TITUS
Black Yajur-Veda: Taittiriya-Brahmana
Part No. 3
Previous part

Chapter: 3 
Paragraph: 1 
Verse: 1    {BS 1.3.1.1}
Sentence: 1    devāsurā́ḥ sáṃyattā āsan /
Sentence: 2    té devā́ vijayám upayántaḥ /
Sentence: 3    agnī́ṣómayos tejasvínīs tanū́s sáṃnyadadʰata /
Sentence: 4    idám u no bʰaviṣyati /
Sentence: 5    yádi no jeṣyántī́ti /
Sentence: 6    ténāgnī́ṣómāv ápākrāmatām /
Sentence: 7    té devā́ vijítya /
Sentence: 8    agnī́ṣómāv ánvaiccʰan /
Sentence: 9    tè 'gním ánvavindann r̥túṣū́tsannam /
Sentence: 10    tásya víbʰaktībʰis tejasvínīs tanū́r ávārundʰata //

Verse: 2    {BS 1.3.1.2}
Sentence: 1    té sómam ánvavindan /
Sentence: 2    tám agʰnan /
Sentence: 3    tásya yatʰābʰijñā́yaṃ tanū́r vyàgr̥hṇata /
Sentence: 4    té gráhā abʰavan /
Sentence: 5    tád gráhāṇāṃ grahatvám /
Sentence: 6    yásyaiváṃ vidúṣo gráhā gr̥hyánte /
Sentence: 7    tásya tv èvá gr̥hītā́ḥ /
Sentence: 8    nā́nāgneyaṃ punarādʰéye kuryāt /
Sentence: 9    yád ánāgneyaṃ punarādʰéye kuryā́t /
Sentence: 10    vyr̥̀ddʰam evá tát {AS eva tat} //

Verse: 3    {BS 1.3.1.3}
Sentence: 1    ánāgneyaṃ vā́ etát kriyate /
Sentence: 2    yát samídʰas tánūn ápātam iḍó barhír yajati /
Sentence: 3    ubʰā́v āgneyā́v ā́jyabʰāgau syātām /
Sentence: 4    ánājyabʰāgau bʰavata íty āhuḥ /
Sentence: 5    yád ubʰā́v āgneyā́v anváñcāv íti /
Sentence: 6    agnáye pávamānāyóttaraḥ syāt /
Sentence: 7    yát pávamānāya /
Sentence: 8    ténā́jyabʰāgaḥ /
Sentence: 9    téna saumyáḥ /
Sentence: 10    búdʰanvaty āgneyásyā́jyabʰāgasya puro'nuvākyā̀ bʰavati //

Verse: 4    {BS 1.3.1.4}
Sentence: 1    yátʰā suptáṃ bodʰáyati /
Sentence: 2    tādŕ̥g evá tát /
Sentence: 3    agnínyaktāḥ patnīsaṃyājā́nām ŕ̥caḥ syuḥ /
Sentence: 4    ténāgneyám̐ sárvaṃ bʰavati /
Sentence: 5    ekadʰā́ tejasvínīṃ devátāmúpaitī́ty āhuḥ /
Sentence: 6    sáinam īśvarā́ pradáha íti /
Sentence: 7    néti brūyāt /
Sentence: 8    prajánanaṃ vā́ agníḥ /
Sentence: 9    prajánanam evópaitī́ti /
Sentence: 10    kr̥táyajuḥ sáṃbʰr̥tasaṃbʰāra íty āhuḥ //

Verse: 5    {BS 1.3.1.5}
Sentence: 1    ná saṃbʰr̥tyāḥ saṃbʰārā́ḥ /
Sentence: 2    ná yájuḥ kāryàm íti /
Sentence: 3    átʰo kʰálu /
Sentence: 4    saṃbʰŕ̥tyā evá saṃbʰārā́ḥ /
Sentence: 5    kāryàṃ yájuḥ /
Sentence: 6    punarādʰéyasya sámr̥ddʰyai /
Sentence: 7    ténopām̐śú prácarati /
Sentence: 8    éṣya iva vā́ eṣáḥ /
Sentence: 9    yát punarādʰéyaḥ /
Sentence: 10    yátʰopām̐śú naṣṭám iccʰáti //

Verse: 6    {BS 1.3.1.6}
Sentence: 1    tādŕ̥g evá tát /
Sentence: 2    uccáiḥ sviṣṭakŕ̥tam útsr̥jati /
Sentence: 3    yátʰā naṣṭáṃ vittvā́ {BS vitvā́} prā́hāyám íti /
Sentence: 4    tādŕ̥g evá tát /
Sentence: 5    ekadʰā́ tejasvínīṃ devátām úpaitī́ty āhuḥ /
Sentence: 6    sáinam īśvarā́ pradáha íti /
Sentence: 7    tát tátʰā nópaiti /
Sentence: 8    prayājānūyājéṣv evá víbʰaktīḥ kuryāt /
Sentence: 9    yatʰāpūrvám ā́jyabʰāgau syā́tām /
Sentence: 10    eváṃ patnīsaṃyājā́ḥ //

Verse: 7    {BS 1.3.1.7}
Sentence: 1    tád vaiśvānarávat prajánanavattaram úpaitī́ti /
Sentence: 2    tád āhuḥ /
Sentence: 3    vyr̥̀ddʰaṃ vā́ etát /
Sentence: 4    ánāgneyaṃ vā́ etát kriyata íti /
Sentence: 5    néti brūyāt /
Sentence: 6    agníṃ pratʰamáṃ víbʰaktīnāṃ yajati /
Sentence: 7    agním uttamáṃ patnīsaṃyājā́nām /
Sentence: 8    ténāgneyám /
Sentence: 9    téna sámr̥ddʰaṃ kriyata íti //

Paragraph: 2 
Verse: 1    {BS 1.3.2.8}
Sentence: 1    devā́ vái yátʰādarśaṃ yajñā́n ā́haranta /
Sentence: 2    yò 'gniṣṭomám /
Sentence: 3    yá uktʰyàm /
Sentence: 4    yò 'tirātrám /
Sentence: 5    té saháivá sárve vājapéyam apaśyan /
Sentence: 6    té /
Sentence: 7    anyònyasmai {AS anyónyásmai} nā́tiṣṭhanta /
Sentence: 8    ahám anéna yajā íti /
Sentence: 9    tè 'bruvan /
Sentence: 10    ājím asyá dʰāvāméti //

Verse: 2    {BS 1.3.2.9}
Sentence: 1    tásminn ājím adʰāvan /
Sentence: 2    táṃ bŕ̥haspátir údajayat /
Sentence: 3    ténāyajata /
Sentence: 4    sá svā́rājyam agaccʰat /
Sentence: 5    tám índro 'bravīt /
Sentence: 6    mā́m anéna yājayéti /
Sentence: 7    ténéndram ayājayat /
Sentence: 8    só 'graṃ devátānāṃ páryait /
Sentence: 9    ágaccʰat svā́rājyam /
Sentence: 10    átiṣṭhantāsmai jyáiṣṭhyāya //

