TITUS
Atharva-Veda-Samhita (Saunaka)
Part No. 553
Previous part

Hymn: 37 
Verse: 1 
Halfverse: a    idáṃ várco agnínā dattám ā́gan bʰárgo yáśaḥ sáha ójo váyo bálam /
Halfverse: c    tráyastriṃśad yā́ni ca vīryā̀ṇi tā́ny agníḥ prá dadātu me //1//

Verse: 2 
Halfverse: a    várca ā́ dʰehi me tanvā̀3ṃ sáha ójo váyo bálam /
Halfverse: c    indriyā́ya tvā kármaṇe vīryā̀ya práti gr̥hṇāmi śatáśāradāya //2//

Verse: 3 
Halfverse: a    ūrjé tvā bálāya tvaújase sáhase tvā /
Halfverse: c    abʰibʰū́yāya tvā rāṣṭrabʰŕ̥tyāya páry ūhāmi śatáśāradāya //3//

Verse: 4 
Halfverse: a    r̥túbʰyaṣ ṭvārtavébʰyo mādbʰyáḥ saṃvatsarébʰyaḥ /
Halfverse: c    dʰātré vidʰātré samŕ̥dʰe bʰūtásya pátaye yaje //4//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.