TITUS
Biblia Udica, Versio Nizhensis: Vetus Testamentum
Part No. 105
Previous part

Chapter: 25 

25-ǯi   ω͑vel mä͑ġ *
25-ci   Ǐvel mə̌ğ *


Davidi ω͑vel mä͑ġ
Davidi Ǐvel mə̌ğ


Verse: 1    Ay Q̣ONƷ́UX, bez üḳäz qaypi Vi be͑śez laxsa zu.
   Ay Q'ONČUX, bez ük'əz qaypi Vi běšez laxsa zu.

Verse: 2    Vaz bać̣an tarasṭa, ay Buxaʒ́ux!
   Vaz bač'an tarast'a, ay Buxačux!
    Za ćomä͑yin ma ba,
    Za ç̌omə̌yin ma ba,
    Düšmänxoy turin oq̇a ćaxćuxeci taysa ma barta!
    Düşmənxoy turin oq'a ç̌axç̌uxeśi taysa ma barta!

Verse: 3    Va bać̣an taradalṭoġoy bać̣an sal sa vädä ḳoc̣tenebakon,
   Va bač'an taradalt'oğoy bač'an sal sa vədə k'os'tenebakon,
    Vaxun nahaq̇ gala ćo taradiyorox isä ćomä͑yinṭun mandon.
    Vaxun nahaq' gala ç̌o taradiyorox isə ç̌omə̌yint'un mandon.

Verse: 4    Ay Q̣ONƷ́UX, za Vi yaq̇en taša,
   Ay Q'ONČUX, za Vi yaq'en taşa,
    Za Vi taġala ǯəġərxo čalxesṭa.
    Za Vi tağala cığırxo çalxest'a.

Verse: 5    Barta Vi düzgünluġi q̇a Vi laxi yaq̇en taysun ḳä baksuna zombakaz.
   Barta Vi düzgünluği q'a Vi laxi yaq'en taysun k'ə baksuna zombakaz.
    Axəri za čarḳesṭala Buxaʒ́ux Hunnu,
    Axıri za çark'est'ala Buxačux Hunnu,
    Vi za kul boxosṭunaz yaq̇be͑ġsa hämišä zu.
    Vi za kul boxost'unaz yaq'běğsa həmişə zu.

Verse: 6    Ay Q̣ONƷ́UX, Vi nu badalbakala čuresuna q̇a üḳ boḳospsuna zaxun kammaba,
   Ay Q'ONČUX, Vi nu badalbakala çuresuna q'a ük' bok'ospsuna zaxun kammaba,
    Me ṗä͑ šeye Vasṭa nu ec̣esuna avazu.
    Me p'ə̌ şeye Vast'a nu es'esuna avazu.

Verse: 7    Bezi ǯäyilluġasṭa äšṗesṭi günaxxo q̇a taxsərxo eyex ma bada,
   Bezi cəyilluğast'a əşp'est'i günaxxo q'a taxsırxo eyex ma bada,
    Vi nu badalbakala čuresuna saal aḳesṭa,
    Vi nu badalbakala çuresuna saal ak'est'a,
    Axəri Hun šaaṭ bakalonu, ay Q̣ONƷ́UX!
    Axıri Hun şaat' bakalonu, ay Q'ONČUX!

Verse: 8    Düzgün bakalo, šaaṭ bakalone Q̣ONƷ́UX,
   Düzgün bakalo, şaat' bakalone Q'ONČUX,
    Günaxkärxo düz yaq̇a laxalone Šo.
    Günaxkərxo düz yaq'a laxalone Şo.

Verse: 9    Izi äyitäxun nu č̣eġalṭoġo yaq̇ aḳesṭalo,
   İzi əyitəxun nu c'eğalt'oğo yaq' ak'est'alo,
    Šoṭoġo Iz laxi yaq̇en taysun ḳä baksuna zombalone Šo.
    Şot'oğo İz laxi yaq'en taysun k'ə baksuna zombalone Şo.

