TITUS
Svan Chrestomathy
Part No. 200
Previous part

Text: 195 
Page of edition: 179 
Line of edition: 10 
195. ჩეყნა̈რე ლიქვრეში


Line of edition: 11       ბეჩვაშ საზოგადოებაისგა სამ სოფელს (ქართვა̈ნის, დოლს ი ჭკიდანა̈რს)
Line of edition: 12    ჩეყნა̈რ ხაჟხახ. ჩეყნა̈რ ხაჟხახ თა̈რგლეზერიშ მარე ჲერვა̈ჲ ლიხ, ეჟა̈რს.
Line of edition: 13    თა̈რგლეზერიშ ლაჴვმი სგვეჯი მეზჷრჟი, მაზერიშ მეწვინქა ლახვ ლი, ეჩეჟი. ალ ჩეყნა̈რს
Line of edition: 14    ხა̈მთქვახ ლადღობ ლიქვრეში. ალ სამ სოფელს ჩი აშხუდ ხოჭიმხ ხერასდ. ხედა
Line of edition: 15    მეზგე მა̈ჲ ზავ მელქორეშ ლიხ, ეჯა̈რ სემი მეზგე ქა ხეჭმენიხ ზორს. ჲერვა̈ჲ ზორს
Line of edition: 16    ხოჴდე, ეჩა ყორჟი ეჯა ჟი ხამზჷრი ეჯ მეზგემ ნა̈შდობახენ. ეჩქანღო ალ ნაზორშვ
Line of edition: 17    იყდიხ ლა̈ჲსა ჴანვ ი ეჩჷნქა ადა̈იდ ჩვარა̈ყიხ ი ვარა̈შს ა̈გნეხ ლიქვრეშია̈შდ. ლიქვრეშის
Line of edition: 18    იბნეხ, ეშხუ ნაგზი ლიჩედურალ ქა ჴედნი, ეჩქას -- ლიმხერი ლადეღ. ამ ლადეღ
Line of edition: 19    ეჯგვა̈რ ხოშა მუს მა̈ჲ ხედი ი იშდუვნი, ეჯღაი მეზჷრთე, ლაჴვმითეჟი ჟი უჴადდ
Line of edition: 20    მადმა ხოყახ. ეჯთეჟი ა̈ჲნეხ ნადბაშუნს (ნადმაშუნ ხაჟხა ჰედ ქორუნეშდ ნა̈ისგ მჷნა̈ყ
Line of edition: 21    ლემზჷრა̈ლს ი ზედა̈შს, მადეი იმგვა̈ჲ ლიმზჷერ ლი, ეჩეჩუშ ნანაყვს ი ზედა̈შს) ი
Line of edition: 22    ზედა̈შს, ეშხუ ჟაჴ ვარა̈შს (ვარა̈შ ლი: ლჷცთეისგა ფექს ხაშდეხ, ეჯი ჟი ლჷნჩიდე ი
Line of edition: 23    ჟი ლუფუ̈ნე ზამისგა ფირქთე იგვში ი მოლა ხა̈ნუნღო ჟი ტეხნი ი ხოჩა ლჷჴმა̈შ
Line of edition: 24    ლეთრე ლი, არა̈ყშალ აშდმე მარა), ჟ'ადბა̈შიხ ლაჴვმისგა, ეჩქანღო, ეჩეისგა კეც
Line of edition: 25    ლჷგ, ეშთეისგა სგ'ა̈გვშეხ ვარა̈შს. უცებ ა̈გვშეხ, ეჩქას პერ ხეგნი, ეჯი ქამჩუ
Line of edition: 26    ა̈სკნე. მჷჟლაწადხენჩუ ლახე ხეჭმენი პერ მა̈ნკუ, ეჩქას მჷდბაშა ქა ჴედნიხ ი
Line of edition: 27    მაზერთე ლაწეუვ ლი, ეჩეჩუ იგნიხ ჭა̈რიდ მა̈გ ი ტულიხ მაზერთე, ჲერვალე მჷმზერიაშ
Line of edition: 28    ჟახაჟი. ხომზჷრიხ ხოჩა ლადეღს ი ხოჩა ზა̈ჲ ესერ მაზერხენჩუ ოლგურნელი.
Line of edition: 29    ამხენჟი ალა̈რი ჰერს ხა̈ტხეხ ი ხემზჷრხ. ალ ჩეყნა̈რს ლა̈ლჩაუნღო ეჩეჩუ ჟიბ ჟი
Line of edition: 30    ლიმზჷრალდ არა̈ყ მადე ხოშიდხ, ესე იგი ჲარ ნაგზაისგა. ეჯ ვარა̈შს მერმე მარე
Line of edition: 31    ჲერვა̈ჲ ლა̈ჲთჷრე, ეჯისი მადე ხოშიდ არა̈ყ ალ დრევდ. ეჩხენჩუ ჩუ ტეხნიხ,
Line of edition: 32    ეჩქანღო ჲერვა̈ჲ მელქორეშ ლიხ, ეჩა ქორს ინზორალხ მა̈გ მელქორშა, ლჷწსაი ვობა̈შს
Line of edition: 33    ა̈წსიხ ქამიშ მარა ი აშხვ ნაგზა გვა̈მიდ ხოჩა ლადღობ ხარხ.

Line of edition: 34       ლიქვრეში ხა̈მთქვახ ადა̈იდ მჷჟალვა̈რს ი უშგლა̈რსი, მარე ამ ფორმაჟი მადმა.


Line of edition: 35 
თენგიზ დადეშქელიანი. მაზერი. ა. შანიძე. 2. იხ. 1923 წ.



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.