Verse: 3    {BS 1.3.2.10}
Sentence: 1    yá eváṃ vidvā́n vājapéyena yájate /
Sentence: 2    gáccʰati svā́rājyam /
Sentence: 3    ágram̐ samānā́nāṃ páryeti /
Sentence: 4    tíṣṭhante 'smai jyáisṭhyāya /
Sentence: 5    sá vā́ eṣá brāhmaṇásya caivá rājanyàsya ca yajñáḥ /
Sentence: 6    táṃ vā́ etáṃ vājapéya íty āhuḥ /
Sentence: 7    vājā́pyo vā́ eṣáḥ /
Sentence: 8    vā́jam̐ hy èténa devā́ áipsann /
Sentence: 9    sómo vái vājapéyaḥ /
Sentence: 10    yó vái sómaṃ vājapéyaṃ véda //

Verse: 4    {BS 1.3.2.11}
Sentence: 1    vājy èváinaṃ pītvā́ bʰavati /
Sentence: 2    ā́sya vājī́ jāyate /
Sentence: 3    ánnaṃ vái vājapéyaḥ /
Sentence: 4    yá eváṃ véda /
Sentence: 5    átty ánnam /
Sentence: 6    ā́syān nādó jāyate /
Sentence: 7    bráhma vái vājapéyaḥ /
Sentence: 8    yá eváṃ véda /
Sentence: 9    átti bráhmaṇā́nnam /
Sentence: 10    ā́sya brahmā́ jāyate //

Verse: 5    {BS 1.3.2.12}
Sentence: 1    vā́g vái vā́jasya prasaváḥ /
Sentence: 2    yá eváṃ véda /
Sentence: 3    karóti vācā́ vīryàm /
Sentence: 4    áinaṃ vācā́ gaccʰati /
Sentence: 5    ápivatīṃ vā́caṃ vadati /
Sentence: 6    prajā́patir devébʰyo yajñā́n vyā́diśat /
Sentence: 7    sá ātmán vājapéyam adʰatta /
Sentence: 8    táṃ devā́ abruvan /
Sentence: 9    eṣá vā́vá yajñáḥ /
Sentence: 10    yád vājapéyaḥ //

Verse: 6    {BS 1.3.2.13}
Sentence: 1    ápy evá nó 'tra_astv íti /
Sentence: 2    tébʰya etā́ {AS etā́n} újjitīḥ prā́yaccʰat /
Sentence: 3    tā́ vā́ etā́ újjitayo vyā́kʰyāyante /
Sentence: 4    yajñásya sarvatvā́ya /
Sentence: 5    devátānām ánirbʰāgāya /
Sentence: 6    devā́ vái bráhmaṇaś cā́nnasya ca śámalam ápāgʰnan /
Sentence: 7    yád bráhmaṇaḥ śámalam āsīt /
Sentence: 8    sā́ gā́tʰā nārāśam̐sy àbʰavat /
Sentence: 9    yád ánnasya /
Sentence: 10    sā́ súrā //

Verse: 7    {BS 1.3.2.14}
Sentence: 1    tásmād gā́yataś ca mattásya ca ná pratigŕ̥hyam /
Sentence: 2    yátpratigr̥hṇīyā́t /
Sentence: 3    śámalaṃ prátigr̥hṇīyāt /
Sentence: 4    sárvā vā́ etásya vā́có 'varuddʰāḥ /
Sentence: 5    yó vājapeyayājī́ /
Sentence: 6    yā́ pr̥tʰivyā́ṃ yā́gnáu yā́ ratʰantaré /
Sentence: 7    yā́ntárikṣe yā́ vāyáu yā́ vāmadevyé /
Sentence: 8    yā́ diví yā́dityé yā́ br̥hatí /
Sentence: 9    yā́psú yáuṣadʰīṣu yā́ vánaspátiṣu /
Sentence: 10    tásmād vājapeyayājy ā́rtvijīnaḥ /
Sentence: 11    sárvā hy àsya vā́có 'varuddʰāḥ //

Paragraph: 3 
Verse: 1    {BS 1.3.3.15}
Sentence: 1    devā́ vái yád anyáir gráhair yajñásya nā́vā́rundʰata /
Sentence: 2    tád atigrāhyàir atigŕ̥hyā́vārundʰata {AS atigrā́hyā́vārundʰata} /
Sentence: 3    tád atigrāhyā̀ṇām atigrāhyatvám /
Sentence: 4    yád atigrāhyā̀ gr̥hyánte /
Sentence: 5    yád evā́nyáir gráhair yajñásya nā́varundʰé /
Sentence: 6    tád evá táir atigŕ̥hyā́varundʰe /
Sentence: 7    páñca gr̥hyante /
Sentence: 8    pā́ṅkto yajñáḥ /
Sentence: 9    yā́vān evá yajñáḥ /
Sentence: 10    tám āptvā́varundʰe //

Verse: 2    {BS 1.3.3.16}
Sentence: 1    sárva aindrā́ bʰavanti /
Sentence: 2    ekadʰáivá yájamāna indriyáṃ dadʰati /
Sentence: 3    saptádaśa prājāpatyā́ gráhā gr̥hyante /
Sentence: 4    saptadaśáḥ prajā́patiḥ /
Sentence: 5    prajā́pater ā́ptyai /
Sentence: 6    ékayarcā́ gr̥hṇāti /
Sentence: 7    ekadʰáivá yájamāne vīryàṃ dadʰāti /
Sentence: 8    somagrahā́m̐ś ca surāgrahā́m̐ś ca gr̥hṇāti /
Sentence: 9    etád vái devā́nāṃ paramám ánnam /
Sentence: 10    yát sómaḥ //

Verse: 3    {BS 1.3.3.17}
Sentence: 1    etán manuṣyā̀ṇām /
Sentence: 2    yát súrā /
Sentence: 3    paraméṇaivā́smā annā́dyenā́varam annā́dyam ávarundʰe /
Sentence: 4    somagrahā́n gr̥hṇāti /
Sentence: 5    bráhmaṇo vā́ etát téjaḥ /
Sentence: 6    yát sómaḥ /
Sentence: 7    bráhmaṇa evá téjasā téjo yájamāne dadʰāti /
Sentence: 8    surāgrahā́n gr̥hṇāti /
Sentence: 9    ánnasya vā́ etác cʰámalam /
Sentence: 10    yát súrā //

