TITUS
Svan Chrestomathy
Part No. 154
Previous part

Text: 149 
Page of edition: 126 
Line of edition: 37 
149. ლა̈ჯშა̈რ ი მიჩა სა̈ხმახა̈რ


Line of edition: 38       კული̄ ლიჯიშს ობა̈ ჭირ ხაკუჩ. ალა ზურა̄ლს გარ ხამა̈ჯრვ ი ღვეჟმა̄რე დე̄მ
Line of edition: 39    ჩიქქას ხაშდბა ლილთეს ი ლიჯიშს ამგვა̈რ-ეჯგვა̈რ მა̈̄ჲ ი̄რი ეში̄.
Line of edition: 40    ლახე ჲერვა̄ლე ღვეჟმა̄რე ლილთეს იჩო, ეჯას მა̈გ ლა̄ცვდ ი ლასყვა̈დურდ იკედ
Line of edition: 41    ი დი̄ნო̄ლს გარ ხაყლეხ.
Page of edition: 127  Line of edition: 1    ღვეჟმა̄რე̄მი გვეშ ლი ლა̈ჯშა̈რე ლიტა̄ბე, ლაცხნი̄რი ლიჩვემ, დაფრეშ, უ̄ღვა̈̄შ
Line of edition: 2    ი მარქვარე ლიტა̄ბე, ლაღბაბა̈̄იშ, ლათდვი̄რიშ ი ზექი მასლარე ლისყე̄ნე.
Line of edition: 3    ლა̈ლჯვმა̈რს ზურალა̈̄რ იჩოხ ი ღვაჟა̈რს დე̄მ ინჩჷდეხ ეჩი ლაჩომთე. საკენზე
Line of edition: 4    ლა̈რსი ზურალა̈̄რ აშდრა̈ნიხ ქანხა̈ნქა.

Line of edition: 5       ზურალა̈̄რ სგვებნავ მა̈ტყს ჩვაბძღჷნეხ, ეჩქანღო ლა̈ფთი̄რშვ ჩვა̈ფთიხ, ღო
Line of edition: 6    ლახე ხათერხ, ეჩქას ჩუ აპენტა̈ვიხ, ეჩქანღო მა̄დხვა̈ჲ-მა̄დხვა̈ჲ ტჷფხელდ ჟ'ასყე̄ ნეხ
Line of edition: 7    [კალა̈რდ ასყე̄ნეხ ლაფეთჟი̄ნ] ი ეჩჟი̄ნ სგა ხაწკტენიხ ცხიკთე̄სგა. ეჩქანღო ჩე̄რიჩერშდას
Line of edition: 8    იკედხ ი ა̈ლთეხ.

Line of edition: 9       ლახე ზურა̄ლს ხვა̈̄ჲ ლელთე ხუღვე, ეჩქას ჩუ ინდენი ლა̈̄თშვ ი რიჰდ ა̈ლთეხ
Line of edition: 10    ჯაჲ მიჩა ნადა̈რ. ლა̈ლგენ ლე̄თ იმქარა̈̄ლხი ადუ, ერვა̈̄ჲ მოშ მაშე̄ნა̈მ ლათჷ̄თას ადლეთნეხ.
Line of edition: 11    მჷლთა ზურა̄ლს, ოშვა̈̄ჲდ ლათჷ̄თა ხაკუჩ კვილია̄ქდ, ეჯზუმს ჩვა̈ლთე.
Line of edition: 12    ლათჷ̄თა ხაჟხა ჩე̄რის ლუჭვე̄ნ ნალა̈თვს. ეჩქანღო ჲარვ ლათჷ̄თას სგა დე̄სგი
Line of edition: 13    სა̈ტრთე, თვით პილს ჟი ხოთხე̄ლი, აშხუდ ხეგვდირნი ი ჟ'აკუ̄კვე. ჲარვ ლათჷ̄თას
Line of edition: 14    ეშხუ კვიკვ ხეფსი ჲორი ლჷფა̈ჲ. ოშვა̈̄ჲდს ახფა̈სნე ნალა̈თვ ლათჷ̄თა̈̄ლს კუკვა̈რს,
Line of edition: 15    ეჩშელდს ჩი̄ სა̈ტრთე დე̄სგი ი ეჩქანღო ლინჩრეს იბნე. ლანჩრიჲა̈ ჩე̄რი ხონგრა
Line of edition: 16    ი ხოჯვდა ლი ი ჩერშდაჲ ზექიშ ლი ი ხოშა ლი.

