TITUS
Atharva-Veda-Samhita (Saunaka)
Part No. 479
Previous part

Book: 13 
13
Hymn: 1 


Verse: 1 
Halfverse: a    udéhi vājin yó apsv à1ntár idáṃ rāṣṭráṃ prá viśa sūnŕ̥tāvat /
Halfverse: c    yó róhito víśvam idáṃ jajā́na sá tvā rāṣṭrā́ya súbʰr̥taṃ bibʰartu //1//

Verse: 2 
Halfverse: a    úd vā́ja ā́ gan yó apsv à1ntár víśa ā́ roha tvádyonayo yā́ḥ /
Halfverse: c    sómaṃ dádʰāno 'pá óṣadʰīr gā́ś cátuṣpado dvipáda ā́ veśayehá //2//

Verse: 3 
Halfverse: a    yūyám ugrā́ marutaḥ pr̥śnimātara índreṇa yujā́ prá mr̥ṇīta śátrūn /
Halfverse: c    ā́ vo róhitaḥ śr̥ṇavat sudānavas triṣaptā́so marutaḥ svādusaṃmudaḥ //3//

Verse: 4 
Halfverse: a    rúho ruroha róhita ā́ ruroha gárbʰo jánīnāṃ janúṣām upástʰam /
Halfverse: c    tā́bʰiḥ sáṃrabdʰam ánv avindan ṣáḍ urvī́r gātúṃ prapáśyann ihá rāṣṭrám ā́hāḥ //4//

Verse: 5 
Halfverse: a    ā́ te rāṣṭrám ihá róhito 'hārṣīd vy ā̀stʰan mŕ̥dʰo ábʰayaṃ te abʰūt /
Halfverse: c    tásmai te dyāvāpr̥tʰivī́ revátībʰiḥ kā́maṃ duhātām ihá śákvarībʰiḥ //5//

Verse: 6 
Halfverse: a    róhito dyā́vāpr̥tʰivī́ jajāna tátra tántuṃ parameṣṭʰī́ tatāna /
Halfverse: c    tátra śiśriye 'já ékapādó 'dr̥ṃhad dyā́vāpr̥tʰivī́ bálena //6//

Verse: 7 
Halfverse: a    róhito dyā́vāpr̥tʰivī́ adr̥ṃhat téna svà stabʰitáṃ téna nā́kaḥ /
Halfverse: c    ténāntárikṣaṃ vímitā rájāṃsi téna devā́ amŕ̥tam ánv avindan //7//

Verse: 8 
Halfverse: a    ví róhito amr̥śad viśvárūpaṃ samākurvāṇáḥ prarúho rúhaś ca /
Halfverse: c    dívaṃ rūḍʰvā́ mahatā́ mahimnā́ sáṃ te rāṣṭrám anaktu páyasā gʰr̥téna //8//

Verse: 9 
Halfverse: a    yā́s te rúhaḥ prarúho yā́s ta ārúho yā́bʰir āpr̥ṇā́si dívam antárikṣam /
Halfverse: c    tā́sāṃ bráhmaṇā páyasā vavr̥dʰānó viśí rāṣṭré jāgr̥hi róhitasya //9//

Verse: 10 
Halfverse: a    yás te víśas tápasaḥ saṃbabʰūvúr vatsáṃ gāyatrī́m ánu tā́ ihā́guḥ /
Halfverse: c    tā́s tvā viśantu mánasā śivéna sáṃmātā vatsó abʰy ètu róhitaḥ //10// {1}

Verse: 11 
Halfverse: a    ūrdʰvó róhito ádʰi nā́ke astʰād víśvā rūpā́ṇi janáyan yúvā kavíḥ /
Halfverse: c    tigménāgnír jyótiṣā ví bʰāti tr̥tī́ye cakre rájasi priyā́ṇi //11//

Verse: 12 
Halfverse: a    sahásraśr̥ṅgo vr̥ṣabʰó jātávedā gʰr̥tā́hutaḥ sómapr̥ṣṭʰaḥ suvī́raḥ /
Halfverse: c    mā́ mā hāsīn nātʰitó nét tvā jáhāni gopoṣáṃ ca me vīrapoṣáṃ ca dʰehi //12//

Verse: 13 
Halfverse: a    róhito yajñásya janitā́ múkʰaṃ ca róhitāya vācā́ śrótreṇa mánasā juhomi /
Halfverse: c    róhitaṃ devā́ yanti sumanasyámānāḥ sá mā róhaiḥ sāmityaí rohayatu //13//

