Page of ms. P: _ Page of ms. L: 440R უფალი არს, რომელი შეახებს ქუეყანასა და შესძრავს მას, და იგლოვდენ ყოველნი მკუიდრნი მისნი; და აღვიდეს ვითარცა მდინარჱ აღსასრული მისი, და წარმოეცეს, ვითარცა მდინარჱ ეგუიპტისაჲ;
რომელი აღაშენებს ზეცასა აღსავალსა თუისსა და აღთქუმასა მას ქუეყანასა ზედა დააფუძნებს; რომელი მოუწესს წყალთა ზღუისათა და მიჰფინის პირსა Page of ms. L: 440V ქუეყანისასა, _ უფალ ყოვლისამპყრობელ არს სახელი მისი.
Page of ms. L: _ Page of ms. P: 256v მას დღესა შინა აღვჰმართო საყოფელი დავითისი, დაცვმული, და აღვაშჱნო დარღუეული მისი, აღვჰმართო და აღვაშჱნო იგი ვითარცა დღენი საუკუნენი,
რაჲთა გამოიძიონ ნეშტთა კაცთა უფალი. და ყოველთა თესლთა ზედა, რომელთა წოდებულ არს სახელი ჩემი მათ ზედა, იტყჳს უფალი, რომელმან შექმნა ესე ყოველი საცნაურნი საუკუნითგან.
აჰა, ესერა, დღენი მოვლენან, იტყჳს უფალი, და წარეწიოს ლეწვაჲ სთუელსა, ჭრელოდ[ის] ყურძენი თესლთა თანა, და გამოადინებდენ მთანი სიტკბოებასა, და ყოველნი ბორცუნი მცენარე იყვნენ.
და მოვაქციო ტყუჱ ერისა ჩემისა ისრაჱლისაჲ და აღვაშჱნო ქალაქი მოოჴრებული. და დაეშჱნნენ მას შინა, დაასხან ვენაჴი და სუმიდენ ღჳნოსა; და იქმნან მტილები და ჭამდენ ნაყოფსა მათსა.
და დავჰნერგნე იგინი ქუეყანასა მათსა Page of ms. P: 257r და არღარა მოიფხურნენ იგინი ქუეყანისაგან მათისა, რომელი-იგი მივეც მათ, იტყჳს უფალი ყოვლისა-მპყრობელი.
