TITUS
Avestan Corpus
Part No. 2
Previous part

Chapter: 1 
zōt̰. u. rāspī.
Paragraph: 1 
Verse: a    niuuaēδaiiemi. haṇkāraiiemi.
Verse: b       daϑuṣ̌ō. ahurahe. mazdā̊. raēuuatō. xvarənaŋuhatō.1
Verse: c          mazištaheca. vahištaheca. sraēštaheca. xraoždištaheca. xraϑβištaheca.
Verse: d          hukərəptəmaheca.
Verse: e          aṣ̌āt̰. apanōtəmaheca.
Verse: f          huδāmanō.2
Verse: g          vouru.rafnaŋhō.
Verse: h          yō. nō. daδa.
Verse: i          yō. tataṣ̌a.
Verse: j          yō. tuϑruiie.3
Verse: k          yō. mainiiuš.4 spəṇtōtəmō.::

Paragraph: 2 
Verse: a    niuuaēδaiiemi. haṇkāraiiemi.
Verse: b       vaŋhauue. manaŋhe.
Verse: c       aṣ̌āi. vahištāi.
Verse: d       xṣ̌aϑrāi. vairiiāi.
Verse: e       spəṇtaiiāi. ārmatə̄e.1
Verse: f       hauruuat̰biia. amərətat̰biia.
Verse: g       gə̄uš. taṣ̌ne.
Verse: h       gə̄uš. urune.
Verse: i       āϑre. ahurahe. mazdā̊.
Verse: j       yaētuštəmāi. aməṣ̌anąm. spəṇtanąm.2::

Paragraph: 3 
Verse: a    niuuaēδaiiemi. haṇkāraiiemi.
Verse: b       1asniiaēibiiō. aṣ̌ahe. ratubiiō::
Verse: c       2hāuuanə̄e. aṣ̌aone. aṣ̌ahe. raϑβe::
Verse: d    niuuaēδaiiemi. haṇkāraiiemi.
Verse: e       sāuuaŋhə̄e. vīsiiāica.3 aṣ̌aone. aṣ̌ahe. raϑβe::
Verse: f    niuuaēδaiiemi. haṇkāraiiemi.
Verse: g       miϑrahe. vouru.gaoiiaotōiš.4
Verse: h          hazaŋrō.gaoṣ̌ahe.5 baēuuarə.caṣ̌manō.
Verse: i          aoxtō.nāmanō. yazatahe.
Verse: j       rāmanō.6 xvāstrahe.::

Paragraph: 4 
Verse: a    niuuaēδaiiemi. haṇkāraiiemi.
Verse: b       rapiϑβināi.1 aṣ̌aone. aṣ̌ahe. raϑβe::
Verse: c    niuuaēδaiiemi. haṇkāraiiemi.
Verse: d       frādat̰.fṣ̌auue.2 zaṇtumāica. aṣ̌aone. aṣ̌ahe. raϑβe::
Verse: e    niuuaēδaiiemi. haṇkāraiiemi.
Verse: f       aṣ̌ahe. vahištahe.
Verse: g       āϑrasca.3 ahurahe. mazdā̊.4::

Paragraph: 5 
Verse: a    niuuaēδaiiemi. haṇkāraiiemi.
Verse: b       uzaiieirināi.1 aṣ̌aone. aṣ̌ahe. raϑβe::
Verse: c    niuuaēδaiiemi. haṇkāraiiemi.
Verse: d       frādat̰.vīrāi. dāx́iiumāica.2 aṣ̌aone. aṣ̌ahe. raϑβe::
Verse: e    niuuaēδaiiemi. haṇkāraiiemi.
Verse: f       bərəzatō. ahurahe. nafəδrō. apąm.
Verse: g       apasca. mazdaδātaiiā̊.::

Paragraph: 6 
Verse: a    niuuaēδaiiemi. haṇkāraiiemi.
Verse: b       aiβisrūϑrimāi.1 aibigaiiāi.2 aṣ̌aone. aṣ̌ahe. raϑβe::
Verse: c    niuuaēδaiiemi. haṇkāraiiemi.
Verse: d       frādat̰.vīspąm.hujiiātə̄e.3 zaraϑuštrōtəmāica. aṣ̌aone. aṣ̌ahe. raϑβe::
Verse: e    niuuaēδaiiemi. haṇkāraiiemi.
Verse: f       aṣ̌āunąm.4 frauuaṣ̌inąm.
Verse: g       γənąnąmca.5 vīrō.vąϑβanąm.
Verse: h       yāiriiaiiā̊sca.6 huṣ̌itōiš::7
Verse: i       amaheca. hutāštahe. huraoδahe.
Verse: j       vərəϑraγnaheca.8 ahuraδātahe.
Verse: k       vanaiṇtiiā̊sca.9 uparatātō.10::

