TITUS
Biblia Udica, Versio Nizhensis: Vetus Testamentum
Part No. 29
Previous part

Chapter: 29 

Be͑yinś bakseynaḳ ə͑velbsun
Běyinš bakseynak' ı̌velbsun



(Lev. 8:1-36)
(Lev. 8:1-36)


Verse: 1  Link to rat Aarona saal iz ġarmoġo Bez be͑yinś bakseynaḳ me q̇aydinen ə͑velba. \ Salamat sa araḳ saal ṗä͑ q̇oč exṭa.
   Aarona saal iz ğarmoğo Bez běyinš bakseynak' me q'aydinen ı̌velba. \ Salamat sa arak' saal p'ə̌ q'oç ext'a.

Verse: 2  Link to rat Saal xuri berxeci xarinaxun ä͑yinsuz śum, zeytuni č̣äyini boš śareci ä͑yinsuz yoxa q̇a iz loxol zeytuni č̣äyin lä͑ä͑mdi ä͑yinsuz ḳoḳalxo häzirba.
   Saal xuri berxeśi xarinaxun ə̌yinsuz šum, zeytuni c'əyini boş šareśi ə̌yinsuz yoxa q'a iz loxol zeytuni c'əyin lə̌ə̌mdi ə̌yinsuz k'ok'alxo həzirba.

Verse: 3  Link to rat Šoṭoġo sa zänbili boš laxi araḳaxun q̇a ṗä͑ q̇očaxun sagala eča.
   Şot'oğo sa zənbili boş laxi arak'axun q'a p'ə̌ q'oçaxun sagala eça.

Verse: 4  Link to rat Oša Aarona q̇a iz ġarmoġo ə͑vel čadəri baġala gala eča, šoṭoġo xenen \ oc̣ḳa.
   Oşa Aarona q'a iz ğarmoğo ı̌vel çadıri bağala gala eça, şot'oğo xenen \ os'k'a.

Verse: 5  Link to rat Aarona guraṭa, döšlin oq̇axun bakala paltara, samǯi be͑yinśi döšlüyä, saal suruḳ ǯuya lapesṭa, oša q̇ayinšal iz bə͑yex ġaćṗa.
   Aarona gurat'a, döşlin oq'axun bakala paltara, samci běyinši döşlüyə, saal suruk' cuya lapest'a, oşa q'ayinşal iz bı̌yex ğaç̌p'a.

Verse: 6  Link to rat Šoṭay bel čalmina, čalmin loxolal ə͑velluġi taǯa * osṭaarba.
   Şot'ay bel çalmina, çalmin loxolal ı̌velluği taca * ost'aarba.

Verse: 7  Link to rat Lä͑ä͑msṭeynaḳ bakala č̣äyinä Aaroni bel lapi šoṭo lä͑ä͑mda. *
   Lə̌ə̌mst'eynak' bakala c'əyinə Aaroni bel lapi şot'o lə̌ə̌mda. *

Verse: 8  Link to rat Oša Aaroni ġarmoġo ičoġoy paltara lapesṭa.
   Oşa Aaroni ğarmoğo içoğoy paltara lapest'a.

Verse: 9  Link to rat Aaroni saal šoṭay ġarmoġoy bə͑yex parčinaxun bakala q̇ayinš ġaćṗa, iz ġarmoġoy bel papaq̇ laxa. Hametär, Aarona q̇a iz ġarmoġo be͑yinś laxa. Me be͑yinśluġal šoṭoġoy näsileynaḳ hämišäluġ sa q̇aydaq̇an baki.
   Aaroni saal şot'ay ğarmoğoy bı̌yex parçinaxun bakala q'ayinş ğaç̌p'a, iz ğarmoğoy bel papaq' laxa. Hametər, Aarona q'a iz ğarmoğo běyinš laxa. Me běyinšluğal şot'oğoy nəsileynak' həmişəluğ sa q'aydaq'an baki.

Verse: 10  Link to rat Oša araḳa ə͑vel čadəri be͑ś eča. Barta Aaronen q̇a iz ġarmoġon ičoġoy kulmoġo araḳi belq̇aṭun laxi.
   Oşa arak'a ı̌vel çadıri běš eça. Barta Aaronen q'a iz ğarmoğon içoğoy kulmoğo arak'i belq'at'un laxi.

Verse: 11  Link to rat Araḳa Q̣ONƷ́UĠOY be͑ś, ə͑vel čadəri baġala gala śampa.
   Arak'a Q'ONČUĞOY běš, ı̌vel çadıri bağala gala šampa.

