TITUS
Alexanderroman (Wernigeroder Handschrift)
Part No. 32
Previous part

Chapter: 46  
Alexanders 1. Antwort an Darius


Verse: 1127    Do Allexandro der brief
Verse: 1128    Braht ward, er rief

Verse: 1129    Allen den fürsten sein
Verse: 1130    Und hiez lesen daz prieflein.

Verse: 1131    Da der brief wart vernomen,
Verse: 1132    Die fürsten die dar warn komen,

Verse: 1133    Erschracken der mer.
Verse: 1134    Do sprach Allexander:

Verse: 1135    'Ir herren und ir fürsten,
Verse: 1136    Land euch nach eren dürsten!

Verse: 1137    Ich pit daz ir sagt mir
Verse: 1138    Wor umb erschrocken seind ir.

Verse: 1139    Ez ist nit allez sampt war
Verse: 1140    Daz an dem brief stat zwär.

Verse: 1141    Hat er als großen reichtüm,
Verse: 1142    Daz mag uns wol werden früm.'

Verse: 1143    Nu hiez er die poten Darius
Verse: 1144    Für in kömen süzz

Verse: 1145    Und hiez da pald gauchen
Verse: 1146    Daz man sie solt hancken.

Verse: 1147    Dez erschrackent sie ser
Verse: 1148    Und sprachent: 'genediger hër,

Verse: 1149    Bedenk dein küniglich wirdickeit,
Verse: 1150    Daz die nit werd also gemailigt

Verse: 1151    An uns.' der künig sprach do:
Verse: 1152    'Ewr her schreibt mir so

Verse: 1153    Daz ich ain schacher sey
Verse: 1154    Und die die mir auch wönent pey:

Verse: 1155    Dem wil ich tün geleich.'
Verse: 1156    'Naynna, her lobleich,

Verse: 1157    Ez hat unser her gewist
Verse: 1158    Nit daz du pist

Verse: 1159    So in großer wird und er.'
Verse: 1160    Da sprach Allexander:

Verse: 1161    'Ich wil nicht tün als er mich
Verse: 1162    Hat: euch wil ich

Verse: 1163    Schicken haim mit eren
Verse: 1164    Zu Dario ewrem herren.'

Verse: 1165    Die pöten im dez sagten dank
Verse: 1166    Und sprachen: 'wiß on wank:

Verse: 1167    Du hast dürch dein tugent uns
Verse: 1168    Laßen leben: dar umb sünß

Verse: 1169    Wöll wir lonnen dir
Verse: 1170    Und wollent nach deiner gir

Verse: 1171    Geben Darium on dein hand.'
Verse: 1172    Zu in sprach der weygant:

Verse: 1173    'Zwüng mich nit mein wirdickeit,
Verse: 1174    Zwar ir mustent leiden paid

Verse: 1175    Und dar umb geben daz leben,
Verse: 1176    Wolt ir mir ewren herren geben,

Verse: 1177    Der maint daz ir im getrew seit:
Verse: 1178    Ich wil euch zwingen mit streit,

Verse: 1179    So verr als mir gan Göt.'
Verse: 1180    Allexander do geböt

Verse: 1181    Schreiben dem künig Dario.
Verse: 1182    Der brief stünd also:

Verse: 1183    'Der sün Olimpiadis
Verse: 1184    Und dez künigs Philippis

Verse: 1185    Enpewt Dario also:
Verse: 1186    Wer reht mercken wil, der waizz

Verse: 1187    Wol daz der werlte kraiß
Verse: 1188    Und alles daz dewͤ sün beschaint

Verse: 1189    Hannd, daz ist unstat
Verse: 1190    Und kain beleiben nit enhat:

Verse: 1191    Ez müß alles wegen sich.
Verse: 1192    Also schüf ez Göt, dünkt mich:

Verse: 1193    Wer yeczo gar höch ist,
Verse: 1194    In ainer kürczen frist

Verse: 1195    Mag er vallen auf den grünt:
Verse: 1196    Dar nach in kürczer stünd

Verse: 1197    Kompt ainer höch, der nichcz waz.
Verse: 1198    Darius, ich sag dir daz:

Verse: 1199    Du geleichest den gotern dich
Verse: 1200    Und pist doch tötlich als ich.

Verse: 1201    Dor umb han ich den gedingen
Verse: 1202    Daz mir wol müg gelingen

Verse: 1203    An dem der tötlich ist als ich pin.
Verse: 1204    Du hast geschaczt in deinem synn

Verse: 1205    Dich gröz und mich zu mol klain:
Verse: 1206    Dar umb in meinem synn main

Verse: 1207    Ich, ez wer mir er grözz
Verse: 1208    Ob ich ainen nider stöß

Verse: 1209    Der großer dann ich wer:
Verse: 1210    So wer ez dir ain clainew er

Verse: 1211    Daz du mich klainen uberwindest.
Verse: 1212    Doch höf ich daz du vindest

Verse: 1213    Mich nach deines herczen gir,
Verse: 1214    Wez du gerst an mir.

Verse: 1215    Wie clain ich aber ymmer sey,
Verse: 1216    Ich hof ich wol dir nachen pey

Verse: 1217    Sein in kürcz mit maht.
Verse: 1218    Da tü zu und traht

Verse: 1219    Daz du dich seczest zu wër.
Verse: 1220    Ich höf mit meinem clainen her

Verse: 1221    Und mit der hilf der got
Verse: 1222    Bringen dich zu spöt,

Verse: 1223    Und du mich under deinen danck
Verse: 1224    Zu hern han müst one wank.'




Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.