TITUS
Text collection: YVB 
Black Yajur-Veda
Text: TS 
Taittirīya-Saṃhitā


On the basis of the edition by
Albrecht Weber,
Die Taittirîya-Saṃhitâ,
Leipzig: Brockhaus 1871-1872
(Indische Studien, 11-12)
edited by Makoto Fushimi, Ōsaka;
TITUS version by Jost Gippert,
Frankfurt a/M, 31.1.97 / 28.2.1998 / 21.6.1998 / 19.10.1999 / 1.6.2000 / 7.12.2008 / 21.4.2012



Book: 1 
Chapter: 1 
Paragraph: 1 
Verse: 1 
Sentence: 1=a    iṣé tvorjé tvā
Sentence: 2=b    vāyáva stʰopāyáva stʰa
Sentence: 3=c    devó vaḥ savitā́ prā́rpayatu śréṣṭʰatamāya kármaṇe \
Sentence: 4=d    ā́ pyāyadʰvam agʰniyā devabʰāgám ū́rjasvatīḥ páyasvatīḥ prajā́vatīr anamīvā́ ayakṣamā́s \
Sentence: 5=e    mā́ va stená īśata mā́gʰáśaṁsas \
Sentence: 6=f    rudrásya hetíḥ pári vo vr̥ṇaktu
Sentence: 7=g    dʰruvā́ asmín gópatau syāta bahvī́s \
Sentence: 8=h    yájamānasya paśū́n pāhi //

Paragraph: 2 
Verse: 1 
Sentence: 1=a    yajñásya gʰoṣád asi
Sentence: 2=b    prátyuṣṭaṁ rákṣaḥ prátyuṣṭā árātayaḥ
Sentence: 3=c    préyám agād dʰiṣáṇā barhír ácʰa mánunā kr̥tā́ svadʰáyā vítaṣṭā / tá ā́ vahanti kaváyaḥ purástād devébʰyo júṣṭam ihá barhír āsáde //
Sentence: 4=d    devā́nām pariṣūtám asi
Sentence: 5=e    varṣávr̥ddʰam asi
Sentence: 6=f    dévabarhir mā́ tvānváṅ mā́ tiryák
Sentence: 7=g    párva te rādʰyāsam
Sentence: 8=h    ā cʰettā́ te mā́ riṣam \
Sentence: 9=i    dévabarhiḥ śatávalśaṃ ví roha sahásravalśāḥ //

Verse: 2 
Sentence: 1    ví vayáṁ ruhema
Sentence: 2=k    pr̥tʰivyā́ḥ sampŕ̥caḥ pāhi
Sentence: 3=l    susambʰŕ̥tā tvā sám bʰarāmi
Sentence: 4=m    ádityai rā́snāsīndrāṇyái saṃnáhanam
Sentence: 5=n    pūṣā́ te grantʰíṃ gratʰnātu sá te mā́stʰāt \
Sentence: 6=o    índrasya tvā bāhúbʰyām úd yacʰe bŕ̥haspáter mūrdʰnā́ harāmi
Sentence: 7=p    urv àntárikṣam ánv ihi
Sentence: 8=q    devaṃgamám asi //

Paragraph: 3 
Verse: 1 
Sentence: 1=a    śúndʰadʰvaṃ dáivyāya kármaṇe devayajyā́yai
Sentence: 2=b    mātaríśvano gʰarmò 'si
Sentence: 3=c    dyáur asi pr̥tʰivy àsi
Sentence: 4=d    viśvádʰāyā asi paraméṇa dʰā́mnā
Sentence: 5=e    dŕ̥ṁhasva mā́ hvās \
Sentence: 6=f    vásūnāṁ pavítram asi śatádʰāraṃ {F vásūnāṃ pavítram} {W vásūnām} {ASS vásūnāṃ pavítram} {BI vásūnāṃ pavítram} {GOLS vásūnāṃ pavítram} asi sahásradʰāram \
Sentence: 7=g    hutá stokó hutó drapsás \
Sentence: 8=h    agnáye br̥haté nā́kāya / svā́hā dyā́vāpr̥tʰivī́bʰyām \
Sentence: 9=k    sā́ viśvā́yuḥ sā́ viśvávyacāḥ sā́ viśvákarmā
Sentence: 10=l    sám pr̥cyadʰvam r̥tāvarīr ūrmíṇīr mádʰumattamā mandrā́ dʰánasya sātáye
Sentence: 11=m    sómena tvā́ tanacmī́ndrāya dádʰi
Sentence: 12=n    víṣṇo havyáṁ rakṣasva //

