Page of ms. P: _ Page of ms. L: 604V ხოლო სიტყჳსა მისთუის წმიდათაჲსა ვითარცა უბრძანე ეკლესიათა გალატიაჲსათა, ეგრეცა თქუენ ჰყვით.
ერთშაბათად-ერთშაბათად კაცად-კაცადი თქუენი იკრებდინ და იუნჯებდინ, უკუეთუ განმარჯუებად რაჲმე იყოს, რაჲთა არა, ოდეს მოვიდე და სიტყუაჲ იყოს მაშინღა.
ხოლო რაჟამს მოვიდე, რომელი-იგი გამოიცადნეთ წიგნებითა, ესენი წარვავლინნე მიღებად მადლისა მის თქუენისა იერუსალჱმად.
უკუეთუ ღირდეს ჩემიცა მისლვაჲ, ჩემ თანა მოვიდენ;
[მოვიდე თქუენ თანა], რაჟამს მაკედონიაჲ განვლო; და მაკედონიაჲთ გამოვიდე.
და თქუენ თანა დავადგრე ანუ და-ცა-ვიზამთრო, Page of ms. L: 605R რაჲთა თქუენ წარმგზავნოთ მე, ვიდრეცა ვიდოდი.
არა მნებავს თქუენი აწ მგზავრ ხილვაჲ; ვესავ რავდენისამე ჟამსა დაყოფასა თქუენ თანა, უფალსა თუ უნდეს.
დავადგრე ეფესოს შინა ვიდრე მარტუირიადმდე.
რამეთუ კარი განმეღო მე დიდი და შემწე, და მჴდომნი მრავალნი არიან.
უკუეთუ მოვიდეს ტიმოთე, იხილეთ, ვითარძი უშიშად იყოს თქუენ თანა, რამეთუ საქმესა უფლისასა იქმს, ვითარცა-ესე მე.
თუ ვინმე შეურაცხ-ყოს იგი, და წარმოგზავნეთ იგი მშუიდობით, რაჲთა მოვიდეს იგი ჩემდა, რამეთუ ველი მას ძმათა თანა.
ხოლო აპოლოისთჳს ძმისა ფრიად ულოცევდი მისთჳს ...
. . . . . მჴნე იყვენით და განძლიერდით.