Verse: 12  Link to rat Araḳi ṗiyaxun exṭa, vi ḳäšinen q̇urban ečala gane mu͑q̇o͑ġo lä͑ä͑mda. Mandi ṗiya isä q̇urban ečala gane tume cipa.
   Arak'i p'iyaxun ext'a, vi k'əşinen q'urban eçala gane mǔq'ǒğo lə̌ə̌mda. Mandi p'iya isə q'urban eçala gane tume śipa.

Verse: 13  Link to rat Heyvani bošin č̣äyinä, mä͑yin ǯiyäri loxol bakala č̣äyinä saal ṗä͑ gurdaḳa iz loxol bakala č̣äyinäxun sagala q̇urban ečala gala boḳosṗa.
   Heyvani boşin c'əyinə, mə̌yin ciyəri loxol bakala c'əyinə saal p'ə̌ gurdak'a iz loxol bakala c'əyinəxun sagala q'urban eçala gala bok'osp'a.

Verse: 14  Link to rat Araḳi yeq̇a, ṭola saal gödänxo isä azuḳi čurḳala ganuxun ä͑xil boḳosṗa. Mo be͑yinśxoy günaxxo oc̣kseynaḳ bakala q̇urbane.
   Arak'i yeq'a, t'ola saal gödənxo isə azuk'i çurk'ala ganuxun ə̌xil bok'osp'a. Mo běyinšxoy günaxxo os'kseynak' bakala q'urbane.

Verse: 15  Link to rat Q̣očurxoy sunṭu exṭa, barta Aaronen q̇a iz ġarmoġon ičoġoy kulmoġo ṭe q̇oče belq̇aṭun laxi.
   Q'oçurxoy sunt'u ext'a, barta Aaronen q'a iz ğarmoğon içoğoy kulmoğo t'e q'oçe belq'at'un laxi.

Verse: 16  Link to rat Oša me q̇oča śampa, iz ṗiyal q̇urban ečala gane böroġo čäčädä.
   Oşa me q'oça šampa, iz p'iyal q'urban eçala gane böroğo çəçədə.

Verse: 17  Link to rat Q̣oče yeq̇a ḳac̣ṗa, iz čalata q̇a turmoġo oc̣ḳi bulaxun sagala ḳac̣ṗi tikoġoy ṭo͑ġo͑l laxa.
   Q'oçe yeq'a k'as'p'a, iz çalata q'a turmoğo os'k'i bulaxun sagala k'as'p'i tikoğoy t'ǒğǒl laxa.

Verse: 18  Link to rat Oša q̇oča bitova q̇urban ečala gala boḳosṗa. Mo Q̣ONƷ́UĠOYNAḲ boḳospsuni q̇urbane. Me boḳosṗakala paye adal Šoṭo iräzibala ade. *
   Oşa q'oça bitova q'urban eçala gala bok'osp'a. Mo Q'ONČUĞOYNAK' bok'ospsuni q'urbane. Me bok'osp'akala paye adal Şot'o irəzibala ade. *

Verse: 19  Link to rat Ṭe soġo q̇očal exṭa, barta Aaronen q̇a iz ġarmoġon ičoġoy kulmoġo šoṭay bel laxeq̇aṭun.
   T'e soğo q'oçal ext'a, barta Aaronen q'a iz ğarmoğon içoğoy kulmoğo şot'ay bel laxeq'at'un.

Verse: 20  Link to rat Oša me q̇oča śampi iz ṗiyaxun samal exṭi Aaroni q̇a iz ġarmoġoy yön u͑mo͑ġo, šoṭoġoy yön kiin saal yön turin kala ḳäšinä lada. Oša q̇oče ṗiyaxun q̇urban ečala gane böroġoval čäčädä.
   Oşa me q'oça šampi iz p'iyaxun samal ext'i Aaroni q'a iz ğarmoğoy yön ǔmǒğo, şot'oğoy yön kiin saal yön turin kala k'əşinə lada. Oşa q'oçe p'iyaxun q'urban eçala gane böroğoval çəçədə.

