TITUS
Svan Prose Texts IV (Lashkh)
Part No. 21
Previous part

Text: 21 
Page of edition: 23 
Line of edition: 25 
XXI. ნეპო̄ლარ


Line of edition: 26       მულზონო̄ლ ტანდ ჩიორო̄ლზუმ ლი. ქურუხვ ფერიშ ლი შიყქა.
Line of edition: 27    მუჭოდ ი აკვედ ყვითელ ხა̄რ. ამშა ლეღვს ლეზობდ მა̄მ ხაყა ი
Line of edition: 28    დეთა̄ჲ ე̄რ ხერმი̄სგა̄ლ ალჲარს. ხაზნახ საბდარალე ლისყი ჯვინელ
Line of edition: 29    ჭვედვარე ჴურუალისა. ძინარს ჩი ნეპრდ ხოშა დო̄სგ ალ ნეპო̄ლი̄ლარ
Line of edition: 30    იბნეხ ლიწჷრკლავის, ლიმშაჲეს ი ლიპე̄ნა̄ლს.

Page of edition: 24 
Line of edition: 1       ლა̄რე̄მი ნეპო̄ლი̄ლ ტანდ ლივლივაჲზუმ ლი; ფერდ
Line of edition: 2    ქურუხვ ფერიშ ლი, მეგემჟი ხეგნი. ალჲარს ლა̄რე̄ლისა ი ლახვარისა
Line of edition: 3    ლირდე ხამთქვახ. ლეღვ ხოჩა გემაშ ხა̄რ ი მე̄ვარ ხედრა̄ლხ ლერმიდ
Line of edition: 4    ალ ნეპო̄ლარს.

Line of edition: 5       ალ ნეპო̄ლ პერნი მჷდრე̄ცთე, ნამწვინჟი (თელდ მეწვინდ) ცხუშა̄ლ.
Line of edition: 6    ერ ესღრი მჷდრე̄ცთე, ეჩქა ჭჷრპლავი: "ვიწ, ვიწ, ვიწ" ლოქ,
Line of edition: 7    ღო ჩუვუდ პერნი ჩუბავ ნამწვინჩუ მულქვაჲთე. ეჩქა ხალხ ყჷლე,
Line of edition: 8    ერე ღერთალთე ჴან ლოქ ასყე̄ნა ი ჩუ ლოქ ახშყედა. ამჟი ლოქ
Line of edition: 9    ხაყლე ღერთალს "ვიწ, ვიწვშ", ჟიბავ მჷდრე̄ცთე ლაპერჟი ი ჩუ ლოქ
Line of edition: 10    ე̄რ ხეფშვდენი მულქვაჲთე, ეჩქა მჷგდა̄ჲ ჩუ ლოქ მეშყდა ჴანს
Line of edition: 11    ხაჭიმ ჩუბავ.

Line of edition: 12       მჷბელყეჩო̄ლ კოჭო̄ლუ̄ლ ლი; ბელყეჩი ბალე̄მი ფერიშ
Line of edition: 13    ლი; თხუმ მეშხე ხა̄რ; ლეზობდ ამშა ლეღვს მა̄მ ხაყა; ფიშირ არიხ
Line of edition: 14    ჩიგარ ეშხუდ ლუნთისა ი ხეგრუზიხ ბელყჩარს ი ალჲარე კვირხილს
Line of edition: 15    იზბიხ. ლუფხვისა მო̄შ-მო̄შ, ლუყლუ̄რად არიხ ჩიგარ ამე მერდე
Line of edition: 16    ნეპო̄ლ ლი.

Line of edition: 17       ჯჷჭკ თვალდ შყეჟვს ხაჯეშ; ტანდ ბეღურაჲ ნეპო̄ლი̄ლდ
Line of edition: 18    ხოში̄ლ ლი; ფერდ -- ქურუხვ; ღალარ თვეთვნო̄ლარ ხა̄რ; მე̄ვარ
Line of edition: 19    ლილგვარი ხოხალ; ლეღვ ხოჩა გემაშ ხა̄რ; ლუნთისა̄ჲ ამე არი ი ზავ
Line of edition: 20    ლადეღი̄, ჩიგარ; კეცხა ლუფხვს ეშხუდ არიხ, ეჩანღო -- მა̄მა. ხოხრა
Line of edition: 21    ბობშარ ხერმი̄სგა̄ლხ ნეჯვდარშვ.

Line of edition: 22       მჷლალქანო̄ლ. ალ ნეპო̄ლი̄ლ ბეღურო̄ლაზუმ გარ ლი.
Line of edition: 23    დეცმე̄ფხე ი ყვითელ ფერშვ ჭჷრელ ლი. ჲერხი იზბი, მარა ეჯზუმ
Line of edition: 24    კოჭო̄ლუ̄ლ ლი, ერე ხვაჲდინ მა̄მშა̄ლ ხეჭმინა̄ლ ლარმი̄სგა̄ლდ. ალ
Line of edition: 25    ნეპო̄ლილარ ხამთქვახ ხოშა ნაღალდ ლალქანელს ი მევარ
Line of edition: 26    ხენტვე̄ბხ ლეზობდ გიმბაშს ი ამხენქა სერ მჷლალქანო̄ლ (\ მჷლჷლ-ქანო̄ლ)
Line of edition: 27    ასჟახე̄ნა. ალჲარ ლუნთ ი ლუფხვ ჩიგარ არიხ.

Line of edition: 28       მჷწჷ̄ლ. მჷწჷ̄ლ ლა̄ჲდი̄ ბეღურო̄ლზუმ ლი ტანდ ი ეჩა
Line of edition: 29    მაჯო̄ნ. ზჷმშ გარ ლი ხოში̄ლ. ლაცინდულას შყეჟვშა̄ლ ვორისა ისყი.
Line of edition: 30    ლუნთისა ი ლუფხვისა ჩიგარ არი. ლეზობდ ჩუ ხაყა. ხაზნა ლიწჷ̄ლი
Line of edition: 31    ი ამხენქა ასჟახე̄ნა მჷწჷ̄ლ. ხოშა ნაღალდ ლეჭმე ლა̄რე̄ლისა ხოხალ
Line of edition: 32    ლირდე ი მეჲად ლაგრასუშ ესღრი უჩრავად.

Line of edition: 33       ჭყეპელაჲ. ალ ნეპრ მჷწჷ̄ლდ ზჷმშ ხოხრი ლი ი ლეზობდ
Line of edition: 34    ჩუ ხაყა. ლირდე ჭყეპარისა ი ლჷლენჭყ გიმარისა ხალატ ი ჭყეპელაი̄
Line of edition: 35    ამხენქა მჷრე̄ს ასჟახე̄ნა. აშ ლახ ე̄სა ხეთხნიხ, ოდო აშ მა̄მ ხერმისჷა̄ლხ
Line of edition: 36    ლედჷარიდ.

Page of edition: 25 
Line of edition: 1       მუხვბე̄მი დაგრაჲ. ალ ნეპრ მუგვი მაჯო̄ნ ლი ტანდ
Line of edition: 2    ი თვალდ, მარა ყვითელ გუგუფ ხა̄რ. ლეზობ ნეპრ ლი, მარა დაგრას
Line of edition: 3    დეშერ ხაკვი̄ ეჩა. არაკდ ყჷლეხ: "ამშა დაგრას ლოქ მუხვბე̄მი დაგრა
Line of edition: 4    ხოხალ" ი ამხენქა ხერი̄და̄ლხ ამშა ლიდგარის.