Verse: 14 
Halfverse: a    róhito yajñáṃ vy àdadʰād viśvákarmaṇe tásmāt téjāṃsy úpa memā́ny ā́guḥ /
Halfverse: c    vocéyaṃ te nā́bʰiṃ bʰúvanasyā́dʰi majmáni //14//

Verse: 15 
Halfverse: a    ā́ tvā ruroha br̥haty ùtá paṅktír ā́ kakúb várcasā jātavedaḥ /
Halfverse: c    ā́ tvā rurohoṣṇihākṣaró vaṣaṭkārá ā́ tvā ruroha róhito rétasā sahá //15//

Verse: 16 
Halfverse: a    ayáṃ vaste gárbʰaṃ pr̥tʰivyā́ dívaṃ vaste 'yám antárikṣam /
Halfverse: c    ayáṃ bradʰnásya viṣṭápi svàr lokā́n vy ā̀naśe //16//

Verse: 17 
Halfverse: a    vā́cas pate pr̥tʰivī́ naḥ syonā́ syonā́ yónis tálpā naḥ suśévā /
Halfverse: c    ihaívá prāṇáḥ sakʰyé no astu táṃ tvā parameṣṭʰin páry agnír ā́yuṣā várcasā dadʰātu //17//

Verse: 18 
Halfverse: a    vā́cas pata r̥távaḥ páñca yé nau vaiśvakarmaṇā́ḥ pári yé saṃbabʰūvúḥ /
Halfverse: c    ihaívá prāṇáḥ sakʰyé no astu táṃ tvā parameṣṭʰin pári róhita ā́yuṣā várcasā dadʰātu //18//

Verse: 19 
Halfverse: a    vā́cas pate saumanasáṃ mánaś ca goṣṭʰé no gā́ janáya yóniṣu prajā́ḥ /
Halfverse: c    ihaívá prāṇáḥ sakʰyé no astu táṃ tvā parameṣṭʰin páry ahám ā́yuṣā várcasā dadʰātu //19//

Verse: 20 
Halfverse: a    pári tvā dʰāt savitā́ devó agnír várcasā mitrā́váruṇāv abʰí tvā /
Halfverse: c    sárvā árātīr avakrā́mann éhīdáṃ rāṣṭrám akaraḥ sunŕ̥tāvat //20// {2}

Verse: 21 
Halfverse: a    yáṃ tvā pŕ̥ṣatī rátʰe práṣṭir váhati rohita /
Halfverse: c    śubʰā́ yāsi riṇánn apáḥ //21//

Verse: 22 
Halfverse: a    ánuvratā róhiṇī róhitasya sūríḥ suvárṇā br̥hatī́ suvárcāḥ /
Halfverse: c    táyā vā́jān viśvárūpāṃ jayema táyā víśvāḥ pŕ̥tanā abʰí ṣyāma //22//

Verse: 23 
Halfverse: a    idáṃ sádo róhiṇī róhitasyāsaú pántʰāḥ pŕ̥ṣatī yéna yā́ti /
Halfverse: c    tā́ṃ gandʰarvā́ḥ kaśyápā ún nayanti tā́ṃ rakṣanti kaváyó 'pramādam //23//

Verse: 24 
Halfverse: a    sū́ryasyā́śvā hárayaḥ ketumántaḥ sádā vahanty amŕ̥tāḥ sukʰáṃ rátʰam /
Halfverse: c    gʰr̥tapā́vā róhito bʰrā́jamāno dívaṃ deváḥ pŕ̥ṣatīm ā́ viveśa //24//

Verse: 25 
Halfverse: a    yó róhito vr̥ṣabʰás tigmáśr̥ṅgaḥ páry agníṃ pári sū́ryaṃ babʰū́va /
Halfverse: c    yó viṣṭabʰnā́ti pr̥tʰivī́ṃ dívaṃ ca tásmād devā́ ádʰi sŕ̥ṣṭīḥ sr̥jante //25//

Verse: 26 
Halfverse: a    róhito dívam ā́ruhan mahatáḥ páry arṇavā́t /
Halfverse: c    sárvo ruroha róhito rúhaḥ //26//

Verse: 27 
Halfverse: a    ví mimīṣva páyasvatīṃ gʰr̥tā́cīṃ devā́nāṃ dʰenúr ánapaspr̥g eṣā́ /
Halfverse: c    índraḥ sómaṃ pibatu kṣémo astv agníḥ prá stautu ví mŕ̥dʰo nudasva //27//