Verse: 4    {BS 1.3.3.18}
Sentence: 1    ánnasyaivá śámalena śámalaṃ yájamānād ápahanti /
Sentence: 2    somagrahā́m̐ś ca surāgrahā́m̐ś ca gr̥hṇāti /
Sentence: 3    púmān vái sómaḥ /
Sentence: 4    strī́ súrā /
Sentence: 5    tán mitʰunám /
Sentence: 6    mitʰunám evā́sya tád yajñé karoti prajánanāya /
Sentence: 7    ātmā́nam evá somagraháiḥ spr̥ṇoti /
Sentence: 8    jāyā́m̐ surāgraháiḥ /
Sentence: 9    tásmād vājapeyayājy àmúṣmim̐l {BS àmúṣmin} loké stríyam̐ sáṃbʰavati /
Sentence: 10    vājapéyābʰijitam̐ hy àsya //

Verse: 5    {BS 1.3.3.19}
Sentence: 1    pū́rve somagrahā́ gr̥hyante /
Sentence: 2    ápare surāgrahā́ḥ /
Sentence: 3    purokṣám̐ somagrahā́n sādayati /
Sentence: 4    paścādakṣám̐ surāgrahā́n /
Sentence: 5    pāpavasyasásya vídʰr̥tyai /
Sentence: 6    eṣá vái yájamānaḥ /
Sentence: 7    yát sómaḥ /
Sentence: 8    ánnam̐ súrā /
Sentence: 9    somagrahā́m̐ś ca surāgrahā́m̐ś ca vyátiṣajati /
Sentence: 10    annā́dyenaiváinaṃ vyátiṣajati //

Verse: 6    {BS 1.3.3.20}
Sentence: 1    saṃpŕ̥caḥ stʰa sáṃ mā bʰdréṇa pr̥ṅktéty āha /
Sentence: 2    ánnaṃ vái bʰadrám /
Sentence: 3    annā́dyenaiváinam̐ sám̐sr̥jati /
Sentence: 4    ánnasya vā́ etác cʰámalam /
Sentence: 5    yát súrā /
Sentence: 6    pāpmáiva kʰálu vái śámalam /
Sentence: 7    pāpmánā vā́ etam etác cʰámalena vyátiṣajati /
Sentence: 8    yát somagrahā́m̐ś ca surāgrahā́m̐ś ca vyatiṣájati {AS vyátiṣajati} /
Sentence: 9    vipŕ̥caḥ stʰa ví mā pāpmánā pr̥ṅktéty āha /
Sentence: 10    pāpmánaiváinam̐ śámalena vyā́vartayati //

Verse: 7    {BS 1.3.3.21}
Sentence: 1    tásmād vājapeyayājī́ pūtó médʰyo dakṣiṇyàḥ /
Sentence: 2    prā́ṅ dravati {BS prā́ṅúdravati} somagraháiḥ /
Sentence: 3    amúm evá táir lokám abʰíjayati /
Sentence: 4    pratyáṅ surāgraháiḥ /
Sentence: 5    imám evá táir lokám abʰíjayati /
Sentence: 6    prátiṣṭhanti somagraháiḥ /
Sentence: 7    yā́vad evá satyám /
Sentence: 8    téna sūyate /
Sentence: 9    vājasŕ̥dbʰyaḥ surāgrahā́n haranti /
Sentence: 10    ánr̥tenaivá víśam̐ sám̐sr̥jati /
Sentence: 11    hiraṇyapātráṃ mádʰoḥ pūrṇáṃ dadāti /
Sentence: 12    madʰvyò 'sānī́ti /
Sentence: 13    ekadʰā́ brahmáṇa úpaharati /
Sentence: 14    ekadʰáivá yájamāna ā́yus téjo dadʰāti //

Paragraph: 4 
Verse: 1    {BS 1.3.4.22}
Sentence: 1    brahmavādíno vadanti /
Sentence: 2    na_ágniṣṭomó na_úktʰyaḥ /
Sentence: 3    ná ṣoḍaśī́ na_átirātráḥ /
Sentence: 4    átʰa kásmād vājapéye sárve yajñakratávo 'varudʰyanta íti /
Sentence: 5    paśúbʰir íti brūyāt /
Sentence: 6    āgneyáṃ paśúm ā́labʰate /
Sentence: 7    agniṣṭomám evá téná_avarundʰe /
Sentence: 8    aindrāgnéna_uktʰyàm /
Sentence: 9    aindréṇa ṣoḍaśinaḥ stotrám /
Sentence: 10    sārasvatyā́_atirātrám //

Verse: 2    {BS 1.3.4.23}
Sentence: 1    mārutyā́ br̥hatáḥ stotrám /
Sentence: 2    etā́vanto vái yajñakratávaḥ /
Sentence: 3    tā́n paśúbʰir evá_avarundʰe /
Sentence: 4    ātmā́nam evá spr̥ṇoty agniṣṭoména /
Sentence: 5    prāṇāpānā́v uktʰyèna /
Sentence: 6    vīryàm̐ ṣoḍaśínaḥ stotréṇa /
Sentence: 7    vā́cam atirātréṇa /
Sentence: 8    prajā́ṃ br̥hatáḥ stotréṇa /
Sentence: 9    imám evá lokám abʰíjayaty agniṣṭoména /
Sentence: 10    antárikṣam uktʰyèna //

Verse: 3    {BS 1.3.4.24}
Sentence: 1    suvargáṃ lokám̐ ṣoḍaśínaḥ stotréṇa /
Sentence: 2    devayā́nān evá patʰá ā́rohaty atirātréṇa /
Sentence: 3    nā́kam̐ rohati br̥hatáḥ stotréṇa /
Sentence: 4    téja evā́tmán dʰatta āgneyéna paśúnā /
Sentence: 5    ójo bálam aindrāgnéna /
Sentence: 6    indriyám aindréṇa /
Sentence: 7    vā́cam̐ sārasvatyā́ /
Sentence: 8    ubʰā́v evá devalokáṃ ca manuṣyalokáṃ ca_abʰíjayati mārutyā́ vaśáyā /
Sentence: 9    saptádaśa prājāpatyā́n paśū́n ā́labʰate /
Sentence: 10    saptadaśáḥ prajā́patiḥ //

Verse: 4    {BS 1.3.4.25}
Sentence: 1    prajā́pater ā́ptyai /
Sentence: 2    śyāmā́ ékarūpā bʰavanti /
Sentence: 3    evám iva hí prajā́patiḥ sámr̥ddʰyai /
Sentence: 4    tā́n páryagnikr̥tān útsr̥jati /
Sentence: 5    marúto yajñám ajigʰām̐san prajā́pateḥ /
Sentence: 6    tébʰya etā́ṃ mārutī́ṃ vaśā́m ā́labʰata /
Sentence: 7    táyaiváinān aśamayat /
Sentence: 8    mārutyā́ pracárya /
Sentence: 9    etā́n sáṃjñapayet /
Sentence: 10    marúta evá śamayitvā́ //

