TITUS
Svan Chrestomathy
Part No. 274
Previous part

Text: 268 
Page of edition: 246 
Line of edition: 19 
268. ლილობჲოვა̄ლ


Line of edition: 20       შვანს ხაზნახ ლილობჲოვა̄ლ ლობიო̄ კაკლარშვ. ხოჩა მელობჲოვა̄ლ ჲერვა̄ჲ
Line of edition: 21    ლი, ეჯკალიბარს ლჷმწრად ხეთხე̄ლიხ. ხოჩა მელობჲოვა̄ლ ხოშა ნაღალდ ზურალე̄ლ
Line of edition: 22    ლიხ. ხონ ხოჩა მეცართე აჩეხ ი ხონ -- ხოჩა მელობჲოვა̄ლთე. ჩუ ერ ე̄სამა
Line of edition: 23    ხეყრენიხ კუმატ: ჲედ ლეგდ ე̄რ ჴედნი, ჲედ ფიშირ იდგარიხ ეშხუ ქორისა, ჲედ
Line of edition: 24    მეზგად დეშ იღუ̄ძიხ ი ჩიგარ ნაღრიბა̄ჲსა გარ არიხ, ჲედ კუმაშ ე̄სამა ეთბერნიხ
Line of edition: 25    დაგრავშ, ჲედ ოთქვითნეხ ე̄სჲამ ი დოშ ენთხე̄ლნეხ, ჲედ ხვაჲ ხანჲა გვამი ლეგმერდე
Line of edition: 26    ხეყე̄ნიხ, გა̄ლ ხე̄რი მეჩდე ი ლიქვთუნა̄ლ მა̄ ხე̄ჲმედი, ეჩქა ღჷრიხ ი ითხე̄ლიხ
Line of edition: 27    ჟი ხოჩა მელობჲოვა̄ლს ი ხეჴჷ̄რიხ სგა. "ოხლობჲოვა̄ლე ლოქ მინს ამ ბეჟდი ი ამ
Line of edition: 28    ბედჟი ი ნავდუნს ლოქ დე̄მამ აზა̄რეხ მიჩაშვდ ე ლოქ ხოჩა̄მდ ახმეჴრა̄ლვნი ჟი
Line of edition: 29    მინე გეეშს ი ხოჩა̄მ ე̄მამ ხათო̄ნნე. მაგ ქა̄ვ ხე̄ქვ ი ნო̄სამა̄ვ ოთვომე ი რიგ ლოქ მადილ
Line of edition: 30    ხე̄რი ი რიგ ჟახე ი მინი̄ მა̄ ლოქ ლიხ ეჲჟი ხოლა ლეიყ მეზგე̄მიშ, ერე ხოჩა ი
Line of edition: 31    ხოლა დოშერს ათტჷხიხ". მელობჲოვა̄ლ აშდე ტაბაგჟი ლჷდა ძვე̄რაჟი ჲერვეშდი
Line of edition: 32    ეშხუ ლობიო̄ კაკალს, თვით ვო̄შთხვ კაკალს იდე̄სხ წყება-წყებად ი ილობჲოვა̄ლხ
Line of edition: 33    სერ ეჯნოვშ. რიგს იმ ხათვრიხ ი რიგს იმ. ჲერხის ხაყლეხ მელობჲოვა̄ლ, ერე "ალ
Line of edition: 34    ხატიშ ი ალ ხატი ტარ ლოქ ხა̄რ ი ლიმზჷრს ლოქ ინუკოვ". ჲესვა̄ჲ ხატი
Line of edition: 35    ნაბრალს ხე̄ქვნეხ, სერ ეჯჲარ ითჲა̄ლჲელხ ი იტვაჟა̄ლხ, მელობჲოვა̄ლა ნათორს ვოდ
Line of edition: 36    ჩუ დო იჩოხ ჩი̄ს. ადრინეხ, ნამზურუნს ადჲესხ, ჲედ ლალგენე̄ლ ე ხე̄რიხ
Line of edition: 37    ლელგენი, ჟი ლოხლაგნა̄ლნეხ; მა̄ჲ ნა̄ქვი̄ს ხე̄რიხ, ჲედ ჴანარე ლილგენი მიჩა-მიჩა
Line of edition: 38    ღერთალე ჟახე̄ლჟი, ჲედ ბაპა ლიტბჷლი, ჲედ გიმე ლიცხტენი; ჲედ მიჩა ნაზჷმ მუტვარი
Line of edition: 39    ლიჲეს ხატთე. ჲედ თხუმ ჟიქა̄ნქა ლი̄ზვნუნე ღოლჲა̄ქაშ ი ჲედ ქათლაშ ი ჩუ
Line of edition: 40    ლიფშვდე უპატრონოდ მიჩა მახვჲა ღერთა ჟახაჟი, ჲედ წისდედალა̄ჲ ლიფშვდე.
Line of edition: 41    მა̄ჲ ჴევისა ხოჩა მელობჲოვა̄ლ ჩვარი, ეჯი ჩი̄ს ჩუ ხოხალხ ი მჷწხა̄რ ჲერვა̄ჲ ი̄რი,
Line of edition: 42    ხათვრიხ სერ, ერე "ამე ლოქ არი ხოჩა მელობჲოვა̄ლ ი ეჯი̄ვ ლოქ ენთხე̄ლე ჟი ი
Page of edition: 247  Line of edition: 1    იმვა̄ჲ ლოქ ხათო̄ნნე, ჩუ̄ვუ ჩომინ ეჯი ი ბაც ლოქ მა̄ ლი, ერე დოშსამა ლოქ
Line of edition: 2    ლახთჷრის ი დოშ ხოწა̄დეს მინე გვეშს". ადინეხ ეჩა̄შთე ი იმვა̄ჲ მელობჲოვა̄ლ ლახთერ
Line of edition: 3    ი ხათო̄ნნე, ეჯის ჩი̄ს ჩუ იჩოხ. ლილობჲოვა̄ლ მე̄ვარ ბჷგიდ ხანწმჷნხ შვანარს.


Line of edition: 4 
არსენ ონიანი. სასაში



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.