TITUS
Svan Chrestomathy
Part No. 88
Previous part

Text: 83 
Page of edition: 72 
Line of edition: 31 
83. გულედა̄ნა̈რ, გულერდავა̈̄ლ ი გოლეთია̄ნა̈̄რ


Line of edition: 32       ლენჯა̈̄რა̈ მათხვმი ჯვინალდ ვიბჲა̄ნშა ლჷმა̈̄რხ. ალჲარე ვიბია̄ნ ხოლა მა̈ნკიშ
Line of edition: 33    ლჷმა̈̄რლი. ყვილჲე̄რისგა სამრაკვა̈ ჰა̈ზვისგა მუსი მურყვმა̈ ლიგემ ხა̈მთქვე̄ნახ.
Line of edition: 34    აშხვ ზავ მურყვმა̈ ლაგა̈მჟი̄ნ მუსი ყვაბშვ ლიყვა̄ბუნა̈̄ლ ხა̄რახ, ამჟი̄ნ გულედა̄ნრე
Line of edition: 35    ხოშა̄მ უმბილდ ფუსდ ვიბია̄ნშე̄რ დი̄ნად ხოყრა ყვაბ თანვისგა ი ქ'ო̄ხხი̄პა. ალა
Line of edition: 36    გუნ ოთხჷ̄რა ვიბჲა̄ნს ი ხა̈კვდა მიჩა გეზლა̈ თემი მჷხპე̄მი დაგრა, მარე ალ გულედა̄ნს
Line of edition: 37    ი ჲარვ მიჩა ლახვბას ქ'ო̄თო̄ტახ ი ქორ ი ლიზგე ჩ'ოთცვი̄რახ ღალ. ალჲა̈რ
Line of edition: 38    ლჷმზიგხ, ათხე ჩუბე ქაუშა იზგეხ, ალ ქორისგა. ა̈მჩედე̄ლიხ ალ სემი ლახვბა,
Line of edition: 39    სგა̄თჴადჷ̄ნე̄ნახ ლეჩხუმთე ი ამე ნაკურალე̄შ ჩვალზიგე̄ლიხ. ობა̈შ ხა̈ნ ა̈მჩედე̄ლი
Line of edition: 40    ი ხოშა̄მ მუხვბა ვიბია̄ნშე̄რ დი̄ნა̈̄ თე̄მი მჷხპა ნა̈̄თი̄შ ი ქორა̈ საუდ ახჴედა. სგა ლოხვჭე̄ნა
Page of edition: 73  Line of edition: 1    აშხვ ლადა̈ღ თვენთნე ჴა̈ნ, ლოხვბინა ლიჴედ ი სგა̈̄მჩედ ლენჯა̈̄რთე̄'სგა. ქორთე
Line of edition: 2    მა̄მ ოთსიპა, ამჟი̄ნ ჟ'ა̈მჩედ ელმჷყთე ი ამეჩუ̄ნ ელდ ჴა̈ნ სგა ლოხვბა. ოხვმეჴრახ
Line of edition: 3    ალა სოფლა̈რს. აჩა̈დხ ესნა̈რ ჟი ი ამეჩუ̄ნ ალ მა̄რე ჩვესხვი̄დხ. ესბა̈ც ესნა̈რ
Line of edition: 4    თხვიმ მა̄რა̈̄ლს: "მა̈დილუ ხე̄რიხ ი ვიბია̄ნ მახვშისუ ხა̈̄ქვხ: მიჩა თხვიმ ელისუ ხასა̈̄რვინე
Line of edition: 5    ი ნა̈ბუ ლახვე̄მ ქორთე ლიტეხიშ". ალ მა̄რა̈̄ლ ანჴა̈დხ ესნა̈რ, ესბა̈ცხ ვიბია̄ნს:
Line of edition: 6    "მა̈დილუ ხე̄რა ი სგა̄ვ ლა̈ჲჴჷ̄რვნე ალ მა̄რე! მიჩ ესერ ალა შგურდ მა̄მ ხეხო̄ლი
Line of edition: 7    ი მა̈დილდ ა̈ხხო̄ლა. ეჩჷნქ' ე̄სერ ალა ხოჩა ჴელვა̄ნ მა̄რე ლი ი ლა̈ჲსჷრგებლე̄ვ
Line of edition: 8    ამი თხვიმ, მა̈ჲ ესერ ხაშა". მარე ვიბია̄ნშე̄რ ვა̈რგს ფე̄დიათე მა̄დ ლოხვთი̄ლა
Line of edition: 9    ალჲარე ლიჴჷ̄რა̈̄ლ.