Paragraph: 4 
Verse: 1 
Sentence: 1=a    kármaṇe vāṃ devébʰyaḥ śakeyam \
Sentence: 2=b    véṣāya tvā
Sentence: 3=c    prátyuṣṭaṁ rákṣaḥ prátyuṣṭā árātayas \
Sentence: 4=d    dʰū́r asi
Sentence: 5=e    {F dʰū́rva dʰū́rvantaṃ} {W } {ASS dʰū́rva dʰū́rvantaṃ} {BI dʰū́rva dʰū́rvantaṃ} {GOLS dʰū́rva dʰū́rvantaṃ} dʰū́rva táṃ yò 'smā́n dʰū́rvati táṃ dʰūrva yáṃ vayáṃ dʰū́rvāmas
Sentence: 6=f    tváṃ devā́nāṃ asi sásnitamam pápritamaṃ júṣṭatamaṃ váhnitamaṃ devahū́tamam
Sentence: 7=g    áhrutam asi havirdʰā́nam \
Sentence: 8=h    dŕ̥ṁhasva mā́ hvās \
Sentence: 9=i    mitrásya tvā cákṣuṣā prékṣe
Sentence: 10=k    mā́ bʰér mā́ sáṃ viktʰā mā́ tvā //

Verse: 2 
Sentence: 1    hiṁsiṣam
Sentence: 2=l    urú vā́tāya
Sentence: 3=m    devásya tvā savitúḥ prasavè 'śvínor bāhúbʰyām pūṣṇó hástābʰyām agnáye júṣṭaṃ nír vapāmy agnī́ṣómābʰyām
Sentence: 4=n    idáṃ devā́nām idám u naḥ sahá
Sentence: 5=o    spʰātyái tvā nā́rātyai
Sentence: 6=p    súvar abʰí ví kʰyeṣaṃ vaiśvānaráṃ jyótis \
Sentence: 7=q    dŕ̥ṁhantāṃ dúryā dyā́vāpr̥tʰivyós \
Sentence: 8=r    urv àntárikṣam ánv ihi \
Sentence: 9=s    ádityās tvopástʰe sādayāmi \
Sentence: 10=t    ágne havyáṁ rakṣasva //

Paragraph: 5 
Verse: 1 
Sentence: 1=a    devó vaḥ savitót punātv ácʰidreṇa pávitreṇa vásoḥ sū́ryasya raśmíbʰis \
Sentence: 2=b    ā́po devīr agrepuvo agreguvó 'gra imáṃ yajñáṃ nayatā́gre yajñápatiṃ dʰatta
Sentence: 3=c    yuṣmā́n índro 'vr̥ṇīta vr̥tratū́rye yūyám índram avr̥ṇīḍʰvaṃ vr̥tratū́rye
Sentence: 4=d    prókṣitā stʰa \
Sentence: 5=e    agnáye vo júṣṭam prókṣāmy agnī́ṣómābʰyām \
Sentence: 6=f    śúndʰadʰvaṃ dáivyāya kármaṇe devayajyā́yai \
Sentence: 7=g    ávadʰūtaṁ rákṣó 'vadʰūtā árātayás \
Sentence: 8=h    adityās tvág asi práti tvā //

