Chapter: 0
Sentence: 0 pad nām ud nērōg ud ayārīh ī dādār ohrmazd ī rāyōmand ī xwarrahōmand. tan-drustīh ud dagr-zīwišnīh ī harw wehān ud frārōn-kunišnān, nāmčištīg ōy kē rāy nibēsīhēd.
Chapter: i
Sentence: 1 pad kārnāmag ī ardaxšīr ī pābagān ēdōn nibišt ēstād kū pas az marg ī alaksandar ī hrōmāyīg ērānšahr 240 kadag-xwadāy būd.
Sentence: 2 spahān ud pārs ud kustīhā ī awiš nazdīktar pad dast ī ardawān sālār būd.
Sentence: 3 pābag marzobān ud šahryār ī pārs būd ud az gumārdagān ī ardawān būd.
Sentence: 4 *ud pad staxr nišast.
Sentence: 5 ud pābag rāy ēč frazand ī nām-burdār nē būd.
Sentence: 6 ud sāsān šubān ī pābag būd ud hamwār abāg gōspandān būd ud az tōhmag ī dārā ī dārāyān būd ud andar dušxwadāyīh ī alaksandar *niyāgān ō wirēg ud nihān-rawišnīh ēstād ud abāg kurdān šubānān raft.
Sentence: 7 pābag nē dānist kū sāsān az tōhmag ī dārā ī dārāyān zād ēstēd.
Sentence: 8 pābag šab-ēw pad xwamn dīd čiyōn ka xwaršēd az sar ī sāsān bē tāft ud hamāg gēhān rōšn kard.
Sentence: 9 any šab ēdōn dīd čiyōn ka sāsān pad pīl-ēw ī ārāstag ī spēd nišast ēstād ud harw kē andar kišwar pērāmōn ī sāsān ēstēnd ud namāz awiš barēnd ud stāyišn ud āfrīn hamē kunēnd.
Sentence: 10 ān ī sidīgar šab hamgōnag ēdōn dīd čiyōn ka ādur farrōbāy ud gušnasp ud burzēn-mihr pad xānag ī sāsān hamē waxšēnd ud rōšnīh ō hamāg gēhān hamē dahēnd.
Sentence: 11 pābag ka-š pad ān ēwēnag dīd abd sahist,
Sentence: 12 u-š dānāgān ud xwamn-wizārān ō pēš xwāst ud ān ī harw 3 šab xwamn čiyōn dīd ēstād pēš awēšān guft.
Sentence: 13 xwamn-wizārān guft kū ān kē ēn xwamn padiš dīd --- ōy ayāb az frazandān ī ān mard kas-ēw ō pādixšāyīh ī gēhān rasēd, čē xwaršēd ud pīl ī spēd ī ārāstag čērīh ud tuwānīgīh ud pērōzīh, ud ādur farrōbay dēn-dānāgān ud mow-mardān, ud ādur gušnasp artēštārān ud spāhbedān, ud ādur burzēn-mihr wāstaryōšān ud warz-kardārān ī gēhān ud hāmōyēn ēn pādixšāyīh ō ān mard ayāb frazandān ī ān mard rasēd.
Sentence: 14 pābag ka-š ān saxwan ašnūd kas frēstād ud sāsān ō pēš xwāst ud pursīd kū tō az kadām tōhmag ud dūdag hēh? az pidarān ud niyāgān ī tō kas būd kē pādixšāyīh ud sālārīh kard?
Sentence: 15 sāsān az pābag pašt ud zēnhār xwāst kū-m wizand ud zyān mā kun.
Sentence: 16 pābag padīrift ud sāsān rāz ī xwēš čiyōn būd pēš pābag guft.
Sentence: 17 pābag šād būd ud framūd kū tan pad ābzan kun.
Sentence: 18 ud pābag framūd kū tā dast-ēw ǰāmag, paymōzan ī xwadāywār, awiš āwurd hēnd ud ō sāsān dād hēnd kū paymōz. ud sāsān hamgōnag kard.
Sentence: 19 ud pābag sāsān rāy framūd kū tā čand rōz-ēw pad xwarišn ud dārišn ī nēk ud sazāgwār parward.
Sentence: 20 u-š pas duxt ī xwēš pad zanīh dād.
Chapter: ii
Sentence: 1 ud ǰahišn ud abāyēd-būdan rāy andar zamān ān kanīzag ābestan būd ud ardaxšīr aziš zād.
Sentence: 2 pābag ka-š tan-bahr ud čābukīh ī ardašīr be dīd dānist kū ān xwamn ī-m dīd rāst būd,
Sentence: 3 u-š ardaxšīr pad frazandīh padīrift ud grāmīg dāšt ud parward.
Sentence: 4 ud ka ō dād ud hangām ī frahang rasīd pad dibīrīh ud aswārīh ud abārīg frahang ēdōn frahixt kū andar pārs nāmīg būd.
Sentence: 5 ka ardaxšīr ō dād ī pānzdah-sālag rasīd āgāhīh ō ardawān mad kū pābag rāy pus-ēw ast ī pad frahang ud aswārīh frahixtag ud abāyišnīg,
Sentence: 6 u-š nāmag ō pābag kard kū amā ēdōn ašnūd kū ašmā rāy pus-ēw ast ī abāyišnīg ud pad frahang ud aswārīh abēr frahixtag,
Sentence: 7 u-mān kāmag kū ōy ō dar ī amā frēstēh ud nazdīk ī amā āyēd tā abāg frazandān ud wāspuhragān bawēd u-š pad frahang ī-š ast bar ud pādāšn framāyēm.
Sentence: 8 pābag az ān čiyōn ardawān meh ud kāmgārdar būd ǰuttar kardan ud ān framān bē spōxtan nē šāyist,
Sentence: 9 u-š andar zamān ardaxšīr ārāstag abāg dah bandag ud was tis ī abd-sahist ud sazāgwār ō pēš ardawān frēstīd.
Sentence: 10 ud ardawān ka-š ardaxšīr dīd šād būd ud grāmīg kard,
Sentence: 11 ud framūd kū harw rōz abāg frazandān ud wāspuhragān ī xwēš ō naxčīr ud čawgān šawēd, ud ardaxšīr hamgōnag kard.
Sentence: 12 pad yazadān ayārīh pad čawgān ud aswārīh, čatrang ud nēw-ardaxšīr ud abārīg frahang az awēšān hāmōyēn čēr ud nibardag būd.
Sentence: 13 rōz-ēw ardawān abāg aswārān ud ardaxšīr ō naxčīr šud ēstād.
Sentence: 14 gōr-ēw andar dašt bē widard ud ardaxšīr ud pus ī meh ī ardawān az pas ī ān gōr taxt ud ardaxšīr andar rasīd ud tigr-ēw ēdōn ō gōr zad kū tigr tā parr pad aškamb andar šud ud dudīgar sōg bē widard ud gōr abar gyāg murd.
Sentence: 15 ardawān ud aswār frāz rasīd hēnd ud ka-šān zanišn ī pad ān ēwēnag abd-sahist dīd, pursīd kū ēn zanišn kē kard?
Sentence: 16 ardaxšīr guft kū man kard.
Sentence: 17 pus ī ardawān guft kū nē, čē man kard.
Sentence: 18 ardaxšīr xēšm grift u-š ō pus ī ardawān guft kū hunar ud mardānagīh pad stambagīh ud duššarmīh ud drō adādestānīhā ō xwēš kardan nē tuwān. ēn dašt nēk ud gōr ēdar was. man ud tō ēdar dudīgar uzmāyišn kunēm ud nēkīh ud badīh ud čābukīh pad dīd āwarēm.
