TITUS
Svan Chrestomathy
Part No. 82
Previous part

Text: 77 
Page of edition: 70 
Line of edition: 1 
77. ტყვა̈̄ლს იმჟი̄ნ ჲჷრმეჲდახ


Line of edition: 2       ჯვინალდ აშხვ სოფელხა̈ნქა მე̄რმა სოფელთე ძვირდ გარ ჲა̈რ მოშ ღჷრდა ეშხვი
Line of edition: 3    მა̄რე. ეჯღ' ე̄რე მე̄რმე სოფლა̈რ ჩვარმეჲდახ ი ვოდე საჴსა̈რს დო იკადდახ ეჩი̄
Line of edition: 4    ქორშა̈რხა̈ნქა, ეჩქად ქა დე̄მ ფიშვდახ. ხოშა̄მ ლუმღვე̄ნს ხოშა̄მ საჴსა̈რს ხაკა̈დდახ
Line of edition: 5    ი ხოხვრა̄მ, მა̈̄ჲ ღალ ხობცჷნხ, ეჯას. საჴსა̈რს თვითონ მა̄რე̄მი მჷრმი მეზგე ხადა̈̄ს
Line of edition: 6    გდა ჟახა, მა̈ზუმვა̈̄ჲს მოშ რა̈̄ქვნინა, ეჩზუმს ხაკა̈დდა. წორდ ხოხვრა̄მ ლუგვნიშს
Line of edition: 7    ძვირდ გარ ჲა̈რ ა̈ჲა̈̄სგდა. საჴსრი მჷჴდა დაბა̈რ ხა̄დ ლეჰვდი, ადო წორა̈ ლუგვენთ
Line of edition: 8    ე̄ქა დეშ ხოჰა̈̄სგდა ქვინლჷმგენე ი გა̈ნზ. მეზგე ტყვეს ჩუ ჲჷრმეჲდა, ეჩქას ჭჷშ
Line of edition: 9    ხა̈რს ჴულვა̈რს ხადა̈̄სგდა, მურყვმა̈ დილეგთესგ' ა̈̄გნა, ჟიქა̄ნ კას ხაფრენდა ი სერ
Line of edition: 10    ნარჰი̄ ლაჴა̈დ დე̄მხა̈ნ ლა̈სვ. ალ დილეგს სანტყვი̄რ ხეჟხა̈̄ნ. ტყვეს ლადა̈ღისგა აშ
Line of edition: 11    ხვ კოკორა̈ჲს ხოკვა̄ნახ ჟაღვშა̄ლ ი ლეთრად მჷცხი ლიცი მჷქაფ ტებდი ლჷც ხათრ ახ.
Line of edition: 12    ხოჩა̄მ მა̈ნკი მეზგათე ლახ ხეჴდჷ̄ნო̄ლდა ტყვეს, ეჩქას ქორს გარ ხეყა̈̄დხ, ვოდე
Line of edition: 13    საჴსა̈რს ქა დო იკადდახ. ვო̄ბა̈შინ ტყვეს სოფალშვ ი ჲჷრმეჲდახ. ჴული ნადა̈̄სგუნღო
Line of edition: 14    აშხვ ლე̄თ აშხვ მეზგაისგ' ა̄რდა, მე̄რმა̄ ლე̄თ -- მე̄რმა მეზგაისგა ი ამჟი̄ნ ხერა̈სდ
Line of edition: 15    ხოჭა̈მხ მეზგან ი მეზგან. ხვა̈̄ინ ლჷმა̈̄რ, ერე ლახე მეზგე საჴსა̈რს ღალ ქა
Line of edition: 16    დოშ იჴდა, ეჩქას ხაფხა̈ჭდახ ტყვეს, სგ'ა̈̄ჲა̈̄სგდახ სა̈ვთე ი ეჩე ქა ჰო̄დდახ ქვინლჷმ
Line of edition: 17    გენა̈̄ლღა. ტყვე ღალ ჩიგარიშდ ჩუ სედენდა უსურმა̈ნს. ჲერხი ქა̄ჲ ლჷმჩი̄ჟა̈̄ლხ,
Line of edition: 18    ლახე უსურმა̈ნი ჯვრილს ჟი ლჷმკიდვინხ ი ჩუ ლჷმფიშრო̄ლინხ. ეჯჲარე ნაბერწ
Line of edition: 19    ყა̈რ ათხეჲ ვო̄ბა̈შ ა̈რიხ სა̈ვს ი ყა̈რჩას. ჲერხის მოგვა̈რ ჩუ ხორიხ ამე ი ვობა̈შინ
Line of edition: 20    ჴედნიხ შვა̈ნთე მინე გვა̈რშჲა̈̄დვი̄ ლათა̈რთე. ამხა̈ნისგა̄ჲ ინჴრინეხ მინე მოგვა̈რ მა̄რ
Line of edition: 21    ა̈̄ლსი ამჟი̄ნ ჩუ თერხ უშხვა̄რა თხუმ.


Line of edition: 22 
მესტია



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.