Verse: 2 
Sentence: 1    pr̥tʰivī́ vettu \
Sentence: 2=i    adʰiṣávaṇam asi vānaspatyám práti tvā́dityās tvág vettu \
Sentence: 3=k    agnés tanū́r asi vācó visárjanam
Sentence: 4=l    devávītaye tvā gr̥hṇāmi \
Sentence: 5=m    ádrir asi vānaspatyáḥ
Sentence: 6=n    sá idáṃ devébʰyo havyáṁ suśámi śamiṣva \
Sentence: 7=o    íṣam ā́ vadórjam ā́ vada
Sentence: 8=p    dyumád vadata
Sentence: 9=q    vayáṁ saṃgʰātáṃ jeṣma
Sentence: 10=r    varṣávr̥ddʰam asi
Sentence: 11=s    práti tvā varṣávr̥ddʰaṃ vettu
Sentence: 12=t    párāpūtaṁ rákṣaḥ párāpūtā árātayas \
Sentence: 13=u    rákṣasām bʰāgò 'si
Sentence: 14=v    vāyúr vo ví vinaktu
Sentence: 15=w    devó vaḥ savitā́ híraṇyapāṇiḥ práti gr̥hṇātu //

Paragraph: 6 
Verse: 1 
Sentence: 1=a    ávadʰūtaṁ rákṣó 'vadʰūtā árātayas \
Sentence: 2=b    ádityās tvág asi práti tvā pr̥tʰivī́ vettu
Sentence: 3=c    divá skambʰanír asi práti tvā́dityās tvág vettu
Sentence: 4=d    dʰiṣáṇāsi parvatyā́ práti tvā divá skambʰanír vettu
Sentence: 5=e    dʰiṣáṇāsi pārvateyī́ práti tvā parvatír vettu
Sentence: 6=f    devásya tvā savitúḥ prasavè 'śvínor bāhúbʰyām pūṣṇó hástābʰyām ádʰi vapāmi
Sentence: 7=g    dʰānyàm asi dʰinuhí devā́n
Sentence: 8=h    prāṇā́ya tvāpānā́ya tvā vyānā́ya tvā
Sentence: 9=i    dīrgʰā́m ánu prásitim ā́yuṣe dʰām \
Sentence: 10=k    devó vaḥ savitā́ híraṇyapāṇiḥ práti gr̥hṇātu //

Paragraph: 7 
Verse: 1 
Sentence: 1=a    dʰŕ̥ṣṭir asi bráhma yacʰa \
Sentence: 2=b    ápāgne 'gním āmā́daṃ jahi níṣ kravyā́daṁ sedʰā́ devayájaṃ vaha
Sentence: 3=c    nírdagdʰaṁ rákṣo nírdagdʰā árātayas \
Sentence: 4=d    dʰruvám asi pṛtʰivī́ṃ dr̥ṁhā́yur dr̥ṁha prajā́ṃ dr̥ṁha sajātā́n asmái yájamānāya páry ūha
Sentence: 5=e    dʰartám asy antárikṣaṃ dr̥ṁha prāṇáṃ dr̥ṁhāpāṇáṃ dr̥ṁha sajātā́n asmái yájamānāya páry ūha
Sentence: 6=f    dʰarúṇam asi dívaṃ dr̥ṁha cákṣuḥ //

Verse: 2 
Sentence: 1    dr̥ṁha śrótraṃ dr̥ṁha sajātā́n asmái yájamānāya páry ūha
Sentence: 2=g    dʰármāsi díśo dr̥ṁha yóniṃ dr̥ṁha prajā́ṃ dr̥ṁha sajātā́n asmái yájamānāya páry ūha
Sentence: 3=h    cíta stʰa prajā́m asmái rayíṃ asmái sajātā́n asmái yájamānāya páry ūha
Sentence: 4=i    bʰŕ̥gūṇām áṅgirasāṃ tápasā tapyadʰvam \
Sentence: 5=k    yā́ni gʰarmé kapā́lāny upacinvánti vedʰásaḥ / pūṣṇás tā́ny ápi vratá indravāyū́ ví muñcatām //