Paragraph: 7 
Verse: a    niuuaēδaiiemi. haṇkāraiiemi.
Verse: b       uṣ̌ahināi.1 aṣ̌aone. aṣ̌ahe. raϑβe::
Verse: c    niuuaēδaiiemi. haṇkāraiiemi.
Verse: d       bərəjiiāi.2 nmāniiāica. aṣ̌aone. aṣ̌ahe. raϑβe::
Verse: e    niuuaēδaiiemi. haṇkāraiiemi.
Verse: f       sraoṣ̌ahe. aš́iiehe. aṣ̌iuuatō.3 vərəϑrājanō. frādat̰.gaēϑahe::
Verse: g       raṣ̌naoš.4 razištahe.
Verse: h       arštātasca.5 frādat̰.gaēϑaiiā̊. varədat̰.gaēϑaiiā̊.6::

Paragraph: 8 
Verse: a    niuuaēδaiiemi. haṇkāraiiemi.
Verse: b       1māhiiaēibiiō. aṣ̌ahe. ratubiiō::
Verse: c       aṇtarəmā̊ŋhāi.2 aṣ̌aone. aṣ̌ahe. raϑβe::
Verse: d    niuuaēδaiiemi. haṇkāraiiemi.
Verse: e       pərənō.mā̊ŋhāi. vīṣ̌aptaϑāica.3 aṣ̌aone. aṣ̌ahe. raϑβe.::

Paragraph: 9 
Verse: a    niuuaēδaiiemi. haṇkāraiiemi.
Verse: b       1yāiriiaēibiiō. aṣ̌ahe. ratubiiō::
Verse: c       maiδiiōizarəmaiiāi.2 aṣ̌aone. aṣ̌ahe. raϑβe::
Verse: d    niuuaēδaiiemi. haṇkāraiiemi.
Verse: e       maiδiiōiṣ̌əmāi.3 aṣ̌aone. aṣ̌ahe. raϑβe::
Verse: f    niuuaēδaiiemi. haṇkāraiiemi.
Verse: g       paitišhahiiāi.4 aṣ̌aone. aṣ̌ahe. raϑβe::
Verse: h    niuuaēδaiiemi. haṇkāraiiemi.
Verse: i       aiiāϑrimāi.5 fraouruuaēštrimāi.6 varṣ̌niharštāica. aṣ̌aone. aṣ̌ahe. raϑβe::
Verse: j    niuuaēδaiiemi. haṇkāraiiemi.
Verse: k       maiδiiāiriiāi.7 aṣ̌aone. aṣ̌ahe. raϑβe::
Verse: l    niuuaēδaiiemi. haṇkāraiiemi.
Verse: m       hamaspaϑmaēdaiiāi.8 aṣ̌aone. aṣ̌ahe. raϑβe::
Verse: n    niuuaēδaiiemi. haṇkāraiiemi.
Verse: o       sarəδaēibiiō. aṣ̌ahe. ratubiiō.::

Paragraph: 10 
Verse: a    niuuaēδaiiemi. haṇkāraiiemi.
Verse: b       vīspaēibiiō. aēibiiō.1 ratubiiō.
Verse: c          yōi. həṇti. aṣ̌ahe. ratauuō.
Verse: d             ϑraiiasca.2 ϑrisąsca. nazdišta. pairišhāuuanaiiō.3
Verse: e          yōi. həṇti. aṣ̌ahe. yat̰. vahištahe.
Verse: f             mazdō.frasāsta.4 zaraϑuštrō.fraoxta.5::

Paragraph: 11 
Verse: a    niuuaēδaiiemi. haṇkāraiiemi.
Verse: b       1ahuraēibiia. miϑraēibiia. bərəzaṇbiia.2 aiϑiiajaŋhaēibiia.3 aṣ̌auuanaēibiia.
Verse: c       stārąmca.4 spəṇtō.mainiiauuanąm.5 dāmanąm.
Verse: d       tištriieheca. stārō. raēuuatō. xvarənaŋuhatō.6
Verse: e       mā̊ŋhaheca.7 gaociϑrahe.
Verse: f       huuarəca. xṣ̌aētahe. auruuat̰.aspahe. dōiϑrahe. ahurahe. mazdā̊.
Verse: g       miϑrahe. dax́iiunąm. daiŋ́hupatōiš::8
Verse: h    9niuuaēδaiiemi. haṇkāraiiemi.
Verse: i       (rōz.) ahurahe. mazdā̊. raēuuatō. xvarənaŋuhatō::10
Verse: j    niuuaēδaiiemi. haṇkāraiiemi.
Verse: k       (māh.) aṣ̌āunąm.11 frauuaṣ̌inąm.::

