TITUS
Author: Wolfram 
Wolfram von Eschenbach
Book: Parzival 
Parzival

On the basis of the edition by
Albert Leitzmann,
Wolfram von Eschenbach,
1.-3. Heft: Parzival,
7. / 5. Auflage,
Tübingen 1959-1961
(Altdeutsche Textbibliothek, 12.-14.)

entered by Richard Schrodt, Vienna;
TITUS version by Jost Gippert,
Frankfurt a/M 28.2.1998 / 21.6.1998 / 3.10.1999 / 1.6.2000 / 2.3.2003



Chapter: 1 
1


Verse: 1    Ist zwîvel herzen nâchgebûr,
Verse: 2    daz muoz der sêle werden sûr,

Verse: 3    gesmæhet und gezieret
Verse: 4    ist swâ sich parrieret

Verse: 5    unverzaget mannes muot,
Verse: 6    als agelstern varwe tuot.

Verse: 7    der mac dennoch wesen geil,
Verse: 8    wande an im sint beidiu teil,

Verse: 9    des himels und der helle.
Verse: 10    der unstæte geselle

Verse: 11    hât die swarzen varwe gar
Verse: 12    und wirt ouch nâch der vinster var:

Verse: 13    sô habet sich an die blanken
Verse: 14    der mit stæten gedanken.

Verse: 15    diz vliegende bîspel
Verse: 16    ist tumben liuten gar ze snel

Verse: 17    si enmugens niht erdenken,
Verse: 18    wande ez kan vor in wenken

Verse: 19    rehte alsam ein schellec hase.
Verse: 20    zin anderhalp an dem glase

Verse: 21    gelîchet und des blinden troum,
Verse: 22    diu gebent antlitzes roum,

Verse: 23    doch mac mit stæte niht gesîn
Verse: 24    dirre trüebe lîhte schîn:

Verse: 25    er machet kurze vreude alwâr.
Verse: 26    wer roufet mich dâ nie dehein hâr

Verse: 27    gewuohs, innen an mîner hant?
Verse: 28    der hât vil nâhe griffe erkant.

Verse: 29    spriche ich gein den vorhten och,
Verse: 30    daz gelîchet mîner witze iedoch.




Chapter: 2 
2


Verse: 1    wil ich triuwe vinden
Verse: 2    aldâ si kan verswinden

Verse: 3    als viur in dem brunnen
Verse: 4    und daz tou an der sunnen?

Verse: 5    ouch erkande ich nie sô wîsen man,
Verse: 6    er enmöhte gerne künde hân

Verse: 7    welher stiure disiu mære gernt
Verse: 8    und waz si guoter lêre wernt.

Verse: 9    dar an si nimmer des verzagent,
Verse: 10    beide si vliehent unde jagent,

Verse: 11    si entwîchent unde kêrent,
Verse: 12    si lasternt und êrent.

Verse: 13    swer mit disen schanzen allen kan,
Verse: 14    an dem hât witze wol getân,

Verse: 15    der sich niht versitzet noch vergêt
Verse: 16    und sich anders wol verstêt.

Verse: 17    valsch geselleclîcher muot
Verse: 18    ist zuo dem helleviure guot

Verse: 19    und ist hôher werdekeit ein hagel.
Verse: 20    sîn triuwe hât sô kurzen zagel

Verse: 21    daz si den dritten biz niht galt,
Verse: 22    vuor si bî bremen in den walt.

Verse: 23    dise maneger slahte underbint
Verse: 24    iedoch niht gar von manne sint:

Verse: 25    vür diu wîp stôze ich disiu zil.
Verse: 26    swelhiu mîn râten merken wil,

Verse: 27    diu sol wizzen war si kêre
Verse: 28    ir prîs und ir êre

Verse: 29    und wem si dâ nâch sî bereit
Verse: 30    minne und ir werdekeit,




Chapter: 3 
3


Verse: 1    sô daz si niht geriuwe
Verse: 2    ir kiusche und ir triuwe.

Verse: 3    vor gote ich guoten wîben bite
Verse: 4    daz in rehtiu mâze volge mite:

Verse: 5    schame ist ein slôz ob allen siten.
Verse: 6    ich endarf in niht mêr heiles biten.

Verse: 7    diu valsche erwirbet valschen prîs.
Verse: 8    wie stæte ist ein dünnez îs

Verse: 9    daz ougestheize sunnen hât?
Verse: 10    ir lop vil balde alsus zergât.

Verse: 11    manec wîbes schœne an lobe is breit:
Verse: 12    ist dâ daz herze konterfeit,

Verse: 13    die lobe ich als ich solde
Verse: 14    daz safer in dem golde.

Verse: 15    ich enhân daz niht vür lîhtiu dinc,
Verse: 16    swer in den kranken messinc

Verse: 17    verwürket edelen rubîn
Verse: 18    und al die âventiure sîn:

Verse: 19    dem gelîche ich rehten wîbes muot.
Verse: 20    diu ir wîpheit rehte tuot,

Verse: 21    dâ ensol ich varwe prüeven niht
Verse: 22    noch herzen dach daz man siht.

Verse: 23    ist si innerhalp der brust bewart,
Verse: 24    sôst werder prîs dâ niht verschart.

Verse: 25    solde ich wîp unde man
Verse: 26    ze rehte prüeven als ich kan,

Verse: 27    dâ vüere ein langez mære mite.
Verse: 28    nû hœrt dirre âventiure site:

Verse: 29    diu lât iuch wizzen beide
Verse: 30    von liebe und von leide,




Chapter: 4 
4


Verse: 1    vreude und angest vert dâ bî.
Verse: 2    nû lât mîn eines wesen drî,

Verse: 3    der ieslîcher sunder phlege
Verse: 4    daz miner künste widerwege

Verse: 5    (dar zuo gehôrte wilder vunt):
Verse: 6    ob si iu gerne tæten kunt

Verse: 7    daz ich iu eine künden wil,
Verse: 8    si heten arbeite vil.

Verse: 9    ein mære ich iu wil niuwen,
Verse: 10    daz saget von grôzen triuwen,

Verse: 11    wîplîchez wîbes reht
Verse: 12    und mannes manheit alsô sleht,

Verse: 13    diu sich gein herte nie gebouc.
Verse: 14    sin herze in dar an niht betrouc,

Verse: 15    er stahel, swâ er ze strîte quam,
Verse: 16    sîn hant dâ sigelîchen nam

Verse: 17    vil manegen lobelîchen prîs.
Verse: 18    er küene, træclîche wîs

Verse: 19    (den helt ich alsus grüeze),
Verse: 20    er wîbes ougen süeze

Verse: 21    und dâ bî wîbes herzen suht,
Verse: 22    vor missewende ein wâriu vluht,

Verse: 23    den ich hie zuo hân erkorn,
Verse: 24    erst mæreshalp noch ungeborn

Verse: 25    dem man dirre âventiure giht
Verse: 26    und wunders vil des dran geschiht.

Verse: 27    Si phlegents noch als mans dô phlac,
Verse: 28    swâ liget und welsch gerihte lac

Verse: 29    (des phliget ouch tiuscher erde ein ort:
Verse: 30    daz habet ir âne mich gehôrt),




Chapter: 5 
5


Verse: 1    swer ie dâ phlac der lande,
Verse: 2    der gebôt wol âne schande

Verse: 3    (daz ist ein wârheit sunder wân)
Verse: 4    daz der eldest bruoder solde hân

Verse: 5    sîns vater ganzen erbeteil.
Verse: 6    daz was der jungern unheil,

Verse: 7    daz in der tôt die phlihte brach
Verse: 8    als in ir vater leben verjach.

Verse: 9    dâ vor was ez gemeine:
Verse: 10    sus hâtz der elder eine.

Verse: 11    daz schuof iedoch ein wîse man,
Verse: 12    daz alder guot solde hân.

Verse: 13    jugent hât vil werdekeit,
Verse: 14    daz alder siuften unde leit:

Verse: 15    ez enwart nie niht als unvruot
Verse: 16    sô alder und armuot.

Verse: 17    künege, grâven, herzogen
Verse: 18    (daz sage ich iu vür ungelogen),

Verse: 19    daz die dâ huobe enterbet sint
Verse: 20    unz an daz elder kint,

Verse: 21    daz ist ein vremdiu zeche.
Verse: 22    der kiusche und der vreche

Verse: 23    Gahmuret der wîgant
Verse: 24    verlôs sus bürge unde lant,

Verse: 25    dâ sîn vater schône
Verse: 26    truoc zepter und die krône

Verse: 27    mit grôzer küneclîcher kraft,
Verse: 28    unz er lach tôt an ritterschaft.

Verse: 29    dô klagete man in sêre.
Verse: 30    die ganzen triuwe und êre




Chapter: 6 
6


Verse: 1    brâhte er unz an sînen tôt.
Verse: 2    sin elder sun vür sich gebôt

Verse: 3    den vürsten ûz sînem rîche.
Verse: 4    die kômen ritterlîche,

Verse: 5    wan si ze rehte solden hân
Verse: 6    von im grôz lêhen sunder wân.

Verse: 7    dô si ze hove wâren komen
Verse: 8    und ir reht was vernomen,

Verse: 9    daz si ir lêhen alle emphiengen,
Verse: 10    nû hœrt wie siz an geviengen.

Verse: 11    si gerten, als ir triuwe riet,
Verse: 12    rîche und arme, gar diu diet,

Verse: 13    einer kranken ernstlîchen bete,
Verse: 14    daz der künec an Gahmurete

Verse: 15    bruoderlîche triuwe mêrte
Verse: 16    und sich selben êrte,

Verse: 17    daz er in niht gar verstieze
Verse: 18    und im sîns landes lieze

Verse: 19    hantgemælde, daz man möhte sehen
Verse: 20    dâ von der herre müeste jehen

Verse: 21    sîns namen und sîner vrîheit.
Verse: 22    daz was dem künege niht ze leit.

Verse: 23    er sprach: "ir kunnet mâze gern:
Verse: 24    ich wil iuch des und vürbaz wern.

Verse: 25    wan nennet ir den bruoder mîn
Verse: 26    Gahmuret Anschevîn?

Verse: 27    Anschouwe ist mîn lant:
Verse: 28    dâ wesen beide von genant."

Verse: 29    sô sprach der künec hêre:
Verse: 30    "mîn bruoder der mac sich mêre




Chapter: 7 
7


Verse: 1    der stæten helfe an mich versehen,
Verse: 2    denne ich sô gâhes welle jehen.

Verse: 3    er sol mîn ingesinde sîn.
Verse: 4    deiswâr ich tuon iu allen schîn

Verse: 5    daz uns beide ein muoter truoc.
Verse: 6    er hât wênec und ich genuoc:

Verse: 7    daz sol im teilen sô mîn hant,
Verse: 8    daz des mîn sælde niht sî phant

Verse: 9    vor dem der gît unde nimt.
Verse: 10    ûf reht in beider der gezimt."

Verse: 11    dô die vürsten rîche
Verse: 12    vernâmen al gelîche

Verse: 13    daz ir herre triuwen phlac
Verse: 14    (diz was in ein lieber tac),

Verse: 15    ieslîcher im sunder neic.
Verse: 16    Gahmuret niht langer sweic

Verse: 17    der volge als im sîn herze jach.
Verse: 18    zem künege er guotlîche sprach:

Verse: 19    "herre und bruoder mîn,
Verse: 20    wolde ich ingesinde sîn

Verse: 21    iuwer oder deheines man,
Verse: 22    sô hete ich mîn gemach getân.

Verse: 23    nû prüevet dar nâch mînen prîs
Verse: 24    (ir sît getriuwe unde wîs)

Verse: 25    und râtet als ez geziehe nuo:
Verse: 26    dâ grîfet helflîche zuo.

Verse: 27    niht wan harnas ich hân:
Verse: 28    hete ich dar inne mêr getân

Verse: 29    daz virrec lop mir bræhte,
Verse: 30    etswâ man mîn gedæhte."




Chapter: 8 
8


Verse: 1    Gahmuret sprach aber sân:
Verse: 2    "sehzehen knappen ich hân,

Verse: 3    der sehse von îser sint.
Verse: 4    dar zuo gebet mir vier kint

Verse: 5    mit guoter zuht von hôher art.
Verse: 6    vor den wirt nimmer niht gespart

Verse: 7    des ie bejagen mac mîn hant.
Verse: 8    ich wil kêren in diu lant:

Verse: 9    ich hân ouch ê ein teil gevarn.
Verse: 10    ob mich gelücke wil bewarn,

Verse: 11    sô erwirbe ich guotes wîbes gruoz.
Verse: 12    ob ich ir dar nâch dienen muoz

Verse: 13    und ob ich des wirdec bin,
Verse: 14    sô rætet nir mîn bester sin

Verse: 15    daz ichs mit rehten triuwen phlege.
Verse: 16    got wîse mich der sælden wege.

Verse: 17    wir vuoren geselleclîche
Verse: 18    (dennoch hete iuwer rîche

Verse: 19    unser vater Gandîn)
Verse: 20    manegen kumberlîchen pîn

Verse: 21    wir beide dolden umbe liep.
Verse: 22    ir wâret ritter unde diep,

Verse: 23    ir kundet dienen unde heln:
Verse: 24    wan kunde ouch ich nû minne steln!

Verse: 25    ouwê wan hete ich iuwer kunst
Verse: 26    und anderhalp die wâren gunst !"

Verse: 27    der künec siufzete unde sprach:
Verse: 28    "ouwê daz ich dich ie gesach,

Verse: 29    sît dû mit schimphlîchen siten
Verse: 30    mîn ganzez herze hâs versniten




Chapter: 9 
9


Verse: 1    und tuos ob wir uns scheiden.
Verse: 2    mîn vater hât uns beiden

Verse: 3    gelâzen guotes harte vil,
Verse: 4    des stôze ich dir gelîchiu zil:

Verse: 5    ich bin dir herzenlîchen holt.
Verse: 6    lieht gesteine, rôtez golt,

Verse: 7    liute,wâpen, ors, gewant,
Verse: 8    des nim sô vil von mîner hant

Verse: 9    daz dû nach dînem willen vars
Verse: 10    und dîne mildekeit bewars.

Verse: 11    dîn manheit ist ûz erkorn:
Verse: 12    wærstû von Gilstram geborn

Verse: 13    oder komen her von Ranculat,
Verse: 14    ich hete dich immer an der stat

Verse: 15    als ich dich sus vil gerne hân.
Verse: 16    dû bist mîn bruoder sunder wân."

Verse: 17    "herre, ir lobet mich umbe nôt,
Verse: 18    sît ez iuwer zuht gebôt:

Verse: 19    dar nâch tuot iuwer helfe schîn.
Verse: 20    welt ir und diu muoter mîn

Verse: 21    mir teilen iuwer varnde habe,
Verse: 22    sô stîge ich ûf und ninder abe.

Verse: 23    mîn herze iedoch nâch hœhe strebet:
Verse: 24    ich enweiz war umbe ez alsus lebet.

Verse: 25    daz mir swillet sus mîn winster brust.
Verse: 26    ouwê war jaget mich mîn gelust?

Verse: 27    ich solz versuochen, ob ich mac.
Verse: 28    nû nâht mîn urloubes tac."

Verse: 29    der künec in alles werte,
Verse: 30    mêr denne er selbe gerte:




Chapter: 10 
10


Verse: 1    vünf ors erwelt und erkant,
Verse: 2    diu besten über al sîn lant,

Verse: 3    küene, starc, niht ze laz,
Verse: 4    manec tiure goltvaz

Verse: 5    und manegen guldînen klôz.
Verse: 6    den künec wênec des verdrôz,

Verse: 7    er envultes im vier soumschrîn.
Verse: 8    gesteines muoste ouch vil dar în.

Verse: 9    dô si gevüllet lâgen,
Verse: 10    knappen die des phlâgen

Verse: 11    wâren wol gekleidet und geriten.
Verse: 12    dâ enwart jâmer niht vermiten,

Verse: 13    dô er vür sîne muoter gienc
Verse: 14    und si in sô vaste zuo ir vienc.

Verse: 15    "fil li roi Gandîn,
Verse: 16    wiltû niht langer bî mir sîn ?"

Verse: 17    sprach daz wîplîche wîp.
Verse: 18    "ouwê nû truoc dich doch mîn lîp:

Verse: 19    dû bist ouch Gandînes kint.
Verse: 20    ist got an siner helfe blint

Verse: 21    oder ist er dran betoubet,
Verse: 22    daz er mir niht geloubet?

Verse: 23    sol ich nû niuwen kumber haben?
Verse: 24    ich hân mîns herzen kraft begraben,

Verse: 25    die süeze mîner ougen:
Verse: 26    wil er mich vürbaz rouben

Verse: 27    und ist doch ein rihtære,
Verse: 28    sô liuget mir daz mære

Verse: 29    als man von sîner helfe saget,
Verse: 30    sît er an mir ist sus verzaget."




Chapter: 11 
11


Verse: 1    dô sprach der junge Anschevîn:
Verse: 2    "got trœste iuch, vrouwe, des vater mîn:

Verse: 3    den suln wir beidiu gerne klagen.
Verse: 4    iu enmac nie man von mir gesagen

Verse: 5    deheiniu klagelîchiu leit.
Verse: 6    ich var durch mîne werdekeit

Verse: 7    nâch ritterschaft in vremdiu lant.
Verse: 8    vrouwe, ez ist sus bewant."

Verse: 9    dô sprach siu küneginne:
Verse: 10    "sît dû nâch hôher minne

Verse: 11    wendes dienest unde muot,
Verse: 12    lieber sun, lâ dir mîn guot,

Verse: 13    ûf die vart niht versmâhen.
Verse: 14    heiz von mir emphâhen

Verse: 15    dîne kamerære
Verse: 16    vier soumschrîn swære:

Verse: 17    dâ ligent inne phelle breit,
Verse: 18    ganze die man nie versneit,

Verse: 19    und manec tiure samît.
Verse: 20    süezer man, lâ mich die zît

Verse: 21    hœren, wenne dû wider kums:
Verse: 22    an mînen vreuden dû mir vrums."

Verse: 23    "vrouwe, des enweiz ich niht,
Verse: 24    in welhem lande man mich siht:

Verse: 25    wan swar ich von iu kêre,
Verse: 26    ir habet nâch ritters êre

Verse: 27    iuwer werdekeit an mir getân.
Verse: 28    ouch hât mich der künec lân

Verse: 29    als im mîn dienest danken sol.
Verse: 30    ich getrûwe iu des vil wol,




Chapter: 12 
12


Verse: 1    daz ir in deste werder hât,
Verse: 2    swie joch mir mîn dinc ergât."

Verse: 3    als uns diu âventiure saget,
Verse: 4    dô hete der helt unverzaget

Verse: 5    emphangen durch liebe kraft
Verse: 6    und durch wîplîch geselleschaft

Verse: 7    kleinœtes tûsent marke wert.
Verse: 8    swâ noch ein jude phandes gert,

Verse: 9    er möhtez dâ vür emphâhen,
Verse: 10    ez endorfte im niht versmâhen.

Verse: 11    daz sande im ein sîn vriundin.
Verse: 12    an sînem dienste lac gewin,

Verse: 13    der wîbe minne und ir gruoz:
Verse: 14    doch wart im selten kumbers buoz.

Verse: 15    urloup nam der wîgant.
Verse: 16    muoter, bruoder noch des lant

Verse: 17    sîn ouge nimmer mêr erkôs:
Verse: 18    dar an doch maneger vil verlôs,

Verse: 19    der sich hete an im erkant,
Verse: 20    ê daz er wære dan gewant,

Verse: 21    mit deheiner slahte günste zil.
Verse: 22    den wart von im gedanket vil:

Verse: 23    es dûhte in mêre denne genuoc.
Verse: 24    durch sîne zuht er nie gewuoc

Verse: 25    daz siz tæten umbe reht:
Verse: 26    sîn muot was ebener denne sleht.

Verse: 27    swer selbe saget wie wert er sî,
Verse: 28    dâst lîhte eine ungeloube bî:

Verse: 29    es solden die umbesæzen jehen
Verse: 30    und ouch die hêten gesehen




Chapter: 13 
13


Verse: 1    sîniu werc dâ er vremde wære,
Verse: 2    sô geloupte man daz mære.

Verse: 3    Gahmuret der site phlac,
Verse: 4    den rehtiu mâze widerwac

Verse: 5    und ander schanze enkeine:
Verse: 6    sîn rüemen daz was kleine,

Verse: 7    grôze êre er lîdenlîche leit,
Verse: 8    der lôse wille in gar vermeit.

Verse: 9    doch wânde der gevüege
Verse: 10    daz niemen krône trüege,

Verse: 11    künec, keiser, keiserîn,
Verse: 12    des massenîe er wolde sîn,

Verse: 13    niwan eines der die hœsten hant
Verse: 14    trüege ûf erde über elliu lant:

Verse: 15    der wille in sînem herzen lac.
Verse: 16    im wart gesaget, ze Baldac

Verse: 17    wære ein sô gewaldec man
Verse: 18    daz im der erde undertân

Verse: 19    diu zwei teil wæren oder mêr.
Verse: 20    sîn name heidensch was sô hêr,

Verse: 21    daz man in hiez der bâruc.
Verse: 22    er hete an krefte alsolhen zuc,

Verse: 23    vil künege wâren sîne man,
Verse: 24    mit gekrôntem lîbe undertân.

Verse: 25    des bâruc ambet hiute stêt.
Verse: 26    seht wie man kristen ê begêt

Verse: 27    ze Rôme, als uns der touf vergiht,
Verse: 28    heidensch orden man dort siht:

Verse: 29    ze Baldac nement si ir bâbestreht.
Verse: 30    daz dunket si âne krümben sleht:




Chapter: 14 
14


Verse: 1    der bâruc in vür sünde
Verse: 2    gît wandels urkünde.

Verse: 3    zwêne bruoder von Babilôn,
Verse: 4    Pompêjus und Ipomidôn,

Verse: 5    den nam der bâruc Nînivê.
Verse: 6    daz was al ir vordern ê:

Verse: 7    si tâten wer mit krefte schîn.
Verse: 8    dar kom der junge Anschevîn:

Verse: 9    dem wart der bâruc vil holt.
Verse: 10    jâ nam nâch dienste aldâ den solt

Verse: 11    Gahmuret der werde man.
Verse: 12    nû erloubet im daz er müeze hân

Verse: 13    ander wâpen denne im Gandîn
Verse: 14    dâ vor gap, der vater sîn.

Verse: 15    der herre phlac mit gernden siten
Verse: 16    ûf sîne kovertiur gesniten

Verse: 17    anker lieht hermîn:
Verse: 18    dâ nâch muoste ouch daz ander sîn,

Verse: 19    ûf sînem schilde und an der wât.
Verse: 20    noch grüener denne ein smârât

Verse: 21    was geprüevet sîn gereite gar
Verse: 22    und nâch dem achmardî vâr:

Verse: 23    daz ist ein sîdîn lachen.
Verse: 24    dar ûz hiez er im machen

Verse: 25    wâpenroc und kursît
Verse: 26    (ez ist bezzer denne der samît),

Verse: 27    hermîn anker drûf genæt,
Verse: 28    guldîniu seil dran gedræt.

Verse: 29    sîne anker heten niht bekort
Verse: 30    ganzes landes noch landes ort:




Chapter: 15 
15


Verse: 1    dâ enwâren si ninder în geslagen.
Verse: 2    der herre muoste vürbaz tragen

Verse: 3    disen wâpenlîchen last
Verse: 4    in manegiu lant, der werde gast,

Verse: 5    nâch dem anker disiu mâl,
Verse: 6    wande er deheiner slahte twâl

Verse: 7    hete ninder noch gebite.
Verse: 8    wie vil er lande durchrite

Verse: 9    und in schiffen umbevüere?
Verse: 10    ob ich iu dâ nâch swüere,

Verse: 11    sô saget iu ûf mînen eit
Verse: 12    mîn ritterlîchiu sicherheit,

Verse: 13    als mir diu âventiure giht.
Verse: 14    ich enhân nû mêr geziuges niht.

Verse: 15    diu saget, sîn manlîchiu kraft
Verse: 16    behielt den prîs in heidenschaft,

Verse: 17    ze Marroch und ze Persiâ.
Verse: 18    sîn hant bezalde ouch anderswâ,

Verse: 19    ze Dômas und ze Hâlap
Verse: 20    und swâ man ritterschaft dâ gap,

Verse: 21    z Arâbîe und vor Arâbî,
Verse: 22    daz er was gegenstrîtes vrî

Verse: 23    vor ieslîchem einem man.
Verse: 24    disen ruoft er dâ gewan.

Verse: 25    sîns herzen gir nâch prîse greif:
Verse: 26    ir aller tât vor im zesleif

Verse: 27    und was vil nâch entnihtet.
Verse: 28    sus was ie der berihtet,

Verse: 29    der gein im tjostierens phlac.
Verse: 30    man jach im des ze Baldac,




Chapter: 16 
16


Verse: 1    sîn ellen strebete sunder wanc.
Verse: 2    von dan vuor er gein Zazamanc

Verse: 3    in daz künecrîche.
Verse: 4    die klageten al gelîche

Verse: 5    îsenharten, der den lîp
Verse: 6    in dienste verlôs umbe ein wîp:

Verse: 7    des twanc in Belacâne.
Verse: 8    diu süeze valsches âne,

Verse: 9    daz si im ir minne nie gebôt,
Verse: 10    des lac er nâch ir minne tôt.

Verse: 11    den râchen sîne mâge
Verse: 12    offenlîche und an der lâge:

Verse: 13    die vrouwen twungen si mit her.
Verse: 14    diu was mit ellenthafter wer,

Verse: 15    dô Gahmuret kom in ir lant,
Verse: 16    daz von Schotten Vridebrant

Verse: 17    mit schiffes her verbrande,
Verse: 18    ê daz er dannen wande.

Verse: 19    nû hœret wie unser ritter var.
Verse: 20    daz mer warf in mit sturme dar,

Verse: 21    sô daz er kûme iedoch genas.
Verse: 22    gein der küneginne palas

Verse: 23    kom er gesigelt in die habe:
Verse: 24    dâ wart er vil geschouwet abe.

Verse: 25    dô sach er ûz an daz velt:
Verse: 26    dâ was geslagen manec zelt

Verse: 27    alumbe die stat, wan gein dem mer.
Verse: 28    dâ lâgen zwei kreftegiu her.

Verse: 29    dô hiez er vrâgen der mære,
Verse: 30    wes diu burc wære:




Chapter: 17 
17


Verse: 1    [wan ir künde nie gewan
Verse: 2    er noch dehein sin schifman.]

Verse: 3    si tæten sînen boten kunt,
Verse: 4    ez wære Patelamunt.

Verse: 5    daz wart im minneclîche enboten.
Verse: 6    si manden in bî ir goten

Verse: 7    daz er in hülfe: des wære in nôt,
Verse: 8    si enrüngen niht wan umbe den tôt.

Verse: 9    dô der junge Anschevîn
Verse: 10    vernam ir kumberlîchen pîn,

Verse: 11    er bôt sîn dienest umbe guot,
Verse: 12    als noch vil dicke ein ritter tuot,

Verse: 13    oder daz si im sageten umbe waz
Verse: 14    er solde doln der vînde haz.

Verse: 15    dô sprach ûz einem munde
Verse: 16    der sieche und der gesunde,

Verse: 17    daz im wære al gemeine
Verse: 18    ir golt und ir gesteine,

Verse: 19    des solde er alles herre wesen
Verse: 20    und der möhte wol bî in genesen.

Verse: 21    doch bedorfte er wênec soldes:
Verse: 22    von Arâbî des goldes

Verse: 23    hete er manegen knollen brâht.
Verse: 24    liute vinster sô diu naht

Verse: 25    wâren alle die von Zazamanc.
Verse: 26    bî den dûhte in diu wîle lanc:

Verse: 27    doch hiez er herberge nemen.
Verse: 28    des mohte ouch si vil wol gezemen,

Verse: 29    daz si im die besten gâben.
Verse: 30    die vrouwen dennoch lâgen




Chapter: 18 
18


Verse: 1    zen venstern unde sâhen dar:
Verse: 2    si næmen des vil rehte war,

Verse: 3    sîne knappen und sîn harnas,
Verse: 4    wie daz gefeitieret was.

Verse: 5    dô truoc der helt milde
Verse: 6    ûf einem hermîn schilde

Verse: 7    ich enweiz wie manegen zobelbalc:
Verse: 8    der küneginne marschalc

Verse: 9    hetez vür einen anker grôz.
Verse: 10    ze sehen in wênec dar verdrôz.

Verse: 11    dô muosten sîniu ougen jehen
Verse: 12    daz er hete ê gesehen

Verse: 13    disen ritter oder sînen schîn.
Verse: 14    daz muoste z Alexandrîe sîn,

Verse: 15    dô der bâruc dâ vor lac:
Verse: 16    sînen prîs dâ niemen widerwac.

Verse: 17    sus vuor der muotes rîche
Verse: 18    in die stat behagenlîche.

Verse: 19    zehen soumære hiez er vazzen.
Verse: 20    die zogeten hin die gazzen:

Verse: 21    dâ riten zweinzec knappen nâch.
Verse: 22    sîn bovel man dort vor ersach:

Verse: 23    garzûne, koche und ir knaben
Verse: 24    heten sich hin vür erhaben.

Verse: 25    stolz was sîn gesinde.
Verse: 26    zwelf wol geborner kinde

Verse: 27    dâ hinden nâch den knappen riten
Verse: 28    an guoter zuht mit süezen siten:

Verse: 29    etslîcher was ein Sarrazîn.
Verse: 30    dar nâch muoste ouch getrecket sîn




Chapter: 19 
19


Verse: 1    aht ors mit zindâle
Verse: 2    verdecket al zemâle,

Verse: 3    daz niunde sînen satel truoc.
Verse: 4    ein schilt, des ich ê gewuoc,

Verse: 5    den vuorte ein knappe vil gemeit.
Verse: 6    dâ bî nâch den selben reit

Verse: 7    pusûner, der man noch bedarf.
Verse: 8    ein tambûrer sluoc und warf

Verse: 9    hôhe sîne tambûr.
Verse: 10    den herren nam vil untûr,

Verse: 11    dâ enriten floitierre bî
Verse: 12    und guoter videlære drî.

Verse: 13    den was allen niht ze gâch.
Verse: 14    selbe reit er hinden nâch

Verse: 15    und sîn marnære,
Verse: 16    der wîse und der mære.

Verse: 17    swaz da was volkes inne,
Verse: 18    mœre und mœrinne

Verse: 19    was beidiu wîp unde man.
Verse: 20    der herre schouwen began

Verse: 21    manegen schilt zebrochen,
Verse: 22    mit spern gar durchstochen:

Verse: 23    der was dâ vil gehangen vür
Verse: 24    an die wende und an die tür.

Verse: 25    si heten jâmer unde guft.
Verse: 26    in diu venster gein dem luft

Verse: 27    was gebettet manegem wunden man,
Verse: 28    swenne er dem arzât gewan,

Verse: 29    daz er doch mohte niht genesen.
Verse: 30    der was bî vînden gewesen:




Chapter: 20 
20


Verse: 1    sus warp ie der ungerne vlôch.
Verse: 2    vil orse man im widerzôch

Verse: 3    durchstochen und verhouwen.
Verse: 4    manege tunkele vrouwen

Verse: 5    sach er beidenthalben sîn,
Verse: 6    nâch rabens varwe was ir schîn.

Verse: 7    sîn wirt in minneclîche emphienc,
Verse: 8    daz im nâch vreuden sît ergienc.

Verse: 9    daz was ein ellens rîcher man:
Verse: 10    mit sîner hant hete er getân

Verse: 11    manegen stich unde slac,
Verse: 12    wande er einer porten phlac.

Verse: 13    bî dem er manegen ritter vant,
Verse: 14    die ir hende hiengen in diu bant

Verse: 15    und den ir houbet wâren verbunden.
Verse: 16    die heten solhe wunden,

Verse: 17    daz si doch tâten ritterschaft:
Verse: 18    si heten lâzen niht ir kraft.

Verse: 19    der burcgrâve von der stat
Verse: 20    sînen gast dô minneclîchen bat,

Verse: 21    daz er niht verbære
Verse: 22    al daz sîn wille wære

Verse: 23    über sîn guot und über den lîp.
Verse: 24    er vuorte in dâ er vant sîn wîp,

Verse: 25    diu Gahmureten kuste,
Verse: 26    des in doch wênec geluste.

Verse: 27    dar nâch vuor er enbîzen sân.
Verse: 28    dô diz alsus was getân,

Verse: 29    der marschalc vuor von im zehant
Verse: 30    aldâ er die küneginne vant,




Chapter: 21 
21


Verse: 1    und iesch vil grôziu botenbrôt.
Verse: 2    er sprach: "vrouwe, unser nôt

Verse: 3    ist mit vreuden zegangen.
Verse: 4    den wir hie haben emphangen,

Verse: 5    daz ist ein ritter sô getân,
Verse: 6    daz wir ze vlêhen immer hân

Verse: 7    unsern goten, die in uns brâhten,
Verse: 8    daz si des ie gedâhten."

Verse: 9    "nû sage mir ûf die triuwe dîn,
Verse: 10    wer der ritter müge sîn.'

Verse: 11    "vrouwe, er ist ein degen fier,
Verse: 12    des bâruckes soldier,

Verse: 13    ein Anschevîn von hôher art.
Verse: 14    âvoi wie wênec wirt gespart

Verse: 15    sîn lîp, swâ man in læzet an!
Verse: 16    wie rehte er dar unde dan

Verse: 17    entwîchet unde kêret!
Verse: 18    die vînde er schaden lêret.

Verse: 19    ich sach in strîten schône:
Verse: 20    dâ die Babilône

Verse: 21    Alexandrîe lœsen solden
Verse: 22    und dô si dannen wolden

Verse: 23    den bâruc trîben mit gewalt,
Verse: 24    waz ir dâ nider wart gevalt

Verse: 25    an der schumphentiure!
Verse: 26    dâ begienc der gehiure

Verse: 27    mit sînem lîbe solhe tât,
Verse: 28    si heten vliehens deheinen rât.

Verse: 29    dar zuo hôrte ich in nennen,
Verse: 30    man solde wol erkennen




Chapter: 22 
22


Verse: 1    daz er den prîs über manegiu lant
Verse: 2    hete al eine ze sîner hant."

Verse: 3    "nû sich et wenne oder wie
Verse: 4    und vüege daz er mich spreche hie.

Verse: 5    wir hân doch vride al disen tac:
Verse: 6    dâ von der helt wol rîten mac

Verse: 7    her ûf ze mir oder sol ich dar?
Verse: 8    erst anders denne wir gevar:

Verse: 9    ouwî wan tæte im daz niht wê!
Verse: 10    daz hete ich gerne ervunden ê,

Verse: 11    ob mirz die mîne rieten:
Verse: 12    ich solde im êre bieten,

Verse: 13    geruochet er mir nâhen.
Verse: 14    wie sol ich in emphâhen?

Verse: 15    ist er mir dar zuo wol geborn,
Verse: 16    daz mîn kus niht si verlorn ?"

Verse: 17    "vrouwe, erst vür küneges künne erkant:
Verse: 18    des sî mîn lîp genennet phant.

Verse: 19    vrouwe, ich wil iuwern vürsten sagen,
Verse: 20    daz si rîchiu kleider tragen

Verse: 21    und daz si vor iu bîten,
Verse: 22    unz daz wir zuo ziu rîten:

Verse: 23    daz saget ir iuwern vrouwen gar.
Verse: 24    wan swenne ich nû hin nider var,

Verse: 25    sô bringe ich iu den werden gast,
Verse: 26    dem süezer tugende nie gebrast."

Verse: 27    harte wênec des verdarp,
Verse: 28    vil behendeclîchen warp

Verse: 29    der marschalc sîner vrouwen bete.
Verse: 30    balde wart dô Gahmurete




Chapter: 23 
23


Verse: 1    rîchiu kleider dar getragen,
Verse: 2    diu legete er an: sus hôrte ich sagen,

Verse: 3    daz diu tiure wæren.
Verse: 4    anker die swæren

Verse: 5    von arâbischem golde
Verse: 6    wâren drûfe als er wolde.

Verse: 7    dô saz der minnen geltes lôn
Verse: 8    ûf ein ors, daz ein Babilôn

Verse: 9    gein im durch tjostieren reit:
Verse: 10    den stach er drabe, daz was dem leit.

Verse: 11    ob sîn wirt iht mit im var?
Verse: 12    er und sîne ritter gar:

Verse: 13    jâ deiswâr, si sint es vrô.
Verse: 14    si riten mit ein ander dô

Verse: 15    und erbeizten vor dem palas,
Verse: 16    dâ manec ritter ûfe was:

Verse: 17    die muosten wol gekleidet sîn.
Verse: 18    sîniu kinder liefen vor im în,

Verse: 19    ie zwei ein ander an der hant.
Verse: 20    ir herre manege vrouwen vant,

Verse: 21    gekleidet wünneclîche.
Verse: 22    der küneginne rîche

Verse: 23    ir ougen vuocten hôhen pîn,
Verse: 24    dô si gesach den Anschevîn

Verse: 25    (der was minneclîch gevar),
Verse: 26    daz er entslôz ir herze gar,

Verse: 27    ez wære ir liep oder leit:
Verse: 28    daz beslôz dâ vor ir wîpheit.

Verse: 29    ein wênec si gein im dô trat,
Verse: 30    ir gast si sich küssen bat.




Chapter: 24 
24


Verse: 1    si nam in selbe mit der hant,
Verse: 2    gein den vînden an die want

Verse: 3    sâzen si in diu venster wît
Verse: 4    ûf einen kulter, gesteppet samît,

Verse: 5    dar under ein weichez bette lac.
Verse: 6    ist iht liehters denne der tac,

Verse: 7    dem gelîchte niht diu künegin.
Verse: 8    si hete wîplîchen sin

Verse: 9    und was aber anders ritterlîch:
Verse: 10    der touwegen rôsen ungelîch,

Verse: 11    nâch swarzer varwe was ir schîn,
Verse: 12    ir krône ein liehter rubîn.

Verse: 13    ir houbet man dâ durch sach.
Verse: 14    diu wirtîn zir gaste sprach,

Verse: 15    daz ir liep wære sîn komen.
Verse: 16    "herre, ich hân von iu vernomen

Verse: 17    vil ritterlîcher werdekeit.
Verse: 18    durch iuwer zuht lât iu niht wesen leit,

Verse: 19    ob ich iu mînen kumber klage,
Verse: 20    den ich nâhe in mînem herzen trage."

Verse: 21    "mîn helfe iuch, vrouwe, niht irret.
Verse: 22    swaz iu war oder wirret,

Verse: 23    swâ daz wenden sol mîn hant,
Verse: 24    diu sî ze dienste dar benant.

Verse: 25    ich bin niht wan einec man:
Verse: 26    swer iu tuot oder hât getân,

Verse: 27    dâ biute ich gegen mînen schilt.
Verse: 28    die vînde wênec des bevilt."

Verse: 29    mit zühten sprach ein vürste sân:
Verse: 30    "hete wir einen houbetman,




Chapter: 25 
25


Verse: 1    wir solden vînde wênec sparn,
Verse: 2    sît Vridebrant ist hin gevarn.

Verse: 3    der lœset dort sîn eigen lant:
Verse: 4    ein künec, heizet Hernant,

Verse: 5    den er durch Herlinde sluoc,
Verse: 6    des mâge tuont im leit genuoc,

Verse: 7    si enwellent sichs niht mâzen.
Verse: 8    er hât hie helde lâzen,

Verse: 9    den herzogen Hiutegêr,
Verse: 10    des rittertât uns manegiu sêr

Verse: 11    vrumt, und sîn geselleschaft.
Verse: 12    ir strît hât kunst unde kraft.

Verse: 13    sô hât hie manegen soldier
Verse: 14    von Normandie Gaschier,

Verse: 15    der wîse degen hêre.
Verse: 16    noch hât hie ritter mêre

Verse: 17    Kailet von Hoskurast.
Verse: 18    manegen zornegen gast

Verse: 19    die bræhten alle in ditze lant,
Verse: 20    der Schotten künec Vridebrant

Verse: 21    und sîner genôze viere.
Verse: 22    mit manegem soldiere

Verse: 23    westerhalp dort an dem mer
Verse: 24    dâ liget îsenhartes her

Verse: 25    mit vliezenden ougen.
Verse: 26    offenlîch noch tougen

Verse: 27    gesach si nimmer mêr dehein man,
Verse: 28    si enmüesten jâmers wunder hân.

Verse: 29    ir herzen regen die güsse warp,
Verse: 30    sît an der tjost ir herre starp."




Chapter: 26 
26


Verse: 1    der gast zer wirtinne
Verse: 2    sprach mit ritters sinne:

Verse: 3    saget mir, ob irs geruochet,
Verse: 4    durch waz man iuch sô suochet

Verse: 5    zornlîche mit gewalt.
Verse: 6    ir habet sô manegen degen balt:

Verse: 7    mich müet daz si sint verladen
Verse: 8    mit vînde hazze nâch ir schaden."

Verse: 9    "daz sage ich iu, herre, sît irs gert.
Verse: 10    mir diende ein ritter, der was wert:

Verse: 11    sîn lîp was tugende ein bernde rîs.
Verse: 12    der helt was küene unde wîs,

Verse: 13    der triuwe ein reht beklibeniu vruht.
Verse: 14    sîn zuht wac vür alle zuht.

Verse: 15    der was noch kiuscher denne ein wîp,
Verse: 16    vrecheit und ellen truoc sîn lîp.

Verse: 17    sô engewuohs an ritter milder hant
Verse: 18    vor im nie über elliu lant.

Verse: 19    ich enweiz waz nâch uns sül geschehen:
Verse: 20    des lâzen ander liute jehen.

Verse: 21    er was gein valscher vuore ein tôr,
Verse: 22    in swarzer varwe als ich ein môr.

Verse: 23    sîn vater hiez Tankanîs,
Verse: 24    ein künec, der hete ouch hôhen prîs.

Verse: 25    mîn vriunt der hiez îsenhart.
Verse: 26    mîn wîpheit was unbewart,

Verse: 27    dô ich sîn dienst nâch minne emphienc.
Verse: 28    daz ez im nâch vreuden niht ergienc,

Verse: 29    des muoz ich immer jâmer tragen.
Verse: 30    si wænent daz ich in schuof erslagen:




Chapter: 27 
27


Verse: 1    verrâtens ich doch wênec kan.
Verse: 2    swie mich des zîhen sîne man,

Verse: 3    er was mir lieber danne in.
Verse: 4    âne geziuge ich des niht bin,

Verse: 5    mit den ichz sol bewæren noch:
Verse: 6    die rehten wârheit wizzen doch

Verse: 7    mîne gote und ouch die sîne.
Verse: 8    er gap mir manege pîne.

Verse: 9    nû hât mîn schamdiu wîpheit
Verse: 10    sîn lôn erlenget und mîn leit.

Verse: 11    dem helde erwarp mîn magetuom
Verse: 12    an ritterschefte manegen ruom.

Verse: 13    dô versuochte ich in, ob er kunde sîn
Verse: 14    ein vriunt: daz wart vil balde schîn.

Verse: 15    er gap durch mich sîn harnas
Verse: 16    enwec, daz als ein palas

Verse: 17    dort stêt, daz ist sîn hôchgezelt:
Verse: 18    daz brâhten Schotten ûf diz velt.

Verse: 19    dô daz der helt âne wart,
Verse: 20    sîn lîp dô wênec wart gespart:

Verse: 21    des lebens in dâ nâch verdrôz.
Verse: 22    manege âventiure suochte er blôz:

Verse: 23    dô diz alsô was,
Verse: 24    ein vürste Protizilas

Verse: 25    (der hiez mîn massenîe),
Verse: 26    vor zageheit der vrîe,

Verse: 27    ûz durch âventiure reit,
Verse: 28    dâ grôz schade in niht vermeit,

Verse: 29    zem fôreist in Azagouc.
Verse: 30    ein tjost im sterben niht erlouc,




Chapter: 28 
28


Verse: 1    die er tet ûf einen küenen man,
Verse: 2    der ouch sîn ende aldâ gewan:

Verse: 3    daz was mîn vriunt îsenhart.
Verse: 4    ir ieweder innen wart

Verse: 5    eins spers durch schilt und durch den lîp.
Verse: 6    daz klage ich noch vil armez wîp:

Verse: 7    ir beider tôt mich immer müet,
Verse: 8    ûf mîner triuwe jâmer blüet.

Verse: 9    ich enwart nie wîp deheines man."
Verse: 10    Gahmureten dûhte sân,

Verse: 11    swie si wære ein heidenin,
Verse: 12    mit triuwen wîplîcher sin

Verse: 13    in wîbes herze nie geslouf.
Verse: 14    ir kiusche was ein reiner touf

Verse: 15    und ouch der regen der si begôz,
Verse: 16    der wâc der von ir ougen vlôz

Verse: 17    ûf ir zobel und an ir brust.
Verse: 18    riuwen phlege was ir gelust

Verse: 19    und rehtiu jâmers lêre.
Verse: 20    si sagete im vürbaz mêre:

Verse: 21    "dô suochte mich von über mer
Verse: 22    der Schotten künec mit sînem her:

Verse: 23    der was sîns œheimes sun.
Verse: 24    si enmohten mir niht mêr getuon

Verse: 25    schaden, denne mir was geschehen
Verse: 26    an îsenharte, ich muoz es jehen."

Verse: 27    diu vrouwe ersiufte dicke.
Verse: 28    durch die zeher manege blicke

Verse: 29    si schamde gastlîchen sach
Verse: 30    an Gahmureten: dô verjach




Chapter: 29 
29


Verse: 1    ir ougen dem herzen sân,
Verse: 2    daz er wære wol getân.

Verse: 3    si kunde ouch liehte varwe spehen,
Verse: 4    wan si hete ê gesehen

Verse: 5    manegen liehten heiden.
Verse: 6    aldâ wart under in beiden

Verse: 7    ein vil getriulîchiu ger:
Verse: 8    sie sach dar und er sach her.

Verse: 9    dar nâch hiez si schenken sân.
Verse: 10    torste si, daz wære verlân:

Verse: 11    ez müete si daz ez niht beleip,
Verse: 12    wande ez die ritter ie vertreip,

Verse: 13    die gerne sprâchen wider diu wîp.
Verse: 14    doch was ir lîp sîn selbes lîp:

Verse: 15    ouch hete er ir den muot gegeben,
Verse: 16    sîn leben was der vrouwen leben.

Verse: 17    dô stuont er ûf unde sprach:
Verse: 18    "vrouwe, ich tuon iu ungemach:

Verse: 19    ich kan ze lange sitzen.
Verse: 20    daz entuon ich niht mit witzen.

Verse: 21    mir ist vil dienestlîchen leit
Verse: 22    daz iuwer kumber ist sô breit.

Verse: 23    vrouwe, gebietet über mich:
Verse: 24    swar ir welt, darst mîn gerich.

Verse: 25    ich diene iu allez daz ich sol."
Verse: 26    si sprach: "herre, des trûwe ich wol."

Verse: 27    der burcgrâve, sîn wirt,
Verse: 28    nû vil wênec des verbirt,

Verse: 29    er enkürze im sîne stunde.
Verse: 30    ze vrâgen er begunde,




Chapter: 30 
30


Verse: 1    ob er wolde baneken rîten,
Verse: 2    "und schouwet wâ wir strîten,

Verse: 3    wie unser porten sîn behuot."
Verse: 4    Gahmuret der degen guot

Verse: 5    sprach, er wolde gerne sehen
Verse: 6    wâ ritterschaft dâ wære geschehen.

Verse: 7    her abe mit dem helde reit
Verse: 8    manec ritter vil gemeit,

Verse: 9    hie der wîse, dort der tumbe.
Verse: 10    si vuorten in alumbe

Verse: 11    vür sehzehen porten.
Verse: 12    si beschieden im mit worten,

Verse: 13    daz der deheiniu wære bespart,
Verse: 14    "sît würde gerochen îsenhart

Verse: 15    an uns mit zorne, naht noch tac.
Verse: 16    unser strît vil nâch gelîche wac:

Verse: 17    man beslôz ir deheine sît.
Verse: 18    uns gît vor ehte porten strît

Verse: 19    des getriuwen îsenhartes man.
Verse: 20    die hânt uns schaden vil getân:

Verse: 21    si ringent mit zorne,
Verse: 22    die vürsten wol geborne,

Verse: 23    des küneges man von Azagouc.
Verse: 24    vor ieslîcher porte vlouc

Verse: 25    ob küener schar ein liehter vane,
Verse: 26    ein durchstochen ritter drane.

Verse: 27    "als îsenhart den lîp verlôs,
Verse: 28    sîn volc diu wâpen dâ nâch kôs:

Verse: 29    dâ gein hân wir einen site,
Verse: 30    dâ stille wir ir jâmer mite.




Chapter: 31 
31


Verse: 1    unser vanen sint erkant,
Verse: 2    daz zwêne vinger ûz der hant

Verse: 3    biutet gein dem eide,
Verse: 4    ir engeschæhe nie sô leide,

Verse: 5    wan sît daz îsenhart lac tôt
Verse: 6    (mîner vrouwen vrumte er herzen nôt),

Verse: 7    sus stêt diu künegîn gemâl,
Verse: 8    vrou Belacâne, sunder twâl

Verse: 9    in einen blanken samît
Verse: 10    gesniten von swarzer varwe sît

Verse: 11    daz wir diu wâpen kurn an in:
Verse: 12    ir triuwe an jâmer hât gewin.

Verse: 13    die steckent ob den porten hôch.
Verse: 14    vür die andern ehte uns suochet noch

Verse: 15    des stolzen Vridebrandes her,
Verse: 16    die getouften von über mer.

Verse: 17    ieslîcher porte ein vürste phliget,
Verse: 18    der sich strîtes ûz bewiget

Verse: 19    mit sîner baniere.
Verse: 20    wir haben Gaschiere

Verse: 21    gevangen einen grâven abe.
Verse: 22    der biutet uns vil grôze habe:

Verse: 23    der ist Kailetes swester sun.
Verse: 24    swaz uns der nû mac getuon,

Verse: 25    daz muoz ie dirre gelten.
Verse: 26    solh gelücke kumt uns selten.

Verse: 27    grüenes angers, lützel sandes,
Verse: 28    wol drîzec poinder landes

Verse: 29    ist zir gezelten von dem graben:
Verse: 30    dâ wirt vil manec tjost erhaben."




Chapter: 32 
32


Verse: 1    disiu mære sagete im gar sîn wirt:
Verse: 2    "ein ritter nimmer daz verbirt,

Verse: 3    er enkome durch tjostieren vür.
Verse: 4    ob der sîn dienest dort verlür

Verse: 5    an ir, diu in sande her,
Verse: 6    waz hülfe in denne sîn vrechiu ger?

Verse: 7    daz ist der stolze Hiutegêr.
Verse: 8    von dem mac ich wol sprechen mêr,

Verse: 9    sît wir hie sîn besezzen,
Verse: 10    daz der helt vermezzen

Verse: 11    ie smorgens vil bereite was
Verse: 12    vor der porte gein dem palas.

Verse: 13    ouch ist von dem küenen man
Verse: 14    kleinœtes vil gevüeret dan,

Verse: 15    daz er durch unser schilde stach,
Verse: 16    des man vür grôze koste jach

Verse: 17    sôz die krîgierre brâchen drabe.
Verse: 18    er valte uns manegen ritter abe.

Verse: 19    er læt sich gerne schouwen,
Verse: 20    in lobent ouch unser vrouwen.

Verse: 21    swen wîp lobent, der wirt erkant:
Verse: 22    er hât den prîs ze sîner hant

Verse: 23    und sînes herzen wunne."
Verse: 24    dô hete diu müede sunne

Verse: 25    ir liehten blic hin zir gelesen:
Verse: 26    des banekens muoste ein ende wesen,

Verse: 27    der gast mit sînem wirte reit.
Verse: 28    er vant sîn ezzen al bereit.

Verse: 29    ich muoz iu von ir spîse sagen:
Verse: 30    diu wart mit zühten vür getragen,




Chapter: 33 
33


Verse: 1    man diende in ritterlîche.
Verse: 2    diu küneginne rîche

Verse: 3    kom stolzlîch vür sînen tisch.
Verse: 4    hie stuont der reiger, dort der visch.

Verse: 5    si was durch daz hin zim gevarn,
Verse: 6    si wolde selbe daz bewarn

Verse: 7    daz man sîn phlæge wol ze vromen.
Verse: 8    si was mit juncvrouwen komen.

Verse: 9    si kniete nider (daz was im leit),
Verse: 10    mit ir selber hant si sneit

Verse: 11    dem ritter sîner spîse ein teil.
Verse: 12    diu vrouwe was ir gastes geil.

Verse: 13    dô huop si im sîn trinken dar
Verse: 14    und phlac sîn wol: ouch nam er war,

Verse: 15    wie was gebærde und ir wort.
Verse: 16    zende an sînes tisches ort

Verse: 17    sâzen sîne spilman
Verse: 18    und anderhalp sîn kappelân.

Verse: 19    al schemde er an die vrouwen sach,
Verse: 20    harte blûclîche er sprach:

Verse: 21    "ich enhân michs niht genietet,
Verse: 22    als ir mirz, vrouwe, bietet,

Verse: 23    mîns lîbes mit solhen êren.
Verse: 24    ob ich iuch solde lêren,

Verse: 25    sô wære hînt an iuch gegert
Verse: 26    eins phlegens des ich wære wert,

Verse: 27    sô enwært ir niht her abe geriten.
Verse: 28    getar ich iuch des, vrouwe, biten,

Verse: 29    sô lât mich in der mâze leben.
Verse: 30    ir habet mir êre ze vil gegeben."




Chapter: 34 
34


Verse: 1    si enwolde ouch des niht lâzen,
Verse: 2    dâ sîniu kinder sâzen,

Verse: 3    diu bat si ezzen vaste.
Verse: 4    diz bôt si zêren ir gaste.

Verse: 5    gar disiu juncherrelîn
Verse: 6    wâren holt der künegîn.

Verse: 7    dar nâch diu vrouwe niht vergaz,
Verse: 8    si gienc ouch dâ der wirt saz

Verse: 9    und des wîp, diu burcgrâvîn.
Verse: 10    den becher huop diu künegîn,

Verse: 11    si sprach: "lâ dir bevolhen sîn
Verse: 12    unsern gast: diu êre ist dîn.

Verse: 13    dar umbe ich iuch beide mane."
Verse: 14    si nam urloup, dô gienc si dane

Verse: 15    aber hin wider vür ir gast.
Verse: 16    des herze truoc ir minnen last,

Verse: 17    daz selbe ouch ir von im geschach,
Verse: 18    des ir herze und ir ougen jach:

Verse: 19    diu muostens mir ir phlihte hân.
Verse: 20    mit zühten sprach diu vrouwe sân:

Verse: 21    "gebietet, herre, (swes ir gert,
Verse: 22    daz schaffe ich, wande ir sît es wert)

Verse: 23    und lât mich iuwer urloup hân.
Verse: 24    wirt iu guot gemach getân,

Verse: 25    des vreu wir uns über al."
Verse: 26    guldîn wæren ir kerzstal,

Verse: 27    vier lieht man vor ir drûfe truoc.
Verse: 28    si reit ouch dâ si vant genuoc.

Verse: 29    si enâzen ouch niht langer dô.
Verse: 30    der herre was trûrec unde vrô:




Chapter: 35 
35


Verse: 1    er vreute sich daz man im bôt
Verse: 2    grôz êre. in twanc doch ander nôt:

Verse: 3    daz was diu strenge minne,
Verse: 4    diu neiget hôhe sinne.

Verse: 5    diu wirtîn vuor an ir gemach,
Verse: 6    harte schiere daz geschach.

Verse: 7    man bette dem helde sân,
Verse: 8    daz wart mit vlîze getân.

Verse: 9    der wirt sprach zem gaste:
Verse: 10    "nû sult ir slâfen vaste

Verse: 11    und ruowet hînt: des wirt iu nôt."
Verse: 12    der wirt den sînen daz gebôt,

Verse: 13    si solden dannen kêren.
Verse: 14    des gastes junchêren,

Verse: 15    der bette alumbe daz sîne lac,
Verse: 16    ir houbet dran, wande er des phlac.

Verse: 17    dâ stuonden kerzen harte grôz
Verse: 18    und brunnen lieht. den helt verdrôz

Verse: 19    daz sô lanc was diu naht.
Verse: 20    in brâhte dicke in ungemach

Verse: 21    diu swarze mœrinne,
Verse: 22    des landes küneginne.

Verse: 23    er want sich dicke als ein wit,
Verse: 24    daz im kracheten diu lit:

Verse: 25    strît und minne was sîn ger.
Verse: 26    nû wünschet daz mans in gewer.

Verse: 27    sîn herze gap von stôzen schal,
Verse: 28    wande ez nâch ritterschefte swal.

Verse: 29    daz begunde dem recken
Verse: 30    sîne brust beide erstrecken,




Chapter: 36 
36


Verse: 1    sô diu senewe tuot daz armbrust.
Verse: 2    dâ was ze dræte sîn gelust.

Verse: 3    der herre âne allez slâfen lac,
Verse: 4    unz er erkôs den grâwen tac:

Verse: 5    der gap dennnoch niht liehten schîn.
Verse: 6    dô solde ouch dâ bereite sîn

Verse: 7    zer messe ein sîn kappelân,
Verse: 8    der sanc si gote und ime sân.

Verse: 9    sîn harnas truoc man sâ zehant.
Verse: 10    er reit dâ man tjostieren vant.

Verse: 11    dô saz er an der stunde
Verse: 12    ûf ein ors, daz beidiu kunde

Verse: 13    hurtlîchen dringen
Verse: 14    und snelleclîchen springen,

Verse: 15    bekêrec swâ manz wider zôch:
Verse: 16    sînen anker ûf dem helme hôch

Verse: 17    man gein der porte vüeren sach.
Verse: 18    aldâ wîp und man verjach,

Verse: 19    si engesæhen nie helt sô wünneclîch,
Verse: 20    ir gote im solden sîn gelîch.

Verse: 21    man vuorte ouch starkiu sper dâ bî.
Verse: 22    wie er gezimieret sî?

Verse: 23    sîn ors von îser truoc ein dach,
Verse: 24    daz was vür slege des gemach.

Verse: 25    dar ûf ein ander decke lac,
Verse: 26    ringe, diu niht swære wac:

Verse: 27    daz was ein grüener samît.
Verse: 28    sîn wâpenroc, sîn kursît

Verse: 29    was ouch ein grüenez achmardî:
Verse: 30    daz was geworht dâ z21Arâbî.




Chapter: 37 
37


Verse: 1    dar an ich liuge niemen.
Verse: 2    sîne schiltriemen,

Verse: 3    swaz der dar zuo gehôrte,
Verse: 4    was ein unverblichen borte

Verse: 5    mit gesteine harte tiure.
Verse: 6    geliutert in dem viure

Verse: 7    was sîn buckel rôt golt.
Verse: 8    sîn dienest nam der minne solt:

Verse: 9    ein scharpher strît in ringe wac.
Verse: 10    diu künegîn in dem venster lac,

Verse: 11    bî ir sâzen vrouwen mêr.
Verse: 12    nû seht, dort hielt ouch Hiutegêr,

Verse: 13    aldâ im ê der prîs geschach.
Verse: 14    dô er disen ritter komen sach

Verse: 15    zuo zim kalopieren hie,
Verse: 16    dô dâhte er: "wenne oder wie

Verse: 17    kom dirre Franzois inz lant?
Verse: 18    wer hât den stolzen her gesant?

Verse: 19    hete ich den vür einen môr,
Verse: 20    sô wære mîn bester sin ein tôr."

Verse: 21    diu doch von sprungen niht beliben,
Verse: 22    ir ors mit sporn si beide triben

Verse: 23    ûz dem walap in die rabîn.
Verse: 24    si tâten ritters ellen schîn:

Verse: 25    der tjost ein ander si niht lugen.
Verse: 26    die sprîzen gein den lüften vlugen

Verse: 27    von des küenen Hiutegêres sper:
Verse: 28    ouch valte in sînes strîtes wer

Verse: 29    hinderz ors ûf daz gras.
Verse: 30    vil ungewent er des was.




Chapter: 38 
38


Verse: 1    er reit ûf in und trat in nider.
Verse: 2    des erholde er sich dicke wider:

Verse: 3    er tet werlîchen willen schîn,
Verse: 4    doch steckete in dem arme sîn

Verse: 5    diu Gahmuretes lanze.
Verse: 6    der iesch fîanze.

Verse: 7    sînen meister hete er vunden.
Verse: 8    "wer hât mich überwunden ?"

Verse: 9    alsô sprach der küene man.
Verse: 10    der sigehafte jach dô sân:

Verse: 11    "ich bin Gahmuret Anschevîn.
Verse: 12    er sprach: "mîn sicherheit sî dîn."

Verse: 13    die emphienc er unde sande in în:
Verse: 14    des muoste er vil geprîset sîn

Verse: 15    von den vrouwen die daz sâhen.
Verse: 16    dort her begunde gâhen

Verse: 17    von Normandîe Gaschier,
Verse: 18    der ellens rîche degen fier,

Verse: 19    der starke tjostiure.
Verse: 20    hie hielt ouch der gehiure

Verse: 21    Gahmuret zer andern tjost bereit.
Verse: 22    sînem sper was daz îser breit

Verse: 23    und der schaft veste.
Verse: 24    aldâ werten die geste

Verse: 25    ein ander: ungelîche ez wac.
Verse: 26    Gaschier dar nider lac

Verse: 27    mit orse mit alle
Verse: 28    von der tjoste valle

Verse: 29    und wart betwungen sicherheit,
Verse: 30    ez wære im liep oder leit.




Chapter: 39 
39


Verse: 1    Gahmuret der wîgant
Verse: 2    sprach: "mir sichert iuwer hant:

Verse: 3    diu was bî manlîcher wer.
Verse: 4    nû rîtet gein der Schotten her

Verse: 5    und bitet si daz si uns verbern
Verse: 6    mit strîte, ob si des wellen gern,

Verse: 7    und komt nâch mir in die stat."
Verse: 8    swaz er gebôt oder bat,

Verse: 9    endehaft ez wart getân:
Verse: 10    die Schotten muosten strîten lân.

Verse: 11    dô kom gevarn Kailet.
Verse: 12    von dem kêrte Gahmuret,

Verse: 13    wande er was sîner muomen sun:
Verse: 14    waz solde er im dô leides tuon?

Verse: 15    der Spânôl rief im nâch genuoc.
Verse: 16    einen strûz er ûf dem helme truoc.

Verse: 17    gezimieret was der man,
Verse: 18    als ich dâ von ze sagen hân,

Verse: 19    mit phelle wît unde lanc.
Verse: 20    daz gevilde nâch dem helde klanc:

Verse: 21    sîne schellen gâben gedœne.
Verse: 22    er bluome an mannes schœne,

Verse: 23    sîn varwe an schœne hielt den strît
Verse: 24    unz an zwêne, die nâch im wuohsen sît,

Verse: 25    Bêâcurs, Lôtes kint,
Verse: 26    und Parzivâl, die dâ niht sint:

Verse: 27    die wâren dennoch ungeborn
Verse: 28    und wurden sît vür schœne erkorn.

Verse: 29    Gaschier in mit dem zoume nam:
Verse: 30    "iuwer wilde wirt vil zam




Chapter: 40 
40


Verse: 1    (daz sage ich iu ûf die triuwe mîn),
Verse: 2    bestêt ir den Anschevîn,

Verse: 3    der mîne sicherheit dort hât.
Verse: 4    ir sult merken mînen rât

Verse: 5    und dar zuo, herre, mîne bete.
Verse: 6    ich hân geheizen Gahmurete

Verse: 7    daz ich iuch alle wende.
Verse: 8    daz lobete ich sîner hende:

Verse: 9    durch mich lât iuwer streben sîn.
Verse: 10    er tuot iu kraft an strîte schîn."

Verse: 11    dô sprach der künec Kailet:
Verse: 12    "ist ez mîn neve Gahmuret,

Verse: 13    fil li roi Gandîn,
Verse: 14    mit dem lâze ich mîn strîten sîn.

Verse: 15    lât mir den zoum." "ich enlâzes niht,
Verse: 16    ê daz mîn ouge alrêst ersiht

Verse: 17    iuwer blôzez houbet.
Verse: 18    daz mîne ist mir betoubet."

Verse: 19    den helm er im her abe dô bant.
Verse: 20    Gahmuret mêr strîtes vant

Verse: 21    (ez was wol mitter morgen dô):
Verse: 22    die von der stat des wâren vrô,

Verse: 23    die dise tjost ersâhen.
Verse: 24    si begunden alle gâhen

Verse: 25    an ir werlîchen letze.
Verse: 26    er was vor in ein netze:

Verse: 27    swaz drunder kom, daz was beslagen.
Verse: 28    ein ander ors, sus hœre ich sagen,

Verse: 29    dar ûf saz der werde:
Verse: 30    daz vlouc und ruorte die erde,




Chapter: 41 
41


Verse: 1    gereht ze beiden sîten,
Verse: 2    küene dâ man solde strîten,

Verse: 3    verhalden unde dræte.
Verse: 4    waz er dar ûfe tæte?

Verse: 5    des muoz ich im vür ellen jehen:
Verse: 6    er reit dâ in môren mohten sehen,

Verse: 7    aldâ die lâgen mit ir her,
Verse: 8    westerhalp dort an dem mer.

Verse: 9    ein vürste Razalîc dâ hiez.
Verse: 10    deheinen tac daz nimmer liez

Verse: 11    der rîcheste von Azagouc
Verse: 12    (sîn geslehte im des niht louc,

Verse: 13    von küneges vrühte was sîn art),
Verse: 14    der huop sich immer dannewart

Verse: 15    durch tjostieren gein der stat.
Verse: 16    aldâ tet sîner krefte mat

Verse: 17    der helt von Anschouwe.
Verse: 18    daz klagete ein swarziu vrouwe,

Verse: 19    diu in hete dar gesant,
Verse: 20    daz in dâ iemen überwant.

Verse: 21    ein knappe bôt al sunder bete
Verse: 22    sînem herren Gahmurete

Verse: 23    ein sper, dem was der schaft ein rôr.
Verse: 24    dâ mite stach er dem môr

Verse: 25    hinderz ors ûf den griez:
Verse: 26    niht langer er in ligen liez,

Verse: 27    dâ twanc in sicherheit sîn hant.
Verse: 28    dô was daz urliuge gelant

Verse: 29    und im ein grôzer prîs geschehen.
Verse: 30    Gahmuret begunde sehen




Chapter: 42 
42


Verse: 1    aht vanen sweimen gein der stat,
Verse: 2    die er balde wenden bat

Verse: 3    den küenen sigelôsen man.
Verse: 4    dar nâch gebôt er im dô sân

Verse: 5    daz er kêrte nâch im în.
Verse: 6    daz tet er, wande ez solde et sîn.

Verse: 7    Gaschier sîn komen ouch niht verbirt,
Verse: 8    an dem innen wart der wirt

Verse: 9    daz sîn gast was komen ûz.
Verse: 10    daz er niht îsen als ein strûz

Verse: 11    und starke vlinse verslant,
Verse: 12    daz machte daz er ir niht envant.

Verse: 13    sîn zorn begunde limmen
Verse: 14    und als ein lewe brimmen.

Verse: 15    dô brach er ûz sîn eigen hâr.
Verse: 16    er sprach: "nû sint mir mîniu jâr

Verse: 17    nâch grôzer tumpheit bewant.
Verse: 18    die gote heten mir gesant

Verse: 19    einen küenen werden gast:
Verse: 20    ist er verladen mit strîtes last,

Verse: 21    sô enmac ich nimmer werden wert.
Verse: 22    waz touc mir schilt unde swert?

Verse: 23    er sol mich schelden, swer michs mane."
Verse: 24    dô kêrte er von den sînen dane,

Verse: 25    gein der porte er vaste ruorte.
Verse: 26    ein knappe im widervuorte

Verse: 27    einen schilt, ûzen und innen dran
Verse: 28    gemâlt als ein durchstochen man,

Verse: 29    geworht in îsenhartes lant.
Verse: 30    einen helm er vuorte ouch in der hant




Chapter: 43 
43


Verse: 1    und ein swert daz Razalîc
Verse: 2    durch ellen brâhte in den wîc.

Verse: 3    dâ was er von gescheiden,
Verse: 4    er küene swarze heiden,

Verse: 5    des lop was virrec unde wît.
Verse: 6    starp er âne toufen sît,

Verse: 7    sô erkenne sich über den degen balt
Verse: 8    der aller wunder hât gewalt.

Verse: 9    dô der burcgrâve daz gesach,
Verse: 10    sô rehte liebe im nie geschach.

Verse: 11    diu wâpen er erkande,
Verse: 12    hin ûz der porte er rande.

Verse: 13    sînen gast sach er dort halden,
Verse: 14    den jungen, niht den alden,

Verse: 15    al gernde strîteclîcher tjost.
Verse: 16    dô nam in Lahfilirost,

Verse: 17    sîn wirt. der zôch in vaste wider,
Verse: 18    er enstach dâ mêr deheinen nider.

Verse: 19    Lahfilirost schahtelacunt
Verse: 20    sprach: "herre, ir sult mir machen kunt,

Verse: 21    hât betwungen iuwer hant
Verse: 22    Razalîgen? unser lant

Verse: 23    ist kamphes sicher immer mêr.
Verse: 24    der ist ob al den môren hêr,

Verse: 25    des getriuwen îsenhartes man,
Verse: 26    die uns den schaden hânt getân.

Verse: 27    sich hât verendet unser nôt.
Verse: 28    ein zornec got in daz gebôt,

Verse: 29    daz si uns hie suochten mit ir her:
Verse: 30    nûst enschumphieret ir wer."




Chapter: 44 
44


Verse: 1    er vuorte in în, daz was im leit.
Verse: 2    diu küneginne im widerreit.

Verse: 3    sînen zoum nam si mit ir hant,
Verse: 4    si entstricte der vinteilen bant.

Verse: 5    der wirt in muoste lâzen.
Verse: 6    sîne knappen niht vergâzen,

Verse: 7    si enkêrten vaste ir herren nâch.
Verse: 8    durch die stat man vüeren sach

Verse: 9    ir gast die küneginne wîs,
Verse: 10    der dâ behalden hete den prîs.

Verse: 11    si erbeizte aldâ sis dûhte zît.
Verse: 12    "wê wie getriuwe ir knappen sît!

Verse: 13    ir wænt verliesen disen man:
Verse: 14    dem wirt âne iuch gemach getân.

Verse: 15    nemt sîn ors und vüert daz hin:
Verse: 16    sîn geselle ich hie bin."

Verse: 17    vil vrouwen er dort ûfe vant.
Verse: 18    entwâpent mit swarzer hant

Verse: 19    wart er von der künegîn.
Verse: 20    ein declachen zobelîn

Verse: 21    und ein bette wol gehêret,
Verse: 22    dar an im wart gemêret

Verse: 23    ein heimlîchiu êre.
Verse: 24    aldâ was niemen mêre:

Verse: 25    die juncvrouwen giengen vür
Verse: 26    und sluzzen nâch in zuo die tür.

Verse: 27    dô phlac diu küneginne
Verse: 28    einer werden süezen minne

Verse: 29    und Gahmuret, ir herzen trût.
Verse: 30    ungelîch was doch ir zweier h^t.




Chapter: 45 
45


Verse: 1    si brâhten ophers vil ir goten,
Verse: 2    die von der stat. waz wart geboten

Verse: 3    dem küenen Razalîge,
Verse: 4    dô er schiet von dem wîge?

Verse: 5    daz leiste er durch triuwe:
Verse: 6    doch wart sîn jâmer niuwe

Verse: 7    nâch sînem herren îsenhart.
Verse: 8    der burcgrâve des innen wart,

Verse: 9    daz er kom: dô wart ein schal.
Verse: 10    dar kômen die vürsten über al

Verse: 11    ûz der künegîn lant von Zazamanc.
Verse: 12    die sageten im des prîses danc,

Verse: 13    den er hete aldâ bezalt.
Verse: 14    ze rehter tjost hete er gevalt

Verse: 15    vier und zweinzec ritter nider
Verse: 16    und zôch ir ors almeistec wider.

Verse: 17    dâ wâren gevangen vürsten drî,
Verse: 18    den reit manec ritter bî

Verse: 19    ze hove ûf den palas.
Verse: 20    entslâfen und enbizzen was

Verse: 21    und wünneclîch gefeitet,
Verse: 22    mit kleidern wol bereitet

Verse: 23    was des hœsten wirtes lîp.
Verse: 24    diu ê hiez maget, diu was nû wîp.

Verse: 25    diu in her ûz vuorte an ir hant,
Verse: 26    si sprach: "mîn lîp und ouch mîn lant

Verse: 27    ist disem ritter undertân,
Verse: 28    ob ez im vînde wellent lân."

Verse: 29    dô wart gevolget Gahmurete
Verse: 30    einer hovelîchen bete:




Chapter: 46 
46


Verse: 1    "gêt nâher, mîn her Razalîc:
Verse: 2    ir sult küssen mîn wîp.

Verse: 3    alsô tuot ouch ir, her Gaschier."
Verse: 4    Hiutegêren den Schotten fier

Verse: 5    bat er si küssen an ir munt,
Verse: 6    der was von sîner tjoste wunt.

Verse: 7    er bat si alle sitzen,
Verse: 8    al stênde sprach er mit witzen:

Verse: 9    "ich sæhe ouch gerne den neven mîn
Verse: 10    möhtez mit sînen hulden sîn,

Verse: 11    der in hie gevangen hât.
Verse: 12    ich enhâns von sippe deheinen rât,

Verse: 13    ich enmüeze in ledec machen."
Verse: 14    diu künegîn begunde lachen.

Verse: 15    si hiez balde nâch im springen:
Verse: 16    dort her begunde dringen

Verse: 17    der minneclîche bêâ cunt.
Verse: 18    der was von ritterschefte wunt

Verse: 19    und hetez ouch dâ vil guot getân.
Verse: 20    Gaschier der Orimân

Verse: 21    in dar brâhte, er was kurtois.
Verse: 22    sîn vater was ein Franzois,

Verse: 23    er was Kailetes swester barn.
Verse: 24    in wîbes dienste er was gevarn.

Verse: 25    er hiez Killirjacac,
Verse: 26    aller manne schœne er widerwac.

Verse: 27    dô in Gahmuret gesach
Verse: 28    (ir antlitze sippe jach,

Verse: 29    diu wâren ein ander vil gelîch),
Verse: 30    er bat die küneginne rîch




Chapter: 47 
47


Verse: 1    in küssen unde vâhen zir.
Verse: 2    er sprach: "nû ginc ouch her ze mir."

Verse: 3    der wirt in kuste selbe dô:
Verse: 4    si wâren ze sehen ein ander vrô.

Verse: 5    Gahmuret sprach aber sân:
Verse: 6    "ouwê junc süezer man,

Verse: 7    waz solde her dîn kranker lîp?
Verse: 8    sage an, gebôt dir daz ein wîp?"

Verse: 9    "die gebietent wênec, herre, mir.
Verse: 10    mich hât mîn veter Gaschier

Verse: 11    her brâht, er weiz wol selbe wie.
Verse: 12    ich hân im tûsent ritter hie

Verse: 13    und stên im dienestlîche bî.
Verse: 14    ze Rœmes in Normandî

Verse: 15    kom ich zer samenunge.
Verse: 16    ich brâhte im helde junge,

Verse: 17    ich vuor von Schampâne durch in.
Verse: 18    nû wil kunst unde sin

Verse: 19    der schade an in kêren,
Verse: 20    ir enwelt iuch selben êren,

Verse: 21    gebietet ir, sô lât in mîn
Verse: 22    geniezen, senften sînen pîn."

Verse: 23    "den rât nim dû vil gar ze dir.
Verse: 24    var dû und mîn her Gaschier

Verse: 25    und brinct mir Kaileten her."
Verse: 26    dô wurben si des heldes ger,

Verse: 27    si brâhten in durch sîne bete.
Verse: 28    dô wart ouch er von Gahmurete

Verse: 29    minneclîche emphangen
Verse: 30    und dicke umbevangen




Chapter: 48 
48


Verse: 1    von der küneginne rîch.
Verse: 2    si kuste den degen minneclîch.

Verse: 3    er was ir mannes muomen sun
Verse: 4    (si mohtez wol mit êren tuon)

Verse: 5    und was von arte ein künec hêr.
Verse: 6    der wirt sprach lachende mêr:

Verse: 7    "got weiz, her Kailet,
Verse: 8    ob ich iu næme Dôlet

Verse: 9    und iuwer lant ze Spâne
Verse: 10    durch den künec von Gascâne,

Verse: 11    der iu dicke tuot mit zornes gir,
Verse: 12    daz wære ein untriuwe an mir,

Verse: 13    wande ir sît mîner muomen kint.
Verse: 14    die besten gar mit iu hie sint,

Verse: 15    der ritterschefte herte.
Verse: 16    wer twanc iuch dirre verte?"

Verse: 17    dô sprach der stolze degen junc:
Verse: 18    "mir gebôt mîn veter Schiltunc,

Verse: 19    des tohter Vridebrant dâ hât,
Verse: 20    daz ich im diende, ez wære sîn rât.

Verse: 21    der hât von sînem wîbe
Verse: 22    hie von mîn eines lîbe

Verse: 23    sehs tûsent ritter wol bekant,
Verse: 24    die tragent werlîche hant.

Verse: 25    ich brâhte ouch ritter mêr durch in,
Verse: 26    der ist ein teil gescheiden hin.

Verse: 27    hie wâren durch die Schotten
Verse: 28    die werlîche rotten.

Verse: 29    im kom von Gruonlanden
Verse: 30    helde zen handen,




Chapter: 49 
49


Verse: 1    zwêne künege mit grôzer kraft.
Verse: 2    die vluot von der ritterschaft

Verse: 3    si brâhten unde manegen kiel,
Verse: 4    ir rotte mir vil wol geviel.

Verse: 5    hie was ouch Môrolt durch in,
Verse: 6    des strît hât kraft unde sin.

Verse: 7    die sint nû hin gekêret.
Verse: 8    swie mich mîn vrouwe lêret,

Verse: 9    alsô tuon ich mit den minnen:
Verse: 10    mîn dienst sol ir erschînen.

Verse: 11    dû endarft mir dienstes danken niht,
Verse: 12    wande es diu sippe sus vergiht.

Verse: 13    die vrevelen helde sint nû dîn.
Verse: 14    wæren si getoufet sô die mîn

Verse: 15    und an der hiute nâch in getân,
Verse: 16    sô wart gekrœnet nie dehein man,

Verse: 17    er enhete strîtes von in genuoc.
Verse: 18    mich wundert waz dich her vertruoc:

Verse: 19    daz sage mir rehte unde wie."
Verse: 20    "ich kom gestern, hiute bin ich hie

Verse: 21    worden herre überz lant.
Verse: 22    mich vienc diu künegîn mit ir hant:

Verse: 23    dô werte ich mich mit minne.
Verse: 24    sus rieten mir die sinne."

Verse: 25    "ich wæne, dir hât dîn süeziu wer
Verse: 26    betwungen beidenthalp diu her."

Verse: 27    "dû meins durch daz ich dir entran.
Verse: 28    vaste riefe dû mich an:

Verse: 29    waz woltstû an mir ertwingen?
Verse: 30    lâ mich sus mit dir dingen."




Chapter: 50 
50


Verse: 1    "dâ enerkande ich niht des ankers dîn:
Verse: 2    mîner muomen man Gandîn

Verse: 3    hât in gevüeret selten ûz."
Verse: 4    "dô erkande aber ich wol dînen strûz,

Verse: 5    an dem schilde ein sarapandratest:
Verse: 6    dîn strûz stuont hôch sunder nest.

Verse: 7    ich sach an dîner gelegenheit,
Verse: 8    dir was diu sicherheit vil leit,

Verse: 9    die mir tâten zwêne man:
Verse: 10    die hetenz dâ vil guot getân."

Verse: 11    "mir wære ouch lîhte alsam geschehen.
Verse: 12    ich muoz des einem tiuvel jehen,

Verse: 13    des vuore ich nimmer wirde vrô:
Verse: 14    hete er den prîs behalden sô

Verse: 15    an vrevelen helden sô dîn lîp,
Verse: 16    vür zucker gæzen in diu wîp."

Verse: 17    "dîn munt mir lobes ze vil vergiht."
Verse: 18    "nein, ich enkan gesmeichen niht:

Verse: 19    nim ander mîner helfe war."
Verse: 20    si riefen Razalîge dar.

Verse: 21    mit zühten sprach dô Kailet:
Verse: 22    "iuch hât mîn neve Gahmuret

Verse: 23    mit sîner hant gevangen."
Verse: 24    "herre, daz ist ergangen.

Verse: 25    ich hân den helt dâ vür erkant,
Verse: 26    daz im Azagouc daz lant

Verse: 27    mit dienste nimmer wirt verspart,
Verse: 28    sît unser herre îsenhart

Verse: 29    aldâ niht krône solde tragen.
Verse: 30    er wart in ir dienste erslagen,




Chapter: 51 
51


Verse: 1    diu nû ist iuwers neven wîp.
Verse: 2    umbe ir minne er gap den lîp:

Verse: 3    daz hât mîn kus an si verkorn.
Verse: 4    ich hân herren und den mâc verlorn.

Verse: 5    wil nû iuwer muomen sun
Verse: 6    ritterlîche vuore tuon,

Verse: 7    daz er uns wil ergetzen sîn,
Verse: 8    sô valde ich im die hende mîn.

Verse: 9    sô hât er rîcheit unde prîs
Verse: 10    und al dâ mite Tankanîs

Verse: 11    îsenharten gerbet hât.
Verse: 12    der gebalsemt in dem her dort stât,

Verse: 13    alle tage ich sîne wunden sach,
Verse: 14    sît im diz sper sîn herze brach."

Verse: 15    daz zôch er ûz dem buosem sîn
Verse: 16    an einer snüere sîdîn,

Verse: 17    hin wider hiencz der degen snel
Verse: 18    vür sîne brust an blôzez vel.

Verse: 19    "ez ist noch vil hôher tac.
Verse: 20    wil mîn her Killirjacac

Verse: 21    inz her werben als ich in bite,
Verse: 22    sô rîtent im die vürsten mite."

Verse: 23    ein vingerlîn er sande dar:
Verse: 24    die nâch der helle wâren gevar,

Verse: 25    die kômen, swaz dâ vürsten was,
Verse: 26    durch die stat ûf den palas.

Verse: 27    dô lêch mit vanen hin sîn hant
Verse: 28    von Azagouc der vürsten lant.

Verse: 29    ieslîcher was sîns ortes geil.
Verse: 30    doch beleip der bezzer teil




Chapter: 52 
52


Verse: 1    Gahmurete, ir herren.
Verse: 2    die selben wâren die erren.

Verse: 3    [nâher drungen die von Zazamanc.
Verse: 4    mit grôzer vuore niht ze kranc

Verse: 5    si emphiengen, als ir vrouwe hiez,
Verse: 6    von im ir lant und des geniez,

Verse: 7    als ieslîchen an gezôch.
Verse: 8    diu armuot ir herren vlôch.]

Verse: 9    dô hete Protizilas,
Verse: 10    der von arte ein vürste was,

Verse: 11    lâzen ein herzentuom.
Verse: 12    daz lêch er dem der manegen ruom

Verse: 13    mit sîner hant bejagete
Verse: 14    (gein strîte er nie verzagete):

Verse: 15    Lahfilirost schahtelacunt
Verse: 16    nam ez mit vanen sâ zestunt.

Verse: 17    von Azagouc die vürsten hêr
Verse: 18    nâmen den Schotten Hiutegêr

Verse: 19    und Gaschieren den Orimân,
Verse: 20    si giengen vür ir herren sân:

Verse: 21    der liez si ledec umbe ir bete.
Verse: 22    des dancten si dô Gahmurete.

Verse: 23    Hiutegêr den Schotten
Verse: 24    si bâten sunder spotten:

Verse: 25    "lât mînem herren daz gezelt
Verse: 26    hie umbe âventiure gelt.

Verse: 27    ez zucte uns îsenhartes leben,
Verse: 28    daz Vridebrande wart gegeben

Verse: 29    diu zierde unsers landes
Verse: 30    (sîn vreude diu stuont phandes,




Chapter: 53 
53


Verse: 1    er stêt hie selbe ouch an dem rê:
Verse: 2    unvergolden dienst im tet ze wê),

Verse: 3    (ûf erde niht sô guotes was),
Verse: 4    der helm, von arte ein adamas

Verse: 5    dicke unde herte,
Verse: 6    an dem strîte ein guot geverte."

Verse: 7    dô lobete Hiutegêres hant,
Verse: 8    swenne er kœme in sînes herren lant,

Verse: 9    daz erz wolde erwerben gar
Verse: 10    und senden wider wol gevar:

Verse: 11    daz tete er unbetwungen.
Verse: 12    nâch urloube drungen

Verse: 13    zem künege swaz dâ vürsten was.
Verse: 14    dô rûmden si den palas.

Verse: 15    swie verwüestet wære sîn lant,
Verse: 16    doch kunde Gahmuretes hant

Verse: 17    swenken solher gâbe solt
Verse: 18    als al die boume trüegen golt.

Verse: 19    er teilde grôze gâbe:
Verse: 20    sîne man, sîne mâge

Verse: 21    nâmen von im des heldes guot.
Verse: 22    daz was der küneginne muot.

Verse: 23    der brûtloufte hôchgezît
Verse: 24    hete dâ vor manegen grôzen strît,

Verse: 25    die wurden sus ze suone brâht.
Verse: 26    ich enhân mirs selbe niht erdâht,

Verse: 27    man sagete mir daz îsenhart
Verse: 28    küneclîch bestatet wart:

Verse: 29    daz tâten die in erkanden.
Verse: 30    den zins von sînen landen,




Chapter: 54 
54


Verse: 1    swaz der gelden mohte ein jâr,
Verse: 2    den selben liezen si dâ gar.

Verse: 3    daz tâten si umbe ir selber muot.
Verse: 4    Gahmuret daz grôze guot

Verse: 5    sîn volc hiez behalden,
Verse: 6    die muostens sunder walden.

Verse: 7    smorgens vor der veste
Verse: 8    rûmdenz gar die geste.

Verse: 9    sich schieden die dâ wâren,
Verse: 10    und vuorten manege bâren.

Verse: 11    daz velt herberge stuont al blôz,
Verse: 12    wan ein gezelt, daz was vil grôz.

Verse: 13    daz hiez der künec ze schiffe tragen.
Verse: 14    dô begunde er dem volke sagen,

Verse: 15    er woldez vüeren in Azagouc:
Verse: 16    mit der rede er si betrouc.

Verse: 17    dâ was der stolze küene man,
Verse: 18    unz er sich vaste senen began,

Verse: 19    daz er niht ritterschefte vant:
Verse: 20    des was sîn vreude sorgen phant.

Verse: 21    doch was im daz swarze wîp
Verse: 22    noch lieber denne sîn selbes lîp.

Verse: 23    ez enwart nie wîp geschicket baz.
Verse: 24    der vrouwen herze nie vergaz,

Verse: 25    im envüere ein werdiu volge mite,
Verse: 26    an rehter kiusche wîplîch site.

Verse: 27    von Sibilje ûz der stat
Verse: 28    was geborn den er dô bat

Verse: 29    dan kêrens zeiner wîle.
Verse: 30    der hete in manege mîle




Chapter: 55 
55


Verse: 1    dâ vor gevuort: er brâhte in dar.
Verse: 2    er was niht als ein môr gevar.

Verse: 3    der marnære wîse
Verse: 4    sprach: "ir sultz heln lîse

Verse: 5    vor den die tragent daz swarze vel.
Verse: 6    mîne kocken sint sô snel,

Verse: 7    si enmugen uns niht genâhen.
Verse: 8    wir suln von hinnen gâhen."

Verse: 9    sîn golt hiez er ze schiffe tragen.
Verse: 10    nû muoz ich iu von scheiden sagen:

Verse: 11    die naht vuor dan der werde man,
Verse: 12    daz wart verholne getân.

Verse: 13    dô er entran dem wîbe,
Verse: 14    dô hete si in ir lîbe

Verse: 15    zwelf wochen lebendec ein kint.
Verse: 16    vaste mente in dan der wint.

Verse: 17    diu vrouwe in ir biutel vant
Verse: 18    einen brief, den schreip ir mannes hant

Verse: 19    en franzois, daz si kunde.
Verse: 20    diu schrift ir sagen begunde:

Verse: 21    "hie enbiutet liep ein ander liep.
Verse: 22    ich bin dirre verte ein diep:

Verse: 23    die muoste ich dir durch jâmer steln.
Verse: 24    vrouwe, ich enmac dich niht verheln,

Verse: 25    wære dîn orden in mîner ê,
Verse: 26    sô wære mir immer nâch dir wê:

Verse: 27    und hân doch immer nâch dir pîn.
Verse: 28    werde unser zweier kindelîn

Verse: 29    an dem antlitze einem man gelîch,
Verse: 30    deiswâr der wirt ellens rîch.




Chapter: 56 
56


Verse: 1    erst erborn von Anschouwe.
Verse: 2    diu minne wirt sîn vrouwe:

Verse: 3    sô wirt aber er an strîte ein schûr,
Verse: 4    den vînden herter nâchgebûr.

Verse: 5    wizzen sol der sun mîn,
Verse: 6    sîn ane der hiez Gandîn,

Verse: 7    der lac an ritterschefte tôt.
Verse: 8    des vater leit die selben nôt,

Verse: 9    der was geheizen Adanz.
Verse: 10    sîn schilt beleip vil selten ganz,

Verse: 11    der was von arte ein Bertûn.
Verse: 12    er und Utepandragûn

Verse: 13    wæren zweier gebruoder kint,
Verse: 14    die beide alhie geschriben sint:

Verse: 15    daz was einer, Lazaliez,
Verse: 16    Brickus der ander hiez.

Verse: 17    der zweier vater hiez Mazadân.
Verse: 18    den vuorte ein feie in Feimurgân,

Verse: 19    diu hiez Terdelaschoie:
Verse: 20    er was ir herzen boie.

Verse: 21    von in zwein kom daz geslehte mîn,
Verse: 22    daz immer mêr gît liehten schîn.

Verse: 23    ieslîcher sider krône truoc
Verse: 24    und heten werdekeit genuoc.

Verse: 25    vrouwe, wiltû toufen dich,
Verse: 26    dû maht ouch noch erwerben mich."

Verse: 27    des engerte si kein wandel niht.
Verse: 28    "ouwê wie balde daz geschiht!

Verse: 29    wil er wider wenden,
Verse: 30    schiere sol ichz enden.




Chapter: 57 
57


Verse: 1    wem hât sîn manlîchiu zuht
Verse: 2    hie lâzen sîner minne vruht?

Verse: 3    ouwê lieplîch geselleschaft,
Verse: 4    sol mir nû riuwe mit ir kraft

Verse: 5    immer twingen mînen lîp!
Verse: 6    sînem gote zêren," sprach daz wîp,

Verse: 7    "ich mich gerne toufen solde
Verse: 8    und leben swie er wolde."

Verse: 9    der jâmer gap ir herzen wîc.
Verse: 10    ir vreude vant den dürren zwîc,

Verse: 11    als noch diu turteltûbe tuot.
Verse: 12    diu hete ie den selben muot:

Verse: 13    swenne ir an trûtschefte gebrast,
Verse: 14    ir triuwe kôs den dürren ast.

Verse: 15    diu vrouwe an rehter zît genas
Verse: 16    eins suns, der zweier varwe was,

Verse: 17    an dem got wunders wart enein:
Verse: 18    wîz und swarzer varwe er schein.

Verse: 19    diu künegîn kuste in sunder twâl
Verse: 20    vil dicke an sîniu blanken mâl.

Verse: 21    diu muoter hiez ir kindelîn
Verse: 22    Feirefîz Anschevîn.

Verse: 23    der wart ein waltswende:
Verse: 24    die tjoste sîner hende

Verse: 25    manec sper zebrâchen,
Verse: 26    die schilde dürkel stâchen.

Verse: 27    als ein agelster wart gevar
Verse: 28    sîn hâr und ouch sîn vel vil gar.

Verse: 29    dô was ez ouch über des jâres zil,
Verse: 30    daz Gahmuret geprîset vil




Chapter: 58 
58


Verse: 1    was worden dâ ze Zazamanc,
Verse: 2    dâ sîn hant die gunst erranc.

Verse: 3    dennoch swebete er ûf dem sê,
Verse: 4    die snellen winde im tâten wê.

Verse: 5    einen sîdîn segel sach er roten:
Verse: 6    den truoc ein kocke und ouch die boten.

Verse: 7    die von Schotten Vridebrant
Verse: 8    vroun Belacânen hete gesant.

Verse: 9    er bat si daz si ûf in verkür,
Verse: 10    swie er den mâc durch si verlür,

Verse: 11    daz si von im gesuochet was.
Verse: 12    dô vuorten si den adamas,

Verse: 13    ein swert, einen halsberc und zwuo hosen.
Verse: 14    hie muget ir grôz wunder losen,

Verse: 15    daz im der kocke widervuor.
Verse: 16    als mir diu âventiure swuor,

Verse: 17    si gâbenz im. dô lobete ouch er,
Verse: 18    sîn munt der botschefte ein wer

Verse: 19    würde, swenne er kœme zir.
Verse: 20    si schieden sich. man sagete mir,

Verse: 21    daz mer in truoc in eine habe.
Verse: 22    ze Sibilje kêrte er drabe.

Verse: 23    mit golde galt der küene man
Verse: 24    sînem marnære sân

Verse: 25    harte wol sîn arbeit.
Verse: 26    si schieden sich, daz was dem leit.

Verse: 27    Dâ ze Spâne in dem lande
Verse: 28    er den künec erkande,

Verse: 29    daz was sîn neve Kailet.
Verse: 30    nâch dem kêrte er ze Dôlet.




Chapter: 59 
59


Verse: 1    der was nâch ritterschefte gevarn,
Verse: 2    dâ man niht schilde dorfte sparn.

Verse: 3    dô hiez er ouch bereiten sich
Verse: 4    (sus wert diu âventiure mich)

Verse: 5    mit spern wol gemâlen.
Verse: 6    von grüenen zindâlen

Verse: 7    ieslîchez hete ein banier,
Verse: 8    drî hermîn anker dran sô fier

Verse: 9    daz man ir jach vür rîcheit.
Verse: 10    si wâren lanc unde breit

Verse: 11    und reichten vaste unz ûf die hant,
Verse: 12    dô man si zem sperîser bant

Verse: 13    dâ niderhalp eine spanne.
Verse: 14    der wart dem küenen manne

Verse: 15    hundert dâ bereitet
Verse: 16    und wol hin nâch geleitet

Verse: 17    von sînes neven liuten.
Verse: 18    êren unde triuten

Verse: 19    kunden si in mit werdekeit.
Verse: 20    daz was ir herren niht ze leit.

Verse: 21    er streich ich enweiz wie lange nâch,
Verse: 22    unz er geste herberge ersach

Verse: 23    in dem lande ze Wâleis.
Verse: 24    dâ was geslagen vür Kanvoleis

Verse: 25    manec poulûn ûf die plâne.
Verse: 26    ich ensagez iu niht nâch wâne:

Verse: 27    gebietet ir, sô ist ez wâr.
Verse: 28    sîn volc hiez er ûf halden gar.

Verse: 29    der herre sande vor hin în
Verse: 30    den kluogen meisterknappen sîn.




Chapter: 60 
60


Verse: 1    der wolde, als in sîn herre bat,
Verse: 2    herberge nemen in der stat:

Verse: 3    dô was im snellîchen gâch.
Verse: 4    man zôch im soumære nâch.

Verse: 5    sîn ouge ninder hûs dâ sach,
Verse: 6    schilde wæren sîn ander dach

Verse: 7    und die wende gar behangen,
Verse: 8    mit spern al umbevangen.

Verse: 9    diu künegîn von Wâleis
Verse: 10    gesprochen hete ze Kanvoleis

Verse: 11    einen turnei alsô gezilt,
Verse: 12    des manegen zagen noch bevilt

Verse: 13    swâ er dem gelîche werben siht:
Verse: 14    von sîner hant es niht geschiht.

Verse: 15    si was ein maget und niht ein wîp
Verse: 16    und bôt zwei lant und ir lîp

Verse: 17    swer dâ den prîs bezalte.
Verse: 18    diz mære manegen valte

Verse: 19    hinderz ors ûf den sâmen.
Verse: 20    die solh gevelle nâmen,

Verse: 21    ir schanze wart gein vlust gesaget.
Verse: 22    des phlâgen helde unverzaget.

Verse: 23    si tâten ritters ellen schîn:
Verse: 24    mit hurteclîcher rabîn

Verse: 25    wart dâ manec ors ersprenget
Verse: 26    und swerte vil erklenget.

Verse: 27    ein schifbrücke ûf einem plân
Verse: 28    gienc über einen wazzers trân,

Verse: 29    mit einem tor beslozzen.
Verse: 30    ein knappe unverdrozzen




Chapter: 61 
61


Verse: 1    tetez ûf, als im ze muote was.
Verse: 2    dar obe stuont der palas.

Verse: 3    ouch saz diu küneginne
Verse: 4    zen venstern dar inne

Verse: 5    mit maneger werden vrouwen.
Verse: 6    die begunden dâ schouwen

Verse: 7    waz dise knappen tâten.
Verse: 8    die heten sich berâten

Verse: 9    und sluogen ûf ein gezelt.
Verse: 10    umbe unvergolden minnen gelt

Verse: 11    wart es ein künec âne,
Verse: 12    des twanc in Belacâne6

Verse: 13    mit arbeit wart ûf geslagen
Verse: 14    daz drîzec soumære muosten tragen,

Verse: 15    ein gezelt daz zeicte rîcheit.
Verse: 16    ouch was der plân wol sô breit,

Verse: 17    daz sich die snüere stracten dran.
Verse: 18    Gahmuret der werde man

Verse: 19    die selben zît dort ûze enbeiz.
Verse: 20    dar nâch er sich mit vlîze vleiz,

Verse: 21    wie er höveschlîche kœme geriten.
Verse: 22    des enwart niht langer dô gebiten,

Verse: 23    sîne knappen an den stunden
Verse: 24    sîniu sper ze samene bunden,

Verse: 25    ieslîcher vünviu an ein bant.
Verse: 26    daz sehste vuorte er an der hant

Verse: 27    mit einer baniere.
Verse: 28    sus kom gevarn der fiere.

Verse: 29    vor der künegîn wart vernomen
Verse: 30    daz ein gast dâ solde komen




Chapter: 62 
62


Verse: 1    ûz alsô verrem lande,
Verse: 2    den niemen dâ erkande.

Verse: 3    "sîn voc daz ist kurtois,
Verse: 4    beidiu heidensch und franzois.

Verse: 5    etslîcher mac ein Anschevîn
Verse: 6    mit sîner sprâche iedoch wol sîn.

Verse: 7    ir muot ist stolz, ir wât ist klâr,
Verse: 8    wol gesniten al vür wâr.

Verse: 9    ich was sînen knappen bî,
Verse: 10    die sint vor missewende vrî.

Verse: 11    si jehent, swer habe geruoche,
Verse: 12    ob der ir herren suoche,

Verse: 13    den scheide er von swære.
Verse: 14    von im vrâcte ich der mære:

Verse: 15    nû sageten si mirz sunder wanc,
Verse: 16    ez wære der küjnec von Zazamanc."

Verse: 17    disiu mære sagete ir ein garzûn:
Verse: 18    "âvoi welh ein poulûn!

Verse: 19    iuwer krône und iuwer lant
Verse: 20    wæren dâ vür niht halbez phant."

Verse: 21    "dû endarft mirz sô loben niht.
Verse: 22    mîn munt hin wider dir des giht,

Verse: 23    ez mac wol sîn eins werden man,
Verse: 24    der niht mit armüete kan."

Verse: 25    alsus sprach diu künegîn:
Verse: 26    "wê wanne kumt er et selbe drîn?"

Verse: 27    den garzûn si des vrâgen bat.
Verse: 28    höveschlîchen durch die stat

Verse: 29    der helt begunde trecken,
Verse: 30    die slâfenden wecken.




Chapter: 63 
63


Verse: 1    vil schilde sach er schînen.
Verse: 2    die hellen pusînen

Verse: 3    mit krache vor im gâben dôz.
Verse: 4    von würfen und mit slegen grôz

Verse: 5    zwêne tambûre gâben schal:
Verse: 6    der galm über al die stat erhal.

Verse: 7    der dôn iedoch gemischet wart
Verse: 8    mit floitieren, an der wart

Verse: 9    eine reisenote si bliesen.
Verse: 10    nû suln wir niht verliesen,

Verse: 11    wie ir herre komen sî:
Verse: 12    dem riten videlære bî.

Verse: 13    dô legete der degen wert
Verse: 14    ein bein vür sich ûf daz phert,

Verse: 15    zwêne stivâle über blôziu bein.
Verse: 16    sîn munt als ein rubîn schein

Verse: 17    von der rœte als ob er brünne:
Verse: 18    der was dicke und niht ze dünne.

Verse: 19    sîn lîp was allenthalben klâr.
Verse: 20    lieht reideloht was im sîn hâr,

Verse: 21    swâ man daz vor dem huote sach.
Verse: 22    der was ein tiure houbetdach.

Verse: 23    grüene samît was der mantel sîn,
Verse: 24    ein zobel dâ vor gap swarzen schîn

Verse: 25    ob einem hemde daz was blanc.
Verse: 26    von schouwen wart dâ grôz gedranc.

Verse: 27    vil dicke aldâ gevrâget wart,
Verse: 28    wer wære der ritter âne bart,

Verse: 29    der vuorte alsolhe rîcheit.
Verse: 30    vil schiere wart daz mære breit,




Chapter: 64 
64


Verse: 1    si sagetenz in vür unbetrogen.
Verse: 2    dô begunden si an die brücke zogen,

Verse: 3    ander volc und ouch die sîne.
Verse: 4    von dem liehten schîne,

Verse: 5    der von der künegîn erschein,
Verse: 6    zucte im neben sich sîn bein:

Verse: 7    ûf rihte sich der degen wert
Verse: 8    als ein vederspil, daz gert.

Verse: 9    diu herberge dûhte in guot.
Verse: 10    alsô stuont des heldes muot:

Verse: 11    si dolde ouch wol, diu wirtîn,
Verse: 12    von Wâleis diu künegîn.

Verse: 13    dô vriesch der künec von Spâne,
Verse: 14    daz ûf der Lêôplâne

Verse: 15    stüende ein gezelt, daz Gahmurete
Verse: 16    durch des küenen Razalîges bete

Verse: 17    beleip vor Patelamunt.
Verse: 18    daz tete im ein ritter kunt.

Verse: 19    dô vuor er springende als ein tier,
Verse: 20    er was der vreuden soldier.

Verse: 21    der selbe ritter aber sprach:
Verse: 22    "iuwer muomen sun ich sach

Verse: 23    komende als er ê was fier.
Verse: 24    ez sint hundert banier

Verse: 25    zeinem schilde ûf grüene velt
Verse: 26    gestôzen vür sîn hôchgezelt,

Verse: 27    die sint ouch alle grüene.
Verse: 28    ouch hât der helt küene

Verse: 29    drî hermîn anker lieht gemâl
Verse: 30    ûf ieslîchem zindâl."




Chapter: 65 
65


Verse: 1    "ist er gezimieret hie,
Verse: 2    âvoi sô sol man schouwen wie

Verse: 3    sîn lîp den poinder irret,
Verse: 4    wie erz mit hurte wirret.

Verse: 5    der stolze künec Hardîz
Verse: 6    hât mit zorne sînen vlîz

Verse: 7    nû lange vaste an mich gewant.
Verse: 8    den sol diu Gahmuretes hant

Verse: 9    mit sîner tjoste neigen.
Verse: 10    mîn sælde ist niht der veigen."

Verse: 11    sîne boten sande er sân
Verse: 12    dâ Gaschier der Orimân

Verse: 13    mit grôzer massenîe lac
Verse: 14    und der liehte Killirjacac:

Verse: 15    die wâren dâ durch sîne bete.
Verse: 16    zem poulûn si mit Kailete

Verse: 17    vuoren durch geselleschaft.
Verse: 18    dô emphiengen si durch liebe kraft

Verse: 19    den werden künec von Zazamanc.
Verse: 20    si dûhte ein beiten gar ze lanc

Verse: 21    daz si in niht ê gesâhen,
Verse: 22    des si mit triuwen jâhen.

Verse: 23    dô vrâcte er si der mære,
Verse: 24    wer dâ ritter wære.

Verse: 25    dô sprach sîner muomen kint:
Verse: 26    "ûz verrem lande nû hie sint

Verse: 27    ritter die diu minne jaget,
Verse: 28    vil küener helde unverzaget.

Verse: 29    hie hât manegen Bertûn
Verse: 30    der künec Utepandragûn.




Chapter: 66 
66


Verse: 1    ein mære in stichet als ein dorn,
Verse: 2    daz er sîn wîp hât verlorn,

Verse: 3    diu Artûses muoter was.
Verse: 4    ein phaffe der wol zouber las,

Verse: 5    mit dem diu vrouwe ist hin gewant,
Verse: 6    dem ist Artûs nâch gerant.

Verse: 7    ez ist nû in dem dritten jâr,
Verse: 8    daz er sun und wîp verlôs vür wâr.

Verse: 9    hiest ouch sîner tohter man,
Verse: 10    der wol mit ritterschefte kan,

Verse: 11    Lôt von Norwæge,
Verse: 12    gein valscheit der træge

Verse: 13    und der snelle gein dem prîse.
Verse: 14    der küene degen wîse.

Verse: 15    hiest ouch Gâwân, des sun,
Verse: 16    sô kranc daz er niht mac getuon

Verse: 17    ritterschaft enkeine.
Verse: 18    er was bî mir, der kleine:

Verse: 19    er sprichet, möhte er einen schaft
Verse: 20    gebrechen, trôte in des sîn kraft,

Verse: 21    er tæte gerne ritters tât.
Verse: 22    wie vruo sîn ger begunnen hât!

Verse: 23    hie hât der künec von Patrigalt
Verse: 24    von spern einen ganzen walt.

Verse: 25    des vuore ist dâ engein gar ein wint,
Verse: 26    wan die von Portegâl hie sint:

Verse: 27    die heizen wir die vrechen,
Verse: 28    si welnt durch schilde stechen.

Verse: 29    hie hânt die Prôvenzâle
Verse: 30    schilde wol gemâle.




Chapter: 67 
67


Verse: 1    hie sint die Wâleise:
Verse: 2    daz si behabent ir reise

Verse: 3    durch den poinder swâ sis gernt,
Verse: 4    von der kraft ir landes si des wernt.

Verse: 5    hiest manec ritter durch diu wîp,
Verse: 6    des niht erkennen mac mîn lîp.

Verse: 7    al die ich hie benennet hân,
Verse: 8    wir ligen mit wârheit sunder wân

Verse: 9    mit grôzer vuore in der stat,
Verse: 10    als uns diu küneginne bat.

Verse: 11    ich sage dir wer ze velde liget,
Verse: 12    die unser wer vil ringe wiget:

Verse: 13    der werde künec von Ascalûn,
Verse: 14    und der stolze künec von Arragûn,

Verse: 15    Cidegast von Lôgrois
Verse: 16    und der künec von Punturtois,

Verse: 17    der heizet Brandelidelîn.
Verse: 18    dâst ouch der küene Lehelîn.

Verse: 19    dâst Môrolt von îrlant,
Verse: 20    der brichet ab uns gæbiu phant.

Verse: 21    dâ ligent ûf dem plâne
Verse: 22    die stolzen Alemâne:

Verse: 23    der herzoge von Brâbant
Verse: 24    ist gestrichen in ditze lant

Verse: 25    durch den künec Hardîzen.
Verse: 26    sîne swester Alîzen

Verse: 27    gap im der künec von Gascôn,
Verse: 28    sîn dienst hât vor emphangen lôn.

Verse: 29    die sint mit zorne hie gein mir.
Verse: 30    nû sol ich wol getrûwen dir:




Chapter: 68 
68


Verse: 1    gedenke an die sippe dîn,
Verse: 2    durch rehte liebe warte mîn."

Verse: 3    dô sprach der künec von Zazamanc:
Verse: 4    "dû endarft mir wizzen keinen danc,

Verse: 5    swaz dir mîn dienst hie zêren tuot.
Verse: 6    wir suln haben einen muot.

Verse: 7    stêt dîn strûz noch sunder nest,
Verse: 8    dû solt dîn sarapandratest

Verse: 9    gein sînem halben grîfen tragen.
Verse: 10    mîn anker vaste wirt geslagen

Verse: 11    durch lenden in sîns poinders hurt.
Verse: 12    er müeze selbe suochen vurt

Verse: 13    hinderm orse ûf dem grieze.
Verse: 14    der uns zein ander lieze,

Verse: 15    ich valte in oder er valte mich:
Verse: 16    des wer ich an den triuwen dich."

Verse: 17    Kailet ze herbergen reit
Verse: 18    mit grôzen vreuden sunder leit.

Verse: 19    sich huop ein krîieren
Verse: 20    vor zwein helden fieren:

Verse: 21    von Poitouwe Schîolarz
Verse: 22    und Gurnemanz de Grâharz,

Verse: 23    die tjostierten ûf dem plân.
Verse: 24    sich huop diu vesperîe sân.

Verse: 25    hie riten sehse, dort wol drî,
Verse: 26    den vuor vil lîhte ein tropel bî.

Verse: 27    si begunden rehte ritters tât:
Verse: 28    des enwas et dô dehein ander rât.

Verse: 29    ez was dennoch wol mitter tac,
Verse: 30    der herre under sînem gezelte lac.




Chapter: 69 
69


Verse: 1    dô vriesch der künec von Zazamanc,
Verse: 2    daz die poinder wît und lanc

Verse: 3    wâren ze velde worden.
Verse: 4    al nâch ritters orden

Verse: 5    er huop ouch sich des endes dar
Verse: 6    mit maneger banier lieht gevar.

Verse: 7    er enkêrte sich niht an gâhez schehen,
Verse: 8    müezeclîche er wolde ersehen

Verse: 9    wiez ze beider sît dâ wære getân.
Verse: 10    sînen teppech legete man ûf den plân,

Verse: 11    dâ sich die poinder wurren
Verse: 12    und diu ors von stichen kurren.

Verse: 13    von knappen was umbe in ein rinc,
Verse: 14    dâ bî von swerten klingâ klinc.

Verse: 15    wie si nâch prîse rungen,
Verse: 16    der klingen alsus klungen!

Verse: 17    von spern was grôz krachen dâ,
Verse: 18    er endorfte niemen vrâgen wâ.

Verse: 19    poinder wâren sîne wende,
Verse: 20    die worhten ritters hende.

Verse: 21    diu ritterschaft sô nâhe was,
Verse: 22    daz die vrouwen ab dem palas

Verse: 23    wol sâhen der helde arbeit.
Verse: 24    doch was der küneginne leit

Verse: 25    daz sich der künec von Zazamanc
Verse: 26    dâ mit den andern niht endranc.

Verse: 27    si sprach:"wê war ist er komen,
Verse: 28    von dem ich wunder hân vernomen?"

Verse: 29    nû was ouch rois de Franze tôt.
Verse: 30    des wîp in dicke in grôze nôt




Chapter: 70 
70


Verse: 1    brâhte mit ir minne,
Verse: 2    diu werde küneginne

Verse: 3    hete aldar nâch im gesant,
Verse: 4    ob er noch wider in daz lant

Verse: 5    wære komen von der heidenschaft.
Verse: 6    des twanc si grôzer liebe kraft.

Verse: 7    ez wart dâ harte guot getân
Verse: 8    von manegem küenen armman,

Verse: 9    die doch der hœhe gerten niht,
Verse: 10    des der küneginne zil vergiht,

Verse: 11    ir lîbes und ir lande.
Verse: 12    sî gerten ander phande.

Verse: 13    nû was ouch Gahmuretes lîp
Verse: 14    in harnase, dâ sîn wîp

Verse: 15    wart einer suone bî gemant,
Verse: 16    daz ir von Schotten Vridebrant

Verse: 17    ze gebe sande vür ir schaden:
Verse: 18    mit strîte hete er si verladen.

Verse: 19    ûf erde niht sô guotes was.
Verse: 20    dô schouwete er den adamas:

Verse: 21    daz was ein helm, dar ûf man bant
Verse: 22    einen anker, dâ man inne vant

Verse: 23    verwieret edel gesteine,
Verse: 24    grôz, niht ze kleine.

Verse: 25    daz was iedoch ein swærer last.
Verse: 26    gezimieret wart der gast.

Verse: 27    wie sîn schilt gehêret sî?
Verse: 28    mit golde von Arâbî

Verse: 29    ein tiuriu buckel drûf geslagen,
Verse: 30    swære, die er muoste tragen




Chapter: 71 
71


Verse: 1    (diu gap von rœte alsolhez brehen,
Verse: 2    daz man sich drinne mohte ersehen),

Verse: 3    ein zobelîn anker drunde.
Verse: 4    mir selben ich wol gunde

Verse: 5    des er hete an den lîp gegert,
Verse: 6    wande ez was maneger marke wert.

Verse: 7    sîn wâpenroc was harte wît:
Verse: 8    ich wæne keinen sô guoten sît

Verse: 9    iemen ze strîte vuorte.
Verse: 10    des lenge den teppech ruorte,

Verse: 11    ob ich in geprüeven künne.
Verse: 12    er schein als ob hie brünne

Verse: 13    bî der naht ein queckez viur.
Verse: 14    verblichen varwe was im tiur,

Verse: 15    sîn glast die blicke niht vermeit:
Verse: 16    ein bœsez ouge sich dran versneit.

Verse: 17    mit golde er gebildet was,
Verse: 18    dâz zer muntâne an Kaukasas

Verse: 19    ab einem velse zarten
Verse: 20    grîfen klâ, diez dâ bewarten

Verse: 21    und ez noch hiute aldâ bewarnt.
Verse: 22    von Arâbîe liute varnt,

Verse: 23    die erwerbent ez mit listen dâ
Verse: 24    (sô tiurez ist ninder anderswâ)

Verse: 25    und bringentz wider z Arâbî,
Verse: 26    dâ man diu grüenen achmardî

Verse: 27    würket und die phellel rîch.
Verse: 28    ander wæte ist er vil ungelîch.

Verse: 29    den schilt nam er ze halse sân.
Verse: 30    hie stuont ein ors vil wol getân,




Chapter: 72 
72


Verse: 1    gewâpent vaste unz ûf den huof,
Verse: 2    hie garzûne ruofâ ruof.

Verse: 3    sîn lîp spranc drûf, wande erz dâ vant.
Verse: 4    vil starker sper des heldes hant

Verse: 5    mit hurte verswande,
Verse: 6    die poinder er zetrande,

Verse: 7    immer durch, anderhalben ûz.
Verse: 8    dem anker volcte nâch der strûz.

Verse: 9    Gahmuret stach hinderz ors
Verse: 10    Poitwîn de Prienlascors

Verse: 11    und anders manegen werden man,
Verse: 12    an den er sicherheit gewan.

Verse: 13    swaz dâ gekriuzter ritter reit,
Verse: 14    die genuzzen sheldes arbeit:

Verse: 15    diu gewunnen ors diu gap er in.
Verse: 16    an im lac ir grôz gewin.

Verse: 17    gelîcher baniere
Verse: 18    man gein im vuorte viere

Verse: 19    (küene rotten riten drunde,
Verse: 20    ir herre strîten kunde),

Verse: 21    an ieslîcher eins grîfen zagel.
Verse: 22    daz hinder teil was ouch ein hagel

Verse: 23    an ritterschaft, des wâren die.
Verse: 24    daz vorder teil des grîfen hie

Verse: 25    der künec von Gascône truoc
Verse: 26    ûf sînem schilt, ein ritter kluoc.

Verse: 27    gezimieret was sîn lîp
Verse: 28    sô wol geprüeven kunnen wîp.

Verse: 29    er nam sich vor den andern ûz,
Verse: 30    dô er ûf dem helme ersach den strûz.




Chapter: 73 
73


Verse: 1    der anker kom doch vor an in.
Verse: 2    dô stach in hinderz ors dort hin

Verse: 3    der werde künec von Zazamanc
Verse: 4    und vienc in. dâ was grôz gedranc,

Verse: 5    hôhe vürhe sleht getennet,
Verse: 6    mit swerten vil gekemmet.

Verse: 7    dâ wart verswendet der walt
Verse: 8    und manec ritter abe gevalt.

Verse: 9    si wunden sich (sus hœre ich sagen)
Verse: 10    hin an den ort dâ hielden zagen.

Verse: 11    der strît was wol sô nâhen,
Verse: 12    daz gar die vrouwen sâhen

Verse: 13    wer dâ bî prîse solde sîn.
Verse: 14    der minnen gernde Rîwalîn,

Verse: 15    von des sper snîte ein niuwe leis.
Verse: 16    daz was der künec von Lohneis,

Verse: 17    sîne hurte gâben kraches schal.
Verse: 18    Môrolt in einen ritter stal,

Verse: 19    ûz dem satel er in vür sich huop,
Verse: 20    daz was ein ungevüeger uop.

Verse: 21    der hiez Killirjacac.
Verse: 22    von dem hete der künec Lac

Verse: 23    dâ vor emphangen solhen solt,
Verse: 24    den er vallende an der erden holt.

Verse: 25    er hetez dâ vil guot getân.
Verse: 26    dô luste disen starken man

Verse: 27    daz er in twünge sunder swert:
Verse: 28    alsus vienc er den degen wert.

Verse: 29    hinderz ors stach Kailetes hant
Verse: 30    den herzogen von Brâbant.




Chapter: 74 
74


Verse: 1    der vürste hiez Lambekîn.
Verse: 2    waz dô tæten die sîn?

Verse: 3    die beschutten in mit swerten,
Verse: 4    die helde strîtes gerten.

Verse: 5    dô stach der künec von Arragûn
Verse: 6    den alden Utepandragûn

Verse: 7    hinderz ors ûf die plâne,
Verse: 8    den künec von Bertâne.

Verse: 9    ez stuont dâ bluomen vil umbe in.
Verse: 10    wê wie gevüege ich doch bin,

Verse: 11    daz ich den werden Berteneis
Verse: 12    sô schône lege vür Kanvoleis,

Verse: 13    dâ nie getrat vilânes vuoz,
Verse: 14    ob ichz iu rehte sagen muoz,

Verse: 15    noch lîhte nimmer dâ geschiht.
Verse: 16    er endorfte sîn besezzen niht

Verse: 17    ûf dem orse aldâ er saz.
Verse: 18    niht langer man sîn dô vergaz:

Verse: 19    in beschutten die ob im dâ striten.
Verse: 20    dâ wart grôz hurten niht vermiten.

Verse: 21    dô kom der künec von Punturteis.
Verse: 22    der wart alhie vor Kanvoleis

Verse: 23    gevellet ûf sîns orses slâ,
Verse: 24    daz er dâ hinder lac aldâ.

Verse: 25    daz tet der stolze Gahmuret.
Verse: 26    wetâ, herre, wetâ wet!

Verse: 27    mit strîte vunden si geweten
Verse: 28    sîner muomen sun Kaileten:

Verse: 29    den viengen Punturteise.
Verse: 30    dâ wart vil rûch diu reise.




Chapter: 75 
75


Verse: 1    dô der künec Brandelidelîn
Verse: 2    wart gezucket von den sîn,

Verse: 3    einen andern künec si viengen.
Verse: 4    dâ liefen unde giengen

Verse: 5    vil manec werder man in îsenwât,
Verse: 6    den wart dâ gâlûnet ir brât

Verse: 7    mit treten und mit kiulen.
Verse: 8    ir vel truoc swarze biulen,

Verse: 9    die helde gehiure
Verse: 10    dâ wurben quaschiure.

Verse: 11    ich ensagez iu niht vür wæhe,
Verse: 12    dâ was diu ruowe smæhe.

Verse: 13    die werden twanc diu minne dar,
Verse: 14    manegen schilt wol gevar

Verse: 15    und manegen gezimierten helm,
Verse: 16    des dach was worden dâ der melm.

Verse: 17    daz velt etswâ geblüemet was,
Verse: 18    dâ stuont al kurz grüene gras:

Verse: 19    dâ vielen ûf die werden man,
Verse: 20    den êre enteil was getân.

Verse: 21    mîn sin kan solher wünsche doln,
Verse: 22    daz et ich besæze ûf dem voln.

Verse: 23    dô reit der künec von Zazamanc
Verse: 24    hin dan dâ in niemen dranc,

Verse: 25    nâch einem orse daz geruowet was.
Verse: 26    man bant von im den adamas,

Verse: 27    niwan durch des windes luft
Verse: 28    und anders durch deheinen guft,

Verse: 29    man stroufte im abe sîn hersenier.
Verse: 30    sîn munt was rôt unde fier.




Chapter: 76 
76


Verse: 1    ein wîp die ich ê genennet hân,
Verse: 2    hie kom ein ir kappelân

Verse: 3    und kleiner juncherren drî.
Verse: 4    den riten starke knappen bî,

Verse: 5    zwêne soumære giengen an ir hant.
Verse: 6    die boten hete dar gesant

Verse: 7    diu küneginne Amphlîse.
Verse: 8    ir kappelân was wîse,

Verse: 9    vil schiere bekande er disen man.
Verse: 10    en franzois er in gruozte sân:

Verse: 11    "bien sei venuz, bêâ sir,
Verse: 12    mîner vrouwen unde mir.

Verse: 13    daz ist rêgîn de Franze,
Verse: 14    die rüeret dîner minnen lanze."

Verse: 15    einen brief gap er im in die hant,
Verse: 16    dar an der herre grüezen vant,

Verse: 17    und ein kleine vingerlîn:
Verse: 18    daz solde ein wâr geleite sîn,

Verse: 19    wan daz emphienc sîn vrouwe
Verse: 20    von dem von Anschouwe.

Verse: 21    er neic, dô er die schrift ersach.
Verse: 22    welt ir nû hœren wie diu sprach?

Verse: 23    "dir enbiutet minne unde gruoz
Verse: 24    mîn lîp, dem nie wart kumbers buoz

Verse: 25    sît ich dîner minne emphant.
Verse: 26    dîn minne ist slôz unde bant

Verse: 27    mîns herzen und des vreude.
Verse: 28    dîn minne tuot mich teude.

Verse: 29    sol mir dîn minne verren,
Verse: 30    sô muoz mir minne werren.




Chapter: 77 
77


Verse: 1    kum wider und nim von mîner hant
Verse: 2    krône, zepter und ein lant.

Verse: 3    daz ist mich an erstorben,
Verse: 4    daz hât dîn minne erworben.

Verse: 5    habe dir ouch ze soldiment
Verse: 6    dise rîchen prîsent

Verse: 7    in den vier soumschrîn.
Verse: 8    dû solt ouch mîn ritter sîn

Verse: 9    in dem lande ze Wâleis
Verse: 10    vor der houbetstat ze Kanvoleis.

Verse: 11    ich enruoche ob ez diu künegîn siht:
Verse: 12    ez mac mir geschaden niht.

Verse: 13    ich bin schœner unde rîcher
Verse: 14    und kan ouch minneclîcher

Verse: 15    minne emphâhen und minne geben.
Verse: 16    wiltû nâch werder minne leben,

Verse: 17    sô habe dir mîne krône
Verse: 18    nâch minne ze lône."

Verse: 19    an disem brieve er niht mêre vant.
Verse: 20    sîn hersenier eins knappen hant

Verse: 21    wider ûf sîn houbet zôch.
Verse: 22    Gahmureten trûren vlôch.

Verse: 23    man bant im ûf den adamas,
Verse: 24    der dicke unde herte was:

Verse: 25    er wolde sich arbeiten.
Verse: 26    die boten hiez er leiten

Verse: 27    durch ruowen underz poulûn.
Verse: 28    swâ gedrenge was, dâ machte er rûm.

Verse: 29    dirre verlôs, jener gewan.
Verse: 30    dâ mohte erholn sich ein man,




Chapter: 78 
78


Verse: 1    hete er versûmet sîne tât:
Verse: 2    alhie was genuoger rât.

Verse: 3    si solden tjostieren,
Verse: 4    dort mit rotten punieren.

Verse: 5    si geloupten sich der sliche,
Verse: 6    die man heizet vriundes stiche.

Verse: 7    heimlîch gevaterschaft
Verse: 8    wart dâ zevuort mit zornes kraft.

Verse: 9    dâ wirt diu krümbe selten sleht.
Verse: 10    man sprach dâ lützel ritters reht:

Verse: 11    swer iht gewan, der habete im daz.
Verse: 12    er enruochte, hetes der ander haz.

Verse: 13    si wâren von manegen landen,
Verse: 14    die da mit ir handen

Verse: 15    schildes ambet worhten
Verse: 16    und schaden lützel vorhten.

Verse: 17    aldâ wart von Gahmurete
Verse: 18    geleistet Amphlîsen bete,

Verse: 19    daz er ir ritter wære:
Verse: 20    ein brief sagete im daz mære.

Verse: 21    âvoi nû wart er lâzen ane.
Verse: 22    ob minne und ellen in des mane?

Verse: 23    grôz liebe und starkiu triuwe
Verse: 24    sîne kraft im vrumte al niuwe.

Verse: 25    nû sach er wâ der künec Lôt
Verse: 26    sînen schilt gein der herte bôt.

Verse: 27    der was umbe nâch gewant.
Verse: 28    daz werte Gahmuretes hant:

Verse: 29    mit hurte er den poinder brach,
Verse: 30    den künec von Arragûn er stach




Chapter: 79 
79


Verse: 1    hinderz ors mit einem rôr.
Verse: 2    der künec hiez Schafillôr.

Verse: 3    daz sper was sunder banier,
Verse: 4    dâ mit er valte den degen fier:

Verse: 5    er hetez brâht ûz der heidenschaft.
Verse: 6    die sîne werten in mit kraft:

Verse: 7    doch vienc er den werden man.
Verse: 8    die innern tâten die ûzern sân

Verse: 9    vaste rîten ûf daz velt.
Verse: 10    ir vesperîe gap strîtes gelt.

Verse: 11    ez mohte sîn ein turnei,
Verse: 12    wan dâ lac manec sper enzwei.

Verse: 13    dô begunde zürnen Lehelîn:
Verse: 14    "sul wir sus entêret sîn?

Verse: 15    daz machet der den anker treget.
Verse: 16    unser entweder den andern leget

Verse: 17    noch hiute dâ er unsanfte liget.
Verse: 18    si hânt uns vil nâch an gesiget."

Verse: 19    ir hurte gap in rûmes vil.
Verse: 20    dâ gienc ez ûz der kinde spil:

Verse: 21    si worhten mit ir henden
Verse: 22    daz den walt begunde swenden.

Verse: 23    diz was gelîche ir beider ger:
Verse: 24    sperâ, herre, sperâ sper!

Verse: 25    doch muoste et dulden Lehelîn
Verse: 26    einen smæhlîchen pîn:

Verse: 27    in stach der künec von Zazamanc
Verse: 28    hinderz ors wol spers lanc,

Verse: 29    daz in ein rôr geschiftet was.
Verse: 30    sîne sicherheit er an sich las:




Chapter: 80 
80


Verse: 1    doch læse ich sanfter süeze birn,
Verse: 2    swie die ritter vor im nider rirn.

Verse: 3    der krîe dô vil maneger wielt,
Verse: 4    swer vor sîner tjoste hielt:

Verse: 5    "hie kumt der anker, fîâ fî !"
Verse: 6    zegegen kom im gehurtet bî

Verse: 7    ein vürste von Anschouwe
Verse: 8    (diu riuwe was sîn vrouwe)

Verse: 9    mit ûf kêrter schildes spitze:
Verse: 10    daz lêrte in jâmers witze.

Verse: 11    diu wâpen er erkande.
Verse: 12    war umbe er von im wande?

Verse: 13    welt ir, ich bescheide iuch des.
Verse: 14    si gap der stolze Gâlôes,

Verse: 15    fil li roi Gandîn,
Verse: 16    der vil getriuwe bruoder sîn,

Verse: 17    dâ vor unz um diu minne erwarp
Verse: 18    daz er an einer tjost erstarp.

Verse: 19    dô bant er abe sînen helm.
Verse: 20    wederz gras noch den melm

Verse: 21    sîn strît dâ niht mêr bante:
Verse: 22    grôz jâmer in des mante.

Verse: 23    mit sînem sinne er bâcte,
Verse: 24    daz er niht dicke envrâcte

Verse: 25    Kaileten, sîner muomen sun,
Verse: 26    waz sîn bruoder wolde tuon,

Verse: 27    daz er niht turnierte hie.
Verse: 28    daz enwesse er leider, wie

Verse: 29    er starp vor Muntôrî.
Verse: 30    dâ vor was im ein kumber bî:




Chapter: 81 
81


Verse: 1    des twanc in werdiu minne
Verse: 2    einer rîchen küneginne.

Verse: 3    diu kom ouch sît nâch im in nôt:
Verse: 4    si lac an klagenden triuwen tôt.

Verse: 5    swie Gahmuret wære ouch mit klage,
Verse: 6    doch hete er an dem halben tage

Verse: 7    gevrumt sô vil der sper enzwei,
Verse: 8    wære worden der turnei,

Verse: 9    sô wære verswendet der walt.
Verse: 10    geverwet hundert im wâren gezalt,

Verse: 11    diu gar vertet der fiere.
Verse: 12    sîne liehten baniere

Verse: 13    wâren den krîgierren worden:
Verse: 14    daz was in ir orden.

Verse: 15    dô reit er gein dem poulûn.
Verse: 16    der Wâleisinne garzûn

Verse: 17    huop sich nâch im ûf die vart.
Verse: 18    der tiure wâpenroc im wart

Verse: 19    durchstochen und verhouwen.
Verse: 20    den truoc er vür die vrouwen:

Verse: 21    er was von golde dennoch guot,
Verse: 22    er gleste als ein glüendec gluot.

Verse: 23    dar ane kôs man rîcheit.
Verse: 24    dô sprach diu künegîn gemeit:

Verse: 25    "dich hât ein werdez wîp gesant
Verse: 26    bî disem ritter in ditze lant.

Verse: 27    nû manet mich diu vuoge mîn,
Verse: 28    daz die andern niht verkrenket sîn,

Verse: 29    die âventiure brâhte dar.
Verse: 30    ieslîcher neme mîns wunsches war,




Chapter: 82 
82


Verse: 1    wan si sint mir alle sippe
Verse: 2    von dem Adâmes rippe.

Verse: 3    doch wæne et Gahmuretes tât
Verse: 4    den hœsten prîs dâ erworben hât."

Verse: 5    die andern tæten ritterschaft
Verse: 6    mit sô bewanter zornes kraft,

Verse: 7    daz siz wielken vaste unz an die naht.
Verse: 8    die innern heten die ûzern brâht

Verse: 9    mit strîte unz an ir poulûn.
Verse: 10    niwan der künec von Ascalûn

Verse: 11    und Môrolt von îrlant,
Verse: 12    durch die snüere in wære gerant.

Verse: 13    dâ was gewunnen und verlorn:
Verse: 14    genuoge heten schaden erkorn,

Verse: 15    die andern prîs und êre.
Verse: 16    nûst zît daz man si kêre

Verse: 17    von ein ander: niemen hie gesiht.
Verse: 18    si enwert der phandære liehtes niht:

Verse: 19    wer solde ouch vinsterlingen spiln?
Verse: 20    es mac die müeden doch beviln.

Verse: 21    der vinster man vil gar vergaz,
Verse: 22    dâ mîn her Gahmuret dort saz

Verse: 23    als ez wære tac: des was ez niht.
Verse: 24    dâ wâren aber ungevüegiu lieht,

Verse: 25    von kleinen kerzen manec schoup,
Verse: 26    geleget ûf ölboume loup

Verse: 27    manec kulter rîche,
Verse: 28    gestrecket vlîzeclîche

Verse: 29    dâ vür manec teppech breit.
Verse: 30    diu künegîn an die snüere reit




Chapter: 83 
83


Verse: 1    mit maneger werden vrouwen
Verse: 2    si wolde gerne schouwen

Verse: 3    den werden künec von Zazamanc.
Verse: 4    vil müeder ritter nâch ir dranc.

Verse: 5    diu tischlachen wâren abe genomen
Verse: 6    ê si inz poulûn wære komen.

Verse: 7    ûf spranc der wirt vil schiere
Verse: 8    und gevangener künege viere,

Verse: 9    den vuor ouch etslîch vürste mite.
Verse: 10    dô emphienc er si nâch zühte site.

Verse: 11    er geviel ir wol, dô si in ersach.
Verse: 12    diu Wâleisinne mit vreuden sprach:

Verse: 13    "ir sît hie wirt dâ ich iuch vant:
Verse: 14    sô bin ich wirtîn überz lant.

Verse: 15    ruocht irs daz ich iuch küssen sol,
Verse: 16    daz ist mit mînem willen wol."

Verse: 17    er sprach: "iuwer kus sol wesen mîn,
Verse: 18    suln dise herren geküsset sîn.

Verse: 19    sol künec oder vürste des enbern,
Verse: 20    sô engetar ouch ichs von iu niht gern."

Verse: 21    "deiswâr daz sol ouch geschehen.
Verse: 22    ich enhân ir keinen ê gesehen."

Verse: 23    si kuste dies dâ wâren wert:
Verse: 24    des hete Gahmuret gegert.

Verse: 25    er bat sitzen die künegîn.
Verse: 26    mîn her Brandelidelîn

Verse: 27    mit zühten zuo der vrouwen saz.
Verse: 28    grüene binz, von touwe naz,

Verse: 29    dünne ûf die teppeche was gestreut.
Verse: 30    dâ saz ûf des sich hie vreut




Chapter: 84 
84


Verse: 1    diu werde Wâleisinne.
Verse: 2    si twanc iedoch sîn minne:

Verse: 3    er saz vür si sô nâhe nider,
Verse: 4    daz si in begreif und zôch in wider

Verse: 5    anderhalp vaste an ir lîp.
Verse: 6    si was ein maget und niht ein wîp.

Verse: 7    diu in sô nâhen sitzen liez,
Verse: 8    welt ir nû hœren wie si hiez?

Verse: 9    diu künegîn Herzeloide
Verse: 10    und ir base Rischoide,

Verse: 11    die hete der künec Kailet,
Verse: 12    des muomen sun was Gahmuret.

Verse: 13    vrou Herzeloide gap den schîn,
Verse: 14    wæren erloschen gar die kerzen sîn,

Verse: 15    dâ wære doch lieht von ir genuoc.
Verse: 16    wan daz grôz jâmer under sluoc

Verse: 17    die hœhe an sîner vreude breit,
Verse: 18    sîn minne wære ir vil bereit.

Verse: 19    si sprâchen gruoz nâch zühte kür.
Verse: 20    bî einer wîle giengen schenken vür

Verse: 21    mit gezierde von Azagouc,
Verse: 22    dar an grôz rîcheit niemen trouc.

Verse: 23    die truogen juncherren în.
Verse: 24    daz muosten tiure nephe sîn

Verse: 25    von edelem gesteine.
Verse: 26    wît, niht ze kleine

Verse: 27    si wâren alle sunder golt:
Verse: 28    ez was des landes zinses solt,

Verse: 29    daz îsenhart vil dicke bôt
Verse: 30    vroun Belacânen vür grôze nôt.




Chapter: 85 
85


Verse: 1    dô bôt man in ir trinken dar
Verse: 2    in manegem steine lieht gevar,

Verse: 3    smârâde unde sardîn.
Verse: 4    etslîcher was ein rubîn.

Verse: 5    vür daz poulûn dô reit
Verse: 6    zwêne ritter ûf ir sicherheit.

Verse: 7    die wâren hin ûz gevangen
Verse: 8    und kômen her în gegangen.

Verse: 9    daz eine daz was Kailet:
Verse: 10    der sach den künec Gahmuret

Verse: 11    sitzen als er wære unvrô.
Verse: 12    er sprach: "wie gebârstû sô?

Verse: 13    dîn prîs ist doch dâ vür erkant,
Verse: 14    vroun Herzeloiden und ir lant

Verse: 15    hât dîn lîp errungen.
Verse: 16    des jehent hie gar die zungen:

Verse: 17    er sî Bertûn oder îrschman
Verse: 18    oder swer hie welsche sprâche kan,

Verse: 19    Franzois oder Brâbant,
Verse: 20    die jehent und volgent dîner hant,

Verse: 21    dir enkünne an sô bewantem spiln
Verse: 22    gelîche niemen hie geziln.

Verse: 23    des lise ich hie den wâren brief.
Verse: 24    dîn kraft mit ellen dô niht slief,

Verse: 25    dô dise herren kômen in nôt,
Verse: 26    der hant nie sicherheit gebôt:

Verse: 27    mîn her Brandelidelîn
Verse: 28    und der küene Lehelîn,

Verse: 29    Hardîz und Schafillôr.
Verse: 30    ouwê Razalîc der môr,




Chapter: 86 
86


Verse: 1    dem dû vor Patelamunt
Verse: 2    tæte ouch fîanze kunt!

Verse: 3    des gert dîn prîs an strîte
Verse: 4    der hœhe und ouch der wîte."

Verse: 5    er sprach: "mîn vrouwe mac wænen, daz dû tobes,
Verse: 6    sît dû mich alsô verlobes.

Verse: 7    dû enmaht mîn doch verkoufen niht,
Verse: 8    wande etswer wandel an mir siht.

Verse: 9    dîn munt ist lobes ze vil vernomen.
Verse: 10    sage et, wie bistû wider komen?"

Verse: 11    "diu werde diet von Punturteis
Verse: 12    hât mich und disen Schampôneis

Verse: 13    ledec lâzen über al.
Verse: 14    Môrolt, der mînen neven stal,

Verse: 15    von dem sol er ledec sîn,
Verse: 16    mac mîn her Brandelidelîn

Verse: 17    ledec sîn von dîner hant.
Verse: 18    wir sîn noch anders beide phant,

Verse: 19    ich und mîner swester sun:
Verse: 20    dû solt an uns genâde tuon.

Verse: 21    ein vesperîe ist hie erliten,
Verse: 22    daz turnieren wirt vermiten

Verse: 23    an dirre zît vor Kanvoleiz.
Verse: 24    die rehten wârheit ich des weiz,

Verse: 25    wan diu ûzer herte sitzet hie.
Verse: 26    nû sprich et, wâ von oder wie

Verse: 27    möhten si uns vor gehalden?
Verse: 28    dû muost vil prîses walden."

Verse: 29    diu künegîn sprach ze Gahmurete
Verse: 30    von herzen eine süeze bete:




Chapter: 87 
87


Verse: 1    "swaz mînes rehtes an iu sî,
Verse: 2    dâ sult ir mich lâzen bî.

Verse: 3    dar zuo mîn dienst genâden gert.
Verse: 4    wirde ich der bete hie gewert,

Verse: 5    sol iu daz prîs verkrenken,
Verse: 6    sô lât mich vürbaz wenken."

Verse: 7    der künegîn Amphlîsen,
Verse: 8    der kiuschen und der wîsen,

Verse: 9    ûf spranc balde ir kappelân.
Verse: 10    er sprach: "niht! in sol ze rehte hân

Verse: 11    mîn vrouwe, diu mich in ditze lant
Verse: 12    nâch sîner minne hât gesant.

Verse: 13    diu lebet nâch im in slîbes zer,
Verse: 14    ir minne hât an im gewer.

Verse: 15    diu sol behalden sînen lîp,
Verse: 16    wan sist im holt vür elliu wîp.

Verse: 17    hie sint ir boten vürsten drî,
Verse: 18    kint vor missewende vrî.

Verse: 19    der heizet einer Lanzidant,
Verse: 20    von hôher art ûz Gruonlant,

Verse: 21    der ist ze Kerlingen komen
Verse: 22    und hât die sprâche an sich genomen.

Verse: 23    der ander heizet Lîedarz,
Verse: 24    fil li cunt Schîolarz."

Verse: 25    wer nû der dritte wære,
Verse: 26    des hœret ouch ein mære.

Verse: 27    des muoter hiez Bêâflûrs
Verse: 28    und sîn vater Pansâmûrs:

Verse: 29    die wâren von der feien art.
Verse: 30    daz kint hiez Lîahturteltart.




Chapter: 88 
88


Verse: 1    diu liefen elliu driu vür in
Verse: 2    und sprâchen: "herre, hâstû sin

Verse: 3    (dir zelt rêgîn de Franze
Verse: 4    der werden minne schanze),

Verse: 5    sô mahtû spiln sunder phant.
Verse: 6    dîn vreude ist kumbers ledec zehant."

Verse: 7    dô diu botschaft was vernomen,
Verse: 8    Kailet, der ê was komen,

Verse: 9    saz der künegîn under ir mantels ort.
Verse: 10    hin zim sprach si disiu wort:

Verse: 11    "sage an, ist dir iht mêr geschehen?
Verse: 12    ich hân slege an dir gesehen."

Verse: 13    dô begreif im diu gehiure
Verse: 14    sîne quaschiure

Verse: 15    mit ir linden handen wîz,
Verse: 16    dar an lac der gotes vlîz.

Verse: 17    dô was im gamesieret
Verse: 18    unde zequaschieret

Verse: 19    hiufel, kinne und an der nasen.
Verse: 20    er hete der küneginne basen.

Verse: 21    diu dise êre an im begienc,
Verse: 22    daz si in mit handen zir gevienc,

Verse: 23    si sprach nâch zühte lêre
Verse: 24    hin ze Gahmurete mêre:

Verse: 25    "iu biutet vaste ir minne
Verse: 26    diu werde Franzoisinne.

Verse: 27    nû êret an mir elliu wîp
Verse: 28    und lât ze rehte mînen lîp.

Verse: 29    sît hie unz ich mîn reht geneme:
Verse: 30    ir lâzet anders mich in scheme."




Chapter: 89 
89


Verse: 1    daz lobete ir der werde man.
Verse: 2    si nam urloup, dô vuor si dan.

Verse: 3    si huop Kailet, der degen wert,
Verse: 4    sunder schamel ûf ir phert

Verse: 5    und gienc von ir hin wider în,
Verse: 6    aldâ er sach die vriunde sîn.

Verse: 7    er sprach ze Hardîze:
Verse: 8    iuwer swester Alîze

Verse: 9    mir minne bôt, die nam ich dâ.
Verse: 10    diu ist bestatet anderswâ

Verse: 11    und werdeclîcher denne ze mir.
Verse: 12    durch iuwer zuht lât zornes gir.

Verse: 13    si hât der vürste Lambekîn.
Verse: 14    al sül si niht gekrœnet sîn,

Verse: 15    si hât doch werdekeit bekant:
Verse: 16    Hânouwe und Brâbant

Verse: 17    ir dient und manec ritter guot.
Verse: 18    kêrt mir ze grüezen iuwern muot,

Verse: 19    lât mich in iuwern hulden sîn
Verse: 20    und nemt hin wider dienest mîn."

Verse: 21    der künec von Gascôn dô sprach
Verse: 22    als im sîn manlîch ellen jach:

Verse: 23    "iuwer rede was ie süeze.
Verse: 24    swer iuch dar umbe grüeze,

Verse: 25    dem ir vil lasters hât getân,
Verse: 26    der woldez doch durch vorhte lân.

Verse: 27    mich vienc iuwer muomen sun."
Verse: 28    "der kan an niemen missetuon:

Verse: 29    ir wert wol ledec von Gahmurete.
Verse: 30    daz sol sîn mîn êrstiu bete.




Chapter: 90 
90


Verse: 1    swenne ir denne unbetwungen sît,
Verse: 2    mîn dienst gelebet noch die zît

Verse: 3    daz ir mich zeinem vriunde nemt.
Verse: 4    ir möht iuch nû wol hân verschemt.

Verse: 5    swaz halt mir von iu geschiht,
Verse: 6    mich enslüege doch iuwer swester niht."

Verse: 7    der rede si lacheten über al.
Verse: 8    dô wart getrüebet in der schal:

Verse: 9    den wirt sîn triuwe mente
Verse: 10    daz er sich wider sente,

Verse: 11    wan jâmer ist ein scharpher gart.
Verse: 12    ir ieslîcher innen wart

Verse: 13    daz sîn lîp mit kumber ranc
Verse: 14    und al sîn vreude was ze kranc.

Verse: 15    dô zurnde sîner muomen sun,
Verse: 16    er sprach: "dû kans unvuoge tuon."

Verse: 17    "nein, ich muoz bî riuwen sîn:
Verse: 18    ich sene mich nâch der künegîn.

Verse: 19    ich liez ze Patelamunt
Verse: 20    dâ von mir ist mîn herze wunt,

Verse: 21    in reiner art ein süeze wîp.
Verse: 22    ir werdiu kiusche mir den lîp

Verse: 23    nâch ir minne jâmers mant.
Verse: 24    si gap mir liute unde lant.

Verse: 25    mich tuot vrou Belacâne
Verse: 26    manlîcher vreuden âne:

Verse: 27    ez ist doch vil manlich,
Verse: 28    swer minnen wankes schamet sich.

Verse: 29    der vrouwen huote mich ûf bant,
Verse: 30    daz ich niht ritterschefte vant.




Chapter: 91 
91


Verse: 1    dô wânde ich daz ritterschaft
Verse: 2    mich neme von ungemüetes kraft.

Verse: 3    der hân ich hie ein teil getân.
Verse: 4    nû wænt manec ungewisser man

Verse: 5    daz mich ir swerze jagete dan:
Verse: 6    die sach ich vür die sunnen an.

Verse: 7    ir wîplîch prîs mir vüeget leit,
Verse: 8    sist ein buckel ob der werdekeit.

Verse: 9    einz undz ander muoz ich klagen:
Verse: 10    ich sach mîns bruoder wâpen tragen

Verse: 11    mit ûf kêrtem orte."
Verse: 12    "ouwê mir dirre worte!"

Verse: 13    daz mære wart dô jæmerlîch,
Verse: 14    von wazzer wurden diu ougen rîch

Verse: 15    dem werden Spânôle.
Verse: 16    "ouwî künegîn fôle,

Verse: 17    durch dîne minne gap den lîp
Verse: 18    Gâlôes, den elliu wîp

Verse: 19    von herzen klagen solden
Verse: 20    mit triuwen, ob si wolden

Verse: 21    daz ir site bræhte
Verse: 22    lop swâ mans gedæhte.

Verse: 23    künegîn von Averre,
Verse: 24    swie lützel dir daz werre,

Verse: 25    den mâc ich doch durch dich verlôs,
Verse: 26    der ritterlîchen ende kôs

Verse: 27    von einer tjoste, diu in sluoc.
Verse: 28    der dîn kleinœte truoc,

Verse: 29    vürsten, die gesellen sîn,
Verse: 30    tuont herzenlîche ir klagen schîn:




Chapter: 92 
92


Verse: 1    si habent ir schildes breite
Verse: 2    nâch jâmers geleite

Verse: 3    zer erden gekêret,
Verse: 4    grôz trûren si daz lêret.

Verse: 5    alsus tuont si ritterschaft.
Verse: 6    si sint verladen mit jâmers kraft,

Verse: 7    sît Gâlôes, mîner muomen sun,
Verse: 8    nâch minnen dienst niht solde tuon."

Verse: 9    dô er vernam des bruoder tôt,
Verse: 10    daz was sîn ander herzenôt.

Verse: 11    mit jâmer sprach er disiu wort:
Verse: 12    "wie hât nû mînes ankers ort

Verse: 13    in riuwe ergriffen landes habe!"
Verse: 14    der wâpen tet er sich dô abe:

Verse: 15    sîn riuwe im hertes kumbers jach.
Verse: 16    der helt mit wâren triuwen sprach:

Verse: 17    "von Anschouwe Gâlôes
Verse: 18    (vürbaz darf niemen vrâgen des,

Verse: 19    ez enwart nie manlîcher zuht
Verse: 20    geborn), der wâren milde vruht

Verse: 21    uz dînem herzen blüete.
Verse: 22    nû erbarmet mich dîn güete."

Verse: 23    er sprach ze Kailete:
Verse: 24    "wie gehabet sich Schôete,

Verse: 25    mîn muoter vreuden arme?"
Verse: 26    "sô daz ez got erbarme.

Verse: 27    dô ir erstarp Gandîn
Verse: 28    und Gâlôes der bruoder dîn

Verse: 29    und dô si dîn bî ir niht sach,
Verse: 30    der tôt ouch ir daz herze brach."




Chapter: 93 
93


Verse: 1    dô sprach der künec Hardîz:
Verse: 2    "nû kêrt an manheit iuwern vlîz.

Verse: 3    ob ir manheit kunnet tragen,
Verse: 4    sô sult ir leit ze mâzen klagen."

Verse: 5    sîn kumber leider was ze grôz,
Verse: 6    ein güsse im von den ougen vlôz.

Verse: 7    er schuof den rittern ir gemach
Verse: 8    und gienc dâ er sîne kamern sach,

Verse: 9    ein kleine gezelt von samît.
Verse: 10    die naht er dolde jâmers zît.

Verse: 11    als der ander tac erschein,
Verse: 12    si wurden alle des enein,

Verse: 13    die innern und daz ûzer her,
Verse: 14    swer dâ mit strîteclîcher wer

Verse: 15    wære, junc oder alt
Verse: 16    oder blœde oder balt,

Verse: 17    die ensolden tjostieren niht.
Verse: 18    dô schein der mitte morgen lieht,

Verse: 19    si wâren mit strîte sô verriben
Verse: 20    und diu ors mit sporn alsô vertriben,

Verse: 21    daz die vrechen ritterschaft
Verse: 22    ie dennoch twanc der müede kraft.

Verse: 23    diu künegîn reit dô selbe
Verse: 24    nâch den werden hin ze velde

Verse: 25    und brâhte die mit ir in die stat.
Verse: 26    die besten si dort inne bat

Verse: 27    daz sie zer Lêôplâne riten.
Verse: 28    dô enwart ir bete niht vermiten.

Verse: 29    si kômen dâ man messe sanc
Verse: 30    dem trûregen künege von Zazamanc.




Chapter: 94 
94


Verse: 1    als der bendiz wart getân,
Verse: 2    dô kom vrou Herzeloide sân.

Verse: 3    an Gahmuretes lîp si sprach:
Verse: 4    si gerte als ir diu volge jach.

Verse: 5    dô sprach er: "vrouwe, ich hân ein wîp,
Verse: 6    diu ist mir lieber danne der lîp.

Verse: 7    ob ich der âne wære,
Verse: 8    dennoch wesse ich ein mære,

Verse: 9    dâ mit ich iu enbræste gar,
Verse: 10    næme iemen mînes rehtes war."

Verse: 11    si sprach: "ir sult die mœrinne
Verse: 12    lân durch mîne minne.

Verse: 13    des toufes segen hât bezzer kraft.
Verse: 14    nû ânet iuch der heidenschaft

Verse: 15    und minnet mich nâch unser ê,
Verse: 16    wan mirst nâch iuwer minne wê.

Verse: 17    oder sol mir gein iu schade sîn
Verse: 18    der Franzoiser künegîn,

Verse: 19    der boten sprâchen süeziu wort?
Verse: 20    si spilten ir mære unz an den ort."

Verse: 21    "jâ diust mîn wâriu vrouwe:
Verse: 22    ich brâhte in Anschouwe

Verse: 23    ir rât und mîner zühte site.
Verse: 24    mir wont noch hiute ir helfe mite,

Verse: 25    dâ von daz mich mîn vrouwe zôch,
Verse: 26    die wîbes missewende ie vlôch.

Verse: 27    wir wâren kinder beidiu dô
Verse: 28    und doch ze sehen ein ander vrô.

Verse: 29    diu küneginne Amphlîse
Verse: 30    wont an wîplîchem prîse.




Chapter: 95 
95


Verse: 1    mir gap diu gehiure
Verse: 2    von dem lande die besten stiure:

Verse: 3    ich was dô ermer denne nuo.
Verse: 4    dâ greif ich willeclîchen zuo.

Verse: 5    zelt mich noch vür die armen.
Verse: 6    ich solde iuch, vrouwe, erbarmen:

Verse: 7    mir ist mîn werder bruoder tôt.
Verse: 8    durch iuwer zuht lât mich âne nôt.

Verse: 9    kêrt minne dâ diu vreude sî,
Verse: 10    wan mir wont niwan jâmer bî."

Verse: 11    "lât mich den lîp niht langer zern:
Verse: 12    saget an, wâ mite welt ir iuch wern?"

Verse: 13    "ich sage nâch iuwer vrâge ger.
Verse: 14    ez wart ein turnei dâ her

Verse: 15    gesprochen, des enwart hie niht.
Verse: 16    manec geziuc mir des giht."

Verse: 17    "den hât ein vesperîe erlemt.
Verse: 18    die vrechen sint sô hie gezemt,

Verse: 19    daz der turnei dâ von verdarp."
Verse: 20    "iuwer stete wer ich warp

Verse: 21    mit den diez guot hie hânt getân.
Verse: 22    ir sult mich nôtrede erlân:

Verse: 23    ez tet hie manec ritter baz.
Verse: 24    iuwer reht ist gein mir laz,

Verse: 25    niwan iuwer gemeiner gruoz,
Verse: 26    ob ich den von iu haben muoz.

Verse: 27    als mir diu âventiure saget,
Verse: 28    dô nam der ritter und diu maget

Verse: 29    einen rihtære über der vrouwen klage.
Verse: 30    dô nâhetez dem mitten tage.




Chapter: 96 
96


Verse: 1    man sprach ein urteil zehant:
Verse: 2    "swelh ritter helm hie ûf gebant,

Verse: 3    der her nâch ritterschaft ist komen,
Verse: 4    hât er den prîs hie genomen,

Verse: 5    den sol diu küneginne hân."
Verse: 6    dar nâch diu volge wart getân.

Verse: 7    dô sprach si: "herre, nû sît ir mîn.
Verse: 8    ich tuon iu dienst nâch hulden schîn

Verse: 9    und vüege iu solher vreuden teil,
Verse: 10    daz ir nâch jâmer werdet geil."

Verse: 11    er hete iedoch von jâmer pîn.
Verse: 12    dô was des aberellen schîn

Verse: 13    zegangen, dar nâch komen was
Verse: 14    kurz kleine grüene gras.

Verse: 15    daz velt was gar vergrüenet,
Verse: 16    daz blœdiu herzen küenet

Verse: 17    und in gît hôchgemüete.
Verse: 18    vil boume stuont in blüete

Verse: 19    von dem süezen lufte des meien.
Verse: 20    sîn art von der feien

Verse: 21    muoste minnen oder minne gern.
Verse: 22    des wolde in vriundîn dâ gewern.

Verse: 23    an vroun Herzeloiden er dô sach,
Verse: 24    sîn süezer munt mit zühten sprach:

Verse: 25    "vrouwe, sol ich mit iu genesen,
Verse: 26    sô lât mich âne huote wesen:

Verse: 27    wan verlæt mich immer jâmers kraft,
Verse: 28    sô tæte ich gerne ritterschaft.

Verse: 29    lât ir niht turnieren mich,
Verse: 30    sô kan ich noch den alden slich,




Chapter: 97 
97


Verse: 1    als dô ich mînem wîbe entran,
Verse: 2    die ich ouch mit ritterschaft gewan.

Verse: 3    dô si mich ûf von strîte bant,
Verse: 4    ich liez liute unde lant."

Verse: 5    si sprach: "herre, nû nemt iu selbe ein zil:
Verse: 6    ich lâze iu iuwers willen vil."

Verse: 7    "ich wil vrumen noch vil der sper enzwei.
Verse: 8    aller mânedgelîch ein turnei,

Verse: 9    des sult ir, vrouwe, ruochen,
Verse: 10    daz ich den müeze suochen."

Verse: 11    diz lobete si, wart mir gesaget:
Verse: 12    er emphienc diu lant und ouch die maget.

Verse: 13    disiu driu juncherrelîn
Verse: 14    Amphlîsen der künegîn

Verse: 15    hie stuonden und ir kappelân,
Verse: 16    dâ volge und urteil wart getân.

Verse: 17    aldâ erz hôrte unde sach,
Verse: 18    heimlîche er Gahmureten sprach:

Verse: 19    "man tet mîner vrouwen kunt
Verse: 20    daz ir vor Patelamunt

Verse: 21    den hœsten prîs behieldet
Verse: 22    und dâ zweier krône wieldet.

Verse: 23    sî hât ouch lant unde muot
Verse: 24    und gît iu lîp unde guot."

Verse: 25    "dô si mir gap die ritterschaft,
Verse: 26    dô muoste ich nâch der ordens kraft,

Verse: 27    als mir des schildes ambet saget,
Verse: 28    dâ bî belîben unverzaget.

Verse: 29    wan daz ich schilt von ir gewan,
Verse: 30    ez wære noch anders ungetân.




Chapter: 98 
98


Verse: 1    ich wære des trûrec oder geil,
Verse: 2    mich behabet hie ritters urteil.

Verse: 3    vart wider, saget ir dienest mîn:
Verse: 4    ich sül iedoch ir ritter sîn,

Verse: 5    ob mir alle krône wæren bereit.
Verse: 6    ich hân nâch ir mîn hœste leit."

Verse: 7    er bôt in sîne grôze habe:
Verse: 8    sîner gebe tâten si sich abe.

Verse: 9    die boten vuoren ze lande
Verse: 10    gar âne ir vrouwen schande.

Verse: 11    si engerten urloubes niht,
Verse: 12    als lîhte in zorne noch geschiht.

Verse: 13    ir knappen vürsten, disiu kint
Verse: 14    wâren von weinen vil nâch blint.

Verse: 15    die den schilt verkêrt dâ hânt getragen,
Verse: 16    den begunde ir vriunt ze velde sagen:

Verse: 17    "vrou Herzeloide diu künegîn,
Verse: 18    diu hât behabet den Anschevîn."

Verse: 19    "wer was von Anschouwe dâ?
Verse: 20    unser herre ist leider anderswâ,

Verse: 21    durch ritters prîs zen Sarrazîn.
Verse: 22    daz ist nû unser hœster pîn."

Verse: 23    "der hie den prîs hât bezalt
Verse: 24    und sô manegen ritter abe gevalt

Verse: 25    und der sô stach unde sluoc
Verse: 26    und der den tiuren anker truoc

Verse: 27    ûf dem helme lieht gesteinet,
Verse: 28    daz ist den ir dâ meinet.

Verse: 29    mir saget der künec Kailet,
Verse: 30    der Anschevîn wære Gahmuret.




Chapter: 99 
99


Verse: 1    dem ist hie wol gelungen."
Verse: 2    nâch den orsen si dô sprungen,

Verse: 3    ir wât wart von den ougen naz.
Verse: 4    dô si kômen dâ ir herre saz,

Verse: 5    si emphiengen in, er emphienc ouch sie.
Verse: 6    vreude und jâmer daz was hie.

Verse: 7    dô kuste er die getriuwen,
Verse: 8    er sprach: "iuch ensol niht riuwen

Verse: 9    zunmâzer wîs der bruoder mîn.
Verse: 10    ich mac iuch wol ergetzen sîn:

Verse: 11    kêrt ûf den schilt nâch sîner art.
Verse: 12    gehabet iuch an der vreuden vart:

Verse: 13    ich sol mîns vater wâpen tragen.
Verse: 14    sîn lant mîn anker hât beslagen.

Verse: 15    der anker ist ein recken zil:
Verse: 16    den trage und neme nû swer der wil.

Verse: 17    ich muoz nû lebelîche
Verse: 18    gebâren: ich bin rîche.

Verse: 19    wan solde ich volkes herre sîn,
Verse: 20    den tæte wê der jâmer mîn.

Verse: 21    vrou Herzeloide, helfet mir,
Verse: 22    daz wir biten, ich und ir,

Verse: 23    künege und vürsten die hie sîn,
Verse: 24    daz si durch den dienest mîn

Verse: 25    belîben, unz ir mich gewert
Verse: 26    des minnen werc zer minnen gert."

Verse: 27    die bete warp ir beider munt,
Verse: 28    die werden lobetenz sâ zestunt.

Verse: 29    ieslîcher vuor an sîn gemach.
Verse: 30    diu künegîn zir vriunde sprach:




Chapter: 100 
100


Verse: 1    "nû habet iuch an mîne phlege."
Verse: 2    si wîste in heimlîche wege.

Verse: 3    sîner geste phlac man wol ze vromen,
Verse: 4    swar halt ir wirt wære komen.

Verse: 5    daz gesinde wart gemeine:
Verse: 6    doch vuor er dan al eine,

Verse: 7    wan zwei juncherrelîn.
Verse: 8    juncvrouwen und diu künegîn

Verse: 9    in vuorten dâ er vreude vant
Verse: 10    und al sîn trûren gar verswant.

Verse: 11    enschumphieret wart sîn riuwe
Verse: 12    und sîn hôchgemüete al niuwe:

Verse: 13    daz muoste iedoch bî liebe sîn.
Verse: 14    vrou Herzeloide diu künegîn

Verse: 15    ir magetuoms dâ âne wart.
Verse: 16    die munde wâren ungespart:

Verse: 17    die begunden si mit küssen zern
Verse: 18    und den jâmer von den vreuden wern.

Verse: 19    dar nâch er eine zuht begienc:
Verse: 20    si wurden ledec, die er dâ vienc.

Verse: 21    Hardîzen und Kailet,
Verse: 22    seht, die versuonde Gahmuret.

Verse: 23    dâ ergienc ein solhiu hôchgezît,
Verse: 24    swer der hât gelîchet sît,

Verse: 25    des hant iedoch gewaldes phlac.
Verse: 26    Gahmuret sich des bewac,

Verse: 27    sîn habe was vil ungespart.
Verse: 28    aræbesch golt geteilet wart

Verse: 29    armen rittern al gemeine,
Verse: 30    und den künegen edel gesteine




Chapter: 101 
101


Verse: 1    teilde Gahmuretes hant
Verse: 2    und ouch swaz er dâ vürsten vant.

Verse: 3    [dâ wart daz varnde volc vil geil,
Verse: 4    die emphiengen rîcher gâbe teil.]

Verse: 5    lât sî rîten, swer dâ geste sîn:
Verse: 6    den gap urloup der Anschevîn.

Verse: 7    daz pantel, daz sîn vater truoc,
Verse: 8    von zobele ûf sînem schilt man sluoc.

Verse: 9    al kleine wîz sîdîn
Verse: 10    ein hemde der künegîn,

Verse: 11    als ez ruorte ir blôzer lîp,
Verse: 12    diu nû worden was sîn wîp,

Verse: 13    daz was sîns halsberges dach.
Verse: 14    ahzeheniu man durchstochen sach

Verse: 15    und mit swerten gar zehouwen,
Verse: 16    ê er schiede von der vrouwen.

Verse: 17    daz legete ouch si an blôze hût,
Verse: 18    sô von ritterschefte kom ir trût,

Verse: 19    der manegen schilt vil dürkel stach.
Verse: 20    ir zweier minne man triuwen jach.

Verse: 21    er hete werdekeit genuoc,
Verse: 22    dô in sîn manlîch ellen truoc

Verse: 23    hin über gein der herte.
Verse: 24    mich jâmert sîner verte.

Verse: 25    im kom diu wâre botschaft,
Verse: 26    sîn herre der bâruc wære mit kraft

Verse: 27    überriten von den Babilôn:
Verse: 28    einer hiez Ipomidôn,

Verse: 29    der ander Pompêjus.
Verse: 30    den nennet diu âventiure alsus,




Chapter: 102 
102


Verse: 1    daz was ein stolz werder man,
Verse: 2    niht der von Rôme entran

Verse: 3    Jûliuse dâ bevor.
Verse: 4    der künec Nabuchodonosor

Verse: 5    sîner muoter bruoder was,
Verse: 6    der an trügelîchen buochen las,

Verse: 7    er solde selbe sîn ein got:
Verse: 8    daz wære nû der liute spot.

Verse: 9    ir lîp, ir guot was ungespart.
Verse: 10    die gebruoder wâren von hôher art,

Verse: 11    von Nînus, der gewaldes phlac
Verse: 12    ê würde gestiftet Baldac

Verse: 13    (der selbe stifte ouch Nînivê):
Verse: 14    in tet schade und laster wê.

Verse: 15    der jach der bâruc zurborn.
Verse: 16    des wart gewunnen und verlorn

Verse: 17    genuoc ze beiden sîten:
Verse: 18    man sach dâ helde strîten.

Verse: 19    dô schiffete er sich über mer
Verse: 20    und vant den bâruc mit wer.

Verse: 21    mit vreuden er emphangen wart,
Verse: 22    swie mich jâmer sîner vart.

Verse: 23    Waz dâ geschæhe, wiez dort ergê,
Verse: 24    gewin und vlust, wie daz gestê,

Verse: 25    des enweiz vrou Herzeloide niht.
Verse: 26    diu was alsô diu sunne lieht

Verse: 27    und hete minneclîchen lîp.
Verse: 28    rîcheit bî tugende phlac daz wîp

Verse: 29    und vreuden mêre denne ze vil.
Verse: 30    si was gar ob dem wunsches zil:




Chapter: 103 
103


Verse: 1    si kêrte ir herze an guote kunst,
Verse: 2    des bejagete si der werlde gunst.

Verse: 3    [vrou Herzeloide diu künegin,
Verse: 4    ir site an lobe vant gewin,]

Verse: 5    ir kiusche was vür prîs erkant,
Verse: 6    küneginne über driu lant:

Verse: 7    Wâleis und Anschouwe,
Verse: 8    dar über was si vrouwe,

Verse: 9    si truoc ouch krône ze Norgâls
Verse: 10    in der houbetstat ze Kingrivâls.

Verse: 11    ir was ouch wol sô liep ir man,
Verse: 12    ob ie kein vrouwe mêr gewan

Verse: 13    sô werden vriunt, waz war ir daz?
Verse: 14    si mohtez lâzen âne haz.

Verse: 15    dô er ûze beleip ein halbez jâr,
Verse: 16    sîns komens warte si vür wâr:

Verse: 17    daz wart ir lîpgedinge.
Verse: 18    dô brast ir vreuden klinge

Verse: 19    mitten in dem hefte enzwei.
Verse: 20    ouwê unde heiâ hei,

Verse: 21    daz güete alsolhen kumber treget
Verse: 22    und immer triuwe jâmer reget!

Verse: 23    alsus vert diu mennescheit:
Verse: 24    hiute vreude, morgen leit.

Verse: 25    diu vrouwe umbe einen mitten tac
Verse: 26    eins angestlîchen slâfes phlac:

Verse: 27    ir kom ein vorhtlîcher schric.
Verse: 28    si dûhte wie ein sternblic

Verse: 29    si gein den lüften vuorte,
Verse: 30    dâ si mit kreften ruorte




Chapter: 104 
104


Verse: 1    manec viurîn donerstrâle.
Verse: 2    die vlugen al zemâle

Verse: 3    gein ir: dô sungelte unde sanc
Verse: 4    von genstern ir zöphe lanc.

Verse: 5    mit krache gap der doner duz,
Verse: 6    brinnendege zeher was sîn guz.

Verse: 7    ir lîp si dâ nâch wider vant,
Verse: 8    dô zucte ein grîfe ir zeswen hant.

Verse: 9    daz wart ir verkêrt hie mite:
Verse: 10    si dûhte wunderlîcher site,

Verse: 11    wie si wære eins wurmes amme,
Verse: 12    der sît zevuorte ir wamme,

Verse: 13    und wie ein trache ir brüste süge
Verse: 14    und daz der gâhes von ir vlüge,

Verse: 15    sô daz si in nimmer mêr gesach.
Verse: 16    daz herze er ir ûz dem lîbe brach.

Verse: 17    die vorhte muosten ir ougen sehen:
Verse: 18    ez ist selten wîbe mêr geschehen

Verse: 19    in slâfe kumber dem gelîch.
Verse: 20    dâ vor was si ritterlîch:

Verse: 21    ach wênec, daz wirt verkêret gar,
Verse: 22    si wirt nâch jâmer nû gevar.

Verse: 23    ir schade wirt lanc unde breit,
Verse: 24    ir nâhent komendiu herzenleit.

