TITUS
White Yajur-Veda: Brhad-Aranyaka-Upanisad
Part No. 2
Previous part

Paragraph: 2    {= ŚBM 10.6.5.1}    {= ŚBK 16.3.2.1-7}
Verse: MK1 
Sentence: a    naìvèhá kíṃ canā́gra āsīn.
   ná~ evá~ ihá kím~ caná~ ágre~ āsīt~

Sentence: b    mr̥tyúnaivèdám ā́vr̥tam āsīd aśanāyáyāśanāyā́ hí mr̥tyús.
   mr̥tyúnā~ evá~ idám ā́vr̥tam āsīt~ aśanāyáyā~ aśanāyā́ hí mr̥tyús

Sentence: c    tán máno 'kurutātmanvī́ syām íti.
   tád~ mánas~ akuruta~ ātmanvī́ syām íti

Sentence: d    só 'rcann acarat.
   sás~ árcan~ acarat

Sentence: e    tásyā́rcata ā́po 'jāyantā́rcate vaí me kám abʰūd íti.
   tásya~ árcatas~ ā́pas~ ajāyanta~ árcate vaí me kám abʰūt~ íti

Sentence: f    tád evā̀rkyàsyārkatváṃ.
   tád evá~ arkyàsya~ arkatvám~

Sentence: g    kám̐ ha vā́ asmai bʰavati,
   kám~ ha vaí~ asmai bʰavati

Sentence: h          yá evám etád arkyàsyārkatváṃ véda.
         yás~ evám etád arkyàsya~ arkatvám~ véda

Verse: MK2 
Sentence: a    ā́po vā́ arkás.
   ā́pas~ vaí~ arkás

Sentence: b    tád yád apā́m̐ śára ā́sīt,
   tád yád apā́m~ śáras~ ā́sīt

Sentence: c          tát sámahanyata,
         tád~ sámahanyata

Sentence: d          sā́ pr̥tʰivy àbʰavat.
         sā́ pr̥tʰivī́~ abʰavat

Sentence: e    tásyām aśrāmyat.
   tásyām aśrāmyat

Sentence: f    tásya śrāntásya taptásya téjo ráso níravartatāgníḥ.
   tásya śrāntásya taptásya téjas~ rásas~ níravartata~ agnís~

Verse: MK3 
Sentence: a    sá tredʰā̀tmā́naṃ vyàkurutādityáṃ tr̥tī́yaṃ,
   sá tredʰā́~ ātmā́nam~ vyàkuruta~ ādityám~ tr̥tī́yam~

Sentence: b          vāyúṃ tr̥tī́yam̐.
         vāyúm~ tr̥tī́yam~

Sentence: c    sá eṣá prāṇás tredʰāvihitás.
   sá eṣá prāṇás tredʰāvihitás

Sentence: d    tásya prā́cī dík śíro 'saú cāsaú cermā́v;
   tásya prā́cī dík śíras~ asaú ca~ asaú ca~ īrmaú~

Sentence: e       átʰāsya pratī́cī dík púccʰam,
      átʰa~ asya pratī́cī dík púccʰam

Sentence: f          asaú cāsaú ca saktʰyaù;
         asaú ca~ asaú ca saktʰyaù

Sentence: g       dákṣiṇā códīcī ca pārśvé,
      dákṣiṇā ca~ údīcī ca pārśvé

Sentence: h          dyaúṣ pr̥ṣṭʰám,
         dyaús~ pr̥ṣṭʰám

Sentence: i          antárikṣam udáram,
         antárikṣam udáram

Sentence: j          iyám úraḥ,
         iyám úras~

Sentence: k          sá eṣò 'psú prátiṣṭʰito.
         sá eṣás~ apsú prátiṣṭʰitas~

Sentence: l    yátra kvà caíti,
   yátra kvà ca~ éti

Sentence: m          tád evá prátitiṣṭʰaty eváṃ vidvā́n.
         tád evá prátitiṣṭʰati~ evám~ vidvā́n

Verse: MK4 
Sentence: a    sò 'kāmayata:
   sás~ akāmayata

Sentence: b       dvitī́yo ma ātmā́ jāyetéti.
      dvitī́yas~ me~ ātmā́ jāyeta~ íti

Sentence: c    sá mánasā vā́caṃ mitʰunám̐ sámabʰavad aśanāyā́ṃ mr̥tyús.
   sá mánasā vā́cam~ mitʰunám~ sámabʰavat~ aśanāyā́m~ mr̥tyús

Sentence: d    tád yád réta ā́sīt,
   tád yád rétas~ ā́sīt

Sentence: e          sá saṃvatsarò 'bʰavan.
         sá saṃvatsarás~ abʰavat~

Sentence: f    ná ha purā́ tátaḥ saṃvatsará āsa.
   ná ha purā́ tátas~ saṃvatsarás~ āsa

Sentence: g    tám etā́vantaṃ kālám abibʰar yā́vānt saṃvatsarás.
   tám etā́vantam~ kālám abibʰar yā́vān~ saṃvatsarás

Sentence: h    tám etā́vataḥ kālásya parástād asr̥jata.
   tám etā́vatas~ kālásya parástād asr̥jata

Sentence: i    táṃ jātám abʰivyā́dadāt;
   tám~ jātám abʰivyā́dadāt

Sentence: j       sá bʰā́ṇ akarot,
      sá bʰā́ṇ akarot

Sentence: k          saìvá vā́g abʰavat.
         sā́~ evá vā́g abʰavat

Verse: MK5 
Sentence: a    sá aikṣata:
   sás~ aikṣata

Sentence: b       yádi vā́ imám abʰimam̐syé,
      yádi vaí~ imám abʰimam̐syé

Sentence: c          kánīyó 'nnaṃ kariṣya íti.
         kánīyas~ ánnam~ kariṣye~ íti

