TITUS
Svan Prose Texts IV (Lashkh)
Part No. 7
Previous part

Text: 7 
Page of edition: 13 
Line of edition: 14 
VII. ჯვინელ ლაგვანი წეს სასა̈შ


Line of edition: 15       ჯვინელდ, მიშგვა მაშყედისა, სასა̄შ ამჟი ლას, ერე მა̄რე ღალ
Line of edition: 16    ლახ ჩვედდაგრო̄ლ, ე ჯი ხეკვეს ალლაგვნე̄ლა̄ნ ლარგავშვ --
Line of edition: 17    ლეთრავშვ ი ლეზობშვ.

Line of edition: 18       კეცხაშ ხევსობთე აწი̄ჲდახ თვითს ჩი ვოჯახხენ სასა̄შისა. ნებოზს,
Line of edition: 19    ლჷდგარა ლჷშთხვან, ქა ჴჷდდახ კა̄რიალს. ალჲარისა სეფსკვრალ
Line of edition: 20    ირდო̄ლხ შელდშვ ვოხუშდ-უსგვა ათას. ეშხუ სეფსკვერ ეშხუ მა̄რას
Line of edition: 21    ქა ხა̄და ნაბზუნდ. მა̄რე̄მი შელდჟი ჩი ვოჯახთე ხაყვანდახ ჲერვჲერუ
Line of edition: 22    სეფსკვერს. მა̄რად იშჷლდანო̄ლ მაგ, ჲერვა̄ჲ ეშხუ ლჷზაჲნუნ
Line of edition: 23    ჩვი̄რო̄ლ.

Line of edition: 24       ამჟი არგავდახ ლეთრასი̄: არაყ ე ი̄რო̄ლ, ხოშა კვანჩხვს, ჲერუ
Line of edition: 25    ლაბოთლიანს, ხა̄ვდუდახ ვოშთხვ მა̄რაჟი, ე ღო ე ღვინელ ი̄რო̄ლ,
Line of edition: 26    ეჩქა ჲერუ მა̄რაჟი ხა̄ვდუდახ ეშხუ კვანჩხვს. ალეს ხე̄ჲშხა̄ნ ლარგავ
Line of edition: 27    ი ამჟი გვეზნა̄ნ ლაგვან ჯვინელდ ნაჲ -- სასა̄შარს.

Line of edition: 28       მე̄რმა სოფლარს, სასა̄შჷნქა, ხეზნა̄ნდახ სგა ლიტეხ ლჷდგარა
Line of edition: 29    ლჷშთხვანღო, სერ იზბჷდახ ი ითრჷდახ ლჷდგარა ვოჯახისა. ნა̄ყუნ
Line of edition: 30    სოფლიშ ლას. ლეჟა̄ ლა̄შხს ალე ათხე̄ჲ ამჟი ლი.

Line of edition: 31       სასა̄შ ათხე ლაგვან მე̄რმაკალიბდ გვიხალ, ლარგავ ხვა̄ჲს ჩუ̄ჲ მა̄მ
Line of edition: 32    ხაშყიდ, ეჯის ხვა̄ჲ ლჷგონ ხეკვად ი ჩვაჴცჷდა მეზგას. ათხე ლჷდგარა
Line of edition: 33    პატრონს ხოხრა ხეხჷრჯავი, ხვაჲ ნაწვარ ხოჴდენი ი ეჯღა. ხალხს
Line of edition: 34    ათხე ხოშა ხოჟრი მეზგე, ამღა ოხცხეხ ლინწვარის.

Page of edition: 14 
Line of edition: 1       ათხე ლჷდგარა პატრონ სოფელისა ჲერვ-ჲერუ მა̄რას აწიჲ ჩი
Line of edition: 2    ვოჯახხენ, ნაღლარხენ -- ჩი̄ს, თელდ ქორგოშის. იშგენ სოფლარხენ
Line of edition: 3    აწი̄ჲხ ჩი̄ს, ჲერვა̄ჲ ხაყახ ყურ ი ნაყარ. ალჲარ მაგ ნაწვარშვ ჴედნიხ


ერმილე ონიანი. სასაში. ა. ონიანი. 1. IX. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.