Page of ms. P: 352V გლოცავ თქუენ, ძმანო, იცნითმცა, რომელნი-ეგე შურებიან თქუენ შორის და წინამძღუარნი თქუენნი უფლისა მიერ და მასწავლელნი თქუენნი,
უმეტესად შეჰრაცხენით იგინი სიყუარულით საქმისა მათისათჳს; და მშჳდობასა ჰყოფდით მათ თანა.
გლოცავ თქუენ, ძმანო, სწავლიდით უწესოთა მათ, Page of ms. P: 353R ნუგეშინის-სცემდით სულმოკლეთა მათ, თავს-იდებდით უძრულთასა მას, სულგრძელ იყვენით ყოველთა მიმართ.
ეკრძალენით, ნუუკუე ვისმე ბოროტისა წილ ბოროტი მიაგოთ; არამედ მარადის კეთილსა ჰყოფდით ურთიერთას და ყოველთა მიმართ.
მარადის გიხაროდენ.
მოუკლებელად ილოცევდით.
ყოველსა შინა ჰმადლობდით, რამეთუ ესე არს ნებაჲ ღმრთისაჲ ქრისტე იესუჲს მიერ თქუენ ყოველთა მიმართ.
სულსა ნუ შეაწუხებთ.
წინაწარმეტყუელებასა ნუ შეურაცხ-ჰყოფთ.
ყოველივე გამოიცადეთ და უმჯობესი შეიწყნარეთ.
ყოვლისაგან საქმისა ბოროტისა განეშორენით.
ხოლო თავადმან ღმერთმან მშჳდობისამან წმიდა-გყვენინ თქუენ ყოვლითა სრულებითა და ყოვლითა სიცოცხლითა, სულნი თქუენნი და გუამი მოსლვასა უფლისა ჩუენისა იესუ ქრისტჱსსა დაგმარხენინ.
სარწმუნო არს, რომელმან-იგი გიჩინნა თქუენ, და ყოსცა.
ძმანო, ილოცევდით ჩუენთჳსცა.
კითხვაჲ არქუთ ძმათა ყოველთა ამბორის-ყოფითა წმიდითა.
გაფუცებ თქუენ უფალსა, უკითხეთ წიგნი ესე ძმათა ყოველთა.
მადლი უფლისა ჩუენისა იესუ ქრისტეჲსი თქუენ ყოველთა თანა იყავნ. ამენ.