Paragraph: 12 
Verse: a    niuuaēδaiiemi. haṇkāraiiemi.
Verse: b       tauua. āϑrō.1 ahurahe. mazdā̊. puϑra.2 mat̰. vīspaēibiiō. ātərəbiiō::3
Verse: c    niuuaēδaiiemi. haṇkāraiiemi.
Verse: d       aiβiiō. vaŋuhibiiō.4
Verse: e       vīspanąmca. apąm. mazdaδātanąm.
Verse: f       vīspanąmca. uruuaranąm. mazdaδātanąm.::

Paragraph: 13 
Verse: a    niuuaēδaiiemi. haṇkāraiiemi.
Verse: b       1mąϑrahe. spəṇtahe. aṣ̌aonō. vərəziiaŋuhahe.2
Verse: c       dātahe. vīdaēuuahe.
Verse: d       dātahe. zaraϑuštrōiš.
Verse: e       darəγaiiā̊. upaiianaiiā̊.3
Verse: f       daēnaiiā̊. vaŋhuiiā̊. māzdaiiasnōiš.::

Paragraph: 14 
Verse: a    niuuaēδaiiemi. haṇkāraiiemi.
Verse: b       garōiš. uṣ̌idarənahe.1 mazdaδātahe. aṣ̌axvāϑrahe.
Verse: c       vīspaēṣ̌ąmca. gairinąm.2 aṣ̌axvāϑranąm. pouru.xvāϑranąm.3 mazdaδātanąm.
Verse: d       kāuuaiieheca. xvarənaŋhō. mazdaδātahe.
Verse: e       axvarətaheca.4 xvarənaŋhō. mazdaδātahe::
Verse: f    niuuaēδaiiemi. haṇkāraiiemi.
Verse: g       aṣ̌ōiš. vaŋhuiiā̊.5
Verse: h       cistōiš.6 vaŋhuiiā̊.5
Verse: i       ərəϑə̄.7 vaŋhuiiā̊.5
Verse: j       ^rasąstātō. vaŋhuiiā̊.5
Verse: k       xvarənaŋhō. sauuaŋhō. mazdaδātahe.::

Paragraph: 15 
Verse: a    niuuaēδaiiemi. haṇkāraiiemi.
Verse: b       dahmaiiā̊. vaŋhuiiā̊. āfritōiš.1
Verse: c       dahmaheca. narš. aṣ̌aonō.
Verse: d       uγraheca. taxmahe. dāmōiš. upamanahe.2 yazatahe.::

Paragraph: 16 
Verse: a    niuuaēδaiiemi. haṇkāraiiemi.
Verse: b       1ā̊ŋhąm. asaŋhąmca.2 ṣ̌ōiϑranąmca. gaoiiaoitinąmca.3 maēϑananąmca.4 auuō.xvarənanąmca.5
Verse: c       apąmca. zəmąmca. uruuaranąmca.
Verse: d       aiŋ́hā̊sca.6 zəmō.
Verse: e       auuaiŋ́heca.7 aṣ̌nō.8
Verse: f       vātaheca.9 aṣ̌aonō.
Verse: g       strąm.10 mā̊ŋhō. hūrō. anaγranąm. raocaŋhąm. xvaδātanąm.
Verse: h       vīspanąmca. spəṇtahe. mainiiə̄uš.11 dāmanąm.
Verse: i          aṣ̌aonąm. aṣ̌aoninąmca.
Verse: j       aṣ̌ahe. raϑβąm.::

Paragraph: 17 
Verse: a    niuuaēδaiiemi. haṇkāraiiemi.
Verse: b       raϑβō. bərəzatō. yō. aṣ̌ahe::
Verse: c       raϑβąm. aiiaranąmca. asniianąmca. māhiianąmca. yāiriianąmca. sarəδanąmca.
Verse: d          yōi. həṇti. aṣ̌ahe. ratauuō::
Verse: e       hāuuanōiš. raϑβō.1::