Sentence: d    sá táyā vācā́ ténātmánedám̐ sárvam asr̥jata,
   sá táyā vācā́ téna~ ātmánā~ idám~ sárvam asr̥jata

Sentence: e          yád idáṃ kíñcárco yájūm̐ṣi sā́māni cʰándām̐si yajñā́n prajā́ṃ paśū́nt.
         yád idám~ kíñca~ ŕ̥cas~ yájūm̐ṣi sā́māni cʰándām̐si yajñā́n prajā́m~ paśū́n~

Sentence: f    sá yád-yad evā́sr̥jata,
   sá yád-yad evá~ ásr̥jata

Sentence: g          tát-tad áttum adʰriyata.
         tát-tad áttum adʰriyata

Sentence: h    sárvaṃ vā́ attī́ti,
   sárvam~ vaí~ atti~ íti

Sentence: i          tád áditer adititvám̐.
         tád ádites~ adititvám~

Sentence: j    sárvasyāttā́ bʰavati,
   sárvasya~ attā́ bʰavati

Sentence: k          sárvam asyā́nnaṃ bʰavati,
         sárvam asya~ ánnam~ bʰavati

Sentence: l          yá evám etád áditer adititváṃ véda.
         yás~ evám etád ádites~ adititvám~ véda

Verse: MK6 
Sentence: a    sò 'kāmayata:
   sás~ akāmayata

Sentence: b       bʰū́yasā yajñéna bʰū́yo yajeyéti.
      bʰū́yasā yajñéna bʰū́yas~ yajeya~ íti

Sentence: c    sò 'śrāmyat,
   sás~ aśrāmyat

Sentence: d          sá tápo 'tapyata.
         sá tápas~ atapyata

Sentence: e    tásya śrāntásya taptásya yáśo vīryàm údakrāmat.
   tásya śrāntásya taptásya yáśas~ vīryàm údakrāmat

Sentence: f    prāṇā́ vaí yáśo vīryàṃ.
   prāṇā́s~ vaí yáśas~ vīryàm~

Sentence: g    tát prāṇéṣū́tkrānteṣu śárīram̐ śváyitum adʰriyata;
   tád~ prāṇéṣu~ útkrānteṣu śárīram~ śváyitum adʰriyata

Sentence: h       tásya śárīra evá mána āsīt.
      tásya śárīre~ evá mánas~ āsīt

Verse: MK7 
Sentence: a    sò 'kāmayata:
   sás~ akāmayata

Sentence: b       médʰyaṃ ma idám̐ syād,
      médʰyam~ me~ idám~ syāt~

Sentence: c          ātmanvy ànéna syām íti.
         ātmanvī́~ anéna syām íti

Sentence: d    tátó 'śvaḥ sámabʰavad.
   tátas~ áśvas~ sámabʰavat~

Sentence: e    yád áśvat,
   yád áśvat

Sentence: f          tán médʰyam abʰūd íti.
         tád~ médʰyam abʰūt~ íti

Sentence: g    tád evā̀śvamedʰásyāśvamedʰatvám.
   tád evá~ aśvamedʰásya~ aśvamedʰatvám

Sentence: h    eṣá ha vā́ aśvamedʰáṃ veda,
   eṣá ha vaí~ aśvamedʰám~ veda

Sentence: i          yá enam eváṃ véda.
         yás~ enam evám~ véda

Verse: M8/K7 
Sentence: a    tám ánavarudʰyevāmanyata.
   tám ánavarudʰya~ iva~ amanyata

Sentence: b    tám̐ saṃvatsarásya parástād ātmána ā́labʰata,
   tám~ saṃvatsarásya parástād ātmáne~ ā́labʰata

Sentence: c          paśū́n devátābʰyaḥ prátyauhat.
         paśū́n devátābʰyas~ prátyauhat

Sentence: d    tásmāt sarvadevatyàṃ prókṣitaṃ prājāpatyám ā́labʰanta.
   tásmād~ sarvadevatyàm~ prókṣitam~ prājāpatyám ā́labʰante~

Sentence: e    eṣá vā́ aśvamedʰó yá eṣá tápati;
   eṣá vaí~ aśvamedʰás~ yás~ eṣá tápati

Sentence: f       tásya saṃvatsará ātmā̀yám agnír arkás,
      tásya saṃvatsarás~ ātmā́~ ayám agnís~ arkás

Sentence: g          tásyemé lokā́ ātmā́nas.
         tásya~ imé lokā́s~ ātmā́nas

Sentence: h    tā́v etā́v arkāśvamedʰaú,
   taú~ etaú~ arkāśvamedʰaú

Sentence: i          sò púnar ékaivá devátā bʰavati,
         sá púnar ékā~ evá devátā bʰavati

Sentence: j          mr̥tyúr evā́pa punarmr̥tyúṃ jayati,
         mr̥tyús~ evá~ ápa punarmr̥tyúm~ jayati

Sentence: k          naìnaṃ mr̥tyúr āpnoti,
         ná~ enam~ mr̥tyús~ āpnoti

Sentence: l          mr̥tyúr asyātmā́ bʰavaty,
         mr̥tyús~ asya~ ātmā́ bʰavati

Sentence: m          sárvam ā́yur ety,
         sárvam ā́yus~ eti~

Sentence: n          etā́sāṃ devátānām éko bʰavati,
         etā́sām~ devátānām ékas~ bʰavati

Sentence: o          yá eváṃ véda.
         yás~ evám~ véda

Next part


This text is part of the TITUS edition of White Yajur-Veda: Brhad-Aranyaka-Upanisad.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.