TITUS
Svan Prose Texts IV (Lashkh)
Part No. 15
Previous part

Text: 15 
Page of edition: 18 
Line of edition: 4 
XV. ლითხვიარ


Line of edition: 5       ლათხვიართე ლა̄ზჟი დოშდულსი̄ ათშიხ. ჩიგარ მა̄ ლოქ ხაყა
Line of edition: 6    ლითხვიარს. ბედნიერ ლადღარდ ხოთრახ: დოშდიშ, თახაშ ი ცა̄შ.
Line of edition: 7    ვობიშ ი ჯიმაშ კვიმატიან ლადღარ ლოქ ლიხ. ჯიმაშ ი ვობიშ ნაქვიც

Line of edition: 8       მეგემს ბღელ ლოქ ხეყრენი ი შიშდ ლოქ ქვერნი ჩუ. დე ლინგზა̄რავს
Line of edition: 9    ლოქ ხაყა ჯიმაშ ი ვობიშ, სერთხი̄ ცინცხლარჟი ლოქ. ცინცხლარს
Line of edition: 10    ლაყლედ მახა დოშდული ლიცა̄დის. ვოდ არა-ჩხარა დო
Line of edition: 11    ი̄რდოშდულ, ეჩქად ცინცხლარს ხვატუ̄ლიდ ი ცინცხლარჟი ნაჩომ გვეშს
Line of edition: 12    დე̄მგვაშს ლოქ ხაყა, მაგ ლოქ კვიმტიან ლი ი ალ ცინცხლარჟი დეი
Line of edition: 13    თა̄ჲ ლითხვიარს ხაშდბახ. სგა ლოქ ე̄რ იჭო̄ნე დოშდულ, ეჩქა ლოქ
Line of edition: 14    ლი ბედნიერ მაგ ნაჩომ-ნა̄ქვი̄ს. დოშდიშ ი ცა̄შ ლემესი ლივდი̄ მე̄ვარ
Line of edition: 15    ხამჭირხ ქორხენქა: "ში ლოქ ხაყა ქა" ი ამღა ხამჭირხ ლემესი
Line of edition: 16    ლივდი დოშდიშუ̄შ ი ცა̄შუ̄შ.

Line of edition: 17       ჲერხი ნათხვიარას ვო̄შთხვ შტიმ ლოქ ხა̄რ ი ვო̄შთხვ ლჷშტიმ
Line of edition: 18    ნათხვიარას თვალ ლოქ ხუღვა. თვალ ლოქ ჲედ გულჩონჩხისა ხაზნა,
Line of edition: 19    დო̄რი̄ -- მაჭიკისა ლოქ. ჲერვა̄ჲ ლოქ ნახთვიარე̄მი თვალს ჩვედხვინე
Line of edition: 20    მეთხვიარ, ეჩის ლოქ ნახთვიარე ჩიგარ მუღვარალაჲდ ხევდო̄ლნი,
Line of edition: 21    იმთე̄ჲ ლოქ დო ადინე ლათხვიარდ. ვო̄შთხვ ლჷშტიმ ნათხვიარე̄მი
Line of edition: 22    ტუფ ლოქ ჲესვა̄ჲს ხეღვე̄ნი ი სგა ლეჲქვემ ლათხვიართე, ეჩის ლოქ
Line of edition: 23    ნათხვიარე̄ლ ჩუ დე̄მ ხე̄ტვხ.

Line of edition: 24       ლა̄შხს ლოქ ლჷმარდ ეშხუ მეთხვიარ მა̄რე ი ეჩის ლოქ ხაღვე̄ნა
Line of edition: 25    ვო̄შთხვ ლჷშტიმ ნათხვიარე̄მი ტუფ ი იმთე̄ჲ ლოქ ქა ლჷმა̄ზნ
Line of edition: 26    ლათხვიარდ ი მა̄ჲ ტყვეფს ლოქ სგა ხაგნო̄ლნა, ცუდდ ბრიკს ლოქ
Line of edition: 27    დე̄მ ლჷმჷემინხ ნათხვიარე̄ლ დე̄მთე ი ხვაჲს ლოქ ლჷმდაგრინ. ჲერვა̄ჲ
Line of edition: 28    ლოქ ბედნიერ ჩუ ი̄რი მეთხვიარ, ეჯკალიბ ლოქ იხვჲენი ვო̄შთხვ
Line of edition: 29    ლჷშტიმ ი ლჷთვალ ნახთვიარას ლედგარიდ. ეჩა მუმურჯი ლოქ ლი
Line of edition: 30    ყერ-ანჷლოზ ბჷრშიშვლიშ ი გოგბედნიერ.

Page of edition: 19 
Line of edition: 1       ლა̄შხ ლეჟა̄ნ მიდამს ხა̄ჲშხა გედუ. ეჩე ლოქ არი ეჯკალიბ
Line of edition: 2    წიფმეგემ, ერე ეჲზუმ მეგემ წიფიშ დეც ჩუქვა̄ნ ლოქ მა̄დ არი ი ეჯ
Line of edition: 3    წიფს ხატუ̄ლიხ მეთხვიარა ბერ წიფიშს. შომა̄ჲ ლათხვიარდ ხელკიხ
Line of edition: 4    ეჯ ტყვეფთე ნაღალდ მეზა̄ლა მეთხვიარა, ჩიგარ ხამზჷრიხ ლითხვიარი
Line of edition: 5    ლიმურჯეს ეჯ წიფს, ი ცურეხ ეჩეჟი ტაბლე̄ლარს
Line of edition: 6    ი კურმულ ჯიმი ნაკვიშს, ჲედ მუტვარს ი კურმულ ჯიმი ნაკვიშს ი
Line of edition: 7    ჟი ლოქ ხოტუ̄სეხ ეჩეჩუ, წიფ ჩუქვა̄ნ, ლითხვიარი მუმურჯი ანგლოზს,
Line of edition: 8    ალ ბერწიფ ათხე̄ჲ ლოქ ჩვარი გედუს.

Line of edition: 9       მეხთვიარა̄ ქუნარ ჩიგარ ლოქ სიპხ ლათხვიარ ადგილართე ი
Line of edition: 10    ხოჩა მეთხვიარ ჩუ ლოქ ერ ადგარი ნათხვიარას, წიორს ლოქ ერ ჩუ
Line of edition: 11    ხოცვრე მიჩა ნა̄თი სგა̄შურას, ეჩანღო მიჩაშვდ ლოქ იტყბი გულჩონჩხი
Line of edition: 12    წვადს ი კოტო̄ლ ხანს წვადს ქა ლოქ იდე̄ს განთე ი ჟი ლოქ
Line of edition: 13    ხოფა̄ნეხ მეთხვიარ ლჷდგარუ̄ ქუნარს.


არდევან ონიანი. სასაში. მ. ქალდანი. 24. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.