Verse: 5    {BS 1.3.4.26}
Sentence: 1    etáiḥ prácarati /
Sentence: 2    yajñásya_ágʰātāya /
Sentence: 3    ekadʰā́ vapā́ juhoti /
Sentence: 4    ekadevatyā̀ hi /
Sentence: 5    eté /
Sentence: 6    átʰo ekadʰáivá yájamāne vīryàṃ dadʰāti /
Sentence: 7    naivāréṇa saptádaśaśarāveṇa_etárhi prácarati /
Sentence: 8    etát puroḍāśā hy èté /
Sentence: 9    átʰo paśūnā́m evá ccʰidrám {BS cʰidrám} ápidadʰāti /
Sentence: 10    sārasvatyā́_uttamáyā prácarati /
Sentence: 11    vā́g vái sárasvatī /
Sentence: 12    tásmāt prāṇā́nāṃ vā́g uttamā́ /
Sentence: 13    átʰo prajā́patāv evá yajñáṃ prátiṣṭhāpayati /
Sentence: 14    prajā́patir hí vā́k /
Sentence: 15    ápannadatī bʰavati /
Sentence: 16    tásmān manuṣyā̀ḥ sarvāṃ vā́caṃ vadanti //

Paragraph: 5 
Verse: 1    {BS 1.3.5.27}
Sentence: 1    sāvitráṃ juhoti kármaṇaḥ karmaṇaḥ purástāt /
Sentence: 2    kás tád veda_íty āhuḥ /
Sentence: 3    yád vājapéyasya pū́rvaṃ yád áparam íti /
Sentence: 4    savitŕ̥prasūta evá yatʰāpūrváṃ kármāṇi karoti /
Sentence: 5    sávane_savane juhoti /
Sentence: 6    ākrámaṇam evá tát sétuṃ yájamānaḥ kurute /
Sentence: 7    suvargásya lokásya sámaṣṭyai /
Sentence: 8    vācáspátir vā́cam adyá svadāti na íty āha /
Sentence: 9    vā́g vái devā́nāṃ purā́nnam āsīt /
Sentence: 10    vā́cam evā́smā ánnam̐ svadayati //

Verse: 2    {BS 1.3.5.28}
Sentence: 1    índrasya vájro 'si vā́rtragʰna {BS vā́rtradʰna} íti rátʰam upā́vaharati víjityai /
Sentence: 2    vā́jasya nú prasavé mātáraṃ mahī́m íty āha /
Sentence: 3    yác caivá_iyám /
Sentence: 4    yác ca_asyā́m ádʰi /
Sentence: 5    tádevá_avarundʰe /
Sentence: 6    átʰo tásminn evá_ubʰaye 'bʰíṣicyate /
Sentence: 7    apsv àntár amŕ̥tam apsú bʰeṣajám íty áśvān palpūlayati /
Sentence: 8    apsú vā́ áśvasya tŕ̥tīyaṃ práviṣṭam /
Sentence: 9    tád anuvénan v ávaplavate /
Sentence: 10    yád apsú palpūláyati //

Verse: 3    {BS 1.3.5.29}
Sentence: 1    yád evā́sya_apsú práviṣṭam /
Sentence: 2    tád evá_avarundʰe /
Sentence: 3    bahú vā́ áśvo 'medʰyám úpagaccʰati /
Sentence: 4    yád apsú palpūláyati /
Sentence: 5    médʰyān eváinān karoti /
Sentence: 6    vāyúr vā tvā mánur vā tvā_íty āha /
Sentence: 7    etā́ vā etáṃ devátā ágre áśvam ayuñjan /
Sentence: 8    tā́bʰir eváinān yunakti /
Sentence: 9    savásya_újjityai /
Sentence: 10    yájuṣā yunakti vyā́vr̥ttyai //

Verse: 4    {BS 1.3.5.30}
Sentence: 1    ápāṃnapād āśuhemann íti sáṃmārṣṭi /
Sentence: 2    médʰyān eváinān karoti /
Sentence: 3    átʰo stáuty eváinān ājím̐ sariṣyatáḥ /
Sentence: 4    viṣṇukramā́n kramate /
Sentence: 5    víṣṇur evá bʰūtvémā́n lokā́n abʰíjayati /
Sentence: 6    vaiśvadevó vái rátʰaḥ /
Sentence: 7    aṅkáu nyaṅkā́v abʰíto rátʰaṃ yā́v íty āha /
Sentence: 8    yā́ evá devátā rátʰe práviṣṭāḥ /
Sentence: 9    tā́bʰya evá námaskaroti /
Sentence: 10    ātmánó 'nārtyai /
Sentence: 11    áśamaratʰaṃbʰāvuko 'sya rátʰo bʰavati /
Sentence: 12    yá eváṃ véda //

Paragraph: 6 
Verse: 1    {BS 1.3.6.31}
Sentence: 1    devásyāhám̐ savitúḥ prasavé bŕ̥haspátinā vājajítā vā́jaṃ jeṣam íty āha /
Sentence: 2    savitŕ̥prasūta evá bráhmaṇā vā́jam újjayati /
Sentence: 3    devásyāhám̐ savitúḥ prasavé bŕ̥haspátinā vājajítā várṣiṣṭhaṃ nā́kam̐ ruheyam íty āha /
Sentence: 4    savitŕ̥prasūta evá bráhmaṇā várṣiṣṭhaṃ nā́kam̐ rohati /
Sentence: 5    cā́tvāle ratʰacakráṃ nímitam̐ rohati /
Sentence: 6    áto vā́ áṅgirasa uttamā́ḥ suvargáṃ lokám āyan /
Sentence: 7    sākṣā́d evá yájamānaḥ suvargáṃ lokám eti /
Sentence: 8    ā́veṣṭayati /
Sentence: 9    vájro vái rátʰaḥ /
Sentence: 10    vájreṇaivá díśo 'bʰíjayati //

Verse: 2    {BS 1.3.6.32}
Sentence: 1    vājínām̐ sā́ma gāyate /
Sentence: 2    ánnaṃ vái vā́jaḥ /
Sentence: 3    ánnam evá_avarundʰe /
Sentence: 4    vācó várṣma devébʰyó 'pākrāmat /
Sentence: 5    tád vánaspátīn prā́viśat /
Sentence: 6    sáiṣā́ vā́g vánaspátiṣu vadati /
Sentence: 7    yā́ dundubʰáu {BS duṃdubʰáu} /
Sentence: 8    tásmād dundubʰíḥ sárvā vā́co 'tivadati /
Sentence: 9    dundubʰī́n samā́gʰnanti /
Sentence: 10    paramā́ vā́ eṣā́ vā́k //