Line of edition: 10       ანჴა̈დ ეჩქას გულედა̄ნ ი ხა̈̄ქვ სოფლა̈რს: "ალ ჴა̈ნ ესერ ეში̄ ჟი̄ვ ლახმა̈ზრეხ
Line of edition: 11    ელს ი ჯ' ე̄სერ ღალ ადრი, ჲაღვ' ე̄სერ მა̈ჲ ჩვემნეს". ლა̈ჲბინ' ე̄სნა̈რ ი მჷგნა̄ლა
Line of edition: 12    სგა ხონჴრიხ. ალ დვრევჟი̄ნ ვიბია̄ნ მურყვამს ლჷმგა̈მვინ ი ჩუბე ლაჴვრა ჩუ მეცვრე
Line of edition: 13    ხა̄რახ ჴელვანა̈რს. ჩირთჷლდთექა იჰა̄ლხ, ეჩქას ათხა̄დ ესნა̈რ გულედა̄ნს: "მიჩა
Line of edition: 14    ქა ლირკა̈ლივშ ესერ მა̈ჲ ლა̈ხქემნი ვიბია̄ნ ფუსდს. ჩვესერ ჰა̄ვ ლოხგვა̄ვა̈̄ნ, მურყვამ
Line of edition: 15    ესერი ჟი ლჷჴცე ხა̄რ, ამის ესერ ჯა ჟ'ოხვმეწვნი̄ს" ი აჩა̈დ. ღვეშგდ მუჭო̄ნა̄ლა̄დ
Line of edition: 16    ესნა̈რ ქ'ო̄ხუმბავეხ ალ ამბვა̈რ ვიბია̄ნს. "ჲაღვ' ე̄სერ მურყვამს ჟი ჰე ხომწვინე,
Line of edition: 17    სგა̄ვ ლა̈ჰი̄დხ ი ჟი̄ვ ესჭო̄ნნეხ!" ლახსგურ' ე̄სნა̈რ ეშხუ მა̄რე ჰილვს ი ათღვა̈ჭვნე.
Line of edition: 18    კა̈ხშია̈̄ნის სგა̈̄ჰი̄დ ესნა̈რ ი ხა̈̄ქვ: "ვიბია̄ნს ესერ ჟ'ოხვია̈დრა მიჩა ქა ლი̄ზი.
Line of edition: 19    სგ'ე̄სერ იხნი ი ჟი̄ვ ესჭვე̄ნ."

