TITUS
Lamprecht, Alexander (Vorauer Bearbeitung)
Part No. 24
Previous part

Chapter: 44  
Alexanders erste Schlacht mit den Persern (Granicus)


Verse: 1195       Unde alsô der bote wider chom
Verse: 1196    unt Darios der zweier herzogen rede vernam,

Verse: 1197    sêre zurnet er sich des.
Verse: 1198    dô nam er ainen herzogen, der hiez sich Mennes,

Verse: 1199    unde dar zû zênzic tûsint man,
Verse: 1200    die er alle uber naht gewan,

Verse: 1201    unde sante si Alexander gegen
Verse: 1202    unde hiez den zwein herzogen sagen,

Verse: 1203    liezen sin uberz wazzer varen,
Verse: 1204    ez solt in iemer mêre scaden.

Verse: 1205    si ne gewunnen sîn niemer frumen,
Verse: 1206    noch si ne getorsten niemer fur sîne ougen chomen.

Verse: 1207    er sprach, wurde Alexanders wille gendeth,
Verse: 1208    si wurden alle der mite gescendeth.

Verse: 1209       Die zwêne herzogen getorsten niuht lâzen,
Verse: 1210    al dâ ir man sâzen,

Verse: 1211    si santen al gerihte
Verse: 1212    uber allez ir gerihte;

Verse: 1213    die sie zesamene brâhten,
Verse: 1214    ze zehen tûsint mahti man si ahten

Verse: 1215    unde drîzech tûsint dar zû.
Verse: 1216    Alexander genante sih ouch dô,

Verse: 1217    er hâte einen ubermûten mût.
Verse: 1218    er sciffet sich zeforderest uber die flût.

Verse: 1219    an eime stade chômen si im enkegen,
Verse: 1220    alsus hôrt ich maister Alberîchen sagen.

Verse: 1221    dâ hûb sich ein sturm vil grôz,
Verse: 1222    ein tûsint beleib ime dâ tôt,

Verse: 1223    von chriechiscen chunne,
Verse: 1224    ê Alexander den furt ie gewunne.

Verse: 1225       Dô chom Alexander selbe geriten,
Verse: 1226    alsô ers vil chûme habeti gebiten.

Verse: 1227    ûf Buzival er reit,
Verse: 1228    dô slûg er alsô der thoner deit,

Verse: 1229    for dem sich niemen mach bewarn.
Verse: 1230    swer in fon ferre sach gevaren,

Verse: 1231    ê er hinder sich gesach,
Verse: 1232    sô heter sîn ainen slach,

Verse: 1233    daz er sîn plût allez spê
Verse: 1234    unde lebte ouch dar nâch nieweht mê.

Verse: 1235    sîn schaft was mâre grôz.
Verse: 1236    sweme wart ein slach oder ein stôz,

Verse: 1237    der was des gewissen tôdes
Verse: 1238    unde ern beiz dar nâch niemer brôtes.

Verse: 1239       Mennes was ein herzoge genant,
Verse: 1240    den Darios hete dar gesant,

Verse: 1241    der was ein helt vrumeclîch.
Verse: 1242    ein hundert rîter hâter umbe sich

Verse: 1243    mit swerten vil gûten,
Verse: 1244    die tâten si im ze hûte.

Verse: 1245    zime mahte niemen brechen,
Verse: 1246    wan ders lebenes wolte vergezzin.

Verse: 1247    Alexander want sîn vanen,
Verse: 1248    er begunde sîne helide manen.

Verse: 1249    er sprenget ze Mennes wert
Verse: 1250    unt liez iz niuht durch die scarphen swert,

Verse: 1251    durch alle die sîne er brach.
Verse: 1252    Mennes er durch den schilt stach,

Verse: 1253    daz daz plût begunde rinnen.
Verse: 1254    Mennes stach hine wider durch den sînen,

Verse: 1255    der was feste helfenpein,
Verse: 1256    daz daz plût an dem spere schain.

Verse: 1257    ir iewedere stach den anderen nider.
Verse: 1258    aldâ grifen si zen swerten sider.

Verse: 1259    a wî daz fûr dar ûz spranch,
Verse: 1260    dâ ein stahel wider den ander dranch.

Verse: 1261    grôzer slege wurden nie getân,
Verse: 1262    sie ne slûge wîlen Samson,

Verse: 1263    der die grôzen maht an ime trûch,
Verse: 1264    daz er mit eines eseles bachen ein tûsint liutes erslûch.

Verse: 1265    a wie mahte daz ie werden:
Verse: 1266    Mennes der slûch Alexandern zû der erde.

Verse: 1267    aldâ wart ime der helm abgeprochen.
Verse: 1268    dâ was vil nâch gerochen .

Verse: 1269    Darius der tûre degen
Verse: 1270    der manegen grôzen slege,

Verse: 1271    der der chunich Alexander finch,
Verse: 1272    dô Mennes ime zû giench.

Verse: 1273    unt wâre er alsô wol gewâfent nieht,
Verse: 1274    er ne bescowet niemerz tages lieht,

Verse: 1275    wane daz sînes tôdes noch neweht solte sîn.
Verse: 1276    ein rîter der hiez Daclym,

Verse: 1277    der was mit Alexander dâ
Verse: 1278    unde stunt ime des tages vil nâ.

Verse: 1279    der ander hiez Jubal,
Verse: 1280    der sich vil ungerne in dem sturme hal.

Verse: 1281    der was dar chomen mit teme herzogen
Verse: 1282    unde hiete daz swert erzogen

Verse: 1283    unde wolde Alexander geben ainen slach,
Verse: 1284    dâ er im den hals plôz gesach.

Verse: 1285    Daclym wart der êror:
Verse: 1286    er lôste sînen hêren.

