TITUS
Svan Chrestomathy
Part No. 137
Previous part

Text: 132 
Page of edition: 105 
Line of edition: 1 
132. ბაბში ი ჭიტი


Line of edition: 2       ბაბში ი ჭიტი ეჯკა̈ლიბ ქვით ლჷმა̈̄რხ, ერე მა̈გ ჰარყრს ლჷგნე ხა̄რახ ლა̈ქვთა̈რს
Line of edition: 3    ბაბში̄ ქორ ათხე ჟი მეხვტე ლი ი მე̄რმა ხუღვე, ჭიტის გეზლა̈ გეზლი̄რი ჩუ
Line of edition: 4    ოთსა̈დ.

Line of edition: 5       აშხვჟი̄ნ ესნა̈რ ბაბში̄ს ქორისგა ლე̄ღა̈ბ მა̄მ ხორი. მიჩა ხახვენ ხა̈̄ქვ: "მა̈̄ჲ ესერ
Line of edition: 6    ხეშდენი̄ხ აღბიე̄რისგა ლე̄ღა̈̄ბურდ? "ეჩი̄ ღედ ესერ ნომმა̄ვ ხა̄რ". ანჷ̄გა̈̄ნ ესნა̈რ
Line of edition: 7    ვებილე̄თ ი აჩა̈დ მჷლახთე. ამეჩუ̄ნ აშხვ ხეხვ-ჭა̈შს ესნა̈რ მახელჷზიჰ ტა̈ხ ქა ხორიკხ
Line of edition: 8    კა̈ვჟიხ. ლა̈ხცა̄დ ესნა̈რ ქორთე̄'სგა ბაბში, ჟ'ა̈ნკიდ ალ ტა̈ხ მურგვალ, სგ'
Line of edition: 9    ე̄სდე ბიდთე̄'სგა ი რიჰდ ა̈გით' ა̄ნჴიდ.

Line of edition: 10       ალ ბაბში ესნა̈რ ალჲა̈რშე̄რემ ნიბა̈̄შინ ლჷმა̈̄რ ი მე̄რმა ლადა̈ღ ესნა̈რ ალჲა̈რშე̄რემ
Line of edition: 11    ლეღვი ნა̈ქვიც ოთზჷზეხ. ალჲა̈რს ხოხახ, ერე ლეღვ მა̄მ ხერდი ბაბშის. ბაბშიდ
Line of edition: 12    ხა̈̄ქვ ესნა̈რ ლეღვი მჷჴდა: "სგა̄ვ აჩა̈დ ქორთე ი ჟი̄ვ ა̈ნწვე̄ნე მიჩა ლე̄ღა̈ბ, მინეშდ
Line of edition: 13    ხოდრა ლე̄ღა̈ბ ესერ ჰემმა ხერდი. მინე ლეღვი შ'ე̄სერ მა̄მ ხაკუჩ მიჩ".
Line of edition: 14    სერ მე̄რმაჟი̄ნ ესნა̈რ ჯა-ჲ ჭიტი აჩა̈დხ აჯაღ ლა̈მახვა̄ლთე. ა̈დმა̈ცხეხ აშხვ მეზგაისგა
Line of edition: 15    ტახი ფელკა̈რ გარ მა̄დე ი ჴანა̈რი. ჭიტი ციცვშა̄ლ ლჷმა̈̄ზ ლანგვლიისგა,
Line of edition: 16    მე̄რმე და̈̄რ მოშ. ანჴა̈დ ესნა̈რ ჭიტი ი სგ'ა̄ჩა̈დ ლანგვლიისგა ი გვალისგა ჴანა̈რ უშხვა̄რ
Line of edition: 17    ნე̄სგა ჩვადყურდა. ალ ქორა̈ ზურალა̈̄რ ესნა̈რ ირბიე̄ლხ ი მეყულფა̈̄ შელდ
Line of edition: 18    ქუთვარე ნა̈ჩდუნ ქა ლუნჩუდნა̄ლე ხა̄რხ. ანჴა̈დ ესია̈რ ჭიტი ი სემი თა̈ში ნა̈ჩდუნ
Line of edition: 19    ქ'ო̄თქვით, სგ'ა̄დჲე გვალთე. ჲო̄რი ყვაბ ბაბშის ათბიშ' ე̄სნა̈რ ლანგვლიქა ი ეშხუ
Line of edition: 20    მიჩნე̄მ ლალე̄მ ი ჴანა̈რ უშხვა̄რ ნე̄სგა ჩუ̄დ ადყურდა. მერბიე̄ლ ირბიე̄ლ ესნა̈რ.
Line of edition: 21    ხეწა̈დ ნა̈ჩდუნვა̈რს ი მუნჩუდნა̈̄ლს ლა̈ხჭვედდა: "შელდს ესერ იმღა ხაკლიხ ნაჩდუნვა̈რს?"
Line of edition: 22    "ეჯ' ე̄სერ იმჟი̄ნ ლი?! მიჩ ესერ მა̈გ ქ'ო̄ხვნა̈ჩდუნა̄ლა". "ჲაღვ' ე̄ ხა̈
Line of edition: 23    მა̈ჲ ლ'ა̄ლა̄, შელდს ქა ხაკლი?!" ოხჩჷ̄დხ ესნა̈რ სერ ალჲა̈რს ლიცვა̈̄ლ ი ხია̈̄რ როფდ
Line of edition: 24    ლახგენე̄ნახ უშხვა̄რ. მა̄მა სერ ი ბა̄ზი ჩვა̈დვახშმა̈̄ნხ, ჩვადუ̄ჟდახ, მა̈გ ეჩქას ესნა̈რ
Line of edition: 25    ანჷ̄გა̈ნ ჟი ჭიტი, ადკარე ჩუ ყო̄რა̈რ, მაჩე̄ნე ჴა̈ნ ჟი ლა̈ჲფიშვდ ი ქ'ა̄ნჴიდ ქა̈̄მთე.
Line of edition: 26    ლა̈ხტახ ეჩქანღო ი ტა̈ხი ფელკა̈რი ჟი ლა̈ჲცვე ი ეჯჲა̈რი ქ'ა̄ნჴიდ ქა̈̄მთე. ლოხჴერდახ
Line of edition: 27    ესნა̈რ უშხვა̄რ ი რიჰდ ა̈გით' ა̄ნჴა̈დხ.