Line of edition: 5       ღვარაშუნაჲ. ალ ნეპრ ლუფხვისა ჴედნი. ძღჷდ ჯო̄დი
Line of edition: 6    ნიკრატ ხა̄რ ი ჭიშხარი̄ ჯო̄დი ხა̄რ. ქინაი̄ ლი ამჟი, ერე მა̄რე დეშ
Line of edition: 7    ხეჲა̄ლ სგა. ლიპე̄ნა̄ლ მე̄ვარ ხამჭირ. ბრეკთეჟი ე დო̄მ ღჷრი, ღო
Line of edition: 8    დეშ იპე̄ნი ეჲჟი. ლეღვ ხოჩა გემაშ ხა̄რ ი იზბიხ ამშა ლეღვს.
Line of edition: 9    მჷნპო̄ლას მე̄ვარ თე ხო̄ზხ ამნარ ი ლას ე̄სა ხეთხნიხ, ქუნუშ არიხ ამშა
Line of edition: 10    ლიდგარის. ლიმპო̄ლი ხაზნახ ლილფხვა̄ლთე. ეჲნურ და̄რ იჟბინე
Line of edition: 11    ლამპო̄ლიდ.

Line of edition: 12       მათათხ. მათათხარ შდუგვარს ხაჯეშხ, მარა ღალარ ხა̄რხ
Line of edition: 13    ი ლე̄თშვ იპე̄ნა̄ლხ, ამშა ლეღვს შდუგვი ლეღვი ნახუმსერ და̄რ
Line of edition: 14    იზბი.

Line of edition: 15       მათათხს ლა̄შხს მეღამიაჲსე ხვატუ̄ლიდ. ლჷყა̄რილ ჩუქვა̄ნ
Line of edition: 16    ხეპტყე̄რიხ ალჲარ.

Line of edition: 17       არაკდ არი, ერე ალ მათათხ ლოქ ხანტჲელნა ნეპო̄ლარს, ერე
Line of edition: 18    "ვაჲ ლოქ ხიადუ̄ლ, მიჩი̄ ლოქუ ხა̄და ღალარ!" ი ეჩქა ვად ლოქ
Line of edition: 19    ჩვასვადე̄ნა ი გაცხაჲდ ლოქ ქა̄ხზვება ღალარ შდუგვს, ოდო ეჩქად
Line of edition: 20    ლოქ შდუგვ ლჷმა̄რ მათათხ.

Line of edition: 21       ჭინჭრაქაჲ. ალე კოჭო̄ლ ნეპო̄ლი̄ლ ლი ჩჲა̄გ მასარდ
Line of edition: 22    არი. ლეზობ მა̄ ლი. ჭინჭრაქაჲ ლუნთისა̄ჲ ამე არიხ. ლეზობდ ლახ
Line of edition: 23    მო̄ ხაყა, და̄რ არმი.

Line of edition: 24       გვაწაჲ. გვაწაჲ კოჭო̄ლ ნეპო̄ლი̄ლ ლი. მეკვეშდ აკვედუ̄ლ
Line of edition: 25    ხა̄რ. ლეზობდ მა̄მ ხაყა ი დეთა̄ჲ ე̄რ ხერმა̄სგა̄ლ. სიბდარს ჩირგისა
Line of edition: 26    ისყი. ლარდადი̄ ჩირგისა არი. გვაწაი̄ ჩიგარ ამე ირი ლუნთ ი ლუფხვ.
Line of edition: 27    გვაწაჲ ნეჯვდართე ლარკალჟი ამჟი ხაგჷრგალიხ (\ ხომგო̄რხენ):
Line of edition: 28    "გვაწაჲ, გვაწაჲ, ჷვაწალაჲ, ნეჯვიდ ჩუქა̄ნქაჲ გვაწალაჲ".

Line of edition: 29       ცხეკი ქათალ. ცხეკი ქათლარ ლახვეშ ი ცხეკი ლაყველმჷყ
Line of edition: 30    გარ ლიხ ლჷფშირე. ნა̄რგილ ქათლირზუმ ლიხ ი ლეღვი̄ ხოჩა
Line of edition: 31    გემაშ ხა̄რ. ხვა̄ჲდინ არმა̄ლიხ ამშა წიწლარს ი ჴჷდეხ აგითე.

Line of edition: 32       ლამა̄რჲა̄ ქოჩოჩო̄ლ. ალჲარ ხვაჲ არიხ. ლატეხ
Line of edition: 33    მუსგვენ თვალა ნეპრ ლი. მუგვზუმ ლი ტანდ. ლეღვს მა̄მ იზბიხ ამშა.

Line of edition: 34       მჷყგჷნ. მჷყგჷნარ ხვაჲ არიხ ჩჲა̄გ ცხეკარისა. ალჲა̄რ ლუნთისა̄ჲ
Line of edition: 35    ჩვარიხ. მჷყგჷნიშ ლეღვს და̄რ იზბი. მჷყგჷნარ მეგმარს ლაფრას
Line of edition: 36    ხაგნეხ. ყჲაქა თვეთვნო̄ლ ხა̄რხ.

Page of edition: 26 
Line of edition: 1       ჭვე̄რ. ჭვე̄რალ აშირობშვ არის. ეშხუ დაბს ატჷნტე̄ლეხ, ჩუ
Line of edition: 2    ერ ხეგნიხ დაბისა. ჭვე̄რი ლეღვს და̄რ იზბი. ჭვერს ლა̄შხს ჭვემას ი
Line of edition: 3    ყვა̄ვსი̄ ხაყლეხ. ბუნ-ბუნდ არიხ ბივილობშვ, ეშხუ აგის სიპხ. ძვირდ
Line of edition: 4    გარ ჴედნიხ ლა̄შხთე.

Line of edition: 5       მენდღლაჲ. მენდღლაჲ შყეჟვი მაჯო̄ნ ი შყეჟვი ფერი
Line of edition: 6    ნეპო̄ლ ლი, ძღჷდ პეჟვაჲ ლი. ლეღვ ხოჩა გემაშ ხა̄რ.

Line of edition: 7       ჴერჭვან. ჴერჭვან მაღლავზუმ ლი ი ლეღვ ხოჩა გემაშ ხა̄რ.
Line of edition: 8    ჩხჷრჷშტი ფერიშ ლი. არმა̄ლიხ ლუფხვისა. ლუნთისა დე̄მე თერახ.
Line of edition: 9    ლამპო̄ლჟი ჩუ ერ არმიხ ნეპრს, მახჲადშვ "ას ას ას ას ას-ს" ხატუ̄-
Line of edition: 10    ლიხ ი ქა ხეყა̄ლხ თხუმჟი ი ხემზჷრხ: "ანჷნღო ხვაჲ ლოქუ ოთჷრმახ
Line of edition: 11    ნეპრალ". ეჩუნღო აკვედს ხაკჩეხ ჩიქე ეშხუ ღალას ი ლე̄ქვნეხ:
Line of edition: 12    "აჲა", ლოქ; ღო მე̄რმა ღალას ხაკჩეხ ი ლე̄ქვნეხ: "დაჲა" ლოქ; ღო --
Line of edition: 13    მესმას ი ლე̄ქვნეხ: "ბაცა" ლოქ. მაგ ღალარ ამჟი ნაშჷლდაჟი ე
Line of edition: 14    ი̄რიხ, ქა ხეყა̄ლხ თხუმჟი, ე მო̄დე ი ქა ხატბჷნეხ, მა̄მ ლოქ მჷრეს
Line of edition: 15    ხა̄რხ სერ ბაც.

Line of edition: 16       აკვედს ჲეს ქა ხაკჩჷ̄რეხ ი ჲეს დე̄მამ. აშ ლჷრმ ნეპრიშ აკვედი
Line of edition: 17    ლიკჩჷ̄რე წეს ლჷმა̄რ ეჩქადი, ათხეჲ.

Line of edition: 18       ყვიჩ ჴერჭვან მა̄ჲ ლი, თვეთვნო̄ლ ხა̄რ გუგუფჟი̄ნე ი დედვ მა̄ჲ
Line of edition: 19    ლი, ქურუხვ ფერიშ ლი, თვეთვნე მა̄მ ხა̄რ გუგუფჟი̄ნე. ყვიჩს
Line of edition: 20    ღალარქა კაბაჲ ხა̄რ.

