TITUS
Atharva-Veda-Samhita (Saunaka)
Part No. 156
Previous part

Hymn: 14 
Verse: 1 
Halfverse: a    suparṇás tvā́nv avindat sūkarás tvākʰanan nasā́ /
Halfverse: c    dípsauṣadʰe tváṃ dípsantam áva kr̥tyākŕ̥taṃ jahi //1//

Verse: 2 
Halfverse: a    áva jahi yātudʰā́nān áva kr̥tyākŕ̥taṃ jahi /
Halfverse: c    átʰo yó asmā́n dípsati tám u tváṃ jahy oṣadʰe //2//

Verse: 3 
Halfverse: a    riśyasyeva parīśāsáṃ parikŕ̥tya pári tvacáḥ /
Halfverse: c    kr̥tyā́ṃ kr̥tyākŕ̥te devā niṣkám iva práti muñcata //3//

Verse: 4 
Halfverse: a    púnaḥ kr̥tyā́ṃ kr̥tyākŕ̥te hastagŕ̥hya párā ṇaya /
Halfverse: c    samakṣám asma ā́ dʰehi yátʰā kr̥tyākŕ̥tam hánat //4//

Verse: 5 
Halfverse: a    kr̥tyā́ḥ santu kr̥tyākŕ̥te śapátʰaḥ śapatʰīyaté /
Halfverse: c    sukʰó rátʰa iva vartatāṃ kr̥tyā́ kr̥tyākŕ̥taṃ púnaḥ //5//

Verse: 6 
Halfverse: a    yádi strī́ yádi vā púmān kr̥tyā́ṃ cakā́ra pāpmáne /
Halfverse: c    tā́m u tásmai nayāmasy áśvam ivāśvābʰidʰā́nyā //6//

Verse: 7 
Halfverse: a    yádi vā́si devákr̥tā yádi vā púruṣaiḥ kr̥tā́ /
Halfverse: c    tā́ṃ tvā púnar ṇayāmasī́ndreṇa sayújā vayám //7//

Verse: 8 
Halfverse: a    ágne pr̥tanāṣāṭ pŕ̥tanāḥ sahasva /
Halfverse: c    púnaḥ kr̥tyā́ṃ kr̥tyākŕ̥te pratiháraṇena harāmasi //8//

Verse: 9 
Halfverse: a    kŕ̥tavyadʰani vídya táṃ yáś cakā́ra tám íj jahi /
Halfverse: c    ná tvā́m ácakruṣe vayáṃ vadʰā́ya sáṃ śiśīmahi //9//

Verse: 10 
Halfverse: a    putrá iva pitáraṃ gacʰa svajá ivābʰíṣṭʰito daśa /
Halfverse: c    bandʰám ivāvakrāmī́ gacʰa kŕ̥tye kr̥tyākŕ̥taṃ púnaḥ //10//

Verse: 11 
Halfverse: a    úd eṇī́va vāraṇy àbʰiskándʰaṃ mr̥gī́va /
Halfverse: c    kr̥tyā́ kartā́ram r̥cʰatu //11//

Verse: 12 
Halfverse: a    íṣvā ŕ̥jīyaḥ patatu dyā́vāpr̥tʰivī táṃ práti /
Halfverse: c    sā́ táṃ mr̥gám iva gr̥hṇatu kr̥tyā́ kr̥tyākŕ̥taṃ púnaḥ //12//

Verse: 13 
Halfverse: a    agnír ivaitu pratikū́lam anukū́lam ivodakám /
Halfverse: c    sukʰó rátʰa iva vartatāṃ kr̥tyā́ kr̥tyākŕ̥taṃ púnaḥ //13//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.