TITUS
Svan Prose Texts IV (Lashkh)
Part No. 104
Previous part

Text: 104 
Page of edition: 145 
Line of edition: 10 
XCIV. ლირი̄კანა̄ლ


Line of edition: 11    ლირე̄კანა̄ლს იშდრა̄ლხ მოკლასა̄ ლაშდიქ ბობშარ, ხოშე̄ლ დე̄მ
Line of edition: 12    იშდრა̄ლხ ალეს. აშ ჩი ლიშდრა̄ლდ ხოფშირა̄მინ ალ ლიშდრა̄ლს
Line of edition: 13    იშდრა̄ლხ ბობშარ: ეშხუ აგის ხაცყეხ წამს ი ეჯ წამმჷყ ჩუ იგნი ალ
Line of edition: 14    ლიშდრა̄ლი მჷბნე ბობშ, ეჩის შიდ ხოყდა̄ნა ეშხუ ალბი ნაჯვდი
Line of edition: 15    ნეცინ ფაუ̄ლ ი კამჷლი ნაჯვდი მე̄რმე ფაუ̄ლ, ხედისი̄ ხა̄ჲშხა
Line of edition: 16    რიკლერსგვენ ტოტისა ალბიან ფაუ ხოყდა̄ნა ლიშდრა̄ლა მჷბნა ბობშს ი
Line of edition: 17    ლერთენ ტოტისა ხოყდა̄ნა რიკ. ჟი იკედ რიკს, ხატსი ალ ჯო̄დი ფაუს
Line of edition: 18    ი ქა̄კვა̄ნე, მარა ხოცხა, ერე ხა̄ლმოშ ეშ ჯო̄დჲათე ადკვა̄რას. ეჩე ალ
Line of edition: 19    რიკ ხეკვეს ჟენჷრმას ფაყვშვ მე̄რმა მოშდრა̄ლ ბობშდ, ე მოშ ენჷრმნე
Line of edition: 20    ალ რიკს მე̄რმე ბობშ, ეჩქა ამშა მჷქაფ ქა ჴედნი ჩუ ლჷცი̄ყ წამთე
Line of edition: 21    ეჯი ი იბნე რიკი ლიკვა̄ნეს ი ჩუ ლუმურჯეი̄ ეჯ რიკი მჷრმი ბობშ
Line of edition: 22    ლი ი ქა̄ცა̄დი ალ მჷბნა ბობშს ი ეჩა მჷქაფ ჯეჲ იგნი წამმჷყ ი ჯეჲ
Line of edition: 23    აკვა̄ნე რიკს ი ალე ხეკვეს ირმჷდეს ფაყვშვ, იმჟი̄ ერე ჯეჲ ირმჷდა,
Line of edition: 24    მარა ე დოშ ირმჷნი, ალეი̄ ქე̄ნცა̄დი ი მჷბნე ალ ჯო̄დი ალბიან ფაუვშ
Line of edition: 25    ჟი იზმე გიმს რიკი ლაშყედნუნ ი ხე̄ქვნე, ერე 10 ფაუ ლოქ ახფასე̄ნა
Line of edition: 26    ი ჲეშდ ტიკ ლოქ ხო̄ზ ათხე. ჩვესგენი აჯაღუდ წამმჷყ, რიკს ცხაჲ
Line of edition: 27    ჟენკედ, იმე̄ჲ ხეკვა̄რა̄ნ, ი მახან ადკვა̄ნნე ფაუვშ წამხენქა, ე აჯაღ
Line of edition: 28    დოშ ენჷრმნე ფაყვშვ რიკს, აჯაღ ენზჷმნე ფაუვშ ი აჯაღ ლეხქემნი
Line of edition: 29    ტიკარჟი ტიკარ ი აჯაღ მჷსრე მჷბნეუდ ი̄რი ი ამჟი ედჯო̄დვნი ვოდ
Line of edition: 30    დო ენჷრმნე ფაყვშვ რიკს ი ვოდ დო ანცა̄დნე მჷბნას ი ვოდ ჯეჲ
Line of edition: 31    დო ესგენი წამმჷყ. ეშხუ რიგი ლირი̄კანა̄ლ ლი ამკალიბ, მარა აჯაღ
Line of edition: 32    მე̄რმა რიგი ლირი̄კანა̄ლსუდ იშდრა̄ლხ ბობშარ, ხოშე̄ლე უნჩჷდა̄ლად.
Line of edition: 33    ლირი̄კანა̄ლს იშდრა̄ლხ ლუფხვისა, ლუნთისა და̄რ იშდრა̄ლ
Line of edition: 34    ალეს, ეჯღა ერე მჷცხი̄სა დეშ იჩმი̄ნი ამშა ლიშდრა̄ლ.

