TITUS
Vetus Testamentum graece iuxta LXX interpretes
Part No. 742
Previous part

Chapter: 7 
Verse: 1  Υἱέ, ϕύλασσε ἐμοὺς λόγους,
τὰς δὲ ἐμὰς ἐντολὰς κρύψον παρὰ σεαυτῷ·
Verse: 1a  υἱέ, τίμα τὸν κύριον, καὶ ἰσχύσεις,
πλὴν δὲ αὐτοῦ μὴ ϕοβοῦ ἄλλον.
Verse: 2  ϕύλαξον ἐμὰς ἐντολάς, καὶ βιώσεις,
τοὺς δὲ ἐμοὺς λόγους ὥσπερ κόρας ὀμμάτων·
Verse: 3  περίϑου δὲ αὐτοὺς σοῖς δακτύλοις,
ἐπίγραψον δὲ ἐπὶ τὸ πλάτος τῆς καρδίας σου.
Verse: 4  εἶπον τὴν σοϕίαν σὴν ἀδελϕὴν εἶναι,
τὴν δὲ ϕρόνησιν γνώριμον περιποίησαι σεαυτῷ,
Verse: 5  ἵνα σε τηρήσῃ ἀπὸ γυναικὸς ἀλλοτρίας καὶ πονηρᾶς,
ἐάν σε λόγοις τοῖς πρὸς χάριν ἐμβάληται.
Verse: 6  ἀπὸ γὰρ ϑυρίδος ἐκ τοῦ οἴκου αὐτῆς εἰς τὰς πλατείας παρακύπτουσα,
Verse: 7  ὃν ἂν ἴδῃ τῶν ἀϕρόνων τέκνων νεανίαν ἐνδεῆ ϕρενῶν
Verse: 8  παραπορευόμενον παρὰ γωνίαν ἐν διόδοις οἴκων αὐτῆς
Verse: 9  καὶ λαλοῦντα ἐν σκότει ἑσπερινῷ,
ἡνίκα ἂν ἡσυχία νυκτερινὴ ᾖ καὶ γνοϕώδης,
Verse: 10  ἡ δὲ γυνὴ συναντᾷ αὐτῷ, εἶδος ἔχουσα πορνικόν,
ἣ ποιεῖ νέων ἐξίπτασϑαι καρδίας.
Verse: 11  ἀνεπτερωμένη δέ ἐστιν καὶ ἄσωτος,
ἐν οἴκῳ δὲ οὐχ ἡσυχάζουσιν οἱ πόδες αὐτῆς·
Verse: 12  χρόνον γάρ τινα ἔξω ῥέμβεται,
χρόνον δὲ ἐν πλατείαις παρὰ πᾶσαν γωνίαν ἐνεδρεύει.
Verse: 13  εἶτα ἐπιλαβομένη ἐϕίλησεν αὐτόν,
ἀναιδεῖ δὲ προσώπῳ προσεῖπεν αὐτῷ
Verse: 14  Θυσία εἰρηνική μοί ἐστιν,
σήμερον ἀποδίδωμι τὰς εὐχάς μου·
Verse: 15  ἕνεκα τούτου ἐξῆλϑον εἰς συνάντησίν σοι,
ποϑοῦσα τὸ σὸν πρόσωπον εὕρηκά σε·
Verse: 16  κειρίαις τέτακα τὴν κλίνην μου,
ἀμϕιτάποις δὲ ἔστρωκα τοῖς ἀπ' Αἰγύπτου·
Verse: 17  διέρραγκα τὴν κοίτην μου κρόκῳ,
τὸν δὲ οἶκόν μου κινναμώμῳ·
Verse: 18  ἐλϑὲ καὶ ἀπολαύσωμεν ϕιλίας ἕως ὄρϑρου,
δεῦρο καὶ ἐγκυλισϑῶμεν ἔρωτι·
Verse: 19  οὐ γὰρ πάρεστιν ὁ ἀνήρ μου ἐν οἴκῳ,
πεπόρευται δὲ ὁδὸν μακρὰν
Verse: 20  ἔνδεσμον ἀργυρίου λαβὼν ἐν χειρὶ αὐτοῦ,
δι' ἡμερῶν πολλῶν ἐπανήξει εἰς τὸν οἶκον αὐτοῦ.
Verse: 21  ἀπεπλάνησεν δὲ αὐτὸν πολλῇ ὁμιλίᾳ
βρόχοις τε τοῖς ἀπὸ χειλέων ἐξώκειλεν αὐτόν.
Verse: 22  ὁ δὲ ἐπηκολούϑησεν αὐτῇ κεπϕωϑείς,
ὥσπερ δὲ βοῦς ἐπὶ σϕαγὴν ἄγεται
καὶ ὥσπερ κύων ἐπὶ δεσμοὺς
Verse: 23  ἢ ὡς ἔλαϕος τοξεύματι πεπληγὼς εἰς τὸ ἧπαρ,
σπεύδει δὲ ὥσπερ ὄρνεον εἰς παγίδα
οὐκ εἰδὼς ὅτι περὶ ψυχῆς τρέχει.
Verse: 24  νῦν οὖν, υἱέ, ἄκουέ μου
καὶ πρόσεχε ῥήμασιν στόματός μου·
Verse: 25  μὴ ἐκκλινάτω εἰς τὰς ὁδοὺς αὐτῆς ἡ καρδία σου·
Verse: 26  πολλοὺς γὰρ τρώσασα καταβέβληκεν,
καὶ ἀναρίϑμητοί εἰσιν οὓς πεϕόνευκεν·
Verse: 27  ὁδοὶ ᾅδου ὁ οἶκος αὐτῆς
κατάγουσαι εἰς τὰ ταμίεια τοῦ ϑανάτου.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.