TITUS
Atharva-Veda-Samhita (Saunaka)
Part No. 608
Previous part

Hymn: 20 
Verse: 1 
Halfverse: a    śuṣmíntamaṃ na ūtáye dyumnínaṃ pāhi jā́gr̥vim /
Halfverse: c    índra sómaṃ śatakrato //1//

Verse: 2 
Halfverse: a    indriyā́ṇi śatakrato yā́ te jáneṣu pañcásu /
Halfverse: c    índra tā́ni ta ā́ vr̥ṇe //2//

Verse: 3 
Halfverse: a    ágann indra śrávo br̥hád dyumnáṃ dadʰiṣva duṣṭáram /
Halfverse: c    út te śúṣmaṃ tirāmasi //3//

Verse: 4 
Halfverse: a    arvāváto na ā́ gahy átʰo śakra parāvátaḥ /
Halfverse: c    u lokó yás te adriva índrehá táta ā́ gahi //4//

Verse: 5 
Halfverse: a    índro aṅgáṃ mahád bʰayám abʰí ṣád ápa cucyavat /
Halfverse: c    sá hí stʰiró vícarṣaṇiḥ //5//

Verse: 6 
Halfverse: a    índraś ca mr̥láyāti no ná naḥ paścā́d agʰáṃ naśat /
Halfverse: c    bʰadráṃ bʰavāti naḥ puráḥ //6//

Verse: 7 
Halfverse: a    índra ā́śābʰyas pári sárvābʰyo ábʰayaṃ karat /
Halfverse: c    jétā śátrūn vícarṣaṇiḥ //7//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.