Paragraph: 18 
Verse: a    niuuaēδaiiemi. haṇkāraiiemi.
Verse: b       1aṣ̌āunąm.2 frauuaṣ̌inąm. uγranąm. aiβiϑūranąm.
Verse: c       paoiriiō.t̰kaēṣ̌anąm. frauuaṣ̌inąm.
Verse: d       nabānazdištanąm. frauuaṣ̌inąm.
Verse: e       hauuahe. urunō. frauuaṣ̌ə̄e.::

Paragraph: 19 
Verse: a    niuuaēδaiiemi. haṇkāraiiemi.
Verse: b       vīspaēibiiō. aṣ̌ahe. ratubiiō::
Verse: c    niuuaēδaiiemi. haṇkāraiiemi.
Verse: d       vīspaēibiiō. vaŋhuδābiiō.1 yazataēibiiō.
Verse: e       mainiiaoibiiascā.2 gaēϑiiaēibiiascā.3
Verse: f          yōi. həṇti. yasniiāca.4 vahmiiāca.5 aṣ̌āt̰. haca. yat̰. vahištāt̰::

Paragraph: 20 
Verse: a    hauuane.1 aṣ̌āum. aṣ̌ahe. ratuuō.2
Verse: b    sauuaŋhe.3 aṣ̌āum. aṣ̌ahe. ratuuō.
Verse: c    rapiϑβina.4 aṣ̌āum. aṣ̌ahe. ratuuō.
Verse: d    uzaiieirina.5 aṣ̌āum. aṣ̌ahe. ratuuō.
Verse: e    aiβisrūϑrima.6 aibigaiia. aṣ̌āum. aṣ̌ahe. ratuuō.
Verse: f    uṣ̌ahina.7 aṣ̌āum. aṣ̌ahe. ratuuō::8

Paragraph: 21 
Verse: a       yezi. ϑβā. diduuaēṣ̌a.
Verse: b          yezi. manaŋha.1
Verse: c          yezi. vacaŋha.
Verse: d          yezi. š́iiaoϑna.2
Verse: e          yezi. zaoṣ̌a.
Verse: f          yezi. azaoṣ̌a::
Verse: g    ā. tē. aiŋ́he.3
Verse: h    fraca. stuiiē.
Verse: i    nī. tē. vaēδaiiemi.
Verse: j       yezi. tē. aiŋ́he.4 auuā.urūraoδa.5
Verse: k          yat̰. yasnaheca. vahmaheca.::

Paragraph: 22 
Verse: a    ratauuō. vīspe. mazišta. aṣ̌āum.1 aṣ̌ahe. ratauuō.
Verse: b       yezi. vō. diduuaēṣ̌a.
Verse: c          yezi. manaŋha.
Verse: d          yezi. vacaŋha.
Verse: e          yezi. š́iiaoϑna.2
Verse: f          yezi. zaoṣ̌a.
Verse: g          yezi. azaoṣ̌a::
Verse: h    ā. vō. aiŋ́he.3
Verse: i    fraca. stuiiē.
Verse: j    nī. vō. vaēδaiiemi.
Verse: k       yezi. vō. aiŋ́he.4 auuā.urūraoδa.5
Verse: l          yat̰. yasnaheca.6 vahmaheca.::

Paragraph: 23  {= Y. 27,12}
zōt̰. u. rāspī.::
Verse: Q1a    1frauuarāne. mazdaiiasnō. zaraϑuštriš. vīdaēuuō.2 ahura.t̰kaēṣ̌ō.3
Verse: Q1b       4hāuuanə̄e. aṣ̌aone. aṣ̌ahe. raϑβe.
Verse: Q1c          yasnāica. vahmāica. xṣ̌naoϑrāica. frasastaiiaēca::
Verse: Q1e       sāuuaŋhə̄e. vīsiiāica.4 aṣ̌aone. aṣ̌ahe. raϑβe.
Verse: Q1f          yasnāica. vahmāica. xṣ̌naoϑrāica. frasastaiiaēca::
Verse: Q1g       raϑβąm. aiiaranąmca. asniianąmca. māhiianąmca. yāiriianąmca. sarəδanąmca.
Verse: Q1h          yasnāica. vahmāica. xṣ̌naoϑrāica. (rāspī) frasastaiiaēca.::::


Next part


This text is part of the TITUS edition of Avestan Corpus.

Copyright TITUS Project, Frankfurt a/M, 10.9.2023. No parts of this document may be republished in any form without prior permission by the copyright holder.