Paragraph: 8 
Verse: 1 
Sentence: 1=a    sáṃ vapāmi
Sentence: 2=b    sám ā́po adbʰír agmata sám óṣadʰayo rásena
Sentence: 3=c    sáṁ revátīr jágatībʰir mádʰumatīr mádʰumatībʰiḥ sr̥jyadʰvam
Sentence: 4=d    adbʰyáḥ pári prájātā stʰa sám adbʰíḥ pr̥cyadʰvam \
Sentence: 5=e    jánayatyai tvā sáṃ yaumi \
Sentence: 6=f    agnáye tvāgnī́ṣómābʰyām
Sentence: 7=g    makʰásya śíro 'si
Sentence: 8=h    gʰarmò 'si viśvā́yus \
Sentence: 9=i    urú pratʰasvorú te yajñápatiḥ pratʰatām \
Sentence: 10=k    tvácaṃ gr̥hṇīṣva \
Sentence: 11=l    antáritaṁ rákṣo 'ntáritā árātayas \
Sentence: 12=m    devás tvā savitā́ śrapayatu várṣaiṣṭʰe ádʰi nā́ke \
Sentence: 13=n    agnís te tanúvam mā́ti dʰāk \
Sentence: 14=o    ágne havyáṁ rakṣasva
Sentence: 15=p    sám bráhmaṇā pr̥cyasva \
Sentence: 16=q    ekatā́ya svā́hā dvitā́ya svā́hā tritā́ya svā́hā //

Paragraph: 9 
Verse: 1 
Sentence: 1=a    ā́ dade \
Sentence: 2=b    índrasya bāhúr asi dákṣiṇaḥ sahásrabʰr̥ṣṭiḥ śatátejās \
Sentence: 3=c    vāyúr asi tigmátejāḥ
Sentence: 4=d    pŕ̥tʰivi devayajany óṣadʰyās te mū́lam mā́ hiṁsiṣam
Sentence: 5=e    ápahato 'ráruḥ pr̥tʰivyái
Sentence: 6=f    vrajáṃ gacʰa gostʰā́nam \
Sentence: 7=g    várṣatu te dyáur
Sentence: 8=h    badʰāná deva savitaḥ paramásyām parāváti śaténa pā́śair yò 'smā́n dvéṣṭi yáṃ ca vayáṃ dviṣmás tám áto mā́ mauk \
Sentence: 9=i    ápahato 'ráruḥ pr̥tʰivyái devayájanyai
Sentence: 10=k    vrajám //

Verse: 2 
Sentence: 1    gacʰa gostʰā́nam \
Sentence: 2=l    várṣatu te dyáur
Sentence: 3=m    badʰāná deva savitaḥ paramásyām parāváti śaténa pā́śair yò 'smā́n dvéṣṭi yáṃ ca vayáṃ dviṣmás tám áto mā́ mauk \
Sentence: 4=n    ápahato 'ráruḥ pr̥tʰivyā́ ádevayajanas \
Sentence: 5=o    vrajáṃ gacʰa gostʰā́nam \
Sentence: 6=p    várṣatu te dyáus \
Sentence: 7=q    badʰāna deva savitaḥ paramásyām parāváti śaténa pā́śair yò 'smā́n dvéṣṭi yáṃ ca vayáṃ dviṣmás tám áto mā́ //

Verse: 3 
Sentence: 1    mauk \
Sentence: 2=r    arárus te dívaṃ mā́ skān
Sentence: 3=s    vásavas tvā pári gr̥hṇantu gāyatréṇa cʰándasā rudrā́s tvā pári gr̥hṇantu tráiṣṭubʰena cʰándasādityā́s tvā pári gr̥hṇantu jā́gatena cʰándasā
Sentence: 4=t    devásya savitúḥ savé kárma kr̥ṇvanti vedʰásas \
Sentence: 5=u    r̥tám asy r̥tasádanam asy r̥taśrī́r asi
Sentence: 6=v    dʰā́ asi svadʰā́ asi \
Sentence: 7=w    urvī́ cā́si vásvī cāsi
Sentence: 8=x    purā́ krūrásya visŕ̥po virapśinn udādā́ya pr̥tʰivī́ṃ jīrádānur yā́m áirayañ candrámasi svadʰā́bʰis tā́ṃ dʰī́rāso anudŕ̥śya yajante //