Verse: 10    Ičuxun ġaćeci iräziluġa ämälbalṭoġoxun Izi čuresuna kamtenebon Q̣ONƷ́UĠON
   İçuxun ğaç̌eśi irəziluğa əməlbalt'oğoxun İzi çuresuna kamtenebon Q'ONČUĞON
    Šoṭoġo qə͑ yaq̇a tene efon Šoṭin.
    Şot'oğo qı̌ yaq'a tene efon Şot'in.

Verse: 11    Ay Q̣ONƷ́UX, Vi Šu baksuna aḳesṭa,
   Ay Q'ONČUX, Vi Şu baksuna ak'est'a,
    Bez taxsərxo kalal bakayin, šoṭoġo baġəšlayinša.
    Bez taxsırxo kalal bakayin, şot'oğo bağışlayinşa.

Verse: 12    Q̣ONƷ́UĠON Iču čalxalṭoġo
   Q'ONČUĞON İçu çalxalt'oğo
    Mani yaq̇en taysuna aḳesṭale.
    Mani yaq'en taysuna ak'est'ale.

Verse: 13    Šoṭoġo här šeyi än šaaṭṭu tadale,
   Şot'oğo hər şeyi ən şaat't'u tadale,
    Šoṭoġoxun bakala näsilen miras kofṭi oćala tum sakale.
    Şot'oğoxun bakala nəsilen miras koft'i oç̌ala tum sakale.

Verse: 14    Iču čalxalṭoġone Q̣ONƷ́UĠON Iz mäsläätä tadon,
   İçu çalxalt'oğone Q'ONČUĞON İz məsləətə tadon,
    Šoṭoġone Izi iräziluġa ämälbsun ḳä baksuna aḳesṭon.
    Şot'oğone İzi irəziluğa əməlbsun k'ə baksuna ak'est'on.

Verse: 15    Q̣ONƷ́UĠOZ qä͑ve͑sa hämišä zu,
   Q'ONČUĞOZ qə̌věsa həmişə zu,
    Šone za bafṭi täloġoxun č̣evḳalo.
    Şone za baft'i təloğoxun c'evk'alo.

Verse: 16    Bezi loxol be͑ġa, Vi üḳ boḳospsun ḳä baksuna aḳesṭa,
   Bezi loxol běğa, Vi ük' bok'ospsun k'ə baksuna ak'est'a,
    Axəri bezi šuḳḳal butene, äzyätez aksa zu.
    Axıri bezi şuk'k'al butene, əzyətez aksa zu.

Verse: 17    Bez üḳ buye, q̇ubarezbsa zu,
   Bez ük' buye, q'ubarezbsa zu,
    Za me zülümäxun čarḳesṭa.
    Za me zülüməxun çark'est'a.

Verse: 18    Za čätinluġxoy, därde boš ma efa,
   Za çətinluğxoy, dərde boş ma efa,
    Bezi günaxxo oc̣ḳa taša.
    Bezi günaxxo os'k'a taşa.

Verse: 19    Be͑ġa heq̇ädär düšmänzax bu,
   Běğa heq'ədər düşmənzax bu,
    Za aḳala pul tene bu šoṭoġoy!
    Za ak'ala pul tene bu şot'oğoy!

Verse: 20    Bez elmoġo haq̇sa ma barta, za čarḳesṭa,
   Bez elmoğo haq'sa ma barta, za çark'est'a,
    Axəri Vaz bać̣an taradi,
    Axıri Vaz bač'an taradi,
    Za ćomä͑yin ma ba.
    Za ç̌omə̌yin ma ba.

Verse: 21    Barta bezi tämizluġen q̇a düzgünluġen za q̇orišeq̇an,
   Barta bezi təmizluğen q'a düzgünluğen za q'orişeq'an,
    Vaz güväyinšaksa zu.
    Vaz güvəyinşaksa zu.

Verse: 22    Ay Buxaʒ́ux, č̣evḳa israilluġo bito čätinluġxoxun!
   Ay Buxačux, c'evk'a israilluğo bito çətinluğxoxun!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.