TITUS
Novum Testamentum graece
Part No. 20
Previous part

Chapter: 20 
Verse: 1    ῾Ομοία γάρ ἐστιν ἡ βασιλεία τῶν οὐρανῶν ἀνϑρώπῳ οἰκοδεσπότῃ ὅστις ἐξῆλϑεν ἅμα πρωὶ μισϑώσασϑαι ἐργάτας εἰς τὸν ἀμπελῶνα αὐτοῦ·
Verse: 2    συμϕωνήσας δὲ μετὰ τῶν ἐργατῶν ἐκ δηναρίου τὴν ἡμέραν ἀπέστειλεν αὐτοὺς εἰς τὸν ἀμπελῶνα αὐτοῦ.
Verse: 3    καὶ ἐξελϑὼν περὶ τρίτην ὥραν εἶδεν ἄλλους ἑστῶτας ἐν τῇ ἀγορᾷ ἀργούς·
Verse: 4    καὶ ἐκείνοις εἶπεν, ῾Υπάγετε καὶ ὑμεῖς εἰς τὸν ἀμπελῶνα, καὶ ὃ ἐὰν ᾖ δίκαιον δώσω ὑμῖν.
Verse: 5    οἱ δὲ ἀπῆλϑον. πάλιν [δὲ] ἐξελϑὼν περὶ ἕκτην καὶ ἐνάτην ὥραν ἐποίησεν ὡσαύτως.
Verse: 6    περὶ δὲ τὴν ἑνδεκάτην ἐξελϑὼν εὗρεν ἄλλους ἑστῶτας, καὶ λέγει αὐτοῖς, Τί ὧδε ἑστήκατε ὅλην τὴν ἡμέραν ἀργοί;
Verse: 7    λέγουσιν αὐτῷ, ῞Οτι οὐδεὶς ἡμᾶς ἐμισϑώσατο. λέγει αὐτοῖς, ῾Υπάγετε καὶ ὑμεῖς εἰς τὸν ἀμπελῶνα.
Verse: 8    ὀψίας δὲ γενομένης λέγει ὁ κύριος τοῦ ἀμπελῶνος τῷ ἐπιτρόπῳ αὐτοῦ, Κάλεσον τοὺς ἐργάτας καὶ ἀπόδος αὐτοῖς τὸν μισϑὸν ἀρξάμενος ἀπὸ τῶν ἐσχάτων ἕως τῶν πρώτων.
Verse: 9    καὶ ἐλϑόντες οἱ περὶ τὴν ἑνδεκάτην ὥραν ἔλαβον ἀνὰ δηνάριον.
Verse: 10    καὶ ἐλϑόντες οἱ πρῶτοι ἐνόμισαν ὅτι πλεῖον λήμψονται· καὶ ἔλαβον [τὸ] ἀνὰ δηνάριον καὶ αὐτοί.
Verse: 11    λαβόντες δὲ ἐγόγγυζον κατὰ τοῦ οἰκοδεσπότου
Verse: 12    λέγοντες, Οὗτοι οἱ ἔσχατοι μίαν ὥραν ἐποίησαν, καὶ ἴσους ἡμῖν αὐτοὺς ἐποίησας τοῖς βαστάσασι τὸ βάρος τῆς ἡμέρας καὶ τὸν καύσωνα.
Verse: 13    ὁ δὲ ἀποκριϑεὶς ἑνὶ αὐτῶν εἶπεν, ῾Εταῖρε, οὐκ ἀδικῶ σε· οὐχὶ δηναρίου συνεϕώνησάς μοι;
Verse: 14    ἆρον τὸ σὸν καὶ ὕπαγε· ϑέλω δὲ τούτῳ τῷ ἐσχάτῳ δοῦναι ὡς καὶ σοί.
Verse: 15    [ἢ] οὐκ ἔξεστίν μοι ὃ ϑέλω ποιῆσαι ἐν τοῖς ἐμοῖς; ἢ ὁ ὀϕϑαλμός σου πονηρός ἐστιν ὅτι ἐγὼ ἀγαϑός εἰμι;
Verse: 16    Οὕτως ἔσονται οἱ ἔσχατοι πρῶτοι καὶ οἱ πρῶτοι ἔσχατοι.
Verse: 17    Καὶ ἀναβαίνων ὁ ᾽Ιησοῦς εἰς ῾Ιεροσόλυμα παρέλαβεν τοὺς δώδεκα [μαϑητὰς] κατ' ἰδίαν, καὶ ἐν τῇ ὁδῷ εἶπεν αὐτοῖς,
Verse: 18    ᾽Ιδοὺ ἀναβαίνομεν εἰς ῾Ιεροσόλυμα, καὶ ὁ υἱὸς τοῦ ἀνϑρώπου παραδοϑήσεται τοῖς ἀρχιερεῦσιν καὶ γραμματεῦσιν, καὶ κατακρινοῦσιν αὐτὸν ϑανάτῳ,
