TITUS
Atharva-Veda-Samhita (Saunaka)
Part No. 555
Previous part

Hymn: 39 
Verse: 1 
Halfverse: a    aítu devás trāyamāṇaḥ kúṣṭʰo himávatas pári /
Halfverse: c    takmā́naṃ sárvaṃ nāśaya sárvāś ca yātudʰānyàḥ //1//

Verse: 2 
Halfverse: a    trī́ṇi te kuṣṭʰa nā́māni nadyamāró nadyā́riṣaḥ /
Halfverse: c    nádyāyáṃ púruso riṣat /
Halfverse: e    yásmai paribrávīmi tvā sāyáṃprātar átʰo dívā //2//

Verse: 3 
Halfverse: a    jīvalā́ nā́ma te mātā́ jīvantó nā́ma te pitā́ /
Halfverse: c    nádyāyáṃ púruṣo riṣat /
Halfverse: e    yásmai paribrávīmi tvā sāyáṃprātar átʰo dívā //3//

Verse: 4 
Halfverse: a    uttamó asy óṣadʰīnām anaḍvā́n jágatām iva vyāgʰráḥ śvápadām iva /
Halfverse: c    nádyāyáṃ púruṣo riṣat /
Halfverse: e    yásmai paribrávīmi tvā sāyáṃprātar átʰo divā //4//

Verse: 5 
Halfverse: a    tríḥ śā́mbubʰyo áṅgirebʰyas trír ādityébʰyas pári /
Halfverse: c    trír jató viśvádevebʰyaḥ /
Halfverse: e    sá kúṣṭʰo viśvábʰeṣajaḥ sākáṃ sómena tiṣṭʰati /
Halfverse: g    takmā́naṃ sárvaṃ nāśaya sárvāś ca yātudʰānyàḥ //5//

Verse: 6 
Halfverse: a    aśvattʰó devasádanas tr̥tī́yasyām itó diví /
Halfverse: c    tátrāmŕ̥tasya cákṣaṇaṃ tátaḥ kúṣṭʰo ajāyata /
Halfverse: e    sá kúṣṭʰo viśvábʰeṣajaḥ sākáṃ sómena tiṣṭʰati /
Halfverse: g    takmā́naṃ sárvaṃ nāśaya sárvāś ca yātudʰānyàḥ //6//

Verse: 7 
Halfverse: a    hiraṇyáyī naúr acarad dʰíraṇyabandʰanā diví /
Halfverse: c    tátrāmŕ̥tasya cákṣaṇaṃ tátaḥ kúṣṭʰo ajāyata /
Halfverse: e    sá kúṣṭʰo viśvábʰeṣajaḥ sākáṃ sómena tiṣṭʰati /
Halfverse: g    takmā́naṃ sárvaṃ nāśaya sárvāś ca yātudʰānyàḥ //7//

Verse: 8 
Halfverse: a    yátra nā́vaprabʰráṃśanaṃ yátra himávataḥ śíraḥ /
Halfverse: c    tátrāmŕ̥tasya cákṣaṇaṃ tátaḥ kúṣṭʰo ajāyata /
Halfverse: e    sá kuṣṭʰo viśvábʰeṣajaḥ sākáṃ sómena tiṣṭʰati /
Halfverse: g    takmā́naṃ sárvaṃ nāśaya sárvāś ca yātudʰānyàḥ //8//

Verse: 9 
Halfverse: a    yáṃ tvā véda pū́rva íkṣvāko yáṃ vā tvā kuṣṭʰa kāmyàḥ /
Halfverse: c    yáṃ vā váso yám ā́tsyas ténāsi viśvábʰeṣajaḥ //9//

Verse: 10 
Halfverse: a    śīrṣaśokáṃ tŕ̥tīyakaṃ sadaṃdír yáś ca hāyanáḥ /
Halfverse: c    takmā́naṃ viśvadʰāvīryādʰarā́ñcaṃ párā suva //10//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.