TITUS
Novum Testamentum graece
Part No. 149
Previous part

Chapter: 14 
Verse: 1    Διώκετε τὴν ἀγάπην, ζηλοῦτε δὲ τὰ πνευματικά, μᾶλλον δὲ ἵνα προϕητεύητε.
Verse: 2    ὁ γὰρ λαλῶν γλώσσῃ οὐκ ἀνϑρώποις λαλεῖ ἀλλὰ ϑεῷ, οὐδεὶς γὰρ ἀκούει, πνεύματι δὲ λαλεῖ μυστήρια·
Verse: 3    ὁ δὲ προϕητεύων ἀνϑρώποις λαλεῖ οἰκοδομὴν καὶ παράκλησιν καὶ παραμυϑίαν.
Verse: 4    ὁ λαλῶν γλώσσῃ ἑαυτὸν οἰκοδομεῖ· ὁ δὲ προϕητεύων ἐκκλησίαν οἰκοδομεῖ.
Verse: 5    ϑέλω δὲ πάντας ὑμᾶς λαλεῖν γλώσσαις, μᾶλλον δὲ ἵνα προϕητεύητε· μείζων δὲ ὁ προϕητεύων ἢ ὁ λαλῶν γλώσσαις, ἐκτὸς εἰ μὴ διερμηνεύῃ, ἵνα ἡ ἐκκλησία οἰκοδομὴν λάβῃ.
Verse: 6    Νῦν δέ, ἀδελϕοί, ἐὰν ἔλϑω πρὸς ὑμᾶς γλώσσαις λαλῶν, τί ὑμᾶς ὠϕελήσω, ἐὰν μὴ ὑμῖν λαλήσω ἢ ἐν ἀποκαλύψει ἢ ἐν γνώσει ἢ ἐν προϕητείᾳ ἢ ἐν διδαχῇ;
Verse: 7    ὅμως τὰ ἄψυχα ϕωνὴν διδόντα, εἴτε αὐλὸς εἴτε κιϑάρα, ἐὰν διαστολὴν τοῖς ϕϑόγγοις μὴ δῷ, πῶς γνωσϑήσεται τὸ αὐλούμενον ἢ τὸ κιϑαριζόμενον;
Verse: 8    καὶ γὰρ ἐὰν ἄδηλον σάλπιγξ ϕωνὴν δῷ, τίς παρασκευάσεται εἰς πόλεμον;
Verse: 9    οὕτως καὶ ὑμεῖς διὰ τῆς γλώσσης ἐὰν μὴ εὔσημον λόγον δῶτε, πῶς γνωσϑήσεται τὸ λαλούμενον; ἔσεσϑε γὰρ εἰς ἀέρα λαλοῦντες.
Verse: 10    τοσαῦτα εἰ τύχοι γένη ϕωνῶν εἰσιν ἐν κόσμῳ, καὶ οὐδὲν ἄϕωνον·
Verse: 11    ἐὰν οὖν μὴ εἰδῶ τὴν δύναμιν τῆς ϕωνῆς, ἔσομαι τῷ λαλοῦντι βάρβαρος καὶ ὁ λαλῶν ἐν ἐμοὶ βάρβαρος.
Verse: 12    οὕτως καὶ ὑμεῖς, ἐπεὶ ζηλωταί ἐστε πνευμάτων, πρὸς τὴν οἰκοδομὴν τῆς ἐκκλησίας ζητεῖτε ἵνα περισσεύητε.
Verse: 13    διὸ ὁ λαλῶν γλώσσῃ προσευχέσϑω ἵνα διερμηνεύῃ.
Verse: 14    ἐὰν [γὰρ] προσεύχωμαι γλώσσῃ, τὸ πνεῦμά μου προσεύχεται, ὁ δὲ νοῦς μου ἄκαρπός ἐστιν.
Verse: 15    τί οὖν ἐστιν; προσεύξομαι τῷ πνεύματι, προσεύξομαι δὲ καὶ τῷ νοί· ψαλῶ τῷ πνεύματι, ψαλῶ δὲ καὶ τῷ νοί.
Verse: 16    ἐπεὶ ἐὰν εὐλογῇς ἐν πνεύματι, ὁ ἀναπληρῶν τὸν τόπον τοῦ ἰδιώτου πῶς ἐρεῖ τὸ ᾽Αμήν ἐπὶ τῇ σῇ εὐχαριστίᾳ, ἐπειδὴ τί λέγεις οὐκ οἶδεν;
Verse: 17    σὺ μὲν γὰρ καλῶς εὐχαριστεῖς, ἀλλ' ὁ ἕτερος οὐκ οἰκοδομεῖται.
Verse: 18    εὐχαριστῶ τῷ ϑεῷ, πάντων ὑμῶν μᾶλλον γλώσσαις λαλῶ·
Verse: 19    ἀλλὰ ἐν ἐκκλησίᾳ ϑέλω πέντε λόγους τῷ νοί μου λαλῆσαι, ἵνα καὶ ἄλλους κατηχήσω, ἢ μυρίους λόγους ἐν γλώσσῃ.
