TITUS
Svan Prose Texts IV (Lashkh)
Part No. 27
Previous part

Text: 27 
Page of edition: 37 
Line of edition: 4 
XXVII. ყა̄რი ლიყა̄რე ი ქორა ლი̄ნშგვი


Line of edition: 5       ყა̄რი ლიყა̄რე ეჩქადი̄ ჩუ ხახლე̄ნახ, მარა ათხე̄ხო̄ნა დროჲჟი
Line of edition: 6    ხოჩულდ ხოხალხ ი აყა̄რეხ ლეღმურისა ხვაჲ ხოჩა ყა̄რს. ჲერს
Line of edition: 7    ლეჩხუმთე ვოდიხ ი ჲერს აგის იჴმარიხ.

Line of edition: 8       ათხად ქორალ კავშ ხუღვა̄ნდახ ლჷ̄ნშგ, მარა ათხე მახა ფორმი
Line of edition: 9    ქორალს ყა̄რშვ ა̄ნშგიხ.

Line of edition: 10       ლეღმუ̄რისა ყა̄რიჲა̄ქს ქა̄კოტრავიხ ჩიქე ი ეჩანღო ლჷკოტრავა
Line of edition: 11    ლეყა̄რჷ̄ლის ჲედ ჩუ ჴჷდეხ სოფელთე ი ჲედ ცხეკისა აყა̄რეხ. ჩუ
Line of edition: 12    ლჷჴი̄დ ლჷკოტრივა ყა̄რიჲა̄ქს აგის ქა̄ყა̄რეხ. ლეჩხუმთე ათხად, ვოდ
Line of edition: 13    შუკვარ ისყო̄ლდახ შვანთე, ლჷკოტრავა ყა̄რიჲა̄ქს ლიცრუ̄შ
Line of edition: 14    აჲესდას. ხოჩულ ლეჲეს ხა̄დახ ლჷკოტრავე ყა̄რიჲა̄ქ ი ამღა ოსღვა̄ნხ
Line of edition: 15    ლიცრუ̄შ ი ეჩე ქა̄ყა̄რახ ი ქა̄ჲ ვოდდახ.

Line of edition: 16       ლიყა̄რე ჩი̄ს მა̄ ხოხალ. ჲერხის გარ ხოხალ, მარა აშ ფიშირს
Line of edition: 17    ხოხალ ათხე. ლეყა̄რჷ̄ლის ცხეკისა ლითერ ხაკუ. ჩიქ სასინჯს ხოკედხ
Line of edition: 18    მეგემს -- ღუმუ̄რს -- ი ჩვასი̄ნჯავიხ: იმჷრგო̄ლნია̄ მო̄დე ყა̄რიჲა̄ქდ
Line of edition: 19    ი ეჩანღო გარ ხაქვცეხ.

Line of edition: 20       მახე ქორალ ათხე ჲესვა̄ჲ ხო̄გხ -- ი ჩუ̂ჲ ხოფშირა̄მ ხო̄გხ -- მაგ
Line of edition: 21    ყა̄რშვ ლჷ̄ნშგა̄ლე ლიხ ი ლჷშკა̄და̄ლე ვოდა̄ ლურსმანდა̄ლშვ. ვოდა̄
Line of edition: 22    ლურსმანდა̄ლს აგი̄ მჷშკდარ აშკა̄და̄ლიხ ი ჟი ხოჩა̄მ აშკა̄დიხ. ბასკას
Line of edition: 23    ხეჩოხ ყა̄რჟი ი ბასკაჟი ვოდა̄ ლურსმანდს ხაშკა̄დიხ ი ხვაჲ ხანს
Line of edition: 24    გეჭნი ვოდა̄ ლურსმანდშვ ლჷშკა̄დე ქორ. ქორი ნა̄ნშგუნ კასი̄ ხოჩა
Line of edition: 25    ხელობ ხეკვად. ხოჩა ლეკაჲჷ̄რი ბეჩ ლას ლეთხე̄ლი, ოდო მაგ დეშ
Line of edition: 26    იმჷრგო̄ლ ლეკაჲჷ̄რიდ. ჩოროლაჲ ბეჩს მა̄ ხაყა ლეკიჲჷ̄რიდ. კავშ
Line of edition: 27    ლჷ̄ნშგ ქორ ივალადეღ გეჭნოლ, მარა ათხე მახა ქორალს და̄რ მჷრ
Line of edition: 28    ა̄ნშგიხ კავშ ი მაგ მჷრ ყა̄რშვ ა̄ნშგა̄ლიხ.

Line of edition: 29       მახე ნა̄თა̄ლ მეზგე̄ლ ზექრე̄ლს იგემხ მურგვალ მეგმიშს ლჷქილიქს ი
Line of edition: 30    ზექრე̄ლ ჲერს ყა̄რშვ ხუღვახ ლჷ̄ნშგა̄ლე ი ჲერს კავშ, მარა ათხე
Line of edition: 31    ზექრე̄ლს ლაკვმაშდ გარ იგემხ ი მინე ლარდად და̄რ იგემხ. ზექრა̄ჲსაჷ̄
Line of edition: 32    ლირდე შგურშა̄ლ ხაბჟახ ი ქა ლჷ̄თე მეზგე ხვაჲ ხანს დე̄მ ირა̄გე
Line of edition: 33    ზექრა̄ჲსა ი ხა̄ლ იმბეცვე ქორა ლიგემს, შიშდ სგა ხა̄რ ლალგმა̄ლს.


ტარიელ ონიანი. სასაში. მ. ქალდანი. 11. IX. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.