Sentence: 19 ardawān ān dušxwār sahist ud pas az ān ardaxšīr nē hišt ō asp nišastan,
Sentence: 20 u-š ardaxšīr ō āxwarr ī stōrān frēstīd,
Sentence: 21 ud framūd kū niger kū rōz ud šab az nazdīkīh ī stōrān ud ō naxčīr ud čawgān ud frahangestān nē šawēh.
Sentence: 22 ardaxšīr dānist kū ardawān duščašmīh ud wad-kāmagīh rāy gōwēd,
Sentence: 23 u-š andar zamān dādestān čiyōn būd nāmag ō pābag nibišt.
Sentence: 24 pābag ka-š nāmag dīd andōhgēn būd,
Sentence: 25 u-š pad passox ō ardaxšīr kard nibišt kū tō nē-dānāgīhā kard ka-t pad tis-ēw kē zyān nē aziš šāyist būdan abāg wuzurgān stēzag burd ud saxwan društēwāzīhā awiš guft.
Sentence: 26 ud nūn-iz bōzišn gō pad petītīg mānag.
Sentence: 27 hangār čē dānāgān guft ēstēd kū dušman pad dušman ān nē tuwān kardan čē adān mard az kunišn ī xwēš awiš rasēd.
Sentence: 28 ēn-iz guft ēstēd kū az ān kas must-abarmānd mā *bāš kē ǰud az ōy nē wizīrēd.
Sentence: 29 ud tō xwad dānēh kū ardawān abar man ud tō ud wasān mardōm ī andar gēhān pad tan ud gyān ud xīr ud xwāstag kāmgārdar pādixšā ast.
Sentence: 30 ud nūn-iz handarz ī man ō tō ēn saxttar kū ēkānagīh ud framānburdārīh kunēh. xwēš tan warz ō wanybūdīh ma abespār.
Chapter: iii
Sentence: 1 ardawān rāy kanīzag-ēw ī abāyišnīg būd kē az abārīg kanīzagān āzarmīgdar ud grāmīgdar dāšt ud harw ēwēnag paristišn ī ardawān būd ān kanīzag kard ēstād.
Sentence: 2 rōz-ēw ka ardaxšīr pad stōrgāh nišast ud tambūr zad ud srōd ud *abārīg huramīh kard ōy ardaxšīr dīd ud padiš wiyābān būd.
Sentence: 3 ud pas az ān *abāg ardaxšīr mihr ud dōstīh ud dōšāram kard ud paywastag *hamē pad šab ka ardawān ī bē-šudag-baxt be xuft ān kanīzag pad nihān ō nazdīk ardaxšīr šud ud tā nazd bām abāg ardaxšīr būd ud pas abāz ō pēš ardawān šud.
Sentence: 4 rōz-ēw ardawān dānāgān ud axtarmārān ī pad dar būd ō pēš xwāst ud pursīd kū: čē *hamē wēnēd pad tis ī haftān ud dwāzdahān ud ēstišn ud rawišn ī stāragān ud tis ī āwāmxwadāyīh ī šahr šahr ud čiyōnīh ī mardōmān ī gēhān ud tis ī man ud frazandān ud mardōmān ī amā?
Sentence: 5 axtarmārān sālār pad passox guft kū: gōčihr ō past ud stārag ī ohrmazd abāz ō bālist āmad. wahrām ud anāhīd pad kust ī haftōring *andar šagr axtar marz ǰahēnd ud ō ohrmazd ayārīh dahēnd.
Sentence: 6 ud im čim rāy ēdōn nimāyēd kū xwadāy-ēw ud pādixšāy-ēw ī nōg ō paydāgīh āyēd ud was sarxwadāy ōzanēd ud gēhān abāz *ō ēwxwadāyīh āwarēd.
Sentence: 7 did-iz *murwnīšān sālār ō pēš mad u-š guft kū: ēdōn paydāg kū harw bandag mard kē az im rōz tā 3 rōz az xwadāy ī xwēš bē wirēzēd ō wuzurgīh ud pādixšāyīh rasēd, abar ān ī xwēš xwadāy kāmaghanǰām ud pērōzgar bawēd.
Sentence: 8 kanīzag ān saxwan čiyōn-aš ō ardawān guft *ašnūd andar šab ka ō nazdīk ardaxšīr rasīd pēš ardaxšīr abāz guft.
Sentence: 9 ardaxšīr ka ān saxwan ašnūd menišn ō wirēxtan az ānōh nihād,
Sentence: 10 u-š ō kanīzag guft kū: agar-at menišn abāg man rāst ud ēkānag ast ahanūz andar ēn 3 rōz ī wizīdag ī dānāgān ud axtarmārān guft ēstēd kū harw kē az xwadāy ī xwēš bē wirēzēd ō wuzurgīh ud pādixšāyīh rasēd, *az ēdar ō gēhān *dawēm ud bē šawēm.
Sentence: 11 agar yazadān ud xwarrah ī ērānšahr ō ayārīh ī amā rasēd ud be bōxtēm, ō nēkīh ud xūbīh rasēm, ēdōn kunam kū az tō farroxdar andar gēhān kas nē bawēd.
Sentence: 12 kanīzag hamdādestān būd ud guft kū: pad āzādīh dāram ud harw čē tō framāyēh kunam.
Sentence: 13 kanīzag čiyōn nazd ō *bām būd abāz ō gāh ī xwēš nazdīk ī ardawān šud,
Sentence: 14 ud šab ka ardawān xuft ēstād az ganǰ ī ardawān šamšēr-ēw ī hindūg ud zēn ī zarrēn ud kamar ī mēšsār ud abesar ī zarrēn ud ǰām ī zarrēn ī padgōhr ud drahm ud dēnār ī was ud *zrēh ud zēnabzār ī payrāstag wasyār ud abārīg was tis stad ud ō pēš ardaxšīr āwurd.
Sentence: 15 ardaxšīr asp 2 az bāragān ī ardawān kē pad rōz-ēw 70 frasang be *raft hē zēn kard, ēk xwad ud ēk kanīzag abar nišast ud rāh ō pārs grift ud pad awištāb *hamē raft.
Sentence: 16 ud ēdōn gōwēnd kū andar šab frāz ō deh-ēw mad,
Sentence: 17 ud ardaxšīr tarsīd kū-*m mā agar mardōm ī deh wēnēnd, šnāsēnd ud griftār kunēnd, andar deh nē bē pad kustag-ēw ī deh widard.
Sentence: 18 u-š 2 zan nišastag dīd,
Sentence: 19 ud ān zan wāng kard kū: mā tars ardaxšīr ī kay ī pābagān ī az tōhmag ī sāsān ud nāf ī dārā šāh čē rast hēh az harw wadīh ud kas tō nē tuwān griftan u-t xwadāyīh ī ērānšahr was sāl abāyēd kardan. awištāb tā ō drayāb ud *tā ka-z drayāb pad čašm *wēnēh mā pāy, čē ka-t čašm ō zrēh ōftēd az dušmanān abē-bīm bawēh.
Sentence: 20 ardaxšīr huram be būd ud az ānōh pad awištāb bē raft.
Chapter: iv
Sentence: 1 ka rōz būd ardawān kanīzag xwāst ud kanīzag pad gyāg nē būd.
Sentence: 2 stōrbān mad, ō ardawān guft kū: ardaxšīr abāg 2 bārag ī ašmā nē pad gyāg ast.
Sentence: 3 ud ardawān dānist kū: kanīzag ī man abāg ardaxšīr wirēxt ud šud.
Sentence: 4 ud ka-š āgāhīh az ganǰ ašnūd dil hangrūdag kard,
Sentence: 5 u-š axtarmārān sālār xwāst ud guft kū: zūd bāš ud be niger tā ān wināhgār abāg ān ǰeh ī rōspīg kadām gyāg šud ud kay šāyēm griftan.