Verse: 19    καὶ παραδώσουσιν αὐτὸν τοῖς ἔϑνεσιν εἰς τὸ ἐμπαῖξαι καὶ μαστιγῶσαι καὶ σταυρῶσαι, καὶ τῇ τρίτῃ ἡμέρᾳ ἐγερϑήσεται.
Verse: 20    Τότε προσῆλϑεν αὐτῷ ἡ μήτηρ τῶν υἱῶν Ζεβεδαίου μετὰ τῶν υἱῶν αὐτῆς προσκυνοῦσα καὶ αἰτοῦσά τι ἀπ' αὐτοῦ.
Verse: 21    ὁ δὲ εἶπεν αὐτῇ, Τί ϑέλεις; λέγει αὐτῷ, Εἰπὲ ἵνα καϑίσωσιν οὗτοι οἱ δύο υἱοί μου εἷς ἐκ δεξιῶν σου καὶ εἷς ἐξ εὐωνύμων σου ἐν τῇ βασιλείᾳ σου.
Verse: 22    ἀποκριϑεὶς δὲ ὁ ᾽Ιησοῦς εἶπεν, Οὐκ οἴδατε τί αἰτεῖσϑε· δύνασϑε πιεῖν τὸ ποτήριον ὃ ἐγὼ μέλλω πίνειν; λέγουσιν αὐτῷ, Δυνάμεϑα.
Verse: 23    λέγει αὐτοῖς, Τὸ μὲν ποτήριόν μου πίεσϑε, τὸ δὲ καϑίσαι ἐκ δεξιῶν μου καὶ ἐξ εὐωνύμων οὐκ ἔστιν ἐμὸν τοῦτο δοῦναι, ἀλλ' οἷς ἡτοίμασται ὑπὸ τοῦ πατρός μου.
Verse: 24    Καὶ ἀκούσαντες οἱ δέκα ἠγανάκτησαν περὶ τῶν δύο ἀδελϕῶν.
Verse: 25    ὁ δὲ ᾽Ιησοῦς προσκαλεσάμενος αὐτοὺς εἶπεν, Οἴδατε ὅτι οἱ ἄρχοντες τῶν ἐϑνῶν κατακυριεύουσιν αὐτῶν καὶ οἱ μεγάλοι κατεξουσιάζουσιν αὐτῶν.
Verse: 26    οὐχ οὕτως ἔσται ἐν ὑμῖν· ἀλλ' ὃς ἐὰν ϑέλῃ ἐν ὑμῖν μέγας γενέσϑαι ἔσται ὑμῶν διάκονος,
Verse: 27    καὶ ὃς ἂν ϑέλῃ ἐν ὑμῖν εἶναι πρῶτος ἔσται ὑμῶν δοῦλος·
Verse: 28    ὥσπερ ὁ υἱὸς τοῦ ἀνϑρώπου οὐκ ἦλϑεν διακονηϑῆναι ἀλλὰ διακονῆσαι καὶ δοῦναι τὴν ψυχὴν αὐτοῦ λύτρον ἀντὶ πολλῶν.
Verse: 29    Καὶ ἐκπορευομένων αὐτῶν ἀπὸ ᾽Ιεριχὼ ἠκολούϑησεν αὐτῷ ὄχλος πολύς.
Verse: 30    καὶ ἰδοὺ δύο τυϕλοὶ καϑήμενοι παρὰ τὴν ὁδόν, ἀκούσαντες ὅτι ᾽Ιησοῦς παράγει, ἔκραξαν λέγοντες, [Κύριε,] ἐλέησον ἡμᾶς, υἱὲ Δαυίδ.
Verse: 31    ὁ δὲ ὄχλος ἐπετίμησεν αὐτοῖς ἵνα σιωπήσωσιν· οἱ δὲ μεῖζον ἔκραξαν λέγοντες, Κύριε, ἐλέησον ἡμᾶς, υἱὲ Δαυίδ.
Verse: 32    καὶ στὰς ὁ ᾽Ιησοῦς ἐϕώνησεν αὐτοὺς καὶ εἶπεν, Τί ϑέλετε ποιήσω ὑμῖν;
Verse: 33    λέγουσιν αὐτῷ, Κύριε, ἵνα ἀνοιγῶσιν οἱ ὀϕϑαλμοὶ ἡμῶν.
Verse: 34    σπλαγχνισϑεὶς δὲ ὁ ᾽Ιησοῦς ἥψατο τῶν ὀμμάτων αὐτῶν, καὶ εὐϑέως ἀνέβλεψαν καὶ ἠκολούϑησαν αὐτῷ.

Next part


This text is part of the TITUS edition of Novum Testamentum graece.

Copyright TITUS Project, Frankfurt a/M, 5.5.2019. No parts of this document may be republished in any form without prior permission by the copyright holder.