Verse: 21  Link to rat Q̣urban ečala ganu bakala ṗiyaxun q̇a lä͑ä͑msṭeynaḳ bakala č̣äyinäxun exṭi Aaroni saal šoṭay paltarxoy, iz ġarmoġoy saal šoṭoġoy paltarxoy loxol čäčädä. Metär, Aaron saal šoṭay paltarxo, iz ġarmux saal šoṭoġoy paltarxo pak bakale.
   Q'urban eçala ganu bakala p'iyaxun q'a lə̌ə̌mst'eynak' bakala c'əyinəxun ext'i Aaroni saal şot'ay paltarxoy, iz ğarmoğoy saal şot'oğoy paltarxoy loxol çəçədə. Metər, Aaron saal şot'ay paltarxo, iz ğarmux saal şot'oğoy paltarxo pak bakale.

Verse: 22  Link to rat Oša me q̇oče č̣äyinä, ṭumṗaḳa, bošin č̣äyinä, mä͑yin ǯiyäri loxol bakala č̣äyinä, ṗä͑ gurdaḳal iz loxol bakala č̣äyinäxun sagala saal yön buda exṭa. Šoṭaynaḳ ki, mo be͑yinśxo ə͑velbseynaḳ ečala q̇oče.
   Oşa me q'oçe c'əyinə, t'ump'ak'a, boşin c'əyinə, mə̌yin ciyəri loxol bakala c'əyinə, p'ə̌ gurdak'al iz loxol bakala c'əyinəxun sagala saal yön buda ext'a. Şot'aynak' ki, mo běyinšxo ı̌velbseynak' eçala q'oçe.

Verse: 23  Link to rat Q̣ONƷ́UĠOY be͑ś bakala ä͑yinsuz śume zänbili bošṭan sa yoxa, zeytuni č̣äyinen śareci yoxa saal sa ḳoḳal exṭa.
   Q'ONČUĞOY běš bakala ə̌yinsuz šume zənbili boşt'an sa yoxa, zeytuni c'əyinen šareśi yoxa saal sa k'ok'al ext'a.

Verse: 24  Link to rat Moṭoġo bitova Aaroni q̇a iz ġarmoġoy kiyel tada ki, šoṭoġon alabi \ moṭoġoy Q̣ONƷ́UĠOYNAḲ sa pay baksuna aḳesṭeq̇aṭun.
   Mot'oğo bitova Aaroni q'a iz ğarmoğoy kiyel tada ki, şot'oğon alabi \ mot'oğoy Q'ONČUĞOYNAK' sa pay baksuna ak'est'eq'at'un.

Verse: 25  Link to rat Oša moṭoġo ičoġoy kiyexun exṭi q̇urban ečala gala q̇urbanluġi yeq̇axun sagala boḳosṗa. Mo Q̣ONƷ́UĠOYNAḲ boḳospsuni q̇urbane. Me boḳospsuni paye adal Šoṭo iräzibala ade.
   Oşa mot'oğo içoğoy kiyexun ext'i q'urban eçala gala q'urbanluği yeq'axun sagala bok'osp'a. Mo Q'ONČUĞOYNAK' bok'ospsuni q'urbane. Me bok'ospsuni paye adal Şot'o irəzibala ade.

Verse: 26  Link to rat Aarona be͑yinś laxseynaḳ bakala q̇urbanluġi q̇oče döše yeq̇a exṭi Q̣ONƷ́UĠOY be͑ś alabi sa pay baksuna aḳesṭa. Me pay vi bakale.
   Aarona běyinš laxseynak' bakala q'urbanluği q'oçe döşe yeq'a ext'i Q'ONČUĞOY běš alabi sa pay baksuna ak'est'a. Me pay vi bakale.

Verse: 27  Link to rat Aarona q̇a iz ġarmoġo be͑yinś laxseynaḳ ečeri Q̣ONƷ́UĠOY be͑ś alabi q̇urbanluġi q̇oče döše yeq̇e saal buda ə͑vel baksuna bayanba.
   Aarona q'a iz ğarmoğo běyinš laxseynak' eçeri Q'ONČUĞOY běš alabi q'urbanluği q'oçe döşe yeq'e saal buda ı̌vel baksuna bayanba.

Verse: 28  Link to rat Israilluġon ečala q̇urbanxoy me payurxo hämišäluġ Aaroni q̇a iz ġarmoġoynaḳq̇an baki. Moroxal israilluġon ečala serluġi q̇urbanxoxun Q̣ONƷ́UĠOYNAḲ alabaki payurxoq̇an baki.
   İsrailluğon eçala q'urbanxoy me payurxo həmişəluğ Aaroni q'a iz ğarmoğoynak'q'an baki. Moroxal israilluğon eçala serluği q'urbanxoxun Q'ONČUĞOYNAK' alabaki payurxoq'an baki.