Verse: 28 
Halfverse: a    sámiddʰo agníḥ samidʰānó gʰr̥távr̥ddʰo gʰr̥tā́hutaḥ /
Halfverse: c    abʰīṣā́ṭ viśvāṣā́ḍ agníḥ sapátnān hantu yé máma //28//

Verse: 29 
Halfverse: a    hántv enān prá dahatv árir yó naḥ pr̥tanyáti /
Halfverse: c    kravyā́dāgnínā vayáṃ sapátnān prá dahāmasi //29//

Verse: 30 
Halfverse: a    avācī́nān áva jahī́ndra vájreṇa bāhumā́n /
Halfverse: c    ádʰā sapátnān māmakā́n agnés téjobʰir ā́diṣi //30// {3}

Verse: 31 
Halfverse: a    ágne sapátnān ádʰarān pādayāsmád vyatʰáyā sajātám utpípānaṃ br̥haspate /
Halfverse: c    índrāgnī mítrāvaruṇāv ádʰare padyantām ápratimanyūyamānāḥ //31//

Verse: 32 
Halfverse: a    udyáṃs tváṃ deva sūrya sapátnān áva me jahi /
Halfverse: c    ávainān áśmanā jahi té yantv adʰamáṃ támaḥ //32//

Verse: 33 
Halfverse: a    vatsó virā́jo vr̥ṣabʰó matīnā́m ā́ ruroha śukrápr̥ṣṭʰo 'ntárikṣam /
Halfverse: c    gʰr̥ténārkám abʰy àrcanti vatsáṃ bráhma sántaṃ bráhmaṇā vardʰayanti //33//

Verse: 34 
Halfverse: a    dívaṃ ca róha pr̥tʰivī́ṃ ca roha rāṣṭráṃ ca róha dráviṇaṃ ca roha /
Halfverse: c    prajā́ṃ ca róhāmŕ̥taṃ ca roha róhitena tanvà1ṃ sáṃ spr̥śasva //34//

Verse: 35 
Halfverse: a    yé devā́ rāṣṭrabʰŕ̥to 'bʰíto yánti sū́ryam /
Halfverse: c    taíṣ ṭe róhitaḥ samvidānó rāṣṭráṃ dadʰātu sumanasyámānaḥ //35//

Verse: 36 
Halfverse: a    út tvā yajñā́ bráhmapūtā vahanty adʰvagáto hárayas tvā vahanti /
Halfverse: c    tiráḥ samudrám áti rocase 'rṇavám //36//

Verse: 37 
Halfverse: a    róhite dyā́vāpr̥tʰivī́ ádʰi śrité vasujíti gojíti saṃdʰanājíti /
Halfverse: c    sahásraṃ yásya jánimāni saptá ca vocéyaṃ te nā́bʰiṃ bʰúvanasyā́dʰi majmáni //37//

Verse: 38 
Halfverse: a    yaśā́ yāsi pradíśo díśaś ca yaśā́ḥ paśūnā́m utá carṣaṇīnā́m /
Halfverse: c    yaśā́ḥ pr̥tʰivyā́ ádityā upástʰe 'háṃ bʰūyāsaṃ savitéva cā́ruḥ //38//

Verse: 39 
Halfverse: a    amútra sánn ihá vettʰetáḥ sáṃs tā́ni paśyasi /
Halfverse: c    itáḥ paśyanti rocanáṃ diví sū́ryaṃ vipaścítam //39//

Verse: 40 
Halfverse: a    devó devā́n marcayasy antáś carasy arṇavé /
Halfverse: c    samānám agním indʰate táṃ viduḥ kaváyaḥ páre //40// {4}

Verse: 41 
Halfverse: a    aváḥ páreṇa pará enā́vareṇa padā́ vatsáṃ bíbratī gaúr úd astʰāt /
Halfverse: c    sā́ kadrī́cī káṃ svid árdʰaṃ párāgāt kvà svit sūte nahí yūtʰé asmín //41//

Verse: 42 
Halfverse: a    ékapadī dvipádī sā́ cátuṣpady aṣṭā́padī návapadī babʰūvúṣī /
Halfverse: c    sahásrākṣarā bʰúvanasya paṅktís tásyāḥ samudrā́ ádʰi ví kṣaranti //42//

Verse: 43 
Halfverse: a    āróhan dyā́m amŕ̥taḥ prā́va me vácaḥ /
Halfverse: c    út tvā yajñā́ bráhmapūtā vahanty adʰvagáto hárayas tvā vahanti //43//

