TITUS
Svan Prose Texts IV (Lashkh)
Part No. 73
Previous part

Text: 73 
Page of edition: 97 
Line of edition: 1 
LXXIII. უჩმინა


Line of edition: 2       ა̄რდახ ეშხუ ჲეხვ-ჭაშ. ჭაშ გუ̄ნ უჩმი̄ნა ლას. დე̄სმამ ასყჷდა.
Line of edition: 3    ჲედ ჩუ სგუ̄რდა ი იზბჷდა, ჲედ ჩუ ყუ̄რდა ი მაჲ ეშხუ ლესგთე ედსიპნო̄ლ,
Line of edition: 4    მაჲ -- მე̄რმათე. ჲეხვს მა̄ჲ ხეჲმედა̄ნ, ამშაჲდა, ჭაშს ასე̄ლვდა
Line of edition: 5    ი მიჩა თხუმსი̄. ეში ღარიბდ იზგახ. დე̄სმა ხუა̄ნდახ ყურძენჷნქა
Line of edition: 6    ი ეჯი̄ჲ რიყისა სილაჲჟი ლას მეჴდე. ეჩე̄ჲსა მერხელჷნქა დე̄სმა
Line of edition: 7    ჴედნო̄ლ.

Line of edition: 8       ეშხუ მუჟღორ ჲეხვ ეთჴჷ̄რა̄ნ მეზვბელარს ი ალე ყურძენ
Line of edition: 9    ჩვათჴანა̄ლვნე, ეჩანღო ლა̄ში ითხე̄ლე ი ჩვადლა̄შეხ. ეჲკიჲ ხოჩა დაბ
Line of edition: 10    ოხჴადხ, ერე ხოჩულ მა̄დ ა̄რდა. ანჴად ლითჲა̄ლე დროჲ. ჲეხვდ ხე̄ქვე
Line of edition: 11    ჭაშს: -- სი მა̄რე, ადე, ქა ხეწდ დაბს, ეგებ მა̄დ აყა, ნაჲ ეში̄ ეჯის
Line of edition: 12    ლოღლიდ!

Line of edition: 13       ჟანგა̄ნ მა̄რე იმჟვა̄ჲ ლას ი აჩად დაბი ლაწედთე, მარა ხჷნსგე
Line of edition: 14    შუკვ მა̄ ხუა̄ნ ლჷგა̄თვე, ანტახ აგითე. ჲეხვს ხჱქვე:
Line of edition: 15       -- ეჩე ხვარდ, მარა მერხელსერ დე̄სმა მეჴდე̄ლი. ლა̄ში ეში̄
Line of edition: 16    ნო̄ვ ოჷვში̄და̄ნ ცუდდ.

Line of edition: 17       ჲეხვს ჩუ ხოხა̄ლდა, მაჲკაჲი̄ დაბი̄ღენ ხუა̄ნდახ. ი ჭაშს დე̄სმა
Line of edition: 18    ხე̄ქვე. ხამა̄ჲ ლითი̄ დროჲ ანჷ̄გა̄ნ, ჲეხვდ ხე̄ქვე ჴაშს:
Line of edition: 19       -- სი მა̄რე, ჲედ ლათი̄თე ადერ, დო̄რღვა̄ჲ აგის ასედ, ლჷჯე
Line of edition: 20    ჟახფი̄ნ, დედვს ი წიწლარს ლეზობ ოთოშდ, ფექ ათძვე̄რ ი ჟახცომავ
Line of edition: 21    კვეცენ!

Line of edition: 22       მა̄რად აგის ლისედ ენცხე̄ნე. დედვ ი წიწლარ ერ დო̄მთე ათჩედა̄ნ,
Line of edition: 23    სგა ლახბე უშხვა̄რ ი ქა̄ფიშვდ ჲეზვთე. შიშდ იმხენი̄ღენა ანჴად
Line of edition: 24    ცხეკვ, ჟესკრეტე წიწლარს ი ადჲე მაგ ეშხუდ. უჩმი̄ნად ჟენკიდ
Line of edition: 25    ძვე̄რა, ფექა̄რ ტომარაჲ, ლჷჯე ი ეხჭამ ცხეკვს. ეჯნე̄მ ესფიქრე: ფექი̄
Line of edition: 26    ჩუ ლოქ ედძვე̄რი, ლჷჯე̄ჲ ჟენფი̄ნი ი მაგ ლეჩომ ეშხუდ ედჩმი̄ნი,
Line of edition: 27    მარა უჩმი̄ნა დე წიწლარს ეხბი̄შდამოშ ცხეკვს, დე ფექ ლეხსად
Line of edition: 28    ტომარა̄ჲსა. ჯეჲ ანტახ აგითე დაღონებულ.

