TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 199

Chapter: 119

119-ǯi ω͑vel mä͑ġ ^*
119-ci Ǐvel mə̌ğ ^*

Verse: 1    He bäxṭävärṭun Q̣ONƷ́UĠOY laxi ḳanunaxun nu č̣eri
   He bəxt'əvərt'un Q'ONČUĞOY laxi k'anunaxun nu c'eri
    Düzgün yaq̇en taġalorox!
    Düzgün yaq'en tağalorox!

Verse: 2    He bäxṭävärṭun Šoṭo üḳin qä͑ve͑ci,
   He bəxt'əvərt'un Şot'o ük'in qə̌věśi,
    Šoṭay bürüšiṭoġo ämälbalorox!
    Şot'ay bürüşit'oğo əməlbalorox!

Verse: 3    Šuḳḳala pisluġ nu balorox,
   Şuk'k'ala pisluğ nu balorox,
    Šoṭay laxi yaq̇en taġaloroxe šorox.
    Şot'ay laxi yaq'en tağaloroxe şorox.

Verse: 4    Ögüd-näsyät tadiyonu Hun yax,
   �güd-nəsyət tadiyonu Hun yax,
    Šoṭoġo ämälbsuna ämirbiyonu.
    Şot'oğo əməlbsuna əmirbiyonu.

Verse: 5    Ćomä͑yinq̇uz baki zu Vi laxi q̇aydoġon nu taġayiz,
   Ç̌omə̌yinq'uz baki zu Vi laxi q'aydoğon nu tağayiz,

Verse: 6    Vi bürüšiṭoġo ämälbsunene bez ćoya mac̣ibsa.
   Vi bürüşit'oğo əməlbsunene bez ç̌oya mas'ibsa.

Verse: 7    Tämiz üḳen Vi c̣iya alaboz zu
   Təmiz ük'en Vi s'iya alaboz zu
    Vi düzgün q̇ärarxo aḳaṭan.
    Vi düzgün q'ərarxo ak'at'an.

Verse: 8    Vi laxi q̇aydoġon taġoz zu,
   Vi laxi q'aydoğon tağoz zu,
    Vi ćoya zaxun ma tarada sal sa vädine Hun.
    Vi ç̌oya zaxun ma tarada sal sa vədine Hun.

Verse: 9    Ǯäyili düz yaq̇a baksuna heṭine aḳesṭa?
   Cəyili düz yaq'a baksuna het'ine ak'est'a?
    Šoṭay Vi äyitäxun nu č̣eysunen!
    Şot'ay Vi əyitəxun nu c'eysunen!

Verse: 10    Üḳenez qä͑ve͑sa Va zu,
   Ük'enez qə̌věsa Va zu,
    Barta Vi laxi yaq̇en taci
    Barta Vi laxi yaq'en taśi
    Vi buyruġxo ämälbes bakaz zu.
    Vi buyruğxo əməlbes bakaz zu.

Verse: 11    Vi piyes günax bakala äš nu biq̇seynaḳ
   Vi piyes günax bakala əş nu biq'seynak'
    Vi piṭoġoynaḳ bez üḳe gaz bi zu.
    Vi pit'oğoynak' bez ük'e gaz bi zu.

Verse: 12    Alxəšq̇an baki Va, ay Q̣ONƷ́UX!
   Alxışq'an baki Va, ay Q'ONČUX!
    Za Vi q̇aydoġon taysuna zomba,
    Za Vi q'aydoğon taysuna zomba,

Verse: 13    Vi źomoxun č̣eri bito q̇ärarxo
   Vi ǰomoxun c'eri bito q'ərarxo
    Soġo-soġo bez muzelez ešṭa zu.
    Soğo-soğo bez muzelez eşt'a zu.

Verse: 14    Kala sa var-dövlätä mu͑qbakala ḳinäḳez mu͑qbaksa zu
   Kala sa var-dövlətə mǔqbakala k'inək'ez mǔqbaksa zu
    Vi bürüšiṭoġo bex ṗaṗesṗaṭan.
    Vi bürüşit'oğo bex p'ap'esp'at'an.

Verse: 15    Vi tadi ögüd-näsyätxoy loxole bez fikir,
   Vi tadi ögüd-nəsyətxoy loxole bez fikir,
    Vi laxi yaq̇ane qä͑ve͑sa bez piin.
    Vi laxi yaq'ane qə̌věsa bez piin.

Verse: 16    Mu͑qluġe ešṭa zaynaḳ Vi laxi q̇aydoġon,
   Mǔqluğe eşt'a zaynak' Vi laxi q'aydoğon,
    Vi piṭoġo eyexun tez č̣evḳon zu.
    Vi pit'oğo eyexun tez c'evk'on zu.

Verse: 17    Vi üḳ boḳospsuni ḳä baksuna aḳesṭa me Vi ḳula,
   Vi ük' bok'ospsuni k'ə baksuna ak'est'a me Vi k'ula,
    Barta yäšäyinši Vi äyitä ämälbes bakaz.
    Barta yəşəyinşi Vi əyitə əməlbes bakaz.

Verse: 18    Qaypa bez pulmoġo,
   Qaypa bez pulmoğo,
    Barta Vi ḳanunen bes bakalṭoġo aḳes bakaz.
    Barta Vi k'anunen bes bakalt'oğo ak'es bakaz.

Verse: 19    Q̣onaġzu zu me dünyäne,
   Q'onağzu zu me dünyəne,
    Ma barta bezi Vi bürüšiṭoġon zombalṭoġo nu aḳi ḳać̣i mansṭuna.
    Ma barta bezi Vi bürüşit'oğon zombalt'oğo nu ak'i k'ač'i manst'una.

Verse: 20    Vi q̇ärarxoxunez fikirbsa zu üše-ġena,
   Vi q'ərarxoxunez fikirbsa zu üşe-ğena,
    Bez üḳäz xebi zu šoṭoġoynaḳ.
    Bez ük'əz xebi zu şot'oğoynak'.

Verse: 21    Ičoġoy galan arcesṭi Hun Vi buyruġxo hiḳḳalbi ičoġoy źomoy tüšen taġalṭoġo,
   İçoğoy galan arśest'i Hun Vi buyruğxo hik'k'albi içoğoy ǰomoy tüşen tağalt'oğo,
    Vi länäti ḳä baksuna aḳiyoroxe šorox.
    Vi lənəti k'ə baksuna ak'iyoroxe şorox.

Verse: 22    Mu͑qmada šoṭoġo,
   Mǔqmada şot'oğo,
    Vi bürüšiṭoġo ämälbalṭu
    Vi bürüşit'oğo əməlbalt'u
    Ćomä͑yin, biyabur baksuni ḳä baksuna aḳesmada.
    Ç̌omə̌yin, biyabur baksuni k'ə baksuna ak'esmada.

Verse: 23    Mone, kalaluġbalxon gireci bez äleyinäl äyitḳayṭun
   Mone, kalaluğbalxon gireśi bez əleyinəl əyitk'ayt'un
    Bez fikir Vi laxi q̇aydoġoy loxole.
    Bez fikir Vi laxi q'aydoğoy loxole.

Verse: 24    Vi bürüšiṭoġone za mu͑qsṭa,
   Vi bürüşit'oğone za mǔqst'a,
    Šoroxe za yaq̇ aḳesṭalo.
    Şoroxe za yaq' ak'est'alo.

Verse: 25    Mone, ṗuri ḳinäḳzu ene zu,
   Mone, p'uri k'inək'zu ene zu,
    Čurpa Vi äyiti loxol, za yäšäyinša qayda.
    Çurpa Vi əyiti loxol, za yəşəyinşa qayda.