Verse: 3    {BS 1.3.6.33}
Sentence: 1    yā́ dundubʰáu /
Sentence: 2    paramáyaivá vācā́_avarāṃ vā́cam ávarundʰe /
Sentence: 3    átʰo vācá evá várṣma yájamāno 'varundʰe /
Sentence: 4    índrāya vā́caṃ vadata_índraṃ vā́jaṃ jāpayata_índro vā́jam ajayid íty āha /
Sentence: 5    eṣá vā́ etárhi_índraḥ /
Sentence: 6    yó yájate /
Sentence: 7    yájamāna evá vā́jam újjayati /
Sentence: 8    saptádaśa pravyādʰā́n ājíṃ dʰāvanti /
Sentence: 9    saptadaśám̐ stotráṃ bʰavati /
Sentence: 10    saptádaśa_saptadaśa dīyante //

Verse: 4    {BS 1.3.6.34}
Sentence: 1    saptadaśáḥ prajā́patiḥ /
Sentence: 2    prajā́pater ā́ptyai /
Sentence: 3    árvā_asi sáptir asi vājyàsī́ty āha /
Sentence: 4    agnír vā́ árvā /
Sentence: 5    vāyúḥ sáptiḥ /
Sentence: 6    ādityó vājī́ /
Sentence: 7    etā́bʰir evā́smai devátābʰir devaratʰáṃ yunakti /
Sentence: 8    praṣṭivāhínaṃ yunakti /
Sentence: 9    praṣṭivāhī́ vái devaratʰáḥ /
Sentence: 10    devaratʰám evā́smai yunakti //

Verse: 5    {BS 1.3.6.35}
Sentence: 1    vā́jino vā́jaṃ dʰāvata kā́ṣṭhāṃ {AS kā́ṣṭhā} gaccʰatéty āha /
Sentence: 2    suvargó vái lokáḥ kā́ṣṭhā /
Sentence: 3    suvargám evá lokáṃ yanti /
Sentence: 4    suvargáṃ vā́ eté lokáṃ yanti /
Sentence: 5    yá ājíṃ dʰā́vanti /
Sentence: 6    prā́ñco dʰāvanti /
Sentence: 7    prā́ṅ iva hí suvargó lokáḥ /
Sentence: 8    catasŕ̥bʰir ánumantrayate /
Sentence: 9    catvā́ri ccʰándā́m̐si {BS cʰándām̐si} /
Sentence: 10    cʰándobʰir eváinān {AS eváinā} suvargáṃ lokáṃ gamayati //

Verse: 6    {BS 1.3.6.36}
Sentence: 1    prá vā́ etè 'smāl lokā́c cyavante {AS cyavate / cyavante} /
Sentence: 2    yá ājíṃ dʰā́vanti /
Sentence: 3    údañca ā́vartante /
Sentence: 4    asmā́d evá téna lokā́n náyanti /
Sentence: 5    ratʰavimocanī́yaṃ juhoti prátiṣṭhityai /
Sentence: 6    ā́ mā vā́jasya prasavó jagamyād íty āha /
Sentence: 7    ánnaṃ vái vā́jaḥ /
Sentence: 8    ánnam evá_avarundʰe /
Sentence: 9    yatʰālokáṃ vā́ etá újjayanti /
Sentence: 10    yá ājíṃ dʰā́vanti //

Verse: 7    {BS 1.3.6.37}
Sentence: 1    kr̥ṣṇálaṃ_kr̥ṣṇalaṃ vājasŕ̥dbʰyaḥ práyaccʰati /
Sentence: 2    yám evá té vā́jaṃ lokám ujjáyanti /
Sentence: 3    táṃ parikrī́ya_ávarundʰe /
Sentence: 4    ekadʰā́ brahmáṇa úpaharati /
Sentence: 5    ekadʰáivá yájamāne vīryàṃ dadʰāti /
Sentence: 6    devā́ vā́ óṣadʰīṣv ājím ayuḥ /
Sentence: 7    tā́ bŕ̥haspátir údajayat /
Sentence: 8    sá nīvā́rān níravr̥ṇīta /
Sentence: 9    tán nīvā́rāṇāṃ nīvāratvám /
Sentence: 10    naivāráś carúr bʰavati //

Verse: 8    {BS 1.3.6.38}
Sentence: 1    etád vái devā́nāṃ paramám ánnam /
Sentence: 2    yán nīvā́rāḥ /
Sentence: 3    paraméṇaivā́smā annā́dyena_ávaram annā́dyam ávarundʰe /
Sentence: 4    saptádaśaśarāvo bʰavati /
Sentence: 5    saptadaśáḥ prajā́patiḥ /
Sentence: 6    prajā́pater ā́ptyai /
Sentence: 7    kṣīré bʰavati /
Sentence: 8    rúcam evā́smin dadʰāti /
Sentence: 9    sarpíṣvān bʰavati medʰyatvā́ya /
Sentence: 10    bārhaspatyó vā́ eṣá devátayā //

Verse: 9    {BS 1.3.6.39}
Sentence: 1    yó vājapéyena yájate /
Sentence: 2    bārhaspatyá eṣá carúḥ /
Sentence: 3    áśvān sariṣyatáḥ sasrúṣaś ca_ávagʰrāpayati /
Sentence: 4    yám evá té vā́jaṃ lokám ujjáyanti /
Sentence: 5    tám evá_avarundʰe /
Sentence: 6    ájījipata vanaspataya índraṃ vā́jaṃ vímucyadʰvam íti dundubʰī́n vímuñcati /
Sentence: 7    yám evá té vā́jaṃ lokám indriyáṃ dundubʰáya ujjáyanti /
Sentence: 8    tám evá_avarundʰe //

Paragraph: 7 
Verse: 1    {BS 1.3.7.40}
Sentence: 1    tārpyáṃ yájamānaṃ páridʰāpayati /
Sentence: 2    yajñó vái tāpryám /
Sentence: 3    yajñénaiváinam̐ sámardʰayati /
Sentence: 4    darbʰamáyaṃ páridʰāpayati /
Sentence: 5    pavítraṃ vái darbʰā́ḥ /
Sentence: 6    punā́ty eváinam /
Sentence: 7    vā́jaṃ vā́ eṣó 'varurutsate /
Sentence: 8    yó vājapéyena yájate /
Sentence: 9    óṣadʰayaḥ kʰálu vái vā́jaḥ /
Sentence: 10    yád darbʰamáyaṃ paridʰāpáyati //