Verse: 25    diu vrouwe dô begunde
Verse: 26    daz si dâ vor niht kunde,

Verse: 27    beidiu zabeln unde wuofen,
Verse: 28    in slâfe lûte ruofen.

Verse: 29    vil juncvrouwen sâzen hie,
Verse: 30    die sprungen dar und wacten sie.




Chapter: 105 
105


Verse: 1    dô kom geriten Tampanîs,
Verse: 2    ir mannes meisterknappe wîs,

Verse: 3    und kleiner juncherren vil.
Verse: 4    dâ gienc er ûz der vreuden zil:

Verse: 5    die sageten klagende ir herren tôt.
Verse: 6    des kom vrou Herzeloide in nôt:

Verse: 7    si viel hin unversunnen.
Verse: 8    die ritter sprâchen: "wiest gewunnen

Verse: 9    mîn herre in sînem harnas,
Verse: 10    sô wol gewâpent sô er was?"

Verse: 11    swie den knappen jâmer jagete,
Verse: 12    den helden er doch sagete:

Verse: 13    "mînen herren lebens lenge vlôch.
Verse: 14    sîn hersenier von im er zôch:

Verse: 15    des twanc in starkiu hitze.
Verse: 16    gunêrtiu heidensch witze

Verse: 17    hât uns verstoln den helt guot.
Verse: 18    ein ritter hete bockes bluot

Verse: 19    genomen in ein langez glas.
Verse: 20    daz sluoc er an den adamas:

Verse: 21    dô wart er weicher danne ein swamp.
Verse: 22    den man noch mâlet vür daz lamp

Verse: 23    und ouch daz kriuze in sîne klân,
Verse: 24    den erbarme daz dâ wart getân.

Verse: 25    dô si mit scharn zein ander riten,
Verse: 26    âvoi wie dâ wart gestriten!

Verse: 27    des bâruckes ritterschaft
Verse: 28    sich werte wol mit ellens kraft

Verse: 29    vor Baldac ûf dem gevilde.
Verse: 30    durchstochen wart vil schilde,




Chapter: 106 
106


Verse: 1    dâ si zein ander gâhten.
Verse: 2    die poinder sich dâ vlâhten,

Verse: 3    sich wurren die banier:
Verse: 4    dâ viel manec degen fier.

Verse: 5    aldâ worhte mînes herren hant
Verse: 6    dâ von ir aller prîs verswant.

Verse: 7    dô kom gevarn Ipomidôn:
Verse: 8    mit tôde er mînem herren lôn

Verse: 9    gap, daz er in nider stach,
Verse: 10    dâz manec tûsent ritter sach

Verse: 11    vor Alexandrîe.
Verse: 12    mîn herre valsches vrîe

Verse: 13    gein dem künege kêrte.
Verse: 14    des tjost in sterben lêrte,

Verse: 15    sînen helm versneit: des spers ort
Verse: 16    durch sîn houbet wart gebort,

Verse: 17    daz man den trunzûn drinne vant.
Verse: 18    iedoch gesaz der wîgant,

Verse: 19    al teude er ûz dem strîte reit
Verse: 20    ûf eine plâne, diu was breit.

Verse: 21    über in kom sîn kappelân:
Verse: 22    er sprach mit kurzen worten sân

Verse: 23    sîne bîhte und sande her
Verse: 24    diz hemde und daz selbe sper

Verse: 25    daz in von uns gescheiden hât.
Verse: 26    er starp âne alle missetât.

Verse: 27    juncherren und die knappen sîn
Verse: 28    bevalh er der künegîn.

Verse: 29    er wart geleget ze Baldac.
Verse: 30    diu koste den bâruc ringe wac:




Chapter: 107 
107


Verse: 1    mit golde wart gehêret,
Verse: 2    grôz rîcheit dran gekêret

Verse: 3    mit edelem gesteine,
Verse: 4    dâ inne liget der reine.

Verse: 5    gebalsemt wart sîn junger rê.
Verse: 6    vor jâmer wart vil liuten wê.

Verse: 7    ein tiure rubîn ist der stein
Verse: 8    ob sînem grabe, dâ durch er schein.

Verse: 9    uns wart gevolget hie mite:
Verse: 10    ein kriuze nâch der marter site,

Verse: 11    als uns Kristes tôt lôste,
Verse: 12    liez man stôzen im ze trôste

Verse: 13    ze scherm der sêle überz grap.
Verse: 14    der bâruc die koste gap:

Verse: 15    ez was ein tiure smârât.
Verse: 16    wir tâtenz âne der heiden rât:

Verse: 17    ir orden kan niht kriuzes phlegen,
Verse: 18    als Kristes tôt uns liez den segen.

Verse: 19    ez betent heiden sunder spot
Verse: 20    an in als an ir werden got,

Verse: 21    niht durch des kriuzes êre
Verse: 22    noch durch des toufes lêre,

Verse: 23    der zem urteillîchen ende
Verse: 24    uns lœsen sol gebende.

Verse: 25    diu manlîche triuwe sîn
Verse: 26    gît im ze himele liehten schîn

Verse: 27    und ouch sîn riuwec bîhte.
Verse: 28    der valsch was an im sîhte.

Verse: 29    in sînen helm, den adamas,
Verse: 30    ein epitafium ergraben was,




Chapter: 108 
108


Verse: 1    versigelt ûfz kriuze ob dem grabe.
Verse: 2    sus sagent die buochstabe:

Verse: 3    "durch disen helm ein tjoste sluoc
Verse: 4    den werden der ellen truoc.

Verse: 5    Gahmuret was er genant,
Verse: 6    gewaldec künec über driu lant.

Verse: 7    ieglîchez im der krône jach,
Verse: 8    dâ giengen rîche vürsten nâch.

Verse: 9    er was von Anschouwe erborn
Verse: 10    und hât vor Baldac verlorn

Verse: 11    den lîp durch den bâruc.
Verse: 12    sîn prîs gap sô hôhen ruc,

Verse: 13    niemen reichet an sîn zil.
Verse: 14    swâ man noch ritter prüeven wil,

Verse: 15    er ist von muoter ungeborn,
Verse: 16    zuo dem sîn ellen habe gesworn.

Verse: 17    ich meine der schildes ambet hât.
Verse: 18    helfe und manlîchen rât

Verse: 19    gap er mit stæte vriunden sîn,
Verse: 20    er leit durch wîp vil scharphen pîn.

Verse: 21    er truoc den touf und kristen ê:
Verse: 22    sîn tôt tet Sarrazînen wê

Verse: 23    sunder liegen, daz ist wâr.
Verse: 24    sîner zît versunnenlîchiu jâr

Verse: 25    sîn ellen sô nâch prîse warp,
Verse: 26    mit ritterlîchem prîse er starp:

Verse: 27    er hete der valscheit an gesiget.
Verse: 28    nû wünschet im heiles, der hie liget."

Verse: 29    diz was alsô der knappe jach.
Verse: 30    Wâleise man vil weinen sach:




Chapter: 109 
109


Verse: 1    die muosten wol von schulden klagen.
Verse: 2    diu vrouwe hete getragen

Verse: 3    ein kint, daz in ir lîbe stiez,
Verse: 4    die man âne helfe ligen liez.

Verse: 5    ahzehen wochen hete gelebet,
Verse: 6    des muoter mit dem tôde strebet,

Verse: 7    vrou Herzeloide diu künegin.
Verse: 8    die andern heten kranken sin,

Verse: 9    daz si niht hulfen dem wîbe,
Verse: 10    wan diu truoc in ir lîbe

Verse: 11    der aller ritter bluome wirt,
Verse: 12    ob in ein sterben hie verbirt.

Verse: 13    dô kom ein altwîser man
Verse: 14    durch klage über die vrouwen sân,

Verse: 15    dâ diu mit dem tôde ranc.
Verse: 16    die zene er ir von ein ander twanc:

Verse: 17    man gôz ir wazzer in den munt.
Verse: 18    aldâ wart ir versinnen kunt.

Verse: 19    si sprach: "ouwê war kom mîn trût?"
Verse: 20    diu vrouwe in klagete über lût:

Verse: 21    "mînes herzen vreude breit
Verse: 22    was Gahmuretes werdekeit.

Verse: 23    daz nam mir sîn vrechiu ger.
Verse: 24    ich was vil junger danne er

Verse: 25    und bin sîn muoter und sîn wîp:
Verse: 26    ich trage alhie doch sînen lîp

Verse: 27    und sînes verhes sâmen,
Verse: 28    den gâben unde nâmen

Verse: 29    unser zweier minne.
Verse: 30    hât got getriuwe sinne,




Chapter: 110 
110


Verse: 1    sô lâze erz mir ze vrühte komen.
Verse: 2    ich hân doch schaden ze vil genomen

Verse: 3    an mînem stolzen werden man.
Verse: 4    wie hât der tôt ze mir getân!

Verse: 5    er emphienc nie wîbes minnen teil,
Verse: 6    er enwære al ir vreuden geil:

Verse: 7    in müete wîbes riuwe.
Verse: 8    daz riet sîn manlîch triuwe,

Verse: 9    wande er was valsches lære."
Verse: 10    nû hœret ein ander mære,

Verse: 11    waz diu vrouwe dô begienc.
Verse: 12    kint und bûch si zir gevienc

Verse: 13    mit armen und mit henden.
Verse: 14    si sprach: "mir sol got senden

Verse: 15    die werden vruht von Gahmurete.
Verse: 16    daz ist mînes herzen bete.

Verse: 17    got wende mich sô tumber nôt:
Verse: 18    daz wære Gahmuretes ander tôt,

Verse: 19    ob ich mich selben slüege,
Verse: 20    die wîle ich bî mir trüege

Verse: 21    daz ich von sîner minne emphienc,
Verse: 22    der mannes triuwe an mir begienc."

Verse: 23    diu vrouwe enruochte wer daz sach:
Verse: 24    daz hemde von der brust si brach.

Verse: 25    ir brüste linde unde wîz:
Verse: 26    dar an kêrte si ir vlîz:

Verse: 27    si dructe si an ir rôten munt.
Verse: 28    si tet wîplîche vuore kunt.

Verse: 29    alsus sprach diu wîse:
Verse: 30    "dû bist kaste eins kindes spîse.




Chapter: 111 
111


Verse: 1    die hât ez vor im her gesant,
Verse: 2    sît ichz lebendec in dem lîbe vant."

Verse: 3    diu vrouwe ir willen dar an sach,
Verse: 4    daz diu spîse was ir herzen dach,

Verse: 5    diu milch in ir tüttelîn:
Verse: 6    die dructe drûz diu künegîn.

Verse: 7    si sprach: "dû bist von triuwen komen.
Verse: 8    hete ich des toufes niht genomen,

Verse: 9    dû wæres wol mîns toufes zil.
Verse: 10    ich sol mich begiezen vil

Verse: 11    mit dir und mit den ougen
Verse: 12    offenlîch und tougen,

Verse: 13    wande ich wil Gahmureten klagen."
Verse: 14    diu vrouwe hiez dar nâher tragen

Verse: 15    ein hemde nâch bluote var,
Verse: 16    dar inne an sbâruckes schar

Verse: 17    Gahmuret den lîp verlôs,
Verse: 18    der werlîchen ende kôs

Verse: 19    mit rehter manlîcher ger.
Verse: 20    diu vrouwe vrâcte ouch nâch dem sper,

Verse: 21    daz Gahmurete gap den rê.
Verse: 22    Ipomidôn von Nînivê

Verse: 23    gap alsus werlîchen lôn,
Verse: 24    der stolze werde Babilôn:

Verse: 25    daz hemde ein hader was von slegen.
Verse: 26    diu vrouwe woldez an sich legen,

Verse: 27    als si dâ vor hete getân,
Verse: 28    sô von ritterschefte kom ir man:

Verse: 29    dô nâmen siz ir ûzer hant.
Verse: 30    die besten über al daz lant




Chapter: 112 
112


Verse: 1    bestatten sper und ouch daz bluot
Verse: 2    ze münster, sô man die tôten tuot.

Verse: 3    in Gahmuretes lande
Verse: 4    man jâmer dô bekande.

Verse: 5    dannen über den vierzehenden tac
Verse: 6    diu vrouwe eins kindelîns gelac,

Verse: 7    eins suns, der solher lide was
Verse: 8    daz si vil kûme dran genas.

Verse: 9    hiest der âventiure wurf gespilt
Verse: 10    und ir bogen ist gezilt,

Verse: 11    wande er ist alrêst geborn,
Verse: 12    dem diz mære wart erkorn.

Verse: 13    sîns vater vreude und des nôt,
Verse: 14    beidiu sîn leben und sîn tôt,

Verse: 15    des habet ir wol ein teil vernomen.
Verse: 16    nû wizzet wâ von iu si komen

Verse: 17    dises mæres sachewalde
Verse: 18    und wie man den behalde.

Verse: 19    man barc in vor ritterschaft,
Verse: 20    ê er kœme an sîner witze kraft.

Verse: 21    dô diu künegîn sich versan
Verse: 22    und ir kindelîn wider zir gewan,

Verse: 23    si und ander vrouwen
Verse: 24    begunden allenthalben schouwen

Verse: 25    zwischen den beinen sîn viselîn.
Verse: 26    er muoste vil getriutet sîn,

Verse: 27    dô er hete manlîchiu lit.
Verse: 28    er wart mit swerten sît ein smit,

Verse: 29    vil viures er von helmen sluoc:
Verse: 30    sîn herze manlîch ellen truoc.




Chapter: 113 
113


Verse: 1    die künegîn des geluste
Verse: 2    daz si in vil dicke kuste.

Verse: 3    si sprach hin zim in allen vlîz:
Verse: 4    "bon fîz, scher fîz, bêâ fîz!"

Verse: 5    diu künegîn nam dô sunder twâl
Verse: 6    diu rôten velwelohten mâl,

Verse: 7    ich meine ir tüttelînes grenselîn:
Verse: 8    daz schoup si im in sîn vlenselîn.

Verse: 9    selbe was sîn amme
Verse: 10    diu in truoc in ir wamme:

Verse: 11    an ir brüste si in zôch.
Verse: 12    die wîbes missewende vlôch,

Verse: 13    si dûhte, si hete Gahmureten
Verse: 14    wider an ir arm erbeten.

Verse: 15    [si kêrte sich niht an lôsheit:
Verse: 16    diemuot was ir bereit.]

Verse: 17    vrou Herzeloide sprach mit sinne:
Verse: 18    "diu hœste küneginne

Verse: 19    Jêsus ir brüste bôt,
Verse: 20    der sît durch uns vil scharphen tôt

Verse: 21    an dem kriuze menneschlîche emphienc
Verse: 22    und sîne triuwe an uns begienc."

Verse: 23    swes lîp sîn zürnen ringet,
Verse: 24    des sêle unsanfte dinget,

Verse: 25    swie kiusche er sî und wære.
Verse: 26    des weiz ich wâriu mære,

Verse: 27    sich begôz des landes vrouwe
Verse: 28    mit ir herzen jâmers touwe:

Verse: 29    ir ougen regenden ûf den knaben.
Verse: 30    si kunde wîbes triuwe haben:




Chapter: 114 
114


Verse: 1    beidiu siufzen unde lachen
Verse: 2    kunde ir munt vil wol gemachen.

Verse: 3    si vreute sich ir suns geburt:
Verse: 4    ir schimph ertranc in riuwen vurt.

Verse: 5    Swer nû wîben sprichet baz,
Verse: 6    deiswâr daz lâze ich âne haz:

Verse: 7    ich vriesche gerne ir vreude breit.
Verse: 8    wan einer bin ich unbereit

Verse: 9    dienestlîcher triuwe:
Verse: 10    mîn zorn ist immer niuwe

Verse: 11    gein ir, sît ich si an wanke sach.
Verse: 12    ich bin Wolfram von Eschenbach

Verse: 13    und kan ein teil mit sange
Verse: 14    und bin ein habendiu zange

Verse: 15    mînen zorn gein einem wîbe:
Verse: 16    diu hât mînem lîbe

Verse: 17    erboten solhe missetât,
Verse: 18    ich enhân si hazzens keinen rât.

Verse: 19    dar umbe hânt mîn die andern haz.
Verse: 20    ouwê war umbe tuont si daz?

Verse: 21    alein sî mir ir hazzen leit,
Verse: 22    ez ist iedoch ir wîpheit,

Verse: 23    sît ich mich versprochen hân
Verse: 24    und an mir selben missetân,

Verse: 25    daz lîhte nimmer mêr geschiht.
Verse: 26    iedoch ensuln si sich vergâhen niht

Verse: 27    mit hurte an mîn hâmît:
Verse: 28    si vindent werlîchen strît.

Verse: 29    ich enhân des niht vergezzen,
Verse: 30    ich enkünne wol gemezzen




Chapter: 115 
115


Verse: 1    beide ir gebære und ir site.
Verse: 2    swelhem wîbe volget kiusche mite,

Verse: 3    der lobes kemphe wil ich sîn:
Verse: 4    mir ist von herzen leit ir pîn.

Verse: 5    sîn lôp hinket an dem spat,
Verse: 6    swer allen vrouwen sprichet mat

Verse: 7    durch sîn eines vrouwen.
Verse: 8    swelhiu mîn reht wil schouwen,

Verse: 9    beidiu sehen und hœren,
Verse: 10    die ensol ich niht betœren:

Verse: 11    schildes ambet ist mîn art.
Verse: 12    swâ mîn ellen sî gespart,

Verse: 13    swelhiu mich minnet umbe sanc,
Verse: 14    sô dunket mich ir witze kranc.

Verse: 15    ob ich guotes wîbes minne ger,
Verse: 16    mac ich mit schilde und ouch mit sper

Verse: 17    verdienen niht ir minne solt,
Verse: 18    al dar nâch sî si mir holt.

Verse: 19    vil hôhes topels er doch spilt,
Verse: 20    der an ritterschaft nâch minnen zilt.

Verse: 21    hetenz wîp niht vür ein smeichen,
Verse: 22    ich solde iu vürbaz reichen

Verse: 23    an disem mære unkundiu wort,
Verse: 24    ich spræche iu die âventiure vort.

Verse: 25    swer des von mir geruoche,
Verse: 26    der enzel si ze keinem buoche:

Verse: 27    ich enkan deheinen buochstap.
Verse: 28    dâ nement genuoge ir urhap:

Verse: 29    disiu âventiure
Verse: 30    vert âne der buoche stiure.




Chapter: 116 
116


Verse: 1    ê man si hete vür ein buoch,
Verse: 2    ich wære ê nacket âne tuoch,

Verse: 3    sô ich in dem bade sæze,
Verse: 4    ob ich squesten niht vergæze.

Verse: 5    Ez machet trûrec mir den lîp,
Verse: 6    daz alsô manegiu heizet wîp.

Verse: 7    ir stimme sint gelîche hel:
Verse: 8    genuoge sint gein valsche snel,

Verse: 9    etsliche valsches lære.
Verse: 10    sus teilent sich diu mære:

Verse: 11    daz die gelîche sint genamt,
Verse: 12    des hât mîn herze sich geschamt.

Verse: 13    wîpheit, dîn ordenlîcher site,
Verse: 14    dem vert und vuor ie triuwe mite.

Verse: 15    Genuoge sprechent, armuot,
Verse: 16    daz diu sî ze nihte guot.

Verse: 17    swer die durch triuwe lîdet,
Verse: 18    helleviur die sêle mîdet.

Verse: 19    die dolde ein wîp durch triuwe:
Verse: 20    des wart ir gâbe niuwe

Verse: 21    ze himele mit endelôser gebe.
Verse: 22    ich wæne ir nû vil wênec lebe,

Verse: 23    die junc der erden rîchtuom
Verse: 24    liezen durch des himeles ruom:

Verse: 25    ich erkenne ir nehein.
Verse: 26    man und wîp mir sint al ein:

Verse: 27    die mîdentz al gelîche.
Verse: 28    vrou Herzeloide diu rîche

Verse: 29    ir drîer lande wart ein gast:
Verse: 30    si truoc der vreuden mangels last.




Chapter: 117 
117


Verse: 1    der valsch an ir sô gar verswant,
Verse: 2    ouge noch ôre in nie dâ vant.

Verse: 3    ein nebel was ir diu sunne.
Verse: 4    si vlôch der werlde wunne,

Verse: 5    ir was gelîch naht und der tac:
Verse: 6    ir herze niht wan jâmers phlac

Verse: 7    sich zôch diu vrouwe jâmers balt
Verse: 8    ûz ir lande in einen walt,

Verse: 9    zer waste in Soltâne,
Verse: 10    niht durch bluomen ûf die plâne.

Verse: 11    ir herzen jâmer was sô ganz,
Verse: 12    si enkêrte sich an keinen kranz,

Verse: 13    er wære rôt oder val.
Verse: 14    si brâhte dar durch vlühtesal

Verse: 15    des werden Gahmuretes kint.
Verse: 16    liute, die bî ir dâ sint,

Verse: 17    müezen bûwen unde riuten.
Verse: 18    si kunde wol getriuten

Verse: 19    ir sun: ê daz sich der versan,
Verse: 20    ir volc si gar vür sich gewan,

Verse: 21    ez wære man oder wîp.
Verse: 22    den gebôt si allen an den lîp,

Verse: 23    daz si immer ritters würden lût,
Verse: 24    "wan vriesche daz mîns herzen trût,

Verse: 25    welh ritters leben wære,
Verse: 26    daz würde mir vil swære.

Verse: 27    nû habet iuch an der witze kraft
Verse: 28    und helt in alle ritterschaft."

Verse: 29    der site vuor angestlîche vart.
Verse: 30    der knappe alsus geborgen wart




Chapter: 118 
118


Verse: 1    zer waste in Soltâne erzogen,
Verse: 2    an küneclîcher vuore betrogen,

Verse: 3    ez enmöhte an einem site sîn:
Verse: 4    bogen unde bölzelîn

Verse: 5    die sneit er mit sîn selbes hant
Verse: 6    und schôz vil vogele die er vant.

Verse: 7    swenne aber er den vogel erschôz,
Verse: 8    des schal von sange ê was sô grôz,

Verse: 9    sô weinde er unde roufte sich,
Verse: 10    an sîn hâr kêrte er gerich.

Verse: 11    sîn lîp was klâr unde fier:
Verse: 12    ûf dem plân an dem rivier

Verse: 13    twuoc er sich alle morgen.
Verse: 14    er enkunde niht gesorgen,

Verse: 15    ez enwære ob im der vogelsanc.
Verse: 16    diu süeze in sîn herze dranc:

Verse: 17    daz erstracte im sîniu brvͤstelîn.
Verse: 18    al weinde er lief zer künegîn.

Verse: 19    sô sprach si: "wer hât dir getân?
Verse: 20    dû wære hin ûz ûf den plân."

Verse: 21    er enkunde ir gesagen niht,
Verse: 22    als kinden lîhte noch geschiht.

Verse: 23    dem mære gienc si lange nâch.
Verse: 24    eins tages si in kaphen sach

Verse: 25    ûf die boume nâch der vogele schal.
Verse: 26    si wart wol innen daz zeswal

Verse: 27    von der stimme ir kindes brust.
Verse: 28    des twanc in art und sîn gelust.

Verse: 29    vrou Herzeloide kêrte ir haz
Verse: 30    an die vogele, si enwesse um waz:




Chapter: 119 
119


Verse: 1    si wolde ir schal verkrenken.
Verse: 2    ir bûliute und ir enken

Verse: 3    die hiez si vaste gâhen,
Verse: 4    vogele würgen unde vâhen.

Verse: 5    die vogele wâren baz geriten:
Verse: 6    etslîches sterben wart vermiten,

Verse: 7    der beleip dâ lebendec ein teil,
Verse: 8    die sît mit sange wurden geil.

Verse: 9    der knappe sprach zer künegîn:
Verse: 10    "waz wîzet man den vogelîn?"

Verse: 11    er gerte in vrides sâ zestunt.
Verse: 12    sîn muoter kuste in an den munt.

Verse: 13    diu sprach: "wes wende ich sîn gebot,
Verse: 14    der doch ist der hœste got?

Verse: 15    suln vogele durch mich vreude lân?"
Verse: 16    der knappe sprach zer muoter sân:

Verse: 17    "ouwê muoter, waz ist got?"
Verse: 18    "sun, ich sage dirz âne spot:

Verse: 19    er ist noch liehter denne der tac.
Verse: 20    der antlitzes sich bewac

Verse: 21    nâch menschen antlitze,
Verse: 22    sun, merke eine witze

Verse: 23    und vlêhe in umbe dîne nôt:
Verse: 24    sîn triuwe der werlde ie helfe bôt.

Verse: 25    sô heizet einer der helle wirt:
Verse: 26    derst swarz, untriuwe in niht verbirt.

Verse: 27    von dem kêre dîne gedanke
Verse: 28    und ouch von zwîvels wanke."

Verse: 29    sîn muoter underschiet im gar
Verse: 30    daz vinster und daz lieht gevar.




Chapter: 120 
120


Verse: 1    dar nâch sîn snelheit verre spranc.
Verse: 2    er lernte den gabilôtes swanc,

Verse: 3    dâ mit er manegen hirz erschôz,
Verse: 4    des sîn muoter und ir volc genôz.

Verse: 5    ez wære æber oder snê,
Verse: 6    dem wilde tet sîn schiezen wê.

Verse: 7    nû hœret vremdiu mære:
Verse: 8    swenne er schôz daz swære,

Verse: 9    des wære ein mûl geladen genuoc,
Verse: 10    als unzeworht hin heim erz truoc.

Verse: 11    eins tages gienc er den weideganc
Verse: 12    an einer halden, diu was lanc.

Verse: 13    er brach durch blates stimme ein zwîc.
Verse: 14    dâ nâhen bî im gienc ein stîc,

Verse: 15    dâ hôrte er schal von huofslegen:
Verse: 16    sîn gabilôt begunde er wegen.

Verse: 17    dô sprach er: "waz hân ich vernomen?
Verse: 18    wan wolde et nû der tiuwel komen

Verse: 19    mit grimme zorneclîche!
Verse: 20    den bestüende ich sicherlîche.

Verse: 21    mîn muoter vreisen von im saget:
Verse: 22    ich wæne ir ellen sî verzaget."

Verse: 23    alsus stuont er in strîtes ger.
Verse: 24    nû seht, dort kom geschûftet her

Verse: 25    ritter nâch wunsche var,
Verse: 26    von vuoze ûf gewâpent gar.

Verse: 27    der knappe wânde sunder spot,
Verse: 28    daz ieslîcher wære ein got.

Verse: 29    dô stuont ouch er niht langer hie,
Verse: 30    in den phat viel er ûf sîniu knie.




Chapter: 121 
121


Verse: 1    lûte rief der knappe sân:
Verse: 2    "hilf, got! dû maht wol helfe hân."

Verse: 3    der vorder zornes sich bewac,
Verse: 4    dô der knappe in dem phade lac:

Verse: 5    "dirre tœrsche Wâleise
Verse: 6    unsich wendet gâher reise."

Verse: 7    ein prîs den wir Beier tragen,
Verse: 8    muoz ich von Wâleisen sagen:

Verse: 9    die sint tœrscher denne beiersch her
Verse: 10    und doch bî manlîcher wer.

Verse: 11    swer in den zwein landen wirt,
Verse: 12    gevuoge ein wunder an im birt.

Verse: 13    dô kom geleischieret
Verse: 14    und wol gezimieret

Verse: 15    ein ritter, dem was harte gâch.
Verse: 16    er reit in strîteclîchen nâch,

Verse: 17    die verre wâren von im komen:
Verse: 18    zwêne ritter heten im genomen

Verse: 19    eine vrouwen in sînem lande.
Verse: 20    den helt ez dûhte schande:

Verse: 21    in müete der juncvrouwen leit,
Verse: 22    diu jæmerlîche vor in reit.

Verse: 23    dise drî wâren sîne man.
Verse: 24    er reit ein schœne kastelân,

Verse: 25    sîns schildes was vil wênec ganz.
Verse: 26    er hiez Karnahkarnanz

Verse: 27    leh cons Ulterlec.
Verse: 28    er sprach: "wer irret uns den wec?"

Verse: 29    sus vuor er zuo dem knappen sân.
Verse: 30    den dûhte er als ein got getân:




Chapter: 122 
122


Verse: 1    er enhete ê sô liehtes niht erkant.
Verse: 2    ûf dem touwe der wâpenroc erwant.

Verse: 3    mit guldîn schellen kleine
Verse: 4    vor iewederm beine

Verse: 5    wâren die stegereife erklenget
Verse: 6    und ze rehter mâze erlenget.

Verse: 7    sîn zeswer arm von schellen klanc.
Verse: 8    swar er den bôt oder swanc,

Verse: 9    der was durch swertslege sô hel:
Verse: 10    der helt was gein prîse snel.

Verse: 11    sus vuor der vürste rîche,
Verse: 12    gezimieret wünneclîche.

Verse: 13    aller manne schœne ein bluomen kranz,
Verse: 14    den vrâcte Karnahkarnanz:

Verse: 15    "juncherre, sâhet ir vür iuch varn
Verse: 16    zwêne ritter die sich niht bewarn

Verse: 17    kunnen an ritterlîcher zunft?
Verse: 18    si ringent mit der nôtnunft

Verse: 19    und sint an werdekeit verzaget:
Verse: 20    si vüerent roubes eine maget."

Verse: 21    der knappe wânde, swaz er sprach,
Verse: 22    ez wære got, als im verjach

Verse: 23    vrou Herzeloide diu künegîn,
Verse: 24    dô si im underschiet den liehten schîn.

Verse: 25    dô rief er lûte sunder spot:
Verse: 26    "nû hilf mir, helferîcher got!"

Verse: 27    vil dicke viel an sîn gebet
Verse: 28    fil li roi Gahmuret.

Verse: 29    der vürste sprach: "ich bin niht got,
Verse: 30    ich leiste aber gerne sîn gebot.




Chapter: 123 
123


Verse: 1    dû maht hie vier ritter sehen,
Verse: 2    ob dû ze rehte kundes spehen."

Verse: 3    der knappe vrâcte vürbaz:
Verse: 4    "dû nennest ritter: waz ist daz?

Verse: 5    hâstû niht gotlîcher kraft,
Verse: 6    sô sage mir, wer gît ritterschaft?"

Verse: 7    "daz tuot der künec Artûs.
Verse: 8    juncherre, komt ir in des hûs,

Verse: 9    der bringet iuch an ritters namen,
Verse: 10    daz irs iuch nimmer durfet schamen.

Verse: 11    ir muget wol sîn von ritters art.
Verse: 12    von den helden er geschouwet wart:

Verse: 13    dô lac diu gotes gunst an im.
Verse: 14    von der âventiure ich daz nim,

Verse: 15    diu mich mit wârheit des beschiet:
Verse: 16    nie mannes varwe baz geriet

Verse: 17    vor im sît Adâmes zît.
Verse: 18    des wart sîn lop von wîben wît.

Verse: 19    aber sprach der knappe sân,
Verse: 20    dâ von ein lachen wart getân:

Verse: 21    "ei ritter got, waz mahtû sîn?
Verse: 22    dû hâs sus manec vingerlîn

Verse: 23    an dînen lîp gebunden
Verse: 24    dort oben und hie unden."

Verse: 25    aldâ begreif des knappen hant
Verse: 26    swaz er îsers an dem vürsten vant.

Verse: 27    des harnas begunde er schouwen:
Verse: 28    "mîner muoter juncvrouwen

Verse: 29    ir vingerlîn an snüeren tragent,
Verse: 30    die niht sus an ein ander ragent."




Chapter: 124 
124


Verse: 1    der knappe sprach durch sînen muot
Verse: 2    zem vürsten: "war zuo ist diz guot,

Verse: 3    daz dich sô wol kan schicken?
Verse: 4    ich enmac es niht abe gezwicken."

Verse: 5    der vürste im zeicte sâ sîn swert:
Verse: 6    "nû sich, swer an mich strîtes gert,

Verse: 7    des selben wer ich mich mit slegen.
Verse: 8    vür die sîne muoz ich an mich legen

Verse: 9    und vür den schuz und vür den stich
Verse: 10    muoz ich alsus wâpen mich."

Verse: 11    aber sprach der knappe snel:
Verse: 12    "ob die hirze trüegen sus ir vel,

Verse: 13    sô enverwunte ir niht mîn gabilôt.
Verse: 14    der vellet maneger von mir tôt."

Verse: 15    die ritter zurnden daz er hielt
Verse: 16    bî dem knappen der vil tumpheit wielt.

Verse: 17    der vürste sprach: "got hüete dîn!
Verse: 18    ouwî wan wære dîn schœne mîn!

Verse: 19    dir hete got den wunsch gegeben,
Verse: 20    ob dû mit witzen soldes leben.

Verse: 21    diu gotes kraft dir virre leit!"
Verse: 22    die sîne und ouch er selbe reit

Verse: 23    und gâhten harte balde
Verse: 24    zeinem velde in dem walde.

Verse: 25    dâ vant der gevüege
Verse: 26    vrou Herzeloiden phlüege

Verse: 27    (ir volke leider nie geschach),
Verse: 28    die er balde eren sach:

Verse: 29    si begunden sæn, dar nâch egen,
Verse: 30    ir garte ob starken ohsen wegen.




Chapter: 125 
125


Verse: 1    der vürste in guoten morgen bôt
Verse: 2    und vrâcte, ob si sæhen nôt

Verse: 3    eine juncvrouwen lîden.
Verse: 4    si enkunden niht vermîden,

Verse: 5    swes er vrâcte daz wart gesaget.
Verse: 6    "zwêne ritter und ein maget

Verse: 7    dâ riten hiute morgen:
Verse: 8    diu vrouwe vuor mit sorgen.

Verse: 9    mit sporn si vaste ruorten."
Verse: 10    die die juncvrouwen vuorten,

Verse: 11    ez was Meljakanz,
Verse: 12    den ergâhte Karnahkarnanz:

Verse: 13    mit strîte er im die vrouwen nam.
Verse: 14    diu was dâ vor an vreuden lam:

Verse: 15    si hiez Imâne
Verse: 16    von der Bêâfontâne.

Verse: 17    die bûliute verzageten.
Verse: 18    dô die helde vür si jageten,

Verse: 19    si sprâchen: "wiest uns sus geschehen?
Verse: 20    hât unser juncherre ersehen

Verse: 21    an disen rittern helme schart,
Verse: 22    sô enhân wir uns niht wol bewart.

Verse: 23    wir suln der küneginne haz
Verse: 24    von schulden hœren umbe daz,

Verse: 25    wande er mit uns dâ her lief
Verse: 26    hiute morgen dô si dannoch slief."

Verse: 27    der knappe enruochte ouch wer dô schôz
Verse: 28    die hirze kleine unde grôz:

Verse: 29    er huop sich gein der muoter wider
Verse: 30    und sagete ir mære. dô viel si nider:




Chapter: 126 
126


Verse: 1    sîner worte si sô sêre erschrac,
Verse: 2    daz si unversunnen vor im lac.

Verse: 3    dô diu küneginne
Verse: 4    wider kom zir sinne,

Verse: 5    swie si dâ vor wære verzaget,
Verse: 6    dô sprach si: "sun, wer hât gesaget

Verse: 7    dir von ritters orden?
Verse: 8    wâ bistûs innen worden?"

Verse: 9    "muoter, ich sach vier man
Verse: 10    noch liehter danne got getân:

Verse: 11    die sageten mir von ritterschaft.
Verse: 12    Artûs küneclîchiu kraft

Verse: 13    sol mich nâch ritters êren
Verse: 14    an schildes ambet kêren."

Verse: 15    sich huop ein niuwer jâmer hie.
Verse: 16    diu vrouwe enwesse rehte wie,

Verse: 17    daz si ir den list erdæhte
Verse: 18    und in von dem willen bræhte.

Verse: 19    der knappe tump unde wert
Verse: 20    iesch von der muoter dicke ein phert.

Verse: 21    daz begunde si in ir herzen klagen.
Verse: 22    si dâhte: "ich enwil im niht versagen,

Verse: 23    ez muoz aber vil bœse sîn."
Verse: 24    dô gedâhte mêr diu künegîn:

Verse: 25    "der liute vil bî spotte sint.
Verse: 26    tôren kleider sol mîn kint

Verse: 27    ob sînem liehten lîbe tragen.
Verse: 28    wirt er geroufet und geslagen,

Verse: 29    sô kumt er mir her wider wol."
Verse: 30    ouwê der jæmerlîchen dol!




Chapter: 127 
127


Verse: 1    diu vrouwe nam ein sactuoch,
Verse: 2    si sneit im hemde unde bruoch,

Verse: 3    daz doch an einem stücke erschein,
Verse: 4    unz enmitten an sîn blankez bein:

Verse: 5    daz wart vür tôren kleit erkant.
Verse: 6    eine gugeln man obene drûfe vant.

Verse: 7    al vrisch rûch kelberîn
Verse: 8    von einer hiute zwei ribalîn

Verse: 9    nâch sînen beinen wart gesniten.
Verse: 10    dâ wart grôz jâmer niht vermiten.

Verse: 11    diu künegîn was alsô bedâht,
Verse: 12    si bat belîben in die naht:

Verse: 13    "dû ensolt niht hinnen kêren,
Verse: 14    ich wil dich liste lêren.

Verse: 15    an ungebanten strâzen
Verse: 16    soltû tunkel vürte lâzen:

Verse: 17    die sîhte unde lûter sîn,
Verse: 18    dâ soltû al balde rîten în.

Verse: 19    dû solt dich site nieten,
Verse: 20    der werlde grüezen bieten.

Verse: 21    ob dich ein grâ wîse man
Verse: 22    zuht wil lêren als er wol kan,

Verse: 23    dem soltû gerne volgen
Verse: 24    und wis im niht erbolgen.

Verse: 25    sun, lâ dir bevolhen sîn,
Verse: 26    swâ dû guotes wîbes vingerlîn

Verse: 27    müges erwerben und ir gruoz,
Verse: 28    daz nim: ez tuot dir kumbers buoz.

Verse: 29    dû solt zir kusse gâhen
Verse: 30    und ir lîp vaste umbevâhen:




Chapter: 128 
128


Verse: 1    daz gît gelücke und hôhen muot,
Verse: 2    ob si kiusche ist unde guot.

Verse: 3    dû solt ouch wizzen, sun mîn,
Verse: 4    der stolze küene Lehelîn

Verse: 5    dînen vürsten abe ervaht zwei lant,
Verse: 6    diu solden dienen dîner hant,

Verse: 7    Wâleis und Norgâls.
Verse: 8    ein dîn vürste Turkentâls

Verse: 9    den tôt von sîner hende emphienc:
Verse: 10    dîn volc er sluoc unde vienc."

Verse: 11    "diz riche ich, muoter, ruocht es got,
Verse: 12    in verwundet noch mîn gabilôt."

Verse: 13    des morgens dô der tac erschein,
Verse: 14    der knappe balde wart enein,

Verse: 15    im was gein Artûse gâch.
Verse: 16    vrou Herzeloide in kuste und lief im nâch.

Verse: 17    der werlde riuwe aldâ geschach:
Verse: 18    dô si ir sun niht langer sach

Verse: 19    (der reit enwec: wemst deste baz?),
Verse: 20    dô viel diu vrouwe valsches laz

Verse: 21    ûf die erde, aldâ si jâmer sneit
Verse: 22    sô daz si ein sterben niht vermeit.

Verse: 23    ir vil getriulîcher tôt
Verse: 24    der vrouwen wert dei hellenôt.

Verse: 25    ô wol si daz si muoter wart!
Verse: 26    sus vuor die lônes bernden vart

Verse: 27    ein wurzel der güete
Verse: 28    und ein stam der diemüete.

Verse: 29    ouwê daz wir nû niht enhân
Verse: 30    ir sippe unz an den eilften spân!




Chapter: 129 
129


Verse: 1    des wirt gevelschet manec lîp.
Verse: 2    doch solden nû getriuwiu wîp

Verse: 3    heiles wünschen disem knaben,
Verse: 4    der sich hie von ir hât erhaben.

Verse: 5    dô reit der knappe wol getân
Verse: 6    gein dem fôreist in Brizljân.

Verse: 7    er kom an einen bach geriten,
Verse: 8    den hete ein hane wol überschriten:

Verse: 9    swie dâ stuonden bluomen unde gras,
Verse: 10    durch daz sîn vluz sô tunkel was,

Verse: 11    der knappe den vurt dar an vermeit.
Verse: 12    den tac er gar dâ neben reit,

Verse: 13    als ez sînen witzen tohte.
Verse: 14    er beleip die naht swie er mohte,

Verse: 15    unz im der liehte tac erschein.
Verse: 16    der knappe sich danne al ein

Verse: 17    huop zeinem vurte lûter wol getân.
Verse: 18    dâ was anderhalp der plân

Verse: 19    mit einem gezelt gehêret,
Verse: 20    grôz rîcheit dran gekêret

Verse: 21    von drîer varwe samît.
Verse: 22    ez was hôch unde wît,

Verse: 23    ûf den næten lâgen borten guot.
Verse: 24    dâ hienc ein liderîn huot,

Verse: 25    den man drüber ziehen solde
Verse: 26    immer swennez regenen wolde.

Verse: 27    duc Orilus de Lalander,
Verse: 28    des wîp dort unde vander

Verse: 29    ligende minneclîche,
Verse: 30    die herzoginne rîche,




Chapter: 130 
130


Verse: 1    gelîche einem ritters trûte.
Verse: 2    si hiez Jeschûte.

Verse: 3    diu vrouwe was entslâfen,
Verse: 4    si truoc der minne wâfen,

Verse: 5    einen munt durchliuhtec rôt
Verse: 6    und gerndes ritters herzen nôt.

Verse: 7    innen des diu vrouwe slief,
Verse: 8    der munt ir von ein ander lief:

Verse: 9    der truoc der minne hitze viur.
Verse: 10    sus lac des wunsches âventiur.

Verse: 11    von snêwîzem beine
Verse: 12    nâhe bî ein ander kleine,

Verse: 13    sus stuonden ir die liehten zene.
Verse: 14    ich wæne mich iemen küssens wene

Verse: 15    an einen sus gelobeten munt:
Verse: 16    daz ist mir selten worden kunt.

Verse: 17    ir deckelachen zobelîn
Verse: 18    erwant an ir hüffelîn,

Verse: 19    daz si durch hitze von ir stiez,
Verse: 20    dâ si der wirt al eine liez.

Verse: 21    si was geschicket und gesniten,
Verse: 22    an ir was künste niht vermiten:

Verse: 23    got selbe worhte ir süezen lîp.
Verse: 24    ouch hete daz minneclîche wîp

Verse: 25    langen arm und blanke hant.
Verse: 26    der knappe ein vingerlîn dâ vant,

Verse: 27    daz in gein dem bette twanc.
Verse: 28    dô er mit der herzoginne ranc,

Verse: 29    dô dâhte er an die muoter sîn:
Verse: 30    diu riet an wîbes vingerlîn.




Chapter: 131 
131


Verse: 1    ouch spranc der knappe wol getân
Verse: 2    von dem teppeche an daz bette sân.

Verse: 3    diu süeze kiusche unsanfte erschrac,
Verse: 4    dô der knappe an ir arme lac:

Verse: 5    si muoste iedoch erwachen.
Verse: 6    mit schame al sunder lachen

Verse: 7    diu vrouwe zuht gelêret
Verse: 8    sprach: "wer hât mich entêret?

Verse: 9    juncherre, es ist iu gar ze vil:
Verse: 10    ir mohtet iu nemen ander zil."

Verse: 11    diu vrouwe lûte klagete.
Verse: 12    er enruochte waz si sagete:

Verse: 13    ir munt er an den sînen twanc.
Verse: 14    dâ nâch was dô niht ze lanc,

Verse: 15    ê er dructe an sich die herzogîn
Verse: 16    und nam ir ouch ein vingerlîn.

Verse: 17    an ir hemde ein vürspan er dâ sach:
Verse: 18    ungevuoge erz dannen brach.

Verse: 19    diu vrouwe was mit wîbes wer,
Verse: 20    ir was sîn kraft ein ganzez her:

Verse: 21    doch wart dâ ringens vil getân.
Verse: 22    der knappe klagete den hunger sân.

Verse: 23    diu vrouwe was ir lîbes lieht,
Verse: 24    si sprach: "ir sult mîn ezzen niht.

Verse: 25    wært ir ze vromen wîse,
Verse: 26    ir næmet iu ander spîse.

Verse: 27    dort stêt brôt unde wîn
Verse: 28    und ouch zwei pardrîsekîn,

Verse: 29    als si ein juncvrouwe brâhte,
Verse: 30    dius wênec iu gedâhte."




Chapter: 132 
132


Verse: 1    er enruochte wâ diu wirtîn saz:
Verse: 2    einen guoten kroph er az,

Verse: 3    dar nâch er swære trünke tranc.
Verse: 4    die vrouwen dûhte gar ze lanc

Verse: 5    sîns wesens in dem poulûn.
Verse: 6    si wânde, er wære ein garzûn

Verse: 7    gescheiden von den witzen.
Verse: 8    ir schame begunde switzen.

Verse: 9    iedoch sprach diu herzogîn:
Verse: 10    "juncherre, ir sult mîn vingerlîn

Verse: 11    hie lâzen und mîn vürspan.
Verse: 12    hebet iuch enwec: wan kumt mîn man,

Verse: 13    ir müezet zürnen lîden,
Verse: 14    daz ir gerner möhtet mîden."

Verse: 15    dô sprach der knappe wol geborn:
Verse: 16    "ouwê waz vürhte ich iuwers mannes zorn?

Verse: 17    wan schadet ez iu an êren,
Verse: 18    sô wil ich hinnen kêren."

Verse: 19    dô gienc er zuo dem bette sân:
Verse: 20    ein ander kus dâ wart getân,

Verse: 21    daz was der herzoginne leit.
Verse: 22    der knappe âne urloup dannen reit.

Verse: 23    iedoch sprach er: "got hüete dîn!
Verse: 24    alsus riet mir diu muoter mîn."

Verse: 25    der knappe des roubes was gemeit.
Verse: 26    dô er eine wîle von dan gereit,

Verse: 27    wol nâch gein der mîle zil,
Verse: 28    dô kom von dem ich sprechen wil.

Verse: 29    der spürte an dem touwe
Verse: 30    daz gesuochet was sîn vrouwe.




Chapter: 133 
133


Verse: 1    der snüere ein teil was ûz getret:
Verse: 2    dâ hete ein knappe daz gras gewet.

Verse: 3    der vürste wert und erkant
Verse: 4    sîn wîp dort unde al trûrec vant.

Verse: 5    dô sprach der stolze Orilus:
Verse: 6    "ouwê vrouwe, wie hân ich sus

Verse: 7    mîn dienst gein iu gewendet!
Verse: 8    mir ist nâch laster gendet

Verse: 9    manec ritterlîcher prîs:
Verse: 10    ir habet ein ander âmîs."

Verse: 11    mit wazzerrîchen ougen
Verse: 12    diu vrouwe bôt ir lougen

Verse: 13    sô, daz si unschuldec wære:
Verse: 14    er engeloupte niht ir mære.

Verse: 15    iedoch sprach si mit vorhte siten:
Verse: 16    "dâ kom ein tôr her zuo geriten:

Verse: 17    swaz ich liute erkennet hân,
Verse: 18    ich engesach nie lîp sô wol getân.

Verse: 19    mîn vürspan und ein vingerlîn
Verse: 20    daz nam er âne den willen mîn."

Verse: 21    "hei sîn lîp iu wol gevellet.
Verse: 22    ir habet iuch zim gesellet."

Verse: 23    dô sprach si: "nû enwelle got!
Verse: 24    sîniu ribalîn, sîn gabilôt

Verse: 25    wâren mir doch ze nâhen.
Verse: 26    diu rede iu solde smâhen:

Verse: 27    vürstinne ez übele zæme,
Verse: 28    ob si dâ minne næme."

Verse: 29    aber sprach der vürste sân:
Verse: 30    "vrouwe, ich enhân iu niht getân,




Chapter: 134 
134


Verse: 1    ir enwelt iuch einer site schamen:
Verse: 2    ir liezet küneginne namen

Verse: 3    und hiezt durch mich ein herzogin.
Verse: 4    der kouf gît mir ungewin.

Verse: 5    mîn manheit ist doch sô quec,
Verse: 6    daz iuwer bruoder êrec,

Verse: 7    mîn swâger, fil li roi Lac,
Verse: 8    iuch wol dar umbe hazzen mac.

Verse: 9    mich erkennet iedoch der wîse
Verse: 10    an sô bewandem prîse,

Verse: 11    der ninder mac entêret sîn,
Verse: 12    wan daz er mich vor Prûrîn

Verse: 13    mit sîner tjoste valte.
Verse: 14    an im ich sît bezalte

Verse: 15    hôhen prîs vor Karnant.
Verse: 16    ze rehter tjost stach in mîn hant

Verse: 17    hinderz ors durch fîanze:
Verse: 18    durch sînen schilt mîn lanze

Verse: 19    iuwer kleinœte brâhte.
Verse: 20    vil wênec ich dô gedâhte

Verse: 21    iuwer minne einem andern trûte,
Verse: 22    mîn vrouwe Jeschûte.

Verse: 23    vrouwe, ir sult gelouben des,
Verse: 24    daz der stolze Gâlôes,

Verse: 25    fil li roi Gandîn,
Verse: 26    tôt lac von der tjoste mîn.

Verse: 27    ir hieldet ouch dâ nâhen bî,
Verse: 28    dâ Plîopliherî

Verse: 29    gein mir durch tjostieren reit
Verse: 30    und mich sîn strîten niht vermeit.




Chapter: 135 
135


Verse: 1    mîn tjoste in hinderz ors verswanc,
Verse: 2    daz in der satel ninder dranc.

Verse: 3    ich hân dicke prîs bezalt
Verse: 4    und manegen ritter abe gevalt:

Verse: 5    des enmohte ich nû geniezen niht.
Verse: 6    ein hôhez laster mir des giht.

Verse: 7    si hazzent mich besunder,
Verse: 8    die von der tavelrunder,

Verse: 9    der ich ehte nider stach,
Verse: 10    dâz manec wert juncvrouwe sach,

Verse: 11    um den sparwære ze Kanedic.
Verse: 12    ich behielt iu prîs und mir den sic.

Verse: 13    daz sâhet ir und Artûs,
Verse: 14    der mîne swester hât ze hûs,

Verse: 15    die süezen Cunnewâren.
Verse: 16    ir munt kan niht gebâren

Verse: 17    mit lachen, ê si den gesiht
Verse: 18    dem man des hœsten prîses giht.

Verse: 19    wan kœme mir doch der selbe man!
Verse: 20    sô würde ein strîten hie getân

Verse: 21    als hiute morgen, dô ich streit
Verse: 22    und einem vürsten vrumte leit,

Verse: 23    der mir sîn tjostieren bôt:
Verse: 24    von mîner tjoste lac er tôt.

Verse: 25    ich enwil iu niht von zorne sagen,
Verse: 26    daz maneger hât sîn wîp geslagen

Verse: 27    umbe ir krenker schulde.
Verse: 28    hete ich dienest oder hulde,

Verse: 29    daz ich iu solde bieten,
Verse: 30    ir müestet iuch mangels nieten.




Chapter: 136 
136


Verse: 1    ich ensol niht mêr erwarmen
Verse: 2    an iuwern blanken armen,

Verse: 3    dâ ich etswenne durch minne lac
Verse: 4    manegen wünneclîchen tac.

Verse: 5    ich sol velwen iuwern rôten munt
Verse: 6    und iuwern ougen machen rœte kunt,

Verse: 7    ich sol iu vreude entêren
Verse: 8    und iuwer herze siuften lêren."

Verse: 9    diu vürstîn an den vürsten sach.
Verse: 10    ir munt dô jæmerlîchen sprach:

Verse: 11    "nû êret an mir ritters prîs.
Verse: 12    ir sît getriuwe unde wîs

Verse: 13    und ouch wol sô gewaldec mîn,
Verse: 14    ir muget mir geben hôhen pîn.

Verse: 15    ir sult ê mîn gerihte nemen.
Verse: 16    durch elliu wîp lât iuch gezemen

Verse: 17    (ir muget mir dannoch vüegen nôt):
Verse: 18    læge ich von andern handen tôt,

Verse: 19    daz iu niht prîs geneicte,
Verse: 20    swie schiere ich denne veicte,

Verse: 21    daz wære mir ein süeziu zit,
Verse: 22    sît iuwer hazzen an mir lît."

Verse: 23    aber sprach der vürste mêre:
Verse: 24    "vrouwe, ir wæret mir gar ze hêre.

Verse: 25    des sol ich an iu mâzen:
Verse: 26    geselleschaft wirt lâzen

Verse: 27    mit trinken und mit ezzen,
Verse: 28    bî ligens wirt vergezzen.

Verse: 29    ir emphâhet mêr dehein gewant,
Verse: 30    wan als ich iuch sitzende vant.




Chapter: 137 
137


Verse: 1    iuwer zoum muoz sîn ein bestîn seil,
Verse: 2    iuwer phert bejaget wol hungers teil,

Verse: 3    iuwer satel wol gezieret
Verse: 4    der wirt enschumphieret."

Verse: 5    vil balde er zarte unde brach
Verse: 6    den samît drabe. dô daz geschach,

Verse: 7    er zesluoc den satel dâ si inne reit.
Verse: 8    ir kiusche und ir wîpheit

Verse: 9    sîn hazzen lîden muosten:
Verse: 10    mit bestînen buosten

Verse: 11    bant er in aber wider zuo.
Verse: 12    ir kom sîn hazzen alze vruo.

Verse: 13    dô sprach er an den zîten:
Verse: 14    "vrouwe, nû suln wir rîten.

Verse: 15    kœme ich an in (des würde ich geil),
Verse: 16    der hie nam iuwer minne teil,

Verse: 17    ich bestüende in doch durch âventiur,
Verse: 18    ob sîn âtem gæbe viur

Verse: 19    als eines wilden trachen."
Verse: 20    al weinde sunder lachen

Verse: 21    diu vrouwe jâmers rîche
Verse: 22    schiet dannen trûreclîche.

Verse: 23    si enmüete niht swaz ir geschach,
Verse: 24    wan ir mannes ungemach:

Verse: 25    des trûren gap ir grôze nôt,
Verse: 26    daz si noch sanfter wære tôt.

Verse: 27    nû sult ir si durch triuwe klagen:
Verse: 28    si beginnet nû hœher kumber tragen.

Verse: 29    wære mir aller wîbe haz bereit,
Verse: 30    mich müete doch vroun Jeschûten leit.




Chapter: 138 
138


Verse: 1    sus riten si ûf der slâ hin nâch.
Verse: 2    dem knappen vor in ouch was vil gâch:

Verse: 3    doch wesse der unverzagete
Verse: 4    niht daz man in jagete,

Verse: 5    wan swen sîn ougen sâhen,
Verse: 6    sô er dem begunde nâhen,

Verse: 7    den gruozte der knappe guoter
Verse: 8    und jach: "sus riet mir mîn muoter."

Verse: 9    sus kom unser tœrscher knabe
Verse: 10    geriten eine halden abe.

Verse: 11    wîbes stimme er hôrte,
Verse: 12    vor eines velses orte

Verse: 13    ein vrouwe ûz rehtem jâmer schrei:
Verse: 14    ir was diu wâre vreude enzwei.

Verse: 15    der knappe reit ir balde zuo.
Verse: 16    nû hœret waz diu vrouwe tuo:

Verse: 17    dâ brach vrou Sigûne
Verse: 18    ir langen zöphe brûne

Verse: 19    vor jâmer ûz ir swarten.
Verse: 20    der knappe begunde warten:

Verse: 21    Schîânatulander
Verse: 22    den vürsten tôt dâ vander

Verse: 23    der juncvrouwen in ir schôz.
Verse: 24    aller schimphe si verdrôz.

Verse: 25    "er sî trûrec oder vreuden var,
Verse: 26    die bat mîn muoter grüezen gar.

Verse: 27    got halde iuch!" sprach des knappen munt.
Verse: 28    "ich hân hie jæmerlîchen vunt

Verse: 29    in iuwerm schôze vunden.
Verse: 30    wer gap iu den ritter wunden?"




Chapter: 139 
139


Verse: 1    [der knappe unverdrozzen
Verse: 2    sprach: "wer hât in erschozzen?]

Verse: 3    geschach ez mit einem gabilôt?
Verse: 4    mich dunket, vrouwe, er lige tôt.

Verse: 5    welt ir mir dâ von iht sagen,
Verse: 6    wer iu den man habe erslagen,

Verse: 7    ob ich in mac errîten,
Verse: 8    ich wil gerne mit im strîten."

Verse: 9    dô greif der knappe mære
Verse: 10    zuo sînem kochære:

Verse: 11    vil scharphiu gabilôt er vant.
Verse: 12    er vuorte ouch dannoch beidiu phant,

Verse: 13    diu er von Jeschûten brach
Verse: 14    und ein tumpheit dâ geschach.

Verse: 15    hete er gelernt sîns vater site,
Verse: 16    die werdeclîche im wonten mite,

Verse: 17    diu buckel wære gehurtet baz,
Verse: 18    dâ diu herzoginne al eine saz,

Verse: 19    diu sît vil kumbers durch in leit:
Verse: 20    mêr danne ein ganzez jâr si meit

Verse: 21    gruoz von ir mannes lîbe.
Verse: 22    unrehte geschach dem wîbe.

Verse: 23    nû hœret ouch von Sigûnen sagen:
Verse: 24    diu kunde ir leit mit jâmer klagen.

Verse: 25    si sprach zem knappen: "dû hâs tugent.
Verse: 26    gêret sî dîn süeziu jugent

Verse: 27    und dîn antlitze minneclîch.
Verse: 28    deiswâr dû wirst noch sælden rîch.

Verse: 29    disen ritter meit daz gabilôt:
Verse: 30    er lac ze tjostieren tôt.




Chapter: 140 
140


Verse: 1    [dû bist geborn von triuwen,
Verse: 2    daz er dich sus kan riuwen. "]

Verse: 3    ê si den knappen rîten lieze,
Verse: 4    si vrâcte in wie er hieze,

Verse: 5    und jach er trüege den gotes vlîz.
Verse: 6    "bon fîz, scher fîz, bêâ fîz,

Verse: 7    alsus hât mich genennet
Verse: 8    der mich dâ heime erkennet."

Verse: 9    dô diu rede was getân,
Verse: 10    si erkande in bî dem namen sân.

Verse: 11    nû hœret in rehter nennen,
Verse: 12    daz ir wol müget erkennen

Verse: 13    wer dirre âventiure herre sî:
Verse: 14    der hielt der juncvrouwen bî.

Verse: 15    ir rôter munt sprach sunder twâl:
Verse: 16    "deiswâr dû heizes Parzivâl.

Verse: 17    der name ist rehte mitten durch.
Verse: 18    grôz liebe ier solh herzen vurch

Verse: 19    mit dîner muoter triuwe:
Verse: 20    dîn vater liez ir riuwe.

Verse: 21    ich engihe dirs niht ze ruome,
Verse: 22    dîn muoter ist mîn muome,

Verse: 23    und sage dir sunder valschen list
Verse: 24    die rehten wârheit, wer dû bist.

Verse: 25    dîn vater was ein Anschevîn,
Verse: 26    ein Wâleis von der muoter dîn

Verse: 27    bistû geborn von Kanvoleiz.
Verse: 28    die rehten wârheit ich des weiz:

Verse: 29    dû bist ouch künec ze Norgâls,
Verse: 30    in der houbetstat ze Kingrivâls




Chapter: 141 
141


Verse: 1    sol dîn houbet krône tragen.
Verse: 2    dirre vürste wart durch dich erslagen,

Verse: 3    wande er dîn lant ie werte:
Verse: 4    sîne triuwe er nie verscherte.

Verse: 5    junc vlætec süezer man,
Verse: 6    die gebruoder hânt dir vil getân:

Verse: 7    zwei lant nam dir Lehelîn,
Verse: 8    disen ritter und den vetern dîn

Verse: 9    ze tjostieren sluoc Orilus.
Verse: 10    der liez ouch mich in jâmer sus.

Verse: 11    mir diende âne alle schande
Verse: 12    dirre vürste von dînem lande:

Verse: 13    dô zôch mich dîn muoter.
Verse: 14    lieber neve guoter,

Verse: 15    nû hœre waz disiu mære sîn.
Verse: 16    ein brackenseil gap im den pîn.

Verse: 17    in unser zweier dienste den tôt
Verse: 18    hât er bejaget und jâmers nôt

Verse: 19    mir nâch sîner minne.
Verse: 20    ich hete kranke sinne,

Verse: 21    daz ich im niht minne gap.
Verse: 22    des hât der sorgen urhap

Verse: 23    mir vreude verschrôten:
Verse: 24    nû minne ich in alsô tôten."

Verse: 25    dô sprach er: "niftel, mir ist leit
Verse: 26    dîn kumber und mîn laster breit.

Verse: 27    swenne ich daz mac gerechen,
Verse: 28    daz wil ich gerne zechen."

Verse: 29    dô was im gein dem strîte gâch.
Verse: 30    si wîste in unrehte nâch:




Chapter: 142 
142


Verse: 1    si vorhte daz er den lîp verlür
Verse: 2    und daz si grôzen schaden kür.

Verse: 3    eine strâze er dô gevienc,
Verse: 4    diu gein den Berteneisen gienc:

Verse: 5    diu was gestrîchet unde breit.
Verse: 6    swer im widergienc oder widerreit,

Verse: 7    ez wære ritter oder koufman,
Verse: 8    die selben gruozte er alle sân

Verse: 9    und jach daz wære sîner muoter rât.
Verse: 10    diu gap in ouch âne missetât.

Verse: 11    der âbent begunde nâhen,
Verse: 12    grôz müede gein im gâhen.

Verse: 13    dô ersach der tumpheit genôz
Verse: 14    ein hûs ze guoter mâze grôz.

Verse: 15    dâ was inne ein arger wirt,
Verse: 16    als noch ûf ungeslehte birt:

Verse: 17    daz was ein vischære
Verse: 18    und aller güete lære.

Verse: 19    den knappen hunger lêrte
Verse: 20    daz er dâ gegen kêrte

Verse: 21    und klagete dem wirte hungers nôt.
Verse: 22    der sprach: "ich engæbe iu ein halbez brôt

Verse: 23    niht ze drîzec jâren.
Verse: 24    swer mîner milde vâren

Verse: 25    vergebene wil, der sûmet sich.
Verse: 26    ich ensorge um niemen danne um mich,

Verse: 27    dar nâch um mîniu kindelîn.
Verse: 28    ir enkomt tâlanc dâ her în.

Verse: 29    hetet ir phenninge oder phant,
Verse: 30    ich behielde iuch al zehant."




Chapter: 143 
143


Verse: 1    dô bôt im der knappe sân
Verse: 2    vroun Jeschûten vürspan.

Verse: 3    dô ez der vilân ersach,
Verse: 4    sîn munt dô lachete unde sprach:

Verse: 5    "wiltû belîben, liebez kint,
Verse: 6    dich êrent alle die hinne sint."

Verse: 7    "wiltû mich hînt wol spîsen
Verse: 8    und morgen rehte wîsen

Verse: 9    gein Artûse (dem bin ich holt),
Verse: 10    sô mac belîben dir daz golt."

Verse: 11    "diz tuon ich" sprach der vilân:
Verse: 12    "ich engesach nie lîp sô wol getân.

Verse: 13    ich bringe dich durch wunder
Verse: 14    vür des küneges tavelrunder."

Verse: 15    die naht beleip der knappe dâ:
Verse: 16    man sach in smorgens anderswâ.

Verse: 17    des tages er kûme erbeite.
Verse: 18    der wirt ouch sich bereite

Verse: 19    und lief im vor, der knappe nâch
Verse: 20    reit: dô was in beiden gâch.

Verse: 21    mîn her Hartman von Ouwe,
Verse: 22    vrou Ginôvêr, iuwer vrouwe,

Verse: 23    und iuwer herre, der künec Artûs,
Verse: 24    den kumt ein mîn gast ze hûs.

Verse: 25    bitet hüeten sîn vor spotte.
Verse: 26    er enist gîge noch diu rotte:

Verse: 27    si suln ein ander gampel nemen.
Verse: 28    des lâzen sich durch zuht gezemen:

Verse: 29    anders iuwer vrouwe ênîte
Verse: 30    und ir muoter Karsnafîte




Chapter: 144 
144


Verse: 1    werdent durch die mül gezucket
Verse: 2    und ir lop gebucket.

Verse: 3    sol ich den munt mit spotte zern,
Verse: 4    ich wil mînen vriunt mit spotte wern.

Verse: 5    dô kom der vischære
Verse: 6    und ouch der knappe mære

Verse: 7    einer houbetstat sô nâhen,
Verse: 8    aldâ si Nantes sâhen.

Verse: 9    dô sprach er: "kint, got hüete dîn!
Verse: 10    nû sich, dort soltû rîten în."

Verse: 11    dô sprach der knappe an witzen laz:
Verse: 12    "dû solt mich wîsen vürbaz."

Verse: 13    "wie wol mîn lîp daz bewart!
Verse: 14    diu massenîe ist alsolher art,

Verse: 15    genæhte ir immer vilân,
Verse: 16    daz wære vil sêre missetân."

Verse: 17    der knappe al eine vürbaz reit
Verse: 18    ûf einen plân niht ze breit,

Verse: 19    der stuont von bluomen lieht gemâl.
Verse: 20    in zôch dehein Curvenâl:

Verse: 21    er kunde kurtôsîe niht,
Verse: 22    als ungevarnem man geschiht.

Verse: 23    sîn zoum der was bestîn
Verse: 24    und harte kranc sîn pherdelîn:

Verse: 25    daz tet von strûchen manegen val.
Verse: 26    ouch was sîn satel über al

Verse: 27    unbeslagen mit niuwen ledern.
Verse: 28    samît, hermîner vedern

Verse: 29    man dâ vil lützel an im siht.
Verse: 30    er enbedorfte der mantelsnüere niht:




Chapter: 145 
145


Verse: 1    vür suckenîe und vür surkôt,
Verse: 2    dâ vür nam er sîn gabilôt.

Verse: 3    des site man gein prîse maz,
Verse: 4    sîn vater was gekleidet baz

Verse: 5    ûf dem teppeche vor Kanvoleiz.
Verse: 6    der geliez nie vorhtlîchen sweiz,

Verse: 7    im kom ein ritter widerriten.
Verse: 8    den gruozte er nâch sînen siten:

Verse: 9    "got halde iuch! riet mîn muoter mir."
Verse: 10    "juncherre, got lône iu und ir!"

Verse: 11    sprach Artûses basen sun,
Verse: 12    den zôch Utepandragûn.

Verse: 13    ouch sprach der selbe wîgant
Verse: 14    erbeschaft ze Bertâne ûfz lant:

Verse: 15    ez was îthêr von Gaheviez.
Verse: 16    den rôten ritter man in hiez:

Verse: 17    sîn harnas was gar sô rôt,
Verse: 18    daz ez den ougen rœte bôt.

Verse: 19    sîn ors was rôt unde snel,
Verse: 20    al rôt was sîn gügerel,

Verse: 21    rôt samît was sîn kovertiur,
Verse: 22    sîn schilt noch rœter danne ein viur,

Verse: 23    al rôt was sîn kursît
Verse: 24    und wol an in gesniten wît,

Verse: 25    rôt was sîn schaft, rôt was sîn sper,
Verse: 26    al rôt nâch des heldes ger

Verse: 27    was im sîn swert gerœtet,
Verse: 28    nâch der scherphe iedoch gelœtet.

Verse: 29    der künec von Kukûmerlant,
Verse: 30    al rôt von golde ûf sîner hant




Chapter: 146 
146


Verse: 1    stuont ein koph vil wol gegraben,
Verse: 2    ob tavelrunder ûf erhaben.

Verse: 3    blanc was sîn vel, rôt was sîn hâr.
Verse: 4    der sprach zem knappen sunder vâr:

Verse: 5    "gêret sî dîn süezer lîp:
Verse: 6    dich brâhte zer werlde ein reine wîp.

Verse: 7    ô wol der muoter diu dich gebar!
Verse: 8    ich engesach nie lîp sô wol gevar.

Verse: 9    dû bist der wâren minne blic,
Verse: 10    ir schumphentiure und ir sic:

Verse: 11    vil wîbes vreude an dir gesiget.
Verse: 12    dar nâch dir jâmer swære wiget,

Verse: 13    lieber vriunt, wiltû dâ hin în,
Verse: 14    sô sage mir durch den dienest mîn

Verse: 15    dem künege und al den sînen,
Verse: 16    ich ensül niht vlühtec schînen:

Verse: 17    ich wil hie gerne beiten.
Verse: 18    swer ze tjost sich sol bereiten,

Verse: 19    ir neheiner habez vür wunder.
Verse: 20    ich reit vür tavelrunder,

Verse: 21    mîns landes ich mich underwant:
Verse: 22    disen koph mîn ungevüegiu hant

Verse: 23    ûf zucte, daz der wîn vergôz
Verse: 24    vroun Ginôvêren in ir schôz.

Verse: 25    underwinden mich daz lêrte.
Verse: 26    ob ich schoube umbe kêrte,

Verse: 27    sô würde ruozec mir mîn vel:
Verse: 28    daz meit ich" sprach der degen snel.

Verse: 29    "ich enhânz ouch niht durch roup getân:
Verse: 30    des hât mîn krône mich erlân.




Chapter: 147 
147


Verse: 1    vriunt, nû sage der künegîn,
Verse: 2    ich begüzze si âne willen mîn,

Verse: 3    aldâ die werden sâzen.
Verse: 4    die rehter wer vergâzen,

Verse: 5    ez sîn künege oder vürsten,
Verse: 6    wes lant si ir wirt erdürsten?

Verse: 7    wan holnt si im hie sîn goltvaz?
Verse: 8    ir sneller prîs wirt anders laz."

Verse: 9    der knappe sprach: "ich wirbe dir
Verse: 10    swaz dû gesprochen hâs ze mir."

Verse: 11    er reit von im ze Nantes în.
Verse: 12    dâ volcten im diu kindelîn

Verse: 13    ûf den hof vür den palas,
Verse: 14    dâ maneger slahte vuore was.

Verse: 15    schiere wart umbe in gedranc:
Verse: 16    îwânet dar nâher spranc,

Verse: 17    ein knappe valsches vrîe.
Verse: 18    der bôt im kumpânîe.

Verse: 19    der knappe sprach: "got halde dich!
Verse: 20    bat reden mîn muoter mich,

Verse: 21    ê daz ich schiede von ir hûs.
Verse: 22    ich sihe hie manegen Artûs:

Verse: 23    wer sol mich ritter machen?"
Verse: 24    îwânet begunde lachen,

Verse: 25    er sprach: "dû ensihs des rehten niht,
Verse: 26    daz aber schiere nû geschiht."

Verse: 27    er vuorte in în zem palas,
Verse: 28    dâ diu werde massenîe was.

Verse: 29    sus vil kunde er in schalle,
Verse: 30    er sprach: "got halde iuch herren alle,




Chapter: 148 
148


Verse: 1    benamen den künec und des wîp!
Verse: 2    mir gebôt mîn muoter an den lîp,

Verse: 3    daz ich die gruozte sunder.
Verse: 4    die ob der tavelrunder

Verse: 5    von rehtem prîse heten stat,
Verse: 6    die selben si mich grüezen bat.

Verse: 7    dar an ein kunst mich verbirt,
Verse: 8    ich enweiz niht welher hinne ist wirt.

Verse: 9    dem hât ein ritter her enboten
Verse: 10    (den sach ich allenthalben roten),

Verse: 11    er welle sîn dâ ûze bîten.
Verse: 12    mich dunket er welle strîten.

Verse: 13    im ist ouch leit daz er den wîn
Verse: 14    vergôz ûf die künegîn.

Verse: 15    ouwî wan hete ich sîn gewant
Verse: 16    emphangen von des küneges hant!

Verse: 17    sô wære ich vreuden rîche,
Verse: 18    wan ez stêt sô ritterlîche."

Verse: 19    der knappe unbetwungen
Verse: 20    wart harte vil gedrungen,

Verse: 21    gehurtet her unde dar.
Verse: 22    si nâmen sîner varwe war:

Verse: 23    diz was selpschouwet,
Verse: 24    geherret noch gevrouwet

Verse: 25    wart nie minneclîcher vruht.
Verse: 26    got was in einer süezen zuht,

Verse: 27    dô er Parzivâlen worhte.
Verse: 28    der vreise wênec vorhte,

Verse: 29    sus wart er vür Artûsen brâht.
Verse: 30    an dem got wunsches hete erdâht,




Chapter: 149 
149


Verse: 1    im kunde niemen vîent sîn.
Verse: 2    dô besach in ouch diu künegîn,

Verse: 3    ê si schiede von dem palas,
Verse: 4    dâ si dâ vor begozzen was.

Verse: 5    Artûs an den knappen sach,
Verse: 6    zuo dem tumben er dô sprach:

Verse: 7    "juncherre, got vergelde iu gruoz,
Verse: 8    den ich gerne dienen muoz

Verse: 9    mit dem lîbe und mit dem guote.
Verse: 10    des ist mir wol ze muote."

Verse: 11    "wolde et got, wan wære daz wâr!
Verse: 12    der wîle dunket mich ein jâr

Verse: 13    daz ich niht ritter wesen sol.
Verse: 14    daz tuot mir wirs denne wol:

Verse: 15    nû ensûmet mich niht mêre,
Verse: 16    phleget mîn nâch ritters êre."

Verse: 17    "daz tuon ich gerne" sprach der wirt.
Verse: 18    "ob werdekeit mich niht verbirt,

Verse: 19    dû bist wol sô gehiure,
Verse: 20    rîch an koste stiure

Verse: 21    wirt dir mîn gâbe undertân.
Verse: 22    deiswâr ich solz ungerne lân.

Verse: 23    dû solt unz morgen beiten:
Verse: 24    ich wil dich wol bereiten."

Verse: 25    der wol geborne knappe
Verse: 26    hielt gagernde als ein trappe.

Verse: 27    er sprach: "ich enwil hie nihtes biten.
Verse: 28    mir kom ein ritter widerriten:

Verse: 29    mac mir des harnas werden niht,
Verse: 30    ich enruoche wer küneges gâbe giht.




Chapter: 150 
150


Verse: 1    sô gît aber mir diu muoter mîn:
Verse: 2    ich wæne doch diust ein künegîn."

Verse: 3    Artûs sprach zem knappen sân:
Verse: 4    "daz harnas vüert an im ein man,

Verse: 5    daz ich dirs niht getörste geben.
Verse: 6    ich muoz doch sus mit kumber leben

Verse: 7    âne alle mîne schulde,
Verse: 8    sît ich darbe sîner hulde.

Verse: 9    ez ist îthêr von Gaheviez,
Verse: 10    der trûren mir duch vreude stiez."

Verse: 11    "ir wæret ein künec milde,
Verse: 12    ob iuch solher gâbe bevilde.

Verse: 13    gebetz im dar" sprach Keie sân
Verse: 14    "und lât in zuo zim ûf den plân,

Verse: 15    sol iemen bringen uns den koph.
Verse: 16    hie helt diu geisel, dort der toph:

Verse: 17    lâtz kint in umbe trîben,
Verse: 18    sô lebet manz vor den wîben.

Verse: 19    ez muoz noch dicke bâgen
Verse: 20    und solhe schanze wâgen.

Verse: 21    ich ensorge umbe ir deweders leben:
Verse: 22    man sol hunde nâch ebers houbet geben."

Verse: 23    "ungerne wolde ich im versagen,
Verse: 24    wan daz ich vürhte er werde erslagen,

Verse: 25    dem ich helfen sol der ritterschaft"
Verse: 26    sprach Artûs ûz triuwen kraft.

Verse: 27    der knappe iedoch die gâbe emphienc,
Verse: 28    dâ von ein jâmer sît ergienc.

Verse: 29    dô was im von dem künege gâch.
Verse: 30    junge und alde im drungen nâch:




Chapter: 151 
151


Verse: 1    îwânet in an der hende zôch
Verse: 2    vür eine louben niht ze hôch.

Verse: 3    dô sach er vür unde wider:
Verse: 4    ouch was diu loube sô nider,

Verse: 5    daz er drûfe hôrte und ouch ersach
Verse: 6    dâ von ein trûren im geschach.

Verse: 7    dâ wolde ouch diu künegîn
Verse: 8    selbe an dem venster sîn

Verse: 9    mit rittern und mit vrouwen.
Verse: 10    die begunden in alle schouwen.

Verse: 11    dâ saz vrou Cunnewâre,
Verse: 12    diu fiere und diu klâre.

Verse: 13    diu enlachete deheinen wîs,
Verse: 14    si ensæhe in der den hœsten prîs

Verse: 15    hete oder solde erwerben:
Verse: 16    si wolde ê sus ersterben.

Verse: 17    allez lachen si vermeit,
Verse: 18    unz daz der knappe vür si reit:

Verse: 19    dô erlachete ir minneclîcher munt.
Verse: 20    des wart ir rücke ungesunt.

Verse: 21    dô nam Keie seneschalt
Verse: 22    vroun Cunnewâren de Lalant

Verse: 23    mit ir reiden hâre.
Verse: 24    ir lange zöphe klâre

Verse: 25    die want er umbe sîne hant:
Verse: 26    er spancte si âne türbant.

Verse: 27    ir rücke wart dehein eit gestabet,
Verse: 28    doch wart ein stap sô dran gehabet,

Verse: 29    unz daz sîn siusen gar verswanc,
Verse: 30    durch die wât und durch ir vel ez dranc.




Chapter: 152 
152


Verse: 1    dô sprach der unwîse:
Verse: 2    "iuwerm werden prîse

Verse: 3    ist gegeben ein smæhiu letze:
Verse: 4    ich bin sîn vengec netze,

Verse: 5    ich sol in wider in iuch smiden
Verse: 6    daz irs emphindet ûf den liden.

Verse: 7    ez ist dem künege Artûs
Verse: 8    ûf sînen hof und in sîn hûs

Verse: 9    sô manec werder man geriten,
Verse: 10    durch den ir lachen hât vermiten,

Verse: 11    und lachet nû durch einen man
Verse: 12    der niht mit ritters vuore kan."

Verse: 13    in zorne wunders vil geschiht.
Verse: 14    sîns slages wære im erteilet niht

Verse: 15    vor dem rîche ûf dise maget,
Verse: 16    diu vil von vriunden wart geklaget,

Verse: 17    ob si halt schilt solde tragen.
Verse: 18    diu ungevuoge ist dâ geslagen

Verse: 19    (wan si was von arte ein vürstîn),
Verse: 20    Orilus und Lehelîn,

Verse: 21    ir bruoder, hetenz die gesehen,
Verse: 22    der slege minner wære geschehen.

Verse: 23    der verswigen Antanôr,
Verse: 24    der durch swîgen dûhte ein tôr,

Verse: 25    sîn rede und ir lachen
Verse: 26    was gezilt mit einen sachen:

Verse: 27    er enwolde nimmer wort gesagen,
Verse: 28    si enlachete diu dâ wart geslagen.

Verse: 29    dô ir lachen wart getân,
Verse: 30    sîn munt sprach ze Keien sân:




Chapter: 153 
153


Verse: 1    "got weiz, her seneschalt,
Verse: 2    daz Cunnewâre de Lalant

Verse: 3    durch den knappen ist zebert,
Verse: 4    iuwer vreude es wirt verzert

Verse: 5    noch von sîner hende,
Verse: 6    er ensî nie sô ellende."

Verse: 7    "sît iuwer êrste rede mir dreut,
Verse: 8    ich wæne irs wênec iuch gevreut."

Verse: 9    sîn brât wart gâlûnet,
Verse: 10    mit slegen vil gerûnet

Verse: 11    dem witzehaften tôren
Verse: 12    mit viusten in sîn ôren:

Verse: 13    daz tet Keie sunder twâl.
Verse: 14    dô muoste der junge Parzivâl

Verse: 15    disen kumber schouwen.
Verse: 16    Antanors und der vrouwen,

Verse: 17    im was von herzen leit ir nôt:
Verse: 18    vil dicke er greif zem gabilôt.

Verse: 19    vor der künegîn was solh gedranc,
Verse: 20    daz er durch daz vermeit den swanc.

Verse: 21    urloup nam do îwânet
Verse: 22    zem fil li roi Gahmuret,

Verse: 23    des reise al eine wart getân
Verse: 24    hin ûz gein îthêr ûf den plân.

Verse: 25    dem sagete er solhiu mære,
Verse: 26    daz niemen dinne wære

Verse: 27    der tjostierens gerte.
Verse: 28    "der künec mich gâbe werte.

Verse: 29    ich sagete, als dû mir verjæhe,
Verse: 30    wiez âne danc geschæhe




Chapter: 154 
154


Verse: 1    daz dû den wîn vergüzze,
Verse: 2    unvuoge dich verdrüzze.

Verse: 3    ir deheinen lüstet strîtes.
Verse: 4    gip mir dâ dû ûfe rîtes,

Verse: 5    und dar zuo al dîn harnas:
Verse: 6    daz emphienc ich ûf dem palas,

Verse: 7    dar inne ich ritter werden muoz.
Verse: 8    widersaget sî dir mîn gruoz,

Verse: 9    ob dû mirz ungerne gîs.
Verse: 10    wer mich, ob dû bî witzen gîs.

Verse: 11    der künec von Kukûmerlant
Verse: 12    sprach: "hât Artûses hant

Verse: 13    dir mîn harnas gegeben,
Verse: 14    deiswâr daz tæte er ouch mîn leben,

Verse: 15    möhtestû mirz an gewinnen.
Verse: 16    sus kan er vriunde minnen:

Verse: 17    was er dir aber ê iht holt?
Verse: 18    dîn dienst gedient sô schier den solt."

Verse: 19    "ich getar wol dienen swaz ich sol:
Verse: 20    ouch hât er mich gewert vil wol.

Verse: 21    gip her und lâz dîn lantreht:
Verse: 22    ich enwil niht langer sîn ein kneht,

Verse: 23    ich sol schildes ambet hân."
Verse: 24    er greif im nâch dem zoume sân:

Verse: 25    "dû maht wol wesen Lehelîn,
Verse: 26    von dem mir klagete diu muoter mîn."

Verse: 27    der ritter umbe kêrte den schaft
Verse: 28    und stach den knappen sô mit kraft,

Verse: 29    daz er und sîn pherdelîn
Verse: 30    muosten vallende ûf die bluomen sîn.




Chapter: 155 
155


Verse: 1    der helt was zornes dræte:
Verse: 2    er sluoc in daz im wæte

Verse: 3    von dem schafte ûzer swarten bluot.
Verse: 4    Parzivâl der knappe guot

Verse: 5    stuont al zornec ûf dem plân.
Verse: 6    sîn gabilôt begreif er sân.

Verse: 7    dâ der helm und diu barbier
Verse: 8    sich locheten ob dem hersenier,

Verse: 9    durchz ouge in sneit daz gabilôt
Verse: 10    und durch den nac, sô daz er tôt

Verse: 11    viel, der valscheit widersaz.
Verse: 12    wîbe siufzen, herzen jâmers kraz

Verse: 13    gap îthêrs tôt von Gaheviez.
Verse: 14    der wîben nazziu ougen liez,

Verse: 15    swelhiu sîner minne emphant,
Verse: 16    durch die vreude ir was gerant

Verse: 17    und ir schimph enschumphieret,
Verse: 18    gein der riuhe gekondewieret.

Verse: 19    Parzivâl der tumbe
Verse: 20    kêrte in dicke al umbe:

Verse: 21    er kunde im abe geziehen niht.
Verse: 22    daz was ein wunderlîch geschiht:

Verse: 23    helmes snüere noch sîniu schinnelier,
Verse: 24    mit sînen blanken handen fier

Verse: 25    kunde ers niht ûf gestricken
Verse: 26    noch sus her abe gezwicken.

Verse: 27    vil dicke erz doch versuochte,
Verse: 28    wîsheit der unberuochte.

Verse: 29    daz ors und daz pherdelîn
Verse: 30    erhuoben einen sô hôhen grîn,




Chapter: 156 
156


Verse: 1    daz ez îwânet erhôrte
Verse: 2    vor der stat an sgraben orte,

Verse: 3    vroun Ginôvêren knappe und ir mâc.
Verse: 4    dô er von dem orse erhôrte den bâc

Verse: 5    und dô er niemen drûfe sach
Verse: 6    (von sînen triuwen daz geschach

Verse: 7    die er nâch Parzivâle truoc),
Verse: 8    dô gâhte dar der knappe kluoc.

Verse: 9    er vant îthêren tôt
Verse: 10    und Parzivâlen in tumber nôt:

Verse: 11    snellîche er zin beiden spranc.
Verse: 12    dô sagete er Parzivâle danc

Verse: 13    prîses des erwarp sîn hant
Verse: 14    an dem von Kukûmerlant.

Verse: 15    "got lône dir! nû rât waz ich tuo.
Verse: 16    ich kan hie harte wênec zuo:

Verse: 17    wie bringe ichz ab im und an mich?"
Verse: 18    "daz kan ich wol gelêren dich."

Verse: 19    sus sprach der stolze îwânet
Verse: 20    zem fil li roi Gahmuret.

Verse: 21    entwâpent wart der tôte man
Verse: 22    aldâ vor Nantes ûf dem plân

Verse: 23    und an den lebenden geleget,
Verse: 24    den dannoch grôziu tumpheit reget.

Verse: 25    îwânet sprach: "diu ribalîn
Verse: 26    suln niht under dem îser sîn:

Verse: 27    dû solt nû tragen ritters kleit."
Verse: 28    diu rede was Parzivâle leit.

Verse: 29    dô sprach der knappe guoter:
Verse: 30    "swaz mir gap mîn muoter,




Chapter: 157 
157


Verse: 1    des sol vil wênec von mir komen,
Verse: 2    ez gê ze schaden oder ze vromen."

Verse: 3    daz dûhte wunderlîch genuoc
Verse: 4    îwâneten: der was kluoc,

Verse: 5    iedoch muoste er im volgen.
Verse: 6    er enwas im niht erbolgen:

Verse: 7    zwuo liehte hosen îserîn
Verse: 8    schuohte er im über diu ribalîn,

Verse: 9    sunder leder mit zwein borten.
Verse: 10    zwêne sporn dar zuo gehôrten:

Verse: 11    er spien im an daz goldes werc.
Verse: 12    ê er im büte dar den halsberc,

Verse: 13    er stricte im umbe diu schinnelier.
Verse: 14    sunder twâl vil harte schier

Verse: 15    von vuoze ûf gewâpent wol
Verse: 16    wart Parzivâl mit gernder dol.

Verse: 17    dô iesch der knappe mære
Verse: 18    sînen kochære.

Verse: 19    "ich enreiche dir dehein gabilôt:
Verse: 20    diu ritterschaft dir daz verbôt"

Verse: 21    sprach îwânet der knappe wert.
Verse: 22    der gurte im umbe ein scharphez swert:

Verse: 23    daz lêrte er in ûz ziehen
Verse: 24    und widerriet im vliehen.

Verse: 25    dô zôch er im dar nâher sân
Verse: 26    des tôten mannes kastelân,

Verse: 27    daz truoc bein hôch und lanc.
Verse: 28    er gewâpende in den satel spranc:

Verse: 29    er engerte stegereifes niht.
Verse: 30    dem man noch snelheite giht,




Chapter: 158 
158


Verse: 1    îwâneten niht bevilde,
Verse: 2    er enlêrte in underm schilde

Verse: 3    künsteclîch gebâren
Verse: 4    und der vînde schaden vâren.

Verse: 5    er bôt im in die hant ein sper:
Verse: 6    daz was gar âne sîne ger,

Verse: 7    doch vrâcte er in: "war zuo ist diz vrum?"
Verse: 8    "swer gein dir zer tjoste kum,

Verse: 9    dâ soltûz balde brechen,
Verse: 10    durch sînen schilt verstechen.

Verse: 11    wiltû des vil getrîben,
Verse: 12    man lobet dich vor den wîben."

Verse: 13    als uns diu âventiure giht,
Verse: 14    von Kölne noch von Mâstrieht

Verse: 15    dehein schildære entwürfe in baz,
Verse: 16    denne als er ûf dem orse saz.

Verse: 17    dô sprach er z îwâneten sân:
Verse: 18    "lieber vriunt, mîn kumpân,

Verse: 19    ich hân hie erworben des ich bat.
Verse: 20    dû solt mîn dienest in die stat

Verse: 21    dem künege Artûse sagen
Verse: 22    und ouch mîn hôhez laster klagen.

Verse: 23    brinc im wider sîn goltvaz.
Verse: 24    ein ritter sich an mir vergaz,

Verse: 25    daz er die juncvrouwen sluoc
Verse: 26    durch daz si lachens mîn gewuoc.

Verse: 27    mich müent ir jæmerlîchen wort,
Verse: 28    diu enrüerent mir dehein herzen ort:

Verse: 29    jâ muoz enmitten drinne sîn
Verse: 30    der vrouwen ungedienter pîn.




Chapter: 159 
159


Verse: 1    nû tuoz durch dîne gesellekeit
Verse: 2    und lâz dir sîn mîn laster leit.

Verse: 3    got hüete dîn! ich wil von dir varn
Verse: 4    der mac uns beide wol bewarn."

Verse: 5    îthêrn von Gaheviez
Verse: 6    er jæmerlîche ligen liez:

Verse: 7    der was, doch tôt, sô minneclîch.
Verse: 8    lebende was er sælden rîch.

Verse: 9    wære ritterschaft sîn endes wer
Verse: 10    zer tjost durch schilt mit einem sper,

Verse: 11    wer klagete denne die wunders nôt?
Verse: 12    er starp von einem gabilôt.

Verse: 13    îwânet ûf in dô brach
Verse: 14    der liehten bluomen zeinem dach.

Verse: 15    er stiez den gabilôtes stil
Verse: 16    zuo zim, nâch der marter zil

Verse: 17    der knappe kiusche unde stolz
Verse: 18    dructe en kriuzes wîs ein holz

Verse: 19    durch des gabilôtes snîden.
Verse: 20    dô enwolde er niht vermîden,

Verse: 21    hin in die stat er sagete
Verse: 22    des manec wîp verzagete

Verse: 23    und des manec ritter weinde.
Verse: 24    der klagende triuwe erscheinde

Verse: 25    (dâ wart jâmers vil gedolt),
Verse: 26    der tôte schône wart geholt.

Verse: 27    diu künegîn reit ûz der stat,
Verse: 28    daz heilectuom si vüeren bat

Verse: 29    ob dem künege von Kukûmerlant,
Verse: 30    den tôte Parzivâles hant.




Chapter: 160 
160


Verse: 1    vrou Ginôvêr diu künegîn
Verse: 2    sprach jæmerlîcher worte sin:

Verse: 3    "ouwê und heiâ hei!
Verse: 4    Artûses werdekeit enzwei

Verse: 5    sol brechen noch diz wunder,
Verse: 6    der ob der tavelrunder

Verse: 7    den hœsten prîs solde tragen,
Verse: 8    daz der vor Nantes liget erslagen.

Verse: 9    sîns erbeteils er gerte,
Verse: 10    dâ man in sterbens werte.

Verse: 11    er was doch massenîe alhie
Verse: 12    alsô, daz dehein ôre nie

Verse: 13    dehein sîn untât vernam.
Verse: 14    er was vor wildem valsche zam:

Verse: 15    der was vil gar von im geschaben.
Verse: 16    nû muoz ich alze vruo begraben

Verse: 17    ein slôz ob dem prîse.
Verse: 18    sîn herze an zühten wîse,

Verse: 19    ob dem slôze ein hantveste,
Verse: 20    riet im benamen daz beste,

Verse: 21    swâ man nâch wîbes minne
Verse: 22    mit ellenthaftem sinne

Verse: 23    solde erzeigen mannes triuwe.
Verse: 24    ein berndiu vruht al niuwe

Verse: 25    ist trûrens ûf diu wîp gesæt.
Verse: 26    ûz dîner wunden jâmer wæt.

Verse: 27    dir was doch wol sô rôt dîn hâr,
Verse: 28    daz dîn bluot die bluomen klâr

Verse: 29    niht rœter dorfte machen.
Verse: 30    dû swendes wîplich lachen."




Chapter: 161 
161


Verse: 1    îthêr der lobes rîche
Verse: 2    wart bestatet küneclîche.

Verse: 3    des tôt schoup siufzen in diu wîp,
Verse: 4    sîn harnas im verlôs den lîp:

Verse: 5    dar umbe was sîn endes wer
Verse: 6    des tumben Parzivâles ger.

Verse: 7    sît dô er sich baz versan,
Verse: 8    ungerne hete erz dô getân.

Verse: 9    daz ors einer site phlac:
Verse: 10    grôz arbeit ez ringe wac,

Verse: 11    ez wære kalt oder heiz.
Verse: 12    ez enliez durch reise deheinen sweiz,

Verse: 13    ez træte stein oder ronen.
Verse: 14    er dorfte im keines gürtens wonen

Verse: 15    doch eines loches nâher baz,
Verse: 16    sô er zwêne tage drûfe saz.

Verse: 17    gewâpent reitz der tumbe man
Verse: 18    den tac sô verre, ez hete lân

Verse: 19    ein blôz wîser, solde erz hân geriten
Verse: 20    zwêne tage, ez wære vermiten.

Verse: 21    er liez et schûften, selten draben:
Verse: 22    er kunde im lützel ûf gehaben.

Verse: 23    hin gein âbende er ersach
Verse: 24    eins turnes guphen und des dach.

Verse: 25    den tumben dûhte sêre,
Verse: 26    wie der türne wüehse mêre:

Verse: 27    der stuont dâ vil ûf einem hûs.
Verse: 28    dô wânde er si sæte Artûs:

Verse: 29    des jach er im vür heilekeit
Verse: 30    und daz sîn sælde wære breit.




Chapter: 162 
162


Verse: 1    alsô sprach der tumbe man:
Verse: 2    "mîner muoter volc niht bûwen kan:

Verse: 3    jâ enwehset niht sô lanc ir sât.
Verse: 4    swaz si ir in dem walde hât,

Verse: 5    grôz regen si selten dâ verbirt."
Verse: 6    Gurnemanz de Grâharz hiez der wirt

Verse: 7    ûf dirre burc dar zuo er reit.
Verse: 8    dâ vor stuont ein linde breit

Verse: 9    ûf einem grüenen anger,
Verse: 10    der was breiter noch langer

Verse: 11    niht wan ze rehter mâze.
Verse: 12    daz ors und ouch diu strâze

Verse: 13    in truogen dâ er sitzen vant
Verse: 14    des was diu burc und ouch daz lant.

Verse: 15    ein grôziu müede in des betwanc,
Verse: 16    daz er den schilt unrehte swanc,

Verse: 17    ze verre hinder oder vür,
Verse: 18    et ninder nâch der site kür

Verse: 19    die man dâ gein prîse maz.
Verse: 20    Gurnemanz der vürste al eine saz:

Verse: 21    ouch gap der linden tolde
Verse: 22    ir schaten, als si solde,

Verse: 23    dem houbetman der wâren zuht.
Verse: 24    des site was vor valsche ein vluht,

Verse: 25    der emphienc den gast. daz was sîn reht:
Verse: 26    bî im was ritter noch der kneht.

Verse: 27    sus antwurte im dô Parzivâl
Verse: 28    ûz tumben witzen sunder twâl:

Verse: 29    "mich bat mîn muoter nemen rât
Verse: 30    ze dem der grâwe locke hât.




Chapter: 163 
163


Verse: 1    dâ wil ich iu dienen nâch,
Verse: 2    sît mir mîn muoter des verjach."

Verse: 3    "sît ir durch râtes schulde
Verse: 4    her komen, iuwer hulde

Verse: 5    müezet ir mir durch râten lân,
Verse: 6    und welt ir râtes volge hân."

Verse: 7    dô warf der vürste mære
Verse: 8    einen mûzersparwære

Verse: 9    von der hende: in die burc er swanc,
Verse: 10    ein guldîn schelle dran erklanc.

Verse: 11    daz was ein bote: dô kômen sân
Verse: 12    vil juncherren wol getân.

Verse: 13    er bat den gast, den er dâ sach,
Verse: 14    în vüeren und schaffen sîn gemach.

Verse: 15    der sprach: "mîn muoter saget al wâr:
Verse: 16    altmannes rede stêt niht ze vâr."

Verse: 17    hin în vuorten si in al zehant,
Verse: 18    dâ er manegen werden ritter vant

Verse: 19    ûf dem hove an einer stat.
Verse: 20    ieslîcher in erbeizen bat.

Verse: 21    dô sprach an dem was tumpheit schîn:
Verse: 22    "mich hiez ein künec ritter sîn:

Verse: 23    swaz halt drûfe mir geschiht,
Verse: 24    ich enkum von disem orse niht.

Verse: 25    gruoz gein iu riet mîn muoter mir."
Verse: 26    si dancten beidiu im und ir.

Verse: 27    dô daz grüezen wart getân
Verse: 28    (daz ors was müede und ouch der man),

Verse: 29    maneger bete si gedâhten,
Verse: 30    ê si in von dem orse brâhten




Chapter: 164 
164


Verse: 1    in eine kemenâten.
Verse: 2    si begunden im alle râten:

Verse: 3    "lâtz harnas von iu bringen
Verse: 4    und iuwern liden ringen."

Verse: 5    schiere er muoste entwâpent sîn.
Verse: 6    dô si diu rûhen ribalîn

Verse: 7    und diu tôren kleit gesâhen,
Verse: 8    dô erschrâken die sîn phlâgen.

Verse: 9    vil blûge ez wart ze hove gesaget:
Verse: 10    der wirt vor schame was nâch verzaget.

Verse: 11    ein ritter sprach durch sîne zuht:
Verse: 12    "deiswâr sô werdeclîche vruht

Verse: 13    erkôs nie mîner ougen sehe.
Verse: 14    an im liget der sælden spehe

Verse: 15    mit reiner süezen hôhen art.
Verse: 16    wiest der minnen blic alsus bewart?

Verse: 17    mich jâmert immer daz ich vant
Verse: 18    an der werlde vreude alsolh gewant.

Verse: 19    wol doch der muoter diu in truoc!
Verse: 20    an dem des wunsches liget genuoc,

Verse: 21    sîn zimierde ist rîche.
Verse: 22    daz harnas stuont ritterlîche

Verse: 23    ê ez kœme von den gehiuren.
Verse: 24    von einer quaschiuren

Verse: 25    bluotege amesiere
Verse: 26    kôs ich an im schiere."

Verse: 27    der wirt sprach zem ritter sân:
Verse: 28    "daz ist durch wîbe gebot getân."

Verse: 29    "nein, herre! erst mit solhen siten,
Verse: 30    er enkunde nimmer wîp gebiten




Chapter: 165 
165


Verse: 1    daz si sîn dienest næme."
Verse: 2    "sîn varwe der minne zæme."

Verse: 3    der wirt sprach: "nû sul wir sehen
Verse: 4    an des wæte ein wunder ist geschehen."

Verse: 5    si giengen dâ si vunden
Verse: 6    Parzivâlen den wunden

Verse: 7    von einem sper, daz beleip doch ganz.
Verse: 8    sîn underwant sich Gurnemanz.

Verse: 9    solh was sîn underwinden,
Verse: 10    daz ein vater sînen kinden,

Verse: 11    der sich triuwe kunde nieten,
Verse: 12    möhtez in niht baz erbieten.

Verse: 13    sîne wunden wuosch und bant
Verse: 14    der wirt mit sîn selbes hant.

Verse: 15    dô was ouch ûf geleget daz brôt.
Verse: 16    des was dem jungen gaste nôt,

Verse: 17    wande in grôz hunger niht vermeit:
Verse: 18    al vastende er des morgens reit

Verse: 19    von dem vischære.
Verse: 20    sîn wunde und harnas swære,

Verse: 21    die vor Nantes er bejagete,
Verse: 22    im müede und hunger sagete

Verse: 23    und diu verre tagereise
Verse: 24    von Artûse dem Berteneise,

Verse: 25    dâ man in allenthalben vasten liez.
Verse: 26    der wirt in mit im ezzen hiez.

Verse: 27    der gast sich dâ gelabete:
Verse: 28    in den barn er sich sô habete,

Verse: 29    daz er der spîse swande vil.
Verse: 30    daz nam der wirt gar zeinem spil:




Chapter: 166 
166


Verse: 1    dô bat in vlîzeclîche
Verse: 2    Gurnemanz der triuwen rîche,

Verse: 3    daz er vaste æze
Verse: 4    und der müede sîn vergæze.

Verse: 5    man huop den tisch, dô des wart zît.
Verse: 6    "ich wæne daz ir müede sît"

Verse: 7    sus sprach der wirt: "wært ir iht vruo?"
Verse: 8    "got weiz, mîn muoter sliefe nuo:

Verse: 9    diu kan sô vil niht wachen."
Verse: 10    der wirt begunde lachen,

Verse: 11    er vuorte in an die slâfstat.
Verse: 12    der wirt in sich ûz sloufen bat:

Verse: 13    ungerne erz tet, doch muostez sîn.
Verse: 14    ein declachen hermîn

Verse: 15    wart geleget über sînen blôzen lîp.
Verse: 16    sô werde vruht gebar nie wîp.

Verse: 17    grôz müede und slâf in lêrte
Verse: 18    daz er sich selten kêrte

Verse: 19    an die andern sîten:
Verse: 20    sus kunde er tages erbîten.

Verse: 21    dô gebôt der vürste mære
Verse: 22    daz ein bat bereite wære

Verse: 23    rehte umbe den mitten morgens tac.
Verse: 24    zende an dem teppech der dâ lac,

Verse: 25    daz muoste smorgens alsô sîn.
Verse: 26    man warf dâ rôsen oben în.

Verse: 27    swie wênec man umbe in dâ rief,
Verse: 28    der gast erwachte der dâ slief.

Verse: 29    der junge werde süeze man
Verse: 30    gienc sitzen in die kuofen sân.




Chapter: 167 
167


Verse: 1    ich enweiz wer si des bæte:
Verse: 2    juncvrouwen mit rîcher wæte

Verse: 3    und an lîbes varwe minneclîch,
Verse: 4    die kômen zühte site gelîch.

Verse: 5    si twuogen und strichen schiere
Verse: 6    von im sîn amesiere

Verse: 7    mit blanken linden henden.
Verse: 8    jâ endorfte in niht ellenden

Verse: 9    der dâ was witze ein weise.
Verse: 10    sus dolde er vreude und eise,

Verse: 11    tumpheit er wênec gein in engalt.
Verse: 12    juncvrouwen kiusche unde balt

Verse: 13    in alsus kunrierten.
Verse: 14    swâ von si parlierten,

Verse: 15    dâ kunde er wol geswîgen zuo.
Verse: 16    ez dorfte in dunken niht ze vruo,

Verse: 17    wan von in schein der ander tac.
Verse: 18    der glast alsus en strîte lac,

Verse: 19    sîn varwe laschte beidiu lieht:
Verse: 20    des was sîn lîp versûmet niht.

Verse: 21    man bôt ein badelachen dar.
Verse: 22    des nam er vil kleine war:

Verse: 23    sus kunde er sich bî vrouwen schemen.
Verse: 24    vor in wolde erz niht umbe nemen,

Verse: 25    die juncvrouwen muosten gên.
Verse: 26    si entorsten dâ niht langer stên:

Verse: 27    ich wæne si gerne heten gesehen,
Verse: 28    ob im dort unde iht wære geschehen.

Verse: 29    wîpheit vert mit triuwen,
Verse: 30    si kan vriundes kumber riuwen.




Chapter: 168 
168


Verse: 1    der gast an daz bette schreit.
Verse: 2    al wîz gewant im was bereit,

Verse: 3    von golde unde sîdîn
Verse: 4    einen bruochgürtel zôch man drîn.

Verse: 5    scharlachens hosen rôt man streich
Verse: 6    an in. dem ellen nie gesweich,

Verse: 7    âvoi wie stuonden sîniu bein!
Verse: 8    reht geschickede ab in schein.

Verse: 9    brûn scharlachen wol gesniten,
Verse: 10    dem was furrieren niht vermiten,

Verse: 11    beidiu innen hermîn blanc,
Verse: 12    roc und mantel wâren lanc,

Verse: 13    breit swarz unde grâ
Verse: 14    zobel dâ vor man kôs aldâ:

Verse: 15    daz legete an der gehiure.
Verse: 16    under einen gürtel tiure

Verse: 17    wart er gefischieret
Verse: 18    und wol gezimieret

Verse: 19    mit einem tiuren vürspan.
Verse: 20    sîn munt dâ bî vor rœte bran.

Verse: 21    dô kom der wirt mit triuwen kraft,
Verse: 22    nâch dem gienc stolziu ritterschaft.

Verse: 23    der emphienc den gast. dô daz geschach,
Verse: 24    der ritter ieslîcher sprach,

Verse: 25    si engesæhen nie sô schœnen lîp.
Verse: 26    mit triuwen lobeten si daz wîp,

Verse: 27    diu gap der werlde alsolhe vruht.
Verse: 28    durch wârheit und umbe ir zuht

Verse: 29    si jâhen: "er wirt wol gewert,
Verse: 30    swâ sîn dienst genâden gert:




Chapter: 169 
169


Verse: 1    im ist minne und gruoz bereit,
Verse: 2    mac er geniezen werdekeit."

Verse: 3    ieslîcher im des dâ verjach
Verse: 4    und dar nâch swer in ie gesach.

Verse: 5    der wirt in mit der hant gevienc,
Verse: 6    geselleclîche er dannen gienc.

Verse: 7    in vrâcte der vürste mære,
Verse: 8    welh sîn ruowe wære

Verse: 9    des nahtes dâ bî im gewesen.
Verse: 10    "dâ enwære ich niht genesen,

Verse: 11    wan daz mîn muoter her mir riet
Verse: 12    des tages dô ich von ir schiet."

Verse: 13    "got müeze lônen iu und ir!
Verse: 14    herre, ir tuot genâde an mir."

Verse: 15    dô gienc der helt mit witzen kranc
Verse: 16    dâ man got und dem wirte sanc.

Verse: 17    der wirt zer messe in lêrte
Verse: 18    daz noch die sælde mêrte,

Verse: 19    ophern unde segenen sich
Verse: 20    und gein dem tiuvel kêren gerich.

Verse: 21    dô giengen si ûf den palas.
Verse: 22    aldâ der tisch gedecket was,

Verse: 23    der gast ze sînem wirte saz.
Verse: 24    die spîse er ungesmæhet az.

Verse: 25    der wirt sprach durch hövescheit:
Verse: 26    "herre, iu ensol niht wesen leit,

Verse: 27    ob ich iuch vrâge mære,
Verse: 28    wannen iuwer reise wære."

Verse: 29    er sagete im gar die underscheit
Verse: 30    und wie er von sîner muoter reit,




Chapter: 170 
170


Verse: 1    umz vingerlîn und umz vürspan
Verse: 2    und wie erz harnas gewan.

Verse: 3    der wirt erkande den ritter rôt:
Verse: 4    der ersiufte und erbarmete in sîn nôt.

Verse: 5    sînen gast des namen er niht erliez,
Verse: 6    den rôten ritter er in hiez.

Verse: 7    dô man den tisch hin dan genam,
Verse: 8    dar nâch wart wilder muot vil zam.

Verse: 9    der wirt sprach zem gaste sîn:
Verse: 10    "ir redet als ein kindelîn.

Verse: 11    wan geswîget ir iuwer muoter gar
Verse: 12    und nemet ander mære war?

Verse: 13    habet iuch an mînen rât:
Verse: 14    der scheidet iuch von missetât.

Verse: 15    sus hebe ich an. lât iuch gezemen,
Verse: 16    ir sult niemer iuch verschemen.

Verse: 17    verschamter lîp, waz touc der mêr?
Verse: 18    der wont in der mûze rêr,

Verse: 19    dâ im werdekeit entrîset
Verse: 20    und in gein der helle wîset.

Verse: 21    ir traget geschickede unde schîn,
Verse: 22    ir muget wol volkes herre sîn.

Verse: 23    ist hôch und hœht sich iuwer art,
Verse: 24    lât iuwern willen des bewart,

Verse: 25    iuch sol erbarmen nôtec her:
Verse: 26    gein des kumber sît ze wer

Verse: 27    mit milde und mit güete.
Verse: 28    vlîzet iuch diemüete.

Verse: 29    der kumberhafte werde man
Verse: 30    wol mit schame ringen kan




Chapter: 171 
171


Verse: 1    (daz ist ein unsüeze arbeit):
Verse: 2    dem sult ir helfe sîn bereit.

Verse: 3    swenne ir dem tuot kumbers buoz,
Verse: 4    sô nâhet iu der gotes gruoz.

Verse: 5    im ist noch wirs denne den die gênt
Verse: 6    nâch brôte aldâ diu venster stênt.

Verse: 7    ir sult bescheidenlîche
Verse: 8    sîn arm unde rîche,

Verse: 9    wan swâ der herre gar vertuot,
Verse: 10    daz ist niht herrenlîcher muot:

Verse: 11    sament er aber schaz ze sêre,
Verse: 12    daz sint ouch unêre.

Verse: 13    gebet rehter mâze ir orden.
Verse: 14    ich bin wol innen worden

Verse: 15    daz ir râtes dürftec sît:
Verse: 16    nû lât der unvuoge ir strît.

Verse: 17    ir ensult niht vil gevrâgen:
Verse: 18    ouch ensol iuch niht betrâgen

Verse: 19    bedâhter gegenrede, diu gê
Verse: 20    rehte als jenes vrâgen stê,

Verse: 21    der iuch wil mit worten spehen.
Verse: 22    ir kunnet hœren unde sehen,

Verse: 23    entseben unde dræhen:
Verse: 24    daz solde iuch witzen næhen.

Verse: 25    lât die erberme bî der vrevel sîn.
Verse: 26    sus tuot mir râtes volge schîn:

Verse: 27    an swem ir strîtes sicherheit
Verse: 28    bezalt, er enhabe iu solhiu leit

Verse: 29    getân diu herzen kumber wesen,
Verse: 30    die nemet und lâzet in genesen.




Chapter: 172 
172


Verse: 1    ir müezet dicke wâpen tragen:
Verse: 2    sôz von iu kom, daz ir getwagen

Verse: 3    under ougen und an handen sît!
Verse: 4    des ist nâch îsers râme zît.

Verse: 5    [sô werdet ir minneclîch gevar:
Verse: 6    des nement wîbes ougen war.]

Verse: 7    sît manlîch und wol gemuot
Verse: 8    (daz ist ze werdem prîse iu guot)

Verse: 9    und lât iu liep sîn diu wîp:
Verse: 10    daz tiuret junges mannes lîp.

Verse: 11    gewenket nimmer tac an in:
Verse: 12    dast rehte manlîcher sin.

Verse: 13    welt ir in gerne liegen,
Verse: 14    ir muget ir vil betriegen:

Verse: 15    gein werder minne valscher list
Verse: 16    hât gein prîse kurze vrist.

Verse: 17    dâ wirt der slîchære klage
Verse: 18    daz dürre holz in dem hage,

Verse: 19    daz bristet unde krachet:
Verse: 20    der wahtære erwachet.

Verse: 21    ungeverte und hâmît,
Verse: 22    dar gedîhet manec strît:

Verse: 23    diz zelt gein der minne.
Verse: 24    diu werde hât sinne,

Verse: 25    gein valsche listeclîche kunst:
Verse: 26    swenne ir bejaget ir ungunst,

Verse: 27    sô müezet ir gunêret sîn
Verse: 28    und immer dulden schemeden pîn.

Verse: 29    dise lêre sult ir nâhe tragen.
Verse: 30    ich wil iu mêr von wîbes orden sagen:




Chapter: 173 
173


Verse: 1    man und wîp diu sint al ein
Verse: 2    als diu sunne diu hiute schein,

Verse: 3    und ouch der name der heizet tac.
Verse: 4    der enwederz sich gescheiden mac:

Verse: 5    si blüent ûz einem kerne gar.
Verse: 6    des nemet künsteclîche war."

Verse: 7    der gast dem wirte durch râten neic.
Verse: 8    sîner muoter er gesweic

Verse: 9    mit rede und in dem herzen niht,
Verse: 10    als noch getriuwem man geschiht.

Verse: 11    der wirt sprach sîn êre:
Verse: 12    "noch sult ir lernen mêre

Verse: 13    kunst an ritterlîchen siten.
Verse: 14    wie kômet ir zuo mir geriten!

Verse: 15    ich hân beschouwet manege want,
Verse: 16    dâ ich den schilt baz hangen vant

Verse: 17    denne er iu ze halse tæte.
Verse: 18    ez ist uns niht ze spæte:

Verse: 19    wir suln ze velde gâhen,
Verse: 20    dâ sult ir künste nâhen.

Verse: 21    brinct im sîn ors und mir daz mîn
Verse: 22    und ieslîchem ritterz sîn.

Verse: 23    juncherren suln ouch dar komen,
Verse: 24    der ieslîcher habe genomen

Verse: 25    einen starken schaft und bringe in dar,
Verse: 26    der nâch der niuwe sî gevar."

Verse: 27    sus kom der vürste ûf den plân.
Verse: 28    dâ wart mit rîten kunst getân:

Verse: 29    sînem gaste er râten gap,
Verse: 30    wie erz ors ûz dem walap




Chapter: 174 
174


Verse: 1    mit sporn gruozes pîne,
Verse: 2    mit schenkel vliegens schîne

Verse: 3    ûf den poinder solde wenken
Verse: 4    und den schaft ze rehte senken

Verse: 5    und den schilt gein tjoste vür sich nemen.
Verse: 6    er sprach: "des lâzet iuch gezemen."

Verse: 7    unvuoge er im sus werte
Verse: 8    baz denne ein swankel gerte

Verse: 9    diu argen kinden brichet vel.
Verse: 10    dô hiez er komen ritter snel

Verse: 11    gein im durch tjostieren.
Verse: 12    er begunde in kondewieren

Verse: 13    einem zegegen an den rinc.
Verse: 14    dô brâhte der jungelinc

Verse: 15    sîn êrsten tjost durch einen schilt,
Verse: 16    des von in allen wart bevilt

Verse: 17    und daz er hinderz ors verswanc
Verse: 18    einen starken ritter niht ze kranc.

Verse: 19    ein ander tjostiur was komen:
Verse: 20    dô hete ouch Parzivâl genomen

Verse: 21    einen starken niuwen schaft,
Verse: 22    sîn jugent hete ellen unde kraft.

Verse: 23    der junge süeze âne bart,
Verse: 24    den twanc diu Gahmuretes art

Verse: 25    und angeborniu manheit,
Verse: 26    daz ors von rabîne er reit

Verse: 27    mit volleclîcher hurte dar.
Verse: 28    er nam der vier nagel war:

Verse: 29    des wirtes ritter niht gesaz,
Verse: 30    al vallende er den acker maz.




Chapter: 175 
175


Verse: 1    dô muosten kleiniu stückelîn
Verse: 2    aldâ von trunzûnen sîn.

Verse: 3    sus stach er ir vünve nider.
Verse: 4    der wirt in nam und vuorte in wider:

Verse: 5    aldâ behielt er schimphes prîs.
Verse: 6    er wart ouch sît an strîte wîs.

Verse: 7    die sîn rîten gesâhen,
Verse: 8    al die wîsen im des jâhen,

Verse: 9    dâ vüere kunst und ellen bî.
Verse: 10    "nû wirt mîn herre jâmers vrî:

Verse: 11    sich mac nû jungen wol sîn leben,
Verse: 12    er sol im ze wîbe geben

Verse: 13    sîne tohter, unser vrouwen.
Verse: 14    ob wir in bî witzen schouwen,

Verse: 15    sô lischet im sîn jâmers nôt:
Verse: 16    vür sîner drîer süne tôt

Verse: 17    ist im ein gelt ze hûs geriten.
Verse: 18    nû hât in sælde niht vermiten."

Verse: 19    sus kom der vürste sâbents în.
Verse: 20    der tisch gedecket muoste sîn:

Verse: 21    sîne tohter bat er komen
Verse: 22    ze tische, alsus hân ichz vernomen,

Verse: 23    dô er die maget komen sach,
Verse: 24    nû hœret wie der wirt sprach

Verse: 25    zuo der schœnen Lîâzen:
Verse: 26    "dû solt dich küssen lâzen

Verse: 27    disen ritter, biut im êre:
Verse: 28    er vert mit sælden lêre.

Verse: 29    ouch solde an iuch gedinget sîn,
Verse: 30    daz ir der megede ir vingerlîn




Chapter: 176 
176


Verse: 1    liezet, ob siz möhte hân.
Verse: 2    nû enhât sis niht noch vürspan:

Verse: 3    wer gæbe ir solhen volleist
Verse: 4    sô der vrouwen in dem fôreist?

Verse: 5    diu hete etswenne von dem si emphienc
Verse: 6    daz iu zemphâhen sît ergienc.

Verse: 7    ir muget Lîâzen niht genemen."
Verse: 8    der gast begunde sich des schemen,

Verse: 9    iedoch kuste er si an den munt,
Verse: 10    dem was wol viurs varwe kunt.

Verse: 11    Lîâzen lîp was minneclîch,
Verse: 12    dar zuo der wâren kiusche rîch.

Verse: 13    der tisch was nider unde lanc.
Verse: 14    der wirt mit niemen sich dâ dranc:

Verse: 15    er saz al eine an den ort.
Verse: 16    sînen gast hiez er sitzen dort

Verse: 17    zwischen im und sînem kinde.
Verse: 18    ir blanken hende linde

Verse: 19    muosten snîden, sô der wirt gebôt,
Verse: 20    den man dâ hiez der ritter rôt,

Verse: 21    swaz der essen wolde.
Verse: 22    niemen si wenden solde,

Verse: 23    si engebârten heimlîche.
Verse: 24    diu maget mit zühten rîche

Verse: 25    leiste ir vater willen gar.
Verse: 26    si und der gast wâren wol gevar.

Verse: 27    dar nâch schier gienc diu maget wider.
Verse: 28    sus phlac man des heldes sider

Verse: 29    unz an den vierzehenden tac.
Verse: 30    bî sînem herzen kumber lac




Chapter: 177 
177


Verse: 1    anders niht wan umbe daz:
Verse: 2    er wolde ê gestrîten baz,

Verse: 3    ê daz er dar an würde warm
Verse: 4    daz man dâ heizet vrouwen arm.

Verse: 5    in dûhte, wert gedinge
Verse: 6    daz wære ein hôhiu linge

Verse: 7    ze disem lîbe hie und dort.
Verse: 8    daz sint noch ungelogeniu wort.

Verse: 9    eins morgens urloubes er bat.
Verse: 10    dô rûmde er Grâharz die stat,

Verse: 11    der wirt mit im ze velde reit.
Verse: 12    dô huop sich niuwez herzenleit.

Verse: 13    dô sprach der vürste ûz triuwe erkorn:
Verse: 14    "ir sît mît vierder sun verlorn.

Verse: 15    jâ wânde ich ergetzet wære
Verse: 16    drîer jæmerlîchen mære.

Verse: 17    der wâren dennoch niht wan driu:
Verse: 18    der nû mîn herze envieriu

Verse: 19    mit sîner hende slüege
Verse: 20    und ieslîchez stücke trüege,

Verse: 21    daz diuhte mich ein grôz gewin,
Verse: 22    einz vür iuch (ir rîtet hin),

Verse: 23    diu driu vür mîniu werden kint
Verse: 24    diu ellent haft erstorben sint.

Verse: 25    sus lônt iedoch diu ritterschaft:
Verse: 26    ir zagel ist jâmerstricke haft.

Verse: 27    ein tôt mich lemt an vreuden gar,
Verse: 28    mînes sunes wol gevar,

Verse: 29    der was geheizen Schenteflûrs.
Verse: 30    dâ Condwîrâmûrs




Chapter: 178 
178


Verse: 1    lîp und ir lant niht wolde geben,
Verse: 2    in ir helfe er verlôs sîn leben

Verse: 3    von Clâmidê und von Kingrûn.
Verse: 4    des ist mir dürkel als ein zûn

Verse: 5    mîn herze von jâmers sniten.
Verse: 6    nû sît ir alze vruo geriten

Verse: 7    von mir trôstelôsem man.
Verse: 8    ouwê daz ich niht sterben kan,

Verse: 9    sît Lîâze diu schœne maget
Verse: 10    und ouch mîn lant iu niht behaget.

Verse: 11    mîn ander sun hiez cuns Lascoit:
Verse: 12    den sluoc mir îdêr fil Noit

Verse: 13    umbe einen sparwære.
Verse: 14    des stên ich vreuden lære.

Verse: 15    mîn dritter sun hiez Gurzgrî:
Verse: 16    dem reit Mahaute bî

Verse: 17    mit ir schœnem lîbe,
Verse: 18    wan si gap im ze wîbe

Verse: 19    ir stolzer bruoder Ehkunat.
Verse: 20    gein Brandigân der houbetstat

Verse: 21    kom er nâch Schoidelakurt geriten.
Verse: 22    dâ wart sîn sterben niht vermiten:

Verse: 23    dâ sluoc in Mabonagrîn.
Verse: 24    des verlôs Mahaute ir liehten schîn

Verse: 25    und lac mîn wîp, sîn muoter, tôt.
Verse: 26    grôz jâmer irz nâch im gebôt."

Verse: 27    der gast nam swirtes jâmer war,
Verse: 28    wande erz im underschiet sô gar.

Verse: 29    dô sprach er: "herre, ich enbin niht wîs:
Verse: 30    bezal aber ich immer ritters prîs,




Chapter: 179 
179


Verse: 1    sô daz ich wol mac minne gern,
Verse: 2    ir sult mich Lîâzen wern,

Verse: 3    iuwer tohter, der schœnen maget.
Verse: 4    ir habet mir alze vil geklaget:

Verse: 5    mac ich iu jâmer denne entsagen,
Verse: 6    des lâze ich iuch sô vil niht tragen."

Verse: 7    urloup nam der junge man
Verse: 8    von dem getriuwen vürsten sân

Verse: 9    und zal der massenîe.
Verse: 10    des vürsten jâmers drîe

Verse: 11    was riuwec an daz quater komen,
Verse: 12    die vierden vlust hete er genomen.

Verse: 13    Dannen schiet sus Parzivâl.
Verse: 14    ritters site und ritters mâl

Verse: 15    sîn lîp mit zühten vuorte,
Verse: 16    ouwê wan daz in ruorte

Verse: 17    manec unsüeziu strenge.
Verse: 18    im was diu wîte ze enge

Verse: 19    und ouch diu breite gar ze smal,
Verse: 20    elliu grüene in dûhte val,

Verse: 21    sîn rôt harnas in dûhte blanc:
Verse: 22    sîn herze diu ougen des betwanc,

Verse: 23    sît er tumpheit âne wart.
Verse: 24    dô enwolde in Gahmuretes art

Verse: 25    denkens niht erlâzen
Verse: 26    nâch der schœnen Lîâzen,

Verse: 27    der megede sælden rîche,
Verse: 28    diu im geselleclîche

Verse: 29    sunder minne bôt êre.
Verse: 30    swar sîn ors nû kêre,




Chapter: 180 
180


Verse: 1    er enmacz vor jâmer niht enthaben,
Verse: 2    ez welle springen oder draben.

Verse: 3    kriuze unde stûden stric,
Verse: 4    dar zuo der wagenleisen bic

Verse: 5    sîne waltstrâzen meit:
Verse: 6    vil ungevertes er dô reit,

Verse: 7    dâ wênec wegerîches stuont.
Verse: 8    tal und berc wâren im unkunt.

Verse: 9    genuoge hânt des einen site
Verse: 10    und sprechent sus, swer irre rite

Verse: 11    daz der den slegel vünde:
Verse: 12    slegels urkünde

Verse: 13    lac dâ âne mâze vil,
Verse: 14    suln grôze ronen sîn slegels zil.

Verse: 15    doch reit er wênec irre,
Verse: 16    wan die slihte an der virre

Verse: 17    kom er des tages von Grâharz
Verse: 18    in daz künecrîche ze Brôbarz

Verse: 19    durch wilde gebirge hôch.
Verse: 20    der tac gein dem âbende zôch,

Verse: 21    dô kom er an ein wazzer snel,
Verse: 22    daz was von sînem duzze hel,

Verse: 23    ez gâben die velse ein ander.
Verse: 24    daz reit er nider, dô vander

Verse: 25    die stat ze Pelrapeire.
Verse: 26    der künec Tampenteire

Verse: 27    hete si gerbet ûf sîn kint,
Verse: 28    bî der vil liute in kumber sint.

Verse: 29    daz wazzer vuor nâch bolze siten,
Verse: 30    die wol gevidert und gesniten




Chapter: 181 
181


Verse: 1    sint, sô si armbrustes span
Verse: 2    mit senewen swanke trîbet dan.

Verse: 3    dar über gienc ein brücken slac,
Verse: 4    dâ manec hurt ûfe lac.

Verse: 5    ez vlôz aldâ rehte inz mer.
Verse: 6    Pelrapeire stuont wol ze wer.

Verse: 7    seht wie kint ûf schocken varn,
Verse: 8    die man schockes niht wil sparn,

Verse: 9    sus vuor diu brücke âne seil:
Verse: 10    diu was vor jugende niht sô geil.

Verse: 11    dort anderhalben stuonden
Verse: 12    mit helmen ûf gebunden

Verse: 13    sehzec ritter oder mêr.
Verse: 14    die riefen alle: "kêrâ kêr!"

Verse: 15    mit ûf geworfen swerten:
Verse: 16    die kranken strîtes gerten.

Verse: 17    durch daz si in dicke sâhen ê,
Verse: 18    si wânden ez wære Clâmidê,

Verse: 19    wande er sô küneclîchen reit
Verse: 20    gein der brücke ûf dem velde breit.

Verse: 21    dô sin disen jungen man
Verse: 22    sus mit schalle riefen an,

Verse: 23    swie vil erz ors mit sporn versneit,
Verse: 24    durch vorhte ez doch die brücken meit.

Verse: 25    den rehtiu zageheit ie vlôch,
Verse: 26    der erbeizte nider unde zôch

Verse: 27    sîn ors ûf der brücken swanc.
Verse: 28    eins zagen muot wære alze kranc,

Verse: 29    solde er gein solhem strîte varn.
Verse: 30    dar zuo muoste er ein dinc bewarn,




Chapter: 182 
182


Verse: 1    wande er vorhte sorses val.
Verse: 2    dô lasch ouch anderhalp der schal.

Verse: 3    die ritter truogen wider în
Verse: 4    helme, schilde, ir swerte schîn

Verse: 5    und sluzzen zuo ir porten:
Verse: 6    grœzer her si vorhten.

Verse: 7    sus zôch hin über Parzival
Verse: 8    und kom geriten an ein wal,

Verse: 9    dâ maneger sînen tôt erkôs,
Verse: 10    der durch ritters prîs den lîp verlôs

Verse: 11    vor der porte gein dem palas,
Verse: 12    der hôch und wol gehêret was.

Verse: 13    einen rinc er an der porte vant,
Verse: 14    den ruorte er vaste mit der hant:

Verse: 15    sîns rüefens nam dâ niemen war,
Verse: 16    wan ein juncvrouwe wol gevar.

Verse: 17    ûz einem venster sach diu maget
Verse: 18    den helt halden unverzaget.

Verse: 19    diu schœne zühte rîche
Verse: 20    sprach: "sît ir vîentlîche

Verse: 21    her komen, herre, dast âne nôt.
Verse: 22    âne iuch man uns vil hazzens bôt

Verse: 23    von dem lande und ûf dem mer,
Verse: 24    zornec und ellenthaftez her."

Verse: 25    dô sprach er: "vrouwe, hie habet ein man,
Verse: 26    der iu dienet. ob ich kan

Verse: 27    (iuwer gruoz sol sîn mîn solt),
Verse: 28    ich bin iu dienestlîchen holt."

Verse: 29    dô gienc diu maget mit sinne
Verse: 30    vür die küneginne




Chapter: 183 
183


Verse: 1    und half im daz er kom dar în,
Verse: 2    daz in sît wande hôhen pîn.

Verse: 3    sus wart er în verlâzen.
Verse: 4    iewederthalp der strâzen

Verse: 5    stuont von bovel ein grôziu schar.
Verse: 6    die werlîche kômen dar,

Verse: 7    slingære und patelierre,
Verse: 8    der was ein langiu virre

Verse: 9    und arger schützen harte vil.
Verse: 10    er kôs ouch an dem selben zil

Verse: 11    vil küener sarjande,
Verse: 12    der besten von dem lande,

Verse: 13    mit langen starken lanzen
Verse: 14    scharphen unde ganzen,

Verse: 15    als ichz mære han vernomen hân.
Verse: 16    dâ stuont ouch manec koufman

Verse: 17    mit hâschen und mit gabilôt,
Verse: 18    als in ir meisterschaft gebôt:

Verse: 19    die truogen alle slachen balc.
Verse: 20    der küneginne marschalc

Verse: 21    muoste in durch si leiten
Verse: 22    ûf den hof mit arbeiten.

Verse: 23    der was gein wer berâten:
Verse: 24    türne ob den kemenâten,

Verse: 25    wîchûs, bervrit, erkêr,
Verse: 26    der stuont dâ sicherlîchen mêr

Verse: 27    denne er dâ vor gesæhe ie.
Verse: 28    dô kômen allenthalben hie

Verse: 29    ritter die in emphiengen.
Verse: 30    die riten unde giengen:




Chapter: 184 
184


Verse: 1    ouch was diu jæmerlîche schar
Verse: 2    elliu nâch aschen var

Verse: 3    oder alsô valwer leim.
Verse: 4    mîn herre der grâve von Wertheim

Verse: 5    wære ungerne soldier dâ gewesen:
Verse: 6    er möhte ir soldes niht genesen.

Verse: 7    der zadel vuocte in hungers nôt:
Verse: 8    si enheten kæse, vleisch noch brôt.

Verse: 9    [si liezen zenstüren sîn
Verse: 10    und smalzten ouch deheinen wîn

Verse: 11    mit ir munde, sô si trunken.
Verse: 12    die wambe in nider sunken.

Verse: 13    ir hüffe hôch unde mager,
Verse: 14    gerumphen als ein Ungers zager

Verse: 15    was in diu hût zuo den riben:
Verse: 16    der hunger hete inz vleisch vertriben,

Verse: 17    den muosten si durch zadel doln.
Verse: 18    in trouf vil wênec in die koln.]

Verse: 19    des twanc si ein werder man,
Verse: 20    der stolze künec von Brandigân:

Verse: 21    [si arnden Clâmidês bete.
Verse: 22    sich vergôz dâ selten mit dem mete

Verse: 23    der zuber oder diu kanne.
Verse: 24    ein Trühendingære phanne

Verse: 25    mit kraphen selten dâ erschrei:
Verse: 26    in was der selbe dôn enzwei.]

Verse: 27    wolde ich nû daz wîzen in,
Verse: 28    sô hete ich harte kranken sin.

Verse: 29    wan dâ ich dicke bin erbeizet
Verse: 30    und dâ man mich herre heizet,




Chapter: 185 
185


Verse: 1    dâ heime in mîn selbes hûs,
Verse: 2    dâ wirt gevreut vil selten mûs,

Verse: 3    wan diu müeste ir spîse steln.
Verse: 4    die dörfte niemen vor mir heln:

Verse: 5    ich envinde ir offenlîche niht.
Verse: 6    alze dicke daz geschiht

Verse: 7    mir Wolfram von Eschenbach,
Verse: 8    daz ich dolde alsolh gemach.

Verse: 9    mîner klage ist vil vernomen:
Verse: 10    nû sol diz mære wider komen,

Verse: 11    wie Pelrapeire stuont jâmers vol.
Verse: 12    dâ gap diu diet von vreuden zol,

Verse: 13    die helde triuwen rîche
Verse: 14    lebeten kumberlîche:

Verse: 15    ir wâriu manheit daz gebôt.
Verse: 16    nû lât erbarmen iuch ir nôt:

Verse: 17    [ir lîp ist nû benennet phant,
Verse: 18    si enlœse drûz diu hœste hant.]

Verse: 19    nû hœrt mêre von den armen,
Verse: 20    die solden iuch erbarmen.

Verse: 21    si emphiengen schemlîche
Verse: 22    ir gast ellens rîche.

Verse: 23    der dûhte si anders wol sô wert,
Verse: 24    daz er niht dörfte hân gegert

Verse: 25    ir herberge als ez in stuont:
Verse: 26    ir grôziu nôt was im unkunt.

Verse: 27    man legete einen teppech ûf daz gras,
Verse: 28    dâ vermûret und geleitet was

Verse: 29    durch den schaten ein linde.
Verse: 30    dô entwâpende inz gesinde.




Chapter: 186 
186


Verse: 1    er was in ungelîche var:
Verse: 2    dô er den râm von im sô gar

Verse: 3    getwuoc mit einem brunnen,
Verse: 4    dô hete er der sunnen

Verse: 5    verdecket vil nâch ir liehten glast.
Verse: 6    des dûhte er si ein werder gast.

Verse: 7    man bôt im einen mantel sân,
Verse: 8    gelîch alsô der roc getân,

Verse: 9    der ê des an dem helde lac:
Verse: 10    des zobel gap wilden niuwen smac.

Verse: 11    si sprâchen: "welt ir schouwen
Verse: 12    die künegîn, unser vrouwen?"

Verse: 13    dô jach der helt stæte
Verse: 14    daz er daz gerne tæte:

Verse: 15    si giengen gein einem palas,
Verse: 16    dâ hôch hin ûf gegrêdet was.

Verse: 17    ein minneclîch antlitzes schîn,
Verse: 18    dar zuo der ougen süeze sîn,

Verse: 19    von der küneginne gienc
Verse: 20    ein liehter glast, ê si in emphienc.

Verse: 21    von Katelangen Kîôt
Verse: 22    und der werde Manphiliôt

Verse: 23    (herzogen beide wâren die),
Verse: 24    ir bruoder kint si brâhten hie,

Verse: 25    des landes küneginne.
Verse: 26    durch die gotes minne

Verse: 27    heten si ûf gegeben ir swert.
Verse: 28    dâ giengen die vürsten wert

Verse: 29    grâ unde wol gevar,
Verse: 30    mit grôzer zuht si brâhten dar




Chapter: 187 
187


Verse: 1    die vrouwen mitten an die stegen:
Verse: 2    dâ kuste si den werden degen,

Verse: 3    die munde wâren beide rôt.
Verse: 4    diu künegîn ir hant im bôt,

Verse: 5    Parzivâlen si vuorte wider,
Verse: 6    aldâ si sâzen beidiu nider.

Verse: 7    vrouwen unde ritterschaft
Verse: 8    heten alle swache kraft:

Verse: 9    die dâ stuonden unde sâzen,
Verse: 10    si heten vreude lâzen,

Verse: 11    daz gesinde und diu wirtîn.
Verse: 12    Condwîrâmûrs ir schîn

Verse: 13    doch schiet von disen strîten:
Verse: 14    Jeschûten, ênîten

Verse: 15    und Cunnewâren de Lalant
Verse: 16    und swâ man lobes die besten vant,

Verse: 17    dâ man vrouwen schœne gewuoc,
Verse: 18    ir glastes schîn vaste under sluoc

Verse: 19    und beider îsalden.
Verse: 20    jâ muoste prîses walden

Verse: 21    Condwîrâmûrs.
Verse: 22    diu truoc den rehten bêâ curs:

Verse: 23    der name ist tiuschen schœner lîp.
Verse: 24    ez wâren wol nütziu wîp,

Verse: 25    die disiu zwei gebâren,
Verse: 26    diu dâ bî ein ander wâren.

Verse: 27    dô schuof wîp unde man
Verse: 28    niht mêre wan daz si sâhen an

Verse: 29    diu zwei bî ein ander.
Verse: 30    guote vriunt dâ vander.




Chapter: 188 
188


Verse: 1    der gast gedâhte, ich sage iu wie:
Verse: 2    "Lîâze ist dort, Lîâze ist hie.

Verse: 3    mir wil got sorge mâzen:
Verse: 4    nû sihe ich Lîâzen,

Verse: 5    des werden Gurnemanzes kint."
Verse: 6    Lîâzen schœne was ein wint

Verse: 7    gein der megede diu hie saz
Verse: 8    (an der got wunsches niht vergaz,

Verse: 9    diu was des landes vrouwe),
Verse: 10    als von dem süezen touwe

Verse: 11    diu rôse ûz ir belgelîn
Verse: 12    blecket niuwen werden schîn,

Verse: 13    der beidiu wîz ist unde rôt.
Verse: 14    daz vuocte ir gaste grôze nôt.

Verse: 15    sîn manlîch zuht was im sô ganz,
Verse: 16    sît in der werde Gurnemanz

Verse: 17    von sîner tumpheit geschiet
Verse: 18    und im vrâgen widerriet,

Verse: 19    ez enwære bescheidenlîche,
Verse: 20    bî der küneginne rîche

Verse: 21    saz sîn munt gar âne wort,
Verse: 22    nâhe aldâ, niht verre dort.

Verse: 23    maneger kan noch rede sparn,
Verse: 24    der mêr gein vrouwen ist gevarn.

Verse: 25    diu küneginne gedâhte sân:
Verse: 26    "ich wæne, mich smæhet dirre man

Verse: 27    durch daz mîn lîp vertwâlet ist.
Verse: 28    nein, er tuotz durch einen list:

Verse: 29    erst gast, ich bin wirtîn.
Verse: 30    diu êrste rede wære mîn.




Chapter: 189 
189


Verse: 1    dar nâch er güetlîche an mich sach,
Verse: 2    sît uns ze sitzen hie geschach:

Verse: 3    er hât sich zuht gein mir enbart.
Verse: 4    mîn rede ist alze vil gespart,

Verse: 5    hie ensol niht mêr geswigen sîn."
Verse: 6    zir gaste sprach diu künegîn:

Verse: 7    "herre, ein wirtîn reden muoz.
Verse: 8    ein kus erwarp mir iuwern gruoz,

Verse: 9    ouch butet ir dienest dâ her în
Verse: 10    (sus sagete ein juncvrouwe mîn):

Verse: 11    des hânt uns geste niht gewent,
Verse: 12    des hât mîn herze sich gesent.

Verse: 13    herre, ich vrâge iuch mære,
Verse: 14    wannen iuwer reise wære."

Verse: 15    "vrouwe, ich reit bî disem tage
Verse: 16    von einem man, den ich in klage

Verse: 17    liez mit triuwen âne schranz.
Verse: 18    der vürste heizet Gurnemanz,

Verse: 19    von Grâharz ist er genant.
Verse: 20    dannen reit ich hiute in ditze lant."

Verse: 21    alsus sprach diu werde maget:
Verse: 22    "hetez anders iemen mir gesaget,

Verse: 23    der volge würde im niht verjehen,
Verse: 24    daz ez eines tages wære geschehen:

Verse: 25    wan swelh mîn bote ie baldest reit,
Verse: 26    die reise er zwêne tage vermeit.

Verse: 27    sîn swester was diu muoter mîn,
Verse: 28    iuwers wirtes. sîner tohter schîn

Verse: 29    sich ouch vor jâmer krenken mac.
Verse: 30    wir haben manegen sûren tac




Chapter: 190 
190


Verse: 1    mit nazzen ougen verklaget,
Verse: 2    ich und Lîâze diu maget.

Verse: 3    sît ir iuwerm wirte holt,
Verse: 4    sô nemetz hînte als wirz gedolt

Verse: 5    hie lange hân, wîp und man:
Verse: 6    ein teil ir dienet im dar an.

Verse: 7    ich wil iu unsern kumber sagen:
Verse: 8    wir müezen strengen zadel tragen."

Verse: 9    dô sprach ir veter Kîôt:
Verse: 10    "vrouwe, ich sende iu zwelf brôt,

Verse: 11    schultern unde hammen drî,
Verse: 12    dâ ligent ehte kæse bî,

Verse: 13    und zwei buzzel mit wîn.
Verse: 14    iuch sol ouch der bruoder mîn

Verse: 15    hînte stiuren, des ist nôt."
Verse: 16    dô sprach Manphiliôt:

Verse: 17    "vrouwe, ich sende iu alsô vil."
Verse: 18    dô saz diu maget an vreuden zil,

Verse: 19    ir grôzer danc wart niht vermiten.
Verse: 20    si nâmen urloup unde riten

Verse: 21    dâ bî zir weidehûsen.
Verse: 22    zer wilden albe klûsen

Verse: 23    die alden sâzen sunder wer:
Verse: 24    si heten ouch vride von dem her.

Verse: 25    ir bote wider kom gedrabet:
Verse: 26    des wart diu kranke diet gelabet.

Verse: 27    dô was der burgære nar
Verse: 28    gedigen an dise spîse gar.

Verse: 29    ir was vor hunger maneger tôt,
Verse: 30    ê daz in dar kœme ditze brôt.




Chapter: 191 
191


Verse: 1    teilenz hiez diu künegîn,
Verse: 2    dar zuo die kæse, daz vleisch, den wîn

Verse: 3    dirre kreftelôsen diet.
Verse: 4    Parzivâl ir gast daz riet:

Verse: 5    des beleip in zwein vil kûme ein snite,
Verse: 6    die teilden si âne bâgens site.

Verse: 7    diu wirtschaft was ouch verzert,
Verse: 8    dâ mite maneges tôt erwert,

Verse: 9    den der hunger leben liez.
Verse: 10    dem gaste man dô betten hiez

Verse: 11    sanfte, des ich wænen wil.
Verse: 12    wæren die burgære vederspil,

Verse: 13    si enwæren überkrüphet niht,
Verse: 14    des noch ir tischgerihte giht.

Verse: 15    si truogen alle hungers mâl,
Verse: 16    wan der junge Parzivâl.

Verse: 17    der nam slâfes urloup.
Verse: 18    ob sîne kerzen wæren schoup?

Verse: 19    nein, si wâren bezzer gar.
Verse: 20    dô gienc der junge wol gevar

Verse: 21    an ein bette rîche
Verse: 22    gehêret küneclîche,

Verse: 23    niht nâch armüete kür.
Verse: 24    ein teppech was geleget dâ vür.

Verse: 25    er bat die ritter wider gên,
Verse: 26    die enliez er dâ niht langer stên.

Verse: 27    kint im entschuohten, sân er slief,
Verse: 28    unz im der wâre jâmer rief

Verse: 29    und liehter ougen herzen regen.
Verse: 30    die wacten schiere den werden degen.




Chapter: 192 
192


Verse: 1    daz kom als ich iu sagen wil.
Verse: 2    ez brach niht wîplîchiu zil:

Verse: 3    mit stæte kiusche truoc diu maget.
Verse: 4    von der ein teil hie wirt gesaget,

Verse: 5    die twanc urliuges nôt
Verse: 6    und lieber helfære tôt

Verse: 7    ir herze an solhez krachen,
Verse: 8    daz ir ougen muosten wachen.

Verse: 9    dô gienc diu küneginne,
Verse: 10    niht nâch solher minne

Verse: 11    diu solhen namen reizet
Verse: 12    der megede wîp heizet:

Verse: 13    si suochte helfe und vriundes rât.
Verse: 14    an ir was werlîchiu wât,

Verse: 15    ein hemde wîz sîdîn:
Verse: 16    waz möhte kamphlîcher sîn

Verse: 17    dan gein dem man sus komende ein wîp?
Verse: 18    ouch swanc diu vrouwe umbe ir lîp

Verse: 19    von samît einen mantel lanc.
Verse: 20    si gienc als si der kumber twanc.

Verse: 21    juncvrouwen, kamerære,
Verse: 22    swaz der dâ bî ir wære,

Verse: 23    die liez si slâfen über al.
Verse: 24    dô sleich si lîse âne allen schal

Verse: 25    in eine kemenâten.
Verse: 26    daz schuofen diez dâ tâten,

Verse: 27    daz Parzivâl al eine lac.
Verse: 28    von kerzen lieht sô der tac

Verse: 29    was vor sîner slâfstat.
Verse: 30    gein sînem bette gienc ir phat,




Chapter: 193 
193


Verse: 1    ûf den teppech kniete si vür in.
Verse: 2    si heten beidiu kranken sin,

Verse: 3    er und diu küneginne,
Verse: 4    an bî ligender minne.

Verse: 5    hie wart alsus geworben:
Verse: 6    an vreuden verdorben

Verse: 7    was diu maget, des twanc si scheme.
Verse: 8    ob er si hin an iht neme?

Verse: 9    leider des enkan er niht.
Verse: 10    âne kunst ez doch geschiht,

Verse: 11    mit einem alsô bewanden vride,
Verse: 12    daz si diu sünebæren lide

Verse: 13    niht zuo ein ander brâhten.
Verse: 14    wênec si des gedâhten.

Verse: 15    der megede jâmer was sô grôz,
Verse: 16    vil zeher von ir ougen vlôz

Verse: 17    ûf den jungen Parzival.
Verse: 18    der erhôrte ir weinens solhen schal,

Verse: 19    daz er si wachende an gesach.
Verse: 20    leide und liebe im dran geschach.

Verse: 21    ûf rihte sich der junge man,
Verse: 22    zer küneginne sprach er sân:

Verse: 23    "vrouwe, bin ich iuwer spot?
Verse: 24    ir soldet knien alsus vür got:

Verse: 25    geruochet sitzen zuo mir her"
Verse: 26    (daz was sîn bete und sîn ger)

Verse: 27    "oder leget iuch hie aldâ ich lac.
Verse: 28    lât mich belîben swâ ich mac."

Verse: 29    si sprach: "welt ir iuch êren,
Verse: 30    solhe mâze gein mir kêren




Chapter: 194 
194


Verse: 1    daz ir mit mir ringet niht,
Verse: 2    mîn ligen aldâ bî iu geschiht."

Verse: 3    des wart ein vride von im getân:
Verse: 4    si smouc sich an daz bette sân.

Verse: 5    es was dennoch sô spæte,
Verse: 6    daz ninder huon dâ kræte:

Verse: 7    hanboume stuonden dâ blôz,
Verse: 8    der zadel hüener von in schôz.

Verse: 9    diu vrouwe jâmers rîche
Verse: 10    vrâcte in zühteclîche,

Verse: 11    ob er hœren wolde ir klage.
Verse: 12    si sprach: "ich vürhte, ob ichz iu sage,

Verse: 13    ez wende iu slâf: daz tuot iu wê.
Verse: 14    mir hât der künec Clâmidê

Verse: 15    und Kingrûn sîn seneschalt
Verse: 16    verwüestet bürge unde lant

Verse: 17    unz an Pelrapeire.
Verse: 18    mîn vater Tampenteire

Verse: 19    liez mich armen weisen
Verse: 20    in vorhteclîchen vreisen.

Verse: 21    mâge, vürsten unde man,
Verse: 22    rîche und arme (undertân

Verse: 23    was mir grôz ellenthaftez her),
Verse: 24    die sint erstorben an der wer

Verse: 25    halp oderz merre teil.
Verse: 26    wes möhte ich armiu wesen geil?

Verse: 27    nûst ez mir komen ûf daz zil,
Verse: 28    daz ich mich selben tœten wil,

Verse: 29    ê daz ich magetuom und lîp
Verse: 30    gæbe und Clâmidês wîp




Chapter: 195 
195


Verse: 1    würde, wan sîn hant mir sluoc
Verse: 2    Schenteflûren, des herze truoc

Verse: 3    manegen ritterlîchen prîs.
Verse: 4    er mannes schœne ein blüende rîs,

Verse: 5    er kunde valscheit mâzen,
Verse: 6    der bruoder Lîâzen."

Verse: 7    dô Lîâze wart genant,
Verse: 8    nâch ir vil kumbers was gemant

Verse: 9    der dienest gebende Parzival.
Verse: 10    sîn hôher muot kom in ein tal:

Verse: 11    daz riet Lîâzen minne.
Verse: 12    er sprach zer küneginne:

Verse: 13    "vrouwe, hilfet iuch iemens trôst?"
Verse: 14    "jâ, herre, ob ich würde erlôst

Verse: 15    von Kingrûne seneschalt.
Verse: 16    ze rehter tjost hât er gevalt

Verse: 17    mir vil manegen ritte nider.
Verse: 18    der kumt morgen dâ her wider

Verse: 19    und wænet daz der herre sîn
Verse: 20    sül ligen an dem arme mîn.

Verse: 21    ir sâhet wol mînen palas,
Verse: 22    der ninder sô gehœhet was,

Verse: 23    ich enviele ê nider in den graben,
Verse: 24    ê Clâmidê solde haben

Verse: 25    mit gewalt mînen magetuom.
Verse: 26    sus wolde ich wenden sînen ruom.

Verse: 27    dô sprach er: "vrouwe, ist Kingrûn
Verse: 28    Franzois oder Bertûn

Verse: 29    oder von swelhem lande er vert,
Verse: 30    mit mîner hant ir sît gewert




Chapter: 196 
196


Verse: 1    alz ez mîn lîp volbringen mac."
Verse: 2    diu naht hete ende und kom der tac:

Verse: 3    diu vrouwe stuont ûf und neic,
Verse: 4    ir grôzen danc si niht versweic.

Verse: 5    dô sleich si wider lîse:
Verse: 6    niemen was dâ sô wîse,

Verse: 7    der würde ir gêns dâ gewar,
Verse: 8    wan Parzivâl der lieht gevar.

Verse: 9    der slief niht langer dô dâ nâch.
Verse: 10    der sunnen was gein der hœhe gâch,

Verse: 11    ir glesten durch die wolken dranc.
Verse: 12    dô erhôrte er maneger glocken klanc:

Verse: 13    kirchen, münster suochte diu diet
Verse: 14    die Clâmidê von vreuden schiet.

Verse: 15    ûf rihte sich der junge man.
Verse: 16    der küneginne kappelân

Verse: 17    sanc gote und sîner vrouwen.
Verse: 18    ir gast si muoste schouwen,

Verse: 19    unz daz der bendiz geschach.
Verse: 20    nâch sînem harnas er sprach:

Verse: 21    dâ wart er wol gewâpent în.
Verse: 22    er tet ouch ritters ellen schîn

Verse: 23    mit rehter manlîcher wer.
Verse: 24    dô kom Clâmidês her

Verse: 25    mit maneger baniere.
Verse: 26    Kingrûn kom schiere

Verse: 27    vor den andern verre
Verse: 28    ûf einem orse von îserterre.

Verse: 29    als irz mære hânt vernomen,
Verse: 30    dô was ouch vür die porten komen




Chapter: 197 
197


Verse: 1    fil li roi Gahmuret.
Verse: 2    der hete der burgære gebet,

Verse: 3    diz was sîn êrste swertes strît.
Verse: 4    er nam den poinder wol sô wît,

Verse: 5    daz von sîner tjoste hurt
Verse: 6    beiden orsen wart engurt.

Verse: 7    darmgürteln brâsten: umbe daz
Verse: 8    ieweders ors ûf hehsen saz.

Verse: 9    die ê des ûf in sâzen,
Verse: 10    ir swert si niht vergâzen:

Verse: 11    in den scheiden si die vunden.
Verse: 12    Kingrûn truoc wunden

Verse: 13    durch den arm und in die brust.
Verse: 14    disiu tjost in lêrte vlust

Verse: 15    an solhem prîse, des er phlac
Verse: 16    unz an sîn hôchvart swindens tac.

Verse: 17    solh ellen was ûf in gezalt,
Verse: 18    sehs ritter solde er hân gevalt,

Verse: 19    die gein im kœmen ûf ein velt.
Verse: 20    Parzivâl im brâhte gelt

Verse: 21    mit sîner ellenthaften hant,
Verse: 22    daz Kingrûn seneschalt

Verse: 23    wânde vremder mære,
Verse: 24    wie ein pheterære

Verse: 25    mit würfen an in seicte.
Verse: 26    ander strît in neicte:

Verse: 27    ein swert im durch den helm erklanc.
Verse: 28    Parzivâl in nider swanc,

Verse: 29    er sazte im an die brust ein knie.
Verse: 30    er bôt daz wart geboten nie




Chapter: 198 
198


Verse: 1    deheinem man, sîn sicherheit.
Verse: 2    ir enwolde niht der mit im streit:

Verse: 3    er bat in fîanze
Verse: 4    bringen Gurnemanze.

Verse: 5    "nein, herre, dû maht mir gerner tuon
Verse: 6    den tôt: ich sluoc im sînen sun,

Verse: 7    Schenteflûren nam ich sîn leben.
Verse: 8    got hât dir êren vil gegeben:

Verse: 9    swâ man daz saget daz von dir
Verse: 10    diu kraft erzeiget ist an mir,

Verse: 11    daz dû mich hâs betwungen,
Verse: 12    sô ist dir wol gelungen."

Verse: 13    dô sprach der junge Parzival:
Verse: 14    "ich wil dir lâzen ander wal:

Verse: 15    nû sicher der künegîn,
Verse: 16    der dîn herre hôhen pîn

Verse: 17    hât gevrumt mit zorne."
Verse: 18    "sô würde ich der verlorne.

Verse: 19    mit swerten wære mîn lîp verzert
Verse: 20    kleine sô daz in sunnen vert,

Verse: 21    wande ich hân herzeleit getân
Verse: 22    dort inne manegen küenen man."

Verse: 23    "sô vüere von disem plâne
Verse: 24    inz lant ze Bertâne

Verse: 25    dîne ritterlîche sicherheit
Verse: 26    einer maget, diu durch mich leit

Verse: 27    des si niht lîden solde,
Verse: 28    der unvuoge erkennen wolde,

Verse: 29    und sage ir, swaz halt mir geschehe,
Verse: 30    daz si mich nimmer vrô gesehe,




Chapter: 199 
199


Verse: 1    ê daz ich si gereche
Verse: 2    aldâ ich schilt durchsteche.

Verse: 3    sage Artûse und dem wîbe sîn,
Verse: 4    in beiden, von mir dienest mîn,

Verse: 5    dar zuo der massenîe gar
Verse: 6    und daz ich nimmer kume dar,

Verse: 7    ê ich lasters mich entsage,
Verse: 8    daz ich geselleclîchen trage

Verse: 9    mit ir diu mir lachen bôt.
Verse: 10    des kom ir lîp in grôze nôt.

Verse: 11    sage ir, ich sî ir dienestman,
Verse: 12    dienstlîcher dieneste undertân."

Verse: 13    der rede ein volge dâ geschach:
Verse: 14    die helde man sich scheiden sach.

Verse: 15    hin wider kom gegangen,
Verse: 16    dâ sîn ors was gevangen,

Verse: 17    der burgære kamphes trôst.
Verse: 18    si wurden sît von im erlôst.

Verse: 19    zwîvels phlac daz ûzer her,
Verse: 20    daz Kingrûn an sîner wer

Verse: 21    was enschumphieret.
Verse: 22    nû wart gekondewieret

Verse: 23    Parzivâl zer künegîn.
Verse: 24    diu tet im umbevâhens schîn,

Verse: 25    si dructe in vaste an ir lîp.
Verse: 26    si sprach: "ich enwirde nimmer wîp

Verse: 27    ûf erde deheines man,
Verse: 28    wan den ich umbevangen hân."

Verse: 29    si half daz er entwâpent wart:
Verse: 30    ir dienest was vil ungespart.




Chapter: 200 
200


Verse: 1    nâch sîner grôzen arbeit
Verse: 2    was krankiu wirtschaft bereit.

Verse: 3    die burgære sus gevuoren,
Verse: 4    daz si im alle hulde swuoren

Verse: 5    und jâhen er müeste ir herre sîn.
Verse: 6    dô sprach ouch diu künegîn,

Verse: 7    er solde sîn ir âmîs,
Verse: 8    sît daz er sô hôhen prîs

Verse: 9    bezalde an Kingrûne.
Verse: 10    zwêne segele brûne

Verse: 11    die kôs man von der wer hin abe.
Verse: 12    die sluoc grôz wint vaste in die habe.

Verse: 13    die kiele wâren geladen sô,
Verse: 14    des die burgære wurden vrô:

Verse: 15    si entruogen niht wan spîse.
Verse: 16    daz vuocte got der wîse.

Verse: 17    hin von den zinnen vielen
Verse: 18    und gâhten zuo den kielen

Verse: 19    daz hungerec her durch den roup.
Verse: 20    si möhten vliegen sô diu loup:

Verse: 21    die magern und die sîhten,
Verse: 22    von vleische die lîhten,

Verse: 23    in was erschoben niht der balc.
Verse: 24    der küneginne marschalc

Verse: 25    tet den schiffen solhen vride,
Verse: 26    daz er gebôt bî der wide

Verse: 27    daz sich ir deheiner ruorte.
Verse: 28    die koufliute er vuorte

Verse: 29    vür sînen herren in die stat.
Verse: 30    Parzivâl in gelden bat




Chapter: 201 
201


Verse: 1    ir habe zwispilde.
Verse: 2    die koufliute des bevilde:

Verse: 3    sus wart vergolden in ir kouf.
Verse: 4    den burgæren in die koln trouf:

Verse: 5    ich wære dâ nû wol soldier,
Verse: 6    wan dâ trinket niemen bier,

Verse: 7    si hânt wîns und spîse vil.
Verse: 8    dô warp als ich iu sagen wil

Verse: 9    Parzivâl der reine:
Verse: 10    von êrste die spîse kleine

Verse: 11    teilde er mit sîn selbes hant.
Verse: 12    er sazte die werden die er dâ vant.

Verse: 13    er wolde niht ir læren magen
Verse: 14    überkrüphe lâzen tragen:

Verse: 15    er gap in rehter mâze teil
Verse: 16    (si wurden sînes râtes geil),

Verse: 17    hin ze naht schuof er in mêre.
Verse: 18    der unlôse, niht ze hêre

Verse: 19    bî ligens wart gevrâget dâ:
Verse: 20    er und diu künegîn sprâchen jâ.

Verse: 21    er lac mit solhen vuogen,
Verse: 22    des nû niht wil genuogen

Verse: 23    manegiu wîp, swer in sô tuot.
Verse: 24    daz si durch arbeitlîchen muot

Verse: 25    ir zuht sus parrierent
Verse: 26    und sich dâ gegen zierent!

Verse: 27    vor gesten sint si an kiuschen siten:
Verse: 28    ir herzen wille hât versniten

Verse: 29    swaz mac an den gebærden sîn.
Verse: 30    ir vriunt si heimlîchen pîn




Chapter: 202 
202


Verse: 1    vüegent mit ir zarte.
Verse: 2    des mâze ie sich bewarte,

Verse: 3    der getriuwe stæte man
Verse: 4    wol vriundinne schônen kan.

Verse: 5    er denket, als ez ist lîhte wâr:
Verse: 6    "ich hân gedienet mîniu jâr

Verse: 7    nâch lône disem wîbe.
Verse: 8    diu hât mînem lîbe

Verse: 9    erboten trôst: nû lige ich hie.
Verse: 10    des hete mich genüeget ie,

Verse: 11    ob ich mit mîner blôzen hant
Verse: 12    müeste rüeren ir gewant.

Verse: 13    ob ich nû gîtes gerte,
Verse: 14    untriuwe es vür mich werte.

Verse: 15    solde ich si arbeiten,
Verse: 16    unser beider laster breiten?"

Verse: 17    vor slâfe süeziu mære
Verse: 18    sint vrouwen site gebære:

Verse: 19    sus lac der Wâleise,
Verse: 20    kranc was sîn vreise.

Verse: 21    den man den rôten ritter hiez,
Verse: 22    die künegîn er maget liez.

Verse: 23    si wânde iedoch, si wære sîn wîp:
Verse: 24    durch sînen minneclîchen lîp

Verse: 25    des morgens is ir houbet bant.
Verse: 26    dô gap im bürge unde lant

Verse: 27    disiu magetbæriu brût,
Verse: 28    wande er was ir herzen trût.

Verse: 29    si wâren mit ein ander sô,
Verse: 30    daz si durch liebe wâren vrô




Chapter: 203 
203


Verse: 1    zwêne tage und die dritten naht.
Verse: 2    von im dicke wart gedâht

Verse: 3    umbevâhens, des sîn muoter riet:
Verse: 4    Gurnemanz im ouch underschiet,

Verse: 5    man und wîp wæren al ein.
Verse: 6    si vlâhten arm unde bein.

Verse: 7    ob ichz iu sagen müeze,
Verse: 8    er vant daz nâhe süeze.

Verse: 9    der alde und der niuwe site
Verse: 10    wonte aldâ in beiden mite:

Verse: 11    in was wol und niht ze wê.
Verse: 12    nû hœret ouch wie Clâmidê

Verse: 13    in krefteclîcher hervart
Verse: 14    mit mæren ungetrœstet wart.

Verse: 15    sus begunde im ein knappe sagen,
Verse: 16    des ors zen sîten was durchslagen:

Verse: 17    "vor Pelrapeire ûf dem plân
Verse: 18    ist werdiu ritterschaft getân,

Verse: 19    scharph genuoc: von ritters hant
Verse: 20    betwungen ist der seneschalt.

Verse: 21    des hers meister Kingrûn
Verse: 22    vert gein Artûse dem Bertûn.

Verse: 23    [die soldier ligent noch vor der stat,
Verse: 24    dô er dannen schiet, als er si bat.]

Verse: 25    ir und iuwer beidiu her
Verse: 26    vindet Pelrapeire mit wer.

Verse: 27    dort inne ist ein ritter wert,
Verse: 28    der anders niht wan strîtes gert.

Verse: 29    iuwer soldier jehent besunder,
Verse: 30    daz von der tavelrunder




Chapter: 204 
204


Verse: 1    diu küneginne habe besant
Verse: 2    îthêren von Kukûmerlant:

Verse: 3    des wâpen kom zer tjoste vür
Verse: 4    und wart getragen nâch prîses kür."

Verse: 5    der künec sprach zem knappen sân:
Verse: 6    "Condwîrâmûrs wil mich hân

Verse: 7    und ich ir lîp und ir lant.
Verse: 8    Kingrûn mîn seneschalt

Verse: 9    mir mit wârheit enbôt,
Verse: 10    si gæben die stat durch hungers nôt

Verse: 11    und daz diu küneginne
Verse: 12    mir büte ir werden minne."

Verse: 13    der knappe erwarp dâ niht wan haz.
Verse: 14    der künec mit her reit vürbaz.

Verse: 15    im kom ein ritter widervarn,
Verse: 16    der ouch daz ors niht kunde sparn:

Verse: 17    der sagete diu selben mære.
Verse: 18    Clâmidê wart swære

Verse: 19    vreude und ritterlîcher sin,
Verse: 20    ez dûhte in grôz ungewin.

Verse: 21    des küneges man, ein vürste sprach:
Verse: 22    "Kingrûnen dâ niemen sach

Verse: 23    strîten vür unser manheit:
Verse: 24    niwan vür sich einen er dâ streit.

Verse: 25    nû lât in sîn ze tode erslagen:
Verse: 26    suln durch daz zwei her verzagen,

Verse: 27    diz und jenez vor der stat?"
Verse: 28    sînen herren er trûren lâzen bat:

Verse: 29    "wir sulnz noch baz versuochen.
Verse: 30    welnt si wer geruochen,




Chapter: 205 
205


Verse: 1    wir geben in noch strîtes vil
Verse: 2    und bringenz ûz ir vreuden zil.

Verse: 3    man und mâge sult ir manen
Verse: 4    und suocht die stat mit zwein vanen:

Verse: 5    wir mugen an der lîten
Verse: 6    wol zorse zuo zin rîten,

Verse: 7    die porten suochen wir ze vuoz.
Verse: 8    deiswâr wir tuon in schimphes buoz."

Verse: 9    den rât gap Galogandres,
Verse: 10    der herzoge von Gippones.

Verse: 11    der brâhte die burgære in nôt,
Verse: 12    er holde ouch an ir letze den tôt.

Verse: 13    als tet der grâve Nârant,
Verse: 14    ein vürste ûz Ukerlant,

Verse: 15    und manec wert armer man,
Verse: 16    den man tôten truoc her dan.

Verse: 17    nû hœret ein ander mære,
Verse: 18    wie die burgære

Verse: 19    ir letze tâten goume.
Verse: 20    si nâmen lange boume

Verse: 21    und stiezen starke stecken drîn.
Verse: 22    daz gap den suochæren pîn:

Verse: 23    mit seilen si die hiengen,
Verse: 24    die ronen in redern giengen.

Verse: 25    daz was geprüevet allezê
Verse: 26    si suochte sturmes Clâmidê,

Verse: 27    nâch Kingrûnes schumphentiur.
Verse: 28    ouch kom in heidensch wilde viur

Verse: 29    mit der spîse in daz lant.
Verse: 30    daz ûzer antwerc wart verbrant:




Chapter: 206 
206


Verse: 1    ir ebenhœhe und ir mangen,
Verse: 2    swaz ûf redern kom gegangen,

Verse: 3    igel, katzen in den graben,
Verse: 4    die kundez viur hin dan wol schaben.

Verse: 5    Kingrûn seneschalt
Verse: 6    was komen ze Bertâne in daz lant

Verse: 7    und vant den künec Artûs
Verse: 8    in Brizljân zem weidehûs,

Verse: 9    daz was geheizen Karminâl.
Verse: 10    dô warp er als in Parzivâl

Verse: 11    gevangenen hete dar gesant:
Verse: 12    vroun Cunnewâren de Lalant

Verse: 13    brâhte er sîne sicherheit.
Verse: 14    diu juncvrouwe was gemeit,

Verse: 15    daz mit triuwen klagete ir nôt
Verse: 16    den man dâ hiez der ritter rôt.

Verse: 17    über al diz mære wart vernomen.
Verse: 18    dô was ouch vür den künec komen

Verse: 19    der betwungene werde man.
Verse: 20    im und der massenîe sân

Verse: 21    sagete er waz in was enboten.
Verse: 22    Keie erschrac und begunde roten,

Verse: 23    doch sprach er: "bistûz Kingrûn?
Verse: 24    âvoi wie manegen Bertûn

Verse: 25    hât enschumphieret dîn hant!
Verse: 26    dû Clâmidês seneschalt,

Verse: 27    wirt mir dîn meister nimmer holt,
Verse: 28    dîns amts dû doch geniezen solt:

Verse: 29    der kezzel ist uns undertân,
Verse: 30    mir hie und dir ze Brandigân.




Chapter: 207 
207


Verse: 1    hilf mir durch dîne werdekeit
Verse: 2    Cunnewâren hulde um kraphen breit."

Verse: 3    er bôt ir anders wandel niht.
Verse: 4    die rede lât sîn: hœrt waz geschiht

Verse: 5    dâ wir diz mære liezen ê.
Verse: 6    vür Pelrapeire kom Clâmidê:

Verse: 7    dâ enwart grôz stürmen niht vermiten.
Verse: 8    die innern mit den ûzern striten:

Verse: 9    si heten trôst unde kraft.
Verse: 10    man vant die helde werhaft:

Verse: 11    dâ von behabeten si daz wal.
Verse: 12    ir landes herre Parzival

Verse: 13    streit den sînen verre vor.
Verse: 14    dâ stuonden offen gar diu tor.

Verse: 15    mit slegen er die arme erswanc,
Verse: 16    sîn swert durch herte helme erklanc.

Verse: 17    swaz er dâ ritter nider sluoc,
Verse: 18    die vunden arbeit genuoc:

Verse: 19    die kunde man si lêren.
Verse: 20    zer halsberge gêren

Verse: 21    die burgære tâten râche schîn:
Verse: 22    si erstâchen si zen slitzen în.

Verse: 23    Parzivâl in werte daz.
Verse: 24    dô si drumbe erhôrten sînen haz,

Verse: 25    zweinzec si ir lebendec geviengen
Verse: 26    ê si von strîte giengen.

Verse: 27    Parzivâl wart wol gewar
Verse: 28    daz Clâmidê mit sîner schar

Verse: 29    ritterschaft zen porten meit
Verse: 30    und daz er anderhalben streit.




Chapter: 208 
208


Verse: 1    der junge muotes herte
Verse: 2    kêrte anz ungeverte:

Verse: 3    hin umbe begunde er gâhen,
Verse: 4    des küneges vanen nâhen.

Verse: 5    seht, dô wart Clâmidês solt
Verse: 6    alrêst mit schaden dâ geholt.