Sentence: 6 axtarmārān sālār zamān handāxt ud pad passox ō ardawān guft kū: māh az kaywān ud wahrām *wirēzēd, ō ohrmazd ud tīr paywast ud xwadāy ī mayān ī asmān azēr brēh ī mihr ēstēd,
Sentence: 7 ud ēdōn paydāg kū ardaxšīr wirēxt ud šud u-š rōy ō kust ī pārs ast ud agar tā 3 rōz griftan nē šāyēd pas az ān griftan nē tuwān.
Sentence: 8 ardawān andar zamān spāh 4000 ārāst ud rāh ō pārs pay ī ardaxšīr grift ud ka nēmrōz būd ō gyāg rasīd kū rāh ī pārs ānōh widard,
Sentence: 9 u-š pursīd kū: ān 2 aswār ī ō ēn kust rōn āmad čē zamān bē widard *hēnd?
Sentence: 10 mardōmān guft kū: bāmdād ka xwaršēd tēγ abar āwurd ēdōn čiyōn wād ī *gardāg homānāg bē widašt *hēnd,
Sentence: 11 u-šān warrag-ēw abēr stabr az pas *hamē dawist, ī az ān nēkōgdar būdan nē šāyist.
Sentence: 12 dānēm kū tā nūn was frasang zamīg šud *hēnd u-tān griftan nē tuwān.
Sentence: 13 ardawān hambun-iz nē pād ud awištāft.
Sentence: 14 ka ō any gyāg-ēw mad az mardōmān pursīd kū: ān 2 aswār čē gāh bē widard hēnd?
Sentence: 15 awēšān guft kū: nēmrōz ēdōn čiyōn *wādgirdag *hamē šud hēnd u-šān warrag-ēw hamwār *hamē raft.
Sentence: 16 ardawān škuft sahist ud guft kū: hangār kū aswār ī dōgānag dānēm bē ān warrag čē sazēd būdan? u-š az dastwar pursīd.
Sentence: 17 dastwar guft kū: ān xwarrah ī xwadāyīh ī ahanūz awiš nē rasīd, bē abāyēd kū be nixwārēm, šāyēd kū pēš kū ān xwarrah awiš rasēd šāyēm griftan.
Sentence: 18 ardawān abāg aswārān saxt awištāft,
Sentence: 19 ud rōz ī *dudīgar 70 frasang raft hēnd u-š kārwān grōh-ēw ō padīrag āmad,
Sentence: 20 ud ardawān az awēšān pursīd kū: ān 2 aswār kadām gyāg padīrag būd *hēnd?
Sentence: 21 awēšān guft kū: mayān ī ašmā ud awēšān zamīg 30 frasang,
Sentence: 22 u-mān ēdōn sahist kū ēk az awēšān aswārān warrag-ēw ī was wuzurg ud čābuk abāg-aš pad asp nišast ēstād.
Sentence: 23 ardawān az dastwar pursīd kū: ān warrag ī-š abāg pad asp čē nimāyēd?
Sentence: 24 dastwar guft kū: anōšag bawēd, ardaxšīr xwarrah ī kayān aw-iš rasēd. pad ēč čārag griftan nē tuwān. pas xwēš tan ud aswārān ranǰ mā dārēd ud aspān mā ranǰēnēd ud tabāh mā kunēd. čārag ī ardaxšīr az any dar xwāhēd.
Chapter: v
Sentence: 1 ardawān ka-š pad ān ēwēnag ašnūd abāz wašt ud ō gyāg ī nišast ī xwēš āmad.
Sentence: 2 ud pas az ān spāh ud gund ī ārāstag abāg pus ī xwēš ō pārs, griftan ī ardaxšīr *rāy frēstīd.
Sentence: 3 ud ardaxšīr rāh ō bār ī drayā grift.
Sentence: 4 ud ēdōn čiyōn hamē raft, čand mard az mardōmān ī pārs az ardawān mustgar būd hēnd u-šān xīr ud xwāstag ud tan ī xwēš pēš ī ardaxšīr dāšt ud ēkānagīh ud framān-burdārīh paydāgēnīd.
Chapter: vi
Sentence: 1 ud ka ō gyāg-ēw ī rāmišn-ardaxšīr xwānēnd rasīd mard-ēw ī wuzurgmenišn ī banāg nām būd az spahān, kē az dast ī ardawān wirēxt ēstād, ānōh bunag dāšt, xwad abāg *6 pus ud was spāh ud gund ō nazdīk ardaxšīr mad.
Sentence: 2 ud ardaxšīr az banāg *hamē tarsīd kū: mā agar-am gīrēd ud ō ardawān abespārēd.
Sentence: 3 pas banāg ō pēš ardaxšīr mad ud sōgand xwārd ud abē-gumānīh dād kū: tā zīwandag bawēm, xwad abāg frazandān, framānburdār ī tō bawēm.
Sentence: 4 ardaxšīr huram būd ud ānōh rōstāg-ēw ī rāmišn-ardaxšīr xwānēnd framūd kardan.
Sentence: 5 banāg abāg aswārān ānōh hišt ud xwad ō bār ī drayā šud.
Sentence: 6 ka-š drayā pad čašm be dīd andar yazadān spāsdārīh hangārd,
Sentence: 7 ud anōh rōstāg ī bōxt-ardaxšīr nām nihād ud ō ātaxš ī wahrām abar drayā framūd nišāstan. az anōh abāz ō nazdīk ī banāg ud aswārān āmad.
Chapter: vii
Sentence: 1 ud spāh ārāst ud ō dar ī ādur farrbāy ī kirbakkar šud ud āyaft aziš xwāst. ō kārezār abāg ardawān mad,
Sentence: 2 ud ān spāh ī ardawān hāmōyēn ōzad ud xīr ud xwāstag ud stōr ud bunag aziš bē stad. xwad pad staxr nišast.
Sentence: 3 *az kirmān ud *makrān ud pārs kustag kustag spāh pad was marag gird kard ud ō kārezār ī ardawān frēstād.
Sentence: 4 4 māhīgān harw rōz kārezār ud ōzanišn ī was būd.
Sentence: 5 ardawān az kustag kustag čiyōn az ray dumāwand daylamān ud padišxwārgar spāh ud āxwarr [*zōr ?] xwāst.
Sentence: 6 az ān čiyōn xwarrah ī kayān abāg ardaxšīr būd ardaxšīr pērōzīh windīd,
Sentence: 7 u-š ardawān ōzad ud hāmōyēn xīr ud xwāstag ō dast ī ardaxšīr mad ud duxt ī ardawān pad zanīh *grift.
Sentence: 8 abāz ō pārs mad *u-š šahrestān ī ardaxšīr-xwarrah xwānēnd kard,
Sentence: 9 ud war ī wuzurg kand, ud āb 4 ǰōy az-iš āwurd ud ātaxš ō war nišāst. kōf-ēw ī stabr kand ud rōd ī rāzīg rāyēnīd. was deh dastgird ābādānīh kard ud was ātaxš ī wahrām ānōh framūd nišāst.
Chapter: viii
Sentence: 1 pas az ān was spāh ud gund ud *zōr ō ham kard ud ō kārezār ī kurdān šāh ī māhīg franaft, was kārezār ud xōnrēzišnīh būd ud spāh ī ardaxšīr stōwīh padīrift.
Sentence: 2 ud ardaxšīr az spāh ī xwēš wiyābān bē būd ud andar šab ō wiyābān-ēw mad kē-š ēč āb ud xwarišn nē būd. xwad az ayārān ud dastwarān hammis ō gursagīh ud tišnagīh mad.
Sentence: 3 u-š az *dūr ātaxš ī šubānān dīd ud ardaxšīr ō ānōh šud.