Verse: 26    Bezi här lä͑ngän avabaki Hun, Va ḳalḳaṭan za inbaki,
   Bezi hər lə̌ngən avabaki Hun, Va k'alk'at'an za inbaki,
    Zomba za Vi laxi q̇aydoġon taysuni ḳä baksuna.
    Zomba za Vi laxi q'aydoğon taysuni k'ə baksuna.

Verse: 27    Vi ögüd-näsyätxon tades bakalṭoġo zomba za,
   Vi ögüd-nəsyətxon tades bakalt'oğo zomba za,
    Barta Vi biq̇i äšurxoy heq̇ädär kala äšur baksuna q̇amišakaz zu.
    Barta Vi biq'i əşurxoy heq'ədər kala əşur baksuna q'amişakaz zu.

Verse: 28    P̣ine o͑nene bez üḳen,
   P'ine ǒnene bez ük'en,
    Üḳ tada za, čurpa Vi äyiti loxol.
    Ük' tada za, çurpa Vi əyiti loxol.

Verse: 29    Ma barta za äfči yaq̇en taysa,
   Ma barta za əfçi yaq'en taysa,
    Vi üḳ boḳospsuni ḳä baksuna aḳesṭa,
    Vi ük' bok'ospsuni k'ə baksuna ak'est'a,
    Vi laxi ḳanunxon taša za.
    Vi laxi k'anunxon taşa za.

Verse: 30    Bez ćoya Vaxun tez taradon zu,
   Bez ç̌oya Vaxun tez taradon zu,
    Vi q̇ärarxonez taysa zu.
    Vi q'ərarxonez taysa zu.

Verse: 31    Vi bürüšiṭoġoz biq̇i čurpe zu, ay Q̣ONƷ́UX,
   Vi bürüşit'oğoz biq'i çurpe zu, ay Q'ONČUX,
    Za ćomä͑yin ma ba.
    Za ç̌omə̌yin ma ba.

Verse: 32    Vi buyruġxon taysune bez čureġalo,
   Vi buyruğxon taysune bez çureğalo,
    Šoṭoġo ämälbsunene za q̇amišaksun tasṭa.
    Şot'oğo əməlbsunene za q'amişaksun tast'a.

Verse: 33    Vi q̇aydoġon taysuni ḳä baksuna aḳesṭa za, ay Q̣ONƷ́UX,
   Vi q'aydoğon taysuni k'ə baksuna ak'est'a za, ay Q'ONČUX,
    Barta hämišä Vi laxi yaq̇en taġaz.
    Barta həmişə Vi laxi yaq'en tağaz.

Verse: 34    Za Vi ḳanunen taysuna zomba ki, zuval šoṭoġo ämälbaz,
   Za Vi k'anunen taysuna zomba ki, zuval şot'oğo əməlbaz,
    Šoṭoġo bez u͑moġo sərəġan baz zu.
    Şot'oğo bez ǔmoğo sırığan baz zu.

Verse: 35    Za Vi buyruġxon aḳesṭala yaq̇en taša,
   Za Vi buyruğxon ak'est'ala yaq'en taşa,
    Šoṭoġoxunez mu͑qbaksa zu.
    Şot'oğoxunez mǔqbaksa zu.

Verse: 36    Barta Vi bürüšiṭoġo ämälbsunq̇an baki bezi üḳexun č̣ovakalo,
   Barta Vi bürüşit'oğo əməlbsunq'an baki bezi ük'exun c'ovakalo,
    Var-dövlät girbsun tää.
    Var-dövlət girbsun təə.

Verse: 37    Amc̣i šeyurxoy bać̣anexun ṭisṭa ma barta za,
   Ams'i şeyurxoy bač'anexun t'ist'a ma barta za,
    Ṭetär ba ki, Vi laxi yaq̇en taysunenq̇an č̣ovaki bezi yäšäyinš.
    T'etər ba ki, Vi laxi yaq'en taysunenq'an c'ovaki bezi yəşəyinş.

Verse: 38    Va bać̣an taradiṭoġo tadi äyiti loxol čurpa,
   Va bač'an taradit'oğo tadi əyiti loxol çurpa,
    Barta mo Vi ḳuleynaḳal q̇əsmat bakeq̇an.
    Barta mo Vi k'uleynak'al q'ısmat bakeq'an.

Verse: 39    Za ćomä͑yin bi bez pula haq̇alṭoġoxun ä͑xilba,
   Za ç̌omə̌yin bi bez pula haq'alt'oğoxun ə̌xilba,
    Vi q̇ärarxoxun šaaṭo butene zaynaḳ.
    Vi q'ərarxoxun şaat'o butene zaynak'.

Verse: 40    Bez ǯiǯirxone ćane Vi ögüd-näsyätxoynaḳ,
   Bez cicirxone ç̌ane Vi ögüd-nəsyətxoynak',
    Aḳesṭa Vi düzgünluġi ḳä baksuna, yäšäyinšesṭa za.
    Ak'est'a Vi düzgünluği k'ə baksuna, yəşəyinşest'a za.

Verse: 41    Aḳesṭa Vi nu badalbakala čuresuni ḳä baksuna, ay Q̣ONƷ́UX,
   Ak'est'a Vi nu badalbakala çuresuni k'ə baksuna, ay Q'ONČUX,
    Vi tadi äyiti loxol čurpi čarḳesṭa za!
    Vi tadi əyiti loxol çurpi çark'est'a za!

Verse: 42    Barta bezi loxol ičoġoy muz č̣eġalṭoġoy ǯoġaba tades bakaz,
   Barta bezi loxol içoğoy muz c'eğalt'oğoy coğaba tades bakaz,
    Axəri Vi tadi äyitäz bać̣an tarasṭa zu.
    Axıri Vi tadi əyitəz bač'an tarast'a zu.

Verse: 43    Barta Vi düzgünluġa aḳesṭala äyitmux bez źomoxun maq̇an biti,
   Barta Vi düzgünluğa ak'est'ala əyitmux bez ǰomoxun maq'an biti,
    Vi q̇ärarxon bes bakalṭoġo avazu zu.
    Vi q'ərarxon bes bakalt'oğo avazu zu.

Verse: 44    Vi laxi ḳanunxoxun sal sa vädä tez č̣eġal zu,
   Vi laxi k'anunxoxun sal sa vədə tez c'eğal zu,
    Šoṭoġo hämišä ämälboz.
    Şot'oğo həmişə əməlboz.

Verse: 45    Tur źena tene lafṭal bezi,
   Tur ǰena tene laft'al bezi,
    Axəri Vi tadi ögüd-näsyätxon laxi yaq̇en taġoz zu.
    Axıri Vi tadi ögüd-nəsyətxon laxi yaq'en tağoz zu.

Verse: 46    Vi bürüšiṭoġoxun exlätṗoz zu padčaġxoynaḳ,
   Vi bürüşit'oğoxun exlətp'oz zu padçağxoynak',
    Bez ćoya mac̣ibale šoṭoġon.
    Bez ç̌oya mas'ibale şot'oğon.

Verse: 47    Vi buyruġxo ämälbsunasṭaz aksa zu bez mu͑qluġa,
   Vi buyruğxo əməlbsunast'az aksa zu bez mǔqluğa,
    Šoṭoġoz čuresa zu.
    Şot'oğoz çuresa zu.

Verse: 48    Bez üḳel basḳi Vi buyruġxo ämälbes bakseynaḳez ḳalpi xoyinśpsa Va,
   Bez ük'el bask'i Vi buyruğxo əməlbes bakseynak'ez k'alpi xoyinšpsa Va,
    Vi laxi q̇aydoġoy loxole bez fikir.
    Vi laxi q'aydoğoy loxole bez fikir.