Line of edition: 21       ლარმეჲჟი ამჟი ხემზჷრხ: "ჴერჭვან ჭია, ჭია, მჷტარ ისგვა ყიას,
Line of edition: 22    ისგვი ლეღვ მიშგვა ყიას, გასარ, გასარ!".

Line of edition: 23       ღომელ. ღომლირ ნამდაგა̄რვა ლეღვს ხათილხ. მე̄ვარ მეშხე
Line of edition: 24    ლი. ლა̄ჲრაკდ არი, ერე ღომელშა̄ლ ლოქ მეშხე ლი. მეთხვიარა
Line of edition: 25    ღომელს გოგბედნიერს ხატუ̄ლიხ. ლათხვიარჟი ღომელს ლას
Line of edition: 26    ხეწდენის, ყჷლეხ: "ლადი ლოქ გოგბედნიერ გვასიპ ი ლითხვიარ
Line of edition: 27    ლუმურჯე ლოქ გვე̄რი". ღომელ მეცარ ლი ი ჩუ ლოქ ხოხალ შომა̄ჲ
Line of edition: 28    ღენ იმურჯე მეთხვიარ ი ეჯღა ლოქ ხასიპ ეჩქა. ღომელს ე იწვე̄ნეხ
Line of edition: 29    ლათხვიარჟი, ეჩქა ხოხალხ, ერე ნათხვიარას ეშჲეში̄ ადგარიხ.
Line of edition: 30    ნათხვიარახენქა ნა̄თი ხოსდენი ღომელსი̄, სგა̄შურა. ღომლარ ლოქ ძორს
Line of edition: 31    ხეჭმინა̄ლხ ი მეთხვიარა ლახ ე̄სა ნათხვიარას ადგარიხ, ეჩქა ლოქ შიშდ
Line of edition: 32    ჟი იქვნიხ ი ხასიპხ ქალუშდუნე წიკა̄ნტარს ი მეთხვიარი მეჩდან
Line of edition: 33    ეჯჲარს ლოქ იზბიხ. წიორსი̄ ლოქ ხოგად ქუნ ნაწილდ ი მეთხვიარა
Line of edition: 34    ნახთვიარა̄შ სგა̄შურას ი ჭიშხარს ეჯღა ლოქ ცურეხ წიორიშდ.

Line of edition: 35       ნეპრისა ღომჟლშა̄ლ გვეფ, მეცარ ი ჩი̄მი მჷმჴერი დე̄სამა ლოქ
Line of edition: 36    ხეჩდა.

Page of edition: 27 
Line of edition: 1       შტავალ. შტავლარ ჩი ზაჲ ჴედნიხ ჩუ ლულფხვან. ალჲარს
Line of edition: 2    ლამა̄რჲა̄ ქათლარს ხატუ̄ლიხ ი დე ხოშა ი დე ხოხრა ქა და̄რ
Line of edition: 3    ხათილ, მუ̄რყმალე კეცხარჟი ასყა̄ლიხ ლაცინდულე̄ლს ი გამდრვალ
Line of edition: 4    მუჟღორ გარ ღჷრიხ ტებდი ქვეყანათე. შტავლარ დე̄მშა მავინ ხაბჟახ
Line of edition: 5    ი ხალატხე მე̄ვარ.

Line of edition: 6       მჷთნაფო̄ლ. ალ ნეპო̄ლ თელდ მჷჴნი̄რს ხაჯეშ ი თამფიერალქა
Line of edition: 7    გარ ჴედნიხ. აკვედი ნაჯვდანი̄ მჷჴნი̄რი მაჯო̄ნ ლი. ამშა ლეღვს
Line of edition: 8    მა̄მ იზბიხ ი დეთა̄ჲ ე̄რ ხერმი̄სგა̄ლ. ჴედნიხ მე̄ვარ ფიშირ ჩუ
Line of edition: 9    ლულფხვან.

Line of edition: 10       ლიცეჴეფო̄ლ. ალ ნეპრ მაღლავს ხაჯეშ თელდ, მარა გუჟი
Line of edition: 11    ხა̄რ თვეთვნე. ლეღვ ეზარ ხა̄რ. აშ დო̄რ ეთთხანი, ეჯჲარჟი და̄რ
Line of edition: 12    ითხვიარ. ტანდი̄ მაღლავზუმ ლი. ლიცე ჴეფო̄ლარ ჲერუ გვარიშ ლიხ.
Line of edition: 13    ჲერხი ძღჷდარ ლიხ ი ფერდ -- ქურხვალ ი მუჭოდქა თვეთნო̄ლარ,
Line of edition: 14    ჲერხი კოტო̄ლი̄ლარ ლიხ, ფერდ -- მეშხე, მუჭოდჟი -- თვეთვნე.
Line of edition: 15    ალჲარ მეჲად ამე არიხ ი მე̄რმე გვარიშ ჯო̄დი ლჷნიკრატ ლუფხვისა
Line of edition: 16    გარ ჴედნიხ.

Line of edition: 17       სკვინჩაჲ. სკვინჩაჲ, ჩიორაჲ ი ჴა̄ჩუ ლუფხვისა მჷტარს
Line of edition: 18    იზბიხ ი ურწმუნს ი ამღა დე̄მ იზბიხ ლუფხვისა ალჲა̄რე ლეღვს.
Line of edition: 19    ლუნთისა ლოქ ჩუ ხაყა ლეზობდ, ურწმუნს ი ვჷტარს ლოქ დეშ ხელკი
Line of edition: 20    მუსი ბედშვ ი დეშ ლოქ იზბი ამკალიბარს. ლუნთისა სკვინჩა̄ჲ
Line of edition: 21    ლეღვს მაგ იზბი.

Line of edition: 22       სკვინჩე̄ლ ჩიგარ ამე არიხ ლუნთ ი ლუფხვ. ალჲარს და̄რ ხეჭმინა̄ლ
Line of edition: 23    ლარმეჲდ; სურუ კოჭო̄ლ ტანაშ ლი ი ეჩა გუ̄ნღა ლიჭმინალდ
Line of edition: 24    მა̄მ ხაჯეშ.

Line of edition: 25       სკვინჩაჲ ლოქ ერ ლერსგვენხენ ლეხხო̄ლი მა̄რას, ხოჩა ნალხვი̄
Line of edition: 26    ლოქ ხა̄რ. ეჯ ლადეღ ლუმურჯე ლოქ ლი ალ მა̄რე, ლერთენხენ
Line of edition: 27    ე ლეხხო̄ლი ი ქა ლახტუ̄ლნე, ეჯი ხოლე̄მი ლალშან ლოქ ლი.

Line of edition: 28       გეგვა̄ლდ. გეგვა̄ლდარ ლუფხვისა გარ ჴედნიხ. მაღლავარზუმ
Line of edition: 29    ღო̄თაშდ ლიხ ი ლეღვი̄ ხოჩა გემაშ ხა̄რხ ი ნეჯვიდარს დე̄მ
Line of edition: 30    ხოგემხ. დეშ არმა̄ლიხ ნეჯვდარშვ, ეჯღა ერე მეგემხენქა მეგემთექა
Line of edition: 31    პერნი ი ძირს ნაკდ იქჲა̄ქ ე̄სა ხეგნი, ოდო აშ მა̄მ ხასჲამ ძირს ლიგნე
Line of edition: 32    გეგვა̄ლდს.

Line of edition: 33       მჷგოწხირო̄ლ. მჷგოწხირო̄ლ მჷწრან ფერიშ ლი; ტანდ
Line of edition: 34    ლივლივაჲდ ხოშა ლი; ლეზობ მა̄ ლი. ხაზნა არღანშა̄ლ ლიჭრია̄ხე,
Line of edition: 35    ჩუ ერ ათჷრმნე. ლეგოწხირას ხეგნიხ. მჷგოწხირი̄ლარი̄ ლუფხვისა
Line of edition: 36    ჴედნიხ.

Page of edition: 28 
Line of edition: 1       გვრიტ. გვრიტალე ლეღვ ეზარ ლი ი ალჲარს მე̄ვარ
Line of edition: 2    ხერმი̄სგა̄ლხ.

