TITUS
Atharva-Veda-Samhita (Saunaka)
Part No. 150
Previous part

Hymn: 8 
Verse: 1 
Halfverse: a    vaikaṅkaténedʰména devébʰya ā́jyaṃ vaha /
Halfverse: c    ágne tā́m ihá mādaya sárva ā́ yantu me hávam //1//

Verse: 2 
Halfverse: a    indrā́ yāhi me hávam idáṃ kariṣyāmi tác cʰr̥ṇu /
Halfverse: c    imá aindrā́ atisarā́ ā́kūtiṃ sáṃ namantu me /
Halfverse: e    tébʰiḥ śakema vīryà1ṃ jā́tavedas tánūvaśin //2//

Verse: 3 
Halfverse: a    yád asā́v amúto devā adeváḥ sáṃś cíkīrṣati /
Halfverse: c    mā́ tásyāgnír havyáṃ vākṣīd dʰávaṃ devā́ asya mópa gúr mámaivá hávam étana //3//

Verse: 4 
Halfverse: a    áti dʰāvatātisarā índrasya vácasā hata /
Halfverse: c    áviṃ vŕ̥ka iva matʰnīta sá vo jī́van mā́ moci prānám asyā́pi nahyata //4//

Verse: 5 
Halfverse: a    yám amī́ purodadʰiré brahmā́ṇam ápabʰūtaye /
Halfverse: c    índra sá te adʰaspadáṃ táṃ práty asyāmi mr̥tyáve //5//

Verse: 6 
Halfverse: a    yádi preyúr devapurā́ bráhma vármāṇi cakriré /
Halfverse: c    tanūpā́naṃ paripā́ṇaṃ kr̥ṇvānā́ yád upociré sárvaṃ tád arasáṃ kr̥dʰi //6//

Verse: 7 
Halfverse: a    yā́n asā́v atisarā́ṃś cakā́ra kr̥ṇávac ca yā́n /
Halfverse: c    tváṃ tā́n indra vr̥trahan pratī́caḥ púnar ā́ kr̥dʰi yátʰāmúṃ tr̥ṇáhāṃ jánam //7//

Verse: 8 
Halfverse: a    yátʰéndra udvā́canaṃ labdʰvā́ cakré adʰaspadám /
Halfverse: c    kr̥ṇvé 'hám ádʰarān tátʰā amū́ñ cʰaśvatī́bʰyaḥ sámābʰyaḥ //8//

Verse: 9 
Halfverse: a    átrainān indra vr̥trahann ugró mármaṇi vidʰya /
Halfverse: c    átraivaínān abʰí tiṣṭʰéndra medy à1háṃ táva /
Halfverse: e    ánu tvendrā́ rabʰāmahe syā́ma sumataú táva //9//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.