Line of edition: 20       გულედა̄ნრე ხოშემნე̄მ ჟ'ესჭვე̄ნ ესნა̈რ ი სგა̄ნჴა̈დ მიჩა ქორთე. ეჩქანღო ლახა̄დ
Line of edition: 21    ესნა̈რ ი ქა მეცვბე ჩუბე მურყვამა̈ ყო̄რ ქ'ა̄ნგე, მე̄რმა ა̈გიქა ოხვცვიბ ყო̄რ,
Line of edition: 22    მურყვამ ჟ'ოხვმეწვნე, ჩ'ო̄თგე ი სგა ლახბა̈რჲე ამჟი̄ნ. ეჩქანღო სერ ვიბია̄ნს მასა̈რდ
Line of edition: 23    ხალტე̄ნა ალ მა̄რე ი ლილზიგა̄ლე ნა̈ბ ლოჰოდა. ალ გულედა̄ნრე ხოშ' ე̄სნა̈რ
Line of edition: 24    ჩვა̈დზიგა̈̄ნ, ქ'ა̈̄დჩი̄ჟა̈̄ნ ი ჩვა̈დგეზლა̈̄ნ. გუნ ხოჩა ლიზგე-ლირდ' ო̄ხვსყა ი მურყვამი
Line of edition: 25    ჩ' ო̄თგა. ალ მურყვამ ათხე̄ჲ ეზერდ ლჷგ. ვიბჲა̄ნშა მურყვამი ეზერდ ლჷ̄გა̈ნ,
Line of edition: 26    იო̄რი ყო̄რ ქა ხეთრი̄ნდა, მარე და̈დავშე̄რემ ბა̈ჩა̈ გუ̄ღა ჩვარიღვხ ი ათხე ნამჴიჩვ
Line of edition: 27    გარ ხასიდ. ვიბჲა̄ნშა ქორ ათხე̄ჲ ჩუ ლჷგ ი ეჩე̄სგა თევდორე და̈დავშ' ა̈̄რი.
Line of edition: 28    ლეჩხუმს ლახვბ' ა̄თსედა გულედა̄ნს, ეჯია̈რს ახმა̈ჭრინე̄ნახ შვა̄ნთე ლიჴედ ი
Line of edition: 29    ჩვა̈მსედხ ნაკურალე̄შ. ეშხუ მუხვბე საკუთარდ ალზიგე̄ლი, ეჩე, ქ'ა̄ლჩი̄ჟე̄ლი ი
Line of edition: 30    ეჩი̄ ნა̈თსა̈ვ ნაკურალე̄შ ი გვესოს იზგეხ, გვა̈რდ გოლეთია̄ნა̈რ ლიხ ი ფიშირ მეზგე
Line of edition: 31    ლიხ. მე̄სმე მუხვბე ზა̈ნთ' ა̈̄მჩედ, ეჩე ლახლატა ლარდად ი ეჩ'ა̄ლზიგე̄ლი ი ქ'ა̄ლჩი̄ჟე̄ლი.
Line of edition: 32    ეჩი ნა̈თსა̈ვ ათხე ზა̈ნს (ლიას, ჭკადუა̄შს ი იშგნა̈გ) იზგეხ. ობა̄შ ფიშირ
Line of edition: 33    მეზგე ლიხ ი გვა̈რდ გულერდავა ხა̄რხ. ლენჯა̈̄რ ალზიგე̄ლი, ალა გუნ ლიმა̈ჩვდ
Line of edition: 34    ლჷმჷრდე̄ლი ი ჩვლდაგა̈რ. ამის ათსედა ჲო̄რი ჭყინტ გეზალ: გუვა ი გულედა̄ნ.
Line of edition: 35    გუვა ქორა̈ მჷშა̈ჲ ლჷმა̈̄რ ხოშა ი გულედა̄ნ ქამა̄ვ მეზელა̈̄ლ ი მჷქმე. აშხვჟი̄ნ გუ
Line of edition: 36    ლედა̄ნ ყა̈რჩათ' ა̈̄მჩედ ლა̈ქმათე. გუვ' ე̄სნა̈რ ელმჷყთ' ი ბაჩა̈რს იბჷრჯე ელმჷყ ლა̈ლგიმა̄ლდ.
Line of edition: 37    ბაჩა̈რს კაპა̈რჩუ̄ნ შიდ' ე̄სნა̈რ ბა̈ბილა̈̄ნითე̄სგა. ანკვა̈რ ესნა̈რ ეშხვი.
Line of edition: 38    კვილ ი ბა̈ბილა̈̄ნითეჩუ̄ნ ჩვანჴა̈დ, ეჩქას ხვა̈ჲ ა̈გის ათთუფნე̄ნა ორჩუ̄ნ. ნა̈ბოზს
Line of edition: 39    ა̈გითეშა̈̄ლიდ ა̈ნწვე̄ნ ე̄სნა̈რ ალ ბა̈ჩ ი ალა ჩეი ლჷმა̈̄რ. ა̈გით' ა̄ნჴიდ ესნა̈რ, ჩვადჰინე
Line of edition: 40    ი ამხა̈ნქა ლჷლღენ ი კარდლა̈რ ანშკა̈̄დ, ეჯა მა̈გ ა̈ხფას ა̄ლ კვილს. მუჟღვერ
Line of edition: 41    ესნა̈რ გულედა̄ნი ანჴა̈დ ლა̈ქმახა̈ნ ი ქვილჷმგენა̈̄ლ ანჴიდ ი შიშდ ლიმდუნე ლოხ
Line of edition: 42    ბინე გუას: "მიჩ ესერ ალა მა̈გ კუმა̈შ ოხვჴი̄და, ჯ'ე̄სერ დე̄მგვაშ იჩომ ქორისგა ლიდჲარა̈̄ლჷნქა.
Line of edition: 43    ეჩქას ესნა̈რ ანჴად გუა ი მიჩა ნაშკა̄დვ ლჷლღენ ი კარდლა̈რ ხაწვე̄ნე.
Page of edition: 74  Line of edition: 1    ოხჩჷ̄დხ ესნა̈რ ამეჟი̄ნ ლიცლა̈ვჲე̄ლ ი ჩვა̈დი̄თა̈̄ნხ. უ̄თა ქორ გულედა̄ნს ხა̈ხვიე̄ნა
Line of edition: 2    ი ნა̈დვა̈რ -- გუას. გუა ჟ'ანხჴა̈დ ესნა̈რ ნე̄სგუნთე ი გულერ ჩვა̈დზიგა̈̄ნ, ათხე
Line of edition: 3    რაჟდენს ქორ ხუღვე, ალ' ა̈̄დიგ ესნა̈რ.

Line of edition: 4       გულედა̄ნა̈ ნა̈თსა̈ვ ლიხ: ო̄თხვ მეზგე ქაუშერა , ჲო̄რი მეზგე გურმაჩშა ი ეშხუ
Line of edition: 5    მეზგე კა̈რშა̈რ. მა̈გ-იშგვიდ. გუვა̈̄ ნა̈თსა̈ვ ლიხ: ეშდარა მეზგე -- ტიტიშა, ჩხა̄რა
Line of edition: 6    მეზგე -- და̄და̈შვა, სემი მეზგე -- სოლთანშა ი ეშხუ მეზგე -- ხვა̈შა̄ლშა. მა̈გ სემეშდ
Line of edition: 7    მეზგე ლიხ.


Line of edition: 8 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.