TITUS
Svan Prose Texts IV (Lashkh)
Part No. 24
Previous part

Text: 24 
Page of edition: 36 
Line of edition: 4 
XXIV. სევი ლისყი


Line of edition: 5       შედმაშედჷნქა სევარს ასყიხ. სევარე ლისყი ჩი̄ს ხა̄ჲმედა. სევა
Line of edition: 6    ჭიშხარს ცხეკხენ ჴჷდეხ. სევს ჲერუ ჭიშხ ხაწჷხ. სევა ჭიშხარ ერ
Line of edition: 7    ხითხე̄ლა, ხაკვჩერ აჩე̄ხი ტყაბ ადგილთე, იმე̄ჲ ცხეკ ი̄რდი. ეჩეჩუ ი̄რდი
Line of edition: 8    ეჭკაი მეგემ, ხედსი̄ თხუმ ლჷკანკულე ხე̄რი. ქა̄ლფხირკიდ ვორს,
Line of edition: 9    ჟალქვიცედ ძირჟი, ეშხუ საჯენს ჩვალცვრედ ი იშგენს ქა̄ლქვიცედ.
Line of edition: 10    ქა̄ლჴდედ შუკვთე̄ჲსა ი ჩვალცვრედ. მე̄რმასი̄ ამჟი ალქვიცედ ი
Line of edition: 11    ქა̄ლჴდედ შუკვთე̄ჲსა. სევა ჭიშხდ აყა წიფრას, ცხვიმრას, იშგენს
Line of edition: 12    დესმამ.

Line of edition: 13       ალჲესდ ჴანარს, ჟოლსყე̄ჲნედ სევჟი სევა ჭიშხარს ი ალჴდედ
Line of edition: 14    აგითე. აგის ჟაფტჯრა̄ლიხ ასალშვ. სევა ჭიშხარს ნე̄სგანუნ აფტჷ̄რეხ
Line of edition: 15    სემი აგის. ალჲარ ლიხ ფეკვნარე ლარდა. ფეკვნარს ერ ჟოლსყე̄ჲნედ,
Line of edition: 16    ეშხუ სევაჭიშხი ფეკვნარე ი მე̄რმე სევაჭიშხი ფეკვნარე ნე̄სგა
Line of edition: 17    ჟოლსყე̄ჲნედ ვოსპე̄რალს, სევა ჭიშხი თხუმვარს ქა̄ლფჷტჷ̄რნედ
Line of edition: 18    მენგრე ბირღვშვ ი ამექა ხეჩოხ ფაუ̄ლს, ხედსი̄ ხა̄ჲშხა სევა თხუმ.
Line of edition: 19    ეჩანღო ჟანქუცუ̄რნეხ ლაკტარა̄ლს. სევა თხუმჟი ჟესწირხლავნეხ
Line of edition: 20    ლაკტარა̄ლს, თხუმისა სგა ლახბენხ ეშხვა̄რ. სევა ჭიშხი თხუმს,
Line of edition: 21    ზჷმჷ̄ლდაშ ჩუხი, ქა̄დფჷტჷ̄რნეხ, ეჩანღო ქა ლოხყი̄ნეხ კვედლარს
Line of edition: 22    ფეკვნარეშ ი ვოსპე̄რი ჟიქა̄ნქა, ჟანწირხლავნეხ ი სევა ჭიშხი ღოშგინ
Line of edition: 23    ჩვადბჷგნეხ ი სევ ლჷმა̄რე ლი. წემბეშვშ სგა ხობემხ უ̄ღვას.
Line of edition: 24    სევარჷნქა იშგენ დე̄სამა იმჷრგო̄ლ ათხად შუკვიშ ი ზჷზი
Line of edition: 25    ნავღვე̄ნოვშ.


ვაჟა ონიანი. სასაში. მ. ქალდანი. 12. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.