Verse: 29  Link to rat Aaroni ə͑vel paltarxo ičuxun oša iz näsiläq̇an mandi ki, šoṭoġoval č̣äyin lä͑ä͑mdi be͑yinśbaṭan me paltarxo lapeq̇aṭun.
   Aaroni ı̌vel paltarxo içuxun oşa iz nəsiləq'an mandi ki, şot'oğoval c'əyin lə̌ə̌mdi běyinšbat'an me paltarxo lapeq'at'un.

Verse: 30  Link to rat Barta šoṭay gala be͑yinśluġa eġala ġaren ə͑vel gala q̇ulluġbseynaḳ ə͑vel čadəra baġaṭan vu͑ġ ġi ṭe paltarxo lapeq̇an.
   Barta şot'ay gala běyinšluğa eğala ğaren ı̌vel gala q'ulluğbseynak' ı̌vel çadıra bağat'an vǔğ ği t'e paltarxo lapeq'an.

Verse: 31  Link to rat Be͑yinś laxseynaḳ bakala q̇urbanluġi q̇oče yeq̇a exṭi sa ə͑vel gala źalda.
   Běyinš laxseynak' bakala q'urbanluği q'oçe yeq'a ext'i sa ı̌vel gala ǰalda.

Verse: 32  Link to rat Aaronen q̇a iz ġarmoġon ṭe q̇oče yeq̇a saal zänbilä bakala śuma ə͑vel čadəri baġala gala käyeq̇aṭun.
   Aaronen q'a iz ğarmoğon t'e q'oçe yeq'a saal zənbilə bakala šuma ı̌vel çadıri bağala gala kəyeq'at'un.

Verse: 33  Link to rat Ičoġo be͑yinś laxseynaḳ bakala, ə͑velbala, ičoġoy günaxxo oc̣ḳala me payurxoxun šoṭoġon ičanq̇aṭun käyi. Q̣eräz amdarxon isä me payurxoxun maq̇an käyi, šoṭaynaḳ ki, me payurxo ə͑vele.
   İçoğo běyinš laxseynak' bakala, ı̌velbala, içoğoy günaxxo os'k'ala me payurxoxun şot'oğon içanq'at'un kəyi. Q'erəz amdarxon isə me payurxoxun maq'an kəyi, şot'aynak' ki, me payurxo ı̌vele.

Verse: 34  Link to rat Ägär be͑yinś laxseynaḳ bakala q̇urbanluġi yeq̇axun q̇a śumaxun savaxṭineynaḳ mandayin, šoṭoġo boḳosṗa, šorox nu ukeġalane, šoṭaynaḳ ki, šorox ə͑vele.
   Əgər běyinš laxseynak' bakala q'urbanluği yeq'axun q'a šumaxun savaxt'ineynak' mandayin, şot'oğo bok'osp'a, şorox nu ukeğalane, şot'aynak' ki, şorox ı̌vele.

Verse: 35  Link to rat Zu va hetärez ämirbesa, haṭetäräl Aarona q̇a iz ġarmoġo ba. Šoṭoġo be͑yinś laxsuni vaxṭ vu͑ġ ġi zaṗḳalane.
   Zu va hetərez əmirbesa, hat'etərəl Aarona q'a iz ğarmoğo ba. Şot'oğo běyinš laxsuni vaxt' vǔğ ği zap'k'alane.

Verse: 36  Link to rat Här ġi šoṭoġoy günaxxo oc̣kseynaḳ sa araḳ q̇urban eča ki, Zu šoṭoġoy günaxxo baġəšlayinšaz. Q̣urban ečala ganuval pakbseynaḳ sa araḳ q̇urban eča, hamal q̇urban ečala ganu č̣äyin lä͑ä͑mda ki, ə͑velq̇an baki.
   Hər ği şot'oğoy günaxxo os'kseynak' sa arak' q'urban eça ki, Zu şot'oğoy günaxxo bağışlayinşaz. Q'urban eçala ganuval pakbseynak' sa arak' q'urban eça, hamal q'urban eçala ganu c'əyin lə̌ə̌mda ki, ı̌velq'an baki.

