TITUS
Rg-Veda: Aitareya-Brahmana
Part No. 16
Previous part

Paragraph: 16 


Sentence: 1    agnaye matʰyamānāyānubrūhīty āhādʰvaryur
Sentence: 2    abʰi tvā devā savitar iti sāvitrīm anvāha
Sentence: 3    tad āhur:
   yad agnaye matʰyamānāyānu vācāhātʰa kasmāt sāvitrīm anvāheti
Sentence: 4    Savitā vai prasavānām īśe, savitr̥prasūtā evainaṃ tan mantʰanti.
   tasmāt sāvitrīm anvāha
Sentence: 5    mahī dyauḥ pr̥tʰivī ca na iti dyāvāpr̥tʰivīyām anvāha
Sentence: 6    tad āhur:
   yad agnaye matʰyamānāyānu vācāhātʰa kasmād dyāvāpr̥tʰivīyām anvāheti.
   dyāvāpr̥tʰivībʰyāṃ vā etaṃ jātaṃ devāḥ paryagr̥hṇaṃs,
   tābʰyām evādyāpi parigr̥hītas.
   tasmād dyāvāpr̥tʰivīyām anvāha
Sentence: 7    tvām agne puṣkarād adʰīti tr̥cam āgneyaṃ gāyatram anvāhāgnau matʰyamāne,
   svayaivainaṃ tad devatayā svena cʰandasā samardʰayaty
Sentence: 8    atʰarvā nir amantʰateti rūpasamr̥ddʰaṃ etad vai yajñasya samr̥ddʰaṃ
   yad rūpasamr̥ddʰaṃ, yat karma kriyamāṇam r̥g abʰivadati
Sentence: 9    sa yadi na jāyeta yadi ciraṃ jāyeta, rākṣogʰnyo gāyatryo 'nūcyā
Sentence: 10    agne haṃsi ny atriṇam ity etā
Sentence: 11    rakṣasām apahatyai
Sentence: 12    rakṣāṃsi vā enaṃ tarhy ālabʰante, yarhi na jāyate yarhi ciraṃ jāyate
Sentence: 13    sa yady ekasyām evānūktāyāṃ jāyeta yadi dvayor, atʰo ta bruvantu
   jantava iti jātāya jātavatīm abʰirūpām anubrūyād
Sentence: 14    yad yajñe 'bʰirūpaṃ tat samr̥ddʰa
Sentence: 15    ā yaṃ haste na kʰādinam iti
Sentence: 16    hastābʰyāṃ hy ena mantʰanti
Sentence: 17    śiśuṃ jātam iti. śiśur iva vā eṣa pratʰamajāto yad agnir
Sentence: 18    na bibʰrati \ viśām agniṃ svadʰvaram iti
Sentence: 19    yad vai devānāṃ neti tad eṣām o+m iti
Sentence: 20    pra devaṃ devavītaye bʰaratā vasuvittamam iti prahriyamāṇāyābʰirūpā
Sentence: 21    yad yajñe 'bʰirūpaṃ tat samr̥ddʰam
Sentence: 22    āsve yonau ni ṣīdatv ity
Sentence: 23    eṣa ha vā asya svo yonir yad agnir agner
Sentence: 24    ā jātaṃ jātavedasīti
Sentence: 25    jāta itaro, jātavedā itaraḥ
Sentence: 26    priyaṃ śiśītātitʰim ity. eṣa ha vā asya priyo 'titʰir yad agnir agneḥ
Sentence: 27    syona ā gr̥haptim iti, śāntyām evainaṃ tad dadʰāty
Sentence: 28    agnināgniḥ sam idʰyate kavir gr̥hapatir yuvā \
   havyavād juhvāsya ity abʰirūpā
Sentence: 29    yad yajñe 'bʰirūpaṃ tat samr̥ddʰaṃ
Sentence: 30    tvaṃ hy agne agninā vipro vipreṇa san sateti
Sentence: 31    vipra itaro vipra itaraḥ, sanu itaraḥ sann itaraḥ
Sentence: 32    sakʰā sakʰyā samidʰyasa ity. eṣa ha vā asya svaḥ sakʰā yad agnir agnes
Sentence: 33    tam marjayanta sukratum puroyāvānam ājiṣu \
   sveṣu kṣayeṣu vājinam iti
Sentence: 34    eṣa ha vā asya svaḥ kṣayo yad agnir agner
Sentence: 35    yajñena yajñam ayajanta devā ity uttamayā paridadʰāti
Sentence: 36    yajñena vai tad devā yajñam ayajanta yad agnināgnim ayajanta,
   te svargaṃ lokam āyaṃs
Sentence: 37    tāni dʰarmāṇi pratʰamāny āsan \
   te ha nākam mahimānaḥ sacanta yatra pūrve sādʰyāḥ santi devā iti
Sentence: 38    cʰandāṃsi vai Sādʰyā devās, te 'gre 'gnināgnim ayajanta,
   te svargaṃ lokam āyann
Sentence: 39    ādityāś caivehāsann Aṅgirasaś ca, te 'gre 'gnināgnim ayajanta,
   te svargaṃ lokam āyan
Sentence: 40    saiṣā svargyāhutir yad agnyāhutir.
   yadi ha va apy abrāhmaṇokto yadi duruktokto yajate
   'tʰa haiṣāhutir gacʰaty eva devān, na pāpmanā saṃsr̥jyate
Sentence: 41    gacʰaty asyāhutir devān nāsyāhutiḥ pāpmanā saṃsr̥jyate ya evaṃ veda
Sentence: 42    tā etās trayodaśānvāha rūpasamr̥ddʰā
Sentence: 43    etad vai yajñasya samr̥ddʰaṃ yad rūpasamr̥ddʰaṃ,
   yat karma kriyamāṇam r̥g abʰivadati
Sentence: 44    tāsāṃ triḥ pratʰamām anvāha trir uttamāṃ, tāḥ saptadaśa sampadyante.
   saptadaśo vai Prajāpatir:
   dvādaśa māsāḥ pañcartavas.
   tāvān saṃvatsaraḥ, saṃvatsaraḥ Prajāpatiḥ
Sentence: 45    prajāpatyāyatanābʰir evābʰī rādʰnoti ya evaṃ veda
Sentence: 46    triḥ pratʰamāṃ trir uttamām anvāha,
   yajñasyaiva tad barsau nahyati stʰemne balāyāvisraṃsāya



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.