Verse: 7    die burgære strîten kunden,
Verse: 8    sô daz in gar verswunden

Verse: 9    die herten schilde von der hant.
Verse: 10    Parzivâles schilt verswant

Verse: 11    von slegen und von schüzzen.
Verse: 12    swie wênec sis genüzzen,

Verse: 13    die suochære die daz sâhen,
Verse: 14    des prîses si im alle jâhen.

Verse: 15    Galogandres truoc den vanen
Verse: 16    (der kunde ouch daz her wol manen),

Verse: 17    der lac an sküneges sîten tôt.
Verse: 18    Clâmidê kom selbe in nôt:

Verse: 19    im und den sînen wart dâ wê.
Verse: 20    den sturm verbôt dô Clâmidê.

Verse: 21    die burgære manheite wîs
Verse: 22    behielden vromen und den prîs.

Verse: 23    Parzivâl der werde degen
Verse: 24    hiez der gevangen schône phlegen

Verse: 25    unz an den dritten morgen.
Verse: 26    daz ûzer her phlac sorgen.

Verse: 27    der junge stolze wirt gemeit
Verse: 28    nam der gevangen sicherheit.

Verse: 29    er sprach: "als ichz iu enbiute,
Verse: 30    komt wider, guoten liute."




Chapter: 209 
209


Verse: 1    ir harnas er behalden bat,
Verse: 2    inz her si kêrten vür die stat.

Verse: 3    swie si wæren von trünken rôt,
Verse: 4    die ûzern sprâchen: "hungers nôt

Verse: 5    habet gedolt ir armen."
Verse: 6    "lât iuch uns niht erbarmen"

Verse: 7    sprach diu gevangene ritterschaft.
Verse: 8    "dort inne ist spîse alsolhiu kraft,

Verse: 9    woldet ir hie ligen noch ein jâr,
Verse: 10    si behielden iuch mit in vür wâr.

Verse: 11    diu künegîn hât den schœnsten man
Verse: 12    der schildes ambet ie gewan:

Verse: 13    er mac wol sîn von hôher art.
Verse: 14    aller ritter êre ist zim bewart."

Verse: 15    dô diz erhôrte Clâmidê,
Verse: 16    alrêst tet im sîn arbeit wê.

Verse: 17    boten sande er wider în
Verse: 18    und enbôt, swer bî der künegîn

Verse: 19    dâ gelegen wære,
Verse: 20    "ist er kamphesbære,

Verse: 21    sô daz si in dâ vür hât erkant,
Verse: 22    daz er ir lîp und ir lant

Verse: 23    mir mit kamphe türre wern,
Verse: 24    sô sî ein vride von beiden hern."

Verse: 25    Parzivâl des wart al vrô,
Verse: 26    daz im diu botschaft alsô

Verse: 27    gein sîn eines kamphe was gesaget.
Verse: 28    dô sprach der junge unverzaget:

Verse: 29    "dâ vür sî mîn triuwe phant,
Verse: 30    des innern hers dehein hant




Chapter: 210 
210


Verse: 1    kumt durch mîne nôt ze wer."
Verse: 2    zwischen dem graben und dem ûzern her

Verse: 3    wart gestætet dirre vride.
Verse: 4    dô wâpenden sich die kamphes smide.

Verse: 5    dô saz der künec von Brandigân
Verse: 6    ûf ein gewâpent kastelân,

Verse: 7    daz was geheizen Guverjorz.
Verse: 8    von sînem neven Grîgorz,

Verse: 9    dem künec von Ipotente,
Verse: 10    mit rîcher prîsente

Verse: 11    was ez komen Clâmidê:
Verse: 12    norden über den Ukersê

Verse: 13    ez brâhte cuns Nârant
Verse: 14    und dar zuo tûsent sarjant

Verse: 15    mit harnas al sunder schilt.
Verse: 16    den was ir solt alsus gezilt,

Verse: 17    volleclîchen zwei jâr.
Verse: 18    ob diu âventiure saget al wâr,

Verse: 19    Grîgorz im sande ritter kluoc
Verse: 20    vünf hundert (ieslîcher truoc

Verse: 21    helm ûf houbet gebunden),
Verse: 22    die wol mit strîte kunden.

Verse: 23    dô hete Clâmidês her
Verse: 24    ûf dem lande und in dem mer

Verse: 25    Pelrapeire alsô belegen,
Verse: 26    die burgære muosten kumbers phlegen.

Verse: 27    ûz kom geriten Parzival
Verse: 28    an daz urteillîche wal,

Verse: 29    dâ got erzeigen solde
Verse: 30    ob er im lâzen wolde




Chapter: 211 
211


Verse: 1    des künec Tampenteires barn.
Verse: 2    stolzlîch er kom gevarn,

Verse: 3    niwan als daz ors den walap
Verse: 4    vor der rabîne gap.

Verse: 5    daz was gewâpent wol vür nôt:
Verse: 6    von samît ein decke rôt

Verse: 7    lac ûf der îserînen.
Verse: 8    an im selben liez er schînen

Verse: 9    rôt schilt, rôt kursît.
Verse: 10    Clâmidê erhuop den strît:

Verse: 11    kurz ein unbesniten sper
Verse: 12    brâhte er durch tjoste vellen her,

Verse: 13    dâ mit er nam den poinder lanc.
Verse: 14    Guverjorz mit hurte spranc.

Verse: 15    wol dâ getjostieret wart
Verse: 16    von den zwein jungen âne bart

Verse: 17    sunder fâlieren.
Verse: 18    von liuten noch von tieren

Verse: 19    wart nie gestriten herter kamph.
Verse: 20    ieweder ors von müede damph:

Verse: 21    sus heten si gevohten,
Verse: 22    daz diu ors niht mêre enmohten.

Verse: 23    dô sturzten si dar under.
Verse: 24    ensamt, niht besunder

Verse: 25    ir ieweder des geruochte,
Verse: 26    daz erz viur im helme suochte.

Verse: 27    si enmohten vîrens niht gephlegen:
Verse: 28    in was ze werke aldâ gegeben.

Verse: 29    dô zerstuben in die schilde,
Verse: 30    als der mit schimphe spilde




Chapter: 212 
212


Verse: 1    und vedern würfe in den wint.
Verse: 2    dennoch was Gahmuretes kint

Verse: 3    ninder müede an deheinem lide.
Verse: 4    dô wânde Clâmidê daz der vride

Verse: 5    wære gebrochen ûz der stat:
Verse: 6    sînen kamphgenôz er bat,

Verse: 7    daz er sich selben êrte
Verse: 8    und mangen würfe werte.

Verse: 9    ez giengen ûf in slege grôz,
Verse: 10    die wâren wol mangensteins genôz.

Verse: 11    sus antwurte im des landes wirt:
Verse: 12    "ich wæne dich mangen wurf verbirt,

Verse: 13    wan dâ vür ist mîn triuwe phant:
Verse: 14    hetes et vride von mîner hant,

Verse: 15    dir enbræche mangen swenkel
Verse: 16    brust, houbet noch den schenkel."

Verse: 17    Clâmidê dranc müede zuo:
Verse: 18    diu was im dennoch gar ze vruo.

Verse: 19    sic gewunnen, sic verlorn
Verse: 20    wart sunder dâ mit strîte erkorn.

Verse: 21    doch wart der künec Clâmidê
Verse: 22    an schumphentiur beschouwetê

Verse: 23    mit einem niderzucke.
Verse: 24    von Parzivâles drucke

Verse: 25    bluot wæte ûz ôren und ûz der nasen,
Verse: 26    daz machte rôt den grüenen wasen.

Verse: 27    er enblôzte imz houbet schier
Verse: 28    von helme und von hersenier:

Verse: 29    gein slage saz der betwungen lîp.
Verse: 30    der sigehafte sprach: "mîn wîp




Chapter: 213 
213


Verse: 1    mac nû belîben vor dir vrî.
Verse: 2    nû lerne waz sterben sî."

Verse: 3    "neinâ, werder degen balt!
Verse: 4    dîn êre wirt sus drîzecvalt

Verse: 5    vaste an mir erzeiget.
Verse: 6    sît dû mich hâs geneiget,

Verse: 7    wâ möhte dir hôher prîs geschehen?
Verse: 8    Condwîrâmûrs mac wol jehen

Verse: 9    daz ich der unsælege bin
Verse: 10    und dîn gelücke hât gewin:

Verse: 11    dîn lant ist erlœset.
Verse: 12    als der sîn schif erœset

Verse: 13    (ez ist vil deste lîhter),
Verse: 14    mîn gewalt ist sîhter.

Verse: 15    reht manlîchiu wünne
Verse: 16    ist worden an mir dünne:

Verse: 17    durch waz soldestû mich sterben?
Verse: 18    ich muoz doch laster erben

Verse: 19    ûf alle mîne nâchkomen.
Verse: 20    dû hâs den prîs und den vromen:

Verse: 21    tuostû mir mêr, dast âne nôt.
Verse: 22    ich trage den lebendegen tôt,

Verse: 23    sît ich von ir gescheiden bin,
Verse: 24    diu mir herze unde sin

Verse: 25    ie mit ir gewalt beslôz
Verse: 26    und ich des nie gein ir genôz.

Verse: 27    des muoz ich unsælec man
Verse: 28    ir lîp, ir lant dir ledec lân."

Verse: 29    dô dâhte der den sic hât
Verse: 30    sân an Gurnemanzes rât,




Chapter: 214 
214


Verse: 1    daz ellenthafter manheit
Verse: 2    erberme solde sîn bereit.

Verse: 3    sus volgete er dem râte nâch.
Verse: 4    hin ze Clâmidê er sprach:

Verse: 5    "ich enwil dich niht erlâzen,
Verse: 6    ir vater, Lîâzen,

Verse: 7    dû enbringes im dîne sicherheit."
Verse: 8    "neinâ, herre! dem hân ich herzeleit

Verse: 9    getân: ich sluoc im sînen sun.
Verse: 10    dû ensolt alsô mit mir niht tuon.

Verse: 11    durch Condwîrâmûrs
Verse: 12    vaht ouch mit mir Schenteflûrs:

Verse: 13    ouch wære ich tôt von sîner hant,
Verse: 14    wan daz mir half mîn seneschalt.

Verse: 15    in sande inz lant ze Brôbarz
Verse: 16    Gurnemanz de Grâharz

Verse: 17    mit werdeclîcher hers kraft.
Verse: 18    dâ tâten guote ritterschaft

Verse: 19    niun hundert ritter die wol striten
Verse: 20    (gewâpent ors die alle riten)

Verse: 21    und zwelf hundert sarjant.
Verse: 22    gewâpent ich si in strîte vant:

Verse: 23    den gebrast niht wan der schilde.
Verse: 24    sîns hers mich bevilde:

Verse: 25    ir kom ouch kûme der sâme wider.
Verse: 26    mêr helde verlôs ich sider.

Verse: 27    nû darbe ich vreude und êre:
Verse: 28    wes gerstû von mir mêre?"

Verse: 29    "ich wil senften dînen vreisen.
Verse: 30    var gein den Berteneisen:




Chapter: 215 
215


Verse: 1    dâ vert ouch vor dir Kingrûn
Verse: 2    gein Artûse dem Bertûn.

Verse: 3    dem soltû mînen dienest sagen:
Verse: 4    bit in daz er mir helfe klagen

Verse: 5    laster daz ich vuorte dan.
Verse: 6    ein juncvrouwe mich lachete an:

Verse: 7    daz man die durch mich zeblou,
Verse: 8    sô sêre mich nie dinc gerou.

Verse: 9    der selben sage, ez sî mir leit,
Verse: 10    und brinc ir dîne sicherheit

Verse: 11    sô daz dû leistes ir gebot,
Verse: 12    oder nim alhie den tôt."

Verse: 13    "sol daz geteilde gelden,
Verse: 14    sô enwil ichz niht beschelden"

Verse: 15    sus sprach der künec von Brandigân:
Verse: 16    "ich wil die vart von hinnen hân."

Verse: 17    mit gelübede dô dannen schiet
Verse: 18    den ê sîn hôchvart verriet.

Verse: 19    Parzivâl der wîgant
Verse: 20    gienc dâ er sîn ors al müede vant:

Verse: 21    sîn vuoz dâ nâch nie gegreif.
Verse: 22    er spranc drûf âne stegereif,

Verse: 23    daz alumbe begunden zirben
Verse: 24    sîn verhouwen schildes schirben.

Verse: 25    des wâren die burgære gemeit.
Verse: 26    daz ûzer her sach herzeleit:

Verse: 27    brât und lide im tâten wê.
Verse: 28    man leite den künec Clâmidê

Verse: 29    dâ sîne helfære wâren.
Verse: 30    die tôten mit den bâren




Chapter: 216 
216


Verse: 1    vrumte er an ir reste.
Verse: 2    dô rûmdenz lant die geste.

Verse: 3    Clâmidê der werde
Verse: 4    reit gein Löver ûf die erde.

Verse: 5    ensamt, niht besunder
Verse: 6    die von der tavelrunder

Verse: 7    wâren ze Dîanazdrûn
Verse: 8    bî Artûse dem Bertûn,

Verse: 9    ob ich iu niht gelogen hân.
Verse: 10    von Dîanazdrûn der plân

Verse: 11    muoste zeltstangen wonen
Verse: 12    mêr danne in Spehteshart sî ronen:

Verse: 13    mit solher massenîe lac
Verse: 14    durch hôchgezît den phingestac

Verse: 15    Artûs mit maneger vrouwen.
Verse: 16    ouch mohte man dâ schouwen

Verse: 17    manege baniere unde schilt,
Verse: 18    den sunderwâpen was gezilt,

Verse: 19    manegen wol gehêrten rinc.
Verse: 20    ez diuhten nû vil grôziu dinc:

Verse: 21    wer möhte diu reiselachen
Verse: 22    solhem wîbe her gemachen?

Verse: 23    ouch wânde dô ein vrouwe sân,
Verse: 24    si solde den prîs verlorn hân,

Verse: 25    hete si dâ niht ir âmîs.
Verse: 26    ich entætes niht deheinen wîs

Verse: 27    (ez was dô manec tumber lîp),
Verse: 28    ich bræhte ungerne nû mîn wîp

Verse: 29    in alsô grôz gemenge,
Verse: 30    ich vorhte unkunt gedrenge.




Chapter: 217 
217


Verse: 1    etslîcher hin zir spræche,
Verse: 2    daz in ir minne stæche

Verse: 3    und im die vreude blande:
Verse: 4    ob si die nôt erwande,

Verse: 5    daz diende er vor unde nâch.
Verse: 6    mir wære ê mit ir dannen gâch.

Verse: 7    ich hân geredet um mîn dinc:
Verse: 8    nû hœret wie Artûses rinc

Verse: 9    sunder was erkenneclîch.
Verse: 10    vor ûz mit maneger schoie rîch

Verse: 11    diu massenîe vor im az,
Verse: 12    manec werder man gein valsche laz

Verse: 13    und manec juncvrouwe stolz,
Verse: 14    daz niht wan tjoste was ir bolz:

Verse: 15    ir vriunt si gein dem vîent schôz.
Verse: 16    lêrte in strît dâ kumber grôz,

Verse: 17    sus stuont lîhte ir gemüete
Verse: 18    daz siz galt mit güete.

Verse: 19    Clâmidê der jungelinc
Verse: 20    reit mitten in den rinc.

Verse: 21    verdecket ors, gewâpent lîp
Verse: 22    sach an im Artûses wîp,

Verse: 23    sînen helm, sînen schilt verhouwen.
Verse: 24    daz sâhen gar die vrouwen:

Verse: 25    sus was er ze hove komen.
Verse: 26    ir habet ê wol vernomen

Verse: 27    daz er des wart betwungen.
Verse: 28    er erbeizte, vil gedrungen

Verse: 29    wart sîn lîp, ê er sitzen vant
Verse: 30    vroun Cunnewâren de Lalant.




Chapter: 218 
218


Verse: 1    dô sprach er: "vrouwe, sît ir daz,
Verse: 2    der ich sol dienen âne haz

Verse: 3    (ein teil mich es twinget nôt),
Verse: 4    sîn dienst iu enbôt der ritter rôt:

Verse: 5    der wil vil ganze phlihte hân
Verse: 6    swaz iu ze laster ist getân.

Verse: 7    ouch bitet erz Artûse klagen.
Verse: 8    ich wæne ir sît durch in geslagen:

Verse: 9    vrouwe, ich bringe iu sicherheit.
Verse: 10    sus gebôt der mit mir dâ streit:

Verse: 11    nû leiste ichz gerne, swenne ir welt.
Verse: 12    mîn lîp gein tôde was verselt."

Verse: 13    vrou Cunnewâre de Lalant
Verse: 14    greif an die gîserten hant.

Verse: 15    aldâ vrou Ginôvêr saz,
Verse: 16    diu âne den künec mit ir az,

Verse: 17    Keie ouch vor dem tische stuont,
Verse: 18    aldâ im diz mære wart kunt.

Verse: 19    der widersaz im ein teil,
Verse: 20    des wart vrou Cunnewâre geil.

Verse: 21    dô sprach er: "vrouwe, dirre man,
Verse: 22    swaz der hât gein iu getân,

Verse: 23    des ist er vaste underzogen.
Verse: 24    doch wæne ich des, erst ûf gelogen.

Verse: 25    ich tetz durch hovelîchen site
Verse: 26    und wolde iuch hân gebezzert mite:

Verse: 27    dar umbe hân ich iuwern haz.
Verse: 28    iedoch wil ich iu râten daz,

Verse: 29    heizt entwâpen disen gevangen:
Verse: 30    in mac hie stêns erlangen."




Chapter: 219 
219


Verse: 1    im bat diu juncvrouwe schier
Verse: 2    abe nemen helm undz hersenier.

Verse: 3    dô manz von im stroufte und bant,
Verse: 4    Clâmidê wart schiere erkant.

Verse: 5    Kingrûn sach dicke
Verse: 6    an in kuntlîche blicke.

Verse: 7    dô wurden an den stunden
Verse: 8    sîne hende alsô gewunden,

Verse: 9    daz si begunden krachen
Verse: 10    als die dürren spachen.

Verse: 11    den tisch stiez von im zehant
Verse: 12    Clâmidês seneschalt,

Verse: 13    sînen herren vrâcte er mære,
Verse: 14    den vant er vreuden lære.

Verse: 15    der sprach: "ich bin ze schaden geborn.
Verse: 16    ich hân sô wirdec her verlorn,

Verse: 17    daz muoter nie gebôt ir brust
Verse: 18    dem der erkande hôher vlust.

Verse: 19    mich enriuwet niht mîns hers tôt
Verse: 20    dâ gegen: minne mangels nôt

Verse: 21    lestet ûf mich solhen last.
Verse: 22    mirst vreude gestîn, hôchmuot gast.

Verse: 23    Condwîrâmûrs vrumt mich grâ.
Verse: 24    Pilâtus von Ponciâ

Verse: 25    und der arme Jûdas,
Verse: 26    der bî einem kusse was

Verse: 27    an der triuwenlôsen vart
Verse: 28    dâ Jêsus verrâten wart,

Verse: 29    swie daz ir schephære ræche,
Verse: 30    die nôt ich niht verspræche,




Chapter: 220 
220


Verse: 1    daz Brôbarzære vrouwen lîp
Verse: 2    mit ir hulden wære mîn wîp,

Verse: 3    sô daz ich si umbevienge,
Verse: 4    swiez mir dar nâch ergienge.

Verse: 5    ir minne ist leider verre
Verse: 6    dem künege von îserterre:

Verse: 7    mîn lant undz volc ze Brandigân
Verse: 8    müezens immer jâmer hân.

Verse: 9    mîns vetern sun Mabonagrîn
Verse: 10    leit ouch dâ ze langen pîn.

Verse: 11    nû bin ich, künec Artûs,
Verse: 12    her geriten in dîn hûs,

Verse: 13    betwungen von ritters hant.
Verse: 14    dû weist wol daz in mîn lant

Verse: 15    dir manec laster ist getân:
Verse: 16    des vergiz nû, werder man,

Verse: 17    die wîle ich hie gevangen sî.
Verse: 18    lâz mich solhes hazzes vrî.

Verse: 19    mich sol vrou Cunnewâre
Verse: 20    ouch scheiden von dem vâre,

Verse: 21    diu mîne sicherheit emphienc,
Verse: 22    dô ich gewâpent vür si gienc."

Verse: 23    Artûs vil getriuwer munt
Verse: 24    verkôs die schulde sâ zestunt.

Verse: 25    dô vriesch wîp unde man
Verse: 26    daz der künec von Brandigân

Verse: 27    was geriten ûf den rinc.
Verse: 28    nû dar nâher! dringâ drinc!

Verse: 29    schiere wart daz mære breit.
Verse: 30    mit zühten iesch gesellekeit




Chapter: 221 
221


Verse: 1    Clâmidê der vreuden âne:
Verse: 2    "ir sult mich Gâwâne

Verse: 3    bevelhen, vrouwe: bin ichs wert,
Verse: 4    sô weiz ich wol daz ers ouch gert.

Verse: 5    leist er dar an iuwer gebot,
Verse: 6    er êrt iuch und den ritter rôt."

Verse: 7    Artûs bat sîner swester sun
Verse: 8    gesellekeit dem künege tuon:

Verse: 9    daz wære iedoch ergangen.
Verse: 10    dô wart wol emphangen

Verse: 11    von der werden massenîe
Verse: 12    der betwungene valsches vrîe.

Verse: 13    ze Clâmidê sprach Kingrûn:
Verse: 14    "ouwê daz ie dehein Bertûn

Verse: 15    dich betwungen sach ze hûs!
Verse: 16    noch rîcher denne Artûs

Verse: 17    wære dû helfe und urborn
Verse: 18    und hetes dîne jugent bevorn.

Verse: 19    sol Artûs dâ von prîs nû tragen,
Verse: 20    daz Keie durch zorn hât geslagen

Verse: 21    ein edel vürstinne,
Verse: 22    diu mit herzen sinne

Verse: 23    ir mit lachen hât erwelt
Verse: 24    der âne liegen ist gezelt

Verse: 25    mit wârheit vür den hœsten prîs?
Verse: 26    die Berteneise ir lobes rîs

Verse: 27    wænent nû hôch gestôzen hân:
Verse: 28    âne ir arbeit ist getân

Verse: 29    daz tôt her wider wart gesant
Verse: 30    der künec von Kukûmerlant




Chapter: 222 
222


Verse: 1    und daz mîn herre im siges jach.
Verse: 2    den man gein im in kamphe sach,

Verse: 3    der selbe hât betwungen mich
Verse: 4    gar âne hælingen slich.

Verse: 5    man sach dâ viur ûz helmen wæn
Verse: 6    und swert in henden umbe dræn."

Verse: 7    dô sprâchen si alle gelîche,
Verse: 8    beide arme und rîche,

Verse: 9    daz Keie hete missetân.
Verse: 10    hie sule wir diz mære lân

Verse: 11    und komens wider an die vart.
Verse: 12    daz wüeste lant erbûwen wart,

Verse: 13    dâ krône truoc Parzival.
Verse: 14    man sach dâ vreude unde schal.

Verse: 15    sîn sweher Tampenteire
Verse: 16    liez im ûf Pelrapeire

Verse: 17    lieht gesteine und rôtez golt:
Verse: 18    daz teilde er sô daz man im holt

Verse: 19    was durch sîne milde.
Verse: 20    vil baniere, niuwe schilde,

Verse: 21    des wart sîn lant gezieret
Verse: 22    und vil geturnieret

Verse: 23    von im und von den sînen.
Verse: 24    er liez dicke ellen schînen

Verse: 25    an der marc sîns landes ort.
Verse: 26    der junge degen unervorht,

Verse: 27    sîn tât was gein den gesten
Verse: 28    geprüevet vür die besten.

Verse: 29    nû hœret ouch von der künegîn.
Verse: 30    wie möhte der immer baz gesîn?




Chapter: 223 
223


Verse: 1    diu junge süeze werde
Verse: 2    hete den wunsch ûf der erde.

Verse: 3    ir minne stuont mit solher kraft,
Verse: 4    gar âne wankes anehaft:

Verse: 5    si hete ir man dâ vür erkant.
Verse: 6    iewederz an dem andern vant:

Verse: 7    er was ir liep, alsô was si im.
Verse: 8    swenne ich daz mære an mich nû nim,

Verse: 9    daz si sich müezen scheiden,
Verse: 10    dâ wehset schade in beiden.

Verse: 11    ouch riuwet mich daz werde wîp:
Verse: 12    ir liute, ir lant, dar zuo ir lîp

Verse: 13    schiet sîn hant von grôzer nôt.
Verse: 14    dâ gein si im ir minne bôt.

Verse: 15    eins morgens er mit zühten sprach
Verse: 16    (manec ritter ez hôrte unde sach):

Verse: 17    "ob ir gebietet, vrouwe,
Verse: 18    mit urloube ich schouwe

Verse: 19    wiez umbe mîne muoter stê.
Verse: 20    ob der wol oder wê

Verse: 21    sî, daz ist mir harte unkunt.
Verse: 22    dar wil ich zeiner kurzen stunt

Verse: 23    und ouch durch âventiure zil.
Verse: 24    mac ich iu gedienen vil,

Verse: 25    daz gildet iuwer minne wert."
Verse: 26    sus hete er urloubes gegert.

Verse: 27    er was ir liep, sôz mære giht:
Verse: 28    si enwolde im versagen niht.

Verse: 29    von allen sînen mannen
Verse: 30    schiet er al eine dannen.




Chapter: 224 
224


Verse: 1    Swer ruochet hœren war nû kumt
Verse: 2    den âventiur hât ûz gevrumt,

Verse: 3    der mac grôziu wunder
Verse: 4    merken al besunder.

Verse: 5    lât rîten Gahmuretes kint:
Verse: 6    swâ nû getriuwe liute sint,

Verse: 7    die wünschen im heiles, wan ez muoz sîn
Verse: 8    daz er nû lîdet hôhen pîn,

Verse: 9    etswenne ouch vreude und êre.
Verse: 10    ein dinc in müete sêre,

Verse: 11    daz er von ir gescheiden was,
Verse: 12    daz munt von wîbe nie gelas

Verse: 13    nâch sus gesagetem mære,
Verse: 14    diu schœner und bezzer wære.

Verse: 15    gedanke nâch der künegin
Verse: 16    begunden krenken im den sin:

Verse: 17    den muoste er gar verlorn hân,
Verse: 18    wærez niht ein herzehafter man.

Verse: 19    mit gewalt den zoum daz ros
Verse: 20    truoc über ronen und durch daz mos,

Verse: 21    wande ez enwîste niemens hant.
Verse: 22    uns tuot diu âventiure bekant,

Verse: 23    daz er bî dem tage reit,
Verse: 24    ein vogel hetes arbeit,

Verse: 25    solde erz allez hân ervlogen.
Verse: 26    mich enhabe diu âventiure betrogen,

Verse: 27    sîn reise unnâch was sô grôz
Verse: 28    des tages dô er îthêren schôz,

Verse: 29    und sît dô er von Grâharz
Verse: 30    kom in daz lant ze Brôbarz.




Chapter: 225 
225


Verse: 1    welt ir nû hœren wiez im gestê?
Verse: 2    er kom des âbents an einen sê:

Verse: 3    dâ heten geankert weideman,
Verse: 4    den was daz wazzer undertân.

Verse: 5    dô si in rîten sâhen,
Verse: 6    si wâren dem stade sô nâhen

Verse: 7    daz si wol hôrten swaz er sprach.
Verse: 8    einen er in dem schiffe sach,

Verse: 9    der hete an im alsolh gewant,
Verse: 10    ob im dienden elliu lant,

Verse: 11    daz ez niht bezzer möhte sîn
Verse: 12    gefurriert. sîn huot was phâwîn.

Verse: 13    den selben vischære
Verse: 14    begunde er vrâgen mære,

Verse: 15    daz er im riete durch got
Verse: 16    und durch sîner zühte gebot,

Verse: 17    wâ er herberge möhte hân.
Verse: 18    sus antwurte im der trûrege man,

Verse: 19    er sprach: "herre, mirst niht bekant
Verse: 20    daz weder wazzer oder lant

Verse: 21    inner drîzec mîlen erbûwen sî.
Verse: 22    wan ein hûs liget uns hie bî:

Verse: 23    mit triuwen ich iu râte dar.
Verse: 24    war möhtet ir tâlanc anderswar?

Verse: 25    dort an des velses ende
Verse: 26    dâ kêrt zer zeswen hende.

Verse: 27    sô ir ûf hin komet an den graben
Verse: 28    (ich wæne dâ müezet ir stille haben),

Verse: 29    bitet iu die brücken nider lâzen
Verse: 30    und offen iu die stâzen."




Chapter: 226 
226


Verse: 1    er tet als im der vischære riet.
Verse: 2    mit urloube er dannen schiet.

Verse: 3    er sprach: "komt ir rehte dar
Verse: 4    (ich nim iuwer hînte selbe war),

Verse: 5    sô danket als man iuwer phlege.
Verse: 6    hüetet iuch: dâ gênt unkunde wege.

Verse: 7    ir muget an der lîten
Verse: 8    vil wol misserîten,

Verse: 9    deiswâr des ich iu doch niht gan."
Verse: 10    Parzivâl der huop sich dan,

Verse: 11    er begunde wackerlîchen draben
Verse: 12    den rehten phat unz an den graben.

Verse: 13    dâ was diu brücke ûf gezogen,
Verse: 14    diu burc an veste niht betrogen:

Verse: 15    si stuont als si wære gedræt.
Verse: 16    ez envlüge oder hete der wint gewæt,

Verse: 17    mit sturme ir niht geschadet was.
Verse: 18    vil türne, manec palas

Verse: 19    dâ stuont mit wunderlîcher wer.
Verse: 20    ob si suochten elliu her,

Verse: 21    si engæben vür die selben nôt
Verse: 22    ze drîzec jâren niht ein brôt.

Verse: 23    ein knappe des geruochte
Verse: 24    und vrâcte in waz er suochte

Verse: 25    oder wannen sîn reise wære.
Verse: 26    er sprach: "der vischære

Verse: 27    hât mich von im her gesant.
Verse: 28    ich hân genigen sîner hant

Verse: 29    niwan durch der herberge wân.
Verse: 30    er bat die brücken nider lân




Chapter: 227 
227


Verse: 1    und hiez mich zuo ziu rîten în."
Verse: 2    "herre, ir sult willekomen sîn,

Verse: 3    sît es der vischære verjach.
Verse: 4    man biutet iu êre und gemach

Verse: 5    durch in der iuch sande wider"
Verse: 6    sprach der knappe und liez die brücken nider.

Verse: 7    in die burc der küene reit
Verse: 8    ûf einen hof wît unde breit.

Verse: 9    durch schimph er niht zetretet was:
Verse: 10    dâ stuont al kurz grüene gras,

Verse: 11    dâ was bûhurdieren vermiten,
Verse: 12    mit banieren selten überriten

Verse: 13    alsô er anger z Abenberc.
Verse: 14    selten vrœlîchiu werc

Verse: 15    was dâ gevrumt ze langer stunt:
Verse: 16    in was wol herzen jâmer kunt.

Verse: 17    wênec er des gein in engalt.
Verse: 18    in emphiengen ritter junc und alt,

Verse: 19    vil kleiner juncherrelîn
Verse: 20    sprungen gein dem zoume sîn,

Verse: 21    ieslîchez vür daz ander greif.
Verse: 22    si habeten sînen stegereif:

Verse: 23    sus muoste er von dem orse stên.
Verse: 24    in bâten ritter vürbaz gên,

Verse: 25    die vuorten in an sîn gemach.
Verse: 26    harte schiere daz geschach,

Verse: 27    daz er mit zuht entwâpent wart.
Verse: 28    dô si den jungen âne bart

Verse: 29    gesâhen alsus minneclîch,
Verse: 30    si jâhen, er wære sælden rîch.




Chapter: 228 
228


Verse: 1    ein wazzer iesch der junge man:
Verse: 2    er twuoc den râm von im sân

Verse: 3    undern ougen und an handen.
Verse: 4    alde und junge wânden

Verse: 5    daz von im ander tac erschine:
Verse: 6    sus saz der minneclîche wine

Verse: 7    gar vor allen tadel vrî.
Verse: 8    mit phelle von Arâbî

Verse: 9    man truoc im einen mantel dar:
Verse: 10    den legete an sich der wol gevar

Verse: 11    mit offener snüere.
Verse: 12    ez was im ein lobes gevüere.

Verse: 13    dô sprach der kamerære kluoc:
Verse: 14    "Repanse de Schoie in truoc,

Verse: 15    mîn vrouwe, diu küngegîn:
Verse: 16    ab ir sol er iu gelihen sîn,

Verse: 17    wan iust niht kleider noch gesniten.
Verse: 18    jâ mohte ich sis mit êren biten,

Verse: 19    wande ir sît ein werder man,
Verse: 20    ob ichz geprüevet rehte hân."

Verse: 21    "got lone iu, herre, daz irs jehet.
Verse: 22    ob ir mich ze rehte spehet,

Verse: 23    sô hât mîn lîp gelücke erholt:
Verse: 24    diu gotes kraft gît solhen solt."

Verse: 25    man schancte im unde phlac sîn sô,
Verse: 26    die trûregen wâren mit im al vrô.

Verse: 27    man bôt im wirde und êre,
Verse: 28    wan dâ was râtes mêre

Verse: 29    denne er ze Pelrapeire vant,
Verse: 30    die dô von kumber schiet sîn hant.




Chapter: 229 
229


Verse: 1    sîn harnas was von im getragen:
Verse: 2    daz begunde er sider sêre klagen,

Verse: 3    dâ er sich schimphes niht versan.
Verse: 4    ze hove ein redespæher man

Verse: 5    bat komen ze vrevellîche
Verse: 6    den gast ellens rîche

Verse: 7    zem wirte, als ob im wære zorn.
Verse: 8    des hete er nâch den lîp verlorn

Verse: 9    von dem jungen Parzivâl.
Verse: 10    dô er sîn swert wol gemâl

Verse: 11    ninder bî im ligen vant,
Verse: 12    zer viuste twanc er sus die hant,

Verse: 13    daz daz bluot ûz den nageln schôz
Verse: 14    und im den ermel gar begôz.

Verse: 15    "nein, herre!" sprach diu ritterschaft,
Verse: 16    "ez ist ein man der schimphes kraft

Verse: 17    hât. swie trûrec wir anders sîn,
Verse: 18    tuot iuwer zuht gein im schîn:

Verse: 19    ir ensultz niht anders hân vernomen,
Verse: 20    wan daz der vischære sî komen.

Verse: 21    dar gêt (ir sît im werder gast)
Verse: 22    und schütet ab iu zornes last."

Verse: 23    si giengen ûf einen palas.
Verse: 24    hundert krône dâ gehangen was,

Verse: 25    vil kerzen drûf gestôzen
Verse: 26    ob den hûsgenôzen,

Verse: 27    kleine kerzen alumbe an der want.
Verse: 28    hundert bette er ligen vant.

Verse: 29    daz schuofen dies dâ phlâgen:
Verse: 30    hundert kulter drûfe lâgen,




Chapter: 230 
230


Verse: 1    ie vier gesellen sundersiz.
Verse: 2    dâ zwischen was ein underviz,

Verse: 3    dâ vür ein teppech sinewel.
Verse: 4    fil li roi Frimutel

Verse: 5    mohte wol geleisten daz.
Verse: 6    eins dinges man dâ niht vergaz:

Verse: 7    si enhete niht betûret,
Verse: 8    mit marmel was gemûret

Verse: 9    drî vierecke viurrame.
Verse: 10    dar ûfe was des viurs name,

Verse: 11    holz, hiez lignâlôê:
Verse: 12    sô grôziu viur sît nochê

Verse: 13    sach niemen hie ze Wildenberc.
Verse: 14    jenez wâren kostenlîchiu werc.

Verse: 15    der wirt sich selben setzen bat
Verse: 16    gein der mitteln viurstat

Verse: 17    ûf ein spanbette.
Verse: 18    ez was worden wette

Verse: 19    zwischen im und der vreude:
Verse: 20    er lebete niht wan teude.

Verse: 21    in den palas kom gegangen
Verse: 22    der dâ wart wol emphangen,

Verse: 23    Parzivâl der lieht gevar,
Verse: 24    von im der in sande dar:

Verse: 25    der liez in dâ niht langer stên.
Verse: 26    in bat der wirt nâher gên

Verse: 27    und sitzen "zuo mir dâ her an.
Verse: 28    sazte ich iuch verre dort hin dan,

Verse: 29    daz wære iu alze gastlîch."
Verse: 30    sus sprach der wirt jâmers rîch.




Chapter: 231 
231


Verse: 1    der wirt hete durch siecheit
Verse: 2    grôziu viur und an im warmiu kleit,

Verse: 3    wît und lanc zobelîn:
Verse: 4    sus muoste ûzen und innen sîn

Verse: 5    der pelliz und der mantel drobe.
Verse: 6    der swechest balc wære wol ze lobe:

Verse: 7    der was doch swarz unde grâ.
Verse: 8    des selben was ein hûbe aldâ

Verse: 9    ûf sînem houbete zwivalt
Verse: 10    von zobele. den man tiure galt,

Verse: 11    sinewel arâbesch ein borte
Verse: 12    oben drûf gehôrte,

Verse: 13    mitten dran ein knöphelîn,
Verse: 14    ein durchliuhtec rubîn.

Verse: 15    dâ saz manec ritter kluoc,
Verse: 16    dâ man jâmer vür si truoc.

Verse: 17    ein knappe spranc zer tür dar în,
Verse: 18    der truoc eine glævîn:

Verse: 19    der site was ze trûren guot.
Verse: 20    an der snîden huop sich bluot

Verse: 21    und lief den schaft unz ûf die hant,
Verse: 22    daz ez in dem ermel widerwant.

Verse: 23    dâ wart geweinet und geschrît
Verse: 24    ûf dem palase wît,

Verse: 25    daz volc von drîzec landen
Verse: 26    möhtez den ougen niht enblanden.

Verse: 27    er truoc si in sînen henden
Verse: 28    alumbe zen vier wenden

Verse: 29    unz aber wider zuo der tür.
Verse: 30    der knappe spranc hin ûz dâ vür.




Chapter: 232 
232


Verse: 1    gestillet was des volkes nôt,
Verse: 2    als in der jâmer ê gebôt,

Verse: 3    des si diu glævîn hete ermant,
Verse: 4    die der knappe brâhte in sîner hant.

Verse: 5    wil iuch nû niht erlangen,
Verse: 6    sô wirt hie zuo gevangen

Verse: 7    daz ich iuch bringe an die vart,
Verse: 8    wie dâ mit zuht gedienet wart.

Verse: 9    zende an dem palas
Verse: 10    ein stehelîn tür entslozzen was:

Verse: 11    dâ giengen ûz zwei werdiu kint
Verse: 12    (nû hœret wie diu geprüevet sint),

Verse: 13    daz si wol gæben minnen solt,
Verse: 14    swerz dâ mit dienste hete erholt.

Verse: 15    daz wâren juncvrouwen klâr.
Verse: 16    zwei schapel über blôziu hâr,

Verse: 17    bluomen was ir gebende.
Verse: 18    iewederiu ûf der hende

Verse: 19    truoc von golde ein kerzstal.
Verse: 20    ir hâr was reit, lanc und val.

Verse: 21    si truogen brinnendegiu lieht.
Verse: 22    hie sule wir vergezzen niht

Verse: 23    umbe der juncvrouwen gewant,
Verse: 24    dâ man si komende inne vant.

Verse: 25    diu grævîn von Tenabroc,
Verse: 26    brûn scharlachen was ir roc:

Verse: 27    des selben truoc ouch ir gespil.
Verse: 28    si wâren gefischieret vil

Verse: 29    mit zwein gürteln an der krenke
Verse: 30    ob der hüffe an dem gelenke.




Chapter: 233 
233


Verse: 1    nâch den kom ein herzogîn
Verse: 2    und ir gespil, zwei stöllelîn

Verse: 3    si truogen von helfenbein.
Verse: 4    ir munt nâch viurs rœte schein.

Verse: 5    die nigen alle viere.
Verse: 6    zwuo sazten schiere

Verse: 7    vür den wirt die stollen.
Verse: 8    dâ wart gedient mit vollen.

Verse: 9    die stuonden ensamt an eine schar
Verse: 10    und wâren alle wol gevar:

Verse: 11    den vieren was gelîch ir wât.
Verse: 12    nû seht wâ sich niht versûmet hât

Verse: 13    ander vrouwen vierstunt zwuo.
Verse: 14    die wâren dâ geschaffet zuo:

Verse: 15    viere truogen kerzen grôz,
Verse: 16    die andern viere niht verdrôz,

Verse: 17    si entrüegen einen tiuren stein,
Verse: 18    dâ tages diu sunne lieht durch schein.

Verse: 19    dâ vür was sîn name erkant:
Verse: 20    ez was ein grânât jâchant,

Verse: 21    beide lanc unde breit.
Verse: 22    durch die lîhte in dünne sneit,

Verse: 23    swer in zeinem tische maz:
Verse: 24    dâ obe der wirt durch rîcheit az.

Verse: 25    si giengen harte rehte
Verse: 26    vür den wirt al ehte,

Verse: 27    gein nîgen si ir houbet wegeten.
Verse: 28    viere die taveln legeten

Verse: 29    ûf helfenbein wîz als ein snê,
Verse: 30    stollen die dâ kômen ê.




Chapter: 234 
234


Verse: 1    mit zuht si kunden wider gên.
Verse: 2    zuo den êrsten vieren stên.

Verse: 3    an disen ehte vrouwen was
Verse: 4    röcke grüener denne ein gras,

Verse: 5    von Azagouc samît,
Verse: 6    gesniten wol lanc und wît.

Verse: 7    dâ mitten si zesamene twanc
Verse: 8    gürteln tiure, smal und lanc.

Verse: 9    dise ehte vrouwen kluoc,
Verse: 10    ieslîchiu ob ir hâre truoc

Verse: 11    ein kleine blüemîn schapel.
Verse: 12    cuns îwân von Nônel

Verse: 13    und Jernîs von Rîle,
Verse: 14    jâ was über manege mîle

Verse: 15    ze dienste ir tohter dar genomen:
Verse: 16    man sach die zwuo vürstîn komen

Verse: 17    in harte wünneclîcher wât.
Verse: 18    zwei mezzer snîdende als ein grât

Verse: 19    brâhten si durch wunder
Verse: 20    ûf zwein tweheln al besunder:

Verse: 21    daz was silber herte und wîz.
Verse: 22    dar an lac ein spæher vlîz:

Verse: 23    im was solh scherphen niht vermiten,
Verse: 24    ez hete stahel wol versniten.

Verse: 25    vor dem silber kômen vrouwen wert,
Verse: 26    der dar ze dienste was gegert:

Verse: 27    die truogen lieht dem silber bî,
Verse: 28    vier kint vor missewende vrî.

Verse: 29    sus giengen si alle sehse zuo.
Verse: 30    nû hœret waz ieslîchiu tuo:




Chapter: 235 
235


Verse: 1    si nigen, ir zwuo dô truogen dar
Verse: 2    ûf die tavel wol gevar

Verse: 3    daz silber unde legetenz nider.
Verse: 4    dô giengen si mit zühten wider

Verse: 5    zuo den êrsten zwelfen sân.
Verse: 6    ob ich geprüevet rehte hân,

Verse: 7    hie suln ahzehen vrouwen stên.
Verse: 8    âvoi nû siht man sehse gên

Verse: 9    in wæte die man tiure galt:
Verse: 10    daz was halbez blîalt,

Verse: 11    daz ander phelle von Nînivê.
Verse: 12    dise und die êrsten sehseê

Verse: 13    truogen zwelf röcke geteilet.
Verse: 14    gein tiurer kost geveilet.

Verse: 15    nâch den kom diu künegîn.
Verse: 16    ir antlitze gap den schîn,

Verse: 17    si wânden alle ez wolde tagen.
Verse: 18    man sach die maget an ir tragen

Verse: 19    phellel von Arâbî.
Verse: 20    ûf einem grüenen achmardî

Verse: 21    truoc si den wunsch von pardîs,
Verse: 22    beide wurzeln unde rîs:

Verse: 23    daz was ein dinc, daz hiez der grâl,
Verse: 24    erden wunsches überwal.

Verse: 25    Repanse de Schoie si hiez,
Verse: 26    die sich der grâl tragen liez.

Verse: 27    der grâl was von solher art,
Verse: 28    wol muoste ir kiusche sîn bewart,

Verse: 29    diu sîn ze rehte solde phlegen:
Verse: 30    diu muoste valsches sich bewegen.




Chapter: 236 
236


Verse: 1    vor dem grâle kômen lieht
Verse: 2    (diu wâren von armer koste niht),

Verse: 3    sehs glas lanc lûter wolgetân,
Verse: 4    dar inne balsem der wol bran.

Verse: 5    dô si kômen von der tür
Verse: 6    ze rehter mâze alsus her vür,

Verse: 7    mit zühten neic diu künegîn
Verse: 8    und al diu juncvrouwelîn

Verse: 9    die dâ truogen balsemvaz.
Verse: 10    diu künegîn valscheite laz

Verse: 11    sazte vür den wirt den grâl.
Verse: 12    diz mære giht daz Parzivâl

Verse: 13    dicke an si sach und dâhte:
Verse: 14    diu den grâl dâ brâhte,

Verse: 15    er hete ouch ir mantel an.
Verse: 16    mit zuht die sibene giengen dan

Verse: 17    zuo den ahzehen êrsten.
Verse: 18    dô liezen si die hêrsten

Verse: 19    zwischen sich, man sagete mir,
Verse: 20    zwelve iewederthalben ir.

Verse: 21    diu maget mit der krône
Verse: 22    stuont dâ harte schône.

Verse: 23    swaz ritter dô gesezzen was
Verse: 24    über al den palas,

Verse: 25    den wâren kamerære
Verse: 26    mit guldîn becken swære

Verse: 27    ie vieren geschaffet einer dar
Verse: 28    und ein juncherre wol gevar

Verse: 29    der eine wîze tweheln truoc.
Verse: 30    man sach dâ rîcheit genuoc:




Chapter: 237 
237


Verse: 1    der taveln hundert muosten sîn,
Verse: 2    die man dô truoc zer tür dar în.

Verse: 3    man sazte ieslîche schiere
Verse: 4    vür werder ritter viere,

Verse: 5    tischlachen var nâch wîze
Verse: 6    wurden drûf geleget mit vlîze.

Verse: 7    der wirt dô selbe wazzer nam.
Verse: 8    der was an hôchmuote lam,

Verse: 9    mit im twuoc sich Parzivâl:
Verse: 10    eine sîdîne tweheln wol gemâl

Verse: 11    die bôt eins grâven sun dâ nâch.
Verse: 12    dem was ze knien vür si gâch.

Verse: 13    swâ dô der taveln deheiniu stuont,
Verse: 14    dâ tet man vier knappen kunt

Verse: 15    daz si ir dienstes niht vergæzen
Verse: 16    den die dâ obe sæzen:

Verse: 17    zwêne knieten unde sniten,
Verse: 18    die andern zwêne niht vermiten,

Verse: 19    si entrüegen trinken und ezzen dar,
Verse: 20    und nâmen ir mit dienste war.

Verse: 21    hœrt mêr von rîcheite sagen:
Verse: 22    vier karrâschen muosten tragen

Verse: 23    manec tiure goltvaz
Verse: 24    ieslîchem ritter der dâ saz.

Verse: 25    man zôch si zen vier wenden.
Verse: 26    vier ritter mit ir henden

Verse: 27    man si ûf die taveln setzen sach.
Verse: 28    ieslîchem gienc ein schrîbære nâch,

Verse: 29    der sich dar zuo arbeite
Verse: 30    und si wider ûf bereite,




Chapter: 238 
238


Verse: 1    sô dâ gedienet wære.
Verse: 2    nû hœret ein ander mære.

Verse: 3    hundert knappen man gebôt:
Verse: 4    die nâmen in wîze tweheln brôt

Verse: 5    mit zühten vor dem grâle.
Verse: 6    die giengen al zemâle

Verse: 7    und teilden vür die taveln sich.
Verse: 8    man sagete mir, diz sage ouch ich

Verse: 9    ûf iuwer ieslîches eit,
Verse: 10    daz vor dem grâle wære bereit

Verse: 11    (sol ich des iemen triegen,
Verse: 12    sô müezet ir mit mir liegen),

Verse: 13    swâ nâch jener bôt die hant,
Verse: 14    daz er al bereite vant

Verse: 15    spîse warm, spîse kalt,
Verse: 16    spîse niuwe und dar zuo alt,

Verse: 17    daz zam und daz wilde.
Verse: 18    es enwürde nie dehein bilde,

Verse: 19    beginnet maneger sprechen:
Verse: 20    der wil sich übel rechen,

Verse: 21    wan der grâl was der sælden vruht,
Verse: 22    der werlde süeze alsolh genuht,

Verse: 23    er wac vil nâch gelîche
Verse: 24    als man saget von himelrîche.

Verse: 25    in kleiniu goltvaz man nam,
Verse: 26    als ieslîcher spîse zam,

Verse: 27    salsen, pheffer, âgrâz.
Verse: 28    dâ hete der kiusche und der vrâz

Verse: 29    alle gelîche genuoc,
Verse: 30    mit grôzer zuht manz vür si truoc.




Chapter: 239 
239


Verse: 1    môraz, wîn, sinôpel rôt,
Verse: 2    swâ nâch den naph ieslîcher bôt,

Verse: 3    swaz er trinkens kunde nennen,
Verse: 4    daz mohte er drinne erkennen

Verse: 5    allez von des grâles kraft.
Verse: 6    diu werde geselleschaft

Verse: 7    heten wirtschaft von dem grâl.
Verse: 8    wol gemarcte Parzivâl

Verse: 9    die rîcheit und daz wunder grôz:
Verse: 10    durch zuht in vrâgens doch verdrôz.

Verse: 11    er dâhte: "mir riet Gurnemanz
Verse: 12    mit grôzen triuwen âne schranz,

Verse: 13    ich solde vil gevrâgen niht.
Verse: 14    waz ob mîn wesen hie geschiht

Verse: 15    die mâze als dort bî im?
Verse: 16    âne vrâge ich vernim

Verse: 17    wiez dirre massenîe stêt."
Verse: 18    in dem gedanke nâher gêt

Verse: 19    ein knappe, der truoc ein swert:
Verse: 20    des balc was tûsent marke wert,

Verse: 21    sîn gehilze was ein rubîn,
Verse: 22    ouch möhte wol diu klinge sîn

Verse: 23    grôzer wunder urhap.
Verse: 24    der wirt ez sînem gaste gap.

Verse: 25    der sprach: "herre, ich brâhtez in nôt
Verse: 26    in maneger stat, ê daz mich got

Verse: 27    an dem lîbe hât geletzet.
Verse: 28    nû sît dâ mite ergetzet,

Verse: 29    ob man iuwer hie niht wol enphlege.
Verse: 30    ir mugetz wol vüeren alle wege:




Chapter: 240 
240


Verse: 1    swenne ir geprüevet sînen art,
Verse: 2    ir sît gein strîte dâ mite bewart."

Verse: 3    ouwê daz er niht vrâcte dô!
Verse: 4    des bin ich vür in noch unvrô,

Verse: 5    wande erz emphienc in sîne hant,
Verse: 6    dô was er vrâgens mite ermant.

Verse: 7    ouch riuwet mich sîn süezer wirt,
Verse: 8    den ungenâde niht verbirt,

Verse: 9    des im von vrâgen nû wære rât.
Verse: 10    genuoc man dâ gegeben hât:

Verse: 11    dies phlâgen, die griffenz an,
Verse: 12    si truogenz gerüste wider dan.

Verse: 13    vier karrâschen man ê luot.
Verse: 14    ieslîch vrouwe ir dienest tuot,

Verse: 15    ê die jungesten, nû die êrsten.
Verse: 16    dô schuofen si aber die hêrsten

Verse: 17    wider zuo dem grâle.
Verse: 18    dem wirte und Parzivâle

Verse: 19    mit zühten neic diu künegîn
Verse: 20    und al diu juncvrouwelîn.

Verse: 21    si brâhten wider în zer tür
Verse: 22    daz si mit zuht ê truogen vür.

Verse: 23    Parzivâl in blicte nâch:
Verse: 24    an einem spanbette er ersach

Verse: 25    in einer kemenâten,
Verse: 26    ê si nâch in zuo getâten,

Verse: 27    den aller schœnsten alden man
Verse: 28    des er künde ie gewan.

Verse: 29    ich macz wol sprechen âne guft,
Verse: 30    er was noch wîzer dan der tuft.




Chapter: 241 
241


Verse: 1    wer der selbe wære,
Verse: 2    des vreischet her nâch mære.

Verse: 3    dar zuo der wirt, sîn burc, sîn lant,
Verse: 4    diu werden iu von mir genant

Verse: 5    her nâch sô des wirdet zît,
Verse: 6    bescheidenlîchen âne strît

Verse: 7    und âne allez vür zogen.
Verse: 8    ich sage die senewen âne bogen.

Verse: 9    diu senewe ist ein bîspel.
Verse: 10    nû dunket iuch der boge snel:

Verse: 11    doch ist sneller daz diu senewe jaget.
Verse: 12    ob ich iu rehte hân gesaget,

Verse: 13    diu senewe gelîchet mæren sleht:
Verse: 14    diu dunkent ouch die liute reht.

Verse: 15    swer iu saget von der krümbe,
Verse: 16    der wil iuch leiten ümbe.

Verse: 17    swer den bogen gespannen siht,
Verse: 18    der senewen er der slehte giht,

Verse: 19    man welle si zer biuge erdenen
Verse: 20    sô si den schuz muoz menen.

Verse: 21    swer aber dem sîn mære schiuzet,
Verse: 22    des in durch nôt verdriuzet

Verse: 23    (wan daz hât dâ ninder stat
Verse: 24    und vil gerûmeclîchen phat

Verse: 25    zeinem ôren în, zem andern vür),
Verse: 26    mîn arbeit ich gar verlür,

Verse: 27    ob den mîn mære drünge:
Verse: 28    ich sagete oder sünge,

Verse: 29    daz ez noch baz vernæme ein boc
Verse: 30    oder ein ulmeger stoc.




Chapter: 242 
242


Verse: 1    ich wil iu doch baz bediuten
Verse: 2    von disen jâmerbæren liuten,

Verse: 3    dar kom geriten Parzival.
Verse: 4    man sach dâ selten vreuden schal,

Verse: 5    ez wære bûhurt oder tanz:
Verse: 6    ir klagendiu stæte was sô ganz,

Verse: 7    si enkêrten sich an schimphen niht.
Verse: 8    swâ man noch volkes siht,

Verse: 9    den tuot etswenne vreude wol:
Verse: 10    dort wâren die winkel alle vol

Verse: 11    und ouch ze hove dâ man si sach.
Verse: 12    der wirt ze sînem gaste sprach:

Verse: 13    "ich wæne man iu gebettet hât.
Verse: 14    sît ir müede, sôst mîn rât

Verse: 15    daz ir gêt: leget iuch slâfen."
Verse: 16    nû solde ich schrîen wâfen

Verse: 17    umbe ir scheiden daz si tuont:
Verse: 18    ez wirt grôz schade in beiden kunt.

Verse: 19    von dem spanbette trat
Verse: 20    ûf den teppech an eine stat

Verse: 21    Parzivâl der wol geslaht.
Verse: 22    der wirt bôt im guote naht:

Verse: 23    diu ritterschaft dô gar ûf spranc.
Verse: 24    ein teil ir im dar nâher dranc:

Verse: 25    dô vuorten si den jungen man
Verse: 26    in eine kemenâten sân.

Verse: 27    diu was wol gehêret,
Verse: 28    mit einem bette gêret,

Verse: 29    daz mich mîn armuot immer müet,
Verse: 30    sît diu erde alsolhe rîcheit blüet:




Chapter: 243 
243


Verse: 1    dem bette armuot was tiur.
Verse: 2    als er glohte in einem viur,

Verse: 3    lac drûfe ein phellel lieht gemâl.
Verse: 4    die ritter bat dô Parzivâl

Verse: 5    wider varn an ir gemach,
Verse: 6    dô er dâ niht mêr bette sach.

Verse: 7    mit urloube si vuoren dan.
Verse: 8    hie hebet sich ander dienest an.

Verse: 9    vil kerzen und diu varwe sîn
Verse: 10    die gâben ze gegenstrîte schîn:

Verse: 11    waz möhte liehter sîn der tac?
Verse: 12    vor sînem bette ein anderz lac,

Verse: 13    dar ûfe ein kulter. dâ er dâ saz,
Verse: 14    juncherren snel und niht ze laz

Verse: 15    maneger im dar nâher spranc:
Verse: 16    si entschuohten bein, diu wâren blanc.

Verse: 17    ouch zôch im mêr gewandes abe
Verse: 18    manec wol geborner knabe.

Verse: 19    vlætec wâren diu selben kindelîn.
Verse: 20    dar nâch gienc dô zer tür dar în

Verse: 21    vier klâre juncvrouwen:
Verse: 22    die solden dennoch schouwen

Verse: 23    wie man des heldes phlæge
Verse: 24    und ob er sanfte læge,

Verse: 25    als mir diu âventiure gewuoc.
Verse: 26    vor ieslîcher ein knappe truoc

Verse: 27    eine kerzen diu wol bran.
Verse: 28    Parzivâl der snelle man

Verse: 29    spranc underz declachen.
Verse: 30    si sageten: "ir sult wachen




Chapter: 244 
244


Verse: 1    durch uns noch eine wîle."
Verse: 2    ein spil mit der île

Verse: 3    hete er unz an den ort gespilt.
Verse: 4    daz man gein liehter varwe zilt,

Verse: 5    daz begunge ir ougen süezen,
Verse: 6    ê si emphiengen sîn grüezen.

Verse: 7    ouch vuocten in gedanke nôt,
Verse: 8    daz im sîn munt was sô rôt

Verse: 9    und daz vor jugende niemen dran
Verse: 10    kôs gein einer halben gran.

Verse: 11    dise vier juncvrouwen kluoc,
Verse: 12    hœret waz ieslîchiu truoc,

Verse: 13    môraz, wîn und lûtertranc
Verse: 14    truogen drî ûf henden blanc,

Verse: 15    diu vierde juncvrouwe wîs
Verse: 16    truoc obez der art von pardîs

Verse: 17    ûf einer tweheln blanc gevar.
Verse: 18    diu selbe kniete ouch vür in dar:

Verse: 19    er bat die vrouwen sitzen.
Verse: 20    si sprach: "lât mich bî witzen.

Verse: 21    sô wæret ir dienstes ungewert,
Verse: 22    als mîn her vür iuch ist gegert."

Verse: 23    süezer rede er gein in niht vergaz.
Verse: 24    der herre tranc, ein teil er az:

Verse: 25    mit urloube si giengen wider,
Verse: 26    Parzivâl sich legete nider.

Verse: 27    ouch sazten juncherrelîn
Verse: 28    ûf den teppech die kerzen sîn,

Verse: 29    dô si in slâfen sâhen:
Verse: 30    si begunden dannen gâhen.




Chapter: 245 
245


Verse: 1    Parzivâl niht eine lac:
Verse: 2    geselleclîche unz an den tac

Verse: 3    was bî im strengiu arbeit.
Verse: 4    ir boten künftegiu leit

Verse: 5    sanden im in slâfe dar,
Verse: 6    sô daz der junge wol gevar

Verse: 7    sîner muoter troum gar widerwac,
Verse: 8    des si nâch Gahmurete phlac.

Verse: 9    sus wart gesteppet im sîn troum,
Verse: 10    mit swertslegen umbe den soum,

Verse: 11    dâ vor mit maneger tjoste rîch.
Verse: 12    von rabîne hurteclîch

Verse: 13    er leit in slâfe etslîch nôt.
Verse: 14    möhte er drîzecstunt sîn tôt,

Verse: 15    daz hete er wachende ê gedolt:
Verse: 16    sus teilde im ungemach den solt.

Verse: 17    von disen strengen sachen
Verse: 18    muoste er durch nôt erwachen:

Verse: 19    im swizten âdern unde bein.
Verse: 20    der tac ouch durch diu venster schein.

Verse: 21    dô sprach er: "wê wâ sint diu kint,
Verse: 22    daz si hie vor mir niht sint?

Verse: 23    wer sol mir bieten mîn gewant?"
Verse: 24    sus warte ir der wîgant,

Verse: 25    unz er anderstunt entslief.
Verse: 26    niemen dâ redete noch enrief:

Verse: 27    si wâren gar verborgen.
Verse: 28    umbe den mitten morgen

Verse: 29    dô erwachete aber der junge man.
Verse: 30    ûf rihte sich der küene sân,




Chapter: 246 
246


Verse: 1    ûf dem teppeche sach der degen wert
Verse: 2    ligen sîn harnas und zwei swert:

Verse: 3    daz eine der wirt im geben hiez,
Verse: 4    daz ander was von Gaheviez.

Verse: 5    sus sprach er zim selben sân:
Verse: 6    "ouwê durch waz ist diz getân?

Verse: 7    deiswâr ich sol mich wâpen drîn.
Verse: 8    ich leit in slâfe alsolhen pîn,

Verse: 9    daz mir wachende arbeit
Verse: 10    noch hiute, wæne ich, ist bereit.

Verse: 11    hât dirre wirt urliuges nôt,
Verse: 12    sô leiste ich gerne sîn gebot

Verse: 13    und ir gebot mit triuwen,
Verse: 14    diu disen mantel niuwen

Verse: 15    mir lêch durch ir güete.
Verse: 16    wan stüende ir gemüete,

Verse: 17    daz si dienest wolde nemen!
Verse: 18    des kunde mich durch si gezemen

Verse: 19    und doch niht durch ir minne,
Verse: 20    wan mîn wîp, diu küneginne,

Verse: 21    ist an ir lîbe alsô klâr
Verse: 22    oder vürbaz, daz ist wâr."

Verse: 23    er tet als er tuon sol:
Verse: 24    von vuoz ûf wâpende er sich wol

Verse: 25    durch strîtes antwurte.
Verse: 26    zwei swert er umbe gurte,

Verse: 27    zer tür ûz gienc der werde degen.
Verse: 28    dâ was sîn ors an die stegen

Verse: 29    geheftet, schilt unde sper
Verse: 30    lente dâ bî: daz was sîn ger.




Chapter: 247 
247


Verse: 1    ê Parzivâl der wîgant
Verse: 2    sich des orses underwant,

Verse: 3    manegez er der gademe erlief,
Verse: 4    sô daz er nâch den liuten rief.

Verse: 5    niemen er hôrte noch ensach,
Verse: 6    ungevüege leit im dran geschach:

Verse: 7    daz hete im zorn gereizet.
Verse: 8    er lief dâ er was erbeizet

Verse: 9    des âbents, dô er komen was.
Verse: 10    dâ was erde unde gras

Verse: 11    mit tretenne gerüeret
Verse: 12    undz tou gar zevüeret.

Verse: 13    al schrîende lief der junge man
Verse: 14    wider ze sînem orse sân,

Verse: 15    mit bâgenden worten
Verse: 16    saz er drûf: die porten

Verse: 17    vant er wît offen stên,
Verse: 18    dâ durch ûz grôze slâ gên.

Verse: 19    niht langer er dô habete,
Verse: 20    vaste ûf die brücke er drabete.

Verse: 21    ein verborgen knappe daz seil
Verse: 22    zôch, daz der slagebrücken teil

Verse: 23    hetez ors vil nâch gevellet nider.
Verse: 24    Parzivâl der sach sich wider:

Verse: 25    dô wolde er hân gevrâget baz.
Verse: 26    "ir sult varn der sunnen haz"

Verse: 27    sprach der knappe, "ir sît ein gans.
Verse: 28    möhtet ir gerüeret hân den vlans

Verse: 29    und hetet den wirt gevrâget!
Verse: 30    vil prîses iuch hât betrâget."




Chapter: 248 
248


Verse: 1    nâch den mæren schrei der gast,
Verse: 2    gegenrede im gar gebrast.

Verse: 3    swie vil er nâch geriefe,
Verse: 4    rehte als er gênde sliefe

Verse: 5    warp der knappe und sluoc die porten zuo.
Verse: 6    dô was sîn dan scheiden ze vruo

Verse: 7    an der vlustbæren zît
Verse: 8    dem der nû zins von vreuden gît:

Verse: 9    diu ist an im verborgen.
Verse: 10    umbe den wurf der sorgen

Verse: 11    wart getopelt, dô er den grâl vant,
Verse: 12    mit sînen ougen âne hant

Verse: 13    und âne würfels ecke.
Verse: 14    ob in nû kumber wecke,

Verse: 15    des was er dâ vor niht gewent:
Verse: 16    er enhete sich niht vil gesent.

Verse: 17    Parzivâl der huop sich nâch
Verse: 18    vaste ûf die slâ die er dâ sach.

Verse: 19    er dâhte: "die vor mir rîten,
Verse: 20    ich wæne die hiute strîten

Verse: 21    manlîche umbe mîns wirtes dinc.
Verse: 22    ruochten sis, sô wære ir rinc

Verse: 23    mit mir niht verkrenket.
Verse: 24    aldâ enwürde niht gewenket,

Verse: 25    ich hülfe in in der selben nôt,
Verse: 26    daz ich gediende mîn brôt

Verse: 27    und ouch diz wünneclîche swert,
Verse: 28    daz mir gap ir herre wert.

Verse: 29    [ungedienet ich daz trage:
Verse: 30    si wænent lîhte ich sî ein zage.]"




Chapter: 249 
249


Verse: 1    der valscheite widersaz
Verse: 2    kêrte ûf der huofslege kraz.

Verse: 3    sîn scheiden dan daz riuwet mich.
Verse: 4    alrêst nû âventiurt ez sich:

Verse: 5    dô begunde krenken sich ir spor.
Verse: 6    sich schieden die dâ riten vor:

Verse: 7    ir slâ wart smal, diu ê was breit.
Verse: 8    er verlôs si gar, daz was im leit.

Verse: 9    mære vriesch dô der junge man,
Verse: 10    dâ von er herzenôt gewan.

Verse: 11    dô erhôrte der degen ellens rîch
Verse: 12    einer vrouwen stimme jæmerlîch.

Verse: 13    ez was dennoch von touwe naz.
Verse: 14    vor im ûf einer linden saz

Verse: 15    ein maget, der vuocte ir triuwe nôt.
Verse: 16    ein gebalsemt ritter tôt

Verse: 17    lente ir zwischen den armen.
Verse: 18    swen ez niht wolde erbarmen,

Verse: 19    der si sô sitzen sæhe,
Verse: 20    untriuwen ich im jæhe.

Verse: 21    sîn ors dô gein ir wande
Verse: 22    der wênec si bekande:

Verse: 23    si was doch sîner muomen kint.
Verse: 24    al irdisch triuwe was ein wint,

Verse: 25    wan die man an ir lîbe sach.
Verse: 26    Parzivâl si gruozte und sprach:

Verse: 27    "vrouwe, mir ist vil leit
Verse: 28    iuwer senlîchiu arbeit:

Verse: 29    bedurfet ir mîns dienstes iht,
Verse: 30    in iuwerm dienste man mich siht."




Chapter: 250 
250


Verse: 1    si dankete im ûz jâmers siten
Verse: 2    und vrâcte in wannen er kœme geriten.

Verse: 3    si sprach: "ez ist widerzæme
Verse: 4    daz iemen an sich næme

Verse: 5    sîne reise in dise waste.
Verse: 6    unkundem gaste

Verse: 7    mac hie wol grôzer schade geschehen.
Verse: 8    ich hânz gehôrt und wol gesehen

Verse: 9    daz hie vil liute ir lîp verlurn,
Verse: 10    die werlîche den tôt erkurn.

Verse: 11    kêrt hinnen, ob ir welt genesen.
Verse: 12    saget ê, wâ sît ir gewesen?"

Verse: 13    "dar ist ein mîle oder mêr,
Verse: 14    daz ich gesach nie burc sô hêr

Verse: 15    mit aller slahte rîcheit.
Verse: 16    inner kurzer wîle ich dannen reit."

Verse: 17    si sprach: "swer iu getrûwet iht,
Verse: 18    den sult ir gerne triegen niht.

Verse: 19    ir traget doch einen gastes schilt.
Verse: 20    iuch möhte swaldes hân bevilt

Verse: 21    von erbûwenem lande her geriten.
Verse: 22    inner drîzec mîlen wart nie versniten

Verse: 23    ze keinem bûwe holz noch stein:
Verse: 24    wan ein burc diu stêt al ein,

Verse: 25    diust erden wunsches rîche.
Verse: 26    swer die suochet vlîzeclîche,

Verse: 27    leider der envindet ir niht:
Verse: 28    vil liute manz doch werben siht.

Verse: 29    ez muoz unwizzende geschehen,
Verse: 30    swer immer sol die burc gesehen.




Chapter: 251 
251


Verse: 1    ich wæne, herre, diust iu niht bekant:
Verse: 2    Munsalvæsche ist si genant.

Verse: 3    der bürge wirtes roiame,
Verse: 4    Terre de Salvæsche ist sîn name.

Verse: 5    ez brâhte der alde Titurel
Verse: 6    an sînen sun rois Frimutel:

Verse: 7    sus hiez der werde wîgant.
Verse: 8    manegen prîs erwarp sîn hant.

Verse: 9    der lac von einer tjoste tôt,
Verse: 10    als im diu minne dar gebôt.

Verse: 11    der selbe liez vier werdiu kint:
Verse: 12    bî rîcheit driu in jâmer sint,

Verse: 13    der vierde hât armuot.
Verse: 14    durch got vür sünde er daz tuot:

Verse: 15    der selbe heizet Trevrizent.
Verse: 16    Anfortas sîn bruoder lent:

Verse: 17    der mac gerîten noch gegên
Verse: 18    noch geligen noch gestên.

Verse: 19    der ist ûf Munsalvæsche wirt.
Verse: 20    ungenâde in niht verbirt."

Verse: 21    si sprach: "herre, wæret ir komen dar
Verse: 22    zuo der jæmerlîchen schar,

Verse: 23    sô wære dem wirte worden rât
Verse: 24    vil kumbers den er lange hât."

Verse: 25    der Wâleis zuo der megede sprach:
Verse: 26    "grœzlîch wunder ich dâ sach

Verse: 27    und manege vrouwen wol getân."
Verse: 28    bî der stimme erkande si den man.

Verse: 29    dô sprach si: "dû bist Parzivâl.
Verse: 30    nû sage et, sæhe dû den grâl




Chapter: 252 
252


Verse: 1    und den wirt vreuden lære?
Verse: 2    lâ hœren liebiu mære,

Verse: 3    ob wendec ist sîn vreise.
Verse: 4    wol dich der sælden reise!

Verse: 5    wan swaz die lüfte hânt beslagen,
Verse: 6    dar obe muostû hœhe tragen:

Verse: 7    dir dienet zam unde wilt.
Verse: 8    ze rîcheit ist dir wunsch gezilt."

Verse: 9    Parzivâl der wîgant
Verse: 10    sprach: "wâ von habet ir mich erkant?"

Verse: 11    si sprach: "dâ bin ichz diu maget,
Verse: 12    diu dir ê kumber hât geklaget

Verse: 13    und diu dir sagete dînen namen.
Verse: 14    dû endarft dich niht der sippe schamen,

Verse: 15    daz dîn muoter ist mîn muome.
Verse: 16    wîplîcher kiusche ein bluome

Verse: 17    ist si, geliutert âne tou.
Verse: 18    got lône dir daz dich dô sô rou

Verse: 19    mîn vriunt, der mir zer tjost lac tôt.
Verse: 20    ich hân in alhie: nû prüeve nôt

Verse: 21    die mir got hât an im gegeben,
Verse: 22    daz er niht langer solde leben.

Verse: 23    er phlac manlîcher güete.
Verse: 24    sîn sterben mich dô müete:

Verse: 25    ouch hân ich sît von tage ze tage
Verse: 26    vürbaz erkennet niuwe klage."

Verse: 27    "ouwê war kom dîn rôter munt?
Verse: 28    bistûz Sigûne, diu mir kunt

Verse: 29    tet wer ich was, âne allen vâr?
Verse: 30    dîn reideleht lanc brûnez hâr,




Chapter: 253 
253


Verse: 1    des ist dîn houbet blôz getân.
Verse: 2    zem fôreist in Brizljân

Verse: 3    sach ich dich dô vil minneclîch,
Verse: 4    swie dû wæres jâmers rîch.

Verse: 5    dû hâs verlorn varwe und kraft.
Verse: 6    dîner herten geselleschaft

Verse: 7    verdrüzze mich, solde ich die haben:
Verse: 8    wir suln disen tôten man begraben."

Verse: 9    dô nazten diu ougen ir die wât.
Verse: 10    ouch was vroun Lûneten rât

Verse: 11    ninder dâ bî ir gewesen.
Verse: 12    diu riet ir vrouwen: "lât genesen

Verse: 13    disen man, der den iuwern sluoc:
Verse: 14    er mac ergetzen iuch genuoc."

Verse: 15    Sigûne gerte ergetzens niht
Verse: 16    als wîp die man bî wanke siht,

Verse: 17    manege, der ich wil gedagen.
Verse: 18    hœrt mêr Sigûnen triuwe sagen.

Verse: 19    diu sprach: "sol mich iht gevreun,
Verse: 20    daz tuot ein dinc, ob in sîn teun

Verse: 21    læzet, den vil trûregen man.
Verse: 22    schiede dû helflîche dan,

Verse: 23    sô ist dîn lîp wol prîses wert.
Verse: 24    dû vüeres ouch umbe dich sîn swert:

Verse: 25    bekennestû des swertes segen,
Verse: 26    dû maht âne angest strîtes phlegen:

Verse: 27    sîn ecke ligent im rehte.
Verse: 28    von edelem geslehte

Verse: 29    worhtez Trebuchetes hant.
Verse: 30    ein brunne stêt bî Karnant,




Chapter: 254 
254


Verse: 1    dar nâch der künec heizet Lac.
Verse: 2    daz swert gestêt ganz einen slac,

Verse: 3    am andern ez zevellet gar:
Verse: 4    wiltûz denne wider bringen dar,

Verse: 5    ez wirt ganz von des wazzers trân.
Verse: 6    dû muost des urspringes hân

Verse: 7    underm velse, ê in beschine der tac.
Verse: 8    der selbe brunne heizet Lac.

Verse: 9    sint diu stücke niht verrêret,
Verse: 10    der si rehte zein ander kêret,

Verse: 11    sô si der brunne machet naz,
Verse: 12    ganz unde sterker baz

Verse: 13    wirt im valz und ecke sîn
Verse: 14    und verliesent niht diu mâl ir schîn.

Verse: 15    daz swert bedarf wol segens wort.
Verse: 16    ich vürhte diu hâstû lâzen dort:

Verse: 17    hât si aber dîn munt gelernet,
Verse: 18    sô wehset unde kernet

Verse: 19    immer sælden kraft bî dir.
Verse: 20    lieber neve, geloube mir,

Verse: 21    sô muoz gar dienen dîner hant
Verse: 22    swaz dîn lîp dâ wunders vant.

Verse: 23    ouch mahtû tragen schône
Verse: 24    immer sælden krône

Verse: 25    hôhe ob den werden.
Verse: 26    den wunsch ûf der erden

Verse: 27    hâstû volleclîche:
Verse: 28    niemen ist sô rîche,

Verse: 29    der gein dir koste mege hân.
Verse: 30    hâstû vrâge ir reht getân?"




Chapter: 255 
255


Verse: 1    er sprach: "ich hân gevrâget niht."
Verse: 2    "ouwê daz iuch mîn ouge siht"

Verse: 3    sprach diu jâmerbæriu maget,
Verse: 4    "sît ir vrâgens sît verzaget!

Verse: 5    ir sâhet doch solh wunder grôz
Verse: 6    (daz iuch vrâgens dô verdrôz,

Verse: 7    aldâ ir wâret dem grâle bî!),
Verse: 8    manege vrouwen valsches vrî,

Verse: 9    die werden Garschiloien
Verse: 10    und Repanse de Schoien,

Verse: 11    und snîdende silber und bluotec sper,
Verse: 12    ouwê waz woldet ir zuo mir her,

Verse: 13    gunêrter lîp, vervluochet man!
Verse: 14    ir truoget den eiterwolves zan,

Verse: 15    dâ diu galle in der triuwe
Verse: 16    an iu bekleip sô niuwe.

Verse: 17    iuch solde iuwer wirt erbarmet hân,
Verse: 18    an dem got wunder hât getân,

Verse: 19    und hetet gevrâget sîner nôt.
Verse: 20    ir lebet und sît an sælden tôt."

Verse: 21    dô sprach er: "liebiu niftel mîn,
Verse: 22    tuo bezzern willen gein mir schîn:

Verse: 23    ich wandel, hân ich iht getân."
Verse: 24    "ir sult wandels sîn erlân"

Verse: 25    sprach diu maget. "mirst wol bekant,
Verse: 26    ze Munsalvæsche an iu verswant

Verse: 27    êre und ritterlîcher prîs.
Verse: 28    ir envindet nû deheinen wîs

Verse: 29    deheine gegenrede an mir."
Verse: 30    Parzivâl sus schiet von ir.




Chapter: 256 
256


Verse: 1    daz er vrâgens was sô laz,
Verse: 2    dô er bî dem trûregen wirte saz,

Verse: 3    daz rou dô grœzlîche
Verse: 4    den helt ellens rîche.

Verse: 5    durch klage und durch den tac sô heiz
Verse: 6    begunde netzen in der sweiz:

Verse: 7    durch den luft von im er bant
Verse: 8    den helm und vuorte in in der hant,

Verse: 9    er entstricte die vinteilen sîn.
Verse: 10    durch îsers râm was lieht sîn schîn.

Verse: 11    er kom ûf eine niuwe slâ,
Verse: 12    wande ez gienc vor im aldâ

Verse: 13    ein ors daz was wol beslagen,
Verse: 14    und ein barvuoz phert muoste tragen

Verse: 15    eine vrouwen, die er sach.
Verse: 16    nâch der ze rîten im geschach,

Verse: 17    ir phert gein kumber was verselt:
Verse: 18    man hete im wol durch hût gezelt

Verse: 19    elliu sîniu rippe gar.
Verse: 20    als ein harm ez was gevar

Verse: 21    (ein bestîn halfter lac dar ane,
Verse: 22    unz ûf den huof swanc im diu mane),

Verse: 23    sîn ougen tief, die gruoben wît.
Verse: 24    ouch was der vrouwen runzît

Verse: 25    vertwâlet und vertrecket,
Verse: 26    durch hunger dicke erwecket:

Verse: 27    ez was dürre als ein zunder.
Verse: 28    sîn gên daz was ein wunder,

Verse: 29    wande ez reit ein vrouwe wert,
Verse: 30    diu selten kunrierte phert.




Chapter: 257 
257


Verse: 1    dâ lac ûf ein gereite,
Verse: 2    smal âne alle breite,

Verse: 3    geschelle und bogen verrêret,
Verse: 4    grôz zadel dran gemêret

Verse: 5    der vrouwen trûrec, niht ze geil.
Verse: 6    ir surzengel was ein seil:

Verse: 7    dem was si doch ze wol geborn.
Verse: 8    ouch heten die este und etslîch dorn

Verse: 9    ir hemde zevüeret:
Verse: 10    swâ daz mit zerren was gerüeret,

Verse: 11    dâ sach er vil der stricke,
Verse: 12    dar unde liehte blicke,

Verse: 13    ir hût noch wîzer denne ein swane.
Verse: 14    si enhete niht wan knoden ane.

Verse: 15    swâ die wâren svelles dach,
Verse: 16    in blanker varwe er daz sach:

Verse: 17    daz ander leit von sunnen nôt.
Verse: 18    swiez ir kom, ir munt was rôt:

Verse: 19    der muoste alsolhe varwe tragen,
Verse: 20    man hete viur wol drûz geslagen.

Verse: 21    swâ man si wolde an rîten,
Verse: 22    daz was zer blôzen sîten:

Verse: 23    nante si iemen vilân,
Verse: 24    der hete ir unreht getân,

Verse: 25    wan si hete wênec an ir.
Verse: 26    durch iuwer zuht geloubet mir:

Verse: 27    si truoc ungedienten haz,
Verse: 28    wîplîcher güete si nie vergaz.

Verse: 29    ich sagete iu vil armuot:
Verse: 30    war zuo? diz ist als guot.

Verse: 31    doch næme ich solchen blôzen lîp
Verse: 32    vür etslîch wol gekleidet wîp.




Chapter: 258 
258


Verse: 1    dô Parzivâl gruoz gein ir sprach,
Verse: 2    an in si erkenneclîchen sach:

Verse: 3    er was der schœnste über elliu lant.
Verse: 4    dâ von si in schiere hete erkant.

Verse: 5    si sagete: "ich hân iuch ê gesehen.
Verse: 6    dâ von ist leide mir geschehen:

Verse: 7    doch müeze iu vreude und êre
Verse: 8    got immer geben mêre

Verse: 9    denne ir um mich gedienet hât.
Verse: 10    des ist nû ermer mîn wât

Verse: 11    denne ir si jungest sâhet.
Verse: 12    wæret ir niht genâhet

Verse: 13    mir an der selben zît,
Verse: 14    sô hete ich êre âne strît."

Verse: 15    dô sprach er: "vrouwe, merket baz,
Verse: 16    gein wem ir kêret iuwern haz.

Verse: 17    jâ enwart von mînem lîbe
Verse: 18    iu noch deheinen wîbe

Verse: 19    laster nie gemêret
Verse: 20    (sô hete ich mich gunêret)

Verse: 21    sît ich den schilt von êrste gewan
Verse: 22    und ritters vuore mich versan.

Verse: 23    mirst ander iuwer kumber leit."
Verse: 24    al weinde diu vrouwe reit,

Verse: 25    daz si begôz ir brüstelîn.
Verse: 26    als si gedræt solden sîn,

Verse: 27    diu stuonden blanc hôch sinewel:
Verse: 28    jâ enwart nie dræhsel sô snel,

Verse: 29    der si gedræt hete baz.
Verse: 30    swie minneclîch diu vrouwe saz,




Chapter: 259 
259


Verse: 1    si muoste in doch erbarmen:
Verse: 2    mit henden und mit armen

Verse: 3    begunde si sich decken
Verse: 4    vor Parzivâl dem recken.

Verse: 5    dô sprach er: "vrouwe, nemt durch got
Verse: 6    ûf rehten dienest sunder spot

Verse: 7    an iuwern lîp mîn kursît."
Verse: 8    "herre, wære daz âne strît

Verse: 9    daz al mîn vreude læge dran,
Verse: 10    sô getörste ichz doch niht grîfen an.

Verse: 11    welt ir uns tœtens machen vrî,
Verse: 12    sô rîtet daz ich iu verre sî.

Verse: 13    doch klagete ich wênec mîne nôt,
Verse: 14    wan daz ich vürhte ir kieset den tôt."

Verse: 15    dô sprach er: "vrouwe, wer næme unsz leben?
Verse: 16    daz hât uns gotes kraft gegeben:

Verse: 17    ob des gerte ein ganzez her,
Verse: 18    man sæhe mich vür uns ze wer."

Verse: 19    si sprach: "es gert ein werder degen:
Verse: 20    der hât sich strîtes sô bewegen,

Verse: 21    iuwer sehse kœmens in arbeit.
Verse: 22    mirst iuwer rîten bî mir leit.

Verse: 23    ich was etswenne sîn wîp:
Verse: 24    nû möhte mîn vertwâlet lîp

Verse: 25    des heldes dierne niht gesîn.
Verse: 26    sus tuot er gein mir zürnen schîn."

Verse: 27    dô sprach er zuo der vrouwen sân:
Verse: 28    "wer ist hie mit iuwerm man?

Verse: 29    wan vlühe ich nû durch iuwern rât,
Verse: 30    daz diuhte iuch lîhte ein missetât.




Chapter: 260 
260


Verse: 1    swenne ich vliehen lerne,
Verse: 2    sô stirbe ich alsô gerne."

Verse: 3    dô sprach diu blôze herzogîn:
Verse: 4    "er hât hie niemen denne mîn."

Verse: 5    "der trôst ist kranc gein strîtes sige."
Verse: 6    niht wan knoden und der rige

Verse: 7    was an der vrouwen hemde ganz.
Verse: 8    wîplîcher kiusche lobes kranz

Verse: 9    truoc si mit armüete:
Verse: 10    si phlac der wâren güete

Verse: 11    sô daz der valsch an ir verswant.
Verse: 12    die vinteilen er vür sich bant,

Verse: 13    gein strîte er wolde vüeren
Verse: 14    den helm er mit den snüeren

Verse: 15    ebene ze sehenne ructe.
Verse: 16    innen des daz ors sich bucte,

Verse: 17    gein dem pherde ez schrîen niht vermeit.
Verse: 18    der vor Parzivâl dâ reit

Verse: 19    und vor der blôzen vrouwen,
Verse: 20    der erhôrtez und wolde schouwen

Verse: 21    wer bî sînem wîbe rite.
Verse: 22    daz ors warf er mit zornes site

Verse: 23    vaste ûz dem stîge.
Verse: 24    gein strîteclîchem wîge

Verse: 25    hielt der herzoge Orilus
Verse: 26    gereit zeiner tjost alsus,

Verse: 27    mit rehter manlîcher ger,
Verse: 28    von Gaheviez mit einem sper:

Verse: 29    daz was geverwet genuoc,
Verse: 30    rehte als er sîniu wâpen truoc.




Chapter: 261 
261


Verse: 1    sînen helm worhte Trebuchet,
Verse: 2    sîn schilt was ze Dôlet

Verse: 3    in Kailetes lande
Verse: 4    geworht dem wîgande:

Verse: 5    rant und buckel heten kraft.
Verse: 6    z Alexandrîe in heidenschaft

Verse: 7    was geworht ein phellel guot,
Verse: 8    des der vürste hôchgemuot

Verse: 9    truoc kursît und wâpenroc.
Verse: 10    sîn decke was ze Tenabroc

Verse: 11    geworht ûz ringen herte.
Verse: 12    sîn stolzheit in lêrte,

Verse: 13    der îserînen decke dach
Verse: 14    was ein phellel (des man jach

Verse: 15    daz der tiure wære),
Verse: 16    rîche und doch niht swære

Verse: 17    sîne hosen, halsberc, hersenier.
Verse: 18    und in îserîniu schinnelier

Verse: 19    was gewâpent dirre küene man,
Verse: 20    geworht ze Bêalzenan

Verse: 21    in der houbetstat z Anschouwe.
Verse: 22    disiu blôziu vrouwe

Verse: 23    vuorte im ungelîchiu kleit:
Verse: 24    diu dâ sô trûrec nâch im reit,

Verse: 25    dâ enhete sis niht bezzer state.
Verse: 26    ze Sessûn was geslagen sîn plate.

Verse: 27    sîn ors von Brumbâne
Verse: 28    de Salvâsche ah muntâne:

Verse: 29    mit einer tjost rois Lehelîn
Verse: 30    bejagetez dâ, der bruoder sîn.




Chapter: 262 
262


Verse: 1    Parzivâl was ouch bereit:
Verse: 2    sîn ors mit walap er reit

Verse: 3    gein Orilus de Lalander.
Verse: 4    ûf des schilde vander

Verse: 5    einen trachen als er lebete.
Verse: 6    ein ander trache strebete

Verse: 7    ûf sînem helme gebunden,
Verse: 8    an den selben stunden

Verse: 9    manec guldîn trache kleine
Verse: 10    (mit manegem edeln steine

Verse: 11    muosten die gehêret sîn,
Verse: 12    ir ougen wâren rubîn)

Verse: 13    ûf der decke und am kursît.
Verse: 14    dâ wart genomen der poinder wît

Verse: 15    von den zwein helden unverzaget.
Verse: 16    newederhalp wart widersaget:

Verse: 17    si wâren doch ledec ir triuwe,
Verse: 18    trunzûne starc al niuwe

Verse: 19    von in wæten gein den lüften.
Verse: 20    ich wolde mich des güften,

Verse: 21    hete ich eine solhe tjost gesehen.
Verse: 22    als mir diz mære hât verjehen.

Verse: 23    dâ wart von rabîne geriten,
Verse: 24    ein solh tjoste niht vermiten:

Verse: 25    vroun Jeschûten muot verjach,
Verse: 26    schœner tjost si nie gesach.

Verse: 27    diu hielt dâ, want ir hende,
Verse: 28    si vreuden ellende

Verse: 29    gunde enwederm helde schaden.
Verse: 30    diu ors in sweize muosten baden:




Chapter: 263 
263


Verse: 1    prîses si beide gerten.
Verse: 2    die blicke von den swerten

Verse: 3    und viur daz von helmen spranc,
Verse: 4    und manec ellenthafter swanc.

Verse: 5    die begunden verre glesten,
Verse: 6    wan dâ wâren strîtes die besten

Verse: 7    mit hurte an ein ander komen,
Verse: 8    ez gê ze schaden oder ze vromen

Verse: 9    den küenen helden mæren.
Verse: 10    swie willec diu ors in wæren,

Verse: 11    dâ si beide ûfe sâzen,
Verse: 12    der sporn si niht vergâzen

Verse: 13    noch ir swerte lieht gemâl.
Verse: 14    prîs gediende Parzivâl,

Verse: 15    daz er sich alsus wern kan
Verse: 16    wol hundert trachen und eines man.

Verse: 17    ein trache wart versêret,
Verse: 18    sîne wunden gemêret,

Verse: 19    der ûf Orilus helme lac.
Verse: 20    sô durchliuhtec daz der tac

Verse: 21    volleclîche durch in schein,
Verse: 22    wart drabe geslagen manec edel stein.

Verse: 23    daz ergienc zorse und niht ze vuoz.
Verse: 24    vroun Jeschûten wart der gruoz

Verse: 25    mit swertes schimphe aldâ bejaget.
Verse: 26    mit heldes handen unverzaget

Verse: 27    mit hurte si dicke zein ander vlugen,
Verse: 28    daz die ringe von den knien zestuben,

Verse: 29    swie si wæren îserîn.
Verse: 30    ruocht irs, si tâten strîtes schîn.




Chapter: 264 
264


Verse: 1    ich sage iu des einen zorn:
Verse: 2    daz sîn wîp wol geborn

Verse: 3    dâ vor was genôtzoget.
Verse: 4    er was iedoch ir rehter voget,

Verse: 5    sô daz si schermes warte an in.
Verse: 6    er wânde, ir wîplîcher sin

Verse: 7    wære gein im verkêret
Verse: 8    und daz si gunêret

Verse: 9    hete ir kiusche und ir prîs
Verse: 10    mit einem andern âmîs.

Verse: 11    des lasters nam er phlihte:
Verse: 12    ouch ergienc sîn gerihte

Verse: 13    über si, daz grœzer nôt
Verse: 14    wîp nie gedolde âne tôt

Verse: 15    und âne alle ir schulde.
Verse: 16    er möhte ir sîne hulde

Verse: 17    versagen, swenne er wolde:
Verse: 18    niemen daz wenden solde,

Verse: 19    ob der man des wîbes hât gewalt.
Verse: 20    Parzivâl der degen balt

Verse: 21    Orilus hulde gerte
Verse: 22    vroun Jeschûten mit dem swerte:

Verse: 23    des hôrte ich ie güetlîche biten.
Verse: 24    ez kom in dâ gar von schimphes siten.

Verse: 25    mich dunket si haben beide reht:
Verse: 26    der beidiu krump unde sleht

Verse: 27    geschuof, künne er scheiden,
Verse: 28    sô wende er daz an beiden,

Verse: 29    daz ez âne sterben dâ ergê.
Verse: 30    si tuont doch sus ein ander wê.




Chapter: 265 
265


Verse: 1    dâ ergienc diu scharphe herte:
Verse: 2    ieweder vaste werte

Verse: 3    sînen prîs vor dem ander.
Verse: 4    duc Orilus de Lalander

Verse: 5    streit nâch sînem gelêrten site.
Verse: 6    ich wæne ie man sô vil gestrite:

Verse: 7    er hete kunst unde kraft.
Verse: 8    des wart er dicke sigehaft

Verse: 9    an maneger stat, swiez dâ ergienc.
Verse: 10    durch den trôst zuo zim er vienc

Verse: 11    den jungen starken Parzivâl.
Verse: 12    der begreif in ouch dô sunder twâl

Verse: 13    und zucte in ûz dem satel sîn;
Verse: 14    als eine garben heberîn

Verse: 15    vaste er in under die arme swanc,
Verse: 16    mit im er von dem orse spranc

Verse: 17    und dructe in über einen ronen.
Verse: 18    dâ muoste schumphentiure wonen

Verse: 19    der solher nôt niht was gewent.
Verse: 20    "dû garnes daz sich hât versent

Verse: 21    disiu vrouwe von dînem zorne.
Verse: 22    nû bistu der verlorne,

Verse: 23    dû enlâzes si dîne hulde hân."
Verse: 24    "daz enwirt sô gâhes niht getân"

Verse: 25    sprach der herzoge Orilus:
Verse: 26    "ich bin noch unbetwungen sus."

Verse: 27    Parzivâl der werde degen
Verse: 28    dructe in an sich, daz bluotes regen

Verse: 29    spranc durch die barbiere.
Verse: 30    dâ wart der vürste schiere




Chapter: 266 
266


Verse: 1    betwungen swes man an in warp.
Verse: 2    er tet sô der ungerne starp,

Verse: 3    er sprach ze Parzivâle sân:
Verse: 4    "ouwê junc starker man,

Verse: 5    wâ gediende ich ie dise nôt
Verse: 6    daz ich vor dir sol ligen tôt?"

Verse: 7    "jâ lâze ich dich vil gerne leben"
Verse: 8    sprach Parzivâl, "ob dû wilt geben

Verse: 9    dirre vrouwen dîne hulde."
Verse: 10    "ich entuons niht: ir schulde

Verse: 11    ist gein mir ze grœzlîch.
Verse: 12    si was werdekeite rîch:

Verse: 13    die hât si gar verkrenket
Verse: 14    und mich in nôt gesenket.

Verse: 15    ich leiste anders swes dû gers,
Verse: 16    ob dû mich des lebens wers.

Verse: 17    daz hete ich etswenne von gote:
Verse: 18    nû ist dîn hant des worden bote

Verse: 19    daz ichs danke dînem prîse."
Verse: 20    sus sprach der vürste wîse:

Verse: 21    "mîn leben koufe ich schône.
Verse: 22    in zwein landen krône

Verse: 23    treget gewaldeclîche
Verse: 24    mîn bruoder, der ist rîche:

Verse: 25    der nim dir swederz dû welles,
Verse: 26    daz dû mich tôt niht velles.

Verse: 27    ich bin im liep: er lœset mich
Verse: 28    als ich gedinge wider dich.

Verse: 29    dar zuo nim ich mîn herzentuom
Verse: 30    von dir: dîn prîslîcher ruom




Chapter: 267 
267


Verse: 1    hât werdekeit an mir bezalt.
Verse: 2    nû erlâz mich, küener degen balt,

Verse: 3    suone gein disem wîbe
Verse: 4    und gebiut mînem lîbe

Verse: 5    anders swaz dîn êre sîn.
Verse: 6    gein der gunêrten herzogîn

Verse: 7    mac ich suone gephlegen niht,
Verse: 8    swaz halt anders mir geschiht."

Verse: 9    Parzivâl der hôchgemuot
Verse: 10    sprach: "liute, lant noch varnde guot,

Verse: 11    der deheinez mac gehelfen dir,
Verse: 12    dû entuos des sicherheit gein mir,

Verse: 13    daz dû gein Bertâne vars
Verse: 14    und die reise niht langer spars

Verse: 15    zeiner maget, die blou durch mich
Verse: 16    ein man, gein dem ist mîn gerich

Verse: 17    âne ir bete niht verkorn.
Verse: 18    dû solt der megede wol geborn

Verse: 19    sichern und mîn dienest sagen
Verse: 20    oder wirt alhie erslagen.

Verse: 21    sage Artûse und dem wîbe sîn,
Verse: 22    in beiden von mir dienest mîn,

Verse: 23    daz si mîn dienst sus letzen
Verse: 24    und die maget ir slege ergetzen.

Verse: 25    dar zuo wil ich schouwen
Verse: 26    in dînen hulden dise vrouwen

Verse: 27    mit suone âne vâre
Verse: 28    oder dû muost eine bâre

Verse: 29    tôt hinnen rîten,
Verse: 30    wiltû michs widerstrîten:




Chapter: 268 
268


Verse: 1    merke diu wort und wis der werke ein wer.
Verse: 2    des gip mir sicherheit alher."

Verse: 3    dô sprach der herzoge Orilus
Verse: 4    zem künege Parzivâl alsus:

Verse: 5    "mac niemen dâ vür niht gegeben,
Verse: 6    sô leiste ichz, wande ich wil noch leben."

Verse: 7    durch die vorhte von ir man
Verse: 8    vrou Jeschûte diu wol getân

Verse: 9    strîtscheidens gar verzagete,
Verse: 10    ir vîndes nôt si klagete.

Verse: 11    Parzivâl in ûf verliez.
Verse: 12    der vroun Jeschûten suone gehiez,

Verse: 13    der betwungene vürste sprach:
Verse: 14    "vrouwe, sît diz durch iuch geschach,

Verse: 15    in strît diu schumphentiure mîn,
Verse: 16    wol her, ir sult geküsset sîn.

Verse: 17    ich hân vil prîses durch iuch verlorn:
Verse: 18    waz denne? ez ist doch verkorn."

Verse: 19    diu vrouwe mit ir blôzem vel
Verse: 20    was zem sprunge harte snel

Verse: 21    von dem pherde ûf den wasen.
Verse: 22    swie daz bluot von der nasen

Verse: 23    den munt im hete gemachet rôt,
Verse: 24    si kuste in dô er kus gebôt.

Verse: 25    dâ wart niht langer dô gebiten,
Verse: 26    si beide und ouch die vrouwe riten

Verse: 27    vür eine klôsen in eins velses want.
Verse: 28    eine kefsen Parzivâl dâ vant,

Verse: 29    ein gemâlet sper dâ bî dâ lent.
Verse: 30    der einsidel der hiez Trevrizent.




Chapter: 269 
269


Verse: 1    Parzivâl dô mit triuwen vuor:
Verse: 2    er nam daz heilectuom, drûf er swuor.

Verse: 3    sus stabete er selbe sînen eit.
Verse: 4    er sprach: "hân ich werdekeit

Verse: 5    (ich habe si oder enhabe ir niht,
Verse: 6    swer mich bî dem schilde siht,

Verse: 7    der prüevet mich gein ritterschaft),
Verse: 8    des namen ordenlîchiu kraft,

Verse: 9    als uns des schildes ambet saget,
Verse: 10    hât dicke hôhen prîs bejaget:

Verse: 11    ez ist ouch noch ein hôher name.
Verse: 12    mîn lîp gein werltlîcher schame

Verse: 13    immer sî gewenket
Verse: 14    und al mîn prîs verkrenket.

Verse: 15    dirre worte sî mit werken phant
Verse: 16    mîn gelücke vor der hœsten hant

Verse: 17    (ich hânz dâ vür, die treget got):
Verse: 18    nû müeze ich vlüsteclîchen spot

Verse: 19    ze beiden lîben immer hân
Verse: 20    von sîner kraft, ob missetân

Verse: 21    disiu vrouwe habe, dô diz geschach
Verse: 22    daz ich ir vürspan von ir brach.

Verse: 23    ouch vuorte ich mêr goldes dan.
Verse: 24    ich was ein tôr und niht ein man,

Verse: 25    gewahsen niht bî witzen.
Verse: 26    vil weinens, dâ bî switzen

Verse: 27    mit jâmer dolde vil ir lîp.
Verse: 28    sist benamen ein unschuldec wîp:

Verse: 29    dâ enscheide ich ûz niht mêre.
Verse: 30    des sî phant mîn sælde und êre:




Chapter: 270 
270


Verse: 1    ruocht irs, si sol unschuldec sîn.
Verse: 2    sêt, gebet ir wider ir vingerlîn.

Verse: 3    ir vürspan wart sô vertân,
Verse: 4    daz es mîn tôrheit danc sol hân."

Verse: 5    die gâbe emphienc der degen guot.
Verse: 6    dô streich er von dem mundez bluot

Verse: 7    und kuste sînes herzen trût.
Verse: 8    ouch wart verdecket ir blôziu hût.

Verse: 9    Orilus der vürste erkant
Verse: 10    stiez daz vingerlîn wider an ir hant

Verse: 11    und gap ir an sîn kursît:
Verse: 12    der was von rîchem phelle wît,

Verse: 13    mit heldes hant zehouwen.
Verse: 14    ich hân doch selten vrouwen

Verse: 15    wâpenröcke an gesehen tragen,
Verse: 16    die wæren in strîte alsus zeslagen:

Verse: 17    von ir krîe wart ouch nie turnei
Verse: 18    gesameliert noch sper enzwei

Verse: 19    gestochen, swâ daz solde sîn.
Verse: 20    der guote knappe und Lembekîn

Verse: 21    die tjost zesamene trüegen baz.
Verse: 22    sus wart diu vrouwe trûrens laz.

Verse: 23    dô sprach der vürste Orilus
Verse: 24    aber ze Parzivâle alsus:

Verse: 25    "helt, dîn unbetwungen eit
Verse: 26    gît mir grôz liep und krankez leit.

Verse: 27    ich hân schumphentiur gedolt,
Verse: 28    diu mir vreude hât erholt:

Verse: 29    jâ mac mit êren nû mîn lîp
Verse: 30    ergetzen diz werde wîp,




Chapter: 271 
271


Verse: 1    daz ich si hulde mîn verstiez.
Verse: 2    dô ich die süezen eine liez,

Verse: 3    waz mohte si, swaz ir geschach?
Verse: 4    dô si aber von dîner schœne sprach,

Verse: 5    ich wânde dâ wære ein vriuntschaft bî.
Verse: 6    nû lône dir got, sist valsches vrî:

Verse: 7    ich hân unvuoge an ir getân.
Verse: 8    vürz fôreist in Brizljân

Verse: 9    reit ich dô in juven pois."
Verse: 10    Parzivâl diz sper von Trois

Verse: 11    nam und vuortez mit im dan.
Verse: 12    des vergaz der wilde Taurîan,

Verse: 13    Dodines bruoder, dâ.
Verse: 14    nû sprechet wie oder wâ

Verse: 15    die helde snahtes megen sîn.
Verse: 16    helme und ir schilde heten pîn:

Verse: 17    die sach man gar verhouwen.
Verse: 18    Parzivâl zer vrouwen

Verse: 19    nam urloup und zir âmîs.
Verse: 20    dô ladete in der vürste wîs

Verse: 21    mit im an sîne viurstat:
Verse: 22    daz half in niht, swie vil ers bat.

Verse: 23    aldâ schieden die helde sich.
Verse: 24    diu âventiur wert mære mich:

Verse: 25    dô Orilus der vürste erkant
Verse: 26    kom dâ er sîniu poulûn vant

Verse: 27    und sîner massenîe ein teil,
Verse: 28    daz volc was al gelîche geil

Verse: 29    daz suone was worden schîn
Verse: 30    gein der sældebernden herzogîn.




Chapter: 272 
272


Verse: 1    daz wart niht langer dô gespart,
Verse: 2    Orilus entwâpent wart,

Verse: 3    bluot und râm von im er twuoc.
Verse: 4    er nam die herzoginne kluoc

Verse: 5    und vuorte si an die suonstat
Verse: 6    und hiez bereiten in zwei bat.

Verse: 7    dô lac vrou Jeschûte
Verse: 8    al weinde bî ir trûte

Verse: 9    vor liebe und doch vor leide niht,
Verse: 10    als guotem wîbe noch geschiht.

Verse: 11    ouch ist genuogen liuten kunt:
Verse: 12    weinende ougen hânt süezen munt.

Verse: 13    dâ von ich mêr noch sprechen wil:
Verse: 14    grôz liebe ist vreude und jâmers zil.

Verse: 15    swer von der liebe ir mære
Verse: 16    treget ûf den seigære,

Verse: 17    ob erz immer wolde wegen,
Verse: 18    ez enkan niht ander schanze phlegen.

Verse: 19    dâ ergienc ein suœne, des wæne ich.
Verse: 20    dô vuoren si sunder baden sich.

Verse: 21    zwelf klâre juncvrouwen
Verse: 22    man mohte bî ir schouwen:

Verse: 23    die phlâgen ir. sît si gewan
Verse: 24    zorn âne ir schult von liebem man,

Verse: 25    si hete ie snahtes deckekleit,
Verse: 26    swie blôz si bî dem tage reit.

Verse: 27    die batten dô mit vreuden sie.
Verse: 28    ruochet ir nû hœren wie?

Verse: 29    Orilus des innen wart,
Verse: 30    âventiur von Artûses vart.




Chapter: 273 
273


Verse: 1    sus begunde im ein ritter sagen:
Verse: 2    "ich sach ûf einen plân geslagen

Verse: 3    tûsent poulûn oder mêr.
Verse: 4    Artûs der rîche künec hêr,

Verse: 5    der Berteneise herre,
Verse: 6    liget uns hie niht verre

Verse: 7    mit wünneclîcher vrouwen schar.
Verse: 8    ungevertes ist ein mîle dar.

Verse: 9    dâst ouch von rittern grœzlîch schal:
Verse: 10    bî dem Plimizœl ze tal

Verse: 11    ligent si an iewederm stade."
Verse: 12    dô gâhte vaste ûz dem bade

Verse: 13    der herzoge Orilus.
Verse: 14    Jeschûte und er gewurben sus.

Verse: 15    diu senfte süeze wol getân
Verse: 16    gienc ouch ûz ir bade sân

Verse: 17    an sîn bette: dâ wart trûrens rât.
Verse: 18    ir lide gedienden bezzer wât

Verse: 19    denne si dâ vor truoc lange.
Verse: 20    mit nâhem umbevange

Verse: 21    behielt ir minne vreuden prîs,
Verse: 22    der vürstinne und des vürsten wîs.

Verse: 23    juncvrouwen kleiten ir vrouwen sân,
Verse: 24    sîn harnas truoc man dar dem man.

Verse: 25    Jeschûten wât man muoste loben.
Verse: 26    vogele gevangen ûf dem kloben

Verse: 27    si mit vreuden âzen.
Verse: 28    dô si an ir bette sâzen,

Verse: 29    vrou Jeschûte etslîchen kus
Verse: 30    emphienc: den gap ir Orilus.




Chapter: 274 
274


Verse: 1    dô zôch man der vrouwen wert
Verse: 2    starc wol gênde ein schœne phert,

Verse: 3    gesatelt und gezoumet wol.
Verse: 4    man huop si drûf, diu rîten sol

Verse: 5    dannen mit ir küenem man.
Verse: 6    sîn ors wart gewâpent sân,

Verse: 7    rehte als erz gein strîte reit.
Verse: 8    sîn swert, dâ mite er stages streit,

Verse: 9    man vorn an den satel hienc.
Verse: 10    von vuoz ûf gewâpent gienc

Verse: 11    Orilus zem orse sîn:
Verse: 12    er spranc drûf vor der herzogîn.

Verse: 13    Jeschûte und er vuoren dan zehant.
Verse: 14    sîne massenîe gein Lalant

Verse: 15    bat er alle kêren,
Verse: 16    wan ein ritter solde in lêren

Verse: 17    gein Artûse rîten.
Verse: 18    er bat daz volc des bîten.

Verse: 19    si kômen Artûs sô nâhen,
Verse: 20    daz si sîniu poulûn sâhen

Verse: 21    vil nâhe ein mîlez wazzer nider.
Verse: 22    der vürste sande den ritter wider,

Verse: 23    der in gewîset hete dar:
Verse: 24    vrou Jeschûte diu wol gevar

Verse: 25    was sîn gesinde und niemen mêr.
Verse: 26    der unlôse Artûs niht ze hêr

Verse: 27    was gegangen, dô er sâbents gaz,
Verse: 28    ûf einen plân: umbe in dâ saz

Verse: 29    diu werde massenîe.
Verse: 30    Orilus der valsches vrîe




Chapter: 275 
275


Verse: 1    kom an den selben rinc geriten.
Verse: 2    sîn helm, sîn schilt was sô versniten,

Verse: 3    daz niemen dran kôs deheiniu mâl:
Verse: 4    die slege vrumte Parzivâl.

Verse: 5    von dem orse stuont der küene man,
Verse: 6    vrou Jeschûte emphienc ez sân:

Verse: 7    vil juncherren dar nâher spranc.
Verse: 8    umbe in und um si was grôz gedranc.

Verse: 9    si jâhen: "wir suln der orse phlegen."
Verse: 10    Orilus der werde degen

Verse: 11    legete schildes schirben ûf daz gras.
Verse: 12    nâch ir, durch die er komen was,

Verse: 13    begunde er vrâgen al zehant.
Verse: 14    vroun Cunnewâren de Lalant

Verse: 15    zeicte man im, wâ diu saz.
Verse: 16    ir site man gein prîse maz.

Verse: 17    gewâpent er sô nâhe gienc,
Verse: 18    künec und diu künegîn in emphienc:

Verse: 19    er dancte in und bôt fîanze sân
Verse: 20    sîner swester wol getân.

Verse: 21    bî den trachen ûf dem kursît
Verse: 22    erkande si in wol, wan ein strît.

Verse: 23    si sprach: "dû bist der bruoder mîn.
Verse: 24    Orilus oder Lehelîn,

Verse: 25    ich nim iuwer deweders sicherheit.
Verse: 26    ir wâret mir beide ie bereit

Verse: 27    ze dieneste als ich iuch gebat:
Verse: 28    mir wære ûf den triuwen mat,

Verse: 29    solde ich gein iu kriegen
Verse: 30    und mîn selber zuht betriegen."




Chapter: 276 
276


Verse: 1    der vürste kniete vor der maget.
Verse: 2    er sprach: "dû hâs al wâr gesaget:

Verse: 3    ich binz dîn bruoder Orilus.
Verse: 4    der rôte ritter twanc mich sus,

Verse: 5    daz ich dir sicherheit muoz geben:
Verse: 6    dâ mite erkoufte ich dô mîn leben.

Verse: 7    die emphâch, sô wirt hie gar getân
Verse: 8    als ich gein im gelobet hân."

Verse: 9    dô emphienc si triuwe in wîze hant
Verse: 10    von im der truoc den serpant,

Verse: 11    und liez in ledec. dô daz geschach,
Verse: 12    dô stuont er ûf unde sprach:

Verse: 13    "ich sol und muoz durch triuwe klagen.
Verse: 14    ouwê wer hât dich geslagen?

Verse: 15    dîne slege tuont mir nimmer wol:
Verse: 16    wirts zît daz ich die rechen sol,

Verse: 17    ich ginner den, swerz ruochet sehen,
Verse: 18    daz mir grôz leit ist dran geschehen.

Verse: 19    ouch hilfet mirz klagen der küenste man
Verse: 20    den muoter ie zer werlt gewan:

Verse: 21    der nennet sich der ritter rôt.
Verse: 22    her künec, vrou künegîn, er enbôt

Verse: 23    iu beiden samt den dienest sîn,
Verse: 24    dar zuo benamen der swester mîn:

Verse: 25    er bitet sîn dienst iuch letzen
Verse: 26    und dise maget ir slege ergetzen.

Verse: 27    ouch hete ichs dô genozzen
Verse: 28    gein dem helde unverdrozzen,

Verse: 29    wesse er wie si mich bestêt
Verse: 30    und mir ir leit ze herzen gêt."




Chapter: 277 
277


Verse: 1    Keie erwarp dô niuwen haz
Verse: 2    von rittern und vrouwen, swer dâ saz

Verse: 3    am stade bî dem Plimizœl.
Verse: 4    Gâwân und Jofreit fîz îdœl

Verse: 5    und des nôt ir habet gehœret ê,
Verse: 6    der gevangene künec Clâmidê,

Verse: 7    und anders manec werder man
Verse: 8    (ir namen ich wol genennen kan,

Verse: 9    wan daz ichz niht wil lengen),
Verse: 10    die begunden sich dô mengen.

Verse: 11    ir dienst mit zühten wart gedolt.
Verse: 12    vrou Jeschûte wart geholt

Verse: 13    ûf ir pherde, aldâ si saz.
Verse: 14    der künec Artûs niht vergaz

Verse: 15    und ouch diu künegîn, sîn wîp,
Verse: 16    si emphiengen Jeschûten lîp.

Verse: 17    von vrouwen dâ manec kus geschach.
Verse: 18    Artûs ze Jeschûten sprach:

Verse: 19    "iuwern vater, den künec von Karnant,
Verse: 20    Lacken hân ich des erkant,

Verse: 21    daz ich iuwern kumber klagete,
Verse: 22    sît man mir in zem êrsten sagete.

Verse: 23    ouch sît ir selbe sô wol getân,
Verse: 24    es solde iuch vriunt erlâzen hân,

Verse: 25    wan iuwer minneclîcher blic
Verse: 26    behielt den prîs ze Kanedic:

Verse: 27    durch iuwer schœne mære
Verse: 28    beleip iu der sparwære,

Verse: 29    iuwer hant er dannen reit.
Verse: 30    swie mir von Oriluse leit




Chapter: 278 
278


Verse: 1    geschæhe, ich engunde iu trûrens niht
Verse: 2    noch engetuon swâz geschiht.

Verse: 3    mirst liep daz ir die hulde hât
Verse: 4    und daz ir vrouwenlîche wât

Verse: 5    traget nâch iuwer grôzen nôt."
Verse: 6    si sprach: "herre, daz vergelde iu got:

Verse: 7    dar an ir hœhet iuwern prîs."
Verse: 8    Jeschûten und ir âmîs

Verse: 9    vrou Cunnewâre de Lalant
Verse: 10    dannen vuorte sâ zehant

Verse: 11    einhalp an des küneges rinc.
Verse: 12    über eines brunnen ursprinc

Verse: 13    stuont ir poulûn ûf dem plân,
Verse: 14    als ez obene ein trache in sînen klân

Verse: 15    hete sganzen aphels halben teil.
Verse: 16    den trachen zugen vier wintseil,

Verse: 17    rehte als er lebendec dâ vlüge
Verse: 18    undz poulûn gein den lüften züge.

Verse: 19    dâ bî erkandez Orilus,
Verse: 20    wan sîniu wâpen wâren sus.

Verse: 21    er wart entwâpent drunde,
Verse: 22    sîn süeziu swester kunde

Verse: 23    im bieten êre und gemach.
Verse: 24    über al diu massenîe sprach,

Verse: 25    des rôten ritters ellen
Verse: 26    næme den prîs zeinem gesellen:

Verse: 27    des jâhen si âne rûnen.
Verse: 28    Keie bat Kingrûnen

Verse: 29    Orilus dienen an sîner stat.
Verse: 30    er kundez wol, den ers dâ bat,




Chapter: 279 
279


Verse: 1    wande er hetes vil getân
Verse: 2    vor Clâmidê ze Brandigân.

Verse: 3    Keie durch daz sîn dienest liez:
Verse: 4    unsælde in svürsten swester hiez

Verse: 5    ze sêre âlûnen mit einem stabe.
Verse: 6    durch zuht entweich er dienstes abe:

Verse: 7    ouch was diu schulde niht verkorn
Verse: 8    von der megede wol geborn.

Verse: 9    doch schuof er spîse dar genuoc:
Verse: 10    Kingrûnz vür Orilusen truoc,

Verse: 11    Cunnewâre diu lobes spîse
Verse: 12    sneit ir bruoder sîne spîse

Verse: 13    mit ir blanken linden hant.
Verse: 14    vrou Jeschûte von Karnant

Verse: 15    mit wîplîchen zühten az.
Verse: 16    Artûs der künec niht vergaz,

Verse: 17    er enkœme dâ diu zwei sâzen
Verse: 18    und vriuntlîchen âzen.

Verse: 19    dô sprach er: "gezzet ir hînte übele hie,
Verse: 20    ez enwart iedoch mîn wille nie:

Verse: 21    ir engesâzet nie über wirtes brôt,
Verse: 22    derz iu mit bezzerm willen bôt

Verse: 23    sô gar âne wankes vâre.
Verse: 24    mîn vrou Cunnewâre,

Verse: 25    ir sult iuwers bruoder hie wol phlegen.
Verse: 26    guote naht gebe iu der gotes segen."

Verse: 27    Artûs vuor slâfen dô.
Verse: 28    Oriluse wart gebettet sô,

Verse: 29    dâ sîn vrou Jeschûte phlac
Verse: 30    geselleclîche unz an den tac.




Chapter: 280 
280


Verse: 1    Welt ir nû hœren wie Artûs
Verse: 2    von Karidœl ûz sînem hûs

Verse: 3    und ouch von sînem lande schiet?
Verse: 4    als im diu massenîe riet,

Verse: 5    sus reit er mit den werden
Verse: 6    sîns landes und ander erden,

Verse: 7    diz mære giht, den ahten tac
Verse: 8    sô, daz er suochennes phlac

Verse: 9    den, der sich der ritter rôt
Verse: 10    nande und im solh êre bôt

Verse: 11    daz er in schiet von kumber grôz,
Verse: 12    dô er den künec îthêren schôz

Verse: 13    und Clâmidên und Kingrûnen
Verse: 14    ouch sande gein den Bertûnen

Verse: 15    in sînen hof besunder.
Verse: 16    über die tavelrunder

Verse: 17    wolde er in durch gesellekeit
Verse: 18    laden: durch daz er nâch im reit

Verse: 19    alsô bescheidenlîche.
Verse: 20    beide arme und rîche,

Verse: 21    die schildes ambet ane want,
Verse: 22    lobeten Artûses hant,

Verse: 23    swâ si sæhen ritterschaft,
Verse: 24    daz is durch ir gelübede kraft

Verse: 25    deheine tjost entæten,
Verse: 26    ez enwære ob si in bæten

Verse: 27    daz er si lieze strîten.
Verse: 28    er jach: wir müezen rîten

Verse: 29    in manec lant, daz ritters tât
Verse: 30    uns wol ze gegenstrîte hât:




Chapter: 281 
281


Verse: 1    ûf gerihtiu sper wir müezen sehen.
Verse: 2    welt ir danne vür ein ander schehen

Verse: 3    alsô vreche rüden, den meisters hant
Verse: 4    abe stroufet ir bant,

Verse: 5    dar zuo trage ich niht willen.
Verse: 6    ich sol den schal gestillen:

Verse: 7    ich hilfe iu swâs niht rât mac sîn.
Verse: 8    des wartet an daz ellen mîn.

Verse: 9    dise gelübede habet ir wol vernomen."
Verse: 10    welt ir nû hœren war sî komen

Verse: 11    Parzivâl der Wâleis?
Verse: 12    von snêwe was ein niuwe leis

Verse: 13    des nahtes vaste ûf in gesnît.
Verse: 14    ez enwas iedoch niht snêwes zît,

Verse: 15    ist ez als ichz vernomen hân.
Verse: 16    Artûs der meienbære man,

Verse: 17    swaz man ie von dem gesprach,
Verse: 18    zeinen phingesten daz geschach

Verse: 19    oder in des meien bluomenzît.
Verse: 20    waz man im süezes luftes gît!

Verse: 21    diz mære ist hie vaste undersniten:
Verse: 22    ez parrieret sich mit snêwes siten.

Verse: 23    sîne valkenære von Karidœl
Verse: 24    riten sâbents zuo den Plimizœl

Verse: 25    durch beizen, dâ si schaden kurn:
Verse: 26    ir besten valken si verlurn,

Verse: 27    der gâhte von in balde
Verse: 28    und stuont die naht ze walde.

Verse: 29    von überkrüphe daz geschach,
Verse: 30    daz im was von dem luoder gâch.




Chapter: 282 
282


Verse: 1    die naht bî Parzivâle er stuont,
Verse: 2    dâ in beiden was der walt unkunt

Verse: 3    und dâ si beide sêre vrôs.
Verse: 4    dô Parzivâl den tac erkôs,

Verse: 5    im was versnît sîn phades ban:
Verse: 6    vil ungevertes reit er dan

Verse: 7    über ronen und über manegen stein.
Verse: 8    der tac ie lanc hôher schein.

Verse: 9    ouch begunde liuhten sich der walt,
Verse: 10    wan daz ein rone was gevalt

Verse: 11    ûf einem plân, zuo dem er sleich
Verse: 12    (Artûs valke al mite streich),

Verse: 13    dâ wol tûsent gense lâgen.
Verse: 14    dâ wart ein michel gâgen:

Verse: 15    mit hurte vlouc er under sie,
Verse: 16    der valke und sluoc ir eine hie,

Verse: 17    daz si im harte kûme enbrast
Verse: 18    under des gevallen ronen ast.

Verse: 19    an ir hôhem vluge wart ir wê:
Verse: 20    ûz ir wunden ûf den snê

Verse: 21    vielen drî bluotes zeher rôt,
Verse: 22    die Parzivâle vuocten nôt.

Verse: 23    von sînen triuwen daz geschach.
Verse: 24    dô er die bluotes zeher sach

Verse: 25    ûf dem snê (der was al wîz),
Verse: 26    dô dâhte er: "wer hât sînen vlîz

Verse: 27    gewant an dise varwe klâr?
Verse: 28    Condwîrâmûrs, sich mac vür wâr

Verse: 29    disiu varwe dir gelîchen.
Verse: 30    mich wil got sælden rîchen,




Chapter: 283 
283


Verse: 1    sît ich dir hie gelîchez vant.
Verse: 2    gêret sî diu gotes hant

Verse: 3    und al diu krêâtiure sîn.
Verse: 4    Condwîrâmûrs, hie liget dîn schîn,

Verse: 5    sît der snê dem bluote wîze bôt
Verse: 6    und ez den snê sus machet rôt.

Verse: 7    Condwîrâmûrs,
Verse: 8    dem gelîchet sich dîn bêâ curs:

Verse: 9    des enbistû niht erlâzen."
Verse: 10    des heldes ougen mâzen,

Verse: 11    als ez dort was ergangen,
Verse: 12    zwêne zeher an ir wangen,

Verse: 13    den dritten an ir kinne.
Verse: 14    er phlac der wâren minne

Verse: 15    gein ir gar âne wenken.
Verse: 16    sus begunde er sich verdenken,

Verse: 17    unz daz er unversunnen hielt.
Verse: 18    diu starke minne sîn dâ wielt:

Verse: 19    solhe nôt vuocte im sîn wîp,
Verse: 20    dirre varwe truoc gelîchen lîp

Verse: 21    von Pelrapeire diu künegin.
Verse: 22    diu zucte im wizzenlîchen sin:

Verse: 23    sus hielt er als er sliefe.
Verse: 24    wer dâ zuo zim liefe?

Verse: 25    Cunnewâren garzûn was gesant
Verse: 26    (der solde gegen Lalant),

Verse: 27    der sach an den stunden
Verse: 28    einen helm mit maneger wunden

Verse: 29    und einen schilt gar verhouwen.
Verse: 30    in dienste sknappen vrouwen




Chapter: 284 
284


Verse: 1    dâ hielt gezimiert ein degen,
Verse: 2    als er tjostierens wolde phlegen,

Verse: 3    geverwet, mit ûf gerihtem sper.
Verse: 4    der garzûn huop sich wider her.

Verse: 5    hete in der knappe erkant enzît,
Verse: 6    er wære von im vil unbeschrît,

Verse: 7    daz ez sîner vrouwen ritter wære.
Verse: 8    als gein einem æhtære

Verse: 9    schuphte erz volc hin ûz an in.
Verse: 10    er wolde im werben ungewin:

Verse: 11    sîne kurtôsîe er dran verlôs.
Verse: 12    lât wesen: sîn vrouwe was ouch lôs.

Verse: 13    solh was des knappen krîe:
Verse: 14    "fîâ fîâ fîe!

Verse: 15    fî ir vertânen!
Verse: 16    zelnt sich Gâwânen

Verse: 17    und ander dise ritterschaft
Verse: 18    gein werdeclîcher prîses kraft

Verse: 19    und Artûsen den Bertûn?"
Verse: 20    alsus rief der garzûn:

Verse: 21    "tavelrunder ist geschant:
Verse: 22    iust durch die snüere alhie gerant."

Verse: 23    dâ wart von rittern grœzlîch schal:
Verse: 24    si begunden vrâgen über al,

Verse: 25    ob ritterschaft dâ wære getân.
Verse: 26    dô vrieschen si daz einec man

Verse: 27    dâ hielt zeiner tjost bereit.
Verse: 28    genuogen was gelübede leit,

Verse: 29    die Artûs von in emphienc.
Verse: 30    sô balde, daz er niht engienc,




Chapter: 285 
285


Verse: 1    beide lief unde spranc
Verse: 2    Segramors, der ie nâch strîte ranc.

Verse: 3    swâ der vehten wânde vinden,
Verse: 4    dâ muoste man in binden

Verse: 5    oder er wolde dâ mite sîn.
Verse: 6    ninder ist sô breit der Rîn,

Verse: 7    sæhe er strîten an dem andern stade,
Verse: 8    dâ würde wênec nâch dem bade

Verse: 9    getast: ez wære warm oder kalt,
Verse: 10    er viele sus dran, der degen balt.

Verse: 11    snellîche kom der jungelinc
Verse: 12    ze hove an Artûses rinc.

Verse: 13    der werde künec vaste slief:
Verse: 14    Segramors im durch die snüere lief,

Verse: 15    zer poulûns tür dranc er în.
Verse: 16    ein declachen zobelîn

Verse: 17    zucte er ab in diu lâgen
Verse: 18    und süezes slâfes phlâgen,

Verse: 19    sô daz si muosten wachen
Verse: 20    und sîner unvuoge lachen.

Verse: 21    dô sprach er zuo der niftel sîn:
Verse: 22    "Ginôvêr, vrouwe künegîn,

Verse: 23    unser sippe ist des bekant,
Verse: 24    man weiz wol über manegiu lant

Verse: 25    daz ich genâden warte an dich.
Verse: 26    nû hilf mir, vrouwe, unde sprich

Verse: 27    gein Artûse, dînem man,
Verse: 28    daz ich von im müeze hân

Verse: 29    (ein âventiure ist hie bî),
Verse: 30    daz ich zer tjost der êrste sî."




Chapter: 286 
286


Verse: 1    Artûs ze Segramorse sprach:
Verse: 2    "dîn sicherheit mir des verjach,

Verse: 3    dû soldes nâch mînem willen varn
Verse: 4    und dîn unbescheidenheit bewarn.

Verse: 5    wirt hie ein tjost von dir getân,
Verse: 6    dar nâch wil manec ander man

Verse: 7    daz ich in lâze rîten
Verse: 8    und ouch nâch prîse strîten:

Verse: 9    dâ mite krenket sich mîn wer.
Verse: 10    wir nâhen Anfortases her,

Verse: 11    daz von Munsalvæsche vert
Verse: 12    undz fôreist mit strîte wert:

Verse: 13    sît wir niht wizzen wâ diu stêt,
Verse: 14    zarbeit ez uns lîhte ergêt."

Verse: 15    Ginôvêr bat Artûsen sô,
Verse: 16    des Segramors wart al vrô.

Verse: 17    dô si im die âventiure erwarp
Verse: 18    (wan daz er niht vor liebe starp,

Verse: 19    daz ander was dâ gar geschehen),
Verse: 20    ungerne hete er dô verjehen

Verse: 21    sîns komenden prîses phlihte
Verse: 22    iemen an der geschihte,

Verse: 23    der junge stolze âne bart.
Verse: 24    sîn ors und er gewâpent wart,

Verse: 25    ûz vuor Segramors rois.
Verse: 26    kalopierende ulter juven pois

Verse: 27    sîn ors über hôhe stûden spranc.
Verse: 28    manec guldîn schelle dran erklanc

Verse: 29    ûf der decke und an dem man.
Verse: 30    man möhte in wol geworfen hân




Chapter: 287 
287


Verse: 1    zem vasân inz dornach:
Verse: 2    swem sîn ze suochen wære gâch,

Verse: 3    der vünde in bî den schellen.
Verse: 4    die kunden lûte hellen.

Verse: 5    sus vuor der unbescheiden helt
Verse: 6    zuo dem der minne was verselt.

Verse: 7    weder er ensluoc noch enstach,
Verse: 8    ê er widersagen hin zim sprach.

Verse: 9    unversunnen hielt dâ Parzivâl.
Verse: 10    daz vuocten im diu bluotes mâl

Verse: 11    und ouch diu strenge minne,
Verse: 12    diu mir dicke nimt die sinne

Verse: 13    und mir daz herze unsanfte reget.
Verse: 14    ach nôt ein wîp an mich leget:

Verse: 15    wil si mich alsus twingen
Verse: 16    und selten helfe bringen,

Verse: 17    ich sol sis underziehen
Verse: 18    und von ir trôste vliehen.

Verse: 19    nû hœrt ouch von jenen beiden,
Verse: 20    umbe ir komen und umbe ir scheiden.

Verse: 21    Segramors sprach alsô:
Verse: 22    "ir gebâret, herre, als ir sît vrô

Verse: 23    daz hie ein künec mit volke liget.
Verse: 24    swie unhôhe iuch daz wiget,

Verse: 25    ir müezet im drumbe wandel geben
Verse: 26    oder ich verliuse mîn leben.

Verse: 27    ir sît ûf strît ze nâhe geriten.
Verse: 28    doch wil ich iuch durch zuht biten,

Verse: 29    ergebet iuch in mîne gewalt
Verse: 30    oder ir sît schier von mir bezalt,




Chapter: 288 
288


Verse: 1    daz iuwer vallen rüert den snê.
Verse: 2    sô tætet irz baz mit êren ê."

Verse: 3    Parzivâl durch drô niht sprach:
Verse: 4    vrou Minne im anders kumbers jach.

Verse: 5    durch tjoste bringen warf sîn ors
Verse: 6    von im der küene Segramors.

Verse: 7    umbe wande ouch sich daz kastelân,
Verse: 8    dâ Parzivâl der wol getân

Verse: 9    unversunnen ûfe saz,
Verse: 10    sô daz erz bluot übermaz.

Verse: 11    sîn sehen wart drabe gekêret.
Verse: 12    des wart sîn prîs gemêret:

Verse: 13    dô er der zeher niht mêr sach,
Verse: 14    vrou Witze im aber sinnes jach.

Verse: 15    hie kom Segramors rois.
Verse: 16    Parzivâl daz sper von Trois,

Verse: 17    daz veste und daz zæhe,
Verse: 18    von verwen daz wæhe,

Verse: 19    als erz vor der klôsen vant,
Verse: 20    daz begunde er senken mit der hant.

Verse: 21    ein tjost emphienc er durch den schilt:
Verse: 22    sîn tjost hin wider wart gezilt,

Verse: 23    daz Segramors der werde degen
Verse: 24    satelrûmens muoste phlegen

Verse: 25    und daz daz sper doch ganz bestuont.
Verse: 26    dâ von im wart gevelle kunt.

Verse: 27    Parzivâl reit âne vrâgen
Verse: 28    dâ die bluotes zeher lâgen.

Verse: 29    dâ er die mit den ougen vant,
Verse: 30    vrou Minne in stricte an ir bant:




Chapter: 289 
289


Verse: 1    weder er ensprach dô sus noch sô,
Verse: 2    wan er schiet von den witzen dô.

Verse: 3    Segramors kastelân
Verse: 4    huop sich gein sînem barne sân.

Verse: 5    er muoste ûf durch ruowen stên,
Verse: 6    ob er inder wolde gên:

Verse: 7    sich legent genuoge durch ruowen nider.
Verse: 8    daz habet ir dicke vreischet sider.

Verse: 9    waz ruowe kôs er in dem snê?
Verse: 10    mir tæte ein ligen drinne wê.

Verse: 11    der schadehafte erwarp ie spot:
Verse: 12    sælden phlihtære dem half got.

Verse: 13    daz her lac wol sô nâhen,
Verse: 14    daz si Parzivâlen sâhen

Verse: 15    haben. als im was geschehen,
Verse: 16    der minne er muoste ir siges jehen,

Verse: 17    diu Salomônen ouch betwanc.
Verse: 18    dâ nâch was dô niht ze lanc,

Verse: 19    ê Segramors dort zuo zin gienc.
Verse: 20    swer in hazte oder der in wol emphienc,

Verse: 21    den was er al gelîche holt:
Verse: 22    sus teilde er bâgens grôzen solt.

Verse: 23    er sprach: "ir habet des vreischet vil,
Verse: 24    ritterschaft ist topelspil

Verse: 25    und daz ein man von tjoste viel.
Verse: 26    ez sinket halt ein mers kiel.

Verse: 27    lât mich nimmer niht gestrîten,
Verse: 28    daz er mîn getorste bîten,

Verse: 29    ob er bekande mînen schilt.
Verse: 30    des hât mich gar an im bevilt,




Chapter: 290 
290


Verse: 1    der noch dort ûze tjoste gert.
Verse: 2    sîn lîp ist ouch wol prîses wert."

Verse: 3    Keie der küene man
Verse: 4    brâhte diz mære vür den künec sân,

Verse: 5    Segramors wære gestochen abe
Verse: 6    und dort ûze hielde ein strenger knabe,

Verse: 7    der gerte tjoste rehte als ê.
Verse: 8    er sprach: "herre, mir tuot immer wê,

Verse: 9    sol ers genozzen scheiden hin.
Verse: 10    ob ich iu sô wirdec bin,

Verse: 11    lât mich versuochen wes er ger,
Verse: 12    sît er mit ûf gerihtem sper

Verse: 13    dort habet vor iuwerm wîbe.
Verse: 14    nimmer ich belîbe

Verse: 15    in iuwerm dienste mêre:
Verse: 16    tavelrunder hât unêre,

Verse: 17    ob manz im niht bezîte wert.
Verse: 18    ûf unsern prîs sîn ellen zert:

Verse: 19    nû gebet mir strîtes urloup.
Verse: 20    wære wir alle blint oder toup,

Verse: 21    ir soldetz im wern: des wære zît."
Verse: 22    Artûs erkoupte Keien strît:

Verse: 23    gewâpent wart der seneschalt.
Verse: 24    dô wolde er swenden den walt

Verse: 25    mit tjost ûf disen komenden gast.
Verse: 26    der truoc der minne grôzen last:

Verse: 27    daz vuocte im snê unde bluot.
Verse: 28    ez ist sünde, swer im mêr nû tuot:

Verse: 29    ouch hâts diu minne kranken prîs.
Verse: 30    diu stiez ûf in ir krefte rîs.




Chapter: 291 
291


Verse: 1    vrou Minne, wie tuot ir sô,
Verse: 2    daz ir den trûregen machet vrô

Verse: 3    mit kurze wernder vreude?
Verse: 4    ir tuot in schiere teude.

Verse: 5    wie stêt iu daz, vrou Minne,
Verse: 6    daz ir manlîche sinne

Verse: 7    und herzehaften hôhen muot
Verse: 8    alsus enschumphieren tuot?

Verse: 9    daz smæhe und daz werde
Verse: 10    und swaz ûf der erde

Verse: 11    gein iu deheines strîtes phliget,
Verse: 12    dem habet ir schiere an gesiget.

Verse: 13    wir müezen iuch bî kreften lân
Verse: 14    mit rehter wârheit sunder wân.

Verse: 15    vrou Minne, ir habet ein êre
Verse: 16    und wênec deheine mêre:

Verse: 17    vrou Liebe iu gît geselleschaft,
Verse: 18    anders wære vil dürkel iuwer kraft.

Verse: 19    vrou Minne, ir phleget untriuwen:
Verse: 20    mit alden siten niuwen

Verse: 21    ir zucket manegem wîbe ir prîs
Verse: 22    und râtet in sippiu âmîs

Verse: 23    und daz manec herre an sînem man
Verse: 24    von iuwer kraft hât missetân

Verse: 25    und der vriunt an sînem gesellen
Verse: 26    (iuwer site kan sich hellen)

Verse: 27    und der man an sînen herren.
Verse: 28    vrou Minne, iu solde werren,

Verse: 29    daz ir den lîp der gir verwent:
Verse: 30    dar umbe sich diu sêle sent.




Chapter: 292 
292


Verse: 1    vrou Minne, sît ir habet gewalt,
Verse: 2    daz ir die jugent sus machet alt,

Verse: 3    der man doch zelt vil kurziu jâr,
Verse: 4    iuwer werc sint hâlscharlîcher vâr.

Verse: 5    disiu rede enzæme keinem man,
Verse: 6    wan der nie trôst von iu gewan.

Verse: 7    hetet ir mir geholfen baz,
Verse: 8    mîn lop wære gein iu niht sô laz:

Verse: 9    ir habet mir mangel vor gezilt
Verse: 10    und mîner ougen ecke alsô verspilt,

Verse: 11    daz ich iu niht getrûwen mac.
Verse: 12    mîn nôt iuch ie vil ringe wac.

Verse: 13    doch sît ir mir ze wol geborn,
Verse: 14    daz gein iu mîn kranker zorn

Verse: 15    immer solde bringen wort.
Verse: 16    iuwer druc hât sô strengen ort,

Verse: 17    ir ladet ûf herze swæren soum.
Verse: 18    her Heinrîch von Veldeke sînen boum

Verse: 19    mit kunst gein iuwerm arte maz:
Verse: 20    hete er uns dô bescheiden baz

Verse: 21    wie man iuch sül behalden!
Verse: 22    er hât her dan gespalden

Verse: 23    wie man iuch sol erwerben.
Verse: 24    von tumpheit muoz verderben

Verse: 25    maneges tôren hôher vunt.
Verse: 26    was oder wirt mir daz noch kunt,

Verse: 27    daz wîze ich iu, vrou Minne.
Verse: 28    ir sît slôz ob dem sinne.

Verse: 29    ez enhilfet gein iu schilt noch swert,
Verse: 30    snel ors, hôch burc mit türnen wert:




Chapter: 293 
293


Verse: 1    ir sît gewaldec ob der wer.
Verse: 2    beide ûf erde und in dem mer

Verse: 3    was entrinnet iuwerm kriege,
Verse: 4    ez vlieze oder vliege?

Verse: 5    vrou Minne, ir tâtet ouch gewalt,
Verse: 6    dô Parzivâl der degen balt

Verse: 7    durch iuch von sînen witzen schiet,
Verse: 8    als im sîn triuwe dô geriet:

Verse: 9    daz werde kiusche klâre wîp
Verse: 10    sande iuch ze boten an sînen lîp,

Verse: 11    rêgîn de Pelrapeire.
Verse: 12    Kardeiz fîz Tampenteire,

Verse: 13    ir bruoder, nâmet ir ouch sîn leben.
Verse: 14    sol man iu solhe zinse geben,

Verse: 15    wol mich daz ich von iu niht hân,
Verse: 16    ir enwoldet mir bezzer senfte lân.

Verse: 17    ich hân geredet unser aller wort:
Verse: 18    nû hœret ouch wiez ergienge dort.

Verse: 19    Keie der ellens rîche
Verse: 20    kom gewâpent ritterlîche

Verse: 21    ûz, als er strîtes gerte.
Verse: 22    ouch wæne in strîtes werte

Verse: 23    des künec Gahmuretes kint.
Verse: 24    swâ twingende vrouwen sint,

Verse: 25    die suln im heiles wünschen nuo,
Verse: 26    wande in brâhte ein wîp dar zuo,

Verse: 27    daz minne witze von im spielt.
Verse: 28    Keie sîner tjost enthielt,

Verse: 29    unz er zem Wâleise sprach:
Verse: 30    "herre, sît iu sus geschach,




Chapter: 294 
294


Verse: 1    daz ir den künec gelastert hât,
Verse: 2    welt ir mir volgen, sôst mîn rât

Verse: 3    und dunket mich iuwer bestez heil,
Verse: 4    nemt iuch selben an ein brackenseil

Verse: 5    und lât iuch vür in ziehen.
Verse: 6    ir enmeget mir niht entvliehen,

Verse: 7    ich bringe iuch doch betwungen dar:
Verse: 8    sô nimt man iuwer unsanfte war."

Verse: 9    den Wâleis twanc der minnen kraft
Verse: 10    swîgens: Keie sînen schaft

Verse: 11    ûf zôch und vrumte im einen swanc
Verse: 12    anz houbet, daz der helm erklanc.

Verse: 13    dô sprach er: "dû muost wachen.
Verse: 14    âne lînlachen

Verse: 15    wirt dir dîn slâfen hie benant.
Verse: 16    ez zilt al anders hie mîn hant:

Verse: 17    ûf den snê dû wirst geleget.
Verse: 18    der den sac von der mül treget,

Verse: 19    wolde man in sô bliuwen,
Verse: 20    in möhte lazheit riuwen."

Verse: 21    vrou Minne, hie seht ir zuo:
Verse: 22    ich wæne manz iu ze laster tuo,

Verse: 23    wan ein gebûr spræche sân:
Verse: 24    "mînem herren sî diz getân."

Verse: 25    er klagete ouch, möhte er sprechen.
Verse: 26    vrou Minne, lât sich rechen

Verse: 27    den werden Wâleisen:
Verse: 28    wan lieze in iuwer vreise

Verse: 29    und iuwer strenge unsüezer last,
Verse: 30    ich wæne sich werte dirre gast.




Chapter: 295 
295


Verse: 1    Keie hurte vaste an in
Verse: 2    und dranc imz ors alumbe hin,

Verse: 3    unz daz der Wâleis übersach
Verse: 4    sîn süeze sûrez ungemach,

Verse: 5    sîns wîbes gelîchen schîn,
Verse: 6    von Pelrapeire der künegîn,

Verse: 7    ich meine den geparrierten snê.
Verse: 8    dô kom aber vrou Witze als ê,

Verse: 9    diu im den sin her wider gap.
Verse: 10    Keiez ors liez in den walap:

Verse: 11    der kom durch tjostieren her.
Verse: 12    von rabîne sancten si diu sper.

Verse: 13    Keie sîne tjoste brâhte
Verse: 14    als im der ougen mez gedâhte,

Verse: 15    durch Parzivâles schilt ein venster wît.
Verse: 16    im wart vergolden dirre strît:

Verse: 17    Keie, Artûs seneschalt,
Verse: 18    ze gegentjoste wart gevalt

Verse: 19    über den ronen dâ diu gans entran,
Verse: 20    sô daz daz ors und der man

Verse: 21    liten beidiu samet nôt.
Verse: 22    der man wart wunt, daz ors lac tôt.

Verse: 23    zwischen dem satelbogen und einem stein
Verse: 24    Keien der zeswe arm undz winster bein

Verse: 25    zebrach von disem gevelle.
Verse: 26    surzengel, satelgeschelle

Verse: 27    von dirre hurte gar zebrast.
Verse: 28    sus galt zwei bliuwen der gast:

Verse: 29    daz eine leit ein maget durch in.
Verse: 30    mit dem andern muoste er selbe sîn.




Chapter: 296 
296


Verse: 1    Parzivâl der valscheitswant,
Verse: 2    sîn triuwe in lêrte daz er vant

Verse: 3    snêwec bluotes zeher drî,
Verse: 4    die in vor witzen machten vrî.

Verse: 5    sîn pensieren umbe den grâl
Verse: 6    und der künegîn gelîchiu mâl,

Verse: 7    iewederz was ein strengiu nôt.
Verse: 8    an im wac vür der minnen lôt,

Verse: 9    wan trûren unde minne
Verse: 10    brichet zæhe sinne.

Verse: 11    sol diz âventiure sîn?
Verse: 12    si möhten beide heizen pîn.

Verse: 13    küene liute solden Keien nôt
Verse: 14    klagen: sîn manheit im gebôt

Verse: 15    genendeclîche an manegen strît.
Verse: 16    man saget in manegen landen wît,

Verse: 17    daz Keie, Artûs seneschalt,
Verse: 18    mit siten wære ein ribalt:

Verse: 19    des sagent in mîniu mære blôz.
Verse: 20    er was der werdekeit genôz,

Verse: 21    swie kleine ich des die volge hân.
Verse: 22    getriuwe und ellenthaft ein man

Verse: 23    was Keie: des giht im mîn munt.
Verse: 24    ich tuon ouch mêre von im kunt.

Verse: 25    Artûses hof was ein zil,
Verse: 26    dar kom vremder ritter vil,

Verse: 27    die werden und die smæhen.
Verse: 28    mit siten die wæhen,

Verse: 29    swelher partierens phlac,
Verse: 30    der selbe Keie ringe wac:




Chapter: 297 
297


Verse: 1    an swem diu kurtôsîe
Verse: 2    und diu werde kumpânîe

Verse: 3    lac, den kunde er êren,
Verse: 4    sîn dienest gein im kêren.

Verse: 5    ich gihe von im der mære,
Verse: 6    er was ein merkære:

Verse: 7    er tet vil rûhes willen schîn.
Verse: 8    ze scherme dem herren sîn

Verse: 9    partierre unde valsche diet,
Verse: 10    von den werden er die schiet:

Verse: 11    er was ir vuore ein strenger hagel,
Verse: 12    noch scherpher dan der bîen ir zagel.

Verse: 13    seht, die verkêrten Keien prîs
Verse: 14    (der was manlîcher triuwen wîs):

Verse: 15    vil hazzes er von in gewan.
Verse: 16    von Düringen vürste Herman,

Verse: 17    etslîch dîn ingesinde ich maz,
Verse: 18    daz ûzgesinde hieze baz:

Verse: 19    dir wære ouch eins Keien nôt,
Verse: 20    sît wâriu milde dir gebôt

Verse: 21    sô manecvalden anehanc,
Verse: 22    etswâ smæhlîch gedranc

Verse: 23    und etswâ werdez dringen.
Verse: 24    dez muoz her Walther singen:

Verse: 25    "guoten tac, bœse unde guot!"
Verse: 26    swâ man solhen sanc nû tuot,

Verse: 27    des sint die valschen gêret.
Verse: 28    Keie hetes in niht gelêret

Verse: 29    noch her Heinrîch von Rîspach.
Verse: 30    hœrt wunders mêr, waz dort geschach




Chapter: 298 
298


Verse: 1    ûf dem Plimizœles plân,
Verse: 2    Keie wart geholt sân,

Verse: 3    in Artûs poulûn getragen.
Verse: 4    sîne vriunt begunden in dâ klagen,

Verse: 5    vil vrouwen unde manec man.
Verse: 6    dô kom ouch mîn her Gâwân

Verse: 7    über in, dâ Keie lac.
Verse: 8    er sprach: "ouwê unsælec tac,

Verse: 9    daz disiu tjost ie wart getân,
Verse: 10    dâ von ich vriunt verlorn hân."

Verse: 11    er klagete in senlîche.
Verse: 12    Keie der zornes rîche

Verse: 13    sprach: "herre, erbarmet iuch mîn lîp?
Verse: 14    sus solden klagen aldiu wîp.

Verse: 15    ir sît mîns herren swester sun:
Verse: 16    möhte ich iu dienest nû getuon,

Verse: 17    als iuwer wille gerte!
Verse: 18    dô mich got der lide werte,

Verse: 19    sô enhât daz mîn hant niht vermiten,
Verse: 20    si enhabe vil durch iuch gestriten:

Verse: 21    ich tæte ouch noch, und solde ez sîn.
Verse: 22    nû enklaget niemêr, lât mir den pîn.

Verse: 23    iuwer œheim, der künec hêr,
Verse: 24    gewinnet nimmer solhen Keien mêr.

Verse: 25    ir sît mir râche ze wol geborn:
Verse: 26    hetet aber ir einen vinger dort verlorn,

Verse: 27    dâ wâcte ich gegen mîn houbet.
Verse: 28    seht ob ir mirz geloubet:

Verse: 29    kêrt iuch niht an mîn hetzen.
Verse: 30    er kan unsanfte letzen,




Chapter: 299 
299


Verse: 1    der noch dort ûze unvlühtec habet:
Verse: 2    weder er enschûftet noch endrabet.

Verse: 3    ouch enist hie ninder vrouwen hâr
Verse: 4    weder sô mürwe noch sô klâr,

Verse: 5    ez enwære doch ein veste bant
Verse: 6    ze wern strîtes iuwer hant.

Verse: 7    swelh man tuot solhe diemuot schîn,
Verse: 8    der êret ouch die muoter sîn:

Verse: 9    vaterhalben solde er ellen hân.
Verse: 10    kêrt muoterhalp, her Gâwân,

Verse: 11    sô werdet ir swertes blicke bleich
Verse: 12    und manlîcher herte weich."

Verse: 13    sus was der wol gelobete man
Verse: 14    gerant zer blôzen sîten an

Verse: 15    mit rede: er kunde ir gelden niht,
Verse: 16    als wol gezogenem man geschiht,

Verse: 17    dem schame versliuzet sînen munt,
Verse: 18    daz dem verschamten ist unkunt.

Verse: 19    Gâwân ze Keien sprach:
Verse: 20    "swâ man sluoc oder stach,

Verse: 21    swaz des gein mir ist geschehen,
Verse: 22    swer mîne varwe wolde spehen,

Verse: 23    diu wæne ich ie erbliche
Verse: 24    von slage oder von stiche.

Verse: 25    dû zürnes mit mir âne nôt:
Verse: 26    ich bin der dir ie dienest bôt."

Verse: 27    ûz dem poulûn gienc her Gâwân.
Verse: 28    sîn ors hiez er bringen sân,

Verse: 29    sunder swert und âne sporn
Verse: 30    saz drûf der degen wol geborn:




Chapter: 300 
300


Verse: 1    er kêrte ûz dâ er den Wâleis vant.
Verse: 2    des witze was der minnen phant,

Verse: 3    er truoc drî tjoste durch den schilt,
Verse: 4    mit heldes handen dar gezilt:

Verse: 5    ouch hete in Orilus versniten.
Verse: 6    sus kom Gâwân zuo zim geriten:

Verse: 7    sunder kalopieren
Verse: 8    und âne punieren.

Verse: 9    er wolde güetlîche ersehen,
Verse: 10    von wem der strît dâ wære geschehen.

Verse: 11    dô sprach er grüezenlîche dar
Verse: 12    ze Parzivâl, ders kleine war

Verse: 13    nam. daz muoste et alsô sîn:
Verse: 14    dâ tet vrou Minne ir ellen schîn

Verse: 15    an dem den Herzeloide bar.
Verse: 16    ungezaldiu sippe in gar

Verse: 17    schiet von den witzen sîn
Verse: 18    und ûf geerbeter pîn

Verse: 19    von vater und von muoter art.
Verse: 20    der Wâleis wênec innen wart,

Verse: 21    waz mîns herren Gâwânes munt
Verse: 22    mit worten im dâ tæte kunt.

Verse: 23    dô sprach der künec Lôtes sun:
Verse: 24    "herre ir welt gewalt nû tuon,

Verse: 25    sît ir mir grüezen widersaget.
Verse: 26    ich enbin doch niht sô gar verzaget,

Verse: 27    ich enbringez an ander vrâge.
Verse: 28    ir habet man und mâge

Verse: 29    und den künec selben entêret,
Verse: 30    unser laster hie gemêret.




Chapter: 301 
301


Verse: 1    des erwirbe ich iu die hulde,
Verse: 2    daz der küenc læt die schulde,

Verse: 3    welt ir nâch mînem râte leben,
Verse: 4    geselleschaft mir vür in geben."

Verse: 5    des künec Gahmuretes kint,
Verse: 6    dreun und vlêhen was im ein wint.

Verse: 7    der tavelrunder hœster prîs,
Verse: 8    Gâwân was solher nœte al wîs:

Verse: 9    er hete si unsanfte erkant.
Verse: 10    dô er mit dem mezzer durch die hant

Verse: 11    stach, des twanc in minnen kraft
Verse: 12    und wert wîplîch geselleschaft:

Verse: 13    in schiet von tôde ein künegîn.
Verse: 14    dô der küene Lehelîn

Verse: 15    mit einer tjoste rîche
Verse: 16    in twanc sô volleclîche,

Verse: 17    diu senfte süeze wol gevar
Verse: 18    ze phande sazte ir houbet dar,

Verse: 19    rêgîn Ingûse de Bahtarliez:
Verse: 20    alsus diu getriuwe hiez.

Verse: 21    dô dâhte mîn her Gâwân:
Verse: 22    "waz ob diu minne disen man

Verse: 23    twinget als si mich dô twanc,
Verse: 24    und sîn getriulîch gedanc

Verse: 25    der minne muoz ir siges jehen?"
Verse: 26    er marcte des Wâleises sehen,

Verse: 27    war stüenden im diu ougen sîn.
Verse: 28    eine veilen tuoches von Surîn,

Verse: 29    gefurriert mit gelwem zindâl,
Verse: 30    die swanc er über diu bluotes mâl.




Chapter: 302 
302


Verse: 1    dô diu veile wart der zeher dach,
Verse: 2    sô daz ir Parzivâl niht sach,

Verse: 3    im gap her wider witze sîn
Verse: 4    von Pelrapeire diu künegîn:

Verse: 5    diu behielt iedoch sîn herze dort.
Verse: 6    nû ruochet hœren sîniu wort.

Verse: 7    er sprach: "ouwê vrouwe unde wîp,
Verse: 8    wer hât benomen mir dînen lîp?

Verse: 9    erwarp mit ritterschaft mîn hant
Verse: 10    dîn werde minne, krône und ein lant?

Verse: 11    bin ichz der dich von Clâmidê
Verse: 12    lôste? ich vant ach und ouwê

Verse: 13    und siufzec manec herze vrebel
Verse: 14    in dîner helfe. ougen nebel

Verse: 15    hât dich bî liehter sunnen hie
Verse: 16    mit benomen, jâ enweiz ich wie."

Verse: 17    er sprach: "Ouwê war kom mîn sper,
Verse: 18    daz ich mit mir brâhte her?"

Verse: 19    dô sprach mîn her Gâwân:
Verse: 20    "herre, ez ist mit tjost vertân."

Verse: 21    "gein wem?" sprach der degen wert.
Verse: 22    "ir enhabet hie schilt noch daz swert:

Verse: 23    waz möhte ich prîses an iu bejagen?
Verse: 24    doch muoz ich iuwer spotten tragen:

Verse: 25    ir bietet mirz lîhte her nâch baz.
Verse: 26    etswenne ich ouch vor tjost gesaz:

Verse: 27    vinde ich nimmer an iu strît,
Verse: 28    doch sint diu lant wol sô wît,

Verse: 29    ich mac dâ prîs und arbeit holn
Verse: 30    und beidiu vreude und angest doln."




Chapter: 303 
303


Verse: 1    mîn her Gâwân dô sprach:
Verse: 2    "swaz hie mit rede gein iu geschach,

Verse: 3    diust lûter unde minneclîch
Verse: 4    und niht mit stæter trüebe rîch.

Verse: 5    ich ger als ichz gedienen wil.
Verse: 6    hie liget ein künec und ritter vil

Verse: 7    und manec vrouwe wol gevar:
Verse: 8    geselleschaft gibe ich iu dar,

Verse: 9    lât ir mich mit iu rîten.
Verse: 10    dâ bewar ich iuch vor strîten."

Verse: 11    "iuwer genâde, herre! ir sprechet wol,
Verse: 12    daz ich vil gerne dienen sol,

Verse: 13    sît ir kumpânîe bietet mir.
Verse: 14    nû werst iuwer herre oder ir?"

Verse: 15    "ich heize herre einen man,
Verse: 16    von dem ich manec urbor hân:

Verse: 17    ein teil ich der benenne hie.
Verse: 18    er was gein mir des willen ie,

Verse: 19    daz er mirz ritterlîche bôt.
Verse: 20    sîne swester hete der künec Lôt,

Verse: 21    diu mich zer werlde brâhte.
Verse: 22    swes got an mir gedâhte,

Verse: 23    daz biutet dienest sîner hant.
Verse: 24    der künec Artûs ist er genant.

Verse: 25    mîn name ist ouch vil unverholn,
Verse: 26    an allen steten unverstoln:

Verse: 27    liute die mich erkennent,
Verse: 28    Gâwân mich die nennent.

Verse: 29    iu dient mîn lîp und der name,
Verse: 30    welt irz kêren mir von schame."




Chapter: 304 
304


Verse: 1    dô sprach er: "bistûz Gâwân?
Verse: 2    wie kranken prîs ich des hân,

Verse: 3    ob dû mirz wol erbiutes hie!
Verse: 4    ich hôrte von dir sprechen ie,

Verse: 5    dû erbiutesz allen liuten wol.
Verse: 6    dîn dienst ich doch emphâhen sol

Verse: 7    niwan ûf gegendienstes gelt.
Verse: 8    nû sage mir, wes sint diu gezelt,

Verse: 9    der dort ist manegez ûf geslagen?
Verse: 10    liget Artûs dâ, sô muoz ich klagen

Verse: 11    daz ich in niht mit êren mîn
Verse: 12    mac gesehen noch die künegîn.

Verse: 13    ich sol rechen ê ein bliuwen,
Verse: 14    dâ von ich sît mit riuwen

Verse: 15    vuor von solhen sachen:
Verse: 16    ein werdiu maget mir lachen

Verse: 17    bôt, die blou der seneschalt
Verse: 18    durch mich, daz von ir reis der walt."

Verse: 19    "unsanfte ist daz gerochen"
Verse: 20    sprach Gâwân: "imst zebrochen

Verse: 21    der zeswe arm undz winster bein.
Verse: 22    rît her, schouwe ors und ouch den stein.

Verse: 23    hie ligent ouch trunzûne ûf dem snê
Verse: 24    dîns spers, nâch dem dû vrâctes ê."

Verse: 25    dô Parzivâl die wârheit sach,
Verse: 26    dô vrâcte er vürbaz unde sprach:

Verse: 27    "diz lâze ich an dich, Gâwân:
Verse: 28    ob daz sî der selbe man

Verse: 29    der mir hât laster vor gezilt,
Verse: 30    sô rîte ich mit dir, swar dû wilt."




Chapter: 305 
305


Verse: 1    "ich enwil gein dir niht liegens phlegen"
Verse: 2    sprach Gâwân: "hiest von tjost gelegen

Verse: 3    Segramors, ein strîtes helt,
Verse: 4    des tât gein prîse ie was erwelt.

Verse: 5    dû tætez ê Keie wart gevalt:
Verse: 6    an in beiden hâstû prîs bezalt,"

Verse: 7    si riten mit ein ander dan,
Verse: 8    der Wâleis und Gâwân.

Verse: 9    vil volkes zorse und ze vuoz
Verse: 10    dort inne bôt in werden gruoz,

Verse: 11    Gâwâne und dem ritter rôt,
Verse: 12    wande in ir zuht daz gebôt.

Verse: 13    Gâwân kêrte, dâ er sîn poulûn vant:
Verse: 14    vroun Cunnewâren de Lalant

Verse: 15    ir snüere unz an die sîne gienc.
Verse: 16    diu wart vil vrô, mit vreude emphienc

Verse: 17    diu maget ir ritter, der si rach
Verse: 18    daz ir von Keien ê geschach.

Verse: 19    si nam ir bruoder an die hant
Verse: 20    und vroun Jeschûten von Karnant:

Verse: 21    sus sach si komen Parzivâl.
Verse: 22    der was gevar durch îsers mâl

Verse: 23    als touwege rôsen wæren dar gevlogen.
Verse: 24    im was sîn harnas abe gezogen.

Verse: 25    er spranc ûf, dô er die vrouwen sach.
Verse: 26    nû hœret wie Cunnewâre sprach:

Verse: 27    "got alrêst, dar nâch mir
Verse: 28    weset willekomen, sît daz ir

Verse: 29    belibet bî manlîchen siten.
Verse: 30    ich hete lachen gar vermiten,




Chapter: 306 
306


Verse: 1    unz iuch mîn herze erkande,
Verse: 2    dô mich an vreuden phande

Verse: 3    Keie, der mich dô sô sluoc.
Verse: 4    daz habet gerochen ir genuoc:

Verse: 5    ich kuste iuch, wære ich kusses wert."
Verse: 6    "des hete ich hiute sân gegert"

Verse: 7    sprach Parzivâl, "getorste ich sô,
Verse: 8    wande ich bin iuwers emphâhens vrô."

Verse: 9    si kusten unde sâzen nider.
Verse: 10    eine juncvrouwen si sande wider

Verse: 11    und hiez ir bringen rîchiu kleit,
Verse: 12    diu wâren gesniten al gereit

Verse: 13    ûz phelle von Nînivê:
Verse: 14    si solde der künec Clâmidê,

Verse: 15    ir gevangen, hân getragen.
Verse: 16    diu maget si brâhte und begunde klagen,

Verse: 17    der mantel wære âne snuor.
Verse: 18    Cunnewâre sus gevuor:

Verse: 19    von blanker sîte ein snüerelîn
Verse: 20    si zucte und zôch ez im dar în.

Verse: 21    mit urloube er sich dô twuoc
Verse: 22    den râm von im: der junge truoc

Verse: 23    bî rôtem munde liehtez vel.
Verse: 24    gekleidet wart der degen snel:

Verse: 25    dô was er fier unde klâr.
Verse: 26    swer in sach, der jach vür wâr,

Verse: 27    er wære geblüemet vür alle man.
Verse: 28    diz lop sîn varwe muoste hân.

Verse: 29    Parzivâl stuont wol sîn wât.
Verse: 30    einen grüenen smârât




Chapter: 307 
307


Verse: 1    spien si im vür sîn houbetloch.
Verse: 2    Cunnewâre gap im mêr dennoch,

Verse: 3    einen tiuren gürtel fier:
Verse: 4    mit edeln steinen manec tier

Verse: 5    muoste ûzen ûf dem borten sîn,
Verse: 6    diu rinke was ein rubîn.

Verse: 7    wie was der junge âne bart
Verse: 8    geschicket, dô er gegürtet wart?

Verse: 9    diz mære giht, wol genuoc.
Verse: 10    daz volc im holdez herze truoc:

Verse: 11    swer in sach, man oder wîp,
Verse: 12    die heten wert sînen lîp.

Verse: 13    der künec messe hete gehôrt:
Verse: 14    man sach Artûsen komen dort

Verse: 15    mit der tavelrunder diet.
Verse: 16    der neheiner valscheit nie geriet,

Verse: 17    die heten alle ê vernomen,
Verse: 18    der rôte ritter wære komen

Verse: 19    in Gâwânes poulûn.
Verse: 20    dar kom Artûs der Bertûn.

Verse: 21    der zeblûwen Antanor
Verse: 22    spranc dem künege allez vor.

Verse: 23    unz er den Wâleis ersach.
Verse: 24    den vrâcte er: "sît irz der mich rach

Verse: 25    und Cunnewâren de Lalant?
Verse: 26    vil prîses giht man iuwer hant:

Verse: 27    Keie hât verphendet.
Verse: 28    sîn dreun ist nû gelendet,

Verse: 29    ich vürhte wênec sînen swanc:
Verse: 30    der zeswe arm ist im ze kranc."




Chapter: 308 
308


Verse: 1    dô truoc der junge Parzivâl
Verse: 2    âne vlügel engels mâl,

Verse: 3    sus geblüet ûf der erden.
Verse: 4    Artûs mit den werden

Verse: 5    emphienc in minneclîche.
Verse: 6    guotes willen wâren rîche

Verse: 7    alle die in gesâhen dâ.
Verse: 8    ir herzen volge sprach in jâ,

Verse: 9    gein sînem lobe sprach niemen nein:
Verse: 10    sô rehte minneclîch er schein.

Verse: 11    Artûs sprach zem Wâleise sân:
Verse: 12    "ir habet mir liep und leit getân:

Verse: 13    doch habet ir mir der êre
Verse: 14    brâht und gesendet mêre

Verse: 15    denne ich ir ie von manne emphienc.
Verse: 16    dâ engein mîn dienst noch kleine gienc,

Verse: 17    hetet ir prîses niemêr getân,
Verse: 18    wan daz diu herzogîn sol hân,

Verse: 19    vrou Jeschûte, die hulde.
Verse: 20    ouch wære iu Keien schulde

Verse: 21    gewandelt und gerochen,
Verse: 22    hete ich iuch ê gesprochen."

Verse: 23    Artûs sagete im wes er bat,
Verse: 24    war umbe er an die selben stat

Verse: 25    und ouch mêr landes was geriten.
Verse: 26    si begunden in dô alle biten

Verse: 27    daz er gelobete sunder
Verse: 28    den von der tavelrunder

Verse: 29    sîn ritterlîch gesellekeit.
Verse: 30    im was ir bete niht ze leit:




Chapter: 309 
309


Verse: 1    ouch mohte ers sîn von schulden vrô.
Verse: 2    Parzivâl si werte dô.

Verse: 3    nû râtet, hœret unde jeht,
Verse: 4    ob tavelrunder mege ir reht

Verse: 5    des tages behalden, wande ir phlac
Verse: 6    Artûs, bî dem ein site lac:

Verse: 7    nehein ritter vor im az
Verse: 8    des tages swenne âventiur vergaz

Verse: 9    daz si sînen hof vermeit.
Verse: 10    imst âventiure nû bereit:

Verse: 11    daz lop muoste tavelrunder hân.
Verse: 12    swie si wære dâ ze Nantes lân,

Verse: 13    man sprach ir reht ûf bluomen velt.
Verse: 14    dâ enirte stûde noch gezelt.

Verse: 15    der künec Artûs daz gebôt
Verse: 16    zêren dem ritter rôt:

Verse: 17    sus nam sîn werdekeit dâ lôn.
Verse: 18    ein phelle von Acratôn,

Verse: 19    ûz heidenschefte verre brâht,
Verse: 20    wart zeinem zil aldâ gedâht,

Verse: 21    niht breit, sinewel gesniten:
Verse: 22    al nâch tavelrunder siten

Verse: 23    (wande in ir zuht des verjach)
Verse: 24    nâch gegenstuole dâ niemen sprach,

Verse: 25    diu gesiz wâren al gelîche hêr.
Verse: 26    der künec Artûs gebôt in mêr

Verse: 27    daz man werde ritter und werde vrouwen
Verse: 28    an dem ringe müeste schouwen,

Verse: 29    die man dâ gein prîse maz.
Verse: 30    maget, wîp und man ze hove dô az.




Chapter: 310 
310


Verse: 1    dô kom vrou Ginôvêr dar
Verse: 2    mit maneger vrouwen lieht gevar,

Verse: 3    mit ir manec edel vürstîn:
Verse: 4    die truogen minneclîchen schîn.

Verse: 5    ouch was der rinc genomen sô wît,
Verse: 6    daz âne gedrenge und âne strît

Verse: 7    manec vrouwe bî ir âmîs saz.
Verse: 8    Artûs der valsches laz

Verse: 9    brâhte den Wâleis an der hant,
Verse: 10    vrou Cunnewâre de Lalant

Verse: 11    gienc im anderhalben bî:
Verse: 12    diu was dô trûrens worden vrî.

Verse: 13    Artûs an den Wâleis sach.
Verse: 14    nû sult ir hœren wie er sprach:

Verse: 15    "ich wil iuwern klâren lîp
Verse: 16    lâzen küssen mîn aldez wîp:

Verse: 17    des endorftet ir doch hie niemen biten,
Verse: 18    sît ir von Pelrapeire geriten,

Verse: 19    wan dâst des kusses hœstez zil.
Verse: 20    eins dinges ich iuch biten wil:

Verse: 21    kom ich immer in iuwer hûs,
Verse: 22    geldet disen kus" sprach Artûs.

Verse: 23    "ich tuon swes ir mich bitet, dâ"
Verse: 24    sprach der Wâleis "und ouch anderswâ."

Verse: 25    ein lützel gein im si dô gienc,
Verse: 26    diu künegîn in mit kusse emphienc.

Verse: 27    "nû verkiuse ich hie mit triuwen"
Verse: 28    sprach si, "daz ir mit riuwen

Verse: 29    mich liezet: die hetet ir mir gegeben,
Verse: 30    dô ir rois îthêr nâmet sîn leben."




Chapter: 311 
311


Verse: 1    von der suone wurden naz
Verse: 2    der künegîn ougen umbe daz,

Verse: 3    wande îthêrs tôt tet wîben wê.
Verse: 4    man sazte den künec Clâmidê

Verse: 5    an daz uover zuo dem Plimizœl,
Verse: 6    bî dem saz Jofreit fîz îdœl.

Verse: 7    zwischen Clâmidê und Gâwân
Verse: 8    der Wâleis sitzen muoste hân,

Verse: 9    als mir diu âventiure maz.
Verse: 10    an disem ringe niemen saz,

Verse: 11    der muoter brust ie gesouc,
Verse: 12    des werdekeit sô lützel trouc,

Verse: 13    wan kraft mit jugent wol gevar
Verse: 14    der Wâleis mit im brâhte dar.