Verse: 2    {BS 1.3.7.41}
Sentence: 1    vā́jasya_ávaruddʰyai /
Sentence: 2    jā́ya éhi súvo róhāva_íty āha /
Sentence: 3    pátniyā eváiṣá yajñásya_anvārambʰó 'navaccʰityai /
Sentence: 4    saptádaśāratnir yūpo bʰavati /
Sentence: 5    saptadaśáḥ prajā́patiḥ /
Sentence: 6    prajā́pater ā́ptyai /
Sentence: 7    tūparáś cáturaśrir bʰavati /
Sentence: 8    gaudʰūmáṃ caṣā́lam /
Sentence: 9    ná vā́ eté vrīháyo ná yávāḥ /
Sentence: 10    yád godʰūmāḥ //

Verse: 3    {BS 1.3.7.42}
Sentence: 1    evám iva hí prajā́patiḥ sámr̥ddʰyai /
Sentence: 2    átʰo amúm evā́smai lokám ánnavantaṃ karoti /
Sentence: 3    vā́sobʰir veṣṭayati /
Sentence: 4    eṣá vái yájamānaḥ /
Sentence: 5    yád yū́paḥ /
Sentence: 6    sarvadevatyàṃ vā́saḥ /
Sentence: 7    sárvābʰir eváinaṃ devátābʰiḥ sámardʰayati /
Sentence: 8    átʰo ākrámaṇam evá tát sétuṃ yájamānaḥ kurute /
Sentence: 9    suvargásya lokásya sámaṣṭyai /
Sentence: 10    dvā́dáśa vājaprasavī́yāni juhoti //

Verse: 4    {BS 1.3.7.43}
Sentence: 1    dvā́daśa mā́sāḥ saṃvatsaráḥ /
Sentence: 2    saṃvatsarám evá prīṇāti /
Sentence: 3    átʰo saṃvatsarám evā́smā úpadadʰāti /
Sentence: 4    suvargásya lokásya sámaṣṭyai /
Sentence: 5    daśábʰiḥ kálpai rohati /
Sentence: 6    navá {BS náva} vái puruṣe prāṇā́ḥ /
Sentence: 7    nā́bʰir daśamī́ /
Sentence: 8    prāṇā́n evá yatʰāstʰānáṃ kalpayitvā́ /
Sentence: 9    suvargáṃ lokám eti /
Sentence: 10    etā́vad vái púruṣasya svám //

Verse: 5    {BS 1.3.7.44}
Sentence: 1    yā́vat prāṇā́ḥ /
Sentence: 2    yā́vad evā́sya_ásti /
Sentence: 3    téna sahá suvargáṃ lokám eti /
Sentence: 4    súvar devā́m̐ aganma_íty āha /
Sentence: 5    suvargám evá lokám eti /
Sentence: 6    amŕ̥tā abʰūma_íty āha /
Sentence: 7    amŕ̥tam iva hí suvargo lokáḥ /
Sentence: 8    prajā́pateḥ prajā́ abʰuma_íty āha /
Sentence: 9    prājāpatyó vā́ ayáṃ lokáḥ /
Sentence: 10    asmā́d evá téna lokā́n ná_eti //

Verse: 6    {BS 1.3.7.45}
Sentence: 1    sám aháṃ prajáyā sáṃ máyā prajā́_íty āha /
Sentence: 2    āśíṣam eváitā́m ā́śāste /
Sentence: 3    āsapuṭáir gʰnanti /
Sentence: 4    ánnaṃ vā́ iyám /
Sentence: 5    annā́dyenaiváinam̐ sámardʰayanti /
Sentence: 6    ū́ṣair gʰnanti /
Sentence: 7    eté hí sākṣā́d ánnam /
Sentence: 8    yád ū́ṣāḥ /
Sentence: 9    sākṣā́d eváinam annā́dyena sámardʰayanti /
Sentence: 10    purástāt pratyáñcaṃ gʰnanti //

Verse: 7    {BS 1.3.7.46}
Sentence: 1    purástād dʰí pratīcī́nam ánnam adyáte /
Sentence: 2    śīrṣató gʰnanti /
Sentence: 3    śīrṣató hy ánnam adyate /
Sentence: 4    digbʰyó gʰnanti /
Sentence: 5    digbʰyá evā́smā annā́dyam ávarundʰate /
Sentence: 6    īśvaró vā́ eṣá párāṅ pradágʰaḥ /
Sentence: 7    yó yū́pam̐ rohati /
Sentence: 8    híraṇyam adʰy àvarohati /
Sentence: 9    amŕ̥taṃ vái híraṇyam /
Sentence: 10    amŕ̥tam̐ suvargó lokáḥ //
{BS 1.3.7.47}
Sentence: 11    amŕ̥ta evá suvargé loké prátitiṣṭhati /
Sentence: 12    śatámānaṃ bʰavati /
Sentence: 13    śatā́yuḥ púruṣaḥ śaténdriyaḥ /
Sentence: 14    ā́yuṣy evá_indriyé prátitiṣṭhati /
Sentence: 15    púṣṭyai vā́ etád rūpám /
Sentence: 16    yád ajā́ /
Sentence: 17    tríḥ saṃvatsarásyānyā́n paśū́n pári prájāyate /
Sentence: 18    bastājinám adʰy àvarohati /
Sentence: 19    púṣṭyām evá prajánane prátitiṣṭhati //

Paragraph: 8 
Verse: 1    {BS 1.3.8.48}
Sentence: 1    saptā́nnahomā́ñ juhoti /
Sentence: 2    saptá vā́ ánnāni /
Sentence: 3    yā́vanty evá_ánnāni /
Sentence: 4    tā́ny evá_avarundʰe /
Sentence: 5    saptá grāmyā́ óṣadʰayaḥ /
Sentence: 6    saptá_araṇyā́ḥ /
Sentence: 7    ubʰáyīṣām ávaruddʰyai /
Sentence: 8    ánnasya_annasya juhoti /
Sentence: 9    ánnasya_annasya_ávaruddʰyai /
Sentence: 10    yád vājapeyayājy ánavaruddʰasya_aśnīyā́t //

Verse: 2    {BS 1.3.8.49}
Sentence: 1    ávaruddʰena vyr̥̀dʰyeta /
Sentence: 2    sárvasya samavadā́ya juhoti /
Sentence: 3    ánavaruddʰasya_ávaruddʰyai /
Sentence: 4    áudumbareṇa sruvéṇa juhoti /
Sentence: 5    ū́rg vā́ ánnam udumbáraḥ /
Sentence: 6    ūrjá evá_annā́dyasya_ávaruddʰyai /
Sentence: 7    devásya tvā savitúḥ prasava íty āha /
Sentence: 8    savitŕ̥prasūta {AS savitr̥prásava} eváinaṃ bráhmaṇā devátābʰir abʰíṣiñcati /
Sentence: 9    ánnasya_annasya_abʰíṣiñcati {AS ánnasyānnasyā́bʰíṣiñcati} /
Sentence: 10    ánnasya_annasyā́varuddʰyai {AS ánnasyānnasyā́bʰíṣiñcati} //