Verse: 20    ᾽Αδελϕοί, μὴ παιδία γίνεσϑε ταῖς ϕρεσίν, ἀλλὰ τῇ κακίᾳ νηπιάζετε, ταῖς δὲ ϕρεσὶν τέλειοι γίνεσϑε.
Verse: 21    ἐν τῷ νόμῳ γέγραπται ὅτι ᾽Εν ἑτερογλώσσοις καὶ ἐν χείλεσιν ἑτέρων λαλήσω τῷ λαῷ τούτῳ, καὶ οὐδ' οὕτως εἰσακούσονταίμου, λέγει κύριος.
Verse: 22    ὥστε αἱ γλῶσσαι εἰς σημεῖόν εἰσιν οὐ τοῖς πιστεύουσιν ἀλλὰ τοῖς ἀπίστοις, ἡ δὲ προϕητεία οὐ τοῖς ἀπίστοις ἀλλὰ τοῖς πιστεύουσιν.
Verse: 23    ᾽Εὰν οὖν συνέλϑῃ ἡ ἐκκλησία ὅλη ἐπὶ τὸ αὐτὸ καὶ πάντες λαλῶσιν γλώσσαις, εἰσέλϑωσιν δὲ ἰδιῶται ἢ ἄπιστοι, οὐκ ἐροῦσιν ὅτι μαίνεσϑε;
Verse: 24    ἐὰν δὲ πάντες προϕητεύωσιν, εἰσέλϑῃ δέ τις ἄπιστος ἢ ἰδιώτης, ἐλέγχεται ὑπὸ πάντων, ἀνακρίνεται ὑπὸ πάντων,
Verse: 25    τὰ κρυπτὰ τῆς καρδίας αὐτοῦ ϕανερὰ γίνεται, καὶ οὕτως πεσὼν ἐπὶ πρόσωπον προσκυνήσει τῷ ϑεῷ, ἀπαγγέλλων ὅτι ῎Οντως ὁ ϑεὸς ἐν ὑμῖν ἐστιν.
Verse: 26    Τί οὖν ἐστιν, ἀδελϕοί; ὅταν συνέρχησϑε, ἕκαστος ψαλμὸν ἔχει, διδαχὴν ἔχει, ἀποκάλυψιν ἔχει, γλῶσσαν ἔχει, ἑρμηνείαν ἔχει· πάντα πρὸς οἰκοδομὴν γινέσϑω.
Verse: 27    εἴτε γλώσσῃ τις λαλεῖ, κατὰ δύο ἢ τὸ πλεῖστον τρεῖς, καὶ ἀνὰ μέρος, καὶ εἷς διερμηνευέτω·
Verse: 28    ἐὰν δὲ μὴ ᾖ διερμηνευτής, σιγάτω ἐν ἐκκλησίᾳ, ἑαυτῷ δὲ λαλείτω καὶ τῷ ϑεῷ.
Verse: 29    προϕῆται δὲ δύο ἢ τρεῖς λαλείτωσαν, καὶ οἱ ἄλλοι διακρινέτωσαν·
Verse: 30    ἐὰν δὲ ἄλλῳ ἀποκαλυϕϑῇ καϑημένῳ, ὁ πρῶτος σιγάτω.
Verse: 31    δύνασϑε γὰρ καϑ' ἕνα πάντες προϕητεύειν, ἵνα πάντες μανϑάνωσιν καὶ πάντες παρακαλῶνται,
Verse: 32    καὶ πνεύματα προϕητῶν προϕήταις ὑποτάσσεται·
Verse: 33    οὐ γάρ ἐστιν ἀκαταστασίας ὁ ϑεὸς ἀλλὰ εἰρήνης. ῾Ως ἐν πάσαις ταῖς ἐκκλησίαις τῶν ἁγίων,
Verse: 34    αἱ γυναῖκες ἐν ταῖς ἐκκλησίαις σιγάτωσαν, οὐ γὰρ ἐπιτρέπεται αὐταῖς λαλεῖν· ἀλλὰ ὑποτασσέσϑωσαν, καϑὼς καὶ ὁ νόμος λέγει.
Verse: 35    εἰ δέ τι μαϑεῖν ϑέλουσιν, ἐν οἴκῳ τοὺς ἰδίους ἄνδρας ἐπερωτάτωσαν, αἰσχρὸν γάρ ἐστιν γυναικὶ λαλεῖν ἐν ἐκκλησίᾳ.
Verse: 36    ἢ ἀϕ' ὑμῶν ὁ λόγος τοῦ ϑεοῦ ἐξῆλϑεν, ἢ εἰς ὑμᾶς μόνους κατήντησεν;
Verse: 37    Εἴ τις δοκεῖ προϕήτης εἶναι ἢ πνευματικός, ἐπιγινωσκέτω ἃ γράϕω ὑμῖν ὅτι κυρίου ἐστὶν ἐντολή·
Verse: 38    εἰ δέ τις ἀγνοεῖ, ἀγνοεῖται.
Verse: 39    ὥστε, ἀδελϕοί [μου], ζηλοῦτε τὸ προϕητεύειν, καὶ τὸ λαλεῖν μὴ κωλύετε γλώσσαις·
Verse: 40    πάντα δὲ εὐσχημόνως καὶ κατὰ τάξιν γινέσϑω.

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.