Paragraph: 10 
Verse: 1 
Sentence: 1=a    prátyuṣṭaṁ rákṣaḥ prátyuṣṭā árātayas \
Sentence: 2=b    agnér vas téjiṣṭʰena téjasā níṣ ṭapāmi
Sentence: 3=c    goṣṭʰám mā́ nír mr̥kṣaṃ vājínaṃ tvā sapatnasaháṁ sám mārjmi
Sentence: 4=d    vā́cam prāṇáṃ cákṣuḥ śrótram prajā́ṃ yónim mā́ nír mr̥kṣam vājínīṃ tvā sapatnasāhī́ṁ sám mārjmi \
Sentence: 5=e    āśā́sānā saumanasám prajā́ṁ sáubʰāgyaṃ tanū́m / agnér ánuvratā bʰūtvā́ sáṃ nahye sukr̥tā́ya kám \
Sentence: 6=f    suprajásas tvā vayáṁ supátnīr úpa //

Verse: 2 
Sentence: 1    sedima / ágne sapatnadámbʰanam ádabdʰāso ádābʰyam
Sentence: 2=g    imáṃ ví ṣyāmi váruṇasya pā́śaṃ yám ábadʰnīta savitā́ sukétaḥ / dʰātúś ca yónau sukr̥tásya loké syonám me sahá pátyā karomi
Sentence: 3=h    sám ā́yuṣā sám prajáyā sám agne várcasā púnaḥ / sám pátnī pátyāháṃ gacʰe sam ātmā́ tanúvā máma
Sentence: 4=i    mahīnā́m páyo 'sy óṣadʰīnāṁ rásas tásya té 'kṣīyamāṇasya níḥ //

Verse: 3 
Sentence: 1    vapāmi
Sentence: 2=k    mahīnā́m páyo 'sy óṣadʰīnāṁ rásó 'dabdʰena tvā cákṣuṣā́vekṣe suprajāstvā́ya
Sentence: 3=l    téjo 'si téjo 'nu préhy agnís te téjo mā́ ví nait \
Sentence: 4=m    agnér jihvā́si subʰū́r devā́nām \
Sentence: 5=n    dʰā́mnedʰāmne devébʰyo yájuṣeyajuṣe bʰava
Sentence: 6=o    śukrám asi jyótir asi téjo 'si
Sentence: 7=p    devó vaḥ savitót punātv ácʰidreṇa pavítreṇa vásoḥ sū́ryasya raśmíbʰiḥ
Sentence: 8=q    śukráṃ tvā śukrā́yāṃ dʰā́mnedʰāmne devébʰyo yájuṣeyajuṣe gr̥hṇāmi
Sentence: 9=r    jyótis tvā jyótiṣy arcís tvārcíṣi dʰā́mnedʰāmne devébʰyo yájuṣeyajuṣe gr̥hṇāmi

Paragraph: 11 
Verse: 1 
Sentence: 1=a    kŕ̥ṣṇo 'sy ākʰareṣṭʰò 'gnáye tvā svā́hā
Sentence: 2=b    védir asi barhíṣe tvā svā́hā
Sentence: 3=c    barhír asi srugbʰyás tvā svā́hā
Sentence: 4=d    divé tvāntárikṣāya tvā pr̥tʰivyái tvā
Sentence: 5=e    svadʰā́ pitŕ̥bʰya ū́rg bʰava barhiṣádbʰyas \
Sentence: 6=f    ūrjā́ pr̥tʰivī́ṃ gacʰata
Sentence: 7=g    víṣṇo stū́po 'si \
Sentence: 8=h    ū́rṇāmradasaṃ tvā str̥ṇāmi svāsastʰáṃ devébʰyas \
Sentence: 9=i    gandʰarvò 'si viśvā́vasur víśvasmād ī́ṣato yájamānasya paridʰír iḍá īḍitás \
Sentence: 10=k    índrasya bāhúr asi //

Verse: 2 
Sentence: 1    dákṣiṇo yájamānasya paridʰír iḍá īḍitás \
Sentence: 2=l    mitrā́váruṇau tvottaratáḥ pári dʰattāṃ dʰruvéṇa dʰármaṇā yájamānasya paridʰír iḍá īḍitáḥ
Sentence: 3=m    sū́ryas tvā purástāt pātu kásyāś cid abʰíśastyās \
Sentence: 4=n    vītíhotraṃ tvā kave dyumántaṁ sám idʰīmahy ágne br̥hántam adʰvaré
Sentence: 5=o    viśó yantré stʰas \
Sentence: 6=p    vásūnāṁ rudrā́ṇām ādityā́nāṁ sádasi sīda
Sentence: 7=q    juhū́r upabʰŕ̥d dʰruvā́si gʰr̥tā́cī nā́mnā priyéṇa nā́mnā priyé sádasi sīda \
Sentence: 8=r    etā́ asadant sukr̥tásya loké
Sentence: 9=s    tā́ viṣṇo pāhi
Sentence: 10=t    pāhí yajñám pāhí yajñápatim pāhí mā́ṃ yajñaníyam //