Verse: 15    swer in ze rehte wolde spehen,
Verse: 16    sô hât sich manec vrouwe ersehen

Verse: 17    in trüeber glase dan wære sîn munt.
Verse: 18    ich tuon iu von sînem velle kunt.

Verse: 19    an dem kinne und an den wangen
Verse: 20    sîn varwe zeiner zangen

Verse: 21    wære guot: si möhte stæte haben,
Verse: 22    diu den zwîvel wol hin dan kan schaben.

Verse: 23    ich meine wîp die wenkent
Verse: 24    und ir vriuntschaft überdenkent.

Verse: 25    sîn glast was wîbes stæte ein bant:
Verse: 26    ir zwîvel gar gein im verswant,

Verse: 27    ir sehen in mit triuwe emphienc,
Verse: 28    durch diu ougen in ir herze er gienc.

Verse: 29    man und wîp im wâren holt:
Verse: 30    sus hete er werdekeit gedolt




Chapter: 312 
312


Verse: 1    unz ûf daz siufzebære zil.
Verse: 2    hie kom von der ich sprechen wil,

Verse: 3    ein maget gein triuwen wol gelobet,
Verse: 4    wan daz ir zuht was vertobet.

Verse: 5    ir mære tet vil liuten leit.
Verse: 6    nû hœret wie diu juncvrouwe reit

Verse: 7    einen mûl hôch als ein kastelân,
Verse: 8    val und dennoch sus getân,

Verse: 9    nassnitec und verbrant,
Verse: 10    als ungerschiu marc erkant.

Verse: 11    ir zoum und ir gereite
Verse: 12    was geworht mit arbeite,

Verse: 13    tiure unde rîche.
Verse: 14    ir mûl gienc volleclîche,

Verse: 15    si was niht vrouwenlîche var.
Verse: 16    wê waz solde ir komen dar?

Verse: 17    si kom iedoch: daz muoste et sîn,
Verse: 18    Artûs her si brâhte pîn.

Verse: 19    der megede ir kunst des verjach,
Verse: 20    alle sprâche si wol sprach,

Verse: 21    latîn, heidensch, franzois.
Verse: 22    si was der witze kurtois,

Verse: 23    dîaletike und jeometrî,
Verse: 24    ir wâren ouch die liste bî

Verse: 25    von astromomîe.
Verse: 26    si hiez Cundrîe,

Verse: 27    surziere was ir zuoname.
Verse: 28    in dem munde niht diu lame

Verse: 29    (wan der geredete ir genuoc),
Verse: 30    vil hôher vreude si nider sluoc.




Chapter: 313 
313


Verse: 1    diu maget witze rîche
Verse: 2    was gevar den ungelîche

Verse: 3    die man dâ heizet bêâ schent.
Verse: 4    ein brûtlachen von Gent,

Verse: 5    noch blâwer denne ein lasûr,
Verse: 6    hete an geleget der vreuden schûr:

Verse: 7    daz was ein kappe wol gesniten
Verse: 8    al nâch der Franzoiser siten.

Verse: 9    drunde an ir lîbe was phelle guot.
Verse: 10    von Lunders ein phæwîn huot,

Verse: 11    gefurriert mit einem blîalt
Verse: 12    (der huot was niuwe, diu snuor niht alt),

Verse: 13    der hienc ir an dem rücke.
Verse: 14    ir mære was ein brücke:

Verse: 15    über vreude ez jâmer truoc.
Verse: 16    si zucte in schimphes dâ genuoc.

Verse: 17    über den huot ein zoph ir swanc
Verse: 18    unz ûf den mûl: der was sô lanc,

Verse: 19    swarz, herte und niht ze klâr,
Verse: 20    linde als eins swînes rückehâr.

Verse: 21    si was genaset als ein hunt,
Verse: 22    zwêne ebers zene ir vür den munt

Verse: 23    giengen wol spannen lanc,
Verse: 24    ietweder wintbra sich dranc

Verse: 25    mit zöphen vür die hâres snuor.
Verse: 26    mîn zuht mit wârheit missevuor,

Verse: 27    daz ich sus muoz von vrouwen sagen:
Verse: 28    nehein anderiu darf ez von mir klagen.

Verse: 29    Cundrîe truoc ôren als ein ber:
Verse: 30    niht nâch vriundes minne ger,




Chapter: 314 
314


Verse: 1    rûch was ir antlitze erkant.
Verse: 2    einen geisel si vuorte in der hant,

Verse: 3    dem wâren die swenkel sîdîn
Verse: 4    und der stil ein rubîn.

Verse: 5    gevar als eines affen hût
Verse: 6    truoc hende diz gæbe trût.

Verse: 7    die nagele wâren niht ze lieht,
Verse: 8    wan mir diu âventiure giht,

Verse: 9    si stüenden als eins lewen klân.
Verse: 10    nâch ir minne was selten tjost getân.

Verse: 11    sus kom geriten in den rinc
Verse: 12    trûrens urhap, vreuden twinc.

Verse: 13    si kêrte aldâ si den wirt vant.
Verse: 14    vrou Cunnewâre de Lalant

Verse: 15    az mit Artûse,
Verse: 16    diu künegîn von Janfûse

Verse: 17    mit vroun Ginôvêren az.
Verse: 18    Artûs der künec schône saz.

Verse: 19    Cundrîe hielt vür den Bertenois,
Verse: 20    si sprach hin zim en franois

Verse: 21    (ob ichz iu tiuschen sagen sol,
Verse: 22    mir tuont ir mære niht ze wol):

Verse: 23    "fil li roi Utepandragûn,
Verse: 24    dich selben und manegen Bertûn

Verse: 25    hât dîn gewerp alhie geschant.
Verse: 26    die besten über elliu lant

Verse: 27    sæzen hie mit werdekeit,
Verse: 28    wan daz ein galle ir prîs versneit:

Verse: 29    tavelrunder ist entnihtet,
Verse: 30    der valsch hât dran gephlihtet.




Chapter: 315 
315


Verse: 1    künec Artûs, dû stüende ze lobe
Verse: 2    hôhe dînen genôzen obe:

Verse: 3    dîn stîgender prîs nû sinket,
Verse: 4    dîn snelliu wirde hinket,

Verse: 5    dîn hôhez lop sich neiget,
Verse: 6    dîn prîs hât valsch erzeiget.

Verse: 7    tavelrunder prîses kraft
Verse: 8    hât erlemt ein geselleschaft,

Verse: 9    die drüber gap her Parzivâl.
Verse: 10    der ouch dort treget diu ritters mâl,

Verse: 11    ir nennet in der ritter rôt
Verse: 12    nâch dem der lac vor Nantes tôt:

Verse: 13    ungelîch ir zweier leben was,
Verse: 14    wan munt von ritter nie gelas,

Verse: 15    der phlæge sô ganzer werdekeit."
Verse: 16    von dem künege si vür den Wâleis reit.

Verse: 17    si sprach: "ir tuot mir site buoz,
Verse: 18    daz ich versage mînen gruoz

Verse: 19    Artûse und der massenîe sîn.
Verse: 20    gunêrt si iuwer liehter schîn

Verse: 21    und iuwer manlîchen lide.
Verse: 22    hete ich suone oder vride,

Verse: 23    diu wæren iu beidiu tiure.
Verse: 24    ich dunke iuch ungehiure

Verse: 25    und bin gehiurer doch danne ir.
Verse: 26    her Parzivâl, wan saget ir mir

Verse: 27    und bescheidet mich einer mære,
Verse: 28    dô der trûrege vischære

Verse: 29    saz âne vreude und âne trôst,
Verse: 30    war umbe ir in niht siufzens hât erlôst?




Chapter: 316 
316


Verse: 1    er truoc iu vür den jâmers last:
Verse: 2    ir vil ungetriuwer gast,

Verse: 3    sîn nôt iuch solde erbarmet hân.
Verse: 4    daz iu der munt noch werde wan,

Verse: 5    ich meine der zungen drinne,
Verse: 6    als iuz herze ist rehter sinne!

Verse: 7    gein der helle ir sît benant
Verse: 8    ze himele vor der hœsten hant:

Verse: 9    alsô sît ir ûf der erden.
Verse: 10    versinnent sich die werden,

Verse: 11    ir heiles ban, ir sælden vluoch,
Verse: 12    des ganzen prîses reht unruoch,

Verse: 13    ir sît manlîcher êren schiech,
Verse: 14    und an der werdekeit sô siech,

Verse: 15    nehein arzet mac iuch des ernern.
Verse: 16    ich wil ûf iuwerm houpte swern,

Verse: 17    gît mir iemen des den eit,
Verse: 18    daz grœzer valsch nie wart bereit

Verse: 19    neheinem alsô schœnem man.
Verse: 20    ir vederangel, ir nâtern zan,

Verse: 21    iu gap iedoch der wirt ein swert,
Verse: 22    des iuwer wirde wart nie wert:

Verse: 23    dâ erwarp iu swîgen sünden zil.
Verse: 24    ir sît der hellehirten spil,

Verse: 25    gunêrter lîp, her Parzivâl!
Verse: 26    ir sâhet ouch vür iuch tragen den grâl

Verse: 27    und snîdende silber und bluotec sper.
Verse: 28    ir vreuden letze, ir trûrens wer,

Verse: 29    wære ze Munsalvæsche iu vrâgen mite!
Verse: 30    in heidenschaft ze Tabronite




Chapter: 317 
317


Verse: 1    diu stat hât erden wunsches solt:
Verse: 2    hie hete iu vrâgen mêr erholt.

Verse: 3    jenes landes künegîn
Verse: 4    Feirefîz Anschevîn

Verse: 5    mit herter ritterschefte erwarp.
Verse: 6    an dem diu manheit niht verdarp,

Verse: 7    die iuwer beider vater truoc,
Verse: 8    iuwer bruoder wunders phliget genuoc:

Verse: 9    jâst beidiu swarz unde blanc
Verse: 10    der künegîn sun von Zazamanc.

Verse: 11    nû denke ich aber an Gahmureten:
Verse: 12    des herze ie valsches was erjeten,

Verse: 13    von Anschouwe iuwer vater hiez,
Verse: 14    der iu ander erbe liez

Verse: 15    denne als ir habet geworben.
Verse: 16    an prîse ir sît verdorben:

Verse: 17    hete iuwer muoster ie missetân,
Verse: 18    sô solde ichz dâ vür gerne hân,

Verse: 19    ir möhtet ir sun niht gesîn.
Verse: 20    nein, si lêrte ir triuwe pîn:

Verse: 21    geloupt von ir guoter mære
Verse: 22    und daz iuwer vater wære

Verse: 23    manlîcher triuwe wîse
Verse: 24    und wîtvengec hôher prîse.

Verse: 25    er kunde wol mit schallen.
Verse: 26    grôz herze und kleine gallen,

Verse: 27    dar obe was sîn brust ein dach.
Verse: 28    er was riuse und vengec vach:

Verse: 29    sîn manlîchez ellen
Verse: 30    kunde den prîs wol gestellen.




Chapter: 318 
318


Verse: 1    nûst iuwer prîs ze valsche komen.
Verse: 2    ouwê daz ie wart vernomen

Verse: 3    von mir, daz Herzeloiden barn
Verse: 4    an prîse hât sus missevarn!"

Verse: 5    Cundrîe was selbe sorgens phant:
Verse: 6    al weinde si die hende want,

Verse: 7    daz manec zaher den andern sluoc.
Verse: 8    grôz jâmer si ûz ir ougen truoc:

Verse: 9    die maget lêrte ir triuwe
Verse: 10    wol klagen ir herzen riuwe.

Verse: 11    wider vür den wirt si kêrte,
Verse: 12    ir mære si dâ gemêrte.

Verse: 13    si sprach: "ist hei kein ritter wert,
Verse: 14    des ellen prîses hât gegert

Verse: 15    und dar zuo hôher minne?
Verse: 16    ich weiz vier küneginne

Verse: 17    und vier hundert juncvrouwen,
Verse: 18    die man gerne möhte schouwen:

Verse: 19    ze Schastel Marveile die sint.
Verse: 20    al âventiure ist ein wint,

Verse: 21    wan die man dâ bezaln mac,
Verse: 22    hôher minne wert bejac.

Verse: 23    al habe ich der reise pîn,
Verse: 24    ich wil doch hînte drûfe sîn."

Verse: 25    diu maget trûrec, niht gemeit,
Verse: 26    âne urloup dannen reit,

Verse: 27    al weinde si dicke wider sach.
Verse: 28    nû hœret wie si ze jungest sprach:

Verse: 29    "ei Munsalvæsche, jâmers zil!
Verse: 30    wê daz dich niemen trœsten wil!"




Chapter: 319 
319


Verse: 1    Cundrîe la surziere,
Verse: 2    diu unsüeze und doch diu fiere,

Verse: 3    den Wâleis si beswæret hât.
Verse: 4    waz half in küenes herzen rât

Verse: 5    und wâriu zuht bî manheit?
Verse: 6    und dennoch mêr im was bereit

Verse: 7    schame ob allen sînen siten:
Verse: 8    den rehten valsch hete er vermiten,

Verse: 9    wan schame gît prîs ze lône
Verse: 10    und ist doch der sêle krône,

Verse: 11    schame ist ob siten ein güebet uop.
Verse: 12    Cunnewâre daz êrste weinen huop,

Verse: 13    daz Parzivâl den degen balt
Verse: 14    Cundrîe surziere sus beschalt,

Verse: 15    ein alsô wunderlîch geschaf.
Verse: 16    herzen jâmer ougen saf

Verse: 17    gap maneger werden vrouwen:
Verse: 18    die man weinde muoste schouwen,

Verse: 19    Cundrîe was ir trûrens wer.
Verse: 20    diu reit enwec: nû reit dort her

Verse: 21    ein ritter, der truoc hôhen muot.
Verse: 22    al sîn harnas was sô guot

Verse: 23    von den vuozen unz an shouptes dach,
Verse: 24    daz mans vür grôze koste jach:

Verse: 25    sîn zimierde was rîche.
Verse: 26    gewâpent ritterlîche

Verse: 27    was des ors und sîn selbes lîp.
Verse: 28    nû vant er maget, man und wîp

Verse: 29    trûrec an dem ringe hie.
Verse: 30    dâ reit er zuo, nû hœret wie:




Chapter: 320 
320


Verse: 1    sîn muot stuont hôch, doch jâmers vol.
Verse: 2    die beide schanze ich nennen sol:

Verse: 3    hôchvart riet sîn manheit,
Verse: 4    jâmer lêrte in herzenleit.

Verse: 5    er reit ûzen zuo dem ringe.
Verse: 6    ob man in dâ iht dringe?

Verse: 7    vil knappen spranc dar nâher sân.
Verse: 8    dô emphiengen si den werden man:

Verse: 9    sîn schilt und er wâren unbekant.
Verse: 10    den helm er niht von im bant:

Verse: 11    der vreuden ellende
Verse: 12    truoc daz swert in sîner hende,

Verse: 13    bedecket mit der scheiden.
Verse: 14    dô vrâcte er nâch in beiden:

Verse: 15    "wâst Artûs und Gâwân?"
Verse: 16    juncherren zeicten im die sân.

Verse: 17    sus gienc er durch den rinc wît.
Verse: 18    tiure was sîn kursît,

Verse: 19    mit liehtem phelle wol gevar.
Verse: 20    vür den wirt des ringes schar

Verse: 21    stuont er unde sprach alsus:
Verse: 22    "got halde den künec Artus,

Verse: 23    dar zuo vrouwen unde man!
Verse: 24    swaz ich der hie gesehen hân,

Verse: 25    den biute ich dienestlîchen gruoz.
Verse: 26    wan einem tuot mîn dienest buoz,

Verse: 27    im enwirt mîn dienest nimmer schîn.
Verse: 28    ich wil bî sînem hazze sîn:

Verse: 29    swaz hazzes er geleisten mac,
Verse: 30    mîn haz im biutet hazzes slac.




Chapter: 321 
321


Verse: 1    ich sol doch nennen wer der sî.
Verse: 2    ach ich armman und ouwî,

Verse: 3    daz er mîn herze ie sus versneit!
Verse: 4    mîn jâmer ist von im ze breit.

Verse: 5    daz ist hie her Gâwân.
Verse: 6    der dicke prîs hât getân

Verse: 7    und hôhe werdekeit bezalt,
Verse: 8    unprîs sîn hete aldâ gewalt,

Verse: 9    dô in sîn gir dar zuo vertruoc,
Verse: 10    im gruoze er mînen herren sluoc.

Verse: 11    ein kus, den Jûdas teilde,
Verse: 12    im solhen willen veilde:

Verse: 13    ez tuot manec tûsent herzen wê.
Verse: 14    daz strenge mortlîche rê

Verse: 15    an mînem herren ist getân.
Verse: 16    lougent des her Gâwân,

Verse: 17    des antwurte ûf kamphes slac
Verse: 18    von hiute über den vierzegesten tac

Verse: 19    vor dem künege von Ascalûn
Verse: 20    in der hôhen stat ze Schanphanzûn.

Verse: 21    ich lade in kamphlîche dar
Verse: 22    gein mir ze komen in kamphes vâr.

Verse: 23    kan sîn lîp des niht verzagen,
Verse: 24    er enwelle dâ schildes ambet tragen,

Verse: 25    sô mane ich in dennoch mêre
Verse: 26    bî des helmes êre

Verse: 27    und durch ritter ordenlîchez leben:
Verse: 28    dem sint zwuo rîche urbor gegeben,

Verse: 29    rehtiu schame und werdiu triuwe
Verse: 30    gebent prîs alt und niuwe.




Chapter: 322 
322


Verse: 1    her Gâwân sol sich niht verschemen,
Verse: 2    ob er geselleschaft wil nemen

Verse: 3    ob der tavelrunder.
Verse: 4    diu dort stêt besunder,

Verse: 5    der reht wære gebrochen sân,
Verse: 6    sæze drobe ein triuwenlôser man.

Verse: 7    ich enbin her niht durch schelden komen:
Verse: 8    geloubet, sît irz habet vernomen,

Verse: 9    ich vorder kamph vür schelden,
Verse: 10    der niht wan tôt sol gelden

Verse: 11    oder leben mit êren,
Verse: 12    swenz wil diu sælde lêren."

Verse: 13    der künec swîcte und was unvrô.
Verse: 14    doch antwurte er der rede alsô:

Verse: 15    "herre, erst mîner swester sun:
Verse: 16    wære Gâwân tôt, ich wolde tuon

Verse: 17    den kamph, ê sîn gebeine
Verse: 18    læge triuwenlôs unreine.

Verse: 19    wil gelücke, iu sol Gâwânes hant
Verse: 20    mit kamphe tuon daz wol bekant,

Verse: 21    daz sîn lîp mit triuwen vert
Verse: 22    und sich des valsches hât erwert.

Verse: 23    habe iu anders iemen leit
Verse: 24    getân, sô enmachet niht sô breit

Verse: 25    sîn laster âne schulde:
Verse: 26    wan erwirbet er iuwer hulde

Verse: 27    sô daz sîn lîp unschuldec ist,
Verse: 28    ir habet in dirre kurzen vrist

Verse: 29    von im gesaget daz iuwern prîs
Verse: 30    krenket, sint die liute wîs."




Chapter: 323 
323


Verse: 1    Bêâcurs der stolze man,
Verse: 2    des bruoder was her Gâwân,

Verse: 3    der spranc ûf und sprach zehant:
Verse: 4    "herre, ich sol dâ wesen phant,

Verse: 5    swar Gâwâne ist der kamph geleget.
Verse: 6    sîn velschen mich unsanfte reget.

Verse: 7    welt irs niht erlâzen in,
Verse: 8    habet iuch an mich: sîn phant ich bin,

Verse: 9    ich sol vür in ze kamphe stên.
Verse: 10    ez mac mit rede niht ergên,

Verse: 11    daz hôher prîs geneiget sî,
Verse: 12    der Gâwâne ist ledeclîche bî."

Verse: 13    er kêrte aldâ sîn bruoder saz:
Verse: 14    vuozvallens er dâ niht vergaz.

Verse: 15    den bat er sus, nû hœret wie:
Verse: 16    "gedenke, bruoder, daz dû ie

Verse: 17    mir hülfe grôzer werdekeit.
Verse: 18    lâ mich vür dîn arbeit

Verse: 19    ein kamphlîchez gîsel wesen.
Verse: 20    ob ich in kamphe sol genesen,

Verse: 21    des hâstû immer êre."
Verse: 22    er bat in vürbaz mêre

Verse: 23    durch bruoderlîchen ritters prîs.
Verse: 24    Gâwân sprach: "ich bin sô wîs,

Verse: 25    daz ich dich, bruoder, niht gewer
Verse: 26    dîner bruoderlîchen ger.

Verse: 27    ich enweiz war umbe ich strîten sol.
Verse: 28    ouch entuot mir strîten niht sô wol:

Verse: 29    ungerne wolde ich dir versagen,
Verse: 30    wan daz ichz laster müeste tragen.




Chapter: 324 
324


Verse: 1    Bêâcurs al vaste bat.
Verse: 2    der gast stuont an sîner stat,

Verse: 3    er sprach: "mir biutet kamph ein man,
Verse: 4    des ich neheine künde hân:

Verse: 5    ich enhân ouch niht ze sprechen dar.
Verse: 6    starc, küene, wol gevar,

Verse: 7    getriuwe unde rîche,
Verse: 8    hât er diu volleclîche,

Verse: 9    er mac borgen deste baz.
Verse: 10    ich entrage gein im deheinen haz:

Verse: 11    er was mîn herre und mîn mâc,
Verse: 12    durch den ich hebe disen bâc.

Verse: 13    unser veter gebruoder hiezen,
Verse: 14    die nihtes ein ander liezen.

Verse: 15    nehein man gekrœnet wart
Verse: 16    nie, ich enhete im vollen art

Verse: 17    mit kamphe rede ze bieten,
Verse: 18    mich râche gein im nieten.

Verse: 19    ich bin ein vürste ûz Ascalûn,
Verse: 20    der lantgrâve von Schanphanzûn,

Verse: 21    und heize Kingrimursel.
Verse: 22    ist her Gâwân lobes snel,

Verse: 23    der mac sich anders niht entsagen,
Verse: 24    er enmüeze kamph dâ gein mir tragen.

Verse: 25    ouch gibe ich im vride über al daz lant,
Verse: 26    niwan von mîn eines hant:

Verse: 27    mit triuwen ich vride geheize
Verse: 28    ûzerhalp des kamphes kreize.

Verse: 29    got hüete al der ich lâze hie,
Verse: 30    wan eines, er weiz wol selbe wie."




Chapter: 325 
325


Verse: 1    sus schiet der wol gelobete man
Verse: 2    von dem Plimizœles plân.

Verse: 3    dô Kingrimursel wart genant,
Verse: 4    ohteiz dô wart er schiere erkant:

Verse: 5    werden virregen prîs
Verse: 6    hete an im der vürste wîs.

Verse: 7    si jâhen daz her Gâwân
Verse: 8    des kamphes sorge müeste hân

Verse: 9    gein sîner wâren manheit,
Verse: 10    des vürsten der dâ von in reit.

Verse: 11    ouch wande manegen trûrens nôt,
Verse: 12    daz man im dâ niht êre bôt:

Verse: 13    dar wâren solhiu mære komen
Verse: 14    als ir wol ê hât vernomen,

Verse: 15    die lîhte erwanden einen gast
Verse: 16    daz wirtes gruozes im gebrast.

Verse: 17    von Cundrîen man ouch innen wart
Verse: 18    Parzivâles namen und sîner art,

Verse: 19    daz in gebar ein künegîn
Verse: 20    und wie die erwarp der Anschevîn.

Verse: 21    maneger sprach: "vil wol ichz weiz
Verse: 22    daz er si vor Kanvoleiz

Verse: 23    gediende hurteclîche
Verse: 24    mit manegem poinder rîche

Verse: 25    und daz sîn ellen unverzaget
Verse: 26    erwarp die sældebæren maget.

Verse: 27    Amphlîse diu gehêrte
Verse: 28    ouch Gahmureten lêrte,

Verse: 29    dâ von der helt wart kurtois.
Verse: 30    nû sol ein ieslîch Bertenois




Chapter: 326 
326


Verse: 1    sich vreun daz uns der helt ist komen,
Verse: 2    dâ prîs mit wârheit ist vernomen

Verse: 3    an im und ouch an Gahmurete.
Verse: 4    reht werdekeit was sîn gewete."

Verse: 5    Artûses her was an dem tage
Verse: 6    komen vreude unde klage:

Verse: 7    ein solh geparriertez leben
Verse: 8    was den helden dâ gegeben.

Verse: 9    si stuonden ûf über al:
Verse: 10    dâ was trûren âne zal.

Verse: 11    ouch giengen die werden sân
Verse: 12    dâ Parzivâl und Gâwân

Verse: 13    bî ein ander stuonden:
Verse: 14    si trôsten si als si kunden.

Verse: 15    Clâmidên den wol geborn
Verse: 16    dûhte, er hete mêr verlorn

Verse: 17    dan iemen der dâ möhte sîn,
Verse: 18    und daz ze scharph wære sîn pîn.

Verse: 19    er sprach ze Parzivâle:
Verse: 20    "wæret ir bî dem grâle,

Verse: 21    sô muoz ich sprechen âne spot,
Verse: 22    in heidenschaft Tribalibot,

Verse: 23    dar zuo daz gebirge in Kaukasas,
Verse: 24    swaz munt von rîcheit ie gelas

Verse: 25    und des grâles werdekeit,
Verse: 26    die envergülden niht mîn herzeleit

Verse: 27    daz ich vor Pelrapeire gewan.
Verse: 28    ach ich arm unsælec man!

Verse: 29    mich schiet von vreuden iuwer hant.
Verse: 30    hiest vrou Cunnewâre de Lalant:




Chapter: 327 
327


Verse: 1    ouch wil diu edele vürstîn
Verse: 2    sô verre ziuwerm gebote sîn,

Verse: 3    daz ir diu niemen dienen lât.
Verse: 4    swie vil si dienestgeldes hât,

Verse: 5    si möhte iedoch erlangen,
Verse: 6    daz ich bin ir gevangen

Verse: 7    alsus lange hie gewesen.
Verse: 8    ob ich an vreuden sol genesen,

Verse: 9    sô helfet mir daz si êre sich
Verse: 10    sô daz ir minne ergetze mich

Verse: 11    ein teil des ich von iu verlôs.
Verse: 12    dâ mich der vreuden zil verkôs,

Verse: 13    ich hetez behalden wol, wan ir.
Verse: 14    nû helfet dirre megede mir."

Verse: 15    "daz tuon ich" sprach der Wâleis.
Verse: 16    "ist si bete volge kurteis,

Verse: 17    ich ergetze iuch gerne, wan sist doch mîn,
Verse: 18    durch die ir welt bî sorgen sîn.

Verse: 19    ich meine diu treget den bêâ curs,
Verse: 20    Condwîren âmûrs."

Verse: 21    von Janfûse diu heidenîn
Verse: 22    und Artûs und daz wîp sîn

Verse: 23    und Cunnewâre de Lalant
Verse: 24    und vrou Jeschûte von Karnant,

Verse: 25    die giengen dâ durch trœsten zuo.
Verse: 26    was welt ir daz man mêr nû tuo?

Verse: 27    Cunnewâren si gâben Clâmidê,
Verse: 28    wan dem was nâch ir minne wê.

Verse: 29    sînen lîp gap er ir ze lône
Verse: 30    und ir houbet eine krône.




Chapter: 328 
328


Verse: 1    dâz diu von Janfûse sach,
Verse: 2    diu heidenîn zem Wâleis sprach:

Verse: 3    "Cundrîe nande uns einen man,
Verse: 4    des ich iu wol ze bruoder gan:

Verse: 5    des kraft ist wît unde breit.
Verse: 6    zweier krône rîcheit

Verse: 7    stêt vorhteclîche in sîner phlege
Verse: 8    ûf dem wazzer und der erden wege:

Verse: 9    Azagouc und Zazamanc.
Verse: 10    diu lant sint kreftec, ninder kranc.

Verse: 11    sînem rîchtuom gelîchet niht
Verse: 12    âne den bâruc, swâ mans giht,

Verse: 13    und âne Tribalibot.
Verse: 14    man betet in an als einen got:

Verse: 15    sîn vel hât vil spæhen glast.
Verse: 16    erst aller mannes varwe ein gast:

Verse: 17    wîz und swarz ist er erkant.
Verse: 18    ich vuor dâ her durch ein sîn lant.

Verse: 19    er wolde gerne erwendet hân
Verse: 20    mîn vart die ich dâ her hân getân:

Verse: 21    daz warp er, dô enmohter.
Verse: 22    sîner muoter muomen tohter

Verse: 23    bin ich: er ist ein künec hêr.
Verse: 24    ich sage iu von im wunders mêr

Verse: 25    niemen gesaz von sîner tjost,
Verse: 26    sîn prîs hât vil hôhe kost,

Verse: 27    sô milder lîp gesouc nie brust,
Verse: 28    sîn site ist valscheite vlust,

Verse: 29    Feirefîz Anschevîn,
Verse: 30    des tât durch wîp kan lîden pîn.




Chapter: 329 
329


Verse: 1    swie vremde ez mir hie wære,
Verse: 2    ich kom ouch her durch mære

Verse: 3    und zerkennen âventiure.
Verse: 4    nû liget diu hœste stiure

Verse: 5    an iu, des al getouftiu diet
Verse: 6    mit prîse sich von laster schiet,

Verse: 7    sol guot gebærde iuch helfen iht,
Verse: 8    und daz man iu mit wârheit giht

Verse: 9    liehter varwe und manlîcher site.
Verse: 10    kraft mit jugende vert dâ mite."

Verse: 11    diu rîche wîse heidenin
Verse: 12    hete an künste den gewin

Verse: 13    daz si wol redete franzeis.
Verse: 14    dô antwurte ir der Wâleis.

Verse: 15    solh was sîn rede wider sie:
Verse: 16    "got lône iu, vrouwe, daz ir hie

Verse: 17    mir gebet sô güetlîchen trôst.
Verse: 18    ich enbin doch trûrens niht erlôst

Verse: 19    und wil iuch des bescheiden.
Verse: 20    ich enmac es sô niht geleiden

Verse: 21    als ez mir leide kündet,
Verse: 22    daz sich nû maneger sündet

Verse: 23    an mir, der niht weiz mîner klage,
Verse: 24    und ich dâ bî sîn spotten trage.

Verse: 25    ich enwil deheiner vreude jehen,
Verse: 26    ich enmüeze alrêst den grâl gesehen,

Verse: 27    diu wîle sî kurz oder lanc.
Verse: 28    mich jaget des endes mîn gedanc:

Verse: 29    dâ von gescheide ich nimmer
Verse: 30    mînes lebens immer.




Chapter: 330 
330


Verse: 1    sol ich durch mîner zuht gebot
Verse: 2    hœren nû der werlde spot,

Verse: 3    sô mac sîn râten niht sîn ganz:
Verse: 4    mir riet der werde Gurnemanz

Verse: 5    daz ich vrevellîche vrâge mite
Verse: 6    und immer gein unvuoge strite.

Verse: 7    vil werder ritter sihe ich hie:
Verse: 8    durch iuwer zuht nû râtet mir wie

Verse: 9    daz ich iuwern hulden næhe mich.
Verse: 10    ez ist ein strenge scherph gerich

Verse: 11    gein mir mit worten hie getân:
Verse: 12    swes hulde ich drumbe verlorn hân,

Verse: 13    daz wil ich wênec wîzen im.
Verse: 14    swenne ich her nâch prîs genim,

Verse: 15    sô habet mich aber denne dar nâch.
Verse: 16    mir ist ze scheiden von iu gâch.

Verse: 17    ir gâbet mir alle geselleschaft,
Verse: 18    die wîle ich stuont in prîses kraft:

Verse: 19    der sît nû ledec, unz ich bezal
Verse: 20    dâ von mîn grüeniu vreude ist val.

Verse: 21    mîn sol grôz jâmer alsô phlegen,
Verse: 22    daz herze gebe den ougen regen,

Verse: 23    sît ich ûf Munsalvæsche liez
Verse: 24    daz mich von wâren vreuden stiez,

Verse: 25    ohteiz wie manege klâre maget!
Verse: 26    swaz iemen wunders hât gesaget,

Verse: 27    dennoch phliget es mêr der grâl.
Verse: 28    der wirt hât siufzebæren twâl:

Verse: 29    ei helfelôser Anfortas,
Verse: 30    waz half dich daz ich bî dir was?"




Chapter: 331 
331


Verse: 1    si enmugen niht langer hie gestên:
Verse: 2    ez muoz nû an ein scheiden gên.

Verse: 3    dô sprach der Wâleise
Verse: 4    z Artûse dem Berteneise

Verse: 5    und zen rittern und zen vrouwen,
Verse: 6    er wolde ir urloup schouwen

Verse: 7    und mit ir hulden vernemen.
Verse: 8    des mohte et niemen dâ gezemen,

Verse: 9    daz er sô trûrec von in reit.
Verse: 10    ich wæne, daz was in allen leit.

Verse: 11    Artûs lobete im an die hant,
Verse: 12    kœme immer in solhe nôt sîn lant

Verse: 13    als ez von Clâmidê gewan,
Verse: 14    des lasters wolde er phlihte hân:

Verse: 15    im wære ouch leit daz Lehelîn
Verse: 16    im næme zwuo rîche krônen sîn.

Verse: 17    vil dienstes im dâ maneger bôt:
Verse: 18    den helt treip von in trûrens nôt.

Verse: 19    vrou Cunnewâre diu klâre maget
Verse: 20    nam den helt unverzaget

Verse: 21    mit ir hant und vuorte in dan.
Verse: 22    dô kuste in mîn her Gâwân.

Verse: 23    dô sprach der manlîche
Verse: 24    ze dem helde ellens rîche:

Verse: 25    "ich weiz wol, vriunt, daz dîn vart
Verse: 26    gein strîtes reise ist ungespart:

Verse: 27    dâ gebe dir got gelücke zuo
Verse: 28    und helfe ouch mir daz ich getuo

Verse: 29    dir noch den dienst als ich kan gern.
Verse: 30    des müeze mich sîn kraft gewern."




Chapter: 332 
332


Verse: 1    der Wâleis sprach: "wê waz ist got?
Verse: 2    wære der gewaldec, solhen spot

Verse: 3    hete er uns beiden niht gegeben.
Verse: 4    kunde got mit kreften leben,

Verse: 5    ich was im dienstes undertân,
Verse: 6    sît ich genâden mich versan:

Verse: 7    nû wil ich im dienest widersagen.
Verse: 8    hât er haz, den wil ich tragen.

Verse: 9    vriunt, an dînes kamphes zît
Verse: 10    dâ neme ein wîp vür dich den strît:

Verse: 11    diu müeze ziehen dîne hant.
Verse: 12    an der dû kiusche hâs bekant

Verse: 13    und wîplîche güete,
Verse: 14    ir minne dich dâ behüete.

Verse: 15    ich enweiz wenne ich dich mêr gesehe:
Verse: 16    mîn wünschen sus an dir geschehe."

Verse: 17    ir scheiden gap in trûren
Verse: 18    ze strengen nâchgebûren.

Verse: 19    vrou Cunnewâre de Lalant
Verse: 20    in vuorte dâ si ir poulûn vant:

Verse: 21    sîn harnas hiez si bringen dar,
Verse: 22    ir linden hende wol gevar

Verse: 23    wâpenden Gahmuretes sun.
Verse: 24    si sprach: "ich solz von rehte tuon,

Verse: 25    sît der künec von Brandigân
Verse: 26    von iuwern schulden mich wil hân.

Verse: 27    grôz kumber iuwer werdekeit
Verse: 28    gît mir siufzebærez leit.

Verse: 29    swenne ir sît trûrens niht erwert,
Verse: 30    iuwer sorge mîne vreude zert."




Chapter: 333 
333


Verse: 1    nû was sîn ors verdecket,
Verse: 2    sîn selbes nôt erwecket.

Verse: 3    ouch hete der degen wol getân
Verse: 4    lieht wîz îserharnas an,

Verse: 5    tiure âne aller slahte getroc:
Verse: 6    sîn kursît, sîn wâpenroc

Verse: 7    was gehêret mit gesteine.
Verse: 8    sînen helm al eine

Verse: 9    hete er niht ûf gebunden:
Verse: 10    dô kuste er an den stunden

Verse: 11    Cunnewâren die klâren maget.
Verse: 12    alsus wart mir vin ir gesaget:

Verse: 13    dâ ergienc ein trûrec scheiden.
Verse: 14    von den gelieben beiden

Verse: 15    hin reit Gahmuretes kint.
Verse: 16    swaz âventiure gesprochen sint,

Verse: 17    die endarf hie niemen mezzen zuo,
Verse: 18    ir enhœret alrêst waz er nû tuo,

Verse: 19    war er kêre und war er var.
Verse: 20    swer den lîp gein ritterschefte spar,

Verse: 21    der endenke die wîle niht an in,
Verse: 22    ob ez im rætet stolzer sin.

Verse: 23    Condwîrâmûrs,
Verse: 24    dîn minneclîcher bêâ curs,

Verse: 25    an den wirt dicke nû gedâht.
Verse: 26    waz dir wirt âventiure brâht!

Verse: 27    schildes ambet umbe den grâl
Verse: 28    wirt nû vil güebet sunder twâl

Verse: 29    von im den Herzeloide bar.
Verse: 30    er was ouch ganerbe dar.




Chapter: 334 
334


Verse: 1    dô vuor der massenîe vil
Verse: 2    gein dem arbeitlîchen zil,

Verse: 3    ein âventiur ze schouwen,
Verse: 4    dâ vier hundert juncvrouwen

Verse: 5    und vier küneginne
Verse: 6    gevangen wâren inne,

Verse: 7    ze Schastel Marveile.
Verse: 8    swaz in dâ wart ze teile,

Verse: 9    daz haben âne mînen haz:
Verse: 10    ich bin doch vrouwen lônes laz.

Verse: 11    dô sprach der Krieche Clîas:
Verse: 12    "ich bin der dâ versûmet was."

Verse: 13    (vor in allen er des jach)
Verse: 14    "der turkoite mich dâ stach

Verse: 15    hinderz ors: ich muoz mich schamen.
Verse: 16    doch sagete er mir vier vrouwen namen,

Verse: 17    die dâ krônebære sint.
Verse: 18    zwuo sint alt, zwuo sint noch kint:

Verse: 19    der heizet einiu Itonjê,
Verse: 20    diu ander heizet Cundrîe,

Verse: 21    diu dritte Arnîve,
Verse: 22    diu vierde Sangîve."

Verse: 23    daz wolde ieslîcher dâ besehen.
Verse: 24    ez enmohte ir reise niht volspehen:

Verse: 25    si muosten schaden dâ bejagen.
Verse: 26    den sol ouch ich ze mâzen klagen,

Verse: 27    wan swer durch wîp hât arbeit,
Verse: 28    daz gît im vreude, etswenne ouch leit

Verse: 29    an dem orte vürbaz wiget.
Verse: 30    sus dicke minne ir lônes phliget.




Chapter: 335 
335


Verse: 1    dô bereite ouch sich her Gâwân
Verse: 2    als ein kamphbære man

Verse: 3    hin vür den künec von Ascalûn.
Verse: 4    des trûrte manec Bertûn

Verse: 5    und manec wîp unde maget:
Verse: 6    herzenlîche wart geklaget

Verse: 7    von in sîn strîtes reise.
Verse: 8    der werdekeit ein weise

Verse: 9    wart nû diu tavelrunder.
Verse: 10    Gâwân maz besunder

Verse: 11    wâ mite er möhte wol gesigen.
Verse: 12    alt herte schilde wol gedigen

Verse: 13    (er enruochte wie sie wâren gevar:
Verse: 14    die brâhten koufliute dar

Verse: 15    ûf ir soumen, doch niht veile),
Verse: 16    der wurden im drî ze teile.

Verse: 17    dô erwarp der mære strîtes helt
Verse: 18    siben ors ze kamphe erwelt.

Verse: 19    ze sînen vriunden er dô nam
Verse: 20    zwelf scherphiu sper von Angram,

Verse: 21    starke rœrîne schefte drîn
Verse: 22    von Oraste Gentesîn

Verse: 23    ûz einem heidenschen muor.
Verse: 24    Gâwân nam urloup und vuor

Verse: 25    mit unverzageter manheit.
Verse: 26    Artûs was im vil bereit:

Verse: 27    er gap im rîcher koste solt,
Verse: 28    lieht gesteine und rôtez golt

Verse: 29    und silbers manegen stærlinc.
Verse: 30    gein sorgen wielzen sîniu dinc.




Chapter: 336 
336


Verse: 1    Ecubâ diu junge
Verse: 2    vuor gein ir schiffunge,

Verse: 3    ich meine die rîchen heidenin.
Verse: 4    dô kêrte manegen ende hin

Verse: 5    daz volc von dem Plimizœl:
Verse: 6    Artûs vuor gein Karidœl,

Verse: 7    Cunnewâre und Clâmidê
Verse: 8    die nâmen ouch sînen urloup ê.

Verse: 9    Orilus der vürste erkant
Verse: 10    und vrou Jeschûte von Karnant

Verse: 11    die nâmen ouch sînen urloup sân,
Verse: 12    doch beliben si ûf dem plân

Verse: 13    bî Clâmidê den dritten tac,
Verse: 14    wande er der brûtloufte phlac,

Verse: 15    niht mit benander hôchgezît:
Verse: 16    si wart dâ heime grœzer sît,

Verse: 17    wande im sîn milde daz geriet.
Verse: 18    vil ritter, kumberhaftiu diet,

Verse: 19    beleip in Clâmidês schar
Verse: 20    und ouch daz varnde volc vil gar:

Verse: 21    die vuorte er heim ze lande.
Verse: 22    mit êren âne schande

Verse: 23    wart in geteilet dâ sîn habe,
Verse: 24    mit valsche niht gewîset abe.

Verse: 25    dô vuor vrou Jeschûte
Verse: 26    mit Orilus, ir trûte,

Verse: 27    durch Clâmidên ze Brandigân:
Verse: 28    daz wart zeinen êren getân

Verse: 29    vroun Cunnewâren der künegîn.
Verse: 30    dâ krônte man die swester sîn.




Chapter: 337 
337


Verse: 1    Nû weiz ich, swelh sinnec wîp,
Verse: 2    ob si hât getriuwen lîp,

Verse: 3    diu diz mære geschriben siht,
Verse: 4    daz si mir mit wârheit giht,

Verse: 5    ich kunde wîben sprechen baz
Verse: 6    denne als ich sanc gein einer maz.

Verse: 7    diu künegîn Belacâne
Verse: 8    was missewenden âne

Verse: 9    und aller valscheite laz,
Verse: 10    dô si ein tôter künec besaz.

Verse: 11    sît gap vroun Herzeloiden troum
Verse: 12    siufzebæren herzeroum.

Verse: 13    welh was vroun Ginôvêren klage
Verse: 14    an îthêres endetage!

Verse: 15    dar zuo was mir ein trûren leit,
Verse: 16    daz alsô schamelîchen reit

Verse: 17    des küneges kint von Karnant,
Verse: 18    vrou Jeschûte von kiusche erkant.

Verse: 19    wie wart vrou Cunnewâre
Verse: 20    gâlûnet mit ir hâre!

Verse: 21    des sint si vaste wider komen:
Verse: 22    ir beider schame hât prîs genomen.

Verse: 23    ze machen neme diz mære ein man,
Verse: 24    der âventiure prüeven kan

Verse: 25    und rîme künne sprechen,
Verse: 26    beidiu samenen und zebrechen.

Verse: 27    ich tætez iu gerne vürbaz kunt,
Verse: 28    woldez gebieten mir ein munt,

Verse: 29    den doch ander vüeze tragent
Verse: 30    dan die mir ze stegereifen wagent.




Chapter: 338 
338


Verse: 1    Der nie gewarp nâch schanden,
Verse: 2    eine wîle ze sînen handen

Verse: 3    sol nû dise âventiure hân
Verse: 4    der werde erkande Gâwân.

Verse: 5    diu prüevet manegen âne haz
Verse: 6    dar neben oder vür in baz

Verse: 7    den des mæres herren Parzivâl.
Verse: 8    swer sînen vriunt alle mâl

Verse: 9    mit worten an daz hœste jaget,
Verse: 10    derst prîses anderhalp verzaget.

Verse: 11    nû wære der liute volge guot,
Verse: 12    swer dicke lop mit wârheit tuot:

Verse: 13    wan, swaz er sprichet oder sprach,
Verse: 14    diu rede belîbet âne dach.

Verse: 15    wer sol sinnes wort behalden,
Verse: 16    es enwellen die wîsen walden?

Verse: 17    valsch lügelîch ein mære,
Verse: 18    daz, wæne ich, baz noch wære

Verse: 19    âne wirt ûf einem snê,
Verse: 20    sô daz dem munde würde wê,

Verse: 21    derz ûz vür wârheit breitet:
Verse: 22    sô hete in got bereitet

Verse: 23    als guoter liute wünschen stêt,
Verse: 24    den ir triuwe zarbeite ergêt.

Verse: 25    swem ir ze solhen werken gâch,
Verse: 26    dâ missewende hœret nâch,

Verse: 27    phliht werder lîp an den gewin,
Verse: 28    daz muoz in lêren kranker sin.

Verse: 29    er mîdetz ê, kan er sich schemen:
Verse: 30    den site sol er ze vogete nemen.




Chapter: 339 
339


Verse: 1    Gâwân der reht gemuote,
Verse: 2    sîn ellen phlac der huote,

Verse: 3    sô daz diu wâre zageheit
Verse: 4    an prîse im nie gevrumte leit.

Verse: 5    sîn herze was ze velde ein burc,
Verse: 6    gein scharphen strîten wol sô kurc,

Verse: 7    in strîtes gedrenge man in sach.
Verse: 8    vriunt und vîent im des jach,

Verse: 9    sîn krîe wære gein prîse hel,
Verse: 10    swie gerne in Kingrimursel

Verse: 11    mit kamphe hete dâ von genomen.
Verse: 12    nû was von Artûse komen,

Verse: 13    des enweiz ich niht wie manegen tac,
Verse: 14    Gâwân, der manheite phlac.

Verse: 15    sus reit der werde degen balt
Verse: 16    sîn rehte strâzen ûz einem walt

Verse: 17    mit sînem gezoc durch einen grunt.
Verse: 18    dâ wart im ûf dem bühel kunt

Verse: 19    ein dinc daz angest lêrte
Verse: 20    und sîne manheit mêrte:

Verse: 21    dâ ersach der helt vür unbetrogen
Verse: 22    nâch maneger baniere zogen

Verse: 23    mit grôzer vuore niht ze kranc.
Verse: 24    er dâhte: "mirst der wec ze lanc,

Verse: 25    vlühtec wider gein dem walde."
Verse: 26    dô hiez er gürten balde

Verse: 27    einem orse daz im Orilus
Verse: 28    gap. daz was genennet sus:

Verse: 29    mit den rôten ôren Gringuljete.
Verse: 30    er emphiencz âne aller slahte bete:




Chapter: 340 
340


Verse: 1    ez was von Munsalvæsche komen
Verse: 2    und hetez Lehelîn genomen

Verse: 3    ze Brumbâne bî dem sê.
Verse: 4    einem ritter tet sîn tjoste wê,

Verse: 5    den er tôt dar hinder stach:
Verse: 6    des sider Trevrizent verjach.

Verse: 7    Gâwân dâhte: "swer verzaget
Verse: 8    sô daz er vliuhet ê man jaget,

Verse: 9    dast sînem prîse gar ze vruo.
Verse: 10    ich wil in nâher staphen zuo:

Verse: 11    swaz mir dâ von nû mac geschehen
Verse: 12    (ir hât michz merre teil gesehen),

Verse: 13    des sol doch guot rât werden."
Verse: 14    dô erbeizte er zuo der erden,

Verse: 15    rehte als er habete einen stal.
Verse: 16    die rotte wâren âne zal,

Verse: 17    die dâ mit kumpânîe riten.
Verse: 18    er sach vil kleider wol gesniten

Verse: 19    und manegen schilt wol gevar,
Verse: 20    daz er ir niht bekande gar

Verse: 21    noch deheine baniere under in.
Verse: 22    "disem her ein gast ich bin"

Verse: 23    sus sprach der werde Gâwân.
Verse: 24    "sît ich ir deheine künde hân,

Verse: 25    wellent siz in über wenden,
Verse: 26    eine tjost sol ich in senden

Verse: 27    deiswâr mit mîn selbes hant,
Verse: 28    ê daz ich von in sî gewant."

Verse: 29    dô was ouch Gringuljeten gegurt,
Verse: 30    daz in manegen angestlîchen vurt




Chapter: 341 
341


Verse: 1    gein strîte was zer tjoste brâht:
Verse: 2    des wart ouch dâ hin zim gedâht.

Verse: 3    Gâwân sach geflôrieret
Verse: 4    und wol gezimieret

Verse: 5    von rîcher koste helme vil.
Verse: 6    si vuorten gein ir nîtspil

Verse: 7    wîz niuwer sper ein wunder,
Verse: 8    diu gemâlet wâren besunder

Verse: 9    juncherren gegeben in die hant,
Verse: 10    ir herren wâpen dran bekant.

Verse: 11    Gâwân fil li roi Lôt
Verse: 12    sach von gedrenge grôze nôt,

Verse: 13    mûle die harnas muosten tragen,
Verse: 14    und manegen wol geladen wagen:

Verse: 15    den was gein herbergen gâch.
Verse: 16    ouch vuor der market hinden nâch

Verse: 17    mit wunderlîcher pârât:
Verse: 18    des enwas et dô dehein ander rât.

Verse: 19    ouch was der vrouwen dâ genuoc:
Verse: 20    etslîchiu den zwelften gürtel truoc

Verse: 21    ze phande nâch ir minne.
Verse: 22    ez wâren niht küneginne:

Verse: 23    die selben tripaniersen
Verse: 24    hiezen soldiersen.

Verse: 25    hie der junge, dort der alde,
Verse: 26    dâ vuor vil ribalde:

Verse: 27    ir loufen machte in müediu lide.
Verse: 28    etslîcher zæme baz an der wide,

Verse: 29    den er daz her dâ mêrte
Verse: 30    und werdez volc unêrte.




Chapter: 342 
342


Verse: 1    vür was geloufen und geriten
Verse: 2    daz her, des Gâwân hete erbiten.

Verse: 3    von solhem wâne daz geschach:
Verse: 4    swer den helt dâ halden sach,

Verse: 5    der wânde er wære des selben hers.
Verse: 6    dishalp noch jene sîte mers

Verse: 7    gevuor nie stolzer ritterschaft:
Verse: 8    si heten hôchmuotes kraft.

Verse: 9    nû vuor in balde hinden nâch
Verse: 10    vaste ûf ir slâ, dem was vil gâch,

Verse: 11    ein knappe gar unvuoge vrî.
Verse: 12    ein ledec ors gienc im bî,

Verse: 13    einen niuwen schilt er vuorte,
Verse: 14    mit beiden sporn er ruorte

Verse: 15    âne zart sîn runzît:
Verse: 16    er wolde gâhen in den strît.

Verse: 17    wol gesniten was sîn kleit.
Verse: 18    Gâwân zuo dem knappen reit,

Verse: 19    nâch gruoze er vrâcte mære,
Verse: 20    wes diu massenîe wære.

Verse: 21    dô sprach der knappe: "ir spottet mîn.
Verse: 22    herre, hân ich solhen pîn

Verse: 23    mit unvuoge an iu erholt?
Verse: 24    hete ich dan ander nôt gedolt,

Verse: 25    diu stüende mir gein prîse baz.
Verse: 26    durch got nû senftet iuwern haz.

Verse: 27    ir erkennet ein ander baz dan ich:
Verse: 28    waz hilft dan daz ir vrâget mich?

Verse: 29    ez sol iu baz wesen kunt
Verse: 30    zeinem mâle und tûsentstunt."




Chapter: 343 
343


Verse: 1    Gâwân bôt des manegen eit,
Verse: 2    swaz volkes dâ vür in gereit,

Verse: 3    daz er des niht erkande.
Verse: 4    er sprach: "mîn varn hât schande,

Verse: 5    sît ich mit wârheit niht darf jehen
Verse: 6    daz ich ir keinen habe gesehen

Verse: 7    vor disem tage an keiner stat,
Verse: 8    swar man mîn dienest ie gebat."

Verse: 9    der knappe sprach ze Gâwân:
Verse: 10    "herre, sô hân ich missetân:

Verse: 11    ich soldez iu ê hân gesaget.
Verse: 12    dô was mîn bezzer sin verzaget.

Verse: 13    nû rihtet mîne schulde
Verse: 14    nâch iuwer selbes hulde.

Verse: 15    ich solz iu dar nâch gerne sagen:
Verse: 16    lât mich mîn unvuoge ê klagen."

Verse: 17    "juncherre, nû saget mir wer si sîn,
Verse: 18    durch iuwern zühtebæren pîn."

Verse: 19    "herre, sus heizt der vor iu vert,
Verse: 20    dem doch sîn reise ist unerwert:

Verse: 21    rois Poidiconjunz
Verse: 22    und duc Astor de Lanverunz.

Verse: 23    dâ vert ein unbescheiden lîp,
Verse: 24    dem minne nie gebôt dehein wîp:

Verse: 25    er treget der unvuoge kranz
Verse: 26    unde heizet Meljacanz.

Verse: 27    ez wære wîp oder maget,
Verse: 28    swaz er dâ minne hât bejaget,

Verse: 29    die nam er gar in nœten:
Verse: 30    man solde in drumme tœten.




Chapter: 344 
344


Verse: 1    er ist Poidiconjunzes sun
Verse: 2    und wil ouch ritterschaft hie tuon:

Verse: 3    der phliget der ellens rîche
Verse: 4    dicke unverzagetlîche.

Verse: 5    waz hilft sîn manlîcher site?
Verse: 6    ein swînmuoter, liefe ir mite

Verse: 7    ir verhelîn, diu werte ouch sie.
Verse: 8    ich engehôrte man geprîsen nie,

Verse: 9    was sîn ellen âne vuoge:
Verse: 10    des volgent mir genuoge.

Verse: 11    herre, noch hœrt ein wunder.
Verse: 12    lât iu daz sagen besunder:

Verse: 13    grôz her nâch iu dâ vüeret
Verse: 14    den sîn unvuoge rüeret,

Verse: 15    der künec Meljanz von Lîz.
Verse: 16    hôchvartlîchen zornes vlîz

Verse: 17    hât er gevrumt âne nôt:
Verse: 18    unrehtiu minne im daz gebôt."

Verse: 19    der knappe in sîner zuht verjach:
Verse: 20    "herre, ich sagez iu, wande ichz sach.

Verse: 21    des künec Meljanzes vater,
Verse: 22    in tôdes leger vür sich bater

Verse: 23    die vürsten sînes landes.
Verse: 24    unerlœset phandes

Verse: 25    stuont sîn ellenthaftez leben:
Verse: 26    daz muoste sich dem tôde ergeben.

Verse: 27    in der selben riuwe
Verse: 28    bevalh er ûf ir triuwe

Verse: 29    Meljanzen den klâren
Verse: 30    allen den die dâ wâren.




Chapter: 345 
345


Verse: 1    er kôs im einen sunder dan:
Verse: 2    der vürste was sîn hœster man,

Verse: 3    gein triuwe alsô bewæret,
Verse: 4    aller valscheit erlæret.

Verse: 5    den bat er ziehen sînen sun.
Verse: 6    er sprach: "dû maht an im nû tuon

Verse: 7    dîner triuwe hantveste.
Verse: 8    bit in daz er die geste

Verse: 9    und die heimlîchen habe wert.
Verse: 10    swennes der kummerhafte gert,

Verse: 11    dem bit in teilen sîne habe."
Verse: 12    sus wart bevolhen dâ der knabe.

Verse: 13    dô leiste der vürste Lippaôt
Verse: 14    al daz sîn herre der künec Schôt

Verse: 15    an tôdes leger gein im warp:
Verse: 16    harte wênec des verdarp,

Verse: 17    endehaft ez wart geleistet sider.
Verse: 18    der vürste vuorte den knappen wider.

Verse: 19    der hete dâ heime liebiu kint,
Verse: 20    als si im noch billîche sint,

Verse: 21    eine tohter, der des niht gebrach,
Verse: 22    wan daz man des ir zîte jach,

Verse: 23    si wære wol âmîe.
Verse: 24    si hiez Obîe,

Verse: 25    ir swester heizet Obilôt.
Verse: 26    Obîe vrumt uns dise nôt.

Verse: 27    eins tages gedêch ez an die stat,
Verse: 28    daz si der junge küenc bat

Verse: 29    nâch sînem dienste minne.
Verse: 30    si vervluochte im sîne sinne




Chapter: 346 
346


Verse: 1    und vrâcte in wes er wânde,
Verse: 2    war um er sich sinnes ânde.

Verse: 3    si sprach hin zim: "wært ir sô alt,
Verse: 4    daz under schilte wære bezalt

Verse: 5    in werdeclîchen stunden,
Verse: 6    mit helme ûf houbet gebunden

Verse: 7    gein herteclîchen vâren,
Verse: 8    iuwer tage in vünf jâren,

Verse: 9    daz ir den prîs dâ hetet genomen,
Verse: 10    und wært ir danne wider komen

Verse: 11    ze mînem gebote gewesen dâ,
Verse: 12    spræche ich denne alrêste jâ,

Verse: 13    des iuwer willen gerte,
Verse: 14    alze vruo ich iuch gewerte.

Verse: 15    ir sît mir liep (wer lougent des?)
Verse: 16    als Annôren Gâlôes,

Verse: 17    diu sît den tôt durch in erkôs,
Verse: 18    dô si in von einer tjost verlôs."

Verse: 19    "ungerne ich," sprach er, "vrouwe,
Verse: 20    iuch sô bî liebe schouwe,

Verse: 21    daz iuwer zürnen ûf mich gêt.
Verse: 22    genâde doch bî dem dienste stêt,

Verse: 23    swer triuwe rehte mezzen wil.
Verse: 24    vrouwe, des ist iu gar ze vil,

Verse: 25    daz ir mînen sin sus smâhet.
Verse: 26    ir habet iuch gar vergâhet:

Verse: 27    ich möhte doch des genozzen hân,
Verse: 28    daz iuwer vater ist mîn man

Verse: 29    und daz er hât von mîner hant
Verse: 30    manege burc und al sîn lant."




Chapter: 347 
347


Verse: 1    "swem ir iht lîht, der diene ouch daz"
Verse: 2    sprach si. "mîn zil sich hœhet baz:

Verse: 3    ich enwil von niemen lêhen hân.
Verse: 4    mîn vrîheit ist sô getân,

Verse: 5    ieslîcher krône hôch genuoc,
Verse: 6    die irdesch houbet ie getruoc."

Verse: 7    er sprach: "ir sîtz gelêret,
Verse: 8    daz ir hôchvart sus mêret,

Verse: 9    sît iuwer vater gap den rât.
Verse: 10    er wandelt mir die missetât.

Verse: 11    ich sol hie wâpen alsô tragen,
Verse: 12    daz wirt gestochen und geslagen,

Verse: 13    ez si strîten oder turnei.
Verse: 14    hie belîbet vil der sper enzwei."

Verse: 15    mit zorne schiet er von der maget.
Verse: 16    sîn zürnen sêre wart geklaget

Verse: 17    von al der massenîe,
Verse: 18    in klagete ouch Obîe.

Verse: 19    gein dirre ungeschihte
Verse: 20    bôt sîn gerihte

Verse: 21    und anders wandels genuoc
Verse: 22    Lippaôt, der unschulde truoc.

Verse: 23    ez wære krump oder sleht,
Verse: 24    er gerte sîner genôze reht,

Verse: 25    hof dâ die vürsten wæren,
Verse: 26    und er wære ze disen mæren

Verse: 27    komen âne schulde.
Verse: 28    genædeclîcher hulde

Verse: 29    er vaste sînen herren bat.
Verse: 30    dem tet der zorn ûf vreuden mat.




Chapter: 348 
348


Verse: 1    man kunde dâ niht gâhen
Verse: 2    sô daz Lippaôt wolde vâhen

Verse: 3    sînen herren, wande er was sîn wirt,
Verse: 4    als noch getriuwer man verbirt.

Verse: 5    der künec âne urloup dannen schiet,
Verse: 6    als im sîn kranker sin geriet.

Verse: 7    sîne knappen, vürsten kindelîn,
Verse: 8    al weinde tâten klagen schîn,

Verse: 9    die mit dem künege dâ wâren gewesen.
Verse: 10    vor den mac Lippaôt wol genesen,

Verse: 11    wande er si mit triuwe hât erzogen,
Verse: 12    gein werder vuore niht betrogen,

Verse: 13    ez ensî dan mîn herre al ein,
Verse: 14    an dem doch svvͤrsten triuwe erschein.

Verse: 15    mîn herre ist ein Franzeis,
Verse: 16    li schahteliur de Bêâveis,

Verse: 17    er heizet Lisavander.
Verse: 18    die eine und die ander

Verse: 19    muosten dem vürsten widersagen,
Verse: 20    dô si schiltes ammet muosten tragen.

Verse: 21    bî dem künege ritter worden sint
Verse: 22    vil vürsten hiute und ander kint.

Verse: 23    des vordern hers phliget ein man,
Verse: 24    der wol mit scharphen strîten kan,

Verse: 25    rois Poidiconjunz von Gors.
Verse: 26    der vüert manec wol gewâpent ors.

Verse: 27    Meljanz ist sîns bruoder sun.
Verse: 28    si kunnen beide hôchvart tuon,

Verse: 29    der junge und ouch der alde.
Verse: 30    daz es unvuoge walde!




Chapter: 349 
349


Verse: 1    sus hât der zorn sich vür genomen,
Verse: 2    daz beide küenge wellent komen

Verse: 3    vür Bêârosche, dâ man muoz
Verse: 4    gedienen mit arbeit wîbe gruoz.

Verse: 5    vil sper muoz man dâ brechen,
Verse: 6    beidiu hurten unde stechen.

Verse: 7    Bêârosche ist sô ze wer,
Verse: 8    ob wir heten zweinzec her,

Verse: 9    ieslîcher grœzer dan wir hân,
Verse: 10    wir müesten si unzevüeret lân.

Verse: 11    mîn reise istz hinder her verholn:
Verse: 12    disen schilt hân ich dan verstoln

Verse: 13    ûz von andern kinden,
Verse: 14    ob mîn herre möhte vinden,

Verse: 15    eine tjost durch sînen êrsten schilt,
Verse: 16    mit hurtes poinder dar gezilt."

Verse: 17    der knappe hinder sich dô sach:
Verse: 18    sîn herre vuor im balde nâch,

Verse: 19    driu ors und zwelf wîziu sper
Verse: 20    gâhten mit im balde her.

Verse: 21    ich wæne sîn gir des iemen trüge,
Verse: 22    er wolde gerne ze vorvlüge

Verse: 23    die êrsten tjost dâ hân bejaget:
Verse: 24    sus hât mir diu âventiure gesaget.

Verse: 25    der knappe sprach ze Gâwân:
Verse: 26    "herre, lât mich iuwern urloup hân."

Verse: 27    der kêrte sînem herren zuo.
Verse: 28    waz welt ir, daz Gâwân nû tuo,

Verse: 29    er enbesehe waz disiu mære sîn?
Verse: 30    doch lêrte in zwîvel strengen pîn.




Chapter: 350 
350


Verse: 1    er dâhte: "sol ich strîten sehen
Verse: 2    und sol des niht von mir geschehen,

Verse: 3    sôst al mîn prîs verloschen gar.
Verse: 4    kum aber ich durch strîten dar

Verse: 5    und wirde ich dâ geletzet,
Verse: 6    mit wârheit ist ensetzet

Verse: 7    al mîn werltlîcher prîs.
Verse: 8    ich entuon es niht deheinen wîs:

Verse: 9    ich sol ê leisten mînen kamph."
Verse: 10    sîn nôt sich in ein ander klamph:

Verse: 11    gein sîner kamphes verte
Verse: 12    was ze belîben alze herte.

Verse: 13    er enmohte ot dâ niht vür gevarn.
Verse: 14    er sprach: "nû müeze got bewarn

Verse: 15    die kraft an mîner manheit."
Verse: 16    Gâwân gein Bêârosche reit.

Verse: 17    burc und stat sô vor im lac,
Verse: 18    daz niemen bezzers hûses phlac.

Verse: 19    ouch gleste gein im schône
Verse: 20    aller ander bürge ein krône

Verse: 21    mit türnen wol gezieret.
Verse: 22    nû was geloschieret

Verse: 23    dem her dar vür ûf den plân.
Verse: 24    dô marcte mîn her Gâwân

Verse: 25    manegen rinc wol gehêret.
Verse: 26    dâ was hôchvart gemêret:

Verse: 27    wunderlîcher baniere
Verse: 28    kôs er dâ manege schiere

Verse: 29    und maneger slahte vremden bovel.
Verse: 30    der zwîvel was sîns herzen hovel,




Chapter: 351 
351


Verse: 1    dâ durch in starkiu angest sneit.
Verse: 2    Gâwân mitten durch si reit,

Verse: 3    doch ieslîch zeltsnuor die andern dranc.
Verse: 4    ir her was wît unde lanc:

Verse: 5    dô sach er wie si lâgen,
Verse: 6    wes dise und jene phlâgen.

Verse: 7    swer "bien sei venuz" dâ sprach,
Verse: 8    "gramerzis" er wider jach.

Verse: 9    grôz rotte an einem orte lac,
Verse: 10    sarjande von Semblidac,

Verse: 11    den lac dâ sunder nâhen bî
Verse: 12    turkopel von Kahetî.

Verse: 13    unkünde dicke unminne sint.
Verse: 14    sus reit des künec Lôtes kint:

Verse: 15    belîbens bete in niemen bat.
Verse: 16    Gâwân kêrte gein der stat.

Verse: 17    er dâhte: "sol ich kipper wesen,
Verse: 18    ich mac vor vlüste baz genesen

Verse: 19    dort in der stat dan hie bî in.
Verse: 20    ich enkêre mich an deheinen gewin,

Verse: 21    wan wie ich daz mîn behalde,
Verse: 22    sô daz es gelücke walde."

Verse: 23    Gâwân gein einer porten reit.
Verse: 24    der burgære site was im leit:

Verse: 25    si enhete niht betûret,
Verse: 26    al ir porten wâren vermûret

Verse: 27    und al ir wîchûs werlîch.
Verse: 28    dar zuo der zinnen ieslîch

Verse: 29    mit armbruste ein schütze phlac,
Verse: 30    der sich schiezens her ûz bewac:




Chapter: 352 
352


Verse: 1    si vlizzen sich gein strîtes werc.
Verse: 2    Gâwân reit ûf an den berc,

Verse: 3    swie wênec er dâ wære bekant.
Verse: 4    er reit ûf dâ er die burc vant.

Verse: 5    sîn ougen muosten schouwen
Verse: 6    manege werde vrouwen.

Verse: 7    diu wirtîn selbe komen was
Verse: 8    durch warten ûf den palas

Verse: 9    mit ir schœnen tohtern zwein,
Verse: 10    von den vil liehter varwe schein.

Verse: 11    schiere hete er von in vernomen.
Verse: 12    si sprâchen: "wer was uns hie komen?"

Verse: 13    sus sprach diu alde herzogîn:
Verse: 14    "waz gezoges mac ditze sîn?"

Verse: 15    dô sprach ir elder tohter sân:
Verse: 16    "muoter, ez ist ein koufman."

Verse: 17    "nû vüert man im doch schilte mite."
Verse: 18    "daz ist vil koufliute site."

Verse: 19    ir junger tohter dô sprach:
Verse: 20    "dû zîhes in, daz doch nie geschach:

Verse: 21    swester, des mahtû dich schamen.
Verse: 22    er gewan nie koufmannes namen:

Verse: 23    er ist sô minneclîch getân,
Verse: 24    ich wil in zeinem ritter hân.

Verse: 25    sîn dienest mac hie lônes gern:
Verse: 26    des wil ich in durch liebe wern."

Verse: 27    sîne knappen nâmen dô goume
Verse: 28    daz ein linde und ölboume

Verse: 29    unden bî der mûre stuont.
Verse: 30    daz dûhte si ein gæber vunt.




Chapter: 353 
353


Verse: 1    waz welt ir daz si mêr nû tuon?
Verse: 2    wan dô erbeizte der künec Lôtes sun,

Verse: 3    aldâ er den besten schaten vant.
Verse: 4    sîn kamerære truoc dar zehant

Verse: 5    einen kulter und ein matraz,
Verse: 6    dar ûf der stolze werde saz.

Verse: 7    ob im saz wîbe hers ein vluot.
Verse: 8    sîn kamergewant man nider luot

Verse: 9    undz harnas von den soumen.
Verse: 10    hinden under den andern boumen

Verse: 11    herberge nâmen sie,
Verse: 12    knappen die dâ kômen hie.

Verse: 13    diu alde herzogîn sprach sân:
Verse: 14    "tohter, welh koufman

Verse: 15    kunde alsus gebâren?
Verse: 16    dû ensolt sîn sus niht vâren."

Verse: 17    dô sprach diu junge Obilôt:
Verse: 18    "unvuoge ir dennoch mêr gebôt:

Verse: 19    gein rois Meljanz von Lîz
Verse: 20    si kêrte ir hôchverte vlîz,

Verse: 21    dô er si bat ir minne.
Verse: 22    gunêrt sîn solhe sinne!"

Verse: 23    dô sprach Obîe,
Verse: 24    vor zorne niht diu vrîe:

Verse: 25    "sîn vuore ist mir unmære.
Verse: 26    dort sitzt ein wehselære,

Verse: 27    des market muoz hie werden guot.
Verse: 28    sîne soumschrîn sint sô behuot,

Verse: 29    dîns ritters, tœrschiu swester mîn,
Verse: 30    er wil ir selbe goumel sîn."




Chapter: 354 
354


Verse: 1    gar dirre worte hôre
Verse: 2    kom Gâwâne in sîn ôre.

Verse: 3    die rede lât sîn als si nû stê.
Verse: 4    nû hœret wiez der stat ergê.

Verse: 5    ein schifrech wazzer vür si vlôz
Verse: 6    durch eine brücke steinîn grôz.

Verse: 7    niht gein der vîende want
Verse: 8    (anderhalp was unverhert daz lant)

Verse: 9    ein marschalc kom geriten sân:
Verse: 10    vür die bruͤcken ûf den plân

Verse: 11    nam er herberge wît.
Verse: 12    sîn herre kom an rehter zît

Verse: 13    und ander die dâ solden komen.
Verse: 14    ich sagez iu, hât irs niht vernomen,

Verse: 15    wer in des wirtes helfe reit
Verse: 16    und wer durch in mit triuwen streit.

Verse: 17    im kom von Brevigariez
Verse: 18    sîn bruoder, duc Marangliez.

Verse: 19    durch den kômen zwêne ritter snel:
Verse: 20    der werde künec Schirniel,

Verse: 21    der truoc krône ze Lirivoin,
Verse: 22    als tet sîn bruoder z Avendroin.

Verse: 23    dô die burgære gesâhen
Verse: 24    daz in helfe wolde nâhen,

Verse: 25    daz ê des war ir aller rât,
Verse: 26    daz dûhte si dô ein missetât.

Verse: 27    der vürste Lippaôt dô sprach:
Verse: 28    "ouwê daz Bêârosche ie geschach

Verse: 29    daz ir porten suln vermûret sîn!
Verse: 30    wan swenne ich gein dem herren mîn




Chapter: 355 
355


Verse: 1    schiltes ammet zeige,
Verse: 2    mîn bestiu zuht ist veige:

Verse: 3    ez hülfe mich und stüende ouch baz
Verse: 4    sîn hulde dan sîn grôzer haz.

Verse: 5    wie stêt ein tjost durch mînen schilt,
Verse: 6    mit sîner hende dar gezilt,

Verse: 7    oder ob versnîden sol mîn swert
Verse: 8    sînen schilt, mîns herren wert!

Verse: 9    gelobet daz iemer wîse wîp,
Verse: 10    diu hât alze lôsen lîp.

Verse: 11    nû lât mich mînen herren hân
Verse: 12    in mînem turne: ich müeste in lân

Verse: 13    und mit im in den sînen.
Verse: 14    swar an er mich wil pînen,

Verse: 15    des stên ich im gar ze sînem gebote.
Verse: 16    doch sol ichs gerne danken gote

Verse: 17    daz er mich niht gevangen hât,
Verse: 18    sît in sîn zürnen niht erlât

Verse: 19    er enwelle mich hie besitzen.
Verse: 20    nû râtet mir mit witzen,"

Verse: 21    sprach er zen burgæren,
Verse: 22    "gein disen strengen mæren."

Verse: 23    dô sprach dâ manec wîse man:
Verse: 24    "möhtet ir unschult genozzen hân,

Verse: 25    ez enwære niht komen an disiu zil."
Verse: 26    si gâben im des râtes vil,

Verse: 27    daz er sîne porten ûf tæte
Verse: 28    und al die besten bæte

Verse: 29    ûz gein der tjoste rîten.
Verse: 30    si jâhen: "wir mugen sô strîten,




Chapter: 356 
356


Verse: 1    ê daz wir uns von zinnen wern
Verse: 2    Meljanzes beiden hern.

Verse: 3    ez sint doch allez meistec kint,
Verse: 4    die mit dem künege dâ komen sint:

Verse: 5    dâ erwerbe wir vil lîhte ein phant,
Verse: 6    dâ von ie grôzer zorn verswant.

Verse: 7    der künec ist lîhte alsô gemuot,
Verse: 8    swenne er hie ritterschaft getuot,

Verse: 9    er sol uns nôt erlâzen
Verse: 10    und al sîn zürnen mâzen.

Verse: 11    veltstrîtes sol uns doch baz gezemen,
Verse: 12    dan daz si uns ûz der mûre nemen.

Verse: 13    wir solden wol gedingen
Verse: 14    dort in ir snüeren ringen,

Verse: 15    wan Poidiconjunzes kraft:
Verse: 16    der vüert die herten ritterschaft.

Verse: 17    dâst unser grœster vreise
Verse: 18    die gevangen Berteneise,

Verse: 19    der phliget der herzoge Astor:
Verse: 20    den siht man hie gein strîte vor.

Verse: 21    dâst ouch sîn sun Meljacanz.
Verse: 22    hete den erzogen Gurnemanz,

Verse: 23    sô wære sîn prîs gehœhet gar:
Verse: 24    doch siht man in in strîtes schar.

Verse: 25    dâ engein ist uns grôz helfe komen."
Verse: 26    ir habet ir râten wol vernomen:

Verse: 27    der vürste tet als man im riet.
Verse: 28    die mûre er ûz den porten schiet.

Verse: 29    die burgære ellens unbetrogen
Verse: 30    begunden ûz ze velde zogen,




Chapter: 357 
357


Verse: 1    hie ein tjost, diu ander dort.
Verse: 2    daz her begunde ouch trecken vort

Verse: 3    her gein der stat durch hôhen muot.
Verse: 4    ir vesperîe wart vil guot:

Verse: 5    ze beider sît rotte ungezalt,
Verse: 6    garzûne krîe manecvalt,

Verse: 7    beide schottesch unde walsch
Verse: 8    wart dâ gerüefet sunder valsch.

Verse: 9    der ritter tât was âne vride.
Verse: 10    die helde erswungen dâ die lide:

Verse: 11    ez wâren doch allez meistec kint.
Verse: 12    die ûz dem her dar komen sint,

Verse: 13    die begunden dâ vil werde tât:
Verse: 14    die burgære phanden si ûf der sât.

Verse: 15    der nie gediende an wîbe
Verse: 16    kleinœte, der möhte an lîbe

Verse: 17    nimmer bezzer wât getragen.
Verse: 18    von Meljanze hôrte ich sagen,

Verse: 19    sîn zimierde wære guot:
Verse: 20    er hete ouch selbe hôhen muot

Verse: 21    und reit ein schœne kastelân,
Verse: 22    daz Meljacanz dort gewan,

Verse: 23    dô er Keien sô hôhe dar hinder stach,
Verse: 24    daz man in am aste hangen sach.

Verse: 25    dôz Meljacanz dort erstreit,
Verse: 26    Meljanz von Lîz ez hie wol reit.

Verse: 27    sîn tât was vor ûz sô bekant,
Verse: 28    al sîne tjoste in ir ougen vant

Verse: 29    Obîe dort ûf dem palas,
Verse: 30    dar si durch warten komen was.




Chapter: 358 
358


Verse: 1    "nû sich," sprach si, "swester mîn:
Verse: 2    deiswâr mîn ritter und der dîn

Verse: 3    begênt hie ungelîchiu werc.
Verse: 4    der dîne wænt daz wir den berc

Verse: 5    und die burc süln verliesen.
Verse: 6    ander wer wir müezen kiesen."

Verse: 7    diu junge muoste ir spotten doln.
Verse: 8    diu sprach: "er mac sichs wol erholn:

Verse: 9    ich gibe im noch gein ellen trôst,
Verse: 10    daz er dîns spottes wirt erlôst.

Verse: 11    er sol dienest gein mir kêren
Verse: 12    und ich wil im vreude mêren.

Verse: 13    sît dû gihs er sî ein koufman,
Verse: 14    er sol mîns lônes market hân."

Verse: 15    ir beider strît der worte
Verse: 16    Gâwân ze merke hôrte.

Verse: 17    als ez im dô getohte
Verse: 18    übersaz erz, swie er mohte.

Verse: 19    sol lûter herze sich niht schemen,
Verse: 20    daz muoz der tôt dâ von ê nemen.

Verse: 21    daz grôze her al stille lac,
Verse: 22    des Poidiconjunz dort phlac:

Verse: 23    wan ein werder jungelinc
Verse: 24    was in dem strîte und al sîn rinc,

Verse: 25    der herzoge von Lanverunz.
Verse: 26    dô kom Poidiconjunz:

Verse: 27    ouch nam der alt wîse man
Verse: 28    die eine und die andern dan.

Verse: 29    diu vesperîe was erliten
Verse: 30    und wol durch werdiu wîp gestriten.




Chapter: 359 
359


Verse: 1    dô sprach Poidiconjunz
Verse: 2    zem herzogen von Lanverunz:

Verse: 3    "geruocht ir mîn niht bîten?
Verse: 4    sô ir vart durch rüemen strîten,

Verse: 5    sô wænt ir daz sî guot getân.
Verse: 6    hiest der werde Lahedumân

Verse: 7    und ouch Meljacanz mîn sun:
Verse: 8    swaz die beide solden tuon

Verse: 9    und ich selbe, ir möhtet dâ strîten sehen,
Verse: 10    ob ir strîten kundet spehen.

Verse: 11    ich enkum niemêr von dirre stat,
Verse: 12    ich enmache uns alle strîtes sat

Verse: 13    oder mir gebent man und wîp
Verse: 14    her ûz gevangen ir beider lîp."

Verse: 15    dô sprach der herzoge Astor:
Verse: 16    "herre, iuwer neve was dâ vor,

Verse: 17    der künec, und al sîn her von Lîz:
Verse: 18    solde iuwer her an slâfes vlîz

Verse: 19    die wîle sich hân gekêret?
Verse: 20    habet ir uns daz gelêret,

Verse: 21    sô slâfe ich dâ man strîten sol:
Verse: 22    ich kan bî strîte slâfen wol.

Verse: 23    doch geloupt mir daz, wære ich niht komen,
Verse: 24    die burgære heten dâ genomen

Verse: 25    vrumen und prîs zir handen.
Verse: 26    ich bewar iuch dâ vor schanden.

Verse: 27    durch got nû senftet iuwern zorn:
Verse: 28    dâst mêr gewunnen dan verlorn

Verse: 29    von iuwer massenîe,
Verse: 30    wils jehen vrou Obîe."




Chapter: 360 
360


Verse: 1    Poidiconjunzes zorn was ganz
Verse: 2    ûf sînen neven Meljanz.

Verse: 3    doch brâhte der werde junge man
Verse: 4    vil tjoste durch sînen schilt her dan:

Verse: 5    daz endorfte sîn niuwer prîs niht klagen.
Verse: 6    nû hœret von Obîen sagen:

Verse: 7    diu bôt ir hazzes genuoc
Verse: 8    Gâwân, der in âne schulde truoc.

Verse: 9    si wolde im werben schande:
Verse: 10    einen garzûn si sande

Verse: 11    hin ze Gâwâne, dâ der saz.
Verse: 12    si sprach: "nû vrâge in vürbaz,

Verse: 13    ob diu ors veile sîn
Verse: 14    und ob in sînen soumschrîn

Verse: 15    lige inder werdez krâmgewant.
Verse: 16    wir vrouwen koufenz al zehant."

Verse: 17    der garzûn kom gegangen:
Verse: 18    mit zorne er wart emphangen.

Verse: 19    Gâwânes ougen blicke
Verse: 20    in lêrten herzen schricke:

Verse: 21    der garzûn sô verzagete,
Verse: 22    daz er envrâcte noch ensagete

Verse: 23    al daz in sîn vrouwe werben hiez.
Verse: 24    Gâwân die rede ouch niht liez,

Verse: 25    er sprach: "vart hin, ir ribalt!
Verse: 26    mûlslege al ungezalt

Verse: 27    sult ir hie vil emphâhen,
Verse: 28    welt ir mir vürbaz nâhen."

Verse: 29    der garzûn dannen lief oder gienc.
Verse: 30    nû hœrt wiez Obîe ane vienc:




Chapter: 361 
361


Verse: 1    einen juncherren si sprechen bat
Verse: 2    den burcgrâven von der stat.

Verse: 3    der was geheizen Scherules.
Verse: 4    si sprach: "dû solt in biten des,

Verse: 5    daz erz durch mînen willen tuo
Verse: 6    und manlîche grîfe zuo.

Verse: 7    under den ölboumen bî dem graben
Verse: 8    stênt siben ors: diu sol er haben

Verse: 9    und ander rîcheite vil.
Verse: 10    ein koufman uns hie triegen wil:

Verse: 11    bit in daz er daz wende.
Verse: 12    ich getrûwe des sîner hende,

Verse: 13    si nemez unvergolden:
Verse: 14    ouch hât erz unbescholden."

Verse: 15    der knappe hin nider sagete
Verse: 16    al daz sîn vrouwe klagete.

Verse: 17    "ich sol vor triegen uns bewarn"
Verse: 18    sprach Scherules: "ich wil dar varn."

Verse: 19    er reit hin ûf dâ Gâwân saz.
Verse: 20    der selten ellens ie vergaz,

Verse: 21    an dem er vant krancheite vlust,
Verse: 22    lieht antlitze und hôhe brust

Verse: 23    und einen ritter wol gevar.
Verse: 24    Scherules in pruovte gar,

Verse: 25    sîne arme und ieweder hant
Verse: 26    und swaz geschickede er dâ vant.

Verse: 27    dô sprach er: "herre, ir sît ein gast:
Verse: 28    guoter witze uns gar gebrast,

Verse: 29    sît ir niht herberge hât.
Verse: 30    nû prüevetz uns vür missetât.




Chapter: 362 
362


Verse: 1    ich sol nû selbe marschalc sîn:
Verse: 2    liute und guot, swaz heizet mîn,

Verse: 3    daz kêre ich iu gein dienstes siten.
Verse: 4    nie gast ze wirte kom geriten,

Verse: 5    der im wære als undertân."
Verse: 6    "herre, iuwer genâde!" sprach Gâwân.

Verse: 7    "daz hân ich ungedienet noch:
Verse: 8    ich sol iu gerne volgen doch."

Verse: 9    Scherules der lobes gehêrte
Verse: 10    sprach als in sîn triuwe lêrte:

Verse: 11    "sît ez sich hât an mich gezoget,
Verse: 12    ich bin vor vlust nû iuwer voget,

Verse: 13    ez enneme iu dan daz ûzer her:
Verse: 14    dâ bin ich mit iu an der wer."

Verse: 15    mit lachendem munde er sprach
Verse: 16    hin zal den knappen die er dâ sach:

Verse: 17    "ladet ûf iuwer harnas über al:
Verse: 18    wir suln hin nider in daz tal."

Verse: 19    Gâwân vuor mit sînem wirt.
Verse: 20    Obîe nû daz niht verbirt,

Verse: 21    ein spilwîp si sande,
Verse: 22    die ir vater wol erkande,

Verse: 23    und enbôt im solhiu mære,
Verse: 24    dâ vüere ein valschære,

Verse: 25    "des habe ist rîche unde guot:
Verse: 26    bit in durch rehten ritters muot,

Verse: 27    sît er vil soldiere hât
Verse: 28    ûf ors, ûf silber und ûf wât,

Verse: 29    daz diz sî ir êrste gelt.
Verse: 30    ez vrumt wol siben ûf daz velt."




Chapter: 363 
363


Verse: 1    daz spilwîp zem vürsten sprach
Verse: 2    al des sîn tohter dar verjach.

Verse: 3    swer ie urliuges phlac,
Verse: 4    dem was vil nôt, ob er bejac

Verse: 5    möhte an rîcher koste hân.
Verse: 6    Lippaôten den getriuwen man

Verse: 7    überlesten soldiere,
Verse: 8    daz er gedâhte schiere:

Verse: 9    "ich sol daz guot gewinnen
Verse: 10    mit zorne oder aber mit minnen."

Verse: 11    die nâchreise er niht vermeit.
Verse: 12    Scherules im widerreit:

Verse: 13    er vrâcte war im wære sô gâch.
Verse: 14    "ich rîte dem trügenære nâch:

Verse: 15    von dem saget man mir mære,
Verse: 16    ez sî ein valschære."

Verse: 17    unschuldec was her Gâwân:
Verse: 18    ez enhete niht wan diu ors getân

Verse: 19    und ander daz er vuorte.
Verse: 20    Scherulesen lachen ruorte.

Verse: 21    dô sprach er: "herre, ir sît betrogen:
Verse: 22    swerz iu sagete, er hât gelogen,

Verse: 23    ez wære maget, man oder wîp.
Verse: 24    unschuldec ist mîns gastes lîp:

Verse: 25    ir sult in anders prîsen.
Verse: 26    er engewan nie münzîsen,

Verse: 27    welt ir der rehten mære losen.
Verse: 28    sîn lîp getruoc nie wehselphosen.

Verse: 29    seht sîne gebære und hœret sîniu wort
Verse: 30    (in mînem hûs liez ich in dort):




Chapter: 364 
364


Verse: 1    kunt ir dan ritters vuore spehen,
Verse: 2    ir müezt im rehter dinge jehen.

Verse: 3    sîn lîp gein valsche nie wart balt.
Verse: 4    swer im dar über tuot gewalt,

Verse: 5    wærez mîn vater oder mîn kint,
Verse: 6    alle die gein im in zorne sint,

Verse: 7    mîne mâge oder mîn bruoder,
Verse: 8    die müesten diu strîtes ruoder

Verse: 9    gein mir ziehen: ich wil in wern,
Verse: 10    vor unrehten strîten nern,

Verse: 11    swâ ich, herre, vor iuwern hulden mac.
Verse: 12    ûz schiltes ammet in einen sac

Verse: 13    wolde ich mich ê ziehen,
Verse: 14    sô verre ûz arte vliehen

Verse: 15    dâ mich niemen erkande,
Verse: 16    ê daz ich iuwer schande,

Verse: 17    herre, an im begienget.
Verse: 18    güetlîche ir emphienget

Verse: 19    billîcher alle die her sint komen
Verse: 20    und iuwern kummer hânt vernomen,

Verse: 21    dan daz ir si welt rouben.
Verse: 22    des sult ir iuch gelouben."

Verse: 23    der vürste sprach: "nû lâz mich in gesehen."
Verse: 24    "dâ mac niht arges ûz geschehen."

Verse: 25    er reit dâ er Gâwânen sach.
Verse: 26    zwei ougen und ein herze jach,

Verse: 27    diu Lippaôt mit im brâhte dar,
Verse: 28    daz der gast wære wol gevar

Verse: 29    und rehte manlîche site
Verse: 30    sînen gebærden wonten mite.




Chapter: 365 
365


Verse: 1    swem wâriu liebe ie erholte
Verse: 2    daz er herzeminne dolte,

Verse: 3    herzen minne ist des erkant,
Verse: 4    daz herze ist rehter minne ein phant,

Verse: 5    alsô versetzet und verselt,
Verse: 6    dehein munt ez nimmer gar volzelt.

Verse: 7    waz minne wunders vüegen kan.
Verse: 8    ez sî wîp oder man,

Verse: 9    die krenket herzen minne
Verse: 10    vil dicke an hôhem sinne.

Verse: 11    Obîe unde Meljanz,
Verse: 12    ir zweier minne was sô ganz

Verse: 13    und stuont mit solhen triuwen,
Verse: 14    sîn zorn iuch solde riuwen.

Verse: 15    daz er mit zorne von ir reit,
Verse: 16    des gap ir trûren solhez leit,

Verse: 17    daz ir kiusche wart gein zorne balt.
Verse: 18    unschuldec Gâwân des engalt

Verse: 19    und ander diez mit ir dâ liten.
Verse: 20    si kom dicke ûz vrouwenlîchen siten:

Verse: 21    sus vlaht ir kiusche sich in zorn.
Verse: 22    ez was ir beider ougen dorn,

Verse: 23    swâ si den werden man gesach:
Verse: 24    ir herze Meljanze jach,

Verse: 25    er müeste vor ûz der hœste sîn.
Verse: 26    si dâhte: "ob er mich lêret pîn,

Verse: 27    den sol ich gerne durch in hân.
Verse: 28    den jungen werden süezen man

Verse: 29    vor al der werlde ich minne:
Verse: 30    dar jagent mich herzen sinne."




Chapter: 366 
366


Verse: 1    von minnen noch zornes vil geschiht:
Verse: 2    nû enwîzet ez Obîen niht.

Verse: 3    nû hœret wie ir vater sprach,
Verse: 4    dô er den werden Gâwân sach

Verse: 5    und er in in daz lant emphienc,
Verse: 6    wie erz mit rede dô ane vienc.

Verse: 7    dô sprach er: "herre, iuwer komen
Verse: 8    daz mac mit sælden uns gevromen.

Verse: 9    ich hân gevarn manege vart:
Verse: 10    sô suoze in mînen ougen wart

Verse: 11    nie von angesihte.
Verse: 12    zuo dirre ungeschihte

Verse: 13    sol iuwer künfteclîcher tac
Verse: 14    uns trœsten, wande er trœsten mac."

Verse: 15    er bat in tuon dâ ritters tât:
Verse: 16    "ob ir harnases mangel hât,

Verse: 17    des lât iuch wol gereiten gar.
Verse: 18    welt ir, sît, herre, in mîner schar."

Verse: 19    dô sprach der werde Gâwân:
Verse: 20    "ich wære des ein bereiter man:

Verse: 21    ich hân harnas und starke lide,
Verse: 22    wan daz mîn strîten stêt mit vride

Verse: 23    unz an eine benande stunde.
Verse: 24    ir læget obe oder unde,

Verse: 25    daz wolde ich durch iuch lîden:
Verse: 26    nû muoz ichz durch daz mîden,

Verse: 27    herre, unz ein mîn kamph ergêt,
Verse: 28    dâ mîn triuwe sô hôhe phandes stêt,

Verse: 29    durch aller werden liute gruoz
Verse: 30    ich si mit kamphe lœsen muoz




Chapter: 367 
367


Verse: 1    (sus bin ich ûf der strâzen)
Verse: 2    oder ich muoz den lîp dâ lâzen."

Verse: 3    daz was Lippaôte ein herzeleit.
Verse: 4    er sprach: "herre, durch iuwer werdekeit

Verse: 5    und durch iuwer zühte hulde
Verse: 6    sô vernemet mîn unschulde.

Verse: 7    ich hân zwuo tohter die mir sint
Verse: 8    liep, wan si sint mîniu kint.

Verse: 9    swaz mir got hât an den gegeben,
Verse: 10    dâ wil ich bî mit vreuden leben.

Verse: 11    ô wol mich daz ich ie gewan
Verse: 12    kummer den ich von in hân!

Verse: 13    den treget iedoch diu eine
Verse: 14    mit mir al gemeine.

Verse: 15    ungelîch ist diu gesellekeit:
Verse: 16    mîn herre ir tuot mit minnen leit

Verse: 17    und mir mit unminne.
Verse: 18    als ich michs versinne,

Verse: 19    mîn herre mir gewalt wil tuon
Verse: 20    durch daz ich hân deheinen sun.

Verse: 21    mir suln ouch tohter lieber sîn:
Verse: 22    waz denne? ob ichs nû lîde pîn,

Verse: 23    den wil ich mir ze sælden zeln.
Verse: 24    swer sol mit sîner tohter weln,

Verse: 25    swie ir verboten sî daz swert:
Verse: 26    ir wer ist anders alsô wert:

Verse: 27    si erwirbet im kiuscheclîche
Verse: 28    einen sun vil ellens rîche.

Verse: 29    des selben ich gedingen hân."
Verse: 30    "nû gewers iuch got" sprach Gâwân.




Chapter: 368 
368


Verse: 1    Lippaôt der vürste al vaste bat.
Verse: 2    "herre, durch got die rede lât"

Verse: 3    sus sprach des künec Lôtes sun.
Verse: 4    "durch iuwer zuht sult ir daz tuon

Verse: 5    und lât mich triuwe niht enbern.
Verse: 6    eins dinges wil ich iuch gewern:

Verse: 7    ich sage iu hînte bî dirre naht,
Verse: 8    wes ich mich drumme hân bedâht."

Verse: 9    Lippaôt im dancte und vuor zehant.
Verse: 10    an dem hove er sîne tohter vant

Verse: 11    und des burcgrâven tohterlîn.
Verse: 12    diu zwei diu snalten vingerlîn.

Verse: 13    dô sprach er Obilôte zuo:
Verse: 14    "tohter, wannen kumstû?"

Verse: 15    "vater, ich var dâ nider her.
Verse: 16    ich getrûwe im wol, daz er michs gewer:

Verse: 17    ich wil den vremden ritter biten
Verse: 18    dienstes nâch lônes siten."

Verse: 19    "tohter, sô sî dir geklaget,
Verse: 20    er enhât mir ane noch abe gesaget.

Verse: 21    kum mîner bete anz ende nâch."
Verse: 22    der megede was zem gaste gâch.

Verse: 23    dô si in die kemenâten gienc,
Verse: 24    Gâwân spranc ûf. dô er si emphienc,

Verse: 25    zuo der süezen er dô saz.
Verse: 26    er dancte ir daz si niht vergaz

Verse: 27    sîn dâ man im missebôt.
Verse: 28    er sprach: "geleit ie ritter nôt

Verse: 29    durch ein sus wênec vrouwelîn,
Verse: 30    dâ solde ich durch iuch inne sîn."




Chapter: 369 
369


Verse: 1    diu junge süeze klâre
Verse: 2    sprach âne alle vâre:

Verse: 3    "got sich des wol versinnen kan,
Verse: 4    herre, ir sît der êrste man

Verse: 5    der ie mîn redegeselle wart:
Verse: 6    ist mîn zuht dar an bewart

Verse: 7    und ouch mîn schamlîcher sin,
Verse: 8    daz gît an vreuden mir gewin,

Verse: 9    wan mir mîn meisterîn verjach,
Verse: 10    diu rede wære des sinnes dach.

Verse: 11    herre, ich bite iuwer unde mîn:
Verse: 12    daz lêrt mich endehafter pîn.

Verse: 13    den nenne ich iu, geruochet irs:
Verse: 14    habet ir mich ihtes deste wirs,

Verse: 15    ich var doch ûf der mâze phat,
Verse: 16    wande ich dâ ziu mîn selber bat.

Verse: 17    ir sît mit der wârheit ich.
Verse: 18    swie die namen teilen sich,

Verse: 19    mîns lîbes namen sult ir hân:
Verse: 20    nû sît maget unde man.

Verse: 21    ich hân iuwer unde mîn gegert.
Verse: 22    lât ir mich, herre, ungewert

Verse: 23    nû schamlîche von iu gên,
Verse: 24    dar umme muoz ze rehte stên

Verse: 25    iuwer prîs vor iuwer selbes zuht,
Verse: 26    sît mîn magetuonlîchiu vluht

Verse: 27    iuwer genâde suochet.
Verse: 28    ob ir des, herre, ruochet,

Verse: 29    ich wil iu geben minne
Verse: 30    mit herzenlîchem sinne.




Chapter: 370 
370


Verse: 1    ob ir manlîche site hât,
Verse: 2    sô wæne ich wol daz ir niht lât

Verse: 3    ir endient mir: ich bin dienstes wert.
Verse: 4    sît ouch mîn vater helfe gert

Verse: 5    an vriunden und an mâgen,
Verse: 6    lât iuch des niht betrâgen,

Verse: 7    ir endient uns beiden ûf mîn eines lôn."
Verse: 8    er sprach: "vrouwe, iuwers mundes dôn

Verse: 9    wil mich von triuwen scheiden.
Verse: 10    untriuwe iu solde leiden.

Verse: 11    mîn triuwe dolt die phandes nôt:
Verse: 12    ist si unerlœset, ich bin tôt.

Verse: 13    doch lât mich dienst und sinne
Verse: 14    kêren gein iuwer minne.

Verse: 15    ê daz ir minne meget gegeben
Verse: 16    ir müezet vünf jâr ê leben:

Verse: 17    darst iuwer minne zît ein zal."
Verse: 18    nû dâhte er des, wie Parzival

Verse: 19    wîben baz getrûte dan gote:
Verse: 20    sîn bevelhen was dirre megede ein bote

Verse: 21    Gâwân in daz herze sîn.
Verse: 22    dô lobete er dem vrouwelîn,

Verse: 23    er wolde durch si wâpen tragen.
Verse: 24    er begunde ir vürbaz mêre sagen:

Verse: 25    "in iuwer hende sî mîn swert.
Verse: 26    ob iemen tjoste gein mir gert,

Verse: 27    den poinder müezt ir rîten,
Verse: 28    ir sult dâ vür mich strîten.

Verse: 29    man mac mich dâ in strîte sehen:
Verse: 30    der muoz mînhalp von iu geschehen."




Chapter: 371 
371


Verse: 1    si sprach: "vil wênec mich des bevilt.
Verse: 2    ich bin iuwer scherm und iuwer schilt

Verse: 3    und iuwer herze und iuwer trôst.
Verse: 4    sît ir mich zwîvels hât erlôst,

Verse: 5    ich bin vür ungevelle
Verse: 6    iuwer geleite und iuwer geselle,

Verse: 7    vür ungelückes schûr ein dach
Verse: 8    bin ich iu senfteclîch gemach.

Verse: 9    mîn minne sol iu vride bern,
Verse: 10    gelückes vor der angest wern,

Verse: 11    daz iuwer ellen niht verbirt
Verse: 12    ir enwert iuch vaste unz an den wirt.

Verse: 13    ich bin wirt und wirtîn
Verse: 14    und wil in strîte bî iu sîn.

Verse: 15    swenne ir des gedingen hât,
Verse: 16    sælde und ellen iuch niht enlât."

Verse: 17    dô sprach der werde Gâwân:
Verse: 18    "vrouwe, ich wil beidiu hân,

Verse: 19    sît ich in iuwerm gebote lebe,
Verse: 20    iuwer minne und iuwer trôstes gebe."

Verse: 21    die wîle wâren ir hendelîn
Verse: 22    zwischen den handen sîn.

Verse: 23    dô sprach si: "herre, nû lât mich varn
Verse: 24    ich muoz ouch mich dar an bewarn:

Verse: 25    wie vüeret ir âne mînen solt?
Verse: 26    dar zuo wære ich iu alze holt.

Verse: 27    ich sol mich arbeiten,
Verse: 28    mîn kleinœte iu bereiten.

Verse: 29    swenne ir daz traget, deheinen wîs
Verse: 30    überhœht iuch nimmer ander prîs."




Chapter: 372 
372


Verse: 1    dan vuor diu maget und ir gespil.
Verse: 2    si buten beide ir dienstes vil

Verse: 3    Gâwâne dem gaste:
Verse: 4    der neic ir hulden vaste.

Verse: 5    dô sprach er: "sult ir werden alt,
Verse: 6    trüege dan niht wan sper der walt

Verse: 7    als erz am andern holze hât,
Verse: 8    daz würde iu zwein ein ringiu sât.

Verse: 9    kan iuwer jugent sus twingen,
Verse: 10    welt irz inz alter bringen,

Verse: 11    iuwer minne lêrt noch ritter hant
Verse: 12    dâ von ie schilt gein sper verwant."

Verse: 13    dannen vuoren die megede beide
Verse: 14    mit vreuden sunder leide.

Verse: 15    des burcgrâven tohterlîn
Verse: 16    diu sprach: "nû saget mir, vrouwe mîn,

Verse: 17    wes habet ir im ze gebene wân,
Verse: 18    sît daz wir niht wan tocken hân?

Verse: 19    sîn die mîne iht schœner baz,
Verse: 20    die gebet im âne mînen haz:

Verse: 21    dâ wirt vil wênec nâch gestrîten."
Verse: 22    der vürste Lippaôt kom geriten

Verse: 23    an dem berge enmitten.
Verse: 24    Obilôten und Clauditten

Verse: 25    sach er vor im ûf hin gên:
Verse: 26    er bat si beide stille stên.

Verse: 27    dô sprach diu junge Obilôt:
Verse: 28    "vater, mir wart nie sô nôt

Verse: 29    dîner helfe. dar zuo gip mir rât:
Verse: 30    der ritter mich gewert hât."




Chapter: 373 
373


Verse: 1    "tohter, swes dîn wille gert,
Verse: 2    hân ichz, des bistû gewert.

Verse: 3    ô wol der vruht diu an dir lac!
Verse: 4    dîn geburt was der sælden tac."

Verse: 5    "vater, sô wil ich dirz sagen,
Verse: 6    heimlîche mînen kummer klagen:

Verse: 7    nâch dînen genâden dar zuo sprich."
Verse: 8    er bat si heben vür sich.

Verse: 9    si sprach: "war kœme dan mîn gespil?"
Verse: 10    dô hielt der ritter bî im vil:

Verse: 11    die striten wer si solde nemen.
Verse: 12    des mohte ieslîchen wol gezemen:

Verse: 13    iedoch bôt man si einem dar.
Verse: 14    Clauditte was ouch wol gevar.

Verse: 15    al rîtende sprach ir vater zir:
Verse: 16    "Obilôt, nû sage mir

Verse: 17    ein teil von dîner nœte."
Verse: 18    "dâ hân ich kleinœte

Verse: 19    dem vremden ritter gelobet.
Verse: 20    ich wæne mîn sin hât getobet.

Verse: 21    hân ich im niht ze gebene,
Verse: 22    waz touc ich dan ze lebene?

Verse: 23    sît er mir dienest hât geboten,
Verse: 24    sô muoz ich schemelîche roten,

Verse: 25    ob ich im niht ze gebene hân.
Verse: 26    nie megede wart sô liep ein man."

Verse: 27    dô sprach er: "tohter, warte an mich:
Verse: 28    ich sol des wol bereiten dich,

Verse: 29    sît dû dienstes von im gers.
Verse: 30    ich gibe dir daz dû in gewers,




Chapter: 374 
374


Verse: 1    ob dich halt dîn muoter lieze.
Verse: 2    got gebe daz ichs genieze,

Verse: 3    ouwî er stolz werder man,
Verse: 4    waz ich gedingen gein im hân!

Verse: 5    nie wort ich dennoch zim gesprach:
Verse: 6    in mînem slâfe ich in hînte sach."

Verse: 7    Lippaôt gienc vür die herzogîn
Verse: 8    und Obilôt diu tohter sîn.

Verse: 9    dô sprach er: "vrouwe, stiurt uns zwei.
Verse: 10    mîn herze nâch vreuden schrei,

Verse: 11    dô mich got dirre maget beriet
Verse: 12    und mich von ungemüete schiet."

Verse: 13    diu alde herzogîn sprach sân:
Verse: 14    "waz welt ir mînes guotes hân?"

Verse: 15    "vrouwe, sît irs uns bereit,
Verse: 16    Obilôt vil bezzer kleit.

Verse: 17    si dunket sichs mit wirde wert,
Verse: 18    sît sô werder man ir minne gert

Verse: 19    und er ir biutet dienstes vil
Verse: 20    und ouch ir kleinœte wil."

Verse: 21    dô sprach der megede muoter:
Verse: 22    "er süezer man vil guoter!

Verse: 23    ich wæne, ir meint den vremden gast.
Verse: 24    sîn blic ist rehte ein meien glast."

Verse: 25    dô hiez tragen dar diu wîse
Verse: 26    samît von Ethnîse.

Verse: 27    unversniten wât truoc man dâ mite,
Verse: 28    phelle von Tabronite

Verse: 29    ûz dem lande ze Tribalibôt.
Verse: 30    an Kaukasas daz golt ist rôt,




Chapter: 375 
375


Verse: 1    dar ûz die heiden manege wât
Verse: 2    würkent, diu vil spæhe hât,

Verse: 3    mit rehter art ûf sîden.
Verse: 4    Lippaôt hiez balde snîden

Verse: 5    sîner tohter kleider:
Verse: 6    er miste gerne ir beider,

Verse: 7    der bœsten und der besten.
Verse: 8    einen phelle mit golde vesten

Verse: 9    den sneit man an daz vrouwelîn.
Verse: 10    ir muoste ein arm geblœzet sîn:

Verse: 11    dâ was ein ermel von genomen,
Verse: 12    der solde Gâwâne komen.

Verse: 13    daz was ir prisente,
Verse: 14    phelle von Nourîente,

Verse: 15    verre ûz heidenschaft gevuort.
Verse: 16    der hete ir zeswen arm geruort,

Verse: 17    doch an den roc niht genæt:
Verse: 18    dâ enwart nie vadem zuo gedræt.

Verse: 19    den brâhte Clauditte dar
Verse: 20    Gâwâne dem wol gevar.

Verse: 21    dô wart sîn lîp gar sorgen vrî.
Verse: 22    sîner schilte wâren drî:

Verse: 23    ûf einen sluoc er in al zehant.
Verse: 24    al sîn trûren gar verswant:

Verse: 25    sînen grôzen danc er niht versweic,
Verse: 26    vil dicke er dem wege neic,

Verse: 27    den diu juncvrouwe gienc,
Verse: 28    diu in sô güetlîche emphienc

Verse: 29    und in sô minneclîche
Verse: 30    an vreuden machte rîche.




Chapter: 376 
376


Verse: 1    der tac hete ende und kom diu naht.
Verse: 2    ze beider sît was grôziu maht,

Verse: 3    manec werlîch ritter guot.
Verse: 4    wære sûzern hers niht solhiu vluot,

Verse: 5    sô heten die innern strîtes vil.
Verse: 6    dô mâzen si ir letze zil

Verse: 7    bî dem liehten mânen.
Verse: 8    si kunden sich wol ânen

Verse: 9    vorhteclîcher zageheit.
Verse: 10    vor tages wart von in bereit

Verse: 11    zwelf zingel wîte,
Verse: 12    vergrabet gein dem strîte.

Verse: 13    daz ieslîch zingel muoste hân
Verse: 14    zorse ûf drî barbigân.

Verse: 15    Kardefablêt de Jâmor,
Verse: 16    des marschalc nam dâ vier tor,

Verse: 17    dâ man smorgens sach sîn her
Verse: 18    wol mit ellenthafter wer.

Verse: 19    der herzoge rîche
Verse: 20    streit dâ ritterlîche.

Verse: 21    diu wirtîn was sîn swester.
Verse: 22    er was des muotes vester

Verse: 23    dan anders manec strîtec man,
Verse: 24    der wol in strîte tûren kan:

Verse: 25    des leit er dicke in strîte pîn.
Verse: 26    sîn her dâ zogete snahtes în.

Verse: 27    er was verre dar gestrichen,
Verse: 28    wande er selten was entwichen

Verse: 29    strîteclîcher herte.
Verse: 30    vier porten er dâ wol werte.




Chapter: 377 
377


Verse: 1    swaz hers anderhalp der brücken lac,
Verse: 2    daz zogete über, ê kom der tac,

Verse: 3    ze Bêârosche in die stat.
Verse: 4    als si Lippaôt der vürste bat,

Verse: 5    dô wâren die von Jâmor
Verse: 6    geriten über die brücken vor.

Verse: 7    man bevalh ieslîche porten sô,
Verse: 8    daz is werlîche dô

Verse: 9    stuonden, dô der tac erschein.
Verse: 10    Scherules der kôs im ein,

Verse: 11    die er und mîn her Gâwân
Verse: 12    niht unbehuot wolden lân.

Verse: 13    man hôrte dâ von den gesten
Verse: 14    (ich wæne daz wâren die besten),

Verse: 15    die klageten daz dâ wære geschehen
Verse: 16    ritterschaft gar âne ir sehen

Verse: 17    und daz diu vesperîe ergienc.
Verse: 18    daz ir deheiner tjost dâ emphienc,

Verse: 19    diu klage was gar âne nôt:
Verse: 20    ungezalt man si in dâ bôt,

Verse: 21    allen den dies geruochten
Verse: 22    und si ûz ze velde suochten.

Verse: 23    in den gazzen kôs man grôze slâ.
Verse: 24    ouch sach man her unde dâ

Verse: 25    manege banier zogen în
Verse: 26    allez bî des mânen schîn

Verse: 27    und manegen helm von rîcher kost
Verse: 28    (man wolde si vüeren gein der tjost)

Verse: 29    und manec sper wol gemâl.
Verse: 30    ein Regenspurger zindâl




Chapter: 378 
378


Verse: 1    dâ wære ze swachem werde:
Verse: 2    vor Bêârosche ûf der erde

Verse: 3    man sach dâ wâpenröcke vil
Verse: 4    hôher an der koste zil.

Verse: 5    diu naht tet nâch ir alden site,
Verse: 6    an dem orte ein tac ir zogete mite:

Verse: 7    den kôs man niht bî lerchen sanc.
Verse: 8    manec hurte dâ vil lûte erklanc:

Verse: 9    daz kom in von strîtes sachen.
Verse: 10    man hôrte diu sper dâ krachen

Verse: 11    rehte als ez wære ein wolken rîz.
Verse: 12    dâ was daz junge her von Lîz

Verse: 13    komen an die von Lirivoin
Verse: 14    und an den künec von Avendroin.

Verse: 15    dâ erhal manec rîchiu tjoste guot,
Verse: 16    als der würfe in grôze gluot

Verse: 17    ganze kastâne.
Verse: 18    âvoi wie ûf dem plâne

Verse: 19    von den gesten wart geriten
Verse: 20    und von den burgæren gestriten!

Verse: 21    Gâwân und der schahteliur,
Verse: 22    durch der sêle âventiur

Verse: 23    und durch ir sælden urhap
Verse: 24    ein phaffe in eine messe gap:

Verse: 25    der sanc si beide gote und in.
Verse: 26    dô nâhte ir werdekeit gewin,

Verse: 27    wande ez was ir gesetze.
Verse: 28    dô riten si in ir letze.

Verse: 29    ir zingel was dâ vor behuot
Verse: 30    mit manegem werden ritter guot:




Chapter: 379 
379


Verse: 1    daz wâren Scheruleses man.
Verse: 2    von den wart ez dâ guot getân.

Verse: 3    waz mac ich nû sprechen mêr?
Verse: 4    wan Poidiconjunz was hêr:

Verse: 5    der reit dar zuo mit solher kraft,
Verse: 6    wære Swarzwalt ieslîch stûde ein schaft,

Verse: 7    man dorfte dâ niht mêr waldes sehen.
Verse: 8    swer sîne schar wolde spehen.

Verse: 9    der reit mit sehs vanen zuo,
Verse: 10    vor den man strîtes begunde vruo.

Verse: 11    pusûner gâben dôzes klac,
Verse: 12    alsô der doner der ie phlac

Verse: 13    vil angestlîcher vorhte.
Verse: 14    manec tambûrer dâ worhte

Verse: 15    mit der pusûner galm.
Verse: 16    wart inder dâ kein stuphenhalm

Verse: 17    getretet, des enmohte ich niht:
Verse: 18    Erffurter wîngarte giht

Verse: 19    von tretene noch der selben nôt.
Verse: 20    manec orses vuoz die slâge bôt.

Verse: 21    dô kom der herzoge Astor
Verse: 22    mit strîte an die von Jâmor.

Verse: 23    dâ wurden tjoste gewetzet,
Verse: 24    manec werder man entsetzet

Verse: 25    hinderz ors ûf den acker.
Verse: 26    si wâren ir strîtes wacker:

Verse: 27    vil vremder krîe man dâ rief.
Verse: 28    manec vole âne sînen meister lief,

Verse: 29    des herre dort ze vuoze stuont:
Verse: 30    ich wæne dem was gevelle kunt.




Chapter: 380 
380


Verse: 1    dô ersach mîn her Gâwân
Verse: 2    daz gevlohten was der plân,

Verse: 3    die vriunt in der vînde schar:
Verse: 4    er huop ouch sich mit poinder dar.

Verse: 5    müelîch sîn was ze warten.
Verse: 6    diu ors doch wênec sparten

Verse: 7    Scherules und die sîne:
Verse: 8    Gâwân si brâhte in pîne.

Verse: 9    waz er dâ ritter nider stach
Verse: 10    und waz er starker sper zebrach,

Verse: 11    der werden tavelrunder bote!
Verse: 12    hete er die kraft niht von gote,

Verse: 13    sô wære dâ prîses vür in gegert.
Verse: 14    dô wart erklenget manec swert.

Verse: 15    im wâren al ein beidiu her,
Verse: 16    gein den was sîn hant ze wer,

Verse: 17    die von Lîz und die von Gors.
Verse: 18    von beider sît er manec ors

Verse: 19    gezogen brâhte schiere
Verse: 20    zuo sîns wirtes baniere.

Verse: 21    er vrâcte ob si iemen wolde dâ:
Verse: 22    der was dâ vil, die sprâchen jâ.

Verse: 23    si wurden al gelîche
Verse: 24    sîner geselleschefte rîche.

Verse: 25    dô kom ein ritter her gevarn,
Verse: 26    der ouch diu sper niht kunde sparn.

Verse: 27    der burcgrâve von Bêâveis
Verse: 28    und Gâwân der kurteis

Verse: 29    kômen an ein ander,
Verse: 30    daz der junge Lisavander




Chapter: 381 
381


Verse: 1    hinderm orse ûf den bluomen lac,
Verse: 2    wande er von tjoste gevelles phlac.

Verse: 3    daz ist mir durch den knappen leit,
Verse: 4    der sandern tages mit zühten reit

Verse: 5    und Gâwân sagete mære,
Verse: 6    wâ von diz komen wære.

Verse: 7    der erbeizte über sînen herren nider.
Verse: 8    Gâwân in erkande und gap im wider

Verse: 9    daz ors daz dâ wart bejaget.
Verse: 10    der knappe im neic, wart mir gesaget.

Verse: 11    nû seht wâ Kardefablêt
Verse: 12    selbe ûf dem acker stêt

Verse: 13    von einer tjost mit hurte erkant.
Verse: 14    die zilte Meljacanzes hant.

Verse: 15    dô zucten in die sîne enbor:
Verse: 16    dâ wart dicke Jâmor

Verse: 17    mit herten swertslegen geschrît.
Verse: 18    dâ wart enge und niht ze wît,

Verse: 19    dâ hurte gein der hurte dranc.
Verse: 20    manec helm in in diu ôren klanc.

Verse: 21    Gâwân nam sîne geselleschaft:
Verse: 22    dô ergienc sîn poinder mit kraft,

Verse: 23    mit sîns wirtes baniere
Verse: 24    beschutte er harte schiere

Verse: 25    von Jâmor den werden.
Verse: 26    dô wart ûf die erden

Verse: 27    ritter vil gevellet.
Verse: 28    geloubetz, ob ir wellet:

Verse: 29    geziuge sint mir gar verzaget,
Verse: 30    wan als diu âventiure saget.




Chapter: 382 
382


Verse: 1    leh cuns de Muntâne
Verse: 2    vuor gein Gâwâne.

Verse: 3    dâ wart ein rîchiu tjost getân,
Verse: 4    daz der starke Lahedumân

Verse: 5    hinderm orse ûf dem acker lac.
Verse: 6    dar nâch er sicherheite phlac,

Verse: 7    der stolze degen wert erkant:
Verse: 8    diu ergienc in Gâwânes hant.

Verse: 9    dô streit der herzoge Astor
Verse: 10    den zingeln aller næste vor:

Verse: 11    dâ ergienc manec hurteclîcher strît.
Verse: 12    dicke Nantes wart geschrît,

Verse: 13    Artûses herzeichen.
Verse: 14    die herten, niht die weichen,

Verse: 15    was dâ manec ellender Berteneis
Verse: 16    und die soldiere von Destrigleis

Verse: 17    ûz êreckes lande.
Verse: 18    der tât man dâ bekande,

Verse: 19    ir phlac duc de Lanverunz.
Verse: 20    ouch möhte Poidiconjunz

Verse: 21    die Berteneise hân ledec lân:
Verse: 22    sô wart ez dâ von in getân.

Verse: 23    si wâren Artûse
Verse: 24    zer muntâne Clûse

Verse: 25    abe gevangen, dâ man strîten sach:
Verse: 26    in einem sturme daz geschach.

Verse: 27    si schrîten Nantes nâch ir siten
Verse: 28    hie oder swâ si strîtes biten:

Verse: 29    daz was ir krîe und ir art.
Verse: 30    etslîcher truoc vil grâwen bart.




Chapter: 383 
383


Verse: 1    ouch hete ieslîch Bertûn
Verse: 2    durch bekantnisse ein gampilûn

Verse: 3    eintweder ûf helm oder ûf den schilt
Verse: 4    nâch Ilinôtes wâpen gezilt:

Verse: 5    daz was Artûses werder sun.
Verse: 6    waz mohte Gâwân dô tuon,

Verse: 7    er ensiufzete, dô er diu wâpen sach,
Verse: 8    wande im sîn herze jâmers jach.

Verse: 9    sîn œheimes sunes tôt
Verse: 10    brâhte Gâwânen in jâmers nôt:

Verse: 11    er bekande wol der wâpen schîn.
Verse: 12    dô liefen über diu ougen sîn.

Verse: 13    er liez die von Bertâne
Verse: 14    sus tûren ûf dem plâne:

Verse: 15    er wolde mit in strîten niht,
Verse: 16    als man noch vriuntschefte giht.

Verse: 17    er reit gein Meljanzes her.
Verse: 18    dâ wâren die burgære ze wer,

Verse: 19    daz mans in danken mohte,
Verse: 20    wan daz in doch niht tohte

Verse: 21    daz velt gein überkraft ze behaben.
Verse: 22    si wâren entwichen gein dem graben.

Verse: 23    den burgæren manege tjost dâ bôt
Verse: 24    ein ritter allenthalben rôt:

Verse: 25    der hiez der ungenande,
Verse: 26    wande in niemen dâ bekande.

Verse: 27    ich sagez iu als ichz hân vernomen:
Verse: 28    er was zuo Meljanze komen

Verse: 29    dâ vor an dem dritten tage.
Verse: 30    des kômen die burgære in klage:




Chapter: 384 
384


Verse: 1    Meljanze er helfe sich bewac.
Verse: 2    der erwarp ouch im von Semblidac

Verse: 3    zwelf knappen, die sîn nâmen war
Verse: 4    an der tjoste und an der poinder schar:

Verse: 5    swaz sper gebieten mohte ir hant,
Verse: 6    diu wurden gar von im verswant.

Verse: 7    sîn tjoste wâren mit hurte hel,
Verse: 8    wande er den künec Schirniel

Verse: 9    und sînen bruoder dâ vienc.
Verse: 10    dennoch dâ mêr von im ergienc:

Verse: 11    sicherheit er niht erliez
Verse: 12    den herzogen Marangliez.

Verse: 13    die wâren des ortes herte.
Verse: 14    ir volc sich dennoch werte.

Verse: 15    Meljanz der künec dâ selbe streit:
Verse: 16    swem er liep und herzeleit

Verse: 17    hete getân, die muosten jehen
Verse: 18    daz selten mêre wære geschehen

Verse: 19    von deheinem alsô jungen man,
Verse: 20    als ez dâ von im wart getân.

Verse: 21    sîn hant vil vester schilte kloup.
Verse: 22    waz starker sper von im zestoup,

Verse: 23    dâ sich poinder in den poinder slôz!
Verse: 24    sîn jungez herze was sô grôz,

Verse: 25    daz er strîtes muoste gern:
Verse: 26    des enmohte in niemen dâ gewern

Verse: 27    volleclîch (daz was ein nôt),
Verse: 28    unz er Gâwân tjostieren bôt.

Verse: 29    Gâwân ze sînem knappen nam.
Verse: 30    der zwelf sper einz von Angram,




Chapter: 385 
385


Verse: 1    als erz erwarp zem Plimizôl.
Verse: 2    Meljanzes krîe was Barbigôl,

Verse: 3    diu werde houbetstat in Lîz.
Verse: 4    Gâwân nam sîner tjoste vlîz:

Verse: 5    dô lêrte Meljanzen pîn
Verse: 6    von Oraste Gentesîn

Verse: 7    der starke rœrîne schaft.
Verse: 8    durch den schilt in dem arme er brast.

Verse: 9    ein rîchiu tjost dâ geschach:
Verse: 10    Gâwân in vlügelingen stach

Verse: 11    und enzwei sînen hindern satelbogen,
Verse: 12    daz die helde vür unbetrogen

Verse: 13    hinder den orsen stuonden.
Verse: 14    dô tâten si als si kunden,

Verse: 15    mit den swerten tûren.
Verse: 16    dâ wære zwein gebûren

Verse: 17    gedroschen mêr dan genuoc:
Verse: 18    ieweder des andern garbe truoc,

Verse: 19    stückeht die wurden hin geslagen.
Verse: 20    Meljanz ein sper ouch muoste tragen,

Verse: 21    daz stacte dem helde durch den arm:
Verse: 22    bluotec sweiz im machte warm.

Verse: 23    dô zucte in mîn her Gâwân
Verse: 24    in Brevigariezer barbigân

Verse: 25    und betwanc in sicherheite:
Verse: 26    der was er im bereite.

Verse: 27    wære der junge man niht wunt,
Verse: 28    dâ enwære niemen sô gâhes kunt

Verse: 29    daz er im würde undertân:
Verse: 30    man müestes in langer hân erlân.




Chapter: 386 
386


Verse: 1    Lippaôt der vürste, slandes wirt,
Verse: 2    sîn manlîch ellen niht verbirt.

Verse: 3    gein dem streit der künec von Gors.
Verse: 4    dâ muosten beidiu liute und ors

Verse: 5    von geschütze lîden pîne,
Verse: 6    dâ die Kahetîne

Verse: 7    und die sarjande von Semblidac
Verse: 8    ieslîcher sîner künste phlac:

Verse: 9    turkopel kunden wenken.
Verse: 10    die burgære muosten denken,

Verse: 11    waz vînde von ir letzen schiet.
Verse: 12    si heten sarjande ad piet:

Verse: 13    ir zingel wâren sô behuot
Verse: 14    als dâ man noch daz beste tuot.

Verse: 15    swelh wert man dâ den lîp verlôs,
Verse: 16    Obîen zorn unsanfte erkôs,

Verse: 17    wande ir tummiu lôsheit
Verse: 18    vil liute brâhte in arbeit.

Verse: 19    wes engalt der vürste Lippaôt?
Verse: 20    sîn herre der alde künec Schôt

Verse: 21    hetes in erlâzen gar.
Verse: 22    dô begunde müeden ouch diu schar:

Verse: 23    dennoch streit vaste Meljacanz.
Verse: 24    ob sîn schilt wære ganz?

Verse: 25    des enwas niht hende breit beliben:
Verse: 26    dô hete in verre hin dan getriben

Verse: 27    der herzoge Kardefablêt.
Verse: 28    der turnei al stille stêt

Verse: 29    ûf einem blüemînen plân.
Verse: 30    dô kom ouch mîn her Gâwân:




Chapter: 387 
387


Verse: 1    des kom Meljacanz in nôt,
Verse: 2    daz im der werde Lanzelôt

Verse: 3    nie sô vaste zuo getrat,
Verse: 4    dô er von der swertbrücke phat

Verse: 5    kom und dâ nâch mit im streit.
Verse: 6    im was gevancnisse leit,

Verse: 7    die vrou Ginôvêr dolte,
Verse: 8    die er dâ mit strîte holte.

Verse: 9    dô punierte Lôtes sun.
Verse: 10    waz mohte Meljacanz nû tuon,

Verse: 11    er entribe ouch daz ors mit sporn dar?
Verse: 12    vil liute nam der tjost war.

Verse: 13    wer dâ hinderm orse læge?
Verse: 14    den der von Norwæge

Verse: 15    gevellet hete ûf die ouwe.
Verse: 16    manec ritter unde vrouwe

Verse: 17    dise tjost ersâhen.
Verse: 18    die Gâwân prîses jâhen,

Verse: 19    den vrouwen ez guot ze sehene was
Verse: 20    her nider von dem palas.

Verse: 21    Meljacanz wart getret,
Verse: 22    durch sîn kursît gewet

Verse: 23    manec ors daz sît nie gruose enbeiz:
Verse: 24    ez reis ûf in der bluotec sweiz.

Verse: 25    dâ ergienc der orse schelmetac,
Verse: 26    dar nâch den gîren ir bejac.

Verse: 27    dô nam der herzoge Astor
Verse: 28    Meljacanzen den von Jâmor:

Verse: 29    der was vil nâch gevangen.
Verse: 30    der turnei was ergangen.




Chapter: 388 
388


Verse: 1    wer dâ nâch prîse wol rite
Verse: 2    und nâch der wîbe lône strite?

Verse: 3    ich enmöhte ir niht erkennen.
Verse: 4    solde ich si iu alle nennen,

Verse: 5    ich würde ein unmüezec man.
Verse: 6    innerhalp wart ez dâ guot getân

Verse: 7    durch die jungen Obilôt
Verse: 8    und ûzerhalp ein ritter rôt,

Verse: 9    die zwêne behielden dâ den prîs,
Verse: 10    vür si niemen deheinen wîs.

Verse: 11    dô des ûzern hers gast
Verse: 12    innen wart daz im gebrast

Verse: 13    dienstdankes von dem meister sîn
Verse: 14    (der was gevangen hin în),

Verse: 15    er reit dâ er sîne knappen sach.
Verse: 16    ze sînen gevangen er dô sprach:

Verse: 17    "ir herren gâbet mit sicherheit.
Verse: 18    mir ist hie widervarn leit:

Verse: 19    gevangen ist der künec von Lîz.
Verse: 20    nû kêret allen iuwern vlîz,

Verse: 21    ob er ledec müge sîn,
Verse: 22    mac er sô vil geniezen mîn"

Verse: 23    sprach er zem künec von Avendroin
Verse: 24    und ze Schirniel von Lirivoin

Verse: 25    und zem herzogen Marangliez.
Verse: 26    mit spæher gelübede er si liez

Verse: 27    von im rîten in die stat:
Verse: 28    Meljanzen er si lœsen bat

Verse: 29    oder daz si erwürben im den grâl.
Verse: 30    si enkunden im ze keinem mâl




Chapter: 389 
389


Verse: 1    niht gesagen wâ der was,
Verse: 2    wan sîn phlæge ein künec, hieze Anfortas.

Verse: 3    dô diu rede von in geschach,
Verse: 4    der rôte ritter aber sprach:

Verse: 5    "ob mîner bete niht ergêt,
Verse: 6    sô vart dâ Pelrapeire stêt.

Verse: 7    brinct der künegîn iuwer sicherheit
Verse: 8    und saget ir, der durch si dâ streit

Verse: 9    mit Kingrûne und mit Clâmidê,
Verse: 10    dem sî nû nâch dem grâle wê

Verse: 11    und doch wider nâch ir minne.
Verse: 12    nâch beiden ich immer sinne.

Verse: 13    nû saget ir sus, ich sande iuch dar.
Verse: 14    ir helde, daz iuch got bewar!"

Verse: 15    mit urloube si riten în.
Verse: 16    dô sprach ouch er zen knappen sîn:

Verse: 17    "wir sîn gewinnes unverzaget.
Verse: 18    nemt swaz hie orse sî bejaget:

Verse: 19    wan einz lât mir an dirre stunt.
Verse: 20    ir seht wol, daz mîne ist sêre wunt."

Verse: 21    dô sprâchen die knappen guot:
Verse: 22    "herre, iuwer genâde daz ir uns tuot

Verse: 23    iuwer helfe sô grœzlîche.
Verse: 24    wir sîn nû immer rîche."

Verse: 25    er welte im einz ûf sîne vart,
Verse: 26    mit den kurzen ôren Ingliart,

Verse: 27    daz dort von Gâwâne gienc,
Verse: 28    innen des er Meljanzen vienc.

Verse: 29    dâ holtez des rôten ritters hant:
Verse: 30    des wart verdürkelt etslîch rant.




Chapter: 390 
390


Verse: 1    mit urloube tet er dannenkêr.
Verse: 2    vünfzehen ors oder mêr

Verse: 3    liez er in âne wunden.
Verse: 4    die knappen danken kunden,

Verse: 5    si bâten in belîben vil:
Verse: 6    vürbaz gestôzen was sîn zil.

Verse: 7    dô kêrte der gehiure,
Verse: 8    dâ grôz gemach was tiure:

Verse: 9    er ensuochte niht wan strîten.
Verse: 10    ich wæne bî sînen zîten

Verse: 11    ie dehein man sô vil gestreit.
Verse: 12    daz ûzer her al zogende reit

Verse: 13    ze herbergen durch gemach.
Verse: 14    dort inne der vürste Lippaôt sprach

Verse: 15    und vrâcte wiez dâ wære komen,
Verse: 16    wande er hête vernomen,

Verse: 17    Meljanz wære gevangen.
Verse: 18    daz was im liebe ergangen:

Verse: 19    ez kom im sît ze trôste.
Verse: 20    Gâwân den ermel lôste

Verse: 21    âne zerren von dem schilte
Verse: 22    (sînen prîs er hôher zilte):

Verse: 23    den gap er Clauditten.
Verse: 24    an dem orte und ouch dâ mitten

Verse: 25    was er durchstochen und durchslagen.
Verse: 26    er hiez in Obilôte tragen:

Verse: 27    dô wart der megede vreude grôz.
Verse: 28    ir arm was blanc unde blôz:

Verse: 29    dar über hefte si in dô sân.
Verse: 30    si sprach: "wer hât mir dâ getân?"




Chapter: 391 
391


Verse: 1    immer swenne si vür ir swester gienc,
Verse: 2    diu disen schimph mit zorne emphienc.

Verse: 3    den rittern dâ was ruowe nôt,
Verse: 4    wande in grôz müede daz gebôt.

Verse: 5    Scherules nam Gâwân
Verse: 6    und den grâven Lahedumân.

Verse: 7    dennoch mêr ritter er dâ vant,
Verse: 8    die Gâwân mit sîner hant

Verse: 9    des tages ûf dem velde vienc,
Verse: 10    dâ manec grôziu hurte ergienc.

Verse: 11    dô sazte si ritterlîche
Verse: 12    der burcgrâve rîche.

Verse: 13    er und al sîn müediu schar
Verse: 14    stuonden vor dem künege gar,

Verse: 15    unz daz Meljanz enbeiz:
Verse: 16    guoter handelunge er sich dâ vleiz.

Verse: 17    des dûhte Gâwân ze vil.
Verse: 18    "ob ez der künec erlouben wil,

Verse: 19    her wirt, sô sult ir sitzen"
Verse: 20    sprach Gâwân mit witzen:

Verse: 21    sîn zuht in dar zuo jagete.
Verse: 22    der wirt die bete versagete,

Verse: 23    er sprach: "mîn herre ist sküneges man.
Verse: 24    disen dienst hete er getân,

Verse: 25    ob den künec des gezæme
Verse: 26    daz er sînen dienest næme.

Verse: 27    mîn herre durch zuht sîn niht ensiht,
Verse: 28    wande er enhât sîner hulde niht.

Verse: 29    gesament die vriuntschaft iemêr got,
Verse: 30    sô leiste wir alle sîn gebot."




Chapter: 392 
392


Verse: 1    dô sprach der junge Meljanz:
Verse: 2    "iuwer zuht was ie sô ganz,

Verse: 3    die wîle daz ich wonte hie,
Verse: 4    daz iuwer rât mich nie verlie.

Verse: 5    hete ich iu baz gevolget dô,
Verse: 6    sô sæhe man mich hiute vrô.

Verse: 7    nû helft mir, grâve Scherules,
Verse: 8    wande ich iu wol getrûwe des,

Verse: 9    um mînen herren der mich hie hât
Verse: 10    (si hœrent wol beide iuwern rât)

Verse: 11    und Lippaôt, der ander vater mîn,
Verse: 12    der tuo sîn zuht nû gein mir schîn.

Verse: 13    sîner hulde hete ich niht verlorn,
Verse: 14    woldes sîn tohter hân enborn:

Verse: 15    diu pruovte gein mir tôren schimph.
Verse: 16    daz was unvrouwenlîch gelimph."

Verse: 17    dô sprach der werde Gâwân:
Verse: 18    "hie wirt ein suone getân,

Verse: 19    die niemen scheidet wan der tôt."
Verse: 20    dô kômen, die der ritter rôt

Verse: 21    hin ûz hete gevangen,
Verse: 22    ûf vür den künec gegangen:

Verse: 23    die sageten wie ez wære komen.
Verse: 24    dô Gâwân hête vernomen

Verse: 25    sîniu wâpen, der mit in dâ streit,
Verse: 26    und wem si gâben sicherheit,

Verse: 27    und dô si im sageten um den grâl,
Verse: 28    dô dâhte er des, daz Parzivâl

Verse: 29    dises mæres wære ein urhap.
Verse: 30    sîn nîgen er gein himele gap,




Chapter: 393 
393


Verse: 1    daz got ir strîtes gegenniet
Verse: 2    des tages von ein ander schiet.

Verse: 3    des was ir heldiu zuht ein phant,
Verse: 4    daz ir neweder wart genant:

Verse: 5    si enerkande ouch niemen dâ.
Verse: 6    daz tet man aber anderswâ.

Verse: 7    zuo Meljanz sprach Scherules:
Verse: 8    "herre, muoz ich iuch biten des,

Verse: 9    sô ruochet mînen herren sehen.
Verse: 10    swes vriunt dâ beidenthalben jehen,

Verse: 11    des sult ir gerne volgen
Verse: 12    und sît im niht erbolgen."

Verse: 13    daz dûhte si guot über al.
Verse: 14    dô vuoren si ûf des küneges sal,

Verse: 15    daz inner her von der stat:
Verse: 16    des vürsten marschalc si des bat.

Verse: 17    dô nam mîn her Gâwân
Verse: 18    den grâven Lahedumân

Verse: 19    und ander sîne gevangen
Verse: 20    die kômen dar zuo gegangen:

Verse: 21    er bat si geben sicherheit,
Verse: 22    die er des tages ab in erstreit,

Verse: 23    Scherulese sînem wirt.
Verse: 24    mennegelîch nû niht verbirt,

Verse: 25    si envüeren, als dâ gelobet was,
Verse: 26    ze Bêârosche ûf den palas.

Verse: 27    Meljanze gap diu burcgrâvîn
Verse: 28    rîchiu kleider und ein rîselîn,

Verse: 29    dâ er sînen wunden arm în hienc,
Verse: 30    dâ Gâwâns tjoste durch gienc.




Chapter: 394 
394


Verse: 1    Gâwân bî Scherules enbôt
Verse: 2    sîner vrouwen Obilôt,

Verse: 3    daz er si gerne wolde sehen
Verse: 4    und ouch mit wârheite jehen

Verse: 5    sînes lîbes undertân
Verse: 6    und er wolde ouch ir urloup hân,

Verse: 7    "und saget, ich lâze ir den künec hie:
Verse: 8    bitet si sich bedenken wie

Verse: 9    daz si in alsô behalde,
Verse: 10    daz prîs ir vuore walde."

Verse: 11    dise rede hôrte Meljanz.
Verse: 12    der sprach: "Obilôt wirt kranz

Verse: 13    aller wîplîchen güete.
Verse: 14    daz senftet mir mîn gemüete,

Verse: 15    ob ich ir sicherheit muoz geben,
Verse: 16    daz ich ir vrides hie sol leben."

Verse: 17    "ir sult si dâ vür hân erkant,
Verse: 18    iuch envienc hie niemen wan ir hant"

Verse: 19    sus sprach der werde Gâwân.
Verse: 20    "mînen prîs sol si al eine hân."

Verse: 21    Scherules kom vür geriten.
Verse: 22    nû enwas ze hove niht vermiten,

Verse: 23    dâ enwære maget, man und wîp
Verse: 24    in solher wæte ieslîches lîp,

Verse: 25    daz man kranker armer wât
Verse: 26    des tages dâ hete lîhten rât.

Verse: 27    mit Meljanz ze hove reit
Verse: 28    al die dort ûze ir sicherheit

Verse: 29    ze phande heten lâzen.
Verse: 30    dort elliu vieriu sâzen,




Chapter: 395 
395


Verse: 1    Lippaôt, sîn wîp, sîniu kint.
Verse: 2    ûf giengen die dâ komen sint:

Verse: 3    der wirt gein sînem herren spranc.
Verse: 4    ûf dem palase was grôz gedranc,

Verse: 5    dâ er den vîent und die vriunde emphienc.
Verse: 6    Meljanz bî Gâwâne gienc.

Verse: 7    "kundez iu niht versmâhen,
Verse: 8    mit kusse iuch wolde emphâhen

Verse: 9    iuwer aldiu vriundîn:
Verse: 10    ich meine mîn wîp, die herzogîn."

Verse: 11    Meljanz antwurte dem wirte sân:
Verse: 12    "ich wil gerne ir kus mit gruoze hân,

Verse: 13    zweier vrouwen die ich hie sihe:
Verse: 14    der dritten ich niht suone gihe."

Verse: 15    des weinden die eldern dô:
Verse: 16    Obilôt was vil vrô.

Verse: 17    der künec mit kusse emphangen wart
Verse: 18    und zwêne ander künege âne bart:

Verse: 19    als tet der herzoge Marangliez.
Verse: 20    Gâwânen man kusses ouch niht erliez

Verse: 21    und daz er næme sîne vrouwen dar.
Verse: 22    er dructe daz kint wol gevar

Verse: 23    als eine tocken an sîne brust:
Verse: 24    des twanc in vriuntlîch gelust.

Verse: 25    hin ze Meljanze er sprach:
Verse: 26    "iuwer hant mir sicherheite jach:

Verse: 27    der sît nû ledec und gebet si her.
Verse: 28    aller mîner vreuden wer

Verse: 29    sitzet an dem arme mîn:
Verse: 30    ir gevangen sult ir sîn."




Chapter: 396 
396


Verse: 1    Meljanz durch daz dar nâher gienc.
Verse: 2    diu maget Gâwânen zuo zir gevienc:

Verse: 3    Obilôte doch sicherheit geschach,
Verse: 4    dâz manec werder ritter sach.

Verse: 5    "her künec, nû habet ir missetân,
Verse: 6    sol mîn ritter sîn ein koufman,

Verse: 7    des mich mîn swester vil an streit,
Verse: 8    daz ir im gâbet sicherheit"

Verse: 9    sus sprach diu maget Obilôt.
Verse: 10    Meljanze si dâ nâch gebôt

Verse: 11    daz er sicherheit verjæhe,
Verse: 12    diu in ir hant geschæhe,

Verse: 13    ir swester Obîen.
Verse: 14    "zeiner âmîen

Verse: 15    sult ir si hân durch ritters prîs:
Verse: 16    zeinem herren und zeinem âmîs

Verse: 17    sol si iuch immer gerne hân.
Verse: 18    ich enwils iuch enwederhalp erlân."

Verse: 19    got ûz ir jungem munde sprach:
Verse: 20    ir bete beidenthalp geschach.

Verse: 21    dâ meisterte vrou Minne
Verse: 22    mit ir krefteclîchem sinne

Verse: 23    und herzenlîchiu triuwe
Verse: 24    der zweier liebe al niuwe.

Verse: 25    Obîen hant vür den mantel sleif:
Verse: 26    dô si Meljanzes arm begreif,

Verse: 27    al weinde kuste ir rôter munt
Verse: 28    dâ der was von tjoste wunt.

Verse: 29    manec zaher im den arm begôz,
Verse: 30    der von ir liehten ougen vlôz.





Chapter: 397 
397


Verse: 1    wer machte si vor der diet sô balt?
Verse: 2    daz tet diu minne junc und alt.

Verse: 3    Lippaôt dô sînen willen sach,
Verse: 4    wande im sô liebe nie geschach.

Verse: 5    sît got der êren in niht erliez,
Verse: 6    sîne tohter er dô vrouwe hiez.

Verse: 7    wie diu hôchzît ergienc,
Verse: 8    des vrâct den der dâ gâbe emphienc,

Verse: 9    und war dô mennegelîch rite,
Verse: 10    er hete gemach oder er strite,

Verse: 11    des mac ich niht ein ende hân.
Verse: 12    man sagete mir daz Gâwân

Verse: 13    urloup nam ûf dem palas,
Verse: 14    dar er durch urloup komen was.

Verse: 15    Obilôt des weinde vil,
Verse: 16    si sprach: "nû vüert mich mit iu hin."

Verse: 17    dô wart der jungen süezen maget
Verse: 18    diu bete von Gâwâne versaget:

Verse: 19    ir muoter si kûme von im brach.
Verse: 20    urloup er dô zin allen sprach:

Verse: 21    Lippaôt im dienstes bôt genuoc,
Verse: 22    wande er im holdez herze truoc.

Verse: 23    Scherules, sîn stolzer wirt,
Verse: 24    mit al den sînen niht verbirt,

Verse: 25    er enrîte ûz mit dem degene balt.
Verse: 26    Gâwâns strâze ûf einen walt

Verse: 27    gienc: dar sande er weideman
Verse: 28    und spîse verre mit in dan.

Verse: 29    urloup nam der werde helt.
Verse: 30    Gâwân gein kummer was verselt.




Chapter: 398 
398


Verse: 1    Swer was ze Bêârosche komen,
Verse: 2    doch hete Gâwân dâ genomen

Verse: 3    den prîs ze beider sît al ein,
Verse: 4    wan daz dâ vor ein ritter schein,

Verse: 5    bî rôtem wâpen unerkant,
Verse: 6    des prîs man in die hœhe bant.

Verse: 7    Gâwân hete êre unde heil,
Verse: 8    ieweders volleclîchen teil:

Verse: 9    nû nâhet ouch sîns kamphes zît.
Verse: 10    der walt was lanc unde wît,

Verse: 11    dâ durch er muoste strîchen,
Verse: 12    wolde er kamphes niht entwîchen:

Verse: 13    âne schulde er was dar zuo erkorn.
Verse: 14    nû was ouch Inglîart verlorn,

Verse: 15    sîn ors mit kurzen ôren:
Verse: 16    in Tabronit von môren

Verse: 17    wart nie bezzer ors ersprenget.
Verse: 18    nû wart der walt gemenget,

Verse: 19    hie ein schache, dort ein velt,
Verse: 20    etslîchez sô breit daz ein gezelt

Verse: 21    vil kûme drûfe stüende.
Verse: 22    mit sehene gewan er künde

Verse: 23    erbûwenes landes, daz hiez Ascalûn.
Verse: 24    dâ vrâgete er gein Schanpfanzûn

Verse: 25    swaz im dâ volkes widervuor.
Verse: 26    hôch gebirge und manec muor,

Verse: 27    des hete er vil durchstrichen dar.
Verse: 28    dô nam er einer bürge war:

Verse: 29    âvoi diu gap vil werden glast.
Verse: 30    dâ kêrte gein des landes gast.




Chapter: 399 
399


Verse: 1    nû hœrt von âventiuren sagen
Verse: 2    und helfet mir dar under klagen

Verse: 3    Gâwâns grôzen kummer.
Verse: 4    mîn wîser und mîn tummer,

Verse: 5    die tuonz durch ir gesellekeit
Verse: 6    und lâzen in mit mir sîn leit.

Verse: 7    ouwê nû solde ich swîgen:
Verse: 8    nein, lât vürbaz sîgen

Verse: 9    der eteswenne gelücke neic
Verse: 10    und nû gein ungemache seic.

Verse: 11    disiu burc was gehêret sô,
Verse: 12    daz ênêas Kartâgô

Verse: 13    nie sô herrenlîche vant,
Verse: 14    dâ vroun Dîdôn tôt was minnen phant.

Verse: 15    waz si palase phlæge
Verse: 16    und wie vil dâ türne læge?

Verse: 17    ir hete Acratôn genuoc,
Verse: 18    diu âne Babilône ie truoc

Verse: 19    an dem griffe die grœsten wîte.
Verse: 20    nâch heiden worte strîte

Verse: 21    si was alumme wol sô hôch,
Verse: 22    und dâ si gein dem mer gezôch,

Verse: 23    deheinen sturm si widersaz
Verse: 24    noch grôzen ungevüegen haz.

Verse: 25    dâ vor lac raste breit ein plân,
Verse: 26    dar über reit her Gâwân.

Verse: 27    vünf hundert ritter oder mêr
Verse: 28    (ob den allen was einer hêr)

Verse: 29    die kômen im dâ widerriten
Verse: 30    in liehten kleidern wol gesniten,




Chapter: 400 
400


Verse: 1    als mir diu âventiure sagete.
Verse: 2    ir vederspil dâ jagete

Verse: 3    den kranech oder swaz vor in dâ vlôch.
Verse: 4    ein râvît von Spâne hôch

Verse: 5    reit der künec Vergulaht.
Verse: 6    sîn blic was tac wol bi der naht:

Verse: 7    sîn geslehte sande Mazadân
Verse: 8    vür den berc ze Fâmorgân,

Verse: 9    sîn art was von der feien.
Verse: 10    in dûhte er sæhe den meien

Verse: 11    in rehter zît von bluomen gar,
Verse: 12    swer nam des küneges varwe war.

Verse: 13    Gâwânen des bedûhte,
Verse: 14    dô der künec sô gein im lûhte,

Verse: 15    ez wære der ander Parzivâl,
Verse: 16    und daz er Gahmuretes mâl

Verse: 17    hete alsô diz mære weiz,
Verse: 18    dô der reit în ze Kanvoleiz.

Verse: 19    ein reiger tet durch vluht entwîch
Verse: 20    in einen muoregen tîch:

Verse: 21    den brâhten valken dar gehurt.
Verse: 22    der künec suochte unrehten vurt,

Verse: 23    in valken helfe wart er naz.
Verse: 24    sîn ors verlôs er umme daz,

Verse: 25    dar zuo al diu kleider sîn
Verse: 26    (doch schiet er valken von ir pin):

Verse: 27    daz nâmen die valkenære.
Verse: 28    ob daz ir reht iht wære?

Verse: 29    ez was ir reht, si soldenz hân:
Verse: 30    man muoste ouch si bî rehte lân.




Chapter: 401 
401


Verse: 1    ein ander ors man im dô lêch:
Verse: 2    des sînen er sich gar verzêch.

Verse: 3    man hienc ouch ander kleider an in:
Verse: 4    jenez was der valkenære gewin.

Verse: 5    hie kom Gâwân zuo geriten.
Verse: 6    âvoi nû wart dâ niht vermiten,

Verse: 7    er enwürde baz emphangen
Verse: 8    dan ze Karidôl wære ergangen

Verse: 9    Ereckes emphâhen,
Verse: 10    dô er begunde nâhen

Verse: 11    Artûs nâch sînem strîte
Verse: 12    und dô vrou ênîte

Verse: 13    sîner vreude was ein kondewier,
Verse: 14    sît im Maliclischier

Verse: 15    daz twerc sîn vel unsanfte brach
Verse: 16    mit der geisel dâz Ginôvêr sach,

Verse: 17    und dô ze Tulmein ein strît
Verse: 18    ergienc in dem kreize wît

Verse: 19    um den sparwære.
Verse: 20    îdêr fil Noit der mære

Verse: 21    im sîne sicherheit dâ bôt:
Verse: 22    er muoste si im bieten vür den tôt.

Verse: 23    die rede lât sîn und hœrt si ouch hie:
Verse: 24    ich wæne sô vrieschet ir nie

Verse: 25    werden antvanc noch gruoz.
Verse: 26    ouwê des wirt unsanfte buoz

Verse: 27    des werden Lôtes kinde.
Verse: 28    râtet irz, ich erwinde

Verse: 29    und sage iu vürbaz niht mêr.
Verse: 30    durch trûren tuon ich widerkêr.




Chapter: 402 
402


Verse: 1    doch vernemt durch iuwer güete,
Verse: 2    wie ein lûter gemüete

Verse: 3    vremder valsch gevrumte trüebe.
Verse: 4    ob ich iu vürbaz üebe

Verse: 5    diz mære mit rehter sage,
Verse: 6    sô kumt irs mit mir in klage.

Verse: 7    dô sprach der künec Vergulaht:
Verse: 8    "herre, ich hân mich des bedâht,

Verse: 9    ir sult rîten dort hin în.
Verse: 10    mac ez mit iuwern hulden sîn,

Verse: 11    ich briche iu nû gesellekeit.
Verse: 12    ist aber iu mîn vürbaz rîten leit,

Verse: 13    ich lâze swaz ich ze schaffen hân."
Verse: 14    dô sprach der werde Gâwân:

Verse: 15    "herre, swaz ir gebietet,
Verse: 16    billîche ir iuch des nietet:

Verse: 17    daz ist ouch âne mînen zorn
Verse: 18    mit guotem willen gar verkorn."

Verse: 19    dô sprach der künec von Ascalûn:
Verse: 20    "herre, ir seht wol Schamfanzûn.

Verse: 21    dâst mîn swester ûf, ein maget:
Verse: 22    swaz munt von schœne hât gesaget,

Verse: 23    des hât si volleclîchen teil.
Verse: 24    welt irz iu prüeven vür ein heil,

Verse: 25    deiswâr sô muoz si sich bewegen
Verse: 26    daz si iuwer unz an mich sol phlegen:

Verse: 27    ich kum iu schierre dan ich sol.
Verse: 28    ouch erbeitet ir mîn vil wol,

Verse: 29    gesehet ir die swester mîn:
Verse: 30    ir enruocht, wolde ich noch lenger sîn."




Chapter: 403 
403


Verse: 1    "ich sihe iuch gerne, als tuon ich sie.
Verse: 2    doch hânt mich grôze vrouwen ie

Verse: 3    ir werden handelunge erlân"
Verse: 4    sus sprach der stolze Gâwân.

Verse: 5    der künec sande einen ritter dar
Verse: 6    und enbôt der maget daz si sîn war

Verse: 7    sô næme daz langiu wîle
Verse: 8    in diuhte ein kurziu île.

Verse: 9    Gâwân vuor dar der künec gebôt.
Verse: 10    welt ir, noch swîge ich grôzer nôt:

Verse: 11    nein, ich wilz iu vürbaz sagen.
Verse: 12    strâze und ein phert begunde tragen

Verse: 13    Gâwânen gein der porte
Verse: 14    an des palas orte.

Verse: 15    swer bûwes ie begunde,
Verse: 16    baz dan ich sprechen kunde

Verse: 17    von dises bûwes veste.
Verse: 18    dâ lac ein burc, diu beste

Verse: 19    diu ie genant wart ertstift:
Verse: 20    unmâzen wît was ir begrift.

Verse: 21    der bürge lop sul wir hie lân,
Verse: 22    wande ich iu vil ze sagene hân

Verse: 23    von sküneges swester, einer maget.
Verse: 24    hiest von bûwe vil gesaget:

Verse: 25    die prüeve ich rehte als ich sol.
Verse: 26    was si schœne, daz stuont ir wol,

Verse: 27    und hete si dar zuo rehten muot,
Verse: 28    daz was gein werdekeit ir guot,

Verse: 29    sô daz ir site und ir sin
Verse: 30    was gelîch der marcgrâvîn,




Chapter: 404 
404


Verse: 1    diu dicke von dem Heitstein
Verse: 2    über al die marke schein.

Verse: 3    wol im derz heimlîche an ir
Verse: 4    solde prüeven! des geloubet mir,

Verse: 5    der vant kurzwîle dâ
Verse: 6    bezzer dan anderswâ.

Verse: 7    ich mac des von vrouwen jehen
Verse: 8    als mir diu ougen kunnen spehen:

Verse: 9    swar ich rede kêre ze guote,
Verse: 10    diu bedarf wol zühte huote.

Verse: 11    nû hœre dise âventiure
Verse: 12    der getriuwe und der gehiure:

Verse: 13    ich enruoche um die ungetriuwen.
Verse: 14    mit dürkelen triuwen

Verse: 15    hânt si alle ir sælekeit verlorn:
Verse: 16    des muoz ir sêle lîden zorn.

Verse: 17    ûf den hof dort vür den palas reit
Verse: 18    Gâwân gein der gesellekeit,

Verse: 19    als in der künec sande,
Verse: 20    der sich selben an im schande.

Verse: 21    ein ritter, der in brâhte dar,
Verse: 22    in vuorte dâ saz wol gevar

Verse: 23    Antikonîe diu künegin.
Verse: 24    sol wîplîch êre sîn gewin,

Verse: 25    des koufes hete si vil gephlegen
Verse: 26    und alles valsches sich bewegen:

Verse: 27    dâ mite ir kiusche prîs erwarp.
Verse: 28    ouwê daz sô vruo erstarp

Verse: 29    von Veldeke der wîse man!
Verse: 30    der kunde si baz gelobet hân.




Chapter: 405 
405


Verse: 1    dô Gâwân die maget ersach,
Verse: 2    der bote gienc nâher unde sprach

Verse: 3    al daz der künec werben hiez.
Verse: 4    diu künegîn dô niht enliez,

Verse: 5    si enspræche: "herre, gêt nâher mir.
Verse: 6    mîner zühte meister daz sît ir:

Verse: 7    nû gebietet unde lêret.
Verse: 8    wirt iu kurzwîle gemêret,

Verse: 9    daz muoz an iuwerm gebote sîn.
Verse: 10    sît daz iuch der bruoder mîn

Verse: 11    mir bevolhen hât sô wol,
Verse: 12    ich küsse iuch, ob ich küssen sol.

Verse: 13    nû gebiet nâch iuwern mâzen
Verse: 14    mîn tuon oder mîn lâzen."

Verse: 15    mit grôzer zuht si vor im stuont.
Verse: 16    Gâwân sprach: "vrouwe, iuwer munt

Verse: 17    ist sô küssenlîch getân,
Verse: 18    ich sol iuwern kus mit gruoze hân."

Verse: 19    ir munt was heiz, dicke und rôt,
Verse: 20    dar an Gâwân den sînen bôt:

Verse: 21    dâ ergienc ein kus ungastlîch.
Verse: 22    zuo der megede zühte rîch

Verse: 23    saz der wol geborne gast.
Verse: 24    süezer rede in niht gebrast

Verse: 25    beidenthalp mit triuwen:
Verse: 26    si kunden wol geniuwen,

Verse: 27    er sîne bete, si ir versagen.
Verse: 28    daz begunde er herzenlîche klagen:

Verse: 29    ouch bat er si genâden vil.
Verse: 30    diu maget sprach als ich iu sagen wil:




Chapter: 406 
406


Verse: 1    "herre, sît ir anders kluoc,
Verse: 2    sô mac es dunken iuch genuoc.

Verse: 3    ich erbiutez iu durch mîns bruoder bete,
Verse: 4    daz ez Amphlîse Gahmurete

Verse: 5    mînem œheim nie baz erbôt,
Verse: 6    âne bî ligen (mîn triuwe ein lôt

Verse: 7    an dem orte vürbaz wæge,
Verse: 8    der uns wegens ze rehte phlæge),

Verse: 9    und enweiz doch, herre, wer ir sît,
Verse: 10    doch ir an sô kurzer zît

Verse: 11    welt mîne minne hân."
Verse: 12    dô sprach der werde Gâwân:

Verse: 13    "mich lêret mîner künde sin,
Verse: 14    ich sage iu, vrouwe, daz ich bin

Verse: 15    mîner basen bruodersun.
Verse: 16    welt ir mir genâde tuon,

Verse: 17    daz enlât niht durch mînen art:
Verse: 18    derst gein iuwerm sô bewart,

Verse: 19    daz si beide al gelîche stênt
Verse: 20    und in rehter mâze gênt."

Verse: 21    ein maget begunde in schenken,
Verse: 22    dar nâch schier von in wenken.

Verse: 23    mêr vrouwen dennoch dâ sâzen,
Verse: 24    die ouch des niht vergâzen,

Verse: 25    si giengen und schuofen um ir phlege.
Verse: 26    ouch was der ritter von dem wege,

Verse: 27    der in dar brâhte.
Verse: 28    Gâwân des gedâhte,

Verse: 29    dô si alle von im kômen ûz,
Verse: 30    daz dicke den grôzen strûz




Chapter: 407 
407


Verse: 1    væhet ein vil kranker ar.
Verse: 2    er greif ir under den mantel dar.

Verse: 3    ich wæne, er ruorte irz hüffelîn:
Verse: 4    des wart gemêret sîn pîn.

Verse: 5    von der liebe alsolhe nôt gewan
Verse: 6    beidiu maget und ouch der man,

Verse: 7    daz dâ nâch was ein dinc geschehen,
Verse: 8    hetenz übel ougen niht ersehen:

Verse: 9    des willen si beide wâren bereit:
Verse: 10    nû seht, dô nâht ir herzeleit:

Verse: 11    dô gienc zer tür in aldâ
Verse: 12    ein ritter blanc, wande er was grâ.

Verse: 13    ein wâfenheiz er nande
Verse: 14    Gâwânen, dô er in erkande.

Verse: 15    dâ bî er dicke lûte schrei:
Verse: 16    "ouwê unde heiâ hei

Verse: 17    mîns herren, den ir sluoget!
Verse: 18    daz iuch des niht genuoget,

Verse: 19    ir ennôtzoget ouch sîn tohter hie!"
Verse: 20    dem wâfenheiz man volget ie:

Verse: 21    der selbe site aldâ geschach.
Verse: 22    Gâwân zer juncvrouwen sprach:

Verse: 23    "vrouwe, nû gebet iuwern rât:
Verse: 24    unser enwederz niht vil wer hie hât."

Verse: 25    er sprach: "wan hete ich doch mîn swert!"
Verse: 26    dô sprach diu juncvrouwe wert:

Verse: 27    "wir suln ze wer uns ziehen,
Verse: 28    ûf jenen turm dort vliehen,

Verse: 29    der bî mîner kemenâten stêt.
Verse: 30    genædeclîche ez lîhte ergêt."




Chapter: 408 
408


Verse: 1    hie der ritter, dort der koufman.
Verse: 2    diu juncvrouwe erhôrte sân

Verse: 3    den bovel komen ûz der stat.
Verse: 4    mit Gâwân si gein dem turne trat,

Verse: 5    ir vriunt muoste kummer lîden.
Verse: 6    si bat siz dicke mîden:

Verse: 7    ir kradem und ir dôz was sô,
Verse: 8    daz er ir deheiner marcte dô.

Verse: 9    durch strît si drungen gein der tür.
Verse: 10    Gâwân stuont ze wer dar vür,

Verse: 11    ir in^ gên er bewarte:
Verse: 12    einen rigel der den turn besparte,

Verse: 13    den zucte er ûz der mûre.
Verse: 14    sîn arge nâchgebûre

Verse: 15    entwichen im dicke mit ir schar.
Verse: 16    diu künegîn lief her und dar,

Verse: 17    ob ûf dem turne iht wære ze wer
Verse: 18    gein disem ungetriuwen her.

Verse: 19    dô vant diu maget reine
Verse: 20    ein schâchzabelgesteine

Verse: 21    und ein bret, wol erleget wît:
Verse: 22    daz brâhte si Gâwâne in den strît.

Verse: 23    an einem îsenînen ringe ez hienc,
Verse: 24    dâ mit ez Gâwân emphienc.

Verse: 25    ûf disen vierecken schilt
Verse: 26    was schâchzabels vil gespilt:

Verse: 27    der wart im sêre zehouwen.
Verse: 28    nû hœrt ouch von der vrouwen:

Verse: 29    ez wære künec oder roch,
Verse: 30    daz warf si gein den vînden doch.




Chapter: 409 
409


Verse: 1    ez was grôz und swære:
Verse: 2    man saget von ir diu mære,

Verse: 3    swen dâ erreichte ir wurfes swanc,
Verse: 4    der strûchte âne sînen danc.

Verse: 5    diu küneginne rîche
Verse: 6    streit dâ ritterlîche:

Verse: 7    bî Gâwâne si werlîche schein,
Verse: 8    daz diu koufwîp ze Tolenstein

Verse: 9    an der vasnaht nie baz gestriten,
Verse: 10    wan si tuontz von gampelsiten

Verse: 11    und müent âne nôt ir lîp.
Verse: 12    swâ harnasrâmec wirt ein wîp,

Verse: 13    diu hât ir rehtes vergezzen,
Verse: 14    sol man ir kiusche mezzen,

Verse: 15    si entuoz dan durch ir triuwe.
Verse: 16    Antikonîen riuwe

Verse: 17    wart ze Schanfanzûn erzeiget
Verse: 18    und ir hôher muot geneiget.

Verse: 19    in strîte si sêre weinde:
Verse: 20    wol si daz bescheinde,

Verse: 21    daz vriuntlîch liebe ist stæte.
Verse: 22    waz Gâwân dô tæte?

Verse: 23    swenne im diu muoze geschach,
Verse: 24    daz er die maget rehte ersach,

Verse: 25    ir munt, ir ougen und ir nasen.
Verse: 26    baz geschicket an spizze hasen,

Verse: 27    ich wæne den gesâht ir nie,
Verse: 28    dan si was dort unde hie,

Verse: 29    zwischen der hüffe und ir brust.
Verse: 30    minne gernde gelust




Chapter: 410 
410


Verse: 1    kunde ir lîp vil wol gereizen.
Verse: 2    ir engesâht nie âmeizen,

Verse: 3    diu bezzers gelenkes phlac,
Verse: 4    dan si was dâ der gürtel lac.

Verse: 5    daz gap ir gesellen
Verse: 6    Gâwâne manlîch ellen.

Verse: 7    si tûrte mit im in der nôt.
Verse: 8    sîn benandez gîsel was der tôt

Verse: 9    und anders dehein gedinge.
Verse: 10    Gâwânen wac vil ringe

Verse: 11    vînde haz, swenne er die maget erkôs:
Verse: 12    dâ von ir vil den lîp verlôs.

Verse: 13    dô kom der künec Vergulaht.
Verse: 14    der sach die strîteclîchen maht

Verse: 15    gein Gâwâne kriegen.
Verse: 16    ich enwolde iuch denne triegen,

Verse: 17    sô enmac ich in niht beschœnen,
Verse: 18    er enwelle sich selben hœnen

Verse: 19    an sînem werden gaste.
Verse: 20    der stuont ze wer al vaste.

Verse: 21    dô tet der wirt selbe schîn,
Verse: 22    daz mich riuwet Gandîn,

Verse: 23    der künec von Anschouwe,
Verse: 24    daz ein sô werdiu vrouwe,

Verse: 25    sîn tohter, ie den sun gebar,
Verse: 26    der mit ungetriuwer schar

Verse: 27    sîn volc bat sêre strîten.
Verse: 28    Gâwân muoste bîten

Verse: 29    unz der künec gewâpent wart:
Verse: 30    er huop sich selbe an strîtes vart.




Chapter: 411 
411


Verse: 1    Gâwân dô muoste entwîchen,
Verse: 2    doch unlasterlîchen:

Verse: 3    under sturnes tür er wart getân.
Verse: 4    nû seht, dô kom der selbe man,

Verse: 5    der in kamphlîche ane ê sprach:
Verse: 6    vor Artûse daz geschach.

Verse: 7    der lantgrâve Kingrimursel
Verse: 8    gram durch swarten und durch vel,

Verse: 9    durch Gâwâns nôt sîn hende er want,
Verse: 10    wan des was sîn triuwe phant,

Verse: 11    daz er dâ solde haben vride,
Verse: 12    ez enwære daz eines mannes lide

Verse: 13    in in kamphe twungen.
Verse: 14    die alden und die jungen

Verse: 15    treip er von dem turne wider:
Verse: 16    den hiez der künec brechen nider.

Verse: 17    Kingrimursel dô sprach
Verse: 18    hin ûf dâ er Gâwânen sach:

Verse: 19    "helt, gip mir vride ze dir dar în.
Verse: 20    ich wil geselleclîchen pîn

Verse: 21    mit dir hân in dirre nôt.
Verse: 22    mich muoz der künec slahen tôt

Verse: 23    oder ich behalde dir dîn leben."
Verse: 24    Gâwân den vride begunde geben:

Verse: 25    der lantgrâve spranc zuo zim dar.
Verse: 26    des zwîvelte diu ûzer schar:

Verse: 27    er was ouch burcgrâve aldâ.
Verse: 28    si wæren junc oder grâ,

Verse: 29    die blûcten an ir strîte.
Verse: 30    Gâwân spranc an die wîte,




Chapter: 412 
412


Verse: 1    als tet ouch Kingrimursel:
Verse: 2    gein ellen si beide wâren snel.

Verse: 3    der künec mande die sîne:
Verse: 4    "wie lange sul wir pîne

Verse: 5    von disen zwein mannen phlegen?
Verse: 6    mîns vetern sun hât sich bewegen,

Verse: 7    er wil ernern disen man,
Verse: 8    der mir den schaden hât getân,

Verse: 9    den er billîcher ræche,
Verse: 10    ob im ellens niht gebræche."

Verse: 11    genuoge, dens ir triuwe jach,
Verse: 12    kurn einen der zem künege sprach:

Verse: 13    "herre, müeze wirz iu sagen,
Verse: 14    der lantgrâve ist unerslagen

Verse: 15    hie von maneger hende.
Verse: 16    got iuch an site wende,

Verse: 17    die man iu vervâhe baz.
Verse: 18    werltlîch prîs iu sînen haz

Verse: 19    teilt, erslahet ir iuwern gast:
Verse: 20    ir ladet ûf iuch der schanden last.

Verse: 21    sôst der ander iuwer mâc,
Verse: 22    in des geleite ir disen bâc

Verse: 23    hebet, daz sult ir lâzen:
Verse: 24    ir sît dâ von verwâzen.

Verse: 25    nû gebet uns einen vride her,
Verse: 26    die wîle daz dirre tac gewer:

Verse: 27    der vride sî ouch dise naht.
Verse: 28    wes ir iuch drum habet bedâht,

Verse: 29    daz stêt dannoch zuiwer hant,
Verse: 30    ir sît geprîset oder geschant.




Chapter: 413 
413


Verse: 1    mîn vrouwe Antikonîe,
Verse: 2    vor valscheit diu vrîe,

Verse: 3    dort al weinde bî im stêt.
Verse: 4    ob iu daz niht ze herzen gêt,

Verse: 5    sît iuch beide ein muoter truoc,
Verse: 6    sô gedenket, herre, ob ir sît kluoc,

Verse: 7    ir sandet in der megede her:
Verse: 8    wære niemen sîns geleites wer,

Verse: 9    er solde iedoch durch si genesen."
Verse: 10    der künec liez einen vride wesen,

Verse: 11    unz er sich baz bespræche
Verse: 12    wie er sînen vater ræche.

Verse: 13    unschuldec was her Gâwân:
Verse: 14    ez hete ein ander man getân,

Verse: 15    wande der stolze Ehkunat
Verse: 16    eine lanzen durch in lêrte phat.

Verse: 17    dô er Jofreiden fîz îdôl
Verse: 18    vuorte gegen Barbigôl,

Verse: 19    den er bî Gâwâne vienc,
Verse: 20    durch den disiu nôt ergienc.

Verse: 21    dô der vride wart getân,
Verse: 22    daz volc huop sich von strîte sân,

Verse: 23    mennegelîch zen herbergen sîn.
Verse: 24    Antikonîe diu künegîn

Verse: 25    ir vetern sun vaste ummevienc:
Verse: 26    manec kus an sînen munt ergienc,

Verse: 27    daz er Gâwânen hete ernert
Verse: 28    und sich selben untât erwert.