Verse: 49    Me Vi ḳula tadi äyitä eyexun ma č̣evḳa,
   Me Vi k'ula tadi əyitə eyexun ma c'evk'a,
    Axəri za umud tadiyonu Hun.
    Axıri za umud tadiyonu Hun.

Verse: 50    Vi tadi äyitene za yäšäyinšesṭa,
   Vi tadi əyitene za yəşəyinşest'a,
    Za üḳ tadalone šo bezi tar ġine.
    Za ük' tadalone şo bezi tar ğine.

Verse: 51    Axśumṭunne bez loxol ičoġoxun iräzi bakalṭoġon,
   Axšumt'unne bez loxol içoğoxun irəzi bakalt'oğon,
    Ama tez č̣eysa zu Vi laxi ḳanunxoxun.
    Ama tez c'eysa zu Vi laxi k'anunxoxun.

Verse: 52    Vi hälä damna dööräsṭä č̣evḳi q̇ärarxoxunez fikirbsa zu,
   Vi hələ damna döörəst'ə c'evk'i q'ərarxoxunez fikirbsa zu,
    Šoṭoġone za arxayinbsa, ay Q̣ONƷ́UX.
    Şot'oğone za arxayinbsa, ay Q'ONČUX.

Verse: 53    Vi laxi ḳanunxoxun č̣eriṭoġo
   Vi laxi k'anunxoxun c'erit'oğo
    Aḳala pul tene bu bezi.
    Ak'ala pul tene bu bezi.

Verse: 54    ω͑vel mä͑ġe͑ baki zaynaḳ Vi laxi q̇aydoox,
   Ǐvel mə̌ğě baki zaynak' Vi laxi q'aydoox,
    Šoṭoġoz mä͑ġpi zu bezi q̇onaġ bakala me dünyäne.
    Şot'oğoz mə̌ğpi zu bezi q'onağ bakala me dünyəne.

Verse: 55    Üše bakaṭan Vi c̣iya eyex badi
   Üşe bakat'an Vi s'iya eyex badi
    Vi Šu baksuna lap šaaṭez aksa zu, ay Q̣ONƷ́UX,
    Vi Şu baksuna lap şaat'ez aksa zu, ay Q'ONČUX,
    Vi laxi ḳanunxoxun č̣etezġon zu.
    Vi laxi k'anunxoxun c'etezğon zu.

Verse: 56    Vi tadi ögüd-näsyätxonez yäšäyinšbsa,
   Vi tadi ögüd-nəsyətxonez yəşəyinşbsa,
    Šoṭoġoz č̣äḳṗi zu.
    Şot'oğoz c'ək'p'i zu.

Verse: 57    Bez paynu kofṭi, bez ḳodoġo cameci neymätnu Hun, ay Q̣ONƷ́UX,
   Bez paynu koft'i, bez k'odoğo śameśi neymətnu Hun, ay Q'ONČUX,
    Vi piṭoġoxun nu č̣eysunaz äyit tade zu.
    Vi pit'oğoxun nu c'eysunaz əyit tade zu.

Verse: 58    Va ḳalpi xoyinśpsune bez üḳexun č̣ovakalo:
   Va k'alpi xoyinšpsune bez ük'exun c'ovakalo:
    Vi tadi äyiti ḳä baksuna aḳesṭa,
    Vi tadi əyiti k'ə baksuna ak'est'a,
    Vi üḳ boḳospsuna kammaba zaxun.
    Vi ük' bok'ospsuna kammaba zaxun.

Verse: 59    Bezi taġala yaq̇az fikir tadi zu,
   Bezi tağala yaq'az fikir tadi zu,
    Vi bürüšiṭoġon taci Vi piyes šaaṭ aḳeġala yaq̇az č̣äḳṗi.
    Vi bürüşit'oğon taśi Vi piyes şaat' ak'eğala yaq'az c'ək'p'i.

Verse: 60    Vi buyruġxo ämälbseynaḳez kape zu,
   Vi buyruğxo əməlbseynak'ez kape zu,
    Moṭoġo bseynaḳ vaxṭ tez aćesbsa.
    Mot'oğo bseynak' vaxt' tez aç̌esbsa.

Verse: 61    Pisṭoġon zaynaḳ laxi täloġo bafaldayiz,
   Pist'oğon zaynak' laxi təloğo bafaldayiz,
    Vi laxi ḳanunxoxun tez č̣eri zu.
    Vi laxi k'anunxoxun tez c'eri zu.

Verse: 62    Lap üšeyal hayzeri Vaz šükürbsa,
   Lap üşeyal hayzeri Vaz şükürbsa,
    Vi düzgünluġi ḳä baksuna aḳesṭala q̇ärarxoynaḳez šükürbsa.
    Vi düzgünluği k'ə baksuna ak'est'ala q'ərarxoynak'ez şükürbsa.

Verse: 63    Va čalxalṭoġoxun,
   Va çalxalt'oğoxun,
    Vi tadi ögüd-näsyätxon taġalṭoġoxunez arci-haysṭa zu.
    Vi tadi ögüd-nəsyətxon tağalt'oğoxunez arśi-hayst'a zu.

Verse: 64    Vi nu badalbakala čuresunen buye me dünyä, ay Q̣ONƷ́UX,
   Vi nu badalbakala çuresunen buye me dünyə, ay Q'ONČUX,
    Zomba za Vi laxi q̇aydoġon taysuna.
    Zomba za Vi laxi q'aydoğon taysuna.

Verse: 65    Vi tadi äyiti loxol čurpi
   Vi tadi əyiti loxol çurpi
    Šaaṭluġen bi Hun me Vi ḳuleynaḳ, ay Q̣ONƷ́UX.
    Şaat'luğen bi Hun me Vi k'uleynak', ay Q'ONČUX.

Verse: 66    Här šeya q̇amišaksuni q̇a ä͑xilaksuni ḳä baksuna zomba za,
   Hər şeya q'amişaksuni q'a ə̌xilaksuni k'ə baksuna zomba za,
    Vi laxi buyruġxon bes bakalṭoġo avazu zu.
    Vi laxi buyruğxon bes bakalt'oğo avazu zu.

Verse: 67    Vi laxi yaq̇axun č̣erezuy zu,
   Vi laxi yaq'axun c'erezuy zu,
    Ama Hun aḳesendi moṭay ǯazin ḳä baksuna,
    Ama Hun ak'esendi mot'ay cazin k'ə baksuna,
    Isä mone, ämälezbsa Vi äyitä zu.
    İsə mone, əməlezbsa Vi əyitə zu.

Verse: 68    Hun šaaṭ bakalonu, Vi biq̇ala äšural šaaṭe,
   Hun şaat' bakalonu, Vi biq'ala əşural şaat'e,
    Zomba za Vi laxi q̇aydoġon taysuna.
    Zomba za Vi laxi q'aydoğon taysuna.

Verse: 69    Ičoġoxun iräziṭoġon bezi c̣iyaṭun läkäläyinšbsa,
   İçoğoxun irəzit'oğon bezi s'iyat'un ləkələyinşbsa,
    Ama zu Vi tadi ögüd-näsyätxo bez u͑mu͑ġo sərəġanez be.
    Ama zu Vi tadi ögüd-nəsyətxo bez ǔmǔğo sırığanez be.

