TITUS Texts: Svan Chrestomathy (I: Upper Bal)

TITUS
Svan Chrestomathy (I: Upper Bal): Part No. 17

Text: 16

Line of edition: 27

16. ლიტბლი

Line of edition: 28       ლიტბლი ჯვინალდ ჩიჲა̈გ (\\ ჩიაგ) შალ ხახლე̄ნახ, მარე ჩია̈გ ჩუ ლ̄შდნე
Line of edition: 29    ლი ი მესტია̄ლა̈რს გარ ხოგიჭხ, ეჯა̄ ჩი̄ მა̄მა, მოლჯგრა̄გას გარ ხაცვირხ, ეჯჲა̈რ
Line of edition: 30    გარ იჩოხ.

Line of edition: 31       ჯვინალდ დაბა̈რი ხუღვა^̄̈ნხ ლელტაბილ. ალ დაბა̈რს მა̈ჲ ეშხუ მეზგ' ა̄ჴა̈ნდა
Line of edition: 32    ი მა̈ჲ მე̄რმე ი იხრესჲა̄ლხ. ქა ჭმინს გარ ხალა^̄̈შდახ ი ალ ჭმინს ჩვაჰრა̈ყდახ. მა̈ზუმ
Line of edition: 33    ფიშირ ხუღვა^̄̈ნხ დაბა̈რ, ეჩი̄ზუმ ფიშირ ლიტბლის იჩომდახ.

Line of edition: 34       ჲერხი მეხვტე მა̄რა^̄̈ლ და̈ბს ცვირახ ობა̈შინ ლელტაბილდ ი შომვა^̄̈ჲ ლიტბლის
Line of edition: 35    იჩომდახ, ეჩქა ეჯ და̈ბი მუცვრა მა̄რა ჩიქე ქა ხოფა̄ნახ ჰარა̈ყს ი ისგ ტაბგობჟი̄ნ
Line of edition: 36    ლაშნდობა̄რს ხა̈ჭმინახ. ფიშირ და̈ბ ესვა^̄̈ ხუღვა^̄̈ნ ლელტაბილდ, ეჩი̄ მაფასვხა̈ნქა,
Line of edition: 37    ჲერხი ნამშა̈ჲს ლა̈ჲსა^̄̈ლღა ჰედვდახ, ეჯჲა̈რს ჩვა̈ჲსენდახ, დიჲა̈რს ქორხა̈ნ ჴიდახ,
Line of edition: 38    ეშვა̈ი ხერა̈ს ლა̈სვ ლიტბლი, ეჯ მეზგაისგა ჩუ ინზო̄რა̄ლდახ ი ხა̄დხ ლიმზირ
Line of edition: 39    ი ხინ.

Line of edition: 40       ათხე მე̄რმა ნუკვიშდ იჩოხ ლიტბლის. მოლჯგრა̄გა ქა ითშის ლა̈ჲსა̄ლე მყდის,
Page of edition: 15 Line of edition: 1    ალჲა̈რ ხეთხე̄ლიხ სოფელისგა ხოჩა̄მ ლუგვა̈რ ლა̈ჲსას. ჟი ითხე̄ლიხ, ეჩქა სგა
Line of edition: 2    ხერგივა^̄̈ლხ ლა̈ჲსა̄ლე ფუსნა^̄̈დუს მუჟღვრეში ნამშა̈ჲღა. იმვა^̄̈ჲჟი ჩუ ირგივა^̄̈ლხ, ეჯ
Line of edition: 3    ნამშა̈ჲს უგუნზიგვდ ჟი ხოზვრიხ ი მაჴვმა^̄̈რს ცვირეხ ლა̈ჲსა^̄̈ მყდის, ქა̄ჲ ა̈წსიხ ლიტბლითე.

Line of edition: 4       ლა̈ჲსა^̄̈ლს, ხოშა ლაღა̈ლდ ჴანა̈რს იყდიხ, მა̄დეჲ ფუკვა̈რს ი იშგან ნეცინ მანგა̈რს
Line of edition: 5    ი ჩვა̈ჲსენიხ, ეჩქას ალ ლა̈ჲსა̄ლე გვერა^̄̈ლღა ჰარა̈ყს იყდიხ.

Line of edition: 6       ზა̈რვლა̈რ ქა ლთიშ ლიხ. ალჲა̈რ ლეღვა̈რს, მა^̄̈ჲ მოშ ხაკუხ ლეზობდ ლა̈მზრჟი̄ნ,
Line of edition: 7    სგა ხაგემხ კარდლა̈რთე, მა^̄̈ჲ მო̄დე, ეჩას ზსყიდ ჩვა̄თა^̄̈ლიხ მეზგე̄მი ქუნჟი̄ნ.
Line of edition: 8    ყვიჟა^̄̈ლს ზა̈რვლა̈რ იტყბეხ, ჟი ხა̈მზრიხ ი ჩუ იზბიხ სგვებნა̄ვ. ლეღვა̈რ ჩუ იჯბიხ,
Line of edition: 9    ეჩქას მა^̄̈ჲ მეზგაისგა ლიტბლი ხა̄რხ, ეჩხა̄ვ ჴედნი მა̈გ. თვით მეზგახა̈ნქა ი დიჲა̈რ
Line of edition: 10    ახღვა, ჩუ ისგვრა^̄̈ლ მა̈გ. ეჩქა^̄̈ნღო ხოშა^̄̈ლ ჰარა̈ყს ი ლემზრა̈რს ჟი ხა̈მზრიხ, ეჩქანღო
Line of edition: 11    ლეღვს, დიჲა̈რს ი ჰარა̈ყს ქა ხოფა̄ნეხ მინე ხოშა^̄̈ლს, ამ ლიტბლი̄ მუცვრა
Line of edition: 12    ი ჩუ ისგვრიხ ლახრჯა̄ლდ. ხინუნღო ჩუ ფხეჟნიხ.

Line of edition: 13          ლენჯა^̄̈რ

Copyright TITUS Project Frankfurt a/M 1999-2000. No parts of this document may be republished in any form without prior permission by the copyright holder.