TITUS
Svan Chrestomathy
Part No. 135
Previous part

Text: 130 
Page of edition: 104 
Line of edition: 12 
130. ლილა̄ტუნა̈̄ლ ი დაგრობ


Line of edition: 13       ლილა̄ტუნა̈̄ლ, ალა ჩიგარ მჷრე̄ს ლა̈სვ ი ჯვინალდი ლჷმა̈̄რლი. აშხვ მახაღვა̈ჟს
Line of edition: 14    ესნა̈რ ხალა̈ტ აშხვ მეზგე̄მი დი̄ნა. ალა ჩი̄ ჩუ ხახლე̄ნა ი ღვეშგმე პილს გარ ოთკვი̄ჰახ
Line of edition: 15    დი̄ნა̈̄ ქორშა̈რს. ამი ლაჯმილას ი ნა̈̄თია̈რს საერთოდ ჩი̄ ხასდიკხ მინე ჰასშვე̄მი
Line of edition: 16    ლილა̄ტუნა̈̄ლ ი ლახე ტარესვ ხოჴდენიხ, ეჩქას ზურა̄ლა ლელა̈ტს ლეყა̈რდ დე̄მის
Line of edition: 17    აზა̄რეხ ი ლახე სგა ხებჭა̈̄ნი დი̄ნა მახაღვა̈ჟს, ეჩქას ხოშა ლაღა̈ლს დაგრობ ხეფსი.
Line of edition: 18    ღო ალ დი̄ნა̄ჲ ესნა̈რ სგა̄ჲ ლახბიჭა̄ნე̄ნა ალ მახაღვა̈ჟს ი გუნ ლასკო̄რათე̄სგა
Line of edition: 19    ლჷმა̈̄რ მეშყდე, მარე იმ იჩომდა. აშხვ ზავ ელმჷყ ჰჷლიშ ლადა̈ღ ალ მახეღვა̈ჟი
Line of edition: 20    აჩა̈დ ამხა̄ვ. ამეჩუ̄ნ არიხ ესნა̈რ ი ლენჯა̈̄რ მურგვა̈ლ მა̈გ ლჷმა̈̄რდ. ალ მახაღვა̈ჟს
Line of edition: 21    ქა ხეწა̈დხ, ეჩქას ჟ'ანვა̈ზრეხ ეჩი̄ დაგრა.

Line of edition: 22       ჰჷლიშ ლადა̈ღ ლჷგრათე ლითოფ ლა̈სვ ლუშნუ თოფარშვ. ალ მახეღვაჟი ქა
Line of edition: 23    ლახსგურდა ლჷგრათე ლათოფს, ეჩქას ანჴა̈დ ესნა̈რ ლჷბჭა̄ნე დი̄ნა̈̄ ჯჷმილ, ლა̈ჲკაჩე
Line of edition: 24    თვეფ ი ჯაჭა̈რისგა ხაჴიდ მჷბჭა̈̄ნის. ქა ნა̈სკინვ თვეფი ცხვი ესნა̈რ უმბილდ
Line of edition: 25    მე̄რმა მეზვბელს ათხვი̄დ ი ერქჷდა ჩუ ადგანხ ამეჩუ̄ნ. უმბილდ ლედგა̈რია̈ ქორშა̈რდ,
Line of edition: 26    მა̈ჲ საკვრელ ლი, გუნ ა̈დვა̈შგდეხ ი ჩიგარ ხედრა̄ლხ მჷდგა̈რის ლედგა̈რიდ,
Line of edition: 27    მარე დე̄მე მოშ იდრენდახ, აშხვჟი̄ნ ა̈ცხირხ ესნა̈რ, ერე ბა̄ზი მჷდგა̈რი ლატლის
Line of edition: 28    ა̈რი ი ხაკუ, ერე ანჴეს ქორთე. ანჴა̈დხ ლედგა̈რია̈ ნა̈̄თია̈რ, ოთდარჯეხ სოლა̈ ლექვე̄რისგა,
Line of edition: 29    ლახა̄სდხ ამექა მჷდგა̈რი ი ჩვადგა̈რხ.


Line of edition: 30 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.