Paragraph: 12 
Verse: 1 
Sentence: 1=a    bʰúvanam asi ví pratʰasva \
Sentence: 2=b    ágne yáṣṭar idáṃ námaḥ /
Sentence: 3=c    júhv éhy agnís tvā hvayati devayajyā́yai \
Sentence: 4=d    úpabʰr̥d éhi devás tvā savitā́ hvayati devayajyā́yai \
Sentence: 5=e    ágnāviṣṇū mā́ vām áva kramiṣam \
Sentence: 6=f    ví jihātʰām mā́ mā sáṃ tāptam \
Sentence: 7=g    lokám me lokakr̥tau kr̥ṇutam \
Sentence: 8=h    víṣṇo stʰā́nam asi \
Sentence: 9=i    itá índro akr̥ṇod vīryā̀ṇi
Sentence: 10=k    samārábʰyordʰvó adʰvaró divispŕ̥śam
Sentence: 11=l    áhruto yajñó yajñápates \
Sentence: 12=m    índrāvānt svā́hā
Sentence: 13=n    br̥hád bʰā́ḥ
Sentence: 14=o    pāhí māgne dúścaritād ā́ mā súcarite bʰaja
Sentence: 15=p    makʰásya śíro 'si sáṃ jyótiṣā jyótir aṅktām //

Paragraph: 13 
Verse: 1 
Sentence: 1=a    vā́jasya mā prasavénodgrābʰéṇód agrabʰīt / átʰā sapátnāṁ índro me nigrābʰéṇā́dʰarāṁ akaḥ //
Sentence: 2=b    udgrābʰáṃ ca nigrābʰáṃ ca bráhma devā́ avīvr̥dʰan / átʰā sapátnān indrāgnī́ me viṣūcī́nān vyàsyatām //
Sentence: 3=c    vásubʰyas tvā rudrébʰyas tvādityébʰyas tvā \
Sentence: 4=d    aktáṁ ríhāṇā viyántu váyaḥ
Sentence: 5=e    prajā́ṃ yónim mā́ nír mr̥kṣam
Sentence: 6=f    ā́ pyāyantām ā́pa óṣadʰayas \
Sentence: 7=g    marútām pŕ̥ṣataya stʰa
Sentence: 8=h    divám //

Verse: 2 
Sentence: 1    gacʰa táto no vŕ̥ṣṭim éraya \
Sentence: 2=i    āyuṣpā́ agne 'sy ā́yur me pāhi
Sentence: 3=k    cakṣuṣpā́ agne 'si cákṣur me pāhi
Sentence: 4=l    dʰruvā́si
Sentence: 5=m    yám paridʰím paryádʰattʰā ágne deva paṇíbʰir vīyámāṇas táṃ ta etám ánu jóṣam bʰarāmi néd eṣá tvád apacetáyātai
Sentence: 6=n    yajñásya pā́tʰa úpa sám itam \
Sentence: 7=o    saṁsrāvábʰāgā stʰeṣā́ br̥hántaḥ prastareṣṭʰā́ barhiṣádaś ca //

Verse: 3 
Sentence: 1    devā́ imā́ṃ vā́cam abʰí víśve gr̥ṇánta āsádyāsmín barhíṣi mādayadʰvam
Sentence: 2=p    agnér vām ápannagr̥hasya sádasi sādayāmi
Sentence: 3=q    sumnā́ya sumninī sumné mā dʰattam \
Sentence: 4=r    dʰurí dʰuryàu pātam
Sentence: 5=s    ágne 'dabdʰāyo 'śītatanopāhí mādyá diváḥ pāhí prásityai pāhí dúriṣṭyai pāhí duradmanyái pāhí dúścaritāt \
Sentence: 6=t    áviṣaṃ naḥ pitúṃ kr̥ṇu suṣádā yóniṁ svā́hā
Sentence: 7=u    dévā gātuvido gātúṃ vittvā́ gātúm ita
Sentence: 8=v    mánasas pata imáṃ no deva devéṣu yajñáṁ svā́hā vācí svā́hā vā́te dʰāḥ //

