TITUS
Hartmann von Aue, Erec
Part No. 2
Previous part

Verse group: (2) 
Verse: 100    wan daz er wîslîchen
Verse: 101    sînem zorne kunde entwîchen.

Verse: 102    der ritter hete im genomen den lîp,
Verse: 103    wan Êrec was blôz als ein wîp.

Verse: 104    er gelebete im nie leidern tac
Verse: 105    dan umbe den geiselslac

Verse: 106    und schamte sich nie sô sêre
Verse: 107    wan daz dise unêre

Verse: 108    diu künegîn mit ir vrouwen sach.
Verse: 109    als im der geiselslac geschach,

Verse: 110    mit grôzer schame er wider reit.
Verse: 111    alsô klagete er sîn leit

Verse: 112    (schamvar wart er under ougen):
Verse: 113    ʽvrouwe, ich enmac des niht verlougen,

Verse: 114    wan irz selbe habet gesehen,
Verse: 115    mir ensî vor iu geschehen

Verse: 116    eine schande alsô grôz
Verse: 117    daz ir nie dehein mîn genôz

Verse: 118    eines hâres mê gewan.
Verse: 119    daz mich ein sus wênic man

Verse: 120    sô lasterlîchen hât geslagen
Verse: 121    und ich im daz muoste vertragen,

Verse: 122    des schame ich mich sô sêre
Verse: 123    daz ich iuch nimmer mêre

Verse: 124    vürbaz getar schouwen
Verse: 125    und dise juncvrouwen,

Verse: 126    und enweiz zwiu mir daz leben sol,
Verse: 127    ez ensî daz ich mich des erhol

Verse: 128    daz mir vor iu geschehen ist.
Verse: 129    ich ensterbe in kurzer vrist,

Verse: 130    sô sol ichz versuochen.
Verse: 131    vrouwe, ir sult geruochen

Verse: 132    daz ich in iuwern hulden var.
Verse: 133    der himelkeiser bewar,

Verse: 134    vrouwe, iuwer êre.
Verse: 135    ir gesehet mich nimmer mêre,

Verse: 136    ichn gereche mich an disem man
Verse: 137    von des getwerge ich mâl gewan.

Verse: 138    ist daz mich got sô gêret
Verse: 139    daz er mîn heil mêret,

Verse: 140    daz mir dar an gelinget
Verse: 141    sô doch mîn muot gedinget,

Verse: 142    sô kum ich über den dritten tac,
Verse: 143    ob ich vor siechtuome mac.'

Verse: 144    der küneginne was vil leit
Verse: 145    daz er alsô junger reit

Verse: 146    ûf sô grôze vreise:
Verse: 147    si bat in lân die reise.

Verse: 148    sô lange er dô urloubes gerte
Verse: 149    unz daz si ins gewerte.

Verse: 150    ouch dâhte der juncherre,
Verse: 151    im wære daz ze verre,

Verse: 152    ob er zen selben zîten
Verse: 153    hin wider wolde rîten

Verse: 154    dâ er sînen harnasch hâte,
Verse: 155    und daz er alsô drâte

Verse: 156    in nimmer genæme
Verse: 157    (swie schiere er wider kæme,

Verse: 158    sô wæren si im entriten gar),
Verse: 159    und îlte in nâch alsô bar.

Verse: 160    dô er in begunde gâhen nâ,
Verse: 161    dô kam er rehte ûf ir slâ

Verse: 162    von den im schade was geschehen.
Verse: 163    vil schiere begunde er si ane sehen.

Verse: 164    zuo in enwas im niht ze gâch:
Verse: 165    er reit in alsô verre nâch

Verse: 166    daz er si sach und si in niht.
Verse: 167    er tete als dem dâ leit geschiht:

Verse: 168    der vlîzet dicke sich dar zuo
Verse: 169    wie erz mit vuoge widertuo.

Verse: 170    si enkâmen ûf dem wege
Verse: 171    ûzer sîner ougen phlege

Verse: 172    des vil langen tages nie
Verse: 173    unz daz der âbent ane gie.

Verse: 174    nû sach er wâ engegen im schein
Verse: 175    ein hûs geheizen tulmein,

Verse: 176    des wirt der herzoge îmâin.
Verse: 177    dâ reit der ritter vor im in:

Verse: 178    dâ wart er emphangen wol,
Verse: 179    sô man ze vriundes hûse sol

Verse: 180    und als dem wirte wol gezam.
Verse: 181    ich sage iu durch waz er kam

Verse: 182    mit sîner vriundîn.
Verse: 183    ez hete der herzoge îmâîn

Verse: 184    hôchzît dâ vor zwei jâr:
Verse: 185    saget diu âventiure wâr,

Verse: 186    sô hete er si dô zem dritten.
Verse: 187    an eine wise enmitten

Verse: 188    hete er hôhe an eine stat
Verse: 189    einen sparwære ûf gesat

Verse: 190    ûf eine stange silberîn.
Verse: 191    diz muoste jærlîche sîn

Verse: 192    ze vreunden sîner lantdiet.
Verse: 193    von der rede er niemen schiet,

Verse: 194    niuwan daz gelîche
Verse: 195    arme unde rîche,

Verse: 196    alte unde junge
Verse: 197    durch schœne handelunge

Verse: 198    ze sîner vreude kæmen
Verse: 199    swenne siz vernæmen.
Next part


This text is part of the TITUS edition of Hartmann von Aue, Erec.

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.