Verse: 70    Hiḳḳal ṭä͑q̇tenesa šoṭoġo, źe͑ biq̇ene ičoġoy üḳen,
   Hik'k'al t'ə̌q'tenesa şot'oğo, ǰě biq'ene içoğoy ük'en,
    Ama zu Vi ḳanunxo ämälbsunasṭaz aksa bez mu͑qluġa.
    Ama zu Vi k'anunxo əməlbsunast'az aksa bez mǔqluğa.

Verse: 71    Šaaṭe ki, za Vi ǯazin ḳä baksuna aḳesendi,
   Şaat'e ki, za Vi cazin k'ə baksuna ak'esendi,
    Vi laxi q̇aydoġon taysunaz zombaki zu.
    Vi laxi q'aydoğon taysunaz zombaki zu.

Verse: 72    Sahäkät q̇əzəlaxun q̇a gümüšäxunsa,
   Sahəkət q'ızılaxun q'a gümüşəxunsa,
    Vi źomoxun č̣eġala ḳanun šaaṭe zaynaḳ.
    Vi ǰomoxun c'eğala k'anun şaat'e zaynak'.

Verse: 73    Za Vi kiinen düzbi yaratmiši Hun,
   Za Vi kiinen düzbi yaratmişi Hun,
    Isä q̇amišaksun tada ki, Vi buyruġxoy ḳä baksuna aḳaz.
    İsə q'amişaksun tada ki, Vi buyruğxoy k'ə baksuna ak'az.

Verse: 74    Va čalxalṭoġonal bez loxol be͑ġi mu͑qbakalṭun,
   Va çalxalt'oğonal bez loxol běği mǔqbakalt'un,
    Axəri Vi tadi äyitäz bać̣an taradi zu.
    Axıri Vi tadi əyitəz bač'an taradi zu.

Verse: 75    Ay Q̣ONƷ́UX, avazu ki, düzgün q̇ärarxone Vi q̇ärarxo,
   Ay Q'ONČUX, avazu ki, düzgün q'ərarxone Vi q'ərarxo,
    Za ǯazina haṭetär gala ten zapesṭe Hun.
    Za cazina hat'etər gala ten zapest'e Hun.

Verse: 76    Isä čurpa Vi tadi äyiti loxol,
   İsə çurpa Vi tadi əyiti loxol,
    Barta Vi nu badalbakala čuresuna aḳi arxayin bakeq̇an me Vi ḳul.
    Barta Vi nu badalbakala çuresuna ak'i arxayin bakeq'an me Vi k'ul.

Verse: 77    Kammaba zaxun Vi üḳ boḳospsuna, barta yäšäyinšaz,
   Kammaba zaxun Vi ük' bok'ospsuna, barta yəşəyinşaz,
    Vi ḳanunxo ämälbsunasṭaz aksa bez mu͑qluġa zu.
    Vi k'anunxo əməlbsunast'az aksa bez mǔqluğa zu.

Verse: 78    Ičoġoy za nahaq̇ gala ćomä͑yin č̣evksuna görä
   İçoğoy za nahaq' gala ç̌omə̌yin c'evksuna görə
    Barta ičoġoxun iräziṭoġoy ćoyenq̇an oṭṗi;
    Barta içoğoxun irəzit'oğoy ç̌oyenq'an ot'p'i;
    Bez fikir isä Vi tadi ögüd-näsyätxoy loxol bakale.
    Bez fikir isə Vi tadi ögüd-nəsyətxoy loxol bakale.

Verse: 79    Barta Vi bürüšiṭoġo q̇amišaki Va čalxaloroxq̇an
   Barta Vi bürüşit'oğo q'amişaki Va çalxaloroxq'an
    Bez bel gireci.
    Bez bel gireśi.

Verse: 80    Barta Vi laxi q̇aydoġo hetär lazəme ämälbes bakaz ki,
   Barta Vi laxi q'aydoğo hetər lazıme əməlbes bakaz ki,
    Bezi üḳäl arxayinq̇an baki,
    Bezi ük'əl arxayinq'an baki,
    Ṭe vädä bezi ćoyenal tene oṭṗon.
    T'e vədə bezi ç̌oyenal tene ot'p'on.

Verse: 81    Bezi ǯiǯirxone ćane Vi tades bakala čarḳesuneynaḳ,
   Bezi cicirxone ç̌ane Vi tades bakala çark'esuneynak',
    Ama Vi tadi äyitäxun bezi umuda tez bosṭa zu.
    Ama Vi tadi əyitəxun bezi umuda tez bost'a zu.

Verse: 82    Bezi pulmuxe č̣iraṗeci Vi tadi äyiti bex ṗapsuna yaq̇be͑ġsunaxun,
   Bezi pulmuxe c'irap'eśi Vi tadi əyiti bex p'apsuna yaq'běğsunaxun,
    "Bezi loxol hevaxṭ be͑ġalnu" uḳa čurpezu.
    "Bezi loxol hevaxt' běğalnu" uk'a çurpezu.

Verse: 83    U͑ġu͑l ḳüüni boš biti mešiḳ ḳinäḳzu zu,
   Ǔğǔl k'üüni boş biti meşik' k'inək'zu zu,
    Ama Vi laxi q̇aydoġoxun tez č̣eysa.
    Ama Vi laxi q'aydoğoxun tez c'eysa.

Verse: 84    Heq̇ädär yaq̇be͑ġala bakale hälä me Vi ḳul?
   Heq'ədər yaq'běğala bakale hələ me Vi k'ul?
    Hevaxṭ Vi q̇ärara č̣evḳi bez bać̣anexun bafṭiṭoġoy ǯazina zapesṭalnu?
    Hevaxt' Vi q'ərara c'evk'i bez bač'anexun baft'it'oğoy cazina zapest'alnu?

Verse: 85    Be͑ġa, bezi turin oq̇axunṭun kaśe
   Běğa, bezi turin oq'axunt'un kaše
    Ičoġoxun iräzi baki Vi ḳanunxo hiḳḳal balṭoġon.
    İçoğoxun irəzi baki Vi k'anunxo hik'k'al balt'oğon.

Verse: 86    Taxsər tene bu bezi, ama ṗurumal kul teṭun haq̇sa zaxun,
   Taxsır tene bu bezi, ama p'urumal kul tet'un haq'sa zaxun,
    Čarḳesṭa za šoṭoġoy kiyexun,
    Çark'est'a za şot'oğoy kiyexun,
    Bać̣an tarades bakala buyruġxone Vi buyruġxo.
    Bač'an tarades bakala buyruğxone Vi buyruğxo.

Verse: 87    Male mansṭa ki, za tumexun äfčibaṭun,
   Male manst'a ki, za tumexun əfçibat'un,
    Ama Vi tadi ögüd-näsyätxo eyexun tez č̣evksa zu.
    Ama Vi tadi ögüd-nəsyətxo eyexun tez c'evksa zu.

Verse: 88    Aḳesṭa Vi nu badalbakala čuresuna, barta yäšäyinšaz,
   Ak'est'a Vi nu badalbakala çuresuna, barta yəşəyinşaz,
    Barta Vi muzin bürüšiṭoġo ämälbes bakaz.
    Barta Vi muzin bürüşit'oğo əməlbes bakaz.

Verse: 89    Hämišäluġ č̣ovakala äyite Vi pi äyit, ay Q̣ONƷ́UX,
   Həmişəluğ c'ovakala əyite Vi pi əyit, ay Q'ONČUX,
    Göyurxone šahid bake Vi piṭoġo.
    Göyurxone şahid bake Vi pit'oğo.

