TITUS
Biblia Udica, Versio Nizhensis: Vetus Testamentum
Part No. 129
Previous part

Chapter: 49 

49-ǯi ω͑vel mä͑ġ
49-ci Ǐvel mə̌ğ



Farḳalxoy däsṭin kalaṭaynaḳ. Goraxi ġarmoġoy ω͑vel mä͑ġ.
Fark'alxoy dəst'in kalat'aynak'. Goraxi ğarmoğoy Ǐvel mə̌ğ.


Verse: 1    U͑mu͑xlaxanan bez uḳalṭoġo, ay bito azuḳxo,
   Ǔmǔxlaxanan bez uk'alt'oğo, ay bito azuk'xo,
    Ibakanan, ay me dünyäne yäšäyinšalorox!
    İbakanan, ay me dünyəne yəşəyinşalorox!

Verse: 2    C̣ila bakalṭinal, nu bakalṭinal,
   S'ila bakalt'inal, nu bakalt'inal,
    Käsibenal, varlunenal iz u͑mu͑xxo qaypeq̇an!
    Kəsibenal, varlunenal iz ǔmǔxxo qaypeq'an!

Verse: 3    Müdrik äyitmux uḳoz vä͑x,
   Müdrik əyitmux uk'oz və̌x,
    Bez üḳexun mani fikirxoy č̣ovaksuna vä͑x ṗaṗesṗoz.
    Bez ük'exun mani fikirxoy c'ovaksuna və̌x p'ap'esp'oz.

Verse: 4    Mäsäloġo u͑mu͑xlaxi šoṭoġoy ḳä upsuna q̇amišakoz,
   Məsəloğo ǔmǔxlaxi şot'oğoy k'ə upsuna q'amişakoz,
    Ošal me müdrikluġa ečeri faren ef mä͑xinä laxoz.
    Oşal me müdrikluğa eçeri faren ef mə̌xinə laxoz.

Verse: 5    Ṭar ġinaxun,
   T'ar ğinaxun,
    Bez härrämine bakala pisluġen buy äfčiduġalxoxun häṭaynaḳ q̇ə͑boz?
    Bez hərrəmine bakala pisluğen buy əfçiduğalxoxun hət'aynak' q'ı̌boz?

Verse: 6    Ičoġoy var-dövlätä güväyinšakalṭoġoy,
   İçoğoy var-dövlətə güvəyinşakalt'oğoy,
    Girbiṭoġo bitoṭay piye badi färäxläyinšakalṭoġoy heṭuxun zaṗeġoz?
    Girbit'oğo bitot'ay piye badi fərəxləyinşakalt'oğoy het'uxun zap'eğoz?

Verse: 7    Elmoġo toyen haq̇ala šey tene,
   Elmoğo toyen haq'ala şey tene,
    Buxaʒ́uġoxun tängä tadi exṭes bakala šey tene elmux.
    Buxačuğoxun təngə tadi ext'es bakala şey tene elmux.

Verse: 8    Šoṭo görä ki, tene bu šoṭay toy,
   Şot'o görə ki, tene bu şot'ay toy,
    Insani kiyexun ayeġala šey tene mo.
    İnsani kiyexun ayeğala şey tene mo.

Verse: 9    Šuva hämišäluġ me dünyäne yäšäyinšalo?
   Şuva həmişəluğ me dünyəne yəşəyinşalo?
    Bito ṗuri oćali oq̇ane taysa!
    Bito p'uri oç̌ali oq'ane taysa!

Verse: 10    Bitoṭin aneksa: nä müdrik bakalṭine me dünyäni ṭo͑ġä biq̇i čurpes bake,
   Bitot'in aneksa: nə müdrik bakalt'ine me dünyəni t'ǒğə biq'i çurpes bake,
    Nääl axmaġen q̇a q̇ammazen.
    Nəəl axmağen q'a q'ammazen.
    Bito ṗuri tanesa, ičoġoy girbiyoroxal q̇erṭune mansṭa.
    Bito p'uri tanesa, içoğoy girbiyoroxal q'ert'une manst'a.