Sentence: 4 mard ī pīr ānōh dīd kē abāg gōspandān pad dašt ud kōf būd hēnd.
Sentence: 5 ardaxšīr ān šab ānōh *pād ud rōz ī dudīgar az awēšān rāh xwāst.
Sentence: 6 awēšān guft kū: az ēdar 3 frasang rōstāg-ēw ast ī abēr ābādān ud was mardōm ud padēxīh ī wasyār ast.
Sentence: 7 ardaxšīr ō ān deh šud. mard frēstīd ud ayārān ī xwēš hāmōyēn ō dar xwāst.
Sentence: 8 spāh ī madīgān pad ēd dāšt kū: nūn az ardaxšīr abēbīm bē būd hēm čē pad stōwīh abāz ō pārs šud.
Chapter: ix
Sentence: 1 ardaxšīr 4000 mard ārāst ud abar awēšān tāzišn ī šabīxōn kard ud az kurdān mard 1000 ōzad.
Sentence: 2 ud abārīg xastag dastgīr kard ud az kurdān šāh abāg pusarān, brādarān, frazandān, was xīr ud xwāstag ō pārs wisē kard.
Chapter: x
Sentence: 1 andar *rāh spāh ī haftōbād ī kirm xwadāy padiš pahikaftag ān hāmōyēn xīr ud xwāstag ud bunag az ān aswārān ī ardaxšīr bē stadag ō kulālān --- dastagird-ēw ī kulāl *nām ānōh kū kirm bunag dāšt --- āwurd.
Sentence: 2 ud ardaxšīr pad ān menišn būd kū: ō *armanestān ud ādurbādegān šawam čē yazadāngard ī syārazūrīg abāg was spāh ud gund az ān kawād ī syārazūrīg *hammis mihrān kardag ud pad framānburdārīh awiš mad ēstād.
Sentence: 3 bē az ān čiyōn stambagīh ud wināhgārīh ī haftōbād pusarān pad spāh ī ardaxšīr ašnūd handēšīd: nazdist kār ī pārs abāyēd wirāstan ud az dušmanān abē-bīm būdan ud pas šahr ī *dudīgar pardāxtan.
Sentence: 4 nūn pad ān *hangām-iz pad kulālān ēdōn čēr ud stahmag *būd kū-š spāh-ēw ī 5000 pad hēnīh pad kustag kustag ī būm ī sind ud *makrān *ud *karān ī drayā frēstīd ēstād.
Sentence: 5 ardaxšīr spāh ud gund az kustagīhā abāz ō *ardaxšīr-xwarrah frēstād.
Sentence: 6 haftōbād spāh ī xwēš hāmōyēn abāz ō dar xwāst.
Sentence: 7 ardaxšīr spāh wasyār abāg spāhbedān ō kārezār ī kirm wisē kard.
Sentence: 8 gālān ī kirm hāmōyēn xīr ud xwāstag ud bunag ō drubuštīh ī diz ī kulālān nihād. xwad kōfīhā ud gyāgīhā ī škastag nihān būd hēnd,
Sentence: 9 ud aswārān ī ardaxšīr āgāhīh nē būd. ō bun ī diz ī kulālān mad hēnd ud diz bē parwast.
Sentence: 10 ud ka šab būd spāh ī kirm abar awēšān zad ud šabīxōnīh kard, az aswārān ī ardaxšīr was ōzad ud asp ud zēn ud zēnabzār ud xwāstag ud bunag aziš stad, pad afsōs ud riyahrīh ud ēwēnag wadwāzag ud brahnag abāz ō pēš ardaxšīr frēstīd.
Sentence: 11 ardaxšīr ka-š pad ān ēwēnag dīd abēr pad bēš būd ud az šahr šahr ud gyāg gyāg spāh ō dar xwāst ud xwad abāg spāh ī was ō kārezār ī kirm franaft.
Sentence: 12 ud ka ō diz ī kulālān mad spāh ī kirm hāmōyēn ō diz nišast ēstād.
Sentence: 13 ardaxšīr pērāmōn ī diz nišast.
Sentence: 14 ud kirm xwadāy haftōbād 7 pus dāšt,
Sentence: 15 harw pus-ēw abāg 1000 mard pad šahr šahr gumārd ēstād.
Sentence: 16 andar ān gāh pus-ēw pad *arahestān būd abāg was spāh az tāzīgān ud mazūnīgān ī pad drayā widārag mad ud abāg ardaxšīr ō kōxšišn ēstād.
Sentence: 17 ud spāh ī kirm kē pad diz būd hāmōyēn ō bērōn mad ud abāg aswārān ī ardaxšīr kōxšišn ud kārezār gyānabespārīhā saxt kard.
Sentence: 18 ud az harw 2 kustag was kušt,
Sentence: 19 spāh ī kirm bērōn mad u-š rāh ud widarag ēdōn bē grift kū ēč kas az spāh ī ardaxšīr bērōn šudan ud xwardan ī xwēš ud padēxīh ī stōrān āwurdan nē šāyist, ud az sagr hamōyēn mardōmān ud stōrān ō niyāz ud ačāragīh mad hēnd.
Chapter: xi
Sentence: 1 mihrag ī anōšagzādān az ham pārs ka-*š ašnūd kū ardaxšīr pad dar ī kirm u-š abar spāh ī kirm *abarwēzīh nē windād,
Sentence: 2 spāh ud gund ārāst ud ō gyāg ī ardaxšīr šud u-š hāmōyēn xīr ud xwāstag ud ganǰ ī ardaxšīr burd.
Sentence: 3 ka-š mihrōdruǰīh ī mihrag ud abārīg mardōmān ī pārs pad *ān ēwēnag ašnūd ǰār-ēw ēn handēšīd kū: az kōxšišn ī kirm be abāyēd pardaxtan,
Sentence: 4 pas ō kōxšišn ud kārezār ī mihrag šudan.
Sentence: 5 u-š spāh hāmōyēn abāz ō dar xwāst ud abāg spāhbedān ōskārd ud čārag pad bē bōxtan ī xwēš ud spāh nigerīd.
Sentence: 6 ud pas az ān pad čāšt xwardan nišast.
Sentence: 7 andar zamān tigr-ēw ī čōbag az diz *frōd mad ud tā parr pad warrag ī abar xwān būd be nišast,
Sentence: 8 ud pad tigr ēdōn nibišt ēstād kū: ēn tigr aswārān ī warzāwand kirm xwadāy wist,
Sentence: 9 u-mān nē abāyēd kū wuzurg mard čiyōn ašmā be ōzad hē, čiyōn-mān ō ēn warrag zad.
Chapter: xii
Sentence: 1 ardaxšīr ka-š pad ān ēwēnag dīd spāh az ānōh kand ud bē raft.
Sentence: 2 ud spāh ī kirm az pas ī ardaxšīr awištāft *u-š gyāg-ēw ī tang abar awēšān ēdōn be grift kū spāh ī ardaxšīr bē widardan nē šāyist.
Sentence: 3 ud ardaxšīr xwad tanīhā ō bār ī drayā ōbast.
Sentence: 4 ēdōn gōwēnd kū xwarrah ī kayān pad gōr *kirb be būd andar pēš ī ardaxšīr ēstād ud andak andak *hamē raft tā ardaxšīr az ān gyāg ī dušwidarag az dast ī dušmanān abē-wizendīhā bērōn ānīd ud frāz ō deh-ēw ī mānd xwānēnd āwurd.
Sentence: 5 andar šab ō xānag ī brādar dō, ī ēk burzag ud ēk burz-ādur nām būd, mad.
Sentence: 6 ō awēšān guft kū: man az aswārān ī ardaxšīr ham kē az kārezār ī kirm pad stōwīh āmad ēstam ud am rōz aspanǰ framāyēd dādan tā āgāhīh ī spāh ī ardaxšīr be āyēd kū ō kadām zamīg ōbast hēnd.