Verse: 29    si sprach: "dû bist mîns vetern sun:
Verse: 30    dû kundes durch niemen missetuon."




Chapter: 414 
414


Verse: 1    welt ir hœren, ich tuon iu kunt
Verse: 2    wâ von ê sprach mîn munt,

Verse: 3    daz lûter gemüete trüebe wart.
Verse: 4    gunêrt sî diu strîtes vart,

Verse: 5    die ze Schampfanzûn tet Vergulaht,
Verse: 6    wan daz was im niht geslaht

Verse: 7    von vater noch von muoter.
Verse: 8    der junge man vil guoter

Verse: 9    von schame leit vil grôzen pîn.
Verse: 10    dô sîn swester diu künegîn

Verse: 11    in begunde vêhen,
Verse: 12    man hôrte in sêre vlêhen.

Verse: 13    dô sprach diu juncvrouwe wert:
Verse: 14    "her Vergulaht, trüege ichz swert

Verse: 15    und wære von gotes gebote ein man,
Verse: 16    daz ich schiltes ammet solde hân,

Verse: 17    iuwer strîten wære hie gar verdaget.
Verse: 18    dô was ich âne wer ein maget,

Verse: 19    wan daz ich truoc doch einen schilt,
Verse: 20    ûf den ist werdekeit gezilt.

Verse: 21    des wâpen sol ich nennen,
Verse: 22    ob ir ruochet diu bekennen:

Verse: 23    guot gebærde und kiuscher site.
Verse: 24    den zweien wont vil stæte mite.

Verse: 25    den bôt ich vür den ritter mîn,
Verse: 26    den ir mir sandet dâ her în:

Verse: 27    anders schermes hete ich niht.
Verse: 28    swâ man iuch nû bî wandel siht,

Verse: 29    ir habet doch an mir missetân,
Verse: 30    ob wîplîch prîs sîn rehte sol hân:




Chapter: 415 
415


Verse: 1    ich hôrte ie sagen, swâz sô gezôch
Verse: 2    daz man gein wîbes scherme vlôch,

Verse: 3    dâ solde ellenthaftez jagen
Verse: 4    an sînem strîte gar verzagen,

Verse: 5    ob dâ wære manlîchiu zuht.
Verse: 6    her Vergulaht, iuwers gastes vluht,

Verse: 7    die er gein mir tet vür den tôt,
Verse: 8    lêrt iuwern prîs noch lasters nôt."

Verse: 9    Kingrimursel dô sprach:
Verse: 10    "herre, ûf iuwern trôst geschach

Verse: 11    daz ich hern Gâwâne
Verse: 12    ûf dem Plimizôles plâne

Verse: 13    gap vride her in iuwer lant.
Verse: 14    iuwer sicherheit was phant,

Verse: 15    ob in sîn ellen trüege her,
Verse: 16    daz ich des vür iuch würde wer,

Verse: 17    in bestüende hie niht wan einec man.
Verse: 18    herre, dâ bin ich bekrenket an.

Verse: 19    hie sehen mîne genôze zuo:
Verse: 20    diz laster ist uns gar ze vruo.

Verse: 21    kunnet ir niht vürsten schônen,
Verse: 22    wir krenken ouch die krônen.

Verse: 23    sol man iuch bî zühten sehen,
Verse: 24    sô muoz des iuwer zuht verjehen

Verse: 25    daz sippe reicht abe iu an mich.
Verse: 26    wære daz ein kebeslîcher slich

Verse: 27    mînhalp, swâ uns diu wirt gezilt,
Verse: 28    ir hetet iuch gâhes an mir bevilt,

Verse: 29    wande ich bin ein ritter doch,
Verse: 30    an dem nie valsch wart vunden noch.




Chapter: 416 
416


Verse: 1    ouch sol mîn prîs erwerben
Verse: 2    daz ichs âne müeze ersterben:

Verse: 3    des ich vil wol getrûwe gote.
Verse: 4    des sî mîn sælde gein im bote.

Verse: 5    ouch swâ diz mære wirt vernomen,
Verse: 6    Artûs swestersun sî komen

Verse: 7    in mînem geleite ûf Schampfanzûn,
Verse: 8    Franzois oder Bertûn,

Verse: 9    Provenzâl oder Burgunjois,
Verse: 10    Galiciâne und die von Punturtois,

Verse: 11    erhœrent die Gâwânes nôt,
Verse: 12    hân ich prîs, derst denne tôt.

Verse: 13    mir vrumt sîn angestlîcher strît
Verse: 14    vil engez lop. mîn laster wît

Verse: 15    daz sol mir vreude swenden
Verse: 16    und mich ûf êren phenden."

Verse: 17    dô disiu rede was getân,
Verse: 18    dô stuont dâ einer sküneges man,

Verse: 19    der was geheizen Liddamus.
Verse: 20    Kîôt in selbe nennet sus.

Verse: 21    Kîôt laschantiure hiez,
Verse: 22    den sîn kunst des niht erliez,

Verse: 23    er ensünge und spræche sô,
Verse: 24    des noch genuoge werdent vrô.

Verse: 25    Kîôt ist ein Provenzâl,
Verse: 26    der dise âventiur von Parzivâl

Verse: 27    heidensch geschriben sach.
Verse: 28    swaz er en franzois dâ von gesprach,

Verse: 29    bin ich niht der witze laz,
Verse: 30    daz sage ich tiuschen vürbaz.




Chapter: 417 
417


Verse: 1    dô sprach der vürste Liddamûs:
Verse: 2    "waz solde der in mîns herren hûs,

Verse: 3    der im sînen vater sluoc
Verse: 4    undz laster im sô nâhe truoc?

Verse: 5    ist mîn herre wert bekant,
Verse: 6    daz richet alhie sîn selbes hant:

Verse: 7    sô gelte ein tôt den andern tôt.
Verse: 8    ich wæne gelîche sîn die nôt."

Verse: 9    nû seht ir wie Gâwân dô stuont:
Verse: 10    alrêst was im grôz angest kunt.

Verse: 11    dô sprach Kingrimursel:
Verse: 12    "swer mit der drô wære sô snel,

Verse: 13    der solde ouch gâhen in den strît.
Verse: 14    ir habet gedrenge oder wît,

Verse: 15    man mac sich iuwer lîhte erwern.
Verse: 16    her Liddamus, vil wol ernern

Verse: 17    trûwe ich vor iu disen man:
Verse: 18    swaz iu der hête getân,

Verse: 19    ir liezetz ungerochen.
Verse: 20    ir habet iuch gar versprochen.

Verse: 21    man sol iu wol gelouben,
Verse: 22    daz iuch nie mannes ougen

Verse: 23    gesâhen ze vorderst dâ man streit:
Verse: 24    iu was ie strîten wol sô leit,

Verse: 25    daz ir der vluht begundet.
Verse: 26    dennoch ir mêr wol kundet:

Verse: 27    swâ man ie gein strîte dranc,
Verse: 28    dâ tætet ir wîbes widerwanc.

Verse: 29    swelh künec sich lât an iuwern rât,
Verse: 30    vil twerhes dem diu krône stât.




Chapter: 418 
418


Verse: 1    dâ wære von mînen handen
Verse: 2    in kreize bestanden

Verse: 3    Gâwân der ellenthafte degen:
Verse: 4    des hete ich mich gein im bewegen,

Verse: 5    daz der kamph wære alhie getân,
Verse: 6    woldes mîn herre gestatet hân.

Verse: 7    der treget mit sünden mînen haz,
Verse: 8    ich trûte im ander dinge baz.

Verse: 9    her Gâwân, lobet mir her vür wâr
Verse: 10    daz ir von hiute über ein jâr

Verse: 11    mir ze gegenrede stêt
Verse: 12    in kamphe, ob ez sô hie ergêt

Verse: 13    daz iu mîn herre læt daz leben:
Verse: 14    dâ wirt iu kamph von mir gegeben.

Verse: 15    ich sprach iuch ane zem Plimizôl:
Verse: 16    nû si der kamph ze Barbigôl

Verse: 17    vor dem künege Meljanze.
Verse: 18    der sorgen zeinem kranze

Verse: 19    trage ich unz ûf daz tegedinc,
Verse: 20    daz ich gein iu kume in den rinc:

Verse: 21    dâ sol mir sorge tuon bekant
Verse: 22    iuwer manlîchiu hant."

Verse: 23    Gâwân der ellens rîche
Verse: 24    bôt gezogenlîche

Verse: 25    nâch dirre bete sicherheit.
Verse: 26    dô was mit rede aldâ bereit

Verse: 27    der herzoge Liddamus,
Verse: 28    begunde ouch sîner rede alsus

Verse: 29    mit spæhelîchen worten.
Verse: 30    aldâ siz alle hôrten,




Chapter: 419 
419


Verse: 1    er sprach, wande im was sprechens zît:
Verse: 2    "swâ ich kume zuo dem strît,

Verse: 3    hân ich dâ vehtens phlihte
Verse: 4    oder vluht mit ungeschihte,

Verse: 5    [bin ich verzagetlîche ein zage
Verse: 6    oder ob ich prîs aldâ bejage,]

Verse: 7    her lantgrâve, des danket ir
Verse: 8    als irz geprüeven kunnet an mir.

Verse: 9    emphâhe ichs nimmer iuwern solt,
Verse: 10    ich bin iedoch mir selben holt."

Verse: 11    sus sprach der rîche Liddamus:
Verse: 12    "welt irz sîn her Turnus,

Verse: 13    sô lât mich sîn her Tranzes
Verse: 14    und strâft mich ob ir wizzet wes

Verse: 15    und enhebet iuch niht ze grôze.
Verse: 16    ob ir vürsten mîner genôze

Verse: 17    der edelste und der rîchste birt,
Verse: 18    ich bin ouch landes herre und landes wirt.

Verse: 19    ich hân in Galîciâ
Verse: 20    beidiu her unde dâ

Verse: 21    manege burc rehte unz an Vedrûn.
Verse: 22    swaz ir und ieslîch Bertûn

Verse: 23    mir dâ ze schaden meget getuon,
Verse: 24    ich engevlœhe nimmer vor iu huon.

Verse: 25    her ist von Bertâne komen
Verse: 26    gein dem ir kamph hât genomen:

Verse: 27    nû rechet herren und den mâc.
Verse: 28    mich sol vermîden iuwer bâc.

Verse: 29    iuwern vetern (ir wârt sîn man),
Verse: 30    swer dem sîn leben ane gewan,




Chapter: 420 
420


Verse: 1    dâ rechetz. ich entet im niht:
Verse: 2    ich wæne mirs ouch iemen giht.

Verse: 3    iuwern vetern sol ich wol verklagen.
Verse: 4    sîn sun die krône nâch im sol tragen:

Verse: 5    derst mir ze herren hôch genuoc.
Verse: 6    diu künegîn Flûrdâmûrs in truoc:

Verse: 7    sîn vater was Kingrisîn,
Verse: 8    sîn ane der künec Gandîn.

Verse: 9    ich wil iuch baz bescheiden des,
Verse: 10    Gahmuret und Gâlôes

Verse: 11    sîne œheime wâren.
Verse: 12    ich enwolde sîn gerne vâren,

Verse: 13    ich möhte mit êren von sîner hant
Verse: 14    mit vanen emphâhen mîn lant.

Verse: 15    swer vehten welle, der tuo daz.
Verse: 16    bin ich gein dem strîte laz,

Verse: 17    ich vreische iedoch diu mære wol.
Verse: 18    swer prîs in dem strîte hol,

Verse: 19    des danken im diu stolzen wîp.
Verse: 20    ich wil durch niemen mînen lîp

Verse: 21    verleiten in ze scharphen pîn.
Verse: 22    waz Wolfhartes solde ich sîn?

Verse: 23    mirst in den strît der wec vergrabet,
Verse: 24    gein vehtene diu gir verhabet.

Verse: 25    würdet ir mirs nimmer holt,
Verse: 26    ich tæte ê als Rûmolt,

Verse: 27    der dem künec Gunther riet,
Verse: 28    dô er von Wormze gein den Hiunen schiet:

Verse: 29    er bat in lange sniten bæn
Verse: 30    und in sînem kezzel umme dræn."




Chapter: 421 
421


Verse: 1    der lantgrâve ellens rîche
Verse: 2    sprach: "ir redet dem gelîche

Verse: 3    als maneger weiz an iu vür wâr
Verse: 4    iuwer zît und iuwer jâr.

Verse: 5    ir râtet mir dar ich wolde iedoch,
Verse: 6    und sprecht, ir tætet als riet ein koch

Verse: 7    den küenen Nibelungen,
Verse: 8    die sich unbetwungen

Verse: 9    ûz huoben dâ man an in rach
Verse: 10    daz Sîvride dâ vor geschach.

Verse: 11    mich muoz her Gâwân slahen tôt
Verse: 12    oder ich gelêre in râche nôt."

Verse: 13    "des volge ich," sprach Liddamus,
Verse: 14    "wan swaz sîn œheim Artus

Verse: 15    hât und die von Indîâ,
Verse: 16    der mirz hie gæbe als siz hant dâ,

Verse: 17    der mirz ledeclîche bræhte,
Verse: 18    ich liezez ê daz ich væhte.

Verse: 19    nû behaldet prîs des man iu giht.
Verse: 20    Segramors enbin ich niht,

Verse: 21    den man durch vehten binden muoz:
Verse: 22    ich erwirbe sus wol küneges gruoz.

Verse: 23    Sibeche nie swert erzôch,
Verse: 24    er was ie bî den dâ man vlôch:

Verse: 25    doch muoste man in vlêhen.
Verse: 26    grôze gebe und starkiu lêhen

Verse: 27    emphienc er von Ermenrîche genuoc:
Verse: 28    nie swert er doch durch helm gesluoc.

Verse: 29    mir wirt verschertet nimmer vel
Verse: 30    durch iuch, her Kingrimursel:




Chapter: 422 
422


Verse: 1    des hân ich mich gein iu bedâht."
Verse: 2    dô sprach der künec Vergulaht:

Verse: 3    "swîget iuwer wehselmære.
Verse: 4    ez ist mir von iu beiden swære,

Verse: 5    daz ir der worte sît sô vrî:
Verse: 6    ich bin iu alze nâhen bî

Verse: 7    ze sus getânem gebrehte.
Verse: 8    ez stêt mir noch iu niht rehte."

Verse: 9    diz was ûf dem palas,
Verse: 10    aldâ sîn swester komen was.

Verse: 11    bî ir stuont her Gâwân
Verse: 12    und manec ander werder man.

Verse: 13    der künec sprach zer swester sîn:
Verse: 14    "nû nim den gesellen dîn

Verse: 15    und ouch den lantgrâven ze dir
Verse: 16    (die mir guotes günnen, die gên mit mir)

Verse: 17    und rât mirz wægest waz ich tuo."
Verse: 18    si sprach: "dâ lege dîn triuwe zuo."

Verse: 19    nû gêt der künec an sînen rât.
Verse: 20    diu künegîn genomen hât

Verse: 21    ir vetern sun und ir gast:
Verse: 22    daz dritte was der sorgen last.

Verse: 23    âne alle missewende
Verse: 24    nam si Gâwânen mit ir hende

Verse: 25    und vuorte in dâ si wolde wesen.
Verse: 26    si sprach zim: "wært ir niht genesen,

Verse: 27    des heten schaden elliu lant."
Verse: 28    an der küneginne hant

Verse: 29    gienc des werden Lôtes sun:
Verse: 30    er mohtez ouch dô vil gerne tuon.




Chapter: 423 
423


Verse: 1    in die kemenâten sân
Verse: 2    gienc diu künegîn und die zwêne man.

Verse: 3    vor den andern beleip si lære
Verse: 4    (des phlâgen kamerære):

Verse: 5    wan klâriu juncvrouwelîn,
Verse: 6    der muoste vil dort inne sîn.

Verse: 7    diu künegîn mit zühten phlac
Verse: 8    Gâwâns, der ir ze herzen lac.

Verse: 9    dâ was der lantgrâve mite:
Verse: 10    der schiet si ninder von dem site,

Verse: 11    doch sorcte vil diu werde maget
Verse: 12    um Gâwâns lîp, wart mir gesaget.

Verse: 13    sus wâren die zwêne dâ inne
Verse: 14    bî der küneginne,

Verse: 15    unz daz der tac liez sînen strît.
Verse: 16    diu naht kom. dô was ezzens zît:

Verse: 17    môraz, wîn, lûtertranc
Verse: 18    brâhten juncvrouwen dâ mitten kranc

Verse: 19    und ander guote spîse,
Verse: 20    vasane, pardrîse,

Verse: 21    guote vische und blankiu wastel.
Verse: 22    Gâwân und Kingrimursel

Verse: 23    wâren komen ûz grôzer nôt.
Verse: 24    sît ez diu künegîn gebôt,

Verse: 25    si âzen als si solden
Verse: 26    und ander dies iht wolden.

Verse: 27    Antikonîe in selbe sneit:
Verse: 28    daz was durch zuht in beiden leit.

Verse: 29    swaz man dâ kniender schenken sach,
Verse: 30    ir deheinem diu hosennestel brach:




Chapter: 424 
424


Verse: 1    ez wâren megede als von der zît,
Verse: 2    den man diu besten jâr noch gît.

Verse: 3    ich bin des unerværet,
Verse: 4    heten si geschæret

Verse: 5    als ein valke sîn gevider:
Verse: 6    dâ rede ich nihit wider.

Verse: 7    nû hœrt wie sich der rât geschiet,
Verse: 8    waz man des landes künege riet.

Verse: 9    die wîsen hete er zim genomen:
Verse: 10    an sînen rât die wâren komen,

Verse: 11    etslîcher sînen willen sprach,
Verse: 12    als im sîn bester sin verjach.

Verse: 13    dô mâzen siz an manege stat:
Verse: 14    der künec sîn rede ouch hœren bat.

Verse: 15    er sprach: "ez wart mit mir gestriten.
Verse: 16    ich kom durch âventiur geriten

Verse: 17    inz fôrest Læhtamrîs.
Verse: 18    ein ritter alze hôhen prîs

Verse: 19    in dirre wochen an mir sach,
Verse: 20    wande er mich vlügelingen stach

Verse: 21    hinderz ors al sunder twâl.
Verse: 22    er twanc mich des, daz ich den grâl

Verse: 23    gelobete im zerwerben.
Verse: 24    solde ich nû drum ersterben,

Verse: 25    sô muoz ich leisten sicherheit
Verse: 26    die sîn hant an mir erstreit.

Verse: 27    dâ râtet umme: des ist nôt.
Verse: 28    mîn bester schilt was vür den tôt

Verse: 29    daz ich dar um bôt mîne hant,
Verse: 30    als iu mit rede ist hie bekant:




Chapter: 425 
425


Verse: 1    erst manheit und ellens hêr.
Verse: 2    der helt gebôt mir dennoch mêr

Verse: 3    daz ich âne arge liste
Verse: 4    inner jâres vriste,

Verse: 5    ob ich des grâles erwürbe niht,
Verse: 6    daz ich ir kœme, der man giht

Verse: 7    der krône ze Pelrapeire
Verse: 8    (ir vater hiez Tampenteire),

Verse: 9    swenne si mîn ouge an sæhe,
Verse: 10    daz ich sicherheit ir jæhe.

Verse: 11    er enbôt ir, ob si dæhte an in,
Verse: 12    daz wære an vreuden sîn gewin

Verse: 13    und er wærez der si lôsteê
Verse: 14    von dem künege Clâmidê."

Verse: 15    dô si die rede erhôrten sus,
Verse: 16    dô sprach aber Liddamus:

Verse: 17    "mit dirre herren urloube ich nuo
Verse: 18    spriche: ouch râten si dar zuo.

Verse: 19    swes iuch dort twanc der eine man,
Verse: 20    des sî hie phant her Gâwân:

Verse: 21    der vederslaget ûf iuwern kloben.
Verse: 22    bitet in iu vor uns allen loben

Verse: 23    daz er iu den grâl gewinne.
Verse: 24    lât in mit guoter minne

Verse: 25    von iu hinnen rîten
Verse: 26    und nâch dem grâle strîten.

Verse: 27    die schame wir alle müesten klagen,
Verse: 28    würde er in iuwerm hûs erslagen.

Verse: 29    nû vergebet im sîne schulde
Verse: 30    durch iuwer swester hulde.




Chapter: 426 
426


Verse: 1    er hât hie erliten grôze nôt
Verse: 2    und er muoz nû kêren in den tôt.

Verse: 3    swaz erden hât umslagen zmer,
Verse: 4    dâ engelac nie hûs sô wol ze wer

Verse: 5    als Munsalvæsche: swâ diu stêt,
Verse: 6    von strîte rûher wec dar gêt.

Verse: 7    bî sînem gemach in hînte lât:
Verse: 8    morgen sage man im den rât."

Verse: 9    des volcten al die râtgeben.
Verse: 10    sus behielt her Gâwân dâ sîn leben.

Verse: 11    man phlac des heldes unverzaget
Verse: 12    des nahtes aldâ, wart mir gesaget,

Verse: 13    daz harte guot was sîn gemach.
Verse: 14    dô man den mitten morgen sach

Verse: 15    und dô man messe gesanc,
Verse: 16    ûf dem palase was grôz gedranc

Verse: 17    von bovel und von werder diet.
Verse: 18    der künec tet als man im riet:

Verse: 19    er hiez Gâwânen bringen.
Verse: 20    den wolde er nihtes twingen,

Verse: 21    wan als ir selbe hât gehôrt.
Verse: 22    nû seht wâ in brâhte dort

Verse: 23    Antikonîe diu wol gevar:
Verse: 24    ir vetern sun kom mit ir dar

Verse: 25    und ander genuoge sküneges man.
Verse: 26    diu künegîn vuorte Gâwân

Verse: 27    vür den künec an ir hende.
Verse: 28    ein schapel was ir gebende.

Verse: 29    ir munt den bluomen nam ir prîs:
Verse: 30    ûf dem schapel deheinen wîs




Chapter: 427 
427


Verse: 1    stuont ninder deheiniu alsô rôt.
Verse: 2    swem si güetlîche ir küssen bôt,

Verse: 3    des muoste swenden sich der walt
Verse: 4    mit maneger tjost ungezalt.

Verse: 5    mit lobe wir solden grüezen
Verse: 6    die kiuschen und die süezen

Verse: 7    vroun Antikonîen,
Verse: 8    vor valscheit die vrîen,

Verse: 9    wan si lebete in solhen siten,
Verse: 10    daz ninder was underriten

Verse: 11    ir prîs mit valschen worten.
Verse: 12    alle die ir prîs gehôrten k,

Verse: 13    ieslîch munt ir wunschte dô
Verse: 14    daz ir prîs bestüende alsô

Verse: 15    bewart vor valscher trüeben jehe.
Verse: 16    lûter virrec als ein valkensehe

Verse: 17    was balsemmæzec stæte an ir.
Verse: 18    daz riet ir werdeclîchiu gir.

Verse: 19    diu süeze sælden rîche
Verse: 20    sprach gezogenlîche:

Verse: 21    "bruoder, hie bringe ich den degen,
Verse: 22    des dû mich selbe hieze phlegen.

Verse: 23    nû lâz in mîn geniezen.
Verse: 24    des ensol dich niht verdriezen:

Verse: 25    denke an bruoderlîche triuwe
Verse: 26    und tuo daz âne riuwe.

Verse: 27    dir stêt manlîchiu triuwe baz,
Verse: 28    dan daz dû dols der werlde haz

Verse: 29    und mînen, kunde ich hazzen:
Verse: 30    den lêre mich gein dir mâzen."




Chapter: 428 
428


Verse: 1    dô sprach der werde süeze man:
Verse: 2    "daz tuon ich, swester, ob ich kan:

Verse: 3    dar zuo gip selbe dînen rât.
Verse: 4    dich dunket daz mir missetât

Verse: 5    werdekeit habe underswungen,
Verse: 6    von prîse mich gedrungen:

Verse: 7    waz töhte ich dan ze bruoder dir?
Verse: 8    wan dienden alle krône mir,

Verse: 9    der stüende ich abe durch dîn gebot:
Verse: 10    dîn hazzen wære mîn hœstiu nôt.

Verse: 11    mirst unmære vreude und êre,
Verse: 12    niht wan nâch dîner lêre.

Verse: 13    her Gâwân, ich wil iuch des biten:
Verse: 14    ir kômt durch prîs dâ her geriten,

Verse: 15    nû tuotz durch prîses hulde,
Verse: 16    helft mir daz mîne schulde

Verse: 17    mîn swester ûf mich verkiese.
Verse: 18    ê daz ich si verliese,

Verse: 19    ich verkiuse ûf iuch mîn herzeleit,
Verse: 20    welt ir mir geben sicherheit

Verse: 21    daz ir mir werbet sunder twâl
Verse: 22    mit guoten triuwen um den grâl."

Verse: 23    dâ wart diu suone gendet
Verse: 24    und Gâwân gesendet

Verse: 25    an dem selben mâle
Verse: 26    durch strîten nâch dem grâle.

Verse: 27    Kingrimursel ouch verkôs
Verse: 28    ûf den künec, der in dâ vor verlôs,

Verse: 29    daz er im sîn geleite brach.
Verse: 30    vor al den vürsten daz geschach,




Chapter: 429 
429


Verse: 1    dâ ir swert wâren gehangen.
Verse: 2    diu wâren in undergangen,

Verse: 3    Gâwâns knappen, an sstrîtes stunt,
Verse: 4    daz ir deheiner worden wunt:

Verse: 5    ein gewaldec man vor der stat
Verse: 6    in vrides vor den andern bat.

Verse: 7    der vienc si und legete si in prisûn.
Verse: 8    ez wære Franzeis oder Bertûn,

Verse: 9    starke knappen und kleiniu kint,
Verse: 10    von swelhen landen si komen sint,

Verse: 11    die brâhte man dô ledeclîchen
Verse: 12    Gâwâne dem ellens rîchen.

Verse: 13    dô in diu kint ersâhen,
Verse: 14    dâ wart grôz ummevâhen.

Verse: 15    ieslîchez sich weinde an in hienc:
Verse: 16    daz weinen iedoch von liebe ergienc.

Verse: 17    von Curnewâls mit im dâ was
Verse: 18    cons Lâîz fîz Tînas.

Verse: 19    ein edel kint wonte im ouch bî,
Verse: 20    duc Gandilûz fîz Gurzgrî

Verse: 21    der durch Schoydelakurt den lîp verlôs,
Verse: 22    dâ manec vrouwe ir jâmer kôs.

Verse: 23    Lîâze was des kindes base.
Verse: 24    sîn munt, sîn ougen und sîn nase

Verse: 25    was rehte der minne kerne:
Verse: 26    al diu werlt sach in gerne.

Verse: 27    dar zuo sehs ander kindelîn.
Verse: 28    dise ehte juncherren sîn

Verse: 29    wâren gebürte des bewart,
Verse: 30    elliu von edeler hôhen art,




Chapter: 430 
430


Verse: 1    si wâren im durch sippe holt
Verse: 2    und dienden im ûf sînen solt.

Verse: 3    werdekeit gap er ze lône
Verse: 4    und phlac ir anders schône.

Verse: 5    Gâwân sprach zen kindelîn:
Verse: 6    "wol iu, süezen mâge mîn!

Verse: 7    mich dunket des, ir woldet mich klagen,
Verse: 8    ob ich wære alhie erslagen."

Verse: 9    man mohte in klage trûwen wol:
Verse: 10    si wâren halt sus in jâmers dol.

Verse: 11    er sprach: "mir was um iuch vil leit.
Verse: 12    wâ wâret ir dô man mit mir streit?"

Verse: 13    si sagetenz im, ir keiner louc:
Verse: 14    "ein mûzersprinzelîn entvlouc

Verse: 15    uns, dô ir bî der künegin
Verse: 16    sâzet: dâ liefe wir elliu hin,

Verse: 17    die dâ stuonden unde sâzen."
Verse: 18    die merkens niht vergâzen,

Verse: 19    die pruovten daz her Gâwân
Verse: 20    wære ein manlîch hövesch man.

Verse: 21    urloubes er dô gerte,
Verse: 22    des in der künec gewerte

Verse: 23    und daz volc al gemeine,
Verse: 24    wan der lantgrâve al eine.

Verse: 25    die zwêne nam diu künegîn
Verse: 26    und Gâwâns juncherrelîn:

Verse: 27    si vuorte si dâ ir phlâgen
Verse: 28    juncvrouwen âne bâgen.

Verse: 29    dô nam ir wol mit zühten war
Verse: 30    manec juncvrouwe wol gevar.




Chapter: 431 
431


Verse: 1    dô Gâwân enbizzen was
Verse: 2    (ich sage iu als Kîôt las),

Verse: 3    durch herzenlîche triuwe
Verse: 4    huop sich dâ grôziu riuwe.

Verse: 5    er sprach zer küneginne:
Verse: 6    "vrouwe, hân ich sinne

Verse: 7    und sol mir got den lîp bewarn,
Verse: 8    sô muoz ihc dienestlîchez varn

Verse: 9    und ritterlîch gemüete
Verse: 10    iuwer wîplîchen güete

Verse: 11    ze dieneste immer kêren,
Verse: 12    wande iuch kan sælde lêren,

Verse: 13    daz ir habet valsche ane gesiget.
Verse: 14    iuwer prîs vür alle prîse wiget:

Verse: 15    gelücke iuch müeze sælden wern.
Verse: 16    vrouwe, ich wil urloubes gern:

Verse: 17    den gebet mir und lât mich varn.
Verse: 18    iuwer zuht müeze iuwern prîs bewarn."

Verse: 19    ir was sîn dan scheiden leit:
Verse: 20    dô weinden durch gesellekeit

Verse: 21    mit ir manec juncvrouwe klâr.
Verse: 22    diu künegîn sprach âne allen vâr:

Verse: 23    "hetet ir mîn genozzen mêr,
Verse: 24    mîn vreude wære gein sorgen hêr:

Verse: 25    nû mohte iuwer vride niht bezzer sîn.
Verse: 26    des geloupt aber, swenne ir lîdet pîn,

Verse: 27    ob iuch vertreget ritterschaft
Verse: 28    in riuwebæren kummers kraft,

Verse: 29    sô wizzet, mîn her Gâwân,
Verse: 30    des sol mîn herze phlihte hân




Chapter: 432 
432


Verse: 1    ze vlüste oder ze gewinne."
Verse: 2    diu edel küneginne

Verse: 3    kuste den Gâwânes munt.
Verse: 4    der wart an vreuden ungesunt,

Verse: 5    daz er sô gâhes von ir reit.
Verse: 6    ich wæne ez was in beiden leit.

Verse: 7    sîne knappen heten sich bedâht,
Verse: 8    daz sîniu ors wâren brâht

Verse: 9    ûf den hof vür den palas,
Verse: 10    aldâ der linden schate was.

Verse: 11    ouch wâren dem lantgrâven komen
Verse: 12    sîne gesellen (sus hân ichz vernomen):

Verse: 13    der reit mit im ûz vür die stat.
Verse: 14    Gâwân in zühteclîchen bat,

Verse: 15    daz er sich arbeite
Verse: 16    und sîn gezoc im leite

Verse: 17    ze Bêârosche. "dâst Scherules:
Verse: 18    den suln si selbe biten des,

Verse: 19    geleites ze Dîanazdrûn.
Verse: 20    dâ wont etslîch Bertûn,

Verse: 21    der si bringet an den herren mîn
Verse: 22    oder an Ginovêren die künegîn."

Verse: 23    daz lobete im Kingrimursel.
Verse: 24    urloup nam der degen snel:

Verse: 25    Gringuljete wart gewâpent sân,
Verse: 26    daz ors, und mîn her Gâwân.

Verse: 27    er kuste sîne mâge diu kindelîn
Verse: 28    und ouch die werden knappen sîn.

Verse: 29    nâch dem grâle im sicherheit gebôt:
Verse: 30    er reit al eine gein wunders nôt.




Chapter: 433 
433


Verse: 1    "Tuot ûf." "wem? wer sît ir?"
Verse: 2    "ich wil inz herze dîn ze dir."

Verse: 3    "sô gert ir zengem rûme."
Verse: 4    "waz denne? belîbe ich kûme,

Verse: 5    mîn dringen soltû selten klagen:
Verse: 6    ich wil dir nû von wunder sagen."

Verse: 7    "jâ sît irz, vrou Aventiure?
Verse: 8    wie vert der gehiure?

Verse: 9    ich meine den werden Parzivâl.
Verse: 10    den Cundrîe nâch dem grâl

Verse: 11    mit unsüezen worten jagete,
Verse: 12    dâ manec vrouwe klagete

Verse: 13    daz niht wendec wart sîn reise,
Verse: 14    von Artûse dem Berteneise

Verse: 15    huop er sich dô: wie vert er nuo?
Verse: 16    den selben mæren grîfet zuo,

Verse: 17    ob er an vreuden sî verzaget,
Verse: 18    oder hât er hôhen prîs bejaget?

Verse: 19    oder ob sîn ganziu werdekeit
Verse: 20    sî beidiu lanc unde breit,

Verse: 21    oder ist si kurz oder smal?
Verse: 22    nû prüevet uns die selben zal,

Verse: 23    waz von sînen henden sî geschehen.
Verse: 24    hât er Munsalvæsche sît gesehen

Verse: 25    und den süezen Anfortas?
Verse: 26    des herze dô vil siufzec was,

Verse: 27    durch iuwer güete gebet uns trôst,
Verse: 28    ob der von jâmer sî erlôst.

Verse: 29    lât hœren uns diu mære,
Verse: 30    ob Parzivâl dâ wære,




Chapter: 434 
434


Verse: 1    beidiu iuwer herre und ouch der mîn.
Verse: 2    nû erliuhtet mir die vuore sîn,

Verse: 3    der süezen Herzeloiden barn:
Verse: 4    wie hât Gahmuretes sun gevarn,

Verse: 5    sît er von Artûse reit?
Verse: 6    ob er liep oder herzeleit

Verse: 7    sît habe bezalt an strîte.
Verse: 8    habet er sich an die wîte

Verse: 9    oder hât er sider sich verlegen?
Verse: 10    saget mir sîn site und al sîn phlegen."

Verse: 11    Nû tuot uns diu âventiure bekant,
Verse: 12    er habe erstrichen manec lant

Verse: 13    zorse und in schiffen ûf dem wâc,
Verse: 14    ez wære lantman oder mâc,

Verse: 15    der tjoste poinder gein im maz,
Verse: 16    daz der deheiner nie gesaz.

Verse: 17    sus kan sîn wâge seigen
Verse: 18    sîn selbes prîs ûf steigen

Verse: 19    und die andern lêren sîgen.
Verse: 20    in manegen herten wîgen

Verse: 21    hât er sich schumfentiure erwert,
Verse: 22    den lîp gein strît alsô gezert,

Verse: 23    swer prîs zeim wolde borgen,
Verse: 24    der müestez tuon mit sorgen.

Verse: 25    sîn swert, daz im Anfortas
Verse: 26    gap dô er bî dem grâle was,

Verse: 27    brast sît dô er bestanden wart:
Verse: 28    dô machtez ganz des brunnen art

Verse: 29    bî Karnant, der dâ heizet Lac.
Verse: 30    daz swert gehalf im prîses bejac:




Chapter: 435 
435


Verse: 1    swerz niht geloupt, der sündet.
Verse: 2    diu âventiure uns kündet

Verse: 3    daz Parzivâl der degen balt
Verse: 4    kom geriten ûf einen walt,

Verse: 5    ich enweiz ze welhen stunden,
Verse: 6    aldâ sîn ougen vunden

Verse: 7    eine klôsen niuwes bûwes stên,
Verse: 8    dâ durch einen snellen brunnen gên:

Verse: 9    einhalp si drüber was geworht.
Verse: 10    der junge degen unervorht

Verse: 11    reit durch âventiur ze versuochen.
Verse: 12    sîn wolde got dô ruochen:

Verse: 13    er vant eine klôsenærinne,
Verse: 14    diu durch die gotes minne

Verse: 15    ir magetuom und ir vreude gap.
Verse: 16    wîplîcher sorgen urhap

Verse: 17    ûz ir herzen blüete alniuwe
Verse: 18    und doch durch alde triuwe.

Verse: 19    Schîanatulander
Verse: 20    und Sigûnen dâ vander:

Verse: 21    der helt lac dinne begraben tôt,
Verse: 22    ir leben leit ûf dem sarke nôt.

Verse: 23    Sigûne doschesse
Verse: 24    hôrte selten messe:

Verse: 25    ir leben was doch ein venje gar.
Verse: 26    ir dicker munt was rôt gevar

Verse: 27    was dô erblichen unde bleich.
Verse: 28    sît werltlîch vreude ir gar gesweich,

Verse: 29    ez erleit nie maget sô hôhen pîn:
Verse: 30    durch klage si muoz al eine sîn.




Chapter: 436 
436


Verse: 1    durch minne diu an im erstarp,
Verse: 2    daz si der vürste niht erwarp,

Verse: 3    si minnete sînen tôten lîp.
Verse: 4    ob si worden wære sîn wîp,

Verse: 5    dâ hete sich vrou Lûnete
Verse: 6    gesûmet an sô gæher bete

Verse: 7    als si riet ir selber vrouwen:
Verse: 8    man mac doch dicke schouwen

Verse: 9    vroun Lûneten rîten zuo
Verse: 10    etslîchem râte gar ze vruo.

Verse: 11    swelh wîp nû durch geselleschaft
Verse: 12    unde durch ir zühte kraft

Verse: 13    phlihte verbirt an vremder minne,
Verse: 14    als ich michs versinne,

Verse: 15    læt siz bî ir mannes leben,
Verse: 16    dem wart an ir der wunsch gegeben.

Verse: 17    dehein beiten stêt ir alsô wol:
Verse: 18    daz erziuge ich ob ich sol.

Verse: 19    dar nâch tuo als siz lêre:
Verse: 20    behelt si dennoch êre,

Verse: 21    si entreget deheinen sô liehten kranz,
Verse: 22    gêt si durch vreude an den tanz.

Verse: 23    wes mizze ich vreude gein der nôt,
Verse: 24    als Sigûnen ir triuwe gebôt?

Verse: 25    daz möhte ich gerne lâzen.
Verse: 26    über ronen âne strâzen

Verse: 27    Parzivâl vürz venster reit
Verse: 28    alze nâhe: daz was im leit.

Verse: 29    dô wolde er vrâgen um den walt
Verse: 30    oder war sîn reise wære gezalt.




Chapter: 437 
437


Verse: 1    er vrâcte der gegenrede aldâ:
Verse: 2    "ist iemen dinne?" si sprach: "jâ."

Verse: 3    dô er hôrte daz ez vrouwen stimme was,
Verse: 4    her dan ûf ungetretet gras

Verse: 5    warf erz ors vil drâte.
Verse: 6    ez dûhte in alze spâte,

Verse: 7    daz er niht was erbeizet ê.
Verse: 8    diu selbe schame tet im wê.

Verse: 9    er bant daz ors vil vaste
Verse: 10    zeins gevallen ronen aste,

Verse: 11    sînen dürkeln schilt hienc er ouch dran.
Verse: 12    dô der kiusche vrevel man

Verse: 13    durch zuht sîn swert von im gebant,
Verse: 14    er gienc vürz venster zuo der want:

Verse: 15    dâ wolde er vrâgen mære.
Verse: 16    diu klôse was vreuden lære,

Verse: 17    dar zuo aller schimphe blôz:
Verse: 18    er vant dâ niht wan jâmer grôz.

Verse: 19    er gerte ir anz venster dar.
Verse: 20    diu juncvrouwe bleich gevar

Verse: 21    mit zuht ûf von ir venje stuont.
Verse: 22    dennoch was im harte unkunt

Verse: 23    wer si wære oder möhte sîn.
Verse: 24    si truoc ein hemde hærîn

Verse: 25    under grâwem rocke zenæst ir hût.
Verse: 26    grôz jâmer was ir sundertrût:

Verse: 27    der hete ir hôhen muot geleget,
Verse: 28    von dem herzen siufzens vil erweget.

Verse: 29    mit zuht diu maget zem venster gienc,
Verse: 30    mit süezen worten si in emphienc.




Chapter: 438 
438


Verse: 1    si truoc einen salter in der hant:
Verse: 2    Parzivâl der wîgant

Verse: 3    ein kleinez vingerlîn dâ kôs,
Verse: 4    daz si durch arbeit nie verlôs,

Verse: 5    si enbehieldez durch rehter minne rât.
Verse: 6    daz steinlîn was ein grânât,

Verse: 7    des blic gap ûz der vinster schîn
Verse: 8    als ein ander gensterlîn.

Verse: 9    senlîch was ir gebende.
Verse: 10    "dâ ûzen bî der wende,"

Verse: 11    sprach si, "herre, dâ stêt ein banc:
Verse: 12    ruocht sitzen, lêrez iuch iuwer gedanc

Verse: 13    und ander unmuoze.
Verse: 14    daz ich her ziuwerm gruoze

Verse: 15    bin komen, daz vergelde iu got:
Verse: 16    der gilt getriulîchen urbot."

Verse: 17    der helt ir râtes niht vergaz,
Verse: 18    vür daz venster er dô saz:

Verse: 19    er bat ouch dinne sitzen sie.
Verse: 20    si sprach: "nû hân ich selten hie

Verse: 21    gesezzen bî deheinem man."
Verse: 22    der helt si vrâgen began

Verse: 23    um ir site und um ir phlege:
Verse: 24    "daz ir sô verre von dem wege

Verse: 25    sitzet in dirre wilde.
Verse: 26    ich hânz vür unbilde,

Verse: 27    vrouwe, wes ir ich begêt,
Verse: 28    sît hie niht bûwes um iuch stêt."

Verse: 29    si sprach: "dâ kumt mir von dem grâl
Verse: 30    mîn spîse dâ her al sunder twâl.




Chapter: 439 
439


Verse: 1    Cundrîe la surziere
Verse: 2    mir dannen bringet schiere

Verse: 3    alle samztage naht
Verse: 4    mîn spîse (des hât si sich bedâht),

Verse: 5    die ich ganze wochen haben sol."
Verse: 6    si sprach: "wære mir anders wol,

Verse: 7    ich sorcte wênec um die nar:
Verse: 8    der bin ich bereitet gar."

Verse: 9    dô wânde Parzivâl, si lüge
Verse: 10    und daz si in anders gerne trüge.

Verse: 11    er sprach in schimphe zir dar în:
Verse: 12    "durch wen traget ir daz vingerlîn?

Verse: 13    ich hôrte ie sagen mære,
Verse: 14    klôsenærinne und klôsenære

Verse: 15    die solden mîden âmûrschaft."
Verse: 16    si sprach: "hete iuwer rede kraft,

Verse: 17    ir woldet mich velschen gerne.
Verse: 18    swenne ich nû valsch gelerne,

Verse: 19    sô hebet mir in ûf, sît ir dâ bî.
Verse: 20    ruochts got, ich bin vor valsche vrî:

Verse: 21    ich enkan deheinen widersaz."
Verse: 22    si sprach: "disen mehelschaz

Verse: 23    trage ich durch einen lieben man,
Verse: 24    des minne ich nie an mich gewan

Verse: 25    mit menneschlîcher tæte:
Verse: 26    magetuomlîches herzen ræte

Verse: 27    mir gein im râtent minne."
Verse: 28    si sprach: "den hân ich hinne.

Verse: 29    des kleinœte ich sider truoc,
Verse: 30    sît Orilus tjost in sluoc,




Chapter: 440 
440


Verse: 1    mîner jæmerlîchen zîte jâr
Verse: 2    wil ich im minne geben vür wâr.

Verse: 3    der rehten minne ich bin sîn wer,
Verse: 4    wande er mit schilte und ouch mit sper

Verse: 5    dâ nâch mit ritters handen warp,
Verse: 6    unz er in mînem dienste erstarp.

Verse: 7    magetuom ich ledeclîche hân:
Verse: 8    er ist iedoch vor gote mîn man.

Verse: 9    ob gedanke würken suln diu werc,
Verse: 10    sô trage ich ninder den geberc

Verse: 11    der underswinge mir mîn ê.
Verse: 12    mînem leben tet sîn sterben wê.

Verse: 13    der rehten ê diz vingerlîn
Verse: 14    vür got sol mîn geleite sîn.

Verse: 15    daz ist ob mîner triuwe ein slôz,
Verse: 16    von dem herzen mîner ougen vlôz.

Verse: 17    ich bin hinne selbander:
Verse: 18    Schîanatulander

Verse: 19    ist daz eine, daz ander ich."
Verse: 20    Parzivâl verstuont dô sich

Verse: 21    daz ez Sigûne wære:
Verse: 22    ir kummer was im swære.

Verse: 23    den helt dô wênec des verdrôz,
Verse: 24    von dem hersenier daz houbet blôz

Verse: 25    er machte ê daz er gein ir sprach.
Verse: 26    diu juncvrouwe an im ersach

Verse: 27    durch îsers râm vil liehtez vel:
Verse: 28    dô erkande si den degen snel.

Verse: 29    si sprach: "ir sîtz her Parzivâl.
Verse: 30    saget an, wie stêtz iu um den grâl?




Chapter: 441 
441


Verse: 1    habet ir geprüevet noch sînen art
Verse: 2    oder wiest bewendet iuwer vart?"

Verse: 3    er sprach zer megede wol geborn:
Verse: 4    "dâ hân ich vreude vil verlorn.

Verse: 5    der grâl mir sorgen gît genuoc.
Verse: 6    ich liez ein lant dâ ich krône truoc,

Verse: 7    dar zuo daz minneclîchste wîp:
Verse: 8    ûf erde nie sô schœner lîp

Verse: 9    wart geborn von menneschlîcher vruht.
Verse: 10    ich sene mich nâch ir kiuschen zuht,

Verse: 11    nâch ir minne ich trûre vil
Verse: 12    und mêr nâch dem hôhen zil,

Verse: 13    wiech Munsalvæsche mege gesehen
Verse: 14    und den grâl: daz ist noch ungeschehen.

Verse: 15    niftel Sigûne, dû tuos gewalt,
Verse: 16    sît dû mînen kummer manecvalt

Verse: 17    erkennes, daz dû vêhes mich."
Verse: 18    diu maget sprach: "al mîn gerich

Verse: 19    sol ûf dich, neve, sîn verkorn.
Verse: 20    dû hâs doch vreuden vil verlorn,

Verse: 21    sît dû lieze dich betrâgen
Verse: 22    um daz werdeclîche vrâgen

Verse: 23    und dô der süeze Anfortas
Verse: 24    dîn wirt und dîn gelücke was.

Verse: 25    dâ hete dir vrâgen wunsch gejaget:
Verse: 26    nû muoz dîn vreude sîn verzaget

Verse: 27    und al dîn hôher muot erlemt.
Verse: 28    dîn herze sorge hât gezemt,

Verse: 29    diu dir vil wilde wære,
Verse: 30    hetes gevrâget dû der mære."




Chapter: 442 
442


Verse: 1    "ich warp als der schaden hât"
Verse: 2    sprach er: "liebiu niftel, gip mir rât.

Verse: 3    gedenke rehter sippe an mir
Verse: 4    und sage mir ouch, wie stêt ez dir?

Verse: 5    ich solde trûren um dîne klage,
Verse: 6    wan daz ich hœhern kummer trage

Verse: 7    dan ie man getrüege.
Verse: 8    mîn nôt ist zungevüege."

Verse: 9    si sprach: "nû helfe dir des hant,
Verse: 10    dem aller kummer ist bekant,

Verse: 11    ob dir sô wol gelinge,
Verse: 12    daz dich ein slâ dar bringe,

Verse: 13    aldâ dû Munsalvæsche sihs.
Verse: 14    dâ dû mir dîner vreuden gihs,

Verse: 15    Cundrîe la surziere reit
Verse: 16    vil niulîch hinnen, mir ist leit,

Verse: 17    daz ich niht vrâcte ob si dar
Verse: 18    wolde kêren oder anderswar.

Verse: 19    immer swenne si kumt, ir mûl dort stêt,
Verse: 20    dâ der brunne ûz dem velse gêt.

Verse: 21    ich râte daz dû ir rîtes nâch:
Verse: 22    irst lîhte vor dir niht sô gâch,

Verse: 23    dû enmüges si schiere hân erriten."
Verse: 24    dâ enwart niht langer dô gebiten,

Verse: 25    urloup nam der helt aldâ.
Verse: 26    dô kêrte er ûf die niuwen slâ:

Verse: 27    Cundrîen mûl die reise gienc.
Verse: 28    daz ungeverte im undervienc

Verse: 29    ein slâ die er hete erkorn.
Verse: 30    sus wart aber den grâl verlorn:




Chapter: 443 
443


Verse: 1    al sîner vreude er dô vergaz.
Verse: 2    ich wæne er hete gevrâget baz

Verse: 3    wære er ze Munsalvæsche komen,
Verse: 4    dan als ir ê hât vernomen.

Verse: 5    nû lât in rîten: war sol er?
Verse: 6    dort gein im kom geriten her

Verse: 7    ein man, dem waz daz houbet blôz,
Verse: 8    sîn wâpenroc von koste grôz,

Verse: 9    dar under zharnas blanc gevar.
Verse: 10    ânez houbet was er gewâpent gar.

Verse: 11    gein Parzivâle er vaste reit.
Verse: 12    dô sprach er: "herre, mir ist leit

Verse: 13    daz ir mîns herren walt sus bant.
Verse: 14    ir werdet schiere drum ermant,

Verse: 15    dâ von sich iuwer gemüete sent.
Verse: 16    Munsalvæsche ist niht gewent

Verse: 17    daz iemen ir sô nâhe rite,
Verse: 18    ez enwære der angestlîche strite

Verse: 19    oder der alsolhen wandel bôt,
Verse: 20    als man vor dem walde heizet tôt."

Verse: 21    einen helm er in der hende
Verse: 22    vuorte, des gebende

Verse: 23    wâren snüere sîdîn,
Verse: 24    und eine scharphe glævîn,

Verse: 25    dar inne al niuwe was der schaft.
Verse: 26    der helt bant mit zornes kraft

Verse: 27    den helm ûfz houbet ebene.
Verse: 28    ez enstuont in niht vergebene

Verse: 29    an den selben zîten
Verse: 30    sîn dreun und ouch sîn strîten:




Chapter: 444 
444


Verse: 1    iedoch bereite er sich zer tjost.
Verse: 2    Parzivâl mit solher kost

Verse: 3    hete ouch sper vil verzert.
Verse: 4    er dâhte: "ich wære unernert,

Verse: 5    rite ich über dises mannes sât:
Verse: 6    wie würde dan sîns zornes rât?

Verse: 7    nû trite ich hie den wilden varm.
Verse: 8    mir engeswîchen hende, ieweder arm,

Verse: 9    ich gibe vür mîne reise ein phant,
Verse: 10    daz ninder bindet mich sîn hant."

Verse: 11    daz wart ze beider sît getân,
Verse: 12    diu ors in den walap verlân,

Verse: 13    mit sporn getriben und ouch gevuort
Verse: 14    vaste ûf der rabîne hurt:

Verse: 15    ir enweders tjost dâ misseriet.
Verse: 16    maneger tjost ein gegenniet

Verse: 17    was Parzivâles hôhiu brust:
Verse: 18    den lêrte kunst und sîn gelust

Verse: 19    daz sîn tjost als ebene vuor
Verse: 20    rehte in den stric der helmsnuor.

Verse: 21    er traf in dâ man hæht den schilt,
Verse: 22    sô man ritterschefte spilt,

Verse: 23    daz von Munsalvæsche der templeis
Verse: 24    von dem orse in eine halden reis

Verse: 25    sô verre hin abe (diu was sô tief),
Verse: 26    daz dâ sîn leger wênec slief.

Verse: 27    Parzivâl der tjoste nâch
Verse: 28    volcte. dem orse was ze gâch:

Verse: 29    ez viel hin abe, daz ez gar zebrast.
Verse: 30    Parzivâl eins zêders ast




Chapter: 445 
445


Verse: 1    begreif mit sînen handen.
Verse: 2    nû jehts im niht ze schanden,

Verse: 3    daz er sich âne schergen hienc.
Verse: 4    mit den vuozen er gevienc

Verse: 5    under im des velses herte
Verse: 6    in grôzem ungeverte

Verse: 7    lac daz ors dort niden tôt.
Verse: 8    der ritter gâhte von der nôt

Verse: 9    anderhalben ûf die halden hin:
Verse: 10    wolde er teilen den gewin

Verse: 11    den er erwarp an Parzivâl,
Verse: 12    sô half im baz dâ heime der grâl.

Verse: 13    Parzivâl her wider steic.
Verse: 14    der zügel gein der erden seic:

Verse: 15    dâ hetez ors durch getreten,
Verse: 16    als ob ez bîtens wære gebeten,

Verse: 17    des jener ritter dâ vergaz.
Verse: 18    dô Parzivâl dar ûf gesaz,

Verse: 19    dô enwas niht wan sîn sper verlorn:
Verse: 20    diu vlust gein vinden was erkorn.

Verse: 21    ich wæne, der starke Lehelîn
Verse: 22    noch der stolze Kingrisîn

Verse: 23    noch rois Gramoflanz
Verse: 24    noch cons Laschoit fîz Gurnemanz

Verse: 25    nie bezzer tjost geriten,
Verse: 26    dan als diz ors wart erstriten.

Verse: 27    dô reit er, er enwesse selbe war,
Verse: 28    sô daz diu Munsalvæscher schar

Verse: 29    in mit strîte gar vermeit.
Verse: 30    des grâles vremde was im leit.




Chapter: 446 
446


Verse: 1    swerz ruocht vernemen, dem tuon ich kunt
Verse: 2    wie im sîn dinc dâ nâch gestuont.

Verse: 3    des enprüeve ich niht der wochen zal,
Verse: 4    über wie lanc sider Parzivâl

Verse: 5    reit durch âventiure als ê.
Verse: 6    eins morgens was ein dünner snê,

Verse: 7    iedoch sô dicke wol gesnît,
Verse: 8    als der noch vrost den liuten gît.

Verse: 9    ez was ûf einem grôzen walt.
Verse: 10    im widergienc ein ritter alt,

Verse: 11    des bart al grâ was gevar,
Verse: 12    dâ bî sîn vel lieht und klâr:

Verse: 13    die selben varwe truoc sîn wîp.
Verse: 14    diu beidiu über blôzen lîp

Verse: 15    truogen grâwe röcke herte
Verse: 16    ûf ir bîhte verte.

Verse: 17    sîniu kint, zwuo juncvrouwen,
Verse: 18    die man gerne mohte schouwen,

Verse: 19    dâ giengen in der selben wât.
Verse: 20    daz riet in kiusches herzen rât,

Verse: 21    si giengen alle barvuoz.
Verse: 22    Parzivâl bôt sînen gruoz

Verse: 23    dem grâwen ritter der dâ gienc.
Verse: 24    von des râte er sît gelücke emphienc,

Verse: 25    ez mohte wol ein herre sîn.
Verse: 26    dâ liefen vrouwen breckelîn.

Verse: 27    mit senften siten niht ze hêr
Verse: 28    gienc dâ ritter und knappen mêr

Verse: 29    mit zühten ûf der gotes vart,
Verse: 30    genuoge sô junc, gar âne bart.




Chapter: 447 
447


Verse: 1    Parzivâl der werde degen
Verse: 2    hete des lîbes sô gephlegen,

Verse: 3    daz sîn zimierde rîche
Verse: 4    stuont gar ritterlîche:

Verse: 5    in solhem harnas er reit,
Verse: 6    dem ungelîch was jeniu kleit

Verse: 7    diu gein im truoc der grâwe man.
Verse: 8    daz ors ûz dem phade sân

Verse: 9    kêrte er mit dem zoume.
Verse: 10    dô nam sîn vrâgen goume

Verse: 11    um der guoten liute vart:
Verse: 12    mit süezer rede ers innen wart.

Verse: 13    dô was des grâwen ritters klage,
Verse: 14    daz im die heileclîchen tage

Verse: 15    niht hülfen gein alsolhem site,
Verse: 16    daz er sunder wâpen rite

Verse: 17    oder daz er barvuoz gienge
Verse: 18    und stages zît begienge.

Verse: 19    Parzivâl sprach zim dô:
Verse: 20    "herre, ich erkenne sus noch sô,

Verse: 21    wie sjâres urhap gestêt
Verse: 22    oder wie der wochen zal gêt.

Verse: 23    swie die tage sint genant,
Verse: 24    daz ist mir allez unbekant.

Verse: 25    ich diende einem der heizet got.
Verse: 26    ê daz sô lasterlîchen spot

Verse: 27    sîn gunst über mich erhancte,
Verse: 28    mîn sin im nie gewancte,

Verse: 29    von dem mir helfe was gesaget.
Verse: 30    von dem mir helfe an mir verzaget."




Chapter: 448 
448


Verse: 1    dô sprach der ritter grâ gevar:
Verse: 2    "meint ir got den diu maget gebar?

Verse: 3    geloupt ir sîner mennscheit,
Verse: 4    waz er als hiute durch uns erleit,

Verse: 5    als man dises tages zît begêt,
Verse: 6    unrehte iu denne zharnas stêt:

Verse: 7    ez ist hiute der karvrîtac,
Verse: 8    des al diu werlt sich vreun mac

Verse: 9    und â bî mit angest siufzec sîn.
Verse: 10    wâ wart ie hôher triuwe schîn,

Verse: 11    dan die got durch uns begienc,
Verse: 12    den man durch uns anz kriuze hienc?

Verse: 13    herre, phleget ir toufes,
Verse: 14    sô jâmer iuch des koufes:

Verse: 15    er hât sîn werdeclîchez leben
Verse: 16    mit tôde vür unser schult gegeben,

Verse: 17    durch daz der mensche was verlorn,
Verse: 18    durch schulde hin zer helle erkorn.

Verse: 19    ob ir niht ein heiden sît,
Verse: 20    sô denket, herre, an dise zît.

Verse: 21    rîtet vürbaz ûf unser spor:
Verse: 22    iu ensitzet niht ze verre vor

Verse: 23    ein heilec man der gît iu rât,
Verse: 24    wandel vür iuwer missetât.

Verse: 25    welt ir im riuwe künden,
Verse: 26    er scheidet iuch von sünden."

Verse: 27    sîne tohter begunden sprechen:
Verse: 28    "waz wiltû, vater, rechen?

Verse: 29    sô bœse weter wir nû hân,
Verse: 30    waz râtes nimstû dich gein im an?




Chapter: 449 
449


Verse: 1    wan vüerstû in dâ er erwarme?
Verse: 2    sîne gîserten arme,

Verse: 3    swie ritterlîch die sîn gestalt,
Verse: 4    uns dunkt doch des, si haben kalt:

Verse: 5    er ervrüre, wæren sîn eines drî.
Verse: 6    dû hâs hie stênde nâhen bî

Verse: 7    gezelt und slavenîen hûs:
Verse: 8    kœme dir der künec Artûs,

Verse: 9    dû behieldes in ouch mit spîse wol.
Verse: 10    nû tuo als ein wirt sol:

Verse: 11    vüere disen ritter mit dir dan."
Verse: 12    dô sprach aber der grâwe man:

Verse: 13    "herre, mîne tohter sagent al wâr.
Verse: 14    hie nâhen bî elliu jâr

Verse: 15    var ich ûf disen wilden walt,
Verse: 16    ez sî warm oder kalt,

Verse: 17    immer gein des marter zît,
Verse: 18    der stæten lôn nâch dienste gît.

Verse: 19    swaz spîse ich ûz brâhte durch got,
Verse: 20    die teile ich mit iu âne spot."

Verse: 21    diez mit guotem willen tâten,
Verse: 22    die juncvrouwen bâten

Verse: 23    in belîben sêre
Verse: 24    und er hete belîbens êre.

Verse: 25    iewederiu daz mit triuwen sprach.
Verse: 26    Parzivâl an iu ersach,

Verse: 27    swie tiur von vroste dâ was der sweiz,
Verse: 28    ir munde wâren rôt, dicke und heiz:

Verse: 29    die stuonden niht senlîche,
Verse: 30    des tages zîte gelîche.




Chapter: 450 
450


Verse: 1    ob ich kleinez dinc dar ræche,
Verse: 2    ungerne ich daz verspræche,

Verse: 3    ich enholte einen kus durch suone dâ.
Verse: 4    ob si der suone spræchen jâ?

Verse: 5    wîp sint et immer wîp.
Verse: 6    werlîches mannes lîp

Verse: 7    hant si schier betwungen:
Verse: 8    inst dicke alsus gelungen.

Verse: 9    Parzivâl hie und dort
Verse: 10    mit bete hôrte ir süezen wort,

Verse: 11    des vater, muoter und der kinde.
Verse: 12    er dâhte: "ob ich erwinde,

Verse: 13    ich gên ungerne in dirre schar.
Verse: 14    dise megede sint sô wol gevar,

Verse: 15    daz mîn rîten bî in übele stêt,
Verse: 16    sît man und wîp ze vuoz hie gêt.

Verse: 17    sich vüect mîn scheiden von in baz,
Verse: 18    sît ich gein dem trage haz,

Verse: 19    den si von herzen minnent
Verse: 20    und sich helfe dâ versinnent.

Verse: 21    der hât sîn helfe mir verspart
Verse: 22    und mich vor sorgen niht bewart."

Verse: 23    Parzivâl sprach zin dô sân:
Verse: 24    "herre und vrouwe, lât mich hân

Verse: 25    iuwern urloup. gelücke iu heil
Verse: 26    gebe unde vreuden vollen teil.

Verse: 27    ir juncvrouwen süeze,
Verse: 28    iuwer zuht iu danken müeze,

Verse: 29    sît ir gundet mir gemaches wol.
Verse: 30    iuwern urloup ich haben sol."




Chapter: 451 
451


Verse: 1    er neic und die andern nigen.
Verse: 2    dâ wart ir klage niht verswigen.

Verse: 3    hin rîtet Herzeloide vruht.
Verse: 4    dem riet sîn manlîchiu zuht

Verse: 5    kiusche und erbarmunge:
Verse: 6    sît Herzeloide diu junge

Verse: 7    in hete ûf gerbet triuwe,
Verse: 8    sich huop sîns herzen riuwe.

Verse: 9    alrêst er dô gedâhte.
Verse: 10    wer al die werlt volbrâhte,

Verse: 11    an sînen schephære,
Verse: 12    wie gewaldec der wære.

Verse: 13    er sprach: "waz ob got helfe phliget,
Verse: 14    diu mînem trûren ane gesiget?

Verse: 15    wart aber er ie ritter holt,
Verse: 16    gediende ie ritter sînen solt

Verse: 17    oder mac schilt unde swert
Verse: 18    sîner helfe sîn sô wert

Verse: 19    und rehtiu manlîchiu wer,
Verse: 20    daz sîn helfe mich vor sorgen ner,

Verse: 21    ist hiute sîn helflîcher tac,
Verse: 22    sô helfe er, ob er helfen mac."

Verse: 23    er kêrte sich wider dannen er dâ reit.
Verse: 24    si stuonden dannoch, den was leit

Verse: 25    daz er von in kêrte.
Verse: 26    ir triuwe si daz lêrte:

Verse: 27    die juncvrouwen im sâhen nâch,
Verse: 28    gein den ouch im sîn herze jach,

Verse: 29    daz er si gerne sæhe,
Verse: 30    wande ir blic in schœne jæhe.




Chapter: 452 
452


Verse: 1    er sprach: "ist gotes kraft sô fier,
Verse: 2    daz is beidiu ors und tier

Verse: 3    und die liute mac wîsen,
Verse: 4    sîn kraft wil ich im prîsen.

Verse: 5    mac gotes kunst die helfe hân,
Verse: 6    diu wîse mir diz kastelân

Verse: 7    daz wægest um die reise mîn:
Verse: 8    sô tuot sîn güete helfe schîn.

Verse: 9    nû genc nâch der gotes kür."
Verse: 10    den zügel gein den ôren vür

Verse: 11    er dem orse legete,
Verse: 12    mit den sporn erz vaste regete.

Verse: 13    gein Fontâne la Salvâsche ez gienc,
Verse: 14    dâ Orilus den eit emphienc.

Verse: 15    der kiusche Trevrizent dâ saz,
Verse: 16    der manegen mântac übel gaz:

Verse: 17    als tet er gar die wochen.
Verse: 18    er hete gar versprochen

Verse: 19    môraz, wîn und ouch daz brôt.
Verse: 20    sîn kiusche im dannoch mêr gebôt,

Verse: 21    der spîse hete er deheinen muot,
Verse: 22    vische noch vleisch, swaz trüege bluot.

Verse: 23    sus stuont sîn heileclîchez leben.
Verse: 24    got hete im den muot gegeben:

Verse: 25    der herre sich bereite gar
Verse: 26    gein der himeleschen schar.

Verse: 27    mit vaste er grôzen kummer leit,
Verse: 28    sîn kiusche gein dem tiuvel streit.

Verse: 29    an dem ervert nû Parzivâl
Verse: 30    diu verholnen mære um den grâl.




Chapter: 453 
453


Verse: 1    swer mich dâ von ê vrâcte
Verse: 2    und drumme mit mir bâcte,

Verse: 3    ob ichs im niht sagete,
Verse: 4    unprîs der dran bejagete.

Verse: 5    mich bat ez heln Kîôt,
Verse: 6    wande im diu âventiure gebôt

Verse: 7    daz es immer man gedæhte,
Verse: 8    ez^ diu âventiure bræhte

Verse: 9    mit worten an der mære gruoz,
Verse: 10    daz man dâ von doch sprechen muoz.

Verse: 11    Kîôt der meister wol bekant
Verse: 12    ze Dôlet verworfen ligen vant

Verse: 13    in heidenscher schrifte
Verse: 14    dirre âventiur gestifte.

Verse: 15    der karakter â bê cê
Verse: 16    muoste er hân gelernetê

Verse: 17    âne den list von nigrômanzî.
Verse: 18    ez half daz im der touf was bî:

Verse: 19    anders wære diz mære noch unvernomen.
Verse: 20    dehein heidensch list möhte uns gevromen

Verse: 21    ze künden um des grâles art,
Verse: 22    wie man sîner tougen innen wart.

Verse: 23    ein heiden Flegetanîs
Verse: 24    bejagete an künste hôhen prîs.

Verse: 25    der selbe fîsîôn
Verse: 26    was geborn von Salomôn,

Verse: 27    ûz israhêlscher sippe erzilt
Verse: 28    von alter her, unz unser schilt

Verse: 29    der touf wart vürz helleviur.
Verse: 30    der schreip von sgrâles âventiur,




Chapter: 454 
454


Verse: 1    er was ein heiden vaterhalp,
Verse: 2    Flegetanîs, der an ein kalp

Verse: 3    bette als ob ez wære sîn got.
Verse: 4    wie mac der tiuvel solhen spot

Verse: 5    gevüegen an sô wîser diet,
Verse: 6    daz si niht scheidet oder schiet

Verse: 7    dâ von der treget die hœsten hant
Verse: 8    und dem elliu wunder sint bekant?

Verse: 9    Flegetanîs der heiden
Verse: 10    kunde uns wol bescheiden

Verse: 11    ieslîches sternen hinganc
Verse: 12    und sîner künfte widerwanc,

Verse: 13    wie lange ieslîcher umme gêt,
Verse: 14    ê er wider an sîn zil gestêt.

Verse: 15    mit der sternen ummereise vart
Verse: 16    sit gepruovt aller menneschlîcher art:

Verse: 17    Flegetanîs der heiden sach,
Verse: 18    dâ von der blûclîche sprach,

Verse: 19    in dem gestirne mit sînen ougen
Verse: 20    verholnbæriu tougen.

Verse: 21    er jach, ez hieze ein dinc der grâl:
Verse: 22    des namen las er sunder twâl

Verse: 23    in dem gestirne, wie der hiez.
Verse: 24    "ein schar in ûf der erden liez:

Verse: 25    diu vuor ûf über die sterne hôch.
Verse: 26    ob die ir unschult wider zôch?

Verse: 27    sît muoz sîn phlegen getouftiu vruht
Verse: 28    mit alsô kiuschlîcher zuht:

Verse: 29    diu mennescheit ist immer wert,
Verse: 30    der zuo dem grâle wirt gegert."




Chapter: 455 
455


Verse: 1    sus schreip dâ von Flegetanîs.
Verse: 2    Kîôt der meister wîs

Verse: 3    diz mære begunde suochen
Verse: 4    in latîneschen buochen,

Verse: 5    wâ gewesen wære
Verse: 6    ein volc dâ zuo gebære

Verse: 7    daz ez des grâles phlæge
Verse: 8    und der kiusche sich bewæge.

Verse: 9    er las der lande krônikâ
Verse: 10    ze Britâne und anderswâ,

Verse: 11    ze Vrancrîche und in îrlant.
Verse: 12    z Anschouwe er diu mære vant:

Verse: 13    er las von Mazadân,
Verse: 14    mit wârheite sunder wân

Verse: 15    um allez sîn geslehte
Verse: 16    stuont dâ geschriben rehte

Verse: 17    und anderhalp wie Titurel
Verse: 18    und des sun Frimutel

Verse: 19    den grâl bræhte ûf Anfortas,
Verse: 20    des swester Herzeloide was,

Verse: 21    bî der Gahmuret ein kint
Verse: 22    gewan. des disiu mære sint,

Verse: 23    der rîtet nû ûf die niuwen slâ,
Verse: 24    die gein im kom der ritter grâ.

Verse: 25    er erkande ein stat, swie læge der snê
Verse: 26    dâ liehte bluomen stuondenê

Verse: 27    (daz was vor eins gebirges want),
Verse: 28    aldâ sîn manlîchiu hant

Verse: 29    vroun Jeschûten die hulde erwarp
Verse: 30    und dâ Orilus zorn verdarp.




Chapter: 456 
456


Verse: 1    diu slâ in dâ niht halden liez:
Verse: 2    Fontâne la Salvâsche hiez

Verse: 3    ein wesen, dar sîn reise gienc.
Verse: 4    er vant den wirt, der in emphienc.

Verse: 5    der einsidel zim sprach:
Verse: 6    "ouwê, herre, daz iu geschach

Verse: 7    in dirre heileclîchen zît.
Verse: 8    hât iuch angestlîcher strît

Verse: 9    in diz harnas getriben
Verse: 10    oder sît ir âne strît beliben?

Verse: 11    sô stüende iu baz ein ander wât,
Verse: 12    lieze iuch hôchverte rât.

Verse: 13    nû ruocht erbeizen, herre,
Verse: 14    (ich wæne iu daz iht werre)

Verse: 15    und erwarmt bî einem viure.
Verse: 16    hât iuch âventiure

Verse: 17    ûz gesant durch minnen solt?
Verse: 18    sît ir rehter minne holt,

Verse: 19    sô minnet als nû diu minne gêt,
Verse: 20    als dises tages minne stêt:

Verse: 21    dient her nâch um wîbe gruoz.
Verse: 22    ruocht erbeizen, ob ichs biten muoz."

Verse: 23    Parzivâl der wîgant
Verse: 24    erbeizte nider al zehant,

Verse: 25    mit grôzer zuht er vor im stuont.
Verse: 26    er tet im von den liuten kunt,

Verse: 27    die in dar wîsten,
Verse: 28    wie die sîn râten prîsten.

Verse: 29    dô sprach er: "herre, nû gebet mir rât:
Verse: 30    ich bin ein man der sünde hât."




Chapter: 457 
457


Verse: 1    dô disiu rede was getân,
Verse: 2    dô sprach aber der guote man:

Verse: 3    "ich bin râtes iuwer wer.
Verse: 4    nû saget mir wer iuch wîste her."

Verse: 5    "herre, ûf dem walde mir widergienc
Verse: 6    ein grâ man, der mich wol emphienc:

Verse: 7    als tet sîn massenîe.
Verse: 8    der selbe valsches vrîe

Verse: 9    hât mich zuo ziu her gesant:
Verse: 10    ich reit sîn slâ, unz ich iuch vant."

Verse: 11    der wirt sprach: "daz was Kahenîs.
Verse: 12    derst werdeclîcher vuore wîs.

Verse: 13    der vürste ist ein Punturteis,
Verse: 14    der rîche künec von Kâreis

Verse: 15    sîn swester hât ze wîbe.
Verse: 16    nie kiuscher vruht von lîbe

Verse: 17    wart geborn dan sîn selbes kint,
Verse: 18    diu iu dâ widergangen sint.

Verse: 19    der vürste ist von küneges art.
Verse: 20    alle jâr ist zuo mir her sîn vart."

Verse: 21    Parzivâl zem wirte sprach:
Verse: 22    "dô ich iuch vor mir stênde sach,

Verse: 23    vorht ir iu iht, dô ich zuo ziu reit?
Verse: 24    was iu mîn komen dô iht leit?"

Verse: 25    dô sprach er: "herre, geloubet mirz,
Verse: 26    mich hât der ber und ouch der hirz

Verse: 27    erschrecket dicker dan der man.
Verse: 28    ein wârheit ich iu sagen kan,

Verse: 29    ich envürhte niht swaz mennesch ist.
Verse: 30    ich hân ouch menneschlîchen list:




Chapter: 458 
458


Verse: 1    hetet irz niht vür einen ruom,
Verse: 2    sô trüege ich vluht noch magetuom.

Verse: 3    mîn herze emphienc noch nie den kranc
Verse: 4    daz ich von wer getæte wanc

Verse: 5    bî mîner werlîchen zît.
Verse: 6    ich was ein ritter, als ir sît,

Verse: 7    der ouch nâch hôher minne ranc.
Verse: 8    etswenne ich sündebæren gedanc

Verse: 9    gein der kiusche parrierte.
Verse: 10    mîn leben ich dar ûf zierte,

Verse: 11    daz mir genâde tæte ein wîp.
Verse: 12    des hât vergezzen nû mîn lîp.

Verse: 13    gebet mir den zoum in mîne hant:
Verse: 14    dort under jenes velses want

Verse: 15    sol iuwer ors durch ruowen stên.
Verse: 16    bî einer wîle sul wir beide gên

Verse: 17    und brechen im grazzach und varm.
Verse: 18    anders vuoters bin ich arm:

Verse: 19    wir sulnz doch harte wol ernern."
Verse: 20    Parzivâl sich wolde wern,

Verse: 21    daz er szoumes emphienge niht.
Verse: 22    "iuwer zuht iu des niht giht,

Verse: 23    daz ir strîtet wider deheinen wirt,
Verse: 24    ob unvuoge iuwer zuht verbirt"

Verse: 25    alsus sprach der guote man.
Verse: 26    dem wirte wart der zoum verlân.

Verse: 27    der zôch daz ors under jenen stein,
Verse: 28    dâ selten sunne hin erschein:

Verse: 29    daz was ein wilder marstal.
Verse: 30    dâ durch gienc eins brunnen val.




Chapter: 459 
459


Verse: 1    Parzivâl stuont ûf dem snê.
Verse: 2    ez tæte einem kranken manne wê,

Verse: 3    ob er harnas trüege
Verse: 4    dâ der vrost sus an in slüege.

Verse: 5    der wirt in vuorte in eine gruft,
Verse: 6    dar selten kom des windes luft:

Verse: 7    dâ lâgen glüendege koln.
Verse: 8    die mohte der gast vil gerne doln.

Verse: 9    eine kerzen zunde swirtes hant:
Verse: 10    dô entwâpende sich der wîgant.

Verse: 11    under im lac ramschoup und varm.
Verse: 12    al sîne lide im wurden warm,

Verse: 13    sô daz sîn vel liehten schîn
Verse: 14    gap. er mohte wol waltmüede sîn,

Verse: 15    wande er hete der strâzen wênec geriten,
Verse: 16    âne dach die naht des tages erbiten:

Verse: 17    als hete er manege ander.
Verse: 18    getriuwen wirt dâ vander.

Verse: 19    dâ lac ein roc, den lêch im an
Verse: 20    der wirt und vuorte in mit im dan

Verse: 21    zeiner andern gruft: dâ inne was
Verse: 22    sîniu buoch dar an der kiusche las.

Verse: 23    nâch stages site ein alterstein
Verse: 24    dâ stuont al blôz, dar ûf erschein

Verse: 25    ein kefse (diu wart schiere erkant),
Verse: 26    dar ûfe Parzivâles hant

Verse: 27    swuor einen ungevelschten eit,
Verse: 28    dâ von vroun Jeschûten leit

Verse: 29    ze liebe wart verkêret
Verse: 30    und ir vreude gemêret.




Chapter: 460 
460


Verse: 1    Parzivâl zem wirte sîn
Verse: 2    sprach: "herre, dirre kefsen schîn

Verse: 3    erkenne ich, wande ich drûfe swuor
Verse: 4    zeinen zîten dô ich hie vür si vuor.

Verse: 5    ein gemâlet sper dâ bî ich vant:
Verse: 6    herre, daz nam alhie mîn hant,

Verse: 7    dâ mite ich prîs bejagete.
Verse: 8    als man mir sider sagete

Verse: 9    (ich verdâhte mich an mîn selbes wîp
Verse: 10    sô daz von witzen kom mîn lîp),

Verse: 11    zwuo rîche tjoste dâ mite ich reit:
Verse: 12    unwizzende ich die beide streit.

Verse: 13    dannoch hete ich êre:
Verse: 14    nû hân ich sorgen mêre

Verse: 15    dan ir an manne ie wart gesehen.
Verse: 16    durch iuwer zuht sult ir des jehen,

Verse: 17    wie lanc ist von der zîte her,
Verse: 18    herre, daz ich hie nam daz sper?"

Verse: 19    dô sprach aber der guote man:
Verse: 20    "des vergaz mîn vriunt Taurian

Verse: 21    hie: er kom mirs sît in klage.
Verse: 22    vünfthalp jâr und drî tage

Verse: 23    ist daz irz im nâmet hie.
Verse: 24    welt irz hœren, ich prüeve iu wie."

Verse: 25    an dem salter las er im über al
Verse: 26    diu jâr und gar der wochen zal,

Verse: 27    die dâ zwischen wâren hin.
Verse: 28    "alrêst ich innen worden bin

Verse: 29    wie lange ich var wîselôs
Verse: 30    und daz vreuden helfe mich verkôs"




Chapter: 461 
461


Verse: 1    sprach Parzivâl. "mirst vreude ein troum:
Verse: 2    ich trage der riuwe swæren soum.

Verse: 3    herre, ich tuon iu mêr noch kunt:
Verse: 4    swâ kirchen oder münster stuont,

Verse: 5    dâ man gotes êre sprach,
Verse: 6    dehein ouge mich dâ nie gesach

Verse: 7    sît den selben zîten.
Verse: 8    ich ensuochte niht wan strîten.

Verse: 9    ouch trage ich hazzes vil gein gote,
Verse: 10    wande er ist mîner sorgen tote:

Verse: 11    die hât er alze hôhe erhaben.
Verse: 12    mîn vreude ist lebendec begraben.

Verse: 13    kunde gotes kraft mit helfe sîn,
Verse: 14    waz ankers wære diu vreude mîn?

Verse: 15    diu sinket durch der riuwe grunt.
Verse: 16    ist mîn manlîch herze wunt

Verse: 17    (oder mac ez dâ von wesen ganz,
Verse: 18    daz diu riuwe ir scharphen kranz

Verse: 19    mir setzet ûf werdekeit,
Verse: 20    die schiltes ammet mir erstreit

Verse: 21    gein werlîchen handen?),
Verse: 22    des gihe ich dem ze schanden,

Verse: 23    der aller helfe hât gewalt,
Verse: 24    ist sîn helfe helfe balt,

Verse: 25    daz er mir denne hilfet niht,
Verse: 26    sô vil man im der helfe giht."

Verse: 27    der wirt ersiufzete und sach an in.
Verse: 28    dô sprach er: "herre, habet ir sin,

Verse: 29    sô sult ir gote getrûwen wol:
Verse: 30    er hilft iu, wande er helfen sol.




Chapter: 462 
462


Verse: 1    got müeze uns helfen beiden.
Verse: 2    herre, ir sult mich bescheiden

Verse: 3    (ruochet alrêst sitzen),
Verse: 4    saget mir mit kiuschen witzen,

Verse: 5    wie der zorn sich ane gevienc,
Verse: 6    dâ von got iuwern haz emphienc.

Verse: 7    durch iuwer zühte gedult
Verse: 8    vernemt von mir sîn unschult,

Verse: 9    ê daz ir mir von im iht klaget.
Verse: 10    sîn helfe ist immer unverzaget.

Verse: 11    doch ich ein leie wære,
Verse: 12    der wâren buoche mære

Verse: 13    kunde ich lesen unde schrîben,
Verse: 14    wie der mensche sol belîben

Verse: 15    mit dienste gein des helfe grôz,
Verse: 16    den der stæten helfe nie verdrôz

Verse: 17    vür der sêle senken.
Verse: 18    sît getriuwe âne allez wenken,

Verse: 19    sît got selbe ein triuwe ist:
Verse: 20    dem was unmære ie valscher list.

Verse: 21    wir suln in des geniezen lân:
Verse: 22    er hât vil durch uns getân,

Verse: 23    sît sîn edel hôher art
Verse: 24    durch uns ze menschen bilde wart.

Verse: 25    got heizt und ist ein wârheit.
Verse: 26    dem was ie valschiu vuore leit,

Verse: 27    daz sult ir gar bedenken.
Verse: 28    er enkan an niemen wenken:

Verse: 29    nû lêret iuwer gedanke,
Verse: 30    hüetet iuch gein im an wanke.




Chapter: 463 
463


Verse: 1    ir enmeget im abe erzürnen niht:
Verse: 2    swer iuch gein im in hazze siht,

Verse: 3    der hât iuch an den witzen kranc.
Verse: 4    nû prüevt wie Lûcifern gelanc

Verse: 5    und sînen nôtgestallen,
Verse: 6    si wâren doch âne gallen:

Verse: 7    jâ herre, wâ nâmen si den nît,
Verse: 8    dâ von ir endelôser strît

Verse: 9    zer helle emphâhet sûren lôn?
Verse: 10    Astirot und Belcimôn,

Verse: 11    Bêlet und Radamant
Verse: 12    und ander die ich dâ hân erkant,

Verse: 13    diu liehte himelesche schar
Verse: 14    wart durch nît nâch helle var.

Verse: 15    dô Lûcifer vuor die hellevart
Verse: 16    mir schar, ein mensche nâch im wart:

Verse: 17    got worhte ûz der erden
Verse: 18    Adâmen den werden.

Verse: 19    von Adâmes verhe er êven brach,
Verse: 20    diu uns gap an daz ungemach,

Verse: 21    daz si ir schephære überhôrte
Verse: 22    und unser vreude stôrte.

Verse: 23    von in zwein kom gebürte vruht:
Verse: 24    einem riet sîn ungenuht

Verse: 25    daz er durch gîteclîchen ruom
Verse: 26    sîner anen nam den magetuom.

Verse: 27    nû beginnet genuoge des gezemen,
Verse: 28    ê si diz mære vernemen,

Verse: 29    daz si vreischen wie daz möhte sîn:
Verse: 30    ez wart iedoch mit sünden schîn."




Chapter: 464 
464


Verse: 1    Parzivâl hin zim dô sprach:
Verse: 2    "herre, ich wæne daz ie geschach.

Verse: 3    von wem was der man erborn,
Verse: 4    von dem sîn ane hât verlorn

Verse: 5    den magetuom, als ir mir saget?
Verse: 6    daz möhtet ir gerne hân verdaget."

Verse: 7    der wirt sprach aber wider zim:
Verse: 8    "von dem zwîvel ich iuch nim.

Verse: 9    sage ich niht wâr die wârheit,
Verse: 10    sô lât iu sîn mîn triegen leit.

Verse: 11    diu erde Adâmes muoter was:
Verse: 12    von erden vruht Adâm genas.

Verse: 13    dannoch was diu erde ein maget:
Verse: 14    noch hân ich iu niht gesaget

Verse: 15    wer ir den magetuom benam.
Verse: 16    Kâîns vater was Adam,

Verse: 17    er sluoc Abêlen um krankez guot:
Verse: 18    dô ûf die reinen erden zbluot

Verse: 19    viel, ir magetuom was vervarn.
Verse: 20    den nam ir Adâmes barn.

Verse: 21    dô huop sich êrst der menschen nît:
Verse: 22    alsô wert er immer sît.

Verse: 23    in der werlde doch niht sô reines ist
Verse: 24    sô diu maget âne valschen list.

Verse: 25    nû prüevt wie reine die megede sint:
Verse: 26    got was selbe der megede kint.

Verse: 27    von megeden sint zwei mensche komen.
Verse: 28    got selbe antlitze hât genomen

Verse: 29    nâch der êrsten megede vruht:
Verse: 30    daz was sîner hôhen art ein zuht.




Chapter: 465 
465


Verse: 1    von Adâmes künne
Verse: 2    huop sich riuwe und wünne,

Verse: 3    sît er uns sippe lougent niht,
Verse: 4    den ieslîch engel ob im siht,

Verse: 5    und daz diu sippe ist sünden wagen,
Verse: 6    sô daz wir sünde müezen tragen.

Verse: 7    dar über erbarme sich des kraft,
Verse: 8    dem erbarme gît geselleschaft.

Verse: 9    sît sîn getriuwiu mennescheit
Verse: 10    mit triuwen gein untriuwe streit,

Verse: 11    ir sult ûf in verkiesen.
Verse: 12    welt ir sælde niht verliesen,

Verse: 13    lât wandel iu vür sünde bî.
Verse: 14    sît rede und werke niht sô vrî,

Verse: 15    wan der sîn leit sô richet
Verse: 16    daz er unkiusche sprichet,

Verse: 17    von des lôn tuon ich iu kunt,
Verse: 18    in urteilt sîn selbes munt.

Verse: 19    nemt aldiu mære vür niuwe,
Verse: 20    ob si iuch lêren triuwe.

Verse: 21    der pareliure Plâtô
Verse: 22    sprach bî sînen zîten dô

Verse: 23    und Sibille diu profêtisse,
Verse: 24    sunder vâlierens misse

Verse: 25    si sageten dâ vor manec jâr,
Verse: 26    uns solde komen al vür wâr

Verse: 27    vür die hœsten schulde phant.
Verse: 28    zer helle uns nam diu hœste hant

Verse: 29    mit der gotlîchen minne:
Verse: 30    die unkiuschen liez er dinne.




Chapter: 466 
466


Verse: 1    von dem wâren minnære
Verse: 2    sagent disiu süezen mære.

Verse: 3    der ist ein durchliuhtec lieht
Verse: 4    und wenket sîner minne niht:

Verse: 5    swem er minne erzeigen sol,
Verse: 6    dem wirt mit sîner minne wol.

Verse: 7    die selben sint geteilet:
Verse: 8    aller werlde ist geveilet

Verse: 9    beidiu sîn minne und ouch sîn haz.
Verse: 10    nû prüevet wederz helfe baz.

Verse: 11    der schuldege âne riuwe
Verse: 12    vliuht die gotlîchen triuwe:

Verse: 13    swer aber wandelt sünden schulde,
Verse: 14    der dient nâch werder hulde.

Verse: 15    die treget der durch gedanke vert.
Verse: 16    gedanc sich sunnen blickes wert:

Verse: 17    gedanc ist âne slôz gespart,
Verse: 18    vor aller krêatiure bewart.

Verse: 19    gedanc ist vinster âne schîn:
Verse: 20    diu gotheit kan lûter sîn,

Verse: 21    si glestet durch der vinster want
Verse: 22    und hât den helden sprunc gerant,

Verse: 23    der endiuzet noch enklinget.
Verse: 24    sô er von dem herzen springet,

Verse: 25    ez ist dehein gedanc sô snel,
Verse: 26    ê er von dem herzen vür daz vel

Verse: 27    kom, er ensî versuochet:
Verse: 28    des kiuschen got geruochet.

Verse: 29    sît got gedanke spehet sô wol,
Verse: 30    ouwê der brœden werke dol!




Chapter: 467 
467


Verse: 1    swâ werc verwürkent sînen gruoz,
Verse: 2    daz gotheit sich schamen muoz,

Verse: 3    wem lât den menneschlîchiu zuht?
Verse: 4    war hât diu arme sêle vluht?

Verse: 5    welt ir nû gote vüegen leit,
Verse: 6    der ze beiden sîten ist bereit,

Verse: 7    zer minne und gein dem zorne,
Verse: 8    sô sît ir der verlorne.

Verse: 9    nû kêret iuwer gemüete,
Verse: 10    daz er iu danke güete."

Verse: 11    Parzivâl sprach zim dô:
Verse: 12    "herre, ich bin des immer vrô,

Verse: 13    daz ir mich von dem bescheiden lât,
Verse: 14    der nihtes ungelônet lât,

Verse: 15    der missewende noch der tugent.
Verse: 16    ich hân mit sorgen mîne jugent

Verse: 17    alsus brâht an disen tac,
Verse: 18    daz ich durch triuwe kummers phlac."

Verse: 19    der wirt sprach aber wider zim:
Verse: 20    "nimts iuch niht hæle, gerne ich vernim

Verse: 21    waz ir kummers und sünden hât.
Verse: 22    ob ir mich diu prüeven lât,

Verse: 23    dar zuo gibe ich iu lîhte rât,
Verse: 24    des ir selbe niht enhât."

Verse: 25    dô sprach aber Parzivâl:
Verse: 26    "mîn hœstiu nôt ist um den grâl,

Verse: 27    dâ nâch um mîn selbes wîp:
Verse: 28    ûf erde nie schœner lîp

Verse: 29    gesouc an deheiner muoter brust.
Verse: 30    nâch den beiden sent sich mîn gelust."




Chapter: 468 
468


Verse: 1    der wirt sprach: "herre, ir sprechet wol.
Verse: 2    ir sît in rehter kummers dol,

Verse: 3    sît ir nâch iuwer selbes wîbe
Verse: 4    sorgen phlihte gebet dem lîbe.

Verse: 5    werdet ir ervunden an rehter ê,
Verse: 6    iu mac zer helle werden wê,

Verse: 7    diu nôt sol schiere ein ende hân
Verse: 8    und werdet von banden aldâ verlân

Verse: 9    mit der gotes helfe al sunder twâl.
Verse: 10    ir jeht, ir sent iuch um den grâl:

Verse: 11    ir tummer man, daz muoz ich klagen.
Verse: 12    jâ enmac den grâl niemen bejagen,

Verse: 13    wan der ze himele ist sô bekant
Verse: 14    daz er zem grâle sî benant.

Verse: 15    des muoz ich von dem grâle jehen:
Verse: 16    ich weiz ez und hânz vür wâr gesehen."

Verse: 17    Parzivâl sprach: "wârt ir dâ?"
Verse: 18    der wirt sprach gein im: "herre, jâ."

Verse: 19    Parzivâl versweic in gar
Verse: 20    daz ouch er was komen dar:

Verse: 21    er vrâcte in von der künde,
Verse: 22    wiez um den grâl dâ stüende.

Verse: 23    der wirt sprach: "mir ist wol bekant,
Verse: 24    ez wont manec werlîchiu hant

Verse: 25    ze Munsalvæsche bî dem grâl.
Verse: 26    durch âventiur die alle mâl

Verse: 27    rîtent manege reise.
Verse: 28    die selben templeise,

Verse: 29    swâ si kummer oder prîs bejagent,
Verse: 30    vür ir sünde si daz tragent.




Chapter: 469 
469


Verse: 1    dâ wont ein werlîchiu schar.
Verse: 2    ich wil iu künden um ir nar:

Verse: 3    si lebent von einem steine,
Verse: 4    des geslehte ist vil reine.

Verse: 5    hât ir des niht erkennet,
Verse: 6    der wirt iu hie genennet:

Verse: 7    er heizet lapsit exillîs.
Verse: 8    von des steines kraft der fênîs

Verse: 9    verbrinnet, daz er zaschen wirt:
Verse: 10    diu asche im aber leben birt.

Verse: 11    sus rêrt der fênîs mûze sîn
Verse: 12    und gît dar nâch vil liehten schîn,

Verse: 13    daz er schœne wirt als ê.
Verse: 14    ouch wart nie menschen sô wê,

Verse: 15    swelhes tages ez den stein gesiht,
Verse: 16    die wochen mac ez sterben niht,

Verse: 17    diu aller schierst dar nâch gestêt.
Verse: 18    sîn varwe im nimmer ouch zegêt:

Verse: 19    man muoz im solher varwe jehen,
Verse: 20    dâ mite ez hât den stein gesehen,

Verse: 21    ez sî maget oder man,
Verse: 22    als dô sîn bestiu zît huop an,

Verse: 23    sæhe ez den stein zwei hundert jâr.
Verse: 24    im enwürde denne grâ sîn hâr,

Verse: 25    solhe kraft dem menschen gît der stein,
Verse: 26    daz im vleisch unde bein

Verse: 27    jugent emphæhet al sunder twâl.
Verse: 28    der stein ist ouch genant der grâl.

Verse: 29    dar ûf kumt hiute ein botschaft,
Verse: 30    dar an doch liget sîn hœste kraft:




Chapter: 470 
470


Verse: 1    ez ist hiute der karvrîtac,
Verse: 2    daz man vür wâr dâ warten mac,

Verse: 3    ein tûbe von himele swinget,
Verse: 4    ûf den stein diu bringet

Verse: 5    eine kleine wîze oblât,
Verse: 6    ûf dem steine si die lât.

Verse: 7    diu tûbe ist durchliuhtec blanc,
Verse: 8    ze himele tuot si widerwanc.

Verse: 9    immer alle karvrîtage
Verse: 10    brinct si ûf den stein, als ich iu sage,

Verse: 11    dâ von der stein emphæhet
Verse: 12    swaz guotes ûf erden dræhet

Verse: 13    von trinken und von spîse,
Verse: 14    als den wunsch von paradîse:

Verse: 15    ich meine, swaz diu erde mac gebern.
Verse: 16    der stein si vürbaz mêr sol wern

Verse: 17    swaz wildes under dem lufte lebet,
Verse: 18    ez vliege oder loufe und daz swebet.

Verse: 19    der ritterlîchen bruoderschaft,
Verse: 20    die phrüende in gît des grâles kraft.

Verse: 21    die aber zem grâle sint benant,
Verse: 22    hœrt wie die werdent bekant.

Verse: 23    zende an des steines drum
Verse: 24    von karakten ein epitafium

Verse: 25    saget sînen namen und sînen art,
Verse: 26    swer dar tuon sol die sælden vart,

Verse: 27    ez sî von megeden oder von knaben.
Verse: 28    die schrift darf niemen danne schaben:

Verse: 29    sô man den namen gelesen hât,
Verse: 30    vor ir ougen si zegât.




Chapter: 471 
471


Verse: 1    si kômen alle dar vür kint,
Verse: 2    die nû dâ grôze liute sint.

Verse: 3    wol die muoter, diu daz kint gebar,
Verse: 4    daz sol ze dienste hœren dar!

Verse: 5    der arme und der rîche
Verse: 6    vreunt sich al gelîche,

Verse: 7    ob man ir kint eischet dar,
Verse: 8    daz siz suln senden an die schar:

Verse: 9    man holt si in manegen landen.
Verse: 10    vor sündebæren schanden

Verse: 11    sint si immer mêr behuot
Verse: 12    und wirt ir lôn ze himele guot:

Verse: 13    swenne in erstirbet hie daz leben,
Verse: 14    sô wirt in dort der wunsch gegeben.

Verse: 15    die newederhalp gestuonden,
Verse: 16    dô strîten begunden

Verse: 17    Lûcifer und Trînitas,
Verse: 18    swaz der selben engel was,

Verse: 19    die edeln und die werden
Verse: 20    muosten ûf die erden

Verse: 21    zuo dem selben steine.
Verse: 22    der stein ist immer reine.

Verse: 23    ich enweiz ob got ûf si verkôs
Verse: 24    oder ob er si vürbaz verlôs:

Verse: 25    was daz sîn reht, er nam si wider.
Verse: 26    des steines phliget immer sider

Verse: 27    die got dar zuo benande
Verse: 28    und in sînen engel sande.

Verse: 29    herre, sus stêt ez um den grâl."
Verse: 30    dô sprach aber Parzivâl:




Chapter: 472 
472


Verse: 1    "mac ritterschaft des lîbes prîs
Verse: 2    und doch der sêle pardîs

Verse: 3    bejagen mir schilte und ouch mit sper,
Verse: 4    sô was ie ritterschaft mîn ger.

Verse: 5    ich streit ie swâ ich strîten vant,
Verse: 6    sô daz mîn werlîchiu hant

Verse: 7    sich næherte dem prîse.
Verse: 8    ist got an strîte wîse,

Verse: 9    der sol mich dar benennen,
Verse: 10    daz si mich dâ bekennen:

Verse: 11    mîn hant dâ strîtes niht verbirt."
Verse: 12    dô sprach aber sîn kiuscher wirt:

Verse: 13    "ir müestet aldâ vor hôchvart
Verse: 14    mit senftem willen sîn bewart.

Verse: 15    iuch verleitet lîhte iuwer jugent
Verse: 16    daz ir der kiusche bræchet tugent.

Verse: 17    hôchvart ie seic unde viel"
Verse: 18    sprach der wirt: ieweder ouge im wiel,

Verse: 19    dô er an diz mære dâhte,
Verse: 20    daz er dâ mit rede volbrâhte.

Verse: 21    dô sprach er: "herre, ein künec dâ was,
Verse: 22    der hiez und heizt noch Anfortas.

Verse: 23    daz sol iuch und mich armen
Verse: 24    immer mêr erbarmen,

Verse: 25    um sîne herzebære nôt,
Verse: 26    die hôchvart im ze lône bôt.

Verse: 27    sîn jugent und sîn rîcheit
Verse: 28    der werlde an im vuocte leit

Verse: 29    und daz er gerte minne
Verse: 30    ûzerhalp der kiusche sinne.




Chapter: 473 
473


Verse: 1    der site ist niht dem grâle reht:
Verse: 2    dâ muoz der ritter und der kneht

Verse: 3    bewart sîn vor lôsheit.
Verse: 4    diemuot die hôchvart überstreit.

Verse: 5    dâ wont ein werdiu bruoderschaft:
Verse: 6    die hânt mit werlîcher kraft

Verse: 7    erwert mit ir handen
Verse: 8    der diet von al den landen,

Verse: 9    daz der grâl ist unerkennet,
Verse: 10    wan die dar sint benennet

Verse: 11    ze Munsalvæsche an sgrâles schar.
Verse: 12    wan einer kom unbenennet dar:

Verse: 13    der selbe was ein tummer man
Verse: 14    und vuorte ouch sünde mit im dan,

Verse: 15    daz er niht zem wirte sprach
Verse: 16    um den kummer den er an im sach.

Verse: 17    ich ensol niemen schelten:
Verse: 18    doch muoz er sünde engelten,

Verse: 19    daz er niht vrâcte swirtes schaden.
Verse: 20    er was mit kummer sô geladen,

Verse: 21    ez enwart nie erkant sô hôher pîn.
Verse: 22    dâ vor kom rois Lehelîn

Verse: 23    ze Brumbâne an den sê geriten.
Verse: 24    durch tjoste hete sîn dâ gebiten

Verse: 25    Libêals der werde helt.
Verse: 26    des tôt mit tjoste was erwelt,

Verse: 27    er was erborn von Prienlascors.
Verse: 28    Lehelîn des heldes ors

Verse: 29    dannen zôch mit sîner hant:
Verse: 30    dâ wart der rêroup bekant.




Chapter: 474 
474


Verse: 1    herre, sît irz Lehelîn?
Verse: 2    sô stêt in dem stalle mîn

Verse: 3    den orsen ein ors gelîch gevar,
Verse: 4    diu dâ hœrent an sgrâles schar:

Verse: 5    an dem satel ein turteltûbe stêt.
Verse: 6    daz ors von Munsalvæsche gêt.

Verse: 7    diu wâpen gap in Anfortas,
Verse: 8    dô er der vreuden herre was.

Verse: 9    ir schilte sint von alter sô.
Verse: 10    Titurel si brâhte dô

Verse: 11    an sînen sun rois Frimutel:
Verse: 12    dar unde verlôs der degen snel

Verse: 13    von einer tjoste ouch sînen lîp.
Verse: 14    der minnete sîn selbes wîp,

Verse: 15    daz nie von manne mêre
Verse: 16    wîp geminnet wart sô sêre,

Verse: 17    ich meine mit rehten triuwen.
Verse: 18    sîne site sult ir niuwen

Verse: 19    und minnet von herzen iuwer konen.
Verse: 20    sîner site sult ir wonen:

Verse: 21    iuwer varwe im treget gelîchiu mâl.
Verse: 22    der was ouch herre über den grâl.

Verse: 23    ouwî herre, wannen ist iuwer vart?
Verse: 24    nû ruocht mir prüeven iuwern art."

Verse: 25    ieweder vaste an den andern sach.
Verse: 26    Parzivâl zem wirte sprach:

Verse: 27    "ich bin von einem man erborn,
Verse: 28    der mit tjoste hât den lîp verlorn

Verse: 29    und durch ritterlîch gemüete.
Verse: 30    herre, durch iuwer güete




Chapter: 475 
475


Verse: 1    sult ir in nemen in iuwer gebet.
Verse: 2    mîn vater der hiez Gahmuret,

Verse: 3    er was von arte ein Anschevîn.
Verse: 4    herre, ich enbinz niht Lehelîn.

Verse: 5    genam ich ie den rêroup,
Verse: 6    sô was ich an den witzen toup:

Verse: 7    ez ist iedoch von mir geschehen.
Verse: 8    der selben sünde muoz ich jehen:

Verse: 9    îthêren von Cucûmerlant
Verse: 10    den sluoc mîn sündebæriu hant,

Verse: 11    ich legete in tôten ûf daz gras
Verse: 12    und nam swaz dâ ze nemen was."

Verse: 13    "ouwê werlt, wie tuostû sô?"
Verse: 14    sprach der wirt: der was des mæres unvrô.

Verse: 15    "dû gîs den liuten herzesêr
Verse: 16    und riuwebæres kummers mêr

Verse: 17    dan der vreude, wie stêt dîn lôn!
Verse: 18    sus endet sich dîns mæres dôn."

Verse: 19    dô sprach er: "lieber swestersun,
Verse: 20    waz râtes möhte ich dir nû tuon?

Verse: 21    dû hâs dîn eigen verh erslagen.
Verse: 22    wiltû vür got die schulde tragen,

Verse: 23    sît daz ir beide wârt ein bluot,
Verse: 24    ob got dâ reht gerihte tuot,

Verse: 25    sô giltet im dîn eigen leben.
Verse: 26    waz wiltû im dâ ze gelte geben,

Verse: 27    îthêren von Gaheviez?
Verse: 28    der rehten werdekeit geniez,

Verse: 29    des diu werlt was gereinet,
Verse: 30    hete got an im erscheinet.




Chapter: 476 
476


Verse: 1    missewende was sîn riuwe.
Verse: 2    er balsem ob der triuwe,

Verse: 3    al werltlîchiu schande in vlôch:
Verse: 4    werdekeit sich in sîn herze zôch.

Verse: 5    dich solden hazzen werdiu wîp
Verse: 6    durch sînen minneclîchen lîp:

Verse: 7    sîn dienest was gein in sô ganz,
Verse: 8    ez machte wîbes ougen glanz,

Verse: 9    die in gesâhen, von sîner süeze.
Verse: 10    got daz erbarmen müeze

Verse: 11    daz dû ie gevrumtes solhe nôt!
Verse: 12    mîn swester lac ouch nâch dir tôt,

Verse: 13    Herzeloide dîn muoter."
Verse: 14    "neinâ herre guoter,

Verse: 15    waz saget ir nû?" sprach Parzivâl.
Verse: 16    "wære ich dan herre über den grâl,

Verse: 17    der möhte mich ergetzen niht
Verse: 18    des mæres mir iuwer munt vergiht.

Verse: 19    bin ich iuwer swester kint,
Verse: 20    sô tuot als die mit triuwen sint

Verse: 21    und saget mir sunder wankes vâr:
Verse: 22    sint disiu mære beidiu wâr?"

Verse: 23    dô sprach aber der guote man:
Verse: 24    "ich enbinz niht der dâ triegen kan:

Verse: 25    dîner muoter daz ir triuwe erwarp,
Verse: 26    dô dû von ir schiede, zehant si starp.

Verse: 27    dû wære daz tier daz si dâ souc,
Verse: 28    und der trache der von ir dâ vlouc.

Verse: 29    ez widervuor in slâfe ir gar,
Verse: 30    ê daz diu süeze dich gebar.




Chapter: 477 
477


Verse: 1    mîner geswisterde zwei noch sint.
Verse: 2    mîn swester Schoisiâne ein kint

Verse: 3    gebar: der vrühte lac si tôt.
Verse: 4    der herzoge Kîôt

Verse: 5    von Katelangen was ir man:
Verse: 6    der enwolde ouch sît niht vreude hân.

Verse: 7    Sigûnen, des selben tohterlîn,
Verse: 8    bevalh man der muoter dîn.

Verse: 9    Schoisiânen tôt mich smerzen
Verse: 10    muoz enmitten in dem herzen:

Verse: 11    ir wîplîch herze was sô guot,
Verse: 12    ein arke vür unkiusche vluot.

Verse: 13    ein maget, mîn swester, phliget noch site
Verse: 14    sô daz ir volget kiusche mite:

Verse: 15    Repanse de Schoie phliget
Verse: 16    des grâles, der sô swære wiget

Verse: 17    daz in diu valschlîch mennescheit
Verse: 18    nimmer von der stat getreit.

Verse: 19    ir bruoder und mîn ist Anfortas,
Verse: 20    der beidiu ist unde was

Verse: 21    von art des grâles herre.
Verse: 22    demst leider vreude verre,

Verse: 23    wan daz er hât gedingen,
Verse: 24    in sül sîn kummer bringen

Verse: 25    zem endelôsen gemache.
Verse: 26    mit wunderlîcher sache

Verse: 27    ist ez im komen an riuwen zil,
Verse: 28    als ich dir, neve, künden wil.

Verse: 29    phligestû denne triuwe,
Verse: 30    sô erbarmet dich sîn riuwe.




Chapter: 478 
478


Verse: 1    dô Frimutel den lîp verlôs,
Verse: 2    mîn vater, nâch im man dô kôs

Verse: 3    sînen eldesten sun ze künege dar,
Verse: 4    ze vogete dem grâle und sgrâles schar.

Verse: 5    daz was mîn bruoder Anfortas,
Verse: 6    der krône und rîcheit wirdec was.

Verse: 7    dannoch wir wênec wâren.
Verse: 8    dô mîn bruoder gein den jâren

Verse: 9    kom vür der gransprunge zît,
Verse: 10    mit solher jugent hât minne ir strît:

Verse: 11    sô twinct si ir vriunt sô sêre,
Verse: 12    man mac es ir jehen zunêre.

Verse: 13    swelh grâles herre aber minne gert
Verse: 14    anders dan diu schrift in wert,

Verse: 15    der muoz ez komen zarbeit
Verse: 16    und in siufzebæriu herzeleit.

Verse: 17    mîn herre und der bruoder mîn
Verse: 18    kôs im eine vriundîn,

Verse: 19    des in dûhte, mit guotem site.
Verse: 20    swer diu was, daz sî dâ mite.

Verse: 21    in ir dienest er sich zôch,
Verse: 22    sô daz diu zageheit in vlôch:

Verse: 23    des wart von sîner klâren hant
Verse: 24    verdürkelt manec schiltes rant.

Verse: 25    dâ bejagete an âventiure
Verse: 26    der süeze und der gehiure,

Verse: 27    wart ie hôher prîs erkant
Verse: 28    über elliu ritterlîchiu lant,

Verse: 29    vor dem mære was er der vrîe.
Verse: 30    âmor was sîn krîe:




Chapter: 479 
479


Verse: 1    der ruoft ist zer diemuot
Verse: 2    iedoch niht volleclîchen guot.

Verse: 3    eins tages der künec al eine reit
Verse: 4    (daz was gar den sînen leit)

Verse: 5    ûz durch âventiure
Verse: 6    durch vreude an minnen stiure:

Verse: 7    des twanc in der minnen ger.
Verse: 8    mit einem gelüppeten sper

Verse: 9    wart er ze tjostieren wunt,
Verse: 10    sô daz er nimmer mêr gesunt

Verse: 11    wart, der süeze œheim dîn,
Verse: 12    durch die heidruose sîn

Verse: 13    ez was ein heiden der dâ streit
Verse: 14    und der die selben tjoste reit,

Verse: 15    geborn von Ethnîse,
Verse: 16    dâ ûz dem pardîse

Verse: 17    rinnet diu Tîgris.
Verse: 18    der selbe heiden was gewis,

Verse: 19    sîn ellen solde den grâl behaben.
Verse: 20    in dem sper was sîn name ergraben:

Verse: 21    er suochte die verren ritterschaft,
Verse: 22    niht wan durch des grâles kraft

Verse: 23    streich er wazzer unde lant.
Verse: 24    von sînem strîte uns vreude swant.

Verse: 25    dîns œheims strît man prîsen
Verse: 26    muoz: des spers îsen

Verse: 27    vuorte er in sînem lîbe dan.
Verse: 28    dô der junge werde man

Verse: 29    kom heim zuo den sînen,
Verse: 30    dâ sach man jâmer schînen.




Chapter: 480 
480


Verse: 1    den heiden hete er dort erslagen:
Verse: 2    den sul ouch wir ze mâze klagen.

Verse: 3    dô uns der künec kom sô bleich
Verse: 4    und im sîn kraft gar gesweich,

Verse: 5    in die wunden greif eins arztes hant,
Verse: 6    unz er des spers îsen vant.

Verse: 7    der trunzûn was rœrîn,
Verse: 8    ein teil in der wunden sîn:

Verse: 9    diu gewan der arzet beidiu wider.
Verse: 10    mîne venje viel ich nider:

Verse: 11    dâ lobete ich der gotes kraft,
Verse: 12    daz ich deheine ritterschaft

Verse: 13    getæte nimmer mêre,
Verse: 14    daz got durch sîn êre

Verse: 15    mînem bruoder hülfe von der nôt.
Verse: 16    ich verswuor ouch vleisch, wîn und brôt

Verse: 17    und dar nâch al daz trüege bluot,
Verse: 18    daz ichs nimmer mêr gewünne muot.

Verse: 19    daz was der diet ander klage,
Verse: 20    lieber neve, als ich dir sage,

Verse: 21    daz ich schiet von dem swerte mîn.
Verse: 22    si sprâchen: "wer sol schirmære sîn

Verse: 23    über des grâles tougen?"
Verse: 24    dô weinden liehtiu ougen.

Verse: 25    si truogen den künec sunder twâl
Verse: 26    durch die gotes helfe vür den grâl.

Verse: 27    dô der künec den grâl gesach,
Verse: 28    daz was sîn ander ungemach,

Verse: 29    daz er niht sterben mohte,
Verse: 30    wande im sterben dô niht tohte,




Chapter: 481 
481


Verse: 1    sît daz ich mich hete ergeben
Verse: 2    in alsus armeclîchez leben

Verse: 3    und des edeln artes hêrschaft
Verse: 4    was komen an sô swache kraft.

Verse: 5    des küneges wunde geitert was.
Verse: 6    swaz man der arztbuoche las,

Verse: 7    die engâben deheiner helfe lôn.
Verse: 8    gein apsis, ecidemôn,

Verse: 9    ehcontius und lîsis,
Verse: 10    jêcis und mêâtris

Verse: 11    (die argen slangenz eiter heiz
Verse: 12    tragent), swaz iemen dâ vür weiz

Verse: 13    und vür ander würme diez eiter tragent,
Verse: 14    swaz die wîsen arzte dâ vür bejagent

Verse: 15    mit fîsiken liste an würzen,
Verse: 16    (lâ dir die rede kürzen)

Verse: 17    der deheinz gehelfen kunde:
Verse: 18    got selbe uns des verbunde.

Verse: 19    wir gewunnen Gêôn
Verse: 20    ze helfe unde Fîsôn,

Verse: 21    Eufrâtes und Tîgrîs,
Verse: 22    diu vier wazzer ûz dem pardîs,

Verse: 23    sô nâhe hin zuo ir süezer smac
Verse: 24    dennoch niht sîn verrochen mac,

Verse: 25    ob dehein wurz dinne quæme,
Verse: 26    diu unser trûren næme.

Verse: 27    daz was verlorniu arbeit.
Verse: 28    dô niute sich unser herzeleit:

Verse: 29    doch versuochte wirz in manege wîs.
Verse: 30    dô gewunne wir daz selbe rîs,




Chapter: 482 
482


Verse: 1    dar ûf Sibille jach
Verse: 2    Enêas vür hellesch ungemach

Verse: 3    und vür des Flegetônen rouch,
Verse: 4    vür ander vlüzze die drinne vliezent ouch.

Verse: 5    des nâme wir uns muoze
Verse: 6    und gewunnen zrîs ze buoze,

Verse: 7    ob daz sper ungehiure
Verse: 8    in dem helleschen viure

Verse: 9    wære gelüppet oder gelœtet,
Verse: 10    daz uns an vreuden tœtet.

Verse: 11    dô was dem sper niht alsus.
Verse: 12    ein vogel heizt pelicânus:

Verse: 13    swemne der vruht gewinnet,
Verse: 14    alze sêre er die minnet.

Verse: 15    in twinget sîner triuwe gelust
Verse: 16    daz er bîzet durch sîn selbes brust

Verse: 17    und læt zbluot den jungen in den munt:
Verse: 18    er stirbet an der selben stunt.

Verse: 19    dô gewunne wir des vogels bluot,
Verse: 20    ob uns sîn triuwe wære guot,

Verse: 21    und strichenz an die wunden
Verse: 22    sô wir beste kunden.

Verse: 23    daz mohte uns niht gehelfen sus.
Verse: 24    ein tier heizt monicirus:

Verse: 25    daz erkennet der megede reine sô grôz,
Verse: 26    daz ez slæfet ûf der megede schôz.

Verse: 27    wir gewunnen stieres herzen
Verse: 28    über des küneges smerzen.

Verse: 29    wir nâmen den karfunkelstein
Verse: 30    ûf des selben tieres hirnbein,




Chapter: 483 
483


Verse: 1    der dâ wehset under sînem horne.
Verse: 2    wir bestrichen die wunden vorne

Verse: 3    und besouften den stein drinne gar:
Verse: 4    diu wunde was et lüppec var.

Verse: 5    daz tet uns mit dem künege wê.
Verse: 6    wir gewunnen eine wurz heizt trachontê

Verse: 7    (wir hœren von der würze sagen,
Verse: 8    swâ ein trache werde erslagen,

Verse: 9    si wahse von dem bluote.
Verse: 10    der würze ist sô ze muote,

Verse: 11    si hât al des luftes art),
Verse: 12    ob uns des trachen ummevart

Verse: 13    dar zuo möhte iht gevromen.
Verse: 14    vür der sterne wider komen

Verse: 15    und vür des mânen wandeltac,
Verse: 16    dar an der wunden smerze lac,

Verse: 17    der würze edel hôch geslehte
Verse: 18    kom uns dâ vür niht rehte.

Verse: 19    unser venje viele wir vür den grâl.
Verse: 20    dar an gesâhe wir zeinem mâl

Verse: 21    geschriben, dar solde ein ritter komen:
Verse: 22    würde des vrâge aldâ vernomen,

Verse: 23    sô solde der kummer ende hân.
Verse: 24    ez wære kint, maget oder man,

Verse: 25    daz in der vrâge warnete iht,
Verse: 26    sô ensolde diu vrâge helfen niht,

Verse: 27    wan daz der schade stüende alsê
Verse: 28    und herzelîcher tæte wê.

Verse: 29    diu schrift sprach: "habet ir daz vernomen?
Verse: 30    iuwer warnen mac ze schaden komen.




Chapter: 484 
484


Verse: 1    vrâct er niht bî der êrsten naht,
Verse: 2    sô zegêt sîner vrâge maht:

Verse: 3    wirt sîn vrâge an rehter zît getân,
Verse: 4    sô sol er zkünecrîche hân

Verse: 5    und hât der kummer ende.
Verse: 6    von der hœsten hende

Verse: 7    dâ mite ist Anfortas genesen,
Verse: 8    er ensol aber niemêr künec wesen."

Verse: 9    sus lâse wir an dem grâle
Verse: 10    daz Anfortases quâle

Verse: 11    dâ mite ein ende næme,
Verse: 12    swenne im diu vrâge quæme.

Verse: 13    wir strichen an die wunden
Verse: 14    swâ mite wir senften kunden,

Verse: 15    die guoten salben nardas
Verse: 16    und swaz gedrîakelt was

Verse: 17    und den rouch von lignâlôê:
Verse: 18    im was et zallen zîten wê.

Verse: 19    dô zôch ich mich dâ her:
Verse: 20    swachiu wünne ist mîner jâre wer.

Verse: 21    sît kom ein ritter dar geriten
Verse: 22    (der möhtez gerne hân vermiten),

Verse: 23    von dem ich dir ê sagete.
Verse: 24    unprîs der dâ bejagete,

Verse: 25    sît er den rehten kummer sach,
Verse: 26    daz er niht zuo dem wirte sprach:

Verse: 27    "herre, wie stêt iuwer nôt?"
Verse: 28    sît im sîn tumpheit daz gebôt

Verse: 29    daz er aldâ niht vrâcte,
Verse: 30    grôzer sælde in dô betrâcte."




Chapter: 485 
485


Verse: 1    si beide wâren mit herzen klage.
Verse: 2    dô nâhete ez dem mitten tage:

Verse: 3    der wirt sprach: "gê wir nâch der nar.
Verse: 4    dîn ors ist unberâten gar:

Verse: 5    ich mac uns selben niht gespîsen,
Verse: 6    es enwelle uns got bewîsen.

Verse: 7    mîn küche riuchet selten:
Verse: 8    des muostû hiute engelten

Verse: 9    und al die wîle dû bî mir bist.
Verse: 10    ich solde dich hiute lêren list

Verse: 11    an den würzen, lieze uns der snê.
Verse: 12    got gebe daz der schier zegê.

Verse: 13    nû brechen die wîle îwîn graz.
Verse: 14    ich wæne dîn ors dicke gaz

Verse: 15    ze Munsalvæsche baz dan hie.
Verse: 16    dû noch ez ze wirte nie

Verse: 17    kômt, der iuwer gerner phlæge,
Verse: 18    ob ez hie bereitez læge."

Verse: 19    si giengen ûz um ir bejac.
Verse: 20    Parzivâl des vuoters phlac.

Verse: 21    der wirt gruop im würzelîn:
Verse: 22    daz muoste ir beste spîse sîn.

Verse: 23    der wirt sîner orden niht vergaz:
Verse: 24    swie vil er gruop, deheine er az

Verse: 25    der würze vor der nône,
Verse: 26    an die stûden schône

Verse: 27    hienc er si und suochte mêre.
Verse: 28    durch die gotes êre

Verse: 29    manegen tac ungâz er gienc,
Verse: 30    so er vermiste dâ sîn spîse hienc.




Chapter: 486 
486


Verse: 1    die zwêne gesellen niht verdrôz,
Verse: 2    si giengen dâ der brunne vlôz,

Verse: 3    si wuoschen würze und ir krût.
Verse: 4    ir munt wart selten lachens lût.

Verse: 5    ieweder sîne hende
Verse: 6    twuoc. an einem gebende

Verse: 7    truoc Parzivâl îwîn loup
Verse: 8    vürz ors. ûf ir ramschoup

Verse: 9    giengen si wider ze den ir koln.
Verse: 10    man dorfte in niht mêr spîse holn:

Verse: 11    dâ enwas gesoten noch gebrâten
Verse: 12    und ir küchen unberâten.

Verse: 13    Parzivâl mit sinne
Verse: 14    durch die getriuwe minne

Verse: 15    die er gein sînem wirte truoc,
Verse: 16    in dûhte er hete baz genuoc

Verse: 17    dan dô sîn phlac Gurnemanz
Verse: 18    und dô sô maneger vrouwen varwe glanz

Verse: 19    ze Munsalvæsche vür in gienc,
Verse: 20    dâ er wirtschaft von dem grâle emphienc.

Verse: 21    der wirt mit triuwen wîse
Verse: 22    sprach: "neve, disiu spîse

Verse: 23    sol dir niht versmâhen.
Verse: 24    dû envündes in allen gâhen

Verse: 25    deheinen wirt der dir gunde baz
Verse: 26    guoter wirtschaft âne haz."

Verse: 27    Parzivâl sprach: "herre,
Verse: 28    der gotes gruoz mir verre,

Verse: 29    ob mich ie baz gezæme
Verse: 30    swes ich von wirte næme."




Chapter: 487 
487


Verse: 1    swaz dâ was spîse vür getragen,
Verse: 2    beliben si dâ nâch ungetwagen,

Verse: 3    daz enschadete in an den ougen niht,
Verse: 4    als man vischegen handen giht.

Verse: 5    ich wil vür mich geheizen,
Verse: 6    man möhte mit mir beizen,

Verse: 7    wære ich vür vederspil erkant,
Verse: 8    ich swünge al gernde von der hant,

Verse: 9    bî solhen kröphelînen
Verse: 10    tæte ich vliegen schînen.

Verse: 11    wes spotte ich der getriuwen diet?
Verse: 12    mîn alt unvuoge mir daz riet.

Verse: 13    ir hât doch wol gehœret
Verse: 14    waz in rîcheit hât gestœret,

Verse: 15    war um si wâren vreuden arm,
Verse: 16    dicke kalt und selten warm.

Verse: 17    si dolten herzen riuwe
Verse: 18    niht wan durch rehte triuwe

Verse: 19    âne alle missewende.
Verse: 20    von der hœsten hende

Verse: 21    emphiengen si um ir kummer solt:
Verse: 22    got was und wart in beiden holt.

Verse: 23    si stuonden ûf und giengen dan,
Verse: 24    Parzivâl und der guote man,

Verse: 25    zem orse gein dem stalle.
Verse: 26    mit kranker vreuden schalle

Verse: 27    der wirt zem orse sprach: "mirst leit
Verse: 28    dîn hungerbæriu arbeit

Verse: 29    durch den satel der ûf dir liget,
Verse: 30    der Anfortases wâpen phliget."




Chapter: 488 
488


Verse: 1    dô si daz ors begiengen,
Verse: 2    niuwe klage si ane geviengen.

Verse: 3    Parzivâl zem wirte sîn
Verse: 4    sprach: "herre und lieber œheim mîn,

Verse: 5    getorste ichz iu vor schame gesagen,
Verse: 6    mîn ungelücke ich solde klagen.

Verse: 7    daz verkiest durch iuwer selbes zuht:
Verse: 8    mîn triuwe hât doch gein iu vluht.

Verse: 9    ich hân sô sêre missetân,
Verse: 10    welt ir michs engelten lân,

Verse: 11    sô scheide ich von dem trôste
Verse: 12    und bin der unerlôste

Verse: 13    immer mêr von riuwe.
Verse: 14    ir sult mit râtes triuwe

Verse: 15    klagen mîne tumpheit.
Verse: 16    der ûf Munsalvæsche reit

Verse: 17    und der den rehten kummer sach
Verse: 18    und der deheine vrâge sprach,

Verse: 19    daz bin ich unsælec barn.
Verse: 20    sus hân ich, herre, missevarn."

Verse: 21    der wirt sprach: "neve, waz sagestû nuo?
Verse: 22    wir suln beide samt zuo

Verse: 23    herzenlîcher klage grîfen
Verse: 24    und die vreude lâzen slîfen,

Verse: 25    sît dîn kunst sich sælden sus verzêch.
Verse: 26    dô dir got vünf sinne lêch

Verse: 27    (die hânt ir rât dir vor bespart),
Verse: 28    wie was dîn triuwe von in bewart

Verse: 29    an den selben stunden
Verse: 30    bî Anfortases wunden?




Chapter: 489 
489


Verse: 1    doch wil ich râtes niht verzagen.
Verse: 2    dû ensolt ouch niht ze sêre klagen:

Verse: 3    dû solt in rehten mâzen
Verse: 4    klagen und klagen lâzen.

Verse: 5    diu mennescheit hât wilden art.
Verse: 6    etswâ wil jugent an witze vart:

Verse: 7    wil dennez alter tumpheit üeben
Verse: 8    und lûter site trüeben,

Verse: 9    dâ von wirt daz wîze sal
Verse: 10    und diu grüene tugent val,

Verse: 11    dâ von beklîben möhte
Verse: 12    daz der werdekeit töhte.

Verse: 13    möhte ich dirz wol begrüenen
Verse: 14    und dîn herze alsô erküenen

Verse: 15    daz dû den prîs bejagetes
Verse: 16    und an got niht verzagetes,

Verse: 17    sô gestüende noch dîn linge
Verse: 18    an sô werdeclîchem dinge,

Verse: 19    daz wol ergetzet hieze.
Verse: 20    got selbe dich niht lieze:

Verse: 21    ich bin von gote dîn râtes wer.
Verse: 22    nû sage mir, sæhe dû daz sper

Verse: 23    ze Munsalvæsche ûf dem hûs?
Verse: 24    dô der sterne Saturnûs

Verse: 25    wider an sîn zil gestuont
Verse: 26    (daz wart uns bî der wunden kunt

Verse: 27    und bî dem sumerlîchen snê),
Verse: 28    im getet der vrost nie sô wê,

Verse: 29    dem süezen œheime dîn.
Verse: 30    daz sper muoste in die wunden sîn:




Chapter: 490 
490


Verse: 1    dâ half ein nôt vür die andern nôt.
Verse: 2    des wart daz sper bluotec rôt.

Verse: 3    etslîcher sterne komende tage
Verse: 4    die diet dâ lêret jâmers klage,

Verse: 5    die sô hôhe ob ein ander stênt
Verse: 6    und ungelîche wider gênt,

Verse: 7    und des mânen wandelkêre
Verse: 8    schadet ouch zer wunden sêre.

Verse: 9    dise zît diech hie benennet hân,
Verse: 10    sô muoz der künec ruowe lân:

Verse: 11    sô tuot im grôzer vrost sô wê,
Verse: 12    sîn vleisch wirt kelter dan der snê.

Verse: 13    sît man daz gelüppe heiz
Verse: 14    an dem spers îsen weiz,

Verse: 15    die zît manz ûf die wunden leget:
Verse: 16    den vrost ez ûz dem lîbe treget,

Verse: 17    al um daz sper glasvar als îs.
Verse: 18    daz enmohte aber deheinen wîs

Verse: 19    von dem sper niemen bringen dan,
Verse: 20    wan Trebuchet der wîse man:

Verse: 21    der worhte zwei mezzer, diu ez sniten,
Verse: 22    ûz silber, diu ez niht vermiten.

Verse: 23    den list tet im ein segen kunt,
Verse: 24    der an des küneges swerte stuont.

Verse: 25    maneger ist der gerne niht:
Verse: 26    aspindê daz holz enbrinne niht:

Verse: 27    sô dises glases drûf iht spranc,
Verse: 28    viurlohen dâ nâch swanc,

Verse: 29    aspindê dâ von verbran.
Verse: 30    waz wunders diz gelüppe kan!




Chapter: 491 
491


Verse: 1    er mac gerîten noch gegên,
Verse: 2    der künec, noch geligen noch gestên:

Verse: 3    er lent âne sitzen
Verse: 4    mit siufzebæren witzen.

Verse: 5    gein des mânen wandel ist im wê.
Verse: 6    Brumbâne ist genant ein sê:

Verse: 7    dâ treget man in ûf durch süezen luft
Verse: 8    durch sîner sûren wunden gruft.

Verse: 9    daz heizt er sînen weidetac:
Verse: 10    swaz er aldâ gevâhen mac

Verse: 11    bî sô smerzlîchem sêre,
Verse: 12    er bedarf dâ heime mêre.

Verse: 13    dâ von kom ûz ein mære,
Verse: 14    er wære ein vischære.

Verse: 15    daz mære muoste er lîden:
Verse: 16    salmen, lamprîden

Verse: 17    hât er doch lützel veile."
Verse: 18    der trûrege, niht der geile,

Verse: 19    Parzivâl sprach al zehant:
Verse: 20    "in dem sê den künec ich vant

Verse: 21    geankert ûf dem wâge,
Verse: 22    ich wæne durch vische lâge

Verse: 23    oder durch ander kurzwîle.
Verse: 24    ich hete manege mîle

Verse: 25    des tages dar gestrichen:
Verse: 26    Pelrapeire ich was entwichen

Verse: 27    rehte um den mitten morgen.
Verse: 28    des âbents phlac ich sorgen,

Verse: 29    wâ diu herberge möhte sîn:
Verse: 30    der beriet mich der œheim mîn."




Chapter: 492 
492


Verse: 1    "dû rite ein angestlîche vart,"
Verse: 2    sprach der wirt, "durch warte wol bewart.

Verse: 3    ieslîchiu sô besetzet ist
Verse: 4    mit rotte, selten iemens list

Verse: 5    in hilfet gein der reise.
Verse: 6    er kêrte ie gein der vreise,

Verse: 7    swer jenen her dâ zuo zin reit:
Verse: 8    si nement niemens sicherheit,

Verse: 9    si wâgent ir leben gein jenes leben.
Verse: 10    daz ist vür sünde in dâ gegeben."

Verse: 11    "nû kom ich âne strîten
Verse: 12    an den selben zîten

Verse: 13    geriten dâ der künec was"
Verse: 14    sprach Parzivâl. "des palas

Verse: 15    sach ich des âbents jâmers vol.
Verse: 16    wie tet in jâmer dô sô wol?

Verse: 17    ein knappe aldâ zer tür în spranc,
Verse: 18    dâ von der palas jâmers klanc.

Verse: 19    der truoc in sînen henden
Verse: 20    einen schaft zen vier wenden,

Verse: 21    dar inne ein sper bluotec rôt.
Verse: 22    des kom diu diet in jâmers nôt."

Verse: 23    der wirt sprach: "neve, sît nochê
Verse: 24    wart dem künege nie sô wê,

Verse: 25    wan dô sîn komen zeicte sus
Verse: 26    der sterne Saturnus:

Verse: 27    der kan mit grôzem vroste komen.
Verse: 28    drûf legen mohte uns niht gevromen,

Verse: 29    als manz ê drûfe ligen sach:
Verse: 30    daz sper man in die wunden stach.




Chapter: 493 
493


Verse: 1    Saturnus louft sô hôhe enbor,
Verse: 2    daz ez diu wunde wesse vor,

Verse: 3    ê der ander vrost kœme her nâch.
Verse: 4    dem snê was ninder alsô gâch,

Verse: 5    er viel alrêst an der andern naht.
Verse: 6    in der sumerlîchen maht,

Verse: 7    dô man sküneges vrost sus werte,
Verse: 8    die diet ez vreuden herte."

Verse: 9    dô sprach der kiusche Trevrizent:
Verse: 10    "si emphiengen jâmers soldiment:

Verse: 11    daz sper in vreude entvuorte,
Verse: 12    daz ir herzen verh sus ruorte.

Verse: 13    dô machte ir jâmers triuwe
Verse: 14    des toufes lêre al niuwe."

Verse: 15    Parzivâl zem wirte sprach:
Verse: 16    "vünf und zweinzec megede ich dâ sach,

Verse: 17    die vor dem künege stuonden
Verse: 18    und wol mit zühten kunden."

Verse: 19    der wirt sprach: "es suln megede phlegen
Verse: 20    (des hât sich got gein im bewegen),

Verse: 21    des grâls, dem si dâ dienden vür.
Verse: 22    der grâl ist mit hôher kür.

Verse: 23    sô suln sîn ritter hüeten
Verse: 24    mit kiuscheclîchen güeten.

Verse: 25    der hôhen sterne komendiu zît
Verse: 26    der diet aldâ grôz jâmer gît,

Verse: 27    den jungen und den alden.
Verse: 28    got hât zorn behalden

Verse: 29    gein in alze lange dâ:
Verse: 30    wenne suln si vreude sprechen jâ?




Chapter: 494 
494


Verse: 1    neve, nû wil ich sagen dir
Verse: 2    daz dû maht wol gelouben mir,

Verse: 3    ein schanze dicke stêt vor in:
Verse: 4    si gebent unde nement gewin.

Verse: 5    si emphâhent kleiniu kinder dar
Verse: 6    von hôher art und wol gevar.

Verse: 7    wirt iender herrenlôs ein lant,
Verse: 8    erkennent si dâ die gotes hant,

Verse: 9    sô daz diu diet eins herren gert,
Verse: 10    von sgrâles schar die sint gewert.

Verse: 11    des müezen ouch si mit zühten phlegen:
Verse: 12    sîn hüetet aldâ der gotes segen.

Verse: 13    got schaffet verholne dan die man,
Verse: 14    offenlîch gît man megede dan.

Verse: 15    dû solt des sîn vil gewis,
Verse: 16    daz der künec Castis

Verse: 17    Herzeloiden gerte,
Verse: 18    der man in schône werte:

Verse: 19    dîne muoter gap man im ze konen.
Verse: 20    er solde aber niht ir minne wonen:

Verse: 21    der tôt in ê legete in daz grap.
Verse: 22    dâ vor er dîner muoter gap

Verse: 23    Wâleis und Norgâls,
Verse: 24    Kanvoleiz und Kingrivâls,

Verse: 25    daz ir mit sal wart gegeben.
Verse: 26    der künec niht langer solde leben.

Verse: 27    diz was ûf sîner reise wider:
Verse: 28    der künec sich legete sterbens nider.

Verse: 29    dô truoc si krône über zwei lant:
Verse: 30    dâ erwarp si Gahmuretes hant.




Chapter: 495 
495


Verse: 1    sus gît man von dem grâle dan
Verse: 2    offenlîch megede, verholne die man

Verse: 3    durch vruht ze dienste wider dar,
Verse: 4    ob ir kint des grâles schar

Verse: 5    mit dieneste suln mêren.
Verse: 6    daz kan si got wol lêren.

Verse: 7    swer sich dienstes gein grâle hât bewegen,
Verse: 8    gein wîben minne er muoz verphlegen:

Verse: 9    wan der künec sol haben eine
Verse: 10    ze rehte eine kronen reine

Verse: 11    und ander die got hât gesant
Verse: 12    ze herren in herrenlôsiu lant.

Verse: 13    über daz gebot ich mich bewac
Verse: 14    daz ich nâch minnen dienstes phlac.

Verse: 15    mir geriet mîn vlæteclîchiu jugent
Verse: 16    und eins werden wîbes tugent,

Verse: 17    daz ich in ir dienest reit,
Verse: 18    dâ ich dicke herteclîchen streit.

Verse: 19    die wilden âventiure
Verse: 20    mich dûhten sô gehiure,

Verse: 21    daz ich selten turnierte.
Verse: 22    ir minne kondewierte

Verse: 23    mir vreude in daz herze mîn,
Verse: 24    durch si tet ich vil strîtes schîn:

Verse: 25    des twanc mich ir minnen kraft
Verse: 26    gein der wilden verren ritterschaft.

Verse: 27    ir minne ich alsus koufte:
Verse: 28    der heiden und der getoufte

Verse: 29    wâren mir strîtes al gelîch.
Verse: 30    si dûhte mich lônes rîch.




Chapter: 496 
496


Verse: 1    sus phlac ichs durch die werden
Verse: 2    ûf den drîn teilen der erden,

Verse: 3    z Eurôpâ und in âsiâ
Verse: 4    unde verre in Afrikâ.

Verse: 5    sô ich rîche tjoste wolde tuon,
Verse: 6    sô reit ich vür Gauriûn.

Verse: 7    ich hân ouch manege tjost getân
Verse: 8    vor dem berc ze Feimorgân.

Verse: 9    ich tet vil rîcher tjoste schîn
Verse: 10    vor dem berc z Agremontîn.

Verse: 11    swer einhalp wil ir tjoste hân,
Verse: 12    dâ koment ûz viurege man:

Verse: 13    anderhalp si brinnent niht,
Verse: 14    swaz man dâ tjostiure siht.

Verse: 15    und dô ich vür den Rôhas
Verse: 16    durch âventiur gestrichen was,

Verse: 17    dâ kom ein werdiu windesch diet
Verse: 18    ûz durch tjoste gegenbiet.

Verse: 19    ich vuor von Sibilje
Verse: 20    daz mer alum gein Zilje,

Verse: 21    durch Frîûl ûz vür Aglei.
Verse: 22    ouwê unde heiâ hei

Verse: 23    daz ich dînen vater ie gesach,
Verse: 24    der mir ze sehene aldâ geschach,

Verse: 25    dô ich ze Sibilje zogete în.
Verse: 26    dô hete der werde Anschevîn

Verse: 27    vor mir geherberget ê.
Verse: 28    sîn vart tuot mir immer wê,

Verse: 29    die er vuor ze Baldac:
Verse: 30    ze tjostieren er dâ tôt lac,




Chapter: 497 
497


Verse: 1    daz was ê von im dîn sage.
Verse: 2    ez ist immer mînes herzen klage.

Verse: 3    mîn bruoder ist guotes rîche:
Verse: 4    verholne ritterlîche

Verse: 5    er mich dicke von im sande.
Verse: 6    sô ich von Munsalvæsche wande,

Verse: 7    sîn insigel nam ich dâ
Verse: 8    und vuortez ze Karcobrâ,

Verse: 9    dâ sich sêwet der Plimizôl.
Verse: 10    in dem bistuom ze Barbigôl

Verse: 11    der burcgrâve mich dâ beriet
Verse: 12    ûfz insigel, ê ich von im schiet,

Verse: 13    knappen und ander koste
Verse: 14    gein der wilden tjoste

Verse: 15    und ûf ander ritterlîche vart.
Verse: 16    des wart vil wênec von im gespart:

Verse: 17    ich muoste al eine komen dar.
Verse: 18    an der widerreise liez ich gar

Verse: 19    bî im swaz ich gesindes phlac:
Verse: 20    ich reit dâ Munsalvæsche lac.

Verse: 21    nû hœre, lieber neve mîn.
Verse: 22    dô mich der werde vater dîn

Verse: 23    ze Sibilje alrêste sach,
Verse: 24    balde er mîn ze bruoder jach

Verse: 25    Herzeloiden sînem wîbe,
Verse: 26    doch wart von sînem lîbe

Verse: 27    mîn antlitze niemêr gesehen.
Verse: 28    man muoste ouch mir vür wâr dâ jehen

Verse: 29    daz nie schœner mannes bilde wart:
Verse: 30    dannoch was ich âne bart.




Chapter: 498 
498


Verse: 1    in mîne herberge er vuor.
Verse: 2    vür dise rede ich dicke swuor

Verse: 3    manegen ungestabeten eit.
Verse: 4    dô er mich sô vil ane gestreit,

Verse: 5    verholne ichz im dô sagete,
Verse: 6    des er vreude vil bejagete.

Verse: 7    er gap sîn kleinœte mir:
Verse: 8    swaz ich im gap daz was sîn gir.

Verse: 9    mîne kefsen, die dû sæhe ê,
Verse: 10    (diust noch grüener dan der klê)

Verse: 11    hiez ich würken ûz einem steine,
Verse: 12    den mir gap der reine.

Verse: 13    sînen neven er mir ze knehte liez,
Verse: 14    îthêren, den sîn herze hiez

Verse: 15    daz aller valsch an im verswant,
Verse: 16    den künec von Kucûmerlant.

Verse: 17    wir mohten vart niht langer sparn,
Verse: 18    wir muosten von ein ander varn:

Verse: 19    er kêrte dâ der bâruc was
Verse: 20    und ich vuor vür den Rôhas.

Verse: 21    ûz Zilje ich vür den Rôhas reit,
Verse: 22    drî mântage ich dâ vil gestreit:

Verse: 23    mich dûhte, ich hete dâ wol gestriten.
Verse: 24    dar nâch ich schierest kom geriten

Verse: 25    in die wîten Gandîne,
Verse: 26    dâ nâch der ane dîne

Verse: 27    Gandîn wart genennet.
Verse: 28    dâ wart îthêr bekennet.

Verse: 29    diu selbe stat liget aldâ,
Verse: 30    dâ diu Greiân in die Trâ,




Chapter: 499 
499


Verse: 1    mit golde ein wazzer, rinnet.
Verse: 2    dâ wart îthêr geminnet:

Verse: 3    dîne basen er dâ vant.
Verse: 4    diu was vrouwe überz lant:

Verse: 5    Gandîn von Anschouwe
Verse: 6    hiez si dâ wesen vrouwe.

Verse: 7    si heizet Lammîre:
Verse: 8    sôst zlant genennet Stîre.

Verse: 9    swer schiltes ammet üeben wil,
Verse: 10    der muoz durchstrîchen lande vil.

Verse: 11    nû riuwet mich mîn knappe rôt,
Verse: 12    durch den si mir grôz êre bôt.

Verse: 13    von îthêren dû bist erborn.
Verse: 14    dîn hant die sippe hât verkorn:

Verse: 15    got hât ir niht vergezzen doch,
Verse: 16    er kan si wol geprüeven noch.

Verse: 17    wiltû gein gote mit triuwen leben,
Verse: 18    sô soltû im wandel drumme geben.

Verse: 19    mit riuwe ich dir daz künde,
Verse: 20    dû treges zwuo grôze sünde:

Verse: 21    îthêren dû hâs erslagen,
Verse: 22    dû solt ouch dîne muoter klagen.

Verse: 23    ir grôziu triuwe daz geriet,
Verse: 24    dîn vart si von dem leben schiet,

Verse: 25    die dû jungest von ir tæte.
Verse: 26    nû volge mîner ræte,

Verse: 27    nim buoze vür missewende
Verse: 28    und sorge et um dîn ende,

Verse: 29    daz dir dîn arbeit hie erhol
Verse: 30    daz dort diu sêle ruowe dol."




Chapter: 500 
500


Verse: 1    der wirt âne allez bâgen
Verse: 2    begunde in vürbaz vrâgen:

Verse: 3    "neve, noch hân ich niht vernomen,
Verse: 4    wannen dir diz ors sî komen."

Verse: 5    "herre, daz ors ich erstreit,
Verse: 6    dô ich von Sigûnen reit.

Verse: 7    vor einer klôsen ich die sprach:
Verse: 8    dar nâch ich vlügelingen stach

Verse: 9    einen ritter drabe und zôch ez dan.
Verse: 10    von Munsalvæsche was der man."

Verse: 11    der wirt sprach: "ist aber der genesen,
Verse: 12    des ez von rehte solde wesen?"

Verse: 13    "herre, ich sach in vor mir gên
Verse: 14    und vant daz ors bî mir stên."

Verse: 15    "wiltû sgrâles volc sus rouben
Verse: 16    und dâ bî des gelouben,

Verse: 17    dû gewinnes ir noch minne,
Verse: 18    sô zweient sich die sinne."

Verse: 19    "herre, ich namz in einem strît.
Verse: 20    swer mir dar um sünde gît,

Verse: 21    der prüeve alrêst wie diu stê.
Verse: 22    mîn ors hete ich verlorn ê."

Verse: 23    dô sprach aber Parzivâl:
Verse: 24    "wer was ein maget diu den grâl

Verse: 25    truoc? ir mantel lêch man mir."
Verse: 26    der wirt sprach: "neve, was er ir,

Verse: 27    diu selbe ist dîn muome.
Verse: 28    si enlêch dirs niht ze ruome:

Verse: 29    si wânde dû soldes dâ herre sîn
Verse: 30    des grâles und ir, dar zuo mîn.




Chapter: 501 
501


Verse: 1    dîn œheim gap dir ouch ein swert,
Verse: 2    dâ mite dû sünden bist gewert,

Verse: 3    sît daz dîn wol redender munt
Verse: 4    dâ leider niht tet vrâge kunt:

Verse: 5    die sünde lâ bî den andern stên.
Verse: 6    wir suln ouch tâlanc ruowen gên."

Verse: 7    wênec wart in bette und kulter brâht:
Verse: 8    si giengen et ligen ûf ein bâht.

Verse: 9    daz leger was ir hôhen art
Verse: 10    gelîche ninder dâ bewart.

Verse: 11    sus was er dâ vünfzehen tage.
Verse: 12    der wirt sîn phlac als ich iu sage:

Verse: 13    krût unde würzelîn
Verse: 14    daz muoste ir bestiu spîse sîn.

Verse: 15    Parzivâl die swære
Verse: 16    truoc durch süeziu mære,

Verse: 17    wande in der wirt von sünden schiet
Verse: 18    und im doch ritterlîchen riet.

Verse: 19    eins tages vrâcte in Parzivâl:
Verse: 20    "wer was ein man lac vor dem grâl?

Verse: 21    der was al grâ bî liehtem vel."
Verse: 22    der wirt sprach: "daz was Titurel.

Verse: 23    der selbe ist dîner muoter ane.
Verse: 24    dem wart alrêst des grâles vane

Verse: 25    bevolhen durch schermens rât.
Verse: 26    ein siechtuom heizet pôgrât

Verse: 27    treget er, die leme helfelôs.
Verse: 28    sîne varwe er iedoch nie verlôs,

Verse: 29    wande er den grâl sô dicke siht,
Verse: 30    dâ von er mac ersterben niht.




Chapter: 502 
502


Verse: 1    durch rât si hânt den betterisen.
Verse: 2    in sîner jugent vürte und wisen

Verse: 3    reit er vil durch tjostieren.
Verse: 4    wiltû dîn leben zieren

Verse: 5    und rehte werdeclîchen varn,
Verse: 6    sô muostû haz gein wîben sparn.

Verse: 7    wîp und phaffen sint erkant,
Verse: 8    die tragent unwerlîche hant:

Verse: 9    sô reicht über phaffen gotes segen.
Verse: 10    der sol dîn dienst mit triuwen phlegen

Verse: 11    dar um, ob wirt dîn ende guot.
Verse: 12    dû muost zen phaffen haben muot:

Verse: 13    swaz dîn ouge ûf erden siht,
Verse: 14    daz gelîchet sich dem priester niht.

Verse: 15    sîn munt die marter sprichet,
Verse: 16    diu unser vlust zebrichet.

Verse: 17    ouch grîfet sîn gewîhtiu hant
Verse: 18    an daz hœheste phant

Verse: 19    daz ie vür schult gesetzet wart:
Verse: 20    swelh priester sich hât sô bewart

Verse: 21    daz er dem kiusche kan gegeben,
Verse: 22    wie möhte der heileclîcher leben?"

Verse: 23    diz was ir zweier scheidens tac.
Verse: 24    Trevrizent sich des bewac,

Verse: 25    er sprach: "gip mir dîn sünde her
Verse: 26    (vor gote ich bin dîn wandels wer)

Verse: 27    und leiste als ich dir hân gesaget.
Verse: 28    belîp des willen unverzaget."

Verse: 29    von ein ander schieden sie:
Verse: 30    ob ir welt, sô prüevet wie.




Chapter: 503 
503


Verse: 1    Ez næhet nû wilden mæren,
Verse: 2    diu vreuden kunnen læren

Verse: 3    und diu hôchgemüete bringent:
Verse: 4    mit den beiden si ringent.

Verse: 5    Nû was ez ouch über des jâres zît,
Verse: 6    gescheiden was des kamphes strît,

Verse: 7    den der lantgrâve zem Plimizôl
Verse: 8    erwarp. der was ze Barbigôl

Verse: 9    von Schanfanzûn gesprochen:
Verse: 10    dâ beleip ungerochen

Verse: 11    der künec Kingrisîn.
Verse: 12    Vergulaht der sun sîn

Verse: 13    kom gein Gâwâne dar:
Verse: 14    dô nam diu werlt ir sippe war

Verse: 15    und schiet den kamph ir sippe maht,
Verse: 16    wande ouch der grâve Ehcunaht

Verse: 17    ûf im die grôzen schulde truoc,
Verse: 18    der man Gâwân zêch genuoc.

Verse: 19    des verkôs Kingrimursel
Verse: 20    ûf Gâwân den degen snel.

Verse: 21    si vuoren beide sunder dan,
Verse: 22    Vergulaht und Gâwân,

Verse: 23    an dem selben mâle
Verse: 24    durch vorschen nâch dem grâle,

Verse: 25    aldâ si mit ir henden
Verse: 26    manege tjoste muosten senden.

Verse: 27    wan swer sgrâles gerte,
Verse: 28    dô muoste mit dem swerte

Verse: 29    sich dem prîse nâhen.
Verse: 30    sus sol man prîses gâhen.




Chapter: 504 
504


Verse: 1    wiez Gâwâne komen sî,
Verse: 2    der ie was missewende vrî,

Verse: 3    sît er von Schanfanzûn geschiet,
Verse: 4    ob sîn reise ûf strît geriet,

Verse: 5    des jehen diez dâ sâhen:
Verse: 6    er muoz nû strîte nâhen.

Verse: 7    eins morgens kom mîn her Gâwân
Verse: 8    geriten ûf einen grüenen plân:

Verse: 9    dâ sach er blicken einen schilt,
Verse: 10    dâ was ein tjoste durch gezilt,

Verse: 11    und ein phert daz vrouwen gereite truoc.
Verse: 12    des zoum und satel was tiur genuoc,

Verse: 13    ez was gebunden vaste
Verse: 14    ze dem schilte an einem aste.

Verse: 15    dô dâhte er: "wer mac sîn diz wîp,
Verse: 16    diu alsus werlîchen lîp

Verse: 17    hât, daz si schiltes phliget?
Verse: 18    ob si sich strîts gein mir bewiget,

Verse: 19    wie sol ich mich ir erwern?
Verse: 20    ze vuoz trûwe ich mich wol ernern.

Verse: 21    wil si die lenge ringen,
Verse: 22    si mac mich nider bringen,

Verse: 23    ich erwerbes haz oder gruoz.
Verse: 24    sol dâ ein tjost ergên ze vuoz,

Verse: 25    obz halt vrou Kamille wære,
Verse: 26    diu mit ritterlîchem mære

Verse: 27    vor Laurent prîs erstreit,
Verse: 28    wære si gesunt als si dort reit,

Verse: 29    ez würde iedoch versuocht an sie,
Verse: 30    ob si mir strîten büte alhie."




Chapter: 505 
505


Verse: 1    der schilt was ouch verhouwen.
Verse: 2    Gâwân begunde in schouwen,

Verse: 3    dô er dar zuo was geriten:
Verse: 4    der tjoste venster was gesniten

Verse: 5    mit der glævîne wît.
Verse: 6    alsus mâlet si der strît:

Verse: 7    wer gültes den schiltæren,
Verse: 8    ob ir varwe alsus wæren?

Verse: 9    der linden grôz was der stam.
Verse: 10    ouch saz ein vrouwe an vreuden lam

Verse: 11    dâ hinder ûf grüenem klê:
Verse: 12    der tet grôz jâmer alsô wê,

Verse: 13    daz si der vreude gar vergaz.
Verse: 14    er reit hin um gein ir baz.

Verse: 15    ir lac ein ritter in der schôz,
Verse: 16    dâ von ir jâmer was sô grôz.

Verse: 17    Gâwân sîn grüezen niht versweic,
Verse: 18    diu vrouwe im dancte unde neic.

Verse: 19    er vant ir stimme heise,
Verse: 20    verschrît durch ir vreise.

Verse: 21    dô erbeizte mîn her Gâwân.
Verse: 22    dâ lac durchstochen ein man,

Verse: 23    dem gienc daz bluot in den lîp.
Verse: 24    dô vrâcte er des heldes wîp,

Verse: 25    ob der ritter lebete
Verse: 26    oder mit dem tôde strebete.

Verse: 27    dô sprach si: "herre, er lebet noch:
Verse: 28    ich wæne dast unlenge doch.

Verse: 29    got sande iuch mir ze trôste her.
Verse: 30    nû râtet nâch iuwer triuwen ger:




Chapter: 506 
506


Verse: 1    ir habet kummers mêr dan ich gesehen,
Verse: 2    lât iuwern trôst an mir geschehen,

Verse: 3    daz ich iuwer helfe schouwe."
Verse: 4    "ich tuon," sprach er, "vrouwe.

Verse: 5    disem ritter wolde ich sterben wern,
Verse: 6    ich trûte in harte wol ernern,

Verse: 7    hete ich eine rœren.
Verse: 8    sehen unde hœren

Verse: 9    möhtet ir in dicke noch gesunt,
Verse: 10    wan er ist niht ze verhe wunt:

Verse: 11    daz bluot ist sînes herzen last."
Verse: 12    er begreif der linden einen ast,

Verse: 13    er sleiz einen louft drabe als ein rôr
Verse: 14    (er was zer wunden niht ein tôr):

Verse: 15    den schoup er zer tjost in den lîp.
Verse: 16    dô bat er sûgen daz wîp,

Verse: 17    unz daz bluot gein ir vlôz.
Verse: 18    des heldes kraft sich ûf entslôz,

Verse: 19    daz er wol redete unde sprach.
Verse: 20    dô er Gâwânen ob im ersach,

Verse: 21    dô dancte er im sêre
Verse: 22    und jach, er hete des êre

Verse: 23    daz er in schiede von unkraft,
Verse: 24    und vrâcte in ob er durch ritterschaft

Verse: 25    wære komen dar gein Lôgrois.
Verse: 26    "ich streich ouch verre von Punturtois

Verse: 27    und wolde hie âventiur bejagen.
Verse: 28    von herzen sol ich immer klagen

Verse: 29    daz ich sô nâhen geriten bin.
Verse: 30    ir sultz ouch mîden, habet ir sin:




Chapter: 507 
507


Verse: 1    ich enwânde niht daz ez kœme alsus.
Verse: 2    Lischois Gwelljus

Verse: 3    hât mich sêre geletzet
Verse: 4    und hinderz ors gesetzet

Verse: 5    mit einer tjoste rîche,
Verse: 6    diu ergienc sô hurteclîche

Verse: 7    durch mînen schilt und durch den lîp.
Verse: 8    dô half mir ditze guote wîp

Verse: 9    ûf ir phert an dise stat."
Verse: 10    Gâwânen er sêre belîben bat.

Verse: 11    Gâwân sprach, er wolde sehen
Verse: 12    wâ im der schade dâ wære geschehen.

Verse: 13    "liget Lôgrois sô nâhen,
Verse: 14    mac ich in dâ vor ergâhen,

Verse: 15    sô muoz er antwurten mir:
Verse: 16    ich vrâge in waz er ræche an dir."

Verse: 17    "des entuo niht" sprach der wunde man.
Verse: 18    "der wârheit ich dir jehen kan:

Verse: 19    dar engêt niht kinde reise,
Verse: 20    ez mac wol heizen vreise."

Verse: 21    Gâwân die wunden verbant
Verse: 22    mit der vrouwen houptgewant,

Verse: 23    er sprach zer wunden wunden segen.
Verse: 24    er bat got man und wîbes phlegen.

Verse: 25    er vant al bluotec ir slâ,
Verse: 26    als ein hiez wære erschozzen dâ:

Verse: 27    daz enliez niht irre in rîten.
Verse: 28    er sach in kurzen zîten

Verse: 29    Lôgrois die gehêrten.
Verse: 30    vil liute mit lobe si êrten.




Chapter: 508 
508


Verse: 1    an der bürge lâgen lobes werc.
Verse: 2    nâch trendeln mâze was ir berc:

Verse: 3    swâ si verre sach der tumme,
Verse: 4    er wânde si liefe alumme.

Verse: 5    der bürge man noch hiute giht
Verse: 6    daz gein ir sturmes hôrte niht:

Verse: 7    si vorhte wênec solhe nôt,
Verse: 8    swâ man hazzen gein ir bôt.

Verse: 9    alum den berc lac ein hac,
Verse: 10    des man mit edeln boumen phlac:

Verse: 11    vîgenboume, grânât,
Verse: 12    öl, wîn und ander rât,

Verse: 13    des wuohs dâ ganziu rîcheit.
Verse: 14    Gâwân die strâze al ûf hin reit:

Verse: 15    dâ ersach er niderhalben sîn
Verse: 16    vreude und sînes herzen pîn.

Verse: 17    ein brunne ûz dem velse schôz:
Verse: 18    dâ vant er, des in niht verdrôz.

Verse: 19    eine alsô klâre vrouwen,
Verse: 20    die er gerne muoste schouwen.

Verse: 21    aller wîbes varwe ein bêâ flûrs.
Verse: 22    âne Condwîrâmûrs

Verse: 23    wart nie geborn sô schœner lîp:
Verse: 24    mit klârheit süeze was daz wîp,

Verse: 25    wol geschicket und kurtois.
Verse: 26    si hiez Orgelûse de Lôgrois.

Verse: 27    ouch saget uns diu âventiur von ir,
Verse: 28    si wære ein reizel minnen gir,

Verse: 29    ougen süeze âne smerzen
Verse: 30    und ein spansenewe sherzen.




Chapter: 509 
509


Verse: 1    Gâwân bôt ir sînen gruoz.
Verse: 2    er sprach: "ob ich erbeizen muoz

Verse: 3    mit iuwern hulden, vrouwe,
Verse: 4    ob ich iuch des willens schouwe

Verse: 5    daz ir mich gerne bî iu hât,
Verse: 6    grôz riuwe mich bî vreuden lât,

Verse: 7    sô enwart nie ritter mêr sô vrô.
Verse: 8    mîn lîp muoz ersterben sô,

Verse: 9    daz mir nimmer wîp gevellet baz."
Verse: 10    "daz ist et wol: nû weiz ich ouch daz."

Verse: 11    solh was ir rede, dô si an in sach.
Verse: 12    ir süezer munt mêr dannoch sprach:

Verse: 13    "nû enlobet mich niht ze sêre.
Verse: 14    ir emphâhets lîhte unêre:

Verse: 15    ich enwil niht daz ieslîch munt
Verse: 16    gein mir tuo sîn prüeven kunt.

Verse: 17    wære mîn lop gemeine,
Verse: 18    daz hieze ein wirde kleine,

Verse: 19    dem wîsen und dem krummen:
Verse: 20    dem wîsen und dem tummen,

Verse: 21    wâ rihte ez sich danne vür?
Verse: 22    nâch der werdekeite kür

Verse: 23    ich sol mîn lop behalden,
Verse: 24    daz es die wîsen walden.

Verse: 25    ich enweiz niht, herre, wer ir sît.
Verse: 26    iuwers rîtens wære von mir zît."

Verse: 27    "mîn prüeven lât iuch doch niht vrî:
Verse: 28    ir sît mînem herzen bî."

Verse: 29    "verre ûzerhalp, niht drinne.
Verse: 30    gert ir mîner minne?




Chapter: 510 
510


Verse: 1    wie habet ir minne an mich erholt?
Verse: 2    maneger sîniu ougen bolt,

Verse: 3    er möhte si ûf einer slingen
Verse: 4    ze senfterm wurfe bringen,

Verse: 5    ob er sehen niht vermîdet,
Verse: 6    daz im sîn herze snîdet.

Verse: 7    lât walzen iuwer kranken gir
Verse: 8    ûf ander minne dan ze mir,

Verse: 9    dient nâch minne iuwer hant.
Verse: 10    hât iuch âventiur gesant

Verse: 11    nâch minne ûf ritterlîche tât,
Verse: 12    des lônes ir an mir niht hât:

Verse: 13    ir muget wol laster hie bejagen,
Verse: 14    muoz ich iu die wârheit sagen."

Verse: 15    dô sprach er: "vrouwe, ir saget mir wâr.
Verse: 16    mîn ougen sint des herzen vâr:

Verse: 17    die hânt an iuwerm lîbe ersehen,
Verse: 18    daz ich mit wârheit des muoz jehen

Verse: 19    daz ich iuwer gevangen bin.
Verse: 20    kêrt gein mir wîplîchen sin.

Verse: 21    swies iuch habe verdrozzen,
Verse: 22    ir habet mich în geslozzen:

Verse: 23    nû lœset oder bindet.
Verse: 24    des willen ir mich vindet,

Verse: 25    hete ich iuch swâ ich wolde,
Verse: 26    den wunsch ich gerne dolde."

Verse: 27    si sprach: "nû vüert mich mit iu hin.
Verse: 28    welt ir teilen den gewin,

Verse: 29    den ir mit minne an mir bejaget,
Verse: 30    mit laster irz dâ nâch beklaget.




Chapter: 511 
511


Verse: 1    ich wesse gerne ob ir der sît,
Verse: 2    der durch mich getorste lîden strît:

Verse: 3    daz verbert, bedurfet ir êre.
Verse: 4    solde ich iu râten mêre,

Verse: 5    spræchet ir denne der volge jâ,
Verse: 6    sô suochet ir minne anderswâ.

Verse: 7    ob ir mîner minne gert,
Verse: 8    minne und vreude ir sît entwert.

Verse: 9    ob ir mich hinnen vüeret,
Verse: 10    grôz sorge iuch dâ nâch rüeret."

Verse: 11    dô sprach mîn her Gâwân:
Verse: 12    "wer mac minne ungedienet hân?

Verse: 13    muoz ich iu daz künden,
Verse: 14    der treget si hin mit sünden.

Verse: 15    swem ist ze werder minne gâch,
Verse: 16    dâ hœret dienest vor und nâch."

Verse: 17    si sprach: "welt ir mir dienest geben,
Verse: 18    sô müezet ir werlîche leben

Verse: 19    und meget doch laster wol bejagen.
Verse: 20    mîn dienst bedarf dehienes zagen.

Verse: 21    vart jenen phat (ez ist niht ein wec)
Verse: 22    dort über jenen hôhen stec

Verse: 23    in jenen boumgarten.
Verse: 24    mîns pherdes sult ir dâ warten.

Verse: 25    dâ hœrt ir und sehet ir manege diet,
Verse: 26    die tanzent unde singent liet,

Verse: 27    tambûren, floitieren.
Verse: 28    swie si iuch kondewieren,

Verse: 29    gêt durch si dâ mîn phert dort stêt,
Verse: 30    und lœsetz ûf: nâch iu ez gêt."




Chapter: 512 
512


Verse: 1    Gâwân von dem orse spranc.
Verse: 2    dô hete er manegen gedanc,

Verse: 3    wie daz ors sîn erbite.
Verse: 4    dem brunnen wonte ninder mite

Verse: 5    dâ erz geheften möhte.
Verse: 6    er dâhte, ob daz töhte

Verse: 7    daz siz ze behalden næme,
Verse: 8    ob im diu bete gezæme.

Verse: 9    "ich sihe wol wes ir angest hât"
Verse: 10    sprach si. "diz ors mir stên hie lât:

Verse: 11    daz behalde ich unz ir wider kumt.
Verse: 12    mîn dienst iu dennoch vil kleine vrumt."

Verse: 13    dô nam mîn her Gâwân
Verse: 14    den zügel von dem orse dan.

Verse: 15    er sprach: "nû habet mirz, vrouwe."
Verse: 16    "bî tumpheit ich iuch schouwe,"

Verse: 17    sprach si, "wan dâ lac iuwer hant,
Verse: 18    der grif sol mir sîn unbekant."

Verse: 19    dô sprach der minne gernde man:
Verse: 20    "vrouwe, ich engreif nie vorne dran."

Verse: 21    "nû, dâ wil ichz emphâhen"
Verse: 22    sprach si. "nû sult ir gâhen

Verse: 23    und brinct mir balde mîn phert.
Verse: 24    mîner reise ir sît mit iu gewert."

Verse: 25    daz dûhte in vreudehaft gewin.
Verse: 26    dô gâhte er balde von ir hin

Verse: 27    über den stec zer porten în.
Verse: 28    dâ sach er maneger vrouwen schîn

Verse: 29    und manegen ritter jungen,
Verse: 30    die tanzten unde sungen.




Chapter: 513 
513


Verse: 1    dô was mîn her Gâwân
Verse: 2    sô gezimieret ein man,

Verse: 3    daz ez si lêrte riuwe,
Verse: 4    wande si heten triuwe,

Verse: 5    die des boumgarten phlâgen.
Verse: 6    si stuonden oder lâgen

Verse: 7    oder sæzen in gezelten,
Verse: 8    die vergâzen des vil selten,

Verse: 9    si enklageten sînen kummer grôz.
Verse: 10    man und wîp des niht verdrôz,

Verse: 11    genuoge sprâchen, denz was leit:
Verse: 12    "mîner vrouwen trügeheit

Verse: 13    wil disen man verleiten
Verse: 14    ze grôzen arbeiten.

Verse: 15    ouwê daz er ir volgen wil
Verse: 16    ûf alsus riuwebæriu zil."

Verse: 17    manec wert man dâ gein im gienc,
Verse: 18    der in mit armen ummevienc

Verse: 19    durch vriuntlîch emphâhen.
Verse: 20    dar nâch begunde er nâhen

Verse: 21    einem ölboume: dâ stuont daz phert.
Verse: 22    ouch was maneger marke wert

Verse: 23    der zoum und sîn gereite.
Verse: 24    mit einem barte breite,

Verse: 25    wol gevlohten unde grâ
Verse: 26    stuont dâ bî ein ritter dâ

Verse: 27    über eine krücken geleinet.
Verse: 28    von dem wart ez beweinet

Verse: 29    daz Gâwân zuo dem pherde gienc.
Verse: 30    mit süezer rede er in doch emphienc.





Chapter: 514 
514


Verse: 1    der sprach: "welt ir râtes phlegen,
Verse: 2    ir sult dises pherdes iuch bewegen:

Verse: 3    ez enwert iu doch niemen hie.
Verse: 4    getâtet aber ir daz wægeste ie,

Verse: 5    sô sult irz phert hie lâzen.
Verse: 6    mîn vrouwe sî verwâzen,

Verse: 7    daz si sô manegen werden man
Verse: 8    von dem lîbe scheiden kan."

Verse: 9    Gâwân sprach, er enliezes niht.
Verse: 10    "ouwê des dâ nâch geschiht!"

Verse: 11    sprach der grâwe ritter wert.
Verse: 12    die halftern lôste er von dem phert.

Verse: 13    er sprach: "ir sult niht langer stên:
Verse: 14    lât diz phert nâch iu gên.

Verse: 15    des hant daz mer gesalzen hât,
Verse: 16    der gebe iu vür kummer rât.

Verse: 17    hüetet daz iuch iht gehœne
Verse: 18    mîner vrouwen schœne,

Verse: 19    wan diu ist bî der süeze al sûr,
Verse: 20    rehte als ein sunnenblicker schûr."

Verse: 21    "nû waldes got" sprach Gâwân.
Verse: 22    urloup nam er zem grâwen man:

Verse: 23    alsô tet er hie und dort.
Verse: 24    si sprâchen alle klagendiu wort.

Verse: 25    daz phert gienc einen smalen wec
Verse: 26    zer porten ûz nâch im ûf den stec.

Verse: 27    sîns herzen voget er dâ vant:
Verse: 28    diu was vrouwe über daz lant.

Verse: 29    swie sîn herze gein ir vlôch,
Verse: 30    vil kummers si im doch drîn gezôch.




Chapter: 515 
515


Verse: 1    si hete mit ir hende
Verse: 2    underm kinne daz gebende

Verse: 3    hin ûz daz houbet geleget.
Verse: 4    kamphbæriu lide treget

Verse: 5    ein wîp die man vindet sô:
Verse: 6    diu wære vil lîhte eins schimphes vrô.

Verse: 7    waz si ander kleider trüege?
Verse: 8    ob ich nû des gewüege,

Verse: 9    daz ich prüeven solde ir wât?
Verse: 10    ir liehter blic mich des erlât.

Verse: 11    dô Gâwân zuo der vrouwen gienc,
Verse: 12    ir süezer munt in sus emphienc.

Verse: 13    si sprach: "weset willekomen, ir gans.
Verse: 14    nie man sô grôze tumpheit dans,

Verse: 15    ob ir mich dienstes welt gewern.
Verse: 16    ouwê wie gerne irz möht verbern!"

Verse: 17    er sprach: "ist iu zornes gâch,
Verse: 18    dâ hœrt iedoch genâde nâch.

Verse: 19    sît ir strâfet mich sô sêre,
Verse: 20    ir habet ergetzens êre.

Verse: 21    die wîle mîn hant iu dienest tuot,
Verse: 22    unz ir gewinnent lônes muot.

Verse: 23    welt ir, ich hebe iuch ûf diz phert."
Verse: 24    si sprach: "des hân ich niht gegert.

Verse: 25    iuwer unversichert hant
Verse: 26    mac grîfen wol an smæher phant."

Verse: 27    hin um von im si sich swanc,
Verse: 28    von den bluomen ûf daz phert si spranc.

Verse: 29    si bat in daz er rite vür.
Verse: 30    "ez wære et schade, ob ich verlür




Chapter: 516 
516


Verse: 1    sus ahtbæren gesellen"
Verse: 2    sprach si: "got müeze iuch vellen!"