Line of edition: 28       აშხვჟი̄ნ ესნა̈რ აჯაღ ლოხჴერდახ უშხვა̄რ ბაბში ი ჭიტი ი აჩა̈დხ მჷლახთე.
Line of edition: 29    აშხვ მეზგა̈ისგა ბაბშის ლვერი ფელკა̈რ ოთმა̈ცხა̈̄ნ ი ეჩი ლიქვთერ ლახვა̈ზრეხ
Line of edition: 30    უშხვა̄რ ალჲა̈რდ. სგა ლა̈ხმუშგვარხ ესნა̈რ ალ მეზგა. ბაბში ქა̈̄მთ ა̄ჩა̈დ ი ლაჴვრამჷყ
Line of edition: 31    ოხღელი, ჭიტიდ ფელიკ ჟ'ა̈ნკიდ ი ლაჴვრაქა ლიბშე ხაკუჩ, მარე ქა დეშ
Line of edition: 32    ხასკდა. სგ'ა̄ნტა̈ხ ბაბში ი ჩუ̄დ ადყურდახ. ჭიტიდ ხა̈̄ქვ: "დეშ ახსკჷდა̈ი გეზალ,
Line of edition: 33    მა̈ჲ ესერ ჩვემინეს?" "ჩუვ ა̈დთჷ̄რ ისგდ ნაჭკორი გეზალ! მა̄მ ესერ ხოხალა?" ლა̈ ჲბინეხ
Line of edition: 34    ლიცვა̈̄ლ. ბაბშის ათხა̄დ: "ჯ' ე̄სერ ამი̄ცახა̈ნ მეგნე მა̄მ ლი" ი მუგვრიდ აჩა̈დ.
Line of edition: 35    ქორს ჩვადუ̄ჟდახ, ეჩქას ანჴად ჭიტი, ფელკა̈რ ჩვაჭკვერ ი ეჩჟი̄ნ ქ'ა̄თბიშე
Line of edition: 36    ბაბშის ლაჴვრაქა. ბაბშიდი ჟი ლა̈ჲცვე ი ა̈გით' ა̄ნჴიდ. მე̄რმა ლადა̈ღ ჭიტი დო̄სგ
Line of edition: 37    ანჷგა̈ნ, მა̈ინძელს მაჴვა̄მ ხა̈̄ქვ ი ა̈გით' ა̄ნჴა̈დ.


Line of edition: 38 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.