TITUS
Alexanderroman (Wernigeroder Handschrift)
Part No. 80
Previous part

Chapter: 186  
Die Amazonen


Verse: 3325    Dar nach für der unverczagt,
Verse: 3326    Als uns daz puch sagt,

Verse: 3327    Mit großer arbait,
Verse: 3328    Die er und die seinen lait,

Verse: 3329    Bizz er kom in Caspia.
Verse: 3330    Da vand er vil der slangen sa.

Verse: 3331    Da waz ain tail gut lant.
Verse: 3332    Sein poten er do sand

Verse: 3333    Von Amason der künigein,
Verse: 3334    Der nam da müst sein

Verse: 3335    Salistria man sie hiez;
Verse: 3336    Der enpot also der fiezz:

Verse: 3337    'Ich künig der künig und her
Verse: 3338    Der herren weit und ferr,

Verse: 3339    Nach dem als ich den sig genam
Verse: 3340    An Dario und Persia köm

Verse: 3341    Under meinen gewalt,
Verse: 3342    So ist so höch geczalt

Verse: 3343    Mein nam: und daz auch ich
Verse: 3344    Hann verjagt flühticlich

Verse: 3345    Porum den künig von India,
Verse: 3346    So sol euch wol sein künt ja

Verse: 3347    Mein ritterlich getat.
Verse: 3348    Dar umb nit enlat

Verse: 3349    Ir schickent den zins mir
Verse: 3350    Als ainem künig, daz ist mein gir.'

Verse: 3351    Dye künigin Salistria
Verse: 3352    Schraib im hin wider yesa:

Verse: 3353    'Allexander, von Macedon
Verse: 3354    Künig, du scholt wißen schön

Verse: 3355    Daz man von deiner weisheit
Verse: 3356    Mir vil hat gesait.

Verse: 3357    Pistu nü weiß, so volg mir.
Verse: 3358    Ainen rat gib ich dir.

Verse: 3359    Ist ez dir gangen wol,
Verse: 3360    Dar umb dir nit mißvallen söl

Verse: 3361    Du gedenckest auch daz end,
Verse: 3362    Wa ez sich wend.

Verse: 3363    Ist daz du in unser reich
Verse: 3364    Wilt, du müst sörgleich

Verse: 3365    Wagen daz leben und den leib
Verse: 3366    Und wirst ze stund von mir weib

Verse: 3367    Bestanden und den frawen mein,
Verse: 3368    Da von du wol in größ pein

Verse: 3369    Komen und in arbait
Verse: 3370    Maht: daz sey dir vor gesait.

Verse: 3371    Begerst aber zu wißen dü
Verse: 3372    Unser leben, ich schreib dirs nü.

Verse: 3373    Wir sind mit wazzer umb geben:
Verse: 3374    Also vertreib wir daz leben,

Verse: 3375    Daz nymmant zu uns komen mag
Verse: 3376    Payde naht und tag

Verse: 3377    Dann mit großen sörgen.
Verse: 3378    In unserm land verporgen

Verse: 3379    Hab wir frawen ritterlich,
Verse: 3380    Die zu fechten manlich

Verse: 3381    Sind, zwir hundert
Verse: 3382    Tausent dar zu gesundert,

Verse: 3383    Die zu vechten gelert
Verse: 3384    Sind, der ez on sie gert.

Verse: 3385    Ez ist auch in unserm land
Verse: 3386    Kain mann pey uns erkand:

Verse: 3387    Sie sint da pey uber se
Verse: 3388    In ainer ynsele.

Verse: 3389    Aynest in dem jar
Verse: 3390    Köm wir zu in für wär

Verse: 3391    In die ynseln, da sie sind:
Verse: 3392    Dürch daz wir uber komen kind

Verse: 3393    Sey wir dreißig tag pey in
Verse: 3394    Mit lust, wün nach dem synn

Verse: 3395    Als dann ist der mynne spil.
Verse: 3396    Wann dann kömpt daz zil,

Verse: 3397    So var wir haim wider.
Verse: 3398    Etliche swanger sieder

Verse: 3399    Wirt: so sie dann genist,
Verse: 3400    Ob ez dann ain knab ist,

Verse: 3401    Die müter zeuht in für war
Verse: 3402    Bis er hat siben jar.

Verse: 3403    Ist ez aber ain töchterlein,
Verse: 3404    So müzz ez pey uns sein

Verse: 3405    Und ziehent ez ritterlich.
Verse: 3406    Also sey wir manlich

Verse: 3407    Ze füß und ze röß wöl,
Verse: 3408    Als ich dir sagen sol.

Verse: 3409    Ist daz ez nöt beschicht
Verse: 3410    Unsern mannen, man uns siht

Verse: 3411    Her uber zu in keren
Verse: 3412    Und helffend in irer feind weren

Verse: 3413    Nach dem als dann ist nöt,
Verse: 3414    Und fürhten nit den töt:

Verse: 3415    Ist ez also gestalt,
Verse: 3416    Wir komen ritterlich pald

Verse: 3417    Zu hilf und zu tröst in,
Verse: 3418    Und land auch da haim sein

Verse: 3419    Die dez landes warten
Verse: 3420    Sullent und behärten.

