TITUS
Atharva-Veda-Samhita (Saunaka)
Part No. 767

Hymn: 137 
Verse: 1 
Halfverse: a    yád dʰa prā́cīr ájagantóro maṇḍūradʰāṇikīḥ /
Halfverse: c    hatā́ índrasya śátravaḥ sárve budbudáyāśavaḥ //1//

Verse: 2 
Halfverse: a    kápr̥n naraḥ kapr̥tʰám úd dadʰātana codáyata kʰudáta vā́jasātaye /
Halfverse: c    niṣṭigryàḥ putrám ā́ cyāvayotáya índraṃ sabā́dʰa ihá sómapītaye //2//

Verse: 3 
Halfverse: a    dadʰikrā́vṇo akāriṣaṃ jiṣṇór áśvasya vājínaḥ /
Halfverse: c    surabʰí no múkʰā karat prá ṇa ā́yūṃṣi tāriṣat //3//

Verse: 4 
Halfverse: a    sutā́so mádʰumattamāḥ sómā índrāya mandínaḥ /
Halfverse: c    pavítravanto akṣaran devā́n gacʰantu vo mádāḥ //4//

Verse: 5 
Halfverse: a    índur índrāya pavata íti devā́so abruvan /
Halfverse: c    vācás pátir makʰasyate víśvasyéśāna ójasā //5//

Verse: 6 
Halfverse: a    sahásradʰāraḥ pavate samudró vācamīṅkʰayáḥ /
Halfverse: c    sómaḥ pátī rayīṇā́ṃ sákʰéndrasya divédive //6//

Verse: 7 
Halfverse: a    áva drapsó aṃśumátīm atiṣṭʰad iyānáḥ kr̥ṣṇó daśábʰiḥ sahásraiḥ /
Halfverse: c    ā́vat tám índraḥ śácyā dʰámantam ápa snéhitīr nr̥máṇā adʰatta //7//

Verse: 8 
Halfverse: a    drapsám apaśyaṃ víṣuṇe cárantam upahvaré nadyò aṃśumátyāḥ /
Halfverse: c    nábʰo ná kr̥ṣṇám avatastʰivā́ṃsam íṣyāmi vo vr̥ṣaṇo yúdʰyatājaú //8//

Verse: 9 
Halfverse: a    ádʰa drapsó aṃśumátyā upástʰé ʼdʰārayat tanvàṃ titviṣāṇáḥ /
Halfverse: c    víśo ádevīr abʰy ā̀cárantīr bŕ̥haspátinā yujéndraḥ sasāhe //9//

Verse: 10 
Halfverse: a    tváṃ ha tyát saptábʰyo jā́yamāno ʼśatrúbʰyo abʰavaḥ śátrur indra /
Halfverse: c    gūlhé dyā́vāpr̥tʰivī́ ánv avindo vibʰumádbʰyo bʰúvanebʰyo ráṇaṃ dʰāḥ //10//

Verse: 11 
Halfverse: a    tváṃ ha tyád apratimānám ójo vájreṇa vajrin dʰr̥ṣitó jagʰantʰa /
Halfverse: c    tváṃ śúṣṇasyā́vātiro vádʰatrais tváṃ gā́ indra śácyéd avindaḥ //11//

Verse: 12 
Halfverse: a    tám índraṃ vājayāmasi mahé vr̥trā́ya hántave /
Halfverse: c    sá vŕ̥ṣā vr̥ṣabʰó bʰuvat //12//

Verse: 13 
Halfverse: a    índraḥ sá dā́mane kr̥tá ójiṣṭʰaḥ sá máde hitáḥ /
Halfverse: c    dyumnī́ ślokī́ sá somyáḥ //13//

Verse: 14 
Halfverse: a    girā́ vájro ná sáṃbʰr̥taḥ sábalo ánapacyutaḥ /
Halfverse: c    vavakṣá r̥ṣvó ástr̥taḥ //14//



Copyright TITUS Project, Frankfurt a/M, 1.1.2002. No parts of this document may be republished in any form without prior permission by the copyright holder.