Verse: 37  Link to rat Hametär, vu͑ġ ġi q̇urban ečala ganu pakbi šoṭo ə͑velba. Oša q̇urban ečala ga än ə͑vel hesabbakale, šoṭo lafṭala här šeyal ə͑vel bakale.
   Hametər, vǔğ ği q'urban eçala ganu pakbi şot'o ı̌velba. Oşa q'urban eçala ga ən ı̌vel hesabbakale, şot'o laft'ala hər şeyal ı̌vel bakale.



Här ġi ečala payurxo
Hər ği eçala payurxo



(Amc̣i oć. 28:1-8Link to udntv)
(Ams'i oç̌. 28:1-8Link to udntv)


Verse: 38  Link to rat Här ġi q̇urban ečala gala sa usenluġ ṗä͑ q̇uzi eča.
   Hər ği q'urban eçala gala sa usenluğ p'ə̌ q'uzi eça.

Verse: 39  Link to rat Q̣uzin sunṭu savaxṭan, ṭe sunṭu isä biyäsin śampa.
   Q'uzin sunt'u savaxt'an, t'e sunt'u isə biyəsin šampa.

Verse: 40  Link to rat Samǯi q̇uzinaxun sagala me šeyurxoval q̇urban ḳinäḳ eča: hine biṗ payaxun sa pay * zeytuni č̣äyinäxun gär efin vic̣ payaxun sa pay * arumi xari saal cipseynaḳ bakala pay ḳinäḳ hine biṗ payaxun sa pay fi.
   Samci q'uzinaxun sagala me şeyurxoval q'urban k'inək' eça: hine bip' payaxun sa pay * zeytuni c'əyinəxun gər efin vis' payaxun sa pay * arumi xari saal śipseynak' bakala pay k'inək' hine bip' payaxun sa pay fi.

Verse: 41  Link to rat Ṭe soġo q̇uzinal savaxṭan ečeri q̇urbanallariḳ taxəli saal \ cipseynaḳ bakala payurxoxun sagala eča. Mo Q̣ONƷ́UĠOYNAḲ boḳospsuni q̇urbane, iz adal Šoṭo iräzibala ade.
   T'e soğo q'uzinal savaxt'an eçeri q'urbanallarik' taxıli saal \ śipseynak' bakala payurxoxun sagala eça. Mo Q'ONČUĞOYNAK' bok'ospsuni q'urbane, iz adal Şot'o irəzibala ade.

Verse: 42-43  Link to rat Me boḳospsuni q̇urbana vaxun oša eġala näsilxonal ə͑vel čadəri baġala gala, Q̣ONƷ́UĠOY be͑ś hämišä ečalaṭun. Hun saal israilluyox Bezi ṭo͑ġo͑l eġaṭanal Zu ṭiya baki vä͑xun exlätṗoz. Me gaal Bezi šäräfen q̇a kala zoren ə͑vel bakale.
   Me bok'ospsuni q'urbana vaxun oşa eğala nəsilxonal ı̌vel çadıri bağala gala, Q'ONČUĞOY běš həmişə eçalat'un. Hun saal israilluyox Bezi t'ǒğǒl eğat'anal Zu t'iya baki və̌xun exlətp'oz. Me gaal Bezi şərəfen q'a kala zoren ı̌vel bakale.

Verse: 44  Link to rat Zu ə͑vel čadəra q̇a q̇urban ečala ganu ə͑vel booz; Aarona q̇a iz ġarmoġoval ə͑vel booz ki, Zaynaḳ be͑yinśluġq̇aṭunbi.
   Zu ı̌vel çadıra q'a q'urban eçala ganu ı̌vel booz; Aarona q'a iz ğarmoğoval ı̌vel booz ki, Zaynak' běyinšluğq'at'unbi.

Verse: 45  Link to rat Zu israilluġoy arane mäsḳän saki šoṭoġoy Buxaʒ́ux bakoz.
   Zu israilluğoy arane məsk'ən saki şot'oğoy Buxačux bakoz.

Verse: 46  Link to rat Šoṭoġonal avabakalṭun ki, ičoġoy arane bakseynaḳ šoṭoġo Misiri oćalaxun č̣evḳi Buxaʒ́ux Q̣ONƷ́UX Zuzu. Zu šoṭoġoy Buxaʒ́ux bakala Q̣ONƷ́UXZU.
   Şot'oğonal avabakalt'un ki, içoğoy arane bakseynak' şot'oğo Misiri oç̌alaxun c'evk'i Buxačux Q'ONČUX Zuzu. Zu şot'oğoy Buxačux bakala Q'ONČUXZU.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.