TITUS
Alexanderroman (Der Grosse Seelentrost)
Part No. 180
Previous part

Chapter: 5_16c  
16c. Herodes Agrippa


Line: 17    De dridde konningk Herodes de hette Agrippa, de was Herodias broder vnde
Line: 18    wart so arm, dat he vel in eynen mistrost vnde wolde sijk suluen dot smechten
Line: 19    vnde beslot sijk in eyneme torne, dar wolde he hunger steruen. Dat wart der
Line: 20    suster to wetene vnde segedet erem manne, de nam ene vte deme torne. Dar
Line: 21    na was he eyne tijd wol geholden. To eyner tijd vorwet se eme dat. Do toch
Line: 22    he hen to Rome vnde dede sijk to Gayus, de was des keysers neue. De halp
Line: 23    eme, dat eme de keyser vorlenede de herschop ouer dat yodessche lant vnde
Line: 24    makede ene dar to konninge. Do dat yenne andere Herodes sach, dat yd em
Line: 25    wol gegan was, do vor he ock to deme keysere. Do screff em desse breue na
Line: 26    vnde vntbot deme keysere, dat he eyn vorreder were vnde wolde sijk setten
Line: 27    wedder den keyser. To allem wartekene so hadde he so vele wapenes in syner
Line: 28    stad, dat he mochte seuentich dusent volkes wol mede belaten. Do de keyser
Line: 29    den breff hadde gelesen, do vragede he ene, ofte he so vele wapene hedde.
Line: 30    Do sprak he: 'Ya.' Do sande ene de keyser ouer mer in cyn elende, vnde Herodias
Line: 31    de ne wolde syner nicht vortigen vnde vor mede. Dar storuen se beyde. Do
Line: 32    e quam desse Herodes Agrippa vorder to des keysers houe vnde dede sijk to
Page: 188   Line: 1    Gayus. To eyner tijd sath he myt Gayus vp eynem wagen vnde sprak to Gayus:
Line: 2    'Ik wolde, dat god geue, dat de keyser dot were vnde dat du keyser werest.'
Line: 3    Dat horde de wagen knecht vnde segede dat deme keysere. Do leit de keyser
Line: 4    Herodes in den kerkenere werpen, dar weren vele vangene inne. To eyner
Line: 5    tijd hadde sijk Herodes gelenet an eynen bom. Vp dem bome sat eyn huk. Dat
Line: 6    sach eyn mester, de was dar ock geuangen, de kunde wicken na vogel sanghe.
Line: 7    De sprak to Herodes: 'Du schalt dat weten, dat du kordiken komen schalt to
Line: 8    groter ere, vnde in der groten ere schaltu steruen. Vnde in welker tijd dat du
Line: 9    mer eynen huk sust bouen dij sytten, so schaltu dar na bynnen vijff dagen
Line: 10    steruen.' Dar na geschach, dat de keyser starff vnde Gayus de wart keyser.
Line: 11    De nam Herodes vte deme torne vnde sande ene to Jherusalem myt groten
Line: 12    eren, dat he dar konningk scholde werden. Do wolde he den yoden behagen
Line: 13    vnde dodede Sunte Jacobe. Do he sach, dat den yoden dat wol to danke was,
Line: 14    do vengk he Sunte Peter vnde legede en in eynen kerkenere vnde wolde ene
Line: 15    na paschen ok doden. Vnder des quam de engel vnde losede Sunte Petere vnde
Line: 16    halp eme, dat he vt quam. Darna toch Herodes to eyner stad, de hette Cesarea.
Line: 17    Dar quam alle dat lant to samne vnde vntfengk ene myt groten eren. Do hadde
Line: 18    he cledere an, de schenen to male van golde. Wan de sunne darup schen, so
Line: 19    geuen se eynen wedder blik van sijk, dat eyn mynsche syne ogen nicht enkunde
Line: 20    an em vnscicken. Do begunden en de lude to louen vnde spreken: 'Konningk,
Line: 21    du bist vnse god.' Dar was eme wol mede. Do sach he vp vnde sach
Line: 22    eynen huk bouen sijk sitten. Do he den sach, do sprak he to den luden: 'Dat ys
Line: 23    vorlorn, juwe god mot nu steruen.' To hant quam eme eyn plage, dat syn
Line: 24    licham beghan to rotten vnde wart vul maden. De vreten ene also lange,
Line: 25    went he in viff dagen starff. Aldus hebben se eren ende genomen, desse dre
Line: 26    konninge Herodes, de mannigen mynschen hebben lifflos gemaket.



Next part


This text is part of the TITUS edition of Alexanderroman (Der Grosse Seelentrost).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.