Verse: 3    swer nû des wil volgen mir,
Verse: 4    der mîde valsche rede gein ir.

Verse: 5    niemen sich verspreche,
Verse: 6    er enwizze ê waz er reche,

Verse: 7    unz er gewinne künde
Verse: 8    wiez um ir herze stüende.

Verse: 9    ich kunde ouch wol gerechen dar
Verse: 10    gein der vrouwen wol gevar,

Verse: 11    swaz si hât gein Gâwân
Verse: 12    in ir zorne missetân

Verse: 13    oder daz si noch getuot gein im:
Verse: 14    die râche ich alle von ir nim.

Verse: 15    Orgelûse diu rîche
Verse: 16    vuor ungeselleclîche:

Verse: 17    zuo Gâwân si kom geriten
Verse: 18    mit alsô zornlîchen siten,

Verse: 19    daz ich michs wênec trôste
Verse: 20    daz si mich von sorgen lôste.

Verse: 21    si riten dannen beide
Verse: 22    ûf eine liehte heide:

Verse: 23    ein krût dâ stênde Gâwân sach,
Verse: 24    des würze er wunden helfe jach.

Verse: 25    dô erbeizte der werde
Verse: 26    nider zuo der erde,

Verse: 27    er gruop si, wider ûf er saz.
Verse: 28    diu vrouwe ir rede ouch niht vergaz,

Verse: 29    si sprach: "kan der geselle mîn
Verse: 30    arzet unde ritter sîn?




Chapter: 517 
517


Verse: 1    er mac sich harte wol bejagen,
Verse: 2    gelernt er bühsen veile tragen."

Verse: 3    zer vrouwen sprach Gâwânes munt:
Verse: 4    "ich reit vür einen ritter wunt,

Verse: 5    des dach ist ein linde.
Verse: 6    ob ich den noch vinde,

Verse: 7    disiu wurz sol in wol ernern
Verse: 8    und al sîn unkraft erwern."

Verse: 9    si sprach: "daz sihe ich gerne.
Verse: 10    waz ob ich kunst gelerne?"

Verse: 11    dô vuor in balde ein knappe nâch,
Verse: 12    dem was zer botschefte gâch,

Verse: 13    die er werben solde.
Verse: 14    Gâwân sîn beiten wolde:

Verse: 15    dô dûhte er in ungehiure.
Verse: 16    Malcrêâtiure

Verse: 17    hiez der knappe fiere.
Verse: 18    Cundrîe la surziere

Verse: 19    was sîn swester wol getân:
Verse: 20    er muoste ir antlitze hân

Verse: 21    gar, wan daz er was ein man.
Verse: 22    im stuont ouch ietweder zan

Verse: 23    als einem eber wilde,
Verse: 24    ungelîch menschen bilde.

Verse: 25    im was daz hâr ouch niht sô lanc
Verse: 26    als ez Cundrîen ûf den mûl dort swanc:

Verse: 27    kurz, scharph als igels hût ez was.
Verse: 28    bî dem wazzer Ganjas

Verse: 29    in dem lande ze Tribalibôt
Verse: 30    wahsent liute alsus durch nôt.




Chapter: 518 
518


Verse: 1    unser vater Adâm,
Verse: 2    die kunst er von gote nam,

Verse: 3    er gap allen dingen namen,
Verse: 4    beidiu wilden unde zamen.

Verse: 5    er erkande ouch ieslîches art,
Verse: 6    dar zuo der sterne ummevart,

Verse: 7    der siben plânêten,
Verse: 8    waz die krefte hêten,

Verse: 9    er erkande ouch aller würze maht
Verse: 10    und waz ieslîcher was geslaht.

Verse: 11    dô sîniu kint der jâre kraft
Verse: 12    gewunnen, daz si berhaft

Verse: 13    wurden menneschlîcerh vruht,
Verse: 14    er widerriet in ungenuht,

Verse: 15    swâ sîner tohter keiniu truoc.
Verse: 16    vil dicke er des gein in gewuoc,

Verse: 17    den rât er selten gein in liez,
Verse: 18    vil würze er si mîden hiez,

Verse: 19    die menschen vruht verkêrten
Verse: 20    und sîn geslehte unêrten,

Verse: 21    "anders denne got uns maz,
Verse: 22    dô er ze werke über mich gesaz"

Verse: 23    sprach er. "mîniu lieben kint,
Verse: 24    nû sît an sælekeit niht blint."

Verse: 25    diu wîp tâten et als wîp.
Verse: 26    etslîcher geriet ir brœder lîp

Verse: 27    daz si diu werc volbrâhte,
Verse: 28    des ir herzen gir gedâhte:

Verse: 29    sus wart verkêrt diu mennescheit.
Verse: 30    daz was iedoch Adâme leit,




Chapter: 519 
519


Verse: 1    doch engezwîvelte nie sîn wille.
Verse: 2    diu künegîn Secundille,

Verse: 3    die Feirefîz mit ritters hant
Verse: 4    erwarp, ir lîp und ir lant,

Verse: 5    diu hete in ir rîche
Verse: 6    harte unlougenlîche

Verse: 7    von alter dar der liute vil
Verse: 8    mit verkêrtem antlitzes zil:

Verse: 9    si truogen vremdiu wilden mal.
Verse: 10    dô sagete man ir um den grâl,

Verse: 11    daz ûf erde niht sô rîches was,
Verse: 12    und des phlæge ein künec hieze Anfortas.

Verse: 13    daz dûhte si wunderlîch genuoc,
Verse: 14    wan vil wazzer in ir lant truoc

Verse: 15    vür den griez edel gesteine.
Verse: 16    grôz, niht ze kleine,

Verse: 17    hete si gebirge guldîn.
Verse: 18    dô dâhte diu edel künegîn:

Verse: 19    "wie gewinne ich künde dises man,
Verse: 20    dem der grâl ist undertân?"

Verse: 21    si sande ir kleinœte dar,
Verse: 22    zwei mensche wunderlîch gevar,

Verse: 23    Cundrîen und ir bruoder klâr.
Verse: 24    si sande im mêr dennoch vür wâr,

Verse: 25    daz niemen möhte vergelten:
Verse: 26    man vündez veile selten.

Verse: 27    dô sande der süeze Anfortas,
Verse: 28    wande er et ie vil milte was,

Verse: 29    Orgelûsen de Lôgrois
Verse: 30    disen knappen kurtois.




Chapter: 520 
520


Verse: 1    von wîbes gir ein underscheit
Verse: 2    in schiet von der mennescheit.

Verse: 3    der würze und der sterne mâc
Verse: 4    huop gein Gâwân grôzen bâc.

Verse: 5    der hete sîn ûf dem wege erbiten.
Verse: 6    Malcrêâtuire kom geriten

Verse: 7    ûf einem runzîde kranc,
Verse: 8    daz von leme an allen vieren hanc:

Verse: 9    ez strûchte dicke ûf die erde.
Verse: 10    vrou Jeschûte diu werde

Verse: 11    iedoch ein bezzer phert reit
Verse: 12    des tages dô Parzivâl erstreit

Verse: 13    ab Orilus ir die hulde.
Verse: 14    die verlôs si âne alle ir schulde.

Verse: 15    der knappe an Gâwânen sach,
Verse: 16    Malcrêâtiure mit zorne sprach:

Verse: 17    "herre, sît ir von ritters art,
Verse: 18    sô möhtet irz gerne hân bewart:

Verse: 19    ir dunket mich ein tummer man,
Verse: 20    daz ir mîne vrouwen vüeret dan.

Verse: 21    ouch werdet irs underwîset,
Verse: 22    daz man iuch drum prîset,

Verse: 23    ob sichs erwert iuwer hant.
Verse: 24    sît aber ir ein sarjant,

Verse: 25    sô werdet ir gâlûnt mit staben,
Verse: 26    daz irs gerne wandel möhtet haben."

Verse: 27    Gâwân sprach: "mîn ritterschaft
Verse: 28    erleit nie solher zühte kraft.

Verse: 29    sus sol man walken gampelher,
Verse: 30    die niht sint mit manlîcher wer:




Chapter: 521 
521


Verse: 1    ich bin noch ledec vor solhem pîn.
Verse: 2    welt aber ir und diu vrouwe mîn

Verse: 3    mir smæhe rede bieten,
Verse: 4    ir müezet iuch eine nieten

Verse: 5    daz ir wol meget vür zürnen hân.
Verse: 6    swie vreissam ir sît getân,

Verse: 7    ich enbære doch sanfte iuwer drô."
Verse: 8    Gâwân in bî dem hâre dô

Verse: 9    begreif und swanc in underz phert.
Verse: 10    der knappe wîs unde wert

Verse: 11    vorhtlîche wider sach.
Verse: 12    sîn igelmæzec hâr sich rach:

Verse: 13    daz versneit Gâwân sô die hant,
Verse: 14    diu wart von bluote al rôt erkant.

Verse: 15    des lachete diu vrouwe.
Verse: 16    si sprach: "vil gerne ich schouwe

Verse: 17    iuch zwêne sus mit zornes site."
Verse: 18    si kêrten dan, daz phert lief mite.

Verse: 19    si kômen dâ si vunden
Verse: 20    ligen den ritter wunden.

Verse: 21    mit triuwen Gâwânes hant
Verse: 22    die wurz ûf die wunden bant.

Verse: 23    der wunde sprach: "wie ergienc ez dir,
Verse: 24    sît daz dû schiede hie von mir?

Verse: 25    dû hâs eine vrouwen brâht,
Verse: 26    diu dîns schaden hât gedâht.

Verse: 27    von ir schulden ist mir sô wê:
Verse: 28    in Estroite Voieê

Verse: 29    half si mir scharpher tjoste
Verse: 30    ûf slîbes und guotes koste.




Chapter: 522 
522


Verse: 1    wellestû behalden dînen lîp,
Verse: 2    sô lâ diz trügehafte wîp

Verse: 3    rîten unde kêr von ir.
Verse: 4    nû prüeve selbe ir rât an mir.

Verse: 5    doch möhte ich harte wol genesen,
Verse: 6    ob ich bî ruowe solde wesen.

Verse: 7    des hilf mir, getriuwer man."
Verse: 8    dô sprach mîn her Gâwân:

Verse: 9    "nim aller mîner helfe wal."
Verse: 10    "hie nâhen stêt ein spitâl"

Verse: 11    alsô sprach der ritter wunt:
Verse: 12    "kœme ich dar in kurzer stunt,

Verse: 13    dâ möhte ich ruowen lange zît.
Verse: 14    mîner vriundîn runzît

Verse: 15    habe wir noch stênde al starkez hie:
Verse: 16    nû hebe si drûf, mich hinder sie."

Verse: 17    dô bant der wol geborne gast
Verse: 18    der vrouwen phert von dem ast:

Verse: 19    er woldez ziehen nâher ir.
Verse: 20    der wunde sprach: "hin dan von mir!

Verse: 21    wiest iuch tretens mich sô gâch?"
Verse: 22    er zôchz ir verre: diu vrouwe gienc nâch,

Verse: 23    sanfte und doch niht drâte.
Verse: 24    al nâch ir mannes râte

Verse: 25    Gâwân ûf daz phert si swanc.
Verse: 26    innen des der wunde ritter spranc

Verse: 27    ûf Gâwânes kastelân:
Verse: 28    ich wæne daz was missetân.

Verse: 29    er und sîn vrouwe riten hin.
Verse: 30    daz was ein sündehaft gewin.




Chapter: 523 
523


Verse: 1    Gâwân daz klagete sêre:
Verse: 2    diu vrouwe es lachte mêre

Verse: 3    dan inder schimphes in gezam.
Verse: 4    sît man im daz ors genam,

Verse: 5    ir süezer munt hin zim dô sprach:
Verse: 6    "vür einen ritter ich iuch sach,

Verse: 7    dar nâch in kurzen stunden
Verse: 8    wurdet ir arzet vür die wunden:

Verse: 9    nû müezet ir ein garzûn wesen.
Verse: 10    sol iemen sîner kunst genesen,

Verse: 11    sô trœstet iuch iuwer sinne.
Verse: 12    gert ir noch mîner minne?"

Verse: 13    "jâ, vrouwe" sprach her Gâwân:
Verse: 14    "möhte ich iuwer minne hân,

Verse: 15    diu wære mir lieber dan iht.
Verse: 16    ez enwont ûf erde nihtes niht

Verse: 17    under krône und alle die krône tragent
Verse: 18    und die vreudehaften prîs bejagent,

Verse: 19    der gein iu teilte ir gewin,
Verse: 20    sô rætet mir mîns herzen sin

Verse: 21    daz ichz in lâzen solde.
Verse: 22    iuwer minne ich haben wolde.

Verse: 23    mac ich der niht erwerben,
Verse: 24    sô muoz ein sûrez sterben

Verse: 25    sich schiere an mir erzeigen.
Verse: 26    ir wüestet iuwer eigen:

Verse: 27    ob ich vrîheit ie gewan,
Verse: 28    ir sult mich doch vür eigen hân.

Verse: 29    daz dunket mich iuwer ledec reht.
Verse: 30    nû nennet mich ritter oder kneht,




Chapter: 524 
524


Verse: 1    garzûn oder vilân:
Verse: 2    swaz ir spottes hât gein mir getân,

Verse: 3    dâ mite ir sünde emphâhet,
Verse: 4    ob ir mîn dienest smâhet.

Verse: 5    solde ich dienstes geniezen,
Verse: 6    iuch möhte spottes verdriezen.

Verse: 7    ob ez mir nimmer würde leit,
Verse: 8    ez krenkt doch iuwer werdekeit."

Verse: 9    wider zuo zin reit der wunde man.
Verse: 10    dô sprach er: "bistûz Gâwân?

Verse: 11    hâstû iht geborget mir,
Verse: 12    daz ist nû gar vergolten dir.

Verse: 13    dô mich dîn manlîchiu kraft
Verse: 14    vienc in herter ritterschaft

Verse: 15    und dô dû bræhte mich ze hûs
Verse: 16    dînem œheim Artûs,

Verse: 17    vier wochen er des niht vergaz:
Verse: 18    die zît ich mit den hunden az."

Verse: 19    dô sprach er: "bistûz ûrjans?
Verse: 20    ob dû mir nû schaden gans,

Verse: 21    den trage ich âne schulde:
Verse: 22    ich erwarp dir sküneges hulde.

Verse: 23    ein swach sin half dir unde riet:
Verse: 24    von schiltes ammet man dich schiet

Verse: 25    und sagete dich gar rehtlôs,
Verse: 26    durch daz ein maget von dir verlôs

Verse: 27    ir reht, dar zuo des landes vride.
Verse: 28    der künec Artûs mit einer wide

Verse: 29    woldez gerne hân gerochen,
Verse: 30    hete ich dich niht versprochen."




Chapter: 525 
525


Verse: 1    "swaz dort geschach, dû stês nû hie.
Verse: 2    dû hôrtes ouch vor dir sprechen ie,

Verse: 3    swer dem andern half daz er genas,
Verse: 4    daz er sîn vîent dâ nâch was.

Verse: 5    ich tuon als die bî witzen sint.
Verse: 6    sich vüeget baz ob weint ein kint

Verse: 7    dan ein bartehter man.
Verse: 8    ich wil diz ors al eine hân."

Verse: 9    mit sporn erz vaste von im reit.
Verse: 10    daz was doch Gâwâne leit.

Verse: 11    der sprach zer vrouwen: "ez kom alsô.
Verse: 12    der künec Artûs der was dô

Verse: 13    in der stat ze Dîanazdrûn,
Verse: 14    mit im dâ manec Bertûn.

Verse: 15    dem was ein vrouwe dar gesant
Verse: 16    durch botschaft in sîn lant.

Verse: 17    ouch was der ungehiure
Verse: 18    ûz komen durch âventiure.

Verse: 19    er was gast und si gestin.
Verse: 20    dô geriet im sîn kranker sin

Verse: 21    daz er mit der vrouwen ranc
Verse: 22    nâch sînem willen âne ir danc:

Verse: 23    hin ze hove kom daz geschrei.
Verse: 24    der künec rief lûte "heiâ hei!"

Verse: 25    diz geschach vor einem walde.
Verse: 26    dar gâhte wir alle balde,

Verse: 27    ich vuor den andern verre vor
Verse: 28    und begreif des schuldehaften spor:

Verse: 29    gevangen vuorte ich wider dan
Verse: 30    vür den künec disen man.




Chapter: 526 
526


Verse: 1    diu juncvrouwe reit uns mite.
Verse: 2    riuwebærec was ir site,

Verse: 3    durch daz ir hête genomen
Verse: 4    der nie was in ir dienest komen

Verse: 5    ir kiuscheclîchen magetuom.
Verse: 6    ouch bezalte er dâ vil kleinen ruom

Verse: 7    gein ir unwerlîchen hant.
Verse: 8    mînen herren si mit zorne vant,

Verse: 9    Artûsen den getriuwen.
Verse: 10    er sprach: "die werlt sol immer riuwen

Verse: 11    dirre vermaldîte mein.
Verse: 12    ouwê daz ie der tac erschein,

Verse: 13    bî des liehte disiu nôt geschach,
Verse: 14    und dâ man mir gerihtes jach

Verse: 15    und dâ ich hiute rihtære bin."
Verse: 16    er sprach zer vrouwen: "habet ir sin,

Verse: 17    nemt vürsprechen unde klaget."
Verse: 18    diu vrouwe was des unverzaget,

Verse: 19    si tet als ir der künec riet.
Verse: 20    dâ stuont von rittern grôziu diet.

Verse: 21    ûrjans der vürste ûz Punturtois
Verse: 22    der stuont dâ vor dem Bertenois

Verse: 23    ûf al sîn êre und ûf den lîp.
Verse: 24    vür gienc daz klagehafte wîp,

Verse: 25    dâz rîche und arme hôrten.
Verse: 26    si bat mit klagenden worten

Verse: 27    den künec durch alle wîpheit,
Verse: 28    daz er im lieze ir laster leit

Verse: 29    sîn, und durch magetuomlîch êre.
Verse: 30    si bat in vürbaz mêre




Chapter: 527 
527


Verse: 1    durch der tavelrunder art
Verse: 2    und durch der botschefte vart,

Verse: 3    als si wære an in gesant,
Verse: 4    wære er ze rihtære erkant,

Verse: 5    daz er denne rihte ir swære.
Verse: 6    durch gerihtes mære

Verse: 7    si bat der tavelrunder schar
Verse: 8    alle ir rehtes nemen war,

Verse: 9    sît daz ir wære ein roup genomen,
Verse: 10    der nimmer möhte wider komen,

Verse: 11    ir magetuom kiusche reine,
Verse: 12    daz si al gemeine

Verse: 13    den künec gerihtes bæten
Verse: 14    und an ir rede træten.

Verse: 15    vürsprechen nam der schuldec man.
Verse: 16    dem ich nû kranker êren gan,

Verse: 17    der werte in als er mohte.
Verse: 18    diu wer im doch niht tohte:

Verse: 19    man verteilte imz leben und sînen prîs
Verse: 20    und daz man winden solde ein rîs,

Verse: 21    dar an im sterben würde erkant
Verse: 22    âne bluotege hant.

Verse: 23    er rief mich ane (des twanc in nôt)
Verse: 24    und mante mich des, daz er mir bôt

Verse: 25    sicherheit durch genesen.
Verse: 26    ich vorhte âne alle mîn êre wesen,

Verse: 27    ob er verlür dâ sînen lîp.
Verse: 28    ich bat daz klagehafte wîp,

Verse: 29    sît si mit ir ougen sach
Verse: 30    daz ich si manlîche rach,




Chapter: 528 
528


Verse: 1    daz si durch wîbes güete
Verse: 2    senfte ir gemüete,

Verse: 3    sît daz si müeste ir minne jehen
Verse: 4    swaz ir dâ was von im geschehen,

Verse: 5    und ir klârem lîbe,
Verse: 6    "und ob ie man von wîbe

Verse: 7    mit dienste kœme in herzenôt,
Verse: 8    ob si im dâ nâch ir helfe bôt,

Verse: 9    der helfe tuot ez zêren,
Verse: 10    lât iuch von zorne kêren."

Verse: 11    ich bat den künec und sîne man,
Verse: 12    ob ich im hete getân

Verse: 13    deheinen dienst, daz ers gedæhte,
Verse: 14    daz er mir lasters æhte

Verse: 15    mit einem site werte,
Verse: 16    daz er den ritter nerte.

Verse: 17    sîn wîp die küneginne
Verse: 18    bat ich durch sippe minne,

Verse: 19    wande mich der künec von kinde zôch
Verse: 20    und daz mîn triuwe ie gein ir vlôch,

Verse: 21    daz si mir hülfe. daz geschach,
Verse: 22    diu juncvrouwe si sunder sprach:

Verse: 23    dô genas er durch die künegîn.
Verse: 24    er muoste aber lîdne hôhen pîn.

Verse: 25    sus wart sîn lîp gereinet,
Verse: 26    solh wandel im bescheinet:

Verse: 27    ez wære vorlouft oder leithunt,
Verse: 28    ûz einem troge az sîn munt

Verse: 29    mit in dâ vier wochen.
Verse: 30    sus wart diu vrouwe gerochen.




Chapter: 529 
529


Verse: 1    vrouwe, daz ist sîn râche ûf mich."
Verse: 2    si sprach: "sich twirhet sîn gerich.

Verse: 3    ich enwirde iu lîhte nimmer holt:
Verse: 4    doch emphæhet er drum alsolhen solt,

Verse: 5    ê er scheide von mînem lande,
Verse: 6    des er jehen mac vür schande.

Verse: 7    sît ez der künec dort niht rach,
Verse: 8    aldâz der vrouwen dâ geschach,

Verse: 9    und ez sich hât an mich gezoget,
Verse: 10    ich bin nû iuwer beider voget

Verse: 11    und enweiz doch wer ir beidiu sît.
Verse: 12    er muoz dar um emphâhen strît,

Verse: 13    durch die vrouwen eine
Verse: 14    und durch iuch harte kleine.

Verse: 15    man sol unvuoge rechen
Verse: 16    mit slahen und mit stechen."

Verse: 17    Gâwân zuo dem pherde gienc,
Verse: 18    mit lîhtem sprunge erz doch gevienc.

Verse: 19    dâ was der knappe komen nâch,
Verse: 20    ze dem diu vrouwe heidensch sprach

Verse: 21    al daz si wider ûf enbôt.
Verse: 22    nû næhet ouch Gâwânes nôt.

Verse: 23    Malcrêâtiure ze vuoz vuor dan.
Verse: 24    dô gesach ouch mîn her Gâwân

Verse: 25    des juncherren runzît.
Verse: 26    daz was ze kranc ûf einen strît:

Verse: 27    ez hete der knappe dort genomen,
Verse: 28    ê er von der halden wære komen,

Verse: 29    einem vilâne.
Verse: 30    dô geschach ez Gâwâne




Chapter: 530 
530


Verse: 1    vür sîn ors ze behalden:
Verse: 2    des geltes muoste er walden.

Verse: 3    si sprach hin zim, ich wæne durch haz:
Verse: 4    "saget an, welt ir niht vürbaz?"

Verse: 5    dô sprach mîn her Gâwân:
Verse: 6    "mîn vart von hinnen wirt getân

Verse: 7    al nâch iuwerm râte."
Verse: 8    si sprach: "der kumt iu spâte."

Verse: 9    "nû diene ich iu doch drumme."
Verse: 10    "des dunket ir mich der tumme:

Verse: 11    welt ir daz niht vermîden,
Verse: 12    sô müezet ir von den blîden

Verse: 13    kêren gein der riuwe.
Verse: 14    iuwer kummer wirt al niuwe."

Verse: 15    dô sprach der minnen gernde:
Verse: 16    "ich bin iuch dienstes wernde,

Verse: 17    ich emphâhes vreude oder nôt,
Verse: 18    sît iuwer minne mir gebôt

Verse: 19    daz ich muoz ziuwerm gebote stên,
Verse: 20    ich mege rîten oder gên."

Verse: 21    al stênde bî der vrouwen
Verse: 22    daz marc begunde er schouwen:

Verse: 23    daz was ze dræter tjoste
Verse: 24    ein harte krankui koste,

Verse: 25    diu stîcleder von baste.
Verse: 26    dem edeln werden gaste

Verse: 27    was eteswenne gesatelt baz.
Verse: 28    ûf sitzen meit er umme daz,

Verse: 29    er vorhte daz er zetræte
Verse: 30    des satels gewæte.




Chapter: 531 
531


Verse: 1    dem pherde was der rücke krump:
Verse: 2    wære drûf ergangen dâ sîn sprunc,

Verse: 3    im wære der rücek gar zevarn.
Verse: 4    daz muoste er allez dô bewarn:

Verse: 5    es het in eteswenne bevilt.
Verse: 6    er zôch ez unde truoc den schilt

Verse: 7    und eine glævîne.
Verse: 8    sîner scharphen pîne

Verse: 9    diu vrouwe sêre lachte,
Verse: 10    diu im vil kummers machte.

Verse: 11    sînen schilt er ûf daz phert bant.
Verse: 12    si sprach: "vüert ir krâmgewant

Verse: 13    in mînem lande veile?
Verse: 14    wer gap mir ze teile

Verse: 15    einen arzet und eins krâmes phlege?
Verse: 16    hüetet iuch vor zolle ûf dem wege:

Verse: 17    etslîch mîn zolnære
Verse: 18    iuch sol machen vreuden lære."

Verse: 19    ir scharphiu saliure
Verse: 20    in dûhte sô gehiure,

Verse: 21    daz er enruochte waz si sprach,
Verse: 22    wan immer swenne er an si sach,

Verse: 23    sô was sîn phant ze riuwe quît.
Verse: 24    si was im rehte ein meien zît,

Verse: 25    vor allem blicke ein flôrî,
Verse: 26    ougen süeze und sûr dem herzen bî.

Verse: 27    sît vlust und vinden an ir was
Verse: 28    und des siechiu vreude an ir was

Verse: 29    daz vrumte in zallen stunden
Verse: 30    ledec und sêre gebunden.




Chapter: 532 
532


Verse: 1    manec mîn meister sprichet sô,
Verse: 2    daz âmor und Cupîdô

Verse: 3    und der zweier muoter Vênus
Verse: 4    den liuten minne geben alsus,

Verse: 5    mit geschôze und mit viure.
Verse: 6    diu minne ist ungehiure.

Verse: 7    swem herzenlîchiu triuwe ist bî,
Verse: 8    der wirt nimmer minnen vrî,

Verse: 9    mit vreude, etswenne mit riuwe.
Verse: 10    reht minne ist wâriu triuwe.

Verse: 11    Cupîdô, dîn strâle
Verse: 12    mîn misset zallem mâle:

Verse: 13    alsô tuot des hern âmors gêr.
Verse: 14    sît ir zwêne ob minnen hêr

Verse: 15    und Vênus mit ir vackeln heiz,
Verse: 16    um solhen kummer ich niht weiz.

Verse: 17    sol ich der wâren minne jehen,
Verse: 18    diu muoz durch triuwe mir geschehen.

Verse: 19    hülfen mîne sinne
Verse: 20    iemen iht vür minne,

Verse: 21    hern Gâwân bin ich wol sô holt,
Verse: 22    dem wolde ich dienen âne solt.

Verse: 23    er ist doch âne schande,
Verse: 24    liget er in minnen bande.

Verse: 25    ob in diu minne rüeret,
Verse: 26    diu starke wer zevüeret,

Verse: 27    er was doch ie sô werlîch,
Verse: 28    der werden wer alsô gelîch,

Verse: 29    daz niht twingen solde ein wîp
Verse: 30    sînen werlîchen lîp.




Chapter: 533 
533


Verse: 1    lât nâher gên, her minnen druc.
Verse: 2    ir tuot der vreude alsolhen zuc,

Verse: 3    daz sich dürkelt vreuden stat
Verse: 4    und bant sich der riuwen phat.

Verse: 5    sus breitet sich der riuwen slâ:
Verse: 6    gienge ir reise anderswâ

Verse: 7    dan in des herzen hôhen muot,
Verse: 8    daz diuhte mich gein vreuden guot.

Verse: 9    ist minne ir unvuoge balt?
Verse: 10    dar zuo dunket si mich zalt.

Verse: 11    oder giht sis ûf ir kintheit,
Verse: 12    swem si vüeget herzeleit?

Verse: 13    unvuoge gan ich baz ir jugent,
Verse: 14    dan daz si ir alter bræche tugent,

Verse: 15    vil dinges ist von ir geschehen:
Verse: 16    wederhalp sol ich des jehen?

Verse: 17    wil si mit jungen ræten
Verse: 18    ir alden site unstæten,

Verse: 19    sô wirt si schiere an prîse laz.
Verse: 20    man sol sis underscheiden baz.

Verse: 21    lûter minne ich prîse
Verse: 22    und alle die sint wîse,

Verse: 23    ez sî wîp oder man,
Verse: 24    von den ichs ganze volge hân.

Verse: 25    swâ liep gein liebe erhüebe
Verse: 26    lûter âne trüebe,

Verse: 27    der enwederz des verdrüzze
Verse: 28    daz minne ir herze slüzze

Verse: 29    mit minne von der wanc ie vlôch,
Verse: 30    diu minne ist ob den andern hôch.




Chapter: 534 
534


Verse: 1    swie gerne ich in næme dan,
Verse: 2    doch mac mîn her Gâwân

Verse: 3    der minne des niht entwenken,
Verse: 4    si enwelle in vreude krenken.

Verse: 5    waz hilfet dan mîn underslac?
Verse: 6    swaz ich dâ von gesprechen mac,

Verse: 7    wert man sol sich niht minne wern,
Verse: 8    wan den muoz minne helfen nern.

Verse: 9    Gâwân durch minne arbeite emphienc.
Verse: 10    sîn vrouwe reit, ze vuoz er gienc.

Verse: 11    Orgelûse und der degen balt
Verse: 12    die kômen in einen grôzen walt:

Verse: 13    dennoch muoste er gêns wonen.
Verse: 14    er zôch daz phert zuo zeinem ronen:

Verse: 15    sîn schilt, der ê drûfe lac,
Verse: 16    des er durch schiltes ammet phlac,

Verse: 17    nam er ze halse, ûfz phert er saz.
Verse: 18    ez truoc in kûme vürbaz,

Verse: 19    anderhalben ûz in erbûwen lant.
Verse: 20    eine burc er mit den ougen vant:

Verse: 21    sîn herze und diu ougen jâhen
Verse: 22    daz si erkanden noch gesâhen

Verse: 23    deheine burc nie der gelîch.
Verse: 24    si was alumme ritterlîch:

Verse: 25    türne unde palas
Verse: 26    manegez ûf der bürge was.

Verse: 27    dar zuo muote er schouwen
Verse: 28    in den venstern manege vrouwen.

Verse: 29    der was vier hundert oder mêr,
Verse: 30    viere under in von arte hêr.




Chapter: 535 
535


Verse: 1    von passâchen ungeverte grôz
Verse: 2    gienc an ein wazzer daz dâ vlôz,

Verse: 3    schifrech, snel unde breit.
Verse: 4    dâ engein er und diu vrouwe reit,

Verse: 5    an dem urvar ein anger lac,
Verse: 6    dar ûfe man vil tjoste phlac.

Verse: 7    überz wazzer stuont daz kastel.
Verse: 8    Gâwân der degen snel

Verse: 9    sach einen ritter nâch im varn,
Verse: 10    der schilt noch sper niht kunde sparn.

Verse: 11    Orgelûse diu rîche
Verse: 12    sprach hôchvartlîche:

Verse: 13    "ob mirs iuwer munt vergiht,
Verse: 14    sô briche ich mîner triuwe niht.

Verse: 15    ich hetes iu ê sô vil gesaget,
Verse: 16    daz ir vil lasters hie bejaget:

Verse: 17    nû wert iuch, ob ir kunnet wern.
Verse: 18    iuch enmac anders niht ernern.

Verse: 19    der dort kumt, iuch sol sîn hant
Verse: 20    sô vellen, ob iu ist zetrant

Verse: 21    inder iuwer niderkleit,
Verse: 22    daz lât iu durch die vrouwen leit

Verse: 23    sîn, die ob iu sitzent und sehent.
Verse: 24    waz ob die iuwer laster spehent?"

Verse: 25    des schiffes meister über her
Verse: 26    kom durch Orgelûsen ger:

Verse: 27    von dem lande inz schif si kêrte,
Verse: 28    daz Gâwân trûren lêrte.

Verse: 29    diu rîche und wol geborne
Verse: 30    sprach wider ûz mit zorne:




Chapter: 536 
536


Verse: 1    "ir enkomt niht zuo mir dâ her în:
Verse: 2    ir müezet phant dort ûze sîn."

Verse: 3    er sprach ir trûreclîchen nâch:
Verse: 4    "vrouwe, wiest iu von mir sô gâch?

Verse: 5    so ich iuch immer mêr gesehen?"
Verse: 6    si sprach: "iu mac der prîs geschehen,

Verse: 7    ich state iu sehens noch an mich.
Verse: 8    ich wæne daz sêre lenget sich."

Verse: 9    diu vrouwe schiet von im alsus.
Verse: 10    hie kom Lischois Gwelljus.

Verse: 11    sagete ich iu nû daz der vlüge,
Verse: 12    mit der rede ich iuch betrüge:

Verse: 13    er gâhte aber anders sêre,
Verse: 14    daz es daz ors hete êre

Verse: 15    (wan daz erzeicte snelheit),
Verse: 16    über den grüenen anger breit.

Verse: 17    dô dâhte mîn her Gâwân:
Verse: 18    "wie sol ich beiten dises man?

Verse: 19    wederz mac daz wæger sîn,
Verse: 20    ze vuoz oder ûf dem pherdelîn?

Verse: 21    wil er vollîch an mich varn,
Verse: 22    daz er den poinder niht kan sparn,

Verse: 23    er sol mich nider rîten.
Verse: 24    wes mac sîn ors dâ bîten,

Verse: 25    ez enstrûche ouch über daz runzît?
Verse: 26    wil er mir denne bieten strît

Verse: 27    aldâ wir beide sîn ze vuoz,
Verse: 28    ob mir halt nimmer würde ir gruoz,

Verse: 29    diu mich dises strîtes hât gewert,
Verse: 30    ich gibe im strît, ob er des gert."




Chapter: 537 
537


Verse: 1    nû, diz was unwendec.
Verse: 2    der komende was genendec:

Verse: 3    alsô was ouch der dâ beite.
Verse: 4    zer tjost er sich bereite:

Verse: 5    dô sazte er die glævîn
Verse: 6    vorne ûf des satels vilzelîn,

Verse: 7    des Gâwân vor hete erdâht.
Verse: 8    sus wart ir beider tjoste brâht:

Verse: 9    diu tjost ieweder sper zebrach,
Verse: 10    daz man die helde ligen sach.

Verse: 11    dô strûchte der baz geriten man,
Verse: 12    daz er und mîn her Gâwân

Verse: 13    ûf den bluomen lâgen.
Verse: 14    wes si dô beide phlâgen?

Verse: 15    ûf springens mit den swerten.
Verse: 16    si beide strîtes gerten.

Verse: 17    die schilte wâren unvermiten:
Verse: 18    die wurden alsô hin gesniten,

Verse: 19    ir beleip in lützel vor der hant,
Verse: 20    wan der schilt ist immer strîtes phant.

Verse: 21    man sach dâ blicke und helmes viur.
Verse: 22    ir megets im jehen vür âventiur,

Verse: 23    swen got den sic dan læzet tragen:
Verse: 24    der muoz vil prîses ê bejagen.

Verse: 25    sus tûrten si mit strîte
Verse: 26    ûf des angers wîte:

Verse: 27    es wæren müede zwêne smide,
Verse: 28    ob si halt heten starker lide,

Verse: 29    von alsô manegen grôzen slage.
Verse: 30    sus rungen si nâch prîses bejage.




Chapter: 538 
538


Verse: 1    wer solde si drum prîsen,
Verse: 2    daz die unwîsen

Verse: 3    striten âne schulde,
Verse: 4    niwan durch prîses hulde

Verse: 5    (si enheten niht ze teilen)
Verse: 6    âne nôt ir leben ze veilen?

Verse: 7    ietweder ûf den andern jach,
Verse: 8    daz er die schulde nie gesach.

Verse: 9    Gâwân kunde ringen
Verse: 10    und mit dem swanke twingen:

Verse: 11    swem er daz swert undergienc
Verse: 12    und in mit armen zim gevienc,

Verse: 13    den twanc er swes er wolde.
Verse: 14    sît er sich wern solde,

Verse: 15    dô gebârte er werlîche.
Verse: 16    der werde muotes rîche

Verse: 17    begreif den jungen ellenthaft,
Verse: 18    der ouch hete manlîche kraft:

Verse: 19    er warf in balde under sich.
Verse: 20    er sprach hin zim: "helt, nû gich,

Verse: 21    wellestû genesen, sicherheit."
Verse: 22    der bete volge unbereit

Verse: 23    was Lischois der dâ unden lac,
Verse: 24    wande er nie sicherheit gephlac.

Verse: 25    daz dûhte in wunderlîch genuoc,
Verse: 26    daz iemen die hant getruoc,

Verse: 27    diu in solde überkomen
Verse: 28    daz nie wart von im genomen,

Verse: 29    betwungenlîchiu sicherheit,
Verse: 30    der sîn hant ê vil erstreit.




Chapter: 539 
539


Verse: 1    swiez dâ was ergangen,
Verse: 2    er hete vil emphangen

Verse: 3    des er niht vürbaz wolde geben:
Verse: 4    vür sicherheit bôt er sîn leben

Verse: 5    und jach, swaz im geschæhe,
Verse: 6    daz er niemêr verjæhe

Verse: 7    sicherheit durch twingen.
Verse: 8    mit dem tôde wolde er dingen.

Verse: 9    dô sprach der unde ligende:
Verse: 10    "bistû nû der gesigende?

Verse: 11    des phlac ich dô got wolde
Verse: 12    und ich prîs haben solde:

Verse: 13    nû hât mîn prîs ein ende
Verse: 14    von dîner werden hende.

Verse: 15    swâ vreischet man oder wîp
Verse: 16    daz überkomen ist mîn lîp,

Verse: 17    des prîs sô hôhe ê swebete enbor,
Verse: 18    sô stêt mir baz ein sterben vor,

Verse: 19    ê mîne vriunt diz mære
Verse: 20    so machen vreuden lære."

Verse: 21    Gâwân warp sicherheit an in:
Verse: 22    dô stuont sîn gir und al sîn sin

Verse: 23    niwan ûf slîbes verderben
Verse: 24    oder ûf ein gæhez sterben.

Verse: 25    dô dâhte mîn her Gâwân:
Verse: 26    "durch waz tœte ich disen man?

Verse: 27    wolde er sus ze mînem gebote stên,
Verse: 28    gesunt lieze ich in hinnen gên."

Verse: 29    mit rede warp erz an in sô:
Verse: 30    daz enwart niht gar geleistet dô.




Chapter: 540 
540


Verse: 1    ûf liez er doch den wîgant
Verse: 2    âne gesicherte hant.

Verse: 3    ietweder ûf die bluomen saz.
Verse: 4    Gâwân sîns kummers niht vergaz,

Verse: 5    daz sîn phert was sô kranc:
Verse: 6    den wîsen lêrte sîn gedanc

Verse: 7    daz er daz ors mit sporn rite
Verse: 8    unz er versuochte sînen site.

Verse: 9    daz was gewâpent wol vür strît:
Verse: 10    phellel unde samît

Verse: 11    was sîn ander kovertiur.
Verse: 12    sît erz erwarp mit âventiur,

Verse: 13    durch waz solde erz nû rîten niht,
Verse: 14    sît ez ze rîten im geschiht?

Verse: 15    er saz drûf: dô vuor ez sô,
Verse: 16    sîner wîten sprünge er was al vrô.

Verse: 17    dô sprach er: "bistûz Gringuljete,
Verse: 18    daz ûrjans mit valscher bete,

Verse: 19    er weiz wol wie, an mir erwarp,
Verse: 20    dâ von iedoch sîn prîs verdarp?

Verse: 21    wer hât dich sus gewâpent sider?
Verse: 22    ob dûz bist, got hât dich wider

Verse: 23    mir schône gesendet,
Verse: 24    der dicke kummer wendet."

Verse: 25    er erbeizte drabe, ein marc er vant:
Verse: 26    des grâles wâpen was gebrant,

Verse: 27    ein turteltûbe, an sînen buoc.
Verse: 28    Lehelîn zer tjoste sluoc

Verse: 29    drûf den von Prienlascors.
Verse: 30    Oriluse wart diz ors,




Chapter: 541 
541


Verse: 1    der gap ez Gâwâne
Verse: 2    ûf dem Plimizôles plâne.

Verse: 3    hie kom sîn trûrec güete
Verse: 4    aber wider in hôchgemüete,

Verse: 5    wan daz in twanc ein riuwe
Verse: 6    und dienestbæriu truiwe,

Verse: 7    die er nâch sîner vrouwen truoc.
Verse: 8    diu im doch smæhe erbôt genuoc,

Verse: 9    nâch der jagete in sîn gedanc.
Verse: 10    innen des der stolze Lischois spranc

Verse: 11    dâ er ligen sach sîn eigen swert,
Verse: 12    daz Gâwân der degen wert

Verse: 13    mit strîte ûz sîner hende brach.
Verse: 14    manec vrouwe ir ander strîten sach.

Verse: 15    die schilte wâren sô gedigen,
Verse: 16    ieweder liez den sînen ligen

Verse: 17    und gâhten sus ze strîte.
Verse: 18    ietweder kom bezîte

Verse: 19    mit herzenlîcher mannes wer.
Verse: 20    ob in saz vrouwen ein her

Verse: 21    in den venstern ûf dem palas
Verse: 22    und sâhen kamph der vor in was.

Verse: 23    dô huop sich êrste niuwer zorn:
Verse: 24    ietweder was sô hôch geborn,

Verse: 25    daz sîn prîs unsanfte leit
Verse: 26    ob in der ander überstreit.

Verse: 27    helme und ir swert liten nôt:
Verse: 28    diu wâren ir schilte vür den tôt.

Verse: 29    swer dâ der helde strîten sach,
Verse: 30    ich wæne ers in vür kummer jach.




Chapter: 542 
542


Verse: 1    Lischois Gwelljus
Verse: 2    der junge süeze warp alsus:

Verse: 3    vrecheit und ellenthaftiu tât,
Verse: 4    daz was sîns hôhen herzen rât.

Verse: 5    er vrumte manegen snellen swanc.
Verse: 6    dicke er von Gâwâne spranc

Verse: 7    und aber wider sêre ûf in.
Verse: 8    Gâwân truoc stætlîchen sin,

Verse: 9    er dâhte: "ergrîfe ich dich ze mir,
Verse: 10    ich sols vil gar gelônen dir."

Verse: 11    man sach dâ viurs blicke
Verse: 12    und diu swert ûf werfen dicke

Verse: 13    ûz ellenthaften henden.
Verse: 14    si begunden ein ander wenden

Verse: 15    neben, vür und hinder sich.
Verse: 16    âne nôt was ir gerich:

Verse: 17    si möhtenz âne strîten lân.
Verse: 18    dô begreif in mîn her Gâwân,

Verse: 19    er warf in under sich mit kraft.
Verse: 20    mit halsen solh geselleschaft

Verse: 21    müeze mich vermîden:
Verse: 22    ich enmöhte ir niht erlîden.

Verse: 23    Gâwân bat sicherheite:
Verse: 24    der was als unbereite

Verse: 25    Lischois der dâ unden lac.
Verse: 26    als dô er von êrste strîtes phlac,

Verse: 27    er sprach: "dû sûmes dich âne nôt.
Verse: 28    vür sicherheit gibe ich den tôt:

Verse: 29    lâz enden dîne werden hant
Verse: 30    swaz mir ie prîses wart bekant.




Chapter: 543 
543


Verse: 1    vor gote ich bin vervluochet,
Verse: 2    mîns prîses er nimmer ruochet.

Verse: 3    durch Orgelûsen minne,
Verse: 4    der edeln herzoginne,

Verse: 5    muoste mir manec werder man
Verse: 6    sînen prîs ze mînen handen lân:

Verse: 7    dû maht vil prîses erben,
Verse: 8    ob dû mich kans ersterben."

Verse: 9    dô dâhte des künec Lôtes sun:
Verse: 10    "deiswâr ich ensol alsô niht tuon.

Verse: 11    sô verlür ich prîses hulde,
Verse: 12    erslüege ich âne schulde

Verse: 13    disen küenen helt unverzaget.
Verse: 14    in hât ir minne ûf mich gejaget,

Verse: 15    der minne mich ouch twinget
Verse: 16    und mir vil kummers bringet:

Verse: 17    wan lâze ich in durch si genesen?
Verse: 18    ob mîn teil an ir sol wesen,

Verse: 19    des enmac er niht erwenden,
Verse: 20    sol mirz gelücke senden.

Verse: 21    wære unser strît von ir gesehen,
Verse: 22    ich wæne si müeste ouch mir des jehen

Verse: 23    daz ich nâch minnen dienen kan."
Verse: 24    dô sprach mîn her Gâwân:

Verse: 25    "ich wil durch die herzogîn
Verse: 26    dich bî dem leben lâzen sîn."

Verse: 27    grôzer müede si niht vergâzen:
Verse: 28    er liez in ûf, si sâzen

Verse: 29    von ein ander verre.
Verse: 30    dô kom des schiffes herre




Chapter: 544 
544


Verse: 1    von dem wazzer ûf daz lant.
Verse: 2    er gienc und truoc ûf sîner hant

Verse: 3    ein mûzersprinzelîn al grâ.
Verse: 4    ez was sîn reht lêhen dâ,

Verse: 5    swer tjostierte ûf dem plân,
Verse: 6    daz er daz ors solde hân

Verse: 7    jenes der dâ læge,
Verse: 8    und disem der siges phlæge,

Verse: 9    des hende solde er nîgen
Verse: 10    und sînen prîs niht verswîgen.

Verse: 11    sus zinste man im blüemîn velt.
Verse: 12    daz was sîn beste huoben gelt

Verse: 13    oder ob sîn mûzersprinzelîn
Verse: 14    einen galandern lêrte pîn:

Verse: 15    von anders nihtiu gienc sîn phluoc.
Verse: 16    daz dûhte in urbor genuoc.

Verse: 17    er was geborn von ritters art,
Verse: 18    mit guoten zühten wol bewart.

Verse: 19    er gienc zuo Gâwâne,
Verse: 20    den zins von dem plâne

Verse: 21    den iesch er zühteclîche.
Verse: 22    Gâwân der ellens rîche

Verse: 23    sprach: "herre, ich enwart nie koufman:
Verse: 24    ir meget mich zolles wol erlân."

Verse: 25    des schiffes herre wider sprach:
Verse: 26    "herre, sô manec vrouwe sach

Verse: 27    daz iu der prîs ist hie geschehen:
Verse: 28    ir sult mir mînes rehtes jehen.

Verse: 29    herre, tuot mir reht bekant:
Verse: 30    ze rehter tjost hât iuwer hant




Chapter: 545 
545


Verse: 1    mir diz ors erworben
Verse: 2    mit prîse al unverdorben,

Verse: 3    wande iuwer hant in nider stach,
Verse: 4    dem al diu werlt ie prîses jach

Verse: 5    mit wârheit unz an disen tac.
Verse: 6    iuwer prîs, sînhalp der gotes slac

Verse: 7    im vreude hât entvüeret.
Verse: 8    grôz sælde iuch hât gerüeret."

Verse: 9    Gâwân sprach: "er stach mich nider:
Verse: 10    des erholte ich mich sider.

Verse: 11    sît man iu tjost verzinsen sol,
Verse: 12    er mac iu zins geleisten wol.

Verse: 13    herre, dort stêt ein runzît,
Verse: 14    daz erwarp an mir sîn strît:

Verse: 15    daz nemet, ob ir gebietet.
Verse: 16    der sich dises orses nietet,

Verse: 17    daz bin ich: ez muoz mich hinnen tragen,
Verse: 18    soldet halt ir niemêr ors bejagen.

Verse: 19    ir nennet reht: welt ir daz nemen,
Verse: 20    sô endarf iuch nimmer des gezemen

Verse: 21    daz ich ze vuoz hinnen gê.
Verse: 22    wan daz tæte mir ze wê,

Verse: 23    solde diz ors iuwer sîn:
Verse: 24    daz was sô ledeclîche mîn

Verse: 25    dennoch hiute morgen vruo.
Verse: 26    woldet ir gemaches grîfen zuo,

Verse: 27    sô ritet ir sanfter einen stap.
Verse: 28    diz ors mir ledeclîchen gap

Verse: 29    Orilus der Burgunjois:
Verse: 30    ûrjans der vürste ûz Punturtois




Chapter: 546 
546


Verse: 1    eine wîle hete mirz verstoln.
Verse: 2    einer mûlinne voln

Verse: 3    möhtet ir noch ê gewinnen.
Verse: 4    ich kan iuch anders minnen:

Verse: 5    sît er iuch dunket alsô wert,
Verse: 6    vür daz ors des ir hie gert

Verse: 7    habet iu den man derz gein mir reit.
Verse: 8    ist im daz liep oder leit,

Verse: 9    dâ kêre ich mich wênec an."
Verse: 10    dô vreute sich der schifman.

Verse: 11    mit lachendem munde er sprach:
Verse: 12    "sô rîche gâbe ich nie gesach,

Verse: 13    swem si reht wære,
Verse: 14    zemphâhene gebære.

Verse: 15    doch, herre, welt irs sîn mîn wer,
Verse: 16    übergolden ist mîn ger:

Verse: 17    vür wâr sîn prîs was ie sô hel,
Verse: 18    vünf hundert ors starc und snel

Verse: 19    ungerne ich vür in næme,
Verse: 20    wande ez mir niht gezæme.

Verse: 21    welt ir mich machen rîche,
Verse: 22    sô werbet ritterlîche:

Verse: 23    meget irs sô gewaldec sîn,
Verse: 24    antwurten in den kocken mîn,

Verse: 25    sô kunnet ir werdekeit wol tuon."
Verse: 26    dô sprach des künec Lôtes sun:

Verse: 27    "beidiu drîn und dar vür
Verse: 28    unz innerhalben iuwer tür

Verse: 29    antwurte ich in iu gevangen."
Verse: 30    "sô werdet ir wol emphangen"




Chapter: 547 
547


Verse: 1    sprach der schifman, des grôzer danc
Verse: 2    was mit nîgen niht ze kranc.

Verse: 3    dô sprach er: "lieber herre mîn,
Verse: 4    dar zuo ruochet selbe sîn

Verse: 5    mit mir hînte durch gemach.
Verse: 6    grœzer êre nie geschach

Verse: 7    deheinem verjen, mînem genôz:
Verse: 8    man prüevet mirz vür sælde grôz,

Verse: 9    behalde ich alsus werden man."
Verse: 10    dô sprach mîn her Gâwân:

Verse: 11    "des ir gert, des solde ich biten.
Verse: 12    mich hât grôz müede überstriten,

Verse: 13    daz mir ruowens wære nôt.
Verse: 14    diu mir diz ungemach gebôt,

Verse: 15    diu kan wol süeze siuren
Verse: 16    und dem herzen vreude tiuren

Verse: 17    und der sorgen machen rîche:
Verse: 18    si lônet ungelîche.

Verse: 19    ouwê vindenlîchiu vlust,
Verse: 20    dû senkes mir die einen brust,

Verse: 21    diu ê der hœhe gerte
Verse: 22    dô mich got vreuden werte,

Verse: 23    dâ lac ein herze unden:
Verse: 24    ich wæne dast verswunden.

Verse: 25    wâ sol ich nû trœsten holn,
Verse: 26    muoz ich âne helfe doln

Verse: 27    nâch minne alsolhe riuwe?
Verse: 28    phliget si wîplîcher triuwe,

Verse: 29    si sol mir vreude mêren,
Verse: 30    diu mich kan sus versêren."




Chapter: 548 
548


Verse: 1    der schifman hôrte daz er ranc
Verse: 2    mit sorge und daz in minne twanc.

Verse: 3    dô sprach er: "herre, ez ist hie reht,
Verse: 4    ûf dem plâne und in dem fôreht

Verse: 5    und aldâ Clinschor herre ist,
Verse: 6    zageheit noch manlîch list

Verse: 7    gevüegentz anders niht wan sô:
Verse: 8    hiute riuwec, morgen vrô.

Verse: 9    ez ist iu lîhte unbekant,
Verse: 10    gar âventiure ist al diz lant:

Verse: 11    sus vert ez naht und ouch den tac.
Verse: 12    bî manheit sælde helfen mac.

Verse: 13    diu sunne kan sô nider stên:
Verse: 14    herre, ir sult ze schiffe gên."

Verse: 15    des bat in der schifman.
Verse: 16    Lischoisen vuorte Gâwân

Verse: 17    mit im dannen ûf den wâc:
Verse: 18    gedulteclîch âne allen bâc

Verse: 19    man den helt des volgen sach.
Verse: 20    der verje zôch daz ors hin nâch.

Verse: 21    sus vuoren si über an den stat.
Verse: 22    der verje Gâwânen bat:

Verse: 23    "sît selbe wirt in mînem hûs."
Verse: 24    daz stuont alsô daz Artûs

Verse: 25    ze Nantes, dâ er dicke saz,
Verse: 26    niht möhte hân gebûwet baz.

Verse: 27    dâ vuorte er Lischoisen în,
Verse: 28    der wirt und daz gesinde sîn

Verse: 29    sich des underwunden.
Verse: 30    an den selben stunden




Chapter: 549 
549


Verse: 1    der wirt ze sîner tohter sprach:
Verse: 2    "dû solt schaffen guot gemach

Verse: 3    mînem herren der hie stêt.
Verse: 4    ir zwei mit ein ander gêt.

Verse: 5    nû diene im unverdrozzen:
Verse: 6    wir hân sîn vil genozzen."

Verse: 7    sînem sune bevalh er Gringuljeten.
Verse: 8    des diu maget was gebeten,

Verse: 9    mit grôzer zuht daz wart getân.
Verse: 10    mit der megede Gâwân

Verse: 11    ûf eine kemenâten gienc.
Verse: 12    den estrîch al übervienc

Verse: 13    niuwer binz und bluomen wol gevar
Verse: 14    wâren drûf gesniten dar.

Verse: 15    dâ entwâpende in diu süeze.
Verse: 16    "got iu des danken müeze,"

Verse: 17    sprach Gâwân," vrouwe, es ist mir nôt:
Verse: 18    wan daz manz iu von hove gebôt,

Verse: 19    sô dient ir mir ze sêre."
Verse: 20    si sprach: "ich diene iu mêre,

Verse: 21    herre, nâch iuwern hulden
Verse: 22    dan von andern schulden."

Verse: 23    des wirtes sun, ein knappe, truoc
Verse: 24    senfter bette dar genuoc

Verse: 25    an der want gein der tür.
Verse: 26    ein teppech wart geleget dar vür,

Verse: 27    dâ solde Gâwân sitzen.
Verse: 28    der knappe truoc mit witzen

Verse: 29    eine kultern sô gemâl
Verse: 30    ûfz bette, von rôtem zindâl.




Chapter: 550 
550


Verse: 1    dem wirte ein bette ouch wart geleget.
Verse: 2    dâ nâch ein ander knappe treget

Verse: 3    dar vür tischlachen und brôt.
Verse: 4    der wirt den beiden daz gebôt.

Verse: 5    dâ gienc diu hûsvrouwe nâch:
Verse: 6    dô diu Gâwânen sach,

Verse: 7    si emphienc in herzenlîche.
Verse: 8    si sprach: "ir hât uns rîche

Verse: 9    nû alrêst gemachet:
Verse: 10    herre, unser sælde wachet."

Verse: 11    der wirt kom, zwazzer man dar truoc.
Verse: 12    dô sich Gâwân getwuoc,

Verse: 13    eine bete er niht vermeit,
Verse: 14    er bat den wirt gesellekeit:

Verse: 15    "lât mit mir ezzen dise maget."
Verse: 16    "herre, ez ist si gar verdaget

Verse: 17    daz si mit herren æze
Verse: 18    oder in sô nâhe sæze:

Verse: 19    si würde lîhte mir ze hêr.
Verse: 20    doch habe wir iuwer genozzen mêr.

Verse: 21    tohter, leiste al sîne ger:
Verse: 22    des bin ich mit der volge wer."

Verse: 23    diu süeze wart von scheme rôt,
Verse: 24    doch tet si daz der wirt gebôt:

Verse: 25    ze Gâwân saz vrou Bêne.
Verse: 26    starker süne zwêne

Verse: 27    hete der wirt ouch erzogen.
Verse: 28    nû hete daz sprinzelîn ervlogen

Verse: 29    des âbents drî galander:
Verse: 30    die hiez er mit ein ander




Chapter: 551 
551


Verse: 1    Gâwân tragen alle drî
Verse: 2    und eine salsen dâ bî.

Verse: 3    diu juncvrouwe niht vermeit,
Verse: 4    mit guoten zühten si sneit

Verse: 5    Gâwân süeziu mursel
Verse: 6    ûf einem blanken wastel

Verse: 7    mit ir klâren henden.
Verse: 8    dô sprach si: "ir sult senden

Verse: 9    dirre gebrâten vogele einen
Verse: 10    (wan si hât enkeinen),

Verse: 11    herre, mîner muoter dar."
Verse: 12    er sprach zer megede wol gevar,

Verse: 13    daz er gerne ir willen tæte
Verse: 14    dar an oder swes si bæte.

Verse: 15    ein galander wart gesant
Verse: 16    der wirtîn: Gâwânes hant

Verse: 17    wart mit zühten vil genigen
Verse: 18    und swirtes danken niht verswigen.

Verse: 19    dô brâhte ein des wirtes sun
Verse: 20    purzeln unde lâtûn

Verse: 21    gebrochen in den vînæger.
Verse: 22    ze grôzer kraft zunwæger

Verse: 23    ist die lenge solhiu nar:
Verse: 24    man wirt ir ouch niht wol gevar.

Verse: 25    solh varwe tuot die wârheit kunt,
Verse: 26    die man sloufet in den munt.

Verse: 27    gestrichen varwe ûf daz vel
Verse: 28    ist selten worden lobes hel.

Verse: 29    swelh wîplîch herze ist stæte ganz,
Verse: 30    ich wæne diu treget den besten glanz.




Chapter: 552 
552


Verse: 1    kunde Gâwân guoten willen zern,
Verse: 2    des möhte er sich dâ wol nern:

Verse: 3    nie muoter gunde ir kinde baz
Verse: 4    dan im der wirt des brôt er az.

Verse: 5    dô man den tisch hin dan emphienc
Verse: 6    und dô diu wirtîn ûz gegienc,

Verse: 7    vil bette man dar ûf dô treget.
Verse: 8    diu wurden Gâwâne geleget.

Verse: 9    einez was ein phlûmît,
Verse: 10    des zieche ein grüener samît,

Verse: 11    des niht von der hôhen art:
Verse: 12    ez was ein samît bastart.

Verse: 13    ein kulter wart des bettes dach,
Verse: 14    niht wan durch Gâwâns gemach,

Verse: 15    mit einem phellel sunder golt
Verse: 16    verre in heidenschaft geholt,

Verse: 17    gesteppet ûf palmât.
Verse: 18    dar über zôch man linde wât,

Verse: 19    zwei lîlachen snêvar.
Verse: 20    man legete ein wanküssen dar

Verse: 21    und der megede mantel einen,
Verse: 22    hermîn niuwe reinen.

Verse: 23    mit urloube erz undervienc,
Verse: 24    der wirt, ê daz er slâfen gienc.

Verse: 25    Gâwân al eine, ist mir gesaget,
Verse: 26    beleip aldâ, mit im diu maget.

Verse: 27    hete er iht hin zir gegert,
Verse: 28    ich wæne si hetes in gewert.

Verse: 29    er sol ouch slâfen, ob er mac.
Verse: 30    got hüete sîn, sô kom der tac.




Chapter: 553 
553


Verse: 1    Grôz müede im zôch diu ougen zuo:
Verse: 2    sus slief er unz des morgens vruo.

Verse: 3    dô erwachte der wîgant.
Verse: 4    einhalp der kemenâten want

Verse: 5    vil venster hete, dâ vor glas.
Verse: 6    der venster einez offen was

Verse: 7    gein dem boumgarten:
Verse: 8    dar în gienc er durch warten,

Verse: 9    durch luft und durch der vogele sanc.
Verse: 10    sîn sitzen wart dâ niht ze lanc,

Verse: 11    er kôs ein burc, die er sâbents sach,
Verse: 12    dô im diu âventiure geschach,

Verse: 13    vil vrouwen ûf dem palas:
Verse: 14    manegiu under in vil schœne was.

Verse: 15    ez dûhte in ein wunder grôz,
Verse: 16    daz die vrouwen niht verdrôz

Verse: 17    ir wachens, daz si sliefen niht.
Verse: 18    dennoch der tac was niht ze lieht.

Verse: 19    er dâhte: "ich wil in zêren
Verse: 20    mich an slâfen kêren."

Verse: 21    wider an sîn bette er gienc.
Verse: 22    der megede mantel übervienc

Verse: 23    in: daz was sîn decke.
Verse: 24    ob man in dâ iht wecke?

Verse: 25    nein, daz wære dem wirte leit.
Verse: 26    diu maget durch gesellekeit,

Verse: 27    aldâ si vor ir muoter lac,
Verse: 28    si brach ir slâf des si phlac

Verse: 29    und gienc hin ûf zir gaste.
Verse: 30    der slief dennoch al vaste.




Chapter: 554 
554


Verse: 1    diu maget ir dienstes niht vergaz:
Verse: 2    vür des bette ûf den teppech saz

Verse: 3    diu klâre juncvrouwe.
Verse: 4    bî mir ich selten schouwe

Verse: 5    daz mir âbents oder vruo
Verse: 6    solh âventiure slîche zuo.

Verse: 7    bî einer wîle Gâwân erwachte:
Verse: 8    er sach an si und lachte

Verse: 9    und sprach: "got halde iuch, vrouwelîn,
Verse: 10    daz ir durch den willen mîn

Verse: 11    iuwern slâf sus brechet
Verse: 12    und an iu selber rechet

Verse: 13    des ich niht hân gedienet gar."
Verse: 14    dô sprach diu maget wol gevar:

Verse: 15    "iuwers dienstes wil ich enbern.
Verse: 16    ich ensol niwan hulde gern:

Verse: 17    herre, gebietet über mich.
Verse: 18    swaz ir gebietet, daz leiste ich.

Verse: 19    al die mit mînem vater sint,
Verse: 20    beidiu mîn muoter und ir kint

Verse: 21    suln iuch ze herren immer hân:
Verse: 22    sô liebe habet ir uns getân."

Verse: 23    er sprach: "sît ir iht lange komen?
Verse: 24    hete ich iuwer kunft ê vernomen,

Verse: 25    daz wære mir liep durch vrâgen,
Verse: 26    wolde iuch des niht betrâgen

Verse: 27    daz ir mirz geruochet sagen.
Verse: 28    ich hân in disen zwein tagen

Verse: 29    vil vrouwen ob mir gesehen:
Verse: 30    von den sult ir mir verjehen




Chapter: 555 
555


Verse: 1    durch iuwer güete, wer die sîn."
Verse: 2    dô erschrac daz juncvrouwelîn

Verse: 3    und sprach: "herre, nû vrâgets niht.
Verse: 4    ich bin dius nimmer iu vergiht,

Verse: 5    ich enkan iu niht von in gesagen:
Verse: 6    ob ichz halt weiz, ich solz verdagen.

Verse: 7    lâtz iu von mir niht swære
Verse: 8    sîn und vrâget ander mære:

Verse: 9    daz râte ich, welt ir volgen mir."
Verse: 10    Gâwân sprach aber wider zir,

Verse: 11    mit vrâge er gienc dem mære nâch
Verse: 12    um al die vrouwen die er dâ sach

Verse: 13    sitzende ûf dem palas.
Verse: 14    diu maget wol sô getriuwe was,

Verse: 15    daz si von herzen weinde
Verse: 16    und grôze klage erscheinde.

Verse: 17    dennoch was ez harte vruo:
Verse: 18    innen des gienc ir vater zuo.

Verse: 19    der liezez âne zürnen gar,
Verse: 20    ob diu maget wol gevar

Verse: 21    ihtes dâ wære betwungen
Verse: 22    und ob dâ was gerungen:

Verse: 23    dem gebârte si gelîche,
Verse: 24    diu maget zühte rîche,

Verse: 25    wande si dem bette nâhe saz.
Verse: 26    daz liez ir vater âne haz.

Verse: 27    dô sprach er: "tohter, weine et niht.
Verse: 28    swaz in schimphe alsus geschiht,

Verse: 29    ob daz von êrste bringet zorn,
Verse: 30    derst schiere dâ nâch verkorn."




Chapter: 556 
556


Verse: 1    Gâwân sprach: "hiest niht geschehen,
Verse: 2    wan des wir vor iu wellen jehen.

Verse: 3    ich vrâcte dise maget ein teil:
Verse: 4    daz dûhte si mîn unheil

Verse: 5    und bat michs daz ichz lieze.
Verse: 6    ob iuch des niht verdrieze,

Verse: 7    sô lât mîn dienst um iuch bejagen,
Verse: 8    wirt, daz ir mirz ruochet sagen,

Verse: 9    um die vrouwen ob uns hie.
Verse: 10    ich envriesch in al den landen nie

Verse: 11    dâ man möhte schouwen
Verse: 12    sô manege klâre vrouwen

Verse: 13    mit sô liehtem gebende."
Verse: 14    der wirt want sîne hende.

Verse: 15    dô sprach er: "vrâgets niht durch got:
Verse: 16    herre, dâst nôt ob aller nôt."

Verse: 17    "sô muoz ich doch ir kummer klagen"
Verse: 18    sprach Gâwân. "wirt, ir sult mir sagen,

Verse: 19    war um ist iu mîn vrâgen leit?"
Verse: 20    "herre, durch iuwer manheit.

Verse: 21    kunnet ir vrâgen niht verbern,
Verse: 22    sô welt ir lîhte vürbaz gern:

Verse: 23    daz lêrt iuch herzen swære
Verse: 24    und machet uns vreuden lære,

Verse: 25    mich und elliu mîniu kint,
Verse: 26    diu iu ze dienste erborn sint."

Verse: 27    Gâwân sprach: "ir sult mirz sagen.
Verse: 28    welt aber ir michz gar verdagen,

Verse: 29    daz iuwer mære mich vergêt,
Verse: 30    ich vreische iedoch wol wiez dâ stêt."




Chapter: 557 
557


Verse: 1    der wirt sprach mit triuwen:
Verse: 2    "herre, sô muoz mich riuwen

Verse: 3    daz iuch svrâgens niht bevilt.
Verse: 4    ich wil iu lîhen einen schilt:

Verse: 5    nû wâpent iuch ûf einen strît.
Verse: 6    ze Terre Marveile ir sît,

Verse: 7    Lît Marveile ist hie.
Verse: 8    herre, ez wart versuochet nie

Verse: 9    ûf Schastel Marveile diu nôt.
Verse: 10    iuwer leben wil in den tôt.

Verse: 11    ist iu âventiure bekant,
Verse: 12    swaz ie gestreit iuwer hant,

Verse: 13    daz was noch gar ein kindes spil:
Verse: 14    nû næhent iu riuwebæriu zil."

Verse: 15    Gâwân sprach: "mir wære leit,
Verse: 16    ob mîn gemach âne arbeit

Verse: 17    von disen vrouwen hinnen rite,
Verse: 18    ich enversuochte ê baz ir site.

Verse: 19    ich hân ouch ê von in vernomen:
Verse: 20    sît ich sô nâhe nû bin komen,

Verse: 21    mich ensol des niht betrâgen,
Verse: 22    ich enwellez durch si wâgen."

Verse: 23    der wirt mit triuwen klagete.
Verse: 24    sînem gaste er dô sagete:

Verse: 25    "aller kummer ist ein niht,
Verse: 26    wan dem ze lîdene geschiht

Verse: 27    disiu âventiure:
Verse: 28    diust scharph und ungehiure

Verse: 29    vür wâr und âne liegen.
Verse: 30    herre, ich enkan niht triegen."




Chapter: 558 
558


Verse: 1    Gâwân der prîses erkande
Verse: 2    an die vorhte sich niht wande.

Verse: 3    er sprach: "nû gebet mir strîtes rât.
Verse: 4    ob ir gebietet, ritters tât

Verse: 5    sol ich hie leisten, ruochets got.
Verse: 6    iuwern rât und iuwer gebot

Verse: 7    wil ich immer gerne hân.
Verse: 8    her wirt, ez wære missetân,

Verse: 9    solde ich sus hinnen scheiden:
Verse: 10    die lieben und die leiden

Verse: 11    heten mich vür einen zagen."
Verse: 12    alrêst der wirt begunde klagen,

Verse: 13    wande im sô leide nie geschach.
Verse: 14    hin ze sînem gaste er sprach:

Verse: 15    "ob daz got erzeige
Verse: 16    daz ir niht sît veige,

Verse: 17    sô werdet ir herre dises landes:
Verse: 18    swaz vrouwen hie stêt phandes,

Verse: 19    die starkez wunder her betwanc,
Verse: 20    daz noch nie ritters prîs erranc,

Verse: 21    manec sarjant, edeliu ritterschaft,
Verse: 22    ob die hie erlœset iuwer kraft,

Verse: 23    sô sît ir prîses gehêret.
Verse: 24    und hât iuch got wol gêret,

Verse: 25    ir muget mit vreuden herre sîn
Verse: 26    über manegen liehten schîn,

Verse: 27    vrouwen von manegen landen.
Verse: 28    wer jæhe iu des ze schanden,

Verse: 29    ob ir hinnen schiedet alsus,
Verse: 30    sît Lischois Gwelljus




Chapter: 559 
559


Verse: 1    iu sînen prîs hie lâzen hât?
Verse: 2    der manege ritterlîche tât

Verse: 3    gevrumet hât, der süeze
Verse: 4    (von rehte ich in alsus grüeze),

Verse: 5    mit ellen ist sîn ritterschaft:
Verse: 6    sô manege tugent diu gotes kraft

Verse: 7    in mannes herze nie gestiez,
Verse: 8    âne îthêren von Gaheviez.

Verse: 9    der îthêrên vor Nantes sluoc,
Verse: 10    mîn schif in gestern über truoc.

Verse: 11    er hât mir vünf ors gegeben
Verse: 12    (got in mit sælden lâze leben),

Verse: 13    diu herzogen und künege riten.
Verse: 14    swaz er hât abe in erstriten,

Verse: 15    daz wirt ze Pelrapeire gesaget:
Verse: 16    ir sicherheit hât er bejaget.

Verse: 17    sîn schilt treget maneger tjoste mâl.
Verse: 18    er reit hie vorschen um den grâl."

Verse: 19    Gâwân sprach: "war ist er komen?
Verse: 20    saget mir, wirt, hât er vernomen,

Verse: 21    dô er sô nâhe was hie bî,
Verse: 22    waz disiu âventiure sî?"

Verse: 23    "herre, er enhât es niht ervarn.
Verse: 24    ich kunde mich des wol bewarn

Verse: 25    daz ichs im zuo gewüege:
Verse: 26    unvuoge ich danne trüege.

Verse: 27    hetet ir selbe vrâgens niht erdâht,
Verse: 28    nimmer wært irs innen brâht

Verse: 29    von mir, waz hie mæres ist,
Verse: 30    mit vorhten scharph ein strenger list.




Chapter: 560 
560


Verse: 1    welt ir niht erwinden,
Verse: 2    mir und mînen kinden

Verse: 3    geschach sô rehte leide nie,
Verse: 4    ob ir den lîp verlieset hie.

Verse: 5    sult aber ir prîs behalden
Verse: 6    und dises landes walden,

Verse: 7    sô hât mîn armuot ende.
Verse: 8    ich getrûwe des iuwer hende,

Verse: 9    si hœhe mich mit rîcheit.
Verse: 10    mit vreuden liep âne leit

Verse: 11    mac iuwer prîs hie erwerben,
Verse: 12    sult ir niht ersterben.

Verse: 13    nû wâpent iuch gein kummer grôz."
Verse: 14    dennoch was Gâwân al blôz.

Verse: 15    er sprach: "traget mir mîn harnas her."
Verse: 16    der bete was der wirt sîn wer.

Verse: 17    von vuoz ûf wâpende in dô gar
Verse: 18    diu süeze maget wol gevar.

Verse: 19    der wirt nâch dem orse gienc.
Verse: 20    ein schilt an sîner wende hienc,

Verse: 21    der dicke und alsô herte was,
Verse: 22    dâ von doch Gâwân sît genas.

Verse: 23    schilt und ors im wâren brâht.
Verse: 24    der wirt was alsô bedâht,

Verse: 25    daz er wider vür in stuont.
Verse: 26    dô sprach er: "herre, ich tuon iu kunt

Verse: 27    wie ir sult gebâren
Verse: 28    gein iuwers verhes vâren.

Verse: 29    mînen schilt sult ir tragen.
Verse: 30    der enist durchstochen noch zeslagen,




Chapter: 561 
561


Verse: 1    wande ich strîte selten:
Verse: 2    wes möhte er danne engelten?

Verse: 3    herre, swenne ir ûf hin kumt,
Verse: 4    ein dinc iu zem orse vrumt.

Verse: 5    ein krâmære sitzet vor dem tor:
Verse: 6    dem lât daz ors hie vor.

Verse: 7    koufet um in, enruochet waz:
Verse: 8    er behelt iuz ors deste baz,

Verse: 9    ob irz im versetzet.
Verse: 10    werdet ir niht geletzet,

Verse: 11    ir muget daz ors gerne hân."
Verse: 12    dô sprach mîn her Gâwân:

Verse: 13    "sol ich niht zorse rîten în?"
Verse: 14    "nein, herre. al der vrouwen schîn

Verse: 15    ist vor iu verborgen:
Verse: 16    sô næhet ez den sorgen.

Verse: 17    den palas vindet ir eine:
Verse: 18    weder grôz noch kleine

Verse: 19    vindet ir niht daz dâ lebe.
Verse: 20    sô waldes diu gotes gebe,

Verse: 21    sô ir in die kemenâten gêt
Verse: 22    dâ Lît Marveile stêt.

Verse: 23    daz bette und die stollen sîn,
Verse: 24    von Marroch der mahmumelîn,

Verse: 25    des krône und al sîn rîcheit,
Verse: 26    wære daz dar gein geleit,

Verse: 27    dâ mite ez wære vergolden niht.
Verse: 28    dar an ze lîden iu geschiht,

Verse: 29    swaz got an iu wil meinen:
Verse: 30    nâch vreude erz müeze erscheinen.




Chapter: 562 
562


Verse: 1    gedenket, herre, ob ir sît wert,
Verse: 2    disen schilt und iuwer swert

Verse: 3    lâzet ninder von iu komen.
Verse: 4    sô ir wænt daz ende habe genomen

Verse: 5    iuwer kummer grœzlîch
Verse: 6    alrêst strîte ist er gelîch."

Verse: 7    dô Gâwân ûf sîn ors gesaz,
Verse: 8    diu maget wart an vreuden laz.

Verse: 9    alle die dâ wâren klageten.
Verse: 10    wênec si des verdageten.

Verse: 11    er sprach zem wirte: "gan mirs got,
Verse: 12    iuwer getriulîch urbot,

Verse: 13    daz ir mîn sus phlâget,
Verse: 14    geltes mich niht betrâget."

Verse: 15    urloup er zer megede nam.
Verse: 16    die grôzes jâmers wol gezam

Verse: 17    (er reit hin), si klageten hie.
Verse: 18    ob ir nû gerne hœret wie

Verse: 19    Gâwâne dâ geschæhe,
Verse: 20    deste gerner ichs iu verjæhe:

Verse: 21    ich sage als ichz hân vernomen.
Verse: 22    dô er was vür die porten komen,

Verse: 23    er vant den krâmære
Verse: 24    und des krâm niht lære.

Verse: 25    dâ lac inne veile,
Verse: 26    daz ichs wære der geile,

Verse: 27    hete ich alsô rîche habe.
Verse: 28    Gâwân vor im erbeizete abe.

Verse: 29    sô rîchen market er nie gesach,
Verse: 30    als im ze sehene aldâ geschach.




Chapter: 563 
563


Verse: 1    der krâm was ein samît,
Verse: 2    vierecke, hôch und wît.

Verse: 3    waz dar inne veiles læge?
Verse: 4    derz mit gelte widerwæge,

Verse: 5    der bâruc von Baldac
Verse: 6    vergülte niht daz drinne lac,

Verse: 7    alsô tæte der katolicô
Verse: 8    von Ranculat: dô Kriechen sô

Verse: 9    stuont daz man hort dar inne vant,
Verse: 10    dâ vergültez niht des keisers hant

Verse: 11    mit jener zweier stiure.
Verse: 12    daz krâmgewant was tiure.

Verse: 13    Gâwân sîn grüezen sprach
Verse: 14    ze dem krâmære. dô er gesach

Verse: 15    waz wunders dâ was veile,
Verse: 16    nâch sîner mâze teile

Verse: 17    bat im zeigen Gâwân
Verse: 18    gürteln oder vürspan.

Verse: 19    der krâmære sprach: "ich hân vür wâr
Verse: 20    hie gesezzen manec jâr,

Verse: 21    daz nie man getorste schouwen
Verse: 22    (niht wan werde vrouwen)

Verse: 23    waz in mînem krâme liget.
Verse: 24    ob iuwer herze manheit phliget,

Verse: 25    sô sît irs alles herre
Verse: 26    (ez ist gevüeret verre),

Verse: 27    habet ir den prîs an iuch genomen.
Verse: 28    sît ir durch âventiure komen

Verse: 29    her, sol iu gelingen
Verse: 30    lîhte ir meget gedingen




Chapter: 564 
564


Verse: 1    um mich: swaz ich veiles hân,
Verse: 2    daz ist iu gar dan undertân.

Verse: 3    vart vürbaz, lâts walden got.
Verse: 4    hât iuch Plippalinot

Verse: 5    der verje her gewîset?
Verse: 6    manec vrouwe prîset

Verse: 7    iuwer komen in ditze lant,
Verse: 8    ob si hie erlœset iuwer hant.

Verse: 9    welt ir nâch âventiuren gên,
Verse: 10    sô lât daz ors al stille stên:

Verse: 11    des hüete ich, welt irz an mich lân."
Verse: 12    dô sprach mîn her Gâwân:

Verse: 13    "wærez in iuwern mâzen,
Verse: 14    ich woldez iu gerne lâzen.

Verse: 15    nû ensitze ich iuwer rîcheit:
Verse: 16    sô rîchen marschalc ez erleit

Verse: 17    nie, sît ich dar ûf gesaz."
Verse: 18    der krâmære sprach âne allen haz:

Verse: 19    "herre, ich selbe und al mîn habe
Verse: 20    (waz möhte ich mêr nû sprechen drabe?)

Verse: 21    ist iuwer: sult ir hie genesen,
Verse: 22    wes möhte ich billîcher wesen?"

Verse: 23    Gâwân sîn ellen lêrte,
Verse: 24    ze vuoz er vürbaz kêrte

Verse: 25    manlîche und unverzaget.
Verse: 26    als ich iu ê hân gesaget,

Verse: 27    er vant der bürge wîte,
Verse: 28    daz ieslîch ir sîte

Verse: 29    stuont mit bûwenlîcher wer.
Verse: 30    vür allen sturm niht ein ber




Chapter: 565 
565


Verse: 1    gæbe si ze drîzec jâren,
Verse: 2    ob man ir wolde vâren.

Verse: 3    mitten drûf ein anger:
Verse: 4    daz Lechvelt ist langer.

Verse: 5    vil türne ob den zinnen stuont.
Verse: 6    uns tuot diu âventiure kunt,

Verse: 7    dô Gâwân den palas sach,
Verse: 8    dem was alumme sîn dach

Verse: 9    rehte als phâwîn gevider gar,
Verse: 10    lieht gemâl und sô gevar,

Verse: 11    weder regen noch der snê
Verse: 12    entet des daches blicke wê.

Verse: 13    innen er was gezieret
Verse: 14    und wol gefeitieret,

Verse: 15    der venster siule wol ergraben,
Verse: 16    dar ûf gewelbe hôhe erhaben.

Verse: 17    dar inne bette ein wunder
Verse: 18    lac her und dar besunder,

Verse: 19    kultern maneger slahte
Verse: 20    lâgen drûf von rîcher ahte.

Verse: 21    dâ wâren die vrouwen gesezzen.
Verse: 22    die enheten niht vergezzen,

Verse: 23    si enwæren dan gegangen.
Verse: 24    von in wart niht emphangen

Verse: 25    ir vreuden kunft, ir sælden tac,
Verse: 26    der gar an Gâwâne lac.

Verse: 27    müesten si in doch hân gesehen,
Verse: 28    waz möhte in liebers sîn geschehen?

Verse: 29    ir neheiniu daz tuon solde.
Verse: 30    swie er in dienen wolde,




Chapter: 566 
566


Verse: 1    dâ wâren si doch unschuldec an.
Verse: 2    dô gienc mîn her Gâwân

Verse: 3    beidiu her unde dar.
Verse: 4    er nam des palases war:

Verse: 5    er sach an einer wende,
Verse: 6    ich enweiz ze weder hende,

Verse: 7    eine tüt wît offen stên,
Verse: 8    dâ innerhalp im solde ergên

Verse: 9    hôhes prîses erwerben
Verse: 10    oder nâch dem prîse ersterben.

Verse: 11    er gienc zer kemenâten în
Verse: 12    (der was ir estrîches schîn

Verse: 13    lûter, hæle als ein glas),
Verse: 14    dâ Lît Marveile was,

Verse: 15    daz bette von dem wunder.
Verse: 16    vier schîben liefen drunder

Verse: 17    von rubînen lieht sinewel,
Verse: 18    daz der wint wart nie sô snel:

Verse: 19    dâ wâren die stollen ûf gekloben.
Verse: 20    den estrîch muoz ich iu loben:

Verse: 21    von jaspis, von krisolde,
Verse: 22    von sardîn, als er wolde,

Verse: 23    Clinschor, der des erdâhte,
Verse: 24    ûz manegem lande brâhte

Verse: 25    sîn listeclîchiu wîsheit
Verse: 26    werc daz hier an was geleit.

Verse: 27    der estrîch was gar sô sleif,
Verse: 28    daz Gâwân kûme aldâ begreif

Verse: 29    mit den vuozen stiure.
Verse: 30    er gienc nâch âventiure.




Chapter: 567 
567


Verse: 1    immer, alsô dicke er trat,
Verse: 2    daz bette vuor von sîner stat,

Verse: 3    dâz ê was gestanden.
Verse: 4    Gâwâne wart enblanden

Verse: 5    daz er den swæren schilt getruoc,
Verse: 6    den im sîn wirt bevalh genuoc.

Verse: 7    er dâhte: "wie kum ich ze dir?
Verse: 8    wiltû wenken sus vor mir,

Verse: 9    ich sol dich innen bringen,
Verse: 10    ob ich dich mege erspringen."

Verse: 11    dô gestuont im daz bette vor:
Verse: 12    er huop sich zem sprunge enbor

Verse: 13    und spranc rehte mitten dran.
Verse: 14    die snelheit vreischet nimmer man,

Verse: 15    wie daz bette her und dar sich stiez.
Verse: 16    der vier wende deheine ez liez,

Verse: 17    mit hurte an ieslîche ez swanc,
Verse: 18    daz al diu burc dâ von erklanc.

Verse: 19    sus reit er manegen poinder grôz.
Verse: 20    swaz der doner ie gedôz

Verse: 21    und al die pusûnære,
Verse: 22    ob der êrste wære

Verse: 23    bî dem jungesten dinne
Verse: 24    und bliesen nâch gewinne,

Verse: 25    ez endorfte niht mêr dâ krachen.
Verse: 26    Gâwân muoste wachen,

Verse: 27    swie er an dem bette læge.
Verse: 28    wes der helt dô phlæge?

Verse: 29    des galmes hete in sô bevilt,
Verse: 30    daz er zucte über sich den schilt:




Chapter: 568 
568


Verse: 1    er lac und liez es walden
Verse: 2    den der helfe hât behalden

Verse: 3    und den der helfe nie verdrôz,
Verse: 4    swer in sînem kummer grôz

Verse: 5    helfe an in versuochen kan.
Verse: 6    der wîse herzehafte man,

Verse: 7    swâ dem kummer wirt bekant,
Verse: 8    der rüefet an die hœsten hant,

Verse: 9    wan diu treget helfe rîche
Verse: 10    und hilfet im helfeclîche.

Verse: 11    daz selbe ouch Gâwân dâ geschach.
Verse: 12    dem er ie sîns prîses jach,

Verse: 13    sînen krefteclîchen güeten,
Verse: 14    den bat er sich behüeten.

Verse: 15    nû gewan daz krachen ende,
Verse: 16    sô daz die vier wende

Verse: 17    gelîche wâren gemezzen dar,
Verse: 18    aldâ daz bette wol gevar

Verse: 19    an dem estrîche enmitten stuont.
Verse: 20    dâ wart im grœzer angest kunt:

Verse: 21    vünf hundert stapslingen
Verse: 22    mit listeclîchen dingen

Verse: 23    ze dem swanke wâren bereite.
Verse: 24    der swanc gap in geleite

Verse: 25    ûf daz bette aldâ er lac.
Verse: 26    der schilt alsolher herte phlac,

Verse: 27    daz ers emphant vil kleine.
Verse: 28    ez wâren wazzersteine

Verse: 29    sinewel unde hart:
Verse: 30    etswâ der schilt doch dürkel wart.




Chapter: 569 
569


Verse: 1    die steine wâren ouch verbolt.
Verse: 2    er hete selten ê gedolt

Verse: 3    sô swinde würfe ûf in gevlogen.
Verse: 4    nû was zem schuzze ûf gezogen

Verse: 5    vünf hundert armbrust oder mêr.
Verse: 6    die heten algelîchen kêr

Verse: 7    rehte ûf daz bette aldâ er lac.
Verse: 8    swer ie solher nœte phlac,

Verse: 9    der mac erkennen phîle.
Verse: 10    daz werte kurze wîle,

Verse: 11    unz daz si wâren versnurret gar.
Verse: 12    swer wil gemaches nemen war,

Verse: 13    der enkum an solh bette niht.
Verse: 14    gemaches im dâ niemen giht:

Verse: 15    es möhte jugent werden grâ,
Verse: 16    des gemaches alsô dâ

Verse: 17    Gâwân an dem bette vant.
Verse: 18    dannoch sîn herze und ouch sîn hant

Verse: 19    der zageheit lâgen eine.
Verse: 20    die phîle und ouch die steine

Verse: 21    heten in niht gar vermiten:
Verse: 22    zequaschieret und ouch versniten

Verse: 23    was er durch die ringe.
Verse: 24    dô hete er gedinge,

Verse: 25    sîns kummers wære ein ende:
Verse: 26    dannoch mit sîner hende

Verse: 27    muoste er prîs erstrîten.
Verse: 28    an den selben zîten

Verse: 29    tet sich gein im ûf ein tür:
Verse: 30    ein starker gebûr gienc dar vür,




Chapter: 570 
570


Verse: 1    der was vreissam getân.
Verse: 2    von visches hiute truoc er an

Verse: 3    ein surkôt und ein bônît
Verse: 4    und des selben zwuo hosen wît.

Verse: 5    einen kolben er in der hende truoc,
Verse: 6    des kiule grœzer dan ein kruoc

Verse: 7    was. er gienc gein Gâwân her:
Verse: 8    daz enwas doch ninder sîn ger,

Verse: 9    wande in sîns komens dâ verdrôz.
Verse: 10    Gâwân dâhte: "dirre ist blôz,

Verse: 11    sîn wer ist gein mir harte laz."
Verse: 12    er rihte sich ûf unde saz,

Verse: 13    als ob in swære ninder lit.
Verse: 14    jener trat hinder einen trit,

Verse: 15    als ob er wolde entwîchen,
Verse: 16    und sprach doch zornlîchen:

Verse: 17    "ir endurfet mich entsitzen niht:
Verse: 18    ich vüege aber wol daz iu geschiht

Verse: 19    dâ von ir den lîp ze phande gebet.
Verse: 20    von stiuvels kreften in noch lebet:

Verse: 21    sol iuch der hie hân ernert,
Verse: 22    ir sît doch sterbens unerwert.

Verse: 23    des bringe ich iuch wol innen,
Verse: 24    als ich nû scheide hinnen."

Verse: 25    der vilân trat wider în.
Verse: 26    Gâwân mit dem swerte sîn

Verse: 27    von dem schilte sluoc die zeine.
Verse: 28    die phîle algemeine

Verse: 29    wâren hin durch gedrungen,
Verse: 30    daz si in den ringen klungen.




Chapter: 571 
571


Verse: 1    dô hôrte er ein gebrumme,
Verse: 2    als der wol zweinzec trummen

Verse: 3    slüege hie ze tanze.
Verse: 4    sîn vester muot der ganze,

Verse: 5    den diu wâre zageheit
Verse: 6    nie verscherte noch versneit,

Verse: 7    dâhte: "waz sol mir geschehen?
Verse: 8    ich möhte nû wol kummers jehen:

Verse: 9    wil sich mîn kummer mêren?
Verse: 10    ze wer sol ich mich kêren."

Verse: 11    nû sach er gein sgebûres tür:
Verse: 12    ein starker lewe spranc dr vür,

Verse: 13    der was als ein ors sô hôch.
Verse: 14    Gâwân der ie ungerne vlôch

Verse: 15    den schilt mit den riemen nam.
Verse: 16    er tet als ez der wer gezam:

Verse: 17    er spranc ûf den estrîch.
Verse: 18    durch hunger was vreislîch

Verse: 19    dirre starke lewe grôz,
Verse: 20    des er doch wênec dâ genôz.

Verse: 21    mit zorne lief er an den man:
Verse: 22    ze wer stuont her Gâwân.

Verse: 23    er hete im den schilt nâch genomen:
Verse: 24    sîn êrster grif was alsô komen,

Verse: 25    durch den schilt mit al den klân.
Verse: 26    von tiere ist selten ê getân

Verse: 27    sîn grif durch solhe herte.
Verse: 28    Gâwân sich zuckes werte:

Verse: 29    ein bein hin abe er im swanc.
Verse: 30    der lewe ûf drîen vüezen spranc:




Chapter: 572 
572


Verse: 1    in dem schilte beleip der vierde vuoz.
Verse: 2    mit bluote gap er solhen guz,

Verse: 3    daz Gâwân mohte vaste stên:
Verse: 4    her und dar begundez gên.

Verse: 5    der lewe spranc dicke an den gast:
Verse: 6    durch die nasen manegen phnast

Verse: 7    tet er mit bleckenden zenen.
Verse: 8    wolde man in solher spîse wenen

Verse: 9    daz er guote liute gæze,
Verse: 10    ungerne ich bî im sæze.

Verse: 11    ez was ouch Gâwâne leit.
Verse: 12    der ûf den lîp dâ mit im streit,

Verse: 13    er hete in sô geletzet,
Verse: 14    mit bluote wart benetzet

Verse: 15    al diu kemenâte gar.
Verse: 16    mit zorne spranc der lewe dar

Verse: 17    und wolde in zucken under sich.
Verse: 18    Gâwân tet im einen stich

Verse: 19    durch die brust unz an die hant,
Verse: 20    dâ von des lewen zorn verswant,

Verse: 21    wande er strûchte nider tôt.
Verse: 22    Gâwân hete die grôze nôt

Verse: 23    mit strîte überwunden.
Verse: 24    in den selben stunden

Verse: 25    dâhte er: "waz ist mir nû guot?
Verse: 26    ich sitze ungerne in ditze bluot.

Verse: 27    ouch sol ich mich des wol bewarn,
Verse: 28    diz bette kan sô umme varn,

Verse: 29    daz ich dran sitze oder lige,
Verse: 30    ob ich rehter wîsheit phlige."




Chapter: 573 
573


Verse: 1    nû was im sîn houbet
Verse: 2    mit würfen sô betoubet,

Verse: 3    und dô sîne wunden
Verse: 4    sô bluoten begunden,

Verse: 5    daz in sîn snellîchiu kraft
Verse: 6    gar liez mit ir geselleschaft,

Verse: 7    durch swindeln er strûchens phlac.
Verse: 8    daz houpt im ûf den lewen lac,

Verse: 9    der schilt vil nider under in.
Verse: 10    gewan er ie kraft oder sin,

Verse: 11    diu wâren im beidiu entvüeret.
Verse: 12    unsanfte er was gerüeret:

Verse: 13    aller sin tet im entwîch.
Verse: 14    sîn wanküssen ungelîch

Verse: 15    was dem daz Gimêle,
Verse: 16    von Monte Ribêle

Verse: 17    diu süeze und diu wîse,
Verse: 18    legete Kahenîse,

Verse: 19    dar ûfe er sînen prîs verslief.
Verse: 20    der prîs gein disem manne lief,

Verse: 21    wande ir habet daz wol vernomen,
Verse: 22    wâ mite er was von witzen komen,

Verse: 23    daz er lac unversunnen,
Verse: 24    wie des wart begunnen.

Verse: 25    verholne ez wart beschouwet,
Verse: 26    daz mit bluote was betouwet,

Verse: 27    der kemenâten estrîch.
Verse: 28    si beide dem tôde wâren gelîch,

Verse: 29    der lewe unde Gâwân.
Verse: 30    ein juncvrouwe wol getân




Chapter: 574 
574


Verse: 1    mit vorhten luogete oben în:
Verse: 2    des wart vil bleich ir liehter schîn.

Verse: 3    diu junge sô verzagete,
Verse: 4    daz ez diu alde klagete,

Verse: 5    Arnîve diu wîse.
Verse: 6    dar um ich si noch prîse,

Verse: 7    daz si den ritter nerte
Verse: 8    und im dô sterben werte.

Verse: 9    si gienc ouch dar durch schouwen.
Verse: 10    dô wart von der vrouwen

Verse: 11    zem venster oben în gesehen
Verse: 12    daz si neweders mohte jehen,

Verse: 13    ir künfteclîcher vreuden tage
Verse: 14    oder immer herzenlîche klage.

Verse: 15    si vorhte, der ritter wære tôt:
Verse: 16    des lêrten si gedanke nôt,

Verse: 17    wande er sus ûf dem lewen lac
Verse: 18    und anders deheines bettes phlac.

Verse: 19    si sprach: "mir ist von herzen leit
Verse: 20    ob dîn getriuwiu manheit

Verse: 21    dîn werdez leben hât verlorn.
Verse: 22    hâstû den tôt alhie erkorn

Verse: 23    durch uns vil ellende diet?
Verse: 24    sît dir dîn triuwe daz geriet,

Verse: 25    mich erbarmet iemêr dîn tugent,
Verse: 26    dû habes alter oder jugent."

Verse: 27    hin zal den vrouwen si dô sprach,
Verse: 28    wande si den helt sus ligen sach:

Verse: 29    "ir vrouwen die des toufes phlegen,
Verse: 30    rüeft alle an got um sînen segen."




Chapter: 575 
575


Verse: 1    si sande zwuo juncvrouwen dar
Verse: 2    und bat si nemen rehte war

Verse: 3    daz si sanfte slichen,
Verse: 4    e daz si dan entwichen,

Verse: 5    daz si ir bræhten mære,
Verse: 6    ob er bî lebene wære

Verse: 7    oder ob er wære verscheiden
Verse: 8    daz gebôt si den beiden.

Verse: 9    die süezen megede reine,
Verse: 10    ob ir dewederiu weine?

Verse: 11    jâ si beide sêre
Verse: 12    durch rehtes jâmers lêre.

Verse: 13    dô si in sus ligen vunden,
Verse: 14    daz von sînen wunden

Verse: 15    der schilt mit bluote swebete,
Verse: 16    si besâhen ob er lebete:

Verse: 17    einiu mit ir klâren hant
Verse: 18    den helm von sînem houpte bant

Verse: 19    und ouch die vinteilen sîn.
Verse: 20    dâ lac ein vil kleinez schiumelîn

Verse: 21    vor sînem rôten munde.
Verse: 22    ze warten si begunde,

Verse: 23    ob er den âtem inder züge
Verse: 24    oder ob er si des lebens trüge.

Verse: 25    daz lac dannoch in strîte.
Verse: 26    ûf sînem kursîte

Verse: 27    von zobele wâren zwei gampilûn,
Verse: 28    als Ilinôt der Bertûn

Verse: 29    mit grôzem prîse wâpen truoc:
Verse: 30    der brâhe werdekeit genuoc




Chapter: 576 
576


Verse: 1    in der jugende an sîn ende.
Verse: 2    diu maget mir ir hende

Verse: 3    des zobels roufte und habete in dar
Verse: 4    vür sîne nasen: dô nam si war,

Verse: 5    ob der âtem zhâr sô regete,
Verse: 6    daz er sich inder wegete.

Verse: 7    der âtem wart dâ vunden.
Verse: 8    an den selben stunden

Verse: 9    hiez si balde springen,
Verse: 10    ein lûter wazzer bringen:

Verse: 11    ir gespil wol gevar
Verse: 12    brâhte ir daz snellîche dar.

Verse: 13    diu maget schoup ir vingerlîn
Verse: 14    zwischen die zene sîn:

Verse: 15    mit grôzen vuogen daz geschach.
Verse: 16    dô gôz si daz wazzer nâch

Verse: 17    sanfte und aber mêre.
Verse: 18    si engôz iedoch niht sêre,

Verse: 19    unz daz er diu ougen ûf swanc.
Verse: 20    er bôt in dienst und sagete in danc,

Verse: 21    den zwein süezen kinden:
Verse: 22    "daz ir mich soldet vinden

Verse: 23    sus ungezogenlîche ligen!
Verse: 24    ob daz wirt von iu verswigen,

Verse: 25    daz prüeve ich iu vür güete.
Verse: 26    iuwer zuht iuch dran behüete."

Verse: 27    si jâhen: "ir lâget unde liget
Verse: 28    als der des hœsten prîses phliget.

Verse: 29    ir habet den prîs alhie bezalt,
Verse: 30    des ir mit vreuden werdet alt:




Chapter: 577 
577


Verse: 1    der sic ist iuwer hiute.
Verse: 2    nû trœstet uns armen liute,

Verse: 3    ob iuwern wunden sî alsô
Verse: 4    daz wir mit iu wesen vrô."

Verse: 5    er sprach: "sæht ir mich gerne leben,
Verse: 6    sô sult ir mir helfe geben."

Verse: 7    des bat er die vrouwen:
Verse: 8    "lât mîne wunden schouwen

Verse: 9    etswen der dâ künec mite.
Verse: 10    sol ich begên noch strîtes site,

Verse: 11    sô bindet mînen helm ûf und gêt ir hin:
Verse: 12    den lîp ich gerne wernde bin."

Verse: 13    si jâhen: "ir sît nû strîtes vrî.
Verse: 14    herre, lât uns iu wesen bî:

Verse: 15    wan einiu sol gewinnen
Verse: 16    an vier küneginnen

Verse: 17    daz botenbrôt, ir lebet noch.
Verse: 18    man sol iu bereiten och

Verse: 19    gemach und erzenîe klâr
Verse: 20    und wol mit triuwen nemen war

Verse: 21    mit salben sô gehiure,
Verse: 22    diu vür die quaschiure

Verse: 23    und vür die wunden ein genist
Verse: 24    mit senfte helfeclîchen ist."

Verse: 25    der megede einiu dannen spranc
Verse: 26    sô balde daz si ninder hanc.

Verse: 27    diu brâhte ze hove mære
Verse: 28    daz er bî lebende wære

Verse: 29    und alsô lebelîche,
Verse: 30    "daz er uns vreuden rîche




Chapter: 578 
578


Verse: 1    mit vreuden machet, ruochets got.
Verse: 2    im ist aber guoter helfe nôt."

Verse: 3    si sprâchen alle: "diê merzîs."
Verse: 4    diu alde küneginne wîs

Verse: 5    ein bette hiez bereiten,
Verse: 6    dâ vür einen teppech breiten

Verse: 7    bî einem guoten viure.
Verse: 8    salben harte tiure,

Verse: 9    wol geworht mit sinne,
Verse: 10    die gewan diu küneginne

Verse: 11    zer quaschiure und ze wunden.
Verse: 12    dô gebôt si an den stunden

Verse: 13    vier juncvrouwen daz si giengen
Verse: 14    und sîn harnas emphiengen,

Verse: 15    daz siz sanfte von im næmen
Verse: 16    und daz si kunden ræmen

Verse: 17    daz er sich des niht dorfte schemen.
Verse: 18    "einen phelle sult ir um iuch nemen

Verse: 19    und entwâpent in in dem schate.
Verse: 20    ob danne gêns sî sîn state,

Verse: 21    daz dolt oder traget in hin
Verse: 22    aldâ ich bî dem bette bin:

Verse: 23    ich warte aldâ der helt sol ligen.
Verse: 24    ob sîn kamph ist sô gedigen

Verse: 25    daz er niht ist ze verhe wunt,
Verse: 26    ich mache in schiere wol gesunt.

Verse: 27    swelh sîn wunde stüende ze verhe,
Verse: 28    daz wære diu vreuden twerhe:

Verse: 29    dâ mite wæren ouch wir erslagen
Verse: 30    und müesten lebendec sterben tragen."




Chapter: 579 
579


Verse: 1    nû, diz wart alsô getân.
Verse: 2    entwâpent wart her Gâwân

Verse: 3    und dannen geleitet
Verse: 4    und helfe bereitet

Verse: 5    von den die helfen kunden.
Verse: 6    dâ wâren sîner wunden

Verse: 7    vünfzec oder mêre.
Verse: 8    die phîle iedoch niht sêre

Verse: 9    durch die ringe wâren gedrucket:
Verse: 10    der schilt was vür gerucket.

Verse: 11    dô nam diu alde künegîn
Verse: 12    dictam und warmen wîn

Verse: 13    und einen blâwen zindâl:
Verse: 14    dô erstreich si diu bluotes mâl

Verse: 15    ûz den wunden, swâ deheiniu was,
Verse: 16    und bant in sô daz er genas.

Verse: 17    swâ der helm was în gebogen,
Verse: 18    dâ engein daz houbet was erzogen,

Verse: 19    daz man die würfe erkande:
Verse: 20    die quaschiuren si verswande

Verse: 21    mit der salben krefte
Verse: 22    und von ir meisterschefte.

Verse: 23    si sprach: "ich senfte iu schiere.
Verse: 24    Cundrîe la surziere

Verse: 25    ruochet mich sô dicke sehen:
Verse: 26    swaz von erzenîe mac geschehen,

Verse: 27    des tuot si mich gewaldec wol.
Verse: 28    sît Anfortas in jâmers dol

Verse: 29    kom, daz man im helfe warp,
Verse: 30    diu salbe im half daz er niht starp:




Chapter: 580 
580


Verse: 1    sist von Munsalvæsche komen."
Verse: 2    dô Gâwân hête vernomen

Verse: 3    Munsalvæsche nennen,
Verse: 4    dô begunde er vreude erkennen:

Verse: 5    er wânde er wære dâ nâhe bî.
Verse: 6    dô sprach der ie was valsches vrî,

Verse: 7    Gâwân zer küneginne:
Verse: 8    "vrouwe, mîne sinne,

Verse: 9    die mir wâren entrunnen,
Verse: 10    die habet ir gewunnen

Verse: 11    wider in mîn herze:
Verse: 12    ouch senftet sich mîn smerze.

Verse: 13    swaz ich krefte oder sinne hân,
Verse: 14    die hât iuwer dienestman

Verse: 15    gar von iuwern schulden."
Verse: 16    si sprach: "herre, iuwern hulden

Verse: 17    sul wir uns alle nâhen
Verse: 18    und des mit truiwen gâhen.

Verse: 19    nû volct mir und enredet niht vil.
Verse: 20    eine wurz ich iu geben wil,

Verse: 21    dâ von ir slâfet: dast iu guot.
Verse: 22    ezzens, trinkens keinen muot

Verse: 23    sult ir haben vor der naht.
Verse: 24    sô kumt iu wider iuwer maht,

Verse: 25    sô trite ich iu mit spîse zuo,
Verse: 26    daz ir wol bîtet unz vruo."

Verse: 27    eine wurz si legete in sînen munt:
Verse: 28    dô slief er an der selben stunt.

Verse: 29    wol si sîn mit decke phlac.
Verse: 30    alsus überslief den tac




Chapter: 581 
581


Verse: 1    der êren rîche und lasters arm,
Verse: 2    lac al sanfte und im was warm.

Verse: 3    etswenne in doch in slâfe vrôs,
Verse: 4    daz er heschete und nôs,

Verse: 5    allez von der salben kraft.
Verse: 6    von vrouwen grôz geselleschaft

Verse: 7    giengen ûz, die andern în.
Verse: 8    die truogen liehten werden schîn.

Verse: 9    Arnîve diu alde
Verse: 10    gebôt mit ir gewalde

Verse: 11    daz ir enkeiniu riefe
Verse: 12    die wîle der helt dâ sliefe.

Verse: 13    si bat ouch den palas
Verse: 14    besliezen: swaz dâ ritter was,

Verse: 15    sarjande, burgære,
Verse: 16    der neheiner disiu mære

Verse: 17    vriesch vor dem andern tage.
Verse: 18    dô kom den vrouwen niuwiu klage.

Verse: 19    sus slief der helt unz an die naht.
Verse: 20    diu künegîn was sô bedâht,

Verse: 21    die wurz si im ûz dem munde nam.
Verse: 22    er erwachte, trinkens in gezam:

Verse: 23    dô hiez dar tragen diu wîse
Verse: 24    trinken und guote spîse.

Verse: 25    er rihte sich ûf unde saz,
Verse: 26    mit guoten vreuden er az.

Verse: 27    vil manec vrouwe vor im stuont.
Verse: 28    im wart nie werder dienest kunt:

Verse: 29    ir dienst mit zühten wart getân.
Verse: 30    dô pruovte mîn her Gâwân




Chapter: 582 
582


Verse: 1    dise, die und aber jene:
Verse: 2    er was et in der alden sene

Verse: 3    nâch Orgelûsen der klâren.
Verse: 4    wande im in sînen jâren

Verse: 5    kein wîp sô nâhe nie gegienc
Verse: 6    etswâ dâ er minne emphienc

Verse: 7    oder dâ im minne was versaget.
Verse: 8    dô sprach der helt unverzaget

Verse: 9    ze sîner meisterinne,
Verse: 10    der alden küneginne:

Verse: 11    "vrouwe, ez krenkt mir mîne zuht,
Verse: 12    ir meget mirs jehen vür ungenuht,

Verse: 13    suln dise vrouwen vor mir stên:
Verse: 14    gebietet in daz si sitzen gên,

Verse: 15    oder heizt si mit mir ezzen."
Verse: 16    "alhie wirt niht gesezzen

Verse: 17    von ir enkeiner unz an mich.
Verse: 18    herre, si möhten schamen sich,

Verse: 19    solden si iu niht dienen vil,
Verse: 20    wande ir sît unser vreuden zil.

Verse: 21    doch, herre, swaz ir gebietet in,
Verse: 22    daz suln si leisten, habe wir sin."

Verse: 23    die edeln mit der hôhen art
Verse: 24    wâren ir zühte des bewart,

Verse: 25    wande siz mit willen tâten,
Verse: 26    ir süezen munde in bâten

Verse: 27    dâ stêns unz er gæze,
Verse: 28    daz ir enkeiniu sæze.

Verse: 29    dô daz geschach, si giengen wider.
Verse: 30    Gâwân sich legete slâfen nider.




Chapter: 583 
583


Verse: 1    Swer im nû ruowe næme,
Verse: 2    ob ruowens in gezæme,

Verse: 3    ich wæne, der hetes sünde.
Verse: 4    nâch der âventiure urkünde

Verse: 5    hete er sich garbeitet,
Verse: 6    gehœhet und gebreitet

Verse: 7    sînen prîs mit grôzer nôt.
Verse: 8    swaz der werde Lanzelôt

Verse: 9    ûf der swertbrücke erleit
Verse: 10    und sît mit Meljakanze streit,

Verse: 11    daz was gein dirre nôt ein niht
Verse: 12    und des man Gârele giht,

Verse: 13    dem stolzen künege rîche:
Verse: 14    der alsô ritterlîche

Verse: 15    den lewen von dem palas
Verse: 16    warf, der dâ ze Nantes was,

Verse: 17    Gârel ouchz mezzer holte,
Verse: 18    dâ von er kummer dolte

Verse: 19    in der marmelînen sûl.
Verse: 20    trüege dise phîle ein mûl,

Verse: 21    er wære ze vil geladen dâ mite,
Verse: 22    die Gâwân durch ellens site

Verse: 23    gein sînem verhe snurren liez,
Verse: 24    als in sîn manlîch herze hiez.

Verse: 25    Li Gweiz Preljus der vurt
Verse: 26    und êrec, der Schoidelakurt

Verse: 27    erstreit ab Mabonagrîn,
Verse: 28    der newederz gap sô hôhen pîn,

Verse: 29    noch dô der stolze îwân
Verse: 30    sînen guz niht wolde lân




Chapter: 584 
584


Verse: 1    ûf der âventiure stein.
Verse: 2    solden dise kummer sîn al ein,

Verse: 3    Gâwâns kummer slüege vür,
Verse: 4    wæge iemen ungemaches kür.

Verse: 5    welhen kummer meine ich nuo?
Verse: 6    ob iuch des diuhte niht ze vruo,

Verse: 7    ich solde in iu benennen gar:
Verse: 8    Orgelûse kom aldar

Verse: 9    in Gâwâns herzen gedanc,
Verse: 10    der ie was zageheite kranc

Verse: 11    und gein dem wâren ellen starc.
Verse: 12    wie kom, daz sich dâ verbarc

Verse: 13    sô grôz wîp in sô kleiner stat?
Verse: 14    si kom einen engen phat

Verse: 15    in Gâwânes herze,
Verse: 16    daz aller sîn smerze

Verse: 17    von disem kummer gar verswant.
Verse: 18    ez was iedoch ein kurziu want,

Verse: 19    dâ sô lanc wîp inne saz,
Verse: 20    der mit triuwen nie vergaz

Verse: 21    sîn dienestlîchez wachen.
Verse: 22    niemen sol des lachen.

Verse: 23    daz sus werlîchen man
Verse: 24    ein wîp enschumfieren kan,

Verse: 25    wochrî woch, waz sol daz sîn?
Verse: 26    dâ tuot vrou Minne ir zürnen schîn

Verse: 27    an dem, der prîs hât bejaget.
Verse: 28    werlîch und unverzaget

Verse: 29    hât si in iedoch vunden.
Verse: 30    gein dem siechen wunden




Chapter: 585 
585


Verse: 1    solde si gewaltes verdriezen:
Verse: 2    er möhte doch des geniezen,

Verse: 3    daz si in âne sînen danc
Verse: 4    wol gesunden ê betwanc.

Verse: 5    vrou Minne, welt ir prîs bejagen,
Verse: 6    möhtet ir iu doch lâzen sagen,

Verse: 7    iust âne êre dirre strît.
Verse: 8    Gâwân lebete ie sîne zît,

Verse: 9    als iuwer hulde im gebôt:
Verse: 10    daz tet ouch sîn vater Lôt.

Verse: 11    muoterhalp al sîn geslehte
Verse: 12    daz stuont iu gar ze rehte

Verse: 13    sît her von Mazadâne,
Verse: 14    den ze Feimurgâne

Verse: 15    Terredelaschoie vuorte.
Verse: 16    den iuwer kraft dô ruorte,

Verse: 17    Mazadânes nâchkomen,
Verse: 18    von den ist dicke sît vernomen,

Verse: 19    daz ir enkeiner iuch nie verliez.
Verse: 20    îthêr von Gaheviez

Verse: 21    iuwer insigel truoc:
Verse: 22    swâ man vor wîben sîn gewuoc,

Verse: 23    des wolde sich ir keiniu schamen,
Verse: 24    swâ man nande sînen namen,

Verse: 25    ob si der minne ir krefte jach.
Verse: 26    nû prüevet denne, diu in sach:

Verse: 27    der wâren diu rehten mære komen
Verse: 28    an dem iu dienest wart benomen.

Verse: 29    nû tuot ouch Gâwân den tôt,
Verse: 30    als sînem neven Ilinôt,




Chapter: 586 
586


Verse: 1    den iuwer kraft dar zuo betwanc,
Verse: 2    daz der junge süeze ranc

Verse: 3    nâch werder âmîen,
Verse: 4    von Kanedic Flôrîen.

Verse: 5    sîns vater lant von kinde er vlôch:
Verse: 6    diu selbe künegîn in zôch,

Verse: 7    ze Bertâne er was ein gast.
Verse: 8    Flôrîe in luot mit minnen last,

Verse: 9    daz si in verjagete vür daz lant.
Verse: 10    in ir dienest man in vant

Verse: 11    tôt, als ir wol hât vernomen.
Verse: 12    Gâwâns künne ist dicke komen

Verse: 13    durch minne in herzebæriu sêr.
Verse: 14    ich nenne iu sîner mâge mêr,

Verse: 15    den ouch von minne ist worden wê.
Verse: 16    wes twanc der bluotvarwe snê

Verse: 17    Parzivâles getriuwen lîp?
Verse: 18    daz schuof diu künegîn sîn wîp.

Verse: 19    Gâlôesen und Gahmureten,
Verse: 20    die habet ir beide übertreten,

Verse: 21    daz ir si gâbet an den rê.
Verse: 22    diu junge werde Itonjê

Verse: 23    truoc nâch dem künege Gramoflanz
Verse: 24    mit triuwen stæte minne ganz:

Verse: 25    daz was Gâwâns swester klâr.
Verse: 26    vrou Minne, ir teiltet ouch iuwern vâr

Verse: 27    Sûrdâmûr durch Alexandern.
Verse: 28    die eine und die andern,

Verse: 29    swaz Gâwân künnes ie gewan,
Verse: 30    vrou Minne, die woldet ir niht erlân,




Chapter: 587 
587


Verse: 1    sie enmüesten dienest gein iu tragen.
Verse: 2    nû welt ir prîs an im bejagen:

Verse: 3    ir soldet kraft gein kreften geben
Verse: 4    und liezet Gâwânen leben

Verse: 5    siech mit sînen wunden
Verse: 6    und twünget die gesunden.

Verse: 7    maneger hât von minnen sanc,
Verse: 8    den nie diu minne alsô getwanc.

Verse: 9    ich möhte nû wol stille dagen:
Verse: 10    ez solden minnære klagen,

Verse: 11    waz dem von Norwæge was,
Verse: 12    dô er der âventiur genas,

Verse: 13    daz in bestuont der minnen schûr
Verse: 14    âne helfe gar ze sûr.

Verse: 15    Er sprach: "ouwê, daz ich ie erkôs
Verse: 16    disiu bette ruowelôs:

Verse: 17    einez hât mich versêret
Verse: 18    und daz ander mir gemêret

Verse: 19    gedanke nâch minne.
Verse: 20    Orgelûse diu herzoginne

Verse: 21    muoz genâde an mir begên,
Verse: 22    ob ich bî vreuden sol bestên."

Verse: 23    vor ungedult er sich sô want,
Verse: 24    daz brast etslîch sîn wunden bant.

Verse: 25    in solhem ungemache er lac.
Verse: 26    nû seht, dô schein ûf in der tac:

Verse: 27    des hete er unsanfte erbiten.
Verse: 28    er hete dâ vor dicke erliten

Verse: 29    mit swerten manegen scharphen strît
Verse: 30    sanfter danne die ruowens zît.




Chapter: 588 
588


Verse: 1    ob kummer sich gelîche deme,
Verse: 2    swelh minnære den an sich geneme,

Verse: 3    der werde alrêst wol gesunt
Verse: 4    mit phîlen alsus sêre wunt:

Verse: 5    daz tuot im lîhte alsô wê
Verse: 6    als sîn minnen kummer ê.

Verse: 7    Gâwân truoc minne und ander klage.
Verse: 8    dô begundez liuhten von dem tage,

Verse: 9    daz sîner grôzen kerzen schîn
Verse: 10    unnâch sô virrec mohte sîn.

Verse: 11    ûf rihte sich der wîgant.
Verse: 12    dô was sîn lînîn gewant

Verse: 13    nâch wunden und harnas var.
Verse: 14    zuo zim was geleget dar

Verse: 15    hemde und bruoch von buckeram
Verse: 16    (den wehsel er dô gerne nam)

Verse: 17    und eine garnâsche merderîn,
Verse: 18    des selben ein kürsenlîn,

Verse: 19    ob den beiden schurbrant
Verse: 20    von Arrâze aldar gesant.

Verse: 21    zwêne stivâle ouch dâ lâgen,
Verse: 22    die niht grôzer enge phlâgen.

Verse: 23    diu niuwen kleider legete er an.
Verse: 24    dô gienc mîn her Gâwân

Verse: 25    ûz zer kemenâten tür.
Verse: 26    sus gienc er wider unde vür,

Verse: 27    unz er den rîchen palas vant.
Verse: 28    sînen ougen wart nie bekant

Verse: 29    rîcheit, diu dar zuo töhte,
Verse: 30    daz si dem dâ gelîchen möhte.




Chapter: 589 
589


Verse: 1    ûf durch den palas einesît
Verse: 2    gienc ein gewelbe niht ze wît,

Verse: 3    gegrêdet über den palas hôch:
Verse: 4    sinewel sich daz umme zôch.

Verse: 5    dar ûfe stuont ein klâriu sûl:
Verse: 6    diu was niht von holze vûl,

Verse: 7    si was lieht unde starc,
Verse: 8    sô grôz, vroun Kamillen sarc

Verse: 9    wære drûfe wol gestanden.
Verse: 10    ûz Feirefîzes landen

Verse: 11    brâhtez der wîse Klinschor.
Verse: 12    werc, daz hie stuont enbor,

Verse: 13    sinewel als ein gezelt ez was.
Verse: 14    der meister Jêômetras,

Verse: 15    soldez geworht hân des hant,
Verse: 16    diu kunst wære im unbekant.

Verse: 17    ez was geworht mit liste.
Verse: 18    adamas und ametiste

Verse: 19    (diu âventiure uns wizzen lât),
Verse: 20    topâzje und grânât,

Verse: 21    krisolde, rubîne,
Verse: 22    smârâde, sardîne,

Verse: 23    sus wâren diu venster rîche,
Verse: 24    wît und hôch gelîche.

Verse: 25    als man der venster siule sach,
Verse: 26    der art was obene al daz dach.

Verse: 27    dehein sûl stuont dar unde,
Verse: 28    diu sich gelîchen kunde

Verse: 29    der grôzen sûl, dâ zwischen stuont.
Verse: 30    uns tuot diu âventiure kunt,




Chapter: 590 
590


Verse: 1    waz diu wunders mohte hân.
Verse: 2    durch schouwen gienc her Gâwân

Verse: 3    ûf daz warthûs eine
Verse: 4    ze manegem tiuren steine.

Verse: 5    dâ vant er solh wunder grôz,
Verse: 6    des in ze sehen niht verdrôz:

Verse: 7    in dûhte, daz im al diu lant
Verse: 8    in der grôzen siule wæren bekant

Verse: 9    und daz diu lant alumme giengen
Verse: 10    und daz mit hurte emphiengen

Verse: 11    die grôzen berge ein ander.
Verse: 12    in der siule vander

Verse: 13    liute rîten unde gên,
Verse: 14    disen loufen, jenen stên.

Verse: 15    in ein venster er gesaz,
Verse: 16    er wolde daz wunder prüeven baz.

Verse: 17    dô kom diu alde Arnîve
Verse: 18    und ir tohter Sangîve

Verse: 19    und ir tohter tohter zwuo.
Verse: 20    die giengen alle viere zuo:

Verse: 21    Gâwân spranc ûf, dô er sie sach.
Verse: 22    diu künegîn Arnîve sprach:

Verse: 23    "herre, ir soldet noch slâfes phlegen.
Verse: 24    habet ir ruowens iuch bewegen,

Verse: 25    dar zuo sît ir ze sêre wunt,
Verse: 26    sol iu ander ungemach sîn kunt."

Verse: 27    dô sprach er: "vrouwe und meisterin,
Verse: 28    mir hât kraft unde sin

Verse: 29    iuwer helfe alsô gegeben,
Verse: 30    daz ich gediene, muoz ich leben."




Chapter: 591 
591


Verse: 1    diu künegîn sprach: "muoz ich sô spehen,
Verse: 2    daz ir mir, herre, habet verjehen,

Verse: 3    daz ich iuwer meisterinne sî,
Verse: 4    sô küsset dise vrouwen alle drî.

Verse: 5    dâ sît ir lasters an bewart:
Verse: 6    si sint erborn von küneges art."

Verse: 7    dirre bete was er vrô,
Verse: 8    die klâren vrouwen kuste er dô,

Verse: 9    Sangîven und Itonjê
Verse: 10    und die süezen Kundrîê.

Verse: 11    Gâwân saz selbe vünfte nider.
Verse: 12    dô sach er vür unde wider

Verse: 13    an der klâren megede lîp:
Verse: 14    iedoch twanc in des ein wîp,

Verse: 15    diu in sînem herzen lac,
Verse: 16    dirre megede blic ein nebeltac

Verse: 17    was bî Orgelûsen gar.
Verse: 18    diu dûhte et in sô wol gevar,

Verse: 19    von Lôgrois diu herzogin:
Verse: 20    dâ jagete in sîn herze hin.

Verse: 21    nû, diz was ergangen,
Verse: 22    daz Gâwân was emphangen

Verse: 23    von den vrouwen allen drîn.
Verse: 24    die truogen sô liehten süezen schîn

Verse: 25    des lîhte ein herze wære versniten,
Verse: 26    daz ê niht kummers hete erliten.

Verse: 27    ze sîner meisterinne er sprach
Verse: 28    um die sûl, die er dâ sach,

Verse: 29    daz si im sagete mære,
Verse: 30    von welher art diu wære.




Chapter: 592 
592


Verse: 1    dô sprach si: "herre, dirre stein
Verse: 2    bî tage und alle nehte schein,

Verse: 3    sît er mir êrste wart erkant.
Verse: 4    alum sehs mîle in daz lant,

Verse: 5    swaz in dem zil geschiht,
Verse: 6    in dirre siule man daz siht,

Verse: 7    in wazzer und ûf velde.
Verse: 8    des ist er wâriu melde:

Verse: 9    ez sî vogel oder tier,
Verse: 10    der gast und der fôrehtier,

Verse: 11    die vremden und die kunden,
Verse: 12    die hât man drinne vunden.

Verse: 13    über sehs mîle gêt sîn glanz.
Verse: 14    er ist sô veste und ouch sô ganz,

Verse: 15    daz in mit starken sinnen
Verse: 16    kunde nie gewinnen

Verse: 17    weder hamer noch der smit.
Verse: 18    er wart verstoln ze Tabronit

Verse: 19    der künegîn Sekundillen,
Verse: 20    ich wæne des, âne ir willen."

Verse: 21    Gâwân an den zîten
Verse: 22    sach in der siule rîten:

Verse: 23    einen ritter und eine vrouwen
Verse: 24    mohte er dâ beidiu schouwen.

Verse: 25    dô dûhte in diu vrouwe klâr,
Verse: 26    man und ors gewâpent gar

Verse: 27    und der helm gezimieret.
Verse: 28    si kômen geheistieret

Verse: 29    durch die passâschen ûf den plân.
Verse: 30    nâch im diu reise wart getân.




Chapter: 593 
593


Verse: 1    si kômen die strâzen durch daz muor,
Verse: 2    als Lischois der stolze vuor,

Verse: 3    den er enschumfierte.
Verse: 4    diu vrouwe kondewierte

Verse: 5    den ritter mit dem zoume her:
Verse: 6    tjostieren was sîn ger.

Verse: 7    Gâwân sich umme kêrte,
Verse: 8    sînen kummer er gemêrte.

Verse: 9    in dûhte, diu sûl hete in betrogen:
Verse: 10    dô sach er vür ungelogen

Verse: 11    Orgelûsen de Lôgrois
Verse: 12    und einen ritter kurtois

Verse: 13    gein dem urvar ûf den wasen.
Verse: 14    ist diu nieswurz in der nasen

Verse: 15    dræte unde strenge,
Verse: 16    durch sîn herze enge

Verse: 17    kom alsus diu herzogîn,
Verse: 18    durch sîniu ougen obene în.

Verse: 19    gein minne helfelôs ein man,
Verse: 20    ouwê, daz ist her Gâwân.

Verse: 21    ze sîner meisterinne er sprach,
Verse: 22    dô er den ritter komen sach:

Verse: 23    "vrouwe, dort vert ein ritter her
Verse: 24    mit ûf gerihtem sper,

Verse: 25    der wil suochens niht erwinden.
Verse: 26    ouch sol sîn suochen vinden,

Verse: 27    sît er ritterschefte gert:
Verse: 28    strîtes ist er von mir gewert.

Verse: 29    saget mir, wer mac diu vrouwe sîn?"
Verse: 30    si sprach:" daz ist diu herzogîn,




Chapter: 594 
594


Verse: 1    von Lôgrois diu klâre.
Verse: 2    wem kunt si sus ze vâre?

Verse: 3    der turkoite ist mit ir komen,
Verse: 4    von dem sô dicke ist vernomen,

Verse: 5    daz sîn herze ist unverzaget.
Verse: 6    er hât mit spern prîs bejaget,

Verse: 7    es wæren gehêret driu lant.
Verse: 8    gein sîner werlîchen hant

Verse: 9    sult ir strîten mîden nuo.
Verse: 10    strîten ist iu gar ze vruo:

Verse: 11    ir sît ûf strît ze sêre wunt.
Verse: 12    ob ir halt wæret wol gesunt,

Verse: 13    ir soldet doch strîten gein im lân."
Verse: 14    dô sprach mîn her Gâwân:

Verse: 15    "ir jeht, ich sül hie herre sîn:
Verse: 16    swer denne ûf al die êre mîn

Verse: 17    ritterschaft sô nâhe suochet,
Verse: 18    sît er strîtes geruochet,

Verse: 19    vrouwe, ich sol mîn harnas hân."
Verse: 20    des wart grôz weinen dâ getân

Verse: 21    von den vrouwen allen vieren.
Verse: 22    si sprâchen:" welt ir zieren

Verse: 23    iuwer sælde und iuwern prîs,
Verse: 24    sô strîtet niht deheinen wîs.

Verse: 25    læget ir dâ vor im tôt,
Verse: 26    alrêst wüehse unser nôt:

Verse: 27    sult aber ir vor im genesen,
Verse: 28    welt ir in harnase wesen,

Verse: 29    iu nement iuwer êrsten wundenz leben:
Verse: 30    sô sîn wir an den tôt gegeben."




Chapter: 595 
595


Verse: 1    Gâwân sus mit kummer ranc:
Verse: 2    ir muget wol hœren, waz in twanc.

Verse: 3    vür schande hete er an sich genomen
Verse: 4    des werden turkoiten komen:

Verse: 5    in twungen ouch wunden sêre
Verse: 6    und diu minne michels mêre

Verse: 7    und der vier vrouwen riuwe,
Verse: 8    wande er sach an in triuwe.

Verse: 9    er bat si weinen verbern.
Verse: 10    sîn munt dar zuo begunde gern

Verse: 11    harnas, ors unde swert.
Verse: 12    die vrouwen klâr unde wert

Verse: 13    vuorten Gâwânen wider.
Verse: 14    er bat si vor im gên dar nider,

Verse: 15    dâ die andern vrouwen wâren,
Verse: 16    die süezen und die klâren.

Verse: 17    Gâwân ûf sîns strîtes vart
Verse: 18    balde aldâ gewâpent wart

Verse: 19    mit weinden liehten ougen:
Verse: 20    si tâtenz alsô tougen,

Verse: 21    daz niemen vriesch diu mære,
Verse: 22    niwan der kamerære,

Verse: 23    der hiez sîn ors erstrîchen.
Verse: 24    Gâwân begunde slîchen,

Verse: 25    aldâ Gringuljete stuont.
Verse: 26    doch was er sô sêre wunt,

Verse: 27    den schilt er kûme dar getruoc.
Verse: 28    der was dürkel ouch genuoc.

Verse: 29    ûfz ors saz her Gâwân.
Verse: 30    dô kêrte er von der burc her dan




Chapter: 596 
596


Verse: 1    gein sînem getriuwen wirte.
Verse: 2    der in vil wênec irte

Verse: 3    alles, des sîn wille gerte,
Verse: 4    eins spers er in gewerte,

Verse: 5    daz was starc und unbeschaben.
Verse: 6    er hete ir manegez ûf erhaben

Verse: 7    dort anderhalben ûf sînem plân.
Verse: 8    dô bat in mîn her Gâwân

Verse: 9    überverte schiere:
Verse: 10    in einem ussiere

Verse: 11    vuorte er in über an daz lant,
Verse: 12    dâ er den turkoiten vant

Verse: 13    wert unde hôchgemuot.
Verse: 14    er was vor schanden alsô behuot,

Verse: 15    daz missewende an im verswant.
Verse: 16    sîn prîs was sô hôch erkant,

Verse: 17    swer gein im tjostierens phlac,
Verse: 18    daz der hinderm orse lac

Verse: 19    von sîner tjoste valle.
Verse: 20    sus hete er sie alle,

Verse: 21    die gein im ie durch prîs geriten,
Verse: 22    mit tjostieren überstriten.

Verse: 23    ouch tet sich ûz der degen wert,
Verse: 24    daz er mit spern sunder swert

Verse: 25    hôhen prîs wolde erben
Verse: 26    oder sînen prîs verderben:

Verse: 27    swer den prîs bezalte,
Verse: 28    daz er in mit tjoste valte,

Verse: 29    dâ würde er âne wer gesehen,
Verse: 30    dem wolde er sicherheit verjehen.




Chapter: 597 
597


Verse: 1    Gâwân vriesch diu mære
Verse: 2    von der tjoste phandære.

Verse: 3    Plipalinôt nam alsô phant:
Verse: 4    swelh tjoste wart aldâ bekant,

Verse: 5    daz einer viel, der ander saz,
Verse: 6    sô emphienc er âne ir beider haz

Verse: 7    dises vlust und jenes gewin:
Verse: 8    ich meine daz ors, daz zôch er hin.

Verse: 9    er enruochte, striten si genuoc:
Verse: 10    swer prîs oder laster truoc,

Verse: 11    des liez er jehen die vrouwen.
Verse: 12    si mohtenz dicke schouwen.

Verse: 13    Gâwânen er vaste sitzen bat.
Verse: 14    er zôch imz ors an den stat,

Verse: 15    er bôt im schilt unde sper.
Verse: 16    hie kom der turkoite her,

Verse: 17    kalopierende als ein man,
Verse: 18    der sîne tjoste mezzen kan

Verse: 19    weder ze hôch noch ze nider.
Verse: 20    Gâwân kom gein im hin wider.

Verse: 21    von Munsalvæsche Gringuljete
Verse: 22    tet nâch Gâwânes bete,

Verse: 23    als ez der zoum gelêrte.
Verse: 24    ûf den plân er kêrte.

Verse: 25    hurtâ, lât die tjoste tuon.
Verse: 26    hie kom des künec Lôtes sun

Verse: 27    manlîch und âne herzen schric.
Verse: 28    wâ hât diu helmsnuor ir stric?

Verse: 29    des turkoiten tjost in traf aldâ.
Verse: 30    Gâwân ruorte in anderswâ,




Chapter: 598 
598


Verse: 1    durch die barbiere.
Verse: 2    man wart wol innen schiere,

Verse: 3    wer dâ gevelles was sîn wer.
Verse: 4    an dem kurzen starken sper

Verse: 5    den helm emphienc her Gâwân:
Verse: 6    hin reit der helm, hie lac der man.

Verse: 7    der werdekeit ein bluome ie was,
Verse: 8    unz er verdacte alsus daz gras

Verse: 9    mit valle von der tjoste,
Verse: 10    sîner zimierde koste

Verse: 11    im touwe mit den bluomen striten.
Verse: 12    Gâwân kom ûf in geriten,

Verse: 13    unz er im sicherheit verjach.
Verse: 14    der verje nâch dem orse sprach.

Verse: 15    daz was sîn reht: wer lougent des?
Verse: 16    "ir vreutet iuch gerne, wesset ir wes,"

Verse: 17    sprach Orgelûse diu klâre
Verse: 18    Gâwâne aber ze vâre,

Verse: 19    "durch daz des starken lewen vuoz
Verse: 20    in iuwerm schilte iu volgen muoz.

Verse: 21    nû wænt ir, iu sî prîs geschehen,
Verse: 22    sît dise vrouwen hânt gesehen

Verse: 23    iuwer tjost alsô getân.
Verse: 24    wir müezen iuch bî vreuden lân,

Verse: 25    sît ir des der geile,
Verse: 26    ob Lît Marveile

Verse: 27    sô kleine sich hât gerochen.
Verse: 28    iust doch der schilt zebrochen,

Verse: 29    als ob iu strît sül wesen kunt.
Verse: 30    ir sît ouch lîhte ze sêre wunt




Chapter: 599 
599


Verse: 1    ûf strîtes gedense:
Verse: 2    daz tæte iu wê zer gense.

Verse: 3    iu mac durch rüemen wesen liep
Verse: 4    der schilt dürkel als ein sip,

Verse: 5    den iu sô manec phîl zebrach.
Verse: 6    an disen zîten ungemach

Verse: 7    muget ir gerne vliehen.
Verse: 8    lât iu den vinger ziehen:

Verse: 9    rîtet wider ûf zen vrouwen.
Verse: 10    wie getörstet ir geschouwen

Verse: 11    strît, den ich werben solde,
Verse: 12    ob iuwer herze wolde

Verse: 13    mir dienen nâch minne."
Verse: 14    er sprach zer herzoginne:

Verse: 15    "vrouwe, hân ich wunden,
Verse: 16    die hânt hie helfe vunden.

Verse: 17    ob iuwer helfe kan gezemen,
Verse: 18    daz ir mîn dienest ruochet nemen,

Verse: 19    sô wart nie nôt sô herte erkant,
Verse: 20    ich ensî ze dienste iu dar benant."

Verse: 21    si sprach:"ich lâze iuch rîten,
Verse: 22    mêr nâch prîse strîten

Verse: 23    mit mir geselleclîche."
Verse: 24    des wart an vreuden rîche

Verse: 25    der stolze werde Gâwân.
Verse: 26    den turkoiten sande er dan

Verse: 27    mit sînem wirt Plipalinôt:
Verse: 28    ûf die burc er enbôt,

Verse: 29    daz sîn mit wirde næmen war
Verse: 30    al die vrouwen wol gevar.





Chapter: 600 
600


Verse: 1    Gâwâns sper was ganz beliben,
Verse: 2    swie beidiu ors wæren getriben

Verse: 3    mit sporn ûf tjoste hurte:
Verse: 4    in sîner hant erz vuorte

Verse: 5    von der liehten ouwe.
Verse: 6    des weinde manec vrouwe,

Verse: 7    daz sîn reise aldâ von in geschach.
Verse: 8    diu künegîn Arnîve sprach:

Verse: 9    "unser trôst hât im erkorn
Verse: 10    sîner ougen senfte, sherzen dorn.

Verse: 11    ouwê, daz er nû volget sus
Verse: 12    gein Li Gweiz Preljus

Verse: 13    Orgelûsen der herzogin!
Verse: 14    daz ist sîner wunden ungewin."

Verse: 15    vier hundert vrouwen wâren in klage:
Verse: 16    er reit von in nâch prîses bejage.

Verse: 17    swaz im an sînen wunden war,
Verse: 18    die nôt hete erwendet gar

Verse: 19    Orgelûsen varwe glanz.
Verse: 20    si sprach:"ir sult mir einen kranz

Verse: 21    von eines boumes rîse
Verse: 22    gewinnen, dar um ich prîse

Verse: 23    iuwer tat: welt ir michs wern,
Verse: 24    sô muget ir mîner minne gern."

Verse: 25    dô sprach er: "vrouwe, swâ daz rîs
Verse: 26    stêt, daz sô hôhen prîs

Verse: 27    mir ze sælden mac bejagen,
Verse: 28    daz ich iu, vrouwe, müeze klagen

Verse: 29    nâch iuwern hulden mîne nôt,
Verse: 30    daz briche ich, ob mich læt der tôt."




Chapter: 601 
601


Verse: 1    swaz dâ stuonden bluomen lieht,
Verse: 2    die wâren gein dirre varwe ein niht,

Verse: 3    die Orgelûse brâhte.
Verse: 4    Gâwân an si dâhte,

Verse: 5    sô daz sîn êrste ungemach
Verse: 6    im deheines kummers jach.

Verse: 7    sus reit si mit ir gaste
Verse: 8    von der burc wol eine raste,

Verse: 9    eine strâzen wît und sleht
Verse: 10    vür ein klârez fôreht.

Verse: 11    der art des boume muosten sîn,
Verse: 12    temrîs und prisîn:

Verse: 13    daz was der Klinschores walt.
Verse: 14    Gâwân der degen balt

Verse: 15    sprach: "vrouwe, wâ briche ich den kranz,
Verse: 16    des mîn dürkel vreude werde ganz?"

Verse: 17    er solde si et hân gediuhet nider
Verse: 18    als dicke ist geschehen sider

Verse: 19    maneger klâren vrouwen.
Verse: 20    si sprach: "ich lâze iuch schouwen,

Verse: 21    aldâ ir prîs meget behaben."
Verse: 22    über velt gein einem graben

Verse: 23    riten si sô nâhen,
Verse: 24    des kranzes boum si sâhen.

Verse: 25    dô sprach si: "herre, jenen stam
Verse: 26    den heiet, der mir vreude nam:

Verse: 27    brinct ir mir dar abe ein rîs,
Verse: 28    nie ritter alsô hôhen prîs

Verse: 29    mit dienst erwarp durch minne."
Verse: 30    sus sprach diu herzoginne:




Chapter: 602 
602


Verse: 1    "hie wil ich mîne reise sparn.
Verse: 2    got waldes, welt ir vürbaz varn,

Verse: 3    sô ensult irz niht lengen.
Verse: 4    ellenthaftez sprengen

Verse: 5    müezet ir zorse tuon alsus
Verse: 6    über Li Gweiz Preljus."

Verse: 7    si habete al stille ûf dem plân.
Verse: 8    vürbaz reit her Gâwân:

Verse: 9    er erhôrte eins dræten wazzers val,
Verse: 10    daz hete durchbrochen wît ein tal,

Verse: 11    tief, ungeverteclîche.
Verse: 12    Gâwân der ellens rîche

Verse: 13    nam daz ors mit den sporn.
Verse: 14    ez treip der degen wol geborn,

Verse: 15    daz ez mit zwein vüezen trat
Verse: 16    hin über an den andern stat:

Verse: 17    der sprunc mit valle muoste sîn.
Verse: 18    des weinde iedoch diu herzogîn:

Verse: 19    der wâc was snel unde grôz.
Verse: 20    Gâwân sîner kraft genôz,

Verse: 21    doch truoc er harnases last.
Verse: 22    dô was eines boumes ast

Verse: 23    gewahsen in den wazzers trân:
Verse: 24    den begreif der starke man,

Verse: 25    wande er dennoch gerne lebete.
Verse: 26    sîn sper dâ bî im swebete,

Verse: 27    daz begreif der wîgant.
Verse: 28    er steic hin ûf an daz lant.

Verse: 29    Gringuljete swam obe und unde,
Verse: 30    dem er helfen dô begunde.




Chapter: 603 
603


Verse: 1    daz ors sô verre hin nider vlôz,
Verse: 2    des loufens in dar nâch verdrôz,

Verse: 3    wande er swære harnas truoc.
Verse: 4    er hete wunden ouch genuoc.

Verse: 5    nû treip ez ein werve her,
Verse: 6    daz erz erreichte mit dem sper,

Verse: 7    aldâ der regen und des guz
Verse: 8    erbrochen hete wîten vluz

Verse: 9    an einer tiefen halden.
Verse: 10    daz uover was gespalden,

Verse: 11    daz Gringuljeten nerte.
Verse: 12    mit dem sper erz kêrte

Verse: 13    sô nâhe her zuo an daz lant,
Verse: 14    den zoum ergreif er mit der hant.

Verse: 15    sus zôch mîn her Gâwân
Verse: 16    daz ors hin ûz ûf den plân.

Verse: 17    ez schutte sich, dô ez genas.
Verse: 18    der schilt dâ niht bestanden was:

Verse: 19    er gurte dem orse und nam den schilt.
Verse: 20    swen sîns kummers niht bevilt,

Verse: 21    daz lâze ich sîn: er hete doch nôt,
Verse: 22    sît ez diu minne im gebôt.

Verse: 23    Orgelûse diu glanze
Verse: 24    in jagete nâch dem kranze:

Verse: 25    daz was ein ellenthaftiu vart.
Verse: 26    der boum was alsô bewart,

Verse: 27    wæren Gâwâns zwêne, die müesten ir leben
Verse: 28    um den kranz hân gegeben:

Verse: 29    des phlac der künec Gramoflanz.
Verse: 30    Gâwân brach iedoch den kranz.




Chapter: 604 
604


Verse: 1    daz wazzer hiez Sabîns.
Verse: 2    Gâwân holte unsenften zins,

Verse: 3    dô er undz ors drîn bleste.
Verse: 4    swie Orgelûse gleste,

Verse: 5    ich wolde ir minne alsô niht nemen:
Verse: 6    ich weiz wol, wes mich sol gezemen.

Verse: 7    dô Gâwân daz rîs gebrach
Verse: 8    und der kranz wart des helmes dach,

Verse: 9    ez reit zuo zim ein ritter klâr.
Verse: 10    dem wâren sîner zîte jâr

Verse: 11    weder ze kurz noch ze lanc.
Verse: 12    sîn muot durch hôchvart in twanc,

Verse: 13    swie vil im ein man tet leit,
Verse: 14    daz er doch mit dem niht streit,

Verse: 15    ir enwæren zwêne oder mêr.
Verse: 16    sîn hôhez herze was sô hêr,

Verse: 17    swaz im tet ein man,
Verse: 18    den wolde er âne strît doch lân.

Verse: 19    fil li roi îrôt
Verse: 20    Gâwân guoten morgen bôt:

Verse: 21    daz was der künec Gramoflanz.
Verse: 22    dô sprach er: "herre, um disen kranz

Verse: 23    hân ich iu doch niht gar verzigen.
Verse: 24    mîn grüezen wære noch gar verswigen,

Verse: 25    ob iuwer zwêne wæren,
Verse: 26    die daz niht verbæren,

Verse: 27    si enholten hie durch hôhen prîs
Verse: 28    ab mînem boume alsus ein rîs:

Verse: 29    die müesten strît emphâhen.
Verse: 30    daz sol mir sus versmâhen."




Chapter: 605 
605


Verse: 1    ungerne ouch Gâwân mit im streit:
Verse: 2    der künec unwerlîche reit.

Verse: 3    doch vuorte der degen mære
Verse: 4    einen mûzersparwære,

Verse: 5    der stuont ûf sîner klâren hant.
Verse: 6    Itonjê hete in im gesant,

Verse: 7    Gâwâns süeziu swester.
Verse: 8    phæwîn von Sinzester

Verse: 9    ein huot ûf sînem houpte was.
Verse: 10    von samît grüene als ein gras

Verse: 11    der künec einen mantel vuorte,
Verse: 12    daz vaste ûf die erden ruorte

Verse: 13    iewederthalp die orte sîn.
Verse: 14    diu veder was lieht hermîn.

Verse: 15    niht ze grôz, doch starc genuoc
Verse: 16    was ein phert, daz den künec truoc,

Verse: 17    an pherdes schœne niht betrogen,
Verse: 18    von Tenemarken dar gezogen

Verse: 19    oder brâht ûf dem mer.
Verse: 20    der künec reit âne alle wer,

Verse: 21    wande er vuorte swertes niht.
Verse: 22    "iuwer schilt iu strîtes giht"

Verse: 23    sus sprach der künec Gramoflanz.
Verse: 24    "iuwers schiltes ist sô wênec ganz:

Verse: 25    Lît Marveile
Verse: 26    ist worden iu ze teile.

Verse: 27    ir habet die âventiure erliten,
Verse: 28    diu mîn solde hân erbiten,

Verse: 29    wan daz der wîse Klinschor
Verse: 30    mir mit vriden gienc ie vor




Chapter: 606 
606


Verse: 1    und daz ich gein ir krieges phlige,
Verse: 2    diu den wâren minnen sige

Verse: 3    mit klârheit hât behalden.
Verse: 4    si kan noch zornes walden

Verse: 5    gein mir. ouch twinget si des nôt:
Verse: 6    Zidegasten sluoc ich tôt,

Verse: 7    in selbe vierden, ir werden man.
Verse: 8    Orgelûsen vuorte ich dan,

Verse: 9    ich bôt ir krône und al mîn lant:
Verse: 10    swaz ir dienstes bôt mîn hant,

Verse: 11    dâ kêrte si engein ir herzen vâr.
Verse: 12    mit vlêhen hête ich si ein jâr:

Verse: 13    ich enkunde ir minne nie bejagen.
Verse: 14    ich muoz iu herzenlîche klagen:

Verse: 15    ich weiz wol, daz si iu minne bôt,
Verse: 16    sît ir hie werbet mînen tôt.

Verse: 17    wært ir nû selbe ander komen,
Verse: 18    ir möhtet mirz leben hân benomen

Verse: 19    oder ir wæret beide erstorben:
Verse: 20    daz hetet ir drum erworben.

Verse: 21    mîn herze nâch ander minne gêt,
Verse: 22    dâ helfe an iuwern genâden stêt:

Verse: 23    sît ir ze Terre Marveile sît
Verse: 24    herre worden (iuwer strît

Verse: 25    hât iu prîs behalden),
Verse: 26    welt ir nû güete walden,

Verse: 27    sô helfet mir um eine maget.
Verse: 28    nâch der mîn herze kummer klaget,

Verse: 29    diu ist des künec Lôtes kint.
Verse: 30    alle, die ûf erden sint,




Chapter: 607 
607


Verse: 1    si engetwüngen mich sô sêre nie.
Verse: 2    ich hân ir kleinœte alhie:

Verse: 3    nû gelobet ouch mîn dienest dar
Verse: 4    gein der megede wol gevar.

Verse: 5    ouch getrûwe ich wol, si sî mir holt,
Verse: 6    wande ich hân nôt durch si gedolt,

Verse: 7    sît Orgelûse diu rîche
Verse: 8    mit worten herzenlîche

Verse: 9    ir minne mir versagete.
Verse: 10    ob ich sît prîs bejagete,

Verse: 11    mir würde wol oder wê,
Verse: 12    daz schuof diu werde Intonjê.

Verse: 13    ich enhân ir leider niht gesehen.
Verse: 14    wil iuwer trôst mir helfe jehen,

Verse: 15    sô brinct diz kleine vingerlîn
Verse: 16    der klâren süezen vrouwen mîn.

Verse: 17    ir sît hie strîtes ledec gar,
Verse: 18    ez enwære grœzer iuwer schar,

Verse: 19    zwêne oder mêre.
Verse: 20    wer jæhe mir des vür êre,

Verse: 21    ob ich iuch slüege oder sicherheit
Verse: 22    twünge? den strît mîn hant ie meit."

Verse: 23    dô sprach mîn her Gâwân:
Verse: 24    "ich bin doch werlîch ein man.

Verse: 25    woldet ir des niht prîs bejagen,
Verse: 26    würde ich von iuwer hant erslagen,

Verse: 27    sô enhân ouch ichs deheinen prîs,
Verse: 28    daz ich gebrochen hân diz rîs.

Verse: 29    wer jæhe mirs vür êre grôz,
Verse: 30    ob ich iuch slüege alsus blôz?




Chapter: 608 
608


Verse: 1    ich wil iuwer bote sîn:
Verse: 2    gebet mir her daz vingerlîn

Verse: 3    und lât mich iuwern dienest sagen
Verse: 4    und iuwern kummer niht verdagen."

Verse: 5    der künec des dancte sêre.
Verse: 6    Gâwân vrâcte in mêre:

Verse: 7    "sît iu versmâhet gein mir strît,
Verse: 8    nû saget mir, herre, wer ir sît."

Verse: 9    "ir ensult ez niht vür laster doln,"
Verse: 10    sprach der künec, "mîn name ist iu unverholn.

Verse: 11    mîn vater der hiez îrot,
Verse: 12    den ersluoc der künec Lôt.

Verse: 13    ich binz der künec Gramoflanz.
Verse: 14    mîn hôhez herze ie was sô ganz,

Verse: 15    daz ich ze keinen zîten
Verse: 16    nimmer wil gestrîten,

Verse: 17    swaz mir tæte ein man,
Verse: 18    wan einer, heizet Gâwân,

Verse: 19    von dem ich prîs hân vernomen,
Verse: 20    daz ich gerne gein im wolde komen

Verse: 21    ûf strît durch mîne riuwe.
Verse: 22    sîn vater der brach triuwe:

Verse: 23    im gruoze er mînen vater sluoc.
Verse: 24    ich hân ze sprechen dar genuoc.

Verse: 25    nû ist Lôt erstorben
Verse: 26    und hât Gâwân erworben

Verse: 27    solhen prîs vor ûz besunder,
Verse: 28    daz ob der tavelrunder

Verse: 29    im prîses niemen gelîchen mac.
Verse: 30    ich gelebe noch gein im strîtes tac."




Chapter: 609 
609


Verse: 1    dô sprach des werden Lôtes sun:
Verse: 2    "welt ir daz ze liebe tuon

Verse: 3    iuwer vriundîn, obz diu ist,
Verse: 4    daz ir sus valschlîchen list

Verse: 5    von ir vater kunnet sagen
Verse: 6    und dar zuo gerne hetet erslagen

Verse: 7    ir bruoder, sôst si ein übel maget,
Verse: 8    daz si den site an iu niht klaget.

Verse: 9    kunde si tohter und swester sîn,
Verse: 10    sô wære si ir beider vogetîn,

Verse: 11    daz ir verbæret disen haz.
Verse: 12    wie stüende iuwerm sweher daz,

Verse: 13    hete er triuwe zebrochen?
Verse: 14    habet ir des niht gerochen,

Verse: 15    daz ir in tôt gein valsche saget?
Verse: 16    sîn sun ist des unverzaget,

Verse: 17    in sol des niht verdriezen,
Verse: 18    mac er niht geniezen

Verse: 19    sîner swester wol gevar,
Verse: 20    ze phande er gît sich selben dar.

Verse: 21    herre, ich heize Gâwân.
Verse: 22    swaz iu mîn vater hât getân,

Verse: 23    daz rechet an mir: er ist tôt.
Verse: 24    ich sol vür sîn lasters nôt,

Verse: 25    hân ich werdeclîchez leben,
Verse: 26    ûf kamph vür in ze gîsel geben."

Verse: 27    dô sprach der künec: "sît ir daz,
Verse: 28    dar ich trage unverkornen haz,

Verse: 29    sô tuot mir iuwer werdekeit
Verse: 30    beidiu liep unde leit.




Chapter: 610 
610


Verse: 1    ein dinc tuot mir an iu wol,
Verse: 2    daz ich mit iu strîten sol.

Verse: 3    ouch ist iu hôher prîs geschehen,
Verse: 4    daz ich iu einem hân verjehen

Verse: 5    gein iu ze kamphe komende.
Verse: 6    ist uns ze prîse vromende,

Verse: 7    ob wir werde vrouwen
Verse: 8    den kamph lâzen schouwen,

Verse: 9    vünfzehen hundert bringe ich dar:
Verse: 10    ir habet ouch eine klâre schar

Verse: 11    ûf Schastel Marveile,
Verse: 12    iu bringet ziuwerm teile

Verse: 13    iuwer œheim Artus
Verse: 14    von einem lande, daz alsus,

Verse: 15    Löver, ist genennet.
Verse: 16    habet ir die stat erkennet,

Verse: 17    Bems bî der Korkâ?
Verse: 18    diu massenîe ist elliu dâ:

Verse: 19    von hiute über den ahten tac
Verse: 20    mit grôzer schoie er komen mac.

Verse: 21    von hiute am sehzehenden tage
Verse: 22    kum ich durch mîn alde klage

Verse: 23    ûf den plân ze Jôflanze
Verse: 24    nâch gelte disem kranze."

Verse: 25    der künec Gâwân mit im bat
Verse: 26    ze Rosche Sabînes in die stat:

Verse: 27    "ir enmuget niht ander brücken hân."
Verse: 28    dô sprach mîn her Gâwân:

Verse: 29    "ich wil hin wider alsô her:
Verse: 30    anders leiste ich iuwer ger."




Chapter: 611 
611


Verse: 1    si gâben fîanze,
Verse: 2    daz si ze Jôflanze

Verse: 3    mit rittern und mit vrouwen her
Verse: 4    kœmen durch ir zweier wer,

Verse: 5    alsô was benant daz tagedinc,
Verse: 6    si zwêne al eine ûf einen rinc.

Verse: 7    sus schiet mîn her Gâwân
Verse: 8    dannen von dem werden man:

Verse: 9    mit vreuden er leischierte,
Verse: 10    der kranz in zimierte.

Verse: 11    er wolde daz ors niht ûf enthaben,
Verse: 12    mit sporn treip erz an den graben.

Verse: 13    Gringuljete nam bezîte
Verse: 14    sînen sprunc sô wîte,

Verse: 15    daz Gâwân vallen gar vermeit.
Verse: 16    zuo zim diu herzoginne reit,

Verse: 17    aldâ der helt erbeizet was
Verse: 18    von dem orse ûf ein gras

Verse: 19    und er dem orse gurte.
Verse: 20    ze sîner antwurte

Verse: 21    erbeizte snellîche
Verse: 22    diu herzoginne rîche.

Verse: 23    gein sînen vuozen si sich bôt.
Verse: 24    dô sprach si: "herre, solher nôt,

Verse: 25    als ich hân an iuch gegert,
Verse: 26    der wart nie mîn wirde wert.

Verse: 27    vür wâr mir iuwer arbeit
Verse: 28    vüeget solhiu herzeleit,

Verse: 29    diu emphâhen sol getriuwez wîp
Verse: 30    um ir lieben vriundes lîp."




Chapter: 612 
612


Verse: 1    dô sprach er: "vrouwe, ist daz wâr,
Verse: 2    daz ir mich grüezet âne vâr,

Verse: 3    sô næhet ir dem prîse.
Verse: 4    ich bin doch wol sô wîse:

Verse: 5    ob der schilt sîn reht sol hân,
Verse: 6    an dem hât ir missetân.

Verse: 7    des schiltes ammet ist sô hôch,
Verse: 8    daz er von spotte ie sich gezôch,

Verse: 9    swer ritterschaft ze rehte phlac.
Verse: 10    vrouwe, ob ich sô sprechen mac,

Verse: 11    swer mich dâ bî hât gesehen,
Verse: 12    der muoz mir ritterschefte jehen.

Verse: 13    etswenne irs anders jâhet,
Verse: 14    sît ir mich êrest sâhet:

Verse: 15    daz lâze ich sîn, nemt hin den kranz.
Verse: 16    ir sult durch iuwer varwe glanz

Verse: 17    neheinem ritter mêre
Verse: 18    erbieten solh unêre.

Verse: 19    solde iuwer spot wesen mîn,
Verse: 20    ich wolde ê âne minne sîn."

Verse: 21    diu klâre und diu rîche
Verse: 22    sprach weinde herzenlîche:

Verse: 23    "herre, als ich iu nôt gesage,
Verse: 24    waz ich der im herzen trage,

Verse: 25    sô gebet ir jâmers mir gewin.
Verse: 26    gein swem sich krenket mîn sin,

Verse: 27    der solz durch zuht verkiesen.
Verse: 28    ich enmac niemêr verliesen

Verse: 29    vreuden, denne ich hân verlorn
Verse: 30    an Zidegaste dem ûz erkorn.




Chapter: 613 
613


Verse: 1    mîn klâre süeze bêâs âmîs,
Verse: 2    sô durchliuhtec was sîn prîs

Verse: 3    mit rehter werdekeite ger,
Verse: 4    ez wære dirre oder der,

Verse: 5    die muoter ie gebâren
Verse: 6    bî sîner zîte jâren,

Verse: 7    die muosten im jehen werdekeit,
Verse: 8    die ander prîs nie überstreit.

Verse: 9    er was ein quecbrunne der tugent,
Verse: 10    mit alsô berhafter jugent

Verse: 11    bewart vor valscher phlihte.
Verse: 12    ûz der vinster gein dem liehte

Verse: 13    hete er sich enblecket,
Verse: 14    sînen prîs sô hôch gestecket,

Verse: 15    daz in niemen kunde erreichen,
Verse: 16    den valscheit möhte erweichen.

Verse: 17    sîn prîs hôch wahsen kunde,
Verse: 18    daz die andern wâren drunde,

Verse: 19    ûz sînes herzen kernen.
Verse: 20    wie loufet ob al den sternen

Verse: 21    der snelle Saturnus?
Verse: 22    der triuwe ein monîzirus,

Verse: 23    sît ich die wârheit sprechen kan,
Verse: 24    sus was mîn erwünschet man.

Verse: 25    daz tier die megede solden klagen:
Verse: 26    ez wirt durch reinekeit erslagen.

Verse: 27    ich was sîn herze, er was mîn lîp.
Verse: 28    den verlôs ich vlüstebærez wîp:

Verse: 29    in sluoc der künec Gramoflanz,
Verse: 30    von dem ir vüeret disen kranz.




Chapter: 614 
614


Verse: 1    herre, ob ich iu leide sprach,
Verse: 2    von den schulden daz geschach,

Verse: 3    daz ich versuochen wolde,
Verse: 4    ob ich iu minne solde

Verse: 5    bieten durch iuwer werdekeit.
Verse: 6    ich weiz wol, herre, ich sprach iu leit:

Verse: 7    daz was durch ein versuochen.
Verse: 8    nû sult ir des geruochen,

Verse: 9    daz ir zorn verlieset
Verse: 10    und gar ûf mich verkieset.

Verse: 11    ir sîtz der ellens rîche.
Verse: 12    dem golde ich iuch gelîche,

Verse: 13    daz man liutert in der gluot:
Verse: 14    als ist geliutert iuwer muot.

Verse: 15    dem ich iuch ze schaden brâhte,
Verse: 16    als ich denke und dô gedâhte,

Verse: 17    der hât mir herzeleit getân."
Verse: 18    dô sprach mîn her Gâwân:

Verse: 19    "vrouwe, es enwende mich der tôt,
Verse: 20    ich lêre den künec solhe nôt,

Verse: 21    diu sîne hôchvart letzet.
Verse: 22    mîne triuwe ich hân versetzet

Verse: 23    gein im ûf kamph ze rîten
Verse: 24    in kurzlîchen zîten:

Verse: 25    dâ sul wir manheit urborn.
Verse: 26    vrouwe, ich hân ûf iuch verkorn.

Verse: 27    ob ir iu mînen tummen rât
Verse: 28    durch zuht niht versmâhen lât,

Verse: 29    ich riete iu wîplîch êre
Verse: 30    und werdekeite lêre.




Chapter: 615 
615


Verse: 1    nû enist hie niemen denne wir:
Verse: 2    vrouwe, nû tuot genâde an mir."

Verse: 3    si sprach: "an gîsertem arm
Verse: 4    bin ich selten worden warm.

Verse: 5    dâ gein ich niht wil strîten,
Verse: 6    ir enmeget wol zandern zîten

Verse: 7    dienstes lôn an mir bejagen.
Verse: 8    ich wil iuwer arbeit klagen,

Verse: 9    unz ir werdet wol gesunt
Verse: 10    über al, swâ ir sît wunt.

Verse: 11    unz daz der schade geheile,
Verse: 12    ûf Schastel Marveile

Verse: 13    wil ich mit iu kêren."
Verse: 14    "ir welt mir vreude mêren"

Verse: 15    sus sprach der minnen gernde man.
Verse: 16    er huop die vrouwen wol getân

Verse: 17    mit drucke an sich ûf ir phert.
Verse: 18    des dûhte er si dâ vor niht wert,

Verse: 19    dô er si ob dem brunnen sach
Verse: 20    und si sô twirhlingen sprach.

Verse: 21    Gâwân reit dan mit vreude siten:
Verse: 22    doch wart ir weinen niht vermiten,

Verse: 23    unz er mit ir klagete.
Verse: 24    er sprach, daz si sagete,

Verse: 25    war um ir weinen wære,
Verse: 26    daz siz durch got verbære.

Verse: 27    si sprach: "herre, ich muoz iu klagen
Verse: 28    von dem, der mir hât erslagen

Verse: 29    den werden Zidegasten.
Verse: 30    des muoz mir jâmer tasten




Chapter: 616 
616


Verse: 1    inz herze, dâ diu vreude lac,
Verse: 2    dô ich Zidegastes minne phlac.

Verse: 3    ich enbin sô niht verdorben,
Verse: 4    ich enhabe doch sît geworben

Verse: 5    des küneges schaden mit koste
Verse: 6    und manege scharphe tjoste

Verse: 7    gein sînem verhe gevrumt.
Verse: 8    waz ob mir an iu helfe kumt,

Verse: 9    diu mich richet und ergetzet,
Verse: 10    daz mir jâmerz herze wetzet?

Verse: 11    ûf Gramoflanzes tôt
Verse: 12    emphienc ich dienest, daz mir bôt

Verse: 13    ein künec, der swunsches herre was.
Verse: 14    herre, der heizet Amfortas.

Verse: 15    durch minne ich nam von sîner hant
Verse: 16    von Tabronît daz krâmgewant,

Verse: 17    daz noch vor iuwer porten stêt,
Verse: 18    dâ tiurez gelt engegen gêt.

Verse: 19    der künec in mînem dienste erwarp,
Verse: 20    dâ von mîn vreude gar verdarp.

Verse: 21    dô ich in minne solde wern,
Verse: 22    dô muoste ich niuwes jâmers gern:

Verse: 23    in mînem dienste erwarp er sêr.
Verse: 24    gelîchen jâmer oder mêr,

Verse: 25    als Zidegast geben kunde,
Verse: 26    gap mir Amfortases wunde.

Verse: 27    nû jeht, wie solde ich armez wîp,
Verse: 28    sît ich hân getriuwen lîp,

Verse: 29    alsolher nôt bî sinne sîn?
Verse: 30    etswenne sich krenket ouch der mîn,




Chapter: 617 
617


Verse: 1    sît daz liget sô helfelôs,
Verse: 2    den ich nâch Zidegaste erkôs

Verse: 3    zergetzen und durch rechen.
Verse: 4    herre, nû hœret sprechen,

Verse: 5    wâ mite erwarp Klinschor
Verse: 6    den rîchen krâm vor iuwerm tor.

Verse: 7    dô der klâre Amfortas
Verse: 8    minne und vreude erwendet was,

Verse: 9    der mir die gâbe sande,
Verse: 10    dô vorhte ich die schande.

Verse: 11    Klinschore ist stæteclîchen bî
Verse: 12    der list von nigrômanzî,

Verse: 13    daz er mit zouber twingen kan
Verse: 14    beidiu wîp unde man.

Verse: 15    swaz er werder diet gesiht,
Verse: 16    die enlæt er âne kummer niht.

Verse: 17    durch vride ich Klinschore dar
Verse: 18    gap mînen krâm nâch rîcheit var.

Verse: 19    swenne diu âventiure würde erliten,
Verse: 20    swer den prîs hete erstriten,

Verse: 21    an den solde ich minne suochen:
Verse: 22    wolde er mîn niht geruochen,

Verse: 23    der krâm wære anderstunde mîn
Verse: 24    (der sol sus unser zweier sîn).

Verse: 25    des swuoren, die dâ wâren.
Verse: 26    dâ mite ich wolde vâren

Verse: 27    Gramoflanzes durch den list,
Verse: 28    der leider noch ungendet ist.

Verse: 29    hete er die âventiure geholt,
Verse: 30    sô müeste er sterben hân gedolt.




Chapter: 618 
618


Verse: 1    Klinschor ist hövesch unde wîs:
Verse: 2    der erloupte mir durch sînen prîs

Verse: 3    von mîner massenîe erkant
Verse: 4    ritterschaft über al sîn lant

Verse: 5    mit manegem stiche unde slage.
Verse: 6    die ganzen wochen, alle ir tage,

Verse: 7    al die wochen in dem jâr
Verse: 8    sunderrotte ich hân ze vâr,

Verse: 9    dise den tac und jene die naht:
Verse: 10    mit koste ich schaden hân gedâht

Verse: 11    Gramoflanz dem hôchgemuot.
Verse: 12    manegen strît er mit in tuot.

Verse: 13    waz bewart in ie dar unde?
Verse: 14    sîns verhes ich vâren kunde.

Verse: 15    die wâren ze rîche in mînen solt,
Verse: 16    wart mir der deheiner anders holt,

Verse: 17    nâch minne ich manegen dienen liez,
Verse: 18    dem ich doch lônes niht gehiez.

Verse: 19    mînen lîp gesach nie man,
Verse: 20    ich enmöhte wol sîn dienest hân,

Verse: 21    wan einer, der truoc wâpen rôt.
Verse: 22    mîn gesinde er brâhte in nôt.

Verse: 23    vür Lôgrois er kom geriten:
Verse: 24    dâ entworhte er sie mit solhen siten,

Verse: 25    sîn hant si nider streute,
Verse: 26    daz ich michs wênec vreute,

Verse: 27    zwischen Lôgrois und iuwerm urvar.
Verse: 28    mîner ritter im volcten vünfe dar:

Verse: 29    die enschumfierte er ûf dem plân
Verse: 30    und gap diu ors dem schifman.




Chapter: 619 
619


Verse: 1    dô er die mîne überstreit,
Verse: 2    nâch dem helde ich selbe reit:

Verse: 3    ich bôt im lant und mînen lîp.
Verse: 4    er sprach, er hete ein schœner wîp

Verse: 5    und diu im lieber wære.
Verse: 6    diu rede was mir swære:

Verse: 7    ich vrâcte, wer diu möhte sîn.
Verse: 8    "von Pelrapeire diu künegîn,

Verse: 9    sus ist genant diu lieht gemâl:
Verse: 10    sô heize ich selbe Parzivâl.

Verse: 11    ich wil iuwer minne niht:
Verse: 12    der grâl mir anders kummer giht"

Verse: 13    sus sprach der helt mit zorne.
Verse: 14    hin reit der ûz erkorne.

Verse: 15    hân ich dar an missetân
Verse: 16    (welt ir mich daz wizzen lân?),

Verse: 17    ob ich durch mîne herzenôt
Verse: 18    dem werden ritter minne bôt,

Verse: 19    sô krenket sich mîn minne."
Verse: 20    Gâwân zer herzoginne

Verse: 21    sprach: "vrouwe, ich erkenne in alsô wert,
Verse: 22    an dem ir minne hât gegert,

Verse: 23    hete er iuch ze minne erkorn,
Verse: 24    iuwer prîs wære an im niht verlorn."

Verse: 25    Gâwân der kurtois
Verse: 26    und diu herzogîn von Lôgrois

Verse: 27    vaste an ein ander sâhen.
Verse: 28    dô riten si sô nâhen,

Verse: 29    daz man si von der burc ersach,
Verse: 30    dâ im diu âventiure geschach.




Chapter: 620 
620


Verse: 1    dô sprach er: "vrouwe, tuot sô wol,
Verse: 2    ob ich iuch des biten sol,

Verse: 3    lât mînen namen unerkant,
Verse: 4    als mich der ritter hât genant,

Verse: 5    der mir entreit Gringuljeten.
Verse: 6    leistet, des ich iuch hân gebeten.

Verse: 7    swer iuch des vrâgen welle,
Verse: 8    sô sprechet ir: "mîn geselle

Verse: 9    ist mir des unerkennet,
Verse: 10    er wart mir nie genennet."

Verse: 11    si sprach: "vil gerne ich siz verdage,
Verse: 12    sît ir niht welt, daz ichz in sage."

Verse: 13    er und diu vrouwe wol gevar
Verse: 14    kêrten gein der bürge dar.