Line of edition: 3       მა̄გა. შყეჟვი მაჯო̄ნ ნეპო̄ლ ლი თელდ, მარა ჭიშხარ ხა̄რ
Line of edition: 4    ხოჯვდულ. ლეღვ ხოჩა ხა̄რ.

Line of edition: 5       მაჯრაჴ. მაჯრაჴ მაღლავზუმ ლი ი შყეჟვი ფერიშ. ლეღვ
Line of edition: 6    ხოჩა ხა̄რ ი მე̄ვარ ხერმი̄სგა̄ლხ. ლუფხვისა გარ არიხ. ხოჩა გარსაჲ
Line of edition: 7    ნეპო̄ლ ლი. მაჯრაჴ წჷრნი ფერიშ ლი, წჷრნი ნიკრატ ხა̄რ, ჭიშხარ
Line of edition: 8    -- კჷ̄ლთხი, ლენჭყ ერ დოშ ლეხი̄დეს.

Line of edition: 9       ღალღაჲ. სალტაჲ ღალღაჲ მეშხე ნეპო̄ლი̄ლ ლი მორჩლა̄რა.
Line of edition: 10    ლეზობდ მა̄ ხაყა. მუჭოდჟი წივწკლარ ხა̄რ. გარსაჲ ლი, აშ
Line of edition: 11    ერე ჟეღ დეშ ხეჲა̄ლ. ჭიშხარ მეშხე ხა̄რ.

Line of edition: 12       ღალღაჲ ჲერუ გვარიშ ლი. ლირდე ხოხალ ლამძღირ ადგილარისა,
Line of edition: 13    გოწხირალეშ ი ბელყეჩარე ძირალისა. ფერდ მეშხე ლი. აკვედ
Line of edition: 14    დე̄სა ხა̄რ. ლეზობდ ხოჩა ლი. ლედგარი ხოჩა ლი, მარა ძვირდ გარ
Line of edition: 15    არიხ. ჴედნიხ ლუფხვისა, ლუნთისა დეშერ ხეწდენი.

Line of edition: 16       ჟღარაჲ ლივლივაჲ. ალ ნეპო̄ლარ ტანდ ლივლივე̄ლდ
Line of edition: 17    ხოში̄ლ ლიხ. ფერდ მჷმშხათე ნაღალდ იბდერხ, მარა აშ ქურუხვ
Line of edition: 18    ფერიშ ლიხ. ლაპე̄ნა̄ლჟი ეშ ჟღრიპნეხ, მჷგდა̄ჲ ჭანჭო̄რიხ. ალჲარე
Line of edition: 19    ლეღვს მახჲადა̄რ იზბი მაგ, ეჲჟი ხოჩა ლუგვარ ლეღვ ხა̄რ. ამთა̄ნ
Line of edition: 20    ლერმი დეხდა ნეპრ ლი. ეშ ხებრა̄ნყვიხ სგა ნეჯვიდთე̄ჲსა. თელდ
Line of edition: 21    ფიშირ დე̄მ იგხიხ ეშხუდ. ვო̄შთხვ-ვოხუშდს გარ ხაზხახ ეშხუდ
Line of edition: 22    ლიპე̄ნა̄ლ.

Line of edition: 23       მჷკა̄ლ ლივლივაჲ. ალ ნეპო̄ლ ჟღარაჲ ლივლივაჲს ხაჯეშ
Line of edition: 24    თელდ. ლივლივა̄ჲ გვარიშ ლი, მარა ძღჷდშვ ხოხრა ლი ლივლივა̄ჲშდ.
Line of edition: 25    ჯოგ-ჯოგდ იზელა̄ლხ ი მეგემჟი დემ ხეგნიხ. ლუფხვისა გარ ჴედნიხ.
Line of edition: 26    ლეღვ ხოჩა გემაშ ხა̄რ.

Line of edition: 27       მჷქსა̄ნი̄ლ. ალ ნეპო̄ლი̄ლარ ლივლივე̄ლს ხაჯეშხ, მარა ალჲარს
Line of edition: 28    მეგემჟი ლიგნე ხაზნახ ი ლივლივე̄ლ მეგემჟი დე̄მ ხეგნიხ; ტანდ
Line of edition: 29    ლივლივე̄ლდ ხოში̄ლ ლი; ქურუხვ ფერიშ ლიხ, თხუმჟი მუჭუ̄ლარშა̄ლ
Line of edition: 30    ქოქოჩო̄ლარ ხა̄გხ ჲერუ ეჩხენ-ამხენ. ლეზობ ნეპრ ლი. ლერმიდ
Line of edition: 31    მე̄ვარ ხოლა ლიხ. დე̄მ ხემინდვიხ ნეჯვიდს.

Line of edition: 32       ჟვი̄ნა. ჟვი̄ნა ცხეკვდ ხოში̄ლ ტანაშ ლი, მარა ცხეკვზუმ ლამარგ
Line of edition: 33    დეშ ლი. ალე̄ჲ ცხეკარისა ი ლახვარისა არი. ლედგარიდ ძვირდ
Line of edition: 34    იდრენი ი დე ლაცინდულას მოშ ერ ხელკი ეჯჲარეშ. ამშა ლეღვს და̄რ
Line of edition: 35    იზბი. ალე̄ჲ მავინ ნეპრ ლი.

Line of edition: 36       მეთოვლიაჲ. მეთოვლიაჲ მუთთვენ ფერიშ ლი ი ჩიგარ არი
Line of edition: 37    ლუნთ ი ლუფხვ. მეთოვლიაჲს ერ იწვე̄ნეხ სოფელისა, ეჩქა ყჷლეხ,
Page of edition: 29  Line of edition: 1    ერე "მუს ლოქ ლი ანღელს, მეთოვლიაჲ ლოქ იპე̄ნა̄ლ". მეთოვლია̄ჲშ
Line of edition: 2    ლეღვს და̄რ იზბი ი დე ლადგარდ ე̄რ ხეჭმინა̄ლ. სოფეთლე სიპ
Line of edition: 3    მახე ლილფხვა̄ლთე. ცხეკვზუმ ლი, მარა ლიღეშა̄ლ დე̄მშა ხა̄ჲმედა.

Line of edition: 4       მჷჴნი̄რ. მჷხნი̄რი̄ლ ბეღურო̄ლდ ხოში̄ლ ტანაშ ლი ზჷმშ ი
Line of edition: 5    თვალაში̄ ხოჩი̄ლ ლი. ჯო̄დი აკვედ ხა̄რ, მეშხავშ ი ქურუხშვ ჭჷრელ ლი ი
Line of edition: 6    მე̄ვარ მუსგვენ თვალაშ. ალჲარ ჴედნიხ ლიჴნჲელისა ი ეჩქა გარ
Line of edition: 7    იჯრავიხ, ერე "ლუფხვ ლოქ ემჴედ ი ლიჴნჲელე დროჲ ლოქ ლი სერ".

Line of edition: 8       იმშა ლეღვს ძვირდ ე̄რ ხათილ ი ხერმი̄სგა̄ლხ და̄რ. ლერმიდი̄ ხოდრა
Line of edition: 9    ლიხ ალჲარ. ალ ნეპო̄ლი̄ლარ მავინ დე̄მშა ხაბჟახ ი ალჲარე
Line of edition: 10    ლიჴედ მე̄ვარ ხახჲადხ. მეშხე გუ̄ლუ̄ლ ხა̄რ ი თელდ ჯო̄დი აკვედ
Line of edition: 11    ი მეჲად ხოქვთან აკვედ. ლაჴანჟი ხაჭიმ ღენწუში ნა̄ზვს ი იზბი
Line of edition: 12    მუღუ̄ლი̄ლარს ი მჷტჷ̄ლარს. ალ ნეპო̄ლი̄ლარ ჩიგარ ლჷჴან დაბარს
Line of edition: 13    გარ ხეჭმინა̄ლხ ი ეჩქა ხოსგდიხ ალჲარს სოფლი მა̄რე̄ლ, ოდო აშ
Line of edition: 14    მაჲ ჩიქა̄ჲ ღენ ჴედნიხ, ჲედ შომა̄ჲ ღენ ღჷრიხ, ეჩას დვშსაჲამ
Line of edition: 15    იმჴერიხ. ჲერხი აგის მჷჴნი̄რი̄ლს თოხიტარას ხატუ̄ლიხ.