Sentence: 7 awēšān was hangrūdagīhā ō ardaxšīr guft kū: gizistag bawād gannāg mēnōg ī druwand kē ēn uzdēs ēdōn čēr ud pādyāwand kard ēstēd kū hāmōyēn mardōm ī kustagīhā az dēn ī ohrmazd ud amahraspandān wiyābān kard ēstēd ud wuzurg xwadāy-iz, mard-*ēw čiyōn ardaxšīr, ud spāh ī-š abāg hāmōyēn az dast ī awēšān dušmanān ī druwandān ī uzdēsparistagān sar ō stōwīh wardēnīd.
Sentence: 8 u-šān asp ī ardaxšīr grift ud andar srāy burd ud pad āxwarr bast ud pad ǰaw ud kāh ud aspast nēk dāšt ud ardaxšīr ō nišastgāh ud gyāg ī pad ēwēn nīd ud be nišāst.
Sentence: 9 ardaxšīr was andōhgēn būd ud *hamē handēšīd.
Sentence: 10 ud awēšān drōn yašt ud ō ardaxšīr xwāhišn kard kū: wāǰ framāy griftan. xwarišn xwar ud andōh ud tēmār mā dār čē ohrmazd ud amahraspandān čārag ī ēn tis xwāhēnd ud ēn petyārag ēdōn bē nē hilēnd,
Sentence: 11 čē abāg stahmagīh ī dahāg ud frāsyāg ī tūr ud alaksandar ī hrōmāyīg pas-iz yazadān padiš hunsand nē būd u-šān pad warz ud xwarrah ī xwēš ēdōn wany ud abaydāg kard čiyōn ān ī *ō gēhān āšnāg.
Sentence: 12 ardaxšīr pad ān saxwan menišn xwaš be būd, wāǰ grift ud xwarišn xward.
Sentence: 13 u-šān may nē būd bē wašag ō pēš āwurd ud myazd rāyēnīd ud āfrīnagān kard.
Sentence: 14 ardaxšīr pad wehīh ud dēndōstīh ud ēkānagīh ud framānburdārīh ī awēšān abē-gumān būd,
Sentence: 15 u-š rāz ī xwēš ō burzag ud burz-ādur dād ud guft kū: man *xwad ardaxšīr ham. nūn ēn nigerēd kū čārag ī ēn pad be afsēnistan ī ēn kirm ud ayārān ī ōy čiyōn šāyēd xwāst.
Sentence: 16 awēšān pad passox guft kū: amā pad tan ud gyān ud xīr ud xwāstag ud zan ud frazand ǰādag ī ašmā *bayān šāh ī ērān ud *agar be abāyēd abespārdan bē abespārēm.
Sentence: 17 bē amā ēdōn dānēm kū čārag ī ēn druǰ ēdōn šāyēd xwāst *kū tō xwēš tan pad ēwēnag ī mard ī dūršahrīg ārāstag kunēh ud ō widār ī diz tan ī xwēš pad bandagīh ud paristišn ī ōy be abespārēh ud mard 2 ī hāwišt ī dēnāgāh ō ānōh barēh ud pad-išān yazišn ud azbāyišn ī yazadān ud amahraspandān frāz gīrēh ud ka hangām ī xwarišn xwardan ī ān kirm bawēd ēdōn kunēh kū rōy ī widāxtag dārēh, pad zafar ī ān druǰ rēzišn tā mīrēd, ud ān druǰ ī mēnōg pad yazišn ud azbāyišn ī yazadān be šāyēd zadan ud ān druǰ ī tanīgardīg pad rōy ī widāxtag be šāyēd zadan.
Sentence: 18 ardaxšīr ān saxwan pasandīd ud pad xūb dāšt ud ō burzag ud burz-ādur guft kū: man ēn kār pad ayārīh ī ašmā tuwān kardan.
Sentence: 19 awēšān guft kū: harw kār ī ašmā framāyēd, tan ud gyān be abespārēm.
Chapter: xiii
Sentence: 1 ardaxšīr az ānōh abāz ō ardaxšīr-xwarrah mad ud *kārezār abāg mihrag ī anōšagzādān kard ud mihrag zad, šahr ud gyāg ud xīr ud xwāstag hāmōyēn ō xwēš kard.
Sentence: 2 kārezār abāg kirm kardan rāy kas frēstīd.
Sentence: 3 burzag ud burz-ādur ō pēš xwāst ud abāg uskārd.
Sentence: 4 was drahm ud dēnār ud paymōzan stad ud xwēš tan pad *brahmag ī xwarāsānīg ārāstag dāšt, abāg burzag ud burz-ādur ō bun ī diz ī kulālān mad ud guft kū: man mard-ēw ī xwarāsānīg ham. az ēn warzāwand xwadāy āyaft-ēw xwāham kū ō dar ī paristišn āyam.
Sentence: 5 uzdēsparistagān ardaxšīr abāg ān 2 mard bē padīrift, pad mān ī kirm gyāg kard.
Sentence: 6 ardaxšīr rōz 3 pad ān ēwēnag paristišn ud ēkānagīh ī kirm kardan paydāgēnīd ud ān drahm ud dēnār ud ǰāmag ō paristagān dād. ēdōn kard *kū harw kē andar ān diz būd abd sahist ud āfrīnkardār būd hēnd.
Sentence: 7 pas ardaxšīr guft kū: ēdōn weh sahēd kū kirm 3 rōz xwarišn pad dast ī xwēš daham.
Sentence: 8 paristagān ud kārframānān hamdādestān būd hēnd.
Sentence: 9 ardaxšīr kas frēstīd, spāh ī 400 mard ī hunarōmand ud gyānabespār pad parwār ī ān gyāg pad kōf ud gyāg ī škastag nihān framūd kardan.
Sentence: 10 framūd kū: *wahmān rōz ka az diz ī kirm dūd wēnēd marčābukīh ud hunarōmandīh kunēd ud ō bun ī diz āyēd.
Sentence: 11 xwad ān rōz rōy ī widāxtag dāšt ud burzag ud burz-ādur yazišn ud azbāyišn ī yazadān frāz grift.
Sentence: 12 ud ka hangām ī xwarišn būd kirm pad ēwēnag ī harw rōz wāng kard.
Sentence: 13 ardaxšīr pēš az ān uzdēsparistagān ud kārframānān pad čāšt mast ud abē-bōy kard ēstād. xwad abāg rahīgān ī xwēš ō pēš kirm šud ud ān xōn ī gāwān ud gōspandān čiyōn harw rōz dād ō pēš kirm burd ud ham čiyōn kirm zafar abāz wiyāft kū xōn xwarēd ardaxšīr rōy ī widāxtag pad zafar ī kirm andar rēxt.
Sentence: 14 kirm čiyōn rōy ō tan mad pad 2 škāft. wāng ēdōn aziš bē mad kū mardōmān andar diz hamāg ānōh mad hēnd ud āšōb andar diz ōbast.
Sentence: 15 ardaxšīr dast ō spar ud šamšēr zad ud garān zanišn ud ōzanišn pad ān diz kard ud framūd kū: ātaxš kunēd tā dūd pad awēšān aswārān dīdār bawēd. rahīgān hamgōnag kard.
Sentence: 16 ud aswārān ī pad kōf būd hēnd čiyōn dūd az diz dīd pad taxtan ō bun ī diz ud ayārīh ī ardaxšīr mad hēnd, ō widār ī diz ōbast ud wāng kard kū: pērōz pērōz bawād ardaxšīr šāhān šāh ī pābagān. šamšēr ō kār grift ēstād.
