TITUS
Buhez Sant Gwenole
Part No. 46
Previous part

Strophe: 46  
Vingaloeus loquitur.


Verse line: 598        Tut amguyn obstinet, dallet dre ho pechet ouch,
Verse line: 599     Dre bezout foll em collet, ma noz em sellet, damnet ouch
Verse line: 600     Guyr caus emauset da monet ezydoch
Verse line: 601     En glachar dan parfont dydan an mor hont blouch.
Verse line: 602        Ne guelaf plen guenech nemet lech da pechet,
Verse line: 603     Tut foll en corollou ha danzceou dezrouet,
Verse line: 604     Gayllart dan galardon O guelaf oz monet.
Verse line: 605        Expres galanteset ha galantet an ker
Verse line: 606     Deoch ez vezo tryst dysonest hoz estoaer
Verse line: 607     Goude joay hac ebat dyvat vezo an cadoaer,
Verse line: 608     O devezo certen evyt goubre me en goaer.
Verse line: 609        Augustin ha Gregoaer a dyscler an doare,
Verse line: 610     Pe dleont da caffout en hyr mont da conta
Verse line: 611     Guell ve guell pyguellat hac arat en stat se,
Verse line: 612     Evyt reyf brut tut foll dyroll en coroll se.
Verse line: 613        Hep dout aznavout Doe bourch ha ploe so dleet,
Verse line: 614     Ha dan merch ha dan mam pe byzout en flam damnet.
Verse line: 615     Moz guel leun tnou ha knech en pep lech a pechet
Verse line: 616     Hoz bet avys presant ma oz em amantet.
Verse line: 617        Guenole sezleuet pa eu duet do mettou,
Verse line: 618     Presant hac amantet queffret ho pechedou,
Verse line: 619     Her oll ez ouch rollet en roet dre ho faetou,
Verse line: 620     Da monet gant souzan hep ehan dan tan glou.
Verse line: 621        Quen paout eou ho faoutou en esamantou bras,
Verse line: 622     En pechedou yffam den a blam noz lamas.
Ms. page: 1390  Verse line: 623     Yve huy en effet ne queffet blas
Verse line: 624     Da aznavout Doe certen Roe an tron o prenas.
Verse line: 625        Map Doe nep o croeas hac o dylyffras glan
Verse line: 626     En hoz sounge nen dougyet, nen goullet en bet man
Verse line: 627     Troet eu hoz holl stat ouz an dyvat Satan
Verse line: 628     Hoz pechet so commun tout ezydouch un van.
Verse line: 629        Duet quentel dre goelvan buan hep ehanaf
Verse line: 630     Da aznavout hoz Doe yve ha de avoeaf
Verse line: 631     An drouc roll ouz follez poble queaz quent ho poaezaf
Verse line: 632     Prest ha prest evyt test en oz amonetaf.
Verse line: 633        Douguen teñ pynygeñ scaf ha goelaf gant caffou
Verse line: 634     Dyrac Doe a dleet goelet meurbet do pechedou,
Verse line: 635     Hac a het an syzun dre commun yunyou
Verse line: 636     Evyt caffout pardon ha remyssyonou.
Verse line: 637        Leset strouill ourgouyllou ha ho pechedou bras,
Verse line: 638     Pan ouf duet da sarmon eval maz aez Ionas,
Verse line: 639     Dan cyte a nynyva ha hy pan arryvas,
Verse line: 640     Roe duc ha buguel oll y o nem rentas.
Verse line: 641        Ionas eff a leffas, han Roe pan clevas se,
Verse line: 642     A gueuru yunou bras, hac a ordrenas da se
Verse line: 643     Teuleur mentell real, hac ef he bugale,
Verse line: 644     Guyscaf dyllat syher gant esper a caret Doe.
Verse line: 645        Chatal mut a yunas try dez en cas astut,
Verse line: 646     Hac yvez tut cumun, ha bugale munut.
Verse line: 647     Maz clevas Roe an bet man oresonou an tut,
Verse line: 648     Ha Doe o pardonas en cas dre bout astut.
Verse line: 649        Duet onest ha lest brut, ha hoz hem reputet,
Verse line: 650     Pan guelet en pep lech tnou a knech ho pechet:
Verse line: 651     Her gouezet en Ys, ha hoz em avyset,
Verse line: 652     Ez eu duet a certen ho termen, ma nen groet.



Next part


This text is part of the TITUS edition of Buhez Sant Gwenole.

Copyright TITUS Project, Frankfurt a/M, 16.9.2012. No parts of this document may be republished in any form without prior permission by the copyright holder.