TITUS
Lamprecht, Alexander (Strassburger Bearbeitung)
Part No. 2
Previous part

Chapter: 4  
Über Alexander


Verse: 37       Iz quît: rîchere kuninge was genûch:
Verse: 38    daz ne sagit uns aber nehein bûch

Verse: 39    noh neheiner slahte mêre,
Verse: 40    daz ie dichein sô rîche wêre,

Verse: 41    der in alten gezîten
Verse: 42    mit sturmen oder mit strîten

Verse: 43    ie sô manige lant gewunne
Verse: 44    oder sô manigen kuninc bedwunge

Verse: 45    oder sô vil herzogen irslûge
Verse: 46    unde andire fursten genûge,

Verse: 47    sô der wunderlîche Alexander.
Verse: 48    ime ne gelîchet nehein ander.

Verse: 49       Er was von Kriechen geborn
Verse: 50    und wart dâ ze kuninge irkorn

Verse: 51    und was der allirhêriste man,
Verse: 52    den Kriechen ze kuninge ie gwan.

Verse: 53    ouh wâren kuninge creftich
Verse: 54    hêr unde mehtih

Verse: 55    ubir manige diet gwaldich,
Verse: 56    ir hêrheit manicfaldich;

Verse: 57    michel was ir wîsheit,
Verse: 58    ir list unde ir cundicheit,

Verse: 59    ir scaz was mêre unde grôz:
Verse: 60    ir ne wart aber nie nehein sîn genôz,

Verse: 61    di mit listen oder mit mehten
Verse: 62    irin willen ie sô vollenbrêhten,

Verse: 63    sô aber dirre selbe man,
Verse: 64    umbe den ich diser rede began.

Verse: 65       An eine andere rede wil ih nû vân.
Verse: 66    Salemon der was aleine ûz getân,

Verse: 67    der sih ûzir allen kuningen nam.
Verse: 68    dô regina austri zû ime quam,

Verse: 69    unde si sîne wunder
Verse: 70    alle besunder

Verse: 71    rehte merken began,
Verse: 72    starke si dô undirquam;

Verse: 73    dô sî sîne wîsheit
Verse: 74    und sîne grôze rîcheit,

Verse: 75    sîn fleisch und sîne vische
Verse: 76    und di zîrheit sîmer tische

Verse: 77    unde sîn templum gesach,
Verse: 78    mit rehter wârheit si dô sprach,

Verse: 79    daz von mannis geburte
Verse: 80    frumiger kuninc nie ne wurde.

Verse: 81    man mûstin wol ûz scheiden,
Verse: 82    wande Alexander was ein heiden.

Verse: 83       Noch sprechint manige lugenêre,
Verse: 84    daz er eines gouchelêres sun wêre,

Verse: 85    Alexander, dar ih û von sagen:
Verse: 86    si liegent alse bôse zagen

Verse: 87    alle di is ie gedâhten;
Verse: 88    wande er was rehte kunincslahte.

Verse: 89    sulhe lugenmêre
Verse: 90    sulen sîn ummêre

Verse: 91    iegelîchen frumen man.
Verse: 92    sîn geslehte ih wol gereiten kan.

Verse: 93    sîn geslehte was hêrlîch,
Verse: 94    ubir al Kriechlant gwaldich.

Verse: 95    Philippus hîz der vater sîn,
Verse: 96    al Macedonien was sîn.

Verse: 97    sîn ane der was ein gût kneht,
Verse: 98    ubir daz mere ginc sîn reht.

Verse: 99    er was geheizen Omin.
Verse: 100    wîten ginc der gwalt sîn,

Verse: 101    michil was sîn heriscraft.
Verse: 102    vil manich volcwîch er vaht

Verse: 103    wider den kuninc Xersen:
Verse: 104    gewaldiclîche verwan er den

Verse: 105    unde vil ellenthafte
Verse: 106    mit sîner hercrafte.

Verse: 107       Philippus der nam ein wîb,
Verse: 108    di trûch einen vil hêrlîchen lîb.

Verse: 109    ih sagû, wî ir name was:
Verse: 110    si hîz di scône Olympias.

Verse: 111    diu was Alexandris mûter.
Verse: 112    di frowe hete einen brûder,

Verse: 113    der was ouh Alexander genant,
Verse: 114    ze Persien het er daz lant.

Verse: 115    der was ein furste alsô getân,
Verse: 116    er ne wolde werden undertân

Verse: 117    nie neheineme kuninge;
Verse: 118    daz sagih û âne lugene:

Verse: 119    er ne wolde ouh ze neheinen zîten
Verse: 120    von sturmen noh von strîten

Verse: 121    nie neheine wîs geflîhen,
Verse: 122    swî ime sîne dinc dâ irgîhen.

Verse: 123    er was ein tûrlîcher degen
Verse: 124    und wolde rehter herschefte plegen.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.