Sentence: 17 ud mardōm ī diz harw čē ōzad enyā pad awištābišn ud kōxšišn ī kārezār az diz ōbast hēnd ud ān ī abārīg zēnhār xwāst, ō bandagīh ud framānburdārīh mad hēnd.
Sentence: 18 ardaxšīr ān diz kand ud awērān kardan framūd. ānōh rōstāg-ēw ī kulālān xwānēnd kard ud haft ātaxš ī wahrām pad ān gyāg nišāst ud xīr ud xwāstag ud zarr ud asēm az ān diz pad 1000 uštar bār kard ud ō gōr wisē kard. burzag ud burz-ādur bahr ī pādāšn ī wuzurgēwēn gyānabespārān kardārān dād ud ān gyāg rōstāg-ēw pad sālārīh ud kadagxwadāyīh awiš dād.
Sentence: 19 pas az ān ī ardaxšīr ān kirm ōzad būd abāz ō gōr āmad.
Sentence: 20 u-š spāh ud gund ō kustag ī kirmān ud kārezār ī bārzān mad.
Chapter: xiv
Sentence: 1 pus ī ardawān 2 abāg xwēš tan dāšt, 2 pad wirēg ō kābulšāh šud ēstād.
Sentence: 2 u-šān ō xwahar ī xwēš čiyōn zan ī ardaxšīr būd nāmag nibišt ud paygām frēstīd kū: rāst ast ān ī ašmā zanān rāy gōwēnd, kū tō marg ī xwēšān ud *hamtōhmagān, ī ēn wināhgār ī yazadān dušman asazāgīhā pad marg ōzad, framōš kard,
Sentence: 3 u-t mihr ud dōšāram ī abāg awēšān mustōmandān brādarān kē pad āzār ud saxtīh, bīm ud sahm ud anāzarmīh pad uzdehīgīh ud šahr ī kābulān griftār ud *any 2 wadbaxt brādarān ī tō, kē ēn mihrdrōz pad band ud zindān pādifrāh āwarēd, kē marg pad āyaft *hamē xwāhēnd, u-t hāmōyēn az daxšag bē hišt,
Sentence: 4 u-t menišn abāg ōy mihrdrōz rāst be kard u-t ēč tēmār ud handēšišn ī amā nēst.
Sentence: 5 zad šawād ān kas kē pas az im rōz pad ēč zan pad gēhān wistāx ud abē-gumān bawēd.
Sentence: 6 nūn ēn kū agar-at hambun-iz mihr ī amā ast čārag ī amā xwāh ud kēn ī pidar ud ān xwēšāwandān ud hamtōhmagān framōš mā kun. ud ēn zahr ī nāgōn *ī-mān abāg mard-*ēw ī abē-gumān ī xwēš ō nazdīk ī ašmā frēstīd az ēn mard stānēd,
Sentence: 7 ud ka-tān tuwān pēš az xwarišn ō ān wināhgār ud mihrdrōz dahēd tā andar zamān mīrēd ud tō ān harw 2 brādar ī bastag wišāhēh, amāh-iz abāz ō šahr ud būm ud gyāg ī xwēš āyēm ud tō ruwān wahištīg ud nām ī ǰāwēdānag ō xwēš kard *bawēd ud abārīg zanān andar gēhān kunišn ī xūb ī tō rāy nāmīgdar ud grāmīgdar bawēnd.
Sentence: 8 xwah ī ardawān ka-š ān nāmag pad ān ēwēnag dīd abāg zahr ī-š awiš frēstīd handēšīd kū: hamgōnag abāyēd kardan ud ān 4 brād ī wadbaxt az band rastag kardan.
Sentence: 9 rōz-ēw ardaxšīr az naxčīr *gursag ud tišnag andar xānag mad,
Sentence: 10 u-š wāz grift ēstād ud kanīzag ān zahr abāg pist ud šakar gumēxt ud ō dast ī ardaxšīr dād pad ēn kū: ahy az abārīg xwarišn framāy xwardan čē pad garmīh ud ranǰagīh nēk.
Sentence: 11 ardaxšīr stad ud xwardan kāmist.
Sentence: 12 ēdōn gōwēnd kū warzāwand ādur ī farrbāy ī pērōzgar ēdōn čiyōn āluh-ēw ī suxr andar parrīd ud parr ō pist zad ud ān ǰām az pist hammis az dast ī ardaxšīr ō zamīg ōbast.
Sentence: 13 ardaxšīr ud ziyānag harw 2 ka pad ān ēwēnag dīd stard bē būd hēnd ud sag ī andar xānag būd hēnd ān xwarišn bē xward ud abar *gyāg murd hēnd.
Sentence: 14 ardaxšīr dānist kū: ān zahr būd pad *ōzadan ī man ārāst ēstād.
Sentence: 15 andar zamān mowbedān mowbed ō pēš xwāst ud pursīd kū: āgrift kū pad gyān ī xwadāyān kōxšīhēd pad čē dārēh u-š čē kunišn?
Sentence: 16 mowbedān mowbed guft kū: anōšag bawēd, ō kāmag rasēd, ōy kē pad gyān ī xwadāyān kōxšēd margarzān ud be ōzanišn.
Sentence: 17 ardaxšīr framūd kū: ēn ǰeh ī ǰādūg ī druwand ī *zadzādak ō aspānūr barēd ud framāy ōzadan.
Sentence: 18 mowbedān mowbed dast ī ziyānag grift ud ō bērōn āmad.
Sentence: 19 ziyānag guft kū: im rōz 7 māhīgān ast tā ābestan ham. ardaxšīr āgāh kunēd,
Sentence: 20 čē agar man margarzān ham ēn frazand ī andar škamb dāram pad margarzān abāyēd dāštan?
Sentence: 21 mowbedān mowbed ka-š ān saxwan ašnūd wašt ud abāz ō pēš ardaxšīr šud ud guft kū: anōšag bawēd, ēn zan *ābestan ast. ǰār-ēw tā ān ka bē zāyēd ōzadan nē abāyēd,
Sentence: 22 čē agar ōy margarzān ān frazand ī az tōhmag ī ašmā bayān ī andar aškamb pad margarzān dāštan ud ōzadan nē abāyēd.
Sentence: 23 ardaxšīr xēšm rāy ī dāšt guft kū: ēč zamān mā pāy u-š ōzan.
Sentence: 24 mowbedān mowbed dānist kū ardaxšīr xēšm was ud az ān ō pašīmānīh rasēd,
Sentence: 25 u-š ān zan nē ōzad u-š pad xānag ī xwēš burd u-š nihān kard,
Sentence: 26 u-š ō zan ī xwēš guft kū: ēn zan grāmīgīhā dār, ō kas tis-iz mā gōw.
Chapter: xv
Sentence: 1 ka zamān ī zādan frāz mad aziš pus-*ēw ī abēr abāyišnīg zād,
Sentence: 2 u-š šāhpuhr nām nihād u-š *hamē parward tā ō dād ī 7-sālag mad.
Sentence: 3 ardaxšīr rōz-ēw ō naxčīr šud u-š asp ō gōr ī mādag hišt ud ān gōr ī nar ō tēx ī ardaxšīr mad u-š gōr ī mādag rastār kard ud xwēš tan ō marg abespārd.
Sentence: 4 ardaxšīr ān gōr hišt ud asp *ō waččag abgand.
Sentence: 5 gōr ī mādag ka-š dīd kū aswār asp ō waččag abgand mad u-š waččag rastār kard ud xwēš tan ō marg abespārd.
Sentence: 6 ardaxšīr ka-š pad ān ēwēnag dīd bē mānd u-š dil sōzāg būd ud asp abāz wašt ud handēšīd kū: wāy ō mardōm bawād *čē abāg adānīh ud agōwāgīh ī ēn čahārpāy ī gung pas mihr ī ēk ō did ēdōn uspurrīg kū gyān ī xwēš zan ud frazand rāy bē abespārēd.
