Page of ms. P: 289V და ესე უწყით, რამეთუ არა განმართლდების კაცი საქმეთაგან შჯულისათა გარნა სარწმუნოებითა იესუ ქრისტესითა, და ჩუენ იესუ ქრისტჱს მიერ გურწმენა და განვმართლდით სარწმუნოებითა იესუ ქრისტჱსითა და არა საქმეთაგან შჯულისათა; რამეთუ საქმეთაგან შჯულისათა არა განმართლდეს ყოველი ჴორციელი.
უკუეთუ მით ვეძიებთ განმართლებასა ქრისტჱს მიმართ, ვიპოვნეთ ჩუენ ცოდვილ; აწ ქრისტე ცოდვასამე მსახურ იქმნაა? ნუ იყოფინ!
უკუეთუ რომელი-იგი დავარღჳე და კუალად მასვე ვაშჱნებდე, შჯულისა გარდამავალად თავი ჩემი შევჰრაცხო.
რამეთუ მე შჯულისათჳს შჯულითა მოვკუედ, რაჲთა ღმრთისა ვცხონდე. ქრისტჱს თანა ჯუარცუმულ ვარ.
ხოლო ცხოველ არღარა მე ვარ, არამედ ცხოველ არს ჩემ თანა ქრისტე, ხოლო აწ ცხოველ ვარ ჴორცითა, სარწმუნოებითა ცხოველ -- ძისა ღმრთისაჲთა, რომელმან შემიყუარა მე და მისცა თავი თჳსი ჩემთჳს.
არა შეურაცხ-ვჰყოფ მადლსა მას ღმრთისასა.