Line of edition: 16       არაკ: "მჷჴნი̄რი̄ლარე ლიჴედჟი მუსი̄ ლოქ ჴედნი".

Line of edition: 17       შაურდენ. შაურდენ ძღჷდ მენგრე ნეპრ ლი, მარა არწივზუმ დეშ
Line of edition: 18    ლი. ჩინ მაშე̄ნე მოღეშა̄ლ ნეპრ ლი ი მე̄ვარ მარჯვ ი სწრაფ. გუგუფ
Line of edition: 19    ხა̄რ გუ̄ნ ქუცაჲ. გუგუფშვ ლოქ იშჲა̄ლ. სგა იმვა̄ჲ ხეძგრი, ჩი̄ს
Line of edition: 20    ხაწრე გუგუფშვ ი ნეპრს ჩი̄ს ჩუ ბუჭკვე. ხედრა̄ლ შაურდენ მაშე̄ნა̄მდ
Line of edition: 21    მჷლყე̄რალს ი ცხეკი ქათლარს. ალჲარს ლოქ არმა̄ლი ი ეჯჲარშვ
Line of edition: 22    ისე̄ლვე თხუმს. ლახვარისა ლირდე ხაზნა.

Line of edition: 23       ცხეკვ ი მიმილ. ცხეკვარ ი მიმლარ ხვაჲ არიხ ი ხვაჲ წიწილს
Line of edition: 24    ი ქათალს ხოღე̄შხ მეზგე̄ლს ი ხვაჲ ზარალს ხაგნეხ. ცხეკვიშ ი მიმლი
Line of edition: 25    ლეღვს და̄რ იზბი. ალჲარე ბედშვ თელდ ლირდე ხა̄რხ მეშთხე
Line of edition: 26    ზურალე̄ლს ქათლარე ნალეჩ ი ნაქქანა̄ლ. ცხეკვარ ჲედ მიმლარ ე̄რ
Line of edition: 27    ხოშგბენიხ მეზგე̄ლს, ეჩქა ხორჲა̄ლი̄ნეხ ი ჩუ ლი ჩჲა̄გ ჲეზვარისა
Line of edition: 28    ბობშარეშ ი ზურალე̄ლე წივილ-კივილ. "არი, არი, არი ლოქ!" ი
Line of edition: 29    ვედნუშ იღრეხ ქა. ცხეკვ ი მიმილ ძღჷდ მავინ ნეპრალ ლიხ. ალჲარე
Line of edition: 30    დაგრას მაგ მე̄ვარ ითჲა̄ლ, მარა ძღჷდ ლეგ ლედრენი ლიხ. მე̄ვარ
Line of edition: 31    ლჷფშირე ლიხ ცხეკვარ ი მიმლარ. ეჯჲარე ლაცინდულას ძვირდ გარ
Line of edition: 32    ერ ხეთხნი ი ამღა მჷრე̄ს ედფიშრა̄ნხ. ცხეკვ ნა̄რგილ ქათალზუმშა̄ლ
Line of edition: 33    ლი ტანდ, მარა ძღჷდ ლამარგიშ ლი. მიმილ ცხეკვდ ხოხრულ
Line of edition: 34    ტანაშ ლი.

Line of edition: 35       მჷყრო̄ნტს (\ მუყრო̄ნტ). მჷყრო̄ნტალ ჴედნიხ ლილფხვა̄ლთე
Line of edition: 36    ნაღალდ, შომა̄ჲ მაშე̄ნე ავდრიანობ ლი, ეჩქა. მუყრო̄ნტალე მეჴდან
Line of edition: 37    გარ ხაჯრავახ ლუფხვ. ამშა ლეღვს იზბიხ ი შომა̄ჲ ალჲარ ანღრიხ,
Page of edition: 30  Line of edition: 1    ეჩქა ძღჷდ მი̄მან ხარს ალჲარე ლაჭმინა̄ლს ჩი̄ს. ხოშა ნაღალდ
Line of edition: 2    ლე̄თშვ ანღრიხ ი ეჯჲარე ლიწი̄ლჲელს ერ იმჴერიხ, ა̄შვეხ ჲეზვარისა
Line of edition: 3    ლემსგარს ი ანღლიხ, ერე ნარის ლოქ ერ იწვე̄ნეხ, ჩუ ლოქ შჷ̄დნიხ
Line of edition: 4    ლემესთეჟი ი ეჩქა ჲერხის ადგარიხ ი ჲერხის არმიხ ხა̄ლ მოშ
Line of edition: 5    ეჲჟი. მჷყრო̄ნტი ლეღვს მაგ იზბი, მარა მე̄ვარ წაი ლეღვ ხა̄რ.
Line of edition: 6    ალჲართე ჩუ ისრეხ თოფარე ლიფშვდესი̄. მჷყრო̄ნტალს ეშხუ მუთხვმი
Line of edition: 7    ხოჟოღვ ი ეჩის ხაჭიმხ იშგენ მაგ ქა ლუდუ̄წად ჯო̄დიდ თეკვშა̄ლ
Line of edition: 8    ი ამჟი ანღრიხ. ძირს შომა̄ჲ ხეგნიხ, ეჩქა ხერმი̄სგა̄ლხ, ოდო ლა̄ზჟი
Line of edition: 9    დეშმამ ხეჩოხ: ძღჷდ ჟიხიქა ესპე̄ნეხ. მჷყრო̄ნტალე ღოშდ ლიტეხს
Line of edition: 10    დეშერ იმჴერი, მაჲღენვა̄ჲ ჩიქა ტეხნიხ. ალჲარს ძღჷდ ჯო̄დი ჯიშხარ
Line of edition: 11    ხა̄რხ ი ჯო̄დი ნიკრატ.

Line of edition: 12       არაკ: მჷყრო̄ნტალ ლოქ ერ ჴედნიხ, ეჯჲარს ეშხუ ლიჴედ მუსი̄
Line of edition: 13    ლოქ ხაჭიმ.

Line of edition: 14       ბატ. ბატარ გარეგანი̄ არიხ ი ნა̄რგილი̄, მარა ნა̄რგილ ბატარ
Line of edition: 15    მე̄ვარ მერხელდ ლიხ ლჷფშირე. ბა̄ტიშს ლეღვდ ხოშა̄მ ბუნტყულს
Line of edition: 16    იმკახეხ. ბატი ბუნტყულიშს ასყიხ ბალიშარს ი ბუმბულარს.
Line of edition: 17    ბუნტყულს ხათშიხ ქა ღინღილს. ღინღილი ბალიშ ი ბუმბულ ხოშა
Line of edition: 18    ლუგვნიან ლი. მახე ლუწვი̄ლე დი̄ნას ათხე̄ ღროჲჟი ხაყვანიხ ბატი
Line of edition: 19    ღინღილი ბალიშარს ი ბუმბულს. ჯვინელ დროჲჟი და̄რ ხაყვანნა ი
Line of edition: 20    ამღა ლჷმარდხ ხომჷრხელა̄მდ ბატარ. ბატი ლჷგრალს აღფეხა̄ლიხ
Line of edition: 21    ი თამფიერისა იჴმარიხ ნაჯგრუნდ. ჯო̄დი ლუნთისა ლეგ ლეშხვნი
Line of edition: 22    ლიხ ბატარ ი ამხენქა ხაყახ მერხელდ. ეშხუ ლიკვშუნეჟი უსგვიშგვიდ
Line of edition: 23    ბჟიტს იკვშე ბატ. ალჲარს ხოჯბიხ მერხელს ი ამშა ქაქს
Line of edition: 24    ხა̄მნეხ. ლარკალჟი ბატარს "სოჲ, სოჲ-ს" ხატე̄ლიხ ი ეჲჟი ოსყახ
Line of edition: 25    ლიცრე პილთე ლალდეღთე ბობშარს.

