TITUS
Vetus Testamentum graece iuxta LXX interpretes
Part No. 893
Previous part

Chapter: 42 
Verse: 1    Μὴ περὶ τούτων αἰσχυνθῇς
   καὶ μὴ λάβῃς πρόσωπον τοῦ ἁμαρτάνειν·
Verse: 2    περὶ νόμου ὑψίστου καὶ διαθήκης
   καὶ περὶ κρίματος δικαιῶσαι τὸν ἀσεβῆ,
Verse: 3    περὶ λόγου κοινωνοῦ καὶ ὁδοιπόρων
   καὶ περὶ δόσεως κληρονομίας ἑταίρων,
Verse: 4    περὶ ἀκριβείας ζυγοῦ καὶ σταθμίων
   καὶ περὶ κτήσεως πολλῶν καὶ ὀλίγων,
Verse: 5    περὶ διαϕόρου πράσεως ἐμπόρων
   καὶ περὶ παιδείας τέκνων πολλῆς
   καὶ οἰκέτῃ πονηρῷ πλευρὰν αἱμάξαι·
Verse: 6    ἐπὶ γυναικὶ πονηρᾷ καλὸν σϕραγίς,
   καὶ ὅπου χεῖρες πολλαί, κλεῖσον·
Verse: 7    ὃ ἐὰν παραδιδῷς, ἐν ἀριθμῷ καὶ σταθμῷ,
   καὶ δόσις καὶ λῆμψις, πάντα ἐν γραϕῇ·
Verse: 8    περὶ παιδείας ἀνοήτου καὶ μωροῦ
   καὶ ἐσχατογήρως κρινομένου πρὸς νέους·
   καὶ ἔσῃ πεπαιδευμένος ἀληθινῶς
   καὶ δεδοκιμασμένος ἔναντι παντὸς ζῶντος.
Verse: 9    Θυγάτηρ πατρὶ ἀπόκρυϕος ἀγρυπνία,
   καὶ ἡ μέριμνα αὐτῆς ἀϕιστᾷ ὕπνον·
   ἐν νεότητι αὐτῆς, μήποτε παρακμάσῃ,
   καὶ συνῳκηκυῖα, μήποτε μισηθῇ·
Verse: 10    ἐν παρθενίᾳ, μήποτε βεβηλωθῇ
   καὶ ἐν τοῖς πατρικοῖς αὐτῆς ἔγκυος γένηται·
   μετὰ ἀνδρὸς οὖσα, μήποτε παραβῇ,
   καὶ συνῳκηκυῖα, μήποτε στειρωθῇ.
Verse: 11    ἐπὶ θυγατρὶ ἀδιατρέπτῳ στερέωσον ϕυλακήν,
   μήποτε ποιήσῃ σε ἐπίχαρμα ἐχθροῖς,
   λαλιὰν ἐν πόλει καὶ ἔκκλητον λαοῦ,
   καὶ καταισχύνῃ σε ἐν πλήθει πολλῶν.
Verse: 12    παντὶ ἀνθρώπῳ μὴ ἔμβλεπε ἐν κάλλει
   καὶ ἐν μέσῳ γυναικῶν μὴ συνέδρευε·
Verse: 13    ἀπὸ γὰρ ἱματίων ἐκπορεύεται σὴς
   καὶ ἀπὸ γυναικὸς πονηρία γυναικός.
Verse: 14    κρείσσων πονηρία ἀνδρὸς ἢ ἀγαθοποιὸς γυνή,
   καὶ γυνὴ καταισχύνουσα εἰς ὀνειδισμόν.
Verse: 15    Μνησθήσομαι δὴ τὰ ἔργα κυρίου,
   καὶ ἃ ἑόρακα, ἐκδιηγήσομαι·
   ἐν λόγοις κυρίου τὰ ἔργα αὐτοῦ.
Verse: 16    ἥλιος ϕωτίζων κατὰ πᾶν ἐπέβλεψεν,
   καὶ τῆς δόξης κυρίου πλῆρες τὸ ἔργον αὐτοῦ.
Verse: 17    οὐκ ἐξεποίησεν τοῖς ἁγίοις κυρίου
   ἐκδιηγήσασθαι πάντα τὰ θαυμάσια αὐτοῦ,
   ἃ ἐστερέωσεν κύριος ὁ παντοκράτωρ
   στηριχθῆναι ἐν δόξῃ αὐτοῦ τὸ πᾶν.
Verse: 18    ἄβυσσον καὶ καρδίαν ἐξίχνευσεν
   καὶ ἐν πανουργεύμασιν αὐτῶν διενοήθη·
   ἔγνω γὰρ ὁ ὕψιστος πᾶσαν εἴδησιν
   καὶ ἐνέβλεψεν εἰς σημεῖον αἰῶνος
Verse: 19    ἀπαγγέλλων τὰ παρεληλυθότα καὶ τὰ ἐσόμενα
   καὶ ἀποκαλύπτων ἴχνη ἀποκρύϕων·
Verse: 20    οὐ παρῆλθεν αὐτὸν πᾶν διανόημα,
   οὐκ ἐκρύβη ἀπ' αὐτοῦ οὐδὲ εἷς λόγος.
Verse: 21    τὰ μεγαλεῖα τῆς σοϕίας αὐτοῦ ἐκόσμησεν,
   ὡς ἔστιν πρὸ τοῦ αἰῶνος καὶ εἰς τὸν αἰῶνα·
   οὔτε προσετέθη οὔτε ἠλαττώθη,
   καὶ οὐ προσεδεήθη οὐδενὸς συμβούλου.
Verse: 22    ὡς πάντα τὰ ἔργα αὐτοῦ ἐπιθυμητὰ
   καὶ ὡς σπινθῆρός ἐστιν θεωρῆσαι·
Verse: 23    πάντα ταῦτα ζῇ καὶ μένει εἰς τὸν αἰῶνα
   ἐν πάσαις χρείαις, καὶ πάντα ὑπακούει.
Verse: 24    πάντα δισσά, ἓν κατέναντι τοῦ ἑνός,
   καὶ οὐκ ἐποίησεν οὐδὲν ἐλλεῖπον·
Verse: 25    ἓν τοῦ ἑνὸς ἐστερέωσεν τὰ ἀγαθά,
   καὶ τίς πλησθήσεται ὁρῶν δόξαν αὐτοῦ;

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.