Line of edition: 17       ლანჩრაჟი ჩუ ისგვრი ზურა̄ლ კჷლთხი ა̈დგილჟი̄ნ ი ეჩხა̈ნჩუ ლინჩრეს იბნე.
Line of edition: 18    ლანჩრაჟი̄ნ მა̈̄ნკვი მა̈შკჟი̄ნ ა̈სპუნე ჩე̄რის, ეჩქანღო ჩუ ფიშვდე ჩუბა̄ვ ი შომვა̈̄ჲ
Line of edition: 19    ხათერ, ერე ათხე კი ლჷნჩრე ლი, ეჩქას ჟი იტხე ჩერის. ნანჩჷრვს ჩიქე ტოტქა
Line of edition: 20    იჭვე̄ნი ი ეჩქანღო ეჩხა̈ნქა სგა ხაჭვე̄ნი ჩერის. შომვა̈̄ჲ ლანჩრას ქ'ა̄სრულე, ეჩქას
Line of edition: 21    აჯაღ კვიკვდჷდ იტხე.

Line of edition: 22       ლანჩრას ჲარვ ფხულაისგა ინხენი ჭიშხიშ ი ეჩხა̈ნქა ქა იტხე კვიკვდ.
Line of edition: 23    ოშვა̈̄ჲდ ლანჩრა ხეღვე̄ნი, ეჩშელდ კვიკვ ისყი. ალ კუკვა̈რს ლახე წიდა̈̄რს
Line of edition: 24    ხათერ, ეჩქას ლაღბაბი̄რჟი̄ნ ხაჭვე̄ნი ი ღჷბა̈ბ ხეფსი.

Line of edition: 25       ლაღბაბა̈̄რ ხაჟხა ამის ა: კვილს ჩუ მეფტე ხა̄რ. ეჩას ჟიქა̄ნჩუ ზექ ხოსვა. ზექს
Line of edition: 26    ჟიქა̄ნჩუ ჲო̄რი ჯო̄დი ნახვწი ყა̈̄რ ხალჯა, ო̄შთხვ მუხვრა̈რჟი̄ნ ჭუ̄ნთა̈რ ხოსვა ი ამის
Line of edition: 27    ხაჭვე̄ნიხ ქიპს. ქიპ ლაჭვე̄ნჟი̄ნ ლაღბაბა̈̄რ მიჩოშ სიპ. ამღა ა̈რი ჰარა̈კდ: "ო̄შთხვ
Line of edition: 28    ლავდილ' ე̄სერ ლიხ, მა̈გ იღლი-მიღლის ხაყლე უშხვა̄რ ი ჩუ და̈̄რ ხეღლინიხ უშხვა̄რ".
Line of edition: 29    ალ ღჷბა̈ბს ქა̄შყვდიხ, ეჩქანღო ჟ'ა̈ფკვეხ ი აჯაღ კუკვარდჷდ ინტვლიხ. ქა იტხეხ
Line of edition: 30    კინთშვ.

Line of edition: 31       ოშვა̈̄ჲდ ჭითხ ხაკა̈ფხ კვილი, ეჩი̄ზუმს ქა იზმიხ ზურალა̈̄რ გიმჟი ი ეჩქანღო
Line of edition: 32    წამა̈რს ხაჴლეხ გიმჟი ო̄შთხვს: აშხვ -- აშხვ ა̈დგილს, აშხვ -- ეჩი̄ ქახიქა ი ჲარვ --
Line of edition: 33    აშხუდ მე̄სმ' ა̈̄დგილს. ეჩქანღო ჩვათდვიხ.

