TITUS
Svan Prose Texts I (Upper Bal)
Part No. 55
Previous part

Text: 55 
Page of edition: 51 
Line of edition: 30 
55. უშგუ̂ლა̈რ ი მედუქა̈ნ ქუთა̈̄შ


Line of edition: 31       აშხუ̂ჟი̄ნ ესნა̈რ უშგუ̂ლა̈რ აჩა̈დხ ლა̈ქმათე. შომუ̂ა̄ლე ადჰეხ სგა
Line of edition: 32    ქუთა̈̄შთე, იზელა̈̄ლხ ესნა̈რ დუქნა̈რმჷყქა. აშხუ̂ დუქა̈ნისგა ხოჩა̄მ
Line of edition: 33    ლეზობ-ლეთრად ჟი გუ̂ეში ლიზ. უშგუ̂ლა̈რ ღალ მასა̈რდ მა̈ჲდა̈̄რ
Page of edition: 52  Line of edition: 1    ლიხ, ლეზიზ ჩუ მეშთხე ხა̄რხ ი ლემშაუ̂ ჩიქე დე̄სამაგუ̂ეშ ხათხე̄ნახ.
Line of edition: 2    ხოსგდიხ ალ ხოჩა̈მ ლეზობ-ლეთრა ი პილა̈რქა ლიც ხა̄გხ. სგა̈უ̂,
Line of edition: 3    ცხა̈ჲ, მედუქნას ჩიგარ ხა̈მთქუ̂ახ ლიწსი ი ალ მედუქა̈ნდი ხა̈̄ქუ̂ უშგუ̂ლა̈რს:
Line of edition: 4    "მობძანდი ესერ". უშგუ̂ლა̈რს ლოხუ̂ხალდახ: "ა̈წს' ე̄სერ მჷრე̄ს
Line of edition: 5    მინს ალ მა̈რე" ი სგა̄ჩა̈დხ. მედუქა̈ნ ლა̈ხჭუ̂ედდა: "მა̈ჲ ესერ ხაკუხ ი
Line of edition: 6    იმ ლეზობს იშგუ̂ემხ? " უშგუ̂ლა̈რს აშხუ̂ი̄ლს ხოხალ ზჷმშუ̂ ქართუ̂ილ,
Line of edition: 7    ეჩჷნქა და̈̄ს.

Line of edition: 8       ალჲა̈რდ, მა̈̄ჲ ესამა ჩუ ხო̄სდა̈ნ მედუქა̈ნს, მა̈გ ქა̄ხჴიდუ̂ნეხ; მა̈̄ჲ
Line of edition: 9    ესამა ლეთრე ჩუ ხო̄გა̈ნ, ალა̄ჲ ქა̄ხჴიდუ̂ნეხ, ჩუ̂ასგურდახ აშხუ̂ ოთა̈ხისგა
Line of edition: 10    ი ჩუ ხა̄რხ ქეიფ. მედუქა̈ნს ჩუ მა̄მ ხაჯრაუ̂ა: "ალამა̈გ ესერ
Line of edition: 11    ლეზუ̂ებ-ლეთრე ქა̄თჰოდე̄ნა" ი ხუ̂ა̈ჲ მოგებას ა̈ნღლი ლა̈დი. უშგუ̂ლა̈რს
Line of edition: 12    ხამბაჟხ: "იმნა̈რ ესერ ხა̈ჩმუნი ლა̈დი ალ მა̄რე ალამა̈გ პა̈ტიუ̂ს?
Line of edition: 13    შომ' ე̄სერ ახტიხეხ ალამა̈გ პა̈ტიუ̂ს? " აშხუ̂ ათხა̄დ: "ალ' ე̄სერ შუ̂ა̈ნს
Line of edition: 14    ნარდუ̂ მჷრე̄ს ლიზ ი ეჯღა ხა̈ჩო ალამა̈გ პა̈ტიუ̂ს!"