Verse: 90    Näsilxoval hari badalbakayin beši bać̣ane čurpiyonu Hun,
   Nəsilxoval hari badalbakayin beşi bač'ane çurpiyonu Hun,
    Ṭetären laxi osṭaarbe ki me oćala, iz ganuxun tene galḳon šo.
    T'etəren laxi ost'aarbe ki me oç̌ala, iz ganuxun tene galk'on şo.

Verse: 91    Vi q̇ärarxone efe bitova ġeyin ġinal ciriḳ,
   Vi q'ərarxone efe bitova ğeyin ğinal śirik',
    Šoṭo görä ki, Vi piṭoġo ämälbseynaḳe här šey.
    Şot'o görə ki, Vi pit'oğo əməlbseynak'e hər şey.

Verse: 92    Vi ḳanunxoxunez mu͑qbaksa zu,
   Vi k'anunxoxunez mǔqbaksa zu,
    Šorox nu bakiyniy, isä ṗurezuy därd zapsaxun.
    Şorox nu bakiyniy, isə p'urezuy dərd zapsaxun.

Verse: 93    Vi tadi ögüd-näsyätxo sal sa vädä eyexun tez č̣evḳon zu,
   Vi tadi ögüd-nəsyətxo sal sa vədə eyexun tez c'evk'on zu,
    Bezi šoṭoġo ämälbsunene yäšäyinšesṭa za.
    Bezi şot'oğo əməlbsunene yəşəyinşest'a za.

Verse: 94    Čarḳesṭa za, axəri zu Vizu,
   Çark'est'a za, axıri zu Vizu,
    Vi tadi ögüd-näsyätxon laxi yaq̇en taġoz zu.
    Vi tadi ögüd-nəsyətxon laxi yaq'en tağoz zu.

Verse: 95    Äfčibsunṭun čuresa za pisṭoġon,
   Əfçibsunt'un çuresa za pist'oğon,
    Ama bez fikir Vi bürüšiṭoġoy loxole.
    Ama bez fikir Vi bürüşit'oğoy loxole.

Verse: 96    Tam noxsansuz hiḳḳal butene,
   Tam noxsansuz hik'k'al butene,
    Sayǯä Vi bürüšiyoroxe noxsansuzaxunal noxsansuz bakalo.
    Saycə Vi bürüşiyoroxe noxsansuzaxunal noxsansuz bakalo.

Verse: 97    Gelez čuresa zu Vi ḳanunxo,
   Gelez çuresa zu Vi k'anunxo,
    Šoṭoġoy loxole bez fikir üše-ġena.
    Şot'oğoy loxole bez fikir üşe-ğena.

Verse: 98    Vi buyruġxon za bez düšmänxoxun ä͑xilaḳale bi,
   Vi buyruğxon za bez düşmənxoxun ə̌xilak'ale bi,
    Šoṭoġo sal sa vädä bez piyexun ṭo͑o͑xtezbi zu.
    Şot'oğo sal sa vədə bez piyexun t'ǒǒxtezbi zu.

Verse: 99    Bezi bito määlimxoxun müdrikzu,
   Bezi bito məəlimxoxun müdrikzu,
    Šoṭo görä ki, Vi bürüšiṭoġoy loxole bez fikir.
    Şot'o görə ki, Vi bürüşit'oğoy loxole bez fikir.

Verse: 100    Zu aġsaq̇q̇alxoxun gelez q̇amiš,
   Zu ağsaq'q'alxoxun gelez q'amiş,
    Šoṭo görä ki, Vi tadi ögüd-näsyätxonez taysa.
    Şot'o görə ki, Vi tadi ögüd-nəsyətxonez taysa.

Verse: 101    Za pis yaq̇en tašes bakala här šeyaxun ä͑xilez tarane zu,
   Za pis yaq'en taşes bakala hər şeyaxun ə̌xilez tarane zu,
    Šoṭo görä ki, Vi äyitenez taysun čuresa.
    Şot'o görə ki, Vi əyitenez taysun çuresa.

Verse: 102    Vi q̇ärarxo nu aksuna tez laxsa zu,
   Vi q'ərarxo nu aksuna tez laxsa zu,
    Axəri Hunnu za här šeya zombalo.
    Axıri Hunnu za hər şeya zombalo.

Verse: 103    Muć̣ane zaynaḳ Vi źomoxun č̣eġala här äyit,
   Muč'ane zaynak' Vi ǰomoxun c'eğala hər əyit,
    Uć̣axunal muć̣ane šorox zaynaḳ.
    Uč'axunal muč'ane şorox zaynak'.

Verse: 104    Vi ögüd-näsyätxon za düzä q̇a ḳorina č̣äḳṗes bakala q̇amišaksune tasṭa,
   Vi ögüd-nəsyətxon za düzə q'a k'orina c'ək'p'es bakala q'amişaksune tast'a,
    Šoṭo göräl düz nu bakala yaq̇a nifrätezbsa zu.
    Şot'o görəl düz nu bakala yaq'a nifrətezbsa zu.

Verse: 105    Čiraġ ḳinäḳe Vi äyit bezi här lä͑ngeynaḳ,
   Çirağ k'inək'e Vi əyit bezi hər lə̌ngeynak',
    Išiġe saksa šoṭin bezi taġala yaq̇a.
    İşiğe saksa şot'in bezi tağala yaq'a.

Verse: 106    Elasṗi äyitez tade zu Vi düzgün q̇ärarxo ämälbsuna,
   Elasp'i əyitez tade zu Vi düzgün q'ərarxo əməlbsuna,
    Bezi äyiti loxolal čurḳoz.
    Bezi əyiti loxolal çurk'oz.

Verse: 107    Koruġez aksa zu, ay Q̣ONƷ́UX, yäšäyinšesṭa za,
   Koruğez aksa zu, ay Q'ONČUX, yəşəyinşest'a za,
    Aḳesṭa Vi tadi äyiti loxol čurpsuni ḳä baksuna.
    Ak'est'a Vi tadi əyiti loxol çurpsuni k'ə baksuna.

Verse: 108    Üḳexun eġala äyitmuxe bez äyitmux, ay Q̣ONƷ́UX,
   Ük'exun eğala əyitmuxe bez əyitmux, ay Q'ONČUX,
    Vi upsuna görä tää, üḳexun č̣ovaksuna görä ečala sa q̇urban ḳinäḳ q̇abulba šoṭoġo,
    Vi upsuna görə təə, ük'exun c'ovaksuna görə eçala sa q'urban k'inək' q'abulba şot'oğo,
    Vi q̇ärarxo ämälbsuni ḳä baksunal zomba za.
    Vi q'ərarxo əməlbsuni k'ə baksunal zomba za.

Verse: 109    Bez źomo kaśṗiz tarasṭa bez elmoġo zu Va nu čalxalṭoġoy kiyexun,
   Bez ǰomo kašp'iz tarast'a bez elmoğo zu Va nu çalxalt'oğoy kiyexun,
    Ama ṗurumal Vi ḳanunxo ämälbsunaxun qoštezbaki zu.
    Ama p'urumal Vi k'anunxo əməlbsunaxun qoştezbaki zu.

Verse: 110    Täläṭun laxi zaynaḳ pisṭoġon,
   Tələt'un laxi zaynak' pist'oğon,
    Ama zu Vi tadi ögüd-näsyätxo eyexun tez č̣evḳi.
    Ama zu Vi tadi ögüd-nəsyətxo eyexun tez c'evk'i.

Verse: 111    Piin išiġ bi efoz zu hämišäluġ Vi bürüšiṭoġo,
   Piin işiğ bi efoz zu həmişəluğ Vi bürüşit'oğo,
    Üḳe qayesa bezi šoṭoġo ämälbaṭan.
    Ük'e qayesa bezi şot'oğo əməlbat'an.