Sentence: 7 u-š *zan ud ān frazand ī-š andar aškamb dāšt ayād būd ud pad pušt ī asp ēdōn čiyōn ēstād pad buland wāng be griyist.
Sentence: 8 ud spāhbedān ud wuzurgān ud āzādagān ud wāspuhragān ka-šān *pad ān ēwēnag dīd škuft bē mānd hēnd ud hamāg ō pēš mowbedān mowbed šud hēnd *ud *guft *kū: ēn čē sazēd būdan ka ardaxšīr pad *dīd ēdōn zarīg ud bēš ud andōh awiš rasīd pad ān ēwēnag *kū griyēd?
Sentence: 9 mowbedān mowbed ud ērān spāhbed ud puštīgbān sālār ud dabīrān mahist ud darhandarzbed ud wāspuhragān ō pēš ardaxšīr šud hēnd ud pad rōy ōbast ud namāz burd ud guft kū: anōšag bawēd, pad ēn ēwēnag xwēš tan andōhgēn kardan bēš ud zarīg ō dil kardan mā framāyēd.
Sentence: 10 agar kār-ēw mad ēstēd ī pad mardōmkārīh čārag kardan šāyēd amāh-iz āgāh framāyēd kardan tā tan ud gyān ud xīr ud xwāstag ud zan ud frazand ī xwēš pēš dārēm ud agar wizand ān ast *kū čārag kardan nē šāyēd xwēš tan ud amā mardōmān ī kišwar zarīgōmand ud bēšōmand mā framāyēd kardan.
Sentence: 11 ardaxšīr pad passox guft kū:-m nūn ǰuttarīh nē mad ēstēd bē-m im rōz andar dašt az čahārpāy ī gung ī agōwāg ud adān ī-m xwad pad ēn ēwēnag bē dīd u-mān ān zan ud ān frazand ī-š andar aškamb ī mādar abē-wināh abāz ayād būd ud pad ōzadan ī awēšān handēšīdār ud čīdār ham kū pad-iz ruwān wināh ī garān šāyēd būdan.
Sentence: 12 mowbedān mowbed ka-š dīd kū ardaxšīr az ān kār ō pašīmānīh mad pad rōy ōbast,
Sentence: 13 u-š guft kū: anōšag bawēd, framāyēd tā pādifrāh ī wināhgārān ud margarzānān ud framān ī xwadāy spōzgārān pad man kunēd.
Sentence: 14 ardaxšīr guft kū: čim ēdōn gōwēh, tō čē wināh ǰast ēstēd?
Sentence: 15 mowbedān mowbed guft: ān zan ud ān frazand ī-š *andar *aškamb ašmā framūd kū: bē ōzan, u-mān nē ōzad ud pus-ēw zād ī az harw nōgzādān ud frazandān ī xwadāyān nēkōgdar ud abāyišnīgdar ast.
Sentence: 16 ardaxšīr guft kū: čē *hamē gōwēh?
Sentence: 17 mowbedān mowbed guft kū: anōšag bawēd, hamgōnag ast čiyōn-am guft.
Sentence: 18 ardaxšīr framūd kū dahān ī mowbedān mowbed purr az yākand dēnār ud murwārīd ī šāhwār ud gōhr kard.
Sentence: 19 andar ham zamān kas mad kē šāhpuhr ō ānōh nīd.
Sentence: 20 ardaxšīr ka-š šāhpuhr frazand ī xwēš dīd pad rōy ōbast ud andar ohrmazd xwadāy ud amahraspandān ud xwarrah ī kayān ud ādurān šāh ī pērōzgar was spās hangārd. guft kū: ān ō man mad ī ō ēč xwadāy ud dahibed nē mad kē pēš az hazārag ī sōšāns ristāxēz ud tan ī pasēn būd *kū-m frazand ī ēdōn nēkōg az murdagān abāz mad.
Sentence: 21 u-š ham gyāg šahrestān-ēw ī *rahišn-šāhpuhr xwānēnd framūd kardan ud 10 ātaxš wahrām ānōh nišāst ud was xīr ud xwāstag ō dar ī ādurān šāh frēstād ud was kār ud kirbag framūd rāyēnīdan.
Sentence: 22 pas az ān ardaxšīr ō kustag kustag šud ud was kārezār ud ōzanišn abāg sarxwadāyān ī ērānšahr kard. ud hamwār ka-š kustag-ēw xūb kard, did-iz kustag ō abāzsārīh ud aburdframānīh ēstād.
Chapter: xvi
Sentence: 1 abar ān xīr abēr čēhišnīg ud handēšīdār būd kū: mā agar-am az abargar nē brēhēnīd ēstēd kū ērānšahr pad ēwxwadāyīh be šāyēd *winārdan.
Sentence: 2 u-š handēšīd kū: az dānāgān ud frazānagān ud kēdān ud kandāgān be abāyēd pursīdan,
Sentence: 3 agar ēdōn kū xwarrah ī amā nē brēhēnīd ēstēd xwadāyīh ī ērānšahr rāyēnīdan hunsand ud bārestān abāyēd būdan. ēn kārezār ud xōnrēzišnīh be abāyēd hištan ud *xwad az ēn ranǰ ud āwām āsān kardan.
Sentence: 4 u-š mard-ēw az awestwārān ī xwēš ō pēš kēd ī hindūgān frēstīd pad pursišn kardan ī ārāstan ī ērānšahr pad ēwxwadāyīh.
Sentence: 5 mard ī ardaxšīr ka ō pēš kēd ī hindūgān rasīd, kēd hamčiyōn mērag dīd, pēš kū mērag saxwan guft, ō mērag guft kū: tō xwadāy ī pārsīgān pad ēn kār frēstīd kū: xwadāyīh ī ērānšahr pad ēwxwadāyīh ō man rasēd? nūn abāz ward, šaw ud ēn passox saxwan ī man awiš gōw kū: ēn xwadāyīh *bē ō 2 tōhmag, ēk az tō ud ēk az dūdag ī mihrag ī anōšagzādān, enyā winārdan nē šāyēd.
Sentence: 6 mērag abāz ō pēš ardaxšīr mad ud az rāyēnišn ī kēd ī hindūgān guft kū ardaxšīr āgāhēnīd.
Sentence: 7 ardaxšīr ka-š ān saxwan ašnūd guft kū: ān rōz mā bād kū az tōhm ī mihrag ī wardruwān kas pad ērānšahr kāmgār bawēd čē mihrag garāntōhm ud anāgtōhm dušman ī man būd ud frazandān ī-š ast hamāg dušman ī man ud frazandān ī man hēnd. agar ō nērōgōmandīh rasēnd ud kēn ī pidar xwāhēnd pad frazandān ī man wizandgār bawēnd.
Sentence: 8 ardaxšīr xēšm ud kēn rāy *ō gyāg ī mihrag šud ud hāmōyēn frazandān ī mihrag framūd *ōzadan.
Sentence: 9 duxt-*ēw ī mihrag 3-sālag būd. *dāyagān pad nihān ō bērōn ānīd u-šān *ō warzīgar mard-ēw abespārd kū parward ud gōš aziš dāšt. warzīgar hamgōnag kard, kanīzag nēkōgīhā parward.
Sentence: 10 ud ka sāl ēčand būd, kanīzag ō dād ī zanān mad. pad tanbahr ud dīdan ud čābūkīh ud pad-iz zōr ud nērōg ēdōn būd kū az hamōyēn zanān ān weh ud frāzdar būd.