Line of edition: 34       ლითდვი ამჟი̄ნ ლ'ა: ჰა̈დვირხჷნსგა ალა̈ბი ნაჯვდა ნახვწი ყა̈რს აშხვ პილხა̈ნ
Line of edition: 35    ჲო̄რი ჴურუ̄ლ ხა̄რ, ეჩექა ქჷპა̈რს ქ'ა̈̄ყხეხ. ეჩქანღო ზურა̄ლ ლიზელა̈̄ლს იბნე,
Line of edition: 36    ქიპს ჟი ხა̈თდვი ალ ჩუ ლუსვა წამა̈რჟი̄ნ. ქ'ა̄დზჷგრ', ეჩქას ჟი ლუთვედს ჟი იკედხ
Line of edition: 37    შჷნთეჟი̄ნ ი ჟ'ასდგვიხ. ალ ქიპ ლი ლათხეჲა̄ქ.

Line of edition: 38       ალ ლათხეჲს ჩიქე ლა̈ჯვმა̈რქ' ა̄ცვეხ ი ღო ლაცხნი̄რქა. ჟი ლჷმა̈რანღო ლათხეიშ
Line of edition: 39    ი ლა̈ჯიშიშ ლა̈ჯშა̈რს ჷგემხ. ალ ლა̈ჯშა̈რი აშხვ პილხა̈ნ ლუსდვიგვს ხალჯენიხ,
Line of edition: 40    ქა ლუცვა ლაცხნი̄რს დაფა̈რთე̄'სგა დე̄სგიხ, დაფა̈რს საკჷნზელა̈რ ხა̈ბხ. ეჯჲ
Line of edition: 41    ა̈რ ჟი ხორიკხ ჟიბა̄ვ. ლაცხნი̄რხა̈ნქა ლა̈ჯშა̈რი უ̄ღვას ხალჯენიხ ნა̈ვნარშვ ქა ლუცვა
Line of edition: 42    კვილჲა̄ქს ჩუბა̄ვ ფხულრე ლა̈რკინა თა̈კულდა̈რ ხოსა̈რხ -- საფჷრჴელა̈რ ი ლა̈ჯშა̈რ
Page of edition: 128  Line of edition: 1    ჟი ლჷკა̄ზმე ლი. ამჩიქდ ჲერხი ზურალა̈̄რ ი ჲედ ბოფშა̈რ ამსჷლა̈̄რიხ ლა̈ჯიშჲა̄ქს.
Line of edition: 2    მასჷლ ჲედ ნა̈ჴჩულა̈შ ლი ი მა̄დეი ზექიშ. ალ მასჷლს სგა ხოსგვრეხ ლამსჷლა̈̄რ
Line of edition: 3    ბარბელდვს ი ქუთუ̄ლჟი̄ნ ა̈სპუნეხ ი მასჷლს ქიპს ხაჭვე̄ნიხ. ქა ლჷმსჷლა მასჷლს
Line of edition: 4    მარქვთე̄სგა დე̄სგიხ ი ამის ზურა̈̄ლ ჟი ხა̈ჯიშ ლათხეჲს. ლა̈ჯიშჟი̄ნ ზურა̄ლ დაფა̈რს
Line of edition: 5    სგა ირყინე, შომვა̈̄ჲ ქიპს ქა იტხე ლათხეჲქა ი ქა̄მავ ხა̈რყინე, შომვა̈̄ჲ მარქვშვ
Line of edition: 6    ქა ლეტხე ხა̄რ ლაჯიშ. ამჟი̄ნ ქა ნა̈ჯიშვს, კვილის, უ̄ღვაქა ხაჭვე̄ნი.
Line of edition: 7    ლიჯიშ ქა ლუსრულანღო კულის ჟ'ატყვბა̈̄ლიხ ი ჰაბა̈რჟი̄ნ ჩვა̈კვლი̄ნეხ. ლაკვლინაჟი
Line of edition: 8    ჩვაბქვეხ ფიშრა̄მინ ტებდი ლჷცისგა ი საპენს ხოხჯჷნეხ. ეჩქანღო ხეგნიხ
Line of edition: 9    ჭჷშხვშ ი ა̈გვრი̄მბეხ, ვოდ ჩუ დო იკვლი̄ნი კული ეჩქად.


Line of edition: 10 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.