Verse: 112    Vi laxi q̇aydoġon taġoz zu hämišä,
   Vi laxi q'aydoğon tağoz zu həmişə,
    Moṭay badalbaksuna imkan tez tadal zu axəral ciriḳ.
    Mot'ay badalbaksuna imkan tez tadal zu axıral śirik'.

Verse: 113    Vi piṭoġo qə͑ üḳen ämälbalṭoġo nifrätezbsa zu,
   Vi pit'oğo qı̌ ük'en əməlbalt'oğo nifrətezbsa zu,
    Vi ḳanuna isä čurezsa.
    Vi k'anuna isə çurezsa.

Verse: 114    Vaz bać̣an tarade zu, za q̇orišalo Hunnu,
   Vaz bač'an tarade zu, za q'orişalo Hunnu,
    Vi tadi äyitäz umudbaksa zu.
    Vi tadi əyitəz umudbaksa zu.

Verse: 115    Ä͑xilbakanan zaxun, ay pis amdarxo,
   Ə̌xilbakanan zaxun, ay pis amdarxo,
    Bartanan bez Buxaʒ́uġoy buyruġxo ämälbes bakaz.
    Bartanan bez Buxačuğoy buyruğxo əməlbes bakaz.

Verse: 116    Osṭaarba bez elmoġo, barta yäšäyinšaz,
   Ost'aarba bez elmoğo, barta yəşəyinşaz,
    Aḳesṭa Vi tadi äyiti loxol čurpsuni ḳä baksuna,
    Ak'est'a Vi tadi əyiti loxol çurpsuni k'ə baksuna,
    Bezi niyätxo bez boš efi za ćomä͑yin ma ba.
    Bezi niyətxo bez boş efi za ç̌omə̌yin ma ba.

Verse: 117    Za kul biq̇a čarḳeces bakaz,
   Za kul biq'a çark'eśes bakaz,
    Vi laxi q̇aydoġoy heq̇ädär šaaṭ baksuna q̇amišakaz.
    Vi laxi q'aydoğoy heq'ədər şaat' baksuna q'amişakaz.

Verse: 118    Vi laxi q̇aydoġoxun ćo taradalṭoġoxun Hunal Vi ćoya taransṭa,
   Vi laxi q'aydoğoxun ç̌o taradalt'oğoxun Hunal Vi ç̌oya taranst'a,
    Amc̣inane taysa šoṭoġoy äšṗesṭala bito bič̣luġxo.
    Ams'inane taysa şot'oğoy əşp'est'ala bito bic'luğxo.

Verse: 119    Exṭi bonsṭa Hun me dünyäne bakala bito pisṭoġo,
   Ext'i bonst'a Hun me dünyəne bakala bito pist'oğo,
    Fine tume arci dördünä bosala ḳinäḳ,
    Fine tume arśi dördünə bosala k'inək',
    Šoṭo göräne Vi bürüšiyorox bez üḳe basḳe.
    Şot'o görəne Vi bürüşiyorox bez ük'e bask'e.

Verse: 120    Bezi sa hiḳḳal baksunaz aksa zu Vi kalaluġi barada fikirbaṭan,
   Bezi sa hik'k'al baksunaz aksa zu Vi kalaluği barada fikirbat'an,
    Vi q̇ärarxoy bes bakalṭoġo beyne ṗaq̇esṭala šey tene.
    Vi q'ərarxoy bes bakalt'oğo beyne p'aq'est'ala şey tene.

Verse: 121    Düzgün q̇ärarxoz č̣evḳe zu, düz äšurez biq̇e,
   Düzgün q'ərarxoz c'evk'e zu, düz əşurez biq'e,
    Za bez düšmänxoy kiyel ma tada.
    Za bez düşmənxoy kiyel ma tada.

Verse: 122    Me Vi ḳuleynaḳ šaaṭ ġimxo eysuna Vi ozane exṭa,
   Me Vi k'uleynak' şaat' ğimxo eysuna Vi ozane ext'a,
    Ma barta ičoġoxun iräziṭoġon za zülüm tadaṭun.
    Ma barta içoğoxun irəzit'oğon za zülüm tadat'un.

Verse: 123    Bezi pulmuxe č̣iraṗeci Vi tades bakala čarḳesuna q̇a
   Bezi pulmuxe c'irap'eśi Vi tades bakala çark'esuna q'a
    Vi tadi haq̇ bakala äyiti bex ṗaṗsuna yaq̇be͑ġsunaxun.
    Vi tadi haq' bakala əyiti bex p'ap'suna yaq'běğsunaxun.

Verse: 124    Aḳesṭa me Vi ḳula Vi nu badalbakala čuresuni ḳä baksuna,
   Ak'est'a me Vi k'ula Vi nu badalbakala çuresuni k'ə baksuna,
    Za Vi laxi q̇aydoġon taysuna zomba.
    Za Vi laxi q'aydoğon taysuna zomba.

Verse: 125    Vi ḳulzu zu, za q̇amišaksun tada,
   Vi k'ulzu zu, za q'amişaksun tada,
    Barta Vi bürüšiṭoġo q̇amišakes bakaz.
    Barta Vi bürüşit'oğo q'amişakes bakaz.

Verse: 126    Hiḳḳalṭunbsa Vi laxi ḳanunxo, ay Q̣ONƷ́UX,
   Hik'k'alt'unbsa Vi laxi k'anunxo, ay Q'ONČUX,
    Moṭay čarina be͑ġa.
    Mot'ay çarina běğa.

Verse: 127    Vi buyruġxo zaynaḳ q̇əzəlaxun,
   Vi buyruğxo zaynak' q'ızılaxun,
    Lap tämiz q̇əzəlaxunal däyärlune.
    Lap təmiz q'ızılaxunal dəyərlune.

Verse: 128    Düz yaq̇ene tašṭa Vi tadi bito ögüd-näsyätxon,
   Düz yaq'ene taşt'a Vi tadi bito ögüd-nəsyətxon,
    Mandi äfčinen buy yaq̇moġo nifrätezbsa zu.
    Mandi əfçinen buy yaq'moğo nifrətezbsa zu.

Verse: 129    Vi bürüšiṭoġon bes bakalṭoġoxun äyitṗi čarḳala šey tene,
   Vi bürüşit'oğon bes bakalt'oğoxun əyitp'i çark'ala şey tene,
    Bez u͑mu͑ġo sərəġanez be zu šoṭoġo.
    Bez ǔmǔğo sırığanez be zu şot'oğo.

Verse: 130    Pulmuxe qayesa Vi piṭoġo ibaki q̇amišakalṭoġoy,
   Pulmuxe qayesa Vi pit'oğo ibaki q'amişakalt'oğoy,
    Müdrik sa määlime bsa Vi äyitmoġon hiḳḳalaxun iz xavar nu bakalṭu.
    Müdrik sa məəlime bsa Vi əyitmoğon hik'k'alaxun iz xavar nu bakalt'u.

Verse: 131    Vi buyruġxo ämälbseynaḳez yäšäyinšbsa zu,
   Vi buyruğxo əməlbseynak'ez yəşəyinşbsa zu,
    Här hä͑vq̇ala näfäsäl koṭaynaḳe bezi!
    Hər hə̌vq'ala nəfəsəl kot'aynak'e bezi!

Verse: 132    Bez loxol be͑ġa, za gorox eki,
   Bez loxol běğa, za gorox eki,
    Axəri Va čureġalṭoġo gorox eġalonu Hun.
    Axıri Va çureğalt'oğo gorox eğalonu Hun.