Line of edition: 26       თოთ ბობშირს ლახ ჴადარ ე̄სა ხეზგუნიხ, ეჩქა ბატი ნა̄ნღველს
Line of edition: 27    აშე̄რეხ ლიცისა ი ეჲჟი ხათრეხ ი ჴადი მაზიგს შიშდ ჩუ ხოშა̄რდე.

Line of edition: 28       გედ. გედ გარეულ (\ ნაქა̄მ) ბატი მაჯო̄ნ ლი თელდ, მარა ხოჯვდა
Line of edition: 29    ნიკრატ ხა̄რ. ლეღვ ლეზობ ლი ამშა.

Line of edition: 30       ყანჩვ. ხოლა ლესგდიშ ლი. ტიტველ კი̄ნჩხ ი კჷ̄ლთხი ჭიშხა̄რ
Line of edition: 31    ხა̄რ ნიკრატ -- ჯო̄დი. იზბი ბაყყარს ი არი ლენჭყისა. ჴედნი ლუფხვისა;
Line of edition: 32    ლუნთისა მა̄დ არიხ. ლეზობ მა̄ ლი.

Line of edition: 33       მჷლც. მჷლცარი̄ ლილფხვა̄ლთე გარ ჴედნიხ. ალჲცრი̄ ბუნ-ბუნდ
Line of edition: 34    იპენა̄ლხ ი ლჷლიც-ლჷტვბაჲ აგის გარ ხეგნიხ. ამშა ლეღვ მე̄ვარ
Line of edition: 35    ხოჩა ხაბჟახ ი მე̄ვარ ხეჭმინა̄ლხ ლადგარდ.
Line of edition: 36    ნა̄რგილ მჷლც ძვირდ გარ არი შვანისა. გარეულ მჷლც ხოხრა
Line of edition: 37    ტანაშ ლი ნა̄რგილ მჷლცდ. მჷლცარი̄ მახე ლილფხვა̄ლთე გარ თერახ,
Page of edition: 31  Line of edition: 1    ო დო ეჩანღო მე̄ვარ მერხელდ გარ ე̄რ ხეწდენი. ეჯჲარე ღოშდ ლიტეხსი̄
Line of edition: 2    დეშ იმჴერიხ. მჷლცარს ბობშარ დეშ ადგარიხ. მჷლცარს
Line of edition: 3    მახეღვაჟარ გარ ხეჭმინა̄ლხ ლადგარდ. მჷლც ჲერუ ნაირიშ ლი: კაბაჲ
Line of edition: 4    მჷლც ი კოკრაჲ მჷლც. კაბაჲ ხოშა ტანიშ ლი, კოკრაჲ -- ხოხრა. დგნორ
Line of edition: 5    ლიცარისა ხამთქვა.

Line of edition: 6       ბულყუჩო̄ლ. ალ ნეპო̄ლ მეშხე ფერიშ ლი ი ტანდ ჯინჯრიკო̄ლზუმ
Line of edition: 7    ლი. ჩინჩაჴვ თვეთვნე ფერიშ ხა̄რ. ლეზობ ნეპო̄ლ ლი. ლირდე
Line of edition: 8    ხაზნი ტუბჲარეშ ი ლიცრე ნაფდიაქა, გუბჲარისა ი ლუყულბუჩა
Line of edition: 9    ლიცარისა ი ამხენქა მჷრე̄ს ესჟახა̄ნ ალ ჟახე. ლერმი ლეგ ლი.

Line of edition: 10       ჯინჯრიკაჲ. ალ ნეპო̄ლი̄ლ მე̄ვარ კოჭო̄ლუ̄ლ ლი, აშ, ერე თელდ
Line of edition: 11    მავრე̄ნე ტანაშე̄ლ ლი ნეპრალისა. ლეზობდ მა̄მ ხაყა ი დეთა̄ჲ ე̄რ
Line of edition: 12    ხერმი̄სგა̄ლ. ფიშირდ ლირდე ხამთქვახ კირვალისა ი ნენის ხეკინკულხ
Line of edition: 13    ი ამნოვშ ისე̄ლვიხ ლუნთისა.

Line of edition: 14       მჷ̄ჲღვერო̄ლ. ალ ნეპო̄ლი̄ლ გვაწაჲზუმ გარ ლი, მუთთვენ
Line of edition: 15    ფერიშ. ლეზობდ ხაყა ამშა ლეღვს ი ხვაჲდინ ხერმი̄სგა̄ლხ. ლუნთისა
Line of edition: 16    დე̄მ იგნიხ ამე ი ლუფხვისა გარ ჴედნიხ. ალ ნეპო̄ლს ხაზნა დაბარე
Line of edition: 17    აღვრე̄ლჟი ი ბეჩარჟი ლიგნე ი ამხენქა ლოქ ხა̄ჲშხა მჷ̄ჲღვერო̄ლ.

Line of edition: 18       ფაფრანჯ. ფაფრანჯ მაღლავზუმ ლი. ფერდი̄ მაღლავს
Line of edition: 19    ხაჯეშ, მარა ჲერხი ჭჷრელ ლი ი ძღჷდ მუსგვენ ლესგდიშ. ხალატ
Line of edition: 20    კუმში ნაფდიაქა ლირდე ი კუმში ბუზუ̄ლარს ხედრა̄ლ ლერმიდ.
Line of edition: 21    ლეზობდ ჩუ ხაყა.

Line of edition: 22       ქურაშ. მჷწჷ̄ლს ხაჯეშ, მარა ზჷმშვ ხოხრი̄ლ ნიკრატ ხა̄რ
Line of edition: 23    ი ხოშა ლუნყუ̄რე ლი. მჷწჷ̄ლ ლჷლენჭყ უჭმა ლა̄რე̄ლისა ხამთქვა,
Line of edition: 24    ქურაშ ხოშა ზჷსკი აგის არი ი იმხენქა ხაყვილ მჷწჷ̄ლს.

Line of edition: 25       ჯავახ. ჭჷრელ ფერიშ ლი. ლეზობდ მა̄ ხაყა, ეჯღა ერე
Line of edition: 26    ხოხრა ნეპრალს არმი ი იზბი, აშ მჷყრო̄ნტს ღო̄თ ხაჯეშ. ეშხუ ცაგხენქა
Line of edition: 27    მე̄რმა ცაგთექა პერნი. ხალატ ლირდე ცაგრე თხუმვარჟი.

Line of edition: 28       გვანც. ჭინჭრაქო̄ლზუმ ლი. მე̄ვარ ლუგვარ ლი ჩიგარ.
Line of edition: 29    ლეღვ ლეზობ ლი. იგვე̄წვრჲელ ნაშხტარისა.

Line of edition: 30       გჷნ. ხამთქვა ლიცე პილარჟი ი ხაჭიმ ლეჟა-ლექვა ლიცს. ჯო̄დი
Line of edition: 31    ნიკრატ ხა̄რ ი ჯო̄დი ჭიშხარ. ჴედნი ლუფხვისა ი ლეზობ ნეპრ
Line of edition: 32    ლი. შივჟი ფარ ფერიშ ლი, ჴიდჩუქვა̄ნ -- თვეთვნე ი გუ დეცვფერიშ
Line of edition: 33    ხა̄რ.

Line of edition: 34       ძუღვა̄ გჷნ. ხაჯეშ გჷნს, მარა ლეგ ლერმი ლი, შიყჟი
Line of edition: 35    მეშხე ი ჩუქვა̄ნ თვეთვნე ლი. შტავალს ღო̄თ ხაჯეშ, მარა ალე ძღჷდ
Line of edition: 36    ტანაშ ლი გჷნდ. ლეზობდ ხაყა ი ძღჷდ სწრაფ ნეპრ ლი. ჴედნი
Line of edition: 37    ლუფხვისა.