Verse: 3    {BS 1.3.8.50}
Sentence: 1    purástāt pratyáñcam abʰíṣiñcati /
Sentence: 2    purástād dʰí pratīcī́nam ánnam adyáte /
Sentence: 3    śīrṣatò 'bʰíṣiñcati /
Sentence: 4    śīrṣató hy ánnam adyáte /
Sentence: 5    ā́ múkʰād anv ávasrāvayati /
Sentence: 6    mukʰatá evā́smā annā́dyaṃ dadʰāti /
Sentence: 7    agnés tvā sā́mrājyena_abʰíṣiñcāmi_íty āha /
Sentence: 8    eṣá vā́ agnéḥ saváḥ /
Sentence: 9    ténaiváinam abʰíṣiñcati /
Sentence: 10    indrasya tvā sā́mrājyena_abʰíṣiñcāmi_íty āha //

Verse: 4    {BS 1.3.8.51}
Sentence: 1    indriyám evā́sminn eténa dadʰāti /
Sentence: 2    bŕ̥haspátes tvā sā́mrājyena_abʰíṣiñcāmi_íty āha /
Sentence: 3    bráhma vái devā́nāṃ bŕ̥haspátiḥ /
Sentence: 4    bráhmaṇā_eváinam abʰíṣiñcati /
Sentence: 5    somagrahā́m̐ś ca_avadānīyā́ni ca_r̥tvígbʰya úpa haranti /
Sentence: 6    amúm evá táir lokám ánnavantaṃ karoti /
Sentence: 7    surāgrahā́m̐ś ca_anavadānīyā́ni ca vājasŕ̥dbʰyaḥ /
Sentence: 8    imám evá táir lokám ánnavantaṃ karoti /
Sentence: 9    ábʰo ubʰáyīṣv evá_abʰíṣicyate /
Sentence: 10    vimātʰáṃ kurvate vājasŕ̥taḥ //

Verse: 5    {BS 1.3.8.52}
Sentence: 1    indriyásya_ávaruddʰyai /
Sentence: 2    ániruktābʰiḥ prātaḥsavané stuvate /
Sentence: 3    ániruktaḥ prajā́patiḥ /
Sentence: 4    prajā́pater ā́ptyai /
Sentence: 5    vā́javatībʰir mā́dʰyandine /
Sentence: 6    ánnaṃ vái vā́jaḥ /
Sentence: 7    ánnam evá_avarundʰe /
Sentence: 8    śipiviṣṭávatībʰis tr̥tīyasavané /
Sentence: 9    yajñó vái víṣṇuḥ /
Sentence: 10    paśávaḥ śípiḥ /
Sentence: 11    yajñá evá paśúṣu prátitiṣṭhati /
Sentence: 12    br̥hád ántyaṃ bʰavati /
Sentence: 13    ántam eváinam̐ śriyái gamayati //

Paragraph: 9 
Verse: 1    {BS 1.3.9.53}
Sentence: 1    nr̥ṣádaṃ tvā_íty āha /
Sentence: 2    prajā́ vái nŕ̥̄n /
Sentence: 3    prajā́nām eváiténa sūyate /druṣádam íty āha /
Sentence: 4    vánasapátayo vái drú /
Sentence: 5    vánaspátīnām eváiténa sūyate /
Sentence: 6    bʰuvanasádam {BS bʰúvanasádam} íty āha /
Sentence: 7    yadā́ vái vásīyān bʰávati /
Sentence: 8    bʰúvanam agann íti vái tám āhuḥ /
Sentence: 9    bʰúvanam eváiténa gaccʰati //

Verse: 2    {BS 1.3.9.54}
Sentence: 1    apsuṣádaṃ tvā gʰŕ̥tasádam íty āha /
Sentence: 2    apā́m eváiténa gʰr̥tásya sūyate /
Sentence: 3    vyomasádam íty āha /
Sentence: 4    yadā́ vái vásīyān bʰávati /
Sentence: 5    vyòma_agann íti vái tám āhuḥ /
Sentence: 6    vyòmaiváiténa gaccʰati /
Sentence: 7    pr̥tʰiviṣádaṃ tvā_antarikṣasádam íty āha /
Sentence: 8    eṣā́m eváiténa lokā́nām̐ sūyate /
Sentence: 9    tásmād vājapeyayājī́ ná káṃ caná pratyávarohati /
Sentence: 10    ápi_iva hí devátānām̐ sūyáte //
{BS 1.3.9.55}
Sentence: 11    nākasádam íty āha /
Sentence: 12    yadā́ vái vásīyān bʰávati /
Sentence: 13    nā́kam agann íti váitám āhuḥ /
Sentence: 14    nā́kam eváiténa gaccʰati /
Sentence: 15    yé gráhāḥ pañcajanī́nā íty āha /
Sentence: 16    pañcajanā́nām eváiténa sūyate /
Sentence: 17    apā́m̐ rásam úd vayasam íty āha /
Sentence: 18    apā́m eváiténa rásasya sūyate /
Sentence: 19    sū́ryaraśmim̐ samā́bʰr̥tam íty āha saśukratvā́ya //

Paragraph: 10 
Verse: 1    {BS 1.3.10.56}
Sentence: 1    índro vr̥trám̐ hatvā́ {BS hutvā́} /
Sentence: 2    ásurān párābʰā́vya {BS prābʰā́vya} /
Sentence: 3    sò 'māvāsyā̀ṃ práty ā́gaccʰat /
Sentence: 4    té pitáraḥ pūrvedyúr ā́gaccʰan /
Sentence: 5    pitŕ̥̄n yajñò 'gaccʰat /
Sentence: 6    táṃ devā́ḥ púnar ayācanta /
Sentence: 7    tám ebʰyo ná púnar adaduḥ /
Sentence: 8    tè 'bruvan váraṃ vr̥ṇāmahai /
Sentence: 9    átʰa vaḥ púnar dāsyāmaḥ /
Sentence: 10    asmábʰyam evá pūrvedyúḥ kriyātā íti //

Verse: 2    {BS 1.3.10.57}
Sentence: 1    tám ebʰyaḥ púnar adaduḥ /
Sentence: 2    tásmāt pitŕ̥bʰyaḥ pūrvedyúḥ kriyate /
Sentence: 3    yát pitŕ̥bʰyaḥ pūrvedyúḥ karóti /
Sentence: 4    pitŕ̥bʰya evá tád yajñáṃ niṣkrī́ya yájamānaḥ prátanute /
Sentence: 5    sómāya pitŕ̥pītāya svadʰā́ náma íty āha /
Sentence: 6    pitúr evá_ádʰi somapītʰám ávarundʰe /
Sentence: 7    ná hí pitā pramī́yamāṇa ā́ha_eṣá somapītʰá íti /
Sentence: 8    indriyáṃ vái somapītʰáḥ /
Sentence: 9    indriyám evá somapītʰám ávarundʰe /
Sentence: 10    téna_indriyéṇa dvitī́yāṃ jāyā́m abʰyàśnute //