Verse: 15    die ritter heten dâ vernomen,
Verse: 16    daz dar ein ritter wære komen,

Verse: 17    der hete die âventiure erliten
Verse: 18    und den lewen überstriten

Verse: 19    und den turkoiten sider
Verse: 20    ze rehter tjost gevellet nider.

Verse: 21    innen des reit Gâwân
Verse: 22    gein dem urvar ûf den plân,

Verse: 23    daz si in von zinnen sâhen.
Verse: 24    si begunden vaste gâhen

Verse: 25    ûz der burc mit schalle.
Verse: 26    dô vuorten si alle

Verse: 27    rîche baniere.
Verse: 28    sus kômen si schiere

Verse: 29    ûf snellen râvîten:
Verse: 30    er wânde, si wolden strîten.




Chapter: 621 
621


Verse: 1    dô er si verre komen sach,
Verse: 2    hin zer herzoginne er sprach:

Verse: 3    "kumt jenez volc gein uns ze wer?"
Verse: 4    si sprach: "ez ist Klinschores her,

Verse: 5    die iuwer kûme hânt erbiten.
Verse: 6    mit vreude si koment nû geriten

Verse: 7    und wellent iuch emphâhen.
Verse: 8    daz darf iu niht versmâhen,

Verse: 9    sît ez diu vreude in gebôt."
Verse: 10    nû was ouch Plipalinôt

Verse: 11    mit sîner klâren tohter fier
Verse: 12    komen in einem ussier.

Verse: 13    verre ûf den plân si gein im gienc:
Verse: 14    diu maget in mit vreude emphienc,

Verse: 15    Gâwân bôt ir sînen gruoz.
Verse: 16    si kuste im stegereif und vuoz

Verse: 17    und emphienc ouch die herzogîn.
Verse: 18    si nam in bî dem zoume sîn

Verse: 19    und bat erbeizen den man.
Verse: 20    diu vrouwe unde Gâwân

Verse: 21    giengen an des schiffes ort.
Verse: 22    ein teppech und ein kulter dort

Verse: 23    lâgen: an der selben stete
Verse: 24    diu herzogin durch sîne bete

Verse: 25    ze Gâwâne nider saz.
Verse: 26    des verjen tohter niht vergaz,

Verse: 27    si entwâpende in, sus hœre ich sagen.
Verse: 28    ir mantel hete si dar getragen,

Verse: 29    der des nahtes ob im lac,
Verse: 30    dô er ir herberge phlac:




Chapter: 622 
622


Verse: 1    des was im nôt an der zît.
Verse: 2    ir mantel und sîn kursît

Verse: 3    legete an sich her Gâwân.
Verse: 4    si truoc daz harnas her dan.

Verse: 5    alrêst diu herzoginne klâr
Verse: 6    nam sîns antlitzes war,

Verse: 7    dâ si sâzen bî ein ander.
Verse: 8    zwêne gebrâtene galander,

Verse: 9    mit wîn ein glesîn barel
Verse: 10    und zwei blankiu wastel

Verse: 11    diu süeze maget dar nâher truoc
Verse: 12    ûf einer tweheln wîz genuoc.

Verse: 13    dise spîse ervlouc ein sprinzelîn.
Verse: 14    Gâwân und diu herzogîn

Verse: 15    mohtenz wazzer selbe nemen,
Verse: 16    ob twahens wolde si gezemen,

Verse: 17    daz is doch beidiu tâten.
Verse: 18    mit vreude er was berâten,

Verse: 19    daz er mit ir ezzen solde,
Verse: 20    durch die er lîden wolde

Verse: 21    beidiu vreude unde nôt.
Verse: 22    swenne si daz barel im gebôt,

Verse: 23    daz gerüeret hete ir munt,
Verse: 24    sô wart im niuwe vreude kunt,

Verse: 25    daz er dâ nâch solde trinken.
Verse: 26    sîn riuwe begunde hinken

Verse: 27    und wart sîn hôchgemüete snel.
Verse: 28    ir süezer munt, ir liehtez vel

Verse: 29    in sô von kummer jagete,
Verse: 30    daz er neheine wunden klagete.




Chapter: 623 
623


Verse: 1    von der burc die vrouwen
Verse: 2    dise wirtschaft mohten schouwen.

Verse: 3    anderhalp anz urvar,
Verse: 4    manec wert ritter kom aldar:

Verse: 5    ir buhurt mit kunst wart getân.
Verse: 6    disehalp her Gâwân

Verse: 7    dancte dem verjen und der tohter sîn
Verse: 8    (alsô tet ouch diu herzogîn)

Verse: 9    ir güetlîchen spîse.
Verse: 10    diu herzoginne wîse

Verse: 11    sprach: "war ist der ritter komen,
Verse: 12    von dem diu tjoste wart genomen

Verse: 13    gester, dô ich hinnen reit?
Verse: 14    ob den iemen überstreit,

Verse: 15    weder schiet daz leben oder tôt?"
Verse: 16    dô sprach Plipalinôt:

Verse: 17    "vrouwe, ich sach in hiute leben.
Verse: 18    er wart mir vür ein ors gegeben:

Verse: 19    welt ir ledegen den man,
Verse: 20    dar um sol ich swalwen hân.

Verse: 21    diu der künegîn Secundillen was
Verse: 22    und die iu sande Amfortas,

Verse: 23    mac diu harphe wesen mîn,
Verse: 24    ledec ist duc de Gôwerzîn."

Verse: 25    "die harphen undz ander krâmgewant,"
Verse: 26    sprach si, "wil er, mit sîner hant

Verse: 27    mac geben und behalden,
Verse: 28    der hie sitzet: lâts in walden.

Verse: 29    ob ich im sô liep wart ie,
Verse: 30    er lœset mir Lischoisen hie,




Chapter: 624 
624


Verse: 1    den herzogen von Gôwerzîn,
Verse: 2    und ouch den andern vürsten mîn,

Verse: 3    Flôranden von Itolac.
Verse: 4    der nahtes mîner wahte phlac,

Verse: 5    er was mîn turkoite alsô,
Verse: 6    sîns trûrens wirde ich nimmer vrô."

Verse: 7    Gâwân sprach zer vrouwen:
Verse: 8    "ir muget si beide schouwen

Verse: 9    ledec, ê daz uns kom diu naht."
Verse: 10    dô heten si sich des bedâht

Verse: 11    und vuoren über an daz lant.
Verse: 12    die herzoginne lieht erkant

Verse: 13    huop Gâwân aber ûf ir phert.
Verse: 14    manec edel ritter wert

Verse: 15    emphiengen in und die herzogin.
Verse: 16    si kêrten gein der bürge hin.

Verse: 17    dâ wart mit vreuden geriten,
Verse: 18    von in diu kunst niht vermiten,

Verse: 19    daz es der buhurt hete êre.
Verse: 20    waz mac ich sprechen mêre,

Verse: 21    wan daz der werde Gâwân
Verse: 22    und diu herzoginne wol getân

Verse: 23    von vrouwen wart emphangen sô,
Verse: 24    si mohtens beidiu wesen vrô,

Verse: 25    ûf Schastel Marveile.
Verse: 26    ir mugets im jehen ze heile,

Verse: 27    daz im diu sælde ie geschach.
Verse: 28    dô vuorte in an sîn gemach

Verse: 29    Arnîve und die daz kunden,
Verse: 30    die bewarten sîne wunden.




Chapter: 625 
625


Verse: 1    z Arnîven sprach Gâwân:
Verse: 2    "vrouwe, ich sol einen boten hân."

Verse: 3    ein juncvrouwe wart gesant:
Verse: 4    diu brâhte einen sarjant,

Verse: 5    manlîch, mit zühten wîse.
Verse: 6    in sarjandes prîse

Verse: 7    der knappe swuor des einen eit,
Verse: 8    er würbe liep oder leit,

Verse: 9    daz er des niemen dâ
Verse: 10    gewüege noch anderswâ,

Verse: 11    wan dâ erz werben solde.
Verse: 12    Gâwân bat, daz man im holde

Verse: 13    tincten unde permint.
Verse: 14    Gâwân des künec Lôtes kint

Verse: 15    schreip gevuoge mit der hant.
Verse: 16    er enbôt ze Löver in daz lant

Verse: 17    Artûse und des wîbe
Verse: 18    dienst von sînem lîbe

Verse: 19    mit triuwen unverschertet
Verse: 20    und hete er prîs behertet,

Verse: 21    der wære an werdekeite tôt,
Verse: 22    si enhülfen im ze sîner nôt,

Verse: 23    daz si beide an triuwe dæhten
Verse: 24    und ze Jôflanze bræhten

Verse: 25    die massenîe mit vrouwen schar,
Verse: 26    und er kœme ouch selbe gein in dar

Verse: 27    durch kamph ûf al sîn êre.
Verse: 28    er enbôt im dennoch mêre,

Verse: 29    der kamph wære alsô genomen,
Verse: 30    daz er werdeclîche müeste komen.




Chapter: 626 
626


Verse: 1    dô enbôt ouch her Gâwân,
Verse: 2    ez wære vrouwe oder man,

Verse: 3    al der massenîe gar,
Verse: 4    daz si ir triuwe næmen war

Verse: 5    und daz si dem künege rieten komen:
Verse: 6    daz möhte an werdekeit in gevromen.

Verse: 7    al den werden er enbôt
Verse: 8    sîn dienst und sîne kamphes nôt.

Verse: 9    der brief niht insigels truoc:
Verse: 10    er schreip in sus erkant genuoc

Verse: 11    mit wârzeichen ungelogen.
Verse: 12    "nû ensoltûz niht langer zogen"

Verse: 13    sprach Gâwân zem knappen sîn.
Verse: 14    "der künec und diu künegîn

Verse: 15    sint ze Bems bî der Korkâ.
Verse: 16    die küneginne soltû dâ

Verse: 17    sprechen eines morgens vruo.
Verse: 18    swaz si dir râte, daz tuo

Verse: 19    und lâz dir eine witze bî:
Verse: 20    verswîc, daz ich hie herre sî.

Verse: 21    daz dû hie massenîe sîs,
Verse: 22    daz ensage in niht deheinen wîs."

Verse: 23    dem knappen was dannen gâch.
Verse: 24    Arnîve sleich im sanfte nâch:

Verse: 25    diu vrâcte in, war er wolde
Verse: 26    und waz er werben solde.

Verse: 27    dô sprach er: "vrouwe, ich ensages iu niht
Verse: 28    ob mir mîn eit rehte giht.

Verse: 29    got hüete iuwer, ich wil hinnen varn."
Verse: 30    er reit nâch werdeclîchen scharn.




Chapter: 627 
627


Verse: 1    Arnîve zorn bejagete,
Verse: 2    daz der knappe ir niht ensagete

Verse: 3    alsus getâniu mære,
Verse: 4    war er gesendet wære.

Verse: 5    si bat den, der der porten phlac:
Verse: 6    "ez si naht oder tac,

Verse: 7    sô der knappe wider rîte,
Verse: 8    vüege, daz er mîn bîte,

Verse: 9    unz ich in gespreche.
Verse: 10    mit dîner kunst daz zeche."

Verse: 11    doch truoc si ûf den knappen haz.
Verse: 12    wider în durch vrâgen baz

Verse: 13    gienc si zer herzoginne.
Verse: 14    diu phlac ouch der sinne,

Verse: 15    daz ir munt des niht gewuoc,
Verse: 16    welhen namen Gâwân truoc.

Verse: 17    sîn bete hete an ir bewart,
Verse: 18    si versweic sînen namen und sînen art.

Verse: 19    pusîne und ander schal
Verse: 20    ûf dem palase erhal

Verse: 21    mit vrœlîchen sachen.
Verse: 22    manec rückelachen

Verse: 23    in dem palase wart gehangen.
Verse: 24    aldâ wart niht gegangen.

Verse: 25    wan ûf teppechen wol geworht.
Verse: 26    ez hete ein armer wirt ervorht.

Verse: 27    alumme an allen sîten
Verse: 28    mit senften phlûmîten

Verse: 29    manec gesiz dâ wart geleget,
Verse: 30    dar ûf man tiure kultern treget.




Chapter: 628 
628


Verse: 1    Gâwân nâch arbeite phlac
Verse: 2    slâfens den mitten tac.

Verse: 3    im wâren sîne wunden
Verse: 4    mit kunst alsô gebunden,

Verse: 5    ob vriundîn wære bî im gelegen,
Verse: 6    hete er minne gephlegen,

Verse: 7    daz wære im senfte unde guot.
Verse: 8    er hete ouch bezzern slâfes muot

Verse: 9    denne snahtes, dô diu herzogin
Verse: 10    an ungemache im gap gewin:

Verse: 11    er erwachte gein der vesper zît.
Verse: 12    doch hete er in slâfe strît

Verse: 13    gestriten mit der minne
Verse: 14    aber mit der herzoginne.

Verse: 15    ein sîn kamerære
Verse: 16    mit tiurem golde swære

Verse: 17    brâhte im kleider dar getragen
Verse: 18    von liehtem phelle, hôrte ich sagen.

Verse: 19    dô sprach mîn her Gâwân:
Verse: 20    "wir suln der kleider mêr noch hân,

Verse: 21    diu al gelîche tiure sîn,
Verse: 22    dem herzogen von Gôwerzîn

Verse: 23    und dem klâren Flôrande,
Verse: 24    der in manegem lande

Verse: 25    hât gedienet werdekeit.
Verse: 26    nû schaffet, daz diu sîn bereit."

Verse: 27    bî einem knappen er enbôt
Verse: 28    sînem wirt Plipalinôt,

Verse: 29    daz er sande im Lischoisen dar.
Verse: 30    bî sîner tohter wol gevar




Chapter: 629 
629


Verse: 1    wart Lischois dar ûf gesant.
Verse: 2    vrou Bêne brâhte in an der hant

Verse: 3    durch Gâwânes hulde
Verse: 4    und ouch durch die schulde:

Verse: 5    Gâwân ir vater wol gehiez,
Verse: 6    dô er si sêre weinde liez,

Verse: 7    des tages, dô er von ir reit,
Verse: 8    dâ prîs erwarp sîn manheit.

Verse: 9    der turkoite was ouch komen.
Verse: 10    an den beiden wart vernomen

Verse: 11    Gâwâns emphâhen âne haz.
Verse: 12    ieweder nider zuo zim saz,

Verse: 13    unz man in kleider dar getruoc.
Verse: 14    diu wâren kostenlîch genuoc,

Verse: 15    daz si niht bezzer möhten sîn.
Verse: 16    diu brâhte man in allen drîn.

Verse: 17    ein meister hiez Sârant,
Verse: 18    nâch dem Sêres wart genant,

Verse: 19    der was von Trîande.
Verse: 20    in Sekundillen lande

Verse: 21    stêt ein stat, heizet Tasmê:
Verse: 22    diust grœzer danne Nînivê

Verse: 23    oder danne diu wîte Akratôn.
Verse: 24    Sârant durch prîses lôn

Verse: 25    eins phelles dâ gedâhte
Verse: 26    (sîn werc vil spæhe brâhte),

Verse: 27    der heizet sârantasmê.
Verse: 28    ob der iht rîlîchen stê?

Verse: 29    daz muget ir âne vrâgen lân,
Verse: 30    wande er muoz grôze koste hân.




Chapter: 630 
630


Verse: 1    diu selben kleider legeten an
Verse: 2    die zwêne unde Gâwân.

Verse: 3    si giengen ûf den palas,
Verse: 4    dâ einhalp manec ritter was,

Verse: 5    anderhalp die klâren vrouwen.
Verse: 6    swer rehte kunde schouwen,

Verse: 7    von Lôgrois diu herzogîn
Verse: 8    truoc vor ûz den besten schîn.

Verse: 9    der wirt und die geste
Verse: 10    stuonden vür si, diu dâ gleste,

Verse: 11    diu Orgelûse was genant.
Verse: 12    der turkoite Flôrant

Verse: 13    und Lischois der klâre
Verse: 14    wurden ledec âne vâre,

Verse: 15    die zwêne vürsten kurtois,
Verse: 16    durch die herzogîn von Lôgrois.

Verse: 17    si dancte Gâwân drumme,
Verse: 18    gein valscheit diu tumme

Verse: 19    und diu herzelîche wîse
Verse: 20    gein wîplîchem prîse.

Verse: 21    dô disiu rede geschach,
Verse: 22    Gâwân vier küneginne sach

Verse: 23    bî der herzoginne stên.
Verse: 24    er bat die zwêne nâher gên

Verse: 25    durch sîne kurtôsîe,
Verse: 26    die jungeren drîe

Verse: 27    hiez er küssen dise zwêne.
Verse: 28    nû was ouch vrou Bêne

Verse: 29    mit Gâwân dar gegangen.
Verse: 30    diu wart dâ wol emphangen.




Chapter: 631 
631


Verse: 1    der wirt niht langer wolde stên:
Verse: 2    er bat die zwêne sitzen gên

Verse: 3    ze den vrouwen, swâ si wolden.
Verse: 4    dô si sô tuon solden,

Verse: 5    diu bete tet in niht ze wê.
Verse: 6    "welhez ist Itonjê?"

Verse: 7    sus sprach der werde Gâwân.
Verse: 8    "diu sol mich bî ir sitzen lân."

Verse: 9    des vrâcte er Bênen stille.
Verse: 10    sît ez was sîn wille,

Verse: 11    si zeicte im die maget klâr.
Verse: 12    "diu den rôten munt, daz brûne hâr

Verse: 13    dort treget bî liehten ougen,
Verse: 14    welt ir si sprechen tougen,

Verse: 15    daz tuot gevuoclîche"
Verse: 16    sprach vrou Bêne diu zühte rîche.

Verse: 17    diu wesse Itonjê minnen nôt
Verse: 18    und daz ir herze dienest bôt

Verse: 19    der werde künec Gramoflanz
Verse: 20    mit ritterlîchen triuwen ganz.

Verse: 21    Gâwân saz nider zuo der maget.
Verse: 22    ich sage iu, daz mir wart gesaget:

Verse: 23    sîner rede er dâ begunde
Verse: 24    mit vuogen, wande erz kunde.

Verse: 25    ouch kunde si gebâren,
Verse: 26    daz von sô kurzen jâren,

Verse: 27    als Itonjê diu junge truoc,
Verse: 28    den hete si zühte gar genuoc.

Verse: 29    er hete sich vrâgens gein ir bewegen,
Verse: 30    ob si noch minne kunde phlegen.




Chapter: 632 
632


Verse: 1    dô sprach diu maget mit sinnen:
Verse: 2    "herre, wen solde ich minnen?

Verse: 3    sît mir mîn êrster tac erschein,
Verse: 4    sô wart ritter nie dehein,

Verse: 5    ze dem ich ie gespræche wort,
Verse: 6    wan als ir hiute hât gehôrt."

Verse: 7    "sô möhten iu doch mære komen,
Verse: 8    wâ ir mit manheit hât vernomen

Verse: 9    bejageten prîs mit ritterschaft
Verse: 10    und wer mit herzenlîcher kraft

Verse: 11    nâch minnen dienest bieten kan"
Verse: 12    sus sprach mîn her Gâwân.

Verse: 13    des antwurte im diu klâre maget:
Verse: 14    "nâch minne ist dienest mich verdaget.

Verse: 15    wan der herzogîn von Lôgrois
Verse: 16    dient manec ritter kurtois

Verse: 17    beidiu nâch minne und um ir solt.
Verse: 18    der hât maneger hie geholt

Verse: 19    tjostieren, dâ wirz sâhen.
Verse: 20    ir deheiner nie sô nâhen

Verse: 21    kom, als ir uns komen sît.
Verse: 22    den prîs ûf hœhet iuwer strît."

Verse: 23    er sprach zer megede wol gevar:
Verse: 24    "war krieget der herzoginne schar,

Verse: 25    sus manec ritter ûz erkorn?
Verse: 26    wer hât ir hulde verlorn?"

Verse: 27    si sprach: "daz hât der künec Gramoflanz,
Verse: 28    der der werdekeite kranz

Verse: 29    treget, als im diu volge giht.
Verse: 30    herre, des erkenne ich anders niht."




Chapter: 633 
633


Verse: 1    dô sprach mîn her Gâwân:
Verse: 2    "ir sult sîn vürbaz künde hân,

Verse: 3    sît er sich prîse nâhet
Verse: 4    und des mit willen gâhet.

Verse: 5    von sînem munde ich hân vernomen,
Verse: 6    daz er herzenlîche ist komen

Verse: 7    mit dienst, ob irs geruochet,
Verse: 8    sô daz er helfe suochet

Verse: 9    durch trôst an iuwer minne.
Verse: 10    künec durch küneginne

Verse: 11    sol billîche emphâhen nôt.
Verse: 12    vrouwe, hiez iuwer vater Lôt,

Verse: 13    sô sît irz, die er meinet,
Verse: 14    nâch der sîn herze weinet,

Verse: 15    und heizet ir Itonjê,
Verse: 16    sô tuot ir im von herzen wê.

Verse: 17    ob ir triuwe kunnet tragen,
Verse: 18    sô sult ir wenden im sîn klagen:

Verse: 19    beidenthalp wil ich des bote sîn.
Verse: 20    vrouwe, nemt diz vingerlîn:

Verse: 21    daz sande iu der klâre.
Verse: 22    ouch wirbe ichz âne vâre:

Verse: 23    vrouwe, daz lât al balde an mich."
Verse: 24    si begunde al rôt verwen sich:

Verse: 25    als ê was gevar ir munt,
Verse: 26    wart al dem antlitze kunt.

Verse: 27    dar nâch schier wart si anders var.
Verse: 28    si greif al blûclîche dar:

Verse: 29    daz vingerlîn wart schiere erkant.
Verse: 30    si emphienc ez mit ir klâren hant.




Chapter: 634 
634


Verse: 1    dô sprach si: "herre, ich sihe nû wol,
Verse: 2    ob ich sô vor iu sprechen sol,

Verse: 3    daz ir von im rîtet,
Verse: 4    nâch dem mîn herze strîtet.

Verse: 5    ob ir der zuht ir reht nû tuot,
Verse: 6    herre, diu lêrt iuch helden muot:

Verse: 7    disiu gâbe ist mir ouch ê gesant
Verse: 8    von des werden küneges hant.

Verse: 9    von im saget wâr diz vingerlîn:
Verse: 10    er emphienc ez von der hende mîn.

Verse: 11    swaz er kummers ie gewan,
Verse: 12    dâ bin ich gar unschuldec an,

Verse: 13    wan sînen lîp hân ich gewert
Verse: 14    mit gedanken, swes er an mich gert.

Verse: 15    er hete schiere daz vernomen,
Verse: 16    möhte ich immer vürbaz komen.

Verse: 17    Orgelûsen ich geküsset hân,
Verse: 18    diu sînen tôt sus werben kan.

Verse: 19    daz was ein kus, den Jûdas truoc,
Verse: 20    dâ von man sprichet noch genuoc.

Verse: 21    elliu triuwe an mir verswant,
Verse: 22    daz der turkoite Flôrant

Verse: 23    und der herzoge von Gôwerzîn
Verse: 24    von mir geküsset solden sîn.

Verse: 25    mîn suone wirt in doch nimmer ganz,
Verse: 26    die gein dem künege Gramoflanz

Verse: 27    mit stæte ir hazzen kunnen tragen.
Verse: 28    mîne muoter sult ir daz verdagen

Verse: 29    und mîne swester Kundrîê."
Verse: 30    des bat Gâwân Itonjê.




Chapter: 635 
635


Verse: 1    "herre, ir bâtet mich alsus,
Verse: 2    daz ich emphâhen müeste ir kus,

Verse: 3    doch unverkorn, an mînen munt:
Verse: 4    des ist mîn herze ungesunt.

Verse: 5    wirt uns zwein immer vreude erkant,
Verse: 6    diu helfe stêt in iuwer hant.

Verse: 7    vür wâr der künec mînen lîp
Verse: 8    minnet vür elliu wîp:

Verse: 9    des wil ich in geniezen lân.
Verse: 10    ich bin im holt vür alle man.

Verse: 11    got lêre iuch helfe unde rât,
Verse: 12    sô daz ir uns bî vreuden lât."

Verse: 13    dô sprach er: "vrouwe, nû lêrt mich wie.
Verse: 14    er hât iuch dort, ir habet in hie

Verse: 15    und sît doch underscheiden.
Verse: 16    möhte ich nû wol iu beiden

Verse: 17    mit triuwen solhen rât gegeben,
Verse: 18    des iuwer werdeclîchez leben

Verse: 19    genüzze, ich woldez werben.
Verse: 20    des enlieze ich niht verderben.

Verse: 21    si sprach: "ir sult gewaldec sîn
Verse: 22    des werden küneges unde mîn.

Verse: 23    iuwer helfe und der gotes segen
Verse: 24    müeze unser zweier minne phlegen,

Verse: 25    sô daz ich ellende
Verse: 26    im sînen kummer wende,

Verse: 27    sît al sîn vreude stêt an mir.
Verse: 28    swenne ich untriuwe enbir,

Verse: 29    sôst immer mînes herzen ger,
Verse: 30    daz ich in mîner minne wer."




Chapter: 636 
636


Verse: 1    Gâwân hôrte an dem vrouwelîn,
Verse: 2    daz si bî minne wolde sîn:

Verse: 3    dar zuo was ouch niht ze laz
Verse: 4    gein der herzoginne ir haz.

Verse: 5    sus truoc si minne unde haz.
Verse: 6    ouch hete er sich gesündet baz

Verse: 7    gein der einvaltegen maget,
Verse: 8    diu im ir kummer hât geklaget,

Verse: 9    wande er ir niht zuo gewuoc,
Verse: 10    daz in und si ein muoter truoc:

Verse: 11    ouch was ir beider vater Lôt.
Verse: 12    der megede er sîne helfe bôt:

Verse: 13    dâ engein si tougenlîchen neic,
Verse: 14    daz er si trœsten niht versweic.

Verse: 15    nû was ouch zît, daz man dar truoc
Verse: 16    tischlachen manegez wîz genuoc

Verse: 17    undz brôt ûf den palas,
Verse: 18    dâ manec klâriu vrouwe was.

Verse: 19    daz hete ein underscheit erkant,
Verse: 20    daz die ritter eine want

Verse: 21    heten sunder dort hin dan.
Verse: 22    den sedel schuof her Gâwân,

Verse: 23    der turkoite zuo zim saz.
Verse: 24    Lischois mit Gâwâns muoter az,

Verse: 25    der klâren Sangîven.
Verse: 26    mit der künegîn Arnîven

Verse: 27    az diu herzoginne klâr.
Verse: 28    sîne swester beide wol gevar

Verse: 29    Gâwân zuo zim sitzen liez:
Verse: 30    iewederiu tet, als er si hiez.




Chapter: 637 
637


Verse: 1    mîn kunst mir des niht halbes giht,
Verse: 2    ich enbin solh küchenmeister niht,

Verse: 3    daz ich die spîse künne sagen,
Verse: 4    diu dâ mit zuht wart vür getragen.

Verse: 5    dem wirte und den vrouwen gar
Verse: 6    dienden megede wol gevar,

Verse: 7    anderhalp den rittern an ir want
Verse: 8    den diende manec sarjant.

Verse: 9    ein vorhtlîch zuht si des betwanc,
Verse: 10    daz sich der knappen keiner dranc

Verse: 11    mit den juncvrouwen:
Verse: 12    man muoste si sunder schouwen,

Verse: 13    si trüegen spîse oder wîn.
Verse: 14    sus muosten si mit zühten sîn.

Verse: 15    si mohten dô wol wirtschaft jehen:
Verse: 16    ez was in selten ê geschehen,

Verse: 17    den vrouwen und der ritterschaft.
Verse: 18    sît si Klinschores kraft

Verse: 19    mit sînen listen überwant,
Verse: 20    si wâren ein ander unbekant

Verse: 21    und beslôz si doch ein porte,
Verse: 22    daz si ze gegenworte

Verse: 23    nie kômen, vrouwen noch die man.
Verse: 24    dô schuof mîn her Gâwân,

Verse: 25    daz diz volc ein ander sach,
Verse: 26    dar an in liebes vil geschach.

Verse: 27    Gâwâne was ouch liep geschehen,
Verse: 28    doch muoste er tougenlîche sehen

Verse: 29    an die klâren herzoginne:
Verse: 30    diu twanc sîns herzen sinne.




Chapter: 638 
638


Verse: 1    nû begunde ouch strûchen der tac,
Verse: 2    daz sîn schîn vil nâch gelac

Verse: 3    und daz man durch diu wolken sach,
Verse: 4    des man der naht ze boten jach,

Verse: 5    manegen stern, der balde gienc,
Verse: 6    wande er der naht herberge vienc.

Verse: 7    nâch der naht baniere
Verse: 8    kom si selbe schiere.

Verse: 9    manec tiuriu krône
Verse: 10    was gehangen schône

Verse: 11    alumme ûf den palas,
Verse: 12    diu schiere wol bekerzet was.

Verse: 13    ûf al die tische sunder
Verse: 14    truoc man kerzen dar ein wunder.

Verse: 15    dar zuo diu âventiure giht,
Verse: 16    diu herzoginne wære sô lieht,

Verse: 17    wære der kerzen keiniu brâht,
Verse: 18    dâ wære doch ninder bî ir naht:

Verse: 19    [ir blic wol selbe kunde tagen.
Verse: 20    sus hôrte ich von der süezen sagen.]

Verse: 21    man welle im unrehtes jehen,
Verse: 22    sô habet ir selten ê gesehen

Verse: 23    deheinen wirt sô vreuden rîch.
Verse: 24    ez was den vreuden dâ gelîch:

Verse: 25    alsus mit vreudehafter ger
Verse: 26    die ritter dar, die vrouwen her

Verse: 27    dicke an ein ander blicten.
Verse: 28    die von der vremde erschricten,

Verse: 29    werdent si immer heimlîcher baz,
Verse: 30    daz sol ich lâzen âne haz.




Chapter: 639 
639


Verse: 1    ez ensî denne gar ein vrâz,
Verse: 2    welt ir, si habent genuoc dâ gâz.

Verse: 3    man truoc die tische gar her dan.
Verse: 4    dô vrâcte mîn her Gâwân

Verse: 5    um guote videlære.
Verse: 6    ob der dâ keiner wære?

Verse: 7    dâ was werder knappen vil,
Verse: 8    wol gelêrt ûf seitspil.

Verse: 9    ir enkeines kunst was doch sô ganz,
Verse: 10    si enmüesten strîchen alden tanz:

Verse: 11    niuwer tenze was dâ wênec vernomen,
Verse: 12    der uns von Düringen vil ist komen.

Verse: 13    nû danket es dem wirte:
Verse: 14    ir vreude er si niht irte.

Verse: 15    manec vrouwe wol gevar
Verse: 16    giengen vür in tanzen dar.

Verse: 17    sus wart ir tanz gezieret,
Verse: 18    wol underparrieret

Verse: 19    die ritter underz vrouwen her.
Verse: 20    gein der riuwe kômen si ze wer.

Verse: 21    ouch muoste man dâ schouwen
Verse: 22    ie zwischen zwein vrouwen

Verse: 23    einen klâren ritter gên.
Verse: 24    man mohte vreude an in verstên:

Verse: 25    swelh ritter phlac der sinne,
Verse: 26    daz er dienest bôt nâch minne,

Verse: 27    diu bete was urlouplîch.
Verse: 28    die sorgen arm und die vreuden rîch

Verse: 29    mit rede vertriben die stunde
Verse: 30    gein manegem süezen munde.




Chapter: 640 
640


Verse: 1    Gâwân und Sangîve
Verse: 2    und diu künegîn Arnîve

Verse: 3    sâzen stille bî des tanzes schar.
Verse: 4    diu herzoginne wol gevar

Verse: 5    her um ze Gâwân sitzen gienc:
Verse: 6    ir hant er in die sîne emphienc,

Verse: 7    si sprâchen sus unde sô.
Verse: 8    ir komens was er zuo zim vrô:

Verse: 9    sîn riuwe smal und sîn vreude breit
Verse: 10    wart dô. sus swant im al sîn leit.

Verse: 11    was ir vreude am tanze grôz,
Verse: 12    Gâwân noch minner hie verdrôz.

Verse: 13    diu künegîn Arnîve sprach:
Verse: 14    "herre, nû prüevet iuwer gemach.

Verse: 15    ir soldet an disen stunden
Verse: 16    ruowen ziuwern wunden.

Verse: 17    hât sich diu herzogîn bewegen,
Verse: 18    daz si iuwer wil mit decke phlegen

Verse: 19    noch hînte geselleclîche?
Verse: 20    diust helfe und râtes rîche."

Verse: 21    Gâwân sprach: "des vrâget sie.
Verse: 22    in iuwer beider gebote ich hie

Verse: 23    gar bin." sus sprach diu herzogîn:
Verse: 24    "er sol in mîner phlege sîn.

Verse: 25    lât diz volc slâfen varn.
Verse: 26    ich sol in hînte sô bewarn,

Verse: 27    daz sîn nie vriundîn baz gephlac.
Verse: 28    Flôranden von Itolac

Verse: 29    und den herzogen von Gôwerzîn
Verse: 30    lât in der ritter phlege sîn."




Chapter: 641 
641


Verse: 1    dar nâch schiere ein ende nam der tanz:
Verse: 2    juncvrouwen mit varwen glanz

Verse: 3    sâzen dort unde hie,
Verse: 4    die ritter sâzen zwischen sie.

Verse: 5    des vreude sich an sorgen rach,
Verse: 6    swer dâ nâch werder minne sprach,

Verse: 7    ob er vant süeziu gegenwort.
Verse: 8    von dem wirte wart gehôrt,

Verse: 9    man soldez trinken vür in tragen.
Verse: 10    daz mohten werbære klagen:

Verse: 11    der wirt warp mit den gesten.
Verse: 12    in kunde ouch minne lesten:

Verse: 13    ir sitzen dûhte in gar ze lanc.
Verse: 14    sîn herze ouch werdiu minne twanc.

Verse: 15    daz trinken gap in urloup.
Verse: 16    manegen kerzînen schoup

Verse: 17    truogen knappen vor den rittern dan.
Verse: 18    dô bevalh mîn her Gâwân

Verse: 19    dise zwêne geste in allen.
Verse: 20    daz muoste in wol gevallen.

Verse: 21    Lischois und Flôrant
Verse: 22    vuoren slâfen al zehant.

Verse: 23    diu herzogîn was sô bedâht,
Verse: 24    diu sprach, si gunde in guoter naht.

Verse: 25    dô vuor ouch al der vrouwen schar,
Verse: 26    dâ si gemaches nâmen war:

Verse: 27    ir nîgens si begunden
Verse: 28    mit zuht, die si wol kunden.

Verse: 29    Sangîve und Itonjê
Verse: 30    vuoren dan, als tet ouch Kundrîê.




Chapter: 642 
642


Verse: 1    Bêne und Arnîve dô
Verse: 2    schuofen, daz ez stuont alsô,

Verse: 3    dâ von der wirt gemach erleit.
Verse: 4    diu herzogîn daz niht vermeit,

Verse: 5    dâ enwære ir helfe nâhe bî.
Verse: 6    Gâwânen vuorten dise drî

Verse: 7    mit in dan durch sîn gemach.
Verse: 8    in einer kemenâten er ersach

Verse: 9    zwei bette sunder ligen.
Verse: 10    nû wirt iu gar von mir verswigen,

Verse: 11    wie diu gehêret wæren:
Verse: 12    ez næhet andern mæren.

Verse: 13    Arnîve zer herzoginne sprach:
Verse: 14    "nû sult ir schaffen guot gemach

Verse: 15    disem ritter, den ir brâhtet her.
Verse: 16    ob der helfe an iu ger,

Verse: 17    iuwer helfe habet ir êre.
Verse: 18    ich ensage iu nû niht mêre,

Verse: 19    wan daz sîne wunden
Verse: 20    mit kunst sô sint gebunden,

Verse: 21    er möhte nû wol wâpen tragen.
Verse: 22    doch sult ir sînen kummer klagen:

Verse: 23    ob ir im senftet, daz ist guot.
Verse: 24    lêret ir in hôhen muot,

Verse: 25    des muge wir alle geniezen:
Verse: 26    nû lâts iuch niht verdriezen."

Verse: 27    diu künegîn Arnîve gienc,
Verse: 28    dô si ze hove urloup emphienc:

Verse: 29    Bêne ein lieht vor ir truoc dan.
Verse: 30    die tür beslôz her Gâwân.




Chapter: 643 
643


Verse: 1    kunnen si zwei nû minne steln,
Verse: 2    daz mac ich unsanfte heln.

Verse: 3    ich sage vil lîhte, daz dâ geschach,
Verse: 4    wan daz man dem unvuoge ie jach,

Verse: 5    der verholniu mære machte breit.
Verse: 6    ez ist ouch noch den höveschen leit:

Verse: 7    ouch unsæleget er sich dâ mite.
Verse: 8    zuht sî des slôz ob minne site.

Verse: 9    nû vuocte diu strenge minne
Verse: 10    und diu klâre herzoginne,

Verse: 11    daz Gâwâns vreude was verzert.
Verse: 12    er wære immer ungewert

Verse: 13    sunder âmîen.
Verse: 14    die philosophîen

Verse: 15    und alle, die ie gesâzen,
Verse: 16    dâ si starke liste mâzen,

Verse: 17    Kankor und Têbit
Verse: 18    unde Trebuchet der smit,

Verse: 19    der Frimutels swert ergruop,
Verse: 20    dâ von sich starkez wunder huop,

Verse: 21    dar zuo al der arzâte kunst,
Verse: 22    ob si im trüegen guote gunst,

Verse: 23    mit temperîe ûz würze kraft,
Verse: 24    âne wîplîch geselleschaft

Verse: 25    sô müeste er sîne scharphe nôt
Verse: 26    hân brâht unz an den sûren tôt.

Verse: 27    ich wil iuz mære machen kurz.
Verse: 28    er vant die rehten hirzwurz,

Verse: 29    diu im half, daz er genas,
Verse: 30    sô daz im arges niht enwas:




Chapter: 644 
644


Verse: 1    diu wurz was bî dem blanken brûn.
Verse: 2    muoterhalp der Bertûn,

Verse: 3    Gâwân fil li roi Lôt,
Verse: 4    süezer senfte vür sûre nôt

Verse: 5    er mit werder helfe phlac
Verse: 6    helfeclîche unz an den tac.

Verse: 7    sîn helfe was doch sô gedigen,
Verse: 8    daz ez al daz volc was verswigen.

Verse: 9    sît nam er mit vreuden war
Verse: 10    al der ritter und der vrouwen gar,

Verse: 11    sô daz ir trûren vil nâch verdarp.
Verse: 12    nû hœrt ouch, wie der knappe warp,

Verse: 13    den Gâwân hête gesant
Verse: 14    hin ze Löver in daz lant,

Verse: 15    ze Bems bî der Korkâ.
Verse: 16    der künec Artûs was aldâ

Verse: 17    und des wîp, diu künegîn,
Verse: 18    und maneger vrouwen liehter schîn

Verse: 19    und der werden massenîe ein vluot.
Verse: 20    nû hœrt ouch, wie der knappe tuot.

Verse: 21    diz was eines morgens vruo:
Verse: 22    sîner botschefte greif er zuo.

Verse: 23    diu künegîn zer kappeln was,
Verse: 24    an ir venje si den salter las,

Verse: 25    der knappe vür si kniete.
Verse: 26    er bôt ir vreuden miete:

Verse: 27    einen brief si nam ûz sîner hant,
Verse: 28    dar an si geschriben vant

Verse: 29    schrift, die si bekande.
Verse: 30    ê sînen herren nande




Chapter: 645 
645


Verse: 1    der knappe, den si knien dâ sach,
Verse: 2    diu künegîn zem brieve sprach:

Verse: 3    "ô wol der hant, diu dich schreip!
Verse: 4    âne sorge ich nie beleip

Verse: 5    sît des tages, daz ich sach
Verse: 6    die hant, von der diu schrift geschach."

Verse: 7    si weinde sêre und was doch vrô.
Verse: 8    hin zem knappen sprach si dô:

Verse: 9    "dû bist Gâwânes kneht."
Verse: 10    "jâ, vrouwe! der enbiutet iu sîn reht,

Verse: 11    dienstlîche triuwe âne allen wanc
Verse: 12    und dâ bî sîne vreude kranc,

Verse: 13    ir enwelt im vreude machen hôch.
Verse: 14    sô kummerlîch ez sich gezôch

Verse: 15    nie um al sîn êre.
Verse: 16    vrouwe, er enbiutet iu mêre,

Verse: 17    daz er mit werden vreuden lebe,
Verse: 18    und vreischet er iuwers trôstes gebe.

Verse: 19    ir muget wol an dem brieve sehen
Verse: 20    mêr, denne ichs iu künne jehen."

Verse: 21    si sprach: "ich hân vür wâr erkant,
Verse: 22    durch was dû zuo mir bist gesant.

Verse: 23    ich tuon im werden dienest dar
Verse: 24    mit wünneclîcher vrouwen schar,

Verse: 25    die vür wâr bî mîner zît
Verse: 26    an prîse vor ûz hânt den strît.

Verse: 27    âne Parzivâles wîp
Verse: 28    und âne Orgelûsen lîp

Verse: 29    sô enerkenne ich ûf der erde
Verse: 30    bî toufe keine sô werde.




Chapter: 646 
646


Verse: 1    daz Gâwân von Artûse reit,
Verse: 2    sît hât sorge unde leit

Verse: 3    mit krache ûf mich geleget ir vlîz.
Verse: 4    mir sagete Meljanz von Lîz,

Verse: 5    er sæhe in sît ze Barbigôl.
Verse: 6    ouwî", sprach si, "Plimizôl,

Verse: 7    daz dich mîn ouge ie gesach!
Verse: 8    waz mir doch leides dâ geschach!

Verse: 9    Kunnewâre de Lalant
Verse: 10    wart mir nimmer mêr bekant,

Verse: 11    mîn süeziu werdiu gespil.
Verse: 12    tavelrunder wart dâ vil

Verse: 13    mit rede ir reht gebrochen.
Verse: 14    vünftehalp jâr und sehs wochen

Verse: 15    ist, daz der werde Parzivâl
Verse: 16    von dem Plimizôl nâch dem grâl

Verse: 17    reit. dô kêrte ouch Gâwân
Verse: 18    gein Askalûn, der werde man.

Verse: 19    Jeschûte und Ekubâ
Verse: 20    schieden sich von mir aldâ.

Verse: 21    grôz jâmer nâch der werden diet
Verse: 22    mich sît von stæten vreuden schiet."

Verse: 23    diu künegîn trûrens vil verjach.
Verse: 24    hin zem knappen si dô sprach:

Verse: 25    "nû volge mîner lêre.
Verse: 26    verholne von mir kêre,

Verse: 27    unz sich erhebe hôch der tac,
Verse: 28    daz daz volc ze hove wesen mac,

Verse: 29    ritter, sarjande,
Verse: 30    diu grôze mahinande.




Chapter: 647 
647


Verse: 1    ûf den hof dû balde drabe.
Verse: 2    enruoche, ob dîn runzît iemen habe:

Verse: 3    dâ von soltû balde gên,
Verse: 4    aldâ die werden ritter stên.

Verse: 5    die vrâgent dich âventiure:
Verse: 6    als dû gâhes ûz einem viure,

Verse: 7    gebâre mit rede und ouch mit siten.
Verse: 8    von in vil kûme wirt gebiten

Verse: 9    waz dû mære bringes:
Verse: 10    waz wirret, ob dû dich dringes

Verse: 11    durchz volc unz an den rehten wirt?
Verse: 12    der gein dir grüezen niht verbirt,

Verse: 13    disen brief gip im in die hant,
Verse: 14    dar an er schiere hât erkant

Verse: 15    dîniu mære und dîns herren ger.
Verse: 16    des ist er mit der volge wer.

Verse: 17    noch mêr wil ich lêren dich:
Verse: 18    offenlîche soltû sprechen mich,

Verse: 19    dâ ich und ander vrouwen
Verse: 20    dich hœren unde schouwen.

Verse: 21    dâ wirp um uns, als dû wol kans,
Verse: 22    ob dû dînem herren guotes gans.

Verse: 23    und sage mir, wâ ist Gâwân?"
Verse: 24    der knappe sprach: "daz wirt verlân.

Verse: 25    ich sage iu niht, wâ mîn herre sî.
Verse: 26    welt ir, er belîbet vreuden bî."

Verse: 27    der knappe was ir râtes vrô:
Verse: 28    von der künegîn er dô

Verse: 29    schiet, als ir wol habet vernomen,
Verse: 30    und kom ouch, als er solde komen,




Chapter: 648 
648


Verse: 1    rehte um den mitten morgen.
Verse: 2    offenlîche und unverborgen

Verse: 3    ûf den hof der knappe reit.
Verse: 4    die höveschen pruovten sîniu kleit

Verse: 5    wol nâch knappelîchen siten.
Verse: 6    ze beiden sîten was versniten

Verse: 7    daz ors mit sporn sêre.
Verse: 8    nâch der künegîn lêre

Verse: 9    er balde von dem orse spranc.
Verse: 10    um in huop sich grôz gedranc:

Verse: 11    kappe, swert unde sporn
Verse: 12    undz ors, wurden diu verlorn,

Verse: 13    dâ kêrte er sich wênec an.
Verse: 14    der knappe huop sich balde dan,

Verse: 15    dâ die werden ritter stuonden,
Verse: 16    die vrâgen in begunden

Verse: 17    von âventiue mære.
Verse: 18    si jehent, daz reht dâ wære,

Verse: 19    ze hove az weder wîp noch man,
Verse: 20    ê der hof sîn reht gewan,

Verse: 21    âventiur sô werdeclîch,
Verse: 22    diu âventiure wære gelîch.

Verse: 23    der knappe sprach: "ich ensage iu niht.
Verse: 24    mîn unmuoze mir des giht.

Verse: 25    daz sult ir mir durch zuht vertragen
Verse: 26    und ruocht mir von dem künege sagen:

Verse: 27    den hete ich gerne gesprochen ê.
Verse: 28    mir tuot mîn unmuoze wê.

Verse: 29    ir vreischt wol, waz ich mære sage:
Verse: 30    got lêre iuch helfe und kummers klage."




Chapter: 649 
649


Verse: 1    diu botschaft den knappen twanc,
Verse: 2    daz er enruochte, wer in dranc,

Verse: 3    unz in der künec selbe sach,
Verse: 4    der sîn grüezen gein im sprach.

Verse: 5    der knappe gap im einen brief,
Verse: 6    der Artûse in sîn herze rief,

Verse: 7    dô er von im wart gelesen,
Verse: 8    dô muoste er bî beiden wesen,

Verse: 9    daz eine was vreude undz ander klage.
Verse: 10    er sprach: "wol disem süezen tage,

Verse: 11    bî des liehte ich hân vernomen,
Verse: 12    mir sint diu wâren mære komen

Verse: 13    um mîner werden swester sun.
Verse: 14    kan ich manlîch dienest tuon,

Verse: 15    durch sippe und durch geselleschaft,
Verse: 16    ob triuwe an mir gewan ie kraft,

Verse: 17    sô leiste ich, daz mir Gâwân
Verse: 18    hât enboten, ob ich kan."

Verse: 19    hin zem knappen sprach er dô:
Verse: 20    "nu sage mir, ist Gâwân vrô?"

Verse: 21    "jâ, herre, ob ir wellet,
Verse: 22    zer vreude er sich gesellet"

Verse: 23    sus sprach der knappe wîse.
Verse: 24    "er schiede gar von prîse,

Verse: 25    ob ir in liezet under wegen:
Verse: 26    wer solde ouch dâ bî vreuden phlegen?

Verse: 27    iuwer trôst im zucket vreude enbor:
Verse: 28    unz ûzerhalp der riuwe tor

Verse: 29    von sînem herzen kummer jaget,
Verse: 30    daz ir an im iht sît verzaget,





Chapter: 650 
650


Verse: 1    mîn herre enbôt sîn dienst dâ her
Verse: 2    der künegîn, ouch ist sîn ger,

Verse: 3    daz al der tavelrunder schar
Verse: 4    sînes dienstes nemen war,

Verse: 5    daz si an triuwe denken
Verse: 6    und im vreude niht verkrenken,

Verse: 7    sô daz si iu komen râten."
Verse: 8    al die werden des dâ bâten.

Verse: 9    Artûs sprach: "trûtgeselle mîn,
Verse: 10    trac disen brief der künegîn,

Verse: 11    lâz si dran lesen unde sagen,
Verse: 12    wes wir uns vreuen und waz wir klagen.

Verse: 13    daz der künec Gramoflanz
Verse: 14    hôchvart mit lôsheite ganz

Verse: 15    gein mînem künne bieten kan!
Verse: 16    er wænt, mîn neve Gâwân

Verse: 17    sî Zidegast, den er sluoc,
Verse: 18    dâ von er kummers hât genuoc.

Verse: 19    ich sol im kummer mêren
Verse: 20    und niuwen site lêren."

Verse: 21    der knappe kom gegangen,
Verse: 22    dâ er wart wol emphangen.

Verse: 23    er gap der künegîn den brief.
Verse: 24    des manec ouge über lief,

Verse: 25    dô ir süezer munt gelas
Verse: 26    al, daz dar an geschriben was,

Verse: 27    Gâwâns klage und werben.
Verse: 28    dô enliez ouch niht verderben

Verse: 29    der knappe zal den vrouwen warp,
Verse: 30    dar an sîn kunst niht verdarp.




Chapter: 651 
651


Verse: 1    Gâwâns mâc, der rîche
Verse: 2    Artûs warp herzenlîche

Verse: 3    zer massenîe dise vart.
Verse: 4    vor sûmen hete ouch sich bewart

Verse: 5    Ginôver, diu kurteise
Verse: 6    warp zen vrouwen dise stolzen reise.

Verse: 7    Keie sprach in sînem zorn:
Verse: 8    "wart aber ie sô werder man geborn,

Verse: 9    getorste ich des gelouben hân,
Verse: 10    sô von Norwæge Gâwân,

Verse: 11    ziu dar nâher! holt in dâ!
Verse: 12    sôst er lîhte anderswâ.

Verse: 13    wil er wenken als ein eichorn,
Verse: 14    ir muget in schiere hân verlorn."

Verse: 15    der knappe sprach zer künegîn:
Verse: 16    "vrouwe, gein dem herren mîn

Verse: 17    muoz ich balde kêren:
Verse: 18    werpt sîn dinc nâch iuwern êren."

Verse: 19    zeinem ir kamerære si sprach:
Verse: 20    "schaffe disem knappen guot gemach.

Verse: 21    sîn ors soltû schouwen:
Verse: 22    sî daz mit sporn verhouwen,

Verse: 23    gip imz beste, daz hie veile sî.
Verse: 24    wone im ander kummer bî,

Verse: 25    ez sî phantlôse oder kleit,
Verse: 26    des sol er alles sîn bereit."

Verse: 27    si sprach: "nû sage Gâwân,
Verse: 28    im sî mîn dienest undertân.

Verse: 29    urloup ich dir zem künege nim:
Verse: 30    dînem herren sage ouch dienst von im."




Chapter: 652 
652


Verse: 1    nû warp der künec sîne vart.
Verse: 2    des wart der tavelrunder art

Verse: 3    des tages aldâ volrecket.
Verse: 4    ez hete in vreude erwecket,

Verse: 5    daz der werde Gâwân
Verse: 6    dennoch sîn leben solde hân:

Verse: 7    des wâren si innen worden.
Verse: 8    der tavelrunder orden

Verse: 9    wart dâ begangen âne haz.
Verse: 10    der künec ob tavelrunder az

Verse: 11    und die dâ sitzen solden.
Verse: 12    die prîs mit arbeit holden,

Verse: 13    al die tavelrunderære
Verse: 14    genuzzen dirre mære.

Verse: 15    nû lât den knappen wider komen,
Verse: 16    von dem diu botschaft sî vernomen.

Verse: 17    der huop sich dan ze rehter zît.
Verse: 18    der künegîn kamerære im gît

Verse: 19    phantlôse, ors und ander kleit.
Verse: 20    der knappe dan mit vreuden reit,

Verse: 21    wande er an Artûse erwarp,
Verse: 22    dâ von sîns herren sorge erstarp.

Verse: 23    er kom wider in solhen tagen,
Verse: 24    des ich vür wâr niht kan gesagen,

Verse: 25    ûf Schastel Marveile.
Verse: 26    Arnîve wart diu geile,

Verse: 27    wande ir der portenære enbôt,
Verse: 28    der knappe wære mit sorses nôt

Verse: 29    balde wider gestrichen.
Verse: 30    gein dem si kom geslichen




Chapter: 653 
653


Verse: 1    aldâ der în verlâzen wart.
Verse: 2    si vrâcte in um sîne vart,

Verse: 3    war nâch er ûz wære geriten.
Verse: 4    der knappe sprach: "daz wirt vermiten,

Verse: 5    vrouwe. ich entars iu niht gesagen,
Verse: 6    ich muoz ez durch mînen eit verdagen.

Verse: 7    ez wære ouch mînem herren leit,
Verse: 8    bræche ich mit mæren mînen eit:

Verse: 9    des diuhte ich iuch der tumme.
Verse: 10    vrouwe, vrâct in selben drumme."

Verse: 11    si spiltez mit vrâge an manegen ort.
Verse: 12    der knappe sprach et disiu wort:

Verse: 13    "vrouwe, ir sûmt mich âne nôt:
Verse: 14    ich leiste, daz mir der eit gebôt."

Verse: 15    er gienc, dâ er sînen herren vant.
Verse: 16    der turkoite Flôrant

Verse: 17    und der herzoge von Gôwerzîn
Verse: 18    und von Lôgrois diu herzogîn

Verse: 19    saz dâ mit grôzer vrouwen schar.
Verse: 20    der knappe gienc ouch zuo zin dar.

Verse: 21    ûf stuont mîn her Gâwân,
Verse: 22    er nam den knappen sunder dan

Verse: 23    und bat in willekomen sîn.
Verse: 24    er sprach: "sage an, geselle mîn,

Verse: 25    eintweder vreude oder nôt
Verse: 26    oder swaz man mir von hove enbôt.

Verse: 27    vünde dû den künec dâ?"
Verse: 28    der knappe sprach: "herre, jâ,

Verse: 29    ich vant den künec und des wîp
Verse: 30    und manegen werdeclîchen lîp.




Chapter: 654 
654


Verse: 1    si enbietent iu dienest und ir komen.
Verse: 2    iuwer botschaft wart von in vernomen

Verse: 3    alsô werdeclîche,
Verse: 4    daz arme unde rîche

Verse: 5    sich vreuten, wande ich tet in kunt,
Verse: 6    daz ir noch wæret wol gesunt.

Verse: 7    ich vant dâ hers ein wunder,
Verse: 8    ouch wart diu tavelrunder

Verse: 9    besetzet durch iuwer botschaft.
Verse: 10    ob ritters prîs gewan ie kraft,

Verse: 11    ich meine an werdekeite,
Verse: 12    die lenge und ouch die breite

Verse: 13    treget iuwer prîs die krône
Verse: 14    ob andern prîsen schône."

Verse: 15    er sagete im ouch, wie daz geschach,
Verse: 16    daz er die küneginne sprach,

Verse: 17    und waz im diu mit triuwen riet.
Verse: 18    er sagete im ouch von al der diet,

Verse: 19    von rittern und von vrouwen,
Verse: 20    daz er si möhte schouwen

Verse: 21    ze Jôflanze vor der zît,
Verse: 22    ê würde sînes kamphes strît.

Verse: 23    Gâwâns sorge gar verswant:
Verse: 24    niht wan vreude er im herzen vant.

Verse: 25    [Gâwân ûz sorgen in vreude trat.
Verse: 26    den knappen erz verswîgen bat.]

Verse: 27    al sîner sorge er gar vergaz.
Verse: 28    er gienc hin wider unde saz

Verse: 29    und was mit vreuden dâ ze hûs,
Verse: 30    unz daz der künec Artûs




Chapter: 655 
655


Verse: 1    mit her in sîne helfe reit.
Verse: 2    nû hœret liep unde leit.

Verse: 3    Gâwân was zallen zîten vrô.
Verse: 4    eins morgens vuoctez sich alsô,

Verse: 5    daz ûf dem rîchen palas
Verse: 6    manec ritter unde vrouwe was.

Verse: 7    in ein venster gein dem phlûm
Verse: 8    nam er im sunder einen rûm,

Verse: 9    dâ er und Arnîve saz,
Verse: 10    diu vremder mære niht vergaz.

Verse: 11    Gâwân sprach zer künegîn:
Verse: 12    "ouwî, liebiu vrouwe mîn,

Verse: 13    wolde iuch des niht betrâgen,
Verse: 14    daz ich iuch müeste vrâgen

Verse: 15    von sus getânen mæren,
Verse: 16    diu mich verswigen wæren!

Verse: 17    wan daz ich von iuwer helfe gebe
Verse: 18    alsus mit werden vreuden lebe,

Verse: 19    getruoc mîn herze ie mannes sin,
Verse: 20    den hete diu edel herzogin

Verse: 21    mit ir gewalt beslozzen.
Verse: 22    nû hân ich iuwer genozzen,

Verse: 23    daz mir gesenftet ist diu nôt.
Verse: 24    minne und wunden wære ich tôt,

Verse: 25    wan daz iuwer helfeclîcher trôst
Verse: 26    mich ûz banden hât erlôst.

Verse: 27    von iuwer schult hân ich den lîp.
Verse: 28    nû saget mir, sældehaftez wîp,

Verse: 29    um wunder, daz hie was und ist,
Verse: 30    durch waz sô strengeclîchen list




Chapter: 656 
656


Verse: 1    der wîse Klinschor hete erkorn.
Verse: 2    wan ir, ich hetes den lîp verlorn."

Verse: 3    diu herzenlîche wîse
Verse: 4    (mit sô wîplîchem prîse

Verse: 5    kom jugent in daz alter nie)
Verse: 6    sprach: "herre, sîniu wunder hie

Verse: 7    sint dâ engein kleiniu wunderlîn,
Verse: 8    wider den starken wundern sîn,

Verse: 9    die er hât in manegen landen.
Verse: 10    swer uns des giht ze schanden,

Verse: 11    der wirbet niht wan sünde mite.
Verse: 12    herre, ich sage iu sînen site:

Verse: 13    derst maneger diete worden sûr.
Verse: 14    sîn lant heizt Terre de Labûr.

Verse: 15    von des nâchkomen er ist erborn,
Verse: 16    der ouch vil wunders hete erkorn,

Verse: 17    von Nâpels Virgîljus.
Verse: 18    Klinschor des neve warp alsus.

Verse: 19    Kâps was sîn houbetstat.
Verse: 20    er trat in prîse sô hôhen phat,

Verse: 21    an prîse was er unbetrogen.
Verse: 22    von Klinschor dem herzogen

Verse: 23    sprâchen wîp unde man,
Verse: 24    unz er schaden sus gewan.

Verse: 25    Sizilje hete ein künec wert:
Verse: 26    der was geheizen Gîbert,

Verse: 27    îblis hiez sîn wîp.
Verse: 28    diu truoc den minneclîchsten lîp,

Verse: 29    der ie von brüste wart genomen.
Verse: 30    in der dienest was er komen,




Chapter: 657 
657


Verse: 1    unz sis mit minnen lônde,
Verse: 2    dar um der künec in hônde.

Verse: 3    muoz ich iu sîniu tougen sagen,
Verse: 4    des sol ich iuwern urloup tragen:

Verse: 5    doch sint diu selben mære
Verse: 6    mir ze sagene ungebære,

Verse: 7    wâ mit er kom in zoubers site.
Verse: 8    zeinem kapûne mit einem snite

Verse: 9    wart Klinschor gemachet."
Verse: 10    des wart aldâ gelachet

Verse: 11    von Gâwâne sêre.
Verse: 12    si sagete im dennoch mêre:

Verse: 13    "ûf Kalotembolot
Verse: 14    erwarp er der werlde spot:

Verse: 15    daz ist ein burc veste erkant.
Verse: 16    der künec bî sînem wîbe in vant:

Verse: 17    Klinschor slief an ir arme.
Verse: 18    lac er dâ iht warme,

Verse: 19    daz muoste er sus verphenden:
Verse: 20    er wart mit küneges henden

Verse: 21    zwischen den beinen gemachet sleht.
Verse: 22    des dûhte den wirt, ez wære sîn reht.

Verse: 23    der besneit in an dem lîbe,
Verse: 24    daz er deheinem wîbe

Verse: 25    mac ze schimphe niht gevromen.
Verse: 26    des ist vil liute in kummer komen.

Verse: 27    ez ist niht daz lant ze Persiâ:
Verse: 28    ein stat heizet Persidâ,

Verse: 29    dâ êrste zouber wart erdâht.
Verse: 30    dâ vuor er hin und hât dan brâht,




Chapter: 658 
658


Verse: 1    daz er wol schaffet, swaz er wil,
Verse: 2    mit listen zouberlîchiu zil.

Verse: 3    durch die schame an sînem lîbe
Verse: 4    wart er manne noch wîbe

Verse: 5    guotes willen nimmer mêr bereit.
Verse: 6    ich meine, die tragent werdekeit,

Verse: 7    swaz er den vreuden mac genemen,
Verse: 8    des kan von herzen in gezemen.

Verse: 9    ein künec der hiez îrôt,
Verse: 10    der ervorhte im die selben nôt,

Verse: 11    von Rosche Sabînes.
Verse: 12    der bôt im des sînes

Verse: 13    ze gebene, swaz er wolde,
Verse: 14    daz er vride haben solde.

Verse: 15    Klinschor emphienc von sîner hant
Verse: 16    disen berc veste erkant

Verse: 17    und an der selben zîle
Verse: 18    alumme ehte mîle.

Verse: 19    Klinschor dô worhte ûf disen berc,
Verse: 20    als ir wol seht, diz spæhe werc.

Verse: 21    aller rîcheite sunder
Verse: 22    sint hie ûf starkiu wunder.

Verse: 23    wolde man der bürge vâren,
Verse: 24    spîse ze drîzec jâren

Verse: 25    wære hie ûfe manecvalt.
Verse: 26    er hât ouch aller der gewalt,

Verse: 27    mal unde bêâ schent,
Verse: 28    die zwischen dem firmament

Verse: 29    wonent und der erden zil,
Verse: 30    niht wan die got beschermen wil.




Chapter: 659 
659


Verse: 1    herre, sît iuwer starkiu nôt
Verse: 2    ist worden wendec âne tôt,

Verse: 3    sîn gâbe stêt in iuwer hant:
Verse: 4    dise burc und diz gemezzen lant,

Verse: 5    er enkêrt sich nimmer mêr nû dran.
Verse: 6    er solde ouch vride von im hân,

Verse: 7    des jach er offenbâre
Verse: 8    (er ist mit rede der wâre),

Verse: 9    swer dise âventiure erlite,
Verse: 10    daz dem sîn gâbe wonte mite.

Verse: 11    swaz er gesach der werden
Verse: 12    ûf kristenlîcher erden,

Verse: 13    ez wære maget, wîp oder man,
Verse: 14    der ist iu hie vil undertân:

Verse: 15    manec heiden und heidenîn
Verse: 16    muoste ouch bî uns hie ûfe sîn.

Verse: 17    nû lât diz volc wider komen,
Verse: 18    dâ nâch uns sorge sî vernomen.

Verse: 19    ellende vrumt mirz herze kalt.
Verse: 20    der die sterne hât gezalt,

Verse: 21    der müeze iuch helfe lêren
Verse: 22    und uns gein vreuden kêren.

Verse: 23    ein muoter ir vruht gebirt,
Verse: 24    diu vruht sîner muoter muoter wirt:

Verse: 25    von dem wazzer kumt daz îs,
Verse: 26    daz læt denne niht deheinen wîs,

Verse: 27    daz wazzer enkome ouch wider von im.
Verse: 28    swenne ich gedanke an mich nim,

Verse: 29    daz ich ûz vreuden bin erborn,
Verse: 30    wirt vreude noch an mir erkorn,




Chapter: 660 
660


Verse: 1    dâ gît ein vruht die andern vruht.
Verse: 2    diz sult ir vüegen, habet ir zuht.

Verse: 3    ez ist lanc, daz mir vreude entviel.
Verse: 4    von segel balde gêt der kiel:

Verse: 5    der man ist sneller, der drûfe gêt.
Verse: 6    ob ir diz bîspel verstêt,

Verse: 7    iuwer prîs wirt hôch und snel.
Verse: 8    ir muget uns vreude machen hel,

Verse: 9    daz wir vreude vüeren in manegiu lant,
Verse: 10    dâ nâch uns sorge wart erkant.

Verse: 11    etswenne ich vreuden phlac genuoc:
Verse: 12    ich was ein wîp, diu krône truoc,

Verse: 13    ouch truoc mîn tohter krône
Verse: 14    von ir landes vürsten schône.

Verse: 15    wir heten beide werdekeit.
Verse: 16    herre, ich engeriet nie mannes leit:

Verse: 17    beidiu wîp unde man
Verse: 18    kunde ich wol nâch ir rehte hân.

Verse: 19    erkennen unde schouwen
Verse: 20    zeiner rehten volkes vrouwen

Verse: 21    muoste man mich, ruochtes got,
Verse: 22    wande ich nie manne missebôt.

Verse: 23    nû sol ein ieslîch sælec wîp,
Verse: 24    ob si wil tragen werden lîp,

Verse: 25    erbietenz guoten liuten wol:
Verse: 26    si kumt vil lîhte in kummers dol,

Verse: 27    daz ir ein swacher garzûn
Verse: 28    enger vreude gæbe wîten rûm.

Verse: 29    herre, ich hân lange hie gebiten:
Verse: 30    niemen geloufen noch geriten




Chapter: 661 
661


Verse: 1    kom her, der mich erkande,
Verse: 2    der mir sorgen wande."

Verse: 3    dô sprach mîn her Gâwân:
Verse: 4    "vrouwe, muoz ich mîn leben hân,

Verse: 5    sô wirt noch vreude an iu vernomen."
Verse: 6    des selben tages solde ouch komen

Verse: 7    mit her Artûs der Bertûn,
Verse: 8    der klagenden Arnîven sun,

Verse: 9    durch sippe und durch triuwe.
Verse: 10    manege banier niuwe

Verse: 11    sach Gâwân gein im trecken,
Verse: 12    mit rottez velt verdecken

Verse: 13    von Lôgrois die strâzen her
Verse: 14    mit manegem lieht gemâlem sper.

Verse: 15    Gâwâne tet ir komen wol.
Verse: 16    swer samenunge warten sol,

Verse: 17    den lêrt sûmen den gedanc:
Verse: 18    er vürht, sîn helfe werde kranc.

Verse: 19    Artûs Gâwâne den zwîvel brach.
Verse: 20    âvoi, wie man den komen sach!

Verse: 21    Gâwân sich hal des tougen,
Verse: 22    daz sîniu liehten ougen

Verse: 23    weinen muosten lernen.
Verse: 24    zeiner zisternen

Verse: 25    wâren si beidiu dô enwiht,
Verse: 26    wan si habeten swazzers niht.

Verse: 27    von der liebe was daz weinen,
Verse: 28    daz Artûs kunde erscheinen.

Verse: 29    von kinde hete er in erzogen:
Verse: 30    ir beider triuwe unerlogen




Chapter: 662 
662


Verse: 1    stuont gein ein ander âne wanc,
Verse: 2    daz si nie valsch underswanc.

Verse: 3    Arnîve wart des weinens innen.
Verse: 4    si sprach: "herre, ir sult beginnen

Verse: 5    vreude mit vreuden schalle:
Verse: 6    herre, daz trœstet uns alle.

Verse: 7    gein der riuwe sult ir sîn ze wer.
Verse: 8    hie kumt der herzoginne her:

Verse: 9    daz trœstet iuch vürbaz schiere."
Verse: 10    herberge, baniere

Verse: 11    sach Arnîve und Gâwân
Verse: 12    manege vüeren ûf den plân,

Verse: 13    bî den allen niht wan einen schilt,
Verse: 14    des wâpen wâren sus gezilt,

Verse: 15    daz in Arnîve erkande.
Verse: 16    îsâjesen si nande,

Verse: 17    den marschalc Utepandragûn:
Verse: 18    den vuorte ein ander Bertûn,

Verse: 19    mit den schœnen schenkeln Maurîn,
Verse: 20    der marschalc der künegîn.

Verse: 21    Arnîve wesse wênec des:
Verse: 22    Utepandragûn und îsâjes

Verse: 23    wâren beide erstorben,
Verse: 24    Maurîn hete erworben

Verse: 25    sîns vater ammet, daz was reht.
Verse: 26    gein dem urvar ûf dem anger sleht

Verse: 27    reit diu grôze mahinande.
Verse: 28    der vrouwen sarjande

Verse: 29    herberge nâmen,
Verse: 30    die vrouwen wol gezâmen,




Chapter: 663 
663


Verse: 1    bî einem klâren snellen bach,
Verse: 2    dâ man schiere ûf geslagen sach

Verse: 3    manec zelt wol getân.
Verse: 4    dem künege sunder dort hin dan

Verse: 5    wart manec wîter rinc genomen
Verse: 6    und rittern, die dâ wâren komen.

Verse: 7    die heten âne vrâge
Verse: 8    ûf ir reise grôze slâge.

Verse: 9    Gâwân bî Bênen hin abe enbôt
Verse: 10    sînem wirt Plipalinôt,

Verse: 11    kocken, ussiere,
Verse: 12    daz er die slüzze schiere,

Verse: 13    sô daz vor sîner übervart
Verse: 14    daz her des tages wære bewart.

Verse: 15    vrou Bêne ûz Gâwâns hende nam
Verse: 16    die êrsten gâbe ûz sînem rîchen krâm,

Verse: 17    swalwen, diu noch z Engellant
Verse: 18    zeiner tiuren harphen ist erkant.

Verse: 19    Bêne vuor mit vreuden dan.
Verse: 20    dô hiez mîn her Gâwân

Verse: 21    besliezen die ûzern porten:
Verse: 22    alde und junge hôrten,

Verse: 23    wes er si zühteclîchen bat.
Verse: 24    "dâ anderhalben an den stat

Verse: 25    sich leget ein alsô grôzez her,
Verse: 26    weder ûf dem lande noch in dem mer

Verse: 27    gesach ich rotte nie gevarn
Verse: 28    mit alsus krefteclîchen scharn.

Verse: 29    wellent si uns hie suochen mit ir kraft,
Verse: 30    helft mir, ich gibe in ritterschaft."




Chapter: 664 
664


Verse: 1    daz lobeten si al gelîche.
Verse: 2    die herzoginne rîche

Verse: 3    si vrâcten, ob daz her wære ir.
Verse: 4    diu sprach: "ir sult gelouben mir,

Verse: 5    ich erkenne dâ weder schilt noch man.
Verse: 6    der mir ê schaden hât getân,

Verse: 7    derst lîhte in mîn lant geriten
Verse: 8    und hât vor Lôgrois gestriten:

Verse: 9    ich wæne, die vant er doch ze wer.
Verse: 10    si heten strît wol disem her

Verse: 11    an zingeln und an barbigân.
Verse: 12    hât dâ ritterschaft getân

Verse: 13    der zornege künec Gramoflanz,
Verse: 14    sô suochte er gelt vür sînen kranz:

Verse: 15    oder swer si sint, die muosten sper
Verse: 16    ûf geriht sehen durch tjoste ger."

Verse: 17    ir munt in louc dâ wênec an.
Verse: 18    Artûs schaden vil gewan,

Verse: 19    ê daz er kœme vür Lôgrois.
Verse: 20    des wart etslîch Bertenois

Verse: 21    ze rehter tjost abe gevalt.
Verse: 22    Artûs her ouch wider galt

Verse: 23    market, den man in dâ bôt.
Verse: 24    si kômens ze beider sît in nôt.

Verse: 25    man sach die strîtmüeden komen,
Verse: 26    von den sô dicke ist vernomen,

Verse: 27    daz si ir kotzen gerne werten.
Verse: 28    si wâren gein strîte die herten:

Verse: 29    beidenthalpz mit schaden stêt.
Verse: 30    Gârel und Gaherjêt




Chapter: 665 
665


Verse: 1    und rois Meljanz de Barbigôl
Verse: 2    und Jofreit fîz Idôl,

Verse: 3    die sint hin ûf gevangen,
Verse: 4    ê der buhurt wære ergangen.

Verse: 5    ouch viengen si von Lôgrois
Verse: 6    duc Frîam de Vermendois

Verse: 7    und cuns Ritschart de Nâvers.
Verse: 8    der vertet niwan eines spers:

Verse: 9    gein swem ouch daz sîn hant gebôt,
Verse: 10    der viel vor im durch tjoste nôt.

Verse: 11    Artûs mit sîn selbes hant
Verse: 12    vienc den degen wert erkant.

Verse: 13    dâ wurden unverdrozzen
Verse: 14    die poinder sô geslozzen,

Verse: 15    des m/hte swenden sich der walt.
Verse: 16    manec tjoste ungezalt

Verse: 17    rêrten trunzûne.
Verse: 18    die werden Bertûne

Verse: 19    wâren ouch manlîch ze wer.
Verse: 20    gein der herzoginne her

Verse: 21    Artûs nâchhuote
Verse: 22    muoste strîtes sîn ze muote.

Verse: 23    man hardierte si den tac
Verse: 24    unz dar diu vluot des hers lac.

Verse: 25    ouch solde mîn her Gâwân
Verse: 26    der herzogîn gekündet hân,

Verse: 27    daz ein sîn helfære
Verse: 28    in ir lande wære:

Verse: 29    sô wære des strîtes niht geschehen.
Verse: 30    dô enwolde ers ir noch niemen jehen,




Chapter: 666 
666


Verse: 1    ê siz selbe sehen mohte.
Verse: 2    er warp, als ez im tohte,

Verse: 3    und schuof ouch sîne reise
Verse: 4    gein Artûse dem Berteneise

Verse: 5    mit tiuren gezelten.
Verse: 6    niemen dâ mohte engelten,

Verse: 7    ob er im was unerkant:
Verse: 8    des milten Gâwânes hant

Verse: 9    begunde in sô mit willen geben,
Verse: 10    als er niht langer wolde leben.

Verse: 11    sarjande, ritter, vrouwen
Verse: 12    muosten emphâhen und schouwen

Verse: 13    sîne gâbe sô grœzlîche,
Verse: 14    daz si sprâchen al gelîche,

Verse: 15    in wære diu wâre helfe komen.
Verse: 16    dô wart ouch vreude an in vernomen.

Verse: 17    dô hiez gewinnen der degen wert
Verse: 18    starke soumære, schœniu vrouwen phert

Verse: 19    und harnas al der ritterschaft.
Verse: 20    sarjande zîser grôze kraft

Verse: 21    aldâ bereite wâren.
Verse: 22    dô kunde er sus gebâren:

Verse: 23    dô nam mîn her Gâwân
Verse: 24    vier werde ritter sunder dan,

Verse: 25    daz einer kamerære
Verse: 26    und der ander schenke wære

Verse: 27    und der dritte truhsæze
Verse: 28    und daz der vierde niht vergæze,

Verse: 29    er enwære marschalc. sus warp er:
Verse: 30    dise viere leisten sîne ger.




Chapter: 667 
667


Verse: 1    nû lât Artûsen stille ligen.
Verse: 2    Gâwâns grüezen wart verswigen

Verse: 3    in den tac: unsanfte erz meit.
Verse: 4    des morgens vruo mit krache reit

Verse: 5    gein Jôflanze Artûses her.
Verse: 6    sîn nâchhuote schuof er ze wer:

Verse: 7    dô die niht strîtes vunden dâ,
Verse: 8    si kêrten nâch im ûf die slâ.

Verse: 9    dô nam mîn her Gâwân
Verse: 10    sîn ammetliute sunder dan.

Verse: 11    niht langer er wolde bîten,
Verse: 12    er hiez den marschalc rîten

Verse: 13    ze Jôflanze ûf den plân.
Verse: 14    "sunderleger wil ich hân.

Verse: 15    dû sihs daz grôze her wol ligen:
Verse: 16    ez ist et nû alsô gedigen,

Verse: 17    ir herren muoz ich iu nennen,
Verse: 18    daz ir den müget erkennen.

Verse: 19    ez ist mîn œheim Artûs,
Verse: 20    in des hove und in des hûs

Verse: 21    ich von kinde bin erzogen.
Verse: 22    nû schaffet mir vür unbetrogen

Verse: 23    mîn reise alsô mit koste dar,
Verse: 24    daz mans vür rîcheit neme war,

Verse: 25    und lât hie ûfe unvernomen,
Verse: 26    daz Artûs her durch mich si komen."

Verse: 27    si leisten, swaz er in gebôt,
Verse: 28    des wart Plipalinôt

Verse: 29    dar nâch unmüezec schiere.
Verse: 30    kocken, ussiere,




Chapter: 668 
668


Verse: 1    Seytiez und snecken,
Verse: 2    mit rotte der quecken

Verse: 3    beidiu zorse und ouch ze vuoz
Verse: 4    mit dem marschalc über muoz,

Verse: 5    sarjande, garzûne.
Verse: 6    hin nâch dem Bertûne

Verse: 7    si kêrten her unde dâ
Verse: 8    mit Gâwâns marschalc ûf die slâ.

Verse: 9    si vuorten ouch, des sît gewis,
Verse: 10    ein gezelt, daz îblis

Verse: 11    Klinschore durch minne sande,
Verse: 12    dâ von man êrste erkande

Verse: 13    ir zweier tougen über lût:
Verse: 14    si wâren beide ein ander trût.

Verse: 15    dem gezelt was koste niht vermiten:
Verse: 16    mit schære nie bezzerz wart gesniten

Verse: 17    wan einz, daz Isenhartes was.
Verse: 18    bî Artûs sunder ûf ein gras

Verse: 19    wart daz gezelt ûf geslagen.
Verse: 20    manec zelt, hôrte ich sagen,

Verse: 21    sluoc man dar um an wîten rinc.
Verse: 22    daz dûhten rîlîchiu dinc.

Verse: 23    vor Artûse wart vernomen,
Verse: 24    Gâwâns marschalc wære komen,

Verse: 25    der herbergete ûf den plân,
Verse: 26    und daz der werde Gâwân

Verse: 27    solde ouch komen bî dem tage.
Verse: 28    daz wart ein gemeiniu sage

Verse: 29    von al der massenîe.
Verse: 30    Gâwân der valsches vrîe




Chapter: 669 
669


Verse: 1    von hûs sich rottierte.
Verse: 2    sîne reise er alsus zierte,

Verse: 3    dâ von m/hte ich iu wunder sagen.
Verse: 4    manec soumære muoste tragen

Verse: 5    kappeln und kamergewant.
Verse: 6    manec soum mit harnase erkant

Verse: 7    giengen ouch dar unden,
Verse: 8    helm oben drûf gebunden

Verse: 9    bî manegem schilte wol getân.
Verse: 10    manec schœne kastelân

Verse: 11    man bî den soumen ziehen sach.
Verse: 12    ritter und vrouwen hinden nâch

Verse: 13    riten an ein ander vaste.
Verse: 14    daz gezoc wol eine raste

Verse: 15    an der lenge was gemezzen.
Verse: 16    dô enwart dâ niht vergezzen,

Verse: 17    Gâwân einen ritter wol gevar
Verse: 18    immer schuof zeiner vrouwen klâr.

Verse: 19    daz wâren kranke sinne,
Verse: 20    ob die sprâchen iht von minne.

Verse: 21    der turkoite Flôrant
Verse: 22    zeinem gesellen wart erkant

Verse: 23    Sangîven von Norwæge.
Verse: 24    Lischois der gar untræge

Verse: 25    reit bî der süezen Kundrîê.
Verse: 26    sîn swester Itonjê

Verse: 27    bî Gâwân solde rîten.
Verse: 28    an den selben zîten

Verse: 29    Arnîve und diu herzogîn
Verse: 30    ouch gesellen wolden sîn.




Chapter: 670 
670


Verse: 1    nû, diz was et alsus komen:
Verse: 2    Gâwâns rinc was genomen

Verse: 3    durch Artûs her, aldâ der lac.
Verse: 4    waz man schouwens dâ gephlac,

Verse: 5    ê diz volc durch si gerite!
Verse: 6    Gâwân durch hovelîchen site

Verse: 7    und ouch durch werdeclîchiu dinc
Verse: 8    hiez an Artûses rinc

Verse: 9    die êrsten vrouwen halden.
Verse: 10    sîn marschalc muoste walden,

Verse: 11    daz einiu nâhe zuo der reit.
Verse: 12    der andern deheiniu dâ vermeit,

Verse: 13    si enhabeten sus alumme,
Verse: 14    hie diu wîse und dort diu tumme,

Verse: 15    bî ieslîcher ein ritter, der ir phlac
Verse: 16    und der sich dienstes dar bewac.

Verse: 17    Artûs rinc den wîten
Verse: 18    man sach an allen sîten

Verse: 19    mit vrouwen ummevangen.
Verse: 20    dô wart alrêst emphangen

Verse: 21    Gâwân der sælden rîche,
Verse: 22    ich wæne des, minneclîche.

Verse: 23    Arnîve, ir toher und ir kint
Verse: 24    mit Gâwâne erbeizet sint,

Verse: 25    von Lôgrois diu herzogîn
Verse: 26    und der herzoge von Gôwerzîn

Verse: 27    und der turkoite Flôrant.
Verse: 28    gein disen liuten wert erkant

Verse: 29    Artûs ûz dem gezelte gienc,
Verse: 30    der si dâ vriuntlîche emphienc.




Chapter: 671 
671


Verse: 1    als tet diu künegîn, sîn wîp:
Verse: 2    diu emphienc Gâwânes lîp

Verse: 3    und ander sîne geselleschaft
Verse: 4    mit getriulîcher liebe kraft.

Verse: 5    dâ wart manec kus getân
Verse: 6    von maneger vrouwen wol getân.

Verse: 7    Artûs sprach zem neven sîn:
Verse: 8    "wer sint die gesellen dîn?"

Verse: 9    Gâwân sprach: "mîne vrouwen
Verse: 10    sol ich si küssen schouwen.

Verse: 11    daz wære unsanfte bewart:
Verse: 12    si sint wol beide von der art."

Verse: 13    der turkoite Flôrant
Verse: 14    wart dâ geküsset al zehant

Verse: 15    und der herzoge von Gôwerzîn
Verse: 16    von Ginovêren der künegîn.

Verse: 17    si giengen wider inz gezelt.
Verse: 18    manegen dûhte, daz daz wîte velt

Verse: 19    vollez vrouwen wære.
Verse: 20    dô warp niht sô der swære

Verse: 21    Artûs, spranc ûf ein kastelân,
Verse: 22    al dise vrouwen wol getân

Verse: 23    und al die ritter beneben in,
Verse: 24    er reit den rinc alumme hin.

Verse: 25    mit zühten Artûses munt
Verse: 26    si emphienc an der selben stunt.

Verse: 27    daz was Gâwâns wille,
Verse: 28    daz si alle habeten stille,

Verse: 29    unz daz er mit in dannen rite:
Verse: 30    daz was ein h/veschlîcher site.




Chapter: 672 
672


Verse: 1    Artûs erbeizte und gienc dar în.
Verse: 2    er saz zuo dem neven sîn:

Verse: 3    den bestuont er sus mit mæren,
Verse: 4    wer die vünf vrouwen wæren.

Verse: 5    dô huop mîn her Gâwân
Verse: 6    an der eldesten zem êrsten an.

Verse: 7    sus sprach er zuo dem Bertûn:
Verse: 8    "erkandet ir Utepandragûn,

Verse: 9    sôst diz Arnîve, sîn wîp:
Verse: 10    von den zwein kom iuwer lîp.

Verse: 11    sô ist diz diu muoter mîn,
Verse: 12    von Norwæge diu künegîn.

Verse: 13    dise zwuo mîn swester sint.
Verse: 14    nû seht, wie vlætegiu kint!"

Verse: 15    ein ander küssen dâ geschach.
Verse: 16    vreude unde jâmer sach

Verse: 17    al, die daz sehen wolden:
Verse: 18    von der liebe si daz dolden.

Verse: 19    beidiu lachen und weinen
Verse: 20    kunde ir munt vil wol bescheinen:

Verse: 21    von grôzer liebe daz geschach.
Verse: 22    Artûs ze Gâwâne sprach:

Verse: 23    "neve, ich bin des mæres noch vrî,
Verse: 24    wer diu klâre vünfte vrouwe sî."

Verse: 25    dô sprach Gâwân der kurtois:
Verse: 26    "ez ist diu herzogîn von Lôgrois.

Verse: 27    in der genâden bin ich hie.
Verse: 28    mirst gesaget, ir habet gesuochet sie:

Verse: 29    swaz ir des habet genozzen,
Verse: 30    daz zeiget unverdrozzen.




Chapter: 673 
673


Verse: 1    ir m/htet zeiner witewen wol tuon."
Verse: 2    Artûs sprach: "dîner muomen sun

Verse: 3    Gaherjêten si dort hât
Verse: 4    und Gârelen, der ritters tât

Verse: 5    in manegem poinder worhte.
Verse: 6    mir wart der unervorhte

Verse: 7    an mîner sîten genomen.
Verse: 8    ein unser poinder was sô komen

Verse: 9    mit hurte unz an ir barbigân.
Verse: 10    hurtâ, wiez dâ wart getân

Verse: 11    von dem werden Meljanz von Lîz!
Verse: 12    under eine baniere wîz

Verse: 13    ist er hin ûf gevangen.
Verse: 14    diu banier hât emphangen

Verse: 15    vor zobele ein swarze strâle
Verse: 16    mit herzen bluotes mâle

Verse: 17    nâch mannes kummer gevar:
Verse: 18    Lirivoin rief al diu schar,

Verse: 19    die under der durch strîten riten.
Verse: 20    die hânt den prîs hin ûf erstriten.

Verse: 21    mirst ouch mîn neve Jofreit
Verse: 22    hin ûf gevangen, daz ist mir leit.

Verse: 23    diu nâchuote was gestern mîn:
Verse: 24    dâ von gedêch mir dirre pîn."

Verse: 25    der künec sîns schaden vil verjach.
Verse: 26    diu herzogîn mit zühten sprach:

Verse: 27    "herre, ich sage iuch slasters buoz.
Verse: 28    ir enhetet mîn deheinen gruoz:

Verse: 29    ir muget mir schaden hân getân,
Verse: 30    den ich doch ungedienet hân,




Chapter: 674 
674


Verse: 1    sît ir mich gesuochet hât.
Verse: 2    nû lêre iuch got ergetzens rât.

Verse: 3    in des helfe ir sît geriten,
Verse: 4    ob der hât mit mir gestriten,

Verse: 5    dâ wart ich âne wer bekant
Verse: 6    und zer blôzen sîten an gerant.

Verse: 7    ob der noch strîtes gein mir gert,
Verse: 8    der wirt wol gendet âne swert."

Verse: 9    z Artuse sprach dô Gâwân:
Verse: 10    "waz râtet irs, ob wir disen plân

Verse: 11    baz mit rittern überlegen,
Verse: 12    sît wirz wol getuon megen?

Verse: 13    ich erwirbe wol an der herzogîn,
Verse: 14    daz die iuwern ledec suln sîn

Verse: 15    und daz ir ritterschaft dâ her
Verse: 16    kumt mit manegem niuwen sper."

Verse: 17    "des volge ich" sprach Artûs.
Verse: 18    diu herzogîn dô hin ze hûs

Verse: 19    sande nâch den werden.
Verse: 20    ich wæne, ûf der erden

Verse: 21    ie schœner samenunge wart.
Verse: 22    gein herbergen sîner vart

Verse: 23    Gâwân urloubes gerte,
Verse: 24    des in der künec gewerte.

Verse: 25    die man mit im komen sach
Verse: 26    vuoren dan mit im an ir gemach.

Verse: 27    sîn herberge rîche
Verse: 28    stuont sô ritterlîche,

Verse: 29    daz si was kostebære
Verse: 30    und der armüete lære




Chapter: 675 
675


Verse: 1    in sîne herberge reit
Verse: 2    maneger, dem von herzen leit

Verse: 3    was sîn langez ûz wesen.
Verse: 4    nû was ouch Keie genesen

Verse: 5    bî dem Plimizôl der tjoste.
Verse: 6    der pruovte Gâwâns koste,

Verse: 7    er sprach: "mîns herren swâger Lôt,
Verse: 8    von dem was uns dehein nôt

Verse: 9    ebenhiuze noch sunderringes."
Verse: 10    dô dâhte er noch des dinges,

Verse: 11    wande in Gâwân dort niht rach,
Verse: 12    dâ im sîn zeswer arm zebrach.

Verse: 13    "got mit den liuten wunder tuot.
Verse: 14    wer gap Gâwân die vrouwen luot?"

Verse: 15    sus sprach Keie in sînem schimph.
Verse: 16    daz was gein vriunde ein swach gelimph:

Verse: 17    der getriuwe ist vriundes êren vrô,
Verse: 18    der ungetriuwe wâfenô

Verse: 19    rüefet, swenne ein liep geschiht
Verse: 20    sînem vriunde und er daz siht.

Verse: 21    Gâwân phlac sælde und êre:
Verse: 22    gert iemen vürbaz mêre,

Verse: 23    war wil der mit gedanken?
Verse: 24    sô sint die muotes kranken

Verse: 25    gîtes unde hazzes vol.
Verse: 26    sô tuot dem ellenthaften wol,

Verse: 27    swâ sînes vriundes prîs gestêt,
Verse: 28    daz schande vlühtec von im gêt.

Verse: 29    Gâwân âne valschen haz
Verse: 30    manlîcher triuwen nie vergaz:




Chapter: 676 
676


Verse: 1    kein unbilde dran geschach,
Verse: 2    swâ man in bî sælden sach.

Verse: 3    wie der von Norwæge
Verse: 4    sînes volkes phlæge,

Verse: 5    der ritter und der vrouwen?
Verse: 6    dâ mohten rîcheit schouwen

Verse: 7    Artûs und sîn gesinde
Verse: 8    von des werden Lôtes kinde.

Verse: 9    si suln ouch slâfen, dô man gaz:
Verse: 10    ir ruowens hân ich selten haz.

Verse: 11    smorgens kom vor tage geriten
Verse: 12    volc mit werlîchen siten,

Verse: 13    der herzoginne ritter gar.
Verse: 14    man nam ir zimierde war

Verse: 15    al bî des mânen schîne.
Verse: 16    dâ Artûs und die sîne

Verse: 17    lâgen, durch die zogeten sie
Verse: 18    unz anderhalp, dâ Gâwân hie

Verse: 19    lac mit wîtem ringe.
Verse: 20    swer solhe helfe ertwinge

Verse: 21    mit sîner ellenthaften hant,
Verse: 22    den mac man hân vür prîs erkant.

Verse: 23    Gâwân sînen marschalc bat
Verse: 24    in zeigen herberge stat.

Verse: 25    als der herzoginne marschalc riet,
Verse: 26    von Lôgrois diu werde diet

Verse: 27    manegen rinc wol sunder zierten.
Verse: 28    ê si geloschierten,

Verse: 29    ez was wol mitter morgen.
Verse: 30    hie næht ez niuwen sorgen.




Chapter: 677 
677


Verse: 1    Artûs der prîses erkande
Verse: 2    sîne boten sande

Verse: 3    ze Rosche Sabînes in die stat:
Verse: 4    den künec Gramoflanz er bat,

Verse: 5    "sît daz unwendec nû sol sîn,
Verse: 6    daz er gein dem neven mîn

Verse: 7    sînen kamph niht wil verbern,
Verse: 8    des sol in mîn neve wern.

Verse: 9    bitet in gein uns schiere komen,
Verse: 10    sît sîn gewalt ist sus vernomen,

Verse: 11    daz erz niht vermîden wil.
Verse: 12    es wære einem andern man ze vil."

Verse: 13    Artûses boten vuoren dan.
Verse: 14    dô nam mîn her Gâwân

Verse: 15    Lischoisen und Flôranden:
Verse: 16    die von manegen landen,

Verse: 17    minnen soldiere,
Verse: 18    bat er im zeigen schiere,

Verse: 19    die der herzogîn ûf hôhen solt
Verse: 20    wâren sô dienestlîchen holt.

Verse: 21    er reit zuo zin und emphienc si sô,
Verse: 22    daz si al gelîche sprâchen dô,

Verse: 23    daz der werde Gâwân
Verse: 24    wære ein manlîch h/vesch man.

Verse: 25    dâ mite kêrte er von in wider.
Verse: 26    sus warp er tougenlîche sider:

Verse: 27    in sîne kamern er gienc,
Verse: 28    mit harnase er übervienc

Verse: 29    den lîp zen selben stunden
Verse: 30    durch daz, ob sîne wunden




Chapter: 678 
678


Verse: 1    sô geheilet wæren,
Verse: 2    daz die mâsen in niht swæren.

Verse: 3    er wolde baneken den lîp,
Verse: 4    sît sô manec man und wîp

Verse: 5    sînen kamph solden sehen,
Verse: 6    dâ die wîsen ritter möhten spehen,

Verse: 7    ob sîn unverzagetiu hant
Verse: 8    des tages gein prîse würde erkant.

Verse: 9    einen knappen hete er des gebeten,
Verse: 10    daz er im bræhte Gringuljeten:

Verse: 11    daz begunde er leischieren.
Verse: 12    er wolde sich môvieren,

Verse: 13    daz er undz ors wæren bereit.
Verse: 14    mir wart sîn reise nie sô leit:

Verse: 15    al ein reit mîn her Gâwân
Verse: 16    von dem her verre ûf den plân.

Verse: 17    gelücke müezes walden!
Verse: 18    er sach einen ritter halden

Verse: 19    bî dem wazzer Sabîns.
Verse: 20    den wir wol möhten heizen vlins

Verse: 21    der manlîchen krefte,
Verse: 22    er schûr der ritterschefte,

Verse: 23    sîn herze valsch nie underswanc.
Verse: 24    er was des lîbes wol sô kranc

Verse: 25    swaz man heizet unprîs
Verse: 26    daz entruoc er nie deheinen wîs

Verse: 27    halbes vingers lanc noch spanne.
Verse: 28    von dem selben werden manne

Verse: 29    muget ir wol ê hân vernomen:
Verse: 30    an den rehten stam diz mære ist komen.




Chapter: 679 
679


Verse: 1    Ob von dem werden Gâwân
Verse: 2    werlîche ein tjost dâ wirt getân,

Verse: 3    sô engevorhte ich sîner êre
Verse: 4    an prîse nie sô sêre.

Verse: 5    ich solde ouch sandern angest hân.
Verse: 6    daz wil ich ûz den sorgen lân:

Verse: 7    der was in strîte eins mannes her.
Verse: 8    ûz heidenschaft verre über mer

Verse: 9    was brâht diu zimierde sîn.
Verse: 10    noch rœter denne ein rubîn

Verse: 11    was sîn kursît und sîn orses kleit.
Verse: 12    der helt nâch âventiuren reit:

Verse: 13    sîn schilt was gar durchstochen.
Verse: 14    er hête ouch gebrochen

Verse: 15    von dem boume, des Gramoflanz
Verse: 16    huote, einen sô liehten kranz,

Verse: 17    daz Gâwânz rîs erkande.
Verse: 18    dô vorhte er die schande,

Verse: 19    ob sîn der künec dâ hete erbiten:
Verse: 20    wære der durch strît gein im geriten,

Verse: 21    sô müeste ouch strîten dâ geschehen,
Verse: 22    und soldez nimmer vrouwe ersehen.

Verse: 23    von Munsalvæsche wâren sie,
Verse: 24    beidiu ors, diu alsus hie

Verse: 25    liezen nâher strîchen:
Verse: 26    ûf den poinder hurteclîchen

Verse: 27    mit sporn si wurden des ermant.
Verse: 28    al grüene klê, niht stoubec sant

Verse: 29    stuont touwec, dâ diu tjost geschach.
Verse: 30    mich müet ir beider ungemach.




Chapter: 680 
680


Verse: 1    si tâten ir poinder rehte:
Verse: 2    ûz der tjoste geslehte

Verse: 3    wâren si beide samt erborn.
Verse: 4    wênec gewunnen, vil verlorn

Verse: 5    hât, swer behaldet dâ den prîs:
Verse: 6    der klagetz doch immer, ist er wîs.

Verse: 7    gein ein ander stuont ir triuwe,
Verse: 8    der enweder alt noch niuwe

Verse: 9    dürkel scharten nie emphienc.
Verse: 10    nû hœret, wie diu tjost ergienc:

Verse: 11    hurteclîche und doch alsô,
Verse: 12    si möhtens beide sîn unvrô.

Verse: 13    erkandiu sippe und hôch geselleschaft
Verse: 14    was dâ mit herzenlîcher kraft

Verse: 15    durch scharphen strît zein ander komen.
Verse: 16    von swem der prîs dâ wirt genomen,

Verse: 17    des vreude ist dar um sorgen phant.
Verse: 18    die tjoste brâhte iewederiu hant,

Verse: 19    daz die mâge und die gesellen
Verse: 20    ein ander muosten vellen

Verse: 21    mit orse mit alle nider.
Verse: 22    alsus wurben si dô sider:

Verse: 23    ez wart aldâ verzwicket,
Verse: 24    mit swerten verbicket.

Verse: 25    schiltes schirben und daz grüene gras
Verse: 26    ein gelîchiu temperîe was,

Verse: 27    sît si begunden strîten.
Verse: 28    si muosten scheidens bîten

Verse: 29    alze lange: si begunden vruo.
Verse: 30    dâ engreif et niemen scheidens zuo:




Chapter: 681 
681


Verse: 1    dâ enwas dennoch niemen wan sie.
Verse: 2    welt ir nû hœren vürbaz, wie

Verse: 3    an den selben stunden
Verse: 4    Artûses boten vunden

Verse: 5    den künec Gramoflanz mit her?
Verse: 6    ûf einem plân bî dem mer

Verse: 7    einhalp vlôz der Sabîns
Verse: 8    und anderhalp der Poinzaklîns:

Verse: 9    diu zwei wazzer sêweten dâ.
Verse: 10    der plân was vester anderswâ:

Verse: 11    Rosche Sabînes dort
Verse: 12    diu houbetstat den vierden ort

Verse: 13    begreif mit mûren und ouch mit graben
Verse: 14    und mit manegem turne hôhe erhaben.

Verse: 15    des hers loschieren was getân
Verse: 16    wol mîlen lanc ûf den plân

Verse: 17    und ouch wol halber mîle breit.
Verse: 18    Artûs boten widerreit

Verse: 19    manec ritter in gar unbekant,
Verse: 20    turkopel, manec sarjant

Verse: 21    zîser und mit lanzen.
Verse: 22    dar nâch begunde swanzen

Verse: 23    under maneger baniere
Verse: 24    manec grôziu rotte schiere.

Verse: 25    von pusînen was dâ krach.
Verse: 26    daz her man gar sich regen sach:

Verse: 27    si wolden an den zîten
Verse: 28    gein Jôflanze rîten.

Verse: 29    von vrouwen zoumen klingâ klinc!
Verse: 30    des künec Gramoflanzes rinc




Chapter: 682 
682


Verse: 1    was mit vrouwen ummehalden.
Verse: 2    kan ich nû mære walden,

Verse: 3    ich sage iu, wer durch in dâ was
Verse: 4    geherberget ûf daz gras

Verse: 5    an sîne samenunge komen.
Verse: 6    habet ir des ê niht vernomen,

Verse: 7    sô lât michz iu machen kunt.
Verse: 8    ûz der wazzervesten stat von Punt

Verse: 9    brâhte im der werde œheim sîn,
Verse: 10    der künec Brandelidelîn,

Verse: 11    sehs hundert klâre vrouwen.
Verse: 12    ieslîchiu mohte schouwen

Verse: 13    gewâpent dâ ir âmîs
Verse: 14    durch ritterschaft und durch prîs.

Verse: 15    die werden Punturteise
Verse: 16    wâren wol an dirre reise.

Verse: 17    dâ was, welt ir gelouben mirs,
Verse: 18    der klâre Bernout de Riviers:

Verse: 19    des rîcher vater Nârant
Verse: 20    hete im lâzen Ukerlant,

Verse: 21    der brâhte in kocken ûf dem mer
Verse: 22    ein alsô klârez vrouwen her,

Verse: 23    den man dâ liehter varwe jach
Verse: 24    und anders niht dâ von in sprach:

Verse: 25    der wâren zwei hundert
Verse: 26    ze megeden besundert,

Verse: 27    zwei hundert heten dâ ir man.
Verse: 28    ob ichz geprüevet rehte hân,

Verse: 29    Bernout fîz cuns Nârant,
Verse: 30    vünf hundert ritter wert erkant




Chapter: 683 
683


Verse: 1    mit im dâ komen wâren,
Verse: 2    die vînde kunden vâren.

Verse: 3    sus wolde der künec Gramoflanz
Verse: 4    mit kamphe rechen sînen kranz,

Verse: 5    daz ez vil liute sæhe,
Verse: 6    wem man dâ prîses jæhe.

Verse: 7    die vürsten ûz sînem rîche
Verse: 8    mit rittern werlîche

Verse: 9    wâren dâ und ouch mit vrouwen schar.
Verse: 10    man sach dâ liute wol gevar.

Verse: 11    Artûses boten kômen hie.
Verse: 12    die vunden den künec, nû hœret wie:

Verse: 13    palmâtes dicke ein matraz
Verse: 14    lac under den künege, aldâ er saz,

Verse: 15    dar ûf gesteppet ein phelle breit.
Verse: 16    juncvrouwen klâr und ouch gemeit

Verse: 17    schuohten îserîne kolzen
Verse: 18    an den künec stolzen.

Verse: 19    ein phelle, gap kostlîchen prîs,
Verse: 20    geworht in Ezidêmonîs,

Verse: 21    beidiu breit unde lanc,
Verse: 22    hôhe ob im durch schate swanc,

Verse: 23    an zwelf schefte genomen.
Verse: 24    Artûs boten wâren komen.

Verse: 25    gein dem, der hôchverte hort
Verse: 26    truoc, si sprâchen disiu wort:

Verse: 27    "herre. uns hât dâ her gesant
Verse: 28    Artûs, der dâ vür erkant

Verse: 29    was, daz er prîs etswenne truoc.
Verse: 30    er hete ouch werdekeit genuoc:




Chapter: 684 
684


Verse: 1    die welt ir im verkrenken.
Verse: 2    wie meget ir des erdenken,

Verse: 3    daz ir gein sîner swester sun
Verse: 4    solh ungenâde wellet tuon?

Verse: 5    hete iu der werde Gâwân
Verse: 6    grœzer herzeleit getân,

Verse: 7    er möhte der tavelrunder
Verse: 8    doch geniezen sunder,

Verse: 9    wande in geselleschefte wernt
Verse: 10    alle, die dar über phlihte gernt."

Verse: 11    der künec sprach: "den gelobeten strît
Verse: 12    mîn unverzagetiu hant sô gît,

Verse: 13    daz ich Gâwânen bî disem tage
Verse: 14    gein prîse oder in laster jage.

Verse: 15    ich hân mit wârheit vernomen,
Verse: 16    Artûs sî mit storje komen

Verse: 17    und des wîp, diu künegîn.
Verse: 18    diu sol willekomen sîn.

Verse: 19    ob diu arge herzoginne
Verse: 20    im gein mir ræt unminne,

Verse: 21    ir kint, daz sult ir understên.
Verse: 22    dâ enmac niht anders an ergên,

Verse: 23    wan daz ich den kanph leisten wil.
Verse: 24    ich hân ritter wol sô vil,

Verse: 25    daz ich gewalt entsitze niht.
Verse: 26    swaz mir von einer hant geschiht,

Verse: 27    die nôt wil ich lîden.
Verse: 28    solde ich nû vermiden,

Verse: 29    des ich mich vermezzen hân,
Verse: 30    sô wolde ich dienst nâch minnen lân.




Chapter: 685 
685


Verse: 1    in der genâde ich hân ergeben
Verse: 2    al mîn vreude und ouch mîn leben,

Verse: 3    got weiz wol, daz er ir genôz,
Verse: 4    wande mich des ie verdrôz,

Verse: 5    strîtes wider einen man,
Verse: 6    wan daz der werde Gâwân

Verse: 7    den lîp hât geurbort sô,
Verse: 8    kamphes bin ich gein im vrô.

Verse: 9    sus nidert sich mîn manheit.
Verse: 10    sô swachen strît ich nie gestreit:

Verse: 11    ich hân gestriten, giht man mir
Verse: 12    (ob ir gebietet, des vrâget ir),

Verse: 13    gein liuten, die des mîner hant
Verse: 14    jâhen, si wære vür prîs erkant.

Verse: 15    ich enbestuont nie einen lîp.
Verse: 16    ez ensuln ouch loben niht diu wîp,

Verse: 17    ob ich den sic hiute erhol.
Verse: 18    mir tuot in dem herzen wol,

Verse: 19    mirst gesaget, si sî ûz banden lân,
Verse: 20    durch die der kamph nû wirt getân.

Verse: 21    Artûs der erkande verre,
Verse: 22    sô manec vremdiu terre

Verse: 23    ze sînem gebote ist vernomen:
Verse: 24    sist lîhte her mit im komen,

Verse: 25    durch die ich vreude unde nôt
Verse: 26    in ir gebot unz an den tôt

Verse: 27    sol dienestlîchen bringen.
Verse: 28    wâ möhte mir baz gelingen,

Verse: 29    ob mir diu sælde sol geschehen,
Verse: 30    daz si mîn dienest ruochet sehen?"




Chapter: 686 
686


Verse: 1    Bêne under sküneges armen saz.
Verse: 2    diu liez den kamph gar âne haz:

Verse: 3    si hete des küneges manheit
Verse: 4    sô vil gesehen, dâ der streit,

Verse: 5    daz siz wolde ûz den sorgen lân.
Verse: 6    wesse aber si, daz Gâwân

Verse: 7    ir vrouwen bruoder wære
Verse: 8    und daz disiu strengen mære

Verse: 9    ûf ir herren wæren gezogen,
Verse: 10    si wære an vreuden dâ betrogen.

Verse: 11    si brâhte dem künege ein vingerlîn,
Verse: 12    daz Itonjê diu junge künegîn

Verse: 13    hete durch minne im gesant,
Verse: 14    daz ir bruoder wert erkant

Verse: 15    holte über den Sabîns.
Verse: 16    Bêne ûf dem Poinzaklîns

Verse: 17    kom in einem seitiez.
Verse: 18    disiu mære si niht liez:

Verse: 19    "von Schastel Marveile gevarn
Verse: 20    ist mîn vrouwe mit vrouwen scharn."

Verse: 21    si mante in triuwe und êre
Verse: 22    von ir vrouwen mêre,

Verse: 23    denne ie kint manne enbôt,
Verse: 24    und daz er dæhte an ir nôt,

Verse: 25    sît si vür alle gewinne
Verse: 26    dienst büte nâch sîner minne.

Verse: 27    daz machte den kuͤnec hôchgemnuot.
Verse: 28    unreht er doch Gâwâne tuot:

Verse: 29    solde ich engelten sus der swester mîn,
Verse: 30    ich wolde ê âne swester sîn.




Chapter: 687 
687


Verse: 1    man truoc im zimierde dar
Verse: 2    von tiurer koste alsô gevar,

Verse: 3    swen diu minne ie des betwanc,
Verse: 4    daz er nâch wîbe lône ranc,

Verse: 5    ez wære Gahmuret oder Gâlôes
Verse: 6    oder der künec Kilikrates,

Verse: 7    der deheiner dorfte sînen lîp
Verse: 8    nie baz gezieren durch diu wîp.

Verse: 9    von Ipopotitikôn
Verse: 10    oder ûz der wîten Akratôn

Verse: 11    oder von Kalomidente
Verse: 12    oder von Agatirsjente

Verse: 13    wart nie bezzer phelle brâht,
Verse: 14    denne dâ zer zimierde wart erdâht.

Verse: 15    dô kuste er daz vingerlîn,
Verse: 16    daz Itonjê diu junge künegîn

Verse: 17    im durch minne sande.
Verse: 18    ir triuwe er sô bekande,

Verse: 19    swâ im kummers wære bevilt,
Verse: 20    dâ was ir minne vür ein schilt.

Verse: 21    der künec was gewâpent nuo.
Verse: 22    zwelf juncvrouwen griffen zuo

Verse: 23    ûf starken runzîden:
Verse: 24    si ensolden daz niht mîden,

Verse: 25    diu klâre geselleschaft,
Verse: 26    ieslîchiu hete an einen schaft

Verse: 27    den tiuren phelle genomen,
Verse: 28    dar unde der künec wolde komen.

Verse: 29    den vuorten si durch schate dan
Verse: 30    ob dem strîtgernden man.




Chapter: 688 
688


Verse: 1    niht ze kranc zwei vrouwelîn
Verse: 2    (diu truogen et dâ den besten schîn)

Verse: 3    under sküneges starken armen riten.
Verse: 4    dô enwart niht langer dâ gebiten,

Verse: 5    Artûs boten vuoren dan
Verse: 6    und kômen dar, dâ Gâwân

Verse: 7    ûf ir widerreise streit.
Verse: 8    dô wart den kinden nie sô leit:

Verse: 9    si schrîten lûte um sîne nôt,
Verse: 10    wande in ir triuwe daz gebôt.

Verse: 11    ez was vil nâch alsô komen,
Verse: 12    daz den sic hete aldâ genomen

Verse: 13    Gâwânes kamphgenôz.
Verse: 14    des kraft was über in sô grôz,

Verse: 15    daz Gâwân der werde degen
Verse: 16    des siges hete nâch verphlegen.

Verse: 17    wan daz in klagende nanden
Verse: 18    kint, diu in bekanden,

Verse: 19    der ê des was sîn strîtes wer,
Verse: 20    verbar dô gein im strîtes ger.

Verse: 21    verre ûz der hant er warf daz swert:
Verse: 22    "unsælec und unwert

Verse: 23    bin ich" sprach der weinde gast.
Verse: 24    "aller sælden mir gebrast.

Verse: 25    daz mîner gunêrten hant
Verse: 26    dirre strît ie wart bekant,

Verse: 27    des was mit unvuoge ir ze vil.
Verse: 28    schuldec ich mich geben wil:

Verse: 29    hie trat mîn ungelücke vür
Verse: 30    und schiet mich von der sælden kür.




Chapter: 689 
689


Verse: 1    sus sint diu alden wâpen mîn
Verse: 2    ê dicke und aber worden schîn.

Verse: 3    daz ich gein dem werden Gâwân
Verse: 4    alhie mîn strîten hân getân!

Verse: 5    ich hân mich selben überstrîten
Verse: 6    und ungelückes hie erbiten.

Verse: 7    dô des strîtes wart begunnen,
Verse: 8    dô was mir sælde entrunnen."

Verse: 9    Gâwân die klage hôrte und sach,
Verse: 10    ze sînem kamphgenôze er sprach:

Verse: 11    "ouwî, herre, wer sît ir?
Verse: 12    ir sprecht genædeclîch gein mir.

Verse: 13    wan wære diu rede ê geschehen,
Verse: 14    die wîle ich krefte möhte jehen!

Verse: 15    sô enwære ich niht von prîse komen.
Verse: 16    ir habet den prîs alhie genomen:

Verse: 17    ich hete iuwer gerne künde,
Verse: 18    wâ ich her nâch vünde

Verse: 19    mînen prîs, ob ich den suochte.
Verse: 20    die wîle es mîn sælde ruochte,

Verse: 21    sô gestreit ich ie wol einer hant."
Verse: 22    "neve, ich tuon mich dir bekant

Verse: 23    dienstlîche nû und elliu mâl:
Verse: 24    ich binz dîn neve Parzivâl."

Verse: 25    Gâwân sprach: "dô was ez reht.
Verse: 26    hiest krummiu tumpheit worden sleht.

Verse: 27    hie hânt zwei herzen einvalt
Verse: 28    mit hazze erzeiget ir gewalt:

Verse: 29    dîn hant uns beide überstreit.
Verse: 30    nû lâ dirz durch uns beide sîn leit:




Chapter: 690 
690


Verse: 1    dû hâs dir selben ane gesiget,
Verse: 2    ob dîn herze triuwen phliget."

Verse: 3    dô disiu rede was getân,
Verse: 4    dô enmohte ouch mîn her Gâwân

Verse: 5    vor unkraft niht langer stên.
Verse: 6    er begunde al swindelde gên,

Verse: 7    wande imz houbet erschellet was:
Verse: 8    er strûcte nider an daz gras.

Verse: 9    Artûses juncherrelîn
Verse: 10    spranc einez underz houbet sîn:

Verse: 11    dô bant im daz süeze kint
Verse: 12    abe den helm und swanc den wint

Verse: 13    mit einem huote phæwîn wîz
Verse: 14    under diu ougen. dirre kindes vlîz

Verse: 15    lêrte Gâwânen niuwe kraft.
Verse: 16    ûz beiden hern geselleschaft

Verse: 17    mit rotte kom in hie und dort,
Verse: 18    ieweder her an sînen ort,

Verse: 19    dâ ir zil wâren gestôzen
Verse: 20    mit gespiegelten ronen grôzen.

Verse: 21    Gramoflanz die koste gap
Verse: 22    durch sîns kamphes urhap:

Verse: 23    der boume hundert wâren
Verse: 24    mit liehten blicken klâren.

Verse: 25    dâ ensolde niemen zwischen komen.
Verse: 26    si stuonden sus, hân ichz vernomen:

Verse: 27    vierzec poinder von ein ander,
Verse: 28    mit gerverweten blicken glander

Verse: 29    vünfzec iewedersît.
Verse: 30    dâ zwischen solde ergên der strît:




Chapter: 691 
691


Verse: 1    daz her solde ûzerhalben haben,
Verse: 2    als ez schiede mûre oder tiefe graben.

Verse: 3    des hete den hantvride getân
Verse: 4    Gramoflanz und Gâwân.

Verse: 5    gein dem ungelobeten strîte
Verse: 6    manec rotte kom bezîte

Verse: 7    ûz beiden hern, die sâhen,
Verse: 8    wem si dâ prîses jâhen.

Verse: 9    die nam ouch wunder, wer dâ strîte
Verse: 10    mit alsô strîteclîchem site

Verse: 11    oder wem des strîtes dâ wære gedâht.
Verse: 12    neweder her hete brâht

Verse: 13    sînen kemphen in den rinc:
Verse: 14    ez dûhten si wunderlîchiu dinc.

Verse: 15    dô dirre kamph was getân
Verse: 16    ûf dem bluomenvarwen plân,

Verse: 17    dô kom der künec Gramoflanz:
Verse: 18    der wolde ouch rechen sînen kranz.

Verse: 19    der vriesch wol, daz dâ was geschehen
Verse: 20    ein kamph, daz nie wart gesehen

Verse: 21    herter strît mit swerten.
Verse: 22    die des ein ander werten,

Verse: 23    si tâtenz âne schulde gar.
Verse: 24    Gramoflanz ûz sîner schar

Verse: 25    zuo den kamphmüeden reit,
Verse: 26    herzenlîche er klagete ir arbeit.

Verse: 27    Gâwân was ûf gesprungen:
Verse: 28    dem wâren die lide erswungen.

Verse: 29    hie stuonden dise zwêne.
Verse: 30    nû was ouch vrou Bêne




Chapter: 692 
692


Verse: 1    mit dem künege in den rinc geriten,
Verse: 2    aldâ der kamph was erliten.

Verse: 3    diu sach Gâwânen kreftelôs,
Verse: 4    den si vür al die werlt erkôs

Verse: 5    zir besten vreude krône.
Verse: 6    nâch herzen jâmers dône

Verse: 7    si schrîende von dem pherde spranc,
Verse: 8    mit armen si in vaste ummeswanc.

Verse: 9    si sprach: "vervluochet sî diu hant,
Verse: 10    diu disen kummer hât erkant

Verse: 11    gemacht an iuwerm lîbe klâr.
Verse: 12    bî allen mannen, daz ist wâr,

Verse: 13    iuwer varwe ein manlîch spiegel was."
Verse: 14    si sazte in nider an daz gras:

Verse: 15    ir weinens wênec wart verdaget.
Verse: 16    dô streich im diu süeze maget

Verse: 17    ab den ougen bluot und sweiz.
Verse: 18    in harnase was im heiz.

Verse: 19    der künec Gramoflanz dô sprach:
Verse: 20    "Gâwân, mirst leit dîn ungemach,

Verse: 21    ez enwære von mîner hant getân.
Verse: 22    wiltû morgen wider ûf den plân

Verse: 23    gein mir komen durch strîten,
Verse: 24    des wil ich gerne bîten.

Verse: 25    ich bestüende gerner nû ein wîp
Verse: 26    denne dînen kreftelôsen lîp:

Verse: 27    waz prîses möhte ich an dir bejagen,
Verse: 28    ich enhôrte dich baz gein kreften sagen?

Verse: 29    nû ruowe hînt, des wirt dir nôt,
Verse: 30    wiltû vür stên den künec Lôt."




Chapter: 693 
693


Verse: 1    dô truoc der starke Parzivâl
Verse: 2    ninder müede lit noch erblichen mâl.

Verse: 3    er hete an den stunden
Verse: 4    sînen helm abe gebunden,

Verse: 5    dâ in der werde künec sach.
Verse: 6    ze dem er zühteclîchen sprach:

Verse: 7    "herre, swaz mîn neve Gâwân
Verse: 8    gein iuwern hulden hât getân,

Verse: 9    des lât mich vür in wesen phant.
Verse: 10    ich trage noch werlîche hant:

Verse: 11    welt ir zürnen gein im kêren,
Verse: 12    daz sol ich iu mit swerten wern."

Verse: 13    der wirt ûz Rosche Sabîns
Verse: 14    sprach: "herre, er gît mir morgen zins:

Verse: 15    der stêt ze gelte vür mînen kranz,
Verse: 16    des sîn prîs wirt hôch und ganz

Verse: 17    oder daz er jaget mich an die stat,
Verse: 18    aldâ ich trite ûf lasters phat.

Verse: 19    ir muget wol anders sîn ein helt:
Verse: 20    dirre kamph ist iu doch niht erwelt."

Verse: 21    dô sprach Bênen süezer munt
Verse: 22    zem künege: "ir ungetriuwer hunt!

Verse: 23    iuwer herze in sîner hende liget,
Verse: 24    dar iuwer herze hazzes phliget:

Verse: 25    war hebet ir iuch durch minne ergeben?
Verse: 26    diu muoz doch sîner genâden leben.

Verse: 27    ir saget iuch selben sigelôs.
Verse: 28    diu minne ir reht an iu verlôs:

Verse: 29    getruoget ir ie minne,
Verse: 30    diu was mit valschem sinne."




Chapter: 694 
694


Verse: 1    dô dises zornes vil geschach,
Verse: 2    der künec Bênen sunder sprach.

Verse: 3    er bat si: "vrouwe, zürne niht,
Verse: 4    daz der kamph von mir geschiht.

Verse: 5    belîp hie bî dem herren dîn.
Verse: 6    sage Itonjê der swester sîn,

Verse: 7    ich sî vür wâr ir dienestman
Verse: 8    und ich wil ir dienen, swaz ich kan."

Verse: 9    dô Bêne daz gehôrte
Verse: 10    mit wærlîchem worte,

Verse: 11    daz ir herre ir vrouwen bruoder was,
Verse: 12    der dâ solde strîten ûf dem gras,

Verse: 13    dô zugen jâmers ruoder
Verse: 14    in ir herzen wol ein vuoder

Verse: 15    der herzenlîchen riuwe,
Verse: 16    wande si phlac herzen triuwe.

Verse: 17    si sprach: "vart hin, vervluochet man!
Verse: 18    ir sît, der triuwe nie gewan."

Verse: 19    der künec reit dan und al die sîn.
Verse: 20    Artûses juncherrelîn

Verse: 21    viengen diu ors disen zwein.
Verse: 22    an den orsen sunderkamph ouch schein.

Verse: 23    Gâwân und Parzivâl
Verse: 24    und Bêne diu lieht gemâl

Verse: 25    riten dannen gein ir her.
Verse: 26    Parzivâl mit mannes wer

Verse: 27    hete den prîs behalden sô,
Verse: 28    si wâren sîner künfte vrô,

Verse: 29    die in dâ komen sâhen.
Verse: 30    hôhes prîses si im alle jâhen.




Chapter: 695 
695


Verse: 1    ich sage iu mære, ob ich kan:
Verse: 2    dô sprach von disem einen man

Verse: 3    in beiden hern die wîsen,
Verse: 4    daz si begunden prîsen

Verse: 5    sîne ritterliche tât:
Verse: 6    "der dâ den prîs genomen hât,

Verse: 7    welt irs jehen, daz ist Parzivâl."
Verse: 8    der was ouch sô lieht gemâl,

Verse: 9    ez enwart nie ritter baz getân:
Verse: 10    des jâhen wîp unde man,

Verse: 11    dô in Gâwân brâhte,
Verse: 12    der des hin zim gedâhte,

Verse: 13    daz er in hieze kleiden.
Verse: 14    dô truoc man dar in beiden

Verse: 15    von tiurer koste gelîch gewant.
Verse: 16    über al diz mære wart erkant,

Verse: 17    daz Parzivâl dâ wære komen,
Verse: 18    von dem sô dicke was vernomen,

Verse: 19    daz er hôhen prîs bejagete.
Verse: 20    vür wâr daz maneger sagete.

Verse: 21    Gâwân sprach: "wiltû schouwen
Verse: 22    dîns künnes vier vrouwen

Verse: 23    und ander vrouwen wol gevar,
Verse: 24    sô gên ich gerne mit dir dar."

Verse: 25    dô sprach Gahmuretes kint:
Verse: 26    "ob hie werde vrouwen sint,

Verse: 27    den soltû mich unmæren niht.
Verse: 28    ein ieslîch vrouwe mich ungerne siht,

Verse: 29    diu bî dem Plimizôl gehôrt
Verse: 30    hât von mir valschlîchiu wort.




Chapter: 696 
696


Verse: 1    got müeze ir wîplîch êre sehen!
Verse: 2    ich wil immer vrouwen sælden jehen:

Verse: 3    ich schame mich noch sô sêre,
Verse: 4    ungerne ich gein in kêre."

Verse: 5    "ez muoz doch sîn" sprach Gâwân.
Verse: 6    der vuorte Parzivâlen dan,

Verse: 7    dâ in kusten vier künegîn.
Verse: 8    die herzogîn ez lêrte pîn,

Verse: 9    daz si den küssen solde,
Verse: 10    der ir gruozes dô niht wolde,

Verse: 11    dô si minne und ir lant im bôt
Verse: 12    (des kom si hie von schame in nôt),

Verse: 13    dô er vor Lôgrois gestreit
Verse: 14    und si sô verre nâch im reit.

Verse: 15    Parzivâl der klâre
Verse: 16    wart des âne vâre

Verse: 17    überparlieret,
Verse: 18    daz wart gekondewieret

Verse: 19    elliu schame ûz sînem herzen dô.
Verse: 20    âne blûkeit wart er vrô.

Verse: 21    Gâwân von rehten schulden
Verse: 22    gebôt bî sînen hulden

Verse: 23    vroun Bênen, daz ir süezer munt
Verse: 24    Itonjê des niht tæte kunt,

Verse: 25    "daz mich der künec Gramoflanz
Verse: 26    sus hazzet um sînen kranz

Verse: 27    und daz wir morgen ein ander strît
Verse: 28    suln geben ze rehter kamphes zît.

Verse: 29    mîner swester soltû des niht sagen
Verse: 30    und solt dîn weinen gar verdagen."




Chapter: 697 
697


Verse: 1    si sprach: "ich mac wol weinen
Verse: 2    und immer klage erscheinen,

Verse: 3    wan sweder iuwer dâ beliget,
Verse: 4    nâch dem mîn vrouwe jâmers phliget.

Verse: 5    diu ist ze beider sît erslagen.
Verse: 6    mîne vrouwen und mich muoz ich wol klagen.

Verse: 7    waz hilft, daz ir ir bruoder sît?
Verse: 8    mit ir herzen welt ir vehten strît."

Verse: 9    daz her was gar gezoget în.
Verse: 10    Gâwân und den gesellen sîn

Verse: 11    was ir ezzen al bereit.
Verse: 12    mit der herzogîn gemeit

Verse: 13    Parzivâl solde ezzen.
Verse: 14    dâ enwart des niht vergezzen,

Verse: 15    Gâwân der enbevülhe in ir.
Verse: 16    si sprach: "welt ir bevelhen mir

Verse: 17    den, der vrouwen spotten kan?
Verse: 18    wie sol ich phlegen dises man?

Verse: 19    doch diene ich im durch iuwer gebot.
Verse: 20    ich enruoche, ob er daz nimt vür spot."

Verse: 21    dô sprach Gahmuretes sun:
Verse: 22    "vrouwe, ir welt gewalt mir tuon.

Verse: 23    sô wîse erkenne ich mînen lîp:
Verse: 24    der mîdet spottes elliu wîp."

Verse: 25    ob ez dâ was, man gap genuoc:
Verse: 26    mit grôzer zuht manz vür si truoc.

Verse: 27    maget, wîp und man mit vreuden az.
Verse: 28    Itonjê des doch niht vergaz,

Verse: 29    si enwarte an Bênen ougen,
Verse: 30    daz diu weinden tougen:




Chapter: 698 
698


Verse: 1    dô wart ouch si nâch jâmer var,
Verse: 2    ir süezer munt meit ezzen gar.

Verse: 3    si dâhte: "waz tuot Bêne hie?
Verse: 4    ich hete iedoch gesendet sie

Verse: 5    ze dem, der dort mîn herze treget,
Verse: 6    daz mich hie gar unsanfte reget.

Verse: 7    waz ist an mir gerochen?
Verse: 8    hât der künec widersprochen

Verse: 9    mîn dienst und mîne minne?
Verse: 10    sîn getriuwe manlîch sinne

Verse: 11    mugen hie niht mêr erwerben.
Verse: 12    wan dar um muoz ersterben

Verse: 13    mîn armer lîp, den ich hie trage,
Verse: 14    nâch im mit herzenlîcher klage."

Verse: 15    dô man ezzens dâ verphlac,
Verse: 16    dô was ez ouch über den mitten tac.

Verse: 17    Artûs und daz wîp sîn,
Verse: 18    vrou Ginovêr diu künegîn,

Verse: 19    mit rittern und mit vrouwen schar
Verse: 20    riten, dâ der wol gevar

Verse: 21    saz bî werder vrouwen diet.
Verse: 22    Parzivâles antvanc dô geriet,

Verse: 23    manege klâre vrouwen
Verse: 24    muoste er sich küssen schouwen.

Verse: 25    Artûs bôt im êre
Verse: 26    und dancte im des sêre,

Verse: 27    daz sîn hôhiu werdekeit
Verse: 28    wære sô lanc und ouch sô breit.

Verse: 29    daz er den prîs vür alle man
Verse: 30    von rehten schulden solde hân.




Chapter: 699 
699


Verse: 1    der Wâleis z Artûse sprach:
Verse: 2    "herre, dô ich iuch jungest sach,

Verse: 3    dô wart ûf die êre mir gerant:
Verse: 4    von prîse ich gap sô hôhiu phant,

Verse: 5    daz ich von prîse nâch was komen.
Verse: 6    nû hân ich, herre, von iu vernomen,

Verse: 7    ob ir mirz saget âne vâr,
Verse: 8    daz prîs an mir ein teil hât wâr.

Verse: 9    swie unsanfte ich daz lerne,
Verse: 10    ich geloubez iu doch gerne,

Verse: 11    woldez gelouben ander diet,
Verse: 12    von den ich mich dô schamede schiet."

Verse: 13    die dâ sâzen, jâhen sîner hant,
Verse: 14    si hete den prîs über manegiu lant

Verse: 15    mit sô hôhem prîse erworben,
Verse: 16    daz sîn prîs wære unverdorben.

Verse: 17    der herzoginne ritter gar
Verse: 18    ouch kômen, dâ der wol gevar

Verse: 19    Parzivâl bî Artûse saz.
Verse: 20    der werde künec des niht vergaz,

Verse: 21    er emphienge si in des wirtes hûs.
Verse: 22    der hövesche wîse Artûs,

Verse: 23    swie wît wære Gâwâns gezelt,
Verse: 24    er saz dar vür ûf daz velt.

Verse: 25    si sâzen um in an den rinc.
Verse: 26    sich samenten unkundiu dinc:

Verse: 27    wer dirre und jener wære,
Verse: 28    daz würden wîtiu mære,

Verse: 29    solde der kristen und der Sarrazîn
Verse: 30    kuntlîche dâ genennet sîn.




Chapter: 700 
700


Verse: 1    wer was Klinschores her?
Verse: 2    wer wâren, die sô wol ze wer

Verse: 3    von Lôgrois vil dicke riten,
Verse: 4    dâ si durch Orgelûsen striten?

Verse: 5    wer wâren, die brâhte Artûs?
Verse: 6    der ir aller lant und ir hûs

Verse: 7    kuntlîche solde nennen,
Verse: 8    müelîch si wâren zerkennen.

Verse: 9    die jâhen al gemeine,
Verse: 10    daz Parzivâl al eine

Verse: 11    vor ûz trüege sô klâren lîp,
Verse: 12    den gerne minnen m\hten wîp,

Verse: 13    und swaz ze hôhem prîse züge,
Verse: 14    daz in des werdekeit niht trüege.

Verse: 15    ûf stuont Gahmuretes kint.
Verse: 16    der sprach: "alle, die hie sint,

Verse: 17    sitzen stille und helfen mir,
Verse: 18    des ich gar unsanfte enbir.

Verse: 19    mich schiet von tavelrunder
Verse: 20    ein verholnbærez wunder:

Verse: 21    die mir ê gâben geselleschaft,
Verse: 22    helfen mir geselleclîcher kraft

Verse: 23    noch dar über." des er gerte,
Verse: 24    Artûs in schône werte.

Verse: 25    einer andern bete er dô bat
Verse: 26    (mit wênec liuten er sunder trat),

Verse: 27    daz Gâwân gæbe im den strît,
Verse: 28    den er ze rehter kamphes zît

Verse: 29    des morgens solde strîten.
Verse: 30    "ich wil sîn gerne dâ bîten,




Chapter: 701 
701


Verse: 1    der dâ heizet künec Gramoflanz:
Verse: 2    von sînem boume ich einen kranz

Verse: 3    brach hiute morgen vruo,
Verse: 4    daz er mir strîten vuorte zuo.

Verse: 5    ich kom durch strîten in sîn lant,
Verse: 6    niwan durch strît gein sîner hant.

Verse: 7    neve, ich solde dîn wênec trûwen hie.
Verse: 8    mir engeschach sô rehte leide nie:

Verse: 9    ich wânde, ez der künec wære,
Verse: 10    der mich strîtes niht verbære.

Verse: 11    neve, noch lâz mich in bestên:
Verse: 12    sol immer sîn unprîs ergên,

Verse: 13    mîn hant im schaden vüeget,
Verse: 14    des in vür wâr genüeget.

Verse: 15    mir ist mîn reht hie wider gegeben:
Verse: 16    ich mac geselleclîche leben,

Verse: 17    lieber neve, nû gein dir.
Verse: 18    denke erkander sippe an mir

Verse: 19    und lâz den kamph wesen mîn.
Verse: 20    dâ tuon ich manlîch ellen schîn."

Verse: 21    dô sprach mîn her Gâwân:
Verse: 22    "mâge und bruoder ich hie hân

Verse: 23    bî dem künege von Bertâne vil:
Verse: 24    iuwer keinem ich gestaten wil,

Verse: 25    daz er vür mich vehte.
Verse: 26    ich getrûwe des mînem rehte,

Verse: 27    süls gelücke walden,
Verse: 28    ich müge den prîs behalden.

Verse: 29    got lône dir, daz dû biutes strît:
Verse: 30    es ist aber vür mich noch niht zît."




Chapter: 702 
702


Verse: 1    Artûs die bete hôrte:
Verse: 2    daz gespræche er zestôrte,

Verse: 3    mit in wider an den rinc er saz.
Verse: 4    Gâwâns schenke niht vergaz,

Verse: 5    dar entrüegen juncherrelîn
Verse: 6    manegen tiuren koph guldîn

Verse: 7    mit edelem gesteine.
Verse: 8    der schenke gienc niht eine.

Verse: 9    dô daz schenken geschach,
Verse: 10    daz volc vuor gar an sîn gemach.

Verse: 11    dô begundez ouch nâhen der naht.
Verse: 12    Parzivâl was sô bedâht,

Verse: 13    al sîn harnas er besach.
Verse: 14    ob dem iht riemen gebrach,

Verse: 15    daz hiez er wol bereiten
Verse: 16    und wünneclîchen feiten

Verse: 17    und einen niuwen schilt gewinnen:
Verse: 18    der sîne was ûzen und innen

Verse: 19    zehurtiert und ouch zeslagen.
Verse: 20    man muoste im einen starken tragen.

Verse: 21    daz tâten sarjande,
Verse: 22    die vil wênec er bekande:

Verse: 23    etslîcher was ein Franzeis.
Verse: 24    sîn ors, daz der templeis

Verse: 25    gein im zer tjoste brâhte,
Verse: 26    ein knappe des gedâhte,

Verse: 27    ez wart nie baz erstrichen sît.
Verse: 28    dô was ez naht und slâfes zît:

Verse: 29    Parzivâl ouch slâfes phlac.
Verse: 30    sîn harnas gar vor im dâ lac.




Chapter: 703 
703


Verse: 1    ouch rou den künec Gramoflanz,
Verse: 2    daz ein ander man vür sînen kranz

Verse: 3    des tages hete gevohten:
Verse: 4    dâ getorsten noch enmohten

Verse: 5    die sîne daz niht gescheiden.
Verse: 6    er begundez sêre leiden,

Verse: 7    daz er sich versûmet hæte.
Verse: 8    waz der helt dô tæte?

Verse: 9    wande er ê prîs bejagete,
Verse: 10    rehte indes, dôz tagete,

Verse: 11    was sîn ors gewâpent und sîn selbes lîp.
Verse: 12    ob gæben rîchelôsiu wîp

Verse: 13    sîner zimierde stiure?
Verse: 14    ez was sus alsô tiure.

Verse: 15    er zierte den lîp durch eine maget:
Verse: 16    der was er dienstes unverzaget.

Verse: 17    er reit eine ûf die warte.
Verse: 18    den künec daz müete harte,

Verse: 19    daz der werde Gâwân
Verse: 20    niht schiere kom ûf den plân.

Verse: 21    nû hete ouch sich gar verholn
Verse: 22    Parzivâl her ûz verstoln.

Verse: 23    ûz einer banier er nam
Verse: 24    ein starkez sper von Angram,

Verse: 25    er hete ouch al sîn harnas an.
Verse: 26    der helt reit al eine dan

Verse: 27    gein den ronen spiegelîn,
Verse: 28    aldâ der kamph solde sîn.

Verse: 29    er sach den künec halden dort.
Verse: 30    ê daz deweder ie wort




Chapter: 704 
704


Verse: 1    zem andern gespræche,
Verse: 2    man giht, ieweder stæche

Verse: 3    den andern durch des schiltes rant,
Verse: 4    daz die sprîzen von der hant

Verse: 5    ûf durch den luft sich wunden.
Verse: 6    mit der tjost si beide kunden

Verse: 7    und sus mit anderm strîte.
Verse: 8    ûf des angers wîte

Verse: 9    wart daz tou zevüeret
Verse: 10    und die helme gerüeret

Verse: 11    mit scharphen ecken, die wol sniten.
Verse: 12    unverzagetlîch si beide striten.

Verse: 13    dâ wart der anger getret,
Verse: 14    an maneger stat daz tou gewet.

Verse: 15    des riuwent mich die bluomen rôt
Verse: 16    und mêr die helde, die dâ nôt

Verse: 17    dolten âne zageheit.
Verse: 18    wem wære daz liep âne leit,

Verse: 19    dem si niht hêten getân?
Verse: 20    dô bereite ouch sich her Gâwân

Verse: 21    gein sînes kamphes sorgen.
Verse: 22    ez was wol mitter morgen,

Verse: 23    ê man vriesch daz mære,
Verse: 24    daz dâ vermisset wære

Verse: 25    Parzivâles des küenen.
Verse: 26    ob erz welle süenen?

Verse: 27    dem gebârte er ungelîche:
Verse: 28    er streit sô manlîche

Verse: 29    mit dem, der ouch strîtes phlac.
Verse: 30    nû was ez hôch ûf den tac.




Chapter: 705 
705


Verse: 1    Gâwâne ein bischof messe sanc.
Verse: 2    von storje wart dâ grôz gedranc:

Verse: 3    ritter unde vrouwen
Verse: 4    man mohte zorse schouwen

Verse: 5    an Artûses ringe.
Verse: 6    ê daz man dâ gesinge,

Verse: 7    der künec Artûs selbe stuont,
Verse: 8    dâ die phaffen daz ammet tuont.

Verse: 9    dô der bendiz wart getân,
Verse: 10    dô wâpende sich her Gâwân:

Verse: 11    man sach ê tragen den stolzen
Verse: 12    sîn îserîne kolzen

Verse: 13    an wol geschicketen beinen.
Verse: 14    dô begunden vrouwen weinen.

Verse: 15    daz her zogete ûz über al,
Verse: 16    dâ si mit swerten hôrten schal

Verse: 17    und viur ûz helmen swingen
Verse: 18    und slege mit kreften bringen.

Verse: 19    der künec Gramoflanz phlac site,
Verse: 20    im versmâhte sêre, daz er strite

Verse: 21    mit einem man. dô dûhte in nuo,
Verse: 22    daz hie sehse griffen strîtes zuo:

Verse: 23    ez was doch Parzivâl al ein.
Verse: 24    der gein im werlîche schein,

Verse: 25    er hete in underwîset
Verse: 26    einer zuht, die man noch prîset:

Verse: 27    er engenam sît nimmer mêre
Verse: 28    mit rede an sich die êre,

Verse: 29    daz er zwein mannen büte strît,
Verse: 30    wan einers im ze vil dâ gît.




Chapter: 706 
706


Verse: 1    daz her was komen ze beider sît
Verse: 2    ûf den grüenen anger wît

Verse: 3    iewederhalp an sîniu zil.
Verse: 4    si pruovten diz nîtspil.

Verse: 5    den küenen wîganden
Verse: 6    diu ors wâren gestanden:

Verse: 7    dô striten sus die werden
Verse: 8    ze vuoz ûf der erden

Verse: 9    einen herten strît scharph erkant.
Verse: 10    diu swert ûf hôhe ûz der hant

Verse: 11    wurfen dicke dise recken:
Verse: 12    si wandelten die ecken.

Verse: 13    sus emphienc der künec Gramoflanz
Verse: 14    sûren zins vür sînen kranz.

Verse: 15    sîner vriundîn künne
Verse: 16    leit ouch bî im swache wünne.

Verse: 17    sus engalt der werde Parzivâl
Verse: 18    Itonjê der lieht gemâl,

Verse: 19    der er geniezen solde,
Verse: 20    ob reht ze rehte wolde.

Verse: 21    nâch prîse die vil gevarnen
Verse: 22    mit strîte muosten arnen,

Verse: 23    einer streit vür vriundes nôt,
Verse: 24    dem andern minne daz gebôt,

Verse: 25    daz er was minne undertân.
Verse: 26    dô kom ouch mîn her Gâwân,

Verse: 27    dôz alsus vil nâch was komen,
Verse: 28    daz den sic hete aldâ genomen

Verse: 29    der stolze küene Wâleis.
Verse: 30    Brandelidelîn von Punturteis




Chapter: 707 
707


Verse: 1    und Bernout de Riviers
Verse: 2    und Afinamus von Klitiers,

Verse: 3    mit blôzen houpten dise drî
Verse: 4    riten dem strîte nâher bî.

Verse: 5    Artûs und Gâwân
Verse: 6    riten anderhalben ûf den plân

Verse: 7    zuo den kamphmüeden zwein.
Verse: 8    die vünfe wurden des enein,

Verse: 9    si wolden scheiden disen strît.
Verse: 10    scheidens dûhte rehtiu zît

Verse: 11    Gramoflanzen, der sô sprach,
Verse: 12    daz er dem siges jach,

Verse: 13    den man gein im dâ hete ersehen.
Verse: 14    des muoste ouch mêre liute jehen.

Verse: 15    dô sprach des künec Lôtes sun:
Verse: 16    "her künec, ich wil iu hiute tuon,

Verse: 17    als ir mir gestern tâtet,
Verse: 18    dô ir mich ruowen bâtet.

Verse: 19    nû ruowet hînt: des wirt iu nôt.
Verse: 20    swer iu disen strît gebôt,

Verse: 21    der hete iu swache kraft erkant
Verse: 22    gein mîner werlîchen hant.

Verse: 23    ich bestüende iuch nû wol ein:
Verse: 24    nû vehtet aber ir niwan mit zwein.

Verse: 25    ich wilz morgen wâgen eine,
Verse: 26    got ez ze rehte erscheine."

Verse: 27    der künec reit dannen zuo den sîn.
Verse: 28    er tet ê fîanze schîn,

Verse: 29    daz er smorgens gein Gâwân
Verse: 30    durch strîten kœme ûf den plân.




Chapter: 708 
708


Verse: 1    Artûs ze Parzivâle sprach:
Verse: 2    "neve, sît dir sus geschach,

Verse: 3    daz dû des kamphes bæte
Verse: 4    und manlîche tæte

Verse: 5    und Gâwân dirz versagete,
Verse: 6    daz dîn munt dô sêre klagete,

Verse: 7    nû hâstû den kamph iedoch gestriten
Verse: 8    gein im, der sîn dâ hete erbiten,

Verse: 9    ez wære uns leit oder liep.
Verse: 10    dû sliche von uns als ein diep:

Verse: 11    wir heten anders dîne hant
Verse: 12    dises kamphes wol erwant.

Verse: 13    nû darf Gâwân des zürnen niht,
Verse: 14    swaz man dir dar um prîses giht."

Verse: 15    Gâwân sprach: "mir ist niht leit
Verse: 16    mîns neven hôhiu werdekeit.

Verse: 17    mirst dennoch morgen alze vruo,
Verse: 18    sol ich kamphes grîfen zuo:

Verse: 19    wolde michs der künec erlâzen,
Verse: 20    des jæhe ich im gein mâzen."

Verse: 21    daz her reit în mit maneger schar.
Verse: 22    man sach dâ vrouwen wol gevar

Verse: 23    und manegen gezimierten man,
Verse: 24    daz nie dehein her mêr gewan

Verse: 25    solher zimierde wunder.
Verse: 26    die von der tavelrunder

Verse: 27    und diu massenîe der herzogîn,
Verse: 28    ir wâpenröcke gâben schîn:

Verse: 29    mit phelle von Zinidunte
Verse: 30    und brâht von Pelpjunte




Chapter: 709 
709


Verse: 1    lieht wâren ir kovertiure.
Verse: 2    Parzivâl der gehiure

Verse: 3    wart in beiden hern geprîset sô,
Verse: 4    sîne vriunt des mohten wesen vrô.

Verse: 5    si jâhen in Gramoflanzes her,
Verse: 6    daz ze keiner zît sô wol ze wer

Verse: 7    nie kom ritter dehein,
Verse: 8    den diu sunne ie überschein:

Verse: 9    swaz ze beiden sîten dâ wære getân,
Verse: 10    den prîs müeste er al eine hân.

Verse: 11    dennoch si sîn erkanden niht,
Verse: 12    dem ieslîch munt dâ prîses giht.

Verse: 13    Gramoflanz si rieten,
Verse: 14    er möhte wol enbieten

Verse: 15    Artûse, daz er næme war,
Verse: 16    daz dehein ander man ûz sîner schar

Verse: 17    gein im kœme durch vehten,
Verse: 18    daz er im sande den rehten:

Verse: 19    Gâwân des künec Lôtes sun,
Verse: 20    mit dem wolde er den kamph tuon.

Verse: 21    die boten wurden dan gesant,
Verse: 22    zwei wîsiu kint hövesch erkant.

Verse: 23    der künec sprach: "nû sult ir spehen,
Verse: 24    wem ir dâ prîses wellet jehen

Verse: 25    under al den klâren vrouwen.
Verse: 26    ir sult ouch sunder schouwen,

Verse: 27    bî welher Bêne sitze.
Verse: 28    nemt daz in iuwer witze,

Verse: 29    in welhen gebærden diu sî.
Verse: 30    wone ir vreude oder trûren bî,




Chapter: 710 
710


Verse: 1    daz sult ir prüeven tougen.
Verse: 2    ir seht wol an ir ougen,

Verse: 3    ob si nâch vriunde kummer hât.
Verse: 4    seht, daz ir des niht enlât,

Verse: 5    Bênen mîner vriundîn
Verse: 6    gebet den brief und diz vingerlîn:

Verse: 7    diu weiz wol, wem daz vürbaz sol.
Verse: 8    werpt gevuoge, sô tuot ir wol."

Verse: 9    nû was ez ouch anderhalben sô komen,
Verse: 10    Itonjê hete vernomen,

Verse: 11    daz ir bruoder und der liepste man,
Verse: 12    den maget inz herze ie gewan,

Verse: 13    mit ein ander vehten solden
Verse: 14    und des niht lâzen wolden.

Verse: 15    dô brast ir jâmer durch die scheme.
Verse: 16    swen ir kummers nû gezeme,

Verse: 17    der tuotz âne mînen rât,
Verse: 18    sît siz ungedienet hât.

Verse: 19    beide ir muoter und ir ane
Verse: 20    die maget vuorten sunder dane

Verse: 21    in ein wênec gezelt sîdîn.
Verse: 22    Arnîve weiz ir disen pîn,

Verse: 23    si strâfte si um ir missetât.
Verse: 24    des was et dô kein ander rât:

Verse: 25    si verjach aldâ unverholn,
Verse: 26    daz si lange in hete vor verstoln.

Verse: 27    dô sprach diu maget wert erkant:
Verse: 28    "sol mir nû mîns bruoder hant

Verse: 29    mîns herzen verh versnîden,
Verse: 30    daz möhte er gerne mîden."




Chapter: 711 
711


Verse: 1    Arnîve zeinem juncherrelîn
Verse: 2    sprach: "nû sage dem sune mîn,

Verse: 3    daz er mich balde spreche
Verse: 4    und daz al eine zeche."

Verse: 5    der knappe Artûsen brâhte.
Verse: 6    Arnîve des gedâhte,

Verse: 7    si woldez in lâzen hœren,
Verse: 8    ob er möhte zestœren,

Verse: 9    nâch wem der klâren Itonjê
Verse: 10    was sô herzenlîche wê.

Verse: 11    des künec Gramoflanzes kint
Verse: 12    nâch Artûse komen sint.

Verse: 13    die erbeizten ûf dem velde.
Verse: 14    vor dem kleinen gezelde

Verse: 15    einer Bênen sitzen sach
Verse: 16    bî der, diu z Artûse sprach:

Verse: 17    "giht des diu herzogîn vür prîs,
Verse: 18    ob mîn bruoder mir mînen âmîs

Verse: 19    sleht durch ir lôsen rât?
Verse: 20    des möhte er jehen vür missetât.

Verse: 21    waz hât der künec im getân?
Verse: 22    er solde in mîn geniezen lân.

Verse: 23    treget mîn bruoder sinne,
Verse: 24    er weiz unser zweier minne

Verse: 25    sô lûter âne truopheit,
Verse: 26    phliget er triuwe, ez wirt im leit.

Verse: 27    sol mir sîn hant erwerben
Verse: 28    nâch dem künege ein sûrez sterben,

Verse: 29    herre, daz sî iu geklaget"
Verse: 30    sprach z Artûse diu süeze maget.




Chapter: 712 
712


Verse: 1    "nû denket, ob ir mîn œheim sît:
Verse: 2    durch triuwe scheidet disen strît."

Verse: 3    Artûs ûz wîsem munde
Verse: 4    sprach an der selben stunde:

Verse: 5    "ouwê, liebiu niftel mîn,
Verse: 6    daz dîn jugent sô hôher minne schîn

Verse: 7    tuot, daz muoz dir werden sûr.
Verse: 8    als tet dîn swester Sûrdâmûr

Verse: 9    durch der Kriechen lampriure.
Verse: 10    süeziu maget gehiure,

Verse: 11    den kamph möhte ich wol scheiden,
Verse: 12    wesse ich daz an iu beiden,

Verse: 13    ob sîn herze undz dîne gesamenet sint.
Verse: 14    Gramoflanz îrôres kint

Verse: 15    vert mit sô manlîchen siten,
Verse: 16    daz der kamph wirt gestriten,

Verse: 17    ez enunderstê diu minne dîn.
Verse: 18    gesach er dînen liehten schîn

Verse: 19    bî vreuden ie ze keiner stunt
Verse: 20    und dînen rôten süezen munt?"

Verse: 21    si sprach: "des enist niht geschehen:
Verse: 22    wir minnen ein ander âne sehen.

Verse: 23    er hât aber mir durch liebe kraft
Verse: 24    und durch rehte geselleschaft

Verse: 25    sîns kleinœtes vil gesant:
Verse: 26    er emphienc ouch von mîner hant,

Verse: 27    daz zer wâren liebe hôrte
Verse: 28    und uns beiden zwîvel stôrte.

Verse: 29    der künec ist an mir stæte
Verse: 30    âne valsches herzen ræte."




Chapter: 713 
713


Verse: 1    dô erkande wol vrou Bêne
Verse: 2    dise knappen zwêne,

Verse: 3    des künec Gramoflanzes kint,
Verse: 4    die nâch Artûse komen sint.

Verse: 5    si sprach: "hie solde niemen stên.
Verse: 6    welt ir, ich heize vürder gên

Verse: 7    daz volc ûz den snüeren.
Verse: 8    wil mîne vrouwen rüeren

Verse: 9    solh ungenâde um ir trût,
Verse: 10    daz mære kumt schiere über lût."

Verse: 11    vrou Bêne her ûz wart gesant.
Verse: 12    der kinde einez in ir hant

Verse: 13    smucte den brief undz vingerlîn.
Verse: 14    si heten ouch den hôhen pîn

Verse: 15    von ir vrouwen wol vernomen
Verse: 16    und jâhen des, si wæren komen

Verse: 17    und wolden Artûsen sprechen,
Verse: 18    ob si daz ruochte zechen.

Verse: 19    si sprach: "stêt verre dort hin dan,
Verse: 20    unz ich iuch gêns zuo mir man."

Verse: 21    von Bênen der süezen maget
Verse: 22    in dem gezelte wart gesaget,

Verse: 23    daz Gramoflanzes boten dâ
Verse: 24    wæren unde vrâcten, wâ

Verse: 25    Artûs der künec wære.
Verse: 26    "daz dûhte mich ungebære,

Verse: 27    ob ich in zeicte an diz gespræche.
Verse: 28    seht denne, waz ich ræche

Verse: 29    an mîner vrouwen, ob si sie
Verse: 30    alsus sæhen weinen hie."




Chapter: 714 
714


Verse: 1    Artûs sprach: "sint ez die knaben,
Verse: 2    die ich an den rinc nâch mir sach draben?

Verse: 3    daz sint von hôher art zwei kint.
Verse: 4    waz ob si sô gevüege sint,

Verse: 5    gar bewart vor missetât,
Verse: 6    daz si wol gênt an disen rât?

Verse: 7    eintweder phliget der sinne,
Verse: 8    daz er sîns herren minne

Verse: 9    an mîner nifteln wol siht."
Verse: 10    Bêne sprach: "des enweiz ich niht.

Verse: 11    herre, macz mit hulden sîn,
Verse: 12    der künec hât diz vingerlîn

Verse: 13    dâ her gesant und disen brief:
Verse: 14    dô ich nû vürz poulûn lief,

Verse: 15    der kinde einez gap in mir.
Verse: 16    vrouwe, sêt, den nemet ir."

Verse: 17    dô wart der brief vil gekust,
Verse: 18    Itonjê dructe in an ir brust.

Verse: 19    dô sprach si: "herre, nû seht hie an,
Verse: 20    ob mich der künec minne man."

Verse: 21    Artûs nam den brief in die hant,
Verse: 22    dar an er geschriben vant

Verse: 23    von dem, der minnen kunde,
Verse: 24    waz ûz sîn selbes munde

Verse: 25    Gramoflanz der stæte sprach.
Verse: 26    Artûs an dem brieve sach,

Verse: 27    daz er mit sînem sinne
Verse: 28    sô endehafte minne

Verse: 29    bî sînen zîten nie vernam.
Verse: 30    dâ stuont, daz minne wol gezam:




Chapter: 715 
715


Verse: 1    "ich grüeze, die ich grüezen sol,
Verse: 2    daz ich mit dienste grüezen hol:

Verse: 3    vrouwelîn, ich meine dich,
Verse: 4    sît dû mit trôste trœstes mich.

Verse: 5    unser minne gebent geselleschaft.
Verse: 6    daz ist wurzel mîner vreude kraft:

Verse: 7    dîn trôst vür ander trôste wiget,
Verse: 8    sit dîn herze gein mir triuwen phliget.

Verse: 9    dû bist slôz ob mîner triuwe
Verse: 10    und ein vlust mîns herzen riuwe.

Verse: 11    dîn minne gît mir helfe rât,
Verse: 12    daz deheiner slahte untât

Verse: 13    an mir nimmer wirt gesehen.
Verse: 14    ich mac wol dîner güete jehen

Verse: 15    stæte âne wenken sus:
Verse: 16    als pôlus artanticus

Verse: 17    gein dem tremuntâne stêt,
Verse: 18    der neweder von der stete gêt,

Verse: 19    unser minne sol in triuwen stên
Verse: 20    und niht von ein ander gên.

Verse: 21    nû gedenke an mir, werdiu maget,
Verse: 22    waz ich dir kummers hân geklaget:

Verse: 23    wis dîner helfe an mir niht laz.
Verse: 24    ob dich iemen durch mînen haz

Verse: 25    von mir welle scheiden,
Verse: 26    sô denke, daz uns beiden

Verse: 27    diu minne mac wol lônen.
Verse: 28    dû solt vrouwen êren schônen

Verse: 29    und lâz mich sîn dîn dienestman:
Verse: 30    ich wil dir dienen, swaz ich kan."




Chapter: 716 
716


Verse: 1    Artûs sprach: "niftel, dû hâs wâr,
Verse: 2    der künec dich grüezet âne vâr.

Verse: 3    dirre brief tuot mit mære kunt,
Verse: 4    daz ich sô wunderlîchen vunt

Verse: 5    gein minne nie gemezzen sach.
Verse: 6    dû solt im sîn ungemach

Verse: 7    wenden, alsô sol er dir.
Verse: 8    lât ir daz beidiu her ze mir:

Verse: 9    ich wil den kamph undervarn.
Verse: 10    die wîle soltû weinen sparn.

Verse: 11    nû wære dû doch gevangen:
Verse: 12    sage mir, wiest daz ergangen,

Verse: 13    daz ir ein ander wurdet holt?
Verse: 14    dû solt im dîner minne solt

Verse: 15    teilen, dâ wil er dienen nâch."
Verse: 16    Itonjê, Artûs niftel, sprach:

Verse: 17    "sist hie, diu daz zesamene truoc.
Verse: 18    unser enwederius nie gewuoc.

Verse: 19    welt ir, si vüeget wol, daz ich in sihe,
Verse: 20    dem ich mînes herzen gihe."

Verse: 21    Artûs sprach: "die zeige mir.
Verse: 22    mac ich, sô vüege ich im und dir,

Verse: 23    daz iuwer wille dran gestêt
Verse: 24    und iuwer beider vreude ergêt."

Verse: 25    Itonjê sprach: "ez ist Bêne.
Verse: 26    ouch sint sîner knappen zwêne

Verse: 27    alhie. muget ir versuochen,
Verse: 28    welt ir mîns lebens ruochen,

Verse: 29    ob mich der künec welle sehen,
Verse: 30    dem ich muoz mîner vreuden jehen?"




Chapter: 717 
717


Verse: 1    Artûs der wîse hövesche man
Verse: 2    gienc her ûz ze den kinden sân:

Verse: 3    er gruozte si, dô er si sach.
Verse: 4    der kinde einez zim dô sprach:

Verse: 5    "herre, der künec Gramoflanz
Verse: 6    iuch bitet, daz ir machet ganz

Verse: 7    gelübede, diu dâ sî getân
Verse: 8    zwischen im und Gâwân,

Verse: 9    durch iuwer selbes êre.
Verse: 10    herre, er bitet iuch mêre,

Verse: 11    daz dehein ander man im vüere strît.
Verse: 12    iuwer her ist sô wît,

Verse: 13    solde er si alle übervehten,
Verse: 14    daz engelîchte niht dem rehten.

Verse: 15    ir sult Gâwânen lâzen komen,
Verse: 16    gein dem der kamph dâ sî genomen."

Verse: 17    der künec sprach zen kinden:
Verse: 18    "ich wil uns des enbinden.

Verse: 19    mînem neven geschach nie grœzer leit,
Verse: 20    daz er selbe dâ niht streit.

Verse: 21    der mit iuwerm herren vaht,
Verse: 22    dem was der sic wol geslaht:

Verse: 23    ez ist Gahmuretes kint.
Verse: 24    alle, die in drîen hern sint

Verse: 25    komen von allen sîten,
Verse: 26    die envrieschen nie gein strîten

Verse: 27    deheinen man sô manlîch.
Verse: 28    sîn tât dem prîse ist gar gelîch:

Verse: 29    ez ist mîn neve Parzivâl.
Verse: 30    ir sult in sehen, den lieht gemâl.




Chapter: 718 
718


Verse: 1    durch Gâwânes triuwe nôt
Verse: 2    leiste ich, daz mir der künec enbôt."

Verse: 3    Artûs und Bêne
Verse: 4    und dise knappen zwêne

Verse: 5    riten her unde dar.
Verse: 6    er liez diu kint nemen war

Verse: 7    liehter blicke an maneger vrouwen.
Verse: 8    si mohten ouch dâ schouwen

Verse: 9    ûf den helmen manec gesnürre.
Verse: 10    wênec daz noch würre

Verse: 11    einem man, der wære rîche,
Verse: 12    gebârte er geselleclîche.

Verse: 13    si kômen niht von den pherden.
Verse: 14    Artûs liez die werden

Verse: 15    über al daz her diu kinder sehen,
Verse: 16    dâ si den wunsch mohten spehen,

Verse: 17    ritter, megede unde wîp,
Verse: 18    manegen vlætegen lîp.

Verse: 19    des hers wâren driu stücke,
Verse: 20    dâ zwischen zwuo lücke.

Verse: 21    Artûs reit mit den kinden dan
Verse: 22    von dem her verre ûf den plân.

Verse: 23    dô sprach er: "Bêne, süeziu maget,
Verse: 24    dû hœrs wol, waz mir hât geklaget

Verse: 25    Itonjê, mîner swester barn:
Verse: 26    diu kan ir weinen wênec sparn.

Verse: 27    daz gelouben mîne gesellen,
Verse: 28    die hie habent, ob si wellen:

Verse: 29    Itonjê hât Gramoflanz
Verse: 30    verleschet nâch ir liehten glanz.




Chapter: 719 
719


Verse: 1    nû helfet mir, ir zwêne
Verse: 2    und ouch dû, vriundîn Bêne,

Verse: 3    daz der künec her zuo mir rîte
Verse: 4    und den kamph doch morgen strîte.

Verse: 5    mînen neven Gâwân
Verse: 6    bringe ich gein im ûf den plân.

Verse: 7    rîtet der künec hiute in mîn her,
Verse: 8    erst morgen al deste baz ze wer.

Verse: 9    hie gît diu minne im einen schilt,
Verse: 10    des sînen kamphgenôz bevilt:

Verse: 11    ich meine gein minne hôhen muot,
Verse: 12    der bî den vînden schaden tuot.

Verse: 13    er sol hövesche liute bringen:
Verse: 14    ich wil hie tegedingen

Verse: 15    zwischen im und der herzogîn.
Verse: 16    nû werbetz, trûtgesellen mîn,

Verse: 17    mit vuoge: des habet ir êre.
Verse: 18    ich sol iu klagen mêre:

Verse: 19    waz hân ich unsælec man
Verse: 20    dem künege Gramoflanz getân,

Verse: 21    sît er gein mînem künne phliget,
Verse: 22    daz in lîhte unhôhe wiget,

Verse: 23    minne und unminne grôz?
Verse: 24    ein ieslîch künec mîn genôz

Verse: 25    mîn gerne möhte schônen.
Verse: 26    wil er nû mit hazze lônen

Verse: 27    ir bruoder, diu in minnet,
Verse: 28    ob er sichs versinnet,

Verse: 29    sîn herze tuot von minnen wanc,
Verse: 30    swenne ez in lêret den gedanc."




Chapter: 720 
720


Verse: 1    der kinde einz zem künege sprach:
Verse: 2    "herre, swes ir vür ungemach

Verse: 3    jeht, daz sol mîn herre lân,
Verse: 4    wil er rehte vuoge hân.

Verse: 5    ir wizzet wol um den alden haz:
Verse: 6    mînem herren stêt belîben baz,

Verse: 7    denne daz er dâ her zuo ziu rite.
Verse: 8    diu herzoginne phliget noch site,

Verse: 9    daz si im ir hulde hât versaget
Verse: 10    und manegem man ab im geklaget."

Verse: 11    "er sol mit wênec liuten komen"
Verse: 12    sprach Artûs." die wîle hân ich genomen

Verse: 13    vride vür den selben zorn
Verse: 14    von der herzoginne wol geborn.

Verse: 15    ich wil im guot geleite tuon:
Verse: 16    Bêâkurs mîner swester sun

Verse: 17    nimt in dort an halbem wege.
Verse: 18    er sol varn in mîns geleites phlege:

Verse: 19    des darf er niht vür laster jehen.
Verse: 20    ich lâze in werde liute sehen."

Verse: 21    mit urloube si vuoren dan:
Verse: 22    Artûs hielt eine ûf dem plân,

Verse: 23    Bêne und diu zwei kindelîn
Verse: 24    ze Rosche Sabînes riten în,

Verse: 25    anderhalben ûz, dâz her lac.
Verse: 26    dô engelebete nie sô lieben tac

Verse: 27    Gramoflanz, dô in gesprach
Verse: 28    Bêne und diu kint. sîn herze jach,

Verse: 29    im wære alsolhiu mære brâht,
Verse: 30    der sælde gein im hete erdâht.




Chapter: 721 
721


Verse: 1    er sprach, er wolde gerne komen.
Verse: 2    dâ wart geselleschaft genomen:

Verse: 3    sînes landes vürsten drî
Verse: 4    riten dem künege dannen bî.

Verse: 5    alsus vuor ouch der œheim sîn,
Verse: 6    der künec Brandelidelîn,

Verse: 7    Bernout de Riviers
Verse: 8    und Afinamus von Klitiers.

Verse: 9    ieweder einen gesellen nam,
Verse: 10    der ûf die reise wol gezam:

Verse: 11    zwelfe wâren ir über al.
Verse: 12    juncherrelîn vil âne zal

Verse: 13    und manec starker sarjant
Verse: 14    ûf die reise wart benant.

Verse: 15    welh der ritter kleider möhten sîn?
Verse: 16    phellel, der vil liehten schîn

Verse: 17    gap von des goldes swære.
Verse: 18    des küneges valkenære

Verse: 19    mit im dan durch beizen riten.
Verse: 20    nû hete ouch Artûs niht vermiten,

Verse: 21    Bêâkurs den lieht gevar
Verse: 22    sande er ze halbem wege aldar

Verse: 23    dem künege zeinem geleite.
Verse: 24    über des gevildes breite,

Verse: 25    ez wære tîch oder bach,
Verse: 26    swâ er die passâschen sach,

Verse: 27    dâ reit der künec beizen her
Verse: 28    und mêre durch der minne ger.

Verse: 29    Bêâkurs in dâ emphienc,
Verse: 30    sô daz ez mit vreude ergienc.




Chapter: 722 
722


Verse: 1    mit Bêâkurse komen sint
Verse: 2    mêr danne vünfzec klâriu kint,

Verse: 3    die von ir arte gâben liehten schîn,
Verse: 4    herzogen unde grævelîn.

Verse: 5    dâ reit ouch etslîch küneges sun.
Verse: 6    dô sach man grôz emphâhen tuon

Verse: 7    von den kinden ze beider sît:
Verse: 8    si emphiengen ein ander âne nît.

Verse: 9    Bêâkurs phlac varwe lieht:
Verse: 10    der künec sich vrâgens sûmte niht,

Verse: 11    Bêne im sagete mære,
Verse: 12    wer der klâre ritter wære:

Verse: 13    "ez ist Bêâkurs, Lôtes kint."
Verse: 14    dô dâhte er: "herze, nû vint

Verse: 15    si, diu dem gelîche.
Verse: 16    der hie rîtet sô minneclîche,

Verse: 17    si ist vür wâr sîn swester.
Verse: 18    diu geworht in Sinzester

Verse: 19    mit ir sparwære sande mir den huot,
Verse: 20    ob si mir mêr genâde tuot,

Verse: 21    al irdeschiu rîcheit,
Verse: 22    ob diu erde wære noch alsô breit,

Verse: 23    dâ vür næme ich si einen.
Verse: 24    si solz mit triuwen meinen:

Verse: 25    ûf ir genâde kum ich hie.
Verse: 26    si hât mich sô getrœstet ie,

Verse: 27    ich getrûwe ir wol, daz si mir tuot,
Verse: 28    dâ von sich hœhet baz mîn muot."

Verse: 29    in nam ir klâren bruoder hant
Verse: 30    in die sîne, diu was ouch lieht erkant.




Chapter: 723 
723


Verse: 1    nû was ez ouch in dem her sô komen,
Verse: 2    Artûs hete aldâ genomen

Verse: 3    vride von der herzogin.
Verse: 4    der was ergetzens gewin

Verse: 5    komen nâch Zidegaste,
Verse: 6    den si ê klagete sô vaste.

Verse: 7    ir zorn was nâch verdecket,
Verse: 8    si hête gewecket

Verse: 9    von Gâwân etslîch ummevanc:
Verse: 10    dâ von ir zürnen was sô kranc.

Verse: 11    Artûs der Bertenois
Verse: 12    nam die klâren vrouwen kurtois,

Verse: 13    beide megede unde wîp,
Verse: 14    die truogen vlæteclîchen lîp.

Verse: 15    er hete der werden hundert
Verse: 16    in ein gezelt gesundert.

Verse: 17    niht lieber möhte ir sîn geschehen,
Verse: 18    wan daz si den künec solde sehen,

Verse: 19    Itonjê, diu ouch dâ saz.
Verse: 20    stæter vreude si niht vergaz:

Verse: 21    doch kôs man an ir ougen schîn,
Verse: 22    daz si diu minne lêrte pîn.

Verse: 23    dâ saz manec ritter lieht gemâl:
Verse: 24    doch truoc der werde Parzivâl

Verse: 25    den prîs vor ander klârheit.
Verse: 26    Gramoflanz an die snüere reit.

Verse: 27    dô vuorte der künec unervorht
Verse: 28    in Gamfassâsche geworht

Verse: 29    einen phelle mit golde vesten,
Verse: 30    der begunde verre glesten.




Chapter: 724 
724


Verse: 1    si erbeizten, die dâ komen sint.
Verse: 2    des künec Gramoflanzes kint

Verse: 3    manegiu vor im sprungen,
Verse: 4    inz poulûn si sich drungen.

Verse: 5    die kamerære en widerstrît
Verse: 6    rûmten eine strâzen wît

Verse: 7    gein der Berteneise künegîn.
Verse: 8    sîn œheim Brandelidelîn

Verse: 9    vor dem künege inz poulûn gienc:
Verse: 10    Ginôvêr den mit kusse emphienc.

Verse: 11    der künec wart ouch emphangen sus.
Verse: 12    Bernouten und Afinamus

Verse: 13    die künegîn man ouch küssen sach.
Verse: 14    Artûs ze Gramoflanze sprach:

Verse: 15    "ê ir sitzens beginnet,
Verse: 16    seht, ob ir deheine minnet

Verse: 17    dirre vrouwen, und küsset sie.
Verse: 18    iu beiden sî daz erloubet hie."