Page of edition: 32 
Line of edition: 1       ძინძღვ. შტავალდ ხოში̄ლ ნეპო̄ლი̄ლ ლი, თელდ შტავალს
Line of edition: 2    ხაჯეშ, მარა ძინძღვ მეშხე ფერიშ ლი ი ხონკვშდა ჭიშხო̄ლარ ხა̄რ.
Line of edition: 3    ქა ვედშვ თერახ ჭიშხარ ტანხენქა; ღალარ ხოჯვდა ხა̄რ შტავალიშდ;
Line of edition: 4    ლეზობდ მა̄მ ხაყა. ლუფხვისა გარ ჴედნიხ ი ლაცინდულას შტავალშა̄ლ
Line of edition: 5    ნამხვირალისა ისყიხ ი ლჷბეჩარისა. ჟი ლიპე̄ნე გარჯ ხა̄რხ. მე̄ვარ
Line of edition: 6    ნალგვარი ხაზნახ. ძღჷდ ჲენას ლიპე̄ნა̄ლ ხოხალ.

Line of edition: 7       არკ. ძღჷ̄დ ნეპრ ლი, ქათალზუმ ღო̄თ ლი. არკ ლე̄თშვ კი̄ლი
Line of edition: 8    ი მე̄ვარ ხოლა ლალშან ხაბჟახ ამშა ლიკი̄ლი. ხედ სოფელთეჲ სგა
Line of edition: 9    ჴედნი არკ ი ხედ სოფელისა̄ჲ ლოქ ეჯი ესკი̄ლნე, ეჩე ჩუ ლოქ იდგრი
Line of edition: 10    მა̄რე.

Line of edition: 11       არკს ლეზობდ მა̄მ ხაყა.

Line of edition: 12       ვადადაჲ. ძღჷდ ლუთხუმ ლი; ლეზობ მა̄ ლი; ხამთქვა
Line of edition: 13    ცხეკარისა. ტანდ ეზრი̄სგა̄ლა ლი, ქათალზუმ ღო̄თ ლი. ყვი̄მბლე̄ვი
Line of edition: 14    მიჩაშურად. ღჷრღლავი ცხეკარისა.

Line of edition: 15       ვადადაჲ ბუვი თანაშ ლი.

Line of edition: 16       მჷღდერაჲ (\ მჷღდერო̄ლ). მჷწჷ̄ლზუმ ნეპო̄ლი̄ლ
Line of edition: 17    ლი. ლუფხვისა ჴედნიხ; ხამთქვახ ფიშირს ეშხუდ ლირდე; ლეღვ
Line of edition: 18    ლეზობ ლი. ქურუხვ ფერიშ ლი. ლუნთისა მა̄დ არის.

Line of edition: 19       ყონაყაჲ (\ ყანუყაჲ). ლუფხვისა ჴედნი; ტანდ
Line of edition: 20    ეზრი̄სგა̄ლა ლი. ლეზობდ მა̄ ხაყა. ყონაყაჲჟი გარგლიხ არაკს: "ყონაყაჲ
Line of edition: 21    ლოქ იმ ოთდაგრა ი მიჩა ნინს ლოქ ოთდაგრა".

Line of edition: 22       კოჯა სვავ. კოჯა სვავ ძღჷდ ტანა ნეპრ ლი. ლეზობდ მა̄
Line of edition: 23    ხაყა. ცხეკი ქათლარს ი რეჭვალს არმი, მა̄დე̄ჲ მენგრა ნახთვიარე̄ლსი̄
Line of edition: 24    ლოქ არმი. მეღე̄შა̄ლ ნეპრ ლი. ძღჷდ ღალარ ხა̄რ; ბართე დე̄მ ჴედნი.
Line of edition: 25    კოჯისა ი ლახვისა ლოქ არი ჩიგარ. მეჲად ამე მერდე ლი.

Line of edition: 26       ჲერხი კოჯა სვავ ეჲზუმ ლოქ ლი, ერე ნადირალსი̄ ლოქ ხვაჲს
Line of edition: 27    აჲეს ი მა̄რასი̄ ლოქ ჟი ხემწირ, ოდო იშგენ ქუნლჷმგენას ლა̄ჲდი̄
Line of edition: 28    ჩი̄ს ლოქ ხემწირ.

Line of edition: 29       ეშხუ მეთხვიარს ლათხვიარჟი ესრენ ჩვათგე̄დნე̄ნა ი ემჴედ სვავ,
Line of edition: 30    ჟოსფხიჭა ი ოთჲა ი სგო̄თჲა კოჯა ტოგონთე̄ჲსა. ალ მეთხვიარს
Line of edition: 31    ხოყი̄რა ღალარქა თოფ ი ჩოთდაგრა კოჯა სვავ; ქო̄თჭკორა ღალარ ი
Line of edition: 32    ჟოხსყა მიჩაშვდ ი ჩოხსკინა კოჯა ტოგონხენჩუ. ეჲზუმ ლახშედახ
Line of edition: 33    ალ კოჯა სვავი ღალარ, ერე კოჯხენჩუ ლაპერჟი ჩვემჴედ ლუარ ი
Line of edition: 34    ჟახსედა ხოჩა̄მდ კოჯხენჩუ ლიშყედს.

Line of edition: 35       ნახთვიარე̄ლს ლოქ ხაზნახ კიობ. ეჩქა ფიკვ ლოქ ხელჩე ძჷგჷრისა
Line of edition: 36    მახე ნაჴიდ ნეღეშტს: "კოჯა სვავდ ლოქ დო̄სა ოთღას" ი ვოდ

Page of edition: 33 
Line of edition: 1       ლოქ დო იცხემ ჟი, ეჩქად დე̄მ ლოქ ჴჷდეხ ქა ძჷგჷრხენქა კოჯა სვავი
Line of edition: 2    მაყალშვ. კიობ ლოქ ამღა ხოხალხ ნათხვიარე̄ლს.

Line of edition: 3       არწივ. ტანდ ჩინ მაშენე ლი. მეღეშა̄ლ ნეპრ ლი. ხოშა უხვა̄ნ
Line of edition: 4    კოჯარისა ლირდე ხაზნა. გუშგვემჷყ ძვირდ გარ არი. არწივ
Line of edition: 5    ნათხვიარე̄ლსი̄ ჟი ხემწირ. მარა̄სი ხაყლუ̄ნი არწივშვდ.

Line of edition: 6       ვერბ. ვერბ ძღჷდ ტანაშ ლი. გოჭარს ი ჟინღარს მე̄ვარ ხედრა̄ლ
Line of edition: 7    ი მეღე̄შა̄ლ ნვპრ ლი ცხეკვშა̄ლ იარწივშა̄ლ. ვერბს ნიკრატ ლუბღუ̄ნჯე
Line of edition: 8    ხა̄რ ი სგა̄მო სკჷრი; კანჭარ -- ჲა̄დურდ ძღჷდ. ლირდე ხაზნა
Line of edition: 9    კოჯარისა. ლაცინდულას მაგა̄რალეშს ი ცხჷნტრა̄შს ლოქ ისყი ქა ლჷსიპ
Line of edition: 10    კოჯარჟი. თვეთვნე ბჟიტარ ლოქ ხაზნა.

Line of edition: 11       ციცილ. ათხე გარ ოხჴი̄დან მჷრა̄მხენ, ოდო ეჩქად დე̄სა
Line of edition: 12    ა̄რდა ციცილ შვანე გიმჟი. ათხე ხაყახ მებცარს. ციცილს ცხეკვ დეშსა
Line of edition: 13    ხობდავი: მე̄ვარ ცუა̄ლაჲ ლოქ ლი.