Line of edition: 15       ქა̈̄ნჰერხ მედუქა̈ნ, ა̈მზჷრიხ მა̈გ ი მაჴუ̂ა̄მს ხაყლეხ ლუშნუდ. მედუქა̈ნ
Line of edition: 16    ხეჴუ̂ა̈̄მიე̄ლ ი "დაბძანდი დაბძანდი"-ს ხაყლე. უშგუ̂ლა̈რ ხაყლეხ:
Line of edition: 17    "მასა̈რდ ესერ კმაყოფილ ლიხ სერ, დეშ ესერ ხა̈ჲმედახ სერ ლიზუ̂ებ-ლითრე!"
Line of edition: 18    სერ შომუ̂ა̄ლე ჟ'ანჷ̄გა̈ნხ, ქა̄ჩა̈დხ და̈ხლთექა ი მაჴუ̂ა̄მს
Line of edition: 19    ხაყლეხ: "მინეშთ' ე̄სერ ჰე̄სა ა̈თჴა̈დჷ̄ნა, მა̈გიე̄რ პა̈ტიუ̂ს ესერ ჩუ ხა̈ჩომხ".
Line of edition: 20    მედუქა̈ნდ უ̂არჩხილ ხაშგუ̂მინ ნახარჯუ̂. ალა ალჲა̈რს ათჷმბაჟჷნხ: "დოს
Line of edition: 21    ე̄სერ ხასმა ამჟი̄ნ, ჩიქ' ე̄სერ ქა ხოწსა ი ათხე ფასუ̂
Line of edition: 22    ხაშგუ̂ემ?!" ხა̄რხ ამჟი ყალა-ჩხუფა. მედუქა̈ნდ აშხუ̂ მუუ̂შგუ̂ილს ქა
Line of edition: 23    ლოხუ̂ჯუ̂ი̄რ, ლა̈ჲშგუ̂ინ მუუ̂შგუ̂ილდ ხანჯა̈რ ი ჟი ხაჴიდ მედუქა̈ნს ი
Line of edition: 24    ჩუ̂აქა̈ჩ. ამჩიქქა პოლიცია̄ჲ ესჰი̄დ, ჩუ̂ადჷრმა̄ლეხ მა̈გ ი უჩა̄სტკათე
Line of edition: 25    ადჲეხ. ამეჩუ̄ნ ლა̈ხჭუ̂ედდახ: "გუ̂ეშ ესერ იმჟი̄ნ ლჷმა̈̄რ". უშგუ̂ლა̈რდ
Line of edition: 26    ქო̄ხუმბაუ̂ეხ: "ამჟი-ი-ამჟ' ე̄სერ ლჷმა̈̄რლი გუ̂ეშ: ქ' ე̄სერ ხოწსა მინ ალ
Line of edition: 27    მა̄რა ი ათხ'ე̄სერ უ̂არჩხილს ხეშგუ̂ემ!" მედუქა̈ნდ ხა̈̄ქუ̂: ალჲა̈რს ესერ
Line of edition: 28    ლეზუ̂ებ-ლეთრე ლოხმამახ ი ოთშხამუ̄ნახ, აშხუ̂ თუ̂ეს ესერ დეშ ხაჰუ̂დო̄ლნა მა̈გ
Line of edition: 29    ქა, ეჯამა̈გ ესერ ლჷმა̈̄რლი. მა̈ჲ ესერ ხა̄რხ მიჩ ალ და̈შდუ̂ა̈რ,
Line of edition: 30    ერე აშ დო ადბიზნა-ჲ ადშდჷმა̈̄ლი̄ს, ღუ̂ ესერ აჯაღ ჩოთქაჩახ
Line of edition: 31    ჯა ხანჯარშუ̂".

Line of edition: 32       პოლიციად უშგუ̂ლა̈რს მა̄მგუ̂ეშ ხაყერ, ლახე გუ̂ეშ ჩუ̂ა̈ცხირ ი მედუქა̈ნს
Line of edition: 33    ხა̈̄ქუ̂: "იმნა̈რ ესერ ლჷმწიჰუ̂ინ, ლახ ესერ მინს მო̄მგუ̂ეშ ხოშგუ̂მინახ
Line of edition: 34    ეჟჩი̄ნ?" ი ა̈გით' ა̄ფიშუ̂დ ცა̈რიელ.
Line of edition: 35    (ლენჯერი)



Next part


This text is part of the TITUS edition of Svan Prose Texts I (Upper Bal).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.