Verse: 1287    er slûch Jubal von oberest sîner zende
Verse: 1288    al nider durch die lende

Verse: 1289    unde machet zwêne halbe man.
Verse: 1290    a wie gût ainen lob daz swert gewan.

Verse: 1291       Daclym den helm gebranc,
Verse: 1292    sînem hêren ern ûf daz houbet pant.

Verse: 1293    sîn houbet was ime erscellet,
Verse: 1294    dâ er der nider wart gevellet.

Verse: 1295    niweht verwielt er sich sîner rede,
Verse: 1296    er was in grôzer unhuge.

Verse: 1297    er warf sich umbe alsô ain helit:
Verse: 1298    'nû werth iuch, hêre chunich',

Verse: 1299    alsus sprach sîn rîter Daclym,
Verse: 1300    'hiute sî iwer ellen schîn.

Verse: 1301    wande ir ein diure kneht sît,
Verse: 1302    nû zîhet swert, des ist zît.'

Verse: 1303       Unde Alexander wart lôs,
Verse: 1304    dô spranc er ûf sîn ros.

Verse: 1305    sîn ougen wâren freislîch;
Verse: 1306    sîne fient erforhten sich.

Verse: 1307    unde alsô er zim selben chom,
Verse: 1308    Buzifal er mit den sporn nam,

Verse: 1309    er tete Daclyme danch
Verse: 1310    unde frumit manegen swertslach.

Verse: 1311    under die menege er reit:
Verse: 1312    alsô der daz kras nider sleit,

Verse: 1313    sô strouwet Alexander;
Verse: 1314    diz ne mohte nehain ander.

Verse: 1315    diu menige diu was mâre grôz,
Verse: 1316    die der hêre slûch unde schôz.

Verse: 1317    alsô vil lag er dâ reslagen,
Verse: 1318    daz iu unzallîch wâre ze sagene,

Verse: 1319    Persen unde Chriechen
Verse: 1320    ân wunden unde âne siechen.

Verse: 1321    man saget von dem sturm der ûf Wolfenwerde gescach,
Verse: 1322    dâ Hilten vater tôt gelach,

Verse: 1323    zewisken Hagenen unde Waten:
Verse: 1324    sô ne mohter herzô nieth katen.

Verse: 1325    iedoch ne mohte nechain sîn,
Verse: 1326    noch Herewîch noch Wolfwîn,

Verse: 1327    der der ie gevaht volcwîch
Verse: 1328    dem chunige Alexander gelîch.

Verse: 1329    man list von gûten chnehten,
Verse: 1330    die wol getorsten vehten,

Verse: 1331    in Troiâre liede,
Verse: 1332    ê sich der sturm geschiede,

Verse: 1333    Achilles unde Hector,
Verse: 1334    Paris unde Nestor,

Verse: 1335    die manich tûsint erslûgen
Verse: 1336    unt die ouch scarfe gêre trûgen:

Verse: 1337    sô moht under in allen
Verse: 1338    zû Alexander niuht gevallen.

Verse: 1339       Pincun was ein grâve genant,
Verse: 1340    der vûrte den vanen an der hant,

Verse: 1341    den er Alexander abe brach,
Verse: 1342    den Mennes der nider stach.

Verse: 1343    unde alsô er den grâven hâte erchorn,
Verse: 1344    dô rûrt erz ros mit den sporn:

Verse: 1345    zû dem grâven er reit.
Verse: 1346    er sprach: 'daz was ein michel chintheit,

Verse: 1347    daz mîn vane chom in iwer hant;
Verse: 1348    iz wirt iu ze laster gewant.'

Verse: 1349    der grâve daz ros umbe warf.
Verse: 1350    a wie schîrer dâ restarb.

Verse: 1351    er sprach: 'gewisse fûr ich einen vanen,
Verse: 1352    der churze wîle mit mir sol wonen.

Verse: 1353    ich sol dirn alsô wider geben,
Verse: 1354    daz ez dir gât an dîn leben.'

Verse: 1355    mit samt deme worte
Verse: 1356    sô stach er in mit dem orte,

Verse: 1357    daz an dem spere was,
Verse: 1358    daz er der wunden wol genas.

Verse: 1359    oberhalb der ougbrâ
Verse: 1360    dâ was ter stich ketan.

Verse: 1361    nû vernement, waz Alexander sprach,
Verse: 1362    alsin Pincun gestach:

Verse: 1363    'dû solt lugenâre wesen
Verse: 1364    unde ich sol des stiches wol genesen.'

Verse: 1365    mit dem selben worte
Verse: 1366    gab er im einen slach mit dem swerte.

Verse: 1367    ûf daz houbet ern slûch
Verse: 1368    durch den hals unde durch den hût.

Verse: 1369    der slach was unsûze,
Verse: 1370    daz houbet viel ime vur die fûze.

Verse: 1371       Unt Alexander sînen vanen wider gewan,
Verse: 1372    Mennes aber ime zû chom,

Verse: 1373    den herzogen er der nider stach.
Verse: 1374    dô gab er im mit dem swert ainen slach:

Verse: 1375    ûf den arm er in slûch,
Verse: 1376    dâ er daz swert inne trîch.

Verse: 1377    der slach was vone grôzer maht,
Verse: 1378    durch den arm unde durch den scaph

Verse: 1379    sô chom daz swert gedrungen,
Verse: 1380    unde want ime an der lungen.

Verse: 1381    aldâ viel Mennes dernider.
Verse: 1382    Persi ne fuhten niweht sider,

Verse: 1383    ûzer dem velde si fluhen:
Verse: 1384    si ne getorsten in selben nieht getrûwen.




Next part


This text is part of the TITUS edition of Lamprecht, Alexander (Vorauer Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.