Line of edition: 14       ლახვა ნეპო̄ლ. კოჭო̄ლი̄ლ ლი, ჯჷჭკჷ̄ლზუმ. ქურუხვ ფერიშ
Line of edition: 15    ლი; ნიკრატ მეკვეშდო̄ლ ხა̄რ ი მეგრე. ლახვარისა ხაზნი ლირდე.
Line of edition: 16    იზბი ჭაფორი ლა̄შის. და̄რ მჷრ ხერმი̄სგა̄ლ, ოდო აშ ჩუ ხაყა
Line of edition: 17    ლეზობდ.

Line of edition: 18       ლურუსუ გვრიტ. აშ გვრიტს მა̄ ხაჯეშ. წვანილ ფერიშ
Line of edition: 19    ლი; ტანდ ჴა̄ჩუზუმ ლი; ლეღვ დეშ ხა̄რ ხოჩა; მეჩხფე ლი; მახე
Line of edition: 20    ნაჴან დაბარისა ხოხალ ლირდე. ცაყარჟი ხეგნო̄ლხ. აშ გვრიტს ხოჩა
Line of edition: 21    ლეღვ ხა̄რ ი ამჷნ ხოლჷვარა̄ჲ ლი.

Line of edition: 22       მანჴიაჲ. შყეჟვდ ხოში̄ლშა̄ლ ლი ი ქურუხვ ფერიშ ლი.
Line of edition: 23    ნაქრუხვი მუთთვენთე ნაღალდ იბდერ. თელდ ცხეკვი მაჯონ
Line of edition: 24    თენიკრატ ხა̄რ. კი̄ნჩხ ხა̄რ ჯო̄დი ი ლჷწრიხე მე̄ვარ. ჲეს აშ აწრიხე
Line of edition: 25    კი̄ნჩხს, ჲეს ეშ ი მანჭიაჲ ამხენქა მჷრე̄ს ესჟახა̄ნ. ლეზობდ მა̄მ ხაყა.
Line of edition: 26    ფხულას ერ ხაწვე̄ნნე, იმთე̄ჲ ათქუთნი, ეჩხა̄ვ აწრიხე ი ხაჯო̄რბა̄ლვნე
Line of edition: 27    თხუმსი̄. უშხვა̄რე ლასყვედურჟი ყჷლეხ, ერე "იმჟი
Line of edition: 28    მანჭიაჲშა̄ლ ლოქ ხაწრიხე კი̄ნჩხს".

Line of edition: 29       მჷჟი̄შხო̄ლ. შტავალდ ხოში̄ლ ნეპო̄ლ ლი. თელდ მეშხე
Line of edition: 30    ფერიშ ლი. ლაპე̄ნა̄ლჟი ფიშირს ხოხალხ ეშხუდ ლიპე̄ნა̄ლ ი ლიჭყი̄ლი.
Line of edition: 31    ალჲარე ლეღვს და̄რ იზბი. ლუფხვისა გარ ჴედნიხ. ჯვინელ
Line of edition: 32    ნამხვირვალისა ისყიხ საბდარალს. თელდ შტავლარე მაჯო̄ნ ლიხ, მარა
Line of edition: 33    გუგუფ მა ხა̄რხ თვეთვნე.

Line of edition: 34       კოჯა ნეპო̄ლი̄ლ. ჩიორო̄ლდ ხოში̄ლ ტანიშ ლი; ფერდ
Line of edition: 35    მეშხე ლი ი დამბლა̄რა, ბადღიო̄ლ; მუჭოდ ლჷგუგუფდ წჷრნიო̄ლ
Line of edition: 36    ხა̄რ. ალჲარს ხამთქვახ ლირდე ხოშა ტყაბ კოჯარისა ი ჯვინელ ქორლე
Page of edition: 34  Line of edition: 1    ქვედვარჟი. ლეზობდ მა̄მ ხაყა ამშა ლეღვს ი დეთა̄ჲ ე̄რ
Line of edition: 2    ხერმი̄სგა̄ლხ.

Line of edition: 3       მეჲავდარო̄ლ. მე̄ვარ კოჭო̄ლ ნეპო̄ლა̄ლ ლი; მჷმშხა-მუქრუხვ
Line of edition: 4    ფერიშ ლი. ჩინჩაჴვ მა̄მ ხა̄რ ი ამღა ამშა ლეღვს მა̄ ხაყა
Line of edition: 5    ლეზობდ.

Line of edition: 6       შომა̄ჲ ალჲარ ფიშირ იხვრჲელის ეშხუდ, ეჩქა უჩხას ახღელიხ.
Line of edition: 7    მეჲავდარო̄ლარე ბივილ-ბივილდ ლიპე̄ნა̄ლ ავდრი ლალშან ლოქ ლი.
Line of edition: 8    დეც ლოქ ერ ლჷრკჷნე ლე̄სეს, ერე მე̄რო̄ლა გვარიშ დო̄მე თერო̄ნს,
Line of edition: 9    მეჲავდარო̄ლარ ლოქ ხა̄ლ იბნეხ ლიჭივჭივის ი ეშხუდ ლიპე̄ნა̄ლს,
Line of edition: 10    ეჩქა ლოქ შიშდ იავდარ. მეჲავდარო̄ლა ნეპო̄ლარს ლიჭივჭივი ლოქ
Line of edition: 11    ხოხალხ ი ეჯჲარე ჭივჭივ ლოქ ჩვაჲავდრე. მეჲავდარო̄ლ ჩიგარ ამე
Line of edition: 12    არი ლუნთ ი ლუფხვ. ავდარ სგობინ იბნეხ ბივილდ ლიპე̄ნა̄ლს,
Line of edition: 13    მჷგდა̄ჲ ხაბჟი̄ნეხ ამსვა̄ლდს, ერე ანღელს ლოქ ლი ავდარ.

Line of edition: 14       ძუღვა̄ კეკფჷრ. ჟიქა̄ნქა მეშხე ლი, ჴადჩუქვა̄ნქა თვეთვნე
Line of edition: 15    ხა̄რ შტავალშა̄ლ. ჴედნი ლუფხვისა; და̄რ ადგარი. ჴა̄ჩუზუმ ლი.
Line of edition: 16    ჟი ე̄რ პერნიხ, ეშ ჭრია̄ხეხ, კი̄ლ-კი̄ლს იკედხ. ლეღვს და̄რ იზბი.

Line of edition: 17       მჷლა̄შო̄ლ. ტანმორჩილ ნეპო̄ლი̄ლ ლი. ლეღვს და̄რ იზბი
Line of edition: 18    ი დეთა̄ჲ ხერმი̄სგა̄ლ ე̄რ. არი ლუფხვისა. ფერდ მუყვთელთე იბდერ.

Line of edition: 19       ჩიერაჲ. კოჭო̄ლ ნეპო̄ლი̄ლ ლი; ლეზობ მა̄ ლი; ლაღობს
Line of edition: 20    ხედრა̄ლ ი ბუზუ̄ლარს ხუტე.

Line of edition: 21       ბატსჷნ. ხამთქვა ლიცარისა; ცურავ ხოხალ; მჷლცზუმ ლი;
Line of edition: 22    და̄რ იზბი; ჴეფაჲ ლი; ლიზელა̄ლ დე̄სა ხოხალ; წჷრნი თერარ ხა̄რ;
Line of edition: 23    ლიპერ მე̄ვარ ხამჭირ. მა̄რე ჟი ირმი ტოტვშვ.

Line of edition: 24       ყირმუ̄შტ. ჩხჷრჷშტდ ხოში̄ლ ლი; ნუქრუხვ-მუთთვენ
Line of edition: 25    ფერიშ ლი. ლუფხვისა ჴედნიხ ი ლიცე პილარლეჟა არიხ. ლეღვ
Line of edition: 26    მაჩე̄ნე გემაშ ხა̄რ.

Line of edition: 27       მეშამბიაჲ. თელდ კოჭო̄ლ ნეპო̄ლ ლი; ლეზობ მა̄ ლი;
Line of edition: 28    არი შამბარისა; შამბი ფერიშ ლი.


ტარიელ და ზურაბ ონიანები. სასაში. მ. ქალდანი. 14-16. IX. 1971




Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.