Verse: 44 
Halfverse: a    véda tát te amartya yát ta ākrámaṇaṃ diví /
Halfverse: c    yát te sadʰástʰaṃ paramé vyòman //44//

Verse: 45 
Halfverse: a    sū́ryo dyā́ṃ sū́ryaḥ pr̥ṭʰivī́ṃ sū́rya ā́pó'ti paśyati /
Halfverse: c    sū́ryo bʰūtásyaíkaṃ cákṣur ā́ ruroha dívaṃ mahī́m //45//

Verse: 46 
Halfverse: a    urvī́r āsan paridʰáyo védir bʰū́mir akalpata /
Halfverse: c    tátraitā́v agnī́ ā́dʰatta himáṃ gʰraṃsáṃ ca róhitaḥ //46//

Verse: 47 
Halfverse: a    himáṃ gʰraṃsáṃ cādʰā́ya yū́pān kr̥tvā́ párvatān /
Halfverse: c    varṣā́jyāv agnī́ ījāte róhitasya svarvídaḥ //47//

Verse: 48 
Halfverse: a    svarvído róhitasya bráhmaṇāgníḥ sám idʰyate /
Halfverse: c    tásmād gʰraṃsás tásmād dʰimás tásmād yajñó 'jāyata //48//

Verse: 49 
Halfverse: a    bráhmaṇāgnī́ vāvr̥dʰānaú bráhmavr̥ddʰau bráhmāhutau /
Halfverse: c    bráhmeddʰāv agnī́ ījāte róhitasya svarvídaḥ //49//

Verse: 50 
Halfverse: a    satyé anyáḥ samā́hito 'psv à1nyáḥ sám idʰyate /
Halfverse: c    bráhmeddʰāv agnī́ ījāte róhitasya svarvídaḥ //50// {5}

Verse: 51 
Halfverse: a    yáṃ vā́taḥ pariśúmbʰati yáṃ véndro bráhmaṇaspátiḥ /
Halfverse: c    bráhmeddʰāvagnī́ ījāte róhitasya svarvídaḥ //51//

Verse: 52 
Halfverse: a    védiṃ bʰū́miṃ kalpayitvā́ dívaṃ kr̥tvā́ dákṣiṇām /
Halfverse: c    gʰraṃsáṃ tád agníṃ kr̥tvā́ cakā́ra víśvam ātmanvád varṣéṇā́jyena róhitaḥ //52//

Verse: 53 
Halfverse: a    varṣám ā́jam gʰraṃsó agnír védir bʰū́mir akalpata /
Halfverse: c    tátraitā́n párvatān agnír gīrbʰír ūrdʰvā́m̐ akalpayat //53//

Verse: 54 
Halfverse: a    gīrbʰír ūrdʰvā́n kalpayitvā́ róhito bʰū́mim abravīt /
Halfverse: c    tváyīdáṃ sárvaṃ jāyatāṃ yád bʰūtáṃ yác ca bʰāvyàm //54//

Verse: 55 
Halfverse: a    sá yajñáḥ pratʰamó bʰūtó bʰávyo ajāyata /
Halfverse: c    tásmād dʰa jajña idáṃ sárvaṃ yát kíṃ cedáṃ virócate róhitena ŕ̥ṣiṇā́bʰr̥tam //55//

Verse: 56 
Halfverse: a    yáś ca gā́ṃ padā́ spʰuráti pratyáṅ sū́ryaṃ ca méhati /
Halfverse: c    tásya vr̥ścāmi te mū́laṃ ná cʰāyā́ṃ karavó 'param //56//

Verse: 57 
Halfverse: a    yó mābʰicʰāyám atyéṣi mā́ṃ cāgníṃ cāntarā́ /
Halfverse: c    tásya vr̥ścāmi te mū́laṃ ná cʰāyā́ṃ karavó 'param //57//

Verse: 58 
Halfverse: a    yó adyá deva sūrya tvā́ṃ ca mā́ṃ cāntarā́yati /
Halfverse: c    duṣvápnyaṃ tásmiṃ cʰámalaṃ duritā́ni ca mr̥jmahe //58//

Verse: 59 
Halfverse: a    mā́ prá gāma patʰó vayáṃ mā́ yajñā́d indra somínaḥ /
Halfverse: c    mā́ntá stʰur no árātayaḥ //59//

Verse: 60 
Halfverse: a    yó yajñásya prasā́dʰanas tántur devéṣv ā́tataḥ /
Halfverse: c    tám ā́hutam aśīmahi //60// {6}

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.