Chapter: xvii
Sentence: 1 ǰahišn ī zamān ud brēhēnišn rāy rōz-ēw šāhpuhr ī ardaxšīrān ō ān šahr āmad, ō naxčīr šud ud pas *az naxčīr xwad abāg 9 aswār ō ān deh mad *kū kanīzag padiš būd.
Sentence: 2 ǰahišn *rāy kanīzag pad sar ī čāh būd ud āb *hamē hixt ud čahārpāyān rāy āb *hamē dād.
Sentence: 3 warzīgar pad kār-ēw šud ēstād.
Sentence: 4 kanīzag ka-š šāhpuhr ud aswārān dīd āxist ud namāz burd ud guft kū: drust ud weh ud pad drōd awarēd. be framāyēd nišast čē gyāg xwaš, sāyag ī draxtān xunak ud hangām garm, tā man āb hanǰam, xwad ud stōrān āb xwarēd.
Sentence: 5 šāhpuhr māndagīh ud gursagīh ud tišnagīh rāy xēšmēn būd u-š ō kanīzag guft kū: bē, ǰeh ī rēman. amā āb ī tō pad kār nē abāyēd.
Sentence: 6 kanīzag pad tēmār šud ud pad kust-ēw be nišast.
Sentence: 7 šāhpuhr ō aswārān guft kū: hēzag ō čāh abganēd ud āb āhanǰēd tā amā wāz gīrēm ud stōrān āb dahēd.
Sentence: 8 aswārān hamgōnag kard, hēzag ō čāh abgand ud wuzurgīh ī hēzag rāy ī purr āb būd ul kašīdan nē šāyist.
Sentence: 9 kanīzag az dūr gyāg *hamē nigāh kard.
Sentence: 10 šāhpuhr ka-š dīd kū aswārān hēzag az čāh hixtan nē šāyēd xēšm grift ud ō sar ī čāh šud ud dušnām ō aswārān dād guft kū:-tān šarm ud nang bād kē az zan-ēw abādyāwanddar ud wadhunardar hēd.
Sentence: 11 u-š arwēs az dast ī aswārān stad ud zōr pad arwēs *kard u-š hēzag az čāh ul hixt.
Sentence: 12 pad zōr ud hunar ud nerōg ī šāhpuhr kanīzag abd sahist.
Sentence: 13 čiyōn-aš dīd *kū pad zōr ud hunar ud nērōg ud *šāyendagīh būd ī *xwad hēzag az čāh ul āhixt dawān ō pēš šāhpuhr mad, pad rōy ōbast ud āfrīn kard guft kū: anōšag bawēd šāhpuhr ī ardaxšīrān mardān pahlom.
Sentence: 14 šāhpuhr be xandīd u-š ō kanīzag guft kū: tō čē dānēh kū man šāhpuhr ham?
Sentence: 15 kanīzag guft kū: man az was kas ašnūd kū andar ērānšahr aswār-ēw ast az zōr ud nērōg ud tanbahr ud dīdan ud čābukīh ēdōn čiyōn tō šāhpuhr ī ardaxšīrān.
Sentence: 16 šāhpuhr ō kanīzag guft kū: rāst gōw kū tō az frazandān ī kē hēh.
Sentence: 17 kanīzag guft kū: man duxt ī ēn warzīgar ham ī pad ēn deh mānēd.
Sentence: 18 šāhpuhr guft kū: nē rāst gōwēh čē duxtar ī warzīgarān ēn hunar ud nērōg ud dīdan ud nēkōgīh ī tō ast nē bawēd. nūn bē *kū rāst gōwēh enyā hamdādestān nē bawēm.
Sentence: 19 kanīzag guft kū:-*t-am zēnhār dahišn pad tan ud gyān tā man rāst be gōwam.
Sentence: 20 šāhpuhr guft kū: zēnhār ud mā tars.
Sentence: 21 kanīzag guft kū: man duxt ī mihrag ī anōšagzādān ham ud az bīm ī ardaxšīr rāy ō ēn gyāg ānīd ham. az 7 frazand ī mihrag bē man tā any kas nē mānd ēstēd.
Sentence: 22 šāhpuhr warzīgar rāy frāz xwand ud kanīzag pad zanīh padīrift ud andar im (ham?) šab abāg būd.
Chapter: xviii
Sentence: 1 brēhēnišn rāy (kū abāyēd būdan) pad ham šab abar ohrmazd ī šāhpuhrān ābestan būd.
Sentence: 2 šāhpuhr kanīzag āzarmīg ud grāmīg dāšt ud ohrmazd ī šāhpuhrān aziš zād.
Sentence: 3 šāhpuhr ohrmazd az pidar pad nihān dāšt tā ān ka ō dād ī 7-sālag mad.
Sentence: 4 rōz-ēw abāg aburnāy zādagān ī wāspuhragān ī ardaxšīr ohrmazd ō asprēs šud ud čawgān kard.
Sentence: 5 ardaxšīr abāg mowbedān mowbed ud artēštārān sālār was āzādān ud wuzurgān ānōh nišast ud ō awēšān *hamē nigerīd.
Sentence: 6 ohrmazd az awēšān aburnāyagān pad aswārīh čēr ud nibardag būd.
Sentence: 7 abāyēd būdan rāy ēk az awēšān čawgān ō gōy zad ud gōy ō kanār ī ardaxšīr ōbast.
Sentence: 8 ardaxšīr ēč tis-ēw nē paydāgēnīd ud aburnāyagān tušt mānd hēnd ud škōh ī ardaxšīr rāy kas nē ayārīd frāz šawēd.
Sentence: 9 ohrmazd wistāxīhā šud ud gōy abar grift, wistāxīhā zad ud wāng kard.
Sentence: 10 ardaxšīr az awēšān pursīd kū: ēn rēdag kē ast?
Sentence: 11 awēšān guft kū: anōšag bawēd, amā ēn rēdag nē dānēm.
Sentence: 12 ardaxšīr kas frāz kard ud rēdag ō pēš xwāst guft kū: tō pus ī kē hēh?
Sentence: 13 ohrmazd guft kū: man pus ī šāhpuhr ham.
Sentence: 14 u-š ham zamān kas frēstīd, šāhpuhr xwand ud guft kū: ēn pus ī kē ast?
Sentence: 15 šāhpuhr zēnhār xwāst.
Sentence: 16 ardaxšīr be *xandīd u-š šāhpuhr zēnhār dād.
Sentence: 17 šāhpuhr guft kū: anōšag bawēd. ēn pus ī man ast u-m az ēn and sāl abāz az ašmā pad nihān dāšt.
Sentence: 18 ardaxšīr guft kū: *ay axwēškār, čim ka-t az 7 sāl abāz frazand ī ēdōn nēkōg az man pad nihān dāšt.
Sentence: 19 u-š ohrmazd grāmīgēnīd ud was dāšn ud paymōzan awiš dād ud spāsdārīh andar yazadān hangārd.
Sentence: 20 u-š guft kū: homānāgīh ī ēn ān ast ī kēd ī hindūg guft.
Sentence: 21 ud pas az ān ka ohrmazd ō xwadāyīh rasīd hāmōyēn ērānšahr abāz ō ēw-xwadāyīh tuwānist āwurdan ud sarxwadāyān ī kustag kustag ohrmazd ō framānburdārīh āwurd.
Sentence: 22 az hrōm ud hindūgān sāk ud bāǰ xwāst ud ērānšahr ō payrāyišnīgdar ud čābuktar ud nāmīgdar kard ud kēsar ī hrōmāyīgān šahryār ud *tāb ī kābul *ud hindūgānšāh ud turk xākān ud abārīg sarxwadāyān ī kustag kustag pad drōd ud šīrēnag ō dar āmad hēnd.
Copyright TITUS Project,
Frankfurt a/M, 1.11.2010.
No parts of this document may be republished in any form
without prior permission by the copyright holder.