Verse: 11    Ičoġoy pul botenešṭa,
   İçoğoy pul boteneşt'a,
    Oćalxoṭun exsṭa ki, ičoġoxun oša eġala näsileynaḳ efalṭun.
    Oç̌alxot'un exst'a ki, içoğoxun oşa eğala nəsileynak' efalt'un.
    Ama mone, gärämzoġo bakala sa ṗaṭar oćale ičoġo mandalo!
    Ama mone, gərəmzoğo bakala sa p'at'ar oç̌ale içoğo mandalo!

Verse: 12    Hetär c̣iye q̇onʒ́ux bakalnu baka,
   Hetər s'iye q'ončux bakalnu baka,
    Ṭe čöle taraḳala heyvanaxun sa färg tene bu insani!
    T'e çöle tarak'ala heyvanaxun sa fərg tene bu insani!
    Bitoṭay axər bisune!
    Bitot'ay axır bisune!

Verse: 13    Mone iču güväyinšakalṭoġoy q̇a šoṭoġollariḳ bakalṭoġoy me dünyäne taġala yaq̇e axər!
   Mone içu güvəyinşakalt'oğoy q'a şot'oğollarik' bakalt'oğoy me dünyəne tağala yaq'e axır!
    Ama maya? Pula q̇ič̣ṗi taġamin moṭo teṭun q̇amišaksa!
    Ama maya? Pula q'ic'p'i tağamin mot'o tet'un q'amişaksa!

Verse: 14    Sürünen iz bula ḳoc̣bi taġala ḳinäḳ taġalṭun šorox ölümäč,
   Sürünen iz bula k'os'bi tağala k'inək' tağalt'un şorox ölüməç,
    Bisun ič šoṭoġoynaḳ yaq̇ aḳesṭala čoban bakale!
    Bisun iç şot'oğoynak' yaq' ak'est'ala çoban bakale!
    P̣uri oćalin oq̇a taġalṭun, baśaybaki äfčibakalṭun ṭiya!
    P'uri oç̌alin oq'a tağalt'un, bašaybaki əfçibakalt'un t'iya!
    Pula qayḳaṭan isä düzgünṭoġoy döör eġale.
    Pula qayk'at'an isə düzgünt'oğoy döör eğale.

Verse: 15    Zaal ṗuri oćalin oq̇a taysa tene barḳal Buxaʒ́uġon.
   Zaal p'uri oç̌alin oq'a taysa tene bark'al Buxačuğon.
    Iz ṭo͑ġo͑l exṭale za Šoṭin!
    İz t'ǒğǒl ext'ale za Şot'in!

Verse: 16    Dövlätlüṭay hiḳḳala tamaxmaba,
   Dövlətlüt'ay hik'k'ala tamaxmaba,
    C̣iye q̇onʒ́ux bakalṭoġoy hörmäti avuzbaksuna aḳi paxəlluġmaba.
    S'iye q'ončux bakalt'oğoy hörməti avuzbaksuna ak'i paxılluğmaba.

Verse: 17    Šoṭo görä ki, hälä šuḳḳalen ičuxun hiḳḳal tašeri tene me dünyänexun,
   Şot'o görə ki, hələ şuk'k'alen içuxun hik'k'al taşeri tene me dünyənexun,
    Nääl c̣iya biq̇i čurḳala šey tene.
    Nəəl s'iya biq'i çurk'ala şey tene.

Verse: 18    Iz pul qay vädine bäxṭäväre hesabbsa iču,
   İz pul qay vədine bəxt'əvəre hesabbsa içu,
    Axəri amdari äšurxo šaaṭ taġaṭan bitoṭaynaḳ piin išiġe!
    Axıri amdari əşurxo şaat' tağat'an bitot'aynak' piin işiğe!

Verse: 19    Ama tene ava ki, bito ṗuri taġamine,
   Ama tene ava ki, bito p'uri tağamine,
    Pula q̇ič̣pi ṭe dünyäne, iz bavoġoy ṭo͑ġo͑l taġamin!
    Pula q'ic'pi t'e dünyəne, iz bavoğoy t'ǒğǒl tağamin!

Verse: 20    Hetär c̣iye q̇onʒ́ux bakalnu baka,
   Hetər s'iye q'ončux bakalnu baka,
    Müdrikluġ nu bakala insani čöle taraḳala heyvanaxun sa färg tene bu!
    Müdrikluğ nu bakala insani çöle tarak'ala heyvanaxun sa fərg tene bu!
    Bitoṭay axər bisune!
    Bitot'ay axır bisune!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.