Page of edition: 146 
Line of edition: 1       მე̄რმეკალიბ ლირი̄კანა̄ლ ლი ამჟი: წამმჷყ ხაჭდეხ მე̄რმა ფაუ̄ლს
Line of edition: 2    ი რიკს ერ ადკვა̄ნნე წამმჷყ მერდე, ხეკვეს ახფუშვდის წამმჷყ
Line of edition: 3    ლჷჭი̄დ ფაუ̄ლს ეჯ რიკ რიკი მჷრმიდ ი ქა ე ათქადნე ალ ფაუ̄ლს,
Line of edition: 4    მაჲზუმსი̄ ათქადნე, ეჯი ხეკვეს ენზჷმას წამმჷყ მერდად ი მუფე̄შვდანა̄ლ
Line of edition: 5    ვოდ ფაუს დო ადკა̄ფნე წამჟი ლჷჭი̄დს, ეჩქად მა̄ ლი ლუმურჯე ი
Line of edition: 6    ხეკვეს ხეფე̄შვდანა̄ლდეს ეჩქად, ვოდ ფაუ̄ლს დო ხო̄ჲხენი ნაფიშვდ
Line of edition: 7    რიკ. ფაუს ერ ხო̄ჲხენი ნაფიშვდ რიკ ი ფაუ̄ლ ერ ჩვედკა̄ფი, ეჩქა
Line of edition: 8    ლუმურჯე ხა̄რ ი ქა იცა̄დი ი მე̄რმე ბობშ ედგენი ეჩა ადგილჟი ი ამჟი
Line of edition: 9    ენხირსიხ ქა მაგ მოშდრა̄ლ ბობშარ. ალ ლიშდრა̄ლარს ლირი̄კანა̄ლეშს
Line of edition: 10    მე̄ვარ ლუნდვნად ი გუშალიანდ იშდრა̄ლხ ბობშარ ი ტიკი
Line of edition: 11    ლიდე̄სს მე̄ვარ ხერი̄და̄ლხ, ხოშგურხ, ერე ლარი̄კანა̄ლჟი ტიკარ ლოქ
Line of edition: 12    ითხეხ, სერ ლოქ დე̄სამა. საყდურს მე̄ვარ ისდიკა̄ლ მაგ ი ძღჷდ
Line of edition: 13    შგურ ხაბჟახ საყდური ლი̄ქვი̄ს. ხვა̄ჲდინ ლარი̄კანა̄ლჟი ლიცვა̄ლჲელ
Line of edition: 14    ხოჩჷ̄დნიხ ბობშარს ი ლეზვენიდ ჴედნიხ ხოშე̄ლეშ, ქა ხესყვედურხ,
Line of edition: 15    ჲერვა̄ჲს ერ ტიკარ ხედიხ ლარი̄კანა̄ლჟი, ი საყდურ დაგრაშა̄ლ ხაძნელ
Line of edition: 16    ჩი̄ს მუშვან მა̄რას, საყდური ლა̄ქვი̄სჟი ხვა̄ჲდინ დაგრობ ხაჩჷ̄დე̄ნახ
Line of edition: 17    მოშდრა̄ლ ბობშარს ცხაჲ მა̄დე, მარა -- ხოშე̄ლს. ამჟი ხაზნახ არაკი
Line of edition: 18    ლი̄ქვი̄ს, ერე "საყდურს ლოქ ნაყირ ხოჩა, ნაყირ ქა ლოქ ხეჟგი მა̄რას,
Line of edition: 19    საყდურ ლოქ ქა დე̄მ ხეჟგი ი თელდ მიჩა გვარს ი ჯილაგს ლოქ
Line of edition: 20    ხოსდენი ივალადღიშდ". ამღა ლი, ერე თელდ ლემშვანჲერას საყდური
Line of edition: 21    ლისყვედურ მე̄ვარ ხაძნელ ი ხოკვიბ, ერე დო̄სა ესსეს ქა
Line of edition: 22    ნასყვედურ ამბავ მიჩ ი მიჩა ჯილაგს ამანღო̄ნაშდ ქა უჟგენად.


ა. ონიანი. 31. VIII. 1958



Next part


This text is part of the TITUS edition of Svan Prose Texts IV (Lashkh).

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.