Paragraph: 14 
Verse: 1 
Sentence: 1=a    ubʰā́ vām indrāgnī āhuvádʰyā ubʰā́ rā́dʰasaḥ sahá mādayádʰyai / ubʰā́ dātā́rāv iṣā́ṁ rayīṇā́m ubʰā́ vā́jasya sātáye huve vām //
Sentence: 2=b    áśravaṁ hí bʰūridā́vattarā vāṃ víjāmātur utá vā gʰā syālā́t / átʰā sómasya práyatī yuvábʰyām índrāgnī stómaṃ janayāmi návyam //
Sentence: 3=c    índrāgnī navatím púro dāsápatnīr adʰūnutam / sākám ékena kármaṇā //
Sentence: 4=d    śúciṃ nú stómaṃ návajātaṃ adyéndrāgnī vr̥trahaṇā juṣétʰām //

Verse: 2 
Sentence: 1    ubʰā́ hí vāṁ suhávā jóhavīmi tā́ vā́jaṁ sadyá uśaté dʰéṣṭʰā //
Sentence: 2=e    vayám u tvā patʰas pate rátʰaṃ ná vā́jasātaye / dʰiyé pūṣann ayujmahi //
Sentence: 3=f    patʰáspatʰaḥ páripatiṃ vacasyā́ kā́mena kr̥tó abʰy ā̀naḍ arkám / sá no rāsac cʰurúdʰaś candrā́grā dʰíyaṃ dʰiyaṁ sīṣadʰāti prá pūṣā́ //
Sentence: 4=g    kṣétrasya pátinā vayáṃ hiténava jayāmasi / gā́m áśvam poṣayitnv ā́ sá naḥ //

Verse: 3 
Sentence: 1    mr̥ḍātīdŕ̥śe //
Sentence: 2=h    kṣétrasya pate mádʰumantam ūrmíṃ dʰenúr iva páyo asmā́su dʰukṣva / madʰuścútaṃ gʰr̥tám iva súpūtam r̥tásya naḥ pátayo mr̥ḍayantu //
Sentence: 3=i    ágne náya supátʰā rāyé asmā́n víśvāni deva váyunāni vidvā́n / yuyodʰy àsmáj juhurāṇám éno bʰū́yiṣṭʰāṃ te námauktiṃ vidʰema //
Sentence: 4=k    ā́ devā́nām ápi pántʰām aganma yác cʰaknávāma tád ánu právoḍʰum / agnír vidvā́nt sá yajāt //

Verse: 4 
Sentence: 1    séd u hótā só adʰvarā́nt sá r̥tū́n kalpayāti //
Sentence: 2=l    yád vā́hiṣṭʰaṃ tád agnáye br̥hád arca vibʰāvaso / máhiṣī́va tvád rayís tvád vā́jā úd īrate //
Sentence: 3=m    ágne tvám pārayā návyo asmā́nt svastíbʰir áti durgā́ṇi víśvā / pū́ś ca pr̥tʰvī́ bahulā́ na urvī́ bʰávā tokā́ya tánayāya śáṃ yóḥ //
Sentence: 4=n    tvám agne vratapā́ asi devá ā́ mártyeṣv ā́ / tváṃ yajñéṣv ī́ḍyaḥ //
Sentence: 5=o    yád vo vayám praminā́ma vratā́ni vidúṣāṃ devā áviduṣṭarāsaḥ / ágniṣ ṭád víśvam ā́ pr̥ṇāti vidvā́n yébʰir devā́ṃ r̥túbʰiḥ kalpáyāti //

Next part


This text is part of the TITUS edition of Black Yajur-Veda: Taittiriya-Samhita.

Copyright TITUS Project, Frankfurt a/M, 9.2.2018. No parts of this document may be republished in any form without prior permission by the copyright holder.