Line of edition: 29       ანჴად ალე მა̄რე, ჟანხურჲელე ლჷგრალ ი ჟესსგუ̄რდა, ვითამ
Line of edition: 30    ჯეჲ ენკვიშე წიწლარს ჲეხვი ლიჴდა̄ლდ. ნებოზს ჲეხვი̄ ანჴად ი ჭაშს
Line of edition: 31    ლახტუ̄ლე: -- ყო̄რ ემკარ!

Line of edition: 32       მა̄რად ლიკროხე ედბინე.

Line of edition: 33       -- ყო̄რ ემკარ! -- ყუ̄ლდა ზურა̄ლ ი ღოშგინპილს, ჱრ მჵდ
Line of edition: 34    ოთკარე ყჵრ, სგა̄დკუშუ̄რე. ზურა̄ლდ ლიყუ̄ლი ოთბინე ჭაშს.
Line of edition: 35       -- მაჲ ლი ალე, იმ ხასყი, ჟანჴედ კალათხენჟი!

Line of edition: 36       მა̄რად ხე̄ქვე: -- კრუხ ი წიწლარ ცხეკვდ ემღე. მი ჟოსგუ
Line of edition: 37    ლჷგრალს ი ხვიკვშე წიწლარს. ჟანჴიდ იეხვემ ჭაშ ძალავშ კალათხენჟი.
Page of edition: 98  Line of edition: 1    მე̄რმა ლადეღ ჲეხვემ ჭაშ ლათი̄ჲთე ადზჷზე. ჭაშემ ხე̄ქვე: -- ე̄მა
Line of edition: 2    ემძი̄ჲნე სემი ქათალს: ეშხუს -- ხევსდ, მე̄რმა̄მ -- ლემაიდდ, მესმა̄მ
Line of edition: 3    -- ვახშამდ, ეჩქა ეჯი დაბს მი ეჲთი̄ჲნე თელდ. ჲეხვდ ჩოთჯირვე.
Line of edition: 4    აჩად ჭაშ დაბთე ი თელდ ლადეღ ხაგდჷდა ი სემი ქათალ ჩუ ლალე̄მ.
Line of edition: 5    ამჟი აჩად სემი̄ჲ ვო̄შთხვ ლადეღ. დაბ სერ ჩუ ლიყვნეს ხამურჯვდა.
Line of edition: 6    ეშხუ ლადეღ ჟანგა̄ნ ჲეხვ, ჟენდია̄ნე ჩა̄ჟ, სგა ლეჲქვე ჭყინტი ლერექვ
Line of edition: 7    ი აჩად მიჩა ჭაშთე. სგა ერ ლოხფე̄დვრე, ქა ლახტუ̄ლე:
Line of edition: 8       -- მჷთი̄ჲ, და̄რ ჯიწვაჲა̄ უჩმი̄ნა მეფე̄ გეზალ არი ლეგდ, ჲერვა̄ჲ
Line of edition: 9    უჩმი̄ნა ი̄რი, ეჩა ყვიჟე ლოქ ხა̄რ ხოჩა.

Line of edition: 10       უჩმი̄ნა ჩვედღურჲელა̄ნ, ერე მიჩ უჩმი̄ნა დო̄რ ხოწვა.

Line of edition: 11       ეჩქა ეჯნე̄მ ხე̄ქვე: -- ალეს ნებოზნუნ ე დოშ ახთი̄ჲნე̄ხი, ჩუ
Line of edition: 12    აჲდაგრი ი ისგვი ყვიჟეს ოთჴიდე მეფე̄ გეზალს ი აჩად.

Line of edition: 13       მა̄რას ჟახყალუ̄ნდა ი ნებოზნუნ ქა̄დგა̄თვე ლითი̄ჲ. ნებოზს ანჴად
Line of edition: 14    აგითე ი ჲეხვს ხე̄ქვე: დაბთე ხელმწიფი მა̄რე ანჴად ლადი ი
Line of edition: 15    ჩვემხუნა̄ლე: -- ნებოზნუნ ე ლოქ დოშ ახთი̄ნე დაბს, ეჩქა ჩუ ლოქ
Line of edition: 16    აჲძი̄ნე ი ისგვა ყვიჟას ლოქ ოთჴიდე მეფე̄ გეზალს. ჲეხვემ ჩვადწყნარე
Line of edition: 17    ჭაშ:
Line of edition: 18       -- ნუმა ჯაყლუ̄ნი, ჟი ეჲთია ი დე̄სმამ ჯაყლეხ.

Line of edition: 19       ეჯ ლადეღუნღო ალე ზურა̄ლა ჭაშ გუ̄ნ ამშაჲდა. ეშხუ მა̄რა̄სი
Line of edition: 20    მა̄ ხოწვა ალე მა̄რე ცუდდ ლუსგურ.

Line of edition: 21       ფექ ამე, გატარ ეჩე!


ელეონორა ონიანიი. ჟახუნდერი. მ. ქალდანი. 13. XI. 1971



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.