Page of ms. P: 53R პავლე, მოციქული ნებითა ღმრთისაჲთა, აღთქმისა მისებრ ქრისტჱ იესუჲსა,
ტიმოთჱს, საყუარელსა შვილსა, მადლი, წყალობაჲ მშჳდობაჲ ღმრთისა მიერ მამისა და უფლისა ჩუენისა იესუ ქრისტჱსა.
ვჰმადლობ ღმერთსა, რომელსა-ესე ვჰმსახურებ წმიდითა გონებითა, ვითარ-იგი მოუკლებელად მაქუს შენი ჴსენებაჲ ლოცვათა შინა ჩემთა ღამე და დღე,
მსურის ხილვაჲ შენი, მომეჴსენებიან ცრემლნი ეგე შენნი და სიხარულითა აღვივსები;
მოვიჴსენი, რომელ-ეგე არს შენ თანა შეუორგულებელი სარწმუნოებაჲ, რომელმან დაიმკჳდრა პირველად დედისდედისა შენისა ლუდიაჲს თანა და დედისა შენისა ივნიკჱს თანა: მრწამს, რამეთუ შენ თანაცა.
რომლისათჳს მოგაჴსენებ შენ აღდუღებად მჴურვალედ მადლსა მას ღმრთისასა, რომელ არს შენ თანა დასხმითა მით ჴელითა ჩემთაჲთა.
რამეთუ არა მოგუცა ჩუენ ღმერთმან სული მოშურნეობისაჲ, არამედ ძრიელებისა და სიყუარულისა და სიწმიდისაჲ.
ნუუკუე გრცხუენინ წა\მებაჲ Page of ms. P: 49R იგი უფლისა ჩუენისა იესუ ქრისტჱსი, ნუცაღა მე, კრული ესე მისი, არამედ თანაიჭირვოდე სახარებასა მას ძალითა ღმრთისაჲთა,
რომელმან-იგი მიჴსნნა ჩუენ და მიჩინნა ჩუენ ჩინებითა მით წმიდითა არა საქმეთათჳს, არამედ თჳსითა ნებითა და მადლითა, რომელი მომეცა ჩუენ ქრისტე იესუს მიერ უწინარჱს ჟამთა მათ საუკუნეთა,
რომელი გამოცხადნა აწ გამოჩინებითა მით მაცხოვრისა ჩუენისა იესუ ქრისტჱსითა, რომელმან-იგი განაქარვა სიკუდილი და განანათლა ცხორებაჲ და უხრწნელებაჲ მით,
რომლისათჳს დადგინებულ ვარ მე ქადაგად და მოციქულად და მოძღუარად წარმართთა.
რომლისათჳსცა მევნების, არამედ არა მრცხუენის, რამეთუ ვიცი, რომელი მრწმენა და მრწამს, რამეთუ ძალ-უც ვედრისა მის ჩემისა დამარხვად მერმესა მას დღესა.
Page of ms. P: 246V მოეცინ უფალმან წყალობაჲ ონესიფორეს სახლსა, რამეთუ მრავალგზის განმისუენა მე, და კრულებაჲ ჩემი არა სირცხჳლ უჩნდა;
არამედ მოვიდა ჰრომედ და მწრაფლ მეძიებდა და მპოა.
მოეცინ მას უფალმან პოვნად წყალობაჲ უფლისამიერი მას დღესა შინა; და რაოდენ ეფესოს შინა მსახურა, უმჯობესი შენ უწყი.