Verse: 133    Barta Vi äyitq̇an baki za yaq̇ aḳesṭi bezi tura źena lafsṭa nu barḳalo,
   Barta Vi əyitq'an baki za yaq' ak'est'i bezi tura ǰena lafst'a nu bark'alo,
    Barta bezi be͑ś č̣eġala sal sa pisluġen za sakes maq̇an baki.
    Barta bezi běš c'eğala sal sa pisluğen za sakes maq'an baki.

Verse: 134    Za pul tadi išiġ nu tadalṭoġoy kiyexun čarḳesṭa ki,
   Za pul tadi işiğ nu tadalt'oğoy kiyexun çark'est'a ki,
    Vi tadi ögüd-näsyätxo ämälbes bakaz.
    Vi tadi ögüd-nəsyətxo əməlbes bakaz.

Verse: 135    Barta Vi üḳe basḳeq̇an me Vi ḳul,
   Barta Vi ük'e bask'eq'an me Vi k'ul,
    Zomba za Vi q̇aydoġon taysuna.
    Zomba za Vi q'aydoğon taysuna.

Verse: 136    Mone, bez piin neġ tene q̇aribaksa,
   Mone, bez piin neğ tene q'aribaksa,
    Šoṭo görä ki, amdarxon Vi laxi ḳanuna hiḳḳalṭunbsa.
    Şot'o görə ki, amdarxon Vi laxi k'anuna hik'k'alt'unbsa.

Verse: 137    Bitoṭay loxol sa piin be͑ġalonu Hun, ay Q̣ONƷ́UX,
   Bitot'ay loxol sa piin běğalonu Hun, ay Q'ONČUX,
    Düzgüne Vi q̇ärarxo.
    Düzgüne Vi q'ərarxo.

Verse: 138    Vi bürüšiṭoġosṭa äfči butene,
   Vi bürüşit'oğost'a əfçi butene,
    Tam bać̣an tarades bakala buyruġxone šorox.
    Tam bač'an tarades bakala buyruğxone şorox.

Verse: 139    Boḳosṗi cinne za
   Bok'osp'i śinne za
    Bezi düšmänxoy Vi piṭoġo hiḳḳalbsunen.
    Bezi düşmənxoy Vi pit'oğo hik'k'albsunen.

Verse: 140    Xebi girbi q̇əzəl ḳinäḳe Vi äyit,
   Xebi girbi q'ızıl k'inək'e Vi əyit,
    Šoṭo göräne šo me Vi ḳule üḳe basḳe.
    Şot'o görəne şo me Vi k'ule ük'e bask'e.

Verse: 141    Mic̣iḳ amdaral bakayiz, bezi loxol ḳoriyal be͑ġayṭun,
   Mis'ik' amdaral bakayiz, bezi loxol k'oriyal běğayt'un,
    Vi tadi ögüd-näsyätxo ämälbsunaxun kultezhaq̇sa zu.
    Vi tadi ögüd-nəsyətxo əməlbsunaxun kultezhaq'sa zu.

Verse: 142    Vasṭa bakala düzgünluġ hämišä č̣ovakala sa düzgünluġe,
   Vast'a bakala düzgünluğ həmişə c'ovakala sa düzgünluğe,
    Vi ḳanun seri sa ḳanune.
    Vi k'anun seri sa k'anune.

Verse: 143    Bez bel nu hari äš tene bu, därde bošzu zu,
   Bez bel nu hari əş tene bu, dərde boşzu zu,
    Sayǯä Vi buyruġxone za mu͑qṭalo.
    Saycə Vi buyruğxone za mǔqt'alo.

Verse: 144    Düz yaq̇ene tašṭa Vi bürüšiṭoġon hämišä,
   Düz yaq'ene taşt'a Vi bürüşit'oğon həmişə,
    Za šoṭoġo q̇amišakes bakala müdrikluġ tada ki, yäšäyinšes bakaz.
    Za şot'oğo q'amişakes bakala müdrikluğ tada ki, yəşəyinşes bakaz.

Verse: 145    Vane ḳalpi xoyinśpsa bezi üḳen, ay Q̣ONƷ́UX, za ibaka,
   Vane k'alpi xoyinšpsa bezi ük'en, ay Q'ONČUX, za ibaka,
    Vi laxi bito q̇aydoġo ämälboz zu.
    Vi laxi bito q'aydoğo əməlboz zu.

Verse: 146    Vaz ḳale, čarḳesṭa za,
   Vaz k'ale, çark'est'a za,
    Zuval Vi bürüšiṭoġo bex ṗaṗesṗoz.
    Zuval Vi bürüşit'oğo bex p'ap'esp'oz.

Verse: 147    Išiġ bitamin hayzeri Vaz ḳalpi xoyinśpsa,
   İşiğ bitamin hayzeri Vaz k'alpi xoyinšpsa,
    Vi tadi äyitäz umud zu.
    Vi tadi əyitəz umud zu.

Verse: 148    Käybakamin bez pula tez q̇ič̣e,
   Kəybakamin bez pula tez q'ic'e,
    Vi tadi äyiti loxole bez fikir.
    Vi tadi əyiti loxole bez fikir.

Verse: 149    Aḳesṭa Vi nu badalbakala čuresuni ḳä baksuna, ay Q̣ONƷ́UX, za ibaka,
   Ak'est'a Vi nu badalbakala çuresuni k'ə baksuna, ay Q'ONČUX, za ibaka,
    Vi düzgün q̇ärarxoy bes bakalṭoġo aḳesṭi za yäšäyinšesṭa.
    Vi düzgün q'ərarxoy bes bakalt'oğo ak'est'i za yəşəyinşest'a.

Verse: 150    Mone, pis äšurxoy bać̣anexun taġalorox hari ṗaṗeṭun za,
   Mone, pis əşurxoy bač'anexun tağalorox hari p'ap'et'un za,
    Vi ḳanunxoxun ä͑xil bakaloroxe šorox.
    Vi k'anunxoxun ə̌xil bakaloroxe şorox.

Verse: 151    Ama Hun bez ṭo͑ġo͑lnu, ay Q̣ONƷ́UX,
   Ama Hun bez t'ǒğǒlnu, ay Q'ONČUX,
    Vi buyruġxoval bito serine.
    Vi buyruğxoval bito serine.

Verse: 152    Gele vaxṭaxunez ava zu Vi bürüšiṭoġoy hämišäluġ baksuna.
   Gele vaxt'axunez ava zu Vi bürüşit'oğoy həmişəluğ baksuna.

Verse: 153    Be͑ġa hetär äzyätez zaṗe zu, čarḳesṭa za,
   Běğa hetər əzyətez zap'e zu, çark'est'a za,
    Axəri Vi laxi ḳanunxo nu eyexun č̣evḳi ämälbalozu zu.
    Axıri Vi laxi k'anunxo nu eyexun c'evk'i əməlbalozu zu.

Verse: 154    Bez äšlä Hun be͑ġi čarḳesṭa za,
   Bez əşlə Hun běği çark'est'a za,
    Vi tadi äyiti loxol čurpi za yäšäyinšesṭa.
    Vi tadi əyiti loxol çurpi za yəşəyinşest'a.

Verse: 155    Teṭun aḳal Vaxun eġala čarḳesuna pisṭoġon,
   Tet'un ak'al Vaxun eğala çark'esuna pist'oğon,
    Vi laxi q̇aydoġon teṭun taysa šorox.
    Vi laxi q'aydoğon tet'un taysa şorox.