Verse: 19    im sagete, wer sîn vriundîn was,
Verse: 20    ein brief, den er ze velde las:

Verse: 21    ich meine, daz er ir bruoder sach,
Verse: 22    diu im vor al der werlde jach

Verse: 23    ir werden minne tougen.
Verse: 24    Gramoflanzes ougen

Verse: 25    si erkanden, diu im minne truoc.
Verse: 26    sîn vreude hôch was genuoc,

Verse: 27    sît Artûs hete erloubet daz,
Verse: 28    daz si beide ein ander âne haz

Verse: 29    mit gruoze emphâhen tâten kunt.
Verse: 30    er kuste Itonjê an den munt.




Chapter: 725 
725


Verse: 1    der künec Brandelidelîn
Verse: 2    saz ze Ginovêren der künegîn.

Verse: 3    ouch saz der künec Gramoflanz
Verse: 4    ze der, diu ir liehten glanz

Verse: 5    mit weinen hete begozzen.
Verse: 6    daz hete si sîn genozzen:

Verse: 7    er enwelle unschulde rechen,
Verse: 8    sus muoste er hin zir sprechen,

Verse: 9    sîn dienst nâch minnen bieten.
Verse: 10    si kunde ouch sich des nieten,

Verse: 11    daz si im dancte um sîn komen.
Verse: 12    ir rede von niemen wart vernomen:

Verse: 13    si sâhen ein ander gerne.
Verse: 14    swenne ich nû rede gelerne,

Verse: 15    sô prüeve ich, waz si spræchen dâ,
Verse: 16    eintweder nein oder jâ.

Verse: 17    Artûs ze Brandelidelîn
Verse: 18    sprach: "ir habet dem wîbe mîn

Verse: 19    iuwer mære nû genuoc gesaget."
Verse: 20    er vuorte den helt unverzaget

Verse: 21    in ein minner gezelt
Verse: 22    kurzen wec überz velt.

Verse: 23    Gramoflanz saz stille
Verse: 24    (daz was Artûses wille)

Verse: 25    und ander die gesellen sîn.
Verse: 26    dâ gâben vrouwœn klâren schîn,

Verse: 27    daz die ritter wênec dâ verdrôz.
Verse: 28    ir kurzwîle was sô grôz,

Verse: 29    si möhte ein man noch gerne doln,
Verse: 30    der nâch sorgen vreude wolde erholn.




Chapter: 726 
726


Verse: 1    vür die künegîn man dô truoc
Verse: 2    daz trinken. trunken si genuoc,

Verse: 3    die ritter und die vrouwen gar,
Verse: 4    si wurden deste baz gevar.

Verse: 5    man truoc ouch trinken dort hin în
Verse: 6    Artûs und Brandelidelîn.

Verse: 7    der schenke gienc her wider dan.
Verse: 8    Artûs sîn rede alsus huop an:

Verse: 9    "her künec, nû lât siz alsô tuon,
Verse: 10    daz der künec, iuwer swester sun,

Verse: 11    mîner swester sun mir hete erslagen:
Verse: 12    wolde er denne minne tragen

Verse: 13    gein mîner niftel, der maget,
Verse: 14    diu im ir kummer ouch dort klaget,

Verse: 15    dâ wir si liezen sitzen,
Verse: 16    vüere si denne mit witzen,

Verse: 17    si würde im nimmer dar um holt
Verse: 18    und teilte im solhen hazzes solt,

Verse: 19    des den künec möhte erdriezen,
Verse: 20    wolde er ir iht geniezen.

Verse: 21    swâ haz die minne undervert,
Verse: 22    dem stæten herzen vreude er wert."

Verse: 23    dô sprach der künec von Punturtois
Verse: 24    z Artûse dem Bertenois:

Verse: 25    "herre, si sint unser swester kint,
Verse: 26    die gein ein ander in hazze sint:

Verse: 27    wir suln den kamph understên.
Verse: 28    dâ enmac niht anders an ergên,

Verse: 29    wan daz si ein ander minnen
Verse: 30    mit herzenlîchen sinnen.




Chapter: 727 
727


Verse: 1    iuwer niftel Itonjê
Verse: 2    sol mînem neven gebieten ê,

Verse: 3    daz er den kamph durch si verber,
Verse: 4    sî daz er ir minne ger.

Verse: 5    sô wirt vür wâr der kamph vermiten
Verse: 6    gar mit strîteclîchen siten.

Verse: 7    und helfet ouch dem neven mîn
Verse: 8    hulde dâ zer herzogîn."

Verse: 9    Artûs sprach: "daz wil ich tuon.
Verse: 10    Gâwân mîner swester sun

Verse: 11    ist wol sô gewaldec ir,
Verse: 12    daz si beidiu im und ouch mir

Verse: 13    durch ir zuht die schulde gît.
Verse: 14    sô scheidet ir disehalp den strît."

Verse: 15    "ich tuon" sprach Brandelidelîn.
Verse: 16    si giengen beide wider în.

Verse: 17    dô saz der künec von Punturtois
Verse: 18    ze Ginovêren, diu was kurtois.

Verse: 19    anderhalben ir saz Parzivâl:
Verse: 20    der was ouch sô lieht gemâl,

Verse: 21    nie ouge ersach sô schœnen man.
Verse: 22    Artûs der künec der huop sich dan

Verse: 23    ze sînem neven Gâwân.
Verse: 24    dem was ze wizzene getân,

Verse: 25    der künec Gramoflanz wære komen.
Verse: 26    dô wart ouch schier vor im vernomen,

Verse: 27    daz Artûs erbeizte vor dem gezelt:
Verse: 28    gein dem spranc er ûf daz velt.

Verse: 29    si truogen daz ze samene dâ,
Verse: 30    daz diu herzogîn sprach suone jâ,




Chapter: 728 
728


Verse: 1    aber anders niht deheinen wîs,
Verse: 2    wan ob Gâwân ir âmîs

Verse: 3    wolde den kamph durch si verbern,
Verse: 4    sô wolde ouch si der suone wern:

Verse: 5    diu suone würde von ir getân,
Verse: 6    ob der künec wolde lân

Verse: 7    bîziht ûf ir sweher Lôt.
Verse: 8    bî Artûs si daz dan enbôt.

Verse: 9    Artûs der wîse hövesche man
Verse: 10    disiu mære brâhte dan.

Verse: 11    dô muoste der künec Gramoflanz
Verse: 12    verkiesen um sînen kranz

Verse: 13    und swaz er hazzes phlæge
Verse: 14    gein Lôt von Norwæge,

Verse: 15    der zegienc als in der sunnen snê
Verse: 16    durch die klâren Itonjê

Verse: 17    lûterlîche âne allen haz.
Verse: 18    daz ergienc, die wîle er bî ir saz:

Verse: 19    aller ir bete er volge jach.
Verse: 20    Gâwânen man dort komen sach

Verse: 21    mit klârlîchen liuten:
Verse: 22    ich enmöhte iu niht gar bediuten

Verse: 23    ir namen und wannen si wâren erborn.
Verse: 24    dâ wart durch liebe leit verkorn:

Verse: 25    Orgelûse diu fiere
Verse: 26    und ir werden soldiere

Verse: 27    und ouch diu Klinschores schar,
Verse: 28    ir ein teil (si enwârenz niht gar)

Verse: 29    sach man mit Gâwâne komen.
Verse: 30    Artûs gezelte wart genomen




Chapter: 729 
729


Verse: 1    diu winde von dem huote.
Verse: 2    Arnîve diu guote,

Verse: 3    Sangîve und Kundrîê,
Verse: 4    die hete Artûs gebetenê

Verse: 5    an dirre suone tegedinc.
Verse: 6    swer prüevet daz vür kleiniu dinc,

Verse: 7    der grœze, swaz er welle.
Verse: 8    Jofreit, Gâwâns geselle,

Verse: 9    vuorte die herzoginne lieht erkant
Verse: 10    underz poulûn an sîner hant.

Verse: 11    diu phlac durch zuht der sinne,
Verse: 12    die drî küneginne

Verse: 13    liez si vor ir gên dar în.
Verse: 14    die kuste Brandelidelîn:

Verse: 15    Orgelûse in ouch mit kusse emphienc.
Verse: 16    Gramoflanz durch suone gienc

Verse: 17    und ûf genâde gein ir dar.
Verse: 18    ir süezer munt rôt gevar

Verse: 19    den künec durch suone kuste,
Verse: 20    dar um si weinens luste:

Verse: 21    si dâhte an Zidegastes tôt.
Verse: 22    dô twanc si wîplîchiu nôt

Verse: 23    nâch im dennoch ir riuwe.
Verse: 24    welt ir, des jeht vür triuwe.

Verse: 25    Gâwân und Gramoflanz
Verse: 26    mit kusse ir suone ouch machten ganz.

Verse: 27    Artûs gap Itonjê
Verse: 28    Gramoflanz ze rehter ê.

Verse: 29    dâ hete er vil gedienet nâch.
Verse: 30    Bêne was vrô, dô daz geschach.




Chapter: 730 
730


Verse: 1    den ouch ir minne lêrte pîn,
Verse: 2    dem herzogen von Gôwerzîn,

Verse: 3    Lischoise wart Kundrîê gegeben:
Verse: 4    âne vreude stuont sîn leben,

Verse: 5    unz er ir werden minne emphant.
Verse: 6    dem turkoiten Flôrant

Verse: 7    Sangîven Artûs ze wîbe bôt:
Verse: 8    die hete dâ vor der künec Lôt,

Verse: 9    der vürste ouch si vil gerne nam.
Verse: 10    diu gâbe minne wol gezam.

Verse: 11    Artûs was vrouwen milte,
Verse: 12    solher gâbe in niht bevilte:

Verse: 13    des was mit râte vor erdâht.
Verse: 14    nû disiu rede wart volbrâht,

Verse: 15    dô sprach diu herzoginne,
Verse: 16    daz Gâwân hete ir minne

Verse: 17    gedient mit prîse hôch erkant,
Verse: 18    daz er ir lîbes und über ir lant

Verse: 19    von rehte herre wære.
Verse: 20    diu rede dûhte swære

Verse: 21    ir soldier, die manec sper
Verse: 22    ê brâchen durch ir minne ger.

Verse: 23    Gâwân und die gesellen sîn,
Verse: 24    Arnîve und diu herzogîn

Verse: 25    und manec vrouwe lieht gemâl
Verse: 26    und ouch der werde Parzivâl,

Verse: 27    Sangîve und Kundrîê
Verse: 28    nâmen urloup: Itonjê

Verse: 29    beleip bî Artûse dâ.
Verse: 30    nû darf niemen sprechen, wâ




Chapter: 731 
731


Verse: 1    schœner hôchgezît ergienc.
Verse: 2    Ginôvêr in ir phlege emphienc

Verse: 3    Itonjê und ir âmîs,
Verse: 4    den werden künec, der manegen prîs

Verse: 5    mit ritterschefte ê dicke erranc,
Verse: 6    des in Itonjê minne twanc.

Verse: 7    ze herbergen maneger reit,
Verse: 8    dem hôhiu minne vuocte leit.

Verse: 9    des nahtes um ir ezzen
Verse: 10    muge wir mære wol vergezzen.

Verse: 11    swer dâ werder minne phlac,
Verse: 12    der wunschte der naht vür den tac.

Verse: 13    der künec Gramoflanz enbôt
Verse: 14    (des twanc in hôchverte nôt)

Verse: 15    ze Rosche Sabînes den sînen,
Verse: 16    si solden sich des pînen,

Verse: 17    daz si abe bræchen bî dem mer
Verse: 18    und vor tage kœmen mit sînem her

Verse: 19    und daz sîn marschalc næme
Verse: 20    stat, diu her gezæme.

Verse: 21    "mir selben prüevet hôhiu dinc,
Verse: 22    ieslîchem vürsten sunderrinc."

Verse: 23    des wart diu hôhe koste erdâht.
Verse: 24    die boten vuoren: dô was ez naht.

Verse: 25    man sach dâ manegen trûregen lîp,
Verse: 26    den daz gelêret heten wîp,

Verse: 27    wan swem sîn dienst verswindet,
Verse: 28    daz er niht lônes vindet,

Verse: 29    dem muoz gein sorgen wesen gâch,
Verse: 30    dâ enreiche wîbe helfe nâch.




Chapter: 732 
732


Verse: 1    nû dâhte aber Parzivâl
Verse: 2    an sîn wîp die lieht gemâl

Verse: 3    und an ir kiuschen süeze.
Verse: 4    ob er keine ander grüeze,

Verse: 5    daz er dienst nâch minnen biete
Verse: 6    und sich unstæte niete?

Verse: 7    solh minne wirt von im gespart.
Verse: 8    grôz triuwe hete im sô bewart

Verse: 9    sîn manlîch herze und ouch den lîp,
Verse: 10    daz vür wâr nie ander wîp

Verse: 11    wart gewaldec sîner minne,
Verse: 12    niwan diu küneginne

Verse: 13    Kondwîrâmûrs,
Verse: 14    diu geflôrierte bêâ flûrs.

Verse: 15    er dâhte: "sît ich minnen kan,
Verse: 16    wie hât diu minne an mir getân?

Verse: 17    nû bin ich doch ûz minne erborn:
Verse: 18    wie hân ich minne alsus verlorn?

Verse: 19    [sol ich nâch dem grâle ringen,
Verse: 20    sô muoz mich immer twingen

Verse: 21    ir kiuschlîcher ummevanc,
Verse: 22    von der ich schiet, des ist ze lanc.]

Verse: 23    sol ich mit den ougen vreude sehen
Verse: 24    und muoz mîn herze jâmers jehen?

Verse: 25    diu werc stênt ungelîche.
Verse: 26    hôhes muotes rîche

Verse: 27    wirt niemen solher phlihte.
Verse: 28    gelücke mich berihte,

Verse: 29    waz mirz wageste drum sî."
Verse: 30    im lac sîn harnas nâhe bî.




Chapter: 733 
733


Verse: 1    er dâhte: "sît ich mangel hân,
Verse: 2    daz den sældehaften undertân

Verse: 3    ist, ich meine die minne,
Verse: 4    diu maneges trûregen sinne

Verse: 5    mit vreuden helfe ergeilet,
Verse: 6    sît ich des bin verteilet,

Verse: 7    ich enruoche nû, waz mir geschiht.
Verse: 8    got wil mîner vreude niht.

Verse: 9    diu mich twinget minnen gir,
Verse: 10    stüende unser minne, mîn und ir,

Verse: 11    daz scheiden dar zuo hôrte,
Verse: 12    sô daz uns zwîvel stôrte,

Verse: 13    ich möhte wol zander minne komen:
Verse: 14    nû hât ir minne mir benomen

Verse: 15    ander minne und vreudebæren trôst.
Verse: 16    ich bin trûrens unerlôst.

Verse: 17    gelücke müeze vreude wern,
Verse: 18    die endehafter vreude gern:

Verse: 19    got gebe vreude al disen scharn.
Verse: 20    ich wil ûz disen vreuden varn."

Verse: 21    er greif, dâ sîn harnas lac,
Verse: 22    des er dicke al eine phlac,

Verse: 23    daz er sich balde wâpende drîn.
Verse: 24    nû wil er werben niuwen pîn.

Verse: 25    dô der vreudenvlühtec man
Verse: 26    hête al sîn harnas an,

Verse: 27    er sateltez ors mit sîner hant.
Verse: 28    schilt und sper bereit er vant.

Verse: 29    man hôrte sîn reise smorgens klagen.
Verse: 30    dô er dannen schiet, dô begundez tagen.




Chapter: 734 
734


Verse: 1    Vil liute des hât verdrozzen,
Verse: 2    den diz mære was vor beslozzen:

Verse: 3    genuoge kundenz nie ervarn
Verse: 4    (nû wil ich daz niht langer sparn,

Verse: 5    ich tuonz iu kunt mit rehter sage,
Verse: 6    wande ich in dem munde trage

Verse: 7    daz slôz dirre âventiure),
Verse: 8    wie der süeze und der gehiure

Verse: 9    Amfortas wart wol gesunt.
Verse: 10    uns tuot diu âventiure kunt,

Verse: 11    wie von Pelrapeire diu künegîn
Verse: 12    ir kiuschen wîplîchen sin

Verse: 13    behielt unz an ir lônes stat,
Verse: 14    dâ si in hôhe sælde trat:

Verse: 15    Parzivâl daz wirbet.
Verse: 16    ob mîn kunst niht verdirbet,

Verse: 17    ich sage alrêst sîn arbeit.
Verse: 18    swaz sîn hant ie gestreit,

Verse: 19    daz was mit kinden her getân.
Verse: 20    möhte ich dises mæres wandel hân,

Verse: 21    ungerne wolde ich in wâgen:
Verse: 22    des kunde ouch mich betrâgen.

Verse: 23    nû bevilhe ich sîn gelücke
Verse: 24    sînem herzen, der sælden stücke,

Verse: 25    dâ diu vrevel bî der kiusche lac,
Verse: 26    wande ez nie zageheit gephlac.

Verse: 27    daz müeze im vestenunge geben,
Verse: 28    daz er behalde nû sîn leben,

Verse: 29    sît ez sich hât an den gezoget,
Verse: 30    in bestêt ob allem strîte ein voget




Chapter: 735 
735


Verse: 1    ûf sîner unverzageten reise.
Verse: 2    der selbe kurteise

Verse: 3    was ein heidenscher man,
Verse: 4    der toufes künde nie gewan.

Verse: 5    Parzivâl reit balde
Verse: 6    gein einem grôzen walde

Verse: 7    ûf einer liehten waste
Verse: 8    gein einem rîchen gaste.

Verse: 9    ez ist wunder, ob ich armer man
Verse: 10    die rîcheit iu gesagen kan,

Verse: 11    die der heiden vür zimierde truoc.
Verse: 12    sage ich des mêre denne genuoc,

Verse: 13    dennoch mac ichs iu mêr wol sagen,
Verse: 14    wil ich sîner rîcheit niht gedagen.

Verse: 15    swaz diende Artûses hant
Verse: 16    ze Bertâne und in Engellant,

Verse: 17    daz vergülte niht die steine,
Verse: 18    die mit edelem arte reine

Verse: 19    lâgen ûf des heldes wâpenroc.
Verse: 20    der was tiure âne al getroc:

Verse: 21    rubîne, kalzidône
Verse: 22    wâren dâ ze swachem lône.

Verse: 23    der wâpenroc gap blanken schîn.
Verse: 24    in dem berge z Agremuntîn

Verse: 25    die würme salamander
Verse: 26    in worhten zein ander

Verse: 27    in dem heizen viure.
Verse: 28    die wâren steine tiure

Verse: 29    lâgen drûfe tunkel unde lieht:
Verse: 30    ir art mac ich benennen niht.




Chapter: 736 
736


Verse: 1    sîn gir stuont nâch minne
Verse: 2    und nâch prîses gewinne:

Verse: 3    daz gâben ouch allez meistec wîp,
Verse: 4    dâ mite der heiden sînen lîp

Verse: 5    kostenlîch zimierte.
Verse: 6    diu minne kondewierte

Verse: 7    in sîn manlîch herze hôhen muot,
Verse: 8    als si noch dem minne gernden tuot.

Verse: 9    er truoc ouch durch prîses lôn
Verse: 10    ûf dem helme ein ezidemôn:

Verse: 11    swelhe würme sint eiterhaft,
Verse: 12    von des selben tierlînes kraft

Verse: 13    hânt si lebens deheine vrist,
Verse: 14    swenne ez von in ersmecket ist.

Verse: 15    Topedissimonte
Verse: 16    und Assigarzjonte,

Verse: 17    Tasmê und Arâbî
Verse: 18    sint vor solhem phelle vrî,

Verse: 19    als sîn ors truoc kovertiure.
Verse: 20    der ungetoufte gehiure

Verse: 21    ranc nâch wîbe lône:
Verse: 22    des zimierte er sich sus schône.

Verse: 23    sîn hôhez herze in des betwanc,
Verse: 24    daz er nâch werder minne ranc.

Verse: 25    der selbe werlîche knabe
Verse: 26    hete in einer wilden habe

Verse: 27    zem fôreht geankert ûf dem mer.
Verse: 28    er hete vünf und zweinzec her,

Verse: 29    der neheinez sandern rede vernam:
Verse: 30    als sîner rîcheit wol gezam,




Chapter: 737 
737


Verse: 1    alsus manec sunderlant
Verse: 2    diende sîner werden hant,

Verse: 3    môre und ander Sarrazîne.
Verse: 4    mit ungelîchem schîne

Verse: 5    in sînem wît gesamenten her
Verse: 6    was manec wunderlîchiu wer.

Verse: 7    ouch reit nâch âventiure dan
Verse: 8    von sînem her dirre eine man

Verse: 9    durch baneken inz fôreht.
Verse: 10    sît si selbe nâmen in daz reht,

Verse: 11    die künege ich lâze rîten,
Verse: 12    al eine nâch prîse strîten.

Verse: 13    Parzivâl reit niht eine:
Verse: 14    dâ was mit im gemeine

Verse: 15    er selbe und ouch sîn hôher muot,
Verse: 16    der sô manlîch wer dâ tuot,

Verse: 17    daz ez diu wîp solden loben,
Verse: 18    si enwolden denne durch lôsheit toben.

Verse: 19    hie wellent ein ander vâren,
Verse: 20    die mit kiusche lemmer wâren

Verse: 21    und lewen an der vrecheit.
Verse: 22    ouwê, sît diu erde was sô breit,

Verse: 23    daz si ein ander niht vermiten,
Verse: 24    die dâ um unschulde striten!

Verse: 25    ich sorge des, den ich hân brâht,
Verse: 26    wan daz ich trôstes hân gedâht,

Verse: 27    in sül des grâles kraft ernern.
Verse: 28    in sol ouch diu minne wern:

Verse: 29    den was er beiden dienesthaft
Verse: 30    âne wanc mit dienestlîcher kraft.




Chapter: 738 
738


Verse: 1    mîn kunst mir des niht witze gît,
Verse: 2    daz ich gesage disen strît

Verse: 3    bescheidenlîche, als er ergienc.
Verse: 4    ieweders ouge blic emphienc,

Verse: 5    daz er den andern komen sach.
Verse: 6    sweders herze dar um vreuden jach,

Verse: 7    dâ stuont ein trûren nâhe bî.
Verse: 8    die lûtern truopheite vrî,

Verse: 9    ieweder des andern herze truoc:
Verse: 10    ir vremde was heimlîch genuoc.

Verse: 11    nû enmac ich disen heiden
Verse: 12    von dem getouften niht gescheiden,

Verse: 13    si enwellen haz erzeigen.
Verse: 14    daz solde in vreude neigen,

Verse: 15    die sint erkant vür guotiu wîp.
Verse: 16    ieweder durch vriundinne lîp

Verse: 17    sîn verh gein der herte bôt.
Verse: 18    gelücke scheidez âne tôt.

Verse: 19    den lewen sîn muoter tôt gebirt:
Verse: 20    von sîns vater galme er lebendec wirt.

Verse: 21    dise zwêne wâren ûz krache erborn,
Verse: 22    von maneger tjost nâch prîse erkorn:

Verse: 23    si kunden ouch mit tjoste.
Verse: 24    mit sper zernder koste

Verse: 25    leischierende si die zoume
Verse: 26    kurzten und tâten goume,

Verse: 27    swenne si punierten,
Verse: 28    daz si niht feilierten.

Verse: 29    si phlâgens unvergezzen:
Verse: 30    dâ wart vaste gesezzen




Chapter: 739 
739


Verse: 1    und gein der tjost geschicket
Verse: 2    und diu ors mit sporn gezwicket.

Verse: 3    hie wart diu tjost alsô geriten,
Verse: 4    beidiu kollier versniten

Verse: 5    von starken spern, diu sich niht bugen.
Verse: 6    die sprîzen von der tjoste vlugen.

Verse: 7    ez hete der heiden gar vür haz,
Verse: 8    daz dirre man vor im gesaz,

Verse: 9    wan des nie man vor im gephlac,
Verse: 10    gein dem er strîtes sich bewac.

Verse: 11    ob si iht swerte vuorten,
Verse: 12    dâ si zein ander ruorten?

Verse: 13    diu wâren dâ scharph und al bereit.
Verse: 14    ir kunst und ir manheit

Verse: 15    wart dâ erzeiget schiere.
Verse: 16    ezidemôn dem tiere

Verse: 17    wart etslîch wunde geslagen,
Verse: 18    ez mohte der helm dar under klagen.

Verse: 19    diu ors vor müede wurden heiz.
Verse: 20    si versuochten manegen niuwen kreiz:

Verse: 21    si beide ab orsen sprungen.
Verse: 22    alrêst diu swert erklungen.

Verse: 23    der heiden tet dem getouften wê.
Verse: 24    des krîe was Tasmê

Verse: 25    und swenne er schrîte Tabronit,
Verse: 26    sô trat er vürbaz einen trit.

Verse: 27    werlîch was der getoufte
Verse: 28    ûf manegem dræten loufte,

Verse: 29    den si zein ander tâten.
Verse: 30    ir strît was sô gerâten,




Chapter: 740 
740


Verse: 1    daz ich die rede mac niht verdagen,
Verse: 2    ich enmüeze ir strît mit triuwen klagen,

Verse: 3    sît ein verh und ein bluot
Verse: 4    solh ungenâde ein ander tuot:

Verse: 5    si wâren doch beide eins mannes kint,
Verse: 6    der geliuterten triuwe fundamint.

Verse: 7    den heiden minne nie verdrôz.
Verse: 8    des was sîn herze in strîte grôz:

Verse: 9    gein prîse truoc er willen
Verse: 10    durch die künegîn Sekundillen.

Verse: 11    diu daz lant ze Tribalibôt
Verse: 12    im gap, diu was sîn schilt in nôt.

Verse: 13    der heiden nam an strîte zuo:
Verse: 14    wie tuon ich dem getouften nuo?

Verse: 15    er enwelle an minne denken,
Verse: 16    sô enmac er niht entwenken,

Verse: 17    dirre strît müeze im erwerben
Verse: 18    von sheidens hant ein sterben.

Verse: 19    daz wende, tugenthafter grâl,
Verse: 20    Kondwîrâmûrs diu lieht gemâl,

Verse: 21    hie stêt iuwer beider dienestman
Verse: 22    in der grœsten nôt, die er ie gewan.

Verse: 23    der heiden warf daz swert ûf hôch.
Verse: 24    manec sîn slac sich sus gezôch,

Verse: 25    daz Parzivâl kom ûf diu knie.
Verse: 26    man mac wol jehen, sus striten sie,

Verse: 27    der si beide nennen wil ze zwein.
Verse: 28    si wâren doch beide niht wan ein:

Verse: 29    mîn bruoder und ich daz ist ein lîp,
Verse: 30    als ist guot man und des guot wîp.




Chapter: 741 
741


Verse: 1    der heiden tet dem getouften wê.
Verse: 2    des schilt was holz, hiez aspindê:

Verse: 3    daz vûlet noch enbrinnet.
Verse: 4    er was von ir geminnet,

Verse: 5    diu in im gap, des sît gewis.
Verse: 6    turkoise, krisoprassis,

Verse: 7    smârâde, rubîne,
Verse: 8    vil steine mit sunderschîne

Verse: 9    wâren verwiert durch kostenlîchen prîs
Verse: 10    alumme ûf diu buckelrîs.

Verse: 11    ûf dem buckelhûse stuont
Verse: 12    ein stein, des namen tuon ich iu kunt:

Verse: 13    antrax dort genennet,
Verse: 14    karfunkel hie bekennet.

Verse: 15    durch der minne kondewier
Verse: 16    ezidemôn das reine tier

Verse: 17    hete im ze wâpene gegeben,
Verse: 18    in der genâden er wolde leben,

Verse: 19    diu künegîn Sekundille.
Verse: 20    diz wâpen was ir wille.

Verse: 21    dâ streit der triuwen lûterheit,
Verse: 22    grôz triuwe aldâ mit triuwen streit.

Verse: 23    durch minne heten si gegeben
Verse: 24    mit kamphe ûf urteil beide ir leben:

Verse: 25    ieweders hant was sicherbote.
Verse: 26    der getoufte wol getrûte gote,

Verse: 27    sît er von Trevrezente schiet,
Verse: 28    der im sô herzenlîche riet,

Verse: 29    er solde helfe an den gern,
Verse: 30    der in sorge vreude kunde wern.




Chapter: 742 
742


Verse: 1    der heiden truoc et starkiu lit.
Verse: 2    swenne er schrîte Tabronit,

Verse: 3    dâ diu künegîn Sekundille was,
Verse: 4    vor der muntâne ze Kaukasas,

Verse: 5    sô gewan er niuwen hôhen muot
Verse: 6    gein dem, der ie was behuot

Verse: 7    vor solhem strîtes überlast:
Verse: 8    er was schumfentiure ein gast,

Verse: 9    daz er si nie gedolte,
Verse: 10    doch si maneger zim erholte.

Verse: 11    mit kunst si die arme erswungen.
Verse: 12    viurs blicke ûz helmen sprungen,

Verse: 13    von ir swerten gienc der sûre wint.
Verse: 14    got ner dâ Gahmuretes kint.

Verse: 15    der wunsch wirt in beiden,
Verse: 16    dem getouften und dem heiden:

Verse: 17    die nande ich ê vür einen.
Verse: 18    sus begunden siz ouch meinen,

Verse: 19    wæren si ein ander baz bekant:
Verse: 20    si ensazten niht sô hôhiu phant.

Verse: 21    ir strît galt niht mêre
Verse: 22    wan vreude, sælde und êre.

Verse: 23    swer dâ den prîs gewinnet,
Verse: 24    ob der triuwe minnet,

Verse: 25    werltlîche vreude er hât verlorn
Verse: 26    und immer herzen riuwe erkorn.

Verse: 27    wes sûmestû dich, Parzivâl,
Verse: 28    daz dû an die kiuschen lieht gemâl

Verse: 29    niht denkes, ich meine dîn wîp?
Verse: 30    wiltû behalden hie den lîp?




Chapter: 743 
743


Verse: 1    der heiden truoc zwuo geselleschaft,
Verse: 2    dar an doch lac sîn meistiu kraft:

Verse: 3    einiu daz er minne phlac,
Verse: 4    diu mit stæte in sînem herzen lac,

Verse: 5    daz ander wâren steine,
Verse: 6    die mit edelem arte reine

Verse: 7    in hôchgemüete lêrten
Verse: 8    und sîne kraft gemêrten.

Verse: 9    mich müet, daz der getoufte
Verse: 10    an strîte und an loufte

Verse: 11    sus müedet und an starken slegen.
Verse: 12    ob im nû niht gehelfen megen

Verse: 13    Kondwîrâmûrs noch der grâl,
Verse: 14    werlîcher Parzivâl,

Verse: 15    sô müezes einen trôst doch haben,
Verse: 16    daz die klâren süezen knaben

Verse: 17    sus vruo niht verweiset sîn,
Verse: 18    Kardeiz und Loherangrîn,

Verse: 19    die beide lebendec truoc sîn wîp,
Verse: 20    dô er jungest ummevienc ir lîp.

Verse: 21    mit rehter kiusche erworben kint,
Verse: 22    ich wæne, diu smannes sælde sint.

Verse: 23    der getoufte nam an kreften zuo.
Verse: 24    er dâhte (des was im niht ze vruo)

Verse: 25    an sîn wîp, die küneginne,
Verse: 26    und an ir werden minne,

Verse: 27    die er mit swertes schimphe erranc,
Verse: 28    dâ viur von slegen ûz helmen spranc,

Verse: 29    vor Pelrapeire an Klâmidê.
Verse: 30    Tabronît und Tasmê,




Chapter: 744 
744


Verse: 1    den wart hie widerruoft gewegen:
Verse: 2    Parzivâl begunde ouch phlegen,

Verse: 3    daz er Pelrapeire schrîte.
Verse: 4    Kondwîrâmûrs bezîte

Verse: 5    durch vier künecrîche aldar
Verse: 6    sîn nam mit minnen kreften war.

Verse: 7    dar sprungen, des ich wæne,
Verse: 8    von des heidens schilte spæne,

Verse: 9    etslîcher hundert marke wert.
Verse: 10    von Gaheviez daz starke swert

Verse: 11    mit slage ûf sheidens helme brast,
Verse: 12    sô daz der küene rîche gast

Verse: 13    mit strûche venje suochte.
Verse: 14    got des niene ruochte,

Verse: 15    daz Parzivâl daz rê nemen
Verse: 16    in sîner hende solde zemen:

Verse: 17    daz swert er îthêre nam,
Verse: 18    als sîner tumpheit dô wol zam.

Verse: 19    der ê nie geseic durch swertes swanc,
Verse: 20    der heiden snellîche ûf dô spranc.

Verse: 21    ez ist noch ungescheiden.
Verse: 22    zurteile stêz in beiden

Verse: 23    vor der hœsten hende,
Verse: 24    daz diu ir sterben wende!

Verse: 25    der heiden was muotes rîche,
Verse: 26    der sprach dô höveschlîche

Verse: 27    en franzois, daz er kunde,
Verse: 28    ûz heidenschem munde:

Verse: 29    "ich sihe wol, werlîcher man,
Verse: 30    dîn strît würde âne swert getân:




Chapter: 745 
745


Verse: 1    waz prîses bejagete ich danne an dir?
Verse: 2    stant stille unde sage mir,

Verse: 3    werlîcher helt, wer dû sîs.
Verse: 4    vür wâr dû hetes mînen prîs

Verse: 5    behabet, der lange ist mich gewert,
Verse: 6    wære dir zebrosten niht dîn swert.

Verse: 7    nû sî von uns beiden vride,
Verse: 8    unz uns geruowen baz diu lide."

Verse: 9    si sâzen nider ûf daz gras:
Verse: 10    manheit bî zuht an beiden was

Verse: 11    und ir beider jâr von solher zît,
Verse: 12    zalt noch ze junc si beide ûf strît.

Verse: 13    der heiden zem getouften sprach:
Verse: 14    "nû geloube, helt, daz ich gesach

Verse: 15    bî mînen zîten noch nie man,
Verse: 16    der baz den prîs möhte hân,

Verse: 17    den man in strîte sol bejagen.
Verse: 18    nû ruoche, helt, mir beidiu sagen,

Verse: 19    dînen namen und dînen art:
Verse: 20    sôst wol bewendet her mîn vart."

Verse: 21    dô sprach Herzeloiden sun:
Verse: 22    "sol ich daz durch vorhte tuon,

Verse: 23    sô endarf es niemen an mich gern,
Verse: 24    sol ichs betwungenlîche wern."

Verse: 25    der heiden von Tasmê
Verse: 26    sprach: "ich wil mich nennenê

Verse: 27    und lâ daz laster wesen mîn.
Verse: 28    ich bin Feirefîz Anschevîn,

Verse: 29    sô rîche wol, daz mîner hant
Verse: 30    mit zinse dienet manec lant."




Chapter: 746 
746


Verse: 1    dô disiu rede von im geschach,
Verse: 2    Parzivâl zem heiden sprach:

Verse: 3    "wâ von sît ir ein Anschevîn?
Verse: 4    Anschouwe ist von erbe mîn,

Verse: 5    bürge, lant unde stete.
Verse: 6    herre, ir sult durch mîne bete

Verse: 7    einen andern namen kiesen.
Verse: 8    solde ich mîn lant verliesen

Verse: 9    und die werden stat Bêalzenân,
Verse: 10    sô hetet ir mir gewalt getân.

Verse: 11    ist unser deweder ein Anschevîn,
Verse: 12    daz sol ich von arte sîn.

Verse: 13    doch ist mir vür wâr gesaget,
Verse: 14    daz ein helt unverzaget

Verse: 15    wone in der heidenschaft,
Verse: 16    der habe mit ritterlîcher kraft

Verse: 17    minne und prîs behalden,
Verse: 18    daz er muoz beider walden:

Verse: 19    der ist ze bruoder mir benant.
Verse: 20    si hânt in dâ vür prîs erkant."

Verse: 21    aber sprach dô Parzivâl:
Verse: 22    "herre, iuwers antlitzes mâl,

Verse: 23    hete ich diu kuntlîche ersehen,
Verse: 24    sô würde iu schier von mir verjehen,

Verse: 25    als er mir kunt ist getân.
Verse: 26    herre, welt irz an mich lân,

Verse: 27    sô enblœzet iuwer houbet.
Verse: 28    ob ir mirz geloubet,

Verse: 29    mîn hant iuch strîtes gar verbirt,
Verse: 30    unz ez anderstunt gewâpent wirt."




Chapter: 747 
747


Verse: 1    dô sprach der heidensche man:
Verse: 2    "dîns strîtes ich wênec angest hân.

Verse: 3    stüende ich gar blôz, sît ich hân swert,
Verse: 4    dû wæres doch schumfentiure gewert,

Verse: 5    sît dîn swert zebrosten ist.
Verse: 6    al dîn werlîcher list

Verse: 7    mac dich vor tôde niht bewarn,
Verse: 8    ich enwelle dich anders gerne sparn.

Verse: 9    ê dû begundes ringen,
Verse: 10    mîn swert lieze ich klingen

Verse: 11    beidiu durch îser und durch vel."
Verse: 12    der heiden starc unde snel

Verse: 13    tet manlîchen site schîn:
Verse: 14    "diz swert sol unser deweders sîn."

Verse: 15    ez warf der küene degen balt
Verse: 16    verre von im in den walt.

Verse: 17    er sprach: "sol nû hie strît ergên,
Verse: 18    dâ muoz gelîchiu schanze stên."

Verse: 19    dô sprach der rîche Feirefîz:
Verse: 20    "helt, durch dîner zühte vlîz,

Verse: 21    sît dû bruoder meges hân,
Verse: 22    sô sage mir, wie ist er getân?

Verse: 23    tuo mir sîn antlitze erkant,
Verse: 24    wie dir sîn varwe sî genant."

Verse: 25    dô sprach Herzeloiden kint:
Verse: 26    "als ein geschriben permint

Verse: 27    swarz und blanc her und dâ,
Verse: 28    sus nande mir in Ekubâ."

Verse: 29    der heiden sprach: "der bin ich."
Verse: 30    si beide wênec dô sûmten sich,




Chapter: 748 
748


Verse: 1    ieweder sîn houbet schiere
Verse: 2    von helme und von herseniere

Verse: 3    enblôzte an der selben stunt.
Verse: 4    Parzivâl vant hôhen vunt

Verse: 5    und den liebesten, den er ie vant.
Verse: 6    der heiden schiere wart erkant,

Verse: 7    wande er truoc agelstern mâl.
Verse: 8    Feirefîz und Parzivâl

Verse: 9    mit kusse understuonden haz:
Verse: 10    in zam ouch beiden vriuntschaft baz

Verse: 11    dan gein ein ander herzen nît.
Verse: 12    triuwe und liebe schiet ir strît.

Verse: 13    der heiden dô mit vreuden sprach:
Verse: 14    "ô wol mich, daz ich ie gesach

Verse: 15    des werden Gahmuretes kint!
Verse: 16    al mîne gote des gêret sint.

Verse: 17    mîn gotinne Jûnô
Verse: 18    dises prîses mac wol wesen vrô.

Verse: 19    mîn kreftec got Jûpiter
Verse: 20    dirre sælden was mîn wer.

Verse: 21    gote und gotinne,
Verse: 22    iuwer kraft ich immer minne.

Verse: 23    gêrt sî des plânêten schîn,
Verse: 24    dar inne diu reise mîn

Verse: 25    nâch âventiure wart getân
Verse: 26    gein dir, vorhtlîch süezer man,

Verse: 27    daz mich von dîner hant gerou.
Verse: 28    gêrt sî luft unde tou,

Verse: 29    daz hiute morgen ûf mich reis.
Verse: 30    minnen slüzzel kurteis,




Chapter: 749 
749


Verse: 1    ô wol diu wîp, diu dich suln sehen!
Verse: 2    waz den doch sælden ist geschehen!"

Verse: 3    "ir sprechet wol. ich spræche baz,
Verse: 4    ob ich daz kunde, âne allen haz:

Verse: 5    nû bin ich leider niht sô wîs,
Verse: 6    des iuwer werdeclîcher prîs

Verse: 7    mit worten mege gehœhet sîn.
Verse: 8    got weiz aber wol den willen mîn:

Verse: 9    swaz herze und ougen künste hânt
Verse: 10    an mir, diu beidiu niht erlânt,

Verse: 11    iuwer prîs saget vor, si volgent nâch.
Verse: 12    daz nie von ritters hant geschach

Verse: 13    mir grœzer nôt, vür wâr ichz weiz,
Verse: 14    denne von iu" sprach der von Kanvoleiz.

Verse: 15    dô sprach der rîche Feirefîz:
Verse: 16    "Jûpiter hât sînen vlîz,

Verse: 17    werder helt, geleget an dich.
Verse: 18    dû solt niht mêre irzen mich:

Verse: 19    wir heten beide doch einen vater."
Verse: 20    mit bruoderlîchen triuwen bater,

Verse: 21    daz er irzens in erlieze
Verse: 22    und in duzenlîche hieze.

Verse: 23    diu rede was Parzivâle leit.
Verse: 24    der sprach: "bruoder, iuwer rîcheit

Verse: 25    gelîcht wol dem bârucke sich,
Verse: 26    sô sît ir elder ouch denne ich:

Verse: 27    mîn jugent und mîn armuot
Verse: 28    sol solher lôsheit sîn behuot,

Verse: 29    daz ich iu duzen biete,
Verse: 30    swenne ich mich zühte niete."




Chapter: 750 
750


Verse: 1    der von Tribalibot
Verse: 2    Jûpiter sînen got

Verse: 3    mit worten êrte manegen wîs.
Verse: 4    er gap ouch vil hôhen prîs

Verse: 5    sîner gotinne Jûnô,
Verse: 6    daz si daz weter vuocte sô,

Verse: 7    dâ mit er und al sîn her
Verse: 8    gein dem lande ûf dem mer

Verse: 9    lantveste nâmen,
Verse: 10    dâ si zein ander quâmen.

Verse: 11    anderstunt si nider sâzen,
Verse: 12    die beide des niht vergâzen,

Verse: 13    si enbüten ein ander êre.
Verse: 14    der heiden sprach dô mêre:

Verse: 15    "ich wil lâzen dir zwei rîchiu lant
Verse: 16    dienstlîchen immer dîner hant,

Verse: 17    diu mîn vater und der dîne erwarp,
Verse: 18    dô der künec Isenhart erstarp,

Verse: 19    Zazamanc und Azagouc.
Verse: 20    sîn manheit dâ niemen trouc,

Verse: 21    wan daz er liez verweiset mich.
Verse: 22    gein mînem vater der gerich

Verse: 23    ist mînhalp noch unverkorn.
Verse: 24    sîn wîp, von der ich wart geborn,

Verse: 25    durch minne ein sterben nâch im kôs,
Verse: 26    dô si minne an im verlôs.

Verse: 27    ich sæhe doch gerne den selben man:
Verse: 28    mir ist ze wizzene getân.

Verse: 29    daz nie bezzer ritter enwart.
Verse: 30    nâch im ist kostenlîch mîn vart."




Chapter: 751 
751


Verse: 1    Parzivâl hin zim dô sprach:
Verse: 2    "ich bin ouch, der in nie gesach.

Verse: 3    man saget mir guotiu werc von im
Verse: 4    (an maneger stat ich diu vernim),

Verse: 5    daz er wol kunde in strîten
Verse: 6    sînen prîs gewîten

Verse: 7    und werdekeit gemachen hôch.
Verse: 8    elliu missewende in vlôch.

Verse: 9    er was wîben undertân:
Verse: 10    ob die triuwe kunden hân,

Verse: 11    si lôndens âne valschen list.
Verse: 12    dâ von der touf noch gêret ist,

Verse: 13    phlac er, triuwe âne wenken.
Verse: 14    er kunde ouch wol verkrenken

Verse: 15    alle valschlîche tât:
Verse: 16    herzen stæte im gap den rât.

Verse: 17    daz ruochten si mich wizzen lân,
Verse: 18    den kündec was der selbe man,

Verse: 19    den ir sô gerne sæhet.
Verse: 20    ich wæne, ir prîses jæhet

Verse: 21    im, ob er noch lebete,
Verse: 22    wande er nâch prîse strebete.

Verse: 23    sîn dienest twanc der wîbe lôn,
Verse: 24    daz der künec Ipomidôn

Verse: 25    gein im tjostierens phlac.
Verse: 26    diu tjost ergienc vor Baldac:

Verse: 27    dâ wart sîn werdeclîchez leben
Verse: 28    durch minne an den rê gegeben.

Verse: 29    wir hân in ze rehter tjost verlorn,
Verse: 30    von dem wir beide sîn erborn."




Chapter: 752 
752


Verse: 1    "ouwê der unergezten nôt!"
Verse: 2    sprach der heiden. "ist mîn vater tôt?

Verse: 3    ich mac wol vreuden vlüste jehen
Verse: 4    und vreuden vunt mit wârheit spehen.

Verse: 5    ich hân an disen stunden
Verse: 6    vreude verlorn und vreude vunden,

Verse: 7    wil ich der wârheit grîfen zuo.
Verse: 8    beidiu mîn vater und ouch dû

Verse: 9    und ich, wir wâren gar al ein,
Verse: 10    doch ez an drîen stücken schein.

Verse: 11    swâ man siht den wîsen man,
Verse: 12    der enzelt deheine sippe dan,

Verse: 13    zwischen vater und des kinden,
Verse: 14    wil er die wârheit vinden.

Verse: 15    mit dir selben hâstû hie gestriten,
Verse: 16    gein mir selben ich kom ûf strît geriten,

Verse: 17    mich selben hete ich gerne erslagen.
Verse: 18    dô enkundestû des niht verzagen,

Verse: 19    dû enwertes mir mîn selbes lîp.
Verse: 20    Jûpiter, diz wunder schrîp:

Verse: 21    dîn kraft tet uns helfe kunt,
Verse: 22    daz si unser sterben understuont."

Verse: 23    er lachte und weinde tougen.
Verse: 24    sîniu heidenschiu ougen

Verse: 25    begunden wazzer rêren
Verse: 26    al nâch des toufes êren.

Verse: 27    der touf sol lêren triuwe,
Verse: 28    sît unser ê diu niuwe

Verse: 29    nâch Kriste wart genennet:
Verse: 30    an Kriste ist triuwe erkennet.




Chapter: 753 
753


Verse: 1    der heiden sprach, ich sage iu wie:
Verse: 2    "wir suln niht langer sitzen hie.

Verse: 3    rît mit mir niht ze verre.
Verse: 4    loschieren ûf dirre terre

Verse: 5    durch dîn schouwen von dem mer
Verse: 6    heize ichz rîcheste her,

Verse: 7    den Jûnô ie gap segels luft.
Verse: 8    mit wârheit âne triegens guft

Verse: 9    zeige ich dir manegen werden man,
Verse: 10    der mir ist dienstes undertân.

Verse: 11    dâ soltû rîten hin mit mir."
Verse: 12    Parzivâl sprach zim: "sît ir

Verse: 13    sô gewaldec iuwer liute,
Verse: 14    daz si iuwer bîten hiute

Verse: 15    und al die wîle ir von in sît?"
Verse: 16    der heiden sprach: "âne strît.

Verse: 17    wære ich von in halbez jâr,
Verse: 18    mîn biten rîche und arme gar:

Verse: 19    si engetorsten ninder kêren.
Verse: 20    gespîset wol nâch êren

Verse: 21    sint al ir schif in der habe:
Verse: 22    ors noch man niht dorften drabe,

Verse: 23    ez enwære durch fontâne
Verse: 24    und durch den luft gein dem plâne."

Verse: 25    Parzivâl zem bruoder sîn
Verse: 26    sprach: "sô sult ir vrouwen schîn

Verse: 27    sehen und grôze wünne,
Verse: 28    von mînem werden künne

Verse: 29    manegen ritter kurtois.
Verse: 30    Artûs der Bertenois




Chapter: 754 
754


Verse: 1    liget hie bî mit werder diet,
Verse: 2    von den ich mich hiute schiet,

Verse: 3    mit grôzer minneclîcher schar.
Verse: 4    wir sehen dâ vrouwen wol gevar."

Verse: 5    dô der heiden hôrte nennen wîp
Verse: 6    (diu wâren et sîn selbes lîp),

Verse: 7    er sprach: "dâ vüere mich hin mit dir.
Verse: 8    dar zuo soltû sagen mir

Verse: 9    mære, der ich dich vrâge.
Verse: 10    sehe wir unser mâge,

Verse: 11    sô wir z Artûse komen?
Verse: 12    von des vuore ich hân vernomen,

Verse: 13    daz er sî prîses rîche
Verse: 14    und er var ouch werdeclîche."

Verse: 15    dô sprach aber Parzivâl:
Verse: 16    "wir sehen dâ vrouwen lieht gemâl.

Verse: 17    sich feilieret niht unser vart:
Verse: 18    wir vinden unsern rehten art,

Verse: 19    liute, von den wir sîn erborn,
Verse: 20    etslîches houbet zer krône erkorn."

Verse: 21    ir deweder dô niht langer saz.
Verse: 22    Parzivâl des niht vergaz,

Verse: 23    er enholte sînes bruoder swert:
Verse: 24    daz stiez er dem degen wert

Verse: 25    wider in die scheiden.
Verse: 26    dâ wart von in beiden

Verse: 27    zornlîcher haz vermiten
Verse: 28    und geselleclîche dan geriten.

Verse: 29    ê si z Artûse wâren komen,
Verse: 30    dâ was ouch mære von in vernomen.




Chapter: 755 
755


Verse: 1    dô was bî dem selben tage
Verse: 2    über al daz her gemeiniu klage,

Verse: 3    daz Parzivâl der werde man
Verse: 4    von in was gescheiden dan.

Verse: 5    Artûs mit râte sich bewac,
Verse: 6    daz er unz an den ahten tac

Verse: 7    Parzivâles dâ wolde bîten
Verse: 8    und von der stat niht rîten.

Verse: 9    Gramoflanzes her was ouch komen:
Verse: 10    dem was manec wîter rinc genomen,

Verse: 11    mit zelten wol gezieret.
Verse: 12    dâ was geloschieret

Verse: 13    den stolzen werden liuten.
Verse: 14    man möhtez den vier briuten

Verse: 15    niht baz erbieten mit vreude siten.
Verse: 16    von Schastel Marveile geriten

Verse: 17    kom ein man zer selben zît,
Verse: 18    der sagete alsus: ez wære ein strît

Verse: 19    ûf dem warthûs in der sûl gesehen,
Verse: 20    "swaz ie mit swerten wære geschehen,

Verse: 21    daz ist gein disem strîte ein niht."
Verse: 22    vor Gâwân er des mæres giht,

Verse: 23    dâ er bî Artûse saz.
Verse: 24    manec ritter dâ mit rede maz,

Verse: 25    von wem der strît dâ wære getân.
Verse: 26    Artûs der künec sprach dô sân:

Verse: 27    "den strît ich einhalp wol weiz:
Verse: 28    in streit mîn neve von Kanvoleiz,

Verse: 29    der von uns schiet hiute vruo."
Verse: 30    dô riten ouch dise zwêne zuo




Chapter: 756 
756


Verse: 1    wol nâch strîtes êre.
Verse: 2    helme und ir schilte sêre

Verse: 3    wâren mit swerten an gerant.
Verse: 4    ieweder wol gelêrte hant

Verse: 5    truoc, der diu strîtes mâl entwarf.
Verse: 6    in strîte man ouch kunst bedarf.

Verse: 7    bî Artûse ringe hin
Verse: 8    si riten. dâ wart vil nâch in

Verse: 9    geschouwet, dâ der heiden reit:
Verse: 10    der vuorte et solhe rîcheit.

Verse: 11    wol beherberget was daz velt.
Verse: 12    si kêrten vür daz hôchgezelt

Verse: 13    an Gâwânes ringe.
Verse: 14    ob man si iht innen bringe,

Verse: 15    daz man si gerne sæhe?
Verse: 16    ich wæne, daz dâ geschæhe.

Verse: 17    Gâwân kom snellîche nâch,
Verse: 18    wande er vor Artûse sach,

Verse: 19    daz si gein sînem gezelte riten.
Verse: 20    der emphienc si dâ mit vreude siten.

Verse: 21    si hetenz harnas dennoch an:
Verse: 22    Gâwân der hövesche man

Verse: 23    hiez si entwâpen schiere.
Verse: 24    ezidemôn dem tiere

Verse: 25    was geteilet mite der strît.
Verse: 26    der heiden truoc ein kursît,

Verse: 27    dem was von slegen ouch worden wê:
Verse: 28    daz was ein sârantasmê,

Verse: 29    dar an stuont manec tiure stein.
Verse: 30    dar unde ein wâpenroc erschein,




Chapter: 757 
757


Verse: 1    rûch gebildet, snêvar.
Verse: 2    dar an stuont her unde dar

Verse: 3    tiure steine gein ein ander.
Verse: 4    die würme salamander

Verse: 5    in worhten in dem viure.
Verse: 6    si liez in âventiure

Verse: 7    ir minne, ir lant und ir lîp,
Verse: 8    diu dise zimierde im gap, ein wîp.

Verse: 9    er leiste ouch gerne ir gebot
Verse: 10    beidiu in vreude und in nôt,

Verse: 11    der künegîn Sekundillen.
Verse: 12    ez was ir herzen wille,

Verse: 13    daz si im gap ir rîcheit:
Verse: 14    sîn hôher prîs ir minne erstreit.

Verse: 15    Gâwân bat des nemen war,
Verse: 16    daz diu zimierde wol gevar

Verse: 17    iender würde verrucket
Verse: 18    oder iht dar von gezucket,

Verse: 19    kursît, helm oder schilt.
Verse: 20    es hete ein armez wîp bevilt

Verse: 21    an dem wâpenrocke al eine:
Verse: 22    sô tiure wâren die steine

Verse: 23    an den stücken allen vieren.
Verse: 24    hôch minne kan wol zieren,

Verse: 25    swâ rîcheit bî dem willen ist
Verse: 26    und ander werdeclîcher list.

Verse: 27    der stolze rîche Feirefîz
Verse: 28    truoc mit dienste grôzen vlîz

Verse: 29    nâch wîbe hulde: umme daz
Verse: 30    einiu ir lônes im niht vergaz.




Chapter: 758 
758


Verse: 1    daz harnas was von in getân.
Verse: 2    dô schouten disen bunten man

Verse: 3    alle, die wunders kunden jehen,
Verse: 4    die mohtenz dâ mit wârheit spehen:

Verse: 5    Feirefîz truoc vremdiu mâl.
Verse: 6    Gâwân sprach ze Parzivâl:

Verse: 7    "neve, tuo den gesellen dîn
Verse: 8    mir kunt. er treget sô wæhen schîn,

Verse: 9    dem ich gelîchez nie gesach."
Verse: 10    Parzivâl ze sînem wirte sprach:

Verse: 11    "bin ich dîn mâc, daz ist ouch er:
Verse: 12    des sî Gahmuret dîn wer.

Verse: 13    diz ist der künec von Zazamanc.
Verse: 14    mîn vater dort mit prîse erranc

Verse: 15    Belakânen, diu disen ritter truoc."
Verse: 16    Gâwân den heiden dô genuoc

Verse: 17    kuste. der rîche Feirefîz
Verse: 18    was beidiu swarz unde wîz

Verse: 19    über al sîn vel, wan daz der munt
Verse: 20    gein halbem zil tet rœte kunt.

Verse: 21    man brâhte in beiden samt gewant,
Verse: 22    daz was vür tiure koste erkant:

Verse: 23    ûz Gâwâns kamern truoc manz dar.
Verse: 24    dô kômen vrouwen lieht gevar.

Verse: 25    diu herzogîn liez Kundrîê
Verse: 26    und Sangîven küssen ê,

Verse: 27    si selbe und Arnîve in dô
Verse: 28    kusten: Feirefîz was vrô,

Verse: 29    daz er sô klâre vrouwen sach.
Verse: 30    ich wæne, im liebe dran geschach.




Chapter: 759 
759


Verse: 1    Gâwân ze Parzivâle sprach:
Verse: 2    "neve, dîn niuwez ungemach

Verse: 3    saget mir dîn helm und ouch der schilt.
Verse: 4    iust beiden strîtes mite gespilt,

Verse: 5    dir und dem bruoder dîn:
Verse: 6    gein wem erholtet ir disen pîn?"

Verse: 7    "ez wart nie herter strît erkant"
Verse: 8    sprach Parzivâl. "mîns bruoder hant

Verse: 9    twanc mich wer in grôzer nôt.
Verse: 10    wer ist ein segen vür den tôt.

Verse: 11    ûf disen heimlîchen gast
Verse: 12    von slage mîn starkez swert zebrast.

Verse: 13    dô tet er kranker vorhte schîn:
Verse: 14    er warf verre ûz der hant daz sîn.

Verse: 15    er vorhte et an mir sünde,
Verse: 16    ê wir gerechenten ze künde.

Verse: 17    nû hân ich sîne hulde wol,
Verse: 18    die ich mit dienste gerne erhol."

Verse: 19    Gâwân sprach: "mir wart gesaget
Verse: 20    von einem strîte unverzaget.

Verse: 21    ûf Schastel Marveile man siht,
Verse: 22    swaz inner sehs mîlen geschiht,

Verse: 23    in der sûl ûf mînem warthûs.
Verse: 24    dô sprach mîn œheim Artûs,

Verse: 25    der dâ strite des selben mâls,
Verse: 26    daz wærestû, neve von Kingrivâls.

Verse: 27    dû hâs diu wâren mære brâht:
Verse: 28    dir was des strîtes doch vor gedâht.

Verse: 29    nû geloube mir, daz ich dir sage:
Verse: 30    dîn wære gebiten hie aht tage




Chapter: 760 
760


Verse: 1    mit grôzer rîcher hôchgezît.
Verse: 2    mich müet iuwer beider strît:

Verse: 3    dâ sult ir bî mir ruowen nâch.
Verse: 4    sît aber strît von iu geschach,

Verse: 5    ir erkennet ein ander deste baz.
Verse: 6    nû kieset vriuntschaft vür den haz."

Verse: 7    Gâwân des âbents az deste ê,
Verse: 8    daz sîn neve von Tasmê,

Verse: 9    Feirefîz Anschevîn,
Verse: 10    dennoch vaste und der bruoder sîn.

Verse: 11    matraze dicke und lanc,
Verse: 12    der wart ein wîter ummevanc.

Verse: 13    kultern maneger künne
Verse: 14    von palmâte niht ze dünne

Verse: 15    wurden dô der matraze dach.
Verse: 16    tiuren phelle man drûf gesteppet sach,

Verse: 17    beidiu lanc unde breit.
Verse: 18    diu Klinschores rîcheit

Verse: 19    wart dâ ze schouwen vür getragen.
Verse: 20    dô sluoc man ûf, sus hôrte ich sagen,

Verse: 21    von phelle vier ruclachen
Verse: 22    mit rîlîchen sachen,

Verse: 23    gein ein ander viersîte,
Verse: 24    dar unde senfte plûmîte,

Verse: 25    mit kultern verdecket,
Verse: 26    ruclachen dar über gestecket.

Verse: 27    der rinc begreif sô wît ein velt,
Verse: 28    dâ wæren gestanden sehs gezelt

Verse: 29    âne gedrenge der snüere.
Verse: 30    unbescheidenlîche ich vüere,




Chapter: 761 
761


Verse: 1    wolde ich die âventiure vürbaz lân.
Verse: 2    dô enbôt mîn her Gâwân

Verse: 3    ze hove Artûse mære,
Verse: 4    wer dâ komen wære:

Verse: 5    der rîche heiden wære dâ,
Verse: 6    den diu heidenîn Ekubâ

Verse: 7    sô prîste bî dem Plimizôl.
Verse: 8    Jofreit fîz îdôl

Verse: 9    Artûs daz mære sagete,
Verse: 10    des er vreude vil bejagete.

Verse: 11    Jofreit bat in ezzen vruo
Verse: 12    und klârlîche grîfen zuo

Verse: 13    mit rittern und mit vrouwen schar
Verse: 14    und höveschlîche komen dar,

Verse: 15    daz siz sô ane geviengen
Verse: 16    und werdeclîche emphiengen

Verse: 17    des stolzen Gahmuretes kint.
Verse: 18    "swaz hie werder liute sint,

Verse: 19    die bringe ich" sprach der Bertenois.
Verse: 20    Jofreit sprach: "erst sô kurtois,

Verse: 21    ir muget in alle gerne sehen,
Verse: 22    wan ir sult wunder an im spehen:

Verse: 23    er vert ûz grôzer rîcheit.
Verse: 24    sîniu wâpenlîchiu kleit

Verse: 25    niemen vergelten möhte.
Verse: 26    deheiner hant daz töhte:

Verse: 27    Löver, Bertâne, Engellant,
Verse: 28    von Pârîs unz an Wîzsant,

Verse: 29    der dâ gein legete al die terre,
Verse: 30    ez wære dem gelte verre."




Chapter: 762 
762


Verse: 1    Jofreit was wider komen.
Verse: 2    von dem hete Artûs vernomen,

Verse: 3    wie er werben solde,
Verse: 4    ob er emphâhen wolde

Verse: 5    sînen neven, den heiden.
Verse: 6    daz sitzen wart bescheiden

Verse: 7    an Gâwânes ringe.
Verse: 8    mit höveschlîchem dinge

Verse: 9    diu massenîe der herzogin
Verse: 10    und die gesellen under in

Verse: 11    ze Gâwânes zeswen saz.
Verse: 12    anderhalben sîn mit vreuden az

Verse: 13    ritter, Klinschores diet.
Verse: 14    der vrouwen sitzen man beschiet:

Verse: 15    über gein Gâwân an den ort
Verse: 16    sâzen Klinschors vrouwen dort.

Verse: 17    der was manegiu lieht gemâl.
Verse: 18    Feirefîz und Parzivâl

Verse: 19    sâzen mitten zwischen den vrouwen:
Verse: 20    man mohte dâ klârheit schouwen.

Verse: 21    der turkoite Flôrant
Verse: 22    und Sangîve diu wert erkant

Verse: 23    und der herzoge von Gôwerzîn
Verse: 24    und Kundrîê, daz wîp sîn,

Verse: 25    über gein ein ander sâzen.
Verse: 26    ich wæne des, niht vergâzen

Verse: 27    Gâwân und Jofreit
Verse: 28    ir alden gesellekeit:

Verse: 29    si âzen mit ein ander.
Verse: 30    diu herzogîn mit blicken glander




Chapter: 763 
763


Verse: 1    mit der künegîn Arnîven az:
Verse: 2    ir enwederiu dâ niht vergaz,

Verse: 3    ir gesellekeite
Verse: 4    wâren si ein ander vil bereite.

Verse: 5    bî Gâwâne saz sîn ane,
Verse: 6    Orgelûse ûzerhalp her dane.

Verse: 7    dâ erzeicte diu rehte unzuht
Verse: 8    von dem ringe ir snellen vluht:

Verse: 9    man truoc bescheidenlîche dar
Verse: 10    den rittern und den vrouwen gar

Verse: 11    ir spîse. zühteclîche
Verse: 12    Feirefîz der rîche

Verse: 13    sprach ze Parzivâl, dem bruoder sîn:
Verse: 14    "Jûpiter die reise mîn

Verse: 15    mir ze sælden hete erdâht,
Verse: 16    daz mich sîn helfe her hât brâht,

Verse: 17    dâ ich mîne werden mâge sihe.
Verse: 18    von rehter schult ich prîses gihe

Verse: 19    mînem vater, den ich hân verlorn:
Verse: 20    der was ûz rehtem prîs erborn."

Verse: 21    Parzivâl sprach: "ir sult noch sehen
Verse: 22    liute, den ir prîses müezet jehen,

Verse: 23    bî Artûs dem houbetman,
Verse: 24    manegen ritter manlîch getân.

Verse: 25    swie schier diz ezzen nû zegêt,
Verse: 26    unlange ez dâ nâch gestêt,

Verse: 27    unz ir die werden sehet komen,
Verse: 28    an den vil prîses ist vernomen.

Verse: 29    swaz tavelrunder krefte ist bî,
Verse: 30    der ensitzet hie niwan ritter drî:




Chapter: 764 
764


Verse: 1    der wirt unde Jofreit,
Verse: 2    etswenne ich ouch den prîs erstreit,

Verse: 3    daz nam mîn dar über gerte,
Verse: 4    des ich si dô gewerte."

Verse: 5    si nâmen diu tischlachen dan
Verse: 6    vor al den vrouwen und vor den man:

Verse: 7    des was zît, dô man gaz.
Verse: 8    Gâwân der wirt niht langer saz:

Verse: 9    die herzogîn und ouch sîn anen
Verse: 10    begunde er biten unde manen,

Verse: 11    daz si Sangîvenê
Verse: 12    und die süezen Kundrîê

Verse: 13    næmen unde giengen dar,
Verse: 14    aldâ der heiden bunt gevar

Verse: 15    saz, und daz si phlægen sîn.
Verse: 16    Feirefîz Anschevîn

Verse: 17    sach dise vrouwen gien im gên:
Verse: 18    gein den begunde er ûf dô stên,

Verse: 19    als tet sîn bruoder Parzivâl.
Verse: 20    diu herzoginne lieht gemâl

Verse: 21    nam Feirefîzen mit ir hant:
Verse: 22    swaz si vrouwen und ritter stên dâ vant,

Verse: 23    die bat si sitzen alle.
Verse: 24    dô reit dar zuo mit schalle

Verse: 25    Artûs mit den sînen.
Verse: 26    man hôrte dâ pusînen,

Verse: 27    tambûren, floitieren, stîven.
Verse: 28    der werde sun Arnîven

Verse: 29    reit dar zuo mit krache.
Verse: 30    dirre vrœlîchen sache




Chapter: 765 
765


Verse: 1    der heiden jach vür werdiu dinc.
Verse: 2    sus reit an Gâwânes rinc

Verse: 3    Artûs mit sînem wîbe
Verse: 4    und mit manegem klâren lîbe,

Verse: 5    mit rittern und mit vrouwen.
Verse: 6    der heiden mohte schouwen,

Verse: 7    daz ouch dâ liute wâren,
Verse: 8    junc mit solhen jâren,

Verse: 9    daz si phlâgen varwe glanz.
Verse: 10    dô was der künec Gramoflanz

Verse: 11    dennoch in Artûses phlege.
Verse: 12    dâ reit ouch ûf dem selben wege

Verse: 13    Itonjê sîn âmîe,
Verse: 14    diu süeze valsches vrîe.

Verse: 15    dô erbeizte der tavelrunder schar
Verse: 16    mit maneger vrouwen wol gevar.

Verse: 17    Ginovêr liez Itonjê
Verse: 18    ir neven, den heiden küssen ê:

Verse: 19    si selbe dô dar nâher gienc,
Verse: 20    Feirefîzen si mit kusse emphienc.

Verse: 21    Artûs und ouch Gramoflanz
Verse: 22    mit getriulîcher liebe ganz

Verse: 23    emphiengen disen heiden.
Verse: 24    dâ wart im von in beiden

Verse: 25    mit dienst erboten êre
Verse: 26    und sîner mâge mêre

Verse: 27    im tâten guoten willen schîn.
Verse: 28    Feirefîz Anschevîn

Verse: 29    was dâ ze guoten vriunden komen:
Verse: 30    daz hete er schiere an in vernomen.




Chapter: 766 
766


Verse: 1    nider sâzen wîp und man
Verse: 2    und manec maget wol getân.

Verse: 3    wolde er sichs underwinden,
Verse: 4    etslîch ritter mohte dâ vinden

Verse: 5    süeziu wort von süezem munde.
Verse: 6    ob er minne werben kunde,

Verse: 7    die bete liez gar âne haz
Verse: 8    manec klâriu vrouwe, diu dâ saz.

Verse: 9    guot wîp man nie gezürnen sach,
Verse: 10    ob wert man nâch ir helfe sprach:

Verse: 11    si hât versagen und gewern bevor.
Verse: 12    giht man vreude iht urbor,

Verse: 13    den zins muoz wâriu minne geben.
Verse: 14    sus sach ich ie die werden leben:

Verse: 15    dâ saz dienest und lôn.
Verse: 16    ez ist ein helfeclîcher dôn,

Verse: 17    swâ vriundîn rede wirt vernomen,
Verse: 18    diu vriunde mac ze staten komen.

Verse: 19    Artûs ze Feirefîze saz.
Verse: 20    ir deweder dô vergaz,

Verse: 21    si entæten beide vrâge ir reht
Verse: 22    mit süezer gegenrede sleht.

Verse: 23    Artûs sprach: "nû lobe ichs got,
Verse: 24    daz er dise êre uns erbôt,

Verse: 25    daz wir dich hie gesehen hân.
Verse: 26    ûz heidenschaft gevuor nie man

Verse: 27    ûf toufphlegenden landen,
Verse: 28    den mit dienestlîchen handen

Verse: 29    ich gerner dienstes werte,
Verse: 30    swar des dîn wille gerte."




Chapter: 767 
767


Verse: 1    Feirefîz z Artûse sprach:
Verse: 2    "al mîn ungelücke brach,

Verse: 3    dô diu gotinne Jûnô
Verse: 4    mîn segelweter vuocte sô

Verse: 5    in disiu westerrîche.
Verse: 6    dû gebâres vil gelîche

Verse: 7    einem man, des werdekeit
Verse: 8    ist mit mæren harte breit:

Verse: 9    bistû Artûs genant,
Verse: 10    sôst dîn name verre erkant."

Verse: 11    Artûs sprach: "er êrte sich,
Verse: 12    der mich geprîset wider dich

Verse: 13    und ouch gein andern liuten hât.
Verse: 14    sîn selbes zuht gap im den rât

Verse: 15    mêre, dan ichz gedienet hân:
Verse: 16    er hâtz durch hövescheit getân.

Verse: 17    ich bin Artûs genennet
Verse: 18    und hete gerne erkennet,

Verse: 19    wie dû sîs komen in ditze lant.
Verse: 20    hât dich vriundîn ûz gesant,

Verse: 21    diu muoz sîn vil gehiure,
Verse: 22    ob dû durch âventiure

Verse: 23    alsus verre bist gestrichen.
Verse: 24    ist si ir lônes ungeswichen,

Verse: 25    daz hœhet wîbe dienst noch baz.
Verse: 26    ein ieslîch wîp emphienge haz

Verse: 27    von ir dienestbietære,
Verse: 28    ob dir ungelônet wære."

Verse: 29    "ez wirt al anders vernomen"
Verse: 30    sprach der heiden. "nû hœre ouch mîn komen:




Chapter: 768 
768


Verse: 1    ich vüere sô kreftegez her,
Verse: 2    Troiære lantwer

Verse: 3    und jene, die si besâzen,
Verse: 4    müesten rûmen mir die strâzen.

Verse: 5    ob si beidenthalp noch lebeten
Verse: 6    und strîtes gein mir strebeten,

Verse: 7    si möhten siges niht erholn,
Verse: 8    si müesten schumfentiure doln

Verse: 9    von mir und von den mînen.
Verse: 10    ich hân in manegen pînen

Verse: 11    bejaget mit ritterlîcher tât,
Verse: 12    daz mîn nû genâde hât

Verse: 13    diu künegîn Sekundille.
Verse: 14    swes diu gert, daz ist mîn wille:

Verse: 15    si hât gesetzet mir mîn leben.
Verse: 16    si hiez mich milteclîche geben

Verse: 17    und guote ritter an mich nemen:
Verse: 18    des solde mich durch si gezemen.

Verse: 19    daz ist alsô ergangen:
Verse: 20    mit schilte bevangen

Verse: 21    ist zingesinde mir benant
Verse: 22    manec ritter wert erkant.

Verse: 23    dâ engein ir minne ist mîn lôn.
Verse: 24    ich trage ein ezidemôn

Verse: 25    ûf dem schilte, als si mir gebôt.
Verse: 26    swâ ich sider kom in nôt,

Verse: 27    zehant sô ich an si dâhte,
Verse: 28    ir minne mir helfe brâhte.

Verse: 29    diu was mir bezzer trôstes wer
Verse: 30    denne mîn got Jûpiter."




Chapter: 769 
769


Verse: 1    Artûs sprach: "von dem vater dîn,
Verse: 2    Gahmurete, dem neven mîn,

Verse: 3    ist ez dîn volleclîcher art,
Verse: 4    in wîbe dienst dîn verriu vart.

Verse: 5    ich wil dich dienest wizzen lân,
Verse: 6    daz selten grœzer ist getân

Verse: 7    ûf erde deheinem wîbe,
Verse: 8    ir wünneclîchem lîbe:

Verse: 9    ich meine die herzoginne,
Verse: 10    diu hie sitzet, nâch ir minne

Verse: 11    ist waldes vil verswendet.
Verse: 12    ir minne hât gephendet

Verse: 13    an vreuden manegen ritter guot
Verse: 14    und in erwendet hôhen muot."

Verse: 15    er sagete ir urliuge gar
Verse: 16    und ouch von der Klinschores schar,

Verse: 17    die dâ sâzen an allen sîten,
Verse: 18    und von den zwein strîten,

Verse: 19    die Parzivâl sîn bruoder streit
Verse: 20    ze Jôflanze ûf dem anger breit:

Verse: 21    "und swaz er anders hât ervarn,
Verse: 22    dâ er den lîp niht kunde sparn,

Verse: 23    er sol dirz selbe machen kunt.
Verse: 24    er suochet einen hôhen vunt:

Verse: 25    nâch dem grâle wirbet er.
Verse: 26    von iu beiden samt ist daz mîn ger,

Verse: 27    ir saget mir liute unde lant,
Verse: 28    die iu mit strîte sîn bekant."

Verse: 29    der heiden sprach: "ich nenne sie,
Verse: 30    die mir die ritter vüerent hie:




Chapter: 770 
770


Verse: 1    rois Papirîs von Trogodjente
Verse: 2    und cuns Behantîns von Kalomidente,

Verse: 3    duc Farjelastis von Africke
Verse: 4    und rois Liddamus von Agrippe,

Verse: 5    rois Trîdanz von Tinodonte
Verse: 6    und rois Amaspartîns von Schipelpjonte,

Verse: 7    duc Lippidîns von Agremuntîn
Verse: 8    und rois Mîlôn von Nomadjentesîn,

Verse: 9    von Assigarzjone cuns Gabarîns
Verse: 10    und von Rivigitas rois Translapîns,

Verse: 11    von Hiberbortikôn cuns Filones
Verse: 12    und von Zentrîûn rois Kilikrates,

Verse: 13    cuns Lisavander von Ipopotitikôn
Verse: 14    und duc Tiridê von Elixodjôn,

Verse: 15    von Oraste Gentesîn rois Tôarîs
Verse: 16    und von Satarchjonte duc Alamîs,

Verse: 17    rois Aminkas von Sotofeititôn
Verse: 18    und duc Kârub von Duskontemedôn,

Verse: 19    von Arâbîe rois Zôrôastêr
Verse: 20    und cuns Posizônjus von Tilirastêr,

Verse: 21    duc Sennes von Narjoklîn
Verse: 22    und cuns Edissôn von Lanzesardîn,

Verse: 23    von Jamfûse cuns Fristines
Verse: 24    und von Atrofagente duc Meiones,

Verse: 25    von Nourîente duc Archeinor
Verse: 26    und von Pamfatis cuns Astor,

Verse: 27    die von Azagouc und von Zazamanc
Verse: 28    und von Gamfassâsche rois Jetakranc,

Verse: 29    cuns Jûrâns von Blemunzîn
Verse: 30    und duc Afinamus von Amantasîn.




Chapter: 771 
771


Verse: 1    ich hete ein dinc vür schande.
Verse: 2    man jach in mînem lande,

Verse: 3    nehein ritter bezzer möhte sîn
Verse: 4    denne Gahmuret Anschevîn,

Verse: 5    der ie ors überschrite:
Verse: 6    ez was mîn wille und ouch mîn site,

Verse: 7    daz ich vüere, unz ich in vünde.
Verse: 8    sît gewan ich strîtes künde.

Verse: 9    von mînen zwein landen her
Verse: 10    vuorte ich kreftec ûf daz mer:

Verse: 11    gein ritterschefte hete ich muot.
Verse: 12    swelh lant was werlîch und guot,

Verse: 13    daz twanc ich mîner hende
Verse: 14    unz verre inz ellende.

Verse: 15    dâ werten mich ir minne
Verse: 16    zwuo rîche kuneginne,

Verse: 17    Olimpjâ und Klauditte.
Verse: 18    Sekundille ist nû diu dritte.

Verse: 19    ich hân durch wîp vil getân.
Verse: 20    hiute alrêst ich künde hân,

Verse: 21    daz mîn vater Gahmuret ist tôt.
Verse: 22    mîn bruoder sage ouch sîne nôt."

Verse: 23    dô sprach der werde Parzivâl:
Verse: 24    "sît ich schiet von dem grâl,

Verse: 25    sô hât mîn hant mit strîte
Verse: 26    in der enge und an der wîte

Verse: 27    vil ritterschefte erzeiget,
Verse: 28    etslîches prîs geneiget,

Verse: 29    der des was ungewent ie.
Verse: 30    die wil ich iu nennen hie:




Chapter: 772 
772


Verse: 1    von Lirivoin rois Schirnîel
Verse: 2    und von Avendroin sînen bruoder Mirabel,

Verse: 3    rois Serabil von Rozokarz
Verse: 4    und rois Piblesûn von Lorneparz,

Verse: 5    von Sirnegunz rois Senilgorz
Verse: 6    und von Villegarunz Strangedorz,

Verse: 7    von Mirnetalle cuns Rogedâl
Verse: 8    und von Pleiedunze Laudunâl,

Verse: 9    rois Oniprîz von Itolac
Verse: 10    und rois Zîrolân von Semblidac,

Verse: 11    von Jeroplîs duc Jerneganz
Verse: 12    und von Zambrôn cuns Plineschanz,

Verse: 13    von Tutelêunz cuns Longefiez
Verse: 14    und von Privegarz duc Marangliez,

Verse: 15    von Piktakôn duc Strennolas
Verse: 16    und von Lampregûn cuns Parfoias,

Verse: 17    von Askalûn rois Vergulaht
Verse: 18    und von Pranzilê cuns Bogudaht,

Verse: 19    Postefar von Laudundrehte
Verse: 20    und duch Leidebrôn von Redunzehte,

Verse: 21    von Leterbe Kollevâl
Verse: 22    und Jovedast von Arle, ein Provenzâl,

Verse: 23    von Triparûn cuns Karfodjas.
Verse: 24    diz ergienc, dâ turnieren was,

Verse: 25    die wîle ich nâch dem grâle reit.
Verse: 26    solde ich gar nennen, dâ ich streit,

Verse: 27    daz wæren unkundiu zil:
Verse: 28    durch nôt ichs muoz verswîgen vil.

Verse: 29    swaz ir mir kunt ist getân,
Verse: 30    die wæne ich hie genennet hân."




Chapter: 773 
773


Verse: 1    der heiden was von herzen vrô,
Verse: 2    daz sîns bruoder prîs alsô

Verse: 3    stuont, daz sîn hant erstreit
Verse: 4    sô manege hôhe werdekeit:

Verse: 5    des dancte er im sêre.
Verse: 6    er hetes selbe ouch êre.

Verse: 7    innen des hiez tragen Gâwân,
Verse: 8    als ez unwizzende wære getân,

Verse: 9    des heidens zimierde in den rinc.
Verse: 10    si pruovtenz dâ vür hôhiu dinc:

Verse: 11    ritter unde vrouwen
Verse: 12    begunden alle schouwen

Verse: 13    den wâpenroc, den schilt, z kursît.
Verse: 14    der helm was zenge noch ze wît.

Verse: 15    si prîsten al gemeine
Verse: 16    die tiuren edeln steine,

Verse: 17    die dran verwieret lâgen.
Verse: 18    niemen darf mich vrâgen

Verse: 19    von ir arte, wie si wæren,
Verse: 20    die lîhten und die swæren.

Verse: 21    iuch hete baz bescheiden des
Verse: 22    Erâklîus oder Erkules

Verse: 23    und der Krieche Alexander
Verse: 24    und dennoch ein ander,

Verse: 25    der wîse Piktâgoras,
Verse: 26    der ein astronomierre was

Verse: 27    und sô wîse âne strît,
Verse: 28    niemen sît Adâmes zît

Verse: 29    möhte im gelîchen sin getragen.
Verse: 30    der kunde wol von steinen sagen.




Chapter: 774 
774


Verse: 1    die vrouwen rûnten dâ, swelh wîp
Verse: 2    dâ mite zierte sînen lîp,

Verse: 3    hete er gein in gewenket,
Verse: 4    sô wære sîn prîs verkrenket.

Verse: 5    etslîchiu was im doch sô holt,
Verse: 6    si hete sîn dienest wol gedolt,

Verse: 7    ich wæne durch sîniu vremdiu mâl.
Verse: 8    Gramoflanz, Artûs und Parzivâl

Verse: 9    und der wirt Gâwân,
Verse: 10    die viere giengen sunder dan.

Verse: 11    den vrouwen wart bescheiden
Verse: 12    in ir phlege der rîche heiden.

Verse: 13    Artûs warp ein hôchgezît,
Verse: 14    daz diu des morgens âne strît

Verse: 15    ûf dem velde ergienge,
Verse: 16    daz man dâ mite emphienge

Verse: 17    sînen neven Feirefîz.
Verse: 18    "an den gewerp kêrt iuwern vlîz

Verse: 19    und iuwer besten witze,
Verse: 20    daz er mit uns besitze

Verse: 21    ob der tavelrunder."
Verse: 22    si lobeten al besunder,

Verse: 23    si wurbenz, wærez im niht leit.
Verse: 24    dô lobete in gesellekeit

Verse: 25    Feirefîz der rîche.
Verse: 26    daz volc vuor al gelîche,

Verse: 27    dô man geschancte, an ir gemach.
Verse: 28    maneges vreude aldâ geschach

Verse: 29    smorgens, ob ich so sprechen mac.
Verse: 30    dô erschein der süeze mære tac,




Chapter: 775 
775


Verse: 1    Utepandragûnes sun
Verse: 2    Artûsen sach man alsus tuon:

Verse: 3    er pruovte kostenlîche
Verse: 4    ein tavelrunder rîche

Verse: 5    ûz einem drîantasmê.
Verse: 6    ir habet wol gehœret ê,

Verse: 7    wie ûf dem Plimizôles plân
Verse: 8    einer tavelrunder wart getân:

Verse: 9    nâch der disiu wart gesniten,
Verse: 10    sinewel mit solhen siten,

Verse: 11    si erzeicte rîlîchiu dinc.
Verse: 12    sinewel man dar um nam den rinc

Verse: 13    ûf einem touwec grüenen gras,
Verse: 14    daz wol ein poinder landes was

Verse: 15    von dem sedel an tavelrunder:
Verse: 16    diu stuont dâ mitten sunder

Verse: 17    niht durch den nûz, et durch den namen.
Verse: 18    sich mohte ein bœse man wol schamen,

Verse: 19    ob er dâ bî den werden saz:
Verse: 20    die spîse sîn munt mit sünden az.

Verse: 21    der rinc wart bî der schœnen naht
Verse: 22    gemezzen unde vor bedâht

Verse: 23    wol nâch rîlîchen ziln.
Verse: 24    es möhte einen armen künec beviln,

Verse: 25    als man den rinc gezieret vant,
Verse: 26    dô der mitte morgen wart erkant.

Verse: 27    Gramoflanz und Gâwân,
Verse: 28    von in diu koste wart getân.

Verse: 29    Artûs was des landes gast:
Verse: 30    sîner koste iedoch dâ niht gebrast.




Chapter: 776 
776


Verse: 1    ez ist selten worden naht,
Verse: 2    wande ez der sunnen ist geslaht,

Verse: 3    si enbræhte ie den tac dar nâch.
Verse: 4    al daz selbe ouch dâ geschach:

Verse: 5    er schein in süeze lûter klâr.
Verse: 6    dâ streich manec ritter wol sîn hâr,

Verse: 7    dar ûf bluomîniu schapel.
Verse: 8    manec ungevelschet vrouwen vel

Verse: 9    man dâ bî rôten munden sach.
Verse: 10    ob Kîôt die wârheit sprach,

Verse: 11    ritter und vrouwen truogen gewant,
Verse: 12    niht gesniten in einem lant,

Verse: 13    wîbe gebende, nider, hôch,
Verse: 14    als ez nâch ir lantwîse zôch.

Verse: 15    dâ was ein wît gesamentiu diet.
Verse: 16    durch daz ir site sich underschiet:

Verse: 17    swelh vrouwe was sunder âmîs,
Verse: 18    diu getorste niht deheinen wîs

Verse: 19    über tavelrunder komen.
Verse: 20    hete si dienest ûf ir lôn genomen

Verse: 21    und gap si lônes sicherheit,
Verse: 22    an tavelrunder rinc si reit:

Verse: 23    die andern muostenz lâzen,
Verse: 24    in ir herbergen si sâzen.

Verse: 25    dô Artûs messe hete vernomen,
Verse: 26    man sach Gramoflanzen komen

Verse: 27    und den herzogen von Gôwerzîn
Verse: 28    und Flôranden, den gesellen sîn.

Verse: 29    die drî gerten sunder
Verse: 30    phlihte über tavelrunder:




Chapter: 777 
777


Verse: 1    Artûs werte si des sân.
Verse: 2    vrâge iuch wîp oder man,

Verse: 3    wer trüege die rîchesten hant,
Verse: 4    der ie von deheinem lant

Verse: 5    über tavelrunder gesaz,
Verse: 6    ir enmuget sis niht bescheiden baz,

Verse: 7    ez was Feirefîz Anschevîn.
Verse: 8    dâ mite lât die rede sîn.

Verse: 9    si zogeten gein dem ringe
Verse: 10    mit werdeclîchem dinge.

Verse: 11    etslîch vrouwe wart gehurt,
Verse: 12    wære ir pherde niht wol gegurt,

Verse: 13    si wære gevallen schiere.
Verse: 14    manege rîche baniere

Verse: 15    sach man zallen sîten komen.
Verse: 16    dâ wart der buhurt wît genomen

Verse: 17    alum der tavelrunder rinc.
Verse: 18    ez wâren höveschlîchiu dinc,

Verse: 19    daz ir deheiner in den rinc gereit:
Verse: 20    daz velt was ûzerhalp sô breit,

Verse: 21    si mohten diu ors ersprengen
Verse: 22    und sich mit hurte mengen

Verse: 23    und ouch mit künste rîten sô,
Verse: 24    des diu wîp ze sehene wâren vrô.

Verse: 25    si kômen ouch, dâ si sâzen.
Verse: 26    aldâ die werden âzen,

Verse: 27    kamerære, truhsæzen, schenken
Verse: 28    muosten daz bedenken,

Verse: 29    wie manz mit zuht dar vür getruoc.
Verse: 30    ich wæne, man gap in dâ genuoc.




Chapter: 778 
778


Verse: 1    etslîch vrouwe hete prîs,
Verse: 2    diu dâ saz bî ir âmîs.

Verse: 3    maneger durch gerndes herzen rât
Verse: 4    gedienet was mit hôher tât.

Verse: 5    Feirefîz und Parzivâl
Verse: 6    mit prüeven heten süeze wal

Verse: 7    jene vrouwen und dise.
Verse: 8    man gesach ûf acker noch ûf wise

Verse: 9    liehter vel noch rœter munt
Verse: 10    sô manegen nie ze keiner stunt,

Verse: 11    alsô man an dem ringe vant.
Verse: 12    des wart dem heiden vreude erkant.

Verse: 13    wol dem künfteclîchen tage!
Verse: 14    gêrt sî ir süezen mære sage,

Verse: 15    als von ir munde wart vernomen!
Verse: 16    man sach eine juncvrouwen komen,

Verse: 17    ir kleider wâren tiure und wol gesniten,
Verse: 18    kostebære nâch Franzoiser siten,

Verse: 19    ir kappe ein rîcher sâmit
Verse: 20    noch swerzer denne ein gênît:

Verse: 21    arâbesch golt gap drûfe schîn,
Verse: 22    wol geworht mance turteltûbelîn

Verse: 23    nâch dem insigel des grâles.
Verse: 24    si wart des selben mâles

Verse: 25    beschouwet vil durch wunders ger.
Verse: 26    nû lât si heistieren her.

Verse: 27    ir gebende was hôch unde blanc,
Verse: 28    mit manegem dicken ummevanc

Verse: 29    was ir antlitze verdecket
Verse: 30    und niht ze sehene enblecket.




Chapter: 779 
779


Verse: 1    senfteclîche und doch in vollem zelt
Verse: 2    kom si rîtende über velt.

Verse: 3    ir zoum, ir satel, ir runzît
Verse: 4    was rîche und tiure âne allen strît.

Verse: 5    man liez si an den zîten
Verse: 6    in den rinc rîten.

Verse: 7    diu wîse, niht diu tumme
Verse: 8    reit den rinc alumme.

Verse: 9    man zeicte ir, wâ Artûs saz,
Verse: 10    gein dem si grüezens niht vergaz:

Verse: 11    en franzois was ir sprâche.
Verse: 12    si warp, daz ein râche

Verse: 13    ûf si verkorn wære
Verse: 14    und daz man hôrte ir mære.

Verse: 15    den künec und die künegîn
Verse: 16    bat si helfe und an ir rede sîn.

Verse: 17    si kêrte von in al zehant,
Verse: 18    dâ si Parzivâlen sitzen vant

Verse: 19    bî Artûse nâhen.
Verse: 20    si begunde ir sprunges gâhen

Verse: 21    von dem pherde ûf daz gras:
Verse: 22    si viel mit zuht, diu an ir was,

Verse: 23    Parzivâle an sînen vuoz.
Verse: 24    si warp al weinde um sînen gruoz,

Verse: 25    sô daz er zorn gein ir verlür
Verse: 26    und âne kus ûf si verkür.

Verse: 27    Artûs und Feirefîz
Verse: 28    an den gewerp legeten vlîz.

Verse: 29    Parzivâl truoc ûf si haz:
Verse: 30    durch vriunde bete er des vergaz




Chapter: 780 
780


Verse: 1    mit triuwen âne vâre.
Verse: 2    diu werde, niht diu klâre

Verse: 3    snellîche wider ûf dô spranc:
Verse: 4    si neic in unde sagete in danc,

Verse: 5    die ir nâch grôzer schulde
Verse: 6    geholfen heten hulde.

Verse: 7    wider abe ir houbetgebende:
Verse: 8    si want mit ir hende

Verse: 9    ez wære betzel oder snürrinc,
Verse: 10    daz warf si von ir an den rinc.

Verse: 11    Kundrîe la surziere
Verse: 12    wart dô bekennet schiere

Verse: 13    und des grâles wâpen, daz si truoc.
Verse: 14    daz wart beschouwet dô genuoc.

Verse: 15    si vuorte ouch noch den selben lîp,
Verse: 16    den sô manec man und wîp

Verse: 17    sach zuo dem Plimizôle komen.
Verse: 18    ir antlitze ir habet vernomen:

Verse: 19    ir ougen stuonden dennoch sus,
Verse: 20    gel als ein topâzjus,

Verse: 21    ir zene lanc, ir munt gap schîn
Verse: 22    als ein vîol weitîn.

Verse: 23    wan daz si truoc gein prîse muot,
Verse: 24    si vuorte âne nôt den tiuren huot

Verse: 25    ûf dem Plimizôles plân.
Verse: 26    diu sunne hete ir niht getân:

Verse: 27    diu enmohte ir vel durch daz hâr
Verse: 28    niht verselwen mit ir blickes vâr.

Verse: 29    si stuont mit zuht unde sprach,
Verse: 30    des man vür hôhiu mære jach.




Chapter: 781 
781


Verse: 1    an der selben stunde
Verse: 2    ir rede si sus begunde:

Verse: 3    "ô wol dich, Gahmuretes sun!
Verse: 4    got wil genâde an dir nû tuon:

Verse: 5    ich meine, den Herzeloide bar.
Verse: 6    Feirefîz der vêch gevar

Verse: 7    muoz mir willekomen sîn
Verse: 8    durch Sekundillen die vrouwen mîn

Verse: 9    und durch manege hôhe werdekeit,
Verse: 10    die von kindes jugent sîn prîs erstreit."

Verse: 11    ze Parzivâle sprach si dô:
Verse: 12    "nû wis kiusche und dâ bî vrô.

Verse: 13    wol dich des hôhen teiles!
Verse: 14    dû krône menschen heiles,

Verse: 15    daz epitafium ist gelesen:
Verse: 16    dû solt des grâles herre wesen,

Verse: 17    Kondwîrâmûrs, daz wîp dîn,
Verse: 18    und dîn sun Loherangrîn

Verse: 19    sint beidiu mit dir dar benant.
Verse: 20    dô dû rûmdes Brôbarz daz lant,

Verse: 21    zwêne süne si lebendec dô truoc.
Verse: 22    Kardeiz hât ouch dort genuoc.

Verse: 23    wære dir niht mêr sælden kunt,
Verse: 24    wan daz dîn wârhafter munt

Verse: 25    den werden und den süezen
Verse: 26    mit rede nû sol grüezen

Verse: 27    (den künec Amfortas nû nert
Verse: 28    dîns mundes vrâge, diu im wert

Verse: 29    siufzebæren jâmer grôz),
Verse: 30    wâ wart an sælden ie dîn genôz?"




Chapter: 782 
782


Verse: 1    siben sterne si dô nande
Verse: 2    heidensch. die namen bekande

Verse: 3    der rîche werde Feirefîz,
Verse: 4    der vor ir saz swarz und wîz.

Verse: 5    si sprach: "nû prüeve, Parzivâl.
Verse: 6    der hœste plânête Zval

Verse: 7    und der snelle Almustrî,
Verse: 8    Almaret und der liehte Samsî

Verse: 9    erzeigent sælekeit an dir.
Verse: 10    der vünfte heizt Aligarfîr,

Verse: 11    under den der sehste Alkitêr
Verse: 12    und uns der næste Alkamêr.

Verse: 13    ich ensprichez niht ûz einem troum:
Verse: 14    die sint des firmamentes zoum,

Verse: 15    die enthalden sîne snelheit,
Verse: 16    ir kriec gein sînem loufte ie streit.

Verse: 17    sorge ist dînhalp nû weise.
Verse: 18    swaz der plânêten reise

Verse: 19    umlouft und ir schîn bedecket,
Verse: 20    des sint dir zil gestecket

Verse: 21    ze reichen und zerwerben.
Verse: 22    dîn riuwe muoz verderben.

Verse: 23    wan ungenuht al eine
Verse: 24    dâ engît dir niht gemeine:

Verse: 25    der grâl und des grâles kraft
Verse: 26    verbietent valschlîch geselleschaft.

Verse: 27    dû hetes junge sorge erzogen:
Verse: 28    die hât komendiu vreude an dir betrogen.

Verse: 29    dû hâs der sêle ruowe erstriten
Verse: 30    und des lîbes vreude in sorge erbiten."




Chapter: 783 
783


Verse: 1    Parzivâlen ir mæres niht verdrôz.
Verse: 2    durch liebe ûz sînen ougen vlôz

Verse: 3    wazzer, sherzen ursprinc.
Verse: 4    dô sprach er: "vrouwe, solhiu dinc,

Verse: 5    als ir hie habet genennet,
Verse: 6    bin ich vor gote erkennet,

Verse: 7    sô daz mîn sündehafter lîp
Verse: 8    und hân ich kint, dar zuo mîn wîp,

Verse: 9    daz diu des phlihte suln hân,
Verse: 10    sô hât got wol ze mir getân.

Verse: 11    swar an ir mich ergetzen meget,
Verse: 12    dâ mite ir iuwer triuwe reget.

Verse: 13    iedoch hete ich niht missetân,
Verse: 14    ir hetet mich zornes etswenne erlân.

Verse: 15    dô enwas ez et dennoch niht mîn heil.
Verse: 16    nû gebet ir mir sô hôhen teil,

Verse: 17    dâ von mîn trûren ende hât
Verse: 18    die wârheit saget mir iuwer wât:

Verse: 19    dô ich ze Munsalvæsche was
Verse: 20    bî dem trûregen Amfortas,

Verse: 21    swaz ich dâ schilte hangen vant,
Verse: 22    die wâren gemâl als iuwer gewant.

Verse: 23    vil turteltûben traget ir hie.
Verse: 24    vrouwe, nû saget, wenne oder wie

Verse: 25    ich sül gein mînen vreuden varn,
Verse: 26    und lât mich daz niht lange sparn."

Verse: 27    dô sprach si: "lieber herre mîn,
Verse: 28    ein man sol dîn geselle sîn.

Verse: 29    den wel: geleites warte an mich.
Verse: 30    durch helfe niht lange sûme dich."




Chapter: 784 
784


Verse: 1    über al den rinc wart vernomen
Verse: 2    "Kundrîe la surziere ist komen"

Verse: 3    und waz ir mære meinde.
Verse: 4    Orgelûse durch liebe weinde,

Verse: 5    daz diu vrâge von Parzivâle
Verse: 6    die Amfortases quâle

Verse: 7    solde machen wendec.
Verse: 8    Artûs der prîses genendec

Verse: 9    ze Kundrîen mit zühten sprach:
Verse: 10    "vrouwe, rîtet an iuwer gemach.

Verse: 11    lât iuwer phlegen, lêrt selbe wie."
Verse: 12    si sprach: "ist Arnîve hie,

Verse: 13    swelh gemach mir diu gît,
Verse: 14    des wil ich leben dise zît,

Verse: 15    unz daz mîn herre hinnen vert.
Verse: 16    ist ir gevancnisse erwert,

Verse: 17    sô erloupt, daz ich müeze schouwen
Verse: 18    si und ander vrouwen,

Verse: 19    den Klinschor teilte sînen vâr
Verse: 20    mit gevancnisse nû manec jâr."

Verse: 21    zwêne ritter huoben si ûf ir phert:
Verse: 22    z Arnîven reit diu maget wert.

Verse: 23    nû was ez ouch zît, daz man dâ gaz.
Verse: 24    Parzivâl bî sînem bruoder saz:

Verse: 25    den bat er gesellekeit.
Verse: 26    Feirefîz was im al bereit

Verse: 27    gein Munsalvæsche ze rîten.
Verse: 28    an den selben zîten

Verse: 29    si stuonden ûf über al den rinc.
Verse: 30    Feirefîz warp hôhiu dinc:




Chapter: 785 
785


Verse: 1    er vrâcte den künec Gramoflanz,
Verse: 2    ob diu liebe wære ganz

Verse: 3    zwischen im und der nifteln sîn,
Verse: 4    daz er daz tæte an im nû schîn.

Verse: 5    "helft ir und mîn neve Gâwân,
Verse: 6    swaz wir hie künege und vürsten hân,

Verse: 7    barûne und arme ritter gar,
Verse: 8    daz der deheiner hinnen var,

Verse: 9    ê si mîn kleinœte ersehen.
Verse: 10    mir wære ein laster hie geschehen,

Verse: 11    schiede ich vor gâbe hinnen vrî.
Verse: 12    swaz hie varndes volkes sî,

Verse: 13    die warten alle gâbe an mich.
Verse: 14    Artûs, nû wil ich biten dich,

Verse: 15    daz es den hôhen niht versmâhe,
Verse: 16    des gewerbes gein in gâhe

Verse: 17    und wis des lasters vür si phant
Verse: 18    (si erkanden nie sô rîche hant)

Verse: 19    und gip mir boten in mîne habe,
Verse: 20    dâ der prîsent sol komen abe."

Verse: 21    si lobeten dem heiden,
Verse: 22    si enwolden sich niht scheiden

Verse: 23    von dem velde in vier tagen.
Verse: 24    der heiden wart vrô, sus hôrte ich sagen.

Verse: 25    Artûs im wîse boten gap,
Verse: 26    die er solde senden an daz hap.

Verse: 27    Feirefîz Gahmuretes kint
Verse: 28    nam tincten und permint:

Verse: 29    sîn schrift wârzeichens niht verdarp.
Verse: 30    ich wæne, ie brief sô vil erwarp.




Chapter: 786 
786


Verse: 1    die boten vuoren endehafte dan.
Verse: 2    Parzivâl sîn rede alsus huop an:

Verse: 3    en franzois er zin allen sprach,
Verse: 4    als Trevrezent dort vorne jach,

Verse: 5    daz den grâl ze keinen zîten
Verse: 6    niemen möhte erstrîten,

Verse: 7    wan der von gote ist dar benant.
Verse: 8    diz mære kom über elliu lant,

Verse: 9    dehein strît möhte in erwerben:
Verse: 10    vil liute liez dô verderben

Verse: 11    nâch dem grâle gewerbes list,
Verse: 12    dâ von er noch verborgen ist.

Verse: 13    Parzivâl und Feirefîz
Verse: 14    diu wîp lêrten jâmers vlîz:

Verse: 15    si hetenz ungerne vermiten,
Verse: 16    in diu vier stücke shers si riten,

Verse: 17    si nâmen urloup zal der diet.
Verse: 18    ieweder dan mit vreuden schiet,

Verse: 19    gewâpent wol gein strîtes wer.
Verse: 20    am dritten tage ûz sheidens her

Verse: 21    wart ze Jôflanze brâht,
Verse: 22    sô grôzer gâbe wart nie gedâht.

Verse: 23    swelh künec dâ sîner gâbe emphant,
Verse: 24    daz half immer mêr des lant.

Verse: 25    ieslîchem man nâch mâze sîn
Verse: 26    wart nie sô tiuriu gâbe schîn,

Verse: 27    al den vrouwen rîchiu prîsente
Verse: 28    von Trîande und von Nourîente.

Verse: 29    ich enweiz, wiez her sich schiede hie:
Verse: 30    Kundrîe und dise zwêne, hin riten sie.




Chapter: 787 
787


Verse: 1    Amfortas und die sîne
Verse: 2    noch vor jâmer dolten pîne:

Verse: 3    ir triuwe liez in in der nôt.
Verse: 4    dicke er warp um si den tôt:

Verse: 5    der wære ouch schiere an im geschehen,
Verse: 6    wan daz si in dicke liezen sehen

Verse: 7    den grâl und des grâles kraft.
Verse: 8    er sprach ze sîner ritterschaft:

Verse: 9    "ich weiz wol, phlæget ir triuwe,
Verse: 10    sô erbarmete iuch mîn riuwe.

Verse: 11    wie lange sol diz an mir wern?
Verse: 12    welt ir iu selben rehtes gern,

Verse: 13    sô müezet ir gelten mich vor gote.
Verse: 14    ich stuont ie gerne ziuwerm gebote,

Verse: 15    sît ich von êrste wâpen truoc.
Verse: 16    ich hân engolten des genuoc,

Verse: 17    ob mir ie unprîs geschach
Verse: 18    und ob daz iuwer keiner sach.

Verse: 19    sît ir vor untriuwen bewart,
Verse: 20    sô lœst mich durch des helmes art

Verse: 21    und durch des schiltes orden.
Verse: 22    ir sît dicke innen worden,

Verse: 23    ob ez iu niht versmâhte,
Verse: 24    daz ich diu beidiu brâhte

Verse: 25    unverzaget ûf ritterlîchiu werc.
Verse: 26    ich hân tal unde berc

Verse: 27    mit maneger tjost überzilt
Verse: 28    und mit dem swerte alsô gespilt,

Verse: 29    daz es die vînde an mir verdrôz,
Verse: 30    swie wênec ich des gein iu genôz,




Chapter: 788 
788


Verse: 1    ich vreuden ellende!
Verse: 2    zem urteillîchen ende

Verse: 3    beklage ich eine iuch alle:
Verse: 4    sô næht ez iuwerm valle,

Verse: 5    ir enlât mich von iu scheiden.
Verse: 6    mîn kummer solde iu leiden.

Verse: 7    ir habet gesehen und ouch vernomen,
Verse: 8    wie mir diz ungelücke ist komen.

Verse: 9    waz touc ich iu ze herren nuo?
Verse: 10    ez ist iu leider alze vruo,

Verse: 11    wirt iuwer sêle an mir verlorn.
Verse: 12    waz sites habet ir iu erkorn?"

Verse: 13    si heten kummers in erlôst,
Verse: 14    wan der trœstenlîche trôst,

Verse: 15    den Trevrezent dort vorne sprach.
Verse: 16    als er am grâle geschriben sach,

Verse: 17    si warten anderstunt des man,
Verse: 18    dem al sîn vreude aldâ entran,

Verse: 19    und der helfeclîchen stunde,
Verse: 20    der vrâge von sînem munde.

Verse: 21    der künec sich dicke des bewac,
Verse: 22    daz er blinzender ougen phlac

Verse: 23    etswenne gein vier tagen.
Verse: 24    sô wart er zuo dem grâle getragen,

Verse: 25    ez wære im liep oder leit:
Verse: 26    sô twanc in des diu siecheit,

Verse: 27    daz er diu ougen ûf swanc.
Verse: 28    sô muoste er âne sînen danc

Verse: 29    leben und niht ersterben.
Verse: 30    sus kunden si mit im werben




Chapter: 789 
789


Verse: 1    unz an den tac, daz Parzivâl
Verse: 2    und Feirefîz der vêch gemâl

Verse: 3    mit vreuden ûf Munsalvæsche riten.
Verse: 4    nû hete diu wîle des erbiten,

Verse: 5    daz Mars oder Jûpiter
Verse: 6    wâren komen wider her

Verse: 7    al zornec mit ir loufte
Verse: 8    (sô was er der verkoufte),

Verse: 9    dar si sich von sprunge huoben ê.
Verse: 10    daz tet an sîner wunden wê

Verse: 11    Amfortase, der sô qual,
Verse: 12    megede und ritter hôrten schal

Verse: 13    von sînem geschreie dicke
Verse: 14    und die jâmerlîchen blicke

Verse: 15    tet er in mit den ougen kunt.
Verse: 16    er was unhelfeclîche wunt:

Verse: 17    si mohten im gehelfen niht.
Verse: 18    iedoch diu âventiure giht,

Verse: 19    im kœme diu wâre helfe nuo.
Verse: 20    si griffen herzen jâmers zuo.

Verse: 21    swenne im diu scharphe sûre nôt
Verse: 22    daz strenge ungemach gebôt,

Verse: 23    sô wart der luft gesüezet,
Verse: 24    der wunden smac gebüezet.

Verse: 25    vor im ûf dem teppech lac
Verse: 26    pigment und zerbenzînen smac,

Verse: 27    müzzel und arômatâ.
Verse: 28    durch süezen luft lac ouch dâ

Verse: 29    drîakel und amber tiure,
Verse: 30    der smac was gehiure.




Chapter: 790 
790


Verse: 1    swâ man ûf den teppech trat,
Verse: 2    kardemôme, jerofel, muskât

Verse: 3    lac gebrochen under ir vüezen
Verse: 4    durch den luft süezen:

Verse: 5    sô daz mit triten wart gebert,
Verse: 6    sô was dâ sûrer smac erwert.

Verse: 7    sîn viur was lignâlôê:
Verse: 8    daz hân ich iu gesaget ouch ê.

Verse: 9    an dem spanbette die stollen sîn
Verse: 10    wâren viperhornîn.

Verse: 11    durch ruowen vürz gelüppe
Verse: 12    von würzen manec gestüppe

Verse: 13    was ûf den kultern gesæt.
Verse: 14    gesteppet und niht genæt

Verse: 15    was, dâ er ûfe lente.
Verse: 16    phelle von Nourîente

Verse: 17    und palmât was sîn matraz.
Verse: 18    sîn spanbette was noch baz

Verse: 19    gehêrt mit edeln steinen
Verse: 20    und anders enkeinen.

Verse: 21    daz spanbette zôch zein ander
Verse: 22    strangen von salamander:

Verse: 23    daz wâren under im diu ricseil.
Verse: 24    er hete an vreuden kranken teil.

Verse: 25    ez was rîche an allen sîten:
Verse: 26    niemen darf des strîten,

Verse: 27    daz er bezzerz ie gesæhe.
Verse: 28    ez was tiure und wæhe

Verse: 29    von der edeln steine geslehte.
Verse: 30    die hœrt hie nennen rehte:




Chapter: 791 
791


Verse: 1    karfunkel und silênîtes,
Verse: 2    balax und gagâtromes,

Verse: 3    ônix und kalzidôn,
Verse: 4    kôralis und bestjôn,

Verse: 5    ûnjô und optallîes,
Verse: 6    zerauns und epistîtes,

Verse: 7    jerachîtes und eljotrôpjâ,
Verse: 8    pantêrs und antrodragmâ,

Verse: 9    prâsem und saddâ,
Verse: 10    ematîtes und djonîsjâ,

Verse: 11    achâtes und zelidôn,
Verse: 12    sardônis und kalkofôn,

Verse: 13    kornjôl und jaspis,
Verse: 14    etîtes und îris,

Verse: 15    gagâtes und ligûrjus,
Verse: 16    abestô und zegolitus,

Verse: 17    galaktîdâ und jazinktus,
Verse: 18    orîtes und enîdrus,

Verse: 19    absist und alabandâ,
Verse: 20    krisolekter und hîennîâ,

Verse: 21    smârât und magnes,
Verse: 22    safîr und pirîtes.

Verse: 23    ouch stuont her unde dâ
Verse: 24    turkoise und liparêâ,

Verse: 25    krisolde, rubîne,
Verse: 26    paleise und sardîne,

Verse: 27    adamas und krisoprassis,
Verse: 28    melochîtes und dîadochis,

Verse: 29    pêanîtes und mêdus,
Verse: 30    berillus und topâzjus.




Chapter: 792 
792


Verse: 1    etslîcher lêrte hôhen muot:
Verse: 2    ze sælde und zerzenîe guot

Verse: 3    was dâ maneges steines sunderart.
Verse: 4    vil kraft man an in innen wart,

Verse: 5    derz versuochen kunde mit listen.
Verse: 6    dâ mite si muosten vristen

Verse: 7    Amfortasen, der ir herze truoc,
Verse: 8    sînem volke er jâmers gap genuoc:

Verse: 9    doch wirt nû vreude an im vernomen.
Verse: 10    in Terre de Salvæsche ist komen,

Verse: 11    von Jôflanze gestrichen,
Verse: 12    dem sîn sorge was entwichen,

Verse: 13    Parzivâl, sîn bruoder und ein maget.
Verse: 14    mir ist niht vür wâr gesaget,

Verse: 15    wie verre dâ zwischen wære.
Verse: 16    si ervüeren nû strîtes mære:

Verse: 17    wan Kundrîe ir geleite
Verse: 18    schiet si von arbeite.

Verse: 19    si riten gein einer warte.
Verse: 20    dâ gâhte gein in harte

Verse: 21    manec wol geriten templeis
Verse: 22    gewâpent. die wâren sô kurteis,

Verse: 23    an dem geleite si wol sâhen,
Verse: 24    daz in vreude solde nâhen.

Verse: 25    der selben rotte meister sprach,
Verse: 26    dô er vil turteltûben sach

Verse: 27    glesten ab Kundrîen wât:
Verse: 28    "unser sorge ein ende hât:

Verse: 29    mit sgrâles insigel hie
Verse: 30    kumt uns, des wir dâ gerten ie,




Chapter: 793 
793


Verse: 1    sît uns der jâmerstric beslôz.
Verse: 2    habet stille: uns næhet vreude grôz."

Verse: 3    Feirefîz Anschevîn
Verse: 4    mante Parzivâlen den bruoder sîn

Verse: 5    an der selben zîte,
Verse: 6    er gâhte gein dem strîte.

Verse: 7    Kundrîe in mit dem zoume vienc.
Verse: 8    sîner tjost dâ niht ergienc.

Verse: 9    dô sprach diu maget rûch gemâl
Verse: 10    balde zir herren Parzivâl:

Verse: 11    "schilte und baniere
Verse: 12    möhtet ir erkennen schiere:

Verse: 13    dort habet niht wan sgrâles schar.
Verse: 14    die sint vil dienesthaft iu gar."

Verse: 15    dô sprach der werde heiden:
Verse: 16    "sô sî der strît gescheiden."

Verse: 17    Parzivâl Kundrîen bat
Verse: 18    gein in rîten ûf dem phat.

Verse: 19    diu reit und sagete in mære,
Verse: 20    waz in vreuden komen wære.

Verse: 21    swaz dâ templeise was,
Verse: 22    die erbeizten nider ûf daz gras

Verse: 23    an den selben stunden.
Verse: 24    manec helm wart abe gebunden,

Verse: 25    Parzivâlen emphiengen si ze vuoz:
Verse: 26    ein segen dûhte si sîn gruoz.

Verse: 27    si emphiengen ouch Feirefîzen
Verse: 28    den swarzen und den wîzen.

Verse: 29    ûf Munsalvæsche wart geriten
Verse: 30    al weinde und doch mit vreude siten.




Chapter: 794 
794


Verse: 1    si vunden volkes ungezalt,
Verse: 2    manegen wünneclîchen ritter alt,

Verse: 3    edeliu kint, vil sarjande,
Verse: 4    die trûrege mahinande.

Verse: 5    dirre künfte vrô wol mohten sîn
Verse: 6    Feirefîz Anschevîn

Verse: 7    und Parzivâl, si bêde.
Verse: 8    vor dem palas an der grêde

Verse: 9    si wurden wol emphangen.
Verse: 10    in den palas wart gegangen.

Verse: 11    dâ lac nâch ir gewonheit
Verse: 12    hundert sinewele teppech breit,

Verse: 13    ûf ieslîchem ein phlûmît
Verse: 14    und ein kulter lanc von samît.

Verse: 15    vuoren die zwêne mit witzen,
Verse: 16    si mohten etswâ dâ sitzen,

Verse: 17    unz manz harnas von in emphienc.
Verse: 18    ein kamerære dar nâher gienc:

Verse: 19    der brâhte in kleider rîche,
Verse: 20    den beiden al gelîche.

Verse: 21    si sâzen, swaz dâ ritter was.
Verse: 22    man truoc von golde (ez was niht glas)

Verse: 23    vür si manegen tiuren schâl.
Verse: 24    Feirefîz und Parzivâl

Verse: 25    trunken unde giengen dan
Verse: 26    z Amfortase dem trûregen man.

Verse: 27    ir habet ê vernomen, daz
Verse: 28    der lente und daz er selten saz

Verse: 29    und wie sîn bette gehêret was.
Verse: 30    dise zwêne emphienc dô Amfortas




Chapter: 795 
795


Verse: 1    vrœlîche und doch mit jâmers siten.
Verse: 2    er sprach: "ich hân unsanfte erbiten,

Verse: 3    wirde ich immer von iu vrô.
Verse: 4    ir schiedet nû jungest von mir alsô,

Verse: 5    phleget ir herzenlîcher triuwe,
Verse: 6    man siht iuch drum in riuwe.

Verse: 7    würde ie prîs von iu gesaget,
Verse: 8    hie sî ritter oder maget,

Verse: 9    werbet mir dâ zin den tôt
Verse: 10    und lât sich enden mîne nôt.

Verse: 11    sît ir genant Parzivâl,
Verse: 12    sô wert mîn sehen an den grâl

Verse: 13    siben naht und ehte tage.
Verse: 14    dâ mite ist wendec al mîn klage:

Verse: 15    ich engetar iuch anders warnen niht.
Verse: 16    wol iu, ob man iu helfe giht.

Verse: 17    iuwer geselle ist hie ein vremder man.
Verse: 18    sîns stêns ich im vor mir niht gan:

Verse: 19    wan lât ir in varn an sîn gemach?"
Verse: 20    al weinde Parzivâl dô sprach:

Verse: 21    "saget mir, wâ der grâl hie lige.
Verse: 22    ob diu gotes güete an mir gesige,

Verse: 23    des wirt wol innen disiu schar."
Verse: 24    sîn venje viel er sendes dar

Verse: 25    drîstunt zêren der trînitât:
Verse: 26    er warp, daz müeste werden rât

Verse: 27    des trûregen mannes herzesêr.
Verse: 28    er rihte sich ûf und sprach dô mêr:

Verse: 29    "œheim, waz wirret dir?"
Verse: 30    der durch sande Silvestern einen stier




Chapter: 796 
796


Verse: 1    von tôde lebendec dan hiez gên
Verse: 2    und der Lâzarum bat ûf stên,

Verse: 3    der selbe half, daz Amfortas
Verse: 4    wart gesunt und wol genas.

Verse: 5    swaz der Franzois heizt flôrî,
Verse: 6    der glast kom sînem velle bî.

Verse: 7    Parzivâles schœne was nû ein wint
Verse: 8    und Absalôn Dâvîdes kint,

Verse: 9    von Askalûn Vergulaht
Verse: 10    und al, den schœne was geslaht,

Verse: 11    und des man Gahmurete jach,
Verse: 12    dô man in în zogen sach

Verse: 13    ze Kanvoleiz sô wünneclîch,
Verse: 14    ir deheines schœne was der gelîch,

Verse: 15    die Amfortas ûz siecheit truoc.
Verse: 16    got noch künste kan genuoc.

Verse: 17    dâ ergienc dô dehein ander wal,
Verse: 18    wan die diu schrift an dem grâl

Verse: 19    hete ze herren in benant:
Verse: 20    Parzivâl wart schiere bekant

Verse: 21    ze künege und ze herren dâ.
Verse: 22    ich wæne, iemen anderswâ

Verse: 23    vünde zwêne als rîche man,
Verse: 24    ob ich rîcheit prüeven kan,

Verse: 25    als Parzivâl und Feirefîz.
Verse: 26    man bôt vil dienestlîchen vlîz

Verse: 27    dem wirte und sînem gaste.
Verse: 28    ich enweiz, wie manege raste

Verse: 29    Kondwîrâmûrs dô was geriten
Verse: 30    gein Munsalvæsche mit vreude siten.




Chapter: 797 
797


Verse: 1    si hete die wârheit ê vernomen:
Verse: 2    solh botschaft was nâch ir komen,

Verse: 3    daz wendec wære ir klagendiu nôt.
Verse: 4    der herzoge Kîôt

Verse: 5    und anders manec werder man
Verse: 6    heten si gevüeret dan

Verse: 7    ze Terre de Salvæsche in den walt.
Verse: 8    dâ mit der tjoste wart gevalt

Verse: 9    Segremors und dâ der snê
Verse: 10    mit bluote sich ir gelîchete ê,

Verse: 11    dâ solde Parzivâl si holn:
Verse: 12    die reise er gerne mohte doln.

Verse: 13    disiu mære sagete im ein templeis:
Verse: 14    "manec ritter kurteis

Verse: 15    die künegîn hânt mit zühten brâht."
Verse: 16    Parzivâl was sô bedâht,

Verse: 17    er nam ein teil des grâles schar
Verse: 18    und reit vür Trevrezenten dar.

Verse: 19    des herze wart der mære vrô,
Verse: 20    daz Amfortases dinc alsô

Verse: 21    stuont, daz er der tjost niht starp
Verse: 22    und im diu vrâge ruowe erwarp.

Verse: 23    dô sprach er: "got vil tougen hât.
Verse: 24    wer gesaz ie an sînen rât

Verse: 25    oder wer weiz ende sîner kraft?
Verse: 26    al die engel mit ir geselleschaft

Verse: 27    bevindentz nimmer an den ort.
Verse: 28    got ist mensche und sîns vater wort,

Verse: 29    got ist vater unde sun,
Verse: 30    sîn geist mac grôze helfe tuon."




Chapter: 798 
798


Verse: 1    Trevrezent ze Parzivâle sprach:
Verse: 2    "grœzer wunder selten ie geschach,

Verse: 3    sît ir ab got erzürnet hât,
Verse: 4    daz sîn endelôsiu trînitât

Verse: 5    iuwers willen werschaft worden ist.
Verse: 6    ich louc durch abeleitens list

Verse: 7    von dem grâl, wiez um in stüende.
Verse: 8    gebet mir wandel vür die sünde:

Verse: 9    ich sol gehôrsam iu nû sîn,
Verse: 10    swestersun und der herre mîn.

Verse: 11    daz die vertriben geiste
Verse: 12    mit der gotes volleiste

Verse: 13    bî dem grâle wæren,
Verse: 14    kom iu von mir ze mæren,

Verse: 15    unz daz si hulde dâ gebiten.
Verse: 16    got ist stæte mit solhen siten,

Verse: 17    er strîtet immer wider sie.
Verse: 18    die ich iu ze hulden nande hie,

Verse: 19    swer sînes lônes iht wil tragen,
Verse: 20    der muoz den selben widersagen:

Verse: 21    êweclîch sint si verlorn.
Verse: 22    die vlust si selbe hânt erkorn.

Verse: 23    mich müet et iuwer arbeit.
Verse: 24    ez was ie ungewonheit,

Verse: 25    daz den grâl ze keinen zîten
Verse: 26    iemen möhte erstrîten:

Verse: 27    ich hete iuch gerne dâ von genomen.
Verse: 28    nûst ez anders um iuch komen:

Verse: 29    sich hât gehœhet iuwer gewin.
Verse: 30    nû kêrt an diemuot iuwern sin."




Chapter: 799 
799


Verse: 1    Parzivâl ze sînem œheim sprach:
Verse: 2    "ich wil si sehen, die ich nie gesach

Verse: 3    inner vünf jâren.
Verse: 4    dô wir bî ein ander wâren,

Verse: 5    si was mir liep: als ist si ouch noch.
Verse: 6    dînen rât wil ich haben doch,

Verse: 7    die wîle uns scheidet niht der tôt:
Verse: 8    dû riete mir ê in grôzer nôt.

Verse: 9    ich wil gein mînem wîbe komen,
Verse: 10    der kunft ich gein mir hân vernomen

Verse: 11    bî dem Plimizôle an einer stat."
Verse: 12    urloup er im geben bat.

Verse: 13    dô bevalh in gote der guote man.
Verse: 14    Parzivâl die naht streich dan:

Verse: 15    sînen gesellen was der walt wol kunt.
Verse: 16    dôz tagete, dô vant er lieben vunt,

Verse: 17    manec gezelt ûf geslagen.
Verse: 18    ûz dem lande ze Brôbarz, hôrte ich sagen,

Verse: 19    was vil banier dâ gestecket,
Verse: 20    manec schilt dar nâch getrecket:

Verse: 21    sîns landes vürsten lâgen dâ.
Verse: 22    Parzivâl der vrâcte, wâ

Verse: 23    diu künegîn selbe læge
Verse: 24    und ob si sunderringes phlæge

Verse: 25    [man zeicte im, aldâ si lac
Verse: 26    und wol gehêrtes ringes phlac,]

Verse: 27    mit zelten ummevangen.
Verse: 28    nû was von Katelangen

Verse: 29    der herzoge Kîôt smorgens vruo
Verse: 30    ûf gestanden: dise riten zuo.




Chapter: 800 
800


Verse: 1    des tages blic was dennoch grâ.
Verse: 2    Kîôt iedoch erkande aldâ

Verse: 3    des grâles wâpen an der schar:
Verse: 4    si vuorten turteltûben gar.

Verse: 5    dô ersiufzete sîn alder lîp,
Verse: 6    wan Schoisîâne, sîn kiusche wîp,

Verse: 7    ze Munsalvæsche im sælde erwarp,
Verse: 8    diu von Sigûnen gebürte erstarp.

Verse: 9    Kîôt gein Parzivâle gienc,
Verse: 10    in und die sîne er wol emphienc.

Verse: 11    er sande ein juncherrelîn
Verse: 12    nâch dem marschalke der künegîn

Verse: 13    und bat in schaffen guot gemach,
Verse: 14    swaz er dâ ritter halden sach.

Verse: 15    er vuorte in selben mit der hant,
Verse: 16    dâ er der künegin kamern vant,

Verse: 17    ein kleine gezelt von buckeram.
Verse: 18    daz harnas man gar von im dâ nam.

Verse: 19    diu künegîn des noch niht enweiz.
Verse: 20    Loherangrîn und Kardeiz

Verse: 21    vant Parzivâl bî ir ligen
Verse: 22    (dô muoste vreude an im gesigen)

Verse: 23    in einem gezelt hôch und wît,
Verse: 24    dâ her und dâ in alle sît

Verse: 25    klârer vrouwen lac genuoc.
Verse: 26    Kîôt ûfz deckelachen sluoc,

Verse: 27    er bat die künegîn wachen
Verse: 28    und vrœlîche lachen.

Verse: 29    si blicte ûf und sach ir man.
Verse: 30    si hete niht wanz hemde an:




Chapter: 801 
801


Verse: 1    um sich siz deckelachen swanc.
Verse: 2    vürz bette ûf den teppech spranc

Verse: 3    Kondwîrâmûrs diu lieht gemâl.
Verse: 4    ouch ummevienc si Parzivâl:

Verse: 5    man sagete mir, si kusten sich.
Verse: 6    si sprach: "mir hât gelücke dich

Verse: 7    gesendet, herzen vreude mîn."
Verse: 8    si bat in willekomen sîn.

Verse: 9    "nû solde ich zürnen: ich enmac.
Verse: 10    gêrt sî diu wîle und dirre tac,

Verse: 11    der mir brâhte disen ummevanc,
Verse: 12    dâ von mîn trûren wirdet kranc.

Verse: 13    ich hân nû, des mîn herze gert:
Verse: 14    sorge ist an mir vil ungewert."

Verse: 15    nû erwachten ouch diu kindelîn.
Verse: 16    Kardeiz und Loherangrîn

Verse: 17    die lâgen ûf dem bette al blôz.
Verse: 18    Parzivâlen des niht verdrôz,

Verse: 19    er enkuste si minneclîche.
Verse: 20    Kîôt der zühte rîche

Verse: 21    bat die knaben dannen tragen.
Verse: 22    er begunde ouch al den vrouwen sagen,

Verse: 23    daz si ûz dem gezelte giengen.
Verse: 24    si tâtenz, dô si emphiengen

Verse: 25    ir herren von langer reise.
Verse: 26    Kîôt der kurteise

Verse: 27    bevalh der künegîn ir man.
Verse: 28    al die juncvrouwen er vuorte dan.

Verse: 29    dennoch was ez harte vruo:
Verse: 30    kamerære sluogen die winden zuo.




Chapter: 802 
802


Verse: 1    gezucte im ie bluot und snê
Verse: 2    geselleschaft an witzenê

Verse: 3    (ûf der selben ouwe erz ligen vant),
Verse: 4    vür solhen kummer gap nû phant

Verse: 5    Kondwîrâmûrs: diu hetez dâ.
Verse: 6    sîn lîp emphienc nie anderswâ

Verse: 7    minne helfe vür der minne nôt:
Verse: 8    manec wert wîp im doch minne bôt.

Verse: 9    ich wæne, er kurzewîle phlac
Verse: 10    unz an den mitten morgens tac.

Verse: 11    daz her über al reit schouwen dar:
Verse: 12    si nâmem der templeise war.

Verse: 13    die wâren gezimieret
Verse: 14    und wol zehurtieret,

Verse: 15    ir schilte mit tjosten sêre durchriten,
Verse: 16    dar zuo mit swerten ouch versniten.

Verse: 17    etslîcher truoc ein kursît
Verse: 18    von phelle oder von samît.

Verse: 19    îserkolzen heten si dennoch an:
Verse: 20    daz ander harnas was von in getân.

Verse: 21    dâ enmac niht mêr geslâfen sîn.
Verse: 22    der künec und diu künegîn

Verse: 23    stuonden ûf. ein priester messe sanc,
Verse: 24    ûf dem ringe huop sich grôz gedranc

Verse: 25    von dem ellenthaften her.
Verse: 26    die gein Klâmidê ê wâren ze wer,

Verse: 27    dô der bendiz wart getân,
Verse: 28    Parzivâlen emphiengen sîne man

Verse: 29    mit triuwen werdeclîche,
Verse: 30    manec ritter ellens rîche.




Chapter: 803 
803


Verse: 1    des gezeltes winden nam man abe.
Verse: 2    der künec sprach: "wederz ist der knabe,

Verse: 3    der künec sol sîn über iuwer lant?"
Verse: 4    al den vürsten tet er dâ bekant:

Verse: 5    "Wâleis und Norgâls,
Verse: 6    Kanvoleiz und Kingrivâls

Verse: 7    der selbe sol mit rehte hân.
Verse: 8    z Anschouwe und in Bêalzenân,

Verse: 9    kom er immer an mannes kraft,
Verse: 10    dar leistet im geselleschaft.

Verse: 11    Gahmuret mîn vater hiez,
Verse: 12    der mirz mit rehtem erbe liez:

Verse: 13    mit sælde ich gerbet hân den grâl.
Verse: 14    nû emphâhet ir an disem mâl

Verse: 15    iuweriu lêhen von mînem kinde,
Verse: 16    ob ich an iu triuwe vinde."

Verse: 17    mit guotem willen daz geschach.
Verse: 18    vil vanen man dort vüeren sach:

Verse: 19    dâ lihen zwuo kleine hende
Verse: 20    wîter lande manec ende.

Verse: 21    gekrœnet wart dô Kardeiz.
Verse: 22    der betwanc ouch sider Kanvoleiz

Verse: 23    und vil des Gahmuretes was.
Verse: 24    bî dem Plimizôl ûf ein gras

Verse: 25    wart gesidele und wîter rinc genomen,
Verse: 26    dâ si zem brôte solden komen.

Verse: 27    snellîche dâ enbizzen wart.
Verse: 28    daz her kêrte an die heimvart:

Verse: 29    diu gezelt nam man elliu nider.
Verse: 30    mit dem jungen künege si vuoren wider.




Chapter: 804 
804


Verse: 1    manec juncvrouwe und ir ander diet
Verse: 2    sich von der küneginne schiet,

Verse: 3    sô daz si tâten klage schîn.
Verse: 4    dô nâmen Loherangrîn

Verse: 5    und sîn muoter wol getân
Verse: 6    die templeise und riten dan

Verse: 7    gein Munsalvæsche balde.
Verse: 8    "zeiner zît ûf disem walde,"

Verse: 9    sprach Parzivâl, "dâ sach ich stên
Verse: 10    eine klôsen, dâ durch balde gên

Verse: 11    einen snellen brunnen klâr:
Verse: 12    ob ir si wizzet, sô wîst mich dar."

Verse: 13    von sînen gesellen wart im gesaget,
Verse: 14    si wessen eine: "dâ wont ein maget

Verse: 15    al klagende ûf vriundes sarke.
Verse: 16    diust rehter güete ein arke,

Verse: 17    unser reise gêt ir nâhe bî.
Verse: 18    man vint si selten jâmers vrî."

Verse: 19    der künec sprach: "wir suln si sehen."
Verse: 20    dâ wart im volge an in verjehen.

Verse: 21    si riten vür sich drâte
Verse: 22    und vunden sâbents spâte

Verse: 23    Sigûnen an ir venje tôt.
Verse: 24    dâ sach diu künegîn jâmers nôt.

Verse: 25    si brâchen zuo zir dar în,
Verse: 26    Parzivâl durch die nifteln sîn

Verse: 27    bat ûf wegen den starkes stein.
Verse: 28    Schîânatulander schein

Verse: 29    unervûlet schône balsemvar.
Verse: 30    man legete si nâhe zuo zim dar,




Chapter: 805 
805


Verse: 1    diu magetuomlîche minne im gap,
Verse: 2    dô si lebete, und sluoc zuo daz grap.

Verse: 3    Kondwîrâmûrs begunde klagen
Verse: 4    ir vetern tohter, hôrte ich sagen,

Verse: 5    und wart vil vreuden âne.
Verse: 6    wande si Schoisîâne,

Verse: 7    der tôten megede muoter, zôch
Verse: 8    kint wesende, drum si vreude vlôch,

Verse: 9    diu Parzivâles muome was.
Verse: 10    ob der Provenzâl die wârheit las,

Verse: 11    der herzoge Kîôt
Verse: 12    wesse wênec um sîner tohter tôt,

Verse: 13    des künec Kardeizes magezoge.
Verse: 14    ez ist niht krump alsô der boge,

Verse: 15    diz mære ist wâr unde sleht.
Verse: 16    si tâten dô der reise ir reht,

Verse: 17    bî naht gein Munsalvæsche si riten.
Verse: 18    dâ hete ir Feirefîz gebiten

Verse: 19    mit kurzewîle die stunde.
Verse: 20    vil kerzen man dô enzunde,

Verse: 21    rehte ob brünne gar der walt.
Verse: 22    ein templeis de Patrigalt

Verse: 23    gewâpent bî der künegîn reit.
Verse: 24    der hof was wît unde breit:

Verse: 25    dar ûfe stuont manec sunderschar.
Verse: 26    si emphiengen die küneginne gar

Verse: 27    und den wirt und den sun sîn.
Verse: 28    dô truoc man Loherangrîn

Verse: 29    gein sînem vetern Feirefîz.
Verse: 30    dô der was swarz unde wîz,




Chapter: 806 
806


Verse: 1    der knabe sîn wolde küssen niht:
Verse: 2    werden kinden man noch vorhte giht.

Verse: 3    des lachete der heiden.
Verse: 4    dô begunden si sich scheiden

Verse: 5    ûf dem hove und dô diu künegin
Verse: 6    erbeizet was, in kom gewin

Verse: 7    an ir mit vreuden künfte aldar.
Verse: 8    man vuorte si, dâ werdiu schar

Verse: 9    von maneger klâren vrouwen was.
Verse: 10    Feirefîz und Amfortas

Verse: 11    mit zühten stuonden bêde
Verse: 12    bî der vrouwen an der grêde.

Verse: 13    Repanse de Schoie
Verse: 14    und von Gruonlant Garschiloie,

Verse: 15    Flôrîe von Lûnel,
Verse: 16    liehtiu ougen und klâriu vel

Verse: 17    die truogen und magetuomlîchen prîs.
Verse: 18    dâ stuont ouch swankel als ein rîs,

Verse: 19    der schœne und güete niht gebrach
Verse: 20    und der man im ze tohter jach,

Verse: 21    von Rîle Jernîse:
Verse: 22    diu maget hiez Amflîse.

Verse: 23    von Tenabroc, ist mir gesaget,
Verse: 24    stuont dâ Klârischanze ein süeziu maget,

Verse: 25    liehter varwe gar unverkrenket,
Verse: 26    als ein âmeize gelenket.

Verse: 27    Feirefîz gein der wirtîn trat.
Verse: 28    diu künegîn den sich küssen bat,

Verse: 29    si kuste ouch Amfortasen dô
Verse: 30    und was sîner urlœsunge vrô.




Chapter: 807 
807


Verse: 1    Feirefîz si vuorte mit der hant,
Verse: 2    dâ si des wirtes muomen vant,

Verse: 3    Repansen de Schoie, stên.
Verse: 4    dâ muoste küssens vil ergên.

Verse: 5    dar zuo ir munt was ê sô rôt:
Verse: 6    der leit von küssen nû die nôt,

Verse: 7    daz ez mich müet und ist mir leit,
Verse: 8    daz ich niht hân solh arbeit

Verse: 9    vür si, wan si kom müediu zin.
Verse: 10    juncvrouwen vuorten ir vrouwen hin.

Verse: 11    die ritter in dem palas
Verse: 12    beliben, der wol gekerzet was,

Verse: 13    die harte liehte brunnen.
Verse: 14    dô wart mit zuht begunnen

Verse: 15    gereitschaft gein dem grâle.
Verse: 16    den truoc man zallem mâle

Verse: 17    der diet niht durch schouwen vür,
Verse: 18    niht wan ze hôchgezîte kür,

Verse: 19    durch daz si trôstes wânden.
Verse: 20    dô si sich vreuden ânden

Verse: 21    sâbents um daz bluotege sper,
Verse: 22    dô wart der grâl durch helfe ger

Verse: 23    vür getragen an der selben zît:
Verse: 24    Parzivâl si liez in sorgen sît.

Verse: 25    mit vreude er wirt nû vür getragen:
Verse: 26    ir sorge ist under gar geslagen.

Verse: 27    dô diu künegîn ir reisegewant
Verse: 28    abe gezôch und sich gebant,

Verse: 29    si kom, als ez ir wol gezam.
Verse: 30    Feirefîz an einer tür si nam.




Chapter: 808 
808


Verse: 1    nû, diz was et âne strît,
Verse: 2    daz hôrte oder spræche ze keiner zît

Verse: 3    iemen von schœnerm wîbe.
Verse: 4    si truoc ouch an ir lîbe

Verse: 5    phellel, den ein künstec hant
Verse: 6    worhte, als in Sârant

Verse: 7    mit grôzem liste erdâhteê
Verse: 8    in der stat ze Tasmê.

Verse: 9    Feirefîz Anschevîn
Verse: 10    si brâhte, diu gap liehten schîn.

Verse: 11    mitten durch den palas
Verse: 12    driu grôziu viur gemachet was,

Verse: 13    lignâlôê des viurs smac.
Verse: 14    vierzec teppeche und gesitze mêr dâ lac

Verse: 15    denne zeiner zît, dô Parzivâl
Verse: 16    ouch dâ vür sach tragen den grâl.

Verse: 17    ein gesiz vor ûz gehêret was,
Verse: 18    dâ Feirefîz und Amfortas

Verse: 19    bî dem wirte solde sitzen.
Verse: 20    dô warp mit zühte witzen,

Verse: 21    swer dâ dienen wolde,
Verse: 22    sô der grâl komen solde.

Verse: 23    ir habet gehôrt ê des genuoc,
Verse: 24    wie man in vür Amfortasen truoc:

Verse: 25    dem siht man nû gelîche tuon
Verse: 26    vür des werden Gahmuretes sun

Verse: 27    und ouch vür Tampenteires kint.
Verse: 28    juncvrouwen nû niht langer sint:

Verse: 29    ordenlîch si kômen über al,
Verse: 30    vünf und zweinzec an der zal.




Chapter: 809 
809


Verse: 1    der êrsten blic den heiden klâr
Verse: 2    dûhte und reideloht ir hâr,

Verse: 3    die andern schœner aber dâ nâch,
Verse: 4    die er dô schierest komen sach,

Verse: 5    und ir aller kleider tiure.
Verse: 6    süeze minneclîch gehiure

Verse: 7    was al der megede antlitze gar.
Verse: 8    nâch in allen kom diu lieht gevar

Verse: 9    Repanse de Schoie, ein maget.
Verse: 10    sich liez der grâl, ist mir gesaget,

Verse: 11    die selben tragen eine
Verse: 12    und anders enkeine.

Verse: 13    ir herzen was vil kiusche bî,
Verse: 14    ir vel des blickes flôrî.

Verse: 15    sage ich des dienstes urhap,
Verse: 16    wie vil kamerære dâ wazzer gap

Verse: 17    und waz man taveln vür si truoc,
Verse: 18    mêr, denne ichs iu ê gewuoc,

Verse: 19    wie unvuoge den palas vlôch,
Verse: 20    waz man dâ karrâschen zôch

Verse: 21    mit tiuren goltvazzen
Verse: 22    und wie die ritter sâzen,

Verse: 23    daz würde ein alze langez spel:
Verse: 24    ich wil der kürze wesen snel.

Verse: 25    mit zuht man vor dem grâle nam
Verse: 26    spîse wilt unde zam,

Verse: 27    disem den mete und dem den wîn,
Verse: 28    als ez ir site wolde sîn,

Verse: 29    môraz, sinôpel, klâret.
Verse: 30    fil li roi Gahmuret




Chapter: 810 
810


Verse: 1    Pelrapeire al anders vant,
Verse: 2    dô si im zem êrsten wart erkant.

Verse: 3    der heiden vrâcte mære,
Verse: 4    wâ von diu goltvaz lære

Verse: 5    vor der taveln würden vol.
Verse: 6    daz wunder im tet ze sehene wol.

Verse: 7    dô sprach der klâre Amfortas,
Verse: 8    der im ze gesellen gegeben was:

Verse: 9    "herre, seht ir vor iu ligen den grâl?"
Verse: 10    dô sprach der heiden vêch gemâl:

Verse: 11    "ich ensihe niht wan ein achmardî:
Verse: 12    daz truoc mîn juncvrouwe uns bî,

Verse: 13    diu dort vor uns mit krône stêt.
Verse: 14    ir blic mir inz herze gêt.

Verse: 15    ich wânde, sô starc wære mîn lîp,
Verse: 16    daz iemêr maget oder wîp

Verse: 17    mir vreuden kraft benæme.
Verse: 18    mirst worden widerzæme,

Verse: 19    ob ich ie werde minne empienc.
Verse: 20    unzuht mir zuht undervienc,

Verse: 21    daz ich iu künde mîne nôt,
Verse: 22    sît ich iu dienest nie gebôt.

Verse: 23    waz hilfet al mîn rîcheit
Verse: 24    und swaz ich ie durch wîp gestreit

Verse: 25    und ob mîn hant iht hât vergeben,
Verse: 26    muoz ich sus pîneclîche leben?

Verse: 27    ein kreftec got Jûpiter,
Verse: 28    waz woldestû mîn zunsenfte her?"

Verse: 29    minnen kraft mit vreuden krenke
Verse: 30    vrumte in bleich an sîner blenke.




Chapter: 811 
811


Verse: 1    Kondwîrâmûrs diu lieht erkant
Verse: 2    vil nâch nû ebenhiuze vant

Verse: 3    an der klâren megede velles blic.
Verse: 4    dô slôz sich in ir minnen stric

Verse: 5    Feirefîz der rîche gast.
Verse: 6    sîner êrsten vriuntschaft im gebrast

Verse: 7    mit vergezzenlîchen willen.
Verse: 8    waz half dô Sekundillen

Verse: 9    ir minne, ir lant Tribalibôt?
Verse: 10    im gap ein maget sô strenge nôt:

Verse: 11    Klauditte und Olimpjâ,
Verse: 12    Sekundille und wîten anderswâ

Verse: 13    dâ wîp im dienstes lônden
Verse: 14    und sînes prîses schônden,

Verse: 15    Gahmuretes sun von Zazamanc
Verse: 16    den dûhte ir aller minne kranc.

Verse: 17    dô sach der klâre Amfortas,
Verse: 18    daz sîn geselle in pînen was,

Verse: 19    des blankiu mâl gar wurden bleich,
Verse: 20    sô daz im hôher muot gesweich.

Verse: 21    dô sprach er: "herre, diu swester mîn,
Verse: 22    mirst leit, ob iuch diu lêret pîn,

Verse: 23    den noch niemen durch si erleit.
Verse: 24    nie ritter in ir dienst gereit:

Verse: 25    dô nam ouch niemen lôn dâ zir.
Verse: 26    si was mit jâmer grôz bî mir.

Verse: 27    daz krenket ouch ir varwe ein teil,
Verse: 28    daz man si sach sô selten geil.

Verse: 29    iuwer bruoder ist ir swester sun:
Verse: 30    der mac iu dâ wol helfe tuon."




Chapter: 812 
812


Verse: 1    "sol diu maget iuwer swester sîn,"
Verse: 2    sprach Feirefîz Anschevîn,

Verse: 3    "diu die krône ûf blôzem hâre dort hât,
Verse: 4    sô gebet mir um ir minne rât:

Verse: 5    nâch ir ist al mîns herzen ger.
Verse: 6    ob ich prîs erwarp ie mit sper,

Verse: 7    wan wære daz gar durch si geschehen
Verse: 8    und wolde si danne ir lônes jehen!

Verse: 9    vünf stiche mac turnieren hân,
Verse: 10    die sint mit mîner hant getân:

Verse: 11    einer ist zem puneiz,
Verse: 12    ze triviers ich den andern weiz,

Verse: 13    der dritte ist ze muoten,
Verse: 14    ze rehter tjost den guoten

Verse: 15    hurteclîch ich hân geriten
Verse: 16    und den zer volge ouch niht vermiten,

Verse: 17    sît der schilt von êrste wart mîn dach.
Verse: 18    hiute ist mîn hœste ungemach.

Verse: 19    ich stach vor Agremuntîn
Verse: 20    gein einem ritter viurîn:

Verse: 21    wan mîn kursît salamander,
Verse: 22    aspindê mîn schilt der ander,

Verse: 23    ich wære verbrunnen von der tjost.
Verse: 24    swâ ich holte ie prîs ûf slîbes kost,

Verse: 25    ouwî, hete si mich gesendet dar,
Verse: 26    iuwer swester minneclîch gevar,

Verse: 27    ich wære gein strîte noch ir bote.
Verse: 28    Jûpitern mînem gote

Verse: 29    wil ich immer hazzen tragen,
Verse: 30    er enwende mir diz starke klagen."




Chapter: 813 
813


Verse: 1    ir beider vater hiez Frimutel:
Verse: 2    gelîch antlitze und gelîchez vel

Verse: 3    Amfortas bî sîner swester truoc.
Verse: 4    der heiden sach an si genuoc

Verse: 5    und aber wider dicke an in.
Verse: 6    swie vil man her oder hin

Verse: 7    spîse truoc, sîn munt ir doch niht az:
Verse: 8    ezzen er doch gelîche saz.

Verse: 9    Amfortas sprach ze Parzivâl:
Verse: 10    "herre, iuwer bruoder hât den grâl,

Verse: 11    des ich wæne, noch niht gesehen."
Verse: 12    Feirefîz begunde dem wirte jehen,

Verse: 13    daz er des grâls niht sæhe.
Verse: 14    daz dûhte al die ritter spæhe.

Verse: 15    diz mære ouch Titurel vernam.
Verse: 16    der alte betterise lam

Verse: 17    der sprach: "ist ez ein heidensch man,
Verse: 18    sô darf er des niht willen hân,

Verse: 19    daz sîn ougen âne stoufes kraft
Verse: 20    bejagen die geselleschaft,

Verse: 21    daz si den grâl beschouwen:
Verse: 22    dâst hâmît vür gehouwen."

Verse: 23    daz enbôt er ûf den palas.
Verse: 24    dô sprach der wirt und Amfortas,

Verse: 25    daz Feirefîz næme war,
Verse: 26    wes al daz volc lebete gar,

Verse: 27    dâ wære ein ieslîch heiden
Verse: 28    mit sehene von gescheiden.

Verse: 29    si wurben, daz er næme den touf
Verse: 30    und endelôsen gewinnes kouf.




Chapter: 814 
814


Verse: 1    "ob ich durch iuch gein toufe kum,
Verse: 2    ist mir der touf ze minnen vrum?"

Verse: 3    sprach der heiden, Gahmuretes kint.
Verse: 4    "ez was ie jenen her ein wint,

Verse: 5    swaz mich strît oder minne twanc.
Verse: 6    des sî kurz oder lanc,

Verse: 7    daz mich êrst der schilt übervienc,
Verse: 8    sît ich nie grœzer nôt emphienc.

Verse: 9    durch zuht solde ich minne heln:
Verse: 10    nû enmac irz herze niht versteln."

Verse: 11    "wen meinestû?" sprach Parzivâl.
Verse: 12    "et jene maget lieht gemâl,

Verse: 13    mîns gesellen swester hie.
Verse: 14    wiltû mir helfen umme sie,

Verse: 15    ich tuon ir rîcheit bekant,
Verse: 16    sô daz ir dienent wîtiu lant."

Verse: 17    "wiltû dich toufes lâzen wern,"
Verse: 18    sprach der wirt, "sô mahtû ir minne gern.

Verse: 19    ich mac nû wol duzen dich:
Verse: 20    unser rîchtuom nâch gelîchet sich,

Verse: 21    mînhalp von sgrâles krefte."
Verse: 22    "hilf mir geselleschefte,"

Verse: 23    sprach Feirefîz Anschevîn,
Verse: 24    "bruoder, um die muomen dîn.

Verse: 25    holt man den touf mit strîte?
Verse: 26    dar schaffe mich bezîte

Verse: 27    und lâz mich dienen um ir lôn.
Verse: 28    ich hôrte ie gerne solhen dôn,

Verse: 29    dâ von tjoste sprîzen sprungen
Verse: 30    und dâ swert ûf helmen klungen."




Chapter: 815 
815


Verse: 1    der wirt des lachte sêre
Verse: 2    und Amfortas noch mêre.

Verse: 3    "kanstû sus touf emphâhen?"
Verse: 4    sprach der wirt. "ich wil si nâhen

Verse: 5    durch rehten touf in dîn gebot.
Verse: 6    Jûpitern dînen got

Verse: 7    muostû durch si verliesen
Verse: 8    und Sekundillen verkiesen.

Verse: 9    morgen vruo gibe ich dir rât,
Verse: 10    der vuoge an dînem gewerbe hât."

Verse: 11    Amfortas vor siecheit zît
Verse: 12    sînen prîs gemachet hête wît

Verse: 13    mit ritterschaft durch minne.
Verse: 14    an sînes herzen sinne

Verse: 15    was güete unde miltekeit.
Verse: 16    sîn hant ouch manegen prîs erstreit.

Verse: 17    dâ sâzen dem grâle bî
Verse: 18    der aller besten ritter drî,

Verse: 19    die dô der schilte phlâgen,
Verse: 20    wande si getorstenz wâgen.

Verse: 21    welt ir, si haben dâ gâz genuoc.
Verse: 22    mit zuht man von in allen truoc

Verse: 23    taveln, tischlachen.
Verse: 24    mit dienestlîchen sachen

Verse: 25    nigen al diu juncvrouwelîn.
Verse: 26    Feirefîz Anschevîn

Verse: 27    sach si von im kêren.
Verse: 28    daz begunde im trûren mêren:

Verse: 29    sîns herzen slôz truoc dan den grâl.
Verse: 30    urloup gap in Parzivâl.




Chapter: 816 
816


Verse: 1    wie diu wirtîn selbe dan gegienc
Verse: 2    und wie manz dâ nâch ane gevienc,

Verse: 3    daz man sîn wol mit betten phlac,
Verse: 4    der doch durch minne unsanfte lac,

Verse: 5    wie al der templeise diet
Verse: 6    mit senfte unsenfte von in schiet,

Verse: 7    dâ von würde ein langiu sage.
Verse: 8    ich wil iu künden von dem tage.

Verse: 9    dô der des morgens vruo erschein,
Verse: 10    Parzivâl wart des enein

Verse: 11    und Amfortas der guote,
Verse: 12    mit endehaftem muote

Verse: 13    si bâten den von Zazamanc
Verse: 14    komen, den diu minne twanc,

Verse: 15    in den tempel vür den grâl.
Verse: 16    er gebôt ouch an dem selben mâl

Verse: 17    dem wîsen templeise dar.
Verse: 18    sarjande, ritter grôziu schar

Verse: 19    dâ stuont. nû gienc der heiden în.
Verse: 20    der toufnaph was ein rubîn,

Verse: 21    von jaspes ein grêde sinewel,
Verse: 22    dar ûf er stuont: Titurel

Verse: 23    hete in mit koste erziuget sô.
Verse: 24    Parzivâl ze sînem bruoder dô

Verse: 25    sprach: "wiltû die muomen mîn
Verse: 26    haben, al die gote dîn

Verse: 27    muostû durch si versprechen
Verse: 28    und immer gerne rechen

Verse: 29    den widersaz des hœsten gotes
Verse: 30    und mit triuwen schônen sîns gebotes."




Chapter: 817 
817


Verse: 1    "swâ von ich sol die maget hân,"
Verse: 2    sprach der heiden, "daz wirt gar getân,

Verse: 3    mit triuwen an mir erzeiget."
Verse: 4    der toufnaph wart geneiget

Verse: 5    ein wênec gein dem grâle.
Verse: 6    vol wazzers an dem mâle

Verse: 7    wart er, ze warm noch ze kalt.
Verse: 8    dâ stuont ein grâwer priester alt,

Verse: 9    der ûz heidenschaft manec kindelîn
Verse: 10    ouch gestôzen hête drîn.

Verse: 11    der sprach: "ir sult gelouben,
Verse: 12    iuwer sêle den tiuvel rouben,

Verse: 13    an den hœsten got al eine.
Verse: 14    des drîvalt ist gemeine

Verse: 15    und al gelîche gurbort,
Verse: 16    got ist mensche und sîns vater wort.

Verse: 17    sît er ist vater unde kint,
Verse: 18    die al gelîche gêret sint,

Verse: 19    ebenhêre sînem geiste,
Verse: 20    mit der drîer volleiste

Verse: 21    wert iu diz wazzer heidenschaft.
Verse: 22    mit der trînitâte kraft

Verse: 23    im wazzer er ze toufe gienc,
Verse: 24    von dem Adâm antlitze emphienc.

Verse: 25    von wazzer boume sint gesaft.
Verse: 26    wazzer vrühtet al die geschaft,

Verse: 27    der man vür krêatûre giht.
Verse: 28    mit dem wazzer man gesiht.

Verse: 29    wazzer gît maneger sêle schîn,
Verse: 30    daz die engel niht liehter dorften sîn."




Chapter: 818 
818


Verse: 1    Feirefîz zem priester sprach:
Verse: 2    "ist ez mir guot vür ungemach,

Verse: 3    ich geloube, swes ir gebietet.
Verse: 4    ob mich ir minne mietet,

Verse: 5    sô leiste ich gerne sîn gebot.
Verse: 6    bruoder, hât dîn muome got,

Verse: 7    an den geloube ich und an sie
Verse: 8    (sô grôze nôt emphienc ich nie):

Verse: 9    al mîne gote sint verkorn.
Verse: 10    Sekundille habe ouch verlorn,

Verse: 11    swaz si an mir ie gêrte sich.
Verse: 12    durch dîner muomen got heiz toufen mich."

Verse: 13    man begunde sîn kristenlîche phlegen
Verse: 14    und sprach ob im den toufes segen.

Verse: 15    dô der heiden touf emphienc
Verse: 16    und diu westerlege ergienc,

Verse: 17    des er unsanfte erbeite,
Verse: 18    der maget man in bereite:

Verse: 19    man gap im Frimutels kint.
Verse: 20    an den grâl was er ze sehene blint,

Verse: 21    ê der touf hete in bedecket:
Verse: 22    sît wart im vor enblecket

Verse: 23    der grâl mit gesihte.
Verse: 24    nâch der toufe geschihte

Verse: 25    am grâle man geschriben vant,
Verse: 26    swelhen templeis diu gotes hant

Verse: 27    gæbe ze herren vremder diete,
Verse: 28    daz er vrâgen widerriete

Verse: 29    sîns namen oder sîns geslehtes
Verse: 30    und daz er in hülfe rehtes.




Chapter: 819 
819


Verse: 1    sô diu vrâge wirt gein im getân,
Verse: 2    sô mugen sis niht langer hân.

Verse: 3    durch daz der süeze Amfortas
Verse: 4    sô lange in sûren pînen was

Verse: 5    und in diu vrâge lange meit,
Verse: 6    inst immer mêr nû vrâgen leit.

Verse: 7    al des grâles phlihtgesellen
Verse: 8    von in vrâgens niht enwellen.

Verse: 9    der getoufte Feirefîz
Verse: 10    an sînen swâger legete vlîz

Verse: 11    mit bete dan ze varne
Verse: 12    und nimmer niht ze sparne

Verse: 13    vor im al sîner rîchen habe.
Verse: 14    dô leite in mit zühten abe

Verse: 15    Amfortas von dem gewerbe.
Verse: 16    "ich enwil niht, daz verderbe

Verse: 17    gein gote mîn dienestlîcher muot.
Verse: 18    des grâles krône ist alsô guot:

Verse: 19    die hât mir hôchvart verlorn.
Verse: 20    nû hân ich diemuot mir erkorn.

Verse: 21    rîcheit und wîbe minne
Verse: 22    sich verret von mînem sinne.

Verse: 23    ir vüeret hinnen ein edel wîp:
Verse: 24    diu gît ze dienste iu kiuschen lîp

Verse: 25    mit guoten wîplîchen siten.
Verse: 26    mîn orden wirt hie niht vermiten:

Verse: 27    ich wil vil tjoste rîten,
Verse: 28    in sgrâles dienste strîten.

Verse: 29    durch wîp gestrîte ich nimmer mêr.
Verse: 30    ein wîp gap mir herzesêr,




Chapter: 820 
820


Verse: 1    iedoch ist immer al mîn haz
Verse: 2    gein wîben volleclîche laz:

Verse: 3    hôch manlîch vreude kumt von in,
Verse: 4    swie kleine dâ wære mîn gewin."

Verse: 5    Amfortasen bat dô sêre
Verse: 6    durch sîner swester êre

Verse: 7    Feirefîz der dannenverte:
Verse: 8    mit versagen er sich werte.

Verse: 9    Feirefîz Anschevîn
Verse: 10    warp, daz Loherangrîn

Verse: 11    mit im dannen solde varn.
Verse: 12    sîn muoter kunde daz wol bewarn.

Verse: 13    ouch sprach der künec Parzivâl:
Verse: 14    "mîn sun ist gordent ûf den grâl:

Verse: 15    dar muoz er dienstlîch herze tragen,
Verse: 16    læt in got rehten sin bejagen."

Verse: 17    vreude und kurzewîle phlac
Verse: 18    Feirefîz aldâ den eilften tac:

Verse: 19    an dem zwelften schiet er dan.
Verse: 20    gein sînem her der rîche man

Verse: 21    sîn wîp wolde vüeren.
Verse: 22    des begunde ein trûren rüeren

Verse: 23    Parzivâlen durch triuwe:
Verse: 24    diu reise in lêrte riuwe.

Verse: 25    mit den sînen er sich beriet,
Verse: 26    daz er von rittern grôze diet

Verse: 27    mit im sande vür den walt.
Verse: 28    Amfortas der süeze degen balt

Verse: 29    mit im durch kondewieren reit.
Verse: 30    manec maget dâ weinen niht vermeit.




Chapter: 821 
821


Verse: 1    si muosten machen niuwe slâ
Verse: 2    ûz gegen Karkobrâ.

Verse: 3    dar enbôt der süeze Amfortas
Verse: 4    dem, der dâ burcgrâve was,

Verse: 5    daz er wære des gemant,
Verse: 6    ob er ie von sîner hant

Verse: 7    emphienge gâbe rîche,
Verse: 8    daz er nû dienestlîche

Verse: 9    sîne triuwe an im geprîste
Verse: 10    und im sînen swâger wîste

Verse: 11    "und des wîp, die swester mîn,
Verse: 12    durchz fôreht Leprisîn

Verse: 13    in die wilden habe wît."
Verse: 14    nû was ez ouch urloubes zît:

Verse: 15    si ensolden dô niht vürbaz komen.
Verse: 16    Kundrîe la surziere wart genomen

Verse: 17    ze dirre botschefte dan.
Verse: 18    urloup zuo dem rîchen man

Verse: 19    nâmen al die templeise.
Verse: 20    hin reit der kurteise.

Verse: 21    der burcgrâve dô niht liez,
Verse: 22    swaz in Kundrîe leisten hiez.

Verse: 23    Feirefîz der rîche
Verse: 24    wart dô ritterlîche

Verse: 25    mit grôzer vuore emphangen.
Verse: 26    in dorfte dâ niht erlangen:

Verse: 27    man vuorte in vürbaz schiere.
Verse: 28    mit werdem kondewiere

Verse: 29    ich enweiz, wie manec lant er reit,
Verse: 30    unz ze Jôflanze ûf dem anger breit




Chapter: 822 
822


Verse: 1    liute ein teil si vunden.
Verse: 2    an den selben stunden

Verse: 3    Feirefîz vrâcte mære,
Verse: 4    war daz her komen wære.

Verse: 5    ieslîcher was in sîn lant,
Verse: 6    dar im diu reise was bekant:

Verse: 7    Artûs was gein Schamilôt.
Verse: 8    der von Tribalibôt

Verse: 9    kunde an den selben zîten
Verse: 10    gein sînem her wol rîten.

Verse: 11    daz lac al trûrec in der habe,
Verse: 12    daz ir herre was gescheiden drabe.

Verse: 13    sîn kunft dâ manegem ritter guot
Verse: 14    brâhte niuwen hôhen muot.

Verse: 15    der burcgrâve von Karkobrâ
Verse: 16    und al die sîne wurden dâ

Verse: 17    mit rîcher gâbe heim gesant.
Verse: 18    Kundrîe dâ grôziu mære bevant:

Verse: 19    boten wâren nâch dem her komen,
Verse: 20    Sekundillen hete der tôt genomen.

Verse: 21    Repanse de Schoie dô
Verse: 22    mohte alrêst ir verte wesen vrô.

Verse: 23    diu gebar sît in Indîân
Verse: 24    einen sun, der hiez Jôhan.

Verse: 25    priester Jôhan man den hiez:
Verse: 26    immer sît die künege man dâ liez

Verse: 27    bî dem namen belîben.
Verse: 28    Feirefîz hiez schrîben

Verse: 29    z Indîâ über al daz lant,
Verse: 30    wie kristen leben wart erkant:




Chapter: 823 
823


Verse: 1    daz was ê niht sô kreftec dâ.
Verse: 2    wir heizenz hie Indîâ:

Verse: 3    dort heizet ez Tribalibôt.
Verse: 4    Feirefîz bî Kundrîen enbôt

Verse: 5    sînem bruoder ûf Munsalvæsche wider,
Verse: 6    wiez im was ergangen sider,

Verse: 7    daz Sekundille verscheiden was.
Verse: 8    des vreute sich dô Amfortas,

Verse: 9    daz sîn swester âne strît
Verse: 10    was vrouwe über manegiu lant sô wît.

Verse: 11    diu rehten mære iu komen sint
Verse: 12    um diu vünf Frimutels kint,

Verse: 13    daz diu mit güeten wurben
Verse: 14    und wie ir zwei ersturben:

Verse: 15    daz eine was Schoisîâne,
Verse: 16    vor gote diu valsches âne,

Verse: 17    diu ander Herzeloide hiez,
Verse: 18    diu valscheit ûz ir herzen stiez.

Verse: 19    sîn swert und ritterlîchez leben
Verse: 20    hete Trevrezent ergeben

Verse: 21    an die süezen gotes minne
Verse: 22    und nâch endelôsem gewinne

Verse: 23    der werde klâre Amfortas
Verse: 24    manlîch bî kiuschem herzen was.

Verse: 25    ordenlîche er manege tjoste reit,
Verse: 26    durch den grâl, niht durch diu wîp er streit.

Verse: 27    Loherangrîn wuohs manlîch starc.
Verse: 28    diu zageheit sich an im barc,

Verse: 29    dô er sich ritterschaft versan.
Verse: 30    in sgrâles dienste er prîs gewan.




Chapter: 824 
824


Verse: 1    welt ir nû hœren vürbaz?
Verse: 2    sît über lant ein vrouwe saz,

Verse: 3    vor aller valscheit bewart.
Verse: 4    rîcheit und hôher art

Verse: 5    ûf si beidiu gerbet wâren.
Verse: 6    si kunde alsô gebâren,

Verse: 7    daz si mit rehter kiusche warp:
Verse: 8    al menneschlîch gir an ir verdarp.

Verse: 9    werder liute warp um si genuoc,
Verse: 10    der etslîcher krône truoc,

Verse: 11    und manec vürste ir genôz:
Verse: 12    ir diemuot was sô grôz,

Verse: 13    daz si sich dran niht wande.
Verse: 14    vil grâven von ir lande

Verse: 15    begundenz an si hazzen,
Verse: 16    wes si sich wolde lazzen,

Verse: 17    daz si einen man niht næme,
Verse: 18    der ir ze herren zæme.

Verse: 19    si hete sich gar an got verlân,
Verse: 20    swaz zornes wart gein ir getân:

Verse: 21    unschulde maneger an si rach.
Verse: 22    einen hof si ir landes herren sprach.

Verse: 23    manec bote ûz verrem lande vuor
Verse: 24    hin zir: die man si gar verswuor,

Verse: 25    wan den si got bewîste,
Verse: 26    des minne si gerne prîste.

Verse: 27    si was vürstîn in Brâbant.
Verse: 28    von Munsalvæsche wart gesant

Verse: 29    der, den der swane brâhte
Verse: 30    und des ir got gedâhte.




Chapter: 825 
825


Verse: 1    z Antwerp wart er ûz gezogen.
Verse: 2    si was an im vil unbetrogen:

Verse: 3    er kunde wol gebâren.
Verse: 4    man muoste in vür den klâren

Verse: 5    und vür den manlîchen
Verse: 6    haben in al den rîchen,

Verse: 7    swâ man sîn künde ie gewan.
Verse: 8    hövesch, mit zühten wîs ein man,

Verse: 9    mit triuwen milte, âne âderstôz
Verse: 10    was sîn lîp missewende blôz.

Verse: 11    des landes vrouwe in schône emphienc.
Verse: 12    nû hœret, wie sîn rede ergienc.

Verse: 13    rîche und arme ez hôrten,
Verse: 14    die dâ stuonden an allen orten.

Verse: 15    dô sprach er: "vrouwe herzogîn,
Verse: 16    sol ich hie landes herre sîn,

Verse: 17    dar um lâze ich alsô vil.
Verse: 18    nû hœret, wes ich iuch biten wil:

Verse: 19    gevrâget nimmer, wer ich sî.
Verse: 20    sô mac ich iu belîben bî.

Verse: 21    bin ich ziuwer vrâge erkorn,
Verse: 22    sô habet ir minne an mir verlorn.

Verse: 23    ob ir niht sît gewarnet des,
Verse: 24    sô warnt mich got, er weiz wol wes."

Verse: 25    si sazte wîbes sicherheit,
Verse: 26    diu sît durch liebe wenken leit,

Verse: 27    si wolde ze sînem gebote stên
Verse: 28    unde nimmer übergên,

Verse: 29    swaz er si leisten hieze,
Verse: 30    ob si got bî sinne lieze.




Chapter: 826 
826


Verse: 1    die naht sîn lîp ir minne emphant.
Verse: 2    dô wart er vürste in Brâbant:

Verse: 3    diu hôchgezît rîlîche ergienc.
Verse: 4    manec herre von sîner hende emphienc

Verse: 5    ir lêhen, die daz solden hân.
Verse: 6    guot rihtære wart der selbe man.

Verse: 7    er tet ouch dicke ritterschaft,
Verse: 8    daz er den prîs behielt mit kraft.

Verse: 9    si gewunnen samt schœniu kint.
Verse: 10    vil liute in Brâbant noch sint,

Verse: 11    die wol wizzen von in beiden,
Verse: 12    ir emphâhen, sîn dan scheiden,

Verse: 13    daz in ir vrâge dan vertreip
Verse: 14    und wie lange er dâ beleip.

Verse: 15    er schiet ouch ungerne dane.
Verse: 16    nû brâhte im aber sîn vriunt, der swane,

Verse: 17    eine kleine gevüege seitiez.
Verse: 18    sîns kleinœtes er dâ liez

Verse: 19    ein swert, ein horn, ein vingerlîn.
Verse: 20    hin vuor Loherangrîn.

Verse: 21    welle wir dem mære rehte tuon,
Verse: 22    sô was er Parzivâles sun.

Verse: 23    der vuor wazzer unde wege
Verse: 24    unz wider in des grâles phlege.

Verse: 25    durch waz verlôs daz guote wîp
Verse: 26    werdes vriundes minneclîchen lîp?

Verse: 27    er widerriet ir vrâgen ê,
Verse: 28    dô er vür si gienc von dem sê.

Verse: 29    hie solde êrec nû sprechen:
Verse: 30    der kunde mit rede sich rechen.




Chapter: 827 
827


Verse: 1    Ob von Troies meister Kristjân
Verse: 2    disem mære hât unreht getân,

Verse: 3    daz mac wol zürnen Kîôt.
Verse: 4    der uns diu rehten mære enbôt,

Verse: 5    endehaft giht der Provenzâl,
Verse: 6    wie Herzeloiden kint den grâl

Verse: 7    erwarp, als im daz gordent was,
Verse: 8    dô in verworhte Amfortas.

Verse: 9    von Provenze in tiuschiu lant
Verse: 10    diu rehten mære uns sint gesant

Verse: 11    und dirre âventiure endes zil.
Verse: 12    niht mêr dâ von nû sprechen wil

Verse: 13    ich Wolfram von Eschenbach,
Verse: 14    wan als dort der meister sprach.

Verse: 15    sîniu kint, sîn hôch geslehte
Verse: 16    hân ich iu benennet rehte,

Verse: 17    Parzivâles, den ich hân brâht,
Verse: 18    dar sîn doch sælde hete erdâht.

Verse: 19    swes leben sich sô verendet,
Verse: 20    daz got niht wirt gephendet

Verse: 21    der sêle durch des lîbes schulde,
Verse: 22    und der doch der werlde hulde

Verse: 23    behalden kan mit werdekeit,
Verse: 24    daz ist ein nütziu arbeit.

Verse: 25    guotiu wîp, hânt die sin,
Verse: 26    deste werder ich in bin,

Verse: 27    ob mir deheiniu guotes gan.
Verse: 28    sît ich diz mære volsprochen hân.

Verse: 29    ist daz durch ein wîp geschehen,
Verse: 30    diu muoz mir süezer worte jehen.


Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.