Verse: 3    {BS 1.3.10.58}
Sentence: 1    etád vái brā́hmaṇaṃ purā́ vājaśravasā́ vidā́m akrann /
Sentence: 2    tásmāt te dvé_dve jāyé abʰyā̀kṣata /
Sentence: 3    yá eváṃ véda /
Sentence: 4    abʰí dvitī́yāṃ jāyā́m aśnute /
Sentence: 5    agnáye kavyavā́hanāya svadʰā́ náma íty āha /
Sentence: 6    yá evá pitr̥̄ṇā́m agníḥ /
Sentence: 7    táṃ prīṇāti /
Sentence: 8    tisrá ā́hutīr juhoti /
Sentence: 9    trír nídadʰāti /
Sentence: 10    ṣáṭ sáṃpadyante //

Verse: 4    {BS 1.3.10.59}
Sentence: 1    ṣáḍ vā́ r̥távaḥ /
Sentence: 2    r̥tū́n evá prīṇāti /
Sentence: 3    tūṣṇī́ṃ mékṣaṇam ā́dadʰāti /
Sentence: 4    ásti vā hí ṣaṣṭhá r̥túr ná vā /
Sentence: 5    devā́n vái pitŕ̥̄n prītā́n /
Sentence: 6    manuṣyā̀ḥ pitáro 'nu prápipate /
Sentence: 7    tisrá ā́hutīr juhoti trír nídadʰāti /
Sentence: 8    ṣáṭ sáṃpadyante /
Sentence: 9    ṣáḍ vā́ r̥távaḥ //

Verse: 5    {BS 1.3.10.60}
Sentence: 1    r̥távaḥ kʰálu vái devā́ḥ pitáraḥ /
Sentence: 2    r̥tū́n evá devā́n pitŕ̥̄n prīṇāti /
Sentence: 3    tā́n prītā́n /
Sentence: 4    manuṣyā̀ḥ pitáro 'nu prapipate /
Sentence: 5    sakr̥dāccʰinnáṃ barhír bʰavati /
Sentence: 6    sakŕ̥d iva hí pitáraḥ /
Sentence: 7    trír nídadʰāti /
Sentence: 8    tr̥tī́ye vā́ itó loké pitáraḥ /
Sentence: 9    tā́n evá prīṇāti /
Sentence: 10    párāṅ ā́vartate //

Verse: 6    {BS 1.3.10.61}
Sentence: 1    hlī́kā hí pitáraḥ /
Sentence: 2    ā́_uṣmáṇo vyāvŕ̥ta úpāste /
Sentence: 3    ūṣmábʰāgā hí pitáraḥ /
Sentence: 4    brahmavādíno vadanti /
Sentence: 5    prā́śyā́3ṃ ná prā́śyā́3m íti /
Sentence: 6    yát prāśnīyā́t /
Sentence: 7    jányam ánnam adyāt /
Sentence: 8    pramā́yukaḥ syāt /
Sentence: 9    yán ná prāśnīyā́t /
Sentence: 10    áhaviḥ syāt {AS áhavisyāt} //

Verse: 7    {BS 1.3.10.62}
Sentence: 1    pitŕ̥bʰya ā́vr̥ścyeta /
Sentence: 2    avagʰréyam evá /
Sentence: 3    tán ná_iva prā́śitaṃ ná_iva_áprāśitam /
Sentence: 4    vīráṃ vā vái pitáraḥ prayánto háranti /
Sentence: 5    vīráṃ vā dadati /
Sentence: 6    daśā́ṃ cʰinatti /
Sentence: 7    háraṇabʰāgā hí pitáraḥ /
Sentence: 8    pitŕ̥̄n evá nirávadayate /
Sentence: 9    úttara ā́yuṣi lóma cʰindīta /
Sentence: 10    pitr̥̄ṇā́m̐ hy etarhi nédīyaḥ //

Verse: 8    {BS 1.3.10.63}
Sentence: 1    námaskaroti /
Sentence: 2    namaskāró hí pitr̥̄ṇā́m /
Sentence: 3    námo váḥ pitaro rásāya /
Sentence: 4    námo váḥ pitaraḥ śúṣmāya /
Sentence: 5    námo vaḥ pitaro jīvā́ya /
Sentence: 6    námo vaḥ pitaraḥ svadʰā́yai /
Sentence: 7    námo vaḥ pitaro manyáve /
Sentence: 8    námo vaḥ pitaro gʰorā́ya /
Sentence: 9    pítaro námo vaḥ /
Sentence: 10    yá etásmin loké stʰá //

Verse: 9    {BS 1.3.10.64}
Sentence: 1    yuṣmā́m̐s té nu /
Sentence: 2    yè 'smín loké /
Sentence: 3    mā́ṃ té 'nu /
Sentence: 4    yá etásmim̐l loké stʰá /
Sentence: 5    yūyáṃ téṣāṃ vásiṣṭhā bʰūyāsta /
Sentence: 6    yè 'smím̐l loké /
Sentence: 7    aháṃ téṣāṃ vásiṣṭho bʰūyāsam íty āha /
Sentence: 8    vásiṣṭhaḥ samānā́nāṃ bʰavati /
Sentence: 9    yá eváṃ vidvā́n pitŕ̥bʰyaḥ karóti /
Sentence: 10    eṣá vái manuṣyā̀ṇāṃ yajñáḥ //

Verse: 10    {BS 1.3.10.65}
Sentence: 1    devā́nāṃ vā́ ítare yajñā́ḥ /
Sentence: 2    téna vā́ etát pitr̥loké carati /
Sentence: 3    yáḥ pitŕ̥bʰyaḥ karóti /
Sentence: 4    sá īśvaráḥ prámetoḥ /
Sentence: 5    prājāpatyáyā_r̥cā́ púnar áiti /
Sentence: 6    yajñó vái prajā́patiḥ /
Sentence: 7    yajñénaivá sahá púnar áiti /
Sentence: 8    ná pramā́yuko bʰavati /
Sentence: 9    pitr̥loké vā́ etád yájamānaś carati /
Sentence: 10    yát pitŕ̥bʰyaḥ karóti /
Sentence: 11    sá īśvará ā́rtim ā́rtoḥ /
Sentence: 12    prajā́patis tvā́ váinaṃ táta únnetum arhati_íty āhuḥ /
Sentence: 13    yát prājāpatyáyā_r̥cā́ {prājāpatyáyarcā́} púnar áiti /
Sentence: 14    prajā́patir eváinaṃ táta únnayati /
Sentence: 15    ná_ā́rtim ā́rccʰati yájamānaḥ //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.