Verse: 156    Čarḳala šey tene Vasṭa bakala üḳ boḳospsun, ay Q̣ONƷ́UX,
   Çark'ala şey tene Vast'a bakala ük' bok'ospsun, ay Q'ONČUX,
    Aḳesṭa Vi düzgün q̇ärarxoy bes bakalṭoġo, yäšäyinšesṭa za.
    Ak'est'a Vi düzgün q'ərarxoy bes bakalt'oğo, yəşəyinşest'a za.

Verse: 157    Gelene bezi bać̣anexun bafṭi zaynaḳ düšmänčiluġ balorox,
   Gelene bezi bač'anexun baft'i zaynak' düşmənçiluğ balorox,
    Ama Vi bürüšiṭoġoxun č̣etezsa zu.
    Ama Vi bürüşit'oğoxun c'etezsa zu.

Verse: 158    Vaxun ćo taradiṭoġo aḳala pul tene bu bezi,
   Vaxun ç̌o taradit'oğo ak'ala pul tene bu bezi,
    Vi äyitä hiḳḳal biyoroxe šorox.
    Vi əyitə hik'k'al biyoroxe şorox.

Verse: 159    Be͑ġa heq̇ädärez čuresa zu Vi ögüd-näsyätxo, ay Q̣ONƷ́UX,
   Běğa heq'ədərez çuresa zu Vi ögüd-nəsyətxo, ay Q'ONČUX,
    Aḳesṭa Vi nu badalbakala čuresuni ḳä baksuna, yäšäyinšesṭa za.
    Ak'est'a Vi nu badalbakala çuresuni k'ə baksuna, yəşəyinşest'a za.

Verse: 160    Serine Vi źomoxun č̣eri äyitmoġoy bito,
   Serine Vi ǰomoxun c'eri əyitmoğoy bito,
    Düzgün, hämišäluġ bakala q̇ärarxone Vi q̇ärarxo.
    Düzgün, həmişəluğ bakala q'ərarxone Vi q'ərarxo.

Verse: 161    Za pul tadi išiġ teṭun tasṭa kalaluġbalxon,
   Za pul tadi işiğ tet'un tast'a kalaluğbalxon,
    Hiḳḳali loxolṭun bezi bać̣anexun bafṭe šorox,
    Hik'k'ali loxolt'un bezi bač'anexun baft'e şorox,
    Ama sayǯä Vi źomoxun č̣eriṭoġoy bes bakalṭoġone bezi pula haq̇es bakon.
    Ama saycə Vi ǰomoxun c'erit'oğoy bes bakalt'oğone bezi pula haq'es bakon.

Verse: 162    Hetär ki, sa put q̇əzəl bä͑ġä͑bi amdare mu͑qbaksa,
   Hetər ki, sa put q'ızıl bə̌ğə̌bi amdare mǔqbaksa,
    Haṭetäre mu͑qsṭa za Vi äyitmoġon.
    Hat'etəre mǔqst'a za Vi əyitmoğon.

Verse: 163    Nifrätezbsa zu äfčinä, iriṭezne šoṭoxun,
   Nifrətezbsa zu əfçinə, irit'ezne şot'oxun,
    Vi ḳanunxone bezi čureġalo.
    Vi k'anunxone bezi çureğalo.

Verse: 164    Ġine vu͑ġ käräm Vi c̣iyaz alabsa zu Vi düzgün q̇ärarxo görä.
   Ğine vǔğ kərəm Vi s'iyaz alabsa zu Vi düzgün q'ərarxo görə.

Verse: 165    Šaaṭ ġiṭun aksa Vi ḳanunen taġalṭoġon,
   Şaat' ğit'un aksa Vi k'anunen tağalt'oğon,
    Tur źe͑na tene lafṭon šoṭoġoy.
    Tur ǰěna tene laft'on şot'oğoy.

Verse: 166    Vi za čarḳesṭunane bezi umud, ay Q̣ONƷ́UX,
   Vi za çark'est'unane bezi umud, ay Q'ONČUX,
    Vi bito buyruġxo ämälezbsa zu.
    Vi bito buyruğxo əməlezbsa zu.

Verse: 167    Sərəġanez bi zu bez u͑mo͑ġo͑ Vi bürüšiṭoġo,
   Sırığanez bi zu bez ǔmǒğǒ Vi bürüşit'oğo,
    Bezi üḳene basḳe šorox bito.
    Bezi ük'ene bask'e şorox bito.

Verse: 168    Vi tadi ögüd-näsyätxonez taysa zu,
   Vi tadi ögüd-nəsyətxonez taysa zu,
    Vi bürüšiṭoġo bitova ämälezbsa,
    Vi bürüşit'oğo bitova əməlezbsa,
    Anksa Hun bezi mani yaq̇en taysuna.
    Anksa Hun bezi mani yaq'en taysuna.

Verse: 169    Ibaka bezi Va ḳalpi xoyinśpsuna, ay Q̣ONƷ́UX,
   İbaka bezi Va k'alpi xoyinšpsuna, ay Q'ONČUX,
    Čurpa Vi tadi äyiti loxol, za q̇amišaksun tada.
    Çurpa Vi tadi əyiti loxol, za q'amişaksun tada.

Verse: 170    Barta Vi u͑mu͑ġo ṗaṗeq̇an bezi xoyinśi säs,
   Barta Vi ǔmǔğo p'ap'eq'an bezi xoyinši səs,
    Čurpa Vi tadi äyiti loxol, čarḳesṭa za.
    Çurpa Vi tadi əyiti loxol, çark'est'a za.

Verse: 171    Tärif barale bez źomoxun Vaynaḳ,
   Tərif barale bez ǰomoxun Vaynak',
    Vi laxi q̇aydoġo za zombalonu Hun.
    Vi laxi q'aydoğo za zombalonu Hun.

Verse: 172    Vi äyitmoġo bez muzel ečeri mä͑ġḳoz zu,
   Vi əyitmoğo bez muzel eçeri mə̌ğk'oz zu,
    Düzgünluġi ḳä baksuna aḳesṭala buyruġxone Vi buyruġxo.
    Düzgünluği k'ə baksuna ak'est'ala buyruğxone Vi buyruğxo.

Verse: 173    Barta Vi kul bez loxolq̇an baki,
   Barta Vi kul bez loxolq'an baki,
    Vi tadi ögüd-näsyätxonez taysa zu.
    Vi tadi ögüd-nəsyətxonez taysa zu.

Verse: 174    Ǯiǯirxone ćane bezi Vi tades bakala čarḳesuneynaḳ, ay Q̣ONƷ́UX,
   Cicirxone ç̌ane bezi Vi tades bakala çark'esuneynak', ay Q'ONČUX,
    Vi ḳanunxo ämälbsunasṭaz aksa bez mu͑qluġa zu.
    Vi k'anunxo əməlbsunast'az aksa bez mǔqluğa zu.

Verse: 175    Efa za, barta dirisṭ mandi Vi c̣iya alabes bakaz,
   Efa za, barta dirist' mandi Vi s'iya alabes bakaz,
    Barta Vi düzgün q̇ärarxonq̇an za yaq̇ aḳesṭi.
    Barta Vi düzgün q'ərarxonq'an za yaq' ak'est'i.

Verse: 176    Sürünäxun täkläyinšaki, iz yaq̇a aćesṗi eġel ḳinäḳzu zu,
   Sürünəxun təkləyinşaki, iz yaq'a aç̌esp'i eğel k'inək'zu zu,
    Bä͑ġä͑ba me Vi ḳula, Vi buyruġxo eyexun tene č̣evḳe šoṭin.
    Bə̌ğə̌ba me Vi k'ula, Vi buyruğxo eyexun tene c'evk'e şot'in.

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 18.11.2023. No parts of this document may be republished in any form without prior permission by the copyright holder.