Verse: 3421    Nü han ich genczlich gesait
Verse: 3422    Dir und für gelait

Verse: 3423    Wie ez umb uns ist
Verse: 3424    Gestalt. hast du list

Verse: 3425    Oder sin daz dü
Verse: 3426    Zu uns komen wilt nü,

Verse: 3427    Wiß daz wir dich
Verse: 3428    Enpfahen wollent ritterlich

Verse: 3429    Und dich ynnen bringen
Verse: 3430    Waz wir in streit begynnen

Verse: 3431    Kunden mit den lanczen,
Verse: 3432    Swerten. wir nit tanczen

Verse: 3433    Begërn für daz ritter spil.
Verse: 3434    Ains ich dir sagen wil.

Verse: 3435    Ez köm uns zu großem lob
Verse: 3436    Ob man uns sech liegen ob

Verse: 3437    Dir und deiner ritterschaft:
Verse: 3438    Ob aber du den praht

Verse: 3439    Gewinst und den sig an uns,
Verse: 3440    Ich sag dir sicher sünß,

Verse: 3441    Ez ist dir nit ain große er,
Verse: 3442    So man spricht: "Allexander

Verse: 3443    Hat weyben gesiget an."
Verse: 3444    Dar umb ich raten kan,

Verse: 3445    Du ker dich doran nit,
Verse: 3446    Daz dir nit er, nun schand git.'

Verse: 3447    Lachen Allexander begann,
Verse: 3448    Do im die potschaft köm

Verse: 3449    Von der künigin Salistria.
Verse: 3450    Do schraib er ir ye sa:

Verse: 3451    'Mit meiner ellenden hant
Verse: 3452    Hann ich betwüngen manig lant:

Verse: 3453    Eüropa und Asya
Verse: 3454    Stat mir zu dinst sa.

Verse: 3455    Und wolt ir euch wider mich
Verse: 3456    Seczzen, daz ist tötlich,

Verse: 3457    Und rat daz ir folget mir
Verse: 3458    Und tut nach meiner begir,

Verse: 3459    Daz ir streicz nit begërt.
Verse: 3460    Ewren sytten hann ich wert.

Verse: 3461    Ich gepeut pey den hulden mein
Verse: 3462    Euch, daz ir nit lat sein

Verse: 3463    Ir kömpt zu uns mit ewren mannen,
Verse: 3464    Umb daz daz ir dänne

Verse: 3465    Frid und genad von uns
Verse: 3466    Habt. ich swer euch sünß

Verse: 3467    Bey den gottern frön
Verse: 3468    Und pey dem got Amon,

Verse: 3469    Von dem wir sind gebörn:
Verse: 3470    Ist daz ir unsern zorn

Verse: 3471    Vermeyden wend, daz ir
Verse: 3472    Schickent ewr maiden mir

Verse: 3473    Etwie vil ze present,
Verse: 3474    Die zu streit gewent

Verse: 3475    Sind und ritterlich,
Verse: 3476    So habt ir huld umb mich.'

Verse: 3477    Als die fraw von Amazon
Verse: 3478    Von Allexandro vernam

Verse: 3479    Den brief, sie hiez gauchen
Verse: 3480    Und vil pald vachen

Verse: 3481    Zwelf der pesten follen,
Verse: 3482    Untzam und die nit dolen

Verse: 3483    Wolten satel noch zaüm.
Verse: 3484    Dar zu hiez sie nemen gaüm

Verse: 3485    Zwelf röß der pësten,
Verse: 3486    So mans yndert weste

Verse: 3487    In allem yren reich:
Verse: 3488    Die braht man snellicleich.

Verse: 3489    Sie warn als die harm weiß.
Verse: 3490    Die schicht da mit fleiß

Verse: 3491    Die künigin Allexandro:
Verse: 3492    Der present ward er frö.

Verse: 3493    Do koment Allexandro
Verse: 3494    Mër wie der künig Pöro

Verse: 3495    Sich stalt zu ainem streit.
Verse: 3496    An der selben zeit

Verse: 3497    Allexander sich besant:
Verse: 3498    Von land zu land

Verse: 3499    Wurden da zwei hündert
Verse: 3500    Der pesten auz gesundert,

Verse: 3501    Und enpfalch ainem yglichen
Verse: 3502    Ain hauffen weisleichen,

Verse: 3503    Wann ez chom dor zü,
Verse: 3504    Daz dann ir yeder tü

Verse: 3505    Mit den seinen daz pest
Verse: 3506    Daz er künd und west

Verse: 3507    Den veinden zu laid.
Verse: 3508    Allexander nit pait

Verse: 3509    Lenger und zoch dann.
Verse: 3510    Ir ygliches schilt brann

Verse: 3511    Reht als tund die stern,
Verse: 3512    So in die sün verren

Verse: 3513    Tut mit yrem glast.
Verse: 3514    Sie warn all vast

Verse: 3515    Umb geben mit gold und stain,
Verse: 3516    Daz es vil licht erschain.




Next part


This text is part of the TITUS edition of Alexanderroman (Wernigeroder Handschrift).

Copyright TITUS Project, Frankfurt a/M, 9.2.